𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 45 – 𑌶𑍍𑌰𑍀𑌕𑍃𑌷𑍍𑌣𑌸𑍍𑌯 𑌬𑌾𑌲𑌲𑍀𑌲𑌾𑌃

𑌅𑌯𑌿 𑌸𑌬𑌲 𑌮𑍁𑌰𑌾𑌰𑍇 𑌪𑌾𑌣𑌿𑌜𑌾𑌨𑍁𑌪𑍍𑌰𑌚𑌾𑌰𑍈𑌃
𑌕𑌿𑌮𑌪𑌿 𑌭𑌵𑌨𑌭𑌾𑌗𑌾𑌨𑍍 𑌭𑍂𑌷𑌯𑌂𑌤𑍌 𑌭𑌵𑌂𑌤𑍌 ।
𑌚𑌲𑌿𑌤𑌚𑌰𑌣𑌕𑌂𑌜𑍌 𑌮𑌂𑌜𑍁𑌮𑌂𑌜𑍀𑌰𑌶𑌿𑌂𑌜𑌾-
𑌶𑍍𑌰𑌵𑌣𑌕𑍁𑌤𑍁𑌕𑌭𑌾𑌜𑍌 𑌚𑍇𑌰𑌤𑍁𑌶𑍍𑌚𑌾𑌰𑍁𑌵𑍇𑌗𑌾𑌤𑍍 ॥1॥

𑌮𑍃𑌦𑍁 𑌮𑍃𑌦𑍁 𑌵𑌿𑌹𑌸𑌂𑌤𑌾𑌵𑍁𑌨𑍍𑌮𑌿𑌷𑌦𑍍𑌦𑌂𑌤𑌵𑌂𑌤𑍌
𑌵𑌦𑌨𑌪𑌤𑌿𑌤𑌕𑍇𑌶𑍌 𑌦𑍃𑌶𑍍𑌯𑌪𑌾𑌦𑌾𑌬𑍍𑌜𑌦𑍇𑌶𑍌 ।
𑌭𑍁𑌜𑌗𑌲𑌿𑌤𑌕𑌰𑌾𑌂𑌤𑌵𑍍𑌯𑌾𑌲𑌗𑌤𑍍𑌕𑌂𑌕𑌣𑌾𑌂𑌕𑍌
𑌮𑌤𑌿𑌮𑌹𑌰𑌤𑌮𑍁𑌚𑍍𑌚𑍈𑌃 𑌪𑌶𑍍𑌯𑌤𑌾𑌂 𑌵𑌿𑌶𑍍𑌵𑌨𑍃𑌣𑌾𑌮𑍍 ॥2॥

𑌅𑌨𑍁𑌸𑌰𑌤𑌿 𑌜𑌨𑍌𑌘𑍇 𑌕𑍌𑌤𑍁𑌕𑌵𑍍𑌯𑌾𑌕𑍁𑌲𑌾𑌕𑍍𑌷𑍇
𑌕𑌿𑌮𑌪𑌿 𑌕𑍃𑌤𑌨𑌿𑌨𑌾𑌦𑌂 𑌵𑍍𑌯𑌾𑌹𑌸𑌂𑌤𑍌 𑌦𑍍𑌰𑌵𑌂𑌤𑍌 ।
𑌵𑌲𑌿𑌤𑌵𑌦𑌨𑌪𑌦𑍍𑌮𑌂 𑌪𑍃𑌷𑍍𑌠𑌤𑍋 𑌦𑌤𑍍𑌤𑌦𑍃𑌷𑍍𑌟𑍀
𑌕𑌿𑌮𑌿𑌵 𑌨 𑌵𑌿𑌦𑌧𑌾𑌥𑍇 𑌕𑍌𑌤𑍁𑌕𑌂 𑌵𑌾𑌸𑍁𑌦𑍇𑌵 ॥3॥

