𑌮𑍂𑌕 𑌪𑌂𑌚 𑌶𑌤𑌿 4 – 𑌕𑌟𑌾𑌕𑍍𑌷 𑌶𑌤𑌕𑌮𑍍

𑌮𑍋𑌹𑌾𑌂𑌧𑌕𑌾𑌰𑌨𑌿𑌵𑌹𑌂 𑌵𑌿𑌨𑌿𑌹𑌂𑌤𑍁𑌮𑍀𑌡𑍇
𑌮𑍂𑌕𑌾𑌤𑍍𑌮𑌨𑌾𑌮𑌪𑌿 𑌮𑌹𑌾𑌕𑌵𑌿𑌤𑌾𑌵𑌦𑌾𑌨𑍍𑌯𑌾𑌨𑍍 ।
𑌶𑍍𑌰𑍀𑌕𑌾𑌂𑌚𑌿𑌦𑍇𑌶𑌶𑌿𑌶𑌿𑌰𑍀𑌕𑍃𑌤𑌿𑌜𑌾𑌗𑌰𑍂𑌕𑌾𑌨𑍍
𑌏𑌕𑌾𑌮𑍍𑌰𑌨𑌾𑌥𑌤𑌰𑍁𑌣𑍀𑌕𑌰𑍁𑌣𑌾𑌵𑌲𑍋𑌕𑌾𑌨𑍍 ॥1॥

𑌮𑌾𑌤𑌰𑍍𑌜𑌯𑌂𑌤𑌿 𑌮𑌮𑌤𑌾𑌗𑍍𑌰𑌹𑌮𑍋𑌕𑍍𑌷𑌣𑌾𑌨𑌿
𑌮𑌾𑌹𑍇𑌂𑌦𑍍𑌰𑌨𑍀𑌲𑌰𑍁𑌚𑌿𑌶𑌿𑌕𑍍𑌷𑌣𑌦𑌕𑍍𑌷𑌿𑌣𑌾𑌨𑌿 ।
𑌕𑌾𑌮𑌾𑌕𑍍𑌷𑌿 𑌕𑌲𑍍𑌪𑌿𑌤𑌜𑌗𑌤𑍍𑌤𑍍𑌰𑌯𑌰𑌕𑍍𑌷𑌣𑌾𑌨𑌿
𑌤𑍍𑌵𑌦𑍍𑌵𑍀𑌕𑍍𑌷𑌣𑌾𑌨𑌿 𑌵𑌰𑌦𑌾𑌨𑌵𑌿𑌚𑌕𑍍𑌷𑌣𑌾𑌨𑌿 ॥2॥

𑌆𑌨𑌂𑌗𑌤𑌂𑌤𑍍𑌰𑌵𑌿𑌧𑌿𑌦𑌰𑍍𑌶𑌿𑌤𑌕𑍌𑌶𑌲𑌾𑌨𑌾𑌮𑍍
𑌆𑌨𑌂𑌦𑌮𑌂𑌦𑌪𑌰𑌿𑌘𑍂𑌰𑍍𑌣𑌿𑌤𑌮𑌂𑌥𑌰𑌾𑌣𑌾𑌮𑍍 ।
𑌤𑌾𑌰𑌲𑍍𑌯𑌮𑌂𑌬 𑌤𑌵 𑌤𑌾𑌡𑌿𑌤𑌕𑌰𑍍𑌣𑌸𑍀𑌮𑍍𑌨𑌾𑌂
𑌕𑌾𑌮𑌾𑌕𑍍𑌷𑌿 𑌖𑍇𑌲𑌤𑌿 𑌕𑌟𑌾𑌕𑍍𑌷𑌨𑌿𑌰𑍀𑌕𑍍𑌷𑌣𑌾𑌨𑌾𑌮𑍍 ॥3॥

𑌕𑌲𑍍𑌲𑍋𑌲𑌿𑌤𑍇𑌨 𑌕𑌰𑍁𑌣𑌾𑌰𑌸𑌵𑍇𑌲𑍍𑌲𑌿𑌤𑍇𑌨
𑌕𑌲𑍍𑌮𑌾𑌷𑌿𑌤𑍇𑌨 𑌕𑌮𑌨𑍀𑌯𑌮𑍃𑌦𑍁𑌸𑍍𑌮𑌿𑌤𑍇𑌨 ।
𑌮𑌾𑌮𑌂𑌚𑌿𑌤𑍇𑌨 𑌤𑌵 𑌕𑌿𑌂𑌚𑌨 𑌕𑍁𑌂𑌚𑌿𑌤𑍇𑌨
𑌕𑌾𑌮𑌾𑌕𑍍𑌷𑌿 𑌤𑍇𑌨 𑌶𑌿𑌶𑌿𑌰𑍀𑌕𑍁𑌰𑍁 𑌵𑍀𑌕𑍍𑌷𑌿𑌤𑍇𑌨 ॥4॥

𑌸𑌾𑌹𑌾𑌯𑍍𑌯𑌕𑌂 𑌗𑌤𑌵𑌤𑍀 𑌮𑍁𑌹𑍁𑌰𑌰𑍍𑌜𑌨𑌸𑍍𑌯
𑌮𑌂𑌦𑌸𑍍𑌮𑌿𑌤𑌸𑍍𑌯 𑌪𑌰𑌿𑌤𑍋𑌷𑌿𑌤𑌭𑍀𑌮𑌚𑍇𑌤𑌾𑌃 ।
𑌕𑌾𑌮𑌾𑌕𑍍𑌷𑌿 𑌪𑌾𑌂𑌡𑌵𑌚𑌮𑍂𑌰𑌿𑌵 𑌤𑌾𑌵𑌕𑍀𑌨𑌾
𑌕𑌰𑍍𑌣𑌾𑌂𑌤𑌿𑌕𑌂 𑌚𑌲𑌤𑌿 𑌹𑌂𑌤 𑌕𑌟𑌾𑌕𑍍𑌷𑌲𑌕𑍍𑌷𑍍𑌮𑍀𑌃 ॥5॥

𑌅𑌸𑍍𑌤𑌂 𑌕𑍍𑌷𑌣𑌾𑌨𑍍𑌨𑌯𑌤𑍁 𑌮𑍇 𑌪𑌰𑌿𑌤𑌾𑌪𑌸𑍂𑌰𑍍𑌯𑌮𑍍
𑌆𑌨𑌂𑌦𑌚𑌂𑌦𑍍𑌰𑌮𑌸𑌮𑌾𑌨𑌯𑌤𑌾𑌂 𑌪𑍍𑌰𑌕𑌾𑌶𑌮𑍍 ।
𑌕𑌾𑌲𑌾𑌂𑌧𑌕𑌾𑌰𑌸𑍁𑌷𑍁𑌮𑌾𑌂 𑌕𑌲𑌯𑌂𑌦𑌿𑌗𑌂𑌤𑍇
𑌕𑌾𑌮𑌾𑌕𑍍𑌷𑌿 𑌕𑍋𑌮𑌲𑌕𑌟𑌾𑌕𑍍𑌷𑌨𑌿𑌶𑌾𑌗𑌮𑌸𑍍𑌤𑍇 ॥6॥

𑌤𑌾𑌟𑌾𑌂𑌕𑌮𑍌𑌕𑍍𑌤𑌿𑌕𑌰𑍁𑌚𑌾𑌂𑌕𑍁𑌰𑌦𑌂𑌤𑌕𑌾𑌂𑌤𑌿𑌃
𑌕𑌾𑌰𑍁𑌣𑍍𑌯𑌹𑌸𑍍𑌤𑌿𑌪𑌶𑌿𑌖𑌾𑌮𑌣𑌿𑌨𑌾𑌧𑌿𑌰𑍂𑌢𑌃 ।
𑌉𑌨𑍍𑌮𑍂𑌲𑌯𑌤𑍍𑌵𑌶𑍁𑌭𑌪𑌾𑌦𑌪𑌮𑌸𑍍𑌮𑌦𑍀𑌯𑌂
𑌕𑌾𑌮𑌾𑌕𑍍𑌷𑌿 𑌤𑌾𑌵𑌕𑌕𑌟𑌾𑌕𑍍𑌷𑌮𑌤𑌂𑌗𑌜𑍇𑌤𑌂𑌦𑍍𑌰𑌃 ॥𑍭॥

𑌛𑌾𑌯𑌾𑌭𑌰𑌣𑍇 𑌜𑌗𑌤𑌾𑌂 𑌪𑌰𑌿𑌤𑌾𑌪𑌹𑌾𑌰𑍀
𑌤𑌾𑌟𑌂𑌕𑌰𑌤𑍍𑌨𑌮𑌣𑌿𑌤𑌲𑍍𑌲𑌜𑌪𑌲𑍍𑌲𑌵𑌶𑍍𑌰𑍀𑌃 ।
𑌕𑌾𑌰𑍁𑌣𑍍𑌯𑌨𑌾𑌮 𑌵𑌿𑌕𑌿𑌰𑌨𑍍𑌮𑌕𑌰𑌂𑌦𑌜𑌾𑌲𑌂
𑌕𑌾𑌮𑌾𑌕𑍍𑌷𑌿 𑌰𑌾𑌜𑌤𑌿 𑌕𑌟𑌾𑌕𑍍𑌷𑌸𑍁𑌰𑌦𑍍𑌰𑍁𑌮𑌸𑍍𑌤𑍇 ॥𑍮॥

𑌸𑍂𑌰𑍍𑌯𑌾𑌶𑍍𑌰𑌯𑌪𑍍𑌰𑌣𑌯𑌿𑌨𑍀 𑌮𑌣𑌿𑌕𑍁𑌂𑌡𑌲𑌾𑌂𑌶𑍁-
𑌲𑍌𑌹𑌿𑌤𑍍𑌯𑌕𑍋𑌕𑌨𑌦𑌕𑌾𑌨𑌨𑌮𑌾𑌨𑌨𑍀𑌯𑌾 ।
𑌯𑌾𑌂𑌤𑍀 𑌤𑌵 𑌸𑍍𑌮𑌰𑌹𑌰𑌾𑌨𑌨𑌕𑌾𑌂𑌤𑌿𑌸𑌿𑌂𑌧𑍁𑌂
𑌕𑌾𑌮𑌾𑌕𑍍𑌷𑌿 𑌰𑌾𑌜𑌤𑌿 𑌕𑌟𑌾𑌕𑍍𑌷𑌕𑌲𑌿𑌂𑌦𑌕𑌨𑍍𑌯𑌾 ॥𑍯॥

𑌪𑍍𑌰𑌾𑌪𑍍𑌨𑍋𑌤𑌿 𑌯𑌂 𑌸𑍁𑌕𑍃𑌤𑌿𑌨𑌂 𑌤𑌵 𑌪𑌕𑍍𑌷𑌪𑌾𑌤𑌾𑌤𑍍
𑌕𑌾𑌮𑌾𑌕𑍍𑌷𑌿 𑌵𑍀𑌕𑍍𑌷𑌣𑌵𑌿𑌲𑌾𑌸𑌕𑌲𑌾𑌪𑍁𑌰𑌂𑌧𑍍𑌰𑍀 ।
𑌸𑌦𑍍𑌯𑌸𑍍𑌤𑌮𑍇𑌵 𑌕𑌿𑌲 𑌮𑍁𑌕𑍍𑌤𑌿𑌵𑌧𑍂𑌰𑍍𑌵𑍃𑌣𑍀𑌤𑍇
𑌤𑌸𑍍𑌮𑌾𑌨𑍍𑌨𑌿𑌤𑌾𑌂𑌤𑌮𑌨𑌯𑍋𑌰𑌿𑌦𑌮𑍈𑌕𑌮𑌤𑍍𑌯𑌮𑍍 ॥10॥

𑌯𑌾𑌂𑌤𑍀 𑌸𑌦𑍈𑌵 𑌮𑌰𑍁𑌤𑌾𑌮𑌨𑍁𑌕𑍂𑌲𑌭𑌾𑌵𑌂
𑌭𑍍𑌰𑍂𑌵𑌲𑍍𑌲𑌿𑌶𑌕𑍍𑌰𑌧𑌨𑍁𑌰𑍁𑌲𑍍𑌲𑌸𑌿𑌤𑌾 𑌰𑌸𑌾𑌰𑍍𑌦𑍍𑌰𑌾 ।
𑌕𑌾𑌮𑌾𑌕𑍍𑌷𑌿 𑌕𑍌𑌤𑍁𑌕𑌤𑌰𑌂𑌗𑌿𑌤𑌨𑍀𑌲𑌕𑌂𑌠𑌾
𑌕𑌾𑌦𑌂𑌬𑌿𑌨𑍀𑌵 𑌤𑌵 𑌭𑌾𑌤𑌿 𑌕𑌟𑌾𑌕𑍍𑌷𑌮𑌾𑌲𑌾 ॥11॥

𑌗𑌂𑌗𑌾𑌂𑌭𑌸𑌿 𑌸𑍍𑌮𑌿𑌤𑌮𑌯𑍇 𑌤𑌪𑌨𑌾𑌤𑍍𑌮𑌜𑍇𑌵
𑌗𑌂𑌗𑌾𑌧𑌰𑍋𑌰𑌸𑌿 𑌨𑌵𑍋𑌤𑍍𑌪𑌲𑌮𑌾𑌲𑌿𑌕𑍇𑌵 ।
𑌵𑌕𑍍𑌤𑍍𑌰𑌪𑍍𑌰𑌭𑌾𑌸𑌰𑌸𑌿 𑌶𑍈𑌵𑌲𑌮𑌂𑌡𑌲𑍀𑌵
𑌕𑌾𑌮𑌾𑌕𑍍𑌷𑌿 𑌰𑌾𑌜𑌤𑌿 𑌕𑌟𑌾𑌕𑍍𑌷𑌰𑍁𑌚𑌿𑌚𑍍𑌛𑌟𑌾 𑌤𑍇 ॥12॥

𑌸𑌂𑌸𑍍𑌕𑌾𑌰𑌤𑌃 𑌕𑌿𑌮𑌪𑌿 𑌕𑌂𑌦𑌲𑌿𑌤𑌾𑌨𑍍 𑌰𑌸𑌜𑍍𑌞-
𑌕𑍇𑌦𑌾𑌰𑌸𑍀𑌮𑍍𑌨𑌿 𑌸𑍁𑌧𑌿𑌯𑌾𑌮𑍁𑌪𑌭𑍋𑌗𑌯𑍋𑌗𑍍𑌯𑌾𑌨𑍍 ।
𑌕𑌲𑍍𑌯𑌾𑌣𑌸𑍂𑌕𑍍𑌤𑌿𑌲𑌹𑌰𑍀𑌕𑌲𑌮𑌾𑌂𑌕𑍁𑌰𑌾𑌨𑍍𑌨𑌃
𑌕𑌾𑌮𑌾𑌕𑍍𑌷𑌿 𑌪𑌕𑍍𑌷𑍍𑌮𑌲𑌯𑌤𑍁 𑌤𑍍𑌵𑌦𑌪𑌾𑌂𑌗𑌮𑍇𑌘𑌃 ॥13॥

