𑌗𑍀𑌤𑌗𑍋𑌵𑌿𑌂𑌦𑌂 𑌸𑌪𑍍𑌤𑌮𑌃 𑌸𑌰𑍍𑌗𑌃 – 𑌨𑌾𑌗𑌰 𑌨𑌾𑌰𑌯𑌣𑌃

॥ 𑌸𑌪𑍍𑌤𑌮𑌃 𑌸𑌰𑍍𑌗𑌃 ॥
॥ 𑌨𑌾𑌗𑌰𑌨𑌾𑌰𑌾𑌯𑌣𑌃 ॥

𑌅𑌤𑍍𑌰𑌾𑌂𑌤𑌰𑍇 𑌚 𑌕𑍁𑌲𑌟𑌾𑌕𑍁𑌲𑌵𑌰𑍍𑌤𑍍𑌮𑌪𑌾𑌤-𑌸𑌂𑌜𑌾𑌤𑌪𑌾𑌤𑌕 𑌇𑌵 𑌸𑍍𑌫𑍁𑌟𑌲𑌾𑌂𑌛𑌨𑌶𑍍𑌰𑍀𑌃 ।
𑌵𑍃𑌂𑌦𑌾𑌵𑌨𑌾𑌂𑌤𑌰𑌮𑌦𑍀𑌪𑌯𑌦𑌂𑌶𑍁𑌜𑌾𑌲𑍈-𑌰𑍍𑌦𑌿𑌕𑍍𑌸𑍁𑌂𑌦𑌰𑍀𑌵𑌦𑌨𑌚𑌂𑌦𑌨𑌬𑌿𑌂𑌦𑍁𑌰𑌿𑌂𑌦𑍁𑌃 ॥ 40 ॥

𑌪𑍍𑌰𑌸𑌰𑌤𑌿 𑌶𑌶𑌧𑌰𑌬𑌿𑌂𑌬𑍇 𑌵𑌿𑌹𑌿𑌤𑌵𑌿𑌲𑌂𑌬𑍇 𑌚 𑌮𑌾𑌧𑌵𑍇 𑌵𑌿𑌧𑍁𑌰𑌾 ।
𑌵𑌿𑌰𑌚𑌿𑌤𑌵𑌿𑌵𑌿𑌧𑌵𑌿𑌲𑌾𑌪𑌂 𑌸𑌾 𑌪𑌰𑌿𑌤𑌾𑌪𑌂 𑌚𑌕𑌾𑌰𑍋𑌚𑍍𑌚𑍈𑌃 ॥ 41 ॥

॥ 𑌗𑍀𑌤𑌂 13 ॥

𑌕𑌥𑌿𑌤𑌸𑌮𑌯𑍇𑌽𑌪𑌿 𑌹𑌰𑌿𑌰𑌹𑌹 𑌨 𑌯𑌯𑍌 𑌵𑌨𑌮𑍍 ।
𑌮𑌮 𑌵𑌿𑌫𑌲𑌮𑌿𑌦𑌮𑌮𑌲𑌰𑍂𑌪𑌮𑌪𑌿 𑌯𑍌𑌵𑌨𑌮𑍍 ॥
𑌯𑌾𑌮𑌿 𑌹𑍇 𑌕𑌮𑌿𑌹 𑌶𑌰𑌣𑌂 𑌸𑌖𑍀𑌜𑌨𑌵𑌚𑌨𑌵𑌂𑌚𑌿𑌤𑌾 ॥ 1 ॥

