𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 50 – 𑌵𑌤𑍍𑌸𑌾𑌸𑍁𑌰-𑌬𑌕𑌾𑌸𑍁𑌰𑌯𑍋𑌃 𑌵𑌧𑌮𑍍

𑌤𑌰𑌲𑌮𑌧𑍁𑌕𑍃𑌤𑍍 𑌵𑍃𑌂𑌦𑍇 𑌵𑍃𑌂𑌦𑌾𑌵𑌨𑍇𑌽𑌥 𑌮𑌨𑍋𑌹𑌰𑍇
𑌪𑌶𑍁𑌪𑌶𑌿𑌶𑍁𑌭𑌿𑌃 𑌸𑌾𑌕𑌂 𑌵𑌤𑍍𑌸𑌾𑌨𑍁𑌪𑌾𑌲𑌨𑌲𑍋𑌲𑍁𑌪𑌃 ।
𑌹𑌲𑌧𑌰𑌸𑌖𑍋 𑌦𑍇𑌵 𑌶𑍍𑌰𑍀𑌮𑌨𑍍 𑌵𑌿𑌚𑍇𑌰𑌿𑌥 𑌧𑌾𑌰𑌯𑌨𑍍
𑌗𑌵𑌲𑌮𑍁𑌰𑌲𑍀𑌵𑍇𑌤𑍍𑌰𑌂 𑌨𑍇𑌤𑍍𑌰𑌾𑌭𑌿𑌰𑌾𑌮𑌤𑌨𑍁𑌦𑍍𑌯𑍁𑌤𑌿𑌃 ॥1॥

𑌵𑌿𑌹𑌿𑌤𑌜𑌗𑌤𑍀𑌰𑌕𑍍𑌷𑌂 𑌲𑌕𑍍𑌷𑍍𑌮𑍀𑌕𑌰𑌾𑌂𑌬𑍁𑌜𑌲𑌾𑌲𑌿𑌤𑌂
𑌦𑌦𑌤𑌿 𑌚𑌰𑌣𑌦𑍍𑌵𑌂𑌦𑍍𑌵𑌂 𑌵𑍃𑌂𑌦𑌾𑌵𑌨𑍇 𑌤𑍍𑌵𑌯𑌿 𑌪𑌾𑌵𑌨𑍇 ।
𑌕𑌿𑌮𑌿𑌵 𑌨 𑌬𑌭𑍌 𑌸𑌂𑌪𑌤𑍍𑌸𑌂𑌪𑍂𑌰𑌿𑌤𑌂 𑌤𑌰𑍁𑌵𑌲𑍍𑌲𑌰𑍀-
𑌸𑌲𑌿𑌲𑌧𑌰𑌣𑍀𑌗𑍋𑌤𑍍𑌰𑌕𑍍𑌷𑍇𑌤𑍍𑌰𑌾𑌦𑌿𑌕𑌂 𑌕𑌮𑌲𑌾𑌪𑌤𑍇 ॥2॥

𑌵𑌿𑌲𑌸𑌦𑍁𑌲𑌪𑍇 𑌕𑌾𑌂𑌤𑌾𑌰𑌾𑌂𑌤𑍇 𑌸𑌮𑍀𑌰𑌣𑌶𑍀𑌤𑌲𑍇
𑌵𑌿𑌪𑍁𑌲𑌯𑌮𑍁𑌨𑌾𑌤𑍀𑌰𑍇 𑌗𑍋𑌵𑌰𑍍𑌧𑌨𑌾𑌚𑌲𑌮𑍂𑌰𑍍𑌧𑌸𑍁 ।
𑌲𑌲𑌿𑌤𑌮𑍁𑌰𑌲𑍀𑌨𑌾𑌦𑌃 𑌸𑌂𑌚𑌾𑌰𑌯𑌨𑍍 𑌖𑌲𑍁 𑌵𑌾𑌤𑍍𑌸𑌕𑌂
𑌕𑍍𑌵𑌚𑌨 𑌦𑌿𑌵𑌸𑍇 𑌦𑍈𑌤𑍍𑌯𑌂 𑌵𑌤𑍍𑌸𑌾𑌕𑍃𑌤𑌿𑌂 𑌤𑍍𑌵𑌮𑍁𑌦𑍈𑌕𑍍𑌷𑌥𑌾𑌃 ॥3॥

