𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 36 – 𑌪𑌰𑌶𑍁𑌰𑌾𑌮𑌾𑌵𑌤𑌾𑌰𑌮𑍍

𑌅𑌤𑍍𑌰𑍇𑌃 𑌪𑍁𑌤𑍍𑌰𑌤𑌯𑌾 𑌪𑍁𑌰𑌾 𑌤𑍍𑌵𑌮𑌨𑌸𑍂𑌯𑌾𑌯𑌾𑌂 𑌹𑌿 𑌦𑌤𑍍𑌤𑌾𑌭𑌿𑌧𑍋
𑌜𑌾𑌤𑌃 𑌶𑌿𑌷𑍍𑌯𑌨𑌿𑌬𑌂𑌧𑌤𑌂𑌦𑍍𑌰𑌿𑌤𑌮𑌨𑌾𑌃 𑌸𑍍𑌵𑌸𑍍𑌥𑌶𑍍𑌚𑌰𑌨𑍍 𑌕𑌾𑌂𑌤𑌯𑌾 ।
𑌦𑍃𑌷𑍍𑌟𑍋 𑌭𑌕𑍍𑌤𑌤𑌮𑍇𑌨 𑌹𑍇𑌹𑌯𑌮𑌹𑍀𑌪𑌾𑌲𑍇𑌨 𑌤𑌸𑍍𑌮𑍈 𑌵𑌰𑌾-
𑌨𑌷𑍍𑌟𑍈𑌶𑍍𑌵𑌰𑍍𑌯𑌮𑍁𑌖𑌾𑌨𑍍 𑌪𑍍𑌰𑌦𑌾𑌯 𑌦𑌦𑌿𑌥 𑌸𑍍𑌵𑍇𑌨𑍈𑌵 𑌚𑌾𑌂𑌤𑍇 𑌵𑌧𑌮𑍍 ॥1॥

𑌸𑌤𑍍𑌯𑌂 𑌕𑌰𑍍𑌤𑍁𑌮𑌥𑌾𑌰𑍍𑌜𑍁𑌨𑌸𑍍𑌯 𑌚 𑌵𑌰𑌂 𑌤𑌚𑍍𑌛𑌕𑍍𑌤𑌿𑌮𑌾𑌤𑍍𑌰𑌾𑌨𑌤𑌂
𑌬𑍍𑌰𑌹𑍍𑌮𑌦𑍍𑌵𑍇𑌷𑌿 𑌤𑌦𑌾𑌖𑌿𑌲𑌂 𑌨𑍃𑌪𑌕𑍁𑌲𑌂 𑌹𑌂𑌤𑍁𑌂 𑌚 𑌭𑍂𑌮𑍇𑌰𑍍𑌭𑌰𑌮𑍍 ।
𑌸𑌂𑌜𑌾𑌤𑍋 𑌜𑌮𑌦𑌗𑍍𑌨𑌿𑌤𑍋 𑌭𑍃𑌗𑍁𑌕𑍁𑌲𑍇 𑌤𑍍𑌵𑌂 𑌰𑍇𑌣𑍁𑌕𑌾𑌯𑌾𑌂 𑌹𑌰𑍇
𑌰𑌾𑌮𑍋 𑌨𑌾𑌮 𑌤𑌦𑌾𑌤𑍍𑌮𑌜𑍇𑌷𑍍𑌵𑌵𑌰𑌜𑌃 𑌪𑌿𑌤𑍍𑌰𑍋𑌰𑌧𑌾𑌃 𑌸𑌮𑍍𑌮𑌦𑌮𑍍 ॥2॥

