𑌮𑍂𑌕 𑌪𑌂𑌚 𑌶𑌤𑌿 5 – 𑌮𑌂𑌦𑌸𑍍𑌮𑌿𑌤 𑌶𑌤𑌕𑌮𑍍

𑌬𑌧𑍍𑌨𑍀𑌮𑍋 𑌵𑌯𑌮𑌂𑌜𑌲𑌿𑌂 𑌪𑍍𑌰𑌤𑌿𑌦𑌿𑌨𑌂 𑌬𑌂𑌧𑌚𑍍𑌛𑌿𑌦𑍇 𑌦𑍇𑌹𑌿𑌨𑌾𑌂
𑌕𑌂𑌦𑌰𑍍𑌪𑌾𑌗𑌮𑌤𑌂𑌤𑍍𑌰𑌮𑍂𑌲𑌗𑍁𑌰𑌵𑍇 𑌕𑌲𑍍𑌯𑌾𑌣𑌕𑍇𑌲𑍀𑌭𑍁𑌵𑍇 ।
𑌕𑌾𑌮𑌾𑌕𑍍𑌷𑍍𑌯𑌾 𑌘𑌨𑌸𑌾𑌰𑌪𑍁𑌂𑌜𑌰𑌜𑌸𑍇 𑌕𑌾𑌮𑌦𑍍𑌰𑍁𑌹𑌶𑍍𑌚𑌕𑍍𑌷𑍁𑌷𑌾𑌂
𑌮𑌂𑌦𑌾𑌰𑌸𑍍𑌤𑌬𑌕𑌪𑍍𑌰𑌭𑌾𑌮𑌦𑌮𑍁𑌷𑍇 𑌮𑌂𑌦𑌸𑍍𑌮𑌿𑌤𑌜𑍍𑌯𑍋𑌤𑌿𑌷𑍇 ॥1॥

𑌸𑌧𑍍𑌰𑍀𑌚𑍇 𑌨𑌵𑌮𑌲𑍍𑌲𑌿𑌕𑌾𑌸𑍁𑌮𑌨𑌸𑌾𑌂 𑌨𑌾𑌸𑌾𑌗𑍍𑌰𑌮𑍁𑌕𑍍𑌤𑌾𑌮𑌣𑍇-
𑌰𑌾𑌚𑌾𑌰𑍍𑌯𑌾𑌯 𑌮𑍃𑌣𑌾𑌲𑌕𑌾𑌂𑌡𑌮𑌹𑌸𑌾𑌂 𑌨𑍈𑌸𑌰𑍍𑌗𑌿𑌕𑌾𑌯 𑌦𑍍𑌵𑌿𑌷𑍇 ।
𑌸𑍍𑌵𑌰𑍍𑌧𑍁𑌨𑍍𑌯𑌾 𑌸𑌹 𑌯𑍁𑌧𑍍𑌵𑍇𑌨 𑌹𑌿𑌮𑌰𑍁𑌚𑍇𑌰𑌰𑍍𑌧𑌾𑌸𑌨𑌾𑌧𑍍𑌯𑌾𑌸𑌿𑌨𑍇
𑌕𑌾𑌮𑌾𑌕𑍍𑌷𑍍𑌯𑌾𑌃 𑌸𑍍𑌮𑌿𑌤𑌮𑌂𑌜𑌰𑍀𑌧𑌵𑌲𑌿𑌮𑌾𑌦𑍍𑌵𑍈𑌤𑌾𑌯 𑌤𑌸𑍍𑌮𑍈 𑌨𑌮𑌃 ॥2॥

𑌕𑌰𑍍𑌪𑍂𑌰𑌦𑍍𑌯𑍁𑌤𑌿𑌚𑌾𑌤𑍁𑌰𑍀𑌮𑌤𑌿𑌤𑌰𑌾𑌮𑌲𑍍𑌪𑍀𑌯𑌸𑍀𑌂 𑌕𑍁𑌰𑍍𑌵𑌤𑍀
𑌦𑍌𑌰𑍍𑌭𑌾𑌗𑍍𑌯𑍋𑌦𑌯𑌮𑍇𑌵 𑌸𑌂𑌵𑌿𑌦𑌧𑌤𑍀 𑌦𑍌𑌷𑌾𑌕𑌰𑍀𑌣𑌾𑌂 𑌤𑍍𑌵𑌿𑌷𑌾𑌮𑍍 ।
𑌕𑍍𑌷𑍁𑌲𑍍𑌲𑌾𑌨𑍇𑌵 𑌮𑌨𑍋𑌜𑍍𑌞𑌮𑌲𑍍𑌲𑌿𑌨𑌿𑌕𑌰𑌾𑌨𑍍𑌫𑍁𑌲𑍍𑌲𑌾𑌨𑌪𑌿 𑌵𑍍𑌯𑌂𑌜𑌤𑍀
𑌕𑌾𑌮𑌾𑌕𑍍𑌷𑍍𑌯𑌾 𑌮𑍃𑌦𑍁𑌲𑌸𑍍𑌮𑌿𑌤𑌾𑌂𑌶𑍁𑌲𑌹𑌰𑍀 𑌕𑌾𑌮𑌪𑍍𑌰𑌸𑍂𑌰𑌸𑍍𑌤𑍁 𑌮𑍇 ॥3॥

𑌯𑌾 𑌪𑍀𑌨𑌸𑍍𑌤𑌨𑌮𑌂𑌡𑌲𑍋𑌪𑌰𑌿 𑌲𑌸𑌤𑍍𑌕𑌰𑍍𑌪𑍂𑌰𑌲𑍇𑌪𑌾𑌯𑌤𑍇
𑌯𑌾 𑌨𑍀𑌲𑍇𑌕𑍍𑌷𑌣𑌰𑌾𑌤𑍍𑌰𑌿𑌕𑌾𑌂𑌤𑌿𑌤𑌤𑌿𑌷𑍁 𑌜𑍍𑌯𑍋𑌤𑍍𑌸𑍍𑌨𑌾𑌪𑍍𑌰𑌰𑍋𑌹𑌾𑌯𑌤𑍇 ।
𑌯𑌾 𑌸𑍌𑌂𑌦𑌰𑍍𑌯𑌧𑍁𑌨𑍀𑌤𑌰𑌂𑌗𑌤𑌤𑌿𑌷𑍁 𑌵𑍍𑌯𑌾𑌲𑍋𑌲𑌹𑌂𑌸𑌾𑌯𑌤𑍇
𑌕𑌾𑌮𑌾𑌕𑍍𑌷𑍍𑌯𑌾𑌃 𑌶𑌿𑌶𑌿𑌰𑍀𑌕𑌰𑍋𑌤𑍁 𑌹𑍃𑌦𑌯𑌂 𑌸𑌾 𑌮𑍇 𑌸𑍍𑌮𑌿𑌤𑌪𑍍𑌰𑌾𑌚𑍁𑌰𑍀 ॥4॥

𑌯𑍇𑌷𑌾𑌂 𑌗𑌚𑍍𑌛𑌤𑌿 𑌪𑍂𑌰𑍍𑌵𑌪𑌕𑍍𑌷𑌸𑌰𑌣𑌿𑌂 𑌕𑍌𑌮𑍁𑌦𑍍𑌵𑌤𑌃 𑌶𑍍𑌵𑍇𑌤𑌿𑌮𑌾
𑌯𑍇𑌷𑌾𑌂 𑌸𑌂𑌤𑌤𑌮𑌾𑌰𑍁𑌰𑍁𑌕𑍍𑌷𑌤𑌿 𑌤𑍁𑌲𑌾𑌕𑌕𑍍𑌷𑍍𑌯𑌾𑌂 𑌶𑌰𑌚𑍍𑌚𑌂𑌦𑍍𑌰𑌮𑌾𑌃 ।
𑌯𑍇𑌷𑌾𑌮𑌿𑌚𑍍𑌛𑌤𑌿 𑌕𑌂𑌬𑍁𑌰𑌪𑍍𑌯𑌸𑍁𑌲𑌭𑌾𑌮𑌂𑌤𑍇𑌵𑌸𑌤𑍍𑌪𑍍𑌰𑌕𑍍𑌰𑌿𑌯𑌾𑌂
𑌕𑌾𑌮𑌾𑌕𑍍𑌷𑍍𑌯𑌾 𑌮𑌮𑌤𑌾𑌂 𑌹𑌰𑌂𑌤𑍁 𑌮𑌮 𑌤𑍇 𑌹𑌾𑌸𑌤𑍍𑌵𑌿𑌷𑌾𑌮𑌂𑌕𑍁𑌰𑌾𑌃 ॥5॥

𑌆𑌶𑌾𑌸𑍀𑌮𑌸𑍁 𑌸𑌂𑌤𑌤𑌂 𑌵𑌿𑌦𑌧𑌤𑍀 𑌨𑍈𑌶𑌾𑌕𑌰𑍀𑌂 𑌵𑍍𑌯𑌾𑌕𑍍𑌰𑌿𑌯𑌾𑌂
𑌕𑌾𑌶𑌾𑌨𑌾𑌮𑌭𑌿𑌮𑌾𑌨𑌭𑌂𑌗𑌕𑌲𑌨𑌾𑌕𑍌𑌶𑌲𑍍𑌯𑌮𑌾𑌬𑌿𑌭𑍍𑌰𑌤𑍀 ।
𑌈𑌶𑌾𑌨𑍇𑌨 𑌵𑌿𑌲𑍋𑌕𑌿𑌤𑌾 𑌸𑌕𑍁𑌤𑍁𑌕𑌂 𑌕𑌾𑌮𑌾𑌕𑍍𑌷𑌿 𑌤𑍇 𑌕𑌲𑍍𑌮𑌷-
𑌕𑍍𑌲𑍇𑌶𑌾𑌪𑌾𑌯𑌕𑌰𑍀 𑌚𑌕𑌾𑌸𑍍𑌤𑌿 𑌲𑌹𑌰𑍀 𑌮𑌂𑌦𑌸𑍍𑌮𑌿𑌤𑌜𑍍𑌯𑍋𑌤𑌿𑌷𑌾𑌮𑍍 ॥6॥

𑌆𑌰𑍂𑌢𑌸𑍍𑌯 𑌸𑌮𑍁𑌨𑍍𑌨𑌤𑌸𑍍𑌤𑌨𑌤𑌟𑍀𑌸𑌾𑌮𑍍𑌰𑌾𑌜𑍍𑌯𑌸𑌿𑌂𑌹𑌾𑌸𑌨𑌂
𑌕𑌂𑌦𑌰𑍍𑌪𑌸𑍍𑌯 𑌵𑌿𑌭𑍋𑌰𑍍𑌜𑌗𑌤𑍍𑌤𑍍𑌰𑌯𑌪𑍍𑌰𑌾𑌕𑌟𑍍𑌯𑌮𑍁𑌦𑍍𑌰𑌾𑌨𑌿𑌧𑍇𑌃 ।
𑌯𑌸𑍍𑌯𑌾𑌶𑍍𑌚𑌾𑌮𑌰𑌚𑌾𑌤𑍁𑌰𑍀𑌂 𑌕𑌲𑌯𑌤𑍇 𑌰𑌶𑍍𑌮𑌿𑌚𑍍𑌛𑌟𑌾 𑌚𑌂𑌚𑌲𑌾
𑌸𑌾 𑌮𑌂𑌦𑌸𑍍𑌮𑌿𑌤𑌮𑌂𑌜𑌰𑍀 𑌭𑌵𑌤𑍁 𑌨𑌃 𑌕𑌾𑌮𑌾𑌯 𑌕𑌾𑌮𑌾𑌕𑍍𑌷𑌿 𑌤𑍇 ॥𑍭॥

𑌶𑌂𑌭𑍋𑌰𑍍𑌯𑌾 𑌪𑌰𑌿𑌰𑌂𑌭𑌸𑌂𑌭𑍍𑌰𑌮𑌵𑌿𑌧𑍌 𑌨𑍈𑌰𑍍𑌮𑌲𑍍𑌯𑌸𑍀𑌮𑌾𑌨𑌿𑌧𑌿𑌃
𑌗𑍈𑌰𑍍𑌵𑌾𑌣𑍀𑌵 𑌤𑌰𑌂𑌗𑌿𑌣𑍀 𑌕𑍃𑌤𑌮𑍃𑌦𑍁𑌸𑍍𑌯𑌂𑌦𑌾𑌂 𑌕𑌲𑌿𑌂𑌦𑌾𑌤𑍍𑌮𑌜𑌾𑌮𑍍 ।
𑌕𑌲𑍍𑌮𑌾𑌷𑍀𑌕𑍁𑌰𑍁𑌤𑍇 𑌕𑌲𑌂𑌕𑌸𑍁𑌷𑌮𑌾𑌂 𑌕𑌂𑌠𑌸𑍍𑌥𑌲𑍀𑌚𑍁𑌂𑌬𑌿𑌨𑍀𑌂
𑌕𑌾𑌮𑌾𑌕𑍍𑌷𑍍𑌯𑌾𑌃 𑌸𑍍𑌮𑌿𑌤𑌕𑌂𑌦𑌲𑍀 𑌭𑌵𑌤𑍁 𑌨𑌃 𑌕𑌲𑍍𑌯𑌾𑌣𑌸𑌂𑌦𑍋𑌹𑌿𑌨𑍀 ॥𑍮॥

𑌜𑍇𑌤𑍁𑌂 𑌹𑌾𑌰𑌲𑌤𑌾𑌮𑌿𑌵 𑌸𑍍𑌤𑌨𑌤𑌟𑍀𑌂 𑌸𑌂𑌜𑌗𑍍𑌮𑍁𑌷𑍀 𑌸𑌂𑌤𑌤𑌂
𑌗𑌂𑌤𑍁𑌂 𑌨𑌿𑌰𑍍𑌮𑌲𑌤𑌾𑌮𑌿𑌵 𑌦𑍍𑌵𑌿𑌗𑍁𑌣𑌿𑌤𑌾𑌂 𑌮𑌗𑍍𑌨𑌾 𑌕𑍃𑌪𑌾𑌸𑍍𑌤𑍍𑌰𑍋𑌤𑌸𑌿 ।
𑌲𑌬𑍍𑌧𑍁𑌂 𑌵𑌿𑌸𑍍𑌮𑌯𑌨𑍀𑌯𑌤𑌾𑌮𑌿𑌵 𑌹𑌰𑌂 𑌰𑌾𑌗𑌾𑌕𑍁𑌲𑌂 𑌕𑍁𑌰𑍍𑌵𑌤𑍀
𑌮𑌂𑌜𑍁𑌸𑍍𑌤𑍇 𑌸𑍍𑌮𑌿𑌤𑌮𑌂𑌜𑌰𑍀 𑌭𑌵𑌭𑌯𑌂 𑌮𑌥𑍍𑌨𑌾𑌤𑍁 𑌕𑌾𑌮𑌾𑌕𑍍𑌷𑌿 𑌮𑍇 ॥𑍯॥

𑌶𑍍𑌵𑍇𑌤𑌾𑌪𑌿 𑌪𑍍𑌰𑌕𑌟𑌂 𑌨𑌿𑌶𑌾𑌕𑌰𑌰𑍁𑌚𑌾𑌂 𑌮𑌾𑌲𑌿𑌨𑍍𑌯𑌮𑌾𑌤𑌨𑍍𑌵𑌤𑍀
𑌶𑍀𑌤𑌾𑌪𑌿 𑌸𑍍𑌮𑌰𑌪𑌾𑌵𑌕𑌂 𑌪𑌶𑍁𑌪𑌤𑍇𑌃 𑌸𑌂𑌧𑍁𑌕𑍍𑌷𑌯𑌂𑌤𑍀 𑌸𑌦𑌾 ।
𑌸𑍍𑌵𑌾𑌭𑌾𑌵𑍍𑌯𑌾𑌦𑌧𑌰𑌾𑌶𑍍𑌰𑌿𑌤𑌾𑌪𑌿 𑌨𑌮𑌤𑌾𑌮𑍁𑌚𑍍𑌚𑍈𑌰𑍍𑌦𑌿𑌶𑌂𑌤𑍀 𑌗𑌤𑌿𑌂
𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌟𑌮𑌂𑌤𑌰𑌾 𑌸𑍍𑌫𑍁𑌰𑌤𑍁 𑌨𑌸𑍍𑌤𑍍𑌵𑌨𑍍𑌮𑌂𑌦𑌹𑌾𑌸𑌪𑍍𑌰𑌭𑌾 ॥10॥

𑌵𑌕𑍍𑌤𑍍𑌰𑌶𑍍𑌰𑍀𑌸𑌰𑌸𑍀𑌜𑌲𑍇 𑌤𑌰𑌲𑌿𑌤𑌭𑍍𑌰𑍂𑌵𑌲𑍍𑌲𑌿𑌕𑌲𑍍𑌲𑍋𑌲𑌿𑌤𑍇
𑌕𑌾𑌲𑌿𑌮𑍍𑌨𑌾 𑌦𑌧𑌤𑍀 𑌕𑌟𑌾𑌕𑍍𑌷𑌜𑌨𑍁𑌷𑌾 𑌮𑌾𑌧𑍁𑌵𑍍𑌰𑌤𑍀𑌂 𑌵𑍍𑌯𑌾𑌪𑍃𑌤𑌿𑌮𑍍 ।
𑌨𑌿𑌰𑍍𑌨𑌿𑌦𑍍𑌰𑌾𑌮𑌲𑌪𑍁𑌂𑌡𑌰𑍀𑌕𑌕𑍁𑌹𑌨𑌾𑌪𑌾𑌂𑌡𑌿𑌤𑍍𑌯𑌮𑌾𑌬𑌿𑌭𑍍𑌰𑌤𑍀
𑌕𑌾𑌮𑌾𑌕𑍍𑌷𑍍𑌯𑌾𑌃 𑌸𑍍𑌮𑌿𑌤𑌚𑌾𑌤𑍁𑌰𑍀 𑌮𑌮 𑌮𑌨𑌃 𑌕𑌾𑌤𑌰𑍍𑌯𑌮𑍁𑌨𑍍𑌮𑍂𑌲𑌯𑍇𑌤𑍍 ॥11॥

𑌨𑌿𑌤𑍍𑌯𑌂 𑌬𑌾𑌧𑌿𑌤𑌬𑌂𑌧𑍁𑌜𑍀𑌵𑌮𑌧𑌰𑌂 𑌮𑍈𑌤𑍍𑌰𑍀𑌜𑍁𑌷𑌂 𑌪𑌲𑍍𑌲𑌵𑍈𑌃
𑌶𑍁𑌦𑍍𑌧𑌸𑍍𑌯 𑌦𑍍𑌵𑌿𑌜𑌮𑌂𑌡𑌲𑌸𑍍𑌯 𑌚 𑌤𑌿𑌰𑌸𑍍𑌕𑌰𑍍𑌤𑌾𑌰𑌮𑌪𑍍𑌯𑌾𑌶𑍍𑌰𑌿𑌤𑌾 ।
𑌯𑌾 𑌵𑍈𑌮𑌲𑍍𑌯𑌵𑌤𑍀 𑌸𑌦𑍈𑌵 𑌨𑌮𑌤𑌾𑌂 𑌚𑍇𑌤𑌃 𑌪𑍁𑌨𑍀𑌤𑍇𑌤𑌰𑌾𑌂
𑌕𑌾𑌮𑌾𑌕𑍍𑌷𑍍𑌯𑌾 𑌹𑍃𑌦𑌯𑌂 𑌪𑍍𑌰𑌸𑌾𑌦𑌯𑌤𑍁 𑌮𑍇 𑌸𑌾 𑌮𑌂𑌦𑌹𑌾𑌸𑌪𑍍𑌰𑌭𑌾 ॥12॥

