𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 31 – 𑌬𑌲𑌿𑌦𑌰𑍍𑌪𑌹𑌰𑌣𑌮𑍍

𑌪𑍍𑌰𑍀𑌤𑍍𑌯𑌾 𑌦𑍈𑌤𑍍𑌯𑌸𑍍𑌤𑌵 𑌤𑌨𑍁𑌮𑌹𑌃𑌪𑍍𑌰𑍇𑌕𑍍𑌷𑌣𑌾𑌤𑍍 𑌸𑌰𑍍𑌵𑌥𑌾𑌽𑌪𑌿
𑌤𑍍𑌵𑌾𑌮𑌾𑌰𑌾𑌧𑍍𑌯𑌨𑍍𑌨𑌜𑌿𑌤 𑌰𑌚𑌯𑌨𑍍𑌨𑌂𑌜𑌲𑌿𑌂 𑌸𑌂𑌜𑌗𑌾𑌦 ।
𑌮𑌤𑍍𑌤𑌃 𑌕𑌿𑌂 𑌤𑍇 𑌸𑌮𑌭𑌿𑌲𑌷𑌿𑌤𑌂 𑌵𑌿𑌪𑍍𑌰𑌸𑍂𑌨𑍋 𑌵𑌦 𑌤𑍍𑌵𑌂
𑌵𑌿𑌤𑍍𑌤𑌂 𑌭𑌕𑍍𑌤𑌂 𑌭𑌵𑌨𑌮𑌵𑌨𑍀𑌂 𑌵𑌾𑌽𑌪𑌿 𑌸𑌰𑍍𑌵𑌂 𑌪𑍍𑌰𑌦𑌾𑌸𑍍𑌯𑍇 ॥1॥

𑌤𑌾𑌮𑍀𑌕𑍍𑌷𑌣𑌾𑌂 𑌬𑌲𑌿𑌗𑌿𑌰𑌮𑍁𑌪𑌾𑌕𑌰𑍍𑌣𑍍𑌯 𑌕𑌾𑌰𑍁𑌣𑍍𑌯𑌪𑍂𑌰𑍍𑌣𑍋𑌽-
𑌪𑍍𑌯𑌸𑍍𑌯𑍋𑌤𑍍𑌸𑍇𑌕𑌂 𑌶𑌮𑌯𑌿𑌤𑍁𑌮𑌨𑌾 𑌦𑍈𑌤𑍍𑌯𑌵𑌂𑌶𑌂 𑌪𑍍𑌰𑌶𑌂𑌸𑌨𑍍 ।
𑌭𑍂𑌮𑌿𑌂 𑌪𑌾𑌦𑌤𑍍𑌰𑌯𑌪𑌰𑌿𑌮𑌿𑌤𑌾𑌂 𑌪𑍍𑌰𑌾𑌰𑍍𑌥𑌯𑌾𑌮𑌾𑌸𑌿𑌥 𑌤𑍍𑌵𑌂
𑌸𑌰𑍍𑌵𑌂 𑌦𑍇𑌹𑍀𑌤𑌿 𑌤𑍁 𑌨𑌿𑌗𑌦𑌿𑌤𑍇 𑌕𑌸𑍍𑌯 𑌹𑌾𑌸𑍍𑌯𑌂 𑌨 𑌵𑌾 𑌸𑍍𑌯𑌾𑌤𑍍 ॥2॥

