𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 𑍭𑍭 – 𑌜𑌰𑌾𑌸𑌂𑌧𑌾𑌦𑌿𑌭𑌿𑌃 𑌸𑌹 𑌯𑍁𑌦𑍍𑌧𑌮𑍍

𑌸𑍈𑌰𑌂𑌧𑍍𑌰𑍍𑌯𑌾𑌸𑍍𑌤𑌦𑌨𑍁 𑌚𑌿𑌰𑌂 𑌸𑍍𑌮𑌰𑌾𑌤𑍁𑌰𑌾𑌯𑌾
𑌯𑌾𑌤𑍋𑌽𑌭𑍂𑌃 𑌸𑍁𑌲𑌲𑌿𑌤𑌮𑍁𑌦𑍍𑌧𑌵𑍇𑌨 𑌸𑌾𑌰𑍍𑌧𑌮𑍍 ।
𑌆𑌵𑌾𑌸𑌂 𑌤𑍍𑌵𑌦𑍁𑌪𑌗𑌮𑍋𑌤𑍍𑌸𑌵𑌂 𑌸𑌦𑍈𑌵
𑌧𑍍𑌯𑌾𑌯𑌂𑌤𑍍𑌯𑌾𑌃 𑌪𑍍𑌰𑌤𑌿𑌦𑌿𑌨𑌵𑌾𑌸𑌸𑌜𑍍𑌜𑌿𑌕𑌾𑌯𑌾𑌃 ॥1॥

𑌉𑌪𑌗𑌤𑍇 𑌤𑍍𑌵𑌯𑌿 𑌪𑍂𑌰𑍍𑌣𑌮𑌨𑍋𑌰𑌥𑌾𑌂 𑌪𑍍𑌰𑌮𑌦𑌸𑌂𑌭𑍍𑌰𑌮𑌕𑌂𑌪𑍍𑌰𑌪𑌯𑍋𑌧𑌰𑌾𑌮𑍍 ।
𑌵𑌿𑌵𑌿𑌧𑌮𑌾𑌨𑌨𑌮𑌾𑌦𑌧𑌤𑍀𑌂 𑌮𑍁𑌦𑌾 𑌰𑌹𑌸𑌿 𑌤𑌾𑌂 𑌰𑌮𑌯𑌾𑌂𑌚𑌕𑍃𑌷𑍇 𑌸𑍁𑌖𑌮𑍍 ॥2॥

𑌪𑍃𑌷𑍍𑌟𑌾 𑌵𑌰𑌂 𑌪𑍁𑌨𑌰𑌸𑌾𑌵𑌵𑍃𑌣𑍋𑌦𑍍𑌵𑌰𑌾𑌕𑍀
𑌭𑍂𑌯𑌸𑍍𑌤𑍍𑌵𑌯𑌾 𑌸𑍁𑌰𑌤𑌮𑍇𑌵 𑌨𑌿𑌶𑌾𑌂𑌤𑌰𑍇𑌷𑍁 ।
𑌸𑌾𑌯𑍁𑌜𑍍𑌯𑌮𑌸𑍍𑌤𑍍𑌵𑌿𑌤𑌿 𑌵𑌦𑍇𑌤𑍍 𑌬𑍁𑌧 𑌏𑌵 𑌕𑌾𑌮𑌂
𑌸𑌾𑌮𑍀𑌪𑍍𑌯𑌮𑌸𑍍𑌤𑍍𑌵𑌨𑌿𑌶𑌮𑌿𑌤𑍍𑌯𑌪𑌿 𑌨𑌾𑌬𑍍𑌰𑌵𑍀𑌤𑍍 𑌕𑌿𑌮𑍍 ॥3॥