𑌚𑌾𑌂𑌚𑌲𑍍𑌯𑌮𑍇𑌵 𑌨𑌿𑌯𑌤𑌂 𑌕𑌲𑌯𑌨𑍍𑌪𑍍𑌰𑌕𑍃𑌤𑍍𑌯𑌾
𑌮𑌾𑌲𑌿𑌨𑍍𑌯𑌭𑍂𑌃 𑌶𑍍𑌰𑌤𑌿𑌪𑌥𑌾𑌕𑍍𑌰𑌮𑌜𑌾𑌗𑌰𑍂𑌕𑌃 ।
𑌕𑍈𑌵𑌲𑍍𑌯𑌮𑍇𑌵 𑌕𑌿𑌮𑍁 𑌕𑌲𑍍𑌪𑌯𑌤𑍇 𑌨𑌤𑌾𑌨𑌾𑌂
𑌕𑌾𑌮𑌾𑌕𑍍𑌷𑌿 𑌚𑌿𑌤𑍍𑌰𑌮𑌪𑌿 𑌤𑍇 𑌕𑌰𑍁𑌣𑌾𑌕𑌟𑌾𑌕𑍍𑌷𑌃 ॥14॥

𑌸𑌂𑌜𑍀𑌵𑌨𑍇 𑌜𑌨𑌨𑌿 𑌚𑍂𑌤𑌶𑌿𑌲𑍀𑌮𑍁𑌖𑌸𑍍𑌯
𑌸𑌂𑌮𑍋𑌹𑌨𑍇 𑌶𑌶𑌿𑌕𑌿𑌶𑍋𑌰𑌕𑌶𑍇𑌖𑌰𑌸𑍍𑌯 ।
𑌸𑌂𑌸𑍍𑌤𑌂𑌭𑌨𑍇 𑌚 𑌮𑌮𑌤𑌾𑌗𑍍𑌰𑌹𑌚𑍇𑌷𑍍𑌟𑌿𑌤𑌸𑍍𑌯
𑌕𑌾𑌮𑌾𑌕𑍍𑌷𑌿 𑌵𑍀𑌕𑍍𑌷𑌣𑌕𑌲𑌾 𑌪𑌰𑌮𑍌𑌷𑌧𑌂 𑌤𑍇 ॥15॥

𑌨𑍀𑌲𑍋𑌽𑌪𑌿 𑌰𑌾𑌗𑌮𑌧𑌿𑌕𑌂 𑌜𑌨𑌯𑌨𑍍𑌪𑍁𑌰𑌾𑌰𑍇𑌃
𑌲𑍋𑌲𑍋𑌽𑌪𑌿 𑌭𑌕𑍍𑌤𑌿𑌮𑌧𑌿𑌕𑌾𑌂 𑌦𑍃𑌢𑌯𑌨𑍍𑌨𑌰𑌾𑌣𑌾𑌮𑍍 ।
𑌵𑌕𑍍𑌰𑍋𑌽𑌪𑌿 𑌦𑍇𑌵𑌿 𑌨𑌮𑌤𑌾𑌂 𑌸𑌮𑌤𑌾𑌂 𑌵𑌿𑌤𑌨𑍍𑌵𑌨𑍍
𑌕𑌾𑌮𑌾𑌕𑍍𑌷𑌿 𑌨𑍃𑌤𑍍𑌯𑌤𑍁 𑌮𑌯𑌿 𑌤𑍍𑌵𑌦𑌪𑌾𑌂𑌗𑌪𑌾𑌤𑌃 ॥16॥

𑌕𑌾𑌮𑌦𑍍𑌰𑍁𑌹𑍋 𑌹𑍃𑌦𑌯𑌯𑌂𑌤𑍍𑌰𑌣𑌜𑌾𑌗𑌰𑍂𑌕𑌾
𑌕𑌾𑌮𑌾𑌕𑍍𑌷𑌿 𑌚𑌂𑌚𑌲𑌦𑍃𑌗𑌂𑌚𑌲𑌮𑍇𑌖𑌲𑌾 𑌤𑍇 ।
𑌆𑌶𑍍𑌚𑌰𑍍𑌯𑌮𑌂𑌬 𑌭𑌜𑌤𑌾𑌂 𑌝𑌟𑌿𑌤𑌿 𑌸𑍍𑌵𑌕𑍀𑌯-
𑌸𑌂𑌪𑌰𑍍𑌕 𑌏𑌵 𑌵𑌿𑌧𑍁𑌨𑍋𑌤𑌿 𑌸𑌮𑌸𑍍𑌤𑌬𑌂𑌧𑌾𑌨𑍍 ॥1𑍭॥

𑌕𑍁𑌂𑌠𑍀𑌕𑌰𑍋𑌤𑍁 𑌵𑌿𑌪𑌦𑌂 𑌮𑌮 𑌕𑍁𑌂𑌚𑌿𑌤𑌭𑍍𑌰𑍂-
𑌚𑌾𑌪𑌾𑌂𑌚𑌿𑌤𑌃 𑌶𑍍𑌰𑌿𑌤𑌵𑌿𑌦𑍇𑌹𑌭𑌵𑌾𑌨𑍁𑌰𑌾𑌗𑌃 ।
𑌰𑌕𑍍𑌷𑍋𑌪𑌕𑌾𑌰𑌮𑌨𑌿𑌶𑌂 𑌜𑌨𑌯𑌂𑌜𑌗𑌤𑍍𑌯𑌾𑌂
𑌕𑌾𑌮𑌾𑌕𑍍𑌷𑌿 𑌰𑌾𑌮 𑌇𑌵 𑌤𑍇 𑌕𑌰𑍁𑌣𑌾𑌕𑌟𑌾𑌕𑍍𑌷𑌃 ॥1𑍮॥

𑌶𑍍𑌰𑍀𑌕𑌾𑌮𑌕𑍋𑌟𑌿 𑌶𑌿𑌵𑌲𑍋𑌚𑌨𑌶𑍋𑌷𑌿𑌤𑌸𑍍𑌯
𑌶𑍃𑌂𑌗𑌾𑌰𑌬𑍀𑌜𑌵𑌿𑌭𑌵𑌸𑍍𑌯 𑌪𑍁𑌨𑌃𑌪𑍍𑌰𑌰𑍋𑌹𑍇 ।
𑌪𑍍𑌰𑍇𑌮𑌾𑌂𑌭𑌸𑌾𑌰𑍍𑌦𑍍𑌰𑌮𑌚𑌿𑌰𑌾𑌤𑍍𑌪𑍍𑌰𑌚𑍁𑌰𑍇𑌣 𑌶𑌂𑌕𑍇
𑌕𑍇𑌦𑌾𑌰𑌮𑌂𑌬 𑌤𑌵 𑌕𑍇𑌵𑌲𑌦𑍃𑌷𑍍𑌟𑌿𑌪𑌾𑌤𑌮𑍍 ॥1𑍯॥

𑌮𑌾𑌹𑌾𑌤𑍍𑌮𑍍𑌯𑌶𑍇𑌵𑌧𑌿𑌰𑌸𑍌 𑌤𑌵 𑌦𑍁𑌰𑍍𑌵𑌿𑌲𑌂𑌘𑍍𑌯-
𑌸𑌂𑌸𑌾𑌰𑌵𑌿𑌂𑌧𑍍𑌯𑌗𑌿𑌰𑌿𑌕𑍁𑌂𑌠𑌨𑌕𑍇𑌲𑌿𑌚𑍁𑌂𑌚𑍁𑌃 ।
𑌧𑍈𑌰𑍍𑌯𑌾𑌂𑌬𑍁𑌧𑌿𑌂 𑌪𑌶𑍁𑌪𑌤𑍇𑌶𑍍𑌚𑍁𑌲𑌕𑍀𑌕𑌰𑍋𑌤𑌿
𑌕𑌾𑌮𑌾𑌕𑍍𑌷𑌿 𑌵𑍀𑌕𑍍𑌷𑌣𑌵𑌿𑌜𑍃𑌂𑌭𑌣𑌕𑍁𑌂𑌭𑌜𑌨𑍍𑌮𑌾 ॥20॥

𑌪𑍀𑌯𑍂𑌷𑌵𑌰𑍍𑌷𑌵𑌶𑌿𑌶𑌿𑌰𑌾 𑌸𑍍𑌫𑍁𑌟𑌦𑍁𑌤𑍍𑌪𑌲𑌶𑍍𑌰𑍀-
𑌮𑍈𑌤𑍍𑌰𑍀 𑌨𑌿𑌸𑌰𑍍𑌗𑌮𑌧𑍁𑌰𑌾 𑌕𑍃𑌤𑌤𑌾𑌰𑌕𑌾𑌪𑍍𑌤𑌿𑌃 ।
𑌕𑌾𑌮𑌾𑌕𑍍𑌷𑌿 𑌸𑌂𑌶𑍍𑌰𑌿𑌤𑌵𑌤𑍀 𑌵𑌪𑍁𑌰𑌷𑍍𑌟𑌮𑍂𑌰𑍍𑌤𑍇𑌃
𑌜𑍍𑌯𑍋𑌤𑍍𑌸𑍍𑌨𑌾𑌯𑌤𑍇 𑌭𑌗𑌵𑌤𑌿 𑌤𑍍𑌵𑌦𑌪𑌾𑌂𑌗𑌮𑌾𑌲𑌾 ॥21॥

𑌅𑌂𑌬 𑌸𑍍𑌮𑌰𑌪𑍍𑌰𑌤𑌿𑌭𑌟𑌸𑍍𑌯 𑌵𑌪𑍁𑌰𑍍𑌮𑌨𑍋𑌜𑍍𑌞𑌮𑍍
𑌅𑌂𑌭𑍋𑌜𑌕𑌾𑌨𑌨𑌮𑌿𑌵𑌾𑌂𑌚𑌿𑌤𑌕𑌂𑌟𑌕𑌾𑌭𑌮𑍍 ।
𑌭𑍃𑌂𑌗𑍀𑌵 𑌚𑍁𑌂𑌬𑌤𑌿 𑌸𑌦𑍈𑌵 𑌸𑌪𑌕𑍍𑌷𑌪𑌾𑌤𑌾
𑌕𑌾𑌮𑌾𑌕𑍍𑌷𑌿 𑌕𑍋𑌮𑌲𑌰𑍁𑌚𑌿𑌸𑍍𑌤𑍍𑌵𑌦𑌪𑌾𑌂𑌗𑌮𑌾𑌲𑌾 ॥22॥

𑌕𑍇𑌶𑌪𑍍𑌰𑌭𑌾𑌪𑌟𑌲𑌨𑍀𑌲𑌵𑌿𑌤𑌾𑌨𑌜𑌾𑌲𑍇
𑌕𑌾𑌮𑌾𑌕𑍍𑌷𑌿 𑌕𑍁𑌂𑌡𑌲𑌮𑌣𑌿𑌚𑍍𑌛𑌵𑌿𑌦𑍀𑌪𑌶𑍋𑌭𑍇 ।
𑌶𑌂𑌕𑍇 𑌕𑌟𑌾𑌕𑍍𑌷𑌰𑍁𑌚𑌿𑌰𑌂𑌗𑌤𑌲𑍇 𑌕𑍃𑌪𑌾𑌖𑍍𑌯𑌾
𑌶𑍈𑌲𑍂𑌷𑌿𑌕𑌾 𑌨𑌟𑌤𑌿 𑌶𑌂𑌕𑌰𑌵𑌲𑍍𑌲𑌭𑍇 𑌤𑍇 ॥23॥

𑌅𑌤𑍍𑌯𑌂𑌤𑌶𑍀𑌤𑌲𑌮𑌤𑌂𑌦𑍍𑌰𑌯𑌤𑍁 𑌕𑍍𑌷𑌣𑌾𑌰𑍍𑌧𑌮𑍍
𑌅𑌸𑍍𑌤𑍋𑌕𑌵𑌿𑌭𑍍𑌰𑌮𑌮𑌨𑌂𑌗𑌵𑌿𑌲𑌾𑌸𑌕𑌂𑌦𑌮𑍍 ।
𑌅𑌲𑍍𑌪𑌸𑍍𑌮𑌿𑌤𑌾𑌦𑍃𑌤𑌮𑌪𑌾𑌰𑌕𑍃𑌪𑌾𑌪𑍍𑌰𑌵𑌾𑌹𑌮𑍍
𑌅𑌕𑍍𑌷𑌿𑌪𑍍𑌰𑌰𑍋𑌹𑌮𑌚𑌿𑌰𑌾𑌨𑍍𑌮𑌯𑌿 𑌕𑌾𑌮𑌕𑍋𑌟𑌿 ॥24॥

𑌮𑌂𑌦𑌾𑌕𑍍𑌷𑌰𑌾𑌗𑌤𑌰𑌲𑍀𑌕𑍃𑌤𑌿𑌪𑌾𑌰𑌤𑌂𑌤𑍍𑌰𑍍𑌯𑌾𑌤𑍍
𑌕𑌾𑌮𑌾𑌕𑍍𑌷𑌿 𑌮𑌂𑌥𑌰𑌤𑌰𑌾𑌂 𑌤𑍍𑌵𑌦𑌪𑌾𑌂𑌗𑌡𑍋𑌲𑌾𑌮𑍍 ।
𑌆𑌰𑍁𑌹𑍍𑌯 𑌮𑌂𑌦𑌮𑌤𑌿𑌕𑍌𑌤𑍁𑌕𑌶𑌾𑌲𑌿 𑌚𑌕𑍍𑌷𑍁𑌃
𑌆𑌨𑌂𑌦𑌮𑍇𑌤𑌿 𑌮𑍁𑌹𑍁𑌰𑌰𑍍𑌧𑌶𑌶𑌾𑌂𑌕𑌮𑍌𑌲𑍇𑌃 ॥25॥