𑌵𑌿𑌶𑍍𑌵𑍇𑌶𑌂 𑌮𑌾𑌂 𑌤𑍍𑌰𑌿𑌪𑌦𑌮𑌿𑌹 𑌕𑌿𑌂 𑌯𑌾𑌚𑌸𑍇 𑌬𑌾𑌲𑌿𑌶𑌸𑍍𑌤𑍍𑌵𑌂
𑌸𑌰𑍍𑌵𑌾𑌂 𑌭𑍂𑌮𑌿𑌂 𑌵𑍃𑌣𑍁 𑌕𑌿𑌮𑌮𑍁𑌨𑍇𑌤𑍍𑌯𑌾𑌲𑌪𑌤𑍍𑌤𑍍𑌵𑌾𑌂 𑌸 𑌦𑍃𑌪𑍍𑌯𑌨𑍍 ।
𑌯𑌸𑍍𑌮𑌾𑌦𑍍𑌦𑌰𑍍𑌪𑌾𑌤𑍍 𑌤𑍍𑌰𑌿𑌪𑌦𑌪𑌰𑌿𑌪𑍂𑌰𑍍𑌤𑍍𑌯𑌕𑍍𑌷𑌮𑌃 𑌕𑍍𑌷𑍇𑌪𑌵𑌾𑌦𑌾𑌨𑍍
𑌬𑌂𑌧𑌂 𑌚𑌾𑌸𑌾𑌵𑌗𑌮𑌦𑌤𑌦𑌰𑍍𑌹𑍋𑌽𑌪𑌿 𑌗𑌾𑌢𑍋𑌪𑌶𑌾𑌂𑌤𑍍𑌯𑍈 ॥3॥

𑌪𑌾𑌦𑌤𑍍𑌰𑌯𑍍𑌯𑌾 𑌯𑌦𑌿 𑌨 𑌮𑍁𑌦𑌿𑌤𑍋 𑌵𑌿𑌷𑍍𑌟𑌪𑍈𑌰𑍍𑌨𑌾𑌪𑌿 𑌤𑍁𑌷𑍍𑌯𑍇-
𑌦𑌿𑌤𑍍𑌯𑍁𑌕𑍍𑌤𑍇𑌽𑌸𑍍𑌮𑌿𑌨𑍍 𑌵𑌰𑌦 𑌭𑌵𑌤𑍇 𑌦𑌾𑌤𑍁𑌕𑌾𑌮𑍇𑌽𑌥 𑌤𑍋𑌯𑌮𑍍 ।
𑌦𑍈𑌤𑍍𑌯𑌾𑌚𑌾𑌰𑍍𑌯𑌸𑍍𑌤𑌵 𑌖𑌲𑍁 𑌪𑌰𑍀𑌕𑍍𑌷𑌾𑌰𑍍𑌥𑌿𑌨𑌃 𑌪𑍍𑌰𑍇𑌰𑌣𑌾𑌤𑍍𑌤𑌂
𑌮𑌾 𑌮𑌾 𑌦𑍇𑌯𑌂 𑌹𑌰𑌿𑌰𑌯𑌮𑌿𑌤𑌿 𑌵𑍍𑌯𑌕𑍍𑌤𑌮𑍇𑌵𑌾𑌬𑌭𑌾𑌷𑍇 ॥4॥

𑌯𑌾𑌚𑌤𑍍𑌯𑍇𑌵𑌂 𑌯𑌦𑌿 𑌸 𑌭𑌗𑌵𑌾𑌨𑍍 𑌪𑍂𑌰𑍍𑌣𑌕𑌾𑌮𑍋𑌽𑌸𑍍𑌮𑌿 𑌸𑍋𑌽𑌹𑌂
𑌦𑌾𑌸𑍍𑌯𑌾𑌮𑍍𑌯𑍇𑌵 𑌸𑍍𑌥𑌿𑌰𑌮𑌿𑌤𑌿 𑌵𑌦𑌨𑍍 𑌕𑌾𑌵𑍍𑌯𑌶𑌪𑍍𑌤𑍋𑌽𑌪𑌿 𑌦𑍈𑌤𑍍𑌯𑌃 ।
𑌵𑌿𑌂𑌧𑍍𑌯𑌾𑌵𑌲𑍍𑌯𑌾 𑌨𑌿𑌜𑌦𑌯𑌿𑌤𑌯𑌾 𑌦𑌤𑍍𑌤𑌪𑌾𑌦𑍍𑌯𑌾𑌯 𑌤𑍁𑌭𑍍𑌯𑌂
𑌚𑌿𑌤𑍍𑌰𑌂 𑌚𑌿𑌤𑍍𑌰𑌂 𑌸𑌕𑌲𑌮𑌪𑌿 𑌸 𑌪𑍍𑌰𑌾𑌰𑍍𑌪𑌯𑌤𑍍𑌤𑍋𑌯𑌪𑍂𑌰𑍍𑌵𑌮𑍍 ॥5॥