𑌤𑌤𑍋 𑌭𑌵𑌾𑌨𑍍 𑌦𑍇𑌵 𑌨𑌿𑌶𑌾𑌸𑍁 𑌕𑌾𑌸𑍁𑌚𑌿𑌨𑍍𑌮𑍃𑌗𑍀𑌦𑍃𑌶𑌂 𑌤𑌾𑌂 𑌨𑌿𑌭𑍃𑌤𑌂 𑌵𑌿𑌨𑍋𑌦𑌯𑌨𑍍 ।
𑌅𑌦𑌾𑌦𑍁𑌪𑌶𑍍𑌲𑍋𑌕 𑌇𑌤𑌿 𑌶𑍍𑌰𑍁𑌤𑌂 𑌸𑍁𑌤𑌂 𑌸 𑌨𑌾𑌰𑌦𑌾𑌤𑍍 𑌸𑌾𑌤𑍍𑌤𑍍𑌵𑌤𑌤𑌂𑌤𑍍𑌰𑌵𑌿𑌦𑍍𑌬𑌬𑌭𑍌 ॥4॥

𑌅𑌕𑍍𑌰𑍂𑌰𑌮𑌂𑌦𑌿𑌰𑌮𑌿𑌤𑍋𑌽𑌥 𑌬𑌲𑍋𑌦𑍍𑌧𑌵𑌾𑌭𑍍𑌯𑌾-
𑌮𑌭𑍍𑌯𑌰𑍍𑌚𑌿𑌤𑍋 𑌬𑌹𑍁 𑌨𑍁𑌤𑍋 𑌮𑍁𑌦𑌿𑌤𑍇𑌨 𑌤𑍇𑌨 ।
𑌏𑌨𑌂 𑌵𑌿𑌸𑍃𑌜𑍍𑌯 𑌵𑌿𑌪𑌿𑌨𑌾𑌗𑌤𑌪𑌾𑌂𑌡𑌵𑍇𑌯-
𑌵𑍃𑌤𑍍𑌤𑌂 𑌵𑌿𑌵𑍇𑌦𑌿𑌥 𑌤𑌥𑌾 𑌧𑍃𑌤𑌰𑌾𑌷𑍍𑌟𑍍𑌰𑍍𑌚𑍇𑌷𑍍𑌟𑌾𑌮𑍍 ॥5॥

𑌵𑌿𑌘𑌾𑌤𑌾𑌜𑍍𑌜𑌾𑌮𑌾𑌤𑍁𑌃 𑌪𑌰𑌮𑌸𑍁𑌹𑍃𑌦𑍋 𑌭𑍋𑌜𑌨𑍃𑌪𑌤𑍇-
𑌰𑍍𑌜𑌰𑌾𑌸𑌂𑌧𑍇 𑌰𑍁𑌂𑌧𑌤𑍍𑌯𑌨𑌵𑌧𑌿𑌰𑍁𑌷𑌾𑌂𑌧𑍇𑌽𑌥 𑌮𑌥𑍁𑌰𑌾𑌮𑍍 ।
𑌰𑌥𑌾𑌦𑍍𑌯𑍈𑌰𑍍𑌦𑍍𑌯𑍋𑌰𑍍𑌲𑌬𑍍𑌧𑍈𑌃 𑌕𑌤𑌿𑌪𑌯𑌬𑌲𑌸𑍍𑌤𑍍𑌵𑌂 𑌬𑌲𑌯𑍁𑌤-
𑌸𑍍𑌤𑍍𑌰𑌯𑍋𑌵𑌿𑌂𑌶𑌤𑍍𑌯𑌕𑍍𑌷𑍌𑌹𑌿𑌣𑌿 𑌤𑌦𑍁𑌪𑌨𑍀𑌤𑌂 𑌸𑌮𑌹𑍃𑌥𑌾𑌃 ॥6॥

𑌬𑌦𑍍𑌧𑌂 𑌬𑌲𑌾𑌦𑌥 𑌬𑌲𑍇𑌨 𑌬𑌲𑍋𑌤𑍍𑌤𑌰𑌂 𑌤𑍍𑌵𑌂
𑌭𑍂𑌯𑍋 𑌬𑌲𑍋𑌦𑍍𑌯𑌮𑌰𑌸𑍇𑌨 𑌮𑍁𑌮𑍋𑌚𑌿𑌥𑍈𑌨𑌮𑍍 ।
𑌨𑌿𑌶𑍍𑌶𑍇𑌷𑌦𑌿𑌗𑍍𑌜𑌯𑌸𑌮𑌾𑌹𑍃𑌤𑌵𑌿𑌶𑍍𑌵𑌸𑍈𑌨𑍍𑌯𑌾𑌤𑍍
𑌕𑍋𑌽𑌨𑍍𑌯𑌸𑍍𑌤𑌤𑍋 𑌹𑌿 𑌬𑌲𑌪𑍌𑌰𑍁𑌷𑌵𑌾𑌂𑌸𑍍𑌤𑌦𑌾𑌨𑍀𑌮𑍍 ॥𑍭॥