𑌤𑍍𑌰𑍈𑌯𑌂𑌬𑌕𑌂 𑌤𑍍𑌰𑌿𑌪𑍁𑌰𑌸𑍁𑌂𑌦𑌰𑌿 𑌹𑌰𑍍𑌮𑍍𑌯𑌭𑍂𑌮𑌿-
𑌰𑌂𑌗𑌂 𑌵𑌿𑌹𑌾𑌰𑌸𑌰𑌸𑍀 𑌕𑌰𑍁𑌣𑌾𑌪𑍍𑌰𑌵𑌾𑌹𑌃 ।
𑌦𑌾𑌸𑌾𑌶𑍍𑌚 𑌵𑌾𑌸𑌵𑌮𑍁𑌖𑌾𑌃 𑌪𑌰𑌿𑌪𑌾𑌲𑌨𑍀𑌯𑌂
𑌕𑌾𑌮𑌾𑌕𑍍𑌷𑌿 𑌵𑌿𑌶𑍍𑌵𑌮𑌪𑌿 𑌵𑍀𑌕𑍍𑌷𑌣𑌭𑍂𑌭𑍃𑌤𑌸𑍍𑌤𑍇 ॥26॥

𑌵𑌾𑌗𑍀𑌶𑍍𑌵𑌰𑍀 𑌸𑌹𑌚𑌰𑍀 𑌨𑌿𑌯𑌮𑍇𑌨 𑌲𑌕𑍍𑌷𑍍𑌮𑍀𑌃
𑌭𑍍𑌰𑍂𑌵𑌲𑍍𑌲𑌰𑍀𑌵𑌶𑌕𑌰𑍀 𑌭𑍁𑌵𑌨𑌾𑌨𑌿 𑌗𑍇𑌹𑌮𑍍 ।
𑌰𑍂𑌪𑌂 𑌤𑍍𑌰𑌿𑌲𑍋𑌕𑌨𑌯𑌨𑌾𑌮𑍃𑌤𑌮𑌂𑌬 𑌤𑍇𑌷𑌾𑌂
𑌕𑌾𑌮𑌾𑌕𑍍𑌷𑌿 𑌯𑍇𑌷𑍁 𑌤𑌵 𑌵𑍀𑌕𑍍𑌷𑌣𑌪𑌾𑌰𑌤𑌂𑌤𑍍𑌰𑍀 ॥2𑍭॥

𑌮𑌾𑌹𑍇𑌶𑍍𑌵𑌰𑌂 𑌝𑌟𑌿𑌤𑌿 𑌮𑌾𑌨𑌸𑌮𑍀𑌨𑌮𑌂𑌬
𑌕𑌾𑌮𑌾𑌕𑍍𑌷𑌿 𑌧𑍈𑌰𑍍𑌯𑌜𑌲𑌧𑍌 𑌨𑌿𑌤𑌰𑌾𑌂 𑌨𑌿𑌮𑌗𑍍𑌨𑌮𑍍 ।
𑌜𑌾𑌲𑍇𑌨 𑌶𑍃𑌂𑌖𑌲𑌯𑌤𑌿 𑌤𑍍𑌵𑌦𑌪𑌾𑌂𑌗𑌨𑌾𑌮𑍍𑌨𑌾
𑌵𑌿𑌸𑍍𑌤𑌾𑌰𑌿𑌤𑍇𑌨 𑌵𑌿𑌷𑌮𑌾𑌯𑍁𑌧𑌦𑌾𑌶𑌕𑍋𑌽𑌸𑍌 ॥2𑍮॥

𑌉𑌨𑍍𑌮𑌥𑍍𑌯 𑌬𑍋𑌧𑌕𑌮𑌲𑌾𑌕𑌾𑌰𑌮𑌂𑌬 𑌜𑌾𑌡𑍍𑌯-
𑌸𑍍𑌤𑌂𑌬𑍇𑌰𑌮𑌂 𑌮𑌮 𑌮𑌨𑍋𑌵𑌿𑌪𑌿𑌨𑍇 𑌭𑍍𑌰𑌮𑌂𑌤𑌮𑍍 ।
𑌕𑍁𑌂𑌠𑍀𑌕𑍁𑌰𑍁𑌷𑍍𑌵 𑌤𑌰𑌸𑌾 𑌕𑍁𑌟𑌿𑌲𑌾𑌗𑍍𑌰𑌸𑍀𑌮𑍍𑌨𑌾
𑌕𑌾𑌮𑌾𑌕𑍍𑌷𑌿 𑌤𑌾𑌵𑌕𑌕𑌟𑌾𑌕𑍍𑌷𑌮𑌹𑌾𑌂𑌕𑍁𑌶𑍇𑌨 ॥2𑍯॥

𑌉𑌦𑍍𑌵𑍇𑌲𑍍𑌲𑌿𑌤𑌸𑍍𑌤𑌬𑌕𑌿𑌤𑍈𑌰𑍍𑌲𑌲𑌿𑌤𑍈𑌰𑍍𑌵𑌿𑌲𑌾𑌸𑍈𑌃
𑌉𑌤𑍍𑌥𑌾𑌯 𑌦𑍇𑌵𑌿 𑌤𑌵 𑌗𑌾𑌢𑌕𑌟𑌾𑌕𑍍𑌷𑌕𑍁𑌂𑌜𑌾𑌤𑍍 ।
𑌦𑍂𑌰𑌂 𑌪𑌲𑌾𑌯𑌯𑌤𑍁 𑌮𑍋𑌹𑌮𑍃𑌗𑍀𑌕𑍁𑌲𑌂 𑌮𑍇
𑌕𑌾𑌮𑌾𑌕𑍍𑌷𑌿 𑌸𑍍𑌤𑌵𑌰𑌮𑌨𑍁𑌗𑍍𑌰𑌹𑌕𑍇𑌸𑌰𑍀𑌂𑌦𑍍𑌰𑌃 ॥30॥

𑌸𑍍𑌨𑍇𑌹𑌾𑌦𑍃𑌤𑌾𑌂 𑌵𑌿𑌦𑌲𑌿𑌤𑍋𑌤𑍍𑌪𑌲𑌕𑌂𑌤𑌿𑌚𑍋𑌰𑌾𑌂
𑌜𑍇𑌤𑌾𑌰𑌮𑍇𑌵 𑌜𑌗𑌦𑍀𑌶𑍍𑌵𑌰𑌿 𑌜𑍇𑌤𑍁𑌕𑌾𑌮𑌃 ।
𑌮𑌾𑌨𑍋𑌦𑍍𑌧𑌤𑍋 𑌮𑌕𑌰𑌕𑍇𑌤𑍁𑌰𑌸𑍌 𑌧𑍁𑌨𑍀𑌤𑍇
𑌕𑌾𑌮𑌾𑌕𑍍𑌷𑌿 𑌤𑌾𑌵𑌕𑌕𑌟𑌾𑌕𑍍𑌷𑌕𑍃𑌪𑌾𑌣𑌵𑌲𑍍𑌲𑍀𑌮𑍍 ॥31॥

𑌶𑍍𑌰𑍌𑌤𑍀𑌂 𑌵𑍍𑌰𑌜𑌨𑍍𑌨𑌪𑌿 𑌸𑌦𑌾 𑌸𑌰𑌣𑌿𑌂 𑌮𑍁𑌨𑍀𑌨𑌾𑌂
𑌕𑌾𑌮𑌾𑌕𑍍𑌷𑌿 𑌸𑌂𑌤𑌤𑌮𑌪𑌿 𑌸𑍍𑌮𑍃𑌤𑌿𑌮𑌾𑌰𑍍𑌗𑌗𑌾𑌮𑍀 ।
𑌕𑍌𑌟𑌿𑌲𑍍𑌯𑌮𑌂𑌬 𑌕𑌥𑌮𑌸𑍍𑌥𑌿𑌰𑌤𑌾𑌂 𑌚 𑌧𑌤𑍍𑌤𑍇
𑌚𑍌𑌰𑍍𑌯𑌂 𑌚 𑌪𑌂𑌕𑌜𑌰𑍁𑌚𑌾𑌂 𑌤𑍍𑌵𑌦𑌪𑌾𑌂𑌗𑌪𑌾𑌤𑌃 ॥32॥

𑌨𑌿𑌤𑍍𑌯𑌂 𑌶𑍍𑌰𑍇𑌤𑍁𑌃 𑌪𑌰𑌿𑌚𑌿𑌤𑍌 𑌯𑌤𑌮𑌾𑌨𑌮𑍇𑌵
𑌨𑍀𑌲𑍋𑌤𑍍𑌪𑌲𑌂 𑌨𑌿𑌜𑌸𑌮𑍀𑌪𑌨𑌿𑌵𑌾𑌸𑌲𑍋𑌲𑌮𑍍 ।
𑌪𑍍𑌰𑍀𑌤𑍍𑌯𑍈𑌵 𑌪𑌾𑌠𑌯𑌤𑌿 𑌵𑍀𑌕𑍍𑌷𑌣𑌦𑍇𑌶𑌿𑌕𑍇𑌂𑌦𑍍𑌰𑌃
𑌕𑌾𑌮𑌾𑌕𑍍𑌷𑍀 𑌕𑌿𑌂𑌤𑍁 𑌤𑌵 𑌕𑌾𑌲𑌿𑌮𑌸𑌂𑌪𑍍𑌰𑌦𑌾𑌯𑌮𑍍 ॥33॥

𑌭𑍍𑌰𑌾𑌂𑌤𑍍𑌵𑌾 𑌮𑍁𑌹𑍁𑌃 𑌸𑍍𑌤𑌬𑌕𑌿𑌤𑌸𑍍𑌮𑌿𑌤𑌫𑍇𑌨𑌰𑌾𑌶𑍌
𑌕𑌾𑌮𑌾𑌕𑍍𑌷𑌿 𑌵𑌕𑍍𑌤𑍍𑌰𑌰𑍁𑌚𑌿𑌸𑌂𑌚𑌯𑌵𑌾𑌰𑌿𑌰𑌾𑌶𑍌 ।
𑌆𑌨𑌂𑌦𑌤𑌿 𑌤𑍍𑌰𑌿𑌪𑍁𑌰𑌮𑌰𑍍𑌦𑌨𑌨𑍇𑌤𑍍𑌰𑌲𑌕𑍍𑌷𑍍𑌮𑍀𑌃
𑌆𑌲𑌂𑌬𑍍𑌯 𑌦𑍇𑌵𑌿 𑌤𑌵 𑌮𑌂𑌦𑌮𑌪𑌾𑌂𑌗𑌸𑍇𑌤𑍁𑌮𑍍 ॥34॥

𑌶𑍍𑌯𑌾𑌮𑌾 𑌤𑌵 𑌤𑍍𑌰𑌿𑌪𑍁𑌰𑌸𑍁𑌂𑌦𑌰𑌿 𑌲𑍋𑌚𑌨𑌶𑍍𑌰𑍀𑌃
𑌕𑌾𑌮𑌾𑌕𑍍𑌷𑌿 𑌕𑌂𑌦𑌲𑌿𑌤𑌮𑍇𑌦𑍁𑌰𑌤𑌾𑌰𑌕𑌾𑌂𑌤𑌿𑌃 ।
𑌜𑍍𑌯𑍋𑌤𑍍𑌸𑍍𑌨𑌾𑌵𑌤𑍀 𑌸𑍍𑌮𑌿𑌤𑌰𑍁𑌚𑌾𑌪𑌿 𑌕𑌥𑌂 𑌤𑌨𑍋𑌤𑌿
𑌸𑍍𑌪𑌰𑍍𑌧𑌾𑌮𑌹𑍋 𑌕𑍁𑌵𑌲𑌯𑍈𑌶𑍍𑌚 𑌤𑌥𑌾 𑌚𑌕𑍋𑌰𑍈𑌃 ॥35॥

𑌕𑌾𑌲𑌾𑌂𑌜𑌨𑌂 𑌚 𑌤𑌵 𑌦𑍇𑌵𑌿 𑌨𑌿𑌰𑍀𑌕𑍍𑌷𑌣𑌂 𑌚
𑌕𑌾𑌮𑌾𑌕𑍍𑌷𑌿 𑌸𑌾𑌮𑍍𑌯𑌸𑌰𑌣𑌿𑌂 𑌸𑌮𑍁𑌪𑍈𑌤𑌿 𑌕𑌾𑌂𑌤𑍍𑌯𑌾 ।
𑌨𑌿𑌶𑍍𑌶𑍇𑌷𑌨𑍇𑌤𑍍𑌰𑌸𑍁𑌲𑌭𑌂 𑌜𑌗𑌤𑍀𑌷𑍁 𑌪𑍂𑌰𑍍𑌵-
𑌮𑌨𑍍𑌯𑌤𑍍𑌤𑍍𑌰𑌿𑌨𑍇𑌤𑍍𑌰𑌸𑍁𑌲𑌭𑌂 𑌤𑍁𑌹𑌿𑌨𑌾𑌦𑍍𑌰𑌿𑌕𑌨𑍍𑌯𑍇 ॥36॥

𑌧𑍂𑌮𑌾𑌂𑌕𑍁𑌰𑍋 𑌮𑌕𑌰𑌕𑍇𑌤𑌨𑌪𑌾𑌵𑌕𑌸𑍍𑌯
𑌕𑌾𑌮𑌾𑌕𑍍𑌷𑌿 𑌨𑍇𑌤𑍍𑌰𑌰𑍁𑌚𑌿𑌨𑍀𑌲𑌿𑌮𑌚𑌾𑌤𑍁𑌰𑍀 𑌤𑍇 ।
𑌅𑌤𑍍𑌯𑌂𑌤𑌮𑌦𑍍𑌭𑍁𑌤𑌮𑌿𑌦𑌂 𑌨𑌯𑌨𑌤𑍍𑌰𑌯𑌸𑍍𑌯
𑌹𑌰𑍍𑌷𑍋𑌦𑌯𑌂 𑌜𑌨𑌯𑌤𑍇 𑌹𑌰𑍁𑌣𑌾𑌂𑌕𑌮𑍌𑌲𑍇𑌃 ॥3𑍭॥

𑌆𑌰𑌭𑍍𑌭𑌲𑍇𑌶𑌸𑌮𑌯𑍇 𑌤𑌵 𑌵𑍀𑌕𑍍𑌷𑌣𑌸𑍍𑌸
𑌕𑌾𑌮𑌾𑌕𑍍𑌷𑌿 𑌮𑍂𑌕𑌮𑌪𑌿 𑌵𑍀𑌕𑍍𑌷𑌣𑌮𑌾𑌤𑍍𑌰𑌨𑌮𑍍𑌰𑌮𑍍 ।
𑌸𑌰𑍍𑌵𑌜𑍍𑌞𑌤𑌾 𑌸𑌕𑌲𑌲𑍋𑌕𑌸𑌮𑌕𑍍𑌷𑌮𑍇𑌵
𑌕𑍀𑌰𑍍𑌤𑌿𑌸𑍍𑌵𑌯𑌂𑌵𑌰𑌣𑌮𑌾𑌲𑍍𑌯𑌵𑌤𑍀 𑌵𑍃𑌣𑍀𑌤𑍇 ॥3𑍮॥

