𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 22 – 𑌅𑌜𑌾𑌮𑌿𑌲𑍋𑌪𑌾𑌖𑍍𑌯𑌾𑌨𑌮𑍍

𑌅𑌜𑌾𑌮𑌿𑌲𑍋 𑌨𑌾𑌮 𑌮𑌹𑍀𑌸𑍁𑌰𑌃 𑌪𑍁𑌰𑌾
𑌚𑌰𑌨𑍍 𑌵𑌿𑌭𑍋 𑌧𑌰𑍍𑌮𑌪𑌥𑌾𑌨𑍍 𑌗𑍃𑌹𑌾𑌶𑍍𑌰𑌮𑍀 ।
𑌗𑍁𑌰𑍋𑌰𑍍𑌗𑌿𑌰𑌾 𑌕𑌾𑌨𑌨𑌮𑍇𑌤𑍍𑌯 𑌦𑍃𑌷𑍍𑌟𑌵𑌾𑌨𑍍
𑌸𑍁𑌧𑍃𑌷𑍍𑌟𑌶𑍀𑌲𑌾𑌂 𑌕𑍁𑌲𑌟𑌾𑌂 𑌮𑌦𑌾𑌕𑍁𑌲𑌾𑌮𑍍 ॥1॥

𑌸𑍍𑌵𑌤𑌃 𑌪𑍍𑌰𑌶𑌾𑌂𑌤𑍋𑌽𑌪𑌿 𑌤𑌦𑌾𑌹𑍃𑌤𑌾𑌶𑌯𑌃
𑌸𑍍𑌵𑌧𑌰𑍍𑌮𑌮𑍁𑌤𑍍𑌸𑍃𑌜𑍍𑌯 𑌤𑌯𑌾 𑌸𑌮𑌾𑌰𑌮𑌨𑍍 ।
𑌅𑌧𑌰𑍍𑌮𑌕𑌾𑌰𑍀 𑌦𑌶𑌮𑍀 𑌭𑌵𑌨𑍍 𑌪𑍁𑌨-
𑌰𑍍𑌦𑌧𑍌 𑌭𑌵𑌨𑍍𑌨𑌾𑌮𑌯𑍁𑌤𑍇 𑌸𑍁𑌤𑍇 𑌰𑌤𑌿𑌮𑍍 ॥2॥

𑌸 𑌮𑍃𑌤𑍍𑌯𑍁𑌕𑌾𑌲𑍇 𑌯𑌮𑌰𑌾𑌜𑌕𑌿𑌂𑌕𑌰𑌾𑌨𑍍
𑌭𑌯𑌂𑌕𑌰𑌾𑌂𑌸𑍍𑌤𑍍𑌰𑍀𑌨𑌭𑌿𑌲𑌕𑍍𑌷𑌯𑌨𑍍 𑌭𑌿𑌯𑌾 ।
𑌪𑍁𑌰𑌾 𑌮𑌨𑌾𑌕𑍍 𑌤𑍍𑌵𑌤𑍍𑌸𑍍𑌮𑍃𑌤𑌿𑌵𑌾𑌸𑌨𑌾𑌬𑌲𑌾𑌤𑍍
𑌜𑍁𑌹𑌾𑌵 𑌨𑌾𑌰𑌾𑌯𑌣𑌨𑌾𑌮𑌕𑌂 𑌸𑍁𑌤𑌮𑍍 ॥3॥

𑌦𑍁𑌰𑌾𑌶𑌯𑌸𑍍𑌯𑌾𑌪𑌿 𑌤𑌦𑌾𑌤𑍍𑌵𑌨𑌿𑌰𑍍𑌗𑌤-
𑌤𑍍𑌵𑌦𑍀𑌯𑌨𑌾𑌮𑌾𑌕𑍍𑌷𑌰𑌮𑌾𑌤𑍍𑌰𑌵𑍈𑌭𑌵𑌾𑌤𑍍 ।
𑌪𑍁𑌰𑍋𑌽𑌭𑌿𑌪𑍇𑌤𑍁𑌰𑍍𑌭𑌵𑌦𑍀𑌯𑌪𑌾𑌰𑍍𑌷𑌦𑌾𑌃
𑌚𑌤𑍁𑌰𑍍𑌭𑍁𑌜𑌾𑌃 𑌪𑍀𑌤𑌪𑌟𑌾 𑌮𑌨𑍋𑌰𑌮𑌾𑌃 ॥4॥