𑌦𑍍𑌰𑍁𑌹𑍍𑌯𑌂𑌤𑍀 𑌤𑌮𑌸𑍇 𑌮𑍁𑌹𑍁𑌃 𑌕𑍁𑌮𑍁𑌦𑌿𑌨𑍀𑌸𑌾𑌹𑌾𑌯𑍍𑌯𑌮𑌾𑌬𑌿𑌭𑍍𑌰𑌤𑍀
𑌯𑌾𑌂𑌤𑍀 𑌚𑌂𑌦𑍍𑌰𑌕𑌿𑌶𑍋𑌰𑌶𑍇𑌖𑌰𑌵𑌪𑍁𑌃𑌸𑍌𑌧𑌾𑌂𑌗𑌣𑍇 𑌪𑍍𑌰𑍇𑌂𑌖𑌣𑌮𑍍 ।
𑌜𑍍𑌞𑌾𑌨𑌾𑌂𑌭𑍋𑌨𑌿𑌧𑌿𑌵𑍀𑌚𑌿𑌕𑌾𑌂 𑌸𑍁𑌮𑌨𑌸𑌾𑌂 𑌕𑍂𑌲𑌂𑌕𑌷𑌾𑌂 𑌕𑍁𑌰𑍍𑌵𑌤𑍀
𑌕𑌾𑌮𑌾𑌕𑍍𑌷𑍍𑌯𑌾𑌃 𑌸𑍍𑌮𑌿𑌤𑌕𑍌𑌮𑍁𑌦𑍀 𑌹𑌰𑌤𑍁 𑌮𑍇 𑌸𑌂𑌸𑌾𑌰𑌤𑌾𑌪𑍋𑌦𑌯𑌮𑍍 ॥13॥

𑌕𑌾𑌶𑍍𑌮𑍀𑌰𑌦𑍍𑌰𑌵𑌧𑌾𑌤𑍁𑌕𑌰𑍍𑌦𑌮𑌰𑍁𑌚𑌾 𑌕𑌲𑍍𑌮𑌾𑌷𑌤𑌾𑌂 𑌬𑌿𑌭𑍍𑌰𑌤𑍀
𑌹𑌂𑌸𑍌𑌧𑍈𑌰𑌿𑌵 𑌕𑍁𑌰𑍍𑌵𑌤𑍀 𑌪𑌰𑌿𑌚𑌿𑌤𑌿𑌂 𑌹𑌾𑌰𑍀𑌕𑍃𑌤𑍈𑌰𑍍𑌮𑍌𑌕𑍍𑌤𑌿𑌕𑍈𑌃 ।
𑌵𑌕𑍍𑌷𑍋𑌜𑌨𑍍𑌮𑌤𑍁𑌷𑌾𑌰𑌶𑍈𑌲𑌕𑌟𑌕𑍇 𑌸𑌂𑌚𑌾𑌰𑌮𑌾𑌤𑌨𑍍𑌵𑌤𑍀
𑌕𑌾𑌮𑌾𑌕𑍍𑌷𑍍𑌯𑌾 𑌮𑍃𑌦𑍁𑌲𑌸𑍍𑌮𑌿𑌤𑌦𑍍𑌯𑍁𑌤𑌿𑌮𑌯𑍀 𑌭𑌾𑌗𑍀𑌰𑌥𑍀 𑌭𑌾𑌸𑌤𑍇 ॥14॥

𑌕𑌂𑌬𑍋𑌰𑍍𑌵𑌂𑌶𑌪𑌰𑌂𑌪𑌰𑌾 𑌇𑌵 𑌕𑍃𑌪𑌾𑌸𑌂𑌤𑌾𑌨𑌵𑌲𑍍𑌲𑍀𑌭𑍁𑌵𑌃
𑌸𑌂𑌫𑍁𑌲𑍍𑌲𑌸𑍍𑌤𑌬𑌕𑌾 𑌇𑌵 𑌪𑍍𑌰𑌸𑍃𑌮𑌰𑌾 𑌮𑍂𑌰𑍍𑌤𑌾𑌃 𑌪𑍍𑌰𑌸𑌾𑌦𑌾 𑌇𑌵 ।
𑌵𑌾𑌕𑍍𑌪𑍀𑌯𑍂𑌷𑌕𑌣𑌾 𑌇𑌵 𑌤𑍍𑌰𑌿𑌪𑌥𑌗𑌾𑌪𑌰𑍍𑌯𑌾𑌯𑌭𑍇𑌦𑌾 𑌇𑌵
𑌭𑍍𑌰𑌾𑌜𑌂𑌤𑍇 𑌤𑌵 𑌮𑌂𑌦𑌹𑌾𑌸𑌕𑌿𑌰𑌣𑌾𑌃 𑌕𑌾𑌂𑌚𑍀𑌪𑍁𑌰𑍀𑌨𑌾𑌯𑌿𑌕𑍇 ॥15॥

𑌵𑌕𑍍𑌷𑍋𑌜𑍇 𑌘𑌨𑌸𑌾𑌰𑌪𑌤𑍍𑌰𑌰𑌚𑌨𑌾𑌭𑌂𑌗𑍀𑌸𑌪𑌤𑍍𑌨𑌾𑌯𑌿𑌤𑌾
𑌕𑌂𑌠𑍇 𑌮𑍌𑌕𑍍𑌤𑌿𑌕𑌹𑌾𑌰𑌯𑌷𑍍𑌟𑌿𑌕𑌿𑌰𑌣𑌵𑍍𑌯𑌾𑌪𑌾𑌰𑌮𑍁𑌦𑍍𑌰𑌾𑌯𑌿𑌤𑌾 ।
𑌓𑌷𑍍𑌠𑌶𑍍𑌰𑍀𑌨𑌿𑌕𑍁𑌰𑍁𑌂𑌬𑌪𑌲𑍍𑌲𑌵𑌪𑍁𑌟𑍇 𑌪𑍍𑌰𑍇𑌂𑌖𑌤𑍍𑌪𑍍𑌰𑌸𑍂𑌨𑌾𑌯𑌿𑌤𑌾
𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌰𑌤𑌾𑌂 𑌮𑌦𑍀𑌯𑌹𑍃𑌦𑌯𑍇 𑌤𑍍𑌵𑌨𑍍𑌮𑌂𑌦𑌹𑌾𑌸𑌪𑍍𑌰𑌭𑌾 ॥16॥

𑌯𑍇𑌷𑌾𑌂 𑌬𑌿𑌂𑌦𑍁𑌰𑌿𑌵𑍋𑌪𑌰𑌿 𑌪𑍍𑌰𑌚𑌲𑌿𑌤𑍋 𑌨𑌾𑌸𑌾𑌗𑍍𑌰𑌮𑍁𑌕𑍍𑌤𑌾𑌮𑌣𑌿𑌃
𑌯𑍇𑌷𑌾𑌂 𑌦𑍀𑌨 𑌇𑌵𑌾𑌧𑌿𑌕𑌂𑌠𑌮𑌯𑌤𑍇 𑌹𑌾𑌰𑌃 𑌕𑌰𑌾𑌲𑌂𑌬𑌨𑌮𑍍 ।
𑌯𑍇𑌷𑌾𑌂 𑌬𑌂𑌧𑍁𑌰𑌿𑌵𑍋𑌷𑍍𑌠𑌯𑍋𑌰𑌰𑍁𑌣𑌿𑌮𑌾 𑌧𑌤𑍍𑌤𑍇 𑌸𑍍𑌵𑌯𑌂 𑌰𑌂𑌜𑌨𑌂
𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑍍𑌰𑌭𑌵𑌂𑌤𑍁 𑌤𑍇 𑌮𑌮 𑌶𑌿𑌵𑍋𑌲𑍍𑌲𑌾𑌸𑌾𑌯 𑌹𑌾𑌸𑌾𑌂𑌕𑍁𑌰𑌾𑌃 ॥1𑍭॥

𑌯𑌾 𑌜𑌾𑌡𑍍𑌯𑌾𑌂𑌬𑍁𑌨𑌿𑌧𑌿𑌂 𑌕𑍍𑌷𑌿𑌣𑍋𑌤𑌿 𑌭𑌜𑌤𑌾𑌂 𑌵𑍈𑌰𑌾𑌯𑌤𑍇 𑌕𑍈𑌰𑌵𑍈𑌃
𑌨𑌿𑌤𑍍𑌯𑌂 𑌯𑌾𑌂 𑌨𑌿𑌯𑌮𑍇𑌨 𑌯𑌾 𑌚 𑌯𑌤𑌤𑍇 𑌕𑌰𑍍𑌤𑍁𑌂 𑌤𑍍𑌰𑌿𑌣𑍇𑌤𑍍𑌰𑍋𑌤𑍍𑌸𑌵𑌮𑍍 ।
𑌬𑌿𑌂𑌬𑌂 𑌚𑌾𑌂𑌦𑍍𑌰𑌮𑌸𑌂 𑌚 𑌵𑌂𑌚𑌯𑌤𑌿 𑌯𑌾 𑌗𑌰𑍍𑌵𑍇𑌣 𑌸𑌾 𑌤𑌾𑌦𑍃𑌶𑍀
𑌕𑌾𑌮𑌾𑌕𑍍𑌷𑌿 𑌸𑍍𑌮𑌿𑌤𑌮𑌂𑌜𑌰𑍀 𑌤𑌵 𑌕𑌥𑌂 𑌜𑍍𑌯𑍋𑌤𑍍𑌸𑍍𑌨𑍇𑌤𑍍𑌯𑌸𑍌 𑌕𑍀𑌰𑍍𑌤𑍍𑌯𑌤𑍇 ॥1𑍮॥

𑌆𑌰𑍁𑌢𑌾 𑌰𑌭𑌸𑌾𑌤𑍍𑌪𑍁𑌰𑌃 𑌪𑍁𑌰𑌰𑌿𑌪𑍋𑌰𑌾𑌶𑍍𑌲𑍇𑌷𑌣𑍋𑌪𑌕𑍍𑌰𑌮𑍇
𑌯𑌾 𑌤𑍇 𑌮𑌾𑌤𑌰𑍁𑌪𑍈𑌤𑌿 𑌦𑌿𑌵𑍍𑌯𑌤𑌟𑌿𑌨𑍀𑌶𑌂𑌕𑌾𑌕𑌰𑍀 𑌤𑌤𑍍𑌕𑍍𑌷𑌣𑌮𑍍 ।
𑌓𑌷𑍍𑌠𑍌 𑌵𑍇𑌪𑌯𑌤𑌿 𑌭𑍍𑌰𑍁𑌵𑍌 𑌕𑍁𑌟𑌿𑌲𑌯𑌤𑍍𑌯𑌾𑌨𑌮𑍍𑌰𑌯𑌤𑍍𑌯𑌾𑌨𑌨𑌂
𑌤𑌾𑌂 𑌵𑌂𑌦𑍇 𑌮𑍃𑌦𑍁𑌹𑌾𑌸𑌪𑍂𑌰𑌸𑍁𑌷𑌮𑌾𑌮𑍇𑌕𑌾𑌮𑍍𑌰𑌨𑌾𑌥𑌪𑍍𑌰𑌿𑌯𑍇 ॥1𑍯॥

𑌵𑌕𑍍𑌤𑍍𑌰𑍇𑌂𑌦𑍋𑌸𑍍𑌤𑌵 𑌚𑌂𑌦𑍍𑌰𑌿𑌕𑌾 𑌸𑍍𑌮𑌿𑌤𑌤𑌤𑌿𑌰𑍍𑌵𑌲𑍍𑌗𑍁 𑌸𑍍𑌫𑍁𑌰𑌂𑌤𑍀 𑌸𑌤𑌾𑌂
𑌸𑍍𑌯𑌾𑌚𑍍𑌚𑍇𑌦𑍍𑌯𑍁𑌕𑍍𑌤𑌿𑌮𑌿𑌦𑌂 𑌚𑌕𑍋𑌰𑌮𑌨𑌸𑌾𑌂 𑌕𑌾𑌮𑌾𑌕𑍍𑌷𑌿 𑌕𑍌𑌤𑍂𑌹𑌲𑌮𑍍 ।
𑌏𑌤𑌚𑍍𑌚𑌿𑌤𑍍𑌰𑌮𑌹𑌰𑍍𑌨𑌿𑌶𑌂 𑌯𑌦𑌧𑌿𑌕𑌾𑌮𑍇𑌷𑌾 𑌰𑍁𑌚𑌿𑌂 𑌗𑌾𑌹𑌤𑍇
𑌬𑌿𑌂𑌬𑍋𑌷𑍍𑌠𑌦𑍍𑌯𑍁𑌮𑌣𑌿𑌪𑍍𑌰𑌭𑌾𑌸𑍍𑌵𑌪𑌿 𑌚 𑌯𑌦𑍍𑌬𑌿𑌬𑍍𑌬𑍋𑌕𑌮𑌾𑌲𑌂𑌬𑌤𑍇 ॥20॥

𑌸𑌾𑌦𑍃𑌶𑍍𑌯𑌂 𑌕𑌲𑌶𑌾𑌂𑌬𑍁𑌧𑍇𑌰𑍍𑌵𑌹𑌤𑌿 𑌯𑌤𑍍𑌕𑌾𑌮𑌾𑌕𑍍𑌷𑌿 𑌮𑌂𑌦𑌸𑍍𑌮𑌿𑌤𑌂
𑌶𑍋𑌭𑌾𑌮𑍋𑌷𑍍𑌠𑌰𑍁𑌚𑌾𑌂𑌬 𑌵𑌿𑌦𑍍𑌰𑍁𑌮𑌭𑌵𑌾𑌮𑍇𑌤𑌾𑌦𑍍𑌭𑌿𑌦𑌾𑌂 𑌬𑍍𑌰𑍂𑌮𑌹𑍇 ।
𑌏𑌕𑌸𑍍𑌮𑌾𑌦𑍁𑌦𑌿𑌤𑌂 𑌪𑍁𑌰𑌾 𑌕𑌿𑌲 𑌪𑌪𑍌 𑌶𑌰𑍍𑌵𑌃 𑌪𑍁𑌰𑌾𑌣𑌃 𑌪𑍁𑌮𑌾𑌨𑍍
𑌏𑌤𑌨𑍍𑌮𑌧𑍍𑌯𑌸𑌮𑍁𑌦𑍍𑌭𑌵𑌂 𑌰𑌸𑌯𑌤𑍇 𑌮𑌾𑌧𑍁𑌰𑍍𑌯𑌰𑍂𑌪𑌂 𑌰𑌸𑌮𑍍 ॥21॥

𑌉𑌤𑍍𑌤𑍁𑌂𑌗𑌸𑍍𑌤𑌨𑌕𑍁𑌂𑌭𑌶𑍈𑌲𑌕𑌟𑌕𑍇 𑌵𑌿𑌸𑍍𑌤𑌾𑌰𑌿𑌕𑌸𑍍𑌤𑍂𑌰𑌿𑌕𑌾-
𑌪𑌤𑍍𑌰𑌶𑍍𑌰𑍀𑌜𑍁𑌷𑌿 𑌚𑌂𑌚𑌲𑌾𑌃 𑌸𑍍𑌮𑌿𑌤𑌰𑍁𑌚𑌃 𑌕𑌾𑌮𑌾𑌕𑍍𑌷𑌿 𑌤𑍇 𑌕𑍋𑌮𑌲𑌾𑌃 ।
𑌸𑌂𑌧𑍍𑌯𑌾𑌦𑍀𑌧𑌿𑌤𑌿𑌰𑌂𑌜𑌿𑌤𑌾 𑌇𑌵 𑌮𑍁𑌹𑍁𑌃 𑌸𑌾𑌂𑌦𑍍𑌰𑌾𑌧𑌰𑌜𑍍𑌯𑍋𑌤𑌿𑌷𑌾
𑌵𑍍𑌯𑌾𑌲𑍋𑌲𑌾𑌮𑌲𑌶𑌾𑌰𑌦𑌾𑌭𑍍𑌰𑌶𑌕𑌲𑌵𑍍𑌯𑌾𑌪𑌾𑌰𑌮𑌾𑌤𑌨𑍍𑌵𑌤𑍇 ॥22॥

𑌕𑍍𑌷𑍀𑌰𑌂 𑌦𑍂𑌰𑌤 𑌏𑌵 𑌤𑌿𑌷𑍍𑌠𑌤𑍁 𑌕𑌥𑌂 𑌵𑍈𑌮𑌲𑍍𑌯𑌮𑌾𑌤𑍍𑌰𑌾𑌦𑌿𑌦𑌂
𑌮𑌾𑌤𑌸𑍍𑌤𑍇 𑌸𑌹𑌪𑌾𑌠𑌵𑍀𑌥𑌿𑌮𑌯𑌤𑌾𑌂 𑌮𑌂𑌦𑌸𑍍𑌮𑌿𑌤𑍈𑌰𑍍𑌮𑌂𑌜𑍁𑌲𑍈𑌃 ।
𑌕𑌿𑌂 𑌚𑍇𑌯𑌂 𑌤𑍁 𑌭𑌿𑌦𑌾𑌸𑍍𑌤𑌿 𑌦𑍋𑌹𑌨𑌵𑌶𑌾𑌦𑍇𑌕𑌂 𑌤𑍁 𑌸𑌂𑌜𑌾𑌯𑌤𑍇
𑌕𑌾𑌮𑌾𑌕𑍍𑌷𑌿 𑌸𑍍𑌵𑌯𑌮𑌰𑍍𑌥𑌿𑌤𑌂 𑌪𑍍𑌰𑌣𑌮𑌤𑌾𑌮𑌨𑍍𑌯𑌤𑍍𑌤𑍁 𑌦𑍋𑌦𑍁𑌹𑍍𑌯𑌤𑍇 ॥23॥

𑌕𑌰𑍍𑌪𑍂𑌰𑍈𑌰𑌮𑍃𑌤𑍈𑌰𑍍𑌜𑌗𑌜𑍍𑌜𑌨𑌨𑌿 𑌤𑍇 𑌕𑌾𑌮𑌾𑌕𑍍𑌷𑌿 𑌚𑌂𑌦𑍍𑌰𑌾𑌤𑌪𑍈𑌃
𑌮𑍁𑌕𑍍𑌤𑌾𑌹𑌾𑌰𑌗𑍁𑌣𑍈𑌰𑍍𑌮𑍃𑌣𑌾𑌲𑌵𑌲𑌯𑍈𑌰𑍍𑌮𑍁𑌗𑍍𑌧𑌸𑍍𑌮𑌿𑌤𑌶𑍍𑌰𑍀𑌰𑌿𑌯𑌮𑍍 ।
𑌶𑍍𑌰𑍀𑌕𑌾𑌂𑌚𑍀𑌪𑍁𑌰𑌨𑌾𑌯𑌿𑌕𑍇 𑌸𑌮𑌤𑌯𑌾 𑌸𑌂𑌸𑍍𑌤𑍂𑌯𑌤𑍇 𑌸𑌜𑍍𑌜𑌨𑍈𑌃
𑌤𑌤𑍍𑌤𑌾𑌦𑍃𑌙𑍍𑌮𑌮 𑌤𑌾𑌪𑌶𑌾𑌂𑌤𑌿𑌵𑌿𑌧𑌯𑍇 𑌕𑌿𑌂 𑌦𑍇𑌵𑌿 𑌮𑌂𑌦𑌾𑌯𑌤𑍇 ॥24॥

𑌮𑌧𑍍𑌯𑍇𑌗𑌰𑍍𑌭𑌿𑌤𑌮𑌂𑌜𑍁𑌵𑌾𑌕𑍍𑌯𑌲𑌹𑌰𑍀𑌮𑌾𑌧𑍍𑌵𑍀𑌝𑌰𑍀𑌶𑍀𑌤𑌲𑌾
𑌮𑌂𑌦𑌾𑌰𑌸𑍍𑌤𑌬𑌕𑌾𑌯𑌤𑍇 𑌜𑌨𑌨𑌿 𑌤𑍇 𑌮𑌂𑌦𑌸𑍍𑌮𑌿𑌤𑌾𑌂𑌶𑍁𑌚𑍍𑌛𑌟𑌾 ।
𑌯𑌸𑍍𑌯𑌾 𑌵𑌰𑍍𑌧𑌯𑌿𑌤𑍁𑌂 𑌮𑍁𑌹𑍁𑌰𑍍𑌵𑌿𑌕𑌸𑌨𑌂 𑌕𑌾𑌮𑌾𑌕𑍍𑌷𑌿 𑌕𑌾𑌮𑌦𑍍𑌰𑍁𑌹𑍋
𑌵𑌲𑍍𑌗𑍁𑌰𑍍𑌵𑍀𑌕𑍍𑌷𑌣𑌵𑌿𑌭𑍍𑌰𑌮𑌵𑍍𑌯𑌤𑌿𑌕𑌰𑍋 𑌵𑌾𑌸𑌂𑌤𑌮𑌾𑌸𑌾𑌯𑌤𑍇 ॥25॥