𑌯𑌦𑌨𑍁𑌗𑌮𑌨𑌾𑌯 𑌨𑌿𑌶𑌿 𑌗𑌹𑌨𑌮𑌪𑌿 𑌶𑍀𑌲𑌿𑌤𑌮𑍍 ।
𑌤𑍇𑌨 𑌮𑌮 𑌹𑍃𑌦𑌯𑌮𑌿𑌦𑌮𑌸𑌮𑌶𑌰𑌕𑍀𑌲𑌿𑌤𑌮𑍍 ॥ 2 ॥

𑌮𑌮 𑌮𑌰𑌣𑌮𑍇𑌵 𑌵𑌰𑌮𑌤𑌿𑌵𑌿𑌤𑌥𑌕𑍇𑌤𑌨𑌾 ।
𑌕𑌿𑌮𑌿𑌹 𑌵𑌿𑌷𑌹𑌾𑌮𑌿 𑌵𑌿𑌰𑌹𑌾𑌨𑌲𑌚𑍇𑌤𑌨𑌾 ॥ 3 ॥

𑌮𑌾𑌮𑌹𑌹 𑌵𑌿𑌧𑍁𑌰𑌯𑌤𑌿 𑌮𑌧𑍁𑌰𑌮𑌧𑍁𑌯𑌾𑌮𑌿𑌨𑍀 ।
𑌕𑌾𑌪𑌿 𑌹𑌰𑌿𑌮𑌨𑍁𑌭𑌵𑌤𑌿 𑌕𑍃𑌤𑌸𑍁𑌕𑍃𑌤𑌕𑌾𑌮𑌿𑌨𑍀 ॥ 4 ॥

𑌅𑌹𑌹 𑌕𑌲𑌯𑌾𑌮𑌿 𑌵𑌲𑌯𑌾𑌦𑌿𑌮𑌣𑍀𑌭𑍂𑌷𑌣𑌮𑍍 ।
𑌹𑌰𑌿𑌵𑌿𑌰𑌹𑌦𑌹𑌨𑌵𑌹𑌨𑍇𑌨 𑌬𑌹𑍁𑌦𑍂𑌷𑌣𑌮𑍍 ॥ 5 ॥

𑌕𑍁𑌸𑍁𑌮𑌸𑍁𑌕𑍁𑌮𑌾𑌰𑌤𑌨𑍁𑌮𑌤𑌨𑍁𑌶𑌰𑌲𑍀𑌲𑌯𑌾 ।
𑌸𑍍𑌰𑌗𑌪𑌿 𑌹𑍃𑌦𑌿 𑌹𑌂𑌤𑌿 𑌮𑌾𑌮𑌤𑌿𑌵𑌿𑌷𑌮𑌶𑍀𑌲𑌯𑌾 ॥ 6 ॥

𑌅𑌹𑌮𑌿𑌹 𑌨𑌿𑌵𑌸𑌾𑌮𑌿 𑌨𑌗𑌣𑌿𑌤𑌵𑌨𑌵𑍇𑌤𑌸𑌾 ।
𑌸𑍍𑌮𑌰𑌤𑌿 𑌮𑌧𑍁𑌸𑍂𑌦𑌨𑍋 𑌮𑌾𑌮𑌪𑌿 𑌨 𑌚𑍇𑌤𑌸𑌾 ॥ 𑍭 ॥

𑌹𑌰𑌿𑌚𑌰𑌣𑌶𑌰𑌣𑌜𑌯𑌦𑍇𑌵𑌕𑌵𑌿𑌭𑌾𑌰𑌤𑍀 ।
