𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 𑍭6 – 𑌉𑌦𑍍𑌧𑌵𑌦𑍌𑌤𑍍𑌯𑌮𑍍

𑌗𑌤𑍍𑌵𑌾 𑌸𑌾𑌂𑌦𑍀𑌪𑌨𑌿𑌮𑌥 𑌚𑌤𑍁𑌷𑍍𑌷𑌷𑍍𑌟𑌿𑌮𑌾𑌤𑍍𑌰𑍈𑌰𑌹𑍋𑌭𑌿𑌃
𑌸𑌰𑍍𑌵𑌜𑍍𑌞𑌸𑍍𑌤𑍍𑌵𑌂 𑌸𑌹 𑌮𑍁𑌸𑌲𑌿𑌨𑌾 𑌸𑌰𑍍𑌵𑌵𑌿𑌦𑍍𑌯𑌾 𑌗𑍃𑌹𑍀𑌤𑍍𑌵𑌾 ।
𑌪𑍁𑌤𑍍𑌰𑌂 𑌨𑌷𑍍𑌟𑌂 𑌯𑌮𑌨𑌿𑌲𑌯𑌨𑌾𑌦𑌾𑌹𑍃𑌤𑌂 𑌦𑌕𑍍𑌷𑌿𑌣𑌾𑌰𑍍𑌥𑌂
𑌦𑌤𑍍𑌵𑌾 𑌤𑌸𑍍𑌮𑍈 𑌨𑌿𑌜𑌪𑍁𑌰𑌮𑌗𑌾 𑌨𑌾𑌦𑌯𑌨𑍍 𑌪𑌾𑌂𑌚𑌜𑌨𑍍𑌯𑌮𑍍 ॥1॥

𑌸𑍍𑌮𑍃𑌤𑍍𑌵𑌾 𑌸𑍍𑌮𑍃𑌤𑍍𑌵𑌾 𑌪𑌶𑍁𑌪𑌸𑍁𑌦𑍃𑌶𑌃 𑌪𑍍𑌰𑍇𑌮𑌭𑌾𑌰𑌪𑍍𑌰𑌣𑍁𑌨𑍍𑌨𑌾𑌃
𑌕𑌾𑌰𑍁𑌣𑍍𑌯𑍇𑌨 𑌤𑍍𑌵𑌮𑌪𑌿 𑌵𑌿𑌵𑌶𑌃 𑌪𑍍𑌰𑌾𑌹𑌿𑌣𑍋𑌰𑍁𑌦𑍍𑌧𑌵𑌂 𑌤𑌮𑍍 ।
𑌕𑌿𑌂𑌚𑌾𑌮𑍁𑌷𑍍𑌮𑍈 𑌪𑌰𑌮𑌸𑍁𑌹𑍃𑌦𑍇 𑌭𑌕𑍍𑌤𑌵𑌰𑍍𑌯𑌾𑌯 𑌤𑌾𑌸𑌾𑌂
𑌭𑌕𑍍𑌤𑍍𑌯𑍁𑌦𑍍𑌰𑍇𑌕𑌂 𑌸𑌕𑌲𑌭𑍁𑌵𑌨𑍇 𑌦𑍁𑌰𑍍𑌲𑌭𑌂 𑌦𑌰𑍍𑌶𑌯𑌿𑌷𑍍𑌯𑌨𑍍 ॥2॥

𑌤𑍍𑌵𑌨𑍍𑌮𑌾𑌹𑌾𑌤𑍍𑌮𑍍𑌯𑌪𑍍𑌰𑌥𑌿𑌮𑌪𑌿𑌶𑍁𑌨𑌂 𑌗𑍋𑌕𑍁𑌲𑌂 𑌪𑍍𑌰𑌾𑌪𑍍𑌯 𑌸𑌾𑌯𑌂
𑌤𑍍𑌵𑌦𑍍𑌵𑌾𑌰𑍍𑌤𑌾𑌭𑌿𑌰𑍍𑌬𑌹𑍁 𑌸 𑌰𑌮𑌯𑌾𑌮𑌾𑌸 𑌨𑌂𑌦𑌂 𑌯𑌶𑍋𑌦𑌾𑌮𑍍 ।
𑌪𑍍𑌰𑌾𑌤𑌰𑍍𑌦𑍍𑌦𑍃𑌷𑍍𑌟𑍍𑌵𑌾 𑌮𑌣𑌿𑌮𑌯𑌰𑌥𑌂 𑌶𑌂𑌕𑌿𑌤𑌾𑌃 𑌪𑌂𑌕𑌜𑌾𑌕𑍍𑌷𑍍𑌯𑌃
𑌶𑍍𑌰𑍁𑌤𑍍𑌵𑌾 𑌪𑍍𑌰𑌾𑌪𑍍𑌤𑌂 𑌭𑌵𑌦𑌨𑍁𑌚𑌰𑌂 𑌤𑍍𑌯𑌕𑍍𑌤𑌕𑌾𑌰𑍍𑌯𑌾𑌃 𑌸𑌮𑍀𑌯𑍁𑌃 ॥3॥