𑌲𑌬𑍍𑌧𑌾𑌮𑍍𑌨𑌾𑌯𑌗𑌣𑌶𑍍𑌚𑌤𑍁𑌰𑍍𑌦𑌶𑌵𑌯𑌾 𑌗𑌂𑌧𑌰𑍍𑌵𑌰𑌾𑌜𑍇 𑌮𑌨𑌾-
𑌗𑌾𑌸𑌕𑍍𑌤𑌾𑌂 𑌕𑌿𑌲 𑌮𑌾𑌤𑌰𑌂 𑌪𑍍𑌰𑌤𑌿 𑌪𑌿𑌤𑍁𑌃 𑌕𑍍𑌰𑍋𑌧𑌾𑌕𑍁𑌲𑌸𑍍𑌯𑌾𑌜𑍍𑌞𑌯𑌾 ।
𑌤𑌾𑌤𑌾𑌜𑍍𑌞𑌾𑌤𑌿𑌗𑌸𑍋𑌦𑌰𑍈𑌃 𑌸𑌮𑌮𑌿𑌮𑌾𑌂 𑌛𑌿𑌤𑍍𑌵𑌾𑌽𑌥 𑌶𑌾𑌂𑌤𑌾𑌤𑍍 𑌪𑌿𑌤𑍁-
𑌸𑍍𑌤𑍇𑌷𑌾𑌂 𑌜𑍀𑌵𑌨𑌯𑍋𑌗𑌮𑌾𑌪𑌿𑌥 𑌵𑌰𑌂 𑌮𑌾𑌤𑌾 𑌚 𑌤𑍇𑌽𑌦𑌾𑌦𑍍𑌵𑌰𑌾𑌨𑍍 ॥3॥

𑌪𑌿𑌤𑍍𑌰𑌾 𑌮𑌾𑌤𑍃𑌮𑍁𑌦𑍇 𑌸𑍍𑌤𑌵𑌾𑌹𑍃𑌤𑌵𑌿𑌯𑌦𑍍𑌧𑍇𑌨𑍋𑌰𑍍𑌨𑌿𑌜𑌾𑌦𑌾𑌶𑍍𑌰𑌮𑌾𑌤𑍍
𑌪𑍍𑌰𑌸𑍍𑌥𑌾𑌯𑌾𑌥 𑌭𑍃𑌗𑍋𑌰𑍍𑌗𑌿𑌰𑌾 𑌹𑌿𑌮𑌗𑌿𑌰𑌾𑌵𑌾𑌰𑌾𑌧𑍍𑌯 𑌗𑍌𑌰𑍀𑌪𑌤𑌿𑌮𑍍 ।
𑌲𑌬𑍍𑌧𑍍𑌵𑌾 𑌤𑌤𑍍𑌪𑌰𑌶𑍁𑌂 𑌤𑌦𑍁𑌕𑍍𑌤𑌦𑌨𑍁𑌜𑌚𑍍𑌛𑍇𑌦𑍀 𑌮𑌹𑌾𑌸𑍍𑌤𑍍𑌰𑌾𑌦𑌿𑌕𑌂
𑌪𑍍𑌰𑌾𑌪𑍍𑌤𑍋 𑌮𑌿𑌤𑍍𑌰𑌮𑌥𑌾𑌕𑍃𑌤𑌵𑍍𑌰𑌣𑌮𑍁𑌨𑌿𑌂 𑌪𑍍𑌰𑌾𑌪𑍍𑌯𑌾𑌗𑌮𑌃 𑌸𑍍𑌵𑌾𑌶𑍍𑌰𑌮𑌮𑍍 ॥4॥

