𑌗𑍀𑌤𑌗𑍋𑌵𑌿𑌂𑌦𑌂 𑌦𑍍𑌵𑌾𑌦𑌶𑌃 𑌸𑌰𑍍𑌗𑌃 – 𑌸𑍁𑌪𑍍𑌰𑍀𑌤 𑌪𑍀𑌤𑌾𑌂𑌬𑌰𑌃

॥ 𑌦𑍍𑌵𑌾𑌦𑌶𑌃 𑌸𑌰𑍍𑌗𑌃 ॥
॥ 𑌸𑍁𑌪𑍍𑌰𑍀𑌤𑌪𑍀𑌤𑌾𑌂𑌬𑌰𑌃 ॥

𑌗𑌤𑌵𑌤𑌿 𑌸𑌖𑍀𑌵𑍃𑌂𑌦𑍇𑌽𑌮𑌂𑌦𑌤𑍍𑌰𑌪𑌾𑌭𑌰𑌨𑌿𑌰𑍍𑌭𑌰-𑌸𑍍𑌮𑌰𑌪𑌰𑌵𑌶𑌾𑌕𑍂𑌤𑌸𑍍𑌫𑍀𑌤𑌸𑍍𑌮𑌿𑌤𑌸𑍍𑌨𑌪𑌿𑌤𑌾𑌧𑌰𑌮𑍍 ।
𑌸𑌰𑌸𑌮𑌨𑌸𑌂 𑌦𑍃𑌷𑍍𑌟𑍍𑌵𑌾 𑌰𑌾𑌧𑌾𑌂 𑌮𑍁𑌹𑍁𑌰𑍍𑌨𑌵𑌪𑌲𑍍𑌲𑌵-𑌪𑍍𑌰𑌸𑌵𑌶𑌯𑌨𑍇 𑌨𑌿𑌕𑍍𑌷𑌿𑌪𑍍𑌤𑌾𑌕𑍍𑌷𑍀𑌮𑍁𑌵𑌾𑌚 𑌹𑌰𑌃 ॥ 6𑍮 ॥

॥ 𑌗𑍀𑌤𑌂 23 ॥

𑌕𑌿𑌸𑌲𑌯𑌶𑌯𑌨𑌤𑌲𑍇 𑌕𑍁𑌰𑍁 𑌕𑌾𑌮𑌿𑌨𑌿 𑌚𑌰𑌣𑌨𑌲𑌿𑌨𑌵𑌿𑌨𑌿𑌵𑍇𑌶𑌮𑍍 ।
𑌤𑌵 𑌪𑌦𑌪𑌲𑍍𑌲𑌵𑌵𑍈𑌰𑌿𑌪𑌰𑌾𑌭𑌵𑌮𑌿𑌦𑌮𑌨𑍁𑌭𑌵𑌤𑍁 𑌸𑍁𑌵𑍇𑌶𑌮𑍍 ॥
𑌕𑍍𑌷𑌣𑌮𑌧𑍁𑌨𑌾 𑌨𑌾𑌰𑌾𑌯𑌣𑌮𑌨𑍁𑌗𑌤𑌮𑌨𑍁𑌸𑌰 𑌰𑌾𑌧𑌿𑌕𑍇 ॥ 1 ॥

𑌕𑌰𑌕𑌮𑌲𑍇𑌨 𑌕𑌰𑍋𑌮𑌿 𑌚𑌰𑌣𑌮𑌹𑌮𑌾𑌗𑌮𑌿𑌤𑌾𑌸𑌿 𑌵𑌿𑌦𑍂𑌰𑌮𑍍 ।
𑌕𑍍𑌷𑌣𑌮𑍁𑌪𑌕𑍁𑌰𑍁 𑌶𑌯𑌨𑍋𑌪𑌰𑌿 𑌮𑌾𑌮𑌿𑌵 𑌨𑍂𑌪𑍁𑌰𑌮𑌨𑍁𑌗𑌤𑌿𑌶𑍂𑌰𑌮𑍍 ॥ 2 ॥

𑌵𑌦𑌨𑌸𑍁𑌧𑌾𑌨𑌿𑌧𑌿𑌗𑌲𑌿𑌤𑌮𑌮𑍃𑌤𑌮𑌿𑌵 𑌰𑌚𑌯 𑌵𑌚𑌨𑌮𑌨𑍁𑌕𑍂𑌲𑌮𑍍 ।
𑌵𑌿𑌰𑌹𑌮𑌿𑌵𑌾𑌪𑌨𑌯𑌾𑌮𑌿 𑌪𑌯𑍋𑌧𑌰𑌰𑍋𑌧𑌕𑌮𑍁𑌰𑌸𑌿 𑌦𑍁𑌕𑍂𑌲𑌮𑍍 ॥ 3 ॥

