𑌗𑍀𑌤𑌗𑍋𑌵𑌿𑌂𑌦𑌂 𑌦𑌶𑌮𑌃 𑌸𑌰𑍍𑌗𑌃 – 𑌚𑌤𑍁𑌰 𑌚𑌤𑍁𑌰𑍍𑌭𑍁𑌜𑌃

॥ 𑌦𑌶𑌮𑌃 𑌸𑌰𑍍𑌗𑌃 ॥
॥ 𑌚𑌤𑍁𑌰𑌚𑌤𑍁𑌰𑍍𑌭𑍁𑌜𑌃 ॥

𑌅𑌤𑍍𑌰𑌾𑌂𑌤𑌰𑍇 𑌮𑌸𑍃𑌣𑌰𑍋𑌷𑌵𑌶𑌾𑌮𑌸𑍀𑌮𑍍-𑌨𑌿𑌃𑌶𑍍𑌵𑌾𑌸𑌨𑌿𑌃𑌸𑌹𑌮𑍁𑌖𑍀𑌂 𑌸𑍁𑌮𑍁𑌖𑍀𑌮𑍁𑌪𑍇𑌤𑍍𑌯 ।
𑌸𑌵𑍍𑌰𑍀𑌡𑌮𑍀𑌕𑍍𑌷𑌿𑌤𑌸𑌖𑍀𑌵𑌦𑌨𑌾𑌂 𑌦𑌿𑌨𑌾𑌂𑌤𑍇 𑌸𑌾𑌨𑌂𑌦𑌗𑌦𑍍𑌗𑌦𑌪𑌦𑌂 𑌹𑌰𑌿𑌰𑌿𑌤𑍍𑌯𑍁𑌵𑌾𑌚 ॥ 53 ॥

॥ 𑌗𑍀𑌤𑌂 1𑍯 ॥

𑌵𑌦𑌸𑌿 𑌯𑌦𑌿 𑌕𑌿𑌂𑌚𑌿𑌦𑌪𑌿 𑌦𑌂𑌤𑌰𑍁𑌚𑌿𑌕𑍌𑌮𑍁𑌦𑍀 𑌹𑌰𑌤𑌿 𑌦𑌰𑌤𑌿𑌮𑌿𑌰𑌮𑌤𑌿𑌘𑍋𑌰𑌮𑍍 ।
𑌸𑍍𑌫𑍁𑌰𑌦𑌧𑌰𑌸𑍀𑌧𑌵𑍇 𑌤𑌵 𑌵𑌦𑌨𑌚𑌂𑌦𑍍𑌰𑌮𑌾 𑌰𑍋𑌚𑌯𑌤𑍁 𑌲𑍋𑌚𑌨𑌚𑌕𑍋𑌰𑌮𑍍 ॥
𑌪𑍍𑌰𑌿𑌯𑍇 𑌚𑌾𑌰𑍁𑌶𑍀𑌲𑍇 𑌮𑍁𑌂𑌚 𑌮𑌯𑌿 𑌮𑌾𑌨𑌮𑌨𑌿𑌦𑌾𑌨𑌂 𑌸𑌪𑌦𑌿 𑌮𑌦𑌨𑌾𑌨𑌲𑍋 𑌦𑌹𑌤𑌿 𑌮𑌮 𑌮𑌾𑌨𑌸𑌂 𑌦𑍇𑌹𑌿 𑌮𑍁𑌖𑌕𑌮𑌲𑌮𑌧𑍁𑌪𑌾𑌨𑌮𑍍 ॥ 1 ॥