𑌆𑌖𑍇𑌟𑍋𑌪𑌗𑌤𑍋𑌽𑌰𑍍𑌜𑍁𑌨𑌃 𑌸𑍁𑌰𑌗𑌵𑍀𑌸𑌂𑌪𑍍𑌰𑌾𑌪𑍍𑌤𑌸𑌂𑌪𑌦𑍍𑌗𑌣𑍈-
𑌸𑍍𑌤𑍍𑌵𑌤𑍍𑌪𑌿𑌤𑍍𑌰𑌾 𑌪𑌰𑌿𑌪𑍂𑌜𑌿𑌤𑌃 𑌪𑍁𑌰𑌗𑌤𑍋 𑌦𑍁𑌰𑍍𑌮𑌂𑌤𑍍𑌰𑌿𑌵𑌾𑌚𑌾 𑌪𑍁𑌨𑌃 ।
𑌗𑌾𑌂 𑌕𑍍𑌰𑍇𑌤𑍁𑌂 𑌸𑌚𑌿𑌵𑌂 𑌨𑍍𑌯𑌯𑍁𑌂𑌕𑍍𑌤 𑌕𑍁𑌧𑌿𑌯𑌾 𑌤𑍇𑌨𑌾𑌪𑌿 𑌰𑍁𑌂𑌧𑌨𑍍𑌮𑍁𑌨𑌿-
𑌪𑍍𑌰𑌾𑌣𑌕𑍍𑌷𑍇𑌪𑌸𑌰𑍋𑌷𑌗𑍋𑌹𑌤𑌚𑌮𑍂𑌚𑌕𑍍𑌰𑍇𑌣 𑌵𑌤𑍍𑌸𑍋 𑌹𑍃𑌤𑌃 ॥5॥

𑌶𑍁𑌕𑍍𑌰𑍋𑌜𑍍𑌜𑍀𑌵𑌿𑌤𑌤𑌾𑌤𑌵𑌾𑌕𑍍𑌯𑌚𑌲𑌿𑌤𑌕𑍍𑌰𑍋𑌧𑍋𑌽𑌥 𑌸𑌖𑍍𑌯𑌾 𑌸𑌮𑌂
𑌬𑌿𑌭𑍍𑌰𑌦𑍍𑌧𑍍𑌯𑌾𑌤𑌮𑌹𑍋𑌦𑌰𑍋𑌪𑌨𑌿𑌹𑌿𑌤𑌂 𑌚𑌾𑌪𑌂 𑌕𑍁𑌠𑌾𑌰𑌂 𑌶𑌰𑌾𑌨𑍍 ।
𑌆𑌰𑍂𑌢𑌃 𑌸𑌹𑌵𑌾𑌹𑌯𑌂𑌤𑍃𑌕𑌰𑌥𑌂 𑌮𑌾𑌹𑌿𑌷𑍍𑌮𑌤𑍀𑌮𑌾𑌵𑌿𑌶𑌨𑍍
𑌵𑌾𑌗𑍍𑌭𑌿𑌰𑍍𑌵𑌤𑍍𑌸𑌮𑌦𑌾𑌶𑍁𑌷𑌿 𑌕𑍍𑌷𑌿𑌤𑌿𑌪𑌤𑍌 𑌸𑌂𑌪𑍍𑌰𑌾𑌸𑍍𑌤𑍁𑌥𑌾𑌃 𑌸𑌂𑌗𑌰𑌮𑍍 ॥6॥

𑌪𑍁𑌤𑍍𑌰𑌾𑌣𑌾𑌮𑌯𑍁𑌤𑍇𑌨 𑌸𑌪𑍍𑌤𑌦𑌶𑌭𑌿𑌶𑍍𑌚𑌾𑌕𑍍𑌷𑍌𑌹𑌿𑌣𑍀𑌭𑌿𑌰𑍍𑌮𑌹𑌾-
𑌸𑍇𑌨𑌾𑌨𑍀𑌭𑌿𑌰𑌨𑍇𑌕𑌮𑌿𑌤𑍍𑌰𑌨𑌿𑌵𑌹𑍈𑌰𑍍𑌵𑍍𑌯𑌾𑌜𑍃𑌂𑌭𑌿𑌤𑌾𑌯𑍋𑌧𑌨𑌃 ।
𑌸𑌦𑍍𑌯𑌸𑍍𑌤𑍍𑌵𑌤𑍍𑌕𑌕𑍁𑌠𑌾𑌰𑌬𑌾𑌣𑌵𑌿𑌦𑌲𑌨𑍍𑌨𑌿𑌶𑍍𑌶𑍇𑌷𑌸𑍈𑌨𑍍𑌯𑍋𑌤𑍍𑌕𑌰𑍋
𑌭𑍀𑌤𑌿𑌪𑍍𑌰𑌦𑍍𑌰𑍁𑌤𑌨𑌷𑍍𑌟𑌶𑌿𑌷𑍍𑌟𑌤𑌨𑌯𑌸𑍍𑌤𑍍𑌵𑌾𑌮𑌾𑌪𑌤𑌤𑍍 𑌹𑍇𑌹𑌯𑌃 ॥𑍭॥