𑌵𑌸𑌤𑍁 𑌹𑍃𑌦𑌿 𑌯𑍁𑌵𑌤𑌿𑌰𑌿𑌵 𑌕𑍋𑌮𑌲𑌕𑌲𑌾𑌵𑌤𑍀 ॥ 𑍮 ॥

𑌤𑌤𑍍𑌕𑌿𑌂 𑌕𑌾𑌮𑌪𑌿 𑌕𑌾𑌮𑌿𑌨𑍀𑌮𑌭𑌿𑌸𑍃𑌤𑌃 𑌕𑌿𑌂 𑌵𑌾 𑌕𑌲𑌾𑌕𑍇𑌲𑌿𑌭𑌿-𑌰𑍍𑌬𑌦𑍍𑌧𑍋 𑌬𑌂𑌧𑍁𑌭𑌿𑌰𑌂𑌧𑌕𑌾𑌰𑌿𑌣𑌿 𑌵𑌨𑍋𑌪𑌾𑌂𑌤𑍇 𑌕𑌿𑌮𑍁 𑌭𑍍𑌰𑌾𑌮𑍍𑌯𑌤𑌿 ।
𑌕𑌾𑌂𑌤𑌃 𑌕𑍍𑌲𑌾𑌂𑌤𑌮𑌨𑌾 𑌮𑌨𑌾𑌗𑌪𑌿 𑌪𑌥𑌿 𑌪𑍍𑌰𑌸𑍍𑌥𑌾𑌤𑍁𑌮𑍇𑌵𑌾𑌕𑍍𑌷𑌮𑌃 𑌸𑌂𑌕𑍇𑌤𑍀𑌕𑍃𑌤𑌮𑌂𑌜𑍁𑌵𑌂𑌜𑍁𑌲𑌲𑌤𑌾𑌕𑍁𑌂𑌜𑍇𑌽𑌪𑌿 𑌯𑌨𑍍𑌨𑌾𑌗𑌤𑌃 ॥ 42 ॥

𑌅𑌥𑌾𑌗𑌤𑌾𑌂 𑌮𑌾𑌧𑌵𑌮𑌂𑌤𑌰𑍇𑌣 𑌸𑌖𑍀𑌮𑌿𑌯𑌂 𑌵𑍀𑌕𑍍𑌷𑍍𑌯 𑌵𑌿𑌷𑌾𑌦𑌮𑍂𑌕𑌾𑌮𑍍 ।
𑌵𑌿𑌶𑌂𑌕𑍍𑌮𑌾𑌨𑌾 𑌰𑌮𑌿𑌤𑌂 𑌕𑌯𑌾𑌪𑌿 𑌜𑌨𑌾𑌰𑍍𑌦𑌨𑌂 𑌦𑍃𑌷𑍍𑌟𑌵𑌦𑍇𑌤𑌦𑌾𑌹 ॥ 43 ॥

॥ 𑌗𑍀𑌤𑌂 14 ॥

𑌸𑍍𑌮𑌰𑌸𑌮𑌰𑍋𑌚𑌿𑌤𑌵𑌿𑌰𑌚𑌿𑌤𑌵𑍇𑌶𑌾 ।
𑌗𑌲𑌿𑌤𑌕𑍁𑌸𑍁𑌮𑌦𑌰𑌵𑌿𑌲𑍁𑌲𑌿𑌤𑌕𑍇𑌶𑌾 ॥
𑌕𑌾𑌪𑌿 𑌮𑌧𑍁𑌰𑌿𑌪𑍁𑌣𑌾 𑌵𑌿𑌲𑌸𑌤𑌿 𑌯𑍁𑌵𑌤𑌿𑌰𑌧𑌿𑌕𑌗𑍁𑌣𑌾 ॥ 1 ॥