𑌦𑍃𑌷𑍍𑌟𑍍𑌵𑌾 𑌚𑍈𑌨𑌂 𑌤𑍍𑌵𑌦𑍁𑌪𑌮𑌲𑌸𑌦𑍍𑌵𑍇𑌷𑌭𑍂𑌷𑌾𑌭𑌿𑌰𑌾𑌮𑌂
𑌸𑍍𑌮𑍃𑌤𑍍𑌵𑌾 𑌸𑍍𑌮𑍃𑌤𑍍𑌵𑌾 𑌤𑌵 𑌵𑌿𑌲𑌸𑌿𑌤𑌾𑌨𑍍𑌯𑍁𑌚𑍍𑌚𑌕𑍈𑌸𑍍𑌤𑌾𑌨𑌿 𑌤𑌾𑌨𑌿 ।
𑌰𑍁𑌦𑍍𑌧𑌾𑌲𑌾𑌪𑌾𑌃 𑌕𑌥𑌮𑌪𑌿 𑌪𑍁𑌨𑌰𑍍𑌗𑌦𑍍𑌗𑌦𑌾𑌂 𑌵𑌾𑌚𑌮𑍂𑌚𑍁𑌃
𑌸𑍌𑌜𑌨𑍍𑌯𑌾𑌦𑍀𑌨𑍍 𑌨𑌿𑌜𑌪𑌰𑌭𑌿𑌦𑌾𑌮𑌪𑍍𑌯𑌲𑌂 𑌵𑌿𑌸𑍍𑌮𑌰𑌂𑌤𑍍𑌯𑌃 ॥4॥

𑌶𑍍𑌰𑍀𑌮𑌾𑌨𑍍 𑌕𑌿𑌂 𑌤𑍍𑌵𑌂 𑌪𑌿𑌤𑍃𑌜𑌨𑌕𑍃𑌤𑍇 𑌪𑍍𑌰𑍇𑌷𑌿𑌤𑍋 𑌨𑌿𑌰𑍍𑌦𑌯𑍇𑌨
𑌕𑍍𑌵𑌾𑌸𑍌 𑌕𑌾𑌂𑌤𑍋 𑌨𑌗𑌰𑌸𑍁𑌦𑍃𑌶𑌾𑌂 𑌹𑌾 𑌹𑌰𑍇 𑌨𑌾𑌥 𑌪𑌾𑌯𑌾𑌃 ।
𑌆𑌶𑍍𑌲𑍇𑌷𑌾𑌣𑌾𑌮𑌮𑍃𑌤𑌵𑌪𑍁𑌷𑍋 𑌹𑌂𑌤 𑌤𑍇 𑌚𑍁𑌂𑌬𑌨𑌾𑌨𑌾-
𑌮𑍁𑌨𑍍𑌮𑌾𑌦𑌾𑌨𑌾𑌂 𑌕𑍁𑌹𑌕𑌵𑌚𑌸𑌾𑌂 𑌵𑌿𑌸𑍍𑌮𑌰𑍇𑌤𑍍 𑌕𑌾𑌂𑌤 𑌕𑌾 𑌵𑌾 ॥5॥