𑌲𑍀𑌲𑌾𑌵𑌾𑌰𑌿𑌤𑌨𑌰𑍍𑌮𑌦𑌾𑌜𑌲𑌵𑌲𑌲𑍍𑌲𑌂𑌕𑍇𑌶𑌗𑌰𑍍𑌵𑌾𑌪𑌹-
𑌶𑍍𑌰𑍀𑌮𑌦𑍍𑌬𑌾𑌹𑍁𑌸𑌹𑌸𑍍𑌰𑌮𑍁𑌕𑍍𑌤𑌬𑌹𑍁𑌶𑌸𑍍𑌤𑍍𑌰𑌾𑌸𑍍𑌤𑍍𑌰𑌂 𑌨𑌿𑌰𑍁𑌂𑌧𑌨𑍍𑌨𑌮𑍁𑌮𑍍 ।
𑌚𑌕𑍍𑌰𑍇 𑌤𑍍𑌵𑌯𑍍𑌯𑌥 𑌵𑍈𑌷𑍍𑌣𑌵𑍇𑌽𑌪𑌿 𑌵𑌿𑌫𑌲𑍇 𑌬𑍁𑌦𑍍𑌧𑍍𑌵𑌾 𑌹𑌰𑌿𑌂 𑌤𑍍𑌵𑌾𑌂 𑌮𑍁𑌦𑌾
𑌧𑍍𑌯𑌾𑌯𑌂𑌤𑌂 𑌛𑌿𑌤𑌸𑌰𑍍𑌵𑌦𑍋𑌷𑌮𑌵𑌧𑍀𑌃 𑌸𑍋𑌽𑌗𑌾𑌤𑍍 𑌪𑌰𑌂 𑌤𑍇 𑌪𑌦𑌮𑍍 ॥𑍮॥

𑌭𑍂𑌯𑍋𑌽𑌮𑌰𑍍𑌷𑌿𑌤𑌹𑍇𑌹𑌯𑌾𑌤𑍍𑌮𑌜𑌗𑌣𑍈𑌸𑍍𑌤𑌾𑌤𑍇 𑌹𑌤𑍇 𑌰𑍇𑌣𑍁𑌕𑌾-
𑌮𑌾𑌘𑍍𑌨𑌾𑌨𑌾𑌂 𑌹𑍃𑌦𑌯𑌂 𑌨𑌿𑌰𑍀𑌕𑍍𑌷𑍍𑌯 𑌬𑌹𑍁𑌶𑍋 𑌘𑍋𑌰𑌾𑌂 𑌪𑍍𑌰𑌤𑌿𑌜𑍍𑌞𑌾𑌂 𑌵𑌹𑌨𑍍 ।
𑌧𑍍𑌯𑌾𑌨𑌾𑌨𑍀𑌤𑌰𑌥𑌾𑌯𑍁𑌧𑌸𑍍𑌤𑍍𑌵𑌮𑌕𑍃𑌥𑌾 𑌵𑌿𑌪𑍍𑌰𑌦𑍍𑌰𑍁𑌹𑌃 𑌕𑍍𑌷𑌤𑍍𑌰𑌿𑌯𑌾𑌨𑍍
𑌦𑌿𑌕𑍍𑌚𑌕𑍍𑌰𑍇𑌷𑍁 𑌕𑍁𑌠𑌾𑌰𑌯𑌨𑍍 𑌵𑌿𑌶𑌿𑌖𑌯𑌨𑍍 𑌨𑌿𑌃𑌕𑍍𑌷𑌤𑍍𑌰𑌿𑌯𑌾𑌂 𑌮𑍇𑌦𑌿𑌨𑍀𑌮𑍍 ॥𑍯॥