𑌕𑌾𑌲𑌾𑌂𑌬𑍁𑌵𑌾𑌹 𑌉𑌵 𑌤𑍇 𑌪𑌰𑌿𑌤𑌾𑌪𑌹𑌾𑌰𑍀
𑌕𑌾𑌮𑌾𑌕𑍍𑌷𑌿 𑌪𑍁𑌷𑍍𑌕𑌰𑌮𑌧𑌃𑌕𑍁𑌰𑍁𑌤𑍇 𑌕𑌟𑌾𑌖𑍍𑌕𑍍𑌷𑍍𑌷𑌃 ।
𑌪𑍂𑌰𑍍𑌵𑌃 𑌪𑌰𑌂 𑌕𑍍𑌷𑌣𑌰𑍁𑌚𑌾 𑌸𑌮𑍁𑌪𑍈𑌤𑌿 𑌮𑍈𑌤𑍍𑌰𑍀-
𑌮𑌨𑍍𑌯𑌸𑍍𑌤𑍁 𑌸.𑌤𑌤𑌰𑍁𑌚𑌿𑌂 𑌪𑍍𑌰𑌕𑌟𑍀𑌕𑌰𑍋𑌤𑌿 ॥3𑍯॥

𑌸𑍂𑌕𑍍𑌷𑍍𑌮𑍇𑌽𑌪𑌿 𑌦𑍁𑌰𑍍𑌗𑌮𑌤𑌰𑍇𑌽𑌪𑌿 𑌗𑍁𑌰𑍁𑌪𑍍𑌰𑌸𑌾𑌦-
𑌸𑌾𑌹𑌾𑌯𑍍𑌯𑌕𑍇𑌨 𑌵𑌿𑌚𑌰𑌨𑍍𑌨𑌪𑌵𑌰𑍍𑌗𑌮𑌾𑌰𑍍𑌗𑍇 ।
𑌸𑌂𑌸𑌾𑌰𑌪𑌂𑌕𑌨𑌿𑌚𑌯𑍇 𑌨 𑌪𑌤𑌤𑍍𑌯𑌮𑍂𑌂 𑌤𑍇
𑌕𑌾𑌮𑌾𑌕𑍍𑌷𑌿 𑌗𑌾𑌢𑌮𑌵𑌲𑌂𑌬𑍍𑌯 𑌕𑌟𑌾𑌕𑍍𑌷𑌯𑌷𑍍𑌟𑌿𑌮𑍍 ॥40॥

𑌕𑌾𑌮𑌾𑌕𑍍𑌷𑌿 𑌸𑌂𑌤𑌤𑌮𑌸𑍌 𑌹𑌰𑌿𑌨𑍀𑌲𑌰𑌤𑍍𑌨-
𑌸𑍍𑌤𑌂𑌭𑍇 𑌕𑌟𑌾𑌕𑍍𑌷𑌰𑍁𑌚𑌿𑌪𑍁𑌂𑌜𑌮𑌯𑍇 𑌭𑌵𑌤𑍍𑌯𑌾𑌃 ।
𑌬𑌦𑍍𑌧𑍋𑌽𑌪𑌿 𑌭𑌕𑍍𑌤𑌿𑌨𑌿𑌗𑌲𑍈𑌰𑍍𑌮𑌮 𑌚𑌿𑌤𑍍𑌤𑌹𑌸𑍍𑌤𑍀
𑌸𑍍𑌤𑌂𑌭𑌂 𑌚 𑌬𑌂𑌧𑌮𑌪𑌿 𑌮𑍁𑌂𑌚𑌤𑌿 𑌹𑌂𑌤 𑌚𑌿𑌤𑍍𑌰𑌮𑍍 ॥41॥

𑌕𑌾𑌮𑌾𑌕𑍍𑌷𑌿 𑌕𑌾𑌷𑍍𑌣𑌰𑍍𑌯𑌮𑌪𑌿 𑌸𑌂𑌤𑌤𑌮𑌂𑌜𑌨𑌂 𑌚
𑌬𑌿𑌭𑍍𑌰𑌨𑍍𑌨𑌿𑌸𑌰𑍍𑌗𑌤𑌰𑌲𑍋𑌽𑌪𑌿 𑌭𑌵𑌤𑍍𑌕𑌟𑌾𑌕𑍍𑌷𑌃 ।
𑌵𑍈𑌮𑌲𑍍𑌯𑌮𑌨𑍍𑌵𑌹𑌮𑌨𑌂𑌜𑌨𑌤𑌾 𑌚 𑌭𑍂𑌯𑌃
𑌸𑍍𑌥𑍈𑌰𑍍𑌯𑌂 𑌚 𑌭𑌕𑍍𑌤𑌹𑍃𑌦𑌯𑌾𑌯 𑌕𑌥𑌂 𑌦𑌦𑌾𑌤𑌿 ॥42॥

𑌮𑌂𑌦𑌸𑍍𑌮𑌿𑌤𑌸𑍍𑌤𑌬𑌕𑌿𑌤𑌂 𑌮𑌣𑌿𑌕𑍁𑌂𑌡𑌲𑌾𑌂𑌶𑍁-
𑌸𑍍𑌤𑍋𑌮𑌪𑍍𑌰𑌵𑌾𑌲𑌰𑍁𑌚𑌿𑌰𑌂 𑌶𑌿𑌶𑌿𑌰𑍀𑌕𑍃𑌤𑌾𑌶𑌮𑍍 ।
𑌕𑌾𑌮𑌾𑌕𑍍𑌷𑌿 𑌰𑌾𑌜𑌤𑌿 𑌕𑌟𑌾𑌕𑍍𑌷𑌰𑍁𑌚𑍇𑌃 𑌕𑌦𑌂𑌬𑌮𑍍
𑌉𑌦𑍍𑌯𑌾𑌨𑌮𑌂𑌬 𑌕𑌰𑍁𑌣𑌾𑌹𑌰𑌿𑌣𑍇𑌕𑍍𑌷𑌣𑌾𑌯𑌾𑌃 ॥43॥

𑌕𑌾𑌮𑌾𑌕𑍍𑌷𑌿 𑌤𑌾𑌵𑌕𑌕𑌟𑌾𑌕𑍍𑌷𑌮𑌹𑍇𑌂𑌦𑍍𑌰𑌨𑍀𑌲-
𑌸𑌿𑌂𑌹𑌾𑌸𑌨𑌂 𑌶𑍍𑌰𑌿𑌤𑌵𑌤𑍋 𑌮𑌕𑌰𑌧𑍍𑌵𑌜𑌸𑍍𑌯 ।
𑌸𑌾𑌮𑍍𑌰𑌾𑌜𑍍𑌯𑌮𑌂𑌗𑌲𑌵𑌿𑌧𑍌 𑌮𑍁𑌣𑌿𑌕𑍁𑌂𑌡𑌲𑌶𑍍𑌰𑍀𑌃
𑌨𑍀𑌰𑌾𑌜𑌨𑍋𑌤𑍍𑌸𑌵𑌤𑌰𑌂𑌗𑌿𑌤𑌦𑍀𑌪𑌮𑌾𑌲𑌾 ॥44॥

𑌮𑌾𑌤𑌃 𑌕𑍍𑌷𑌣𑌂 𑌸𑍍𑌨𑌪𑌯 𑌮𑌾𑌂 𑌤𑌵 𑌵𑍀𑌕𑍍𑌷𑌿𑌤𑍇𑌨
𑌮𑌂𑌦𑌾𑌕𑍍𑌷𑌿𑌤𑍇𑌨 𑌸𑍁𑌜𑌨𑍈𑌰𑌪𑌰𑍋𑌕𑍍𑌷𑌿𑌤𑍇𑌨 ।
𑌕𑌾𑌮𑌾𑌕𑍍𑌷𑌿 𑌕𑌰𑍍𑌮𑌤𑌿𑌮𑌿𑌰𑍋𑌤𑍍𑌕𑌰𑌭𑌾𑌸𑍍𑌕𑌰𑍇𑌣
𑌶𑍍𑌰𑍇𑌯𑌸𑍍𑌕𑌰𑍇𑌣 𑌮𑌧𑍁𑌪𑌦𑍍𑌯𑍁𑌤𑌿𑌤𑌸𑍍𑌕𑌰𑍇𑌣 ॥45॥

𑌪𑍍𑌰𑍇𑌮𑌾𑌪𑌗𑌾𑌪𑌯𑌸𑌿 𑌮𑌜𑍍𑌜𑌨𑌮𑌾𑌰𑌚𑌯𑍍𑌯
𑌯𑍁𑌕𑍍𑌤𑌃 𑌸𑍍𑌮𑌿𑌤𑌾𑌂𑌶𑍁𑌕𑍃𑌤𑌭𑌸𑍍𑌮𑌵𑌿𑌲𑍇𑌪𑌨𑍇𑌨 ।
𑌕𑌾𑌮𑌾𑌕𑍍𑌷𑌿 𑌕𑍁𑌂𑌡𑌲𑌮𑌣𑌿𑌦𑍍𑌯𑍁𑌤𑌿𑌭𑌿𑌰𑍍𑌜𑌟𑌾𑌲𑌃
𑌶𑍍𑌰𑍀𑌕𑌂𑌠𑌮𑍇𑌵 𑌭𑌜𑌤𑍇 𑌤𑌵 𑌦𑍃𑌷𑍍𑌟𑌿𑌪𑌾𑌤𑌃 ॥46॥

𑌕𑍈𑌵𑌲𑍍𑌯𑌦𑌾𑌯 𑌕𑌰𑍁𑌣𑌾𑌰𑌸𑌕𑌿𑌂𑌕𑌰𑌾𑌯
𑌕𑌾𑌮𑌾𑌕𑍍𑌷𑌿 𑌕𑌂𑌦𑌲𑌿𑌤𑌵𑌿𑌭𑍍𑌰𑌮𑌶𑌂𑌕𑌰𑌾𑌯 ।
𑌆𑌲𑍋𑌕𑌨𑌾𑌯 𑌤𑌵 𑌭𑌕𑍍𑌤𑌶𑌿𑌵𑌂𑌕𑌰𑌾𑌯
𑌮𑌾𑌤𑌰𑍍𑌨𑌮𑍋𑌽𑌸𑍍𑌤𑍁 𑌪𑌰𑌤𑌂𑌤𑍍𑌰𑌿𑌤𑌶𑌂𑌕𑌰𑌾𑌯 ॥4𑍭॥

𑌸𑌾𑌮𑍍𑌰𑌾𑌜𑍍𑌯𑌮𑌂𑌗𑌲𑌵𑌿𑌧𑍌 𑌮𑌕𑌰𑌧𑍍𑌵𑌜𑌸𑍍𑌯
𑌲𑍋𑌲𑌾𑌲𑌕𑌾𑌲𑌿𑌕𑍃𑌤𑌤𑍋𑌰𑌣𑌮𑌾𑌲𑍍𑌯𑌶𑍋𑌭𑍇 ।
𑌕𑌾𑌮𑍇𑌶𑍍𑌵𑌰𑌿 𑌪𑍍𑌰𑌚𑌲𑌦𑍁𑌤𑍍𑌪𑌲𑌵𑍈𑌜𑌯𑌂𑌤𑍀-
𑌚𑌾𑌤𑍁𑌰𑍍𑌯𑌮𑍇𑌤𑌿 𑌤𑌵 𑌚𑌂𑌚𑌲𑌦𑍃𑌷𑍍𑌟𑌿𑌪𑌾𑌤𑌃 ॥4𑍮॥

𑌮𑌾𑌰𑍍𑌗𑍇𑌣 𑌮𑌂𑌜𑍁𑌕𑌚𑌕𑌾𑌂𑌤𑌿𑌤𑌮𑍋𑌵𑍃𑌤𑍇𑌨
𑌮𑌂𑌦𑌾𑌯𑌮𑌾𑌨𑌗𑌮𑌨𑌾 𑌮𑌦𑌨𑌾𑌤𑍁𑌰𑌾𑌸𑍌 ।
𑌕𑌾𑌮𑌾𑌕𑍍𑌷𑌿 𑌦𑍃𑌷𑍍𑌟𑌿𑌰𑌯𑌤𑍇 𑌤𑌵 𑌶𑌂𑌕𑌰𑌾𑌯
𑌸𑌂𑌕𑍇𑌤𑌭𑍂𑌮𑌿𑌮𑌚𑌿𑌰𑌾𑌦𑌭𑌿𑌸𑌾𑌰𑌿𑌕𑍇𑌵 ॥4𑍯॥

𑌵𑍍𑌰𑍀𑌡𑌨𑍁𑌵𑍃𑌤𑍍𑌤𑌿𑌰𑌮𑌣𑍀𑌕𑍃𑌤𑌸𑌾𑌹𑌚𑌰𑍍𑌯𑌾
𑌶𑍈𑌵𑌾𑌲𑌿𑌤𑌾𑌂 𑌗𑌲𑌰𑍁𑌚𑌾 𑌶𑌶𑌿𑌶𑍇𑌖𑌰𑌸𑍍𑌯 ।
𑌕𑌾𑌮𑌾𑌕𑍍𑌷𑌿 𑌕𑌾𑌂𑌤𑌿𑌸𑌰𑌸𑍀𑌂 𑌤𑍍𑌵𑌦𑌪𑌾𑌂𑌗𑌲𑌕𑍍𑌷𑍍𑌮𑍀𑌃
𑌮𑌂𑌦𑌂 𑌸𑌮𑌾𑌶𑍍𑌰𑌯𑌤𑌿 𑌮𑌜𑍍𑌜𑌨𑌖𑍇𑌲𑌨𑌾𑌯 ॥50॥

