𑌹𑌿𑌰𑌣𑍍𑌯 𑌗𑌰𑍍𑌭 𑌸𑍂𑌕𑍍𑌤𑌮𑍍

(𑌋.10.121)

𑌹𑌿॒𑌰॒𑌣𑍍𑌯॒𑌗॒𑌰𑍍𑌭𑌃 𑌸𑌮॑𑌵𑌰𑍍𑌤॒𑌤𑌾𑌗𑍍𑌰𑍇॑ 𑌭𑍂॒𑌤𑌸𑍍𑌯॑ 𑌜𑌾॒𑌤𑌃 𑌪𑌤𑌿॒𑌰𑍇𑌕॑ 𑌆𑌸𑍀𑌤𑍍 ।
𑌸 𑌦𑌾॑𑌧𑌾𑌰 𑌪𑍃𑌥𑌿॒𑌵𑍀𑌂 𑌦𑍍𑌯𑌾𑌮𑍁॒𑌤𑍇𑌮𑌾𑌂 𑌕𑌸𑍍𑌮𑍈॑ 𑌦𑍇॒𑌵𑌾𑌯॑ 𑌹॒𑌵𑌿𑌷𑌾॑ 𑌵𑌿𑌧𑍇𑌮 ॥ 1

𑌯 𑌆॑𑌤𑍍𑌮॒𑌦𑌾 𑌬॑𑌲॒𑌦𑌾 𑌯𑌸𑍍𑌯॒ 𑌵𑌿𑌶𑍍𑌵॑ 𑌉॒𑌪𑌾𑌸॑𑌤𑍇 𑌪𑍍𑌰॒𑌶𑌿𑌷𑌂॒-𑌯𑌁𑌸𑍍𑌯॑ 𑌦𑍇॒𑌵𑌾𑌃 ।
𑌯𑌸𑍍𑌯॑ 𑌛𑌾॒𑌯𑌾𑌮𑍃𑌤𑌂॒-𑌯𑌁𑌸𑍍𑌯॑ 𑌮𑍃॒𑌤𑍍𑌯𑍁𑌃 𑌕𑌸𑍍𑌮𑍈॑ 𑌦𑍇॒𑌵𑌾𑌯॑ 𑌹॒𑌵𑌿𑌷𑌾॑ 𑌵𑌿𑌧𑍇𑌮 ॥ 2

𑌯𑌃 𑌪𑍍𑌰𑌾॑𑌣॒𑌤𑍋 𑌨𑌿॑𑌮𑌿𑌷॒𑌤𑍋 𑌮॑𑌹𑌿॒𑌤𑍍𑌵𑍈𑌕॒ 𑌇𑌦𑍍𑌰𑌾𑌜𑌾॒ 𑌜𑌗॑𑌤𑍋 𑌬॒𑌭𑍂𑌵॑ ।
𑌯 𑌈𑌶𑍇॑ 𑌅॒𑌸𑍍𑌯 𑌦𑍍𑌵𑌿॒𑌪𑌦॒𑌶𑍍𑌚𑌤𑍁॑𑌷𑍍𑌪𑌦𑌃॒ 𑌕𑌸𑍍𑌮𑍈॑ 𑌦𑍇॒𑌵𑌾𑌯॑ 𑌹॒𑌵𑌿𑌷𑌾॑ 𑌵𑌿𑌧𑍇𑌮 ॥ 3

𑌯𑌸𑍍𑌯𑍇॒𑌮𑍇 𑌹𑌿॒𑌮𑌵𑌂॑𑌤𑍋 𑌮𑌹𑌿॒𑌤𑍍𑌵𑌾 𑌯𑌸𑍍𑌯॑ 𑌸𑌮𑍁॒𑌦𑍍𑌰𑌂 𑌰॒𑌸𑌯𑌾॑ 𑌸॒𑌹𑌾𑌹𑍁𑌃 ।
𑌯𑌸𑍍𑌯𑍇॒𑌮𑌾𑌃 𑌪𑍍𑌰॒𑌦𑌿𑌶𑍋॒ 𑌯𑌸𑍍𑌯॑ 𑌬𑌾॒𑌹𑍂 𑌕𑌸𑍍𑌮𑍈॑ 𑌦𑍇॒𑌵𑌾𑌯॑ 𑌹॒𑌵𑌿𑌷𑌾॑ 𑌵𑌿𑌧𑍇𑌮 ॥ 4

𑌯𑍇𑌨॒ 𑌦𑍍𑌯𑍌𑌰𑍁॒𑌗𑍍𑌰𑌾 𑌪𑍃॑𑌥𑌿॒𑌵𑍀 𑌚॑ 𑌦𑍃॒𑌳𑍍𑌹𑌾 𑌯𑍇𑌨॒ 𑌸𑍍𑌵𑌃॑ 𑌸𑍍𑌤𑌭𑌿॒𑌤𑌂-𑌯𑍇𑌁𑌨॒ 𑌨𑌾𑌕𑌃॑ ।
𑌯𑍋 𑌅𑌂॒𑌤𑌰𑌿॑𑌕𑍍𑌷𑍇॒ 𑌰𑌜॑𑌸𑍋 𑌵𑌿॒𑌮𑌾𑌨𑌃॒ 𑌕𑌸𑍍𑌮𑍈॑ 𑌦𑍇॒𑌵𑌾𑌯॑ 𑌹॒𑌵𑌿𑌷𑌾॑ 𑌵𑌿𑌧𑍇𑌮 ॥ 5