𑌪𑍍𑌰𑌿𑌯𑌪𑌰𑌿𑌰𑌂𑌭𑌣𑌰𑌭𑌸𑌵𑌲𑌿𑌤𑌮𑌿𑌵 𑌪𑍁𑌲𑌕𑌿𑌤𑌮𑌤𑌿𑌦𑍁𑌰𑌵𑌾𑌪𑌮𑍍 ।
𑌮𑌦𑍁𑌰𑌸𑌿 𑌕𑍁𑌚𑌕𑌲𑌶𑌂 𑌵𑌿𑌨𑌿𑌵𑍇𑌶𑌯 𑌶𑍋𑌷𑌯 𑌮𑌨𑌸𑌿𑌜𑌤𑌾𑌪𑌮𑍍 ॥ 4 ॥

𑌅𑌧𑌰𑌸𑍁𑌧𑌾𑌰𑌸𑌮𑍁𑌪𑌨𑌯 𑌭𑌾𑌵𑌿𑌨𑌿 𑌜𑍀𑌵𑌯 𑌮𑍃𑌤𑌮𑌿𑌵 𑌦𑌾𑌸𑌮𑍍 ।
𑌤𑍍𑌵𑌯𑌿 𑌵𑌿𑌨𑌿𑌹𑌿𑌤𑌮𑌨𑌸𑌂 𑌵𑌿𑌰𑌹𑌾𑌨𑌲𑌦𑌗𑍍𑌧𑌵𑌪𑍁𑌷𑌮𑌵𑌿𑌲𑌾𑌸𑌮𑍍 ॥ 5 ॥

𑌶𑌶𑌿𑌮𑍁𑌖𑌿 𑌮𑍁𑌖𑌰𑌯 𑌮𑌣𑌿𑌰𑌶𑌨𑌾𑌗𑍁𑌣𑌮𑌨𑍁𑌗𑍁𑌣𑌕𑌂𑌠𑌨𑌿𑌦𑌾𑌨𑌮𑍍 ।
𑌶𑍍𑌰𑍁𑌤𑌿𑌯𑍁𑌗𑌲𑍇 𑌪𑌿𑌕𑌰𑍁𑌤𑌵𑌿𑌕𑌲𑍇 𑌮𑌮 𑌶𑌮𑌯 𑌚𑌿𑌰𑌾𑌦𑌵𑌸𑌾𑌦𑌮𑍍 ॥ 6 ॥

𑌮𑌾𑌮𑌤𑌿𑌵𑌿𑌫𑌲𑌰𑍁𑌷𑌾 𑌵𑌿𑌕𑌲𑍀𑌕𑍃𑌤𑌮𑌵𑌲𑍋𑌕𑌿𑌤𑌮𑌧𑍁𑌨𑍇𑌦𑌮𑍍 ।
𑌮𑍀𑌲𑌿𑌤𑌲𑌜𑍍𑌜𑌿𑌤𑌮𑌿𑌵 𑌨𑌯𑌨𑌂 𑌤𑌵 𑌵𑌿𑌰𑌮 𑌵𑌿𑌸𑍃𑌜 𑌰𑌤𑌿𑌖𑍇𑌦𑌮𑍍 ॥ 𑍭 ॥

𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌮𑌿𑌦𑌮𑌨𑍁𑌪𑌦𑌨𑌿𑌗𑌦𑌿𑌤𑌮𑌧𑍁𑌰𑌿𑌪𑍁𑌮𑍋𑌦𑌮𑍍 ।
𑌜𑌨𑌯𑌤𑍁 𑌰𑌸𑌿𑌕𑌜𑌨𑍇𑌷𑍁 𑌮𑌨𑍋𑌰𑌮𑌤𑌿𑌰𑌸𑌭𑌾𑌵𑌵𑌿𑌨𑍋𑌦𑌮𑍍 ॥ 𑍮 ॥

