𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 33 – 𑌅𑌂𑌬𑌰𑍀𑌷𑌚𑌰𑌿𑌤𑌮𑍍

𑌵𑍈𑌵𑌸𑍍𑌵𑌤𑌾𑌖𑍍𑌯𑌮𑌨𑍁𑌪𑍁𑌤𑍍𑌰𑌨𑌭𑌾𑌗𑌜𑌾𑌤-
𑌨𑌾𑌭𑌾𑌗𑌨𑌾𑌮𑌕𑌨𑌰𑍇𑌂𑌦𑍍𑌰𑌸𑍁𑌤𑍋𑌽𑌂𑌬𑌰𑍀𑌷𑌃 ।
𑌸𑌪𑍍𑌤𑌾𑌰𑍍𑌣𑌵𑌾𑌵𑍃𑌤𑌮𑌹𑍀𑌦𑌯𑌿𑌤𑍋𑌽𑌪𑌿 𑌰𑍇𑌮𑍇
𑌤𑍍𑌵𑌤𑍍𑌸𑌂𑌗𑌿𑌷𑍁 𑌤𑍍𑌵𑌯𑌿 𑌚 𑌮𑌗𑍍𑌨𑌮𑌨𑌾𑌸𑍍𑌸𑌦𑍈𑌵 ॥1॥

𑌤𑍍𑌵𑌤𑍍𑌪𑍍𑌰𑍀𑌤𑌯𑍇 𑌸𑌕𑌲𑌮𑍇𑌵 𑌵𑌿𑌤𑌨𑍍𑌵𑌤𑍋𑌽𑌸𑍍𑌯
𑌭𑌕𑍍𑌤𑍍𑌯𑍈𑌵 𑌦𑍇𑌵 𑌨𑌚𑌿𑌰𑌾𑌦𑌭𑍃𑌥𑌾𑌃 𑌪𑍍𑌰𑌸𑌾𑌦𑌮𑍍 ।
𑌯𑍇𑌨𑌾𑌸𑍍𑌯 𑌯𑌾𑌚𑌨𑌮𑍃𑌤𑍇𑌽𑌪𑍍𑌯𑌭𑌿𑌰𑌕𑍍𑌷𑌣𑌾𑌰𑍍𑌥𑌂
𑌚𑌕𑍍𑌰𑌂 𑌭𑌵𑌾𑌨𑍍 𑌪𑍍𑌰𑌵𑌿𑌤𑌤𑌾𑌰 𑌸𑌹𑌸𑍍𑌰𑌧𑌾𑌰𑌮𑍍 ॥2॥

𑌸 𑌦𑍍𑌵𑌾𑌦𑌶𑍀𑌵𑍍𑌰𑌤𑌮𑌥𑍋 𑌭𑌵𑌦𑌰𑍍𑌚𑌨𑌾𑌰𑍍𑌥𑌂
𑌵𑌰𑍍𑌷𑌂 𑌦𑌧𑍌 𑌮𑌧𑍁𑌵𑌨𑍇 𑌯𑌮𑍁𑌨𑍋𑌪𑌕𑌂𑌠𑍇 ।
𑌪𑌤𑍍𑌨𑍍𑌯𑌾 𑌸𑌮𑌂 𑌸𑍁𑌮𑌨𑌸𑌾 𑌮𑌹𑌤𑍀𑌂 𑌵𑌿𑌤𑌨𑍍𑌵𑌨𑍍
𑌪𑍂𑌜𑌾𑌂 𑌦𑍍𑌵𑌿𑌜𑍇𑌷𑍁 𑌵𑌿𑌸𑍃𑌜𑌨𑍍 𑌪𑌶𑍁𑌷𑌷𑍍𑌟𑌿𑌕𑍋𑌟𑌿𑌮𑍍 ॥3॥

