𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 52 – 𑌵𑌤𑍍𑌸𑌸𑍍𑌤𑍇𑌯𑌂 𑌤𑌥𑌾 𑌬𑍍𑌰𑌹𑍍𑌮𑌗𑌰𑍍𑌵𑌶𑌮𑌨𑌮𑍍

𑌅𑌨𑍍𑌯𑌾𑌵𑌤𑌾𑌰𑌨𑌿𑌕𑌰𑍇𑌷𑍍𑌵𑌨𑌿𑌰𑍀𑌕𑍍𑌷𑌿𑌤𑌂 𑌤𑍇
𑌭𑍂𑌮𑌾𑌤𑌿𑌰𑍇𑌕𑌮𑌭𑌿𑌵𑍀𑌕𑍍𑌷𑍍𑌯 𑌤𑌦𑌾𑌘𑌮𑍋𑌕𑍍𑌷𑍇 ।
𑌬𑍍𑌰𑌹𑍍𑌮𑌾 𑌪𑌰𑍀𑌕𑍍𑌷𑌿𑌤𑍁𑌮𑌨𑌾𑌃 𑌸 𑌪𑌰𑍋𑌕𑍍𑌷𑌭𑌾𑌵𑌂
𑌨𑌿𑌨𑍍𑌯𑍇𑌽𑌥 𑌵𑌤𑍍𑌸𑌕𑌗𑌣𑌾𑌨𑍍 𑌪𑍍𑌰𑌵𑌿𑌤𑌤𑍍𑌯 𑌮𑌾𑌯𑌾𑌮𑍍 ॥1॥

𑌵𑌤𑍍𑌸𑌾𑌨𑌵𑍀𑌕𑍍𑌷𑍍𑌯 𑌵𑌿𑌵𑌶𑍇 𑌪𑌶𑍁𑌪𑍋𑌤𑍍𑌕𑌰𑍇 𑌤𑌾-
𑌨𑌾𑌨𑍇𑌤𑍁𑌕𑌾𑌮 𑌇𑌵 𑌧𑌾𑌤𑍃𑌮𑌤𑌾𑌨𑍁𑌵𑌰𑍍𑌤𑍀 ।
𑌤𑍍𑌵𑌂 𑌸𑌾𑌮𑌿𑌭𑍁𑌕𑍍𑌤𑌕𑌬𑌲𑍋 𑌗𑌤𑌵𑌾𑌂𑌸𑍍𑌤𑌦𑌾𑌨𑍀𑌂
𑌭𑍁𑌕𑍍𑌤𑌾𑌂𑌸𑍍𑌤𑌿𑌰𑍋𑌽𑌧𑌿𑌤 𑌸𑌰𑍋𑌜𑌭𑌵𑌃 𑌕𑍁𑌮𑌾𑌰𑌾𑌨𑍍 ॥2॥

𑌵𑌤𑍍𑌸𑌾𑌯𑌿𑌤𑌸𑍍𑌤𑌦𑌨𑍁 𑌗𑍋𑌪𑌗𑌣𑌾𑌯𑌿𑌤𑌸𑍍𑌤𑍍𑌵𑌂
𑌶𑌿𑌕𑍍𑌯𑌾𑌦𑌿𑌭𑌾𑌂𑌡𑌮𑍁𑌰𑌲𑍀𑌗𑌵𑌲𑌾𑌦𑌿𑌰𑍂𑌪𑌃 ।
𑌪𑍍𑌰𑌾𑌗𑍍𑌵𑌦𑍍𑌵𑌿𑌹𑍃𑌤𑍍𑌯 𑌵𑌿𑌪𑌿𑌨𑍇𑌷𑍁 𑌚𑌿𑌰𑌾𑌯 𑌸𑌾𑌯𑌂
𑌤𑍍𑌵𑌂 𑌮𑌾𑌯𑌯𑌾𑌽𑌥 𑌬𑌹𑍁𑌧𑌾 𑌵𑍍𑌰𑌜𑌮𑌾𑌯𑌯𑌾𑌥 ॥3॥