𑌬𑌿𑌂𑌬𑍋𑌷𑍍𑌠𑌦𑍍𑌯𑍁𑌤𑌿𑌪𑍁𑌂𑌜𑌰𑌂𑌜𑌿𑌤𑌰𑍁𑌚𑌿𑌸𑍍𑌤𑍍𑌵𑌨𑍍𑌮𑌂𑌦𑌹𑌾𑌸𑌚𑍍𑌛𑌟𑌾 ।
𑌕𑌲𑍍𑌯𑌾𑌣𑌂 𑌗𑌿𑌰𑌿𑌸𑌾𑌰𑍍𑌵𑌭𑍌𑌮𑌤𑌨𑌯𑍇 𑌕𑌲𑍍𑌲𑍋𑌲𑌯𑌤𑍍𑌵𑌾𑌶𑍁 𑌮𑍇 ।
𑌫𑍁𑌲𑍍𑌲𑌨𑍍𑌮𑌲𑍍𑌲𑌿𑌪𑌿𑌨𑌦𑍍𑌧𑌹𑌲𑍍𑌲𑌕𑌮𑌯𑍀 𑌮𑌾𑌲𑍇𑌵 𑌯𑌾 𑌪𑍇𑌶𑌲𑌾
𑌶𑍍𑌰𑍀𑌕𑌾𑌂𑌚𑍀𑌶𑍍𑌵𑌰𑌿 𑌮𑌾𑌰𑌮𑌰𑍍𑌦𑌿𑌤𑍁𑌰𑍁𑌰𑍋𑌮𑌧𑍍𑌯𑍇 𑌮𑍁𑌹𑍁𑌰𑍍𑌲𑌂𑌬𑌤𑍇 ॥26॥

𑌬𑌿𑌭𑍍𑌰𑌾𑌣𑌾 𑌶𑌰𑌦𑌭𑍍𑌰𑌵𑌿𑌭𑍍𑌰𑌮𑌦𑌶𑌾𑌂 𑌵𑌿𑌦𑍍𑌯𑍋𑌤𑌮𑌾𑌨𑌾𑌪𑍍𑌯𑌸𑍋
𑌕𑌾𑌮𑌾𑌕𑍍𑌷𑌿 𑌸𑍍𑌮𑌿𑌤𑌮𑌂𑌜𑌰𑍀 𑌕𑌿𑌰𑌤𑌿 𑌤𑍇 𑌕𑌾𑌰𑍁𑌣𑍍𑌯𑌧𑌾𑌰𑌾𑌰𑌸𑌮𑍍 ।
𑌆𑌶𑍍𑌚𑌰𑍍𑌯𑌂 𑌶𑌿𑌶𑌿𑌰𑍀𑌕𑌰𑍋𑌤𑌿 𑌜𑌗𑌤𑍀𑌶𑍍𑌚𑌾𑌲𑍋𑌕𑍍𑌯 𑌚𑍈𑌨𑌾𑌮𑌹𑍋
𑌕𑌾𑌮𑌂 𑌖𑍇𑌲𑌤𑌿 𑌨𑍀𑌲𑌕𑌂𑌠𑌹𑍃𑌦𑌯𑌂 𑌕𑍌𑌤𑍂𑌹𑌲𑌾𑌂𑌦𑍋𑌲𑌿𑌤𑌮𑍍 ॥2𑍭॥

𑌪𑍍𑌰𑍇𑌂𑌖𑌤𑍍𑌪𑍍𑌰𑍌𑌢𑌕𑌟𑌾𑌕𑍍𑌷𑌕𑍁𑌂𑌜𑌕𑍁𑌹𑌰𑍇𑌷𑍍𑌵𑌤𑍍𑌯𑌚𑍍𑌛𑌗𑍁𑌚𑍍𑌛𑌾𑌯𑌿𑌤𑌂
𑌵𑌕𑍍𑌤𑍍𑌰𑍇𑌂𑌦𑍁𑌚𑍍𑌛𑌵𑌿𑌸𑌿𑌂𑌧𑍁𑌵𑍀𑌚𑌿𑌨𑌿𑌚𑌯𑍇 𑌫𑍇𑌨𑌪𑍍𑌰𑌤𑌾𑌨𑌾𑌯𑌿𑌤𑌮𑍍 ।
𑌨𑍈𑌰𑌂𑌤𑌰𑍍𑌯𑌵𑌿𑌜𑍃𑌂𑌭𑌿𑌤𑌸𑍍𑌤𑌨𑌤𑌟𑍇 𑌨𑍈𑌚𑍋𑌲𑌪𑌟𑍍𑌟𑌾𑌯𑌿𑌤𑌂
𑌕𑌾𑌲𑍁𑌷𑍍𑌯𑌂 𑌕𑌬𑌲𑍀𑌕𑌰𑍋𑌤𑍁 𑌮𑌮 𑌤𑍇 𑌕𑌾𑌮𑌾𑌕𑍍𑌷𑌿 𑌮𑌂𑌦𑌸𑍍𑌮𑌿𑌤𑌮𑍍 ॥2𑍮॥

𑌪𑍀𑌯𑍂𑌷𑌂 𑌤𑌵 𑌮𑌂𑌥𑌰𑌸𑍍𑌮𑌿𑌤𑌮𑌿𑌤𑌿 𑌵𑍍𑌯𑌰𑍍𑌥𑍈𑌵 𑌸𑌾𑌪𑌪𑍍𑌰𑌥𑌾
𑌕𑌾𑌮𑌾𑌕𑍍𑌷𑌿 𑌧𑍍𑌰𑍁𑌵𑌮𑍀𑌦𑍃𑌶𑌂 𑌯𑌦𑌿 𑌭𑌵𑍇𑌦𑍇𑌤𑌤𑍍𑌕𑌥𑌂 𑌵𑌾 𑌶𑌿𑌵𑍇 ।
𑌮𑌂𑌦𑌾𑌰𑌸𑍍𑌯 𑌕𑌥𑌾𑌲𑌵𑌂 𑌨 𑌸𑌹𑌤𑍇 𑌮𑌥𑍍𑌨𑌾𑌤𑌿 𑌮𑌂𑌦𑌾𑌕𑌿𑌨𑍀-
𑌮𑌿𑌂𑌦𑍁𑌂 𑌨𑌿𑌂𑌦𑌤𑌿 𑌕𑍀𑌰𑍍𑌤𑌿𑌤𑍇𑌽𑌪𑌿 𑌕𑌲𑌶𑍀𑌪𑌾𑌥𑍋𑌧𑌿𑌮𑍀𑌰𑍍𑌷𑍍𑌯𑌾𑌯𑌤𑍇 ॥2𑍯॥

𑌵𑌿𑌶𑍍𑌵𑍇𑌷𑌾𑌂 𑌨𑌯𑌨𑍋𑌤𑍍𑌸𑌵𑌂 𑌵𑌿𑌤𑌨𑍁𑌤𑌾𑌂 𑌵𑌿𑌦𑍍𑌯𑍋𑌤𑌤𑌾𑌂 𑌚𑌂𑌦𑍍𑌰𑌮𑌾
𑌵𑌿𑌖𑍍𑌯𑌾𑌤𑍋 𑌮𑌦𑌨𑌾𑌂𑌤𑌕𑍇𑌨 𑌮𑍁𑌕𑍁𑌟𑍀𑌮𑌧𑍍𑌯𑍇 𑌚 𑌸𑌂𑌮𑌾𑌨𑍍𑌯𑌤𑌾𑌮𑍍 ।
𑌆𑌃 𑌕𑌿𑌂 𑌜𑌾𑌤𑌮𑌨𑍇𑌨 𑌹𑌾𑌸𑌸𑍁𑌷𑌮𑌾𑌮𑌾𑌲𑍋𑌕𑍍𑌯 𑌕𑌾𑌮𑌾𑌕𑍍𑌷𑌿 𑌤𑍇
𑌕𑌾𑌲𑌂𑌕𑍀𑌮𑌵𑌲𑌂𑌬𑌤𑍇 𑌖𑌲𑍁 𑌦𑌶𑌾𑌂 𑌕𑌲𑍍𑌮𑌾𑌷𑌹𑍀𑌨𑍋𑌽𑌪𑍍𑌯𑌸𑍌 ॥30॥

𑌚𑍇𑌤𑌃 𑌶𑍀𑌤𑌲𑌯𑌂𑌤𑍁 𑌨𑌃 𑌪𑌶𑍁𑌪𑌤𑍇𑌰𑌾𑌨𑌂𑌦𑌜𑍀𑌵𑌾𑌤𑌵𑍋
𑌨𑌮𑍍𑌰𑌾𑌣𑌾𑌂 𑌨𑌯𑌨𑌾𑌧𑍍𑌵𑌸𑍀𑌮𑌸𑍁 𑌶𑌰𑌚𑍍𑌚𑌂𑌦𑍍𑌰𑌾𑌤𑌪𑍋𑌪𑌕𑍍𑌰𑌮𑌾𑌃 ।
𑌸𑌂𑌸𑌾𑌰𑌾𑌖𑍍𑌯𑌸𑌰𑍋𑌰𑍁𑌹𑌾𑌕𑌰𑌖𑌲𑍀𑌕𑌾𑌰𑍇 𑌤𑍁𑌷𑌾𑌰𑍋𑌤𑍍𑌕𑌰𑌾𑌃
𑌕𑌾𑌮𑌾𑌕𑍍𑌷𑌿 𑌸𑍍𑌮𑌰𑌕𑍀𑌰𑍍𑌤𑌿𑌬𑍀𑌜𑌨𑌿𑌕𑌰𑌾𑌸𑍍𑌤𑍍𑌵𑌨𑍍𑌮𑌂𑌦𑌹𑌾𑌸𑌾𑌂𑌕𑍁𑌰𑌾𑌃 ॥31॥

𑌕𑌰𑍍𑌮𑍌𑌘𑌾𑌖𑍍𑌯𑌤𑌮𑌃𑌕𑌚𑌾𑌕𑌚𑌿𑌕𑌰𑌾𑌨𑍍𑌕𑌾𑌮𑌾𑌕𑍍𑌷𑌿 𑌸𑌂𑌚𑌿𑌂𑌤𑌯𑍇
𑌤𑍍𑌵𑌨𑍍𑌮𑌂𑌦𑌸𑍍𑌮𑌿𑌤𑌰𑍋𑌚𑌿𑌷𑌾𑌂 𑌤𑍍𑌰𑌿𑌭𑍁𑌵𑌨𑌕𑍍𑌷𑍇𑌮𑌂𑌕𑌰𑌾𑌨𑌂𑌕𑍁𑌰𑌾𑌨𑍍 ।
𑌯𑍇 𑌵𑌕𑍍𑌤𑍍𑌰𑌂 𑌶𑌿𑌶𑌿𑌰𑌶𑍍𑌰𑌿𑌯𑍋 𑌵𑌿𑌕𑌸𑌿𑌤𑌂 𑌚𑌂𑌦𑍍𑌰𑌾𑌤𑌪𑌾𑌂𑌭𑍋𑌰𑍁𑌹-
𑌦𑍍𑌵𑍇𑌷𑍋𑌦𑍍𑌧𑍇𑌷𑍋𑌣𑌚𑌾𑌤𑍁𑌰𑍀𑌮𑌿𑌵 𑌤𑌿𑌰𑌸𑍍𑌕𑌰𑍍𑌤𑍁𑌂 𑌪𑌰𑌿𑌷𑍍𑌕𑍁𑌰𑍍𑌵𑌤𑍇 ॥32॥

𑌕𑍁𑌰𑍍𑌯𑍁𑌰𑍍𑌨𑌃 𑌕𑍁𑌲𑌶𑍈𑌲𑌰𑌾𑌜𑌤𑌨𑌯𑍇 𑌕𑍂𑌲𑌂𑌕𑌷𑌂 𑌮𑌂𑌗𑌲𑌂
𑌕𑍁𑌂𑌦𑌸𑍍𑌪𑌰𑍍𑌧𑌨𑌚𑍁𑌂𑌚𑌵𑌸𑍍𑌤𑌵 𑌶𑌿𑌵𑍇 𑌮𑌂𑌦𑌸𑍍𑌮𑌿𑌤𑌪𑍍𑌰𑌕𑍍𑌰𑌮𑌾𑌃 ।
𑌯𑍇 𑌕𑌾𑌮𑌾𑌕𑍍𑌷𑌿 𑌸𑌮𑌸𑍍𑌤𑌸𑌾𑌕𑍍𑌷𑌿𑌨𑌯𑌨𑌂 𑌸𑌂𑌤𑍋𑌷𑌯𑌂𑌤𑍀𑌶𑍍𑌵𑌰𑌂
𑌕𑌰𑍍𑌪𑍂𑌰𑌪𑍍𑌰𑌕𑌰𑌾 𑌇𑌵 𑌪𑍍𑌰𑌸𑍃𑌮𑌰𑌾𑌃 𑌪𑍁𑌂𑌸𑌾𑌮𑌸𑌾𑌧𑌾𑌰𑌣𑌾𑌃 ॥33॥

𑌕𑌮𑍍𑌰𑍇𑌣 𑌸𑍍𑌨𑌪𑌯𑌸𑍍𑌵 𑌕𑌰𑍍𑌮𑌕𑍁𑌹𑌨𑌾𑌚𑍋𑌰𑍇𑌣 𑌮𑌾𑌰𑌾𑌗𑌮-
𑌵𑍍𑌯𑌾𑌖𑍍𑌯𑌾𑌶𑌿𑌕𑍍𑌷𑌣𑌦𑍀𑌕𑍍𑌷𑌿𑌤𑍇𑌨 𑌵𑌿𑌦𑍁𑌷𑌾𑌮𑌕𑍍𑌷𑍀𑌣𑌲𑌕𑍍𑌷𑍍𑌮𑍀𑌪𑍁𑌷𑌾 ।
𑌕𑌾𑌮𑌾𑌕𑍍𑌷𑌿 𑌸𑍍𑌮𑌿𑌤𑌕𑌂𑌦𑌲𑍇𑌨 𑌕𑌲𑍁𑌷𑌸𑍍𑌫𑍋𑌟𑌕𑍍𑌰𑌿𑌯𑌾𑌚𑍁𑌂𑌚𑍁𑌨𑌾
𑌕𑌾𑌰𑍁𑌣𑍍𑌯𑌾𑌮𑍃𑌤𑌵𑍀𑌚𑌿𑌕𑌾𑌵𑌿𑌹𑌰𑌣𑌪𑍍𑌰𑌾𑌚𑍁𑌰𑍍𑌯𑌧𑍁𑌰𑍍𑌯𑍇𑌣 𑌮𑌾𑌮𑍍 ॥34॥

𑌤𑍍𑌵𑌨𑍍𑌮𑌂𑌦𑌸𑍍𑌮𑌿𑌤𑌕𑌂𑌦𑌲𑌸𑍍𑌯 𑌨𑌿𑌯𑌤𑌂 𑌕𑌾𑌮𑌾𑌕𑍍𑌷𑌿 𑌶𑌂𑌕𑌾𑌮𑌹𑍇
𑌬𑌿𑌂𑌬𑌃 𑌕𑌶𑍍𑌚𑌨 𑌨𑍂𑌤𑌨𑌃 𑌪𑍍𑌰𑌚𑌲𑌿𑌤𑍋 𑌨𑍈𑌶𑌾𑌕𑌰𑌃 𑌶𑍀𑌕𑌰𑌃 ।
𑌕𑌿𑌂𑌚 𑌕𑍍𑌷𑍀𑌰𑌪𑌯𑍋𑌨𑌿𑌧𑌿𑌃 𑌪𑍍𑌰𑌤𑌿𑌨𑌿𑌧𑌿𑌃 𑌸𑍍𑌵𑌰𑍍𑌵𑌾𑌹𑌿𑌨𑍀𑌵𑍀𑌚𑌿𑌕𑌾-
𑌬𑌿𑌬𑍍𑌵𑍋𑌕𑍋𑌽𑌪𑌿 𑌵𑌿𑌡𑌂𑌬 𑌏𑌵 𑌕𑍁𑌹𑌨𑌾 𑌮𑌲𑍍𑌲𑍀𑌮𑌤𑌲𑍍𑌲𑍀𑌰𑍁𑌚𑌃 ॥35॥

𑌦𑍁𑌷𑍍𑌕𑌰𑍍𑌮𑌾𑌰𑍍𑌕𑌨𑌿𑌸𑌰𑍍𑌗𑌕𑌰𑍍𑌕𑌶𑌮𑌹𑌸𑍍𑌸𑌂𑌪𑌰𑍍𑌕𑌤𑌪𑌤𑌂 𑌮𑌿𑌲-
𑌤𑍍𑌪𑌂𑌕𑌂 𑌶𑌂𑌕𑌰𑌵𑌲𑍍𑌲𑌭𑍇 𑌮𑌮 𑌮𑌨𑌃 𑌕𑌾𑌂𑌚𑍀𑌪𑍁𑌰𑌾𑌲𑌂𑌕𑍍𑌰𑌿𑌯𑍇 ।
𑌅𑌂𑌬 𑌤𑍍𑌵𑌨𑍍𑌮𑍃𑌦𑍁𑌲𑌸𑍍𑌮𑌿𑌤𑌾𑌮𑍃𑌤𑌰𑌸𑍇 𑌮𑌂𑌕𑍍𑌤𑍍𑌵𑌾 𑌵𑌿𑌧𑍂𑌯 𑌵𑍍𑌯𑌥𑌾-
𑌮𑌾𑌨𑌂𑌦𑍋𑌦𑌯𑌸𑍌𑌧𑌶𑍃𑌂𑌗𑌪𑌦𑌵𑍀𑌮𑌾𑌰𑍋𑌢𑍁𑌮𑌾𑌕𑌾𑌂𑌕𑍍𑌷𑌤𑌿 ॥36॥

𑌨𑌮𑍍𑌰𑌾𑌣𑌾𑌂 𑌨𑌗𑌰𑌾𑌜𑌶𑍇𑌖𑌰𑌸𑍁𑌤𑍇 𑌨𑌾𑌕𑌾𑌲𑌯𑌾𑌨𑌾𑌂 𑌪𑍁𑌰𑌃
𑌕𑌾𑌮𑌾𑌕𑍍𑌷𑌿 𑌤𑍍𑌵𑌰𑌯𑌾 𑌵𑌿𑌪𑌤𑍍𑌪𑍍𑌰𑌶𑌮𑍇𑌨 𑌕𑌾𑌰𑍁𑌣𑍍𑌯𑌧𑌾𑌰𑌾𑌃 𑌕𑌿𑌰𑌨𑍍 ।
𑌆𑌗𑌚𑍍𑌛𑌂𑌤𑌮𑌨𑍁𑌗𑍍𑌰𑌹𑌂 𑌪𑍍𑌰𑌕𑌟𑌯𑌨𑍍𑌨𑌾𑌨𑌂𑌦𑌬𑍀𑌜𑌾𑌨𑌿 𑌤𑍇
𑌨𑌾𑌸𑍀𑌰𑍇 𑌮𑍃𑌦𑍁𑌹𑌾𑌸 𑌏𑌵 𑌤𑌨𑍁𑌤𑍇 𑌨𑌾𑌥𑍇 𑌸𑍁𑌧𑌾𑌶𑍀𑌤𑌲𑌃 ॥3𑍭॥

𑌕𑌾𑌮𑌾𑌕𑍍𑌷𑌿 𑌪𑍍𑌰𑌥𑌮𑌾𑌨𑌵𑌿𑌭𑍍𑌰𑌮𑌨𑌿𑌧𑌿𑌃 𑌕𑌂𑌦𑌰𑍍𑌪𑌦𑌰𑍍𑌪𑌪𑍍𑌰𑌸𑍂𑌃
𑌮𑍁𑌗𑍍𑌧𑌸𑍍𑌤𑍇 𑌮𑍃𑌦𑍁𑌹𑌾𑌸 𑌏𑌵 𑌗𑌿𑌰𑌿𑌜𑍇 𑌮𑍁𑌷𑍍𑌣𑌾𑌤𑍁 𑌮𑍇 𑌕𑌿𑌲𑍍𑌬𑌿𑌷𑌮𑍍 ।
𑌯𑌂 𑌦𑍍𑌰𑌷𑍍𑌟𑍁𑌂 𑌵𑌿𑌹𑌿𑌤𑍇 𑌕𑌰𑌗𑍍𑌰𑌹 𑌉𑌮𑍇 𑌶𑌂𑌭𑍁𑌸𑍍𑌤𑍍𑌰𑌪𑌾𑌮𑍀𑌲𑌿𑌤𑌂
𑌸𑍍𑌵𑍈𑌰𑌂 𑌕𑌾𑌰𑌯𑌤𑌿 𑌸𑍍𑌮 𑌤𑌾𑌂𑌡𑌵𑌵𑌿𑌨𑍋𑌦𑌾𑌨𑌂𑌦𑌿𑌨𑌾 𑌤𑌂𑌡𑍁𑌨𑌾 ॥3𑍮॥

