𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 41 – 𑌪𑍂𑌤𑌨𑌾𑌦𑌹𑌨𑌂 𑌤𑌥𑌾 𑌕𑍃𑌷𑍍𑌣𑌲𑌾𑌲𑌨𑌾𑌹𑍍𑌲𑌾𑌦𑌮𑍍

𑌵𑍍𑌰𑌜𑍇𑌶𑍍𑌵𑌰𑍈𑌃 𑌶𑍌𑌰𑌿𑌵𑌚𑍋 𑌨𑌿𑌶𑌮𑍍𑌯 𑌸𑌮𑌾𑌵𑍍𑌰𑌜𑌨𑍍𑌨𑌧𑍍𑌵𑌨𑌿 𑌭𑍀𑌤𑌚𑍇𑌤𑌾𑌃 ।
𑌨𑌿𑌷𑍍𑌪𑌿𑌷𑍍𑌟𑌨𑌿𑌶𑍍𑌶𑍇𑌷𑌤𑌰𑍁𑌂 𑌨𑌿𑌰𑍀𑌕𑍍𑌷𑍍𑌯 𑌕𑌂𑌚𑌿𑌤𑍍𑌪𑌦𑌾𑌰𑍍𑌥𑌂 𑌶𑌰𑌣𑌂 𑌗𑌤𑌸𑍍𑌵𑌾𑌮𑍍 ॥1॥

𑌨𑌿𑌶𑌮𑍍𑌯 𑌗𑍋𑌪𑍀𑌵𑌚𑌨𑌾𑌦𑍁𑌦𑌂𑌤𑌂 𑌸𑌰𑍍𑌵𑍇𑌽𑌪𑌿 𑌗𑍋𑌪𑌾 𑌭𑌯𑌵𑌿𑌸𑍍𑌮𑌯𑌾𑌂𑌧𑌾𑌃 ।
𑌤𑍍𑌵𑌤𑍍𑌪𑌾𑌤𑌿𑌤𑌂 𑌘𑍋𑌰𑌪𑌿𑌶𑌾𑌚𑌦𑍇𑌹𑌂 𑌦𑍇𑌹𑍁𑌰𑍍𑌵𑌿𑌦𑍂𑌰𑍇𑌽𑌥 𑌕𑍁𑌠𑌾𑌰𑌕𑍃𑌤𑍍𑌤𑌮𑍍 ॥2॥

𑌤𑍍𑌵𑌤𑍍𑌪𑍀𑌤𑌪𑍂𑌤𑌸𑍍𑌤𑌨𑌤𑌚𑍍𑌛𑌰𑍀𑌰𑌾𑌤𑍍 𑌸𑌮𑍁𑌚𑍍𑌚𑌲𑌨𑍍𑌨𑍁𑌚𑍍𑌚𑌤𑌰𑍋 𑌹𑌿 𑌧𑍂𑌮𑌃 ।
𑌶𑌂𑌕𑌾𑌮𑌧𑌾𑌦𑌾𑌗𑌰𑌵𑌃 𑌕𑌿𑌮𑍇𑌷 𑌕𑌿𑌂 𑌚𑌾𑌂𑌦𑌨𑍋 𑌗𑍌𑌲𑍍𑌗𑍁𑌲𑌵𑍋𑌽𑌥𑌵𑍇𑌤𑌿 ॥3॥

𑌮𑌦𑌂𑌗𑌸𑌂𑌗𑌸𑍍𑌯 𑌫𑌲𑌂 𑌨 𑌦𑍂𑌰𑍇 𑌕𑍍𑌷𑌣𑍇𑌨 𑌤𑌾𑌵𑌤𑍍 𑌭𑌵𑌤𑌾𑌮𑌪𑌿 𑌸𑍍𑌯𑌾𑌤𑍍 ।
𑌇𑌤𑍍𑌯𑍁𑌲𑍍𑌲𑌪𑌨𑍍 𑌵𑌲𑍍𑌲𑌵𑌤𑌲𑍍𑌲𑌜𑍇𑌭𑍍𑌯𑌃 𑌤𑍍𑌵𑌂 𑌪𑍂𑌤𑌨𑌾𑌮𑌾𑌤𑌨𑍁𑌥𑌾𑌃 𑌸𑍁𑌗𑌂𑌧𑌿𑌮𑍍 ॥4॥

𑌚𑌿𑌤𑍍𑌰𑌂 𑌪𑌿𑌶𑌾𑌚𑍍𑌯𑌾 𑌨 𑌹𑌤𑌃 𑌕𑍁𑌮𑌾𑌰𑌃 𑌚𑌿𑌤𑍍𑌰𑌂 𑌪𑍁𑌰𑍈𑌵𑌾𑌕𑌥𑌿 𑌶𑍌𑌰𑌿𑌣𑍇𑌦𑌮𑍍 ।
𑌇𑌤𑌿 𑌪𑍍𑌰𑌶𑌂𑌸𑌨𑍍 𑌕𑌿𑌲 𑌗𑍋𑌪𑌲𑍋𑌕𑍋 𑌭𑌵𑌨𑍍𑌮𑍁𑌖𑌾𑌲𑍋𑌕𑌰𑌸𑍇 𑌨𑍍𑌯𑌮𑌾𑌂𑌕𑍍𑌷𑍀𑌤𑍍 ॥5॥

