𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 43 – 𑌤𑍃𑌣𑌾𑌵𑌰𑍍𑌤𑌵𑌧𑌮𑍍

𑌤𑍍𑌵𑌾𑌮𑍇𑌕𑌦𑌾 𑌗𑍁𑌰𑍁𑌮𑌰𑍁𑌤𑍍𑌪𑍁𑌰𑌨𑌾𑌥 𑌵𑍋𑌢𑍁𑌂
𑌗𑌾𑌢𑌾𑌧𑌿𑌰𑍂𑌢𑌗𑌰𑌿𑌮𑌾𑌣𑌮𑌪𑌾𑌰𑌯𑌂𑌤𑍀 ।
𑌮𑌾𑌤𑌾 𑌨𑌿𑌧𑌾𑌯 𑌶𑌯𑌨𑍇 𑌕𑌿𑌮𑌿𑌦𑌂 𑌬𑌤𑍇𑌤𑌿
𑌧𑍍𑌯𑌾𑌯𑌂𑌤𑍍𑌯𑌚𑍇𑌷𑍍𑌟𑌤 𑌗𑍃𑌹𑍇𑌷𑍁 𑌨𑌿𑌵𑌿𑌷𑍍𑌟𑌶𑌂𑌕𑌾 ॥1॥

𑌤𑌾𑌵𑌦𑍍𑌵𑌿𑌦𑍂𑌰𑌮𑍁𑌪𑌕𑌰𑍍𑌣𑌿𑌤𑌘𑍋𑌰𑌘𑍋𑌷-
𑌵𑍍𑌯𑌾𑌜𑍃𑌂𑌭𑌿𑌪𑌾𑌂𑌸𑍁𑌪𑌟𑌲𑍀𑌪𑌰𑌿𑌪𑍂𑌰𑌿𑌤𑌾𑌶𑌃 ।
𑌵𑌾𑌤𑍍𑌯𑌾𑌵𑌪𑍁𑌸𑍍𑌸 𑌕𑌿𑌲 𑌦𑍈𑌤𑍍𑌯𑌵𑌰𑌸𑍍𑌤𑍃𑌣𑌾𑌵-
𑌰𑍍𑌤𑌾𑌖𑍍𑌯𑍋 𑌜𑌹𑌾𑌰 𑌜𑌨𑌮𑌾𑌨𑌸𑌹𑌾𑌰𑌿𑌣𑌂 𑌤𑍍𑌵𑌾𑌮𑍍 ॥2॥

𑌉𑌦𑍍𑌦𑌾𑌮𑌪𑌾𑌂𑌸𑍁𑌤𑌿𑌮𑌿𑌰𑌾𑌹𑌤𑌦𑍃𑌷𑍍𑌟𑌿𑌪𑌾𑌤𑍇
𑌦𑍍𑌰𑌷𑍍𑌟𑍁𑌂 𑌕𑌿𑌮𑌪𑍍𑌯𑌕𑍁𑌶𑌲𑍇 𑌪𑌶𑍁𑌪𑌾𑌲𑌲𑍋𑌕𑍇 ।
𑌹𑌾 𑌬𑌾𑌲𑌕𑌸𑍍𑌯 𑌕𑌿𑌮𑌿𑌤𑌿 𑌤𑍍𑌵𑌦𑍁𑌪𑌾𑌂𑌤𑌮𑌾𑌪𑍍𑌤𑌾
𑌮𑌾𑌤𑌾 𑌭𑌵𑌂𑌤𑌮𑌵𑌿𑌲𑍋𑌕𑍍𑌯 𑌭𑍃𑌶𑌂 𑌰𑍁𑌰𑍋𑌦 ॥3॥