𑌕𑍍𑌷𑍁𑌣𑍍𑌣𑌂 𑌕𑍇𑌨𑌚𑌿𑌦𑍇𑌵 𑌧𑍀𑌰𑌮𑌨𑌸𑌾 𑌕𑍁𑌤𑍍𑌰𑌾𑌪𑌿 𑌨𑌾𑌨𑌾𑌜𑌨𑍈𑌃
𑌕𑌰𑍍𑌮𑌗𑍍𑌰𑌂𑌥𑌿𑌨𑌿𑌯𑌂𑌤𑍍𑌰𑌿𑌤𑍈𑌰𑌸𑍁𑌗𑌮𑌂 𑌕𑌾𑌮𑌾𑌕𑍍𑌷𑌿 𑌸𑌾𑌮𑌾𑌨𑍍𑌯𑌤𑌃 ।
𑌮𑍁𑌗𑍍𑌧𑍈𑌰𑍍𑌦𑍍𑌰𑍁𑌷𑍍𑌟𑍁𑌮𑌶𑌕𑍍𑌯𑌮𑍇𑌵 𑌮𑌨𑌸𑌾 𑌮𑍂𑌢𑌸𑌯 𑌮𑍇 𑌮𑍌𑌕𑍍𑌤𑌿𑌕𑌂
𑌮𑌾𑌰𑍍𑌗𑌂 𑌦𑌰𑍍𑌶𑌯𑌤𑍁 𑌪𑍍𑌰𑌦𑍀𑌪 𑌇𑌵 𑌤𑍇 𑌮𑌂𑌦𑌸𑍍𑌮𑌿𑌤𑌶𑍍𑌰𑍀𑌰𑌿𑌯𑌮𑍍 ॥3𑍯॥

𑌜𑍍𑌯𑍋𑌤𑍍𑌸𑍍𑌨𑌾𑌕𑌾𑌂𑌤𑌿𑌭𑌿𑌰𑍇𑌵 𑌨𑌿𑌰𑍍𑌮𑌲𑌤𑌰𑌂 𑌨𑍈𑌶𑌾𑌕𑌰𑌂 𑌮𑌂𑌡𑌲𑌂
𑌹𑌂𑌸𑍈𑌰𑍇𑌵 𑌶𑌰𑌦𑍍𑌵𑌿𑌲𑌾𑌸𑌸𑌮𑌯𑍇 𑌵𑍍𑌯𑌾𑌕𑍋𑌚𑌮𑌂𑌭𑍋𑌰𑍁𑌹𑌮𑍍 ।
𑌸𑍍𑌵𑌚𑍍𑌛𑍈𑌰𑍇𑌵 𑌵𑌿𑌕𑌸𑍍𑌵𑌰𑍈𑌰𑍁𑌡𑍁𑌗𑍁𑌣𑍈𑌃 𑌕𑌾𑌮𑌾𑌕𑍍𑌷𑌿 𑌬𑌿𑌂𑌬𑌂 𑌦𑌿𑌵𑌃
𑌪𑍁𑌣𑍍𑌯𑍈𑌰𑍇𑌵 𑌮𑍃𑌦𑍁𑌸𑍍𑌮𑌿𑌤𑍈𑌸𑍍𑌤𑌵 𑌮𑍁𑌖𑌂 𑌪𑍁𑌷𑍍𑌣𑌾𑌤𑌿 𑌶𑍋𑌭𑌾𑌭𑌰𑌮𑍍 ॥40॥

𑌮𑌾𑌨𑌗𑍍𑌰𑌂𑌥𑌿𑌵𑌿𑌧𑍁𑌂𑌤𑍁𑌦𑍇𑌨 𑌰𑌭𑌸𑌾𑌦𑌾𑌸𑍍𑌵𑌾𑌦𑍍𑌯𑌮𑌾𑌨𑍇 𑌨𑌵-
𑌪𑍍𑌰𑍇𑌮𑌾𑌡𑌂𑌬𑌰𑌪𑍂𑌰𑍍𑌣𑌿𑌮𑌾𑌹𑌿𑌮𑌕𑌰𑍇 𑌕𑌾𑌮𑌾𑌕𑍍𑌷𑌿 𑌤𑍇 𑌤𑌤𑍍𑌕𑍍𑌷𑌣𑌮𑍍 ।
𑌆𑌲𑍋𑌕𑍍𑌯 𑌸𑍍𑌮𑌿𑌤𑌚𑌂𑌦𑍍𑌰𑌿𑌕𑌾𑌂 𑌪𑍁𑌨𑌰𑌿𑌮𑌾𑌮𑍁𑌨𑍍𑌮𑍀𑌲𑌨𑌂 𑌜𑌗𑍍𑌮𑍁𑌷𑍀𑌂
𑌚𑍇𑌤𑌃 𑌶𑍀𑌲𑌯𑌤𑍇 𑌚𑌕𑍋𑌰𑌚𑌰𑌿𑌤𑌂 𑌚𑌂𑌦𑍍𑌰𑌾𑌰𑍍𑌧𑌚𑍂𑌡𑌾𑌮𑌣𑍇𑌃 ॥41॥

𑌕𑌾𑌮𑌾𑌕𑍍𑌷𑌿 𑌸𑍍𑌮𑌿𑌤𑌮𑌂𑌜𑌰𑍀𑌂 𑌤𑌵 𑌭𑌜𑍇 𑌯𑌸𑍍𑌯𑌾𑌸𑍍𑌤𑍍𑌵𑌿𑌷𑌾𑌮𑌂𑌕𑍁𑌰𑌾-
𑌨𑌾𑌪𑍀𑌨𑌸𑍍𑌤𑌨𑌪𑌾𑌨𑌲𑌾𑌲𑌸𑌤𑌯𑌾 𑌨𑌿𑌶𑍍𑌶𑌂𑌕𑌮𑌂𑌕𑍇𑌶𑌯𑌃 ।
𑌊𑌰𑍍𑌧𑍍𑌵𑌂 𑌵𑍀𑌕𑍍𑌷𑍍𑌯 𑌵𑌿𑌕𑌰𑍍𑌷𑌤𑌿 𑌪𑍍𑌰𑌸𑍃𑌮𑌰𑌾𑌨𑍁𑌦𑍍𑌦𑌾𑌮𑌯𑌾 𑌶𑍁𑌂𑌡𑌯𑌾
𑌸𑍂𑌨𑍁𑌸𑍁𑌤𑍇 𑌬𑌿𑌸𑌶𑌂𑌕𑌯𑌾𑌶𑍁 𑌕𑍁𑌹𑌨𑌾𑌦𑌂𑌤𑌾𑌵𑌲𑌗𑍍𑌰𑌾𑌮𑌣𑍀𑌃 ॥42॥

𑌗𑌾𑌢𑌾𑌶𑍍𑌲𑍇𑌷𑌵𑌿𑌮𑌰𑍍𑌦𑌸𑌂𑌭𑍍𑌰𑌮𑌵𑌶𑌾𑌦𑍁𑌦𑍍𑌦𑌾𑌮𑌮𑍁𑌕𑍍𑌤𑌾𑌗𑍁𑌣-
𑌪𑍍𑌰𑌾𑌲𑌂𑌬𑍇 𑌕𑍁𑌚𑌕𑍁𑌂𑌭𑌯𑍋𑌰𑍍𑌵𑌿𑌗𑌲𑌿𑌤𑍇 𑌦𑌕𑍍𑌷𑌦𑍍𑌵𑌿𑌷𑍋 𑌵𑌕𑍍𑌷𑌸𑌿 ।
𑌯𑌾 𑌸𑌖𑍍𑌯𑍇𑌨 𑌪𑌿𑌨𑌹𑍍𑌯𑌤𑌿 𑌪𑍍𑌰𑌚𑍁𑌰𑌯𑌾 𑌭𑌾𑌸𑌾 𑌤𑌦𑍀𑌯𑌾𑌂 𑌦𑌶𑌾𑌂
𑌸𑌾 𑌮𑍇 𑌖𑍇𑌲𑌤𑍁 𑌕𑌾𑌮𑌕𑍋𑌟𑌿 𑌹𑍃𑌦𑌯𑍇 𑌸𑌾𑌂𑌦𑍍𑌰𑌸𑍍𑌮𑌿𑌤𑌾𑌂𑌶𑍁𑌚𑍍𑌛𑌟𑌾 ॥43॥

𑌮𑌂𑌦𑌾𑌰𑍇 𑌤𑌵 𑌮𑌂𑌥𑌰𑌸𑍍𑌮𑌿𑌤𑌰𑍁𑌚𑌾𑌂 𑌮𑌾𑌤𑍍𑌸𑌰𑍍𑌯𑌮𑌾𑌲𑍋𑌕𑍍𑌯𑌤𑍇
𑌕𑌾𑌮𑌾𑌕𑍍𑌷𑌿 𑌸𑍍𑌮𑌰𑌶𑌾𑌸𑌨𑍇 𑌚 𑌨𑌿𑌯𑌤𑍋 𑌰𑌾𑌗𑍋𑌦𑌯𑍋 𑌲𑌕𑍍𑌷𑍍𑌯𑌤𑍇 ।
𑌚𑌾𑌂𑌦𑍍𑌰𑍀𑌷𑍁 𑌦𑍍𑌯𑍁𑌤𑌿𑌮𑌂𑌜𑌰𑍀𑌷𑍁 𑌚 𑌮𑌹𑌾𑌂𑌦𑍍𑌵𑍇𑌷𑌾𑌂𑌕𑍁𑌰𑍋 𑌦𑍃𑌶𑍍𑌯𑌤𑍇
𑌶𑍁𑌦𑍍𑌧𑌾𑌨𑌾𑌂 𑌕𑌥𑌮𑍀𑌦𑍃𑌶𑍀 𑌗𑌿𑌰𑌿𑌸𑍁𑌤𑍇𑌽𑌤𑌿𑌶𑍁𑌦𑍍𑌧𑌾 𑌦𑌶𑌾 𑌕𑌥𑍍𑌯𑌤𑌾𑌮𑍍 ॥44॥

𑌪𑍀𑌯𑍂𑌷𑌂 𑌖𑌲𑍁 𑌪𑍀𑌯𑌤𑍇 𑌸𑍁𑌰𑌜𑌨𑍈𑌰𑍍𑌦𑍁𑌗𑍍𑌧𑌾𑌂𑌬𑍁𑌧𑌿𑌰𑍍𑌮𑌥𑍍𑌯𑌤𑍇
𑌮𑌾𑌹𑍇𑌶𑍈𑌶𑍍𑌚 𑌜𑌟𑌾𑌕𑌲𑌾𑌪𑌨𑌿𑌗𑌡𑍈𑌰𑍍𑌮𑌂𑌦𑌾𑌕𑌿𑌨𑍀 𑌨𑌹𑍍𑌯𑌤𑍇 ।
𑌶𑍀𑌤𑌾𑌂𑌶𑍁𑌃 𑌪𑌰𑌿𑌭𑍂𑌯𑌤𑍇 𑌚 𑌤𑌮𑌸𑌾 𑌤𑌸𑍍𑌮𑌾𑌦𑌨𑍇𑌤𑌾𑌦𑍃𑌶𑍀
𑌕𑌾𑌮𑌾𑌕𑍍𑌷𑌿 𑌸𑍍𑌮𑌿𑌤𑌮𑌂𑌜𑌰𑍀 𑌤𑌵 𑌵𑌚𑍋𑌵𑍈𑌦𑌗𑍍𑌧𑍍𑌯𑌮𑍁𑌲𑍍𑌲𑌂𑌘𑌤𑍇 ॥45॥

𑌆𑌶𑌂𑌕𑍇 𑌤𑌵 𑌮𑌂𑌦𑌹𑌾𑌸𑌲𑌹𑌰𑍀𑌮𑌨𑍍𑌯𑌾𑌦𑍃𑌶𑍀𑌂 𑌚𑌂𑌦𑍍𑌰𑌿𑌕𑌾-
𑌮𑍇𑌕𑌾𑌮𑍍𑌰𑍇𑌶𑌕𑍁𑌟𑍁𑌂𑌬𑌿𑌨𑌿 𑌪𑍍𑌰𑌤𑌿𑌪𑌦𑌂 𑌯𑌸𑍍𑌯𑌾𑌃 𑌪𑍍𑌰𑌭𑌾𑌸𑌂𑌗𑌮𑍇 ।
𑌵𑌕𑍍𑌷𑍋𑌜𑌾𑌂𑌬𑍁𑌰𑍁𑌹𑍇 𑌨 𑌤𑍇 𑌰𑌚𑌯𑌤𑌃 𑌕𑌾𑌂𑌚𑌿𑌦𑍍𑌦𑌶𑌾𑌂 𑌕𑍌𑌙𑍍𑌮𑌲𑍀-
𑌮𑌾𑌸𑍍𑌯𑌾𑌂𑌭𑍋𑌰𑍁𑌹𑌮𑌂𑌬 𑌕𑌿𑌂𑌚 𑌶𑌨𑌕𑍈𑌰𑌾𑌲𑌂𑌬𑌤𑍇 𑌫𑍁𑌲𑍍𑌲𑌤𑌾𑌮𑍍 ॥46॥

𑌆𑌸𑍍𑌤𑍀𑌰𑍍𑌣𑌾𑌧𑌰𑌕𑌾𑌂𑌤𑌿𑌪𑌲𑍍𑌲𑌵𑌚𑌯𑍇 𑌪𑌾𑌤𑌂 𑌮𑍁𑌹𑍁𑌰𑍍𑌜𑌗𑍍𑌮𑍁𑌷𑍀
𑌮𑌾𑌰𑌦𑍍𑌰𑍋𑌹𑌿𑌣𑌿 𑌕𑌂𑌦𑌲𑌤𑍍𑌸𑍍𑌮𑌰𑌶𑌰𑌜𑍍𑌵𑌾𑌲𑌾𑌵𑌲𑍀𑌰𑍍𑌵𑍍𑌯𑌂𑌜𑌤𑍀 ।
𑌨𑌿𑌂𑌦𑌂𑌤𑍀 𑌘𑌨𑌸𑌾𑌰𑌹𑌾𑌰𑌵𑌲𑌯𑌜𑍍𑌯𑍋𑌤𑍍𑌸𑍍𑌨𑌾𑌮𑍃𑌣𑌾𑌲𑌾𑌨𑌿 𑌤𑍇
𑌕𑌾𑌮𑌾𑌕𑍍𑌷𑌿 𑌸𑍍𑌮𑌿𑌤𑌚𑌾𑌤𑍁𑌰𑍀 𑌵𑌿𑌰𑌹𑌿𑌣𑍀𑌰𑍀𑌤𑌿𑌂 𑌜𑌗𑌾𑌹𑍇𑌤𑌰𑌾𑌮𑍍 ॥4𑍭॥

𑌸𑍂𑌰𑍍𑌯𑌾𑌲𑍋𑌕𑌵𑌿𑌧𑍌 𑌵𑌿𑌕𑌾𑌸𑌮𑌧𑌿𑌕𑌂 𑌯𑌾𑌂𑌤𑍀 𑌹𑌰𑌂𑌤𑍀 𑌤𑌮-
𑌸𑍍𑌸𑌂𑌦𑍋𑌹𑌂 𑌨𑌮𑌤𑌾𑌂 𑌨𑌿𑌜𑌸𑍍𑌮𑌰𑌣𑌤𑍋 𑌦𑍋𑌷𑌾𑌕𑌰𑌦𑍍𑌵𑍇𑌷𑌿𑌣𑍀 ।
𑌨𑌿𑌰𑍍𑌯𑌾𑌂𑌤𑍀 𑌵𑌦𑌨𑌾𑌰𑌵𑌿𑌂𑌦𑌕𑍁𑌹𑌰𑌾𑌨𑍍𑌨𑌿𑌰𑍍𑌧𑍂𑌤𑌜𑌾𑌡𑍍𑌯𑌾 𑌨𑍃𑌣𑌾𑌂
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌤𑌵 𑌸𑍍𑌮𑌿𑌤𑌦𑍍𑌯𑍁𑌤𑌿𑌮𑌯𑍀 𑌚𑌿𑌤𑍍𑌰𑍀𑌯𑌤𑍇 𑌚𑌂𑌦𑍍𑌰𑌿𑌕𑌾 ॥4𑍮॥

𑌕𑍁𑌂𑌠𑍀𑌕𑍁𑌰𑍍𑌯𑍁𑌰𑌮𑍀 𑌕𑍁𑌬𑍋𑌧𑌘𑌟𑌨𑌾𑌮𑌸𑍍𑌮𑌨𑍍𑌮𑌨𑍋𑌮𑌾𑌥𑌿𑌨𑍀𑌂
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌶𑌿𑌵𑌂𑌕𑌰𑌾𑌸𑍍𑌤𑌵 𑌶𑌿𑌵𑍇 𑌶𑍍𑌰𑍀𑌮𑌂𑌦𑌹𑌾𑌸𑌾𑌂𑌕𑍁𑌰𑌾𑌃 ।
𑌯𑍇 𑌤𑌨𑍍𑌵𑌂𑌤𑌿 𑌨𑌿𑌰𑌂𑌤𑌰𑌂 𑌤𑌰𑍁𑌣𑌿𑌮𑌸𑍍𑌤𑌂𑌬𑍇𑌰𑌮𑌗𑍍𑌰𑌾𑌮𑌣𑍀-
𑌕𑍁𑌂𑌭𑌦𑍍𑌵𑌂𑌦𑍍𑌵𑌵𑌿𑌡𑌂𑌬𑌿𑌨𑌿 𑌸𑍍𑌤𑌨𑌤𑌟𑍇 𑌮𑍁𑌕𑍍𑌤𑌾𑌕𑍁𑌥𑌾𑌡𑌂𑌬𑌰𑌮𑍍 ॥4𑍯॥

𑌪𑍍𑌰𑍇𑌂𑌖𑌂𑌤𑌃 𑌶𑌰𑌦𑌂𑌬𑍁𑌦𑌾 𑌇𑌵 𑌶𑌨𑍈𑌃 𑌪𑍍𑌰𑍇𑌮𑌾𑌨𑌿𑌲𑍈𑌃 𑌪𑍍𑌰𑍇𑌰𑌿𑌤𑌾
𑌮𑌜𑍍𑌜𑌂𑌤𑍋 𑌮𑌂𑌦𑌨𑌾𑌰𑌿𑌕𑌂𑌠𑌸𑍁𑌷𑌮𑌾𑌸𑌿𑌂𑌧𑍌 𑌮𑍁𑌹𑍁𑌰𑍍𑌮𑌂𑌥𑌰𑌮𑍍 ।
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌤𑌵 𑌸𑍍𑌮𑌿𑌤𑌾𑌂𑌶𑍁𑌨𑌿𑌕𑌰𑌾𑌃 𑌶𑍍𑌯𑌾𑌮𑌾𑌯𑌮𑌾𑌨𑌶𑍍𑌰𑌿𑌯𑍋
𑌨𑍀𑌲𑌾𑌂𑌭𑍋𑌧𑌰𑌨𑍈𑌪𑍁𑌣𑍀𑌂 𑌤𑌤 𑌇𑌤𑍋 𑌨𑌿𑌰𑍍𑌨𑌿𑌦𑍍𑌰𑌯𑌂𑌤𑍍𑌯𑌂𑌜𑌸𑌾 ॥50॥