𑌮𑌾𑌰𑌂𑌕𑍇 𑌰𑌤𑌿𑌕𑍇𑌲𑌿𑌸𑌂𑌕𑍁𑌲𑌰𑌣𑌾𑌰𑌂𑌭𑍇 𑌤𑌯𑌾 𑌸𑌾𑌹𑌸-𑌪𑍍𑌰𑌾𑌯𑌂 𑌕𑌾𑌂𑌤𑌜𑌯𑌾𑌯 𑌕𑌿𑌂𑌚𑌿𑌦𑍁𑌪𑌰𑌿 𑌪𑍍𑌰𑌾𑌰𑌂𑌭𑌿 𑌯𑌤𑍍𑌸𑌂𑌭𑍍𑌰𑌮𑌾𑌤𑍍 ।
𑌨𑌿𑌷𑍍𑌪𑌂𑌦𑌾 𑌜𑌘𑌨𑌸𑍍𑌥𑌲𑍀 𑌶𑌿𑌥𑌿𑌲𑌤𑌾 𑌦𑍋𑌰𑍍𑌵𑌲𑍍𑌲𑌿𑌰𑍁𑌤𑍍𑌕𑌂𑌪𑌿𑌤𑌂 𑌵𑌕𑍍𑌷𑍋 𑌮𑍀𑌲𑌿𑌤𑌮𑌕𑍍𑌷𑌿 𑌪𑍌𑌰𑍁𑌷𑌰𑌸𑌃 𑌸𑍍𑌤𑍍𑌰𑍀𑌣𑌾𑌂 𑌕𑍁𑌤𑌃 𑌸𑌿𑌧𑍍𑌯𑌤𑌿 ॥ 6𑍯 ॥

𑌅𑌥 𑌕𑌾𑌂𑌤𑌂 𑌰𑌤𑌿𑌕𑍍𑌲𑌾𑌂𑌤𑌮𑌪𑌿 𑌮𑌂𑌡𑌨𑌵𑌾𑌂𑌛𑌯𑌾 ।
𑌨𑌿𑌜𑌗𑌾𑌦 𑌨𑌿𑌰𑌾𑌬𑌾𑌧𑌾 𑌰𑌾𑌧𑌾 𑌸𑍍𑌵𑌾𑌧𑍀𑌨𑌭𑌰𑍍𑌤𑍃𑌕𑌾 ॥ 𑍭0 ॥

॥ 𑌗𑍀𑌤𑌂 24 ॥

𑌕𑍁𑌰𑍁 𑌯𑌦𑍁𑌨𑌂𑌦𑌨 𑌚𑌂𑌦𑌨𑌶𑌿𑌶𑌿𑌰𑌤𑌰𑍇𑌣 𑌕𑌰𑍇𑌣 𑌪𑌯𑍋𑌧𑌰𑍇 ।
𑌮𑍃𑌗𑌮𑌦𑌪𑌤𑍍𑌰𑌕𑌮𑌤𑍍𑌰 𑌮𑌨𑍋𑌭𑌵𑌮𑌂𑌗𑌲𑌕𑌲𑌶𑌸𑌹𑍋𑌦𑌰𑍇 ।
𑌨𑌿𑌜𑌗𑌾𑌦 𑌸𑌾 𑌯𑌦𑍁𑌨𑌂𑌦𑌨𑍇 𑌕𑍍𑌰𑍀𑌡𑌤𑌿 𑌹𑍃𑌦𑌯𑌾𑌨𑌂𑌦𑌨𑍇 ॥ 1 ॥

𑌅𑌲𑌿𑌕𑍁𑌲𑌗𑌂𑌜𑌨𑌮𑌂𑌜𑌨𑌕𑌂 𑌰𑌤𑌿𑌨𑌾𑌯𑌕𑌸𑌾𑌯𑌕𑌮𑍋𑌚𑌨𑍇 ।
𑌤𑍍𑌵𑌦𑌧𑌰𑌚𑍁𑌂𑌬𑌨𑌲𑌂𑌬𑌿𑌤𑌕𑌜𑍍𑌜𑌲𑌮𑍁𑌜𑍍𑌜𑍍𑌵𑌲𑌯 𑌪𑍍𑌰𑌿𑌯 𑌲𑍋𑌚𑌨𑍇 ॥ 2 ॥

𑌨𑌯𑌨𑌕𑍁𑌰𑌂𑌗𑌤𑌰𑌂𑌗𑌵𑌿𑌕𑌾𑌸𑌨𑌿𑌰𑌾𑌸𑌕𑌰𑍇 𑌶𑍍𑌰𑍁𑌤𑌿𑌮𑌂𑌡𑌲𑍇 ।
𑌮𑌨𑌸𑌿𑌜𑌪𑌾𑌶𑌵𑌿𑌲𑌾𑌸𑌧𑌰𑍇 𑌶𑍁𑌭𑌵𑍇𑌶 𑌨𑌿𑌵𑍇𑌶𑌯 𑌕𑍁𑌂𑌡𑌲𑍇 ॥ 3 ॥