𑌰𑌭𑌸𑌵𑌿𑌲𑌸𑌤𑍍𑌪𑍁𑌚𑍍𑌛𑌂 𑌵𑌿𑌚𑍍𑌛𑌾𑌯𑌤𑍋𑌽𑌸𑍍𑌯 𑌵𑌿𑌲𑍋𑌕𑌯𑌨𑍍
𑌕𑌿𑌮𑌪𑌿 𑌵𑌲𑌿𑌤𑌸𑍍𑌕𑌂𑌧𑌂 𑌰𑌂𑌧𑍍𑌰𑌪𑍍𑌰𑌤𑍀𑌕𑍍𑌷𑌮𑍁𑌦𑍀𑌕𑍍𑌷𑌿𑌤𑌮𑍍 ।
𑌤𑌮𑌥 𑌚𑌰𑌣𑍇 𑌬𑌿𑌭𑍍𑌰𑌦𑍍𑌵𑌿𑌭𑍍𑌰𑌾𑌮𑌯𑌨𑍍 𑌮𑍁𑌹𑍁𑌰𑍁𑌚𑍍𑌚𑌕𑍈𑌃
𑌕𑍁𑌹𑌚𑌨 𑌮𑌹𑌾𑌵𑍃𑌕𑍍𑌷𑍇 𑌚𑌿𑌕𑍍𑌷𑍇𑌪𑌿𑌥 𑌕𑍍𑌷𑌤𑌜𑍀𑌵𑌿𑌤𑌮𑍍 ॥4॥

𑌨𑌿𑌪𑌤𑌤𑌿 𑌮𑌹𑌾𑌦𑍈𑌤𑍍𑌯𑍇 𑌜𑌾𑌤𑍍𑌯𑌾 𑌦𑍁𑌰𑌾𑌤𑍍𑌮𑌨𑌿 𑌤𑌤𑍍𑌕𑍍𑌷𑌣𑌂
𑌨𑌿𑌪𑌤𑌨𑌜𑌵𑌕𑍍𑌷𑍁𑌣𑍍𑌣𑌕𑍍𑌷𑍋𑌣𑍀𑌰𑍁𑌹𑌕𑍍𑌷𑌤𑌕𑌾𑌨𑌨𑍇 ।
𑌦𑌿𑌵𑌿 𑌪𑌰𑌿𑌮𑌿𑌲𑌤𑍍 𑌵𑍃𑌂𑌦𑌾 𑌵𑍃𑌂𑌦𑌾𑌰𑌕𑌾𑌃 𑌕𑍁𑌸𑍁𑌮𑍋𑌤𑍍𑌕𑌰𑍈𑌃
𑌶𑌿𑌰𑌸𑌿 𑌭𑌵𑌤𑍋 𑌹𑌰𑍍𑌷𑌾𑌦𑍍𑌵𑌰𑍍𑌷𑌂𑌤𑌿 𑌨𑌾𑌮 𑌤𑌦𑌾 𑌹𑌰𑍇 ॥5॥

𑌸𑍁𑌰𑌭𑌿𑌲𑌤𑌮𑌾 𑌮𑍂𑌰𑍍𑌧𑌨𑍍𑌯𑍂𑌰𑍍𑌧𑍍𑌵𑌂 𑌕𑍁𑌤𑌃 𑌕𑍁𑌸𑍁𑌮𑌾𑌵𑌲𑍀
𑌨𑌿𑌪𑌤𑌤𑌿 𑌤𑌵𑍇𑌤𑍍𑌯𑍁𑌕𑍍𑌤𑍋 𑌬𑌾𑌲𑍈𑌃 𑌸𑌹𑍇𑌲𑌮𑍁𑌦𑍈𑌰𑌯𑌃 ।
𑌝𑌟𑌿𑌤𑌿 𑌦𑌨𑍁𑌜𑌕𑍍𑌷𑍇𑌪𑍇𑌣𑍋𑌰𑍍𑌧𑍍𑌵𑌂 𑌗𑌤𑌸𑍍𑌤𑌰𑍁𑌮𑌂𑌡𑌲𑌾𑌤𑍍
𑌕𑍁𑌸𑍁𑌮𑌨𑌿𑌕𑌰𑌃 𑌸𑍋𑌽𑌯𑌂 𑌨𑍂𑌨𑌂 𑌸𑌮𑍇𑌤𑌿 𑌶𑌨𑍈𑌰𑌿𑌤𑌿 ॥6॥

𑌕𑍍𑌵𑌚𑌨 𑌦𑌿𑌵𑌸𑍇 𑌭𑍂𑌯𑍋 𑌭𑍂𑌯𑌸𑍍𑌤𑌰𑍇 𑌪𑌰𑍁𑌷𑌾𑌤𑌪𑍇
𑌤𑌪𑌨𑌤𑌨𑌯𑌾𑌪𑌾𑌥𑌃 𑌪𑌾𑌤𑍁𑌂 𑌗𑌤𑌾 𑌭𑌵𑌦𑌾𑌦𑌯𑌃 ।
𑌚𑌲𑌿𑌤𑌗𑌰𑍁𑌤𑌂 𑌪𑍍𑌰𑍇𑌕𑍍𑌷𑌾𑌮𑌾𑌸𑍁𑌰𑍍𑌬𑌕𑌂 𑌖𑌲𑍁 𑌵𑌿𑌸𑍍𑌮𑍃𑌤𑌂
𑌕𑍍𑌷𑌿𑌤𑌿𑌧𑌰𑌗𑌰𑍁𑌚𑍍𑌛𑍇𑌦𑍇 𑌕𑍈𑌲𑌾𑌸𑌶𑍈𑌲𑌮𑌿𑌵𑌾𑌪𑌰𑌮𑍍 ॥𑍭॥

