𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 5𑍭 – 𑌪𑍍𑌰𑌲𑌂𑌬𑌾𑌸𑍁𑌰𑌵𑌧𑌮𑍍

𑌰𑌾𑌮𑌸𑌖𑌃 𑌕𑍍𑌵𑌾𑌪𑌿 𑌦𑌿𑌨𑍇 𑌕𑌾𑌮𑌦 𑌭𑌗𑌵𑌨𑍍 𑌗𑌤𑍋 𑌭𑌵𑌾𑌨𑍍 𑌵𑌿𑌪𑌿𑌨𑌮𑍍 ।
𑌸𑍂𑌨𑍁𑌭𑌿𑌰𑌪𑌿 𑌗𑍋𑌪𑌾𑌨𑌾𑌂 𑌧𑍇𑌨𑍁𑌭𑌿𑌰𑌭𑌿𑌸𑌂𑌵𑍃𑌤𑍋 𑌲𑌸𑌦𑍍𑌵𑍇𑌷𑌃 ॥1॥

𑌸𑌂𑌦𑌰𑍍𑌶𑌯𑌨𑍍 𑌬𑌲𑌾𑌯 𑌸𑍍𑌵𑍈𑌰𑌂 𑌵𑍃𑌂𑌦𑌾𑌵𑌨𑌶𑍍𑌰𑌿𑌯𑌂 𑌵𑌿𑌮𑌲𑌾𑌮𑍍 ।
𑌕𑌾𑌂𑌡𑍀𑌰𑍈𑌃 𑌸𑌹 𑌬𑌾𑌲𑍈𑌰𑍍𑌭𑌾𑌂𑌡𑍀𑌰𑌕𑌮𑌾𑌗𑌮𑍋 𑌵𑌟𑌂 𑌕𑍍𑌰𑍀𑌡𑌨𑍍 ॥2॥

𑌤𑌾𑌵𑌤𑍍𑌤𑌾𑌵𑌕𑌨𑌿𑌧𑌨𑌸𑍍𑌪𑍃𑌹𑌯𑌾𑌲𑍁𑌰𑍍𑌗𑍋𑌪𑌮𑍂𑌰𑍍𑌤𑌿𑌰𑌦𑌯𑌾𑌲𑍁𑌃 ।
𑌦𑍈𑌤𑍍𑌯𑌃 𑌪𑍍𑌰𑌲𑌂𑌬𑌨𑌾𑌮𑌾 𑌪𑍍𑌰𑌲𑌂𑌬𑌬𑌾𑌹𑍁𑌂 𑌭𑌵𑌂𑌤𑌮𑌾𑌪𑍇𑌦𑍇 ॥3॥

𑌜𑌾𑌨𑌨𑍍𑌨𑌪𑍍𑌯𑌵𑌿𑌜𑌾𑌨𑌨𑍍𑌨𑌿𑌵 𑌤𑍇𑌨 𑌸𑌮𑌂 𑌨𑌿𑌬𑌦𑍍𑌧𑌸𑍌𑌹𑌾𑌰𑍍𑌦𑌃 ।
𑌵𑌟𑌨𑌿𑌕𑌟𑍇 𑌪𑌟𑍁𑌪𑌶𑍁𑌪𑌵𑍍𑌯𑌾𑌬𑌦𑍍𑌧𑌂 𑌦𑍍𑌵𑌂𑌦𑍍𑌵𑌯𑍁𑌦𑍍𑌧𑌮𑌾𑌰𑌬𑍍𑌧𑌾𑌃 ॥4॥

𑌗𑍋𑌪𑌾𑌨𑍍 𑌵𑌿𑌭𑌜𑍍𑌯 𑌤𑌨𑍍𑌵𑌨𑍍 𑌸𑌂𑌘𑌂 𑌬𑌲𑌭𑌦𑍍𑌰𑌕𑌂 𑌭𑌵𑌤𑍍𑌕𑌮𑌪𑌿 ।
𑌤𑍍𑌵𑌦𑍍𑌬𑌲𑌭𑍀𑌰𑍁𑌂 𑌦𑍈𑌤𑍍𑌯𑌂 𑌤𑍍𑌵𑌦𑍍𑌬𑌲𑌗𑌤𑌮𑌨𑍍𑌵𑌮𑌨𑍍𑌯𑌥𑌾 𑌭𑌗𑌵𑌨𑍍 ॥5॥