𑌹𑌰𑌿𑌪𑌰𑌿𑌰𑌂𑌭𑌣𑌵𑌲𑌿𑌤𑌵𑌿𑌕𑌾𑌰𑌾 ।
𑌕𑍁𑌚𑌕𑌲𑌶𑍋𑌪𑌰𑌿 𑌤𑌰𑌲𑌿𑌤𑌹𑌾𑌰𑌾 ॥ 2 ॥

𑌵𑌿𑌚𑌲𑌦𑌲𑌕𑌲𑌲𑌿𑌤𑌾𑌨𑌨𑌚𑌂𑌦𑍍𑌰𑌾 ।
𑌤𑌦𑌧𑌰𑌪𑌾𑌨𑌰𑌭𑌸𑌕𑍃𑌤𑌤𑌂𑌦𑍍𑌰𑌾 ॥ 3 ॥

𑌚𑌂𑌚𑌲𑌕𑍁𑌂𑌡𑌲𑌦𑌲𑌿𑌤𑌕𑌪𑍋𑌲𑌾 ।
𑌮𑍁𑌖𑌰𑌿𑌤𑌰𑌸𑌨𑌜𑌘𑌨𑌗𑌲𑌿𑌤𑌲𑍋𑌲𑌾 ॥ 4 ॥

𑌦𑌯𑌿𑌤𑌵𑌿𑌲𑍋𑌕𑌿𑌤𑌲𑌜𑍍𑌜𑌿𑌤𑌹𑌸𑌿𑌤𑌾 ।
𑌬𑌹𑍁𑌵𑌿𑌧𑌕𑍂𑌜𑌿𑌤𑌰𑌤𑌿𑌰𑌸𑌰𑌸𑌿𑌤𑌾 ॥ 5 ॥

𑌵𑌿𑌪𑍁𑌲𑌪𑍁𑌲𑌕𑌪𑍃𑌥𑍁𑌵𑍇𑌪𑌥𑍁𑌭𑌂𑌗𑌾 ।
𑌶𑍍𑌵𑌸𑌿𑌤𑌨𑌿𑌮𑍀𑌲𑌿𑌤𑌵𑌿𑌕𑌸𑌦𑌨𑌂𑌗𑌾 ॥ 6 ॥

𑌶𑍍𑌰𑌮𑌜𑌲𑌕𑌣𑌭𑌰𑌸𑍁𑌭𑌗𑌶𑌰𑍀𑌰𑌾 ।
𑌪𑌰𑌿𑌪𑌤𑌿𑌤𑍋𑌰𑌸𑌿 𑌰𑌤𑌿𑌰𑌣𑌧𑍀𑌰𑌾 ॥ 𑍭 ॥

𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌹𑌰𑌿𑌰𑌮𑌿𑌤𑌮𑍍 ।
𑌕𑌲𑌿𑌕𑌲𑍁𑌷𑌂 𑌜𑌨𑌯𑌤𑍁 𑌪𑌰𑌿𑌶𑌮𑌿𑌤𑌮𑍍 ॥ 𑍮 ॥

𑌵𑌿𑌰𑌹𑌪𑌾𑌂𑌡𑍁𑌮𑍁𑌰𑌾𑌰𑌿𑌮𑍁𑌖𑌾𑌂𑌬𑍁𑌜-𑌦𑍍𑌯𑍁𑌤𑌿𑌰𑌿𑌯𑌂 𑌤𑌿𑌰𑌯𑌨𑍍𑌨𑌪𑌿 𑌚𑍇𑌤𑌨𑌾𑌮𑍍 ।
𑌵𑌿𑌧𑍁𑌰𑌤𑍀𑌵 𑌤𑌨𑍋𑌤𑌿 𑌮𑌨𑍋𑌭𑍁𑌵𑌃 𑌸𑌹𑍃𑌦𑌯𑍇 𑌹𑍃𑌦𑌯𑍇 𑌮𑌦𑌨𑌵𑍍𑌯𑌥𑌾𑌮𑍍 ॥ 44 ॥

॥ 𑌗𑍀𑌤𑌂 15 ॥

𑌸𑌮𑍁𑌦𑌿𑌤𑌮𑌦𑌨𑍇 𑌰𑌮𑌣𑍀𑌵𑌦𑌨𑍇 𑌚𑍁𑌂𑌬𑌨𑌵𑌲𑌿𑌤𑌾𑌧𑌰𑍇 ।
𑌮𑍃𑌗𑌮𑌦𑌤𑌿𑌲𑌕𑌂 𑌲𑌿𑌖𑌤𑌿 𑌸𑌪𑍁𑌲𑌕𑌂 𑌮𑍃𑌗𑌮𑌿𑌵 𑌰𑌜𑌨𑍀𑌕𑌰𑍇 ॥
𑌰𑌮𑌤𑍇 𑌯𑌮𑍁𑌨𑌾𑌪𑍁𑌲𑌿𑌨𑌵𑌨𑍇 𑌵𑌿𑌜𑌯𑍀 𑌮𑍁𑌰𑌾𑌰𑌿𑌰𑌧𑍁𑌨𑌾 ॥ 1 ॥

