𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 25 – 𑌨𑌰𑌸𑌿𑌂𑌹𑌾𑌵𑌤𑌾𑌰𑌮𑍍

𑌸𑍍𑌤𑌂𑌭𑍇 𑌘𑌟𑍍𑌟𑌯𑌤𑍋 𑌹𑌿𑌰𑌣𑍍𑌯𑌕𑌶𑌿𑌪𑍋𑌃 𑌕𑌰𑍍𑌣𑍌 𑌸𑌮𑌾𑌚𑍂𑌰𑍍𑌣𑌯-
𑌨𑍍𑌨𑌾𑌘𑍂𑌰𑍍𑌣𑌜𑍍𑌜𑌗𑌦𑌂𑌡𑌕𑍁𑌂𑌡𑌕𑍁𑌹𑌰𑍋 𑌘𑍋𑌰𑌸𑍍𑌤𑌵𑌾𑌭𑍂𑌦𑍍𑌰𑌵𑌃 ।
𑌶𑍍𑌰𑍁𑌤𑍍𑌵𑌾 𑌯𑌂 𑌕𑌿𑌲 𑌦𑍈𑌤𑍍𑌯𑌰𑌾𑌜𑌹𑍃𑌦𑌯𑍇 𑌪𑍂𑌰𑍍𑌵𑌂 𑌕𑌦𑌾𑌪𑍍𑌯𑌶𑍍𑌰𑍁𑌤𑌂
𑌕𑌂𑌪𑌃 𑌕𑌶𑍍𑌚𑌨 𑌸𑌂𑌪𑌪𑌾𑌤 𑌚𑌲𑌿𑌤𑍋𑌽𑌪𑍍𑌯𑌂𑌭𑍋𑌜𑌭𑍂𑌰𑍍𑌵𑌿𑌷𑍍𑌟𑌰𑌾𑌤𑍍 ॥1॥

𑌦𑍈𑌤𑍍𑌯𑍇 𑌦𑌿𑌕𑍍𑌷𑍁 𑌵𑌿𑌸𑍃𑌷𑍍𑌟𑌚𑌕𑍍𑌷𑍁𑌷𑌿 𑌮𑌹𑌾𑌸𑌂𑌰𑌂𑌭𑌿𑌣𑌿 𑌸𑍍𑌤𑌂𑌭𑌤𑌃
𑌸𑌂𑌭𑍂𑌤𑌂 𑌨 𑌮𑍃𑌗𑌾𑌤𑍍𑌮𑌕𑌂 𑌨 𑌮𑌨𑍁𑌜𑌾𑌕𑌾𑌰𑌂 𑌵𑌪𑍁𑌸𑍍𑌤𑍇 𑌵𑌿𑌭𑍋 ।
𑌕𑌿𑌂 𑌕𑌿𑌂 𑌭𑍀𑌷𑌣𑌮𑍇𑌤𑌦𑌦𑍍𑌭𑍁𑌤𑌮𑌿𑌤𑌿 𑌵𑍍𑌯𑍁𑌦𑍍𑌭𑍍𑌰𑌾𑌂𑌤𑌚𑌿𑌤𑍍𑌤𑍇𑌽𑌸𑍁𑌰𑍇
𑌵𑌿𑌸𑍍𑌫𑍂𑌰𑍍𑌜𑍍𑌜𑌦𑍍𑌧𑌵𑌲𑍋𑌗𑍍𑌰𑌰𑍋𑌮𑌵𑌿𑌕𑌸𑌦𑍍𑌵𑌰𑍍𑌷𑍍𑌮𑌾 𑌸𑌮𑌾𑌜𑍃𑌂𑌭𑌥𑌾𑌃 ॥2॥