𑌤𑌾𑌤𑍋𑌜𑍍𑌜𑍀𑌵𑌨𑌕𑍃𑌨𑍍𑌨𑍃𑌪𑌾𑌲𑌕𑌕𑍁𑌲𑌂 𑌤𑍍𑌰𑌿𑌸𑍍𑌸𑌪𑍍𑌤𑌕𑍃𑌤𑍍𑌵𑍋 𑌜𑌯𑌨𑍍
𑌸𑌂𑌤𑌰𑍍𑌪𑍍𑌯𑌾𑌥 𑌸𑌮𑌂𑌤𑌪𑌂𑌚𑌕𑌮𑌹𑌾𑌰𑌕𑍍𑌤𑌹𑍃𑌦𑍌𑌘𑍇 𑌪𑌿𑌤𑍃𑌨𑍍
𑌯𑌜𑍍𑌞𑍇 𑌕𑍍𑌷𑍍𑌮𑌾𑌮𑌪𑌿 𑌕𑌾𑌶𑍍𑌯𑌪𑌾𑌦𑌿𑌷𑍁 𑌦𑌿𑌶𑌨𑍍 𑌸𑌾𑌲𑍍𑌵𑍇𑌨 𑌯𑍁𑌧𑍍𑌯𑌨𑍍 𑌪𑍁𑌨𑌃
𑌕𑍃𑌷𑍍𑌣𑍋𑌽𑌮𑍁𑌂 𑌨𑌿𑌹𑌨𑌿𑌷𑍍𑌯𑌤𑍀𑌤𑌿 𑌶𑌮𑌿𑌤𑍋 𑌯𑍁𑌦𑍍𑌧𑌾𑌤𑍍 𑌕𑍁𑌮𑌾𑌰𑍈𑌰𑍍𑌭𑌵𑌾𑌨𑍍 ॥10॥

𑌨𑍍𑌯𑌸𑍍𑌯𑌾𑌸𑍍𑌤𑍍𑌰𑌾𑌣𑌿 𑌮𑌹𑍇𑌂𑌦𑍍𑌰𑌭𑍂𑌭𑍃𑌤𑌿 𑌤𑌪𑌸𑍍𑌤𑌨𑍍𑌵𑌨𑍍 𑌪𑍁𑌨𑌰𑍍𑌮𑌜𑍍𑌜𑌿𑌤𑌾𑌂
𑌗𑍋𑌕𑌰𑍍𑌣𑌾𑌵𑌧𑌿 𑌸𑌾𑌗𑌰𑍇𑌣 𑌧𑌰𑌣𑍀𑌂 𑌦𑍃𑌷𑍍𑌟𑍍𑌵𑌾𑌰𑍍𑌥𑌿𑌤𑌸𑍍𑌤𑌾𑌪𑌸𑍈𑌃 ।
𑌧𑍍𑌯𑌾𑌤𑍇𑌷𑍍𑌵𑌾𑌸𑌧𑍃𑌤𑌾𑌨𑌲𑌾𑌸𑍍𑌤𑍍𑌰𑌚𑌕𑌿𑌤𑌂 𑌸𑌿𑌂𑌧𑍁𑌂 𑌸𑍍𑌰𑍁𑌵𑌕𑍍𑌷𑍇𑌪𑌣𑌾-
𑌦𑍁𑌤𑍍𑌸𑌾𑌰𑍍𑌯𑍋𑌦𑍍𑌧𑍃𑌤𑌕𑍇𑌰𑌲𑍋 𑌭𑍃𑌗𑍁𑌪𑌤𑍇 𑌵𑌾𑌤𑍇𑌶 𑌸𑌂𑌰𑌕𑍍𑌷 𑌮𑌾𑌮𑍍 ॥11॥