𑌭𑍍𑌰𑌮𑌰𑌚𑌯𑌂 𑌰𑌚𑌹𑌯𑌂𑌤𑌮𑍁𑌪𑌰𑌿 𑌰𑍁𑌚𑌿𑌰𑌂 𑌸𑍁𑌚𑌿𑌰𑌂 𑌮𑌮 𑌸𑌂𑌮𑍁𑌖𑍇 ।
𑌜𑌿𑌤𑌕𑌮𑌲𑍇 𑌵𑌿𑌮𑌲𑍇 𑌪𑌰𑌿𑌕𑌰𑍍𑌮𑌯 𑌨𑌰𑍍𑌮𑌜𑌨𑌕𑌮𑌲𑌕𑌂 𑌮𑍁𑌖𑍇 ॥ 4 ॥

𑌮𑍃𑌗𑌮𑌦𑌰𑌸𑌵𑌲𑌿𑌤𑌂 𑌲𑌲𑌿𑌤𑌂 𑌕𑍁𑌰𑍁 𑌤𑌿𑌲𑌕𑌮𑌲𑌿𑌕𑌰𑌜𑌨𑍀𑌕𑌰𑍇 ।
𑌵𑌿𑌹𑌿𑌤𑌕𑌲𑌂𑌕𑌕𑌲𑌂 𑌕𑌮𑌲𑌾𑌨𑌨 𑌵𑌿𑌶𑍍𑌰𑌮𑌿𑌤𑌶𑍍𑌰𑌮𑌶𑍀𑌕𑌰𑍇 ॥ 5 ॥

𑌮𑌮 𑌰𑍁𑌚𑌿𑌰𑍇 𑌚𑌿𑌕𑍁𑌰𑍇 𑌕𑍁𑌰𑍁 𑌮𑌾𑌨𑌦 𑌮𑌾𑌨𑌸𑌜𑌧𑍍𑌵𑌜𑌚𑌾𑌮𑌰𑍇 ।
𑌰𑌤𑌿𑌗𑌲𑌿𑌤𑍇 𑌲𑌲𑌿𑌤𑍇 𑌕𑍁𑌸𑍁𑌮𑌾𑌨𑌿 𑌶𑌿𑌖𑌂𑌡𑌿𑌶𑌿𑌖𑌂𑌡𑌕𑌡𑌾𑌮𑌰𑍇 ॥ 6 ॥

𑌸𑌰𑌸𑌘𑌨𑍇 𑌜𑌘𑌨𑍇 𑌮𑌮 𑌶𑌂𑌬𑌰𑌦𑌾𑌰𑌣𑌵𑌾𑌰𑌣𑌕𑌂𑌦𑌰𑍇 ।
𑌮𑌣𑌿𑌰𑌶𑌨𑌾𑌵𑌸𑌨𑌾𑌭𑌰𑌣𑌾𑌨𑌿 𑌶𑍁𑌭𑌾𑌶𑌯 𑌵𑌾𑌸𑌯 𑌸𑍁𑌂𑌦𑌰𑍇 ॥ 𑍭 ॥

𑌶𑍍𑌰𑍀𑌜𑌯𑌦𑍇𑌵𑌵𑌚𑌸𑌿 𑌰𑍁𑌚𑌿𑌰𑍇 𑌹𑍃𑌦𑌯𑌂 𑌸𑌦𑌯𑌂 𑌕𑍁𑌰𑍁 𑌮𑌂𑌡𑌨𑍇 ।
𑌹𑌰𑌿𑌚𑌰𑌣𑌸𑍍𑌮𑌰𑌣𑌾𑌮𑍃𑌤𑌕𑍃𑌤𑌕𑌲𑌿𑌕𑌲𑍁𑌷𑌭𑌵𑌜𑍍𑌵𑌰𑌖𑌂𑌡𑌨𑍇 ॥ 𑍮 ॥