𑌘𑌨𑌚𑌯𑌰𑍁𑌚𑌿𑌰𑍇 𑌰𑌚𑌯𑌤𑌿 𑌚𑌿𑌕𑍁𑌰𑍇 𑌤𑌰𑌲𑌿𑌤𑌤𑌰𑍁𑌣𑌾𑌨𑌨𑍇 ।
𑌕𑍁𑌰𑌬𑌕𑌕𑍁𑌸𑍁𑌮𑌂 𑌚𑌪𑌲𑌾𑌸𑍁𑌷𑌮𑌂 𑌰𑌤𑌿𑌪𑌤𑌿𑌮𑍃𑌗𑌕𑌾𑌨𑌨𑍇 ॥ 2 ॥

𑌘𑌟𑌯𑌤𑌿 𑌸𑍁𑌘𑌨𑍇 𑌕𑍁𑌚𑌯𑍁𑌗𑌗𑌗𑌨𑍇 𑌮𑍃𑌗𑌮𑌦𑌰𑍁𑌚𑌿𑌰𑍂𑌷𑌿𑌤𑍇 ।
𑌮𑌣𑌿𑌸𑌰𑌮𑌮𑌲𑌂 𑌤𑌾𑌰𑌕𑌪𑌟𑌲𑌂 𑌨𑌖𑌪𑌦𑌶𑌶𑌿𑌭𑍂𑌷𑌿𑌤𑍇 ॥ 3 ॥

𑌜𑌿𑌤𑌬𑌿𑌸𑌶𑌕𑌲𑍇 𑌮𑍃𑌦𑍁𑌭𑍁𑌜𑌯𑍁𑌗𑌲𑍇 𑌕𑌰𑌤𑌲𑌨𑌲𑌿𑌨𑍀𑌦𑌲𑍇 ।
𑌮𑌰𑌕𑌤𑌵𑌲𑌯𑌂 𑌮𑌧𑍁𑌕𑌰𑌨𑌿𑌚𑌯𑌂 𑌵𑌿𑌤𑌰𑌤𑌿 𑌹𑌿𑌮𑌶𑍀𑌤𑌲𑍇 ॥ 4 ॥

𑌰𑌤𑌿𑌗𑍃𑌹𑌜𑌘𑌨𑍇 𑌵𑌿𑌪𑍁𑌲𑌾𑌪𑌘𑌨𑍇 𑌮𑌨𑌸𑌿𑌜𑌕𑌨𑌕𑌾𑌸𑌨𑍇 ।
𑌮𑌣𑌿𑌮𑌯𑌰𑌸𑌨𑌂 𑌤𑍋𑌰𑌣𑌹𑌸𑌨𑌂 𑌵𑌿𑌕𑌿𑌰𑌤𑌿 𑌕𑍃𑌤𑌵𑌾𑌸𑌨𑍇 ॥ 5 ॥

𑌚𑌰𑌣𑌕𑌿𑌸𑌲𑌯𑍇 𑌕𑌮𑌲𑌾𑌨𑌿𑌲𑌯𑍇 𑌨𑌖𑌮𑌣𑌿𑌗𑌣𑌪𑍂𑌜𑌿𑌤𑍇 ।
𑌬𑌹𑌿𑌰𑌪𑌵𑌰𑌣𑌂 𑌯𑌾𑌵𑌕𑌭𑌰𑌣𑌂 𑌜𑌨𑌯𑌤𑌿 𑌹𑍃𑌦𑌿 𑌯𑍋𑌜𑌿𑌤𑍇 ॥ 6 ॥

𑌰𑌮𑌯𑌤𑌿 𑌸𑌦𑍃𑌶𑌂 𑌕𑌾𑌮𑌪𑌿 𑌸𑍁𑌭𑍃𑌶𑌂 𑌖𑌲𑌹𑌲𑌧𑌰𑌸𑍋𑌦𑌰𑍇 ।
𑌕𑌿𑌮𑌫𑌲𑌮𑌵𑌸𑌂 𑌚𑌿𑌰𑌮𑌿𑌹 𑌵𑌿𑌰𑌸𑌂 𑌵𑌦 𑌸𑌖𑌿 𑌵𑌿𑌟𑌪𑍋𑌦𑌰𑍇 ॥ 𑍭 ॥

