𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 𑍭 – 𑌵𑌿𑌰𑌾𑌟𑍍𑌸𑍍𑌬𑍍𑌰𑌹𑍍𑌮𑌣𑌃 𑌜𑌨𑍍𑌮, 𑌤𑌪𑌃 𑌤𑌥𑌾 𑌵𑍈𑌕𑍁𑌂𑌠𑌦𑌰𑍍𑌶𑌨𑌮𑍍𑌵𑌰𑍂𑌪𑌵𑌰𑍍𑌣𑌨𑌮𑍍

𑌏𑌵𑌂 𑌦𑍇𑌵 𑌚𑌤𑍁𑌰𑍍𑌦𑌶𑌾𑌤𑍍𑌮𑌕𑌜𑌗𑌦𑍍𑌰𑍂𑌪𑍇𑌣 𑌜𑌾𑌤𑌃 𑌪𑍁𑌨-
𑌸𑍍𑌤𑌸𑍍𑌯𑍋𑌰𑍍𑌧𑍍𑌵𑌂 𑌖𑌲𑍁 𑌸𑌤𑍍𑌯𑌲𑍋𑌕𑌨𑌿𑌲𑌯𑍇 𑌜𑌾𑌤𑍋𑌽𑌸𑌿 𑌧𑌾𑌤𑌾 𑌸𑍍𑌵𑌯𑌮𑍍 ।
𑌯𑌂 𑌶𑌂𑌸𑌂𑌤𑌿 𑌹𑌿𑌰𑌣𑍍𑌯𑌗𑌰𑍍𑌭𑌮𑌖𑌿𑌲𑌤𑍍𑌰𑍈𑌲𑍋𑌕𑍍𑌯𑌜𑍀𑌵𑌾𑌤𑍍𑌮𑌕𑌂
𑌯𑍋𑌽𑌭𑍂𑌤𑍍 𑌸𑍍𑌫𑍀𑌤𑌰𑌜𑍋𑌵𑌿𑌕𑌾𑌰𑌵𑌿𑌕𑌸𑌨𑍍𑌨𑌾𑌨𑌾𑌸𑌿𑌸𑍃𑌕𑍍𑌷𑌾𑌰𑌸𑌃 ॥1॥

𑌸𑍋𑌽𑌯𑌂 𑌵𑌿𑌶𑍍𑌵𑌵𑌿𑌸𑌰𑍍𑌗𑌦𑌤𑍍𑌤𑌹𑍃𑌦𑌯𑌃 𑌸𑌂𑌪𑌶𑍍𑌯𑌮𑌾𑌨𑌃 𑌸𑍍𑌵𑌯𑌂
𑌬𑍋𑌧𑌂 𑌖𑌲𑍍𑌵𑌨𑌵𑌾𑌪𑍍𑌯 𑌵𑌿𑌶𑍍𑌵𑌵𑌿𑌷𑌯𑌂 𑌚𑌿𑌂𑌤𑌾𑌕𑍁𑌲𑌸𑍍𑌤𑌸𑍍𑌥𑌿𑌵𑌾𑌨𑍍 ।
𑌤𑌾𑌵𑌤𑍍𑌤𑍍𑌵𑌂 𑌜𑌗𑌤𑌾𑌂 𑌪𑌤𑍇 𑌤𑌪 𑌤𑌪𑍇𑌤𑍍𑌯𑍇𑌵𑌂 𑌹𑌿 𑌵𑍈𑌹𑌾𑌯𑌸𑍀𑌂
𑌵𑌾𑌣𑍀𑌮𑍇𑌨𑌮𑌶𑌿𑌶𑍍𑌰𑌵𑌃 𑌶𑍍𑌰𑍁𑌤𑌿𑌸𑍁𑌖𑌾𑌂 𑌕𑍁𑌰𑍍𑌵𑌂𑌸𑍍𑌤𑌪𑌃𑌪𑍍𑌰𑍇𑌰𑌣𑌾𑌮𑍍 ॥2॥