𑌦𑌿𑌨𑍇𑌦𑌿𑌨𑍇𑌽𑌥 𑌪𑍍𑌰𑌤𑌿𑌵𑍃𑌦𑍍𑌧𑌲𑌕𑍍𑌷𑍍𑌮𑍀𑌰𑌕𑍍𑌷𑍀𑌣𑌮𑌾𑌂𑌗𑌲𑍍𑌯𑌶𑌤𑍋 𑌵𑍍𑌰𑌜𑍋𑌽𑌯𑌮𑍍 ।
𑌭𑌵𑌨𑍍𑌨𑌿𑌵𑌾𑌸𑌾𑌦𑌯𑌿 𑌵𑌾𑌸𑍁𑌦𑍇𑌵 𑌪𑍍𑌰𑌮𑍋𑌦𑌸𑌾𑌂𑌦𑍍𑌰𑌃 𑌪𑌰𑌿𑌤𑍋 𑌵𑌿𑌰𑍇𑌜𑍇 ॥6॥

𑌗𑍃𑌹𑍇𑌷𑍁 𑌤𑍇 𑌕𑍋𑌮𑌲𑌰𑍂𑌪𑌹𑌾𑌸𑌮𑌿𑌥𑌃𑌕𑌥𑌾𑌸𑌂𑌕𑍁𑌲𑌿𑌤𑌾𑌃 𑌕𑌮𑌨𑍍𑌯𑌃 ।
𑌵𑍃𑌤𑍍𑌤𑍇𑌷𑍁 𑌕𑍃𑌤𑍍𑌯𑍇𑌷𑍁 𑌭𑌵𑌨𑍍𑌨𑌿𑌰𑍀𑌕𑍍𑌷𑌾𑌸𑌮𑌾𑌗𑌤𑌾𑌃 𑌪𑍍𑌰𑌤𑍍𑌯𑌹𑌮𑌤𑍍𑌯𑌨𑌂𑌦𑌨𑍍 ॥𑍭॥

𑌅𑌹𑍋 𑌕𑍁𑌮𑌾𑌰𑍋 𑌮𑌯𑌿 𑌦𑌤𑍍𑌤𑌦𑍃𑌷𑍍𑌟𑌿𑌃 𑌸𑍍𑌮𑌿𑌤𑌂 𑌕𑍃𑌤𑌂 𑌮𑌾𑌂 𑌪𑍍𑌰𑌤𑌿 𑌵𑌤𑍍𑌸𑌕𑍇𑌨 ।
𑌏𑌹𑍍𑌯𑍇𑌹𑌿 𑌮𑌾𑌮𑌿𑌤𑍍𑌯𑍁𑌪𑌸𑌾𑌰𑍍𑌯 𑌪𑌾𑌣𑍀 𑌤𑍍𑌵𑌯𑍀𑌶 𑌕𑌿𑌂 𑌕𑌿𑌂 𑌨 𑌕𑍃𑌤𑌂 𑌵𑌧𑍂𑌭𑌿𑌃 ॥𑍮॥

𑌭𑌵𑌦𑍍𑌵𑌪𑍁𑌃𑌸𑍍𑌪𑌰𑍍𑌶𑌨𑌕𑍌𑌤𑍁𑌕𑍇𑌨 𑌕𑌰𑌾𑌤𑍍𑌕𑌰𑌂 𑌗𑍋𑌪𑌵𑌧𑍂𑌜𑌨𑍇𑌨 ।
𑌨𑍀𑌤𑌸𑍍𑌤𑍍𑌵𑌮𑌾𑌤𑌾𑌮𑍍𑌰𑌸𑌰𑍋𑌜𑌮𑌾𑌲𑌾𑌵𑍍𑌯𑌾𑌲𑌂𑌬𑌿𑌲𑍋𑌲𑌂𑌬𑌤𑍁𑌲𑌾𑌮𑌲𑌾𑌸𑍀𑌃 ॥𑍯॥

𑌨𑌿𑌪𑌾𑌯𑌯𑌂𑌤𑍀 𑌸𑍍𑌤𑌨𑌮𑌂𑌕𑌗𑌂 𑌤𑍍𑌵𑌾𑌂 𑌵𑌿𑌲𑍋𑌕𑌯𑌂𑌤𑍀 𑌵𑌦𑌨𑌂 𑌹𑌸𑌂𑌤𑍀 ।
𑌦𑌶𑌾𑌂 𑌯𑌶𑍋𑌦𑌾 𑌕𑌤𑌮𑌾𑌂 𑌨 𑌭𑍇𑌜𑍇 𑌸 𑌤𑌾𑌦𑍃𑌶𑌃 𑌪𑌾𑌹𑌿 𑌹𑌰𑍇 𑌗𑌦𑌾𑌨𑍍𑌮𑌾𑌮𑍍 ॥10॥