𑌇𑌹 𑌰𑌸𑌭𑌣𑌨𑍇 𑌕𑍃𑌤𑌹𑌰𑌿𑌗𑍁𑌣𑌨𑍇 𑌮𑌧𑍁𑌰𑌿𑌪𑍁𑌪𑌦𑌸𑍇𑌵𑌕𑍇 ।
𑌕𑌲𑌿𑌯𑍁𑌗𑌚𑌰𑌿𑌤𑌂 𑌨 𑌵𑌸𑌤𑍁 𑌦𑍁𑌰𑌿𑌤𑌂 𑌕𑌵𑌿𑌨𑍃𑌪𑌜𑌯𑌦𑍇𑌵𑌕𑍇 ॥ 𑍮 ॥

𑌨𑌾𑌯𑌾𑌤𑌃 𑌸𑌖𑌿 𑌨𑌿𑌰𑍍𑌦𑌯𑍋 𑌯𑌦𑌿 𑌶𑌠𑌸𑍍𑌤𑍍𑌵𑌂 𑌦𑍂𑌤𑌿 𑌕𑌿𑌂 𑌦𑍂𑌯𑌸𑍇 𑌸𑍍𑌵𑌚𑍍𑌛𑌂𑌦𑌂 𑌬𑌹𑍁𑌵𑌲𑍍𑌲𑌭𑌃 𑌸 𑌰𑌮𑌤𑍇 𑌕𑌿𑌂 𑌤𑌤𑍍𑌰 𑌤𑍇 𑌦𑍂𑌷𑌣𑌮𑍍 ।
𑌪𑌶𑍍𑌯𑌾𑌦𑍍𑌯 𑌪𑍍𑌰𑌿𑌯𑌸𑌮𑍍𑌗𑌮𑌾𑌯 𑌦𑌯𑌿𑌤𑌸𑍍𑌯𑌾𑌕𑍃𑌷𑍍𑌯𑌮𑌾𑌣𑌂 𑌗𑌣𑍈-𑌰𑍁𑌤𑍍𑌕𑌂𑌠𑌾𑌰𑍍𑌤𑌿𑌭𑌰𑌾𑌦𑌿𑌵 𑌸𑍍𑌫𑍁𑌟𑌦𑌿𑌦𑌂 𑌚𑍇𑌤𑌃 𑌸𑍍𑌵𑌯𑌂 𑌯𑌾𑌸𑍍𑌯𑌤𑌿 ॥ 45 ॥