𑌸𑌤𑍍𑌯𑌮𑍇𑌵𑌾𑌸𑌿 𑌯𑌦𑌿 𑌸𑍁𑌦𑌤𑌿 𑌮𑌯𑌿 𑌕𑍋𑌪𑌿𑌨𑍀 𑌦𑍇𑌹𑌿 𑌖𑌰𑌨𑌖𑌶𑌰𑌘𑌾𑌤𑌮𑍍 ।
𑌘𑌟𑌯 𑌭𑍁𑌜𑌬𑌂𑌧𑌨𑌂 𑌜𑌨𑌯 𑌰𑌦𑌖𑌂𑌡𑌨𑌂 𑌯𑍇𑌨 𑌵𑌾 𑌭𑌵𑌤𑌿 𑌸𑍁𑌖𑌜𑌾𑌤𑌮𑍍 ॥ 2 ॥

𑌤𑍍𑌵𑌮𑌸𑌿 𑌮𑌮 𑌭𑍂𑌷𑌣𑌂 𑌤𑍍𑌵𑌮𑌸𑌿 𑌮𑌮 𑌜𑍀𑌵𑌨𑌂 𑌤𑍍𑌵𑌮𑌸𑌿 𑌭𑌵𑌜𑌲𑌧𑌿𑌰𑌤𑍍𑌨𑌮𑍍 ।
𑌭𑌵𑌤𑍁 𑌭𑌵𑌤𑍀𑌹 𑌮𑌯𑌿 𑌸𑌤𑌤𑌮𑌨𑍋𑌰𑍋𑌧𑌿𑌨𑌿 𑌤𑌤𑍍𑌰 𑌮𑌮 𑌹𑍃𑌦𑌯𑌮𑌤𑌿𑌰𑌤𑍍𑌨𑌮𑍍 ॥ 3 ॥

𑌨𑍀𑌲𑌨𑌲𑌿𑌨𑌾𑌭𑌮𑌪𑌿 𑌤𑌨𑍍𑌵𑌿 𑌤𑌵 𑌲𑍋𑌚𑌨𑌂 𑌧𑌾𑌰𑌯𑌤𑌿 𑌕𑍋𑌕𑌨𑌦𑌰𑍂𑌪𑌮𑍍 ।
𑌕𑍁𑌸𑍁𑌮𑌶𑌰𑌬𑌾𑌣𑌭𑌾𑌵𑍇𑌨 𑌯𑌦𑌿 𑌰𑌂𑌜𑌯𑌸𑌿 𑌕𑍃𑌷𑍍𑌣𑌮𑌿𑌦𑌮𑍇𑌤𑌦𑌨𑍁𑌰𑍂𑌪𑌮𑍍 ॥ 4 ॥

𑌸𑍍𑌫𑍁𑌰𑌤𑍁 𑌕𑍁𑌚𑌕𑍁𑌂𑌭𑌯𑍋𑌰𑍁𑌪𑌰𑌿 𑌮𑌣𑌿𑌮𑌂𑌜𑌰𑍀 𑌰𑌂𑌜𑌯𑌤𑍁 𑌤𑌵 𑌹𑍃𑌦𑌯𑌦𑍇𑌶𑌮𑍍 ।
𑌰𑌸𑌤𑍁 𑌰𑌶𑌨𑌾𑌪𑌿 𑌤𑌵 𑌘𑌨𑌜𑌘𑌨𑌮𑌂𑌡𑌲𑍇 𑌘𑍋𑌷𑌯𑌤𑍁 𑌮𑌨𑍍𑌮𑌥𑌨𑌿𑌦𑍇𑌶𑌮𑍍 ॥ 5 ॥

𑌸𑍍𑌥𑌲𑌕𑌮𑌲𑌗𑌂𑌜𑌨𑌂 𑌮𑌮 𑌹𑍃𑌦𑌯𑌰𑌂𑌜𑌨𑌂 𑌜𑌨𑌿𑌤𑌰𑌤𑌿𑌰𑌂𑌗𑌪𑌰𑌭𑌾𑌗𑌮𑍍 ।
𑌭𑌣 𑌮𑌸𑍃𑌣𑌵𑌾𑌣𑌿 𑌕𑌰𑌵𑌾𑌣𑌿 𑌪𑌦𑌪𑌂𑌕𑌜𑌂 𑌸𑌰𑌸𑌲𑌸𑌦𑌲𑌕𑍍𑌤𑌕𑌰𑌾𑌗𑌮𑍍 ॥ 6 ॥