𑌤𑌪𑍍𑌤𑌸𑍍𑌵𑌰𑍍𑌣𑌸𑌵𑌰𑍍𑌣𑌘𑍂𑌰𑍍𑌣𑌦𑌤𑌿𑌰𑍂𑌕𑍍𑌷𑌾𑌕𑍍𑌷𑌂 𑌸𑌟𑌾𑌕𑍇𑌸𑌰-
𑌪𑍍𑌰𑍋𑌤𑍍𑌕𑌂𑌪𑌪𑍍𑌰𑌨𑌿𑌕𑍁𑌂𑌬𑌿𑌤𑌾𑌂𑌬𑌰𑌮𑌹𑍋 𑌜𑍀𑌯𑌾𑌤𑍍𑌤𑌵𑍇𑌦𑌂 𑌵𑌪𑍁𑌃 ।
𑌵𑍍𑌯𑌾𑌤𑍍𑌤𑌵𑍍𑌯𑌾𑌪𑍍𑌤𑌮𑌹𑌾𑌦𑌰𑍀𑌸𑌖𑌮𑍁𑌖𑌂 𑌖𑌡𑍍𑌗𑍋𑌗𑍍𑌰𑌵𑌲𑍍𑌗𑌨𑍍𑌮𑌹𑌾-
𑌜𑌿𑌹𑍍𑌵𑌾𑌨𑌿𑌰𑍍𑌗𑌮𑌦𑍃𑌶𑍍𑌯𑌮𑌾𑌨𑌸𑍁𑌮𑌹𑌾𑌦𑌂𑌷𑍍𑌟𑍍𑌰𑌾𑌯𑍁𑌗𑍋𑌡𑍍𑌡𑌾𑌮𑌰𑌮𑍍 ॥3॥

𑌉𑌤𑍍𑌸𑌰𑍍𑌪𑌦𑍍𑌵𑌲𑌿𑌭𑌂𑌗𑌭𑍀𑌷𑌣𑌹𑌨𑍁 𑌹𑍍𑌰𑌸𑍍𑌵𑌸𑍍𑌥𑌵𑍀𑌯𑌸𑍍𑌤𑌰-
𑌗𑍍𑌰𑍀𑌵𑌂 𑌪𑍀𑌵𑌰𑌦𑍋𑌶𑍍𑌶𑌤𑍋𑌦𑍍𑌗𑌤𑌨𑌖𑌕𑍍𑌰𑍂𑌰𑌾𑌂𑌶𑍁𑌦𑍂𑌰𑍋𑌲𑍍𑌬𑌣𑌮𑍍 ।
𑌵𑍍𑌯𑍋𑌮𑍋𑌲𑍍𑌲𑌂𑌘𑌿 𑌘𑌨𑌾𑌘𑌨𑍋𑌪𑌮𑌘𑌨𑌪𑍍𑌰𑌧𑍍𑌵𑌾𑌨𑌨𑌿𑌰𑍍𑌧𑌾𑌵𑌿𑌤-
𑌸𑍍𑌪𑌰𑍍𑌧𑌾𑌲𑍁𑌪𑍍𑌰𑌕𑌰𑌂 𑌨𑌮𑌾𑌮𑌿 𑌭𑌵𑌤𑌸𑍍𑌤𑌨𑍍𑌨𑌾𑌰𑌸𑌿𑌂𑌹𑌂 𑌵𑌪𑍁𑌃 ॥4॥

𑌨𑍂𑌨𑌂 𑌵𑌿𑌷𑍍𑌣𑍁𑌰𑌯𑌂 𑌨𑌿𑌹𑌨𑍍𑌮𑍍𑌯𑌮𑍁𑌮𑌿𑌤𑌿 𑌭𑍍𑌰𑌾𑌮𑍍𑌯𑌦𑍍𑌗𑌦𑌾𑌭𑍀𑌷𑌣𑌂
𑌦𑍈𑌤𑍍𑌯𑍇𑌂𑌦𑍍𑌰𑌂 𑌸𑌮𑍁𑌪𑌾𑌦𑍍𑌰𑌵𑌂𑌤𑌮𑌧𑍃𑌥𑌾 𑌦𑍋𑌰𑍍𑌭𑍍𑌯𑌾𑌂 𑌪𑍃𑌥𑍁𑌭𑍍𑌯𑌾𑌮𑌮𑍁𑌮𑍍 ।
𑌵𑍀𑌰𑍋 𑌨𑌿𑌰𑍍𑌗𑌲𑌿𑌤𑍋𑌽𑌥 𑌖𑌡𑍍𑌗𑌫𑌲𑌕𑍌 𑌗𑍃𑌹𑍍𑌣𑌨𑍍𑌵𑌿𑌚𑌿𑌤𑍍𑌰𑌶𑍍𑌰𑌮𑌾𑌨𑍍
𑌵𑍍𑌯𑌾𑌵𑍃𑌣𑍍𑌵𑌨𑍍 𑌪𑍁𑌨𑌰𑌾𑌪𑌪𑌾𑌤 𑌭𑍁𑌵𑌨𑌗𑍍𑌰𑌾𑌸𑍋𑌦𑍍𑌯𑌤𑌂 𑌤𑍍𑌵𑌾𑌮𑌹𑍋 ॥5॥