𑌤𑍍𑌵𑌾𑌮𑍇𑌵 𑌶𑌿𑌕𑍍𑌯𑌗𑌵𑌲𑌾𑌦𑌿𑌮𑌯𑌂 𑌦𑌧𑌾𑌨𑍋
𑌭𑍂𑌯𑌸𑍍𑌤𑍍𑌵𑌮𑍇𑌵 𑌪𑌶𑍁𑌵𑌤𑍍𑌸𑌕𑌬𑌾𑌲𑌰𑍂𑌪𑌃 ।
𑌗𑍋𑌰𑍂𑌪𑌿𑌣𑍀𑌭𑌿𑌰𑌪𑌿 𑌗𑍋𑌪𑌵𑌧𑍂𑌮𑌯𑍀𑌭𑌿-
𑌰𑌾𑌸𑌾𑌦𑌿𑌤𑍋𑌽𑌸𑌿 𑌜𑌨𑌨𑍀𑌭𑌿𑌰𑌤𑌿𑌪𑍍𑌰𑌹𑌰𑍍𑌷𑌾𑌤𑍍 ॥4॥

𑌜𑍀𑌵𑌂 𑌹𑌿 𑌕𑌂𑌚𑌿𑌦𑌭𑌿𑌮𑌾𑌨𑌵𑌶𑌾𑌤𑍍𑌸𑍍𑌵𑌕𑍀𑌯𑌂
𑌮𑌤𑍍𑌵𑌾 𑌤𑌨𑍂𑌜 𑌇𑌤𑌿 𑌰𑌾𑌗𑌭𑌰𑌂 𑌵𑌹𑌂𑌤𑍍𑌯𑌃 ।
𑌆𑌤𑍍𑌮𑌾𑌨𑌮𑍇𑌵 𑌤𑍁 𑌭𑌵𑌂𑌤𑌮𑌵𑌾𑌪𑍍𑌯 𑌸𑍂𑌨𑍁𑌂
𑌪𑍍𑌰𑍀𑌤𑌿𑌂 𑌯𑌯𑍁𑌰𑍍𑌨 𑌕𑌿𑌯𑌤𑍀𑌂 𑌵𑌨𑌿𑌤𑌾𑌶𑍍𑌚 𑌗𑌾𑌵𑌃 ॥5॥

𑌏𑌵𑌂 𑌪𑍍𑌰𑌤𑌿𑌕𑍍𑌷𑌣𑌵𑌿𑌜𑍃𑌂𑌭𑌿𑌤𑌹𑌰𑍍𑌷𑌭𑌾𑌰-
𑌨𑌿𑌶𑍍𑌶𑍇𑌷𑌗𑍋𑌪𑌗𑌣𑌲𑌾𑌲𑌿𑌤𑌭𑍂𑌰𑌿𑌮𑍂𑌰𑍍𑌤𑌿𑌮𑍍 ।
𑌤𑍍𑌵𑌾𑌮𑌗𑍍𑌰𑌜𑍋𑌽𑌪𑌿 𑌬𑍁𑌬𑍁𑌧𑍇 𑌕𑌿𑌲 𑌵𑌤𑍍𑌸𑌰𑌾𑌂𑌤𑍇
𑌬𑍍𑌰𑌹𑍍𑌮𑌾𑌤𑍍𑌮𑌨𑍋𑌰𑌪𑌿 𑌮𑌹𑌾𑌨𑍍 𑌯𑍁𑌵𑌯𑍋𑌰𑍍𑌵𑌿𑌶𑍇𑌷𑌃 ॥6॥

𑌵𑌰𑍍𑌷𑌾𑌵𑌧𑍌 𑌨𑌵𑌪𑍁𑌰𑌾𑌤𑌨𑌵𑌤𑍍𑌸𑌪𑌾𑌲𑌾𑌨𑍍
𑌦𑍃𑌷𑍍𑌟𑍍𑌵𑌾 𑌵𑌿𑌵𑍇𑌕𑌮𑌸𑍃𑌣𑍇 𑌦𑍍𑌰𑍁𑌹𑌿𑌣𑍇 𑌵𑌿𑌮𑍂𑌢𑍇 ।
𑌪𑍍𑌰𑌾𑌦𑍀𑌦𑍃𑌶𑌃 𑌪𑍍𑌰𑌤𑌿𑌨𑌵𑌾𑌨𑍍 𑌮𑌕𑍁𑌟𑌾𑌂𑌗𑌦𑌾𑌦𑌿
𑌭𑍂𑌷𑌾𑌂𑌶𑍍𑌚𑌤𑍁𑌰𑍍𑌭𑍁𑌜𑌯𑍁𑌜𑌃 𑌸𑌜𑌲𑌾𑌂𑌬𑍁𑌦𑌾𑌭𑌾𑌨𑍍 ॥𑍭॥

