𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 64 – 𑌗𑍋𑌵𑌿𑌂𑌦𑌪𑌟𑍍𑌟𑌾𑌭𑌿𑌷𑍇𑌕𑌮𑍍

𑌆𑌲𑍋𑌕𑍍𑌯 𑌶𑍈𑌲𑍋𑌦𑍍𑌧𑌰𑌣𑌾𑌦𑌿𑌰𑍂𑌪𑌂 𑌪𑍍𑌰𑌭𑌾𑌵𑌮𑍁𑌚𑍍𑌚𑍈𑌸𑍍𑌤𑌵 𑌗𑍋𑌪𑌲𑍋𑌕𑌾𑌃 ।
𑌵𑌿𑌶𑍍𑌵𑍇𑌶𑍍𑌵𑌰𑌂 𑌤𑍍𑌵𑌾𑌮𑌭𑌿𑌮𑌤𑍍𑌯 𑌵𑌿𑌶𑍍𑌵𑍇 𑌨𑌂𑌦𑌂 𑌭𑌵𑌜𑍍𑌜𑌾𑌤𑌕𑌮𑌨𑍍𑌵𑌪𑍃𑌚𑍍𑌛𑌨𑍍 ॥1॥

𑌗𑌰𑍍𑌗𑍋𑌦𑌿𑌤𑍋 𑌨𑌿𑌰𑍍𑌗𑌦𑌿𑌤𑍋 𑌨𑌿𑌜𑌾𑌯 𑌵𑌰𑍍𑌗𑌾𑌯 𑌤𑌾𑌤𑍇𑌨 𑌤𑌵 𑌪𑍍𑌰𑌭𑌾𑌵𑌃 ।
𑌪𑍂𑌰𑍍𑌵𑌾𑌧𑌿𑌕𑌸𑍍𑌤𑍍𑌵𑌯𑍍𑌯𑌨𑍁𑌰𑌾𑌗 𑌏𑌷𑌾𑌮𑍈𑌧𑌿𑌷𑍍𑌟 𑌤𑌾𑌵𑌤𑍍 𑌬𑌹𑍁𑌮𑌾𑌨𑌭𑌾𑌰𑌃 ॥2॥

𑌤𑌤𑍋𑌽𑌵𑌮𑌾𑌨𑍋𑌦𑌿𑌤𑌤𑌤𑍍𑌤𑍍𑌵𑌬𑍋𑌧𑌃 𑌸𑍁𑌰𑌾𑌧𑌿𑌰𑌾𑌜𑌃 𑌸𑌹 𑌦𑌿𑌵𑍍𑌯𑌗𑌵𑍍𑌯𑌾।
𑌉𑌪𑍇𑌤𑍍𑌯 𑌤𑍁𑌷𑍍𑌟𑌾𑌵 𑌸 𑌨𑌷𑍍𑌟𑌗𑌰𑍍𑌵𑌃 𑌸𑍍𑌪𑍃𑌷𑍍𑌟𑍍𑌵𑌾 𑌪𑌦𑌾𑌬𑍍𑌜𑌂 𑌮𑌣𑌿𑌮𑍌𑌲𑌿𑌨𑌾 𑌤𑍇 ॥3॥

𑌸𑍍𑌨𑍇𑌹𑌸𑍍𑌨𑍁𑌤𑍈𑌸𑍍𑌤𑍍𑌵𑌾𑌂 𑌸𑍁𑌰𑌭𑌿𑌃 𑌪𑌯𑍋𑌭𑌿𑌰𑍍𑌗𑍋𑌵𑌿𑌂𑌦𑌨𑌾𑌮𑌾𑌂𑌕𑌿𑌤𑌮𑌭𑍍𑌯𑌷𑌿𑌂𑌚𑌤𑍍 ।
𑌐𑌰𑌾𑌵𑌤𑍋𑌪𑌾𑌹𑍃𑌤𑌦𑌿𑌵𑍍𑌯𑌗𑌂𑌗𑌾𑌪𑌾𑌥𑍋𑌭𑌿𑌰𑌿𑌂𑌦𑍍𑌰𑍋𑌽𑌪𑌿 𑌚 𑌜𑌾𑌤𑌹𑌰𑍍𑌷𑌃 ॥4॥

𑌜𑌗𑌤𑍍𑌤𑍍𑌰𑌯𑍇𑌶𑍇 𑌤𑍍𑌵𑌯𑌿 𑌗𑍋𑌕𑍁𑌲𑍇𑌶𑍇 𑌤𑌥𑌾𑌽𑌭𑌿𑌷𑌿𑌕𑍍𑌤𑍇 𑌸𑌤𑌿 𑌗𑍋𑌪𑌵𑌾𑌟𑌃 ।
𑌨𑌾𑌕𑍇𑌽𑌪𑌿 𑌵𑍈𑌕𑍁𑌂𑌠𑌪𑌦𑍇𑌽𑌪𑍍𑌯𑌲𑌭𑍍𑌯𑌾𑌂 𑌶𑍍𑌰𑌿𑌯𑌂 𑌪𑍍𑌰𑌪𑍇𑌦𑍇 𑌭𑌵𑌤𑌃 𑌪𑍍𑌰𑌭𑌾𑌵𑌾𑌤𑍍 ॥5॥

