𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 63 – 𑌗𑍋𑌵𑌰𑍍𑌧𑌨𑍋𑌦𑍍𑌧𑌾𑌰𑌣𑌮𑍍

𑌦𑌦𑍃𑌶𑌿𑌰𑍇 𑌕𑌿𑌲 𑌤𑌤𑍍𑌕𑍍𑌷𑌣𑌮𑌕𑍍𑌷𑌤-
𑌸𑍍𑌤𑌨𑌿𑌤𑌜𑍃𑌂𑌭𑌿𑌤𑌕𑌂𑌪𑌿𑌤𑌦𑌿𑌕𑍍𑌤𑌟𑌾𑌃 ।
𑌸𑍁𑌷𑌮𑌯𑌾 𑌭𑌵𑌦𑌂𑌗𑌤𑍁𑌲𑌾𑌂 𑌗𑌤𑌾
𑌵𑍍𑌰𑌜𑌪𑌦𑍋𑌪𑌰𑌿 𑌵𑌾𑌰𑌿𑌧𑌰𑌾𑌸𑍍𑌤𑍍𑌵𑌯𑌾 ॥1॥

𑌵𑌿𑌪𑍁𑌲𑌕𑌰𑌕𑌮𑌿𑌶𑍍𑌰𑍈𑌸𑍍𑌤𑍋𑌯𑌧𑌾𑌰𑌾𑌨𑌿𑌪𑌾𑌤𑍈-
𑌰𑍍𑌦𑌿𑌶𑌿𑌦𑌿𑌶𑌿 𑌪𑌶𑍁𑌪𑌾𑌨𑌾𑌂 𑌮𑌂𑌡𑌲𑍇 𑌦𑌂𑌡𑍍𑌯𑌮𑌾𑌨𑍇 ।
𑌕𑍁𑌪𑌿𑌤𑌹𑌰𑌿𑌕𑍃𑌤𑌾𑌨𑍍𑌨𑌃 𑌪𑌾𑌹𑌿 𑌪𑌾𑌹𑍀𑌤𑌿 𑌤𑍇𑌷𑌾𑌂
𑌵𑌚𑌨𑌮𑌜𑌿𑌤 𑌶𑍃𑌣𑍍𑌵𑌨𑍍 𑌮𑌾 𑌬𑌿𑌭𑍀𑌤𑍇𑌤𑍍𑌯𑌭𑌾𑌣𑍀𑌃 ॥2॥

𑌕𑍁𑌲 𑌇𑌹 𑌖𑌲𑍁 𑌗𑍋𑌤𑍍𑌰𑍋 𑌦𑍈𑌵𑌤𑌂 𑌗𑍋𑌤𑍍𑌰𑌶𑌤𑍍𑌰𑍋-
𑌰𑍍𑌵𑌿𑌹𑌤𑌿𑌮𑌿𑌹 𑌸 𑌰𑍁𑌂𑌧𑍍𑌯𑌾𑌤𑍍 𑌕𑍋 𑌨𑍁 𑌵𑌃 𑌸𑌂𑌶𑌯𑍋𑌽𑌸𑍍𑌮𑌿𑌨𑍍 ।
𑌇𑌤𑌿 𑌸𑌹𑌸𑌿𑌤𑌵𑌾𑌦𑍀 𑌦𑍇𑌵 𑌗𑍋𑌵𑌰𑍍𑌦𑍍𑌧𑌨𑌾𑌦𑍍𑌰𑌿𑌂
𑌤𑍍𑌵𑌰𑌿𑌤𑌮𑍁𑌦𑌮𑍁𑌮𑍂𑌲𑍋 𑌮𑍂𑌲𑌤𑍋 𑌬𑌾𑌲𑌦𑍋𑌰𑍍𑌭𑍍𑌯𑌾𑌮𑍍 ॥3॥

𑌤𑌦𑌨𑍁 𑌗𑌿𑌰𑌿𑌵𑌰𑌸𑍍𑌯 𑌪𑍍𑌰𑍋𑌦𑍍𑌧𑍃𑌤𑌸𑍍𑌯𑌾𑌸𑍍𑌯 𑌤𑌾𑌵𑌤𑍍
𑌸𑌿𑌕𑌤𑌿𑌲𑌮𑍃𑌦𑍁𑌦𑍇𑌶𑍇 𑌦𑍂𑌰𑌤𑍋 𑌵𑌾𑌰𑌿𑌤𑌾𑌪𑍇 ।
𑌪𑌰𑌿𑌕𑌰𑌪𑌰𑌿𑌮𑌿𑌶𑍍𑌰𑌾𑌨𑍍 𑌧𑍇𑌨𑍁𑌗𑍋𑌪𑌾𑌨𑌧𑌸𑍍𑌤𑌾-
𑌦𑍁𑌪𑌨𑌿𑌦𑌧𑌦𑌧𑌤𑍍𑌥𑌾 𑌹𑌸𑍍𑌤𑌪𑌦𑍍𑌮𑍇𑌨 𑌶𑍈𑌲𑌮𑍍 ॥4॥