𑌨𑌿𑌸𑍍𑌸𑌂𑌦𑍇𑌹𑌂 𑌦𑌿𑌤𑌿𑌕𑍁𑌲𑌪𑌤𑍌 𑌤𑍍𑌵𑌯𑍍𑌯𑌶𑍇𑌷𑌾𑌰𑍍𑌪𑌣𑌂 𑌤𑌦𑍍-
𑌵𑍍𑌯𑌾𑌤𑌨𑍍𑌵𑌾𑌨𑍇 𑌮𑍁𑌮𑍁𑌚𑍁𑌃-𑌋𑌷𑌯𑌃 𑌸𑌾𑌮𑌰𑌾𑌃 𑌪𑍁𑌷𑍍𑌪𑌵𑌰𑍍𑌷𑌮𑍍 ।
𑌦𑌿𑌵𑍍𑌯𑌂 𑌰𑍂𑌪𑌂 𑌤𑌵 𑌚 𑌤𑌦𑌿𑌦𑌂 𑌪𑌶𑍍𑌯𑌤𑌾𑌂 𑌵𑌿𑌶𑍍𑌵𑌭𑌾𑌜𑌾-
𑌮𑍁𑌚𑍍𑌚𑍈𑌰𑍁𑌚𑍍𑌚𑍈𑌰𑌵𑍃𑌧𑌦𑌵𑌧𑍀𑌕𑍃𑌤𑍍𑌯 𑌵𑌿𑌶𑍍𑌵𑌾𑌂𑌡𑌭𑌾𑌂𑌡𑌮𑍍 ॥6॥

𑌤𑍍𑌵𑌤𑍍𑌪𑌾𑌦𑌾𑌗𑍍𑌰𑌂 𑌨𑌿𑌜𑌪𑌦𑌗𑌤𑌂 𑌪𑍁𑌂𑌡𑌰𑍀𑌕𑍋𑌦𑍍𑌭𑌵𑍋𑌽𑌸𑍌
𑌕𑍁𑌂𑌡𑍀𑌤𑍋𑌯𑍈𑌰𑌸𑌿𑌚𑌦𑌪𑍁𑌨𑌾𑌦𑍍𑌯𑌜𑍍𑌜𑌲𑌂 𑌵𑌿𑌶𑍍𑌵𑌲𑍋𑌕𑌾𑌨𑍍 ।
𑌹𑌰𑍍𑌷𑍋𑌤𑍍𑌕𑌰𑍍𑌷𑌾𑌤𑍍 𑌸𑍁𑌬𑌹𑍁 𑌨𑌨𑍃𑌤𑍇 𑌖𑍇𑌚𑌰𑍈𑌰𑍁𑌤𑍍𑌸𑌵𑍇𑌽𑌸𑍍𑌮𑌿𑌨𑍍
𑌭𑍇𑌰𑍀𑌂 𑌨𑌿𑌘𑍍𑌨𑌨𑍍 𑌭𑍁𑌵𑌨𑌮𑌚𑌰𑌜𑍍𑌜𑌾𑌂𑌬𑌵𑌾𑌨𑍍 𑌭𑌕𑍍𑌤𑌿𑌶𑌾𑌲𑍀 ॥𑍭॥

