𑌗𑍀𑌤𑌗𑍋𑌵𑌿𑌂𑌦𑌂 𑌨𑌵𑌮𑌃 𑌸𑌰𑍍𑌗𑌃 – 𑌮𑌂𑌦 𑌮𑍁𑌕𑍁𑌂𑌦𑌃

॥ 𑌨𑌵𑌮𑌃 𑌸𑌰𑍍𑌗𑌃 ॥
॥ 𑌮𑌂𑌦𑌮𑍁𑌕𑍁𑌂𑌦𑌃 ॥

𑌤𑌾𑌮𑌥 𑌮𑌨𑍍𑌮𑌥𑌖𑌿𑌨𑍍𑌨𑌾𑌂 𑌰𑌤𑌿𑌰𑌸𑌭𑌿𑌨𑍍𑌨𑌾𑌂 𑌵𑌿𑌷𑌾𑌦𑌸𑌂𑌪𑌨𑍍𑌨𑌾𑌮𑍍 ।
𑌅𑌨𑍁𑌚𑌿𑌂𑌤𑌿𑌤𑌹𑌰𑌿𑌚𑌰𑌿𑌤𑌾𑌂 𑌕𑌲𑌹𑌾𑌂𑌤𑌰𑌿𑌤𑌮𑍁𑌵𑌾𑌚 𑌸𑌖𑍀 ॥ 51 ॥

॥ 𑌗𑍀𑌤𑌂 1𑍮 ॥

𑌹𑌰𑌿𑌰𑌭𑌿𑌸𑌰𑌤𑌿 𑌵𑌹𑌤𑌿 𑌮𑌧𑍁𑌪𑌵𑌨𑍇 ।
𑌕𑌿𑌮𑌪𑌰𑌮𑌧𑌿𑌕𑌸𑍁𑌖𑌂 𑌸𑌖𑌿 𑌭𑍁𑌵𑌨𑍇 ॥
𑌮𑌾𑌧𑌵𑍇 𑌮𑌾 𑌕𑍁𑌰𑍁 𑌮𑌾𑌨𑌿𑌨𑌿 𑌮𑌾𑌨𑌮𑌯𑍇 ॥ 1 ॥