𑌰𑌚𑌯 𑌕𑍁𑌚𑌯𑍋𑌃 𑌪𑌤𑍍𑌰𑌂 𑌚𑌿𑌤𑍍𑌰𑌂 𑌕𑍁𑌰𑍁𑌷𑍍𑌵 𑌕𑌪𑍋𑌲𑌯𑍋-𑌰𑍍𑌘𑌟𑌯 𑌜𑌘𑌨𑍇 𑌕𑌾𑌂𑌚𑍀𑌮𑌂𑌚 𑌸𑍍𑌰𑌜𑌾 𑌕𑌬𑌰𑍀𑌭𑌰𑌮𑍍 ।
𑌕𑌲𑌯 𑌵𑌲𑌯𑌶𑍍𑌰𑍇𑌣𑍀𑌂 𑌪𑌾𑌣𑍌 𑌪𑌦𑍇 𑌕𑍁𑌰𑍁 𑌨𑍂𑌪𑍁𑌰𑌾-𑌵𑌿𑌤𑌿 𑌨𑌿𑌗𑌤𑌿𑌤𑌃 𑌪𑍍𑌰𑍀𑌤𑌃 𑌪𑍀𑌤𑌾𑌂𑌬𑌰𑍋𑌽𑌪𑌿 𑌤𑌥𑌾𑌕𑌰𑍋𑌤𑍍 ॥ 𑍭1 ॥

𑌯𑌦𑍍𑌗𑌾𑌂𑌧𑍍𑌗𑌰𑍍𑌵𑌕𑌲𑌾𑌸𑍁 𑌕𑍌𑌶𑌲𑌮𑌨𑍁𑌧𑍍𑌯𑌾𑌨𑌂 𑌚 𑌯𑌦𑍍𑌵𑍈𑌷𑍍𑌣𑌵𑌂 𑌯𑌚𑍍𑌛𑍃𑌂𑌗𑌾𑌰𑌵𑌿𑌵𑍇𑌕𑌤𑌤𑍍𑌵𑌮𑌪𑌿 𑌯𑌤𑍍𑌕𑌾𑌵𑍍𑌯𑍇𑌷𑍁 𑌲𑍀𑌲𑌾𑌯𑌿𑌤𑌮𑍍 ।
𑌤𑌤𑍍𑌸𑌰𑍍𑌵𑌂 𑌜𑌯𑌦𑍇𑌵𑌪𑌂𑌡𑌿𑌤𑌕𑌵𑍇𑌃 𑌕𑍃𑌷𑍍𑌣𑍈𑌕𑌤𑌾𑌨𑌾𑌤𑍍𑌮𑌨𑌃 𑌸𑌾𑌨𑌂𑌦𑌾𑌃 𑌪𑌰𑌿𑌶𑍋𑌧𑌯𑌂𑌤𑍁 𑌸𑍁𑌧𑌿𑌯𑌃 𑌶𑍍𑌰𑍀𑌗𑍀𑌤𑌗𑍋𑌵𑌿𑌂𑌦𑌤𑌃 ॥ 𑍭2 ॥

𑌶𑍍𑌰𑍀𑌭𑍋𑌜𑌦𑍇𑌵𑌪𑍍𑌰𑌭𑌵𑌸𑍍𑌯 𑌰𑌾𑌮𑌾𑌦𑍇𑌵𑍀𑌸𑍁𑌤𑌶𑍍𑌰𑍀𑌜𑌯𑌦𑍇𑌵𑌕𑌸𑍍𑌯 ।
𑌪𑌰𑌾𑌶𑌰𑌾𑌦𑌿𑌪𑍍𑌰𑌿𑌯𑌵𑌰𑍍𑌗𑌕𑌂𑌠𑍇 𑌶𑍍𑌰𑍀𑌗𑍀𑌤𑌗𑍋𑌵𑌿𑌂𑌦𑌕𑌵𑌿𑌤𑍍𑌵𑌮𑌸𑍍𑌤𑍁 ॥ 𑍭3 ॥

॥ 𑌇𑌤𑌿 𑌶𑍍𑌰𑍀𑌜𑌯𑌦𑍇𑌵𑌕𑍃𑌤𑍌 𑌗𑍀𑌤𑌗𑍋𑌵𑌿𑌂𑌦𑍇 𑌸𑍁𑌪𑍍𑌰𑍀𑌤𑌪𑍀𑌤𑌾𑌂𑌬𑌰𑍋 𑌨𑌾𑌮 𑌦𑍍𑌵𑌾𑌦𑌶𑌃 𑌸𑌰𑍍𑌗𑌃 ॥
॥ 𑌇𑌤𑌿 𑌗𑍀𑌤𑌗𑍋𑌵𑌿𑌂𑌦𑌂 𑌸𑌮𑌾𑌪𑍍𑌤𑌮𑍍 ॥