𑌤𑌤𑍍𑌰𑌾𑌥 𑌪𑌾𑌰𑌣𑌦𑌿𑌨𑍇 𑌭𑌵𑌦𑌰𑍍𑌚𑌨𑌾𑌂𑌤𑍇
𑌦𑍁𑌰𑍍𑌵𑌾𑌸𑌸𑌾𑌽𑌸𑍍𑌯 𑌮𑍁𑌨𑌿𑌨𑌾 𑌭𑌵𑌨𑌂 𑌪𑍍𑌰𑌪𑍇𑌦𑍇 ।
𑌭𑍋𑌕𑍍𑌤𑍁𑌂 𑌵𑍃𑌤𑌶𑍍𑌚𑌸 𑌨𑍃𑌪𑍇𑌣 𑌪𑌰𑌾𑌰𑍍𑌤𑌿𑌶𑍀𑌲𑍋
𑌮𑌂𑌦𑌂 𑌜𑌗𑌾𑌮 𑌯𑌮𑍁𑌨𑌾𑌂 𑌨𑌿𑌯𑌮𑌾𑌨𑍍𑌵𑌿𑌧𑌾𑌸𑍍𑌯𑌨𑍍 ॥4॥

𑌰𑌾𑌜𑍍𑌞𑌾𑌽𑌥 𑌪𑌾𑌰𑌣𑌮𑍁𑌹𑍂𑌰𑍍𑌤𑌸𑌮𑌾𑌪𑍍𑌤𑌿𑌖𑍇𑌦𑌾-
𑌦𑍍𑌵𑌾𑌰𑍈𑌵 𑌪𑌾𑌰𑌣𑌮𑌕𑌾𑌰𑌿 𑌭𑌵𑌤𑍍𑌪𑌰𑍇𑌣 ।
𑌪𑍍𑌰𑌾𑌪𑍍𑌤𑍋 𑌮𑍁𑌨𑌿𑌸𑍍𑌤𑌦𑌥 𑌦𑌿𑌵𑍍𑌯𑌦𑍃𑌶𑌾 𑌵𑌿𑌜𑌾𑌨𑌨𑍍
𑌕𑍍𑌷𑌿𑌪𑍍𑌯𑌨𑍍 𑌕𑍍𑌰𑍁𑌧𑍋𑌦𑍍𑌧𑍃𑌤𑌜𑌟𑍋 𑌵𑌿𑌤𑌤𑌾𑌨 𑌕𑍃𑌤𑍍𑌯𑌾𑌮𑍍 ॥5॥

𑌕𑍃𑌤𑍍𑌯𑌾𑌂 𑌚 𑌤𑌾𑌮𑌸𑌿𑌧𑌰𑌾𑌂 𑌭𑍁𑌵𑌨𑌂 𑌦𑌹𑌂𑌤𑍀-
𑌮𑌗𑍍𑌰𑍇𑌽𑌭𑌿𑌵𑍀𑌕𑍍𑌷𑍍𑌯𑌨𑍃𑌪𑌤𑌿𑌰𑍍𑌨 𑌪𑌦𑌾𑌚𑍍𑌚𑌕𑌂𑌪𑍇 ।
𑌤𑍍𑌵𑌦𑍍𑌭𑌕𑍍𑌤𑌬𑌾𑌧𑌮𑌭𑌿𑌵𑍀𑌕𑍍𑌷𑍍𑌯 𑌸𑍁𑌦𑌰𑍍𑌶𑌨𑌂 𑌤𑍇
𑌕𑍃𑌤𑍍𑌯𑌾𑌨𑌲𑌂 𑌶𑌲𑌭𑌯𑌨𑍍 𑌮𑍁𑌨𑌿𑌮𑌨𑍍𑌵𑌧𑌾𑌵𑍀𑌤𑍍 ॥6॥

𑌧𑌾𑌵𑌨𑍍𑌨𑌶𑍇𑌷𑌭𑍁𑌵𑌨𑍇𑌷𑍁 𑌭𑌿𑌯𑌾 𑌸 𑌪𑌶𑍍𑌯𑌨𑍍
𑌵𑌿𑌶𑍍𑌵𑌤𑍍𑌰 𑌚𑌕𑍍𑌰𑌮𑌪𑌿 𑌤𑍇 𑌗𑌤𑌵𑌾𑌨𑍍 𑌵𑌿𑌰𑌿𑌂𑌚𑌮𑍍 ।
𑌕𑌃 𑌕𑌾𑌲𑌚𑌕𑍍𑌰𑌮𑌤𑌿𑌲𑌂𑌘𑌯𑌤𑍀𑌤𑍍𑌯𑌪𑌾𑌸𑍍𑌤𑌃
𑌶𑌰𑍍𑌵𑌂 𑌯𑌯𑍌 𑌸 𑌚 𑌭𑌵𑌂𑌤𑌮𑌵𑌂𑌦𑌤𑍈𑌵 ॥𑍭॥