𑌰𑌾𑌸𑌕𑍍𑌰𑍀𑌡𑌾𑌲𑍁𑌲𑌿𑌤𑌲𑌲𑌿𑌤𑌂 𑌵𑌿𑌶𑍍𑌲𑌥𑌤𑍍𑌕𑍇𑌶𑌪𑌾𑌶𑌂
𑌮𑌂𑌦𑍋𑌦𑍍𑌭𑌿𑌨𑍍𑌨𑌶𑍍𑌰𑌮𑌜𑌲𑌕𑌣𑌂 𑌲𑍋𑌭𑌨𑍀𑌯𑌂 𑌤𑍍𑌵𑌦𑌂𑌗𑌮𑍍 ।
𑌕𑌾𑌰𑍁𑌣𑍍𑌯𑌾𑌬𑍍𑌧𑍇 𑌸𑌕𑍃𑌦𑌪𑌿 𑌸𑌮𑌾𑌲𑌿𑌂𑌗𑌿𑌤𑍁𑌂 𑌦𑌰𑍍𑌶𑌯𑍇𑌤𑌿
𑌪𑍍𑌰𑍇𑌮𑍋𑌨𑍍𑌮𑌾𑌦𑌾𑌦𑍍𑌭𑍁𑌵𑌨𑌮𑌦𑌨 𑌤𑍍𑌵𑌤𑍍𑌪𑍍𑌰𑌿𑌯𑌾𑌸𑍍𑌤𑍍𑌵𑌾𑌂 𑌵𑌿𑌲𑍇𑌪𑍁𑌃 ॥6॥

𑌏𑌵𑌂𑌪𑍍𑌰𑌾𑌯𑍈𑌰𑍍𑌵𑌿𑌵𑌶𑌵𑌚𑌨𑍈𑌰𑌾𑌕𑍁𑌲𑌾 𑌗𑍋𑌪𑌿𑌕𑌾𑌸𑍍𑌤𑌾-
𑌸𑍍𑌤𑍍𑌵𑌤𑍍𑌸𑌂𑌦𑍇𑌶𑍈𑌃 𑌪𑍍𑌰𑌕𑍃𑌤𑌿𑌮𑌨𑌯𑌤𑍍 𑌸𑍋𑌽𑌥 𑌵𑌿𑌜𑍍𑌞𑌾𑌨𑌗𑌰𑍍𑌭𑍈𑌃 ।
𑌭𑍂𑌯𑌸𑍍𑌤𑌾𑌭𑌿𑌰𑍍𑌮𑍁𑌦𑌿𑌤𑌮𑌤𑌿𑌭𑌿𑌸𑍍𑌤𑍍𑌵𑌨𑍍𑌮𑌯𑍀𑌭𑌿𑌰𑍍𑌵𑌧𑍂𑌭𑌿-
𑌸𑍍𑌤𑌤𑍍𑌤𑌦𑍍𑌵𑌾𑌰𑍍𑌤𑌾𑌸𑌰𑌸𑌮𑌨𑌯𑌤𑍍 𑌕𑌾𑌨𑌿𑌚𑌿𑌦𑍍𑌵𑌾𑌸𑌰𑌾𑌣𑌿 ॥𑍭॥

𑌤𑍍𑌵𑌤𑍍𑌪𑍍𑌰𑍋𑌦𑍍𑌗𑌾𑌨𑍈𑌃 𑌸𑌹𑌿𑌤𑌮𑌨𑌿𑌶𑌂 𑌸𑌰𑍍𑌵𑌤𑍋 𑌗𑍇𑌹𑌕𑍃𑌤𑍍𑌯𑌂
𑌤𑍍𑌵𑌦𑍍𑌵𑌾𑌰𑍍𑌤𑍈𑌵 𑌪𑍍𑌰𑌸𑌰𑌤𑌿 𑌮𑌿𑌥𑌃 𑌸𑍈𑌵 𑌚𑍋𑌤𑍍𑌸𑍍𑌵𑌾𑌪𑌲𑌾𑌪𑌾𑌃 ।
𑌚𑍇𑌷𑍍𑌟𑌾𑌃 𑌪𑍍𑌰𑌾𑌯𑌸𑍍𑌤𑍍𑌵𑌦𑌨𑍁𑌕𑍃𑌤𑌯𑌸𑍍𑌤𑍍𑌵𑌨𑍍𑌮𑌯𑌂 𑌸𑌰𑍍𑌵𑌮𑍇𑌵𑌂
𑌦𑍃𑌷𑍍𑌟𑍍𑌵𑌾 𑌤𑌤𑍍𑌰 𑌵𑍍𑌯𑌮𑍁𑌹𑌦𑌧𑌿𑌕𑌂 𑌵𑌿𑌸𑍍𑌮𑌯𑌾𑌦𑍁𑌦𑍍𑌧𑌵𑍋𑌽𑌯𑌮𑍍 ॥𑍮॥