𑌯𑌂 𑌕𑍍𑌰𑌂𑌦॑𑌸𑍀॒ 𑌅𑌵॑𑌸𑌾 𑌤𑌸𑍍𑌤𑌭𑌾॒𑌨𑍇 𑌅॒𑌭𑍍𑌯𑍈𑌕𑍍𑌷𑍇॑𑌤𑌾𑌂॒ 𑌮𑌨॑𑌸𑌾॒ 𑌰𑍇𑌜॑𑌮𑌾𑌨𑍇 ।
𑌯𑌤𑍍𑌰𑌾𑌧𑌿॒ 𑌸𑍂𑌰॒ 𑌉𑌦𑌿॑𑌤𑍋 𑌵𑌿॒𑌭𑌾𑌤𑌿॒ 𑌕𑌸𑍍𑌮𑍈॑ 𑌦𑍇॒𑌵𑌾𑌯॑ 𑌹॒𑌵𑌿𑌷𑌾॑ 𑌵𑌿𑌧𑍇𑌮 ॥ 6

𑌆𑌪𑍋॑ 𑌹॒ 𑌯𑌦𑍍𑌬𑍃॑𑌹॒𑌤𑍀𑌰𑍍𑌵𑌿𑌶𑍍𑌵॒𑌮𑌾𑌯॒𑌨𑍍 𑌗𑌰𑍍𑌭𑌂॒ 𑌦𑌧𑌾॑𑌨𑌾 𑌜॒𑌨𑌯𑌂॑𑌤𑍀𑌰॒𑌗𑍍𑌨𑌿𑌮𑍍 ।
𑌤𑌤𑍋॑ 𑌦𑍇॒𑌵𑌾𑌨𑌾𑌂॒ 𑌸𑌮॑𑌵𑌰𑍍𑌤॒𑌤𑌾𑌸𑍁॒𑌰𑍇𑌕𑌃॒ 𑌕𑌸𑍍𑌮𑍈॑ 𑌦𑍇॒𑌵𑌾𑌯॑ 𑌹॒𑌵𑌿𑌷𑌾॑ 𑌵𑌿𑌧𑍇𑌮 ॥ 𑍭

𑌯𑌶𑍍𑌚𑌿॒𑌦𑌾𑌪𑍋॑ 𑌮𑌹𑌿॒𑌨𑌾 𑌪॒𑌰𑍍𑌯𑌪॑𑌶𑍍𑌯॒𑌦𑍍𑌦𑌕𑍍𑌷𑌂॒ 𑌦𑌧𑌾॑𑌨𑌾 𑌜॒𑌨𑌯𑌂॑𑌤𑍀𑌰𑍍𑌯॒𑌜𑍍𑌞𑌮𑍍 ।
𑌯𑍋 𑌦𑍇॒𑌵𑍇𑌷𑍍𑌵𑌿𑌧𑌿॑ 𑌦𑍇॒𑌵 𑌏𑌕॒ 𑌆𑌸𑍀॒𑌤𑍍𑌕𑌸𑍍𑌮𑍈॑ 𑌦𑍇॒𑌵𑌾𑌯॑ 𑌹॒𑌵𑌿𑌷𑌾॑ 𑌵𑌿𑌧𑍇𑌮 ॥ 𑍮

𑌮𑌾 𑌨𑍋॑ 𑌹𑌿𑌂𑌸𑍀𑌜𑍍𑌜𑌨𑌿॒𑌤𑌾 𑌯𑌃 𑌪𑍃॑𑌥𑌿॒𑌵𑍍𑌯𑌾 𑌯𑍋 𑌵𑌾॒ 𑌦𑌿𑌵𑌂॑ 𑌸॒𑌤𑍍𑌯𑌧॑𑌰𑍍𑌮𑌾 𑌜॒𑌜𑌾𑌨॑ ।
𑌯𑌶𑍍𑌚𑌾॒𑌪𑌶𑍍𑌚𑌂॒𑌦𑍍𑌰𑌾 𑌬𑍃॑𑌹॒𑌤𑍀𑌰𑍍𑌜॒𑌜𑌾𑌨॒ 𑌕𑌸𑍍𑌮𑍈॑ 𑌦𑍇॒𑌵𑌾𑌯॑ 𑌹॒𑌵𑌿𑌷𑌾॑ 𑌵𑌿𑌧𑍇𑌮 ॥ 𑍯

𑌪𑍍𑌰𑌜𑌾॑𑌪𑌤𑍇॒ 𑌨 𑌤𑍍𑌵𑌦𑍇॒𑌤𑌾𑌨𑍍𑌯॒𑌨𑍍𑌯𑍋 𑌵𑌿𑌶𑍍𑌵𑌾॑ 𑌜𑌾॒𑌤𑌾𑌨𑌿॒ 𑌪𑌰𑌿॒ 𑌤𑌾 𑌬॑𑌭𑍂𑌵 ।
𑌯𑌤𑍍𑌕𑌾॑𑌮𑌾𑌸𑍍𑌤𑍇 𑌜𑍁𑌹𑍁॒𑌮𑌸𑍍𑌤𑌨𑍍𑌨𑍋॑ 𑌅𑌸𑍍𑌤𑍁 𑌵॒𑌯𑌂 𑌸𑍍𑌯𑌾॑𑌮॒ 𑌪𑌤॑𑌯𑍋 𑌰𑌯𑍀॒𑌣𑌾𑌮𑍍 ॥ 10