𑌭𑍍𑌰𑌾𑌮𑍍𑌯𑌂𑌤𑌂 𑌦𑌿𑌤𑌿𑌜𑌾𑌧𑌮𑌂 𑌪𑍁𑌨𑌰𑌪𑌿 𑌪𑍍𑌰𑍋𑌦𑍍𑌗𑍃𑌹𑍍𑌯 𑌦𑍋𑌰𑍍𑌭𑍍𑌯𑌾𑌂 𑌜𑌵𑌾𑌤𑍍
𑌦𑍍𑌵𑌾𑌰𑍇𑌽𑌥𑍋𑌰𑍁𑌯𑍁𑌗𑍇 𑌨𑌿𑌪𑌾𑌤𑍍𑌯 𑌨𑌖𑌰𑌾𑌨𑍍 𑌵𑍍𑌯𑍁𑌤𑍍𑌖𑌾𑌯 𑌵𑌕𑍍𑌷𑍋𑌭𑍁𑌵𑌿 ।
𑌨𑌿𑌰𑍍𑌭𑌿𑌂𑌦𑌨𑍍𑌨𑌧𑌿𑌗𑌰𑍍𑌭𑌨𑌿𑌰𑍍𑌭𑌰𑌗𑌲𑌦𑍍𑌰𑌕𑍍𑌤𑌾𑌂𑌬𑍁 𑌬𑌦𑍍𑌧𑍋𑌤𑍍𑌸𑌵𑌂
𑌪𑌾𑌯𑌂 𑌪𑌾𑌯𑌮𑍁𑌦𑍈𑌰𑌯𑍋 𑌬𑌹𑍁 𑌜𑌗𑌤𑍍𑌸𑌂𑌹𑌾𑌰𑌿𑌸𑌿𑌂𑌹𑌾𑌰𑌵𑌾𑌨𑍍 ॥6॥

𑌤𑍍𑌯𑌕𑍍𑌤𑍍𑌵𑌾 𑌤𑌂 𑌹𑌤𑌮𑌾𑌶𑍁 𑌰𑌕𑍍𑌤𑌲𑌹𑌰𑍀𑌸𑌿𑌕𑍍𑌤𑍋𑌨𑍍𑌨𑌮𑌦𑍍𑌵𑌰𑍍𑌷𑍍𑌮𑌣𑌿
𑌪𑍍𑌰𑌤𑍍𑌯𑍁𑌤𑍍𑌪𑌤𑍍𑌯 𑌸𑌮𑌸𑍍𑌤𑌦𑍈𑌤𑍍𑌯𑌪𑌟𑌲𑍀𑌂 𑌚𑌾𑌖𑌾𑌦𑍍𑌯𑌮𑌾𑌨𑍇 𑌤𑍍𑌵𑌯𑌿 ।
𑌭𑍍𑌰𑌾𑌮𑍍𑌯𑌦𑍍𑌭𑍂𑌮𑌿 𑌵𑌿𑌕𑌂𑌪𑌿𑌤𑌾𑌂𑌬𑍁𑌧𑌿𑌕𑍁𑌲𑌂 𑌵𑍍𑌯𑌾𑌲𑍋𑌲𑌶𑍈𑌲𑍋𑌤𑍍𑌕𑌰𑌂
𑌪𑍍𑌰𑍋𑌤𑍍𑌸𑌰𑍍𑌪𑌤𑍍𑌖𑌚𑌰𑌂 𑌚𑌰𑌾𑌚𑌰𑌮𑌹𑍋 𑌦𑍁𑌃𑌸𑍍𑌥𑌾𑌮𑌵𑌸𑍍𑌥𑌾𑌂 𑌦𑌧𑍌 ॥𑍭॥