𑌕𑌾𑌷𑌾𑌯𑌮𑌂𑌶𑍁𑌕𑌮𑌿𑌵 𑌪𑍍𑌰𑌕𑌟𑌂 𑌦𑌧𑌾𑌨𑍋
𑌮𑌾𑌣𑌿𑌕𑍍𑌯𑌕𑍁𑌂𑌡𑌲𑌰𑍁𑌚𑌿𑌂 𑌮𑌮𑌤𑌾𑌵𑌿𑌰𑍋𑌧𑍀 ।
𑌶𑍍𑌰𑍁𑌤𑍍𑌯𑌂𑌤𑌸𑍀𑌮𑌨𑌿 𑌰𑌤𑌃 𑌸𑍁𑌤𑌰𑌾𑌂 𑌚𑌕𑌾𑌸𑍍𑌤𑌿
𑌕𑌾𑌮𑌾𑌕𑍍𑌷𑌿 𑌤𑌾𑌵𑌕𑌕𑌟𑌾𑌕𑍍𑌷𑌯𑌤𑍀𑌶𑍍𑌵𑌰𑍋𑌽𑌸𑍌 ॥51॥

𑌪𑌾𑌷𑌾𑌣 𑌏𑌵 𑌹𑌰𑌿𑌨𑍀𑌲𑌮𑌣𑌿𑌰𑍍𑌦𑌿𑌨𑍇𑌷𑍁
𑌪𑍍𑌰𑌮𑍍𑌲𑌨𑌤𑌾𑌂 𑌕𑍁𑌵𑌲𑌯𑌂 𑌪𑍍𑌰𑌕𑌟𑍀𑌕𑌰𑍋𑌤𑌿 ।
𑌨𑍌𑌮𑌿𑌤𑍍𑌤𑌿𑌕𑍋 𑌜𑌲𑌦𑌮𑍇𑌚𑌕𑌿𑌮𑌾 𑌤𑌤𑌸𑍍𑌤𑍇
𑌕𑌾𑌮𑌾𑌕𑍍𑌷𑌿 𑌶𑍂𑌨𑍍𑌯𑌮𑍁𑌪𑌮𑌨𑌮𑌪𑌾𑌂𑌗𑌲𑌕𑍍𑌷𑍍𑌮𑍍𑌯𑌾𑌃 ॥52॥

𑌶𑍃𑌂𑌗𑌾𑌰𑌵𑌿𑌭𑍍𑌰𑌮𑌵𑌤𑍀 𑌸𑍁𑌤𑌰𑌾𑌂 𑌸𑌲𑌜𑍍𑌜𑌾
𑌨𑌾𑌸𑌾𑌗𑍍𑌰𑌮𑍌𑌕𑍍𑌤𑌿𑌕𑌰𑍁𑌚𑌾 𑌕𑍃𑌤𑌮𑌂𑌦𑌹𑌾𑌸𑌾 ।
𑌶𑍍𑌯𑌾𑌮𑌾 𑌕𑌟𑌾𑌕𑍍𑌷𑌸𑍁𑌷𑌮𑌾 𑌤𑌵 𑌯𑍁𑌕𑍍𑌤𑌮𑍇𑌤𑌤𑍍
𑌕𑌾𑌮𑌾𑌕𑍍𑌷𑌿 𑌚𑍁𑌂𑌬𑌤𑌿 𑌦𑌿𑌗𑌂𑌬𑌰𑌵𑌕𑍍𑌤𑍍𑌰𑌬𑌿𑌂𑌬𑌮𑍍 ॥53॥

𑌨𑍀𑌲𑍋𑌤𑍍𑌪𑌲𑍇𑌨 𑌮𑌧𑍁𑌪𑍇𑌨 𑌚 𑌦𑍃𑌷𑍍𑌟𑌿𑌪𑌾𑌤𑌃
𑌕𑌾𑌮𑌾𑌕𑍍𑌷𑌿 𑌤𑍁𑌲𑍍𑌯 𑌇𑌤𑌿 𑌤𑍇 𑌕𑌥𑌮𑌾𑌮𑌨𑌂𑌤𑌿 ।
𑌶𑍈𑌤𑍍𑌯𑍇𑌨 𑌨𑌿𑌂𑌦𑌯𑌤𑌿 𑌯𑌦𑌨𑍍𑌵𑌹𑌮𑌿𑌂𑌦𑍁𑌪𑌾𑌦𑌾𑌨𑍍
𑌪𑌾𑌥𑍋𑌰𑍁𑌹𑍇𑌣 𑌯𑌦𑌸𑍌 𑌕𑌲𑌹𑌾𑌯𑌤𑍇 𑌚 ॥54॥

𑌓𑌷𑍍𑌠𑌪𑍍𑌰𑌭𑌾𑌪𑌟𑌲𑌵𑌿𑌦𑍍𑌰𑍁𑌮𑌮𑍁𑌦𑍍𑌰𑌿𑌤𑍇 𑌤𑍇
𑌭𑍍𑌰𑍂𑌵𑌲𑍍𑌲𑌿𑌵𑍀𑌚𑌿𑌸𑍁𑌭𑌗𑍇 𑌮𑍁𑌖𑌕𑌾𑌂𑌤𑌿𑌸𑌿𑌂𑌧𑍌 ।
𑌕𑌾𑌮𑌾𑌕𑍍𑌷𑌿 𑌵𑌾𑌰𑌿𑌭𑌰𑌪𑍂𑌰𑌣𑌲𑌂𑌬𑌮𑌾𑌨-
𑌕𑌾𑌲𑌾𑌂𑌬𑍁𑌵𑌾𑌹𑌸𑌰𑌣𑌿𑌂 𑌲𑌭𑌤𑍇 𑌕𑌟𑌾𑌕𑍍𑌷𑌃 ॥55॥

𑌮𑌂𑌦𑌸𑍍𑌮𑌿𑌤𑍈𑌰𑍍𑌧𑌵𑌲𑌿𑌤𑌾 𑌮𑌣𑌿𑌕𑍁𑌂𑌡𑌲𑌾𑌂𑌶𑍁-
𑌸𑌂𑌪𑌰𑍍𑌕𑌲𑍋𑌹𑌿𑌤𑌰𑍁𑌚𑌿𑌸𑍍𑌤𑍍𑌵𑌦𑌪𑌾𑌂𑌗𑌧𑌾𑌰𑌾 ।
𑌕𑌾𑌮𑌾𑌕𑍍𑌷𑌿 𑌮𑌲𑍍𑌲𑌿𑌕𑍁𑌸𑍁𑌮𑍈𑌰𑍍𑌨𑌵𑌪𑌲𑍍𑌲𑌵𑍈𑌶𑍍𑌚
𑌨𑍀𑌲𑍋𑌤𑍍𑌪𑌲𑍈𑌶𑍍𑌚 𑌰𑌚𑌿𑌤𑍇𑌵 𑌵𑌿𑌭𑌾𑌤𑌿 𑌮𑌾𑌲𑌾 ॥56॥

𑌕𑌾𑌮𑌾𑌕𑍍𑌷𑌿 𑌶𑍀𑌤𑌲𑌕𑍃𑌪𑌾𑌰𑌸𑌨𑌿𑌰𑍍𑌝𑌰𑌾𑌂𑌭𑌃-
𑌸𑌂𑌪𑌰𑍍𑌕𑌪𑌕𑍍𑌷𑍍𑌮𑌲𑌰𑍁𑌚𑌿𑌸𑍍𑌤𑍍𑌵𑌦𑌪𑌾𑌂𑌗𑌮𑌾𑌲𑌾 ।
𑌗𑍋𑌭𑌿𑌃 𑌸𑌦𑌾 𑌪𑍁𑌰𑌰𑌿𑌪𑍋𑌰𑌭𑌿𑌲𑌷𑍍𑌯𑌮𑌾𑌣𑌾
𑌦𑍂𑌰𑍍𑌵𑌾𑌕𑌦𑌂𑌬𑌕𑌵𑌿𑌡𑌂𑌬𑌨𑌮𑌾𑌤𑌨𑍋𑌤𑌿 ॥5𑍭॥

𑌹𑍃𑌤𑍍𑌪𑌂𑌕𑌜𑌂 𑌮𑌮 𑌵𑌿𑌕𑌾𑌸𑌯𑌤𑍁 𑌪𑍍𑌰𑌮𑍁𑌷𑍍𑌣-
𑌨𑍍𑌨𑍁𑌲𑍍𑌲𑌾𑌸𑌮𑍁𑌤𑍍𑌪𑌲𑌰𑍁𑌚𑍇𑌸𑍍𑌤𑌮𑌸𑌾𑌂 𑌨𑌿𑌰𑍋𑌦𑍍𑌧𑌾 ।
𑌦𑍋𑌷𑌾𑌨𑍁𑌷𑌂𑌗𑌜𑌡𑌤𑌾𑌂 𑌜𑌗𑌤𑌾𑌂 𑌧𑍁𑌨𑌾𑌨𑌃
𑌕𑌾𑌮𑌾𑌕𑍍𑌷𑌿 𑌵𑍀𑌕𑍍𑌷𑌣𑌵𑌿𑌲𑌾𑌸𑌦𑌿𑌨𑍋𑌦𑌯𑌸𑍍𑌤𑍇 ॥5𑍮॥

𑌚𑌕𑍍𑌷𑍁𑌰𑍍𑌵𑌿𑌮𑍋𑌹𑌯𑌤𑌿 𑌚𑌂𑌦𑍍𑌰𑌵𑌿𑌭𑍂𑌷𑌣𑌸𑍍𑌯
𑌕𑌾𑌮𑌾𑌕𑍍𑌷𑌿 𑌤𑌾𑌵𑌕𑌕𑌟𑌾𑌕𑍍𑌷𑌤𑌮𑌃𑌪𑍍𑌰𑌰𑍋𑌹𑌃 ।
𑌪𑍍𑌰𑌤𑍍𑌯𑌙𑍍𑌮𑍁𑌖𑌂 𑌤𑍁 𑌨𑌯𑌨𑌂 𑌸𑍍𑌤𑌿𑌮𑌿𑌤𑌂 𑌮𑍁𑌨𑍀𑌨𑌾𑌂
𑌪𑍍𑌰𑌾𑌕𑌾𑌶𑍍𑌯𑌮𑍇𑌵 𑌨𑌯𑌤𑍀𑌤𑌿 𑌪𑌰𑌂 𑌵𑌿𑌚𑌿𑌤𑍍𑌰𑌮𑍍 ॥5𑍯॥

𑌕𑌾𑌮𑌾𑌕𑍍𑌷𑌿 𑌵𑍀𑌕𑍍𑌷𑌣𑌰𑍁𑌚𑌾 𑌯𑍁𑌧𑌿 𑌨𑌿𑌰𑍍𑌜𑌿𑌤𑌂 𑌤𑍇
𑌨𑍀𑌲𑍋𑌤𑍍𑌪𑌲𑌂 𑌨𑌿𑌰𑌵𑌶𑍇𑌷𑌗𑌤𑌾𑌭𑌿𑌮𑌾𑌨𑌮𑍍 ।
𑌆𑌗𑌤𑍍𑌯 𑌤𑌤𑍍𑌪𑌰𑌿𑌸𑌰𑌂 𑌶𑍍𑌰𑌵𑌣𑌵𑌤𑌂𑌸-
𑌵𑍍𑌯𑍋𑌜𑍇𑌨 𑌨𑍂𑌨𑌮𑌭𑌯𑌾𑌰𑍍𑌥𑌨𑌮𑌾𑌤𑌨𑍋𑌤𑌿 ॥60॥

𑌆𑌶𑍍𑌚𑌰𑍍𑌯𑌮𑌂𑌬 𑌮𑌦𑌾𑌨𑌾𑌭𑍍𑌯𑍁𑌦𑌯𑌾𑌵𑌲𑌂𑌬𑌃
𑌕𑌾𑌮𑌾𑌕𑍍𑌷𑌿 𑌚𑌂𑌚𑌲𑌨𑌿𑌰𑍀𑌕𑍍𑌷𑌣𑌵𑌿𑌭𑍍𑌰𑌮𑌸𑍍𑌤𑍇 ।
𑌧𑍈𑌰𑍍𑌯𑌂 𑌵𑌿𑌧𑍂𑌯 𑌤𑌨𑍁𑌤𑍇 𑌹𑍃𑌦𑌿 𑌰𑌾𑌗𑌬𑌂𑌧𑌂
𑌶𑌂𑌭𑍋𑌸𑍍𑌤𑌦𑍇𑌵 𑌵𑌿𑌪𑌰𑍀𑌤𑌤𑌯𑌾 𑌮𑍁𑌨𑍀𑌨𑌾𑌮𑍍 ॥61॥

𑌜𑌂𑌤𑍋𑌃 𑌸𑌕𑍃𑌤𑍍𑌪𑍍𑌰𑌣𑌮𑌤𑍋 𑌜𑌗𑌦𑍀𑌡𑍍𑌯𑌤𑌾𑌂 𑌚
𑌤𑍇𑌜𑌾𑌸𑍍𑌵𑌿𑌤𑌾𑌂 𑌚 𑌨𑌿𑌶𑌿𑌤𑌾𑌂 𑌚 𑌮𑌤𑌿𑌂 𑌸𑌭𑌾𑌯𑌾𑌮𑍍 ।
𑌕𑌾𑌮𑌾𑌕𑍍𑌷𑌿 𑌮𑌾𑌕𑍍𑌷𑌿𑌕𑌝𑌰𑍀𑌮𑌿𑌵 𑌵𑍈𑌖𑌰𑍀𑌂 𑌚
𑌲𑌕𑍍𑌷𑍍𑌮𑍀𑌂 𑌚 𑌪𑌕𑍍𑌷𑍍𑌮𑌲𑌯𑌤𑌿 𑌕𑍍𑌷𑌣𑌵𑍀𑌕𑍍𑌷𑌣𑌂 𑌤𑍇 ॥62॥

𑌕𑌾𑌦𑌂𑌬𑌿𑌨𑍀 𑌕𑌿𑌮𑌯𑌤𑍇 𑌨 𑌜𑌲𑌾𑌨𑍁𑌷𑌂𑌗𑌂
𑌭𑍃𑌂𑌗𑌾𑌵𑌲𑍀 𑌕𑌿𑌮𑍁𑌰𑌰𑍀𑌕𑍁𑌰𑍁𑌤𑍇 𑌨 𑌪𑌦𑍍𑌮𑌮𑍍 ।
𑌕𑌿𑌂 𑌵𑌾 𑌕𑌲𑌿𑌂𑌦𑌤𑌨𑌯𑌾 𑌸𑌹𑌤𑍇 𑌨 𑌭𑌂𑌗𑌂
𑌕𑌾𑌮𑌾𑌕𑍍𑌷𑌿 𑌨𑌿𑌶𑍍𑌚𑌯𑌪𑌦𑌂 𑌨 𑌤𑌵𑌾𑌕𑍍𑌷𑌿𑌲𑌕𑍍𑌷𑍍𑌮𑍀𑌃 ॥63॥

