𑌮𑍁𑌚𑍁𑌕𑍁𑌂𑌦 𑌸𑍍𑌤𑍁𑌤𑌿𑌃

𑌵𑌿𑌮𑍋𑌹𑌿𑌤𑍋𑌽𑌯𑌂 𑌜𑌨 𑌈𑌶 𑌮𑌾𑌯𑌯𑌾
𑌤𑍍𑌵𑌦𑍀𑌯𑌯𑌾 𑌤𑍍𑌵𑌾𑌂 𑌚 𑌭𑌜𑌤𑍍𑌯𑌨𑌰𑍍𑌥𑌦𑍃𑌕𑍍 ।
𑌸𑍁𑌖𑌾𑌯 𑌦𑍁𑌃𑌖𑌪𑍍𑌰𑌭𑌵𑍇𑌷𑍁 𑌸𑌜𑍍𑌜𑌤𑍇
𑌗𑍃𑌹𑍇𑌷𑍁 𑌯𑍋𑌷𑌿𑌤𑍍𑌪𑍁𑌰𑍁𑌷𑌶𑍍𑌚 𑌵𑌂𑌚𑌿𑌤𑌃 ॥ 1 ॥
𑌲𑌬𑍍𑌧𑍍𑌵𑌾 𑌜𑌨𑍋 𑌦𑍁𑌰𑍍𑌲𑌭𑌮𑌤𑍍𑌰 𑌮𑌾𑌨𑍁𑌷𑌂
𑌕𑌥𑌂𑌚𑌿𑌦𑌵𑍍𑌯𑌂𑌗𑌮𑌯𑌤𑍍𑌨𑌤𑍋𑌽𑌨𑌘 ।
𑌪𑌾𑌦𑌾𑌰𑌵𑌿𑌂𑌦𑌂 𑌨 𑌭𑌜𑌤𑍍𑌯𑌸𑌨𑍍𑌮𑌤𑌿-
𑌰𑍍𑌗𑍃𑌹𑌾𑌂𑌧𑌕𑍂𑌪𑍇 𑌪𑌤𑌿𑌤𑍋 𑌯𑌥𑌾 𑌪𑌶𑍁𑌃 ॥ 2 ॥
𑌮𑌮𑍈𑌷 𑌕𑌾𑌲𑍋𑌽𑌜𑌿𑌤 𑌨𑌿𑌷𑍍𑌫𑌲𑍋 𑌗𑌤𑍋
𑌰𑌾𑌜𑍍𑌯𑌶𑍍𑌰𑌿𑌯𑍋𑌨𑍍𑌨𑌦𑍍𑌧𑌮𑌦𑌸𑍍𑌯 𑌭𑍂𑌪𑌤𑍇 ।
𑌮𑌰𑍍𑌤𑍍𑌯𑌾𑌤𑍍𑌮𑌬𑍁𑌦𑍍𑌧𑍇𑌃 𑌸𑍁𑌤𑌦𑌾𑌰𑌕𑍋𑌶𑌭𑍂-
𑌷𑍍𑌵𑌾𑌸𑌜𑍍𑌜𑌮𑌾𑌨𑌸𑍍𑌯 𑌦𑍁𑌰𑌂𑌤𑌚𑌿𑌂𑌤𑌯𑌾 ॥ 3 ॥
𑌕𑌲𑍇𑌵𑌰𑍇𑌽𑌸𑍍𑌮𑌿𑌨𑍍 𑌘𑌟𑌕𑍁𑌡𑍍𑌯𑌸𑌨𑍍𑌨𑌿𑌭𑍇
𑌨𑌿𑌰𑍂𑌢𑌮𑌾𑌨𑍋 𑌨𑌰𑌦𑍇𑌵 𑌇𑌤𑍍𑌯𑌹𑌮𑍍 ।
𑌵𑍃𑌤𑍋 𑌰𑌥𑍇𑌭𑌾𑌶𑍍𑌵𑌪𑌦𑌾𑌤𑍍𑌯𑌨𑍀𑌕𑌪𑍈𑌰𑍍𑌗𑌾𑌂
𑌪𑌰𑍍𑌯𑌟𑌂𑌸𑍍𑌤𑍍𑌵𑌾𑌗𑌣𑌯𑌨𑍍 𑌸𑍁𑌦𑍁𑌰𑍍𑌮𑌦𑌃 ॥ 4 ॥
𑌪𑍍𑌰𑌮𑌤𑍍𑌤𑌮𑍁𑌚𑍍𑌚𑍈𑌰𑌿𑌤𑌿 𑌕𑍃𑌤𑍍𑌯𑌚𑌿𑌂𑌤𑌯𑌾
𑌪𑍍𑌰𑌭𑍁𑌦𑍍𑌧𑌲𑍋𑌭𑌂 𑌵𑌿𑌷𑌯𑍇𑌷𑍁 𑌲𑌾𑌲𑌸𑌮𑍍 ।