॥ 𑌗𑍀𑌤𑌂 16 ॥

𑌅𑌨𑌿𑌲𑌤𑌰𑌲𑌕𑍁𑌵𑌲𑌯𑌨𑌯𑌨𑍇𑌨 ।
𑌤𑌪𑌤𑌿 𑌨 𑌸𑌾 𑌕𑌿𑌸𑌲𑌯𑌶𑌯𑌨𑍇𑌨 ॥
𑌸𑌖𑌿 𑌯𑌾 𑌰𑌮𑌿𑌤𑌾 𑌵𑌨𑌮𑌾𑌲𑌿𑌨𑌾 ॥ 1 ॥

𑌵𑌿𑌕𑌸𑌿𑌤𑌸𑌰𑌸𑌿𑌜𑌲𑌲𑌿𑌤𑌮𑍁𑌖𑍇𑌨 ।
𑌸𑍍𑌫𑍁𑌟𑌤𑌿 𑌨 𑌸𑌾 𑌮𑌨𑌸𑌿𑌜𑌵𑌿𑌶𑌿𑌖𑍇𑌨 ॥ 2 ॥

𑌅𑌮𑍃𑌤𑌮𑌧𑍁𑌰𑌮𑍃𑌦𑍁𑌤𑌰𑌵𑌚𑌨𑍇𑌨 ।
𑌜𑍍𑌵𑌲𑌤𑌿 𑌨 𑌸𑌾 𑌮𑌲𑌯𑌜𑌪𑌵𑌨𑍇𑌨 ॥ 3 ॥

𑌸𑍍𑌥𑌲𑌜𑌲𑌰𑍁𑌹𑌰𑍁𑌚𑌿𑌕𑌰𑌚𑌰𑌣𑍇𑌨 ।
𑌲𑍁𑌠𑌤𑌿 𑌨 𑌸𑌾 𑌹𑌿𑌮𑌕𑌰𑌕𑌿𑌰𑌣𑍇𑌨 ॥ 4 ॥

𑌸𑌜𑌲𑌜𑌲𑌦𑌸𑌮𑍁𑌦𑌯𑌰𑍁𑌚𑌿𑌰𑍇𑌣 ।
𑌦𑌲𑌤𑌿 𑌨 𑌸𑌾 𑌹𑍃𑌦𑌿 𑌚𑌿𑌰𑌵𑌿𑌰𑌹𑍇𑌣 ॥ 5 ॥

𑌕𑌨𑌕𑌨𑌿𑌕𑌷𑌰𑍁𑌚𑌿𑌶𑍁𑌚𑌿𑌵𑌸𑌨𑍇𑌨 ।
𑌶𑍍𑌵𑌸𑌤𑌿 𑌨 𑌸𑌾 𑌪𑌰𑌿𑌜𑌨𑌹𑌸𑌨𑍇𑌨 ॥ 6 ॥

𑌸𑌕𑌲𑌭𑍁𑌵𑌨𑌜𑌨𑌵𑌰𑌤𑌰𑍁𑌣𑍇𑌨 ।
𑌵𑌹𑌤𑌿 𑌨 𑌸𑌾 𑌰𑍁𑌜𑌮𑌤𑌿𑌕𑌰𑍁𑌣𑍇𑌨 ॥ 𑍭 ॥

𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌵𑌚𑌨𑍇𑌨 ।
𑌪𑍍𑌰𑌵𑌿𑌶𑌤𑍁 𑌹𑌰𑌿𑌰𑌪𑌿 𑌹𑍃𑌦𑌯𑌮𑌨𑍇𑌨 ॥ 𑍮 ॥

𑌮𑌨𑍋𑌭𑌵𑌾𑌨𑌂𑌦𑌨 𑌚𑌂𑌦𑌨𑌾𑌨𑌿𑌲 𑌪𑍍𑌰𑌸𑍀𑌦 𑌰𑍇 𑌦𑌕𑍍𑌷𑌿𑌣 𑌮𑍁𑌂𑌚 𑌵𑌾𑌮𑌤𑌾𑌮𑍍 ।
𑌕𑍍𑌷𑌣𑌂 𑌜𑌗𑌤𑍍𑌪𑍍𑌰𑌾𑌣 𑌵𑌿𑌧𑌾𑌯 𑌮𑌾𑌧𑌵𑌂 𑌪𑍁𑌰𑍋 𑌮𑌮 𑌪𑍍𑌰𑌾𑌣𑌹𑌰𑍋 𑌭𑌵𑌿𑌷𑍍𑌯𑌸𑌿 ॥ 46 ॥

𑌰𑌿𑌪𑍁𑌰𑌿𑌵 𑌸𑌖𑍀𑌸𑌂𑌵𑌾𑌸𑍋𑌽𑌯𑌂 𑌶𑌿𑌖𑍀𑌵 𑌹𑌿𑌮𑌾𑌨𑌿𑌲𑍋 𑌵𑌿𑌷𑌮𑌿𑌵 𑌸𑍁𑌧𑌾𑌰𑌶𑍍𑌮𑌿𑌰𑍍𑌯𑌸𑍍𑌮𑌿𑌂𑌦𑍁𑌨𑍋𑌤𑌿 𑌮𑌨𑍋𑌗𑌤𑍇 ।
𑌹𑍃𑌦𑌯𑌮𑌦𑌯𑍇 𑌤𑌸𑍍𑌮𑌿𑌨𑍍𑌨𑍇𑌵𑌂 𑌪𑍁𑌨𑌰𑍍𑌵𑌲𑌤𑍇 𑌬𑌲𑌾𑌤𑍍 𑌕𑍁𑌵𑌲𑌯𑌦𑍃𑌶𑌾𑌂 𑌵𑌾𑌮𑌃 𑌕𑌾𑌮𑍋 𑌨𑌿𑌕𑌾𑌮𑌨𑌿𑌰𑌂𑌕𑍁𑌶𑌃 ॥ 4𑍭 ॥