𑌕𑌾𑌕𑍋𑌲𑌪𑌾𑌵𑌕𑌤𑍃𑌣𑍀𑌕𑌰𑌣𑍇𑌽𑌪𑌿 𑌦𑌕𑍍𑌷𑌃
𑌕𑌾𑌮𑌾𑌕𑍍𑌷𑌿 𑌬𑌾𑌲𑌕𑌸𑍁𑌧𑌾𑌕𑌰𑌶𑍇𑌖𑌰𑌸𑍍𑌯 ।
𑌅𑌤𑍍𑌯𑌂𑌤𑌶𑍀𑌤𑌲𑌤𑌮𑍋𑌽𑌪𑍍𑌯𑌨𑍁𑌪𑌾𑌰𑌤𑌂 𑌤𑍇
𑌚𑌿𑌤𑍍𑌤𑌂 𑌵𑌿𑌮𑍋𑌹𑌯𑌤𑌿 𑌚𑌿𑌤𑍍𑌰𑌮𑌯𑌂 𑌕𑌟𑌾𑌕𑍍𑌷𑌃 ॥64॥

𑌕𑌾𑌰𑍍𑌪𑌣𑍍𑌯𑌪𑍂𑌰𑌪𑌰𑌿𑌵𑌰𑍍𑌧𑌿𑌤𑌮𑌂𑌬 𑌮𑍋𑌹-
𑌕𑌂𑌦𑍋𑌦𑍍𑌗𑌤𑌂 𑌭𑌵𑌮𑌯𑌂 𑌵𑌿𑌷𑌪𑌾𑌦𑌪𑌂 𑌮𑍇 ।
𑌤𑍁𑌂𑌗𑌂 𑌛𑌿𑌨𑌤𑍍𑌤𑍁 𑌤𑍁𑌹𑌿𑌨𑌾𑌦𑍍𑌰𑌿𑌸𑍁𑌤𑍇 𑌭𑌵𑌤𑍍𑌯𑌾𑌃
𑌕𑌾𑌂𑌚𑍀𑌪𑍁𑌰𑍇𑌶𑍍𑌵𑌰𑌿 𑌕𑌟𑌾𑌕𑍍𑌷𑌕𑍁𑌠𑌾𑌰𑌧𑌾𑌰𑌾 ॥65॥

𑌕𑌾𑌮𑌾𑌕𑍍𑌷𑌿 𑌘𑍋𑌰𑌭𑌵𑌰𑍋𑌗𑌚𑌿𑌕𑌿𑌤𑍍𑌸𑌨𑌾𑌰𑍍𑌥-
𑌮𑌭𑍍𑌯𑌰𑍍𑌥𑍍𑌯 𑌦𑍇𑌶𑌿𑌕𑌕𑌟𑌾𑌕𑍍𑌷𑌭𑌿𑌷𑌕𑍍𑌪𑍍𑌰𑌸𑌾𑌦𑌾𑌤𑍍 ।
𑌤𑌤𑍍𑌰𑌾𑌪𑌿 𑌦𑍇𑌵𑌿 𑌲𑌭𑌤𑍇 𑌸𑍁𑌕𑍃𑌤𑍀 𑌕𑌦𑌾𑌚𑌿-
𑌦𑌨𑍍𑌯𑌸𑍍𑌯 𑌦𑍁𑌰𑍍𑌲𑌭𑌮𑌪𑌾𑌂𑌗𑌮𑌹𑍌𑌷𑌧𑌂 𑌤𑍇 ॥66॥

𑌕𑌾𑌮𑌾𑌕𑍍𑌷𑌿 𑌦𑍇𑌶𑌿𑌕𑌕𑍃𑌪𑌾𑌂𑌕𑍁𑌰𑌮𑌾𑌶𑍍𑌰𑌯𑌂𑌤𑍋
𑌨𑌾𑌨𑌾𑌤𑌪𑍋𑌨𑌿𑌯𑌮𑌨𑌾𑌶𑌿𑌤𑌪𑌾𑌶𑌬𑌂𑌧𑌾𑌃 ।
𑌵𑌾𑌸𑌾𑌲𑌯𑌂 𑌤𑌵 𑌕𑌟𑌾𑌕𑍍𑌷𑌮𑌮𑍁𑌂 𑌮𑌹𑌾𑌂𑌤𑍋
𑌲𑌬𑍍𑌧𑍍𑌵𑌾 𑌸𑍁𑌖𑌂 𑌸𑌮𑌾𑌧𑌿𑌯𑍋 𑌵𑌿𑌚𑌰𑌂𑌤𑌿 𑌲𑍋𑌕𑍇 ॥6𑍭॥

𑌸𑌾𑌕𑍂𑌤𑌸𑌂𑌲𑌪𑌿𑌤𑌸𑌂𑌭𑍃𑌤𑌮𑍁𑌗𑍍𑌧𑌹𑌾𑌸𑌂
𑌵𑍍𑌰𑍀𑌡𑌾𑌨𑍁𑌰𑌾𑌗𑌸𑌹𑌚𑌾𑌰𑌿 𑌵𑌿𑌲𑍋𑌕𑌨𑌂 𑌤𑍇 ।
𑌕𑌾𑌮𑌾𑌕𑍍𑌷𑌿 𑌕𑌾𑌮𑌪𑌰𑌿𑌪𑌂𑌥𑌿𑌨𑌿 𑌮𑌾𑌰𑌵𑍀𑌰-
𑌸𑌾𑌮𑍍𑌰𑌾𑌜𑍍𑌯𑌵𑌿𑌭𑍍𑌰𑌮𑌦𑌶𑌾𑌂 𑌸𑌫𑌲𑍀𑌕𑌰𑍋𑌤𑌿 ॥6𑍮॥

𑌕𑌾𑌮𑌾𑌕𑍍𑌷𑌿 𑌵𑌿𑌭𑍍𑌰𑌮𑌬𑌲𑍈𑌕𑌨𑌿𑌧𑌿𑌰𑍍𑌵𑌿𑌧𑌾𑌯
𑌭𑍍𑌰𑍂𑌵𑌲𑍍𑌲𑌿𑌚𑌾𑌪𑌕𑍁𑌟𑌿𑌲𑍀𑌕𑍃𑌤𑌿𑌮𑍇𑌵 𑌚𑌿𑌤𑍍𑌰𑌮𑍍 ।
𑌸𑍍𑌵𑌾𑌧𑍀𑌨𑌤𑌾𑌂 𑌤𑌵 𑌨𑌿𑌨𑌾𑌯 𑌶𑌶𑌾𑌂𑌕𑌮𑍌𑌲𑍇-
𑌰𑌂𑌗𑌾𑌰𑍍𑌧𑌰𑌾𑌜𑍍𑌯𑌸𑍁𑌖𑌲𑌾𑌭𑌮𑌪𑌾𑌂𑌗𑌵𑍀𑌰𑌃 ॥6𑍯॥

𑌕𑌾𑌮𑌾𑌂𑌕𑍁𑌰𑍈𑌕𑌨𑌿𑌲𑌯𑌸𑍍𑌤𑌵 𑌦𑍃𑌷𑍍𑌟𑌿𑌪𑌾𑌤𑌃
𑌕𑌾𑌮𑌾𑌕𑍍𑌷𑌿 𑌭𑌕𑍍𑌤𑌮𑌨𑌸𑌾𑌂 𑌪𑍍𑌰𑌦𑌦𑌾𑌤𑍁 𑌕𑌾𑌮𑌾𑌨𑍍 ।
𑌰𑌾𑌗𑌾𑌨𑍍𑌵𑌿𑌤𑌃 𑌸𑍍𑌵𑌯𑌮𑌪𑌿 𑌪𑍍𑌰𑌕𑌟𑍀𑌕𑌰𑍋𑌤𑌿
𑌵𑍈𑌰𑌾𑌗𑍍𑌯𑌮𑍇𑌵 𑌕𑌥𑌮𑍇𑌷 𑌮𑌹𑌾𑌮𑍁𑌨𑍀𑌨𑌾𑌮𑍍 ॥𑍭0॥

𑌕𑌾𑌲𑌾𑌂𑌬𑍁𑌵𑌾𑌹𑌨𑌿𑌵𑌹𑍈𑌃 𑌕𑌲𑌹𑌾𑌯𑌤𑍇 𑌤𑍇
𑌕𑌾𑌮𑌾𑌕𑍍𑌷𑌿 𑌕𑌾𑌲𑌿𑌮𑌮𑌦𑍇𑌨 𑌸𑌦𑌾 𑌕𑌟𑌾𑌕𑍍𑌷𑌃 ।
𑌚𑌿𑌤𑍍𑌰𑌂 𑌤𑌥𑌾𑌪𑌿 𑌨𑌿𑌤𑌰𑌾𑌮𑌮𑍁𑌮𑍇𑌵 𑌦𑍃𑌷𑍍𑌟𑍍𑌵𑌾
𑌸𑍋𑌤𑍍𑌕𑌂𑌠 𑌏𑌵 𑌰𑌮𑌤𑍇 𑌕𑌿𑌲 𑌨𑍀𑌲𑌕𑌂𑌠𑌃 ॥𑍭1॥

𑌕𑌾𑌮𑌾𑌕𑍍𑌷𑌿 𑌮𑌨𑍍𑌮𑌥𑌰𑌿𑌪𑍁𑌂 𑌪𑍍𑌰𑌤𑌿 𑌮𑌾𑌰𑌤𑌾𑌪-
𑌮𑍋𑌹𑌾𑌂𑌧𑌕𑌾𑌰𑌜𑌲𑌦𑌾𑌗𑌮𑌨𑍇𑌨 𑌨𑍃𑌤𑍍𑌯𑌨𑍍 ।
𑌦𑍁𑌷𑍍𑌕𑌰𑍍𑌮𑌕𑌂𑌚𑍁𑌕𑌿𑌕𑍁𑌲𑌂 𑌕𑌬𑌲𑍀𑌕𑌰𑍋𑌤𑍁
𑌵𑍍𑌯𑌾𑌮𑌿𑌶𑍍𑌰𑌮𑍇𑌚𑌕𑌰𑍁𑌚𑌿𑌸𑍍𑌤𑍍𑌵𑌦𑌪𑌾𑌂𑌗𑌕𑍇𑌕𑍀 ॥𑍭2॥

𑌕𑌾𑌮𑌾𑌕𑍍𑌷𑌿 𑌮𑌨𑍍𑌮𑌥𑌰𑌿𑌪𑍋𑌰𑌵𑌲𑍋𑌕𑌨𑍇𑌷𑍁
𑌕𑌾𑌂𑌤𑌂 𑌪𑌯𑍋𑌜𑌮𑌿𑌵 𑌤𑌾𑌵𑌕𑌮𑌕𑍍𑌷𑌿𑌪𑌾𑌤𑌮𑍍 ।
𑌪𑍍𑌰𑍇𑌮𑌾𑌗𑌮𑍋 𑌦𑌿𑌵𑌸𑌵𑌦𑍍𑌵𑌿𑌕𑌚𑍀𑌕𑌰𑍋𑌤𑌿
𑌲𑌜𑍍𑌜𑌾𑌭𑌰𑍋 𑌰𑌜𑌨𑌿𑌵𑌨𑍍𑌮𑍁𑌕𑍁𑌲𑍀𑌕𑌰𑍋𑌤𑌿 ॥𑍭3॥

𑌮𑍂𑌕𑍋 𑌵𑌿𑌰𑌿𑌂𑌚𑌤𑌿 𑌪𑌰𑌂 𑌪𑍁𑌰𑍁𑌷𑌃 𑌕𑍁𑌰𑍂𑌪𑌃
𑌕𑌂𑌦𑌰𑍍𑌪𑌤𑌿 𑌤𑍍𑌰𑌿𑌦𑌶𑌰𑌾𑌜𑌤𑌿 𑌕𑌿𑌂𑌪𑌚𑌾𑌨𑌃 ।
𑌕𑌾𑌮𑌾𑌕𑍍𑌷𑌿 𑌕𑍇𑌵𑌲𑌮𑍁𑌪𑌕𑍍𑌰𑌮𑌕𑌾𑌲 𑌏𑌵
𑌲𑍀𑌲𑌾𑌤𑌰𑌂𑌗𑌿𑌤𑌕𑌟𑌾𑌕𑍍𑌷𑌰𑍁𑌚𑌃 𑌕𑍍𑌷𑌣𑌂 𑌤𑍇 ॥𑍭4॥

𑌨𑍀𑌲𑌾𑌲𑌕𑌾 𑌮𑌧𑍁𑌕𑌰𑌂𑌤𑌿 𑌮𑌨𑍋𑌜𑍍𑌞𑌨𑌾𑌸𑌾-
𑌮𑍁𑌕𑍍𑌤𑌾𑌰𑍁𑌚𑌃 𑌪𑍍𑌰𑌕𑌟𑌕𑌂𑌦𑌬𑌿𑌸𑌾𑌂𑌕𑍁𑌰𑌂𑌤𑌿 ।
𑌕𑌾𑌰𑍁𑌣𑍍𑌯𑌮𑌂𑌬 𑌮𑌕𑌰𑌂𑌦𑌤𑌿 𑌕𑌾𑌮𑌕𑍋𑌟𑌿
𑌮𑌨𑍍𑌯𑍇 𑌤𑌤𑌃 𑌕𑌮𑌲𑌮𑍇𑌵 𑌵𑌿𑌲𑍋𑌚𑌨𑌂 𑌤𑍇 ॥𑍭5॥

𑌆𑌕𑌾𑌂𑌕𑍍𑌷𑍍𑌯𑌮𑌾𑌣𑌫𑌲𑌦𑌾𑌨𑌵𑌿𑌚𑌕𑍍𑌷𑌣𑌾𑌯𑌾𑌃 ।
𑌕𑌾𑌮𑌾𑌕𑍍𑌷𑌿 𑌤𑌾𑌵𑌕𑌕𑌟𑌾𑌕𑍍𑌷𑌕𑌕𑌾𑌮𑌧𑍇𑌨𑍋𑌃 ।
𑌸𑌂𑌪𑌰𑍍𑌕 𑌏𑌵 𑌕𑌥𑌮𑌂𑌬 𑌵𑌿𑌮𑍁𑌕𑍍𑌤𑌪𑌾𑌶-
𑌬𑌂𑌧𑌾𑌃 𑌸𑍍𑌫𑍁𑌟𑌂 𑌤𑌨𑍁𑌭𑍃𑌤𑌃 𑌪𑌶𑍁𑌤𑌾𑌂 𑌤𑍍𑌯𑌜𑌂𑌤𑌿 ॥𑍭6॥