𑌅𑌮𑍁𑌂 𑌚 𑌸𑌂𑌪𑌾𑌶𑍍𑌯 𑌵𑌿𑌕𑌰𑍍𑌷𑌤𑍋 𑌭𑌟𑌾𑌨𑍍
𑌵𑌿𑌮𑍁𑌂𑌚𑌤𑍇𑌤𑍍𑌯𑌾𑌰𑍁𑌰𑍁𑌧𑍁𑌰𑍍𑌬𑌲𑌾𑌦𑌮𑍀 ।
𑌨𑌿𑌵𑌾𑌰𑌿𑌤𑌾𑌸𑍍𑌤𑍇 𑌚 𑌭𑌵𑌜𑍍𑌜𑌨𑍈𑌸𑍍𑌤𑌦𑌾
𑌤𑌦𑍀𑌯𑌪𑌾𑌪𑌂 𑌨𑌿𑌖𑌿𑌲𑌂 𑌨𑍍𑌯𑌵𑍇𑌦𑌯𑌨𑍍 ॥5॥

𑌭𑌵𑌂𑌤𑍁 𑌪𑌾𑌪𑌾𑌨𑌿 𑌕𑌥𑌂 𑌤𑍁 𑌨𑌿𑌷𑍍𑌕𑍃𑌤𑍇
𑌕𑍃𑌤𑍇𑌽𑌪𑌿 𑌭𑍋 𑌦𑌂𑌡𑌨𑌮𑌸𑍍𑌤𑌿 𑌪𑌂𑌡𑌿𑌤𑌾𑌃 ।
𑌨 𑌨𑌿𑌷𑍍𑌕𑍃𑌤𑌿𑌃 𑌕𑌿𑌂 𑌵𑌿𑌦𑌿𑌤𑌾 𑌭𑌵𑌾𑌦𑍃𑌶𑌾-
𑌮𑌿𑌤𑌿 𑌪𑍍𑌰𑌭𑍋 𑌤𑍍𑌵𑌤𑍍𑌪𑍁𑌰𑍁𑌷𑌾 𑌬𑌭𑌾𑌷𑌿𑌰𑍇 ॥6॥

𑌶𑍍𑌰𑍁𑌤𑌿𑌸𑍍𑌮𑍃𑌤𑌿𑌭𑍍𑌯𑌾𑌂 𑌵𑌿𑌹𑌿𑌤𑌾 𑌵𑍍𑌰𑌤𑌾𑌦𑌯𑌃
𑌪𑍁𑌨𑌂𑌤𑌿 𑌪𑌾𑌪𑌂 𑌨 𑌲𑍁𑌨𑌂𑌤𑌿 𑌵𑌾𑌸𑌨𑌾𑌮𑍍 ।
𑌅𑌨𑌂𑌤𑌸𑍇𑌵𑌾 𑌤𑍁 𑌨𑌿𑌕𑍃𑌂𑌤𑌤𑌿 𑌦𑍍𑌵𑌯𑍀-
𑌮𑌿𑌤𑌿 𑌪𑍍𑌰𑌭𑍋 𑌤𑍍𑌵𑌤𑍍𑌪𑍁𑌰𑍁𑌷𑌾 𑌬𑌭𑌾𑌷𑌿𑌰𑍇 ॥𑍭॥