𑌵𑍍𑌯𑌾𑌪𑌾𑌰𑌂 𑌚𑌤𑍁𑌰𑌾𑌨𑌨𑍈𑌕𑌵𑌿𑌹𑍃𑌤𑍌 𑌵𑍍𑌯𑌾𑌕𑍁𑌰𑍍𑌵𑌤𑍀 𑌕𑍁𑌰𑍍𑌵𑌤𑍀
𑌰𑍁𑌦𑍍𑌰𑌾𑌕𑍍𑌷𑌗𑍍𑌰𑌹𑌣𑌂 𑌮𑌹𑍇𑌶𑌿 𑌸𑌤𑌤𑌂 𑌵𑌾𑌗𑍂𑌰𑍍𑌮𑌿𑌕𑌲𑍍𑌲𑍋𑌲𑌿𑌤𑌾 ।
𑌉𑌤𑍍𑌫𑍁𑌲𑍍𑌲𑌂 𑌧𑌵𑌲𑌾𑌰𑌵𑌿𑌂𑌦𑌮𑌧𑌰𑍀𑌕𑍃𑌤𑍍𑌯 𑌸𑍍𑌫𑍁𑌰𑌂𑌤𑍀 𑌸𑌦𑌾
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌸𑌰𑌸𑍍𑌵𑌤𑍀 𑌵𑌿𑌜𑌯𑌤𑍇 𑌤𑍍𑌵𑌨𑍍𑌮𑌂𑌦𑌹𑌾𑌸𑌪𑍍𑌰𑌭𑌾 ॥51॥

𑌕𑌰𑍍𑌪𑍂𑌰𑌦𑍍𑌯𑍁𑌤𑌿𑌤𑌸𑍍𑌕𑌰𑍇𑌣 𑌮𑌹𑌸𑌾 𑌕𑌲𑍍𑌮𑌾𑌷𑌯𑌤𑍍𑌯𑌾𑌨𑌨𑌂
𑌶𑍍𑌰𑍀𑌕𑌾𑌂𑌚𑍀𑌪𑍁𑌰𑌨𑌾𑌯𑌿𑌕𑍇 𑌪𑌤𑌿𑌰𑌿𑌵 𑌶𑍍𑌰𑍀𑌮𑌂𑌦𑌹𑌾𑌸𑍋𑌽𑌪𑌿 𑌤𑍇 ।
𑌆𑌲𑌿𑌂𑌗𑌤𑍍𑌯𑌤𑌿𑌪𑍀𑌵𑌰𑌾𑌂 𑌸𑍍𑌤𑌨𑌤𑌟𑍀𑌂 𑌬𑌿𑌂𑌬𑌾𑌧𑌰𑌂 𑌚𑍁𑌂𑌬𑌤𑌿
𑌪𑍍𑌰𑍌𑌢𑌂 𑌰𑌾𑌗𑌭𑌰𑌂 𑌵𑍍𑌯𑌨𑌕𑍍𑌤𑌿 𑌮𑌨𑌸𑍋 𑌧𑍈𑌰𑍍𑌯𑌂 𑌧𑍁𑌨𑍀𑌤𑍇𑌤𑌰𑌾𑌮𑍍 ॥52॥

𑌵𑍈𑌶𑌦𑍍𑌯𑍇𑌨 𑌚 𑌵𑌿𑌶𑍍𑌵𑌤𑌾𑌪𑌹𑌰𑌣𑌕𑍍𑌰𑍀𑌡𑌾𑌪𑌟𑍀𑌯𑌸𑍍𑌤𑌯𑌾
𑌪𑌾𑌂𑌡𑌿𑌤𑍍𑌯𑍇𑌨 𑌪𑌚𑍇𑌲𑌿𑌮𑍇𑌨 𑌜𑌗𑌤𑌾𑌂 𑌨𑍇𑌤𑍍𑌰𑍋𑌤𑍍𑌸𑌵𑍋𑌤𑍍𑌪𑌾𑌦𑍇𑌨 ।
𑌕𑌾𑌮𑌾𑌕𑍍𑌷𑌿 𑌸𑍍𑌮𑌿𑌤𑌕𑌂𑌦𑌲𑍈𑌸𑍍𑌤𑌵 𑌤𑍁𑌲𑌾𑌮𑌾𑌰𑍋𑌢𑍁𑌮𑍁𑌦𑍍𑌯𑍋𑌗𑌿𑌨𑍀
𑌜𑍍𑌯𑍋𑌤𑍍𑌸𑍍𑌨𑌾𑌸𑍌 𑌜𑌲𑌰𑌾𑌶𑌿𑌪𑍋𑌷𑌣𑌤𑌯𑌾 𑌦𑍂𑌷𑍍𑌯𑌾𑌂 𑌪𑍍𑌰𑌪𑌨𑍍𑌨𑌾 𑌦𑌶𑌾𑌮𑍍 ॥53॥

𑌲𑌾𑌵𑌣𑍍𑌯𑌾𑌂𑌬𑍁𑌜𑌿𑌨𑍀𑌮𑍃𑌣𑌾𑌲𑌵𑌲𑌯𑍈𑌃 𑌶𑍃𑌂𑌗𑌾𑌰𑌗𑌂𑌧𑌦𑍍𑌵𑌿𑌪-
𑌗𑍍𑌰𑌾𑌮𑌣𑍍𑌯𑌃 𑌶𑍍𑌰𑍁𑌤𑌿𑌚𑌾𑌮𑌰𑍈𑌸𑍍𑌤𑌰𑍁𑌣𑌿𑌮𑌸𑍍𑌵𑌾𑌰𑌾𑌜𑍍𑌯𑌤𑍇𑌜𑍋𑌂𑌕𑍁𑌰𑍈𑌃 ।
𑌆𑌨𑌂𑌦𑌾𑌮𑍃𑌤𑌸𑌿𑌂𑌧𑍁𑌵𑍀𑌚𑌿𑌪𑍃𑌷𑌤𑍈𑌰𑌾𑌸𑍍𑌯𑌾𑌬𑍍𑌜𑌹𑌂𑌸𑍈𑌸𑍍𑌤𑌵
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌮𑌥𑌾𑌨 𑌮𑌂𑌦𑌹𑌸𑌿𑌤𑍈𑌰𑍍𑌮𑌤𑍍𑌕𑌂 𑌮𑌨𑌃𑌕𑌲𑍍𑌮𑌷𑌮𑍍 ॥54॥

𑌉𑌤𑍍𑌤𑍁𑌂𑌗𑌸𑍍𑌤𑌨𑌮𑌂𑌡𑌲𑍀𑌪𑌰𑌿𑌚𑌲𑌨𑍍𑌮𑌾𑌣𑌿𑌕𑍍𑌯𑌹𑌾𑌰𑌚𑍍𑌛𑌟𑌾-
𑌚𑌂𑌚𑌚𑍍𑌛𑍋𑌣𑌿𑌮𑌪𑍁𑌂𑌜𑌮𑌧𑍍𑌯𑌸𑌰𑌣𑌿𑌂 𑌮𑌾𑌤𑌃 𑌪𑌰𑌿𑌷𑍍𑌕𑍁𑌰𑍍𑌵𑌤𑍀 ।
𑌯𑌾 𑌵𑍈𑌦𑌗𑍍𑌧𑍍𑌯𑌮𑍁𑌪𑍈𑌤𑌿 𑌶𑌂𑌕𑌰𑌜𑌟𑌾𑌕𑌾𑌂𑌤𑌾𑌰𑌵𑌾𑌟𑍀𑌪𑌤-
𑌤𑍍𑌸𑍍𑌵𑌰𑍍𑌵𑌾𑌪𑍀𑌪𑌯𑌸𑌃 𑌸𑍍𑌮𑌿𑌤𑌦𑍍𑌯𑍁𑌤𑌿𑌰𑌸𑍌 𑌕𑌾𑌮𑌾𑌕𑍍𑌷𑌿 𑌤𑍇 𑌮𑌂𑌜𑍁𑌲𑌾 ॥55॥

𑌸𑌨𑍍𑌨𑌾𑌮𑍈𑌕𑌜𑍁𑌷𑌾 𑌜𑌨𑍇𑌨 𑌸𑍁𑌲𑌭𑌂 𑌸𑌂𑌸𑍂𑌚𑌯𑌂𑌤𑍀 𑌶𑌨𑍈-
𑌰𑍁𑌤𑍍𑌤𑍁𑌂𑌗𑌸𑍍𑌯 𑌚𑌿𑌰𑌾𑌦𑌨𑍁𑌗𑍍𑌰𑌹𑌤𑌰𑍋𑌰𑍁𑌤𑍍𑌪𑌤𑍍𑌸𑍍𑌯𑌮𑌾𑌨𑌂 𑌫𑌲𑌮𑍍 ।
𑌪𑍍𑌰𑌾𑌥𑌮𑍍𑌯𑍇𑌨 𑌵𑌿𑌕𑌸𑍍𑌵𑌰𑌾 𑌕𑍁𑌸𑍁𑌮𑌵𑌤𑍍𑌪𑍍𑌰𑌾𑌗𑌲𑍍𑌭𑍍𑌯𑌮𑌭𑍍𑌯𑍇𑌯𑍁𑌷𑍀
𑌕𑌾𑌮𑌾𑌕𑍍𑌷𑌿 𑌸𑍍𑌮𑌿𑌤𑌚𑌾𑌤𑍁𑌰𑍀 𑌤𑌵 𑌮𑌮 𑌕𑍍𑌷𑍇𑌮𑌂𑌕𑌰𑍀 𑌕𑌲𑍍𑌪𑌤𑌾𑌮𑍍 ॥56॥

𑌧𑌾𑌨𑍁𑌷𑍍𑌕𑌾𑌗𑍍𑌰𑌸𑌰𑌸𑍍𑌯 𑌲𑍋𑌲𑌕𑍁𑌟𑌿𑌲𑌭𑍍𑌰𑍂𑌲𑍇𑌖𑌯𑌾 𑌬𑌿𑌭𑍍𑌰𑌤𑍋
𑌲𑍀𑌲𑌾𑌲𑍋𑌕𑌶𑌿𑌲𑍀𑌮𑍁𑌖𑌂 𑌨𑌵𑌵𑌯𑌸𑍍𑌸𑌾𑌮𑍍𑌰𑌾𑌜𑍍𑌯𑌲𑌕𑍍𑌷𑍍𑌮𑍀𑌪𑍁𑌷𑌃 ।
𑌜𑍇𑌤𑍁𑌂 𑌮𑌨𑍍𑌮𑌥𑌮𑌰𑍍𑌦𑌿𑌨𑌂 𑌜𑌨𑌨𑌿 𑌤𑍇 𑌕𑌾𑌮𑌾𑌕𑍍𑌷𑌿 𑌹𑌾𑌸𑌃 𑌸𑍍𑌵𑌯𑌂
𑌵𑌲𑍍𑌗𑍁𑌰𑍍𑌵𑌿𑌭𑍍𑌰𑌮𑌭𑍂𑌭𑍃𑌤𑍋 𑌵𑌿𑌤𑌨𑍁𑌤𑍇 𑌸𑍇𑌨𑌾𑌪𑌤𑌿𑌪𑍍𑌰𑌕𑍍𑌰𑌿𑌯𑌾𑌮𑍍 ॥5𑍭॥

𑌯𑌨𑍍𑌨𑌾𑌕𑌂𑌪𑌤 𑌕𑌾𑌲𑌕𑍂𑌟𑌕𑌬𑌲𑍀𑌕𑌾𑌰𑍇 𑌚𑍁𑌚𑍁𑌂𑌬𑍇 𑌨 𑌯𑌦𑍍-
𑌗𑍍𑌲𑌾𑌨𑍍𑌯𑌾 𑌚𑌕𑍍𑌷𑍁𑌷𑌿 𑌰𑍂𑌷𑌿𑌤𑌾𑌨𑌲𑌶𑌿𑌖𑍇 𑌰𑍁𑌦𑍍𑌰𑌸𑍍𑌯 𑌤𑌤𑍍𑌤𑌾𑌦𑍃𑌶𑌮𑍍 ।
𑌚𑍇𑌤𑍋 𑌯𑌤𑍍𑌪𑍍𑌰𑌸𑌭𑌂 𑌸𑍍𑌮𑌰𑌜𑍍𑌵𑌰𑌶𑌿𑌖𑌿𑌜𑍍𑌵𑌾𑌲𑍇𑌨 𑌲𑍇𑌲𑌿𑌹𑍍𑌯𑌤𑍇
𑌤𑌤𑍍𑌕𑌾𑌮𑌾𑌕𑍍𑌷𑌿 𑌤𑌵 𑌸𑍍𑌮𑌿𑌤𑌾𑌂𑌶𑍁𑌕𑌲𑌿𑌕𑌾𑌹𑍇𑌲𑌾𑌭𑌵𑌂 𑌪𑍍𑌰𑌾𑌭𑌵𑌮𑍍 ॥5𑍮॥

𑌸𑌂𑌭𑌿𑌨𑍍𑌨𑍇𑌵 𑌸𑍁𑌪𑌰𑍍𑌵𑌲𑍋𑌕𑌤𑌟𑌿𑌨𑍀 𑌵𑍀𑌚𑍀𑌚𑌯𑍈𑌰𑍍𑌯𑌾𑌮𑍁𑌨𑍈𑌃
𑌸𑌂𑌮𑌿𑌶𑍍𑌰𑍇𑌵 𑌶𑌶𑌾𑌂𑌕𑌦𑍀𑌪𑍍𑌤𑌿𑌲𑌹𑌰𑍀 𑌨𑍀𑌲𑍈𑌰𑍍𑌮𑌹𑌾𑌨𑍀𑌰𑌦𑍈𑌃 ।
𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌰𑌿𑌤𑌾 𑌤𑌵 𑌸𑍍𑌮𑌿𑌤𑌰𑍁𑌚𑌿𑌃 𑌕𑌾𑌲𑌾𑌂𑌜𑌨𑌸𑍍𑌪𑌰𑍍𑌧𑌿𑌨𑌾
𑌕𑌾𑌲𑌿𑌮𑍍𑌨𑌾 𑌕𑌚𑌰𑍋𑌚𑌿𑌷𑌾𑌂 𑌵𑍍𑌯𑌤𑌿𑌕𑌰𑍇 𑌕𑌾𑌂𑌚𑌿𑌦𑍍𑌦𑌶𑌾𑌮𑌶𑍍𑌨𑍁𑌤𑍇 ॥5𑍯॥

𑌜𑌾𑌨𑍀𑌮𑍋 𑌜𑌗𑌦𑍀𑌶𑍍𑌵𑌰𑌪𑍍𑌰𑌣𑌯𑌿𑌨𑌿 𑌤𑍍𑌵𑌨𑍍𑌮𑌂𑌦𑌹𑌾𑌸𑌪𑍍𑌰𑌭𑌾𑌂
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌸𑌰𑍋𑌜𑌿𑌨𑍀𑌮𑌭𑌿𑌨𑌵𑌾𑌮𑍇𑌷𑌾 𑌯𑌤𑌃 𑌸𑌰𑍍𑌵𑌦𑌾 ।
𑌆𑌸𑍍𑌯𑍇𑌂𑌦𑍋𑌰𑌵𑌲𑍋𑌕𑍇𑌨 𑌪𑌶𑍁𑌪𑌤𑍇𑌰𑌭𑍍𑌯𑍇𑌤𑌿 𑌸𑌂𑌫𑍁𑌲𑍍𑌲𑌤𑌾𑌂
𑌤𑌂𑌦𑍍𑌰𑌾𑌲𑍁𑌸𑍍𑌤𑌦𑌭𑌾𑌵 𑌏𑌵 𑌤𑌨𑍁𑌤𑍇 𑌤𑌦𑍍𑌵𑍈𑌪𑌰𑍀𑌤𑍍𑌯𑌕𑍍𑌰𑌮𑌮𑍍 ॥60॥

𑌯𑌾𑌂𑌤𑍀 𑌲𑍋𑌹𑌿𑌤𑌿𑌮𑌾𑌨𑌮𑌭𑍍𑌰𑌤𑌟𑌿𑌨𑍀 𑌧𑌾𑌤𑍁𑌚𑍍𑌛𑌟𑌾𑌕𑌰𑍍𑌦𑌮𑍈𑌃
𑌭𑌾𑌂𑌤𑍀 𑌬𑌾𑌲𑌗𑌭𑌸𑍍𑌤𑌿𑌮𑌾𑌲𑌿𑌕𑌿𑌰𑌣𑍈𑌰𑍍𑌮𑍇𑌘𑌾𑌵𑌲𑍀 𑌶𑌾𑌰𑌦𑍀 ।
𑌬𑌿𑌂𑌬𑍋𑌷𑍍𑌠𑌦𑍍𑌯𑍁𑌤𑌿𑌪𑍁𑌂𑌜𑌚𑍁𑌂𑌬𑌨𑌕𑌲𑌾𑌶𑍋𑌣𑌾𑌯𑌮𑌾𑌨𑍇𑌨 𑌤𑍇
𑌕𑌾𑌮𑌾𑌕𑍍𑌷𑌿 𑌸𑍍𑌮𑌿𑌤𑌰𑍋𑌚𑌿𑌷𑌾 𑌸𑌮𑌦𑌶𑌾𑌮𑌾𑌰𑍋𑌢𑍁𑌮𑌾𑌕𑌾𑌂𑌕𑍍𑌷𑌤𑍇 ॥61॥

𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌮𑍁𑌖𑍇𑌂𑌦𑍁𑌭𑍂𑌷𑌣𑌮𑌿𑌦𑌂 𑌮𑌂𑌦𑌸𑍍𑌮𑌿𑌤𑌂 𑌤𑌾𑌵𑌕𑌂
𑌨𑍇𑌤𑍍𑌰𑌾𑌨𑌂𑌦𑌕𑌰𑌂 𑌤𑌥𑌾 𑌹𑌿𑌮𑌕𑌰𑍋 𑌗𑌚𑍍𑌛𑍇𑌦𑍍𑌯𑌥𑌾 𑌤𑌿𑌗𑍍𑌮𑌤𑌾𑌮𑍍 ।
𑌶𑍀𑌤𑌂 𑌦𑍇𑌵𑌿 𑌤𑌥𑌾 𑌯𑌥𑌾 𑌹𑌿𑌮𑌜𑌲𑌂 𑌸𑌂𑌤𑌾𑌪𑌮𑍁𑌦𑍍𑌰𑌾𑌸𑍍𑌪𑌦𑌂
𑌶𑍍𑌵𑍇𑌤𑌂 𑌕𑌿𑌂𑌚 𑌤𑌥𑌾 𑌯𑌥𑌾 𑌮𑌲𑌿𑌨𑌤𑌾𑌂 𑌧𑌤𑍍𑌤𑍇 𑌚 𑌮𑍁𑌕𑍍𑌤𑌾𑌮𑌣𑌿𑌃 ॥62॥

𑌤𑍍𑌵𑌨𑍍𑌮𑌂𑌦𑌸𑍍𑌮𑌿𑌤𑌮𑌂𑌜𑌰𑍀𑌂 𑌪𑍍𑌰𑌸𑍃𑌮𑌰𑌾𑌂 𑌕𑌾𑌮𑌾𑌕𑍍𑌷𑌿 𑌚𑌂𑌦𑍍𑌰𑌾𑌤𑌪𑌂
𑌸𑌂𑌤𑌃 𑌸𑌂𑌤𑌤𑌮𑌾𑌮𑌨𑌂𑌤𑍍𑌯𑌮𑌲𑌤𑌾 𑌤𑌲𑍍𑌲𑌕𑍍𑌷𑌣𑌂 𑌲𑌕𑍍𑌷𑍍𑌯𑌤𑍇 ।
𑌅𑌸𑍍𑌮𑌾𑌕𑌂 𑌨 𑌧𑍁𑌨𑍋𑌤𑌿 𑌤𑌾𑌪𑌕𑌮𑌧𑌿𑌕𑌂 𑌧𑍂𑌨𑍋𑌤𑌿 𑌨𑌾𑌭𑍍𑌯𑌂𑌤𑌰𑌂
𑌧𑍍𑌵𑌾𑌂𑌤𑌂 𑌤𑌤𑍍𑌖𑌲𑍁 𑌦𑍁𑌃𑌖𑌿𑌨𑍋 𑌵𑌯𑌮𑌿𑌦𑌂 𑌕𑍇𑌨𑍋𑌤𑌿 𑌨𑍋 𑌵𑌿𑌦𑍍𑌮𑌹𑍇 ॥63॥

