𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 61 – 𑌵𑌿𑌪𑍍𑌰𑌪𑌤𑍍𑌨𑍍𑌯𑌨𑍁𑌗𑍍𑌰𑌹𑌮𑍍

𑌤𑌤𑌶𑍍𑌚 𑌵𑍃𑌂𑌦𑌾𑌵𑌨𑌤𑍋𑌽𑌤𑌿𑌦𑍂𑌰𑌤𑍋
𑌵𑌨𑌂 𑌗𑌤𑌸𑍍𑌤𑍍𑌵𑌂 𑌖𑌲𑍁 𑌗𑍋𑌪𑌗𑍋𑌕𑍁𑌲𑍈𑌃 ।
𑌹𑍃𑌦𑌂𑌤𑌰𑍇 𑌭𑌕𑍍𑌤𑌤𑌰𑌦𑍍𑌵𑌿𑌜𑌾𑌂𑌗𑌨𑌾-
𑌕𑌦𑌂𑌬𑌕𑌾𑌨𑍁𑌗𑍍𑌰𑌹𑌣𑌾𑌗𑍍𑌰𑌹𑌂 𑌵𑌹𑌨𑍍 ॥1॥

𑌤𑌤𑍋 𑌨𑌿𑌰𑍀𑌕𑍍𑌷𑍍𑌯𑌾𑌶𑌰𑌣𑍇 𑌵𑌨𑌾𑌂𑌤𑌰𑍇
𑌕𑌿𑌶𑍋𑌰𑌲𑍋𑌕𑌂 𑌕𑍍𑌷𑍁𑌧𑌿𑌤𑌂 𑌤𑍃𑌷𑌾𑌕𑍁𑌲𑌮𑍍 ।
𑌅𑌦𑍂𑌰𑌤𑍋 𑌯𑌜𑍍𑌞𑌪𑌰𑌾𑌨𑍍 𑌦𑍍𑌵𑌿𑌜𑌾𑌨𑍍 𑌪𑍍𑌰𑌤𑌿
𑌵𑍍𑌯𑌸𑌰𑍍𑌜𑌯𑍋 𑌦𑍀𑌦𑌿𑌵𑌿𑌯𑌾𑌚𑌨𑌾𑌯 𑌤𑌾𑌨𑍍 ॥2॥

𑌗𑌤𑍇𑌷𑍍𑌵𑌥𑍋 𑌤𑍇𑌷𑍍𑌵𑌭𑌿𑌧𑌾𑌯 𑌤𑍇𑌽𑌭𑌿𑌧𑌾𑌂
𑌕𑍁𑌮𑌾𑌰𑌕𑍇𑌷𑍍𑌵𑍋𑌦𑌨𑌯𑌾𑌚𑌿𑌷𑍁 𑌪𑍍𑌰𑌭𑍋 ।
𑌶𑍍𑌰𑍁𑌤𑌿𑌸𑍍𑌥𑌿𑌰𑌾 𑌅𑌪𑍍𑌯𑌭𑌿𑌨𑌿𑌨𑍍𑌯𑍁𑌰𑌶𑍍𑌰𑍁𑌤𑌿𑌂
𑌨 𑌕𑌿𑌂𑌚𑌿𑌦𑍂𑌚𑍁𑌶𑍍𑌚 𑌮𑌹𑍀𑌸𑍁𑌰𑍋𑌤𑍍𑌤𑌮𑌾𑌃 ॥3॥

𑌅𑌨𑌾𑌦𑌰𑌾𑌤𑍍 𑌖𑌿𑌨𑍍𑌨𑌧𑌿𑌯𑍋 𑌹𑌿 𑌬𑌾𑌲𑌕𑌾𑌃 ।
𑌸𑌮𑌾𑌯𑌯𑍁𑌰𑍍𑌯𑍁𑌕𑍍𑌤𑌮𑌿𑌦𑌂 𑌹𑌿 𑌯𑌜𑍍𑌵𑌸𑍁 ।
𑌚𑌿𑌰𑌾𑌦𑌭𑌕𑍍𑌤𑌾𑌃 𑌖𑌲𑍁 𑌤𑍇 𑌮𑌹𑍀𑌸𑍁𑌰𑌾𑌃
𑌕𑌥𑌂 𑌹𑌿 𑌭𑌕𑍍𑌤𑌂 𑌤𑍍𑌵𑌯𑌿 𑌤𑍈𑌃 𑌸𑌮𑌰𑍍𑌪𑍍𑌯𑌤𑍇 ॥4॥

𑌨𑌿𑌵𑍇𑌦𑌯𑌧𑍍𑌵𑌂 𑌗𑍃𑌹𑌿𑌣𑍀𑌜𑌨𑌾𑌯 𑌮𑌾𑌂
𑌦𑌿𑌶𑍇𑌯𑍁𑌰𑌨𑍍𑌨𑌂 𑌕𑌰𑍁𑌣𑌾𑌕𑍁𑌲𑌾 𑌇𑌮𑌾𑌃 ।
𑌇𑌤𑌿 𑌸𑍍𑌮𑌿𑌤𑌾𑌰𑍍𑌦𑍍𑌰𑌂 𑌭𑌵𑌤𑍇𑌰𑌿𑌤𑌾 𑌗𑌤𑌾-
𑌸𑍍𑌤𑍇 𑌦𑌾𑌰𑌕𑌾 𑌦𑌾𑌰𑌜𑌨𑌂 𑌯𑌯𑌾𑌚𑌿𑌰𑍇 ॥5॥