𑌤𑍍𑌵𑌮𑌪𑍍𑌰𑌮𑌤𑍍𑌤𑌃 𑌸𑌹𑌸𑌾𑌽𑌭𑌿𑌪𑌦𑍍𑌯𑌸𑍇
𑌕𑍍𑌷𑍁𑌲𑍍𑌲𑍇𑌲𑌿𑌹𑌾𑌨𑍋𑌽𑌹𑌿𑌰𑌿𑌵𑌾𑌖𑍁𑌮𑌂𑌤𑌕𑌃 ॥ 5 ॥
𑌪𑍁𑌰𑌾 𑌰𑌥𑍈𑌰𑍍𑌹𑍇𑌮𑌪𑌰𑌿𑌷𑍍𑌕𑍃𑌤𑍈𑌶𑍍𑌚𑌰𑌨𑍍
𑌮𑌤𑌂𑌗𑌜𑍈𑌰𑍍𑌵𑌾 𑌨𑌰𑌦𑍇𑌵𑌸𑌂𑌜𑍍𑌞𑌿𑌤𑌃 ।
𑌸 𑌏𑌵 𑌕𑌾𑌲𑍇𑌨 𑌦𑍁𑌰𑌤𑍍𑌯𑌯𑍇𑌨 𑌤𑍇
𑌕𑌲𑍇𑌵𑌰𑍋 𑌵𑌿𑌟𑍍𑌕𑍃𑌮𑌿𑌭𑌸𑍍𑌮𑌸𑌂𑌜𑍍𑌞𑌿𑌤𑌃 ॥ 6 ॥
𑌨𑌿𑌰𑍍𑌜𑌿𑌤𑍍𑌯 𑌦𑌿𑌕𑍍𑌚𑌕𑍍𑌰𑌮𑌭𑍂𑌤𑌵𑌿𑌗𑍍𑌰𑌹𑍋
𑌵𑌰𑌾𑌸𑌨𑌸𑍍𑌥𑌃 𑌸𑌮𑌰𑌾𑌜𑌵𑌂𑌦𑌿𑌤𑌃 ।
𑌗𑍃𑌹𑍇𑌷𑍁 𑌮𑍈𑌥𑍁𑌨𑍍𑌯𑌸𑍁𑌖𑍇𑌷𑍁 𑌯𑍋𑌷𑌿𑌤𑌾𑌂
𑌕𑍍𑌰𑍀𑌡𑌾𑌮𑍃𑌗 𑌪𑍂𑌰𑍁𑌷 𑌈𑌶 𑌨𑍀𑌯𑌤𑍇 ॥ 𑍭 ॥
𑌕𑌰𑍋𑌤𑌿 𑌕𑌰𑍍𑌮𑌾𑌣𑌿 𑌤𑌪𑌃𑌸𑍁 𑌨𑌿𑌷𑍍𑌠𑌿𑌤𑍋
𑌨𑌿𑌵𑍃𑌤𑍍𑌤𑌭𑍋𑌗𑌸𑍍𑌤𑌦𑌪𑍇𑌕𑍍𑌷𑌯𑌾 𑌦𑌦𑌤𑍍 ।
𑌪𑍁𑌨𑌶𑍍𑌚 𑌭𑍂𑌯𑍇𑌯𑌮𑌹𑌂 𑌸𑍍𑌵𑌰𑌾𑌡𑌿𑌤𑌿
𑌪𑍍𑌰𑌬𑍁𑌦𑍍𑌧𑌤𑌰𑍍𑌷𑍋 𑌨 𑌸𑍁𑌖𑌾𑌯 𑌕𑌲𑍍𑌪𑌤𑍇 ॥ 𑍮 ॥
𑌭𑌵𑌾𑌪𑌵𑌰𑍍𑌗𑍋 𑌭𑍍𑌰𑌮𑌤𑍋 𑌯𑌦𑌾 𑌭𑌵𑍇-
𑌜𑍍𑌜𑌨𑌸𑍍𑌯 𑌤𑌰𑍍𑌹𑍍𑌯𑌚𑍍𑌯𑍁𑌤 𑌸𑌤𑍍𑌸𑌮𑌾𑌗𑌮𑌃 ।
𑌸𑌤𑍍𑌸𑌂𑌗𑌮𑍋 𑌯𑌰𑍍𑌹𑌿 𑌤𑌦𑍈𑌵 𑌸𑌦𑍍𑌗𑌤𑍌
𑌪𑌰𑌾𑌵𑌰𑍇𑌶𑍇 𑌤𑍍𑌵𑌯𑌿 𑌜𑌾𑌯𑌤𑍇 𑌮𑌤𑌿𑌃 ॥ 𑍯 ॥
𑌮𑌨𑍍𑌯𑍇 𑌮𑌮𑌾𑌨𑍁𑌗𑍍𑌰𑌹 𑌈𑌶 𑌤𑍇 𑌕𑍃𑌤𑍋
