𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 21 – 𑌨𑌵 𑌵𑌰𑍍𑌷𑌾𑌃 𑌤𑌥𑌾 𑌸𑌪𑍍𑌤𑌦𑍍𑌵𑍀𑌪𑌾𑌃

𑌮𑌧𑍍𑌯𑍋𑌦𑍍𑌭𑌵𑍇 𑌭𑍁𑌵 𑌇𑌲𑌾𑌵𑍃𑌤𑌨𑌾𑌮𑍍𑌨𑌿 𑌵𑌰𑍍𑌷𑍇
𑌗𑍌𑌰𑍀𑌪𑍍𑌰𑌧𑌾𑌨𑌵𑌨𑌿𑌤𑌾𑌜𑌨𑌮𑌾𑌤𑍍𑌰𑌭𑌾𑌜𑌿 ।
𑌶𑌰𑍍𑌵𑍇𑌣 𑌮𑌂𑌤𑍍𑌰𑌨𑍁𑌤𑌿𑌭𑌿𑌃 𑌸𑌮𑍁𑌪𑌾𑌸𑍍𑌯𑌮𑌾𑌨𑌂
𑌸𑌂𑌕𑌰𑍍𑌷𑌣𑌾𑌤𑍍𑌮𑌕𑌮𑌧𑍀𑌶𑍍𑌵𑌰 𑌸𑌂𑌶𑍍𑌰𑌯𑍇 𑌤𑍍𑌵𑌾𑌮𑍍 ॥1॥

𑌭𑌦𑍍𑌰𑌾𑌶𑍍𑌵𑌨𑌾𑌮𑌕 𑌇𑌲𑌾𑌵𑍃𑌤𑌪𑍂𑌰𑍍𑌵𑌵𑌰𑍍𑌷𑍇
𑌭𑌦𑍍𑌰𑌶𑍍𑌰𑌵𑍋𑌭𑌿𑌃 𑌋𑌷𑌿𑌭𑌿𑌃 𑌪𑌰𑌿𑌣𑍂𑌯𑌮𑌾𑌨𑌮𑍍 ।
𑌕𑌲𑍍𑌪𑌾𑌂𑌤𑌗𑍂𑌢𑌨𑌿𑌗𑌮𑍋𑌦𑍍𑌧𑌰𑌣𑌪𑍍𑌰𑌵𑍀𑌣𑌂
𑌧𑍍𑌯𑌾𑌯𑌾𑌮𑌿 𑌦𑍇𑌵 𑌹𑌯𑌶𑍀𑌰𑍍𑌷𑌤𑌨𑍁𑌂 𑌭𑌵𑌂𑌤𑌮𑍍 ॥2॥

𑌧𑍍𑌯𑌾𑌯𑌾𑌮𑌿 𑌦𑌕𑍍𑌷𑌿𑌣𑌗𑌤𑍇 𑌹𑌰𑌿𑌵𑌰𑍍𑌷𑌵𑌰𑍍𑌷𑍇
𑌪𑍍𑌰𑌹𑍍𑌲𑌾𑌦𑌮𑍁𑌖𑍍𑌯𑌪𑍁𑌰𑍁𑌷𑍈𑌃 𑌪𑌰𑌿𑌷𑍇𑌵𑍍𑌯𑌮𑌾𑌣𑌮𑍍 ।
𑌉𑌤𑍍𑌤𑍁𑌂𑌗𑌶𑌾𑌂𑌤𑌧𑌵𑌲𑌾𑌕𑍃𑌤𑌿𑌮𑍇𑌕𑌶𑍁𑌦𑍍𑌧-
𑌜𑍍𑌞𑌾𑌨𑌪𑍍𑌰𑌦𑌂 𑌨𑌰𑌹𑌰𑌿𑌂 𑌭𑌗𑌵𑌨𑍍 𑌭𑌵𑌂𑌤𑌮𑍍 ॥3॥

𑌵𑌰𑍍𑌷𑍇 𑌪𑍍𑌰𑌤𑍀𑌚𑌿 𑌲𑌲𑌿𑌤𑌾𑌤𑍍𑌮𑌨𑌿 𑌕𑍇𑌤𑍁𑌮𑌾𑌲𑍇
𑌲𑍀𑌲𑌾𑌵𑌿𑌶𑍇𑌷𑌲𑌲𑌿𑌤𑌸𑍍𑌮𑌿𑌤𑌶𑍋𑌭𑌨𑌾𑌂𑌗𑌮𑍍 ।
𑌲𑌕𑍍𑌷𑍍𑌮𑍍𑌯𑌾 𑌪𑍍𑌰𑌜𑌾𑌪𑌤𑌿𑌸𑍁𑌤𑍈𑌶𑍍𑌚 𑌨𑌿𑌷𑍇𑌵𑍍𑌯𑌮𑌾𑌣𑌂
𑌤𑌸𑍍𑌯𑌾𑌃 𑌪𑍍𑌰𑌿𑌯𑌾𑌯 𑌧𑍃𑌤𑌕𑌾𑌮𑌤𑌨𑍁𑌂 𑌭𑌜𑍇 𑌤𑍍𑌵𑌾𑌮𑍍 ॥4॥