𑌸𑌂𑌸𑌾𑌰𑌘𑌰𑍍𑌮𑌪𑌰𑌿𑌤𑌾𑌪𑌜𑍁𑌷𑌾𑌂 𑌨𑌰𑌾𑌣𑌾𑌂
𑌕𑌾𑌮𑌾𑌕𑍍𑌷𑌿 𑌶𑍀𑌤𑌲𑌤𑌰𑌾𑌣𑌿 𑌤𑌵𑍇𑌕𑍍𑌷𑌿𑌤𑌾𑌨𑌿 ।
𑌚𑌂𑌦𑍍𑌰𑌾𑌤𑌪𑌂𑌤𑌿 𑌘𑌨𑌚𑌂𑌦𑌨𑌕𑌰𑍍𑌦𑌮𑌂𑌤𑌿
𑌮𑍁𑌕𑍍𑌤𑌾𑌗𑍁𑌣𑌂𑌤𑌿 𑌹𑌿𑌮𑌵𑌾𑌰𑌿𑌨𑌿𑌷𑍇𑌚𑌨𑌂𑌤𑌿 ॥𑍭𑍭॥

𑌪𑍍𑌰𑍇𑌮𑌾𑌂𑌬𑍁𑌰𑌾𑌶𑌿𑌸𑌤𑌤𑌸𑍍𑌨𑌪𑌿𑌤𑌾𑌨𑌿 𑌚𑌿𑌤𑍍𑌰𑌂
𑌕𑌾𑌮𑌾𑌕𑍍𑌷𑌿 𑌤𑌾𑌵𑌕𑌕𑌟𑌾𑌕𑍍𑌷𑌨𑌿𑌰𑍀𑌕𑍍𑌷𑌣𑌾𑌨𑌿 ।
𑌸𑌂𑌧𑍁𑌕𑍍𑌷𑌯𑌂𑌤𑌿 𑌮𑍁𑌹𑍁𑌰𑌿𑌂𑌧𑌨𑌰𑌾𑌶𑌿𑌰𑍀𑌤𑍍𑌯𑌾
𑌮𑌾𑌰𑌦𑍍𑌰𑍁𑌹𑍋 𑌮𑌨𑌸𑌿 𑌮𑌨𑍍𑌮𑌥𑌚𑌿𑌤𑍍𑌰𑌭𑌾𑌨𑍁𑌮𑍍 ॥𑍭𑍮॥

𑌕𑌾𑌲𑌾𑌂𑌜𑌨𑌪𑍍𑌰𑌤𑌿𑌭𑌟𑌂 𑌕𑌮𑌨𑍀𑌯𑌕𑌾𑌂𑌤𑍍𑌯𑌾
𑌕𑌂𑌦𑌰𑍍𑌪𑌤𑌂𑌤𑍍𑌰𑌕𑌲𑌯𑌾 𑌕𑌲𑌿𑌤𑌾𑌨𑍁𑌭𑌾𑌵𑌮𑍍 ।
𑌕𑌾𑌂𑌚𑍀𑌵𑌿𑌹𑌾𑌰𑌰𑌸𑌿𑌕𑍇 𑌕𑌲𑍁𑌷𑌾𑌰𑍍𑌤𑌿𑌚𑍋𑌰𑌂
𑌕𑌲𑍍𑌲𑍋𑌲𑌯𑌸𑍍𑌵 𑌮𑌯𑌿 𑌤𑍇 𑌕𑌰𑍁𑌣𑌾𑌕𑌟𑌾𑌕𑍍𑌷𑌮𑍍 ॥𑍭𑍯॥

𑌕𑍍𑌰𑌾𑌂𑌤𑍇𑌨 𑌮𑌨𑍍𑌮𑌥𑌦𑍇𑌨 𑌵𑌿𑌮𑍋𑌹𑍍𑌯𑌮𑌾𑌨-
𑌸𑍍𑌵𑌾𑌂𑌤𑍇𑌨 𑌚𑍂𑌤𑌤𑌰𑍁𑌮𑍂𑌲𑌗𑌤𑌸𑍍𑌯 𑌪𑍁𑌂𑌸𑌃 ।
𑌕𑌾𑌂𑌤𑍇𑌨 𑌕𑌿𑌂𑌚𑌿𑌦𑌵𑌲𑍋𑌕𑌯 𑌲𑍋𑌚𑌨𑌸𑍍𑌯
𑌪𑍍𑌰𑌾𑌂𑌤𑍇𑌨 𑌮𑌾𑌂 𑌜𑌨𑌨𑌿 𑌕𑌾𑌂𑌚𑌿𑌪𑍁𑌰𑍀𑌵𑌿𑌭𑍂𑌷𑍇 ॥𑍮0॥

𑌕𑌾𑌮𑌾𑌕𑍍𑌷𑌿 𑌕𑍋𑌽𑌪𑌿 𑌸𑍁𑌜𑌨𑌾𑌸𑍍𑌤𑍍𑌵𑌦𑌪𑌾𑌂𑌗𑌸𑌂𑌗𑍇
𑌕𑌂𑌠𑍇𑌨 𑌕𑌂𑌦𑌲𑌿𑌤𑌕𑌾𑌲𑌿𑌮𑌸𑌂𑌪𑍍𑌰𑌦𑌾𑌯𑌾𑌃 ।
𑌉𑌤𑍍𑌤𑌂𑌸𑌕𑌲𑍍𑌪𑌿𑌤𑌚𑌕𑍋𑌰𑌕𑍁𑌟𑍁𑌂𑌬𑌪𑍋𑌷𑌾
𑌨𑌕𑍍𑌤𑌂𑌦𑌿𑌵𑌸𑌪𑍍𑌰𑌸𑌵𑌭𑍂𑌨𑌯𑌨𑌾 𑌭𑌵𑌂𑌤𑌿 ॥𑍮1॥

𑌨𑍀𑌲𑍋𑌤𑍍𑌪𑌲𑌪𑍍𑌰𑌸𑌵𑌕𑌾𑌂𑌤𑌿𑌨𑌿𑌰𑍍𑌦𑌶𑌨𑍇𑌨
𑌕𑌾𑌰𑍁𑌣𑍍𑌯𑌵𑌿𑌭𑍍𑌰𑌮𑌜𑍁𑌷𑌾 𑌤𑌵 𑌵𑍀𑌕𑍍𑌷𑌣𑍇𑌨 ।
𑌕𑌾𑌮𑌾𑌕𑍍𑌷𑌿 𑌕𑌰𑍍𑌮𑌜𑌲𑌧𑍇𑌃 𑌕𑌲𑌶𑍀𑌸𑍁𑌤𑍇𑌨
𑌪𑌾𑌶𑌤𑍍𑌰𑌯𑌾𑌦𑍍𑌵𑌯𑌮𑌮𑍀 𑌪𑌰𑌿𑌮𑍋𑌚𑌨𑍀𑌯𑌾𑌃 ॥𑍮2॥

𑌅𑌤𑍍𑌯𑌂𑌤𑌚𑌂𑌚𑌲𑌮𑌕𑍃𑌤𑍍𑌰𑌿𑌮𑌮𑌂𑌜𑌨𑌂 𑌕𑌿𑌂
𑌝𑌂𑌕𑌾𑌰𑌭𑌂𑌗𑌿𑌰𑌹𑌿𑌤𑌾 𑌕𑌿𑌮𑍁 𑌭𑍃𑌂𑌗𑌮𑌾𑌲𑌾 ।
𑌧𑍂𑌮𑌾𑌂𑌕𑍁𑌰𑌃 𑌕𑌿𑌮𑍁 𑌹𑍁𑌤𑌾𑌶𑌨𑌸𑌂𑌗𑌹𑍀𑌨𑌃
𑌕𑌾𑌮𑌾𑌕𑍍𑌷𑌿 𑌨𑍇𑌤𑍍𑌰𑌰𑍁𑌚𑌿𑌨𑍀𑌲𑌿𑌮𑌕𑌂𑌦𑌲𑍀 𑌤𑍇 ॥𑍮3॥

𑌕𑌾𑌮𑌾𑌕𑍍𑌷𑌿 𑌨𑌿𑌤𑍍𑌯𑌮𑌯𑌮𑌂𑌜𑌲𑌿𑌰𑌸𑍍𑌤𑍁 𑌮𑍁𑌕𑍍𑌤𑌿-
𑌬𑍀𑌜𑌾𑌯 𑌵𑌿𑌭𑍍𑌰𑌮𑌮𑌦𑍋𑌦𑌯𑌘𑍂𑌰𑍍𑌣𑌿𑌤𑌾𑌯 ।
𑌕𑌂𑌦𑌰𑍍𑌪𑌦𑌰𑍍𑌪𑌪𑍁𑌨𑌰𑍁𑌦𑍍𑌭𑌵𑌸𑌿𑌦𑍍𑌧𑌿𑌦𑌾𑌯
𑌕𑌲𑍍𑌯𑌾𑌣𑌦𑌾𑌯 𑌤𑌵 𑌦𑍇𑌵𑌿 𑌦𑍃𑌗𑌂𑌚𑌲𑌾𑌯 ॥𑍮4॥

𑌦𑌰𑍍𑌪𑌾𑌂𑌕𑍁𑌰𑍋 𑌮𑌕𑌰𑌕𑍇𑌤𑌨𑌵𑌿𑌭𑍍𑌰𑌮𑌾𑌣𑌾𑌂
𑌨𑌿𑌂𑌦𑌾𑌂𑌕𑍁𑌰𑍋 𑌵𑌿𑌦𑌲𑌿𑌤𑍋𑌤𑍍𑌪𑌲𑌚𑌾𑌤𑍁𑌰𑍀𑌣𑌾𑌮𑍍 ।
𑌦𑍀𑌪𑌾𑌂𑌕𑍁𑌰𑍋 𑌭𑌵𑌤𑌮𑌿𑌸𑍍𑌰𑌕𑌦𑌂𑌬𑌕𑌾𑌨𑌾𑌂
𑌕𑌾𑌮𑌾𑌕𑍍𑌷𑌿 𑌪𑌾𑌲𑌯𑌤𑍁 𑌮𑌾𑌂 𑌤𑍍𑌵𑌦𑌪𑌾𑌂𑌗𑌪𑌾𑌤𑌃 ॥𑍮5॥

𑌕𑍈𑌵𑌲𑍍𑌯𑌦𑌿𑌵𑍍𑌯𑌮𑌣𑌿𑌰𑍋𑌹𑌣𑌪𑌰𑍍𑌵𑌤𑍇𑌭𑍍𑌯𑌃
𑌕𑌾𑌰𑍁𑌣𑍍𑌯𑌨𑌿𑌰𑍍𑌝𑌰𑌪𑌯𑌃𑌕𑍃𑌤𑌮𑌂𑌜𑌨𑍇𑌭𑍍𑌯𑌃 ।
𑌕𑌾𑌮𑌾𑌕𑍍𑌷𑌿 𑌕𑌿𑌂𑌕𑌰𑌿𑌤𑌶𑌂𑌕𑌰𑌮𑌾𑌨𑌸𑍇𑌭𑍍𑌯-
𑌸𑍍𑌤𑍇𑌭𑍍𑌯𑍋 𑌨𑌮𑍋𑌽𑌸𑍍𑌤𑍁 𑌤𑌵 𑌵𑍀𑌕𑍍𑌷𑌣𑌵𑌿𑌭𑍍𑌰𑌮𑍇𑌭𑍍𑌯𑌃 ॥𑍮6॥

𑌅𑌲𑍍𑌪𑍀𑌯 𑌏𑌵 𑌨𑌵𑌮𑍁𑌤𑍍𑌪𑌲𑌮𑌂𑌬 𑌹𑍀𑌨𑌾
𑌮𑍀𑌨𑌸𑍍𑌯 𑌵𑌾 𑌸𑌰𑌣𑌿𑌰𑌂𑌬𑍁𑌰𑍁𑌹𑌾𑌂 𑌚 𑌕𑌿𑌂 𑌵𑌾 ।
𑌦𑍂𑌰𑍇 𑌮𑍃𑌗𑍀𑌦𑍃𑌗𑌸𑌮𑌂𑌜𑌸𑌮𑌂𑌜𑌨𑌂 𑌚
𑌕𑌾𑌮𑌾𑌕𑍍𑌷𑌿 𑌵𑍀𑌕𑍍𑌷𑌣𑌰𑍁𑌚𑍌 𑌤𑌵 𑌤𑌰𑍍𑌕𑌯𑌾𑌮𑌃 ॥𑍮𑍭॥

𑌮𑌿𑌶𑍍𑌰𑍀𑌭𑌵𑌦𑍍𑌗𑌰𑌲𑌪𑌂𑌕𑌿𑌲𑌶𑌂𑌕𑌰𑍋𑌰𑌸𑍍-
𑌸𑍀𑌮𑌾𑌂𑌗𑌣𑍇 𑌕𑌿𑌮𑌪𑌿 𑌰𑌿𑌂𑌖𑌣𑌮𑌾𑌦𑌧𑌾𑌨𑌃 ।
𑌹𑍇𑌲𑌾𑌵𑌧𑍂𑌤𑌲𑌲𑌿𑌤𑌶𑍍𑌰𑌵𑌣𑍋𑌤𑍍𑌪𑌲𑍋𑌽𑌸𑍌
𑌕𑌾𑌮𑌾𑌕𑍍𑌷𑌿 𑌬𑌾𑌲 𑌇𑌵 𑌰𑌾𑌜𑌤𑌿 𑌤𑍇 𑌕𑌟𑌾𑌕𑍍𑌷𑌃 ॥𑍮𑍮॥

𑌪𑍍𑌰𑍌𑌢𑌿𑌕𑌰𑍋𑌤𑌿 𑌵𑌿𑌦𑍁𑌷𑌾𑌂 𑌨𑌵𑌸𑍂𑌕𑍍𑌤𑌿𑌧𑌾𑌟𑍀-
𑌚𑍂𑌤𑌾𑌟𑌵𑍀𑌷𑍁 𑌬𑍁𑌧𑌕𑍋𑌕𑌿𑌲𑌲𑌾𑌲𑍍𑌯𑌮𑌾𑌨𑌮𑍍 ।
𑌮𑌾𑌧𑍍𑌵𑍀𑌰𑌸𑌂 𑌪𑌰𑌿𑌮𑌲𑌂 𑌚 𑌨𑌿𑌰𑌰𑍍𑌗𑌲𑌂 𑌤𑍇
𑌕𑌾𑌮𑌾𑌕𑍍𑌷𑌿 𑌵𑍀𑌕𑍍𑌷𑌣𑌵𑌿𑌲𑌾𑌸𑌵𑌸𑌂𑌤𑌲𑌕𑍍𑌷𑍍𑌮𑍀𑌃 ॥𑍮𑍯॥