𑌨𑌮𑍍𑌰𑌸𑍍𑌯 𑌪𑍍𑌰𑌣𑌯𑌪𑍍𑌰𑌰𑍂𑌢𑌕𑌲𑌹𑌚𑍍𑌛𑍇𑌦𑌾𑌯 𑌪𑌾𑌦𑌾𑌬𑍍𑌜𑌯𑍋𑌃
𑌮𑌂𑌦𑌂 𑌚𑌂𑌦𑍍𑌰𑌕𑌿𑌶𑍋𑌰𑌶𑍇𑌖𑌰𑌮𑌣𑍇𑌃 𑌕𑌾𑌮𑌾𑌕𑍍𑌷𑌿 𑌰𑌾𑌗𑍇𑌣 𑌤𑍇 ।
𑌬𑌂𑌧𑍂𑌕𑌪𑍍𑌰𑌸𑌵𑌶𑍍𑌰𑌿𑌯𑌂 𑌜𑌿𑌤𑌵𑌤𑍋 𑌬𑌂𑌹𑍀𑌯𑌸𑍀𑌂 𑌤𑌾𑌦𑍃𑌶𑍀𑌂
𑌬𑌿𑌂𑌬𑍋𑌷𑍍𑌠𑌸𑍍𑌯 𑌰𑍁𑌚𑌿𑌂 𑌨𑌿𑌰𑌸𑍍𑌯 𑌹𑌸𑌿𑌤𑌜𑍍𑌯𑍋𑌤𑍍𑌸𑍍𑌨𑌾 𑌵𑌯𑌸𑍍𑌯𑌾𑌯𑌤𑍇 ॥64॥

𑌮𑍁𑌕𑍍𑌤𑌾𑌨𑌾𑌂 𑌪𑌰𑌿𑌮𑍋𑌚𑌨𑌂 𑌵𑌿𑌦𑌧𑌤𑌸𑍍𑌤𑌤𑍍𑌪𑍍𑌰𑍀𑌤𑌿𑌨𑌿𑌷𑍍𑌪𑌾𑌦𑌿𑌨𑍀
𑌭𑍂𑌯𑍋 𑌦𑍂𑌰𑌤 𑌏𑌵 𑌧𑍂𑌤𑌮𑌰𑍁𑌤𑌸𑍍𑌤𑌤𑍍𑌪𑌾𑌲𑌨𑌂 𑌤𑌨𑍍𑌵𑌤𑍀 ।
𑌉𑌦𑍍𑌭𑍂𑌤𑌸𑍍𑌯 𑌜𑌲𑌾𑌂𑌤𑌰𑌾𑌦𑌵𑌿𑌰𑌤𑌂 𑌤𑌦𑍍𑌦𑍂𑌰𑌤𑌾𑌂 𑌜𑌗𑍍𑌮𑍁𑌷𑍀
𑌕𑌾𑌮𑌾𑌕𑍍𑌷𑌿 𑌸𑍍𑌮𑌿𑌤𑌮𑌂𑌜𑌰𑍀 𑌤𑌵 𑌕𑌥𑌂 𑌕𑌂𑌬𑍋𑌸𑍍𑌤𑍁𑌲𑌾𑌮𑌶𑍍𑌨𑍁𑌤𑍇 ॥65॥

𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌤𑌵 𑌸𑍍𑌮𑌿𑌤𑌦𑍍𑌯𑍁𑌤𑌿𑌝𑌰𑍀𑌵𑍈𑌦𑌗𑍍𑌧𑍍𑌯𑌲𑍀𑌲𑌾𑌯𑌿𑌤𑌂
𑌪𑌶𑍍𑌯𑌂𑌤𑍋𑌽𑌪𑌿 𑌨𑌿𑌰𑌂𑌤𑌰𑌂 𑌸𑍁𑌵𑌿𑌮𑌲𑌂𑌮𑌨𑍍𑌯𑌾 𑌜𑌗𑌨𑍍𑌮𑌂𑌡𑌲𑍇 ।
𑌲𑍋𑌕𑌂 𑌹𑌾𑌸𑌯𑌿𑌤𑍁𑌂 𑌕𑌿𑌮𑌰𑍍𑌥𑌮𑌨𑌿𑌶𑌂 𑌪𑍍𑌰𑌾𑌕𑌾𑌶𑍍𑌯𑌮𑌾𑌤𑌨𑍍𑌵𑌤𑍇
𑌮𑌂𑌦𑌾𑌕𑍍𑌷𑌂 𑌵𑌿𑌰𑌹𑌯𑍍𑌯 𑌮𑌂𑌗𑌲𑌤𑌰𑌂 𑌮𑌂𑌦𑌾𑌰𑌚𑌂𑌦𑍍𑌰𑌾𑌦𑌯𑌃 ॥66॥

𑌕𑍍𑌷𑍀𑌰𑌾𑌬𑍍𑌧𑍇𑌰𑌪𑌿 𑌶𑍈𑌲𑌰𑌾𑌜𑌤𑌨𑌯𑍇 𑌤𑍍𑌵𑌨𑍍𑌮𑌂𑌦𑌹𑌾𑌸𑌸𑍍𑌯 𑌚
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌵𑌲𑌕𑍍𑌷𑌿𑌮𑍋𑌦𑌯𑌨𑌿𑌧𑍇𑌃 𑌕𑌿𑌂𑌚𑌿𑌦𑍍𑌭𑌿𑌦𑌾𑌂 𑌬𑍍𑌰𑍂𑌮𑌹𑍇 ।
𑌏𑌕𑌸𑍍𑌮𑍈 𑌪𑍁𑌰𑍁𑌷𑌾𑌯 𑌦𑍇𑌵𑌿 𑌸 𑌦𑌦𑍌 𑌲𑌕𑍍𑌷𑍍𑌮𑍀𑌂 𑌕𑌦𑌾𑌚𑌿𑌤𑍍𑌪𑍁𑌰𑌾
𑌸𑌰𑍍𑌵𑍇𑌭𑍍𑌯𑍋𑌽𑌪𑌿 𑌦𑌦𑌾𑌤𑍍𑌯𑌸𑍌 𑌤𑍁 𑌸𑌤𑌤𑌂 𑌲𑌕𑍍𑌷𑍍𑌮𑍀𑌂 𑌚 𑌵𑌾𑌗𑍀𑌶𑍍𑌵𑌰𑍀𑌮𑍍 ॥6𑍭॥

𑌶𑍍𑌰𑍀𑌕𑌾𑌂𑌚𑍀𑌪𑍁𑌰𑌰𑌤𑍍𑌨𑌦𑍀𑌪𑌕𑌲𑌿𑌕𑍇 𑌤𑌾𑌨𑍍𑌯𑍇𑌵 𑌮𑍇𑌨𑌾𑌤𑍍𑌮𑌜𑍇
𑌚𑌾𑌕𑍋𑌰𑌾𑌣𑌿 𑌕𑍁𑌲𑌾𑌨𑌿 𑌦𑍇𑌵𑌿 𑌸𑍁𑌤𑌰𑌾𑌂 𑌧𑌨𑍍𑌯𑌾𑌨𑌿 𑌮𑌨𑍍𑌯𑌾𑌮𑌹𑍇 ।
𑌕𑌂𑌪𑌾𑌤𑍀𑌰𑌕𑍁𑌟𑍁𑌂𑌬𑌚𑌂𑌕𑍍𑌰𑌮𑌕𑌲𑌾𑌚𑍁𑌂𑌚𑍂𑌨𑌿 𑌚𑌂𑌚𑍂𑌪𑍁𑌟𑍈𑌃
𑌨𑌿𑌤𑍍𑌯𑌂 𑌯𑌾𑌨𑌿 𑌤𑌵 𑌸𑍍𑌮𑌿𑌤𑍇𑌂𑌦𑍁𑌮𑌹𑌸𑌾𑌮𑌾𑌸𑍍𑌵𑌾𑌦𑌮𑌾𑌤𑌨𑍍𑌵𑌤𑍇 ॥6𑍮॥

𑌶𑍈𑌤𑍍𑌯𑌪𑍍𑌰𑌕𑍍𑌰𑌮𑌮𑌾𑌶𑍍𑌰𑌿𑌤𑍋𑌽𑌪𑌿 𑌨𑌮𑌤𑌾𑌂 𑌜𑌾𑌡𑍍𑌯𑌪𑍍𑌰𑌥𑌾𑌂 𑌧𑍂𑌨𑌯𑌨𑍍
𑌨𑍈𑌰𑍍𑌮𑌲𑍍𑌯𑌂 𑌪𑌰𑌮𑌂 𑌗𑌤𑍋𑌽𑌪𑌿 𑌗𑌿𑌰𑌿𑌶𑌂 𑌰𑌾𑌗𑌾𑌕𑍁𑌲𑌂 𑌚𑌾𑌰𑌯𑌨𑍍 ।
𑌲𑍀𑌲𑌾𑌲𑌾𑌪𑌪𑍁𑌰𑌸𑍍𑌸𑌰𑍋𑌽𑌪𑌿 𑌸𑌤𑌤𑌂 𑌵𑌾𑌚𑌂𑌯𑌮𑌾𑌨𑍍𑌪𑍍𑌰𑍀𑌣𑌯𑌨𑍍
𑌕𑌾𑌮𑌾𑌕𑍍𑌷𑌿 𑌸𑍍𑌮𑌿𑌤𑌰𑍋𑌚𑌿𑌷𑌾𑌂 𑌤𑌵 𑌸𑌮𑍁𑌲𑍍𑌲𑌾𑌸𑌃 𑌕𑌥𑌂 𑌵𑌰𑍍𑌣𑍍𑌯𑌤𑍇 ॥6𑍯॥

𑌶𑍍𑌰𑍋𑌣𑍀𑌚𑌂𑌚𑌲𑌮𑍇𑌖𑌲𑌾𑌮𑍁𑌖𑌰𑌿𑌤𑌂 𑌲𑍀𑌲𑌾𑌗𑌤𑌂 𑌮𑌂𑌥𑌰𑌂
𑌭𑍍𑌰𑍂𑌵𑌲𑍍𑌲𑍀𑌚𑌲𑌨𑌂 𑌕𑌟𑌾𑌕𑍍𑌷𑌵𑌲𑌨𑌂 𑌮𑌂𑌦𑌾𑌕𑍍𑌷𑌵𑍀𑌕𑍍𑌷𑌾𑌚𑌣𑌮𑍍 ।
𑌯𑌦𑍍𑌵𑍈𑌦𑌗𑍍𑌧𑍍𑌯𑌮𑍁𑌖𑍇𑌨 𑌮𑌨𑍍𑌮𑌥𑌰𑌿𑌪𑍁𑌂 𑌸𑌂𑌮𑍋𑌹𑌯𑌂𑌤𑍍𑌯𑌂𑌜𑌸𑌾
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌤𑌵 𑌸𑍍𑌮𑌿𑌤𑌾𑌯 𑌸𑌤𑌤𑌂 𑌤𑌸𑍍𑌮𑍈 𑌨𑌮𑍍𑌸𑌕𑍁𑌰𑍍𑌮𑌹𑍇 ॥𑍭0॥

𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌮𑌨𑍋𑌜𑍍𑌞𑌮𑌂𑌦𑌹𑌸𑌿𑌤𑌜𑍍𑌯𑍋𑌤𑌿𑌷𑍍𑌪𑍍𑌰𑌰𑍋𑌹𑍇 𑌤𑌵
𑌸𑍍𑌫𑍀𑌤𑌶𑍍𑌵𑍇𑌤𑌿𑌮𑌸𑌾𑌰𑍍𑌵𑌭𑍌𑌮𑌸𑌰𑌣𑌿𑌪𑍍𑌰𑌾𑌗𑌲𑍍𑌭𑍍𑌯𑌮𑌭𑍍𑌯𑍇𑌯𑍁𑌷𑌿 ।
𑌚𑌂𑌦𑍍𑌰𑍋𑌽𑌯𑌂 𑌯𑍁𑌵𑌰𑌾𑌜𑌤𑌾𑌂 𑌕𑌲𑌯𑌤𑍇 𑌚𑍇𑌟𑍀𑌧𑍁𑌰𑌂 𑌚𑌂𑌦𑍍𑌰𑌿𑌕𑌾
𑌶𑍁𑌦𑍍𑌧𑌾 𑌸𑌾 𑌚 𑌸𑍁𑌧𑌾𑌝𑌰𑍀 𑌸𑌹𑌚𑌰𑍀𑌸𑌾𑌧𑌰𑍍𑌮𑍍𑌯𑌮𑌾𑌲𑌂𑌬𑌤𑍇 ॥𑍭1॥

𑌜𑍍𑌯𑍋𑌤𑍍𑌸𑍍𑌨𑌾 𑌕𑌿𑌂 𑌤𑌨𑍁𑌤𑍇 𑌫𑌲𑌂 𑌤𑌨𑍁𑌮𑌤𑌾𑌮𑍌𑌷𑍍𑌣𑍍𑌯𑌪𑍍𑌰𑌶𑌾𑌂𑌤𑌿𑌂 𑌵𑌿𑌨𑌾
𑌤𑍍𑌵𑌨𑍍𑌮𑌂𑌦𑌸𑍍𑌮𑌿𑌤𑌰𑍋𑌚𑌿𑌷𑌾 𑌤𑌨𑍁𑌮𑌤𑌾𑌂 𑌕𑌾𑌮𑌾𑌕𑍍𑌷𑌿 𑌰𑍋𑌚𑌿𑌷𑍍𑌣𑍁𑌨𑌾 ।
𑌸𑌂𑌤𑌾𑌪𑍋 𑌵𑌿𑌨𑌿𑌵𑌾𑌰𑍍𑌯𑌤𑍇 𑌨𑌵𑌵𑌯𑌃𑌪𑍍𑌰𑌾𑌚𑍁𑌰𑍍𑌯𑌮𑌂𑌕𑍂𑌰𑍍𑌯𑌤𑍇
𑌸𑍌𑌂𑌦𑌰𑍍𑌯𑌂 𑌪𑌰𑌿𑌪𑍂𑌰𑍍𑌯𑌤𑍇 𑌜𑌗𑌤𑌿 𑌸𑌾 𑌕𑍀𑌰𑍍𑌤𑌿𑌶𑍍𑌚 𑌸𑌂𑌚𑌾𑌰𑍍𑌯𑌤𑍇 ॥𑍭2॥

𑌵𑍈𑌮𑌲𑍍𑌯𑌂 𑌕𑍁𑌮𑍁𑌦𑌶𑍍𑌰𑌿𑌯𑌾𑌂 𑌹𑌿𑌮𑌰𑍁𑌚𑌃 𑌕𑌾𑌂𑌤𑍍𑌯𑍈𑌵 𑌸𑌂𑌧𑍁𑌕𑍍𑌷𑍍𑌯𑌤𑍇
𑌜𑍍𑌯𑍋𑌤𑍍𑌸𑍍𑌨𑌾𑌰𑍋𑌚𑌿𑌰𑌪𑌿 𑌪𑍍𑌰𑌦𑍋𑌷𑌸𑌮𑌯𑌂 𑌪𑍍𑌰𑌾𑌪𑍍𑌯𑍈𑌵 𑌸𑌂𑌪𑌦𑍍𑌯𑌤𑍇 ।
𑌸𑍍𑌵𑌚𑍍𑌛𑌤𑍍𑌵𑌂 𑌨𑌵𑌮𑍌𑌕𑍍𑌤𑌿𑌕𑌸𑍍𑌯 𑌪𑌰𑌮𑌂 𑌸𑌂𑌸𑍍𑌕𑌾𑌰𑌤𑍋 𑌦𑍃𑌶𑍍𑌯𑌤𑍇
𑌕𑌾𑌮𑌾𑌕𑍍𑌷𑍍𑌯𑌾𑌃 𑌸𑍍𑌮𑌿𑌤𑌦𑍀𑌧𑌿𑌤𑍇𑌰𑍍𑌵𑌿𑌶𑌦𑌿𑌮𑌾 𑌨𑍈𑌸𑌰𑍍𑌗𑌿𑌕𑍋 𑌭𑌾𑌸𑌤𑍇 ॥𑍭3॥

𑌪𑍍𑌰𑌾𑌕𑌾𑌶𑍍𑌯𑌂 𑌪𑌰𑌮𑍇𑌶𑍍𑌵𑌰𑌪𑍍𑌰𑌣𑌯𑌿𑌨𑌿 𑌤𑍍𑌵𑌨𑍍𑌮𑌂𑌦𑌹𑌾𑌸𑌶𑍍𑌰𑌿𑌯𑌃
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌮𑌮 𑌕𑍍𑌷𑌿𑌣𑍋𑌤𑍁 𑌮𑌮𑌤𑌾𑌵𑍈𑌚𑌕𑍍𑌷𑌣𑍀𑌮𑌕𑍍𑌷𑌯𑌾𑌮𑍍 ।
𑌯𑌦𑍍𑌭𑍀𑌤𑍍𑌯𑍇𑌵 𑌨𑌿𑌲𑍀𑌯𑌤𑍇 𑌹𑌿𑌮𑌕𑌰𑍋 𑌮𑍇𑌘𑍋𑌦𑌰𑍇 𑌶𑍁𑌕𑍍𑌤𑌿𑌕𑌾-
𑌗𑌰𑍍𑌭𑍇 𑌮𑍌𑌕𑍍𑌤𑌿𑌕𑌮𑌂𑌡𑌲𑍀 𑌚 𑌸𑌰𑌸𑍀𑌮𑌧𑍍𑌯𑍇 𑌮𑍃𑌣𑌾𑌲𑍀 𑌚 𑌸𑌾 ॥𑍭4॥

𑌹𑍇𑌰𑌂𑌬𑍇 𑌚 𑌗𑍁𑌹𑍇 𑌹𑌰𑍍𑌷𑌭𑌰𑌿𑌤𑌂 𑌵𑌾𑌤𑍍𑌸𑌲𑍍𑌯𑌮𑌂𑌕𑍂𑌰𑌯𑌤𑍍
𑌮𑌾𑌰𑌦𑍍𑌰𑍋𑌹𑌿𑌣𑌿 𑌪𑍂𑌰𑍁𑌷𑍇 𑌸𑌹𑌭𑍁𑌵𑌂 𑌪𑍍𑌰𑍇𑌮𑌾𑌂𑌕𑍁𑌰𑌂 𑌵𑍍𑌯𑌂𑌜𑌯𑌤𑍍 ।
𑌆𑌨𑌮𑍍𑌰𑍇𑌷𑍁 𑌜𑌨𑍇𑌷𑍁 𑌪𑍂𑌰𑍍𑌣𑌕𑌰𑍁𑌣𑌾𑌵𑍈𑌦𑌗𑍍𑌧𑍍𑌯𑌮𑍁𑌤𑍍𑌤𑌾𑌲𑌯𑌤𑍍
𑌕𑌾𑌮𑌾𑌕𑍍𑌷𑌿 𑌸𑍍𑌮𑌿𑌤𑌮𑌂𑌜𑌸𑌾 𑌤𑌵 𑌕𑌥𑌂𑌕𑌾𑌰𑌂 𑌮𑌯𑌾 𑌕𑌥𑍍𑌯𑌤𑍇 ॥𑍭5॥

𑌸𑌂𑌕𑍍𑌰𑍁𑌦𑍍𑌧𑌦𑍍𑌵𑌿𑌜𑌰𑌾𑌜𑌕𑍋𑌽𑌪𑍍𑌯𑌵𑌿𑌰𑌤𑌂 𑌕𑍁𑌰𑍍𑌵𑌂𑌦𑍍𑌵𑌿𑌜𑍈𑌃 𑌸𑌂𑌗𑌮𑌂
𑌵𑌾𑌣𑍀𑌪𑌦𑍍𑌧𑌤𑌿𑌦𑍂𑌰𑌗𑍋𑌽𑌪𑌿 𑌸𑌤𑌤𑌂 𑌤𑌤𑍍𑌸𑌾𑌹𑌚𑌰𑍍𑌯𑌂 𑌵𑌹𑌨𑍍 ।
𑌅𑌶𑍍𑌰𑌾𑌂𑌤𑌂 𑌪𑌶𑍁𑌦𑍁𑌰𑍍𑌲𑌭𑍋𑌽𑌪𑌿 𑌕𑌲𑌯𑌨𑍍𑌪𑌤𑍍𑌯𑍌 𑌪𑌶𑍂𑌨𑌾𑌂 𑌰𑌤𑌿𑌂
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌤𑌵 𑌸𑍍𑌮𑌿𑌤𑌾𑌮𑍃𑌤𑌰𑌸𑌸𑍍𑌯𑌂𑌦𑍋 𑌮𑌯𑌿 𑌸𑍍𑌪𑌂𑌦𑌤𑌾𑌮𑍍 ॥𑍭6॥

𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌮𑌹𑍇𑌶𑍍𑌵𑌰𑍇 𑌨𑌿𑌰𑍁𑌪𑌮𑌪𑍍𑌰𑍇𑌮𑌾𑌂𑌕𑍁𑌰𑌪𑍍𑌰𑌕𑍍𑌰𑌮𑌮𑌂
𑌨𑌿𑌤𑍍𑌯𑌂 𑌯𑌃 𑌪𑍍𑌰𑌕𑌟𑍀𑌕𑌰𑍋𑌤𑌿 𑌸𑌹𑌜𑌾𑌮𑍁𑌨𑍍𑌨𑌿𑌦𑍍𑌰𑌯𑌨𑍍𑌮𑌾𑌧𑍁𑌰𑍀𑌮𑍍 ।
𑌤𑌤𑍍𑌤𑌾𑌦𑍃𑌕𑍍𑌤𑌵 𑌮𑌂𑌦𑌹𑌾𑌸𑌮𑌹𑌿𑌮𑌾 𑌮𑌾𑌤𑌃 𑌕𑌥𑌂 𑌮𑌾𑌨𑌿𑌤𑌾𑌂
𑌤𑌨𑍍𑌮𑍂𑌰𑍍𑌧𑍍𑌨𑌾 𑌸𑍁𑌰𑌨𑌿𑌮𑍍𑌨𑌗𑌾𑌂 𑌚 𑌕𑌲𑌿𑌕𑌾𑌮𑌿𑌂𑌦𑍋𑌶𑍍𑌚 𑌤𑌾𑌂 𑌨𑌿𑌂𑌦𑌤𑌿 ॥𑍭𑍭॥

𑌯𑍇 𑌮𑌾𑌧𑍁𑌰𑍍𑌯𑌵𑌿𑌹𑌾𑌰𑌮𑌂𑌟𑌪𑌭𑍁𑌵𑍋 𑌯𑍇 𑌶𑍈𑌤𑍍𑌯𑌮𑍁𑌦𑍍𑌰𑌾𑌕𑌰𑌾
𑌯𑍇 𑌵𑍈𑌶𑌦𑍍𑌯𑌦𑌶𑌾𑌵𑌿𑌶𑍇𑌷𑌸𑍁𑌭𑌗𑌾𑌸𑍍𑌤𑍇 𑌮𑌂𑌦𑌹𑌾𑌸𑌾𑌂𑌕𑍁𑌰𑌾𑌃 ।
𑌕𑌾𑌮𑌾𑌕𑍍𑌷𑍍𑌯𑌾𑌃 𑌸𑌹𑌜𑌂 𑌗𑍁𑌣𑌤𑍍𑌰𑌯𑌮𑌿𑌦𑌂 𑌪𑌰𑍍𑌯𑌾𑌯𑌤𑌃 𑌕𑍁𑌰𑍍𑌵𑌤𑌾𑌂
𑌵𑌾𑌣𑍀𑌗𑍁𑌂𑌫𑌨𑌡𑌂𑌬𑌰𑍇 𑌚 𑌹𑍃𑌦𑌯𑍇 𑌕𑍀𑌰𑍍𑌤𑌿𑌪𑍍𑌰𑌰𑍋𑌹𑍇 𑌚 𑌮𑍇 ॥𑍭𑍮॥

𑌕𑌾𑌮𑌾𑌕𑍍𑌷𑍍𑌯𑌾 𑌮𑍃𑌦𑍁𑌲𑌸𑍍𑌮𑌿𑌤𑌾𑌂𑌶𑍁𑌨𑌿𑌕𑌰𑌾 𑌦𑌕𑍍𑌷𑌾𑌂𑌤𑌕𑍇 𑌵𑍀𑌕𑍍𑌷𑌣𑍇
𑌮𑌂𑌦𑌾𑌕𑍍𑌷𑌗𑍍𑌰𑌹𑌿𑌲𑌾 𑌹𑌿𑌮𑌦𑍍𑌯𑍁𑌤𑌿𑌮𑌯𑍂𑌖𑌾𑌕𑍍𑌷𑍇𑌪𑌦𑍀𑌕𑍍𑌷𑌾𑌂𑌕𑍁𑌰𑌾𑌃 ।
𑌦𑌾𑌕𑍍𑌷𑍍𑌯𑌂 𑌪𑌕𑍍𑌷𑍍𑌮𑌲𑌯𑌂𑌤𑍁 𑌮𑌾𑌕𑍍𑌷𑌿𑌕𑌗𑍁𑌡𑌦𑍍𑌰𑌾𑌕𑍍𑌷𑌾𑌭𑌵𑌂 𑌵𑌾𑌕𑍍𑌷𑍁 𑌮𑍇
𑌸𑍂𑌕𑍍𑌷𑍍𑌮𑌂 𑌮𑍋𑌕𑍍𑌷𑌪𑌥𑌂 𑌨𑌿𑌰𑍀𑌕𑍍𑌷𑌿𑌤𑍁𑌮𑌪𑌿 𑌪𑍍𑌰𑌕𑍍𑌷𑌾𑌲𑌯𑍇𑌯𑍁𑌰𑍍𑌮𑌨𑌃 ॥𑍭𑍯॥

𑌜𑌾𑌤𑍍𑌯𑌾 𑌶𑍀𑌤𑌶𑍀𑌤𑌲𑌾𑌨𑌿 𑌮𑌧𑍁𑌰𑌾𑌣𑍍𑌯𑍇𑌤𑌾𑌨𑌿 𑌪𑍂𑌤𑌾𑌨𑌿 𑌤𑍇
𑌗𑌾𑌂𑌗𑌾𑌨𑍀𑌵 𑌪𑌯𑌾𑌂𑌸𑌿 𑌦𑍇𑌵𑌿 𑌪𑌟𑌲𑌾𑌨𑍍𑌯𑌲𑍍𑌪𑌸𑍍𑌮𑌿𑌤𑌜𑍍𑌯𑍋𑌤𑌿𑌷𑌾𑌮𑍍 ।
𑌏𑌨𑌃𑌪𑌂𑌕𑌪𑌰𑌂𑌪𑌰𑌾𑌮𑌲𑌿𑌨𑌿𑌤𑌾𑌮𑍇𑌕𑌾𑌮𑍍𑌰𑌨𑌾𑌥𑌪𑍍𑌰𑌿𑌯𑍇
𑌪𑍍𑌰𑌜𑍍𑌞𑌾𑌨𑌾𑌤𑍍𑌸𑍁𑌤𑌰𑌾𑌂 𑌮𑌦𑍀𑌯𑌧𑌿𑌷𑌣𑌾𑌂 𑌪𑍍𑌰𑌕𑍍𑌷𑌾𑌲𑌯𑌂𑌤𑍁 𑌕𑍍𑌷𑌣𑌾𑌤𑍍 ॥𑍮0॥

𑌅𑌶𑍍𑌰𑌾𑌂𑌤𑌂 𑌪𑌰𑌤𑌂𑌤𑍍𑌰𑌿𑌤𑌃 𑌪𑌶𑍁𑌪𑌤𑌿𑌸𑍍𑌤𑍍𑌵𑌨𑍍𑌮𑌂𑌦𑌹𑌾𑌸𑌾𑌂𑌕𑍁𑌰𑍈𑌃
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌤𑌦𑍀𑌯𑌵𑌰𑍍𑌣𑌸𑌮𑌤𑌾𑌸𑌂𑌗𑍇𑌨 𑌶𑌂𑌕𑌾𑌮𑌹𑍇 ।
𑌇𑌂𑌦𑍁𑌂 𑌨𑌾𑌕𑌧𑍁𑌨𑍀𑌂 𑌚 𑌶𑍇𑌖𑌰𑌯𑌤𑍇 𑌮𑌾𑌲𑌾𑌂 𑌚 𑌧𑌤𑍍𑌤𑍇 𑌨𑌵𑍈𑌃
𑌵𑍈𑌕𑍁𑌂𑌠𑍈𑌰𑌵𑌕𑍁𑌂𑌠𑌨𑌂 𑌚 𑌕𑍁𑌰𑍁𑌤𑍇 𑌧𑍂𑌲𑍀𑌚𑌯𑍈𑌰𑍍𑌭𑌾𑌸𑍍𑌮𑌨𑍈𑌃 ॥𑍮1॥

𑌶𑍍𑌰𑍀𑌕𑌾𑌂𑌚𑍀𑌪𑍁𑌰𑌦𑍇𑌵𑌤𑍇 𑌮𑍃𑌦𑍁𑌵𑌚𑌸𑍍𑌸𑍌𑌰𑌭𑍍𑌯𑌮𑍁𑌦𑍍𑌰𑌾𑌸𑍍𑌪𑌦𑌂
𑌪𑍍𑌰𑍌𑌢𑌪𑍍𑌰𑍇𑌮𑌲𑌤𑌾𑌨𑌵𑍀𑌨𑌕𑍁𑌸𑍁𑌮𑌂 𑌮𑌂𑌦𑌸𑍍𑌮𑌿𑌤𑌂 𑌤𑌾𑌵𑌕𑌮𑍍 ।
𑌮𑌂𑌦𑌂 𑌕𑌂𑌦𑌲𑌤𑌿 𑌪𑍍𑌰𑌿𑌯𑌸𑍍𑌯 𑌵𑌦𑌨𑌾𑌲𑍋𑌕𑍇 𑌸𑌮𑌾𑌭𑌾𑌷𑌣𑍇
𑌶𑍍𑌲𑌕𑍍𑌷𑍍𑌣𑍇 𑌕𑍁𑌙𑍍𑌮𑌲𑌤𑌿 𑌪𑍍𑌰𑌰𑍂𑌢𑌪𑍁𑌲𑌕𑍇 𑌚𑌾𑌶𑍍𑌲𑍋𑌷𑌣𑍇 𑌫𑍁𑌲𑍍𑌲𑌤𑌿 ॥𑍮2॥

𑌕𑌿𑌂 𑌤𑍍𑌰𑍈𑌸𑍍𑌰𑍋𑌤𑌸𑌮𑌂𑌬𑌿𑌕𑍇 𑌪𑌰𑌿𑌣𑌤𑌂 𑌸𑍍𑌰𑍋𑌤𑌶𑍍𑌚𑌤𑍁𑌰𑍍𑌥𑌂 𑌨𑌵𑌂
𑌪𑍀𑌯𑍂𑌷𑌸𑍍𑌯 𑌸𑌮𑌸𑍍𑌤𑌤𑌾𑌪𑌹𑌰𑌣𑌂 𑌕𑌿𑌂𑌵𑌾 𑌦𑍍𑌵𑌿𑌤𑍀𑌯𑌂 𑌵𑌪𑍁𑌃 ।
𑌕𑌿𑌂𑌸𑍍𑌵𑌿𑌤𑍍𑌤𑍍𑌵𑌨𑍍𑌨𑌿𑌕𑌟𑌂 𑌗𑌤𑌂 𑌮𑌧𑍁𑌰𑌿𑌮𑌾𑌭𑍍𑌯𑌾𑌸𑌾𑌯 𑌗𑌵𑍍𑌯𑌂 𑌪𑌯𑌃
𑌶𑍍𑌰𑍀𑌕𑌾𑌂𑌚𑍀𑌪𑍁𑌰𑌨𑌾𑌯𑌕𑌪𑍍𑌰𑌿𑌯𑌤𑌮𑍇 𑌮𑌂𑌦𑌸𑍍𑌮𑌿𑌤𑌂 𑌤𑌾𑌵𑌕𑌮𑍍 ॥𑍮3॥

𑌭𑍂𑌷𑌾 𑌵𑌕𑍍𑌤𑍍𑌰𑌸𑌰𑍋𑌰𑍁𑌹𑌸𑍍𑌯 𑌸𑌹𑌜𑌾 𑌵𑌾𑌚𑌾𑌂 𑌸𑌖𑍀 𑌶𑌾𑌶𑍍𑌵𑌤𑍀
𑌨𑍀𑌵𑍀 𑌵𑌿𑌭𑍍𑌰𑌮𑌸𑌂𑌤𑌤𑍇𑌃 𑌪𑌶𑍁𑌪𑌤𑍇𑌃 𑌸𑍌𑌧𑍀 𑌦𑍃𑌶𑌾𑌂 𑌪𑌾𑌰𑌣𑌾 ।
𑌜𑍀𑌵𑌾𑌤𑍁𑌰𑍍𑌮𑌦𑌨𑌶𑍍𑌰𑌿𑌯𑌃 𑌶𑌶𑌿𑌰𑍁𑌚𑍇𑌰𑍁𑌚𑍍𑌚𑌾𑌟𑌨𑍀 𑌦𑍇𑌵𑌤𑌾
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌗𑌿𑌰𑌾𑌮𑌭𑍂𑌮𑌿𑌮𑌯𑌤𑍇 𑌹𑌾𑌸𑌪𑍍𑌰𑌭𑌾𑌮𑌂𑌜𑌰𑍀 ॥𑍮4॥

𑌸𑍂𑌤𑌿𑌃 𑌶𑍍𑌵𑍇𑌤𑌿𑌮𑌕𑌂𑌦𑌲𑌸𑍍𑌯 𑌵𑌸𑌤𑌿𑌃 𑌶𑍃𑌂𑌗𑌾𑌰𑌸𑌾𑌰𑌶𑍍𑌰𑌿𑌯𑌃
𑌪𑍂𑌰𑍍𑌤𑌿𑌃 𑌸𑍂𑌕𑍍𑌤𑌿𑌝𑌰𑍀𑌰𑌸𑌸𑍍𑌯 𑌲𑌹𑌰𑍀 𑌕𑌾𑌰𑍁𑌣𑍍𑌯𑌪𑌾𑌥𑍋𑌨𑌿𑌧𑍇𑌃 ।
𑌵𑌾𑌟𑍀 𑌕𑌾𑌚𑌨 𑌕𑍌𑌸𑍁𑌮𑍀 𑌮𑌧𑍁𑌰𑌿𑌮𑌸𑍍𑌵𑌾𑌰𑌾𑌜𑍍𑌯𑌲𑌕𑍍𑌷𑍍𑌮𑍍𑌯𑌾𑌸𑍍𑌤𑌵
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌮𑌮𑌾𑌸𑍍𑌤𑍁 𑌮𑌂𑌗𑌲𑌕𑌰𑍀 𑌹𑌾𑌸𑌪𑍍𑌰𑌭𑌾𑌚𑌾𑌤𑍁𑌰𑍀 ॥𑍮5॥

𑌜𑌂𑌤𑍂𑌨𑌾𑌂 𑌜𑌨𑌿𑌦𑍁𑌃𑌖𑌮𑍃𑌤𑍍𑌯𑍁𑌲𑌹𑌰𑍀𑌸𑌂𑌤𑌾𑌪𑌨𑌂 𑌕𑍃𑌂𑌤𑌤𑌃
𑌪𑍍𑌰𑍌𑌢𑌾𑌨𑍁𑌗𑍍𑌰𑌹𑌪𑍂𑌰𑍍𑌣𑌶𑍀𑌤𑌲𑌰𑍁𑌚𑍋 𑌨𑌿𑌤𑍍𑌯𑍋𑌦𑌯𑌂 𑌬𑌿𑌭𑍍𑌰𑌤𑌃 ।
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌵𑌿𑌸𑍃𑌤𑍍𑌵𑌰𑌾 𑌇𑌵 𑌕𑌰𑌾 𑌹𑌾𑌸𑌾𑌂𑌕𑍁𑌰𑌾𑌸𑍍𑌤𑍇 𑌹𑌠𑌾-
𑌦𑌾𑌲𑍋𑌕𑍇𑌨 𑌨𑌿𑌹𑌨𑍍𑌯𑍁𑌰𑌂𑌧𑌤𑌮𑌸𑌸𑍍𑌤𑍋𑌮𑌸𑍍𑌯 𑌮𑍇 𑌸𑌂𑌤𑌤𑌿𑌮𑍍 ॥𑍮6॥

𑌉𑌤𑍍𑌤𑍁𑌂𑌗𑌸𑍍𑌤𑌨𑌮𑌂𑌡𑌲𑌸𑍍𑌯 𑌵𑌿𑌲𑌸𑌲𑍍𑌲𑌾𑌵𑌣𑍍𑌯𑌲𑍀𑌲𑌾𑌨𑌟𑍀-
𑌰𑌂𑌗𑌸𑍍𑌯 𑌸𑍍𑌫𑍁𑌟𑌮𑍂𑌰𑍍𑌧𑍍𑌵𑌸𑍀𑌮𑌨𑌿 𑌮𑍁𑌹𑍁𑌃 𑌪𑍍𑌰𑌾𑌕𑌾𑌶𑍍𑌯𑌮𑌭𑍍𑌯𑍇𑌯𑍁𑌷𑍀 ।
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌤𑌵 𑌸𑍍𑌮𑌿𑌤𑌦𑍍𑌯𑍁𑌤𑌿𑌤𑌤𑌿𑌰𑍍𑌬𑌿𑌂𑌬𑍋𑌷𑍍𑌠𑌕𑌾𑌂𑌤𑍍𑌯𑌂𑌕𑍁𑌰𑍈𑌃
𑌚𑌿𑌤𑍍𑌰𑌾𑌂 𑌵𑌿𑌦𑍍𑌰𑍁𑌮𑌮𑍁𑌦𑍍𑌰𑌿𑌤𑌾𑌂 𑌵𑌿𑌤𑌨𑍁𑌤𑍇 𑌮𑍌𑌕𑍍𑌤𑍀𑌂 𑌵𑌿𑌤𑌾𑌨𑌶𑍍𑌰𑌿𑌯𑌮𑍍 ॥𑍮𑍭॥

𑌸𑍍𑌵𑌾𑌭𑌾𑌵𑍍𑌯𑌾𑌤𑍍𑌤𑌵 𑌵𑌕𑍍𑌤𑍍𑌰𑌮𑍇𑌵 𑌲𑌲𑌿𑌤𑌂 𑌸𑌂𑌤𑍋𑌷𑌸𑌂𑌪𑌾𑌦𑌨𑌂
𑌶𑌂𑌭𑍋𑌃 𑌕𑌿𑌂 𑌪𑍁𑌨𑌰𑌂𑌚𑌿𑌤𑌸𑍍𑌮𑌿𑌤𑌰𑍁𑌚𑌃 𑌪𑌾𑌂𑌡𑌿𑌤𑍍𑌯𑌪𑌾𑌤𑍍𑌰𑍀𑌕𑍃𑌤𑌮𑍍 ।
𑌅𑌂𑌭𑍋𑌜𑌂 𑌸𑍍𑌵𑌤 𑌏𑌵 𑌸𑌰𑍍𑌵𑌜𑌗𑌤𑌾𑌂 𑌚𑌕𑍍𑌷𑍁𑌃𑌪𑍍𑌰𑌿𑌯𑌂𑌭𑌾𑌵𑍁𑌕𑌂
𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌰𑌿𑌤𑍇 𑌶𑌰𑌦𑍍𑌵𑌿𑌕𑌸𑌿𑌤𑍇 𑌕𑍀𑌦𑍃𑌗𑍍𑌵𑌿𑌧𑌂 𑌭𑍍𑌰𑌾𑌜𑌤𑍇 ॥𑍮𑍮॥