𑌦𑍍𑌰𑍁𑌤𑌗𑌤𑌿𑌷𑍁 𑌪𑌤𑌂𑌤𑌾𑌵𑍁𑌤𑍍𑌥𑌿𑌤𑍌 𑌲𑌿𑌪𑍍𑌤𑌪𑌂𑌕𑍌
𑌦𑌿𑌵𑌿 𑌮𑍁𑌨𑌿𑌭𑌿𑌰𑌪𑌂𑌕𑍈𑌃 𑌸𑌸𑍍𑌮𑌿𑌤𑌂 𑌵𑌂𑌦𑍍𑌯𑌮𑌾𑌨𑍌 ।
𑌦𑍍𑌰𑍁𑌤𑌮𑌥 𑌜𑌨𑌨𑍀𑌭𑍍𑌯𑌾𑌂 𑌸𑌾𑌨𑍁𑌕𑌂𑌪𑌂 𑌗𑍃𑌹𑍀𑌤𑍌
𑌮𑍁𑌹𑍁𑌰𑌪𑌿 𑌪𑌰𑌿𑌰𑌬𑍍𑌧𑍌 𑌦𑍍𑌰𑌾𑌗𑍍𑌯𑍁𑌵𑌾𑌂 𑌚𑍁𑌂𑌬𑌿𑌤𑍌 𑌚 ॥4॥

𑌸𑍍𑌨𑍁𑌤𑌕𑍁𑌚𑌭𑌰𑌮𑌂𑌕𑍇 𑌧𑌾𑌰𑌯𑌂𑌤𑍀 𑌭𑌵𑌂𑌤𑌂
𑌤𑌰𑌲𑌮𑌤𑌿 𑌯𑌶𑍋𑌦𑌾 𑌸𑍍𑌤𑌨𑍍𑌯𑌦𑌾 𑌧𑌨𑍍𑌯𑌧𑌨𑍍𑌯𑌾 ।
𑌕𑌪𑌟𑌪𑌶𑍁𑌪 𑌮𑌧𑍍𑌯𑍇 𑌮𑍁𑌗𑍍𑌧𑌹𑌾𑌸𑌾𑌂𑌕𑍁𑌰𑌂 𑌤𑍇
𑌦𑌶𑌨𑌮𑍁𑌕𑍁𑌲𑌹𑍃𑌦𑍍𑌯𑌂 𑌵𑍀𑌕𑍍𑌷𑍍𑌯 𑌵𑌕𑍍𑌤𑍍𑌰𑌂 𑌜𑌹𑌰𑍍𑌷 ॥5॥

𑌤𑌦𑌨𑍁𑌚𑌰𑌣𑌚𑌾𑌰𑍀 𑌦𑌾𑌰𑌕𑍈𑌸𑍍𑌸𑌾𑌕𑌮𑌾𑌰𑌾-
𑌨𑍍𑌨𑌿𑌲𑌯𑌤𑌤𑌿𑌷𑍁 𑌖𑍇𑌲𑌨𑍍 𑌬𑌾𑌲𑌚𑌾𑌪𑌲𑍍𑌯𑌶𑌾𑌲𑍀 ।
𑌭𑌵𑌨𑌶𑍁𑌕𑌵𑌿𑌡𑌾𑌲𑌾𑌨𑍍 𑌵𑌤𑍍𑌸𑌕𑌾𑌂𑌶𑍍𑌚𑌾𑌨𑍁𑌧𑌾𑌵𑌨𑍍
𑌕𑌥𑌮𑌪𑌿 𑌕𑍃𑌤𑌹𑌾𑌸𑍈𑌰𑍍𑌗𑍋𑌪𑌕𑍈𑌰𑍍𑌵𑌾𑌰𑌿𑌤𑍋𑌽𑌭𑍂𑌃 ॥6॥