𑌤𑌾𑌵𑌤𑍍 𑌸 𑌦𑌾𑌨𑌵𑌵𑌰𑍋𑌽𑌪𑌿 𑌚 𑌦𑍀𑌨𑌮𑍂𑌰𑍍𑌤𑌿-
𑌰𑍍𑌭𑌾𑌵𑌤𑍍𑌕𑌭𑌾𑌰𑌪𑌰𑌿𑌧𑌾𑌰𑌣𑌲𑍂𑌨𑌵𑍇𑌗𑌃 ।
𑌸𑌂𑌕𑍋𑌚𑌮𑌾𑌪 𑌤𑌦𑌨𑍁 𑌕𑍍𑌷𑌤𑌪𑌾𑌂𑌸𑍁𑌘𑍋𑌷𑍇
𑌘𑍋𑌷𑍇 𑌵𑍍𑌯𑌤𑌾𑌯𑌤 𑌭𑌵𑌜𑍍𑌜𑌨𑌨𑍀𑌨𑌿𑌨𑌾𑌦𑌃 ॥4॥

𑌰𑍋𑌦𑍋𑌪𑌕𑌰𑍍𑌣𑌨𑌵𑌶𑌾𑌦𑍁𑌪𑌗𑌮𑍍𑌯 𑌗𑍇𑌹𑌂
𑌕𑍍𑌰𑌂𑌦𑌤𑍍𑌸𑍁 𑌨𑌂𑌦𑌮𑍁𑌖𑌗𑍋𑌪𑌕𑍁𑌲𑍇𑌷𑍁 𑌦𑍀𑌨𑌃 ।
𑌤𑍍𑌵𑌾𑌂 𑌦𑌾𑌨𑌵𑌸𑍍𑌤𑍍𑌵𑌖𑌿𑌲𑌮𑍁𑌕𑍍𑌤𑌿𑌕𑌰𑌂 𑌮𑍁𑌮𑍁𑌕𑍍𑌷𑍁-
𑌸𑍍𑌤𑍍𑌵𑌯𑍍𑌯𑌪𑍍𑌰𑌮𑍁𑌂𑌚𑌤𑌿 𑌪𑌪𑌾𑌤 𑌵𑌿𑌯𑌤𑍍𑌪𑍍𑌰𑌦𑍇𑌶𑌾𑌤𑍍 ॥5॥

𑌰𑍋𑌦𑌾𑌕𑍁𑌲𑌾𑌸𑍍𑌤𑌦𑌨𑍁 𑌗𑍋𑌪𑌗𑌣𑌾 𑌬𑌹𑌿𑌷𑍍𑌠-
𑌪𑌾𑌷𑌾𑌣𑌪𑍃𑌷𑍍𑌠𑌭𑍁𑌵𑌿 𑌦𑍇𑌹𑌮𑌤𑌿𑌸𑍍𑌥𑌵𑌿𑌷𑍍𑌠𑌮𑍍 ।
𑌪𑍍𑌰𑍈𑌕𑍍𑌷𑌂𑌤 𑌹𑌂𑌤 𑌨𑌿𑌪𑌤𑌂𑌤𑌮𑌮𑍁𑌷𑍍𑌯 𑌵𑌕𑍍𑌷-
𑌸𑍍𑌯𑌕𑍍𑌷𑍀𑌣𑌮𑍇𑌵 𑌚 𑌭𑌵𑌂𑌤𑌮𑌲𑌂 𑌹𑌸𑌂𑌤𑌮𑍍 ॥6॥

𑌗𑍍𑌰𑌾𑌵𑌪𑍍𑌰𑌪𑌾𑌤𑌪𑌰𑌿𑌪𑌿𑌷𑍍𑌟𑌗𑌰𑌿𑌷𑍍𑌠𑌦𑍇𑌹-
𑌭𑍍𑌰𑌷𑍍𑌟𑌾𑌸𑍁𑌦𑍁𑌷𑍍𑌟𑌦𑌨𑍁𑌜𑍋𑌪𑌰𑌿 𑌧𑍃𑌷𑍍𑌟𑌹𑌾𑌸𑌮𑍍 ।
𑌆𑌘𑍍𑌨𑌾𑌨𑌮𑌂𑌬𑍁𑌜𑌕𑌰𑍇𑌣 𑌭𑌵𑌂𑌤𑌮𑍇𑌤𑍍𑌯
𑌗𑍋𑌪𑌾 𑌦𑌧𑍁𑌰𑍍𑌗𑌿𑌰𑌿𑌵𑌰𑌾𑌦𑌿𑌵 𑌨𑍀𑌲𑌰𑌤𑍍𑌨𑌮𑍍 ॥𑍭॥