𑌪𑍁𑌂𑌭𑌿𑌰𑍍𑌨𑌿𑌰𑍍𑌮𑌲𑌮𑌾𑌨𑌸𑍌𑌰𑍍𑌵𑌿𑌦𑌧𑌤𑍇 𑌮𑍈𑌤𑍍𑌰𑍀𑌂 𑌦𑍃𑌢𑌂 𑌨𑌿𑌰𑍍𑌮𑌲𑌾𑌂
𑌲𑌬𑍍𑌧𑍍𑌵𑌾 𑌕𑌰𑍍𑌮𑌲𑌯𑌂 𑌚 𑌨𑌿𑌰𑍍𑌮𑌲𑌤𑌰𑌾𑌂 𑌕𑍀𑌰𑍍𑌤𑌿𑌂 𑌲𑌭𑌂𑌤𑍇𑌤𑌰𑌾𑌮𑍍 ।
𑌸𑍂𑌕𑍍𑌤𑌿𑌂 𑌪𑌕𑍍𑌷𑍍𑌮𑌲𑌯𑌂𑌤𑌿 𑌨𑌿𑌰𑍍𑌮𑌲𑌤𑌮𑌾𑌂 𑌯𑌤𑍍𑌤𑌾𑌵𑌕𑌾𑌃 𑌸𑍇𑌵𑌕𑌾𑌃
𑌤𑌤𑍍𑌕𑌾𑌮𑌾𑌕𑍍𑌷𑌿 𑌤𑌵 𑌸𑍍𑌮𑌿𑌤𑌸𑍍𑌯 𑌕𑌲𑌯𑌾 𑌨𑍈𑌰𑍍𑌮𑌲𑍍𑌯𑌸𑍀𑌮𑌾𑌨𑌿𑌧𑍇𑌃 ॥𑍮𑍯॥

𑌆𑌕𑌰𑍍𑌷𑌨𑍍𑌨𑌯𑌨𑌾𑌨𑌿 𑌨𑌾𑌕𑌿𑌸𑌦𑌸𑌾𑌂 𑌶𑍈𑌤𑍍𑌯𑍇𑌨 𑌸𑌂𑌸𑍍𑌤𑌂𑌭𑌯-
𑌨𑍍𑌨𑌿𑌂𑌦𑍁𑌂 𑌕𑌿𑌂𑌚 𑌵𑌿𑌮𑍋𑌹𑌯𑌨𑍍𑌪𑌶𑍁𑌪𑌤𑌿𑌂 𑌵𑌿𑌶𑍍𑌵𑌾𑌰𑍍𑌤𑌿𑌮𑍁𑌚𑍍𑌚𑌾𑌟𑌯𑌨𑍍 ।
𑌹𑌿𑌂𑌸𑌤𑍍𑌸𑌂𑌸𑍃𑌤𑌿𑌡𑌂𑌬𑌰𑌂 𑌤𑌵 𑌶𑌿𑌵𑍇 𑌹𑌾𑌸𑌾𑌹𑍍𑌵𑌯𑍋 𑌮𑌾𑌂𑌤𑍍𑌰𑌿𑌕𑌃
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌮𑌦𑍀𑌯𑌮𑌾𑌨𑌸𑌤𑌮𑍋𑌵𑌿𑌦𑍍𑌵𑍇𑌷𑌣𑍇 𑌚𑍇𑌷𑍍𑌟𑌤𑌾𑌮𑍍 ॥𑍯0॥

𑌕𑍍𑌷𑍇𑌪𑍀𑌯𑌃 𑌕𑍍𑌷𑌪𑌯𑌂𑌤𑍁 𑌕𑌲𑍍𑌮𑌷𑌭𑌯𑌾𑌨𑍍𑌯𑌸𑍍𑌮𑌾𑌕𑌮𑌲𑍍𑌪𑌸𑍍𑌮𑌿𑌤-
𑌜𑍍𑌯𑍋𑌤𑌿𑌰𑍍𑌮𑌂𑌡𑌲𑌚𑌂𑌕𑍍𑌰𑌮𑌾𑌸𑍍𑌤𑌵 𑌶𑌿𑌵𑍇 𑌕𑌾𑌮𑌾𑌕𑍍𑌷𑌿 𑌰𑍋𑌚𑌿𑌷𑍍𑌣𑌵𑌃 ।
𑌪𑍀𑌡𑌾𑌕𑌰𑍍𑌮𑌠𑌕𑌰𑍍𑌮𑌘𑌰𑍍𑌮𑌸𑌮𑌯𑌵𑍍𑌯𑌾𑌪𑌾𑌰𑌤𑌾𑌪𑌾𑌨𑌲-
𑌶𑍍𑌰𑍀𑌪𑌾𑌤𑌾 𑌨𑌵𑌹𑌰𑍍𑌷𑌵𑌰𑍍𑌷𑌣𑌸𑍁𑌧𑌾𑌸𑍍𑌰𑍋𑌤𑌸𑍍𑌵𑌿𑌨𑍀𑌶𑍀𑌕𑌰𑌾𑌃 ॥𑍯1॥

𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌤𑌵 𑌸𑍍𑌮𑌿𑌤𑍈𑌂𑌦𑌵𑌮𑌹𑌃𑌪𑍂𑌰𑍇 𑌪𑌰𑌿𑌂𑌫𑍂𑌰𑍍𑌜𑌤𑌿
𑌪𑍍𑌰𑍌𑌢𑌾𑌂 𑌵𑌾𑌰𑌿𑌧𑌿𑌚𑌾𑌤𑍁𑌰𑍀𑌂 𑌕𑌲𑌯𑌤𑍇 𑌭𑌕𑍍𑌤𑌾𑌤𑍍𑌮𑌨𑌾𑌂 𑌪𑍍𑌰𑌾𑌤𑌿𑌭𑌮𑍍 ।
𑌦𑍌𑌰𑍍𑌗𑌤𑍍𑌯𑌪𑍍𑌰𑌸𑌰𑌾𑌸𑍍𑌤𑌮𑌃𑌪𑌟𑌲𑌿𑌕𑌾𑌸𑌾𑌧𑌰𑍍𑌮𑍍𑌯𑌮𑌾𑌬𑌿𑌭𑍍𑌰𑌤𑍇
𑌸𑌰𑍍𑌵𑌂 𑌕𑍈𑌰𑌵𑌸𑌾𑌹𑌚𑌰𑍍𑌯𑌪𑌦𑌵𑍀𑌰𑍀𑌤𑌿𑌂 𑌵𑌿𑌧𑌤𑍍𑌤𑍇 𑌪𑌰𑌮𑍍 ॥𑍯2॥

𑌮𑌂𑌦𑌾𑌰𑌾𑌦𑌿𑌷𑍁 𑌮𑌨𑍍𑌮𑌥𑌾𑌰𑌿𑌮𑌹𑌿𑌷𑌿 𑌪𑍍𑌰𑌾𑌕𑌾𑌶𑍍𑌯𑌰𑍀𑌤𑌿𑌂 𑌨𑌿𑌜𑌾𑌂
𑌕𑌾𑌦𑌾𑌚𑌿𑌤𑍍𑌕𑌤𑌯𑌾 𑌵𑌿𑌶𑌂𑌕𑍍𑌯 𑌬𑌹𑍁𑌶𑍋 𑌵𑍈𑌶𑌦𑍍𑌯𑌮𑍁𑌦𑍍𑌰𑌾𑌗𑍁𑌣𑌃 ।
𑌸𑌾𑌤𑌤𑍍𑌯𑍇𑌨 𑌤𑌵 𑌸𑍍𑌮𑌿𑌤𑍇 𑌵𑌿𑌤𑌨𑍁𑌤𑍇 𑌸𑍍𑌵𑍈𑌰𑌾𑌸𑌨𑌾𑌵𑌾𑌸𑌨𑌾𑌮𑍍 ॥𑍯3॥

𑌇𑌂𑌧𑌾𑌨𑍇 𑌭𑌵𑌵𑍀𑌤𑌿𑌹𑍋𑌤𑍍𑌰𑌨𑌿𑌵𑌹𑍇 𑌕𑌰𑍍𑌮𑍌𑌘𑌚𑌂𑌡𑌾𑌨𑌿𑌲-
𑌪𑍍𑌰𑍌𑌢𑌿𑌮𑍍𑌨𑌾 𑌬𑌹𑍁𑌲𑍀𑌕𑍃𑌤𑍇 𑌨𑌿𑌪𑌤𑌿𑌤𑌂 𑌸𑌂𑌤𑌾𑌪𑌚𑌿𑌂𑌤𑌾𑌕𑍁𑌲𑌮𑍍 ।
𑌮𑌾𑌤𑌰𑍍𑌮𑌾𑌂 𑌪𑌰𑌿𑌷𑌿𑌂𑌚 𑌕𑌿𑌂𑌚𑌿𑌦𑌮𑌲𑍈𑌃 𑌪𑍀𑌯𑍂𑌷𑌵𑌰𑍍𑌷𑍈𑌰𑌿𑌵
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌤𑌵 𑌸𑍍𑌮𑌿𑌤𑌦𑍍𑌯𑍁𑌤𑌿𑌕𑌣𑍈𑌃 𑌶𑍈𑌶𑌿𑌰𑍍𑌯𑌲𑍀𑌲𑌾𑌕𑌰𑍈𑌃 ॥𑍯4॥

𑌭𑌾𑌷𑌾𑌯𑌾 𑌰𑌸𑌨𑌾𑌗𑍍𑌰𑌖𑍇𑌲𑌨𑌜𑍁𑌷𑌃 𑌶𑍃𑌂𑌗𑌾𑌰𑌮𑍁𑌦𑍍𑌰𑌾𑌸𑌖𑍀-
𑌲𑍀𑌲𑌾𑌜𑌾𑌤𑌰𑌤𑍇𑌃 𑌸𑍁𑌖𑍇𑌨 𑌨𑌿𑌯𑌮𑌸𑍍𑌨𑌾𑌨𑌾𑌯 𑌮𑍇𑌨𑌾𑌤𑍍𑌮𑌜𑍇 ।
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌸𑍁𑌧𑌾𑌮𑌯𑍀𑌵 𑌶𑌿𑌶𑌿𑌰𑌾 𑌸𑍍𑌰𑍋𑌤𑌸𑍍𑌵𑌿𑌨𑍀 𑌤𑌾𑌵𑌕𑍀
𑌗𑌾𑌢𑌾𑌨𑌂𑌦𑌤𑌰𑌂𑌗𑌿𑌤𑌾 𑌵𑌿𑌜𑌯𑌤𑍇 𑌹𑌾𑌸𑌪𑍍𑌰𑌭𑌾𑌚𑌾𑌤𑍁𑌰𑍀 ॥𑍯5॥

𑌸𑌂𑌤𑌾𑌪𑌂 𑌵𑌿𑌰𑌲𑍀𑌕𑌰𑍋𑌤𑍁 𑌸𑌕𑌲𑌂 𑌕𑌾𑌮𑌾𑌕𑍍𑌷𑌿 𑌮𑌚𑍍𑌚𑍇𑌤𑌨𑌾
𑌮𑌜𑍍𑌜𑌂𑌤𑍀 𑌮𑌧𑍁𑌰𑌸𑍍𑌮𑌿𑌤𑌾𑌮𑌰𑌧𑍁𑌨𑍀𑌕𑌲𑍍𑌲𑍋𑌲𑌜𑌾𑌲𑍇𑌷𑍁 𑌤𑍇 ।
𑌨𑍈𑌰𑌂𑌤𑌰𑍍𑌯𑌮𑍁𑌪𑍇𑌤𑍍𑌯 𑌮𑌨𑍍𑌮𑌥𑌮𑌰𑍁𑌲𑍍𑌲𑍋𑌲𑍇𑌷𑍁 𑌯𑍇𑌷𑍁 𑌸𑍍𑌫𑍁𑌟𑌂
𑌪𑍍𑌰𑍇𑌮𑍇𑌂𑌦𑍁𑌃 𑌪𑍍𑌰𑌤𑌿𑌬𑌿𑌂𑌬𑌿𑌤𑍋 𑌵𑌿𑌤𑌨𑍁𑌤𑍇 𑌕𑍌𑌤𑍂𑌹𑌲𑌂 𑌧𑍂𑌰𑍍𑌜𑌟𑍇𑌃 ॥𑍯6॥

𑌚𑍇𑌤𑌃𑌕𑍍𑌷𑍀𑌰𑌪𑌯𑍋𑌧𑌿𑌮𑌂𑌥𑌰𑌚𑌲𑌦𑍍𑌰𑌾𑌗𑌾𑌖𑍍𑌯𑌮𑌂𑌥𑌾𑌚𑌲-
𑌕𑍍𑌷𑍋𑌭𑌵𑍍𑌯𑌾𑌪𑍃𑌤𑌿𑌸𑌂𑌭𑌵𑌾𑌂 𑌜𑌨𑌨𑌿 𑌤𑍇 𑌮𑌂𑌦𑌸𑍍𑌮𑌿𑌤𑌶𑍍𑌰𑍀𑌸𑍁𑌧𑌾𑌮𑍍 ।
𑌸𑍍𑌵𑌾𑌦𑌂𑌸𑍍𑌵𑌾𑌦𑌮𑍁𑌦𑍀𑌤𑌕𑍌𑌤𑍁𑌕𑌰𑌸𑌾 𑌨𑍇𑌤𑍍𑌰𑌤𑍍𑌰𑌯𑍀 𑌶𑌾𑌂𑌕𑌰𑍀
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌨𑌿𑌰𑌂𑌤𑌰𑌂 𑌪𑌰𑌿𑌣𑌮𑌤𑍍𑌯𑌾𑌨𑌂𑌦𑌵𑍀𑌚𑍀𑌮𑌯𑍀 ॥𑍯𑍭॥

𑌆𑌲𑍋𑌕𑍇 𑌤𑌵 𑌪𑌂𑌚𑌸𑌾𑌯𑌕𑌰𑌿𑌪𑍋𑌰𑍁𑌦𑍍𑌦𑌾𑌮𑌕𑍌𑌤𑍂𑌹𑌲-
𑌪𑍍𑌰𑍇𑌂𑌖𑌨𑍍𑌮𑌾𑌰𑍁𑌤𑌘𑌟𑍍𑌟𑌨𑌪𑍍𑌰𑌚𑌲𑌿𑌤𑌾𑌦𑌾𑌨𑌂𑌦𑌦𑍁𑌗𑍍𑌧𑌾𑌂𑌬𑍁𑌧𑍇𑌃 ।
𑌕𑌾𑌚𑌿𑌦𑍍𑌵𑍀𑌚𑌿𑌰𑍁𑌦𑌂𑌚𑌤𑌿 𑌪𑍍𑌰𑌤𑌿𑌨𑌵𑌾 𑌸𑌂𑌵𑌿𑌤𑍍𑌪𑍍𑌰𑌰𑍋𑌹𑌾𑌤𑍍𑌮𑌿𑌕𑌾
𑌤𑌾𑌂 𑌕𑌾𑌮𑌾𑌕𑍍𑌷𑌿 𑌕𑌵𑍀𑌶𑍍𑌵𑌰𑌾𑌃 𑌸𑍍𑌮𑌿𑌤𑌮𑌿𑌤𑌿 𑌵𑍍𑌯𑌾𑌕𑍁𑌰𑍍𑌵𑌤𑍇 𑌸𑌰𑍍𑌵𑌦𑌾 ॥𑍯𑍮॥

𑌸𑍂𑌕𑍍𑌤𑌿𑌃 𑌶𑍀𑌲𑌯𑌤𑍇 𑌕𑌿𑌮𑌦𑍍𑌰𑌿𑌤𑌨𑌯𑍇 𑌮𑌂𑌦𑌸𑍍𑌮𑌿𑌤𑌾𑌤𑍍𑌤𑍇 𑌮𑍁𑌹𑍁𑌃
𑌮𑌾𑌧𑍁𑌰𑍍𑌯𑌾𑌗𑌮𑌸𑌂𑌪𑍍𑌰𑌦𑌾𑌯𑌮𑌥𑌵𑌾 𑌸𑍂𑌕𑍍𑌤𑍇𑌰𑍍𑌨𑍁 𑌮𑌂𑌦𑌸𑍍𑌮𑌿𑌤𑌮𑍍 ।
𑌇𑌤𑍍𑌥𑌂 𑌕𑌾𑌮𑌪𑌿 𑌗𑌾𑌹𑌤𑍇 𑌮𑌮 𑌮𑌨𑌃 𑌸𑌂𑌦𑍇𑌹𑌮𑌾𑌰𑍍𑌗𑌭𑍍𑌰𑌮𑌿𑌂
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌨 𑌪𑌾𑌰𑌮𑌾𑌰𑍍𑌥𑍍𑌯𑌸𑌰𑌣𑌿𑌸𑍍𑌫𑍂𑌰𑍍𑌤𑍌 𑌨𑌿𑌧𑌤𑍍𑌤𑍇 𑌪𑌦𑌮𑍍 ॥𑍯𑍯॥

𑌕𑍍𑌰𑍀𑌡𑌾𑌲𑍋𑌲𑌕𑍃𑌪𑌾𑌸𑌰𑍋𑌰𑍁𑌹𑌮𑍁𑌖𑍀𑌸𑍌𑌧𑌾𑌂𑌗𑌣𑍇𑌭𑍍𑌯𑌃 𑌕𑌵𑌿-
𑌶𑍍𑌰𑍇𑌣𑍀𑌵𑌾𑌕𑍍𑌪𑌰𑌿𑌪𑌾𑌟𑌿𑌕𑌾𑌮𑍃𑌤𑌝𑌰𑍀𑌸𑍂𑌤𑍀𑌗𑍃𑌹𑍇𑌭𑍍𑌯𑌃 𑌶𑌿𑌵𑍇 ।
𑌨𑌿𑌰𑍍𑌵𑌾𑌣𑌾𑌂𑌕𑍁𑌰𑌸𑌾𑌰𑍍𑌵𑌭𑍌𑌮𑌪𑌦𑌵𑍀𑌸𑌿𑌂𑌹𑌾𑌸𑌨𑍇𑌭𑍍𑌯𑌸𑍍𑌤𑌵
𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌮𑌨𑍋𑌜𑍍𑌞𑌮𑌂𑌦𑌹𑌸𑌿𑌤𑌜𑍍𑌯𑍋𑌤𑌿𑌷𑍍𑌕𑌣𑍇𑌭𑍍𑌯𑍋 𑌨𑌮𑌃 ॥100॥

𑌆𑌰𑍍𑌯𑌾𑌮𑍇𑌵 𑌵𑌿𑌭𑌾𑌵𑌯𑌨𑍍𑌮𑌨𑌸𑌿 𑌯𑌃 𑌪𑌾𑌦𑌾𑌰𑌵𑌿𑌂𑌦𑌂 𑌪𑍁𑌰𑌃
𑌪𑌶𑍍𑌯𑌨𑍍𑌨𑌾𑌰𑌭𑌤𑍇 𑌸𑍍𑌤𑍁𑌤𑌿𑌂 𑌸 𑌨𑌿𑌯𑌤𑌂 𑌲𑌬𑍍𑌧𑍍𑌵𑌾 𑌕𑌟𑌾𑌕𑍍𑌷𑌚𑍍𑌛𑌵𑌿𑌮𑍍 ।
𑌕𑌾𑌮𑌾𑌕𑍍𑌷𑍍𑌯𑌾 𑌮𑍃𑌦𑍁𑌲𑌸𑍍𑌮𑌿𑌤𑌾𑌂𑌶𑍁𑌲𑌹𑌰𑍀𑌜𑍍𑌯𑍋𑌤𑍍𑌸𑍍𑌨𑌾𑌵𑌯𑌸𑍍𑌯𑌾𑌨𑍍𑌵𑌿𑌤𑌾𑌮𑍍
𑌆𑌰𑍋𑌹𑌤𑍍𑌯𑌪𑌵𑌰𑍍𑌗𑌸𑍌𑌧𑌵𑌲𑌭𑍀𑌮𑌾𑌨𑌂𑌦𑌵𑍀𑌚𑍀𑌮𑌯𑍀𑌮𑍍 ॥101॥

॥ 𑌇𑌤𑌿 𑌮𑌂𑌦𑌸𑍍𑌮𑌿𑌤𑌶𑌤𑌕𑌂 𑌸𑌂𑌪𑍂𑌰𑍍𑌣𑌮𑍍 ॥

॥ 𑌇𑌤𑌿 𑌶𑍍𑌰𑍀 𑌮𑍂𑌕𑌪𑌂𑌚𑌶𑌤𑍀 𑌸𑌂𑌪𑍂𑌰𑍍𑌣𑌾 ॥

॥𑌔𑌂 𑌤𑌤𑍍 𑌸𑌤𑍍 ॥