𑌕𑍋𑌽𑌸𑍌 𑌮𑌾𑌮𑌵𑌦𑌤𑍍 𑌪𑍁𑌮𑌾𑌨𑌿𑌤𑌿 𑌜𑌲𑌾𑌪𑍂𑌰𑍍𑌣𑍇 𑌜𑌗𑌨𑍍𑌮𑌂𑌡𑌲𑍇
𑌦𑌿𑌕𑍍𑌷𑍂𑌦𑍍𑌵𑍀𑌕𑍍𑌷𑍍𑌯 𑌕𑌿𑌮𑌪𑍍𑌯𑌨𑍀𑌕𑍍𑌷𑌿𑌤𑌵𑌤𑌾 𑌵𑌾𑌕𑍍𑌯𑌾𑌰𑍍𑌥𑌮𑍁𑌤𑍍𑌪𑌶𑍍𑌯𑌤𑌾 ।
𑌦𑌿𑌵𑍍𑌯𑌂 𑌵𑌰𑍍𑌷𑌸𑌹𑌸𑍍𑌰𑌮𑌾𑌤𑍍𑌤𑌤𑌪𑌸𑌾 𑌤𑍇𑌨 𑌤𑍍𑌵𑌮𑌾𑌰𑌾𑌧𑌿𑌤 –
𑌸𑍍𑌤𑌸𑍍𑌮𑍈 𑌦𑌰𑍍𑌶𑌿𑌤𑌵𑌾𑌨𑌸𑌿 𑌸𑍍𑌵𑌨𑌿𑌲𑌯𑌂 𑌵𑍈𑌕𑍁𑌂𑌠𑌮𑍇𑌕𑌾𑌦𑍍𑌭𑍁𑌤𑌮𑍍 ॥3॥

𑌮𑌾𑌯𑌾 𑌯𑌤𑍍𑌰 𑌕𑌦𑌾𑌪𑌿 𑌨𑍋 𑌵𑌿𑌕𑍁𑌰𑍁𑌤𑍇 𑌭𑌾𑌤𑍇 𑌜𑌗𑌦𑍍𑌭𑍍𑌯𑍋 𑌬𑌹𑌿𑌃
𑌶𑍋𑌕𑌕𑍍𑌰𑍋𑌧𑌵𑌿𑌮𑍋𑌹𑌸𑌾𑌧𑍍𑌵𑌸𑌮𑍁𑌖𑌾 𑌭𑌾𑌵𑌾𑌸𑍍𑌤𑍁 𑌦𑍂𑌰𑌂 𑌗𑌤𑌾𑌃 ।
𑌸𑌾𑌂𑌦𑍍𑌰𑌾𑌨𑌂𑌦𑌝𑌰𑍀 𑌚 𑌯𑌤𑍍𑌰 𑌪𑌰𑌮𑌜𑍍𑌯𑍋𑌤𑌿𑌃𑌪𑍍𑌰𑌕𑌾𑌶𑌾𑌤𑍍𑌮𑌕𑍇
𑌤𑌤𑍍𑌤𑍇 𑌧𑌾𑌮 𑌵𑌿𑌭𑌾𑌵𑌿𑌤𑌂 𑌵𑌿𑌜𑌯𑌤𑍇 𑌵𑍈𑌕𑍁𑌂𑌠𑌰𑍂𑌪𑌂 𑌵𑌿𑌭𑍋 ॥4॥

𑌯𑌸𑍍𑌮𑌿𑌨𑍍𑌨𑌾𑌮 𑌚𑌤𑍁𑌰𑍍𑌭𑍁𑌜𑌾 𑌹𑌰𑌿𑌮𑌣𑌿𑌶𑍍𑌯𑌾𑌮𑌾𑌵𑌦𑌾𑌤𑌤𑍍𑌵𑌿𑌷𑍋
𑌨𑌾𑌨𑌾𑌭𑍂𑌷𑌣𑌰𑌤𑍍𑌨𑌦𑍀𑌪𑌿𑌤𑌦𑌿𑌶𑍋 𑌰𑌾𑌜𑌦𑍍𑌵𑌿𑌮𑌾𑌨𑌾𑌲𑌯𑌾𑌃 ।
𑌭𑌕𑍍𑌤𑌿𑌪𑍍𑌰𑌾𑌪𑍍𑌤𑌤𑌥𑌾𑌵𑌿𑌧𑍋𑌨𑍍𑌨𑌤𑌪𑌦𑌾 𑌦𑍀𑌵𑍍𑌯𑌂𑌤𑌿 𑌦𑌿𑌵𑍍𑌯𑌾 𑌜𑌨𑌾-
𑌤𑌤𑍍𑌤𑍇 𑌧𑌾𑌮 𑌨𑌿𑌰𑌸𑍍𑌤𑌸𑌰𑍍𑌵𑌶𑌮𑌲𑌂 𑌵𑍈𑌕𑍁𑌂𑌠𑌰𑍂𑌪𑌂 𑌜𑌯𑍇𑌤𑍍 ॥5॥