𑌕𑍂𑌲𑌂𑌕𑌷𑌂 𑌵𑌿𑌤𑌨𑍁𑌤𑍇 𑌕𑌰𑍁𑌣𑌾𑌂𑌬𑍁𑌵𑌰𑍍𑌷𑍀
𑌸𑌾𑌰𑌸𑍍𑌵𑌤𑌂 𑌸𑍁𑌕𑍃𑌤𑌿𑌨𑌃 𑌸𑍁𑌲𑌭𑌂 𑌪𑍍𑌰𑌵𑌾𑌹𑌮𑍍 ।
𑌤𑍁𑌚𑍍𑌛𑍀𑌕𑌰𑍋𑌤𑌿 𑌯𑌮𑍁𑌨𑌾𑌂𑌬𑍁𑌤𑌰𑌂𑌗𑌭𑌂𑌗𑍀𑌂
𑌕𑌾𑌮𑌾𑌕𑍍𑌷𑌿 𑌕𑌿𑌂 𑌤𑌵 𑌕𑌟𑌾𑌕𑍍𑌷𑌮𑌹𑌾𑌂𑌬𑍁𑌵𑌾𑌹𑌃 ॥𑍯0॥

𑌜𑌗𑌰𑍍𑌤𑌿 𑌦𑍇𑌵𑌿 𑌕𑌰𑍁𑌣𑌾𑌶𑍁𑌕𑌸𑍁𑌂𑌦𑌰𑍀 𑌤𑍇
𑌤𑌾𑌟𑌂𑌕𑌰𑌤𑍍𑌨𑌰𑍁𑌚𑌿𑌦𑌾𑌡𑌿𑌮𑌖𑌂𑌡𑌶𑍋𑌣𑍇 ।
𑌕𑌾𑌮𑌾𑌕𑍍𑌷𑌿 𑌨𑌿𑌰𑍍𑌭𑌰𑌕𑌟𑌾𑌕𑍍𑌷𑌮𑌰𑍀𑌚𑌿𑌪𑍁𑌂𑌜-
𑌮𑌾𑌹𑍇𑌂𑌦𑍍𑌰𑌨𑍀𑌲𑌮𑌣𑌿𑌪𑌂𑌜𑌰𑌮𑌧𑍍𑌯𑌭𑌾𑌗𑍇 ॥𑍯1॥

𑌕𑌾𑌮𑌾𑌕𑍍𑌷𑌿 𑌸𑌤𑍍𑌕𑍁𑌵𑌲𑌯𑌸𑍍𑌯 𑌸𑌗𑍋𑌤𑍍𑌰𑌭𑌾𑌵𑌾-
𑌦𑌾𑌕𑍍𑌰𑌾𑌮𑌤𑌿 𑌶𑍍𑌰𑍁𑌤𑌿𑌮𑌸𑍌 𑌤𑌵 𑌦𑍃𑌷𑍍𑌟𑌿𑌪𑌾𑌤𑌃 ।
𑌕𑌿𑌂𑌚 𑌸𑍍𑌫𑍁𑌟𑌂 𑌕𑍁𑌟𑌿𑌲𑌤𑌾𑌂 𑌪𑍍𑌰𑌕𑌟𑍀𑌕𑌰𑍋𑌤𑌿
𑌭𑍍𑌰𑍂𑌵𑌲𑍍𑌲𑌰𑍀𑌪𑌰𑌿𑌚𑌿𑌤𑌸𑍍𑌯 𑌫𑌲𑌂 𑌕𑌿𑌮𑍇𑌤𑌤𑍍 ॥𑍯2॥

𑌏𑌷𑌾 𑌤𑌵𑌾𑌕𑍍𑌷𑌿𑌸𑍁𑌷𑌮𑌾 𑌵𑌿𑌷𑌮𑌾𑌯𑍁𑌧𑌸𑍍𑌯
𑌨𑌾𑌰𑌾𑌚𑌵𑌰𑍍𑌷𑌲𑌹𑌰𑍀 𑌨𑌗𑌰𑌾𑌜𑌕𑌨𑍍𑌯𑍇 ।
𑌶𑌂𑌕𑍇 𑌕𑌰𑍋𑌤𑌿 𑌶𑌤𑌧𑌾 𑌹𑍃𑌦𑌿 𑌧𑍈𑌰𑍍𑌯𑌮𑍁𑌦𑍍𑌰𑌾𑌂
𑌶𑍍𑌰𑍀𑌕𑌾𑌮𑌕𑍋𑌟𑌿 𑌯𑌦𑌸𑍌 𑌶𑌿𑌶𑌿𑌰𑌾𑌂𑌶𑍁𑌮𑍌𑌲𑍇𑌃 ॥𑍯3॥

𑌬𑌾𑌣𑍇𑌨 𑌪𑍁𑌷𑍍𑌪𑌧𑌨𑍁𑌷𑌃 𑌪𑌰𑌿𑌕𑌲𑍍𑌪𑍍𑌯𑌮𑌾𑌨-
𑌤𑍍𑌰𑌾𑌣𑍇𑌨 𑌭𑌕𑍍𑌤𑌮𑌨𑌸𑌾𑌂 𑌕𑌰𑍁𑌣𑌾𑌕𑌰𑍇𑌣 ।
𑌕𑍋𑌣𑍇𑌨 𑌕𑍋𑌮𑌲𑌦𑍃𑌶𑌸𑍍𑌤𑌵 𑌕𑌾𑌮𑌕𑍋𑌟𑌿
𑌶𑍋𑌣𑍇𑌨 𑌶𑍋𑌷𑌯 𑌶𑌿𑌵𑍇 𑌮𑌮 𑌶𑍋𑌕𑌸𑌿𑌂𑌧𑍁𑌮𑍍 ॥𑍯4॥

𑌮𑌾𑌰𑌦𑍍𑌰𑍁𑌹𑌾 𑌮𑍁𑌕𑍁𑌟𑌸𑍀𑌮𑌨𑌿 𑌲𑌾𑌲𑍍𑌯𑌮𑌾𑌨𑍇
𑌮𑌂𑌦𑌾𑌕𑌿𑌨𑍀𑌪𑌯𑌸𑌿 𑌤𑍇 𑌕𑍁𑌟𑌿𑌲𑌂 𑌚𑌰𑌿𑌷𑍍𑌣𑍁𑌃 ।
𑌕𑌾𑌮𑌾𑌕𑍍𑌷𑌿 𑌕𑍋𑌪𑌰𑌭𑌸𑌾𑌦𑍍𑌵𑌲𑌮𑌾𑌨𑌮𑍀𑌨-
𑌸𑌂𑌦𑍇𑌹𑌮𑌂𑌕𑍁𑌰𑌯𑌤𑌿 𑌕𑍍𑌷𑌣𑌮𑌕𑍍𑌷𑌿𑌪𑌾𑌤𑌃 ॥𑍯5॥

𑌕𑌾𑌮𑌾𑌕𑍍𑌷𑌿 𑌸𑌂𑌵𑌲𑌿𑌤𑌮𑍌𑌕𑍍𑌤𑌿𑌕𑌕𑍁𑌂𑌡𑌲𑌾𑌂𑌶𑍁-
𑌚𑌂𑌚𑌤𑍍𑌸𑌿𑌤𑌶𑍍𑌰𑌵𑌣𑌚𑌾𑌮𑌰𑌚𑌾𑌤𑍁𑌰𑍀𑌕𑌃 ।
𑌸𑍍𑌤𑌂𑌭𑍇 𑌨𑌿𑌰𑌂𑌤𑌰𑌮𑌪𑌾𑌂𑌗𑌮𑌯𑍇 𑌭𑌵𑌤𑍍𑌯𑌾
𑌬𑌦𑍍𑌧𑌶𑍍𑌚𑌕𑌾𑌸𑍍𑌤𑌿 𑌮𑌕𑌰𑌧𑍍𑌵𑌜𑌮𑌤𑍍𑌤𑌹𑌸𑍍𑌤𑍀 ॥𑍯6॥

𑌯𑌾𑌵𑌤𑍍𑌕𑌟𑌾𑌕𑍍𑌷𑌰𑌜𑌨𑍀𑌸𑌮𑌯𑌾𑌗𑌮𑌸𑍍𑌤𑍇
𑌕𑌾𑌮𑌾𑌕𑍍𑌷𑌿 𑌤𑌾𑌵𑌦𑌚𑌿𑌰𑌾𑌨𑍍𑌨𑌮𑌤𑌾𑌂 𑌨𑌰𑌾𑌣𑌾𑌮𑍍 ।
𑌆𑌵𑌿𑌰𑍍𑌭𑌵𑌤𑍍𑌯𑌮𑍃𑌤𑌦𑍀𑌧𑌿𑌤𑌿𑌬𑌿𑌂𑌬𑌮𑌂𑌬
𑌸𑌂𑌵𑌿𑌨𑍍𑌮𑌯𑌂 𑌹𑍃𑌦𑌯𑌪𑍂𑌰𑍍𑌵𑌗𑌿𑌰𑍀𑌂𑌦𑍍𑌰𑌶𑍃𑌂𑌗𑍇 ॥𑍯𑍭॥

𑌕𑌾𑌮𑌾𑌕𑍍𑌷𑌿 𑌕𑌲𑍍𑌪𑌵𑌿𑌟𑌪𑍀𑌵 𑌭𑌵𑌤𑍍𑌕𑌟𑌾𑌕𑍍𑌷𑍋
𑌦𑌿𑌤𑍍𑌸𑍁𑌃 𑌸𑌮𑌸𑍍𑌤𑌵𑌿𑌭𑌵𑌂 𑌨𑌮𑌤𑌾𑌂 𑌨𑌰𑌾𑌣𑌾𑌮𑍍 ।
𑌭𑍃𑌂𑌗𑌸𑍍𑌯 𑌨𑍀𑌲𑌨𑌲𑌿𑌨𑌸𑍍𑌯 𑌚 𑌕𑌾𑌂𑌤𑌿𑌸𑌂𑌪-
𑌤𑍍𑌸𑌰𑍍𑌵𑌸𑍍𑌵𑌮𑍇𑌵 𑌹𑌰𑌤𑍀𑌤𑌿 𑌪𑌰𑌂 𑌵𑌿𑌚𑌿𑌤𑍍𑌰𑌮𑍍 ॥𑍯𑍮॥

𑌅𑌤𑍍𑌯𑌂𑌤𑌶𑍀𑌤𑌲𑌮𑌨𑌰𑍍𑌗𑌲𑌕𑌰𑍍𑌮𑌪𑌾𑌕-
𑌕𑌾𑌕𑍋𑌲𑌹𑌾𑌰𑌿 𑌸𑍁𑌲𑌭𑌂 𑌸𑍁𑌮𑌨𑍋𑌭𑌿𑌰𑍇𑌤𑌤𑍍 ।
𑌪𑍀𑌯𑍂𑌷𑌮𑍇𑌵 𑌤𑌵 𑌵𑍀𑌕𑍍𑌷𑌣𑌮𑌂𑌬 𑌕𑌿𑌂𑌤𑍁
𑌕𑌾𑌮𑌾𑌕𑍍𑌷𑌿 𑌨𑍀𑌲𑌮𑌿𑌦𑌮𑌿𑌤𑍍𑌯𑌯𑌮𑍇𑌵 𑌭𑍇𑌦𑌃 ॥𑍯𑍯॥

𑌅𑌜𑍍𑌞𑌾𑌤𑌭𑌕𑍍𑌤𑌿𑌰𑌸𑌮𑌪𑍍𑌰𑌸𑌰𑌦𑍍𑌵𑌿𑌵𑍇𑌕-
𑌮𑌤𑍍𑌯𑌂𑌤𑌗𑌰𑍍𑌵𑌮𑌨𑌧𑍀𑌤𑌸𑌮𑌸𑍍𑌤𑌶𑌾𑌸𑍍𑌤𑍍𑌰𑌮𑍍 ।
𑌅𑌪𑍍𑌰𑌾𑌪𑍍𑌤𑌸𑌤𑍍𑌯𑌮𑌸𑌮𑍀𑌪𑌗𑌤𑌂 𑌚 𑌮𑍁𑌕𑍍𑌤𑍇𑌃
𑌕𑌾𑌮𑌾𑌕𑍍𑌷𑌿 𑌨𑍈𑌵 𑌤𑌵 𑌸𑍍𑌪𑍃𑌹𑌯𑌤𑌿 𑌦𑍃𑌷𑍍𑌟𑌿𑌪𑌾𑌤𑌃 ॥100॥

(𑌕𑌾𑌮𑌾𑌕𑍍𑌷𑌿 𑌮𑌾𑌮𑌵𑌤𑍁 𑌤𑍇 𑌕𑌰𑍁𑌣𑌾𑌕𑌟𑌾𑌕𑍍𑌷𑌃)
𑌪𑌾𑌤𑍇𑌨 𑌲𑍋𑌚𑌨𑌰𑍁𑌚𑍇𑌸𑍍𑌤𑌵 𑌕𑌾𑌮𑌕𑍋𑌟𑌿
𑌪𑍋𑌤𑍇𑌨 𑌪𑌤𑌕𑌪𑌯𑍋𑌧𑌿𑌭𑌯𑌾𑌤𑍁𑌰𑌾𑌣𑌾𑌮𑍍 ।
𑌪𑍂𑌤𑍇𑌨 𑌤𑍇𑌨 𑌨𑌵𑌕𑌾𑌂𑌚𑌨𑌕𑍁𑌂𑌡𑌲𑌾𑌂𑌶𑍁-
𑌵𑍀𑌤𑍇𑌨 𑌶𑍀𑌤𑌲𑌯 𑌭𑍂𑌧𑌰𑌕𑌨𑍍𑌯𑌕𑍇 𑌮𑌾𑌮𑍍 ॥101॥

॥ 𑌇𑌤𑌿 𑌕𑌟𑌾𑌕𑍍𑌷𑌶𑌤𑌕𑌂 𑌸𑌂𑌪𑍂𑌰𑍍𑌣𑌮𑍍 ॥