𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 4𑍭 – 𑌉𑌲𑍂𑌖𑌲𑌬𑌂𑌧𑌨𑌮𑍍

𑌏𑌕𑌦𑌾 𑌦𑌧𑌿𑌵𑌿𑌮𑌾𑌥𑌕𑌾𑌰𑌿𑌣𑍀𑌂 𑌮𑌾𑌤𑌰𑌂 𑌸𑌮𑍁𑌪𑌸𑍇𑌦𑌿𑌵𑌾𑌨𑍍 𑌭𑌵𑌾𑌨𑍍 ।
𑌸𑍍𑌤𑌨𑍍𑌯𑌲𑍋𑌲𑍁𑌪𑌤𑌯𑌾 𑌨𑌿𑌵𑌾𑌰𑌯𑌨𑍍𑌨𑌂𑌕𑌮𑍇𑌤𑍍𑌯 𑌪𑌪𑌿𑌵𑌾𑌨𑍍 𑌪𑌯𑍋𑌧𑌰𑍌 ॥1॥

𑌅𑌰𑍍𑌧𑌪𑍀𑌤𑌕𑍁𑌚𑌕𑍁𑌡𑍍𑌮𑌲𑍇 𑌤𑍍𑌵𑌯𑌿 𑌸𑍍𑌨𑌿𑌗𑍍𑌧𑌹𑌾𑌸𑌮𑌧𑍁𑌰𑌾𑌨𑌨𑌾𑌂𑌬𑍁𑌜𑍇 ।
𑌦𑍁𑌗𑍍𑌧𑌮𑍀𑌶 𑌦𑌹𑌨𑍇 𑌪𑌰𑌿𑌸𑍍𑌰𑍁𑌤𑌂 𑌧𑌰𑍍𑌤𑍁𑌮𑌾𑌶𑍁 𑌜𑌨𑌨𑍀 𑌜𑌗𑌾𑌮 𑌤𑍇 ॥2॥

𑌸𑌾𑌮𑌿𑌪𑍀𑌤𑌰𑌸𑌭𑌂𑌗𑌸𑌂𑌗𑌤𑌕𑍍𑌰𑍋𑌧𑌭𑌾𑌰𑌪𑌰𑌿𑌭𑍂𑌤𑌚𑍇𑌤𑌸𑌾।
𑌮𑌂𑌥𑌦𑌂𑌡𑌮𑍁𑌪𑌗𑍃𑌹𑍍𑌯 𑌪𑌾𑌟𑌿𑌤𑌂 𑌹𑌂𑌤 𑌦𑍇𑌵 𑌦𑌧𑌿𑌭𑌾𑌜𑌨𑌂 𑌤𑍍𑌵𑌯𑌾 ॥3॥

𑌉𑌚𑍍𑌚𑌲𑌦𑍍𑌧𑍍𑌵𑌨𑌿𑌤𑌮𑍁𑌚𑍍𑌚𑌕𑍈𑌸𑍍𑌤𑌦𑌾 𑌸𑌨𑍍𑌨𑌿𑌶𑌮𑍍𑌯 𑌜𑌨𑌨𑍀 𑌸𑌮𑌾𑌦𑍍𑌰𑍁𑌤𑌾 ।
𑌤𑍍𑌵𑌦𑍍𑌯𑌶𑍋𑌵𑌿𑌸𑌰𑌵𑌦𑍍𑌦𑌦𑌰𑍍𑌶 𑌸𑌾 𑌸𑌦𑍍𑌯 𑌏𑌵 𑌦𑌧𑌿 𑌵𑌿𑌸𑍍𑌤𑍃𑌤𑌂 𑌕𑍍𑌷𑌿𑌤𑍌 ॥4॥

𑌵𑍇𑌦𑌮𑌾𑌰𑍍𑌗𑌪𑌰𑌿𑌮𑌾𑌰𑍍𑌗𑌿𑌤𑌂 𑌰𑍁𑌷𑌾 𑌤𑍍𑌵𑌮𑌵𑍀𑌕𑍍𑌷𑍍𑌯 𑌪𑌰𑌿𑌮𑌾𑌰𑍍𑌗𑌯𑌂𑌤𑍍𑌯𑌸𑍌 ।
𑌸𑌂𑌦𑌦𑌰𑍍𑌶 𑌸𑍁𑌕𑍃𑌤𑌿𑌨𑍍𑌯𑍁𑌲𑍂𑌖𑌲𑍇 𑌦𑍀𑌯𑌮𑌾𑌨𑌨𑌵𑌨𑍀𑌤𑌮𑍋𑌤𑌵𑍇 ॥5॥