𑌨𑌾𑌨𑌾𑌦𑌿𑌵𑍍𑌯𑌵𑌧𑍂𑌜𑌨𑍈𑌰𑌭𑌿𑌵𑍃𑌤𑌾 𑌵𑌿𑌦𑍍𑌯𑍁𑌲𑍍𑌲𑌤𑌾𑌤𑍁𑌲𑍍𑌯𑌯𑌾
𑌵𑌿𑌶𑍍𑌵𑍋𑌨𑍍𑌮𑌾𑌦𑌨𑌹𑍃𑌦𑍍𑌯𑌗𑌾𑌤𑍍𑌰𑌲𑌤𑌯𑌾 𑌵𑌿𑌦𑍍𑌯𑍋𑌤𑌿𑌤𑌾𑌶𑌾𑌂𑌤𑌰𑌾 ।
𑌤𑍍𑌵𑌤𑍍𑌪𑌾𑌦𑌾𑌂𑌬𑍁𑌜𑌸𑍌𑌰𑌭𑍈𑌕𑌕𑍁𑌤𑍁𑌕𑌾𑌲𑍍𑌲𑌕𑍍𑌷𑍍𑌮𑍀𑌃 𑌸𑍍𑌵𑌯𑌂 𑌲𑌕𑍍𑌷𑍍𑌯𑌤𑍇
𑌯𑌸𑍍𑌮𑌿𑌨𑍍 𑌵𑌿𑌸𑍍𑌮𑌯𑌨𑍀𑌯𑌦𑌿𑌵𑍍𑌯𑌵𑌿𑌭𑌵𑌂 𑌤𑌤𑍍𑌤𑍇 𑌪𑌦𑌂 𑌦𑍇𑌹𑌿 𑌮𑍇 ॥6॥

𑌤𑌤𑍍𑌰𑍈𑌵𑌂 𑌪𑍍𑌰𑌤𑌿𑌦𑌰𑍍𑌶𑌿𑌤𑍇 𑌨𑌿𑌜𑌪𑌦𑍇 𑌰𑌤𑍍𑌨𑌾𑌸𑌨𑌾𑌧𑍍𑌯𑌾𑌸𑌿𑌤𑌂
𑌭𑌾𑌸𑍍𑌵𑌤𑍍𑌕𑍋𑌟𑌿𑌲𑌸𑌤𑍍𑌕𑌿𑌰𑍀𑌟𑌕𑌟𑌕𑌾𑌦𑍍𑌯𑌾𑌕𑌲𑍍𑌪𑌦𑍀𑌪𑍍𑌰𑌾𑌕𑍃𑌤𑌿 ।
𑌶𑍍𑌰𑍀𑌵𑌤𑍍𑌸𑌾𑌂𑌕𑌿𑌤𑌮𑌾𑌤𑍍𑌤𑌕𑍌𑌸𑍍𑌤𑍁𑌭𑌮𑌣𑌿𑌚𑍍𑌛𑌾𑌯𑌾𑌰𑍁𑌣𑌂 𑌕𑌾𑌰𑌣𑌂
𑌵𑌿𑌶𑍍𑌵𑍇𑌷𑌾𑌂 𑌤𑌵 𑌰𑍂𑌪𑌮𑍈𑌕𑍍𑌷𑌤 𑌵𑌿𑌧𑌿𑌸𑍍𑌤𑌤𑍍𑌤𑍇 𑌵𑌿𑌭𑍋 𑌭𑌾𑌤𑍁 𑌮𑍇 ॥𑍭॥