𑌰𑌾𑌧𑌾𑌯𑌾 𑌮𑍇 𑌪𑍍𑌰𑌿𑌯𑌤𑌮𑌮𑌿𑌦𑌂 𑌮𑌤𑍍𑌪𑍍𑌰𑌿𑌯𑍈𑌵𑌂 𑌬𑍍𑌰𑌵𑍀𑌤𑌿
𑌤𑍍𑌵𑌂 𑌕𑌿𑌂 𑌮𑍌𑌨𑌂 𑌕𑌲𑌯𑌸𑌿 𑌸𑌖𑍇 𑌮𑌾𑌨𑌿𑌨𑍀𑌮𑌤𑍍𑌪𑍍𑌰𑌿𑌯𑍇𑌵।
𑌇𑌤𑍍𑌯𑌾𑌦𑍍𑌯𑍇𑌵 𑌪𑍍𑌰𑌵𑌦𑌤𑌿 𑌸𑌖𑌿 𑌤𑍍𑌵𑌤𑍍𑌪𑍍𑌰𑌿𑌯𑍋 𑌨𑌿𑌰𑍍𑌜𑌨𑍇 𑌮𑌾-
𑌮𑌿𑌤𑍍𑌥𑌂𑌵𑌾𑌦𑍈𑌰𑌰𑌮𑌦𑌯𑌂 𑌤𑍍𑌵𑌤𑍍𑌪𑍍𑌰𑌿𑌯𑌾𑌮𑍁𑌤𑍍𑌪𑌲𑌾𑌕𑍍𑌷𑍀𑌮𑍍 ॥𑍯॥

𑌏𑌷𑍍𑌯𑌾𑌮𑌿 𑌦𑍍𑌰𑌾𑌗𑌨𑍁𑌪𑌗𑌮𑌨𑌂 𑌕𑍇𑌵𑌲𑌂 𑌕𑌾𑌰𑍍𑌯𑌭𑌾𑌰𑌾-
𑌦𑍍𑌵𑌿𑌶𑍍𑌲𑍇𑌷𑍇𑌽𑌪𑌿 𑌸𑍍𑌮𑌰𑌣𑌦𑍃𑌢𑌤𑌾𑌸𑌂𑌭𑌵𑌾𑌨𑍍𑌮𑌾𑌸𑍍𑌤𑍁 𑌖𑍇𑌦𑌃 ।
𑌬𑍍𑌰𑌹𑍍𑌮𑌾𑌨𑌂𑌦𑍇 𑌮𑌿𑌲𑌤𑌿 𑌨𑌚𑌿𑌰𑌾𑌤𑍍 𑌸𑌂𑌗𑌮𑍋 𑌵𑌾 𑌵𑌿𑌯𑍋𑌗-
𑌸𑍍𑌤𑍁𑌲𑍍𑌯𑍋 𑌵𑌃 𑌸𑍍𑌯𑌾𑌦𑌿𑌤𑌿 𑌤𑌵 𑌗𑌿𑌰𑌾 𑌸𑍋𑌽𑌕𑌰𑍋𑌨𑍍𑌨𑌿𑌰𑍍𑌵𑍍𑌯𑌥𑌾𑌸𑍍𑌤𑌾𑌃 ॥10॥

𑌏𑌵𑌂 𑌭𑌕𑍍𑌤𑌿 𑌸𑌕𑌲𑌭𑍁𑌵𑌨𑍇 𑌨𑍇𑌕𑍍𑌷𑌿𑌤𑌾 𑌨 𑌶𑍍𑌰𑍁𑌤𑌾 𑌵𑌾
𑌕𑌿𑌂 𑌶𑌾𑌸𑍍𑌤𑍍𑌰𑍌𑌘𑍈𑌃 𑌕𑌿𑌮𑌿𑌹 𑌤𑌪𑌸𑌾 𑌗𑍋𑌪𑌿𑌕𑌾𑌭𑍍𑌯𑍋 𑌨𑌮𑍋𑌽𑌸𑍍𑌤𑍁 ।
𑌇𑌤𑍍𑌯𑌾𑌨𑌂𑌦𑌾𑌕𑍁𑌲𑌮𑍁𑌪𑌗𑌤𑌂 𑌗𑍋𑌕𑍁𑌲𑌾𑌦𑍁𑌦𑍍𑌧𑌵𑌂 𑌤𑌂
𑌦𑍃𑌷𑍍𑌟𑍍𑌵𑌾 𑌹𑍃𑌷𑍍𑌟𑍋 𑌗𑍁𑌰𑍁𑌪𑍁𑌰𑌪𑌤𑍇 𑌪𑌾𑌹𑌿 𑌮𑌾𑌮𑌾𑌮𑌯𑍌𑌘𑌾𑌤𑍍 ॥11॥