𑌗𑍃𑌹𑍀𑌤𑌨𑌾𑌮𑍍𑌨𑌿 𑌤𑍍𑌵𑌯𑌿 𑌸𑌂𑌭𑍍𑌰𑌮𑌾𑌕𑍁𑌲𑌾-
𑌶𑍍𑌚𑌤𑍁𑌰𑍍𑌵𑌿𑌧𑌂 𑌭𑍋𑌜𑍍𑌯𑌰𑌸𑌂 𑌪𑍍𑌰𑌗𑍃𑌹𑍍𑌯 𑌤𑌾𑌃 ।
𑌚𑌿𑌰𑌂𑌧𑍃𑌤𑌤𑍍𑌵𑌤𑍍𑌪𑍍𑌰𑌵𑌿𑌲𑍋𑌕𑌨𑌾𑌗𑍍𑌰𑌹𑌾𑌃
𑌸𑍍𑌵𑌕𑍈𑌰𑍍𑌨𑌿𑌰𑍁𑌦𑍍𑌧𑌾 𑌅𑌪𑌿 𑌤𑍂𑌰𑍍𑌣𑌮𑌾𑌯𑌯𑍁𑌃 ॥6॥

𑌵𑌿𑌲𑍋𑌲𑌪𑌿𑌂𑌛𑌂 𑌚𑌿𑌕𑍁𑌰𑍇 𑌕𑌪𑍋𑌲𑌯𑍋𑌃
𑌸𑌮𑍁𑌲𑍍𑌲𑌸𑌤𑍍𑌕𑍁𑌂𑌡𑌲𑌮𑌾𑌰𑍍𑌦𑍍𑌰𑌮𑍀𑌕𑍍𑌷𑌿𑌤𑍇 ।
𑌨𑌿𑌧𑌾𑌯 𑌬𑌾𑌹𑍁𑌂 𑌸𑍁𑌹𑍃𑌦𑌂𑌸𑌸𑍀𑌮𑌨𑌿
𑌸𑍍𑌥𑌿𑌤𑌂 𑌭𑌵𑌂𑌤𑌂 𑌸𑌮𑌲𑍋𑌕𑌯𑌂𑌤 𑌤𑌾𑌃 ॥𑍭॥

𑌤𑌦𑌾 𑌚 𑌕𑌾𑌚𑌿𑌤𑍍𑌤𑍍𑌵𑌦𑍁𑌪𑌾𑌗𑌮𑍋𑌦𑍍𑌯𑌤𑌾
𑌗𑍃𑌹𑍀𑌤𑌹𑌸𑍍𑌤𑌾 𑌦𑌯𑌿𑌤𑍇𑌨 𑌯𑌜𑍍𑌵𑌨𑌾 ।
𑌤𑌦𑍈𑌵 𑌸𑌂𑌚𑌿𑌂𑌤𑍍𑌯 𑌭𑌵𑌂𑌤𑌮𑌂𑌜𑌸𑌾
𑌵𑌿𑌵𑍇𑌶 𑌕𑍈𑌵𑌲𑍍𑌯𑌮𑌹𑍋 𑌕𑍃𑌤𑌿𑌨𑍍𑌯𑌸𑍌 ॥𑍮॥

𑌆𑌦𑌾𑌯 𑌭𑍋𑌜𑍍𑌯𑌾𑌨𑍍𑌯𑌨𑍁𑌗𑍃𑌹𑍍𑌯 𑌤𑌾𑌃 𑌪𑍁𑌨-
𑌸𑍍𑌤𑍍𑌵𑌦𑌂𑌗𑌸𑌂𑌗𑌸𑍍𑌪𑍃𑌹𑌯𑍋𑌜𑍍𑌝𑌤𑍀𑌰𑍍𑌗𑍃𑌹𑌮𑍍 ।
𑌵𑌿𑌲𑍋𑌕𑍍𑌯 𑌯𑌜𑍍𑌞𑌾𑌯 𑌵𑌿𑌸𑌰𑍍𑌜𑌯𑌨𑍍𑌨𑌿𑌮𑌾-
𑌶𑍍𑌚𑌕𑌰𑍍𑌥 𑌭𑌰𑍍𑌤𑍃𑌨𑌪𑌿 𑌤𑌾𑌸𑍍𑌵𑌗𑌰𑍍𑌹𑌣𑌾𑌨𑍍 ॥𑍯॥

𑌨𑌿𑌰𑍂𑌪𑍍𑌯 𑌦𑍋𑌷𑌂 𑌨𑌿𑌜𑌮𑌂𑌗𑌨𑌾𑌜𑌨𑍇
𑌵𑌿𑌲𑍋𑌕𑍍𑌯 𑌭𑌕𑍍𑌤𑌿𑌂 𑌚 𑌪𑍁𑌨𑌰𑍍𑌵𑌿𑌚𑌾𑌰𑌿𑌭𑌿𑌃
𑌪𑍍𑌰𑌬𑍁𑌦𑍍𑌧𑌤𑌤𑍍𑌤𑍍𑌵𑍈𑌸𑍍𑌤𑍍𑌵𑌮𑌭𑌿𑌷𑍍𑌟𑍁𑌤𑍋 𑌦𑍍𑌵𑌿𑌜𑍈-
𑌰𑍍𑌮𑌰𑍁𑌤𑍍𑌪𑍁𑌰𑌾𑌧𑍀𑌶 𑌨𑌿𑌰𑍁𑌂𑌧𑌿 𑌮𑍇 𑌗𑌦𑌾𑌨𑍍 ॥10॥