𑌕𑌾𑌲𑌾𑌂𑌭𑍋𑌦𑌕𑌲𑌾𑌯𑌕𑍋𑌮𑌲𑌰𑍁𑌚𑍀𑌚𑌕𑍍𑌰𑍇𑌣 𑌚𑌕𑍍𑌰𑌂 𑌦𑌿𑌶𑌾 –
𑌮𑌾𑌵𑍃𑌣𑍍𑌵𑌾𑌨𑌮𑍁𑌦𑌾𑌰𑌮𑌂𑌦𑌹𑌸𑌿𑌤𑌸𑍍𑌯𑌂𑌦𑌪𑍍𑌰𑌸𑌨𑍍𑌨𑌾𑌨𑌨𑌮𑍍 ।
𑌰𑌾𑌜𑌤𑍍𑌕𑌂𑌬𑍁𑌗𑌦𑌾𑌰𑌿𑌪𑌂𑌕𑌜𑌧𑌰𑌶𑍍𑌰𑍀𑌮𑌦𑍍𑌭𑍁𑌜𑌾𑌮𑌂𑌡𑌲𑌂
𑌸𑍍𑌰𑌷𑍍𑌟𑍁𑌸𑍍𑌤𑍁𑌷𑍍𑌟𑌿𑌕𑌰𑌂 𑌵𑌪𑍁𑌸𑍍𑌤𑌵 𑌵𑌿𑌭𑍋 𑌮𑌦𑍍𑌰𑍋𑌗𑌮𑍁𑌦𑍍𑌵𑌾𑌸𑌯𑍇𑌤𑍍 ॥𑍮॥

𑌦𑍃𑌷𑍍𑌟𑍍𑌵𑌾 𑌸𑌂𑌭𑍃𑌤𑌸𑌂𑌭𑍍𑌰𑌮𑌃 𑌕𑌮𑌲𑌭𑍂𑌸𑍍𑌤𑍍𑌵𑌤𑍍𑌪𑌾𑌦𑌪𑌾𑌥𑍋𑌰𑍁𑌹𑍇
𑌹𑌰𑍍𑌷𑌾𑌵𑍇𑌶𑌵𑌶𑌂𑌵𑌦𑍋 𑌨𑌿𑌪𑌤𑌿𑌤𑌃 𑌪𑍍𑌰𑍀𑌤𑍍𑌯𑌾 𑌕𑍃𑌤𑌾𑌰𑍍𑌥𑍀𑌭𑌵𑌨𑍍 ।
𑌜𑌾𑌨𑌾𑌸𑍍𑌯𑍇𑌵 𑌮𑌨𑍀𑌷𑌿𑌤𑌂 𑌮𑌮 𑌵𑌿𑌭𑍋 𑌜𑍍𑌞𑌾𑌨𑌂 𑌤𑌦𑌾𑌪𑌾𑌦𑌯
𑌦𑍍𑌵𑍈𑌤𑌾𑌦𑍍𑌵𑍈𑌤𑌭𑌵𑌤𑍍𑌸𑍍𑌵𑌰𑍂𑌪𑌪𑌰𑌮𑌿𑌤𑍍𑌯𑌾𑌚𑌷𑍍𑌟 𑌤𑌂 𑌤𑍍𑌵𑌾𑌂 𑌭𑌜𑍇 ॥𑍯॥

𑌆𑌤𑌾𑌮𑍍𑌰𑍇 𑌚𑌰𑌣𑍇 𑌵𑌿𑌨𑌮𑍍𑌰𑌮𑌥 𑌤𑌂 𑌹𑌸𑍍𑌤𑍇𑌨 𑌹𑌸𑍍𑌤𑍇 𑌸𑍍𑌪𑍃𑌶𑌨𑍍
𑌬𑍋𑌧𑌸𑍍𑌤𑍇 𑌭𑌵𑌿𑌤𑌾 𑌨 𑌸𑌰𑍍𑌗𑌵𑌿𑌧𑌿𑌭𑌿𑌰𑍍𑌬𑌂𑌧𑍋𑌽𑌪𑌿 𑌸𑌂𑌜𑌾𑌯𑌤𑍇 ।
𑌇𑌤𑍍𑌯𑌾𑌭𑌾𑌷𑍍𑌯 𑌗𑌿𑌰𑌂 𑌪𑍍𑌰𑌤𑍋𑌷𑍍𑌯 𑌨𑌿𑌤𑌰𑌾𑌂 𑌤𑌚𑍍𑌚𑌿𑌤𑍍𑌤𑌗𑍂𑌢𑌃 𑌸𑍍𑌵𑌯𑌂
𑌸𑍃𑌷𑍍𑌟𑍌 𑌤𑌂 𑌸𑌮𑍁𑌦𑍈𑌰𑌯𑌃 𑌸 𑌭𑌗𑌵𑌨𑍍𑌨𑍁𑌲𑍍𑌲𑌾𑌸𑌯𑍋𑌲𑍍𑌲𑌾𑌘𑌤𑌾𑌮𑍍 ॥10॥