𑌤𑌾𑌵𑌨𑍍𑌮𑌾𑌂𑌸𑌵𑌪𑌾𑌕𑌰𑌾𑌲𑌵𑌪𑍁𑌷𑌂 𑌘𑍋𑌰𑌾𑌂𑌤𑍍𑌰𑌮𑌾𑌲𑌾𑌧𑌰𑌂
𑌤𑍍𑌵𑌾𑌂 𑌮𑌧𑍍𑌯𑍇𑌸𑌭𑌮𑌿𑌦𑍍𑌧𑌕𑍋𑌪𑌮𑍁𑌷𑌿𑌤𑌂 𑌦𑍁𑌰𑍍𑌵𑌾𑌰𑌗𑍁𑌰𑍍𑌵𑌾𑌰𑌵𑌮𑍍 ।
𑌅𑌭𑍍𑌯𑍇𑌤𑍁𑌂 𑌨 𑌶𑌶𑌾𑌕 𑌕𑍋𑌪𑌿 𑌭𑍁𑌵𑌨𑍇 𑌦𑍂𑌰𑍇 𑌸𑍍𑌥𑌿𑌤𑌾 𑌭𑍀𑌰𑌵𑌃
𑌸𑌰𑍍𑌵𑍇 𑌶𑌰𑍍𑌵𑌵𑌿𑌰𑌿𑌂𑌚𑌵𑌾𑌸𑌵𑌮𑍁𑌖𑌾𑌃 𑌪𑍍𑌰𑌤𑍍𑌯𑍇𑌕𑌮𑌸𑍍𑌤𑍋𑌷𑌤 ॥𑍮॥

𑌭𑍂𑌯𑍋𑌽𑌪𑍍𑌯𑌕𑍍𑌷𑌤𑌰𑍋𑌷𑌧𑌾𑌮𑍍𑌨𑌿 𑌭𑌵𑌤𑌿 𑌬𑍍𑌰𑌹𑍍𑌮𑌾𑌜𑍍𑌞𑌯𑌾 𑌬𑌾𑌲𑌕𑍇
𑌪𑍍𑌰𑌹𑍍𑌲𑌾𑌦𑍇 𑌪𑌦𑌯𑍋𑌰𑍍𑌨𑌮𑌤𑍍𑌯𑌪𑌭𑌯𑍇 𑌕𑌾𑌰𑍁𑌣𑍍𑌯𑌭𑌾𑌰𑌾𑌕𑍁𑌲𑌃 ।
𑌶𑌾𑌂𑌤𑌸𑍍𑌤𑍍𑌵𑌂 𑌕𑌰𑌮𑌸𑍍𑌯 𑌮𑍂𑌰𑍍𑌧𑍍𑌨𑌿 𑌸𑌮𑌧𑌾𑌃 𑌸𑍍𑌤𑍋𑌤𑍍𑌰𑍈𑌰𑌥𑍋𑌦𑍍𑌗𑌾𑌯𑌤-
𑌸𑍍𑌤𑌸𑍍𑌯𑌾𑌕𑌾𑌮𑌧𑌿𑌯𑍋𑌽𑌪𑌿 𑌤𑍇𑌨𑌿𑌥 𑌵𑌰𑌂 𑌲𑍋𑌕𑌾𑌯 𑌚𑌾𑌨𑍁𑌗𑍍𑌰𑌹𑌮𑍍 ॥𑍯॥

𑌏𑌵𑌂 𑌨𑌾𑌟𑌿𑌤𑌰𑍌𑌦𑍍𑌰𑌚𑍇𑌷𑍍𑌟𑌿𑌤 𑌵𑌿𑌭𑍋 𑌶𑍍𑌰𑍀𑌤𑌾𑌪𑌨𑍀𑌯𑌾𑌭𑌿𑌧-
𑌶𑍍𑌰𑍁𑌤𑍍𑌯𑌂𑌤𑌸𑍍𑌫𑍁𑌟𑌗𑍀𑌤𑌸𑌰𑍍𑌵𑌮𑌹𑌿𑌮𑌨𑍍𑌨𑌤𑍍𑌯𑌂𑌤𑌶𑍁𑌦𑍍𑌧𑌾𑌕𑍃𑌤𑍇 ।
𑌤𑌤𑍍𑌤𑌾𑌦𑍃𑌙𑍍𑌨𑌿𑌖𑌿𑌲𑍋𑌤𑍍𑌤𑌰𑌂 𑌪𑍁𑌨𑌰𑌹𑍋 𑌕𑌸𑍍𑌤𑍍𑌵𑌾𑌂 𑌪𑌰𑍋 𑌲𑌂𑌘𑌯𑍇𑌤𑍍
𑌪𑍍𑌰𑌹𑍍𑌲𑌾𑌦𑌪𑍍𑌰𑌿𑌯 𑌹𑍇 𑌮𑌰𑍁𑌤𑍍𑌪𑍁𑌰𑌪𑌤𑍇 𑌸𑌰𑍍𑌵𑌾𑌮𑌯𑌾𑌤𑍍𑌪𑌾𑌹𑌿 𑌮𑌾𑌮𑍍 ॥10॥