𑌰𑌮𑍍𑌯𑍇 𑌹𑍍𑌯𑍁𑌦𑍀𑌚𑌿 𑌖𑌲𑍁 𑌰𑌮𑍍𑌯𑌕𑌨𑌾𑌮𑍍𑌨𑌿 𑌵𑌰𑍍𑌷𑍇
𑌤𑌦𑍍𑌵𑌰𑍍𑌷𑌨𑌾𑌥𑌮𑌨𑍁𑌵𑌰𑍍𑌯𑌸𑌪𑌰𑍍𑌯𑌮𑌾𑌣𑌮𑍍 ।
𑌭𑌕𑍍𑌤𑍈𑌕𑌵𑌤𑍍𑌸𑌲𑌮𑌮𑌤𑍍𑌸𑌰𑌹𑍃𑌤𑍍𑌸𑍁 𑌭𑌾𑌂𑌤𑌂
𑌮𑌤𑍍𑌸𑍍𑌯𑌾𑌕𑍃𑌤𑌿𑌂 𑌭𑍁𑌵𑌨𑌨𑌾𑌥 𑌭𑌜𑍇 𑌭𑌵𑌂𑌤𑌮𑍍 ॥5॥

𑌵𑌰𑍍𑌷𑌂 𑌹𑌿𑌰𑌣𑍍𑌮𑌯𑌸𑌮𑌾𑌹𑍍𑌵𑌯𑌮𑍌𑌤𑍍𑌤𑌰𑌾𑌹-
𑌮𑌾𑌸𑍀𑌨𑌮𑌦𑍍𑌰𑌿𑌧𑍃𑌤𑌿𑌕𑌰𑍍𑌮𑌠𑌕𑌾𑌮𑌠𑌾𑌂𑌗𑌮𑍍 ।
𑌸𑌂𑌸𑍇𑌵𑌤𑍇 𑌪𑌿𑌤𑍃𑌗𑌣𑌪𑍍𑌰𑌵𑌰𑍋𑌽𑌰𑍍𑌯𑌮𑌾 𑌯𑌂
𑌤𑌂 𑌤𑍍𑌵𑌾𑌂 𑌭𑌜𑌾𑌮𑌿 𑌭𑌗𑌵𑌨𑍍 𑌪𑌰𑌚𑌿𑌨𑍍𑌮𑌯𑌾𑌤𑍍𑌮𑌨𑍍 ॥6॥

𑌕𑌿𑌂𑌚𑍋𑌤𑍍𑌤𑌰𑍇𑌷𑍁 𑌕𑍁𑌰𑍁𑌷𑍁 𑌪𑍍𑌰𑌿𑌯𑌯𑌾 𑌧𑌰𑌣𑍍𑌯𑌾
𑌸𑌂𑌸𑍇𑌵𑌿𑌤𑍋 𑌮𑌹𑌿𑌤𑌮𑌂𑌤𑍍𑌰𑌨𑍁𑌤𑌿𑌪𑍍𑌰𑌭𑍇𑌦𑍈𑌃 ।
𑌦𑌂𑌷𑍍𑌟𑍍𑌰𑌾𑌗𑍍𑌰𑌘𑍃𑌷𑍍𑌟𑌘𑌨𑌪𑍃𑌷𑍍𑌠𑌗𑌰𑌿𑌷𑍍𑌠𑌵𑌰𑍍𑌷𑍍𑌮𑌾
𑌤𑍍𑌵𑌂 𑌪𑌾𑌹𑌿 𑌬𑌿𑌜𑍍𑌞𑌨𑍁𑌤 𑌯𑌜𑍍𑌞𑌵𑌰𑌾𑌹𑌮𑍂𑌰𑍍𑌤𑍇 ॥𑍭॥

𑌯𑌾𑌮𑍍𑌯𑌾𑌂 𑌦𑌿𑌶𑌂 𑌭𑌜𑌤𑌿 𑌕𑌿𑌂𑌪𑍁𑌰𑍁𑌷𑌾𑌖𑍍𑌯𑌵𑌰𑍍𑌷𑍇
𑌸𑌂𑌸𑍇𑌵𑌿𑌤𑍋 𑌹𑌨𑍁𑌮𑌤𑌾 𑌦𑍃𑌢𑌭𑌕𑍍𑌤𑌿𑌭𑌾𑌜𑌾 ।
𑌸𑍀𑌤𑌾𑌭𑌿𑌰𑌾𑌮𑌪𑌰𑌮𑌾𑌦𑍍𑌭𑍁𑌤𑌰𑍂𑌪𑌶𑌾𑌲𑍀
𑌰𑌾𑌮𑌾𑌤𑍍𑌮𑌕𑌃 𑌪𑌰𑌿𑌲𑌸𑌨𑍍 𑌪𑌰𑌿𑌪𑌾𑌹𑌿 𑌵𑌿𑌷𑍍𑌣𑍋 ॥𑍮॥