𑌤𑌾𑌲𑌫𑌲𑌾𑌦𑌪𑌿 𑌗𑍁𑌰𑍁𑌮𑌤𑌿𑌸𑌰𑌸𑌮𑍍 ।
𑌕𑌿𑌂 𑌵𑌿𑌫𑌲𑍀𑌕𑍁𑌰𑍁𑌷𑍇 𑌕𑍁𑌚𑌕𑌲𑌶𑌮𑍍 ॥ 2 ॥

𑌕𑌤𑌿 𑌨 𑌕𑌥𑌿𑌤𑌮𑌿𑌦𑌮𑌨𑍁𑌪𑌦𑌮𑌚𑌿𑌰𑌮𑍍 ।
𑌮𑌾 𑌪𑌰𑌿𑌹𑌰 𑌹𑌰𑌿𑌮𑌤𑌿𑌶𑌯𑌰𑍁𑌚𑌿𑌰𑌮𑍍 ॥ 3 ॥

𑌕𑌿𑌮𑌿𑌤𑌿 𑌵𑌿𑌷𑍀𑌦𑌸𑌿 𑌰𑍋𑌦𑌿𑌷𑌿 𑌵𑌿𑌕𑌲𑌾 ।
𑌵𑌿𑌹𑌸𑌤𑌿 𑌯𑍁𑌵𑌤𑌿𑌸𑌭𑌾 𑌤𑌵 𑌸𑌕𑌲𑌾 ॥ 4 ॥

𑌸𑌜𑌲𑌨𑌲𑌿𑌨𑍀𑌦𑌲𑌶𑍀𑌤𑌲𑌶𑌯𑌨𑍇 ।
𑌹𑌰𑌿𑌮𑌵𑌲𑍋𑌕𑍍𑌯 𑌸𑌫𑌲𑌯𑍍 𑌨𑌯𑌨𑍇 ॥ 5 ॥

𑌜𑌨𑌯𑌸𑌿 𑌮𑌨𑌸𑌿 𑌕𑌿𑌮𑌿𑌤𑌿 𑌗𑍁𑌰𑍁𑌖𑍇𑌦𑌮𑍍 ।
𑌶𑍃𑌣𑍁 𑌮𑌮 𑌵𑌚𑌨𑌮𑌨𑍀𑌹𑌿𑌤𑌭𑍇𑌦𑌮𑍍 ॥ 6 ॥

𑌹𑌰𑌿𑌰𑍁𑌪𑌯𑌾𑌤𑍁 𑌵𑌦𑌤𑍁 𑌬𑌹𑍁𑌮𑌧𑍁𑌰𑌮𑍍 ।
𑌕𑌿𑌮𑌿𑌤𑌿 𑌕𑌰𑍋𑌷𑌿 𑌹𑍃𑌦𑌯𑌮𑌤𑌿𑌵𑌿𑌧𑍁𑌰𑌮𑍍 ॥ 𑍭 ॥

𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌮𑌤𑌿𑌲𑌲𑌿𑌤𑌮𑍍 ।
𑌸𑍁𑌖𑌯𑌤𑍁 𑌰𑌸𑌿𑌕𑌜𑌨𑌂 𑌹𑌰𑌿𑌚𑌰𑌿𑌤𑌮𑍍 ॥ 𑍮 ॥

𑌸𑍍𑌨𑌿𑌗𑍍𑌧𑍇 𑌯𑌤𑍍𑌪𑌰𑍁𑌷𑌾𑌸𑌿 𑌯𑌤𑍍𑌪𑍍𑌰𑌣𑌮𑌤𑌿 𑌸𑍍𑌤𑌬𑍍𑌧𑌾𑌸𑌿 𑌯𑌦𑍍𑌰𑌾𑌗𑌿𑌣𑌿 𑌦𑍍𑌵𑍇𑌷𑌸𑍍𑌥𑌾𑌸𑌿 𑌯𑌦𑍁𑌨𑍍𑌮𑍁𑌖𑍇 𑌵𑌿𑌮𑍁𑌖𑌤𑌾𑌂 𑌯𑌾𑌤𑌾𑌸𑌿 𑌤𑌸𑍍𑌮𑌿𑌨𑍍𑌪𑍍𑌰𑌿𑌯𑍇 ।
𑌯𑍁𑌕𑍍𑌤𑌂 𑌤𑌦𑍍𑌵𑌿𑌪𑌰𑍀𑌤𑌕𑌾𑌰𑌿𑌣𑌿 𑌤𑌵 𑌶𑍍𑌰𑍀𑌖𑌂𑌡𑌚𑌰𑍍𑌚𑌾 𑌵𑌿𑌷𑌂 𑌶𑍀𑌤𑌾𑌂𑌶𑍁𑌸𑍍𑌤𑌪𑌨𑍋 𑌹𑌿𑌮𑌂 𑌹𑍁𑌤𑌵𑌹𑌃 𑌕𑍍𑌰𑍀𑌡𑌾𑌮𑍁𑌦𑍋 𑌯𑌾𑌤𑌨𑌾𑌃 ॥ 52 ॥

॥ 𑌇𑌤𑌿 𑌗𑍀𑌤𑌗𑍋𑌵𑌿𑌂𑌦𑍇 𑌕𑌲𑌹𑌾𑌂𑌤𑌰𑌿𑌤𑌾𑌵𑌰𑍍𑌣𑌨𑍇 𑌮𑌂𑌦𑌮𑍁𑌕𑍁𑌂𑌦𑍋 𑌨𑌾𑌮 𑌨𑌵𑌮𑌃 𑌸𑌰𑍍𑌗𑌃 ॥