𑌕𑌲𑍍𑌪𑌿𑌤𑌵𑌿𑌜𑍇𑌤𑍃𑌵𑌹𑌨𑍇 𑌸𑌮𑌰𑍇 𑌪𑌰𑌯𑍂𑌥𑌗𑌂 𑌸𑍍𑌵𑌦𑌯𑌿𑌤𑌤𑌰𑌮𑍍 ।
𑌶𑍍𑌰𑍀𑌦𑌾𑌮𑌾𑌨𑌮𑌧𑌤𑍍𑌥𑌾𑌃 𑌪𑌰𑌾𑌜𑌿𑌤𑍋 𑌭𑌕𑍍𑌤𑌦𑌾𑌸𑌤𑌾𑌂 𑌪𑍍𑌰𑌥𑌯𑌨𑍍 ॥6॥

𑌏𑌵𑌂 𑌬𑌹𑍁𑌷𑍁 𑌵𑌿𑌭𑍂𑌮𑌨𑍍 𑌬𑌾𑌲𑍇𑌷𑍁 𑌵𑌹𑌤𑍍𑌸𑍁 𑌵𑌾𑌹𑍍𑌯𑌮𑌾𑌨𑍇𑌷𑍁 ।
𑌰𑌾𑌮𑌵𑌿𑌜𑌿𑌤𑌃 𑌪𑍍𑌰𑌲𑌂𑌬𑍋 𑌜𑌹𑌾𑌰 𑌤𑌂 𑌦𑍂𑌰𑌤𑍋 𑌭𑌵𑌦𑍍𑌭𑍀𑌤𑍍𑌯𑌾 ॥𑍭॥

𑌤𑍍𑌵𑌦𑍍𑌦𑍂𑌰𑌂 𑌗𑌮𑌯𑌂𑌤𑌂 𑌤𑌂 𑌦𑍃𑌷𑍍𑌟𑍍𑌵𑌾 𑌹𑌲𑌿𑌨𑌿 𑌵𑌿𑌹𑌿𑌤𑌗𑌰𑌿𑌮𑌭𑌰𑍇 ।
𑌦𑍈𑌤𑍍𑌯𑌃 𑌸𑍍𑌵𑌰𑍂𑌪𑌮𑌾𑌗𑌾𑌦𑍍𑌯𑌦𑍍𑌰𑍂𑌪𑌾𑌤𑍍 𑌸 𑌹𑌿 𑌬𑌲𑍋𑌽𑌪𑌿 𑌚𑌕𑌿𑌤𑍋𑌽𑌭𑍂𑌤𑍍 ॥𑍮॥

𑌉𑌚𑍍𑌚𑌤𑌯𑌾 𑌦𑍈𑌤𑍍𑌯𑌤𑌨𑍋𑌸𑍍𑌤𑍍𑌵𑌨𑍍𑌮𑍁𑌖𑌮𑌾𑌲𑍋𑌕𑍍𑌯 𑌦𑍂𑌰𑌤𑍋 𑌰𑌾𑌮𑌃 ।
𑌵𑌿𑌗𑌤𑌭𑌯𑍋 𑌦𑍃𑌢𑌮𑍁𑌷𑍍𑌟𑍍𑌯𑌾 𑌭𑍃𑌶𑌦𑍁𑌷𑍍𑌟𑌂 𑌸𑌪𑌦𑌿 𑌪𑌿𑌷𑍍𑌟𑌵𑌾𑌨𑍇𑌨𑌮𑍍 ॥𑍯॥

𑌹𑌤𑍍𑌵𑌾 𑌦𑌾𑌨𑌵𑌵𑍀𑌰𑌂 𑌪𑍍𑌰𑌾𑌪𑍍𑌤𑌂 𑌬𑌲𑌮𑌾𑌲𑌿𑌲𑌿𑌂𑌗𑌿𑌥 𑌪𑍍𑌰𑍇𑌮𑍍𑌣𑌾 ।
𑌤𑌾𑌵𑌨𑍍𑌮𑌿𑌲𑌤𑍋𑌰𑍍𑌯𑍁𑌵𑌯𑍋𑌃 𑌶𑌿𑌰𑌸𑌿 𑌕𑍃𑌤𑌾 𑌪𑍁𑌷𑍍𑌪𑌵𑍃𑌷𑍍𑌟𑌿𑌰𑌮𑌰𑌗𑌣𑍈𑌃 ॥10॥

𑌆𑌲𑌂𑌬𑍋 𑌭𑍁𑌵𑌨𑌾𑌨𑌾𑌂 𑌪𑍍𑌰𑌾𑌲𑌂𑌬𑌂 𑌨𑌿𑌧𑌨𑌮𑍇𑌵𑌮𑌾𑌰𑌚𑌯𑌨𑍍 ।
𑌕𑌾𑌲𑌂 𑌵𑌿𑌹𑌾𑌯 𑌸𑌦𑍍𑌯𑍋 𑌲𑍋𑌲𑌂𑌬𑌰𑍁𑌚𑍇 𑌹𑌰𑍇 𑌹𑌰𑍇𑌃 𑌕𑍍𑌲𑍇𑌶𑌾𑌨𑍍 ॥11॥