𑌭𑌗𑍍𑌨𑌃 𑌸 𑌲𑌗𑍍𑌨𑌹𑍃𑌦𑌯𑍋𑌽𑌪𑌿 𑌨𑍃𑌪𑍈𑌃 𑌪𑍍𑌰𑌣𑍁𑌨𑍍𑌨𑍋
𑌯𑍁𑌦𑍍𑌧𑌂 𑌤𑍍𑌵𑌯𑌾 𑌵𑍍𑌯𑌧𑌿𑌤 𑌷𑍋𑌡𑌶𑌕𑍃𑌤𑍍𑌵 𑌏𑌵𑌮𑍍 ।
𑌅𑌕𑍍𑌷𑍌𑌹𑌿𑌣𑍀𑌃 𑌶𑌿𑌵 𑌶𑌿𑌵𑌾𑌸𑍍𑌯 𑌜𑌘𑌂𑌥 𑌵𑌿𑌷𑍍𑌣𑍋
𑌸𑌂𑌭𑍂𑌯 𑌸𑍈𑌕𑌨𑌵𑌤𑌿𑌤𑍍𑌰𑌿𑌶𑌤𑌂 𑌤𑌦𑌾𑌨𑍀𑌮𑍍 ॥𑍮॥

𑌅𑌷𑍍𑌟𑌾𑌦𑌶𑍇𑌽𑌸𑍍𑌯 𑌸𑌮𑌰𑍇 𑌸𑌮𑍁𑌪𑍇𑌯𑍁𑌷𑌿 𑌤𑍍𑌵𑌂
𑌦𑍃𑌷𑍍𑌟𑍍𑌵𑌾 𑌪𑍁𑌰𑍋𑌽𑌥 𑌯𑌵𑌨𑌂 𑌯𑌵𑌨𑌤𑍍𑌰𑌿𑌕𑍋𑌟𑍍𑌯𑌾 ।
𑌤𑍍𑌵𑌷𑍍𑌟𑍍𑌰𑌾 𑌵𑌿𑌧𑌾𑌪𑍍𑌯 𑌪𑍁𑌰𑌮𑌾𑌶𑍁 𑌪𑌯𑍋𑌧𑌿𑌮𑌧𑍍𑌯𑍇
𑌤𑌤𑍍𑌰𑌾𑌽𑌥 𑌯𑍋𑌗𑌬𑌲𑌤𑌃 𑌸𑍍𑌵𑌜𑌨𑌾𑌨𑌨𑍈𑌷𑍀𑌃 ॥𑍯॥

𑌪𑌦𑌭𑍍𑌯𑌾𑌂 𑌤𑍍𑌵𑌾𑌂 𑌪𑌦𑍍𑌮𑌮𑌾𑌲𑍀 𑌚𑌕𑌿𑌤 𑌇𑌵 𑌪𑍁𑌰𑌾𑌨𑍍𑌨𑌿𑌰𑍍𑌗𑌤𑍋 𑌧𑌾𑌵𑌮𑌾𑌨𑍋
𑌮𑍍𑌲𑍇𑌚𑍍𑌛𑍇𑌶𑍇𑌨𑌾𑌨𑍁𑌯𑌾𑌤𑍋 𑌵𑌧𑌸𑍁𑌕𑍃𑌤𑌵𑌿𑌹𑍀𑌨𑍇𑌨 𑌶𑍈𑌲𑍇 𑌨𑍍𑌯𑌲𑍈𑌷𑍀𑌃 ।
𑌸𑍁𑌪𑍍𑌤𑍇𑌨𑌾𑌂𑌘𑍍𑌰𑍍𑌯𑌾𑌹𑌤𑍇𑌨 𑌦𑍍𑌰𑍁𑌤𑌮𑌥 𑌮𑍁𑌚𑍁𑌕𑍁𑌂𑌦𑍇𑌨 𑌭𑌸𑍍𑌮𑍀𑌕𑍃𑌤𑍇𑌽𑌸𑍍𑌮𑌿𑌨𑍍
𑌭𑍂𑌪𑌾𑌯𑌾𑌸𑍍𑌮𑍈 𑌗𑍁𑌹𑌾𑌂𑌤𑍇 𑌸𑍁𑌲𑌲𑌿𑌤𑌵𑌪𑍁𑌷𑌾 𑌤𑌸𑍍𑌥𑌿𑌷𑍇 𑌭𑌕𑍍𑌤𑌿𑌭𑌾𑌜𑍇 ॥10॥