𑌅𑌨𑍇𑌨 𑌭𑍋 𑌜𑌨𑍍𑌮𑌸𑌹𑌸𑍍𑌰𑌕𑍋𑌟𑌿𑌭𑌿𑌃
𑌕𑍃𑌤𑍇𑌷𑍁 𑌪𑌾𑌪𑍇𑌷𑍍𑌵𑌪𑌿 𑌨𑌿𑌷𑍍𑌕𑍃𑌤𑌿𑌃 𑌕𑍃𑌤𑌾 ।
𑌯𑌦𑌗𑍍𑌰𑌹𑍀𑌨𑍍𑌨𑌾𑌮 𑌭𑌯𑌾𑌕𑍁𑌲𑍋 𑌹𑌰𑍇-
𑌰𑌿𑌤𑌿 𑌪𑍍𑌰𑌭𑍋 𑌤𑍍𑌵𑌤𑍍𑌪𑍁𑌰𑍁𑌷𑌾 𑌬𑌭𑌾𑌷𑌿𑌰𑍇 ॥𑍮॥

𑌨𑍃𑌣𑌾𑌮𑌬𑍁𑌦𑍍𑌧𑍍𑌯𑌾𑌪𑌿 𑌮𑍁𑌕𑍁𑌂𑌦𑌕𑍀𑌰𑍍𑌤𑌨𑌂
𑌦𑌹𑌤𑍍𑌯𑌘𑍌𑌘𑌾𑌨𑍍 𑌮𑌹𑌿𑌮𑌾𑌸𑍍𑌯 𑌤𑌾𑌦𑍃𑌶𑌃 ।
𑌯𑌥𑌾𑌗𑍍𑌨𑌿𑌰𑍇𑌧𑌾𑌂𑌸𑌿 𑌯𑌥𑍌𑌷𑌧𑌂 𑌗𑌦𑌾 –
𑌨𑌿𑌤𑌿 𑌪𑍍𑌰𑌭𑍋 𑌤𑍍𑌵𑌤𑍍𑌪𑍁𑌰𑍁𑌷𑌾 𑌬𑌭𑌾𑌷𑌿𑌰𑍇 ॥𑍯॥

𑌇𑌤𑍀𑌰𑌿𑌤𑍈𑌰𑍍𑌯𑌾𑌮𑍍𑌯𑌭𑌟𑍈𑌰𑌪𑌾𑌸𑍃𑌤𑍇
𑌭𑌵𑌦𑍍𑌭𑌟𑌾𑌨𑌾𑌂 𑌚 𑌗𑌣𑍇 𑌤𑌿𑌰𑍋𑌹𑌿𑌤𑍇 ।
𑌭𑌵𑌤𑍍𑌸𑍍𑌮𑍃𑌤𑌿𑌂 𑌕𑌂𑌚𑌨 𑌕𑌾𑌲𑌮𑌾𑌚𑌰𑌨𑍍
𑌭𑌵𑌤𑍍𑌪𑌦𑌂 𑌪𑍍𑌰𑌾𑌪𑌿 𑌭𑌵𑌦𑍍𑌭𑌟𑍈𑌰𑌸𑍌 ॥10॥

𑌸𑍍𑌵𑌕𑌿𑌂𑌕𑌰𑌾𑌵𑍇𑌦𑌨𑌶𑌂𑌕𑌿𑌤𑍋 𑌯𑌮-
𑌸𑍍𑌤𑍍𑌵𑌦𑌂𑌘𑍍𑌰𑌿𑌭𑌕𑍍𑌤𑍇𑌷𑍁 𑌨 𑌗𑌮𑍍𑌯𑌤𑌾𑌮𑌿𑌤𑌿 ।
𑌸𑍍𑌵𑌕𑍀𑌯𑌭𑍃𑌤𑍍𑌯𑌾𑌨𑌶𑌿𑌶𑌿𑌕𑍍𑌷𑌦𑍁𑌚𑍍𑌚𑌕𑍈𑌃
𑌸 𑌦𑍇𑌵 𑌵𑌾𑌤𑌾𑌲𑌯𑌨𑌾𑌥 𑌪𑌾𑌹𑌿 𑌮𑌾𑌮𑍍 ॥11॥