𑌭𑍂𑌯𑍋 𑌭𑌵𑌨𑍍𑌨𑌿𑌲𑌯𑌮𑍇𑌤𑍍𑌯 𑌮𑍁𑌨𑌿𑌂 𑌨𑌮𑌂𑌤𑌂
𑌪𑍍𑌰𑍋𑌚𑍇 𑌭𑌵𑌾𑌨𑌹𑌮𑍃𑌷𑍇 𑌨𑌨𑍁 𑌭𑌕𑍍𑌤𑌦𑌾𑌸𑌃 ।
𑌜𑍍𑌞𑌾𑌨𑌂 𑌤𑌪𑌶𑍍𑌚 𑌵𑌿𑌨𑌯𑌾𑌨𑍍𑌵𑌿𑌤𑌮𑍇𑌵 𑌮𑌾𑌨𑍍𑌯𑌂
𑌯𑌾𑌹𑍍𑌯𑌂𑌬𑌰𑍀𑌷𑌪𑌦𑌮𑍇𑌵 𑌭𑌜𑍇𑌤𑌿 𑌭𑍂𑌮𑌨𑍍 ॥𑍮॥

𑌤𑌾𑌵𑌤𑍍𑌸𑌮𑍇𑌤𑍍𑌯 𑌮𑍁𑌨𑌿𑌨𑌾 𑌸 𑌗𑍃𑌹𑍀𑌤𑌪𑌾𑌦𑍋
𑌰𑌾𑌜𑌾𑌽𑌪𑌸𑍃𑌤𑍍𑌯 𑌭𑌵𑌦𑌸𑍍𑌤𑍍𑌰𑌮𑌸𑌾𑌵𑌨𑍌𑌷𑍀𑌤𑍍 ।
𑌚𑌕𑍍𑌰𑍇 𑌗𑌤𑍇 𑌮𑍁𑌨𑌿𑌰𑌦𑌾𑌦𑌖𑌿𑌲𑌾𑌶𑌿𑌷𑍋𑌽𑌸𑍍𑌮𑍈
𑌤𑍍𑌵𑌦𑍍𑌭𑌕𑍍𑌤𑌿𑌮𑌾𑌗𑌸𑌿 𑌕𑍃𑌤𑍇𑌽𑌪𑌿 𑌕𑍃𑌪𑌾𑌂 𑌚 𑌶𑌂𑌸𑌨𑍍 ॥𑍯॥

𑌰𑌾𑌜𑌾 𑌪𑍍𑌰𑌤𑍀𑌕𑍍𑌷𑍍𑌯 𑌮𑍁𑌨𑌿𑌮𑍇𑌕𑌸𑌮𑌾𑌮𑌨𑌾𑌶𑍍𑌵𑌾𑌨𑍍
𑌸𑌂𑌭𑍋𑌜𑍍𑌯 𑌸𑌾𑌧𑍁 𑌤𑌮𑍃𑌷𑌿𑌂 𑌵𑌿𑌸𑍃𑌜𑌨𑍍 𑌪𑍍𑌰𑌸𑌨𑍍𑌨𑌮𑍍 ।
𑌭𑍁𑌕𑍍𑌤𑍍𑌵𑌾 𑌸𑍍𑌵𑌯𑌂 𑌤𑍍𑌵𑌯𑌿 𑌤𑌤𑍋𑌽𑌪𑌿 𑌦𑍃𑌢𑌂 𑌰𑌤𑍋𑌽𑌭𑍂-
𑌤𑍍𑌸𑌾𑌯𑍁𑌜𑍍𑌯𑌮𑌾𑌪 𑌚 𑌸 𑌮𑌾𑌂 𑌪𑌵𑌨𑍇𑌶 𑌪𑌾𑌯𑌾𑌃 ॥10॥