𑌰𑌾𑌜𑍍𑌯𑌾𑌨𑍁𑌬𑌂𑌧𑌾𑌪𑌗𑌮𑍋 𑌯𑌦𑍃𑌚𑍍𑌛𑌯𑌾 ।
𑌯𑌃 𑌪𑍍𑌰𑌾𑌰𑍍𑌥𑍍𑌯𑌤𑍇 𑌸𑌾𑌧𑍁𑌭𑌿𑌰𑍇𑌕𑌚𑌰𑍍𑌯𑌯𑌾
𑌵𑌨𑌂 𑌵𑌿𑌵𑌿𑌕𑍍𑌷𑌦𑍍𑌭𑌿𑌰𑌖𑌂𑌡𑌭𑍂𑌮𑌿𑌪𑍈𑌃 ॥ 10 ॥
𑌨 𑌕𑌾𑌮𑌯𑍇𑌽𑌨𑍍𑌯𑌂 𑌤𑌵 𑌪𑌾𑌦𑌸𑍇𑌵𑌨𑌾𑌦𑍍-
𑌅𑌕𑌿𑌂𑌚𑌨𑌪𑍍𑌰𑌾𑌰𑍍𑌥𑍍𑌯𑌤𑌮𑌾𑌦𑍍𑌵𑌰𑌂 𑌵𑌿𑌭𑍋 ।
𑌆𑌰𑌾𑌧𑍍𑌯 𑌕𑌸𑍍𑌤𑍍𑌵𑌾𑌂 𑌹𑍍𑌯𑌪𑌵𑌰𑍍𑌗𑌦𑌂 𑌹𑌰𑍇
𑌵𑍃𑌣𑍀𑌤 𑌆𑌰𑍍𑌯𑍋 𑌵𑌰𑌮𑌾𑌤𑍍𑌮𑌬𑌂𑌧𑌨𑌮𑍍 ॥ 11 ॥
𑌤𑌸𑍍𑌮𑌾𑌦𑍍𑌵𑌿𑌸𑍃𑌜𑍍𑌯𑌾𑌶𑌿𑌷 𑌈𑌶 𑌸𑌰𑍍𑌵𑌤𑍋
𑌰𑌜𑌸𑍍𑌤𑌮𑌃𑌸𑌤𑍍𑌤𑍍𑌵𑌗𑍁𑌣𑌾𑌨𑍁𑌬𑌂𑌧𑌨𑌾𑌃 ।
𑌨𑌿𑌰𑌂𑌜𑌨𑌂 𑌨𑌿𑌰𑍍𑌗𑍁𑌣𑌮𑌦𑍍𑌵𑌯𑌂 𑌪𑌰𑌂
𑌤𑍍𑌵𑌾𑌂 𑌜𑍍𑌞𑌪𑍍𑌤𑌿𑌮𑌾𑌤𑍍𑌰𑌂 𑌪𑍁𑌰𑍁𑌷𑌂 𑌵𑍍𑌰𑌜𑌾𑌮𑍍𑌯𑌹𑌮𑍍 ॥ 12 ॥
𑌚𑌿𑌰𑌮𑌿𑌹 𑌵𑍃𑌜𑌿𑌨𑌾𑌰𑍍𑌤𑌸𑍍𑌤𑌪𑍍𑌯𑌮𑌾𑌨𑍋𑌽𑌨𑍁𑌤𑌾𑌪𑍈𑌃
𑌅𑌵𑌿𑌤𑍃𑌷𑌷𑌡𑌮𑌿𑌤𑍍𑌰𑍋 𑌲𑌬𑍍𑌧𑌶𑌾𑌂𑌤𑌿𑌃 𑌕𑌥𑌂𑌚𑌿𑌤𑍍 ।
𑌶𑌰𑌣𑌦 𑌸𑌮𑍁𑌪𑍇𑌤𑌸𑍍𑌤𑍍𑌵𑌤𑍍𑌪𑌦𑌾𑌬𑍍𑌜𑌂 𑌪𑌰𑌾𑌤𑍍𑌮𑌨𑍍
𑌅𑌭𑌯𑌮𑌮𑍃𑌤𑌮𑌶𑍋𑌕𑌂 𑌪𑌾𑌹𑌿 𑌮𑌾𑌽𑌪𑌨𑍍𑌨𑌮𑍀𑌶 ॥ 13 ॥

𑌇𑌤𑌿 𑌶𑍍𑌰𑍀𑌮𑌦𑍍𑌭𑌾𑌗𑌵𑌤𑌾𑌂𑌤𑌰𑍍𑌗𑌤𑌾 𑌮𑍁𑌚𑍁𑌕𑍁𑌂𑌦𑌕𑍃𑌤𑌾 𑌶𑍍𑌰𑍀𑌵𑌿𑌷𑍍𑌣𑍁𑌸𑍍𑌤𑍁𑌤𑌿𑌃 𑌸𑌮𑌾𑌪𑍍𑌤𑌾 ।