𑌕𑌦𑌾𑌚𑌿𑌦𑌂𑌤𑌰𑍍𑌯𑌮𑍁𑌨𑌂 𑌪𑍍𑌰𑌭𑌾𑌤𑍇 𑌸𑍍𑌨𑌾𑌯𑌨𑍍 𑌪𑌿𑌤𑌾 𑌵𑌾𑌰𑍁𑌣𑌪𑍂𑌰𑍁𑌷𑍇𑌣 ।
𑌨𑍀𑌤𑌸𑍍𑌤𑌮𑌾𑌨𑍇𑌤𑍁𑌮𑌗𑌾𑌃 𑌪𑍁𑌰𑍀𑌂 𑌤𑍍𑌵𑌂 𑌤𑌾𑌂 𑌵𑌾𑌰𑍁𑌣𑍀𑌂 𑌕𑌾𑌰𑌣𑌮𑌰𑍍𑌤𑍍𑌯𑌰𑍂𑌪𑌃 ॥6॥

𑌸𑌸𑌂𑌭𑍍𑌰𑌮𑌂 𑌤𑍇𑌨 𑌜𑌲𑌾𑌧𑌿𑌪𑍇𑌨 𑌪𑍍𑌰𑌪𑍂𑌜𑌿𑌤𑌸𑍍𑌤𑍍𑌵𑌂 𑌪𑍍𑌰𑌤𑌿𑌗𑍃𑌹𑍍𑌯 𑌤𑌾𑌤𑌮𑍍 ।
𑌉𑌪𑌾𑌗𑌤𑌸𑍍𑌤𑌤𑍍𑌕𑍍𑌷𑌣𑌮𑌾𑌤𑍍𑌮𑌗𑍇𑌹𑌂 𑌪𑌿𑌤𑌾𑌽𑌵𑌦𑌤𑍍𑌤𑌚𑍍𑌚𑌰𑌿𑌤𑌂 𑌨𑌿𑌜𑍇𑌭𑍍𑌯𑌃 ॥𑍭॥

𑌹𑌰𑌿𑌂 𑌵𑌿𑌨𑌿𑌶𑍍𑌚𑌿𑌤𑍍𑌯 𑌭𑌵𑌂𑌤𑌮𑍇𑌤𑌾𑌨𑍍 𑌭𑌵𑌤𑍍𑌪𑌦𑌾𑌲𑍋𑌕𑌨𑌬𑌦𑍍𑌧𑌤𑍃𑌷𑍍𑌣𑌾𑌨𑍍 ॥
𑌨𑌿𑌰𑍀𑌕𑍍𑌷𑍍𑌯 𑌵𑌿𑌷𑍍𑌣𑍋 𑌪𑌰𑌮𑌂 𑌪𑌦𑌂 𑌤𑌦𑍍𑌦𑍁𑌰𑌾𑌪𑌮𑌨𑍍𑌯𑍈𑌸𑍍𑌤𑍍𑌵𑌮𑌦𑍀𑌦𑍃𑌶𑌸𑍍𑌤𑌾𑌨𑍍 ॥𑍮॥

𑌸𑍍𑌫𑍁𑌰𑌤𑍍𑌪𑌰𑌾𑌨𑌂𑌦𑌰𑌸𑌪𑍍𑌰𑌵𑌾𑌹𑌪𑍍𑌰𑌪𑍂𑌰𑍍𑌣𑌕𑍈𑌵𑌲𑍍𑌯𑌮𑌹𑌾𑌪𑌯𑍋𑌧𑍌 ।
𑌚𑌿𑌰𑌂 𑌨𑌿𑌮𑌗𑍍𑌨𑌾𑌃 𑌖𑌲𑍁 𑌗𑍋𑌪𑌸𑌂𑌘𑌾𑌸𑍍𑌤𑍍𑌵𑌯𑍈𑌵 𑌭𑍂𑌮𑌨𑍍 𑌪𑍁𑌨𑌰𑍁𑌦𑍍𑌧𑍃𑌤𑌾𑌸𑍍𑌤𑍇 ॥𑍯॥

𑌕𑌰𑌬𑌦𑌰𑌵𑌦𑍇𑌵𑌂 𑌦𑍇𑌵 𑌕𑍁𑌤𑍍𑌰𑌾𑌵𑌤𑌾𑌰𑍇
𑌨𑌿𑌜𑌪𑌦𑌮𑌨𑌵𑌾𑌪𑍍𑌯𑌂 𑌦𑌰𑍍𑌶𑌿𑌤𑌂 𑌭𑌕𑍍𑌤𑌿𑌭𑌾𑌜𑌾𑌮𑍍 ।
𑌤𑌦𑌿𑌹 𑌪𑌶𑍁𑌪𑌰𑍂𑌪𑍀 𑌤𑍍𑌵𑌂 𑌹𑌿 𑌸𑌾𑌕𑍍𑌷𑌾𑌤𑍍 𑌪𑌰𑌾𑌤𑍍𑌮𑌾
𑌪𑌵𑌨𑌪𑍁𑌰𑌨𑌿𑌵𑌾𑌸𑌿𑌨𑍍 𑌪𑌾𑌹𑌿 𑌮𑌾𑌮𑌾𑌮𑌯𑍇𑌭𑍍𑌯𑌃 ॥10॥