𑌹𑌲𑌧𑌰𑌸𑌹𑌿𑌤𑌸𑍍𑌤𑍍𑌵𑌂 𑌯𑌤𑍍𑌰 𑌯𑌤𑍍𑌰𑍋𑌪𑌯𑌾𑌤𑍋
𑌵𑌿𑌵𑌶𑌪𑌤𑌿𑌤𑌨𑍇𑌤𑍍𑌰𑌾𑌸𑍍𑌤𑌤𑍍𑌰 𑌤𑌤𑍍𑌰𑍈𑌵 𑌗𑍋𑌪𑍍𑌯𑌃 ।
𑌵𑌿𑌗𑌲𑌿𑌤𑌗𑍃𑌹𑌕𑍃𑌤𑍍𑌯𑌾 𑌵𑌿𑌸𑍍𑌮𑍃𑌤𑌾𑌪𑌤𑍍𑌯𑌭𑍃𑌤𑍍𑌯𑌾
𑌮𑍁𑌰𑌹𑌰 𑌮𑍁𑌹𑍁𑌰𑌤𑍍𑌯𑌂𑌤𑌾𑌕𑍁𑌲𑌾 𑌨𑌿𑌤𑍍𑌯𑌮𑌾𑌸𑌨𑍍 ॥𑍭॥

𑌪𑍍𑌰𑌤𑌿𑌨𑌵𑌨𑌵𑌨𑍀𑌤𑌂 𑌗𑍋𑌪𑌿𑌕𑌾𑌦𑌤𑍍𑌤𑌮𑌿𑌚𑍍𑌛𑌨𑍍
𑌕𑌲𑌪𑌦𑌮𑍁𑌪𑌗𑌾𑌯𑌨𑍍 𑌕𑍋𑌮𑌲𑌂 𑌕𑍍𑌵𑌾𑌪𑌿 𑌨𑍃𑌤𑍍𑌯𑌨𑍍 ।
𑌸𑌦𑌯𑌯𑍁𑌵𑌤𑌿𑌲𑍋𑌕𑍈𑌰𑌰𑍍𑌪𑌿𑌤𑌂 𑌸𑌰𑍍𑌪𑌿𑌰𑌶𑍍𑌨𑌨𑍍
𑌕𑍍𑌵𑌚𑌨 𑌨𑌵𑌵𑌿𑌪𑌕𑍍𑌵𑌂 𑌦𑍁𑌗𑍍𑌧𑌮𑌪𑍍𑌯𑌾𑌪𑌿𑌬𑌸𑍍𑌤𑍍𑌵𑌮𑍍 ॥𑍮॥

𑌮𑌮 𑌖𑌲𑍁 𑌬𑌲𑌿𑌗𑍇𑌹𑍇 𑌯𑌾𑌚𑌨𑌂 𑌜𑌾𑌤𑌮𑌾𑌸𑍍𑌤𑌾-
𑌮𑌿𑌹 𑌪𑍁𑌨𑌰𑌬𑌲𑌾𑌨𑌾𑌮𑌗𑍍𑌰𑌤𑍋 𑌨𑍈𑌵 𑌕𑍁𑌰𑍍𑌵𑍇 ।
𑌇𑌤𑌿 𑌵𑌿𑌹𑌿𑌤𑌮𑌤𑌿𑌃 𑌕𑌿𑌂 𑌦𑍇𑌵 𑌸𑌂𑌤𑍍𑌯𑌜𑍍𑌯 𑌯𑌾𑌚𑍍𑌞𑌾𑌂
𑌦𑌧𑌿𑌘𑍃𑌤𑌮𑌹𑌰𑌸𑍍𑌤𑍍𑌵𑌂 𑌚𑌾𑌰𑍁𑌣𑌾 𑌚𑍋𑌰𑌣𑍇𑌨 ॥𑍯॥