𑌪𑌿𑌬𑌤𑌿 𑌸𑌲𑌿𑌲𑌂 𑌗𑍋𑌪𑌵𑍍𑌰𑌾𑌤𑍇 𑌭𑌵𑌂𑌤𑌮𑌭𑌿𑌦𑍍𑌰𑍁𑌤𑌃
𑌸 𑌕𑌿𑌲 𑌨𑌿𑌗𑌿𑌲𑌨𑍍𑌨𑌗𑍍𑌨𑌿𑌪𑍍𑌰𑌖𑍍𑌯𑌂 𑌪𑍁𑌨𑌰𑍍𑌦𑍍𑌰𑍁𑌤𑌮𑍁𑌦𑍍𑌵𑌮𑌨𑍍 ।
𑌦𑌲𑌯𑌿𑌤𑍁𑌮𑌗𑌾𑌤𑍍𑌤𑍍𑌰𑍋𑌟𑍍𑌯𑌾𑌃 𑌕𑍋𑌟𑍍𑌯𑌾 𑌤𑌦𑌾𑌽𑌽𑌶𑍁 𑌭𑌵𑌾𑌨𑍍 𑌵𑌿𑌭𑍋
𑌖𑌲𑌜𑌨𑌭𑌿𑌦𑌾𑌚𑍁𑌂𑌚𑍁𑌶𑍍𑌚𑌂𑌚𑍂 𑌪𑍍𑌰𑌗𑍃𑌹𑍍𑌯 𑌦𑌦𑌾𑌰 𑌤𑌮𑍍 ॥𑍮॥

𑌸𑌪𑌦𑌿 𑌸𑌹𑌜𑌾𑌂 𑌸𑌂𑌦𑍍𑌰𑌷𑍍𑌟𑍁𑌂 𑌵𑌾 𑌮𑍃𑌤𑌾𑌂 𑌖𑌲𑍁 𑌪𑍂𑌤𑌨𑌾-
𑌮𑌨𑍁𑌜𑌮𑌘𑌮𑌪𑍍𑌯𑌗𑍍𑌰𑍇 𑌗𑌤𑍍𑌵𑌾 𑌪𑍍𑌰𑌤𑍀𑌕𑍍𑌷𑌿𑌤𑍁𑌮𑍇𑌵 𑌵𑌾 ।
𑌶𑌮𑌨𑌨𑌿𑌲𑌯𑌂 𑌯𑌾𑌤𑍇 𑌤𑌸𑍍𑌮𑌿𑌨𑍍 𑌬𑌕𑍇 𑌸𑍁𑌮𑌨𑍋𑌗𑌣𑍇
𑌕𑌿𑌰𑌤𑌿 𑌸𑍁𑌮𑌨𑍋𑌵𑍃𑌂𑌦𑌂 𑌵𑍃𑌂𑌦𑌾𑌵𑌨𑌾𑌤𑍍 𑌗𑍃𑌹𑌮𑍈𑌯𑌥𑌾𑌃 ॥𑍯॥

𑌲𑌲𑌿𑌤𑌮𑍁𑌰𑌲𑍀𑌨𑌾𑌦𑌂 𑌦𑍂𑌰𑌾𑌨𑍍𑌨𑌿𑌶𑌮𑍍𑌯 𑌵𑌧𑍂𑌜𑌨𑍈-
𑌸𑍍𑌤𑍍𑌵𑌰𑌿𑌤𑌮𑍁𑌪𑌗𑌮𑍍𑌯𑌾𑌰𑌾𑌦𑌾𑌰𑍂𑌢𑌮𑍋𑌦𑌮𑍁𑌦𑍀𑌕𑍍𑌷𑌿𑌤𑌃 ।
𑌜𑌨𑌿𑌤𑌜𑌨𑌨𑍀𑌨𑌂𑌦𑌾𑌨𑌂𑌦𑌃 𑌸𑌮𑍀𑌰𑌣𑌮𑌂𑌦𑌿𑌰-
𑌪𑍍𑌰𑌥𑌿𑌤𑌵𑌸𑌤𑍇 𑌶𑍌𑌰𑍇 𑌦𑍂𑌰𑍀𑌕𑍁𑌰𑍁𑌷𑍍𑌵 𑌮𑌮𑌾𑌮𑌯𑌾𑌨𑍍 ॥10॥