𑌬𑌾𑌧𑌾𑌂 𑌵𑌿𑌧𑍇𑌹𑌿 𑌮𑌲𑌯𑌾𑌨𑌿𑌲 𑌪𑌂𑌚𑌬𑌾𑌣 𑌪𑍍𑌰𑌾𑌣𑌾𑌨𑍍𑌗𑍃𑌹𑌾𑌣 𑌨 𑌗𑍃𑌹𑌂 𑌪𑍁𑌨𑌰𑌾𑌶𑍍𑌰𑌯𑌿𑌷𑍍𑌯𑍇 ।
𑌕𑌿𑌂 𑌤𑍇 𑌕𑍃𑌤𑌾𑌂𑌤𑌭𑌗𑌿𑌨𑌿 𑌕𑍍𑌷𑌮𑌯𑌾 𑌤𑌰𑌂𑌗𑍈-𑌰𑌂𑌗𑌾𑌨𑌿 𑌸𑌿𑌂𑌚 𑌮𑌮 𑌶𑌾𑌮𑍍𑌯𑌤𑍁 𑌦𑍇𑌹𑌦𑌾𑌹𑌃 ॥ 4𑍮 ॥

𑌪𑍍𑌰𑌾𑌤𑌰𑍍𑌨𑍀𑌲𑌨𑌿𑌚𑍋𑌲𑌮𑌚𑍍𑌯𑍁𑌤𑌮𑍁𑌰𑌸𑍍𑌸𑌂𑌵𑍀𑌤𑌪𑍀𑌤𑌾𑌂𑌬𑌰𑌮𑍍
𑌰𑌧𑌾𑌯𑌾𑌶𑍍𑌕𑌿𑌤𑌂 𑌵𑌿𑌲𑍋𑌕𑍍𑌯 𑌹𑌸𑌤𑌿 𑌸𑍍𑌵𑍈𑌰𑌂 𑌸𑌖𑍀𑌮𑌂𑌡𑌲𑍇 ।
𑌵𑍍𑌰𑍀𑌡𑌾𑌚𑌂𑌚𑌲𑌮𑌂𑌚𑌲𑌂 𑌨𑌯𑌨𑌯𑍋𑌰𑌾𑌧𑌾𑌯 𑌰𑌾𑌧𑌾𑌨𑌨𑍇
𑌸𑍍𑌵𑌾𑌦𑍁𑌸𑍍𑌮𑍇𑌰𑌮𑍁𑌖𑍋𑌽𑌯𑌮𑌸𑍍𑌤𑍁 𑌜𑌗𑌦𑌾𑌨𑌂𑌦𑌾𑌯 𑌨𑌂𑌦𑌾𑌤𑍍𑌮𑌜𑌃॥ (𑌕𑌸𑍍𑌮𑌿𑌂𑌶𑍍𑌚𑌨 𑌪𑌾𑌠𑌾𑌂𑌤𑌰𑍇 𑌇𑌦𑌂 𑌪𑌦𑍍𑌯𑌂 𑌵𑌿𑌦𑍍𑌯𑌤𑍇)

॥ 𑌇𑌤𑌿 𑌗𑍀𑌤𑌗𑍋𑌵𑌿𑌂𑌦𑍇 𑌵𑌿𑌪𑍍𑌰𑌲𑌬𑍍𑌧𑌾𑌵𑌰𑍍𑌣𑌨𑍇 𑌨𑌾𑌗𑌨𑌾𑌰𑌾𑌯𑌣𑍋 𑌨𑌾𑌮 𑌸𑌪𑍍𑌤𑌮𑌃 𑌸𑌰𑍍𑌗𑌃 ॥