𑌐𑌕𑍍𑌷𑍍𑌵𑌾𑌕𑍋𑌽𑌹𑌂 𑌵𑌿𑌰𑌕𑍍𑌤𑍋𑌽𑌸𑍍𑌮𑍍𑌯𑌖𑌿𑌲𑌨𑍃𑌪𑌸𑍁𑌖𑍇 𑌤𑍍𑌵𑌤𑍍𑌪𑍍𑌰𑌸𑌾𑌦𑍈𑌕𑌕𑌾𑌂𑌕𑍍𑌷𑍀
𑌹𑌾 𑌦𑍇𑌵𑍇𑌤𑌿 𑌸𑍍𑌤𑍁𑌵𑌂𑌤𑌂 𑌵𑌰𑌵𑌿𑌤𑌤𑌿𑌷𑍁 𑌤𑌂 𑌨𑌿𑌸𑍍𑌪𑍃𑌹𑌂 𑌵𑍀𑌕𑍍𑌷𑍍𑌯 𑌹𑍃𑌷𑍍𑌯𑌨𑍍 ।
𑌮𑍁𑌕𑍍𑌤𑍇𑌸𑍍𑌤𑍁𑌲𑍍𑌯𑌾𑌂 𑌚 𑌭𑌕𑍍𑌤𑌿𑌂 𑌧𑍁𑌤𑌸𑌕𑌲𑌮𑌲𑌾𑌂 𑌮𑍋𑌕𑍍𑌷𑌮𑌪𑍍𑌯𑌾𑌶𑍁 𑌦𑌤𑍍𑌵𑌾
𑌕𑌾𑌰𑍍𑌯𑌂 𑌹𑌿𑌂𑌸𑌾𑌵𑌿𑌶𑍁𑌦𑍍𑌧𑍍𑌯𑍈 𑌤𑌪 𑌇𑌤𑌿 𑌚 𑌤𑌦𑌾 𑌪𑍍𑌰𑌾𑌤𑍍𑌥 𑌲𑍋𑌕𑌪𑍍𑌰𑌤𑍀𑌤𑍍𑌯𑍈 ॥11॥

𑌤𑌦𑌨𑍁 𑌮𑌥𑍁𑌰𑌾𑌂 𑌗𑌤𑍍𑌵𑌾 𑌹𑌤𑍍𑌵𑌾 𑌚𑌮𑍂𑌂 𑌯𑌵𑌨𑌾𑌹𑍃𑌤𑌾𑌂
𑌮𑌗𑌧𑌪𑌤𑌿𑌨𑌾 𑌮𑌾𑌰𑍍𑌗𑍇 𑌸𑍈𑌨𑍍𑌯𑍈𑌃 𑌪𑍁𑌰𑍇𑌵 𑌨𑌿𑌵𑌾𑌰𑌿𑌤𑌃 ।
𑌚𑌰𑌮𑌵𑌿𑌜𑌯𑌂 𑌦𑌰𑍍𑌪𑌾𑌯𑌾𑌸𑍍𑌮𑍈 𑌪𑍍𑌰𑌦𑌾𑌯 𑌪𑌲𑌾𑌯𑌿𑌤𑍋
𑌜𑌲𑌧𑌿𑌨𑌗𑌰𑍀𑌂 𑌯𑌾𑌤𑍋 𑌵𑌾𑌤𑌾𑌲𑌯𑍇𑌶𑍍𑌵𑌰 𑌪𑌾𑌹𑌿 𑌮𑌾𑌮𑍍 ॥12॥