𑌤𑍍𑌵𑌾𑌂 𑌪𑍍𑌰𑌗𑍃𑌹𑍍𑌯 𑌬𑌤 𑌭𑍀𑌤𑌿𑌭𑌾𑌵𑌨𑌾𑌭𑌾𑌸𑍁𑌰𑌾𑌨𑌨𑌸𑌰𑍋𑌜𑌮𑌾𑌶𑍁 𑌸𑌾 ।
𑌰𑍋𑌷𑌰𑍂𑌷𑌿𑌤𑌮𑍁𑌖𑍀 𑌸𑌖𑍀𑌪𑍁𑌰𑍋 𑌬𑌂𑌧𑌨𑌾𑌯 𑌰𑌶𑌨𑌾𑌮𑍁𑌪𑌾𑌦𑌦𑍇 ॥6॥

𑌬𑌂𑌧𑍁𑌮𑌿𑌚𑍍𑌛𑌤𑌿 𑌯𑌮𑍇𑌵 𑌸𑌜𑍍𑌜𑌨𑌸𑍍𑌤𑌂 𑌭𑌵𑌂𑌤𑌮𑌯𑌿 𑌬𑌂𑌧𑍁𑌮𑌿𑌚𑍍𑌛𑌤𑍀 ।
𑌸𑌾 𑌨𑌿𑌯𑍁𑌜𑍍𑌯 𑌰𑌶𑌨𑌾𑌗𑍁𑌣𑌾𑌨𑍍 𑌬𑌹𑍂𑌨𑍍 𑌦𑍍𑌵𑍍𑌯𑌂𑌗𑍁𑌲𑍋𑌨𑌮𑌖𑌿𑌲𑌂 𑌕𑌿𑌲𑍈𑌕𑍍𑌷𑌤 ॥𑍭॥

𑌵𑌿𑌸𑍍𑌮𑌿𑌤𑍋𑌤𑍍𑌸𑍍𑌮𑌿𑌤𑌸𑌖𑍀𑌜𑌨𑍇𑌕𑍍𑌷𑌿𑌤𑌾𑌂 𑌸𑍍𑌵𑌿𑌨𑍍𑌨𑌸𑌨𑍍𑌨𑌵𑌪𑍁𑌷𑌂 𑌨𑌿𑌰𑍀𑌕𑍍𑌷𑍍𑌯 𑌤𑌾𑌮𑍍 ।
𑌨𑌿𑌤𑍍𑌯𑌮𑍁𑌕𑍍𑌤𑌵𑌪𑍁𑌰𑌪𑍍𑌯𑌹𑍋 𑌹𑌰𑍇 𑌬𑌂𑌧𑌮𑍇𑌵 𑌕𑍃𑌪𑌯𑌾𑌽𑌨𑍍𑌵𑌮𑌨𑍍𑌯𑌥𑌾𑌃 ॥𑍮॥

𑌸𑍍𑌥𑍀𑌯𑌤𑌾𑌂 𑌚𑌿𑌰𑌮𑍁𑌲𑍂𑌖𑌲𑍇 𑌖𑌲𑍇𑌤𑍍𑌯𑌾𑌗𑌤𑌾 𑌭𑌵𑌨𑌮𑍇𑌵 𑌸𑌾 𑌯𑌦𑌾।
𑌪𑍍𑌰𑌾𑌗𑍁𑌲𑍂𑌖𑌲𑌬𑌿𑌲𑌾𑌂𑌤𑌰𑍇 𑌤𑌦𑌾 𑌸𑌰𑍍𑌪𑌿𑌰𑌰𑍍𑌪𑌿𑌤𑌮𑌦𑌨𑍍𑌨𑌵𑌾𑌸𑍍𑌥𑌿𑌥𑌾𑌃 ॥𑍯॥

𑌯𑌦𑍍𑌯𑌪𑌾𑌶𑌸𑍁𑌗𑌮𑍋 𑌵𑌿𑌭𑍋 𑌭𑌵𑌾𑌨𑍍 𑌸𑌂𑌯𑌤𑌃 𑌕𑌿𑌮𑍁 𑌸𑌪𑌾𑌶𑌯𑌾𑌽𑌨𑌯𑌾 ।
𑌏𑌵𑌮𑌾𑌦𑌿 𑌦𑌿𑌵𑌿𑌜𑍈𑌰𑌭𑌿𑌷𑍍𑌟𑍁𑌤𑍋 𑌵𑌾𑌤𑌨𑌾𑌥 𑌪𑌰𑌿𑌪𑌾𑌹𑌿 𑌮𑌾𑌂 𑌗𑌦𑌾𑌤𑍍 ॥10॥