𑌪𑍍𑌰𑌤𑍍𑌯𑍇𑌕𑌮𑍇𑌵 𑌕𑌮𑌲𑌾𑌪𑌰𑌿𑌲𑌾𑌲𑌿𑌤𑌾𑌂𑌗𑌾𑌨𑍍
𑌭𑍋𑌗𑍀𑌂𑌦𑍍𑌰𑌭𑍋𑌗𑌶𑌯𑌨𑌾𑌨𑍍 𑌨𑌯𑌨𑌾𑌭𑌿𑌰𑌾𑌮𑌾𑌨𑍍 ।
𑌲𑍀𑌲𑌾𑌨𑌿𑌮𑍀𑌲𑌿𑌤𑌦𑍃𑌶𑌃 𑌸𑌨𑌕𑌾𑌦𑌿𑌯𑍋𑌗𑌿-
𑌵𑍍𑌯𑌾𑌸𑍇𑌵𑌿𑌤𑌾𑌨𑍍 𑌕𑌮𑌲𑌭𑍂𑌰𑍍𑌭𑌵𑌤𑍋 𑌦𑌦𑌰𑍍𑌶 ॥𑍮॥

𑌨𑌾𑌰𑌾𑌯𑌣𑌾𑌕𑍃𑌤𑌿𑌮𑌸𑌂𑌖𑍍𑌯𑌤𑌮𑌾𑌂 𑌨𑌿𑌰𑍀𑌕𑍍𑌷𑍍𑌯
𑌸𑌰𑍍𑌵𑌤𑍍𑌰 𑌸𑍇𑌵𑌕𑌮𑌪𑌿 𑌸𑍍𑌵𑌮𑌵𑍇𑌕𑍍𑌷𑍍𑌯 𑌧𑌾𑌤𑌾 ।
𑌮𑌾𑌯𑌾𑌨𑌿𑌮𑌗𑍍𑌨𑌹𑍃𑌦𑌯𑍋 𑌵𑌿𑌮𑍁𑌮𑍋𑌹 𑌯𑌾𑌵-
𑌦𑍇𑌕𑍋 𑌬𑌭𑍂𑌵𑌿𑌥 𑌤𑌦𑌾 𑌕𑌬𑌲𑌾𑌰𑍍𑌧𑌪𑌾𑌣𑌿𑌃 ॥𑍯॥

𑌨𑌶𑍍𑌯𑌨𑍍𑌮𑌦𑍇 𑌤𑌦𑌨𑍁 𑌵𑌿𑌶𑍍𑌵𑌪𑌤𑌿𑌂 𑌮𑍁𑌹𑍁𑌸𑍍𑌤𑍍𑌵𑌾𑌂
𑌨𑌤𑍍𑌵𑌾 𑌚 𑌨𑍂𑌤𑌵𑌤𑌿 𑌧𑌾𑌤𑌰𑌿 𑌧𑌾𑌮 𑌯𑌾𑌤𑍇 ।
𑌪𑍋𑌤𑍈𑌃 𑌸𑌮𑌂 𑌪𑍍𑌰𑌮𑍁𑌦𑌿𑌤𑍈𑌃 𑌪𑍍𑌰𑌵𑌿𑌶𑌨𑍍 𑌨𑌿𑌕𑍇𑌤𑌂
𑌵𑌾𑌤𑌾𑌲𑌯𑌾𑌧𑌿𑌪 𑌵𑌿𑌭𑍋 𑌪𑌰𑌿𑌪𑌾𑌹𑌿 𑌰𑍋𑌗𑌾𑌤𑍍 ॥10॥