𑌤𑌵 𑌦𑌧𑌿𑌘𑍃𑌤𑌮𑍋𑌷𑍇 𑌘𑍋𑌷𑌯𑍋𑌷𑌾𑌜𑌨𑌾𑌨𑌾-
𑌮𑌭𑌜𑌤 𑌹𑍃𑌦𑌿 𑌰𑍋𑌷𑍋 𑌨𑌾𑌵𑌕𑌾𑌶𑌂 𑌨 𑌶𑍋𑌕𑌃 ।
𑌹𑍃𑌦𑌯𑌮𑌪𑌿 𑌮𑍁𑌷𑌿𑌤𑍍𑌵𑌾 𑌹𑌰𑍍𑌷𑌸𑌿𑌂𑌧𑍌 𑌨𑍍𑌯𑌧𑌾𑌸𑍍𑌤𑍍𑌵𑌂
𑌸 𑌮𑌮 𑌶𑌮𑌯 𑌰𑍋𑌗𑌾𑌨𑍍 𑌵𑌾𑌤𑌗𑍇𑌹𑌾𑌧𑌿𑌨𑌾𑌥 ॥10॥

𑌶𑌾𑌖𑌾𑌗𑍍𑌰𑍇 𑌵𑌿𑌧𑍁𑌂 𑌵𑌿𑌲𑍋𑌕𑍍𑌯 𑌫𑌲𑌮𑌿𑌤𑍍𑌯𑌂𑌬𑌾𑌂 𑌚 𑌤𑌾𑌤𑌂 𑌮𑍁𑌹𑍁𑌃
𑌸𑌂𑌪𑍍𑌰𑌾𑌰𑍍𑌥𑍍𑌯𑌾𑌥 𑌤𑌦𑌾 𑌤𑌦𑍀𑌯𑌵𑌚𑌸𑌾 𑌪𑍍𑌰𑍋𑌤𑍍𑌕𑍍𑌷𑌿𑌪𑍍𑌤𑌬𑌾𑌹𑍌 𑌤𑍍𑌵𑌯𑌿।
𑌚𑌿𑌤𑍍𑌰𑌂 𑌦𑍇𑌵 𑌶𑌶𑍀 𑌸 𑌤𑍇 𑌕𑌰𑍍𑌮𑌗𑌾𑌤𑍍 𑌕𑌿𑌂 𑌬𑍍𑌰𑍂𑌮𑌹𑍇 𑌸𑌂𑌪𑌤𑌃
𑌜𑍍𑌯𑍋𑌤𑌿𑌰𑍍𑌮𑌂𑌡𑌲𑌪𑍂𑌰𑌿𑌤𑌾𑌖𑌿𑌲𑌵𑌪𑍁𑌃 𑌪𑍍𑌰𑌾𑌗𑌾 𑌵𑌿𑌰𑌾𑌡𑍍𑌰𑍂𑌪𑌤𑌾𑌮𑍍 ॥ 11॥

𑌕𑌿𑌂 𑌕𑌿𑌂 𑌬𑌤𑍇𑌦𑌮𑌿𑌤𑌿 𑌸𑌂𑌭𑍍𑌰𑌮 𑌭𑌾𑌜𑌮𑍇𑌨𑌂
𑌬𑍍𑌰𑌹𑍍𑌮𑌾𑌰𑍍𑌣𑌵𑍇 𑌕𑍍𑌷𑌣𑌮𑌮𑍁𑌂 𑌪𑌰𑌿𑌮𑌜𑍍𑌜𑍍𑌯 𑌤𑌾𑌤𑌮𑍍 ।
𑌮𑌾𑌯𑌾𑌂 𑌪𑍁𑌨𑌸𑍍𑌤𑌨𑌯-𑌮𑍋𑌹𑌮𑌯𑍀𑌂 𑌵𑌿𑌤𑌨𑍍𑌵𑌨𑍍
𑌆𑌨𑌂𑌦𑌚𑌿𑌨𑍍𑌮𑌯 𑌜𑌗𑌨𑍍𑌮𑌯 𑌪𑌾𑌹𑌿 𑌰𑍋𑌗𑌾𑌤𑍍 ॥12॥