𑌤𑌾𑌵𑌦𑍍𑌦𑍈𑌤𑍍𑌯𑌾𑌸𑍍𑌤𑍍𑌵𑌨𑍁𑌮𑌤𑌿𑌮𑍃𑌤𑍇 𑌭𑌰𑍍𑌤𑍁𑌰𑌾𑌰𑌬𑍍𑌧𑌯𑍁𑌦𑍍𑌧𑌾
𑌦𑍇𑌵𑍋𑌪𑍇𑌤𑍈𑌰𑍍𑌭𑌵𑌦𑌨𑍁𑌚𑌰𑍈𑌸𑍍𑌸𑌂𑌗𑌤𑌾 𑌭𑌂𑌗𑌮𑌾𑌪𑌨𑍍 ।
𑌕𑌾𑌲𑌾𑌤𑍍𑌮𑌾𑌽𑌯𑌂 𑌵𑌸𑌤𑌿 𑌪𑍁𑌰𑌤𑍋 𑌯𑌦𑍍𑌵𑌶𑌾𑌤𑍍 𑌪𑍍𑌰𑌾𑌗𑍍𑌜𑌿𑌤𑌾𑌃 𑌸𑍍𑌮𑌃
𑌕𑌿𑌂 𑌵𑍋 𑌯𑍁𑌦𑍍𑌧𑍈𑌰𑌿𑌤𑌿 𑌬𑌲𑌿𑌗𑌿𑌰𑌾 𑌤𑍇𑌽𑌥 𑌪𑌾𑌤𑌾𑌲𑌮𑌾𑌪𑍁𑌃 ॥𑍮॥

𑌪𑌾𑌶𑍈𑌰𑍍𑌬𑌦𑍍𑌧𑌂 𑌪𑌤𑌗𑌪𑌤𑌿𑌨𑌾 𑌦𑍈𑌤𑍍𑌯𑌮𑍁𑌚𑍍𑌚𑍈𑌰𑌵𑌾𑌦𑍀-
𑌸𑍍𑌤𑌾𑌰𑍍𑌤𑍍𑌤𑍀𑌯𑍀𑌕𑌂 𑌦𑌿𑌶 𑌮𑌮 𑌪𑌦𑌂 𑌕𑌿𑌂 𑌨 𑌵𑌿𑌶𑍍𑌵𑍇𑌶𑍍𑌵𑌰𑍋𑌽𑌸𑌿 ।
𑌪𑌾𑌦𑌂 𑌮𑍂𑌰𑍍𑌧𑍍𑌨𑌿 𑌪𑍍𑌰𑌣𑌯 𑌭𑌗𑌵𑌨𑍍𑌨𑌿𑌤𑍍𑌯𑌕𑌂𑌪𑌂 𑌵𑌦𑌂𑌤𑌂
𑌪𑍍𑌰𑌹𑍍𑌲𑌾𑌦𑍍𑌸𑍍𑌤𑌂 𑌸𑍍𑌵𑌯𑌮𑍁𑌪𑌗𑌤𑍋 𑌮𑌾𑌨𑌯𑌨𑍍𑌨𑌸𑍍𑌤𑌵𑍀𑌤𑍍𑌤𑍍𑌵𑌾𑌮𑍍 ॥𑍯॥

𑌦𑌰𑍍𑌪𑍋𑌚𑍍𑌛𑌿𑌤𑍍𑌤𑍍𑌯𑍈 𑌵𑌿𑌹𑌿𑌤𑌮𑌖𑌿𑌲𑌂 𑌦𑍈𑌤𑍍𑌯 𑌸𑌿𑌦𑍍𑌧𑍋𑌽𑌸𑌿 𑌪𑍁𑌣𑍍𑌯𑍈-
𑌰𑍍𑌲𑍋𑌕𑌸𑍍𑌤𑍇𑌽𑌸𑍍𑌤𑍁 𑌤𑍍𑌰𑌿𑌦𑌿𑌵𑌵𑌿𑌜𑌯𑍀 𑌵𑌾𑌸𑌵𑌤𑍍𑌵𑌂 𑌚 𑌪𑌶𑍍𑌚𑌾𑌤𑍍 ।
𑌮𑌤𑍍𑌸𑌾𑌯𑍁𑌜𑍍𑌯𑌂 𑌭𑌜 𑌚 𑌪𑍁𑌨𑌰𑌿𑌤𑍍𑌯𑌨𑍍𑌵𑌗𑍃𑌹𑍍𑌣𑌾 𑌬𑌲𑌿𑌂 𑌤𑌂
𑌵𑌿𑌪𑍍𑌰𑍈𑌸𑍍𑌸𑌂𑌤𑌾𑌨𑌿𑌤𑌮𑌖𑌵𑌰𑌃 𑌪𑌾𑌹𑌿 𑌵𑌾𑌤𑌾𑌲𑌯𑍇𑌶 ॥10॥