𑌏𑌕𑍈𑌕𑌮𑌾𑌶𑍁 𑌪𑌰𑌿𑌗𑍃𑌹𑍍𑌯 𑌨𑌿𑌕𑌾𑌮𑌨𑌂𑌦-
𑌨𑍍𑌨𑌂𑌦𑌾𑌦𑌿𑌗𑍋𑌪𑌪𑌰𑌿𑌰𑌬𑍍𑌧𑌵𑌿𑌚𑍁𑌂𑌬𑌿𑌤𑌾𑌂𑌗𑌮𑍍 ।
𑌆𑌦𑌾𑌤𑍁𑌕𑌾𑌮𑌪𑌰𑌿𑌶𑌂𑌕𑌿𑌤𑌗𑍋𑌪𑌨𑌾𑌰𑍀-
𑌹𑌸𑍍𑌤𑌾𑌂𑌬𑍁𑌜𑌪𑍍𑌰𑌪𑌤𑌿𑌤𑌂 𑌪𑍍𑌰𑌣𑍁𑌮𑍋 𑌭𑌵𑌂𑌤𑌮𑍍 ॥𑍮॥

𑌭𑍂𑌯𑍋𑌽𑌪𑌿 𑌕𑌿𑌨𑍍𑌨𑍁 𑌕𑍃𑌣𑍁𑌮𑌃 𑌪𑍍𑌰𑌣𑌤𑌾𑌰𑍍𑌤𑌿𑌹𑌾𑌰𑍀
𑌗𑍋𑌵𑌿𑌂𑌦 𑌏𑌵 𑌪𑌰𑌿𑌪𑌾𑌲𑌯𑌤𑌾𑌤𑍍 𑌸𑍁𑌤𑌂 𑌨𑌃 ।
𑌇𑌤𑍍𑌯𑌾𑌦𑌿 𑌮𑌾𑌤𑌰𑌪𑌿𑌤𑍃𑌪𑍍𑌰𑌮𑍁𑌖𑍈𑌸𑍍𑌤𑌦𑌾𑌨𑍀𑌂
𑌸𑌂𑌪𑍍𑌰𑌾𑌰𑍍𑌥𑌿𑌤𑌸𑍍𑌤𑍍𑌵𑌦𑌵𑌨𑌾𑌯 𑌵𑌿𑌭𑍋 𑌤𑍍𑌵𑌮𑍇𑌵 ॥𑍯॥

𑌵𑌾𑌤𑌾𑌤𑍍𑌮𑌕𑌂 𑌦𑌨𑍁𑌜𑌮𑍇𑌵𑌮𑌯𑌿 𑌪𑍍𑌰𑌧𑍂𑌨𑍍𑌵𑌨𑍍
𑌵𑌾𑌤𑍋𑌦𑍍𑌭𑌵𑌾𑌨𑍍 𑌮𑌮 𑌗𑌦𑌾𑌨𑍍 𑌕𑌿𑌮𑍁 𑌨𑍋 𑌧𑍁𑌨𑍋𑌷𑌿 ।
𑌕𑌿𑌂 𑌵𑌾 𑌕𑌰𑍋𑌮𑌿 𑌪𑍁𑌨𑌰𑌪𑍍𑌯𑌨𑌿𑌲𑌾𑌲𑌯𑍇𑌶
𑌨𑌿𑌶𑍍𑌶𑍇𑌷𑌰𑍋𑌗𑌶𑌮𑌨𑌂 𑌮𑍁𑌹𑍁𑌰𑌰𑍍𑌥𑌯𑍇 𑌤𑍍𑌵𑌾𑌮𑍍 ॥10॥