𑌭𑌵𑌤𑌿 𑌵𑌿𑌧𑍃𑌤𑌶𑍈𑌲𑍇 𑌬𑌾𑌲𑌿𑌕𑌾𑌭𑌿𑌰𑍍𑌵𑌯𑌸𑍍𑌯𑍈-
𑌰𑌪𑌿 𑌵𑌿𑌹𑌿𑌤𑌵𑌿𑌲𑌾𑌸𑌂 𑌕𑍇𑌲𑌿𑌲𑌾𑌪𑌾𑌦𑌿𑌲𑍋𑌲𑍇 ।
𑌸𑌵𑌿𑌧𑌮𑌿𑌲𑌿𑌤𑌧𑍇𑌨𑍂𑌰𑍇𑌕𑌹𑌸𑍍𑌤𑍇𑌨 𑌕𑌂𑌡𑍂-
𑌯𑌤𑌿 𑌸𑌤𑌿 𑌪𑌶𑍁𑌪𑌾𑌲𑌾𑌸𑍍𑌤𑍋𑌷𑌮𑍈𑌷𑌂𑌤 𑌸𑌰𑍍𑌵𑍇 ॥5॥

𑌅𑌤𑌿𑌮𑌹𑌾𑌨𑍍 𑌗𑌿𑌰𑌿𑌰𑍇𑌷 𑌤𑍁 𑌵𑌾𑌮𑌕𑍇
𑌕𑌰𑌸𑌰𑍋𑌰𑍁𑌹𑌿 𑌤𑌂 𑌧𑌰𑌤𑍇 𑌚𑌿𑌰𑌮𑍍 ।
𑌕𑌿𑌮𑌿𑌦𑌮𑌦𑍍𑌭𑍁𑌤𑌮𑌦𑍍𑌰𑌿𑌬𑌲𑌂 𑌨𑍍𑌵𑌿𑌤𑌿
𑌤𑍍𑌵𑌦𑌵𑌲𑍋𑌕𑌿𑌭𑌿𑌰𑌾𑌕𑌥𑌿 𑌗𑍋𑌪𑌕𑍈𑌃 ॥6॥

𑌅𑌹𑌹 𑌧𑌾𑌰𑍍𑌷𑍍𑌟𑍍𑌯𑌮𑌮𑍁𑌷𑍍𑌯 𑌵𑌟𑍋𑌰𑍍𑌗𑌿𑌰𑌿𑌂
𑌵𑍍𑌯𑌥𑌿𑌤𑌬𑌾𑌹𑍁𑌰𑌸𑌾𑌵𑌵𑌰𑍋𑌪𑌯𑍇𑌤𑍍 ।
𑌇𑌤𑌿 𑌹𑌰𑌿𑌸𑍍𑌤𑍍𑌵𑌯𑌿 𑌬𑌦𑍍𑌧𑌵𑌿𑌗𑌰𑍍𑌹𑌣𑍋
𑌦𑌿𑌵𑌸𑌸𑌪𑍍𑌤𑌕𑌮𑍁𑌗𑍍𑌰𑌮𑌵𑌰𑍍𑌷𑌯𑌤𑍍 ॥𑍭॥

𑌅𑌚𑌲𑌤𑌿 𑌤𑍍𑌵𑌯𑌿 𑌦𑍇𑌵 𑌪𑌦𑌾𑌤𑍍 𑌪𑌦𑌂
𑌗𑌲𑌿𑌤𑌸𑌰𑍍𑌵𑌜𑌲𑍇 𑌚 𑌘𑌨𑍋𑌤𑍍𑌕𑌰𑍇 ।
𑌅𑌪𑌹𑍃𑌤𑍇 𑌮𑌰𑍁𑌤𑌾 𑌮𑌰𑍁𑌤𑌾𑌂 𑌪𑌤𑌿-
𑌸𑍍𑌤𑍍𑌵𑌦𑌭𑌿𑌶𑌂𑌕𑌿𑌤𑌧𑍀𑌃 𑌸𑌮𑍁𑌪𑌾𑌦𑍍𑌰𑌵𑌤𑍍 ॥𑍮॥

𑌶𑌮𑌮𑍁𑌪𑍇𑌯𑍁𑌷𑌿 𑌵𑌰𑍍𑌷𑌭𑌰𑍇 𑌤𑌦𑌾
𑌪𑌶𑍁𑌪𑌧𑍇𑌨𑍁𑌕𑍁𑌲𑍇 𑌚 𑌵𑌿𑌨𑌿𑌰𑍍𑌗𑌤𑍇 ।
𑌭𑍁𑌵𑌿 𑌵𑌿𑌭𑍋 𑌸𑌮𑍁𑌪𑌾𑌹𑌿𑌤𑌭𑍂𑌧𑌰𑌃
𑌪𑍍𑌰𑌮𑍁𑌦𑌿𑌤𑍈𑌃 𑌪𑌶𑍁𑌪𑍈𑌃 𑌪𑌰𑌿𑌰𑍇𑌭𑌿𑌷𑍇 ॥𑍯॥

𑌧𑌰𑌣𑌿𑌮𑍇𑌵 𑌪𑍁𑌰𑌾 𑌧𑍃𑌤𑌵𑌾𑌨𑌸𑌿
𑌕𑍍𑌷𑌿𑌤𑌿𑌧𑌰𑍋𑌦𑍍𑌧𑌰𑌣𑍇 𑌤𑌵 𑌕𑌃 𑌶𑍍𑌰𑌮𑌃 ।
𑌇𑌤𑌿 𑌨𑍁𑌤𑌸𑍍𑌤𑍍𑌰𑌿𑌦𑌶𑍈𑌃 𑌕𑌮𑌲𑌾𑌪𑌤𑍇
𑌗𑍁𑌰𑍁𑌪𑍁𑌰𑌾𑌲𑌯 𑌪𑌾𑌲𑌯 𑌮𑌾𑌂 𑌗𑌦𑌾𑌤𑍍 ॥10॥