𑌶𑍍𑌰𑍀𑌨𑌾𑌰𑌦𑍇𑌨 𑌸𑌹 𑌭𑌾𑌰𑌤𑌖𑌂𑌡𑌮𑍁𑌖𑍍𑌯𑍈-
𑌸𑍍𑌤𑍍𑌵𑌂 𑌸𑌾𑌂𑌖𑍍𑌯𑌯𑍋𑌗𑌨𑍁𑌤𑌿𑌭𑌿𑌃 𑌸𑌮𑍁𑌪𑌾𑌸𑍍𑌯𑌮𑌾𑌨𑌃 ।
𑌆𑌕𑌲𑍍𑌪𑌕𑌾𑌲𑌮𑌿𑌹 𑌸𑌾𑌧𑍁𑌜𑌨𑌾𑌭𑌿𑌰𑌕𑍍𑌷𑍀
𑌨𑌾𑌰𑌾𑌯𑌣𑍋 𑌨𑌰𑌸𑌖𑌃 𑌪𑌰𑌿𑌪𑌾𑌹𑌿 𑌭𑍂𑌮𑌨𑍍 ॥𑍯॥

𑌪𑍍𑌲𑌾𑌕𑍍𑌷𑍇𑌽𑌰𑍍𑌕𑌰𑍂𑌪𑌮𑌯𑌿 𑌶𑌾𑌲𑍍𑌮𑌲 𑌇𑌂𑌦𑍁𑌰𑍂𑌪𑌂
𑌦𑍍𑌵𑍀𑌪𑍇 𑌭𑌜𑌂𑌤𑌿 𑌕𑍁𑌶𑌨𑌾𑌮𑌨𑌿 𑌵𑌹𑍍𑌨𑌿𑌰𑍂𑌪𑌮𑍍 ।
𑌕𑍍𑌰𑍌𑌂𑌚𑍇𑌽𑌂𑌬𑍁𑌰𑍂𑌪𑌮𑌥 𑌵𑌾𑌯𑍁𑌮𑌯𑌂 𑌚 𑌶𑌾𑌕𑍇
𑌤𑍍𑌵𑌾𑌂 𑌬𑍍𑌰𑌹𑍍𑌮𑌰𑍂𑌪𑌮𑌪𑌿 𑌪𑍁𑌷𑍍𑌕𑌰𑌨𑌾𑌮𑍍𑌨𑌿 𑌲𑍋𑌕𑌾𑌃 ॥10॥

𑌸𑌰𑍍𑌵𑍈𑌰𑍍𑌧𑍍𑌰𑍁𑌵𑌾𑌦𑌿𑌭𑌿𑌰𑍁𑌡𑍁𑌪𑍍𑌰𑌕𑌰𑍈𑌰𑍍𑌗𑍍𑌰𑌹𑍈𑌶𑍍𑌚
𑌪𑍁𑌚𑍍𑌛𑌾𑌦𑌿𑌕𑍇𑌷𑍍𑌵𑌵𑌯𑌵𑍇𑌷𑍍𑌵𑌭𑌿𑌕𑌲𑍍𑌪𑍍𑌯𑌮𑌾𑌨𑍈𑌃 ।
𑌤𑍍𑌵𑌂 𑌶𑌿𑌂𑌶𑍁𑌮𑌾𑌰𑌵𑌪𑍁𑌷𑌾 𑌮𑌹𑌤𑌾𑌮𑍁𑌪𑌾𑌸𑍍𑌯𑌃
𑌸𑌂𑌧𑍍𑌯𑌾𑌸𑍁 𑌰𑍁𑌂𑌧𑌿 𑌨𑌰𑌕𑌂 𑌮𑌮 𑌸𑌿𑌂𑌧𑍁𑌶𑌾𑌯𑌿𑌨𑍍 ॥11॥

𑌪𑌾𑌤𑌾𑌲𑌮𑍂𑌲𑌭𑍁𑌵𑌿 𑌶𑍇𑌷𑌤𑌨𑍁𑌂 𑌭𑌵𑌂𑌤𑌂
𑌲𑍋𑌲𑍈𑌕𑌕𑍁𑌂𑌡𑌲𑌵𑌿𑌰𑌾𑌜𑌿𑌸𑌹𑌸𑍍𑌰𑌶𑍀𑌰𑍍𑌷𑌮𑍍 ।
𑌨𑍀𑌲𑌾𑌂𑌬𑌰𑌂 𑌧𑍃𑌤𑌹𑌲𑌂 𑌭𑍁𑌜𑌗𑌾𑌂𑌗𑌨𑌾𑌭𑌿-
𑌰𑍍𑌜𑍁𑌷𑍍𑌟𑌂 𑌭𑌜𑍇 𑌹𑌰 𑌗𑌦𑌾𑌨𑍍 𑌗𑍁𑌰𑍁𑌗𑍇𑌹𑌨𑌾𑌥 ॥12॥