𑌸𑍍𑌮𑌰𑌗𑌰𑌲𑌖𑌂𑌡𑌨𑌂 𑌮𑌮 𑌶𑌿𑌰𑌸𑌿 𑌮𑌂𑌡𑌨𑌂 𑌦𑍇𑌹𑌿 𑌪𑌦𑌪𑌲𑍍𑌲𑌵𑌮𑍁𑌦𑌾𑌰𑌮𑍍 ।
𑌜𑍍𑌵𑌲𑌤𑌿 𑌮𑌯𑌿 𑌦𑌾𑌰𑍁𑌣𑍋 𑌮𑌦𑌨𑌕𑌦𑌨𑌾𑌰𑍁𑌣𑍋 𑌹𑌰𑌤𑍁 𑌤𑌦𑍁𑌪𑌾𑌹𑌿𑌤𑌵𑌿𑌕𑌾𑌰𑌮𑍍 ॥ 𑍭 ॥

𑌇𑌤𑌿 𑌚𑌟𑍁𑌲𑌚𑌾𑌟𑍁𑌪𑌟𑍁𑌚𑌾𑌰𑍁 𑌮𑍁𑌰𑌵𑍈𑌰𑌿𑌣𑍋 𑌰𑌾𑌧𑌿𑌕𑌾𑌮𑌧𑌿 𑌵𑌚𑌨𑌜𑌾𑌤𑌮𑍍 ।
𑌜𑌯𑌤𑌿 𑌪𑌦𑍍𑌮𑌾𑌵𑌤𑍀𑌰𑌮𑌣𑌜𑌯𑌦𑍇𑌵𑌕𑌵𑌿-𑌭𑌾𑌰𑌤𑍀𑌭𑌣𑌿𑌤𑌮𑌤𑌿𑌶𑌾𑌤𑌮𑍍 ॥ 𑍮 ॥

𑌪𑌰𑌿𑌹𑌰 𑌕𑍃𑌤𑌾𑌤𑌂𑌕𑍇 𑌶𑌂𑌕𑌾𑌂 𑌤𑍍𑌵𑌯𑌾 𑌸𑌤𑌤𑌂 𑌘𑌨-𑌸𑍍𑌤𑌨𑌜𑌘𑌨𑌯𑌾𑌕𑍍𑌰𑌾𑌂𑌤𑍇 𑌸𑍍𑌵𑌾𑌂𑌤𑍇 𑌪𑌰𑌾𑌨𑌵𑌕𑌾𑌶𑌿𑌨𑌿 ।
𑌵𑌿𑌶𑌤𑌿 𑌵𑌿𑌤𑌨𑍋𑌰𑌨𑍍𑌯𑍋 𑌧𑌨𑍍𑌯𑍋 𑌨 𑌕𑍋𑌽𑌪𑌿 𑌮𑌮𑌾𑌂𑌤𑌰𑌂 𑌸𑍍𑌤𑌨𑌭𑌰𑌪𑌰𑍀𑌰𑌂𑌭𑌾𑌰𑌂𑌭𑍇 𑌵𑌿𑌧𑍇𑌹𑌿 𑌵𑌿𑌧𑍇𑌯𑌤𑌾𑌮𑍍 ॥ 54 ॥

𑌮𑍁𑌗𑍍𑌧𑍇 𑌵𑌿𑌧𑍇𑌹𑌿 𑌮𑌯𑌿 𑌨𑌿𑌰𑍍𑌦𑌯𑌦𑌂𑌤𑌦𑌂𑌶-𑌦𑍋𑌰𑍍𑌵𑌲𑍍𑌲𑌿𑌬𑌂𑌧𑌨𑌿𑌬𑌿𑌡𑌸𑍍𑌤𑌨𑌪𑍀𑌡𑌨𑌾𑌨𑌿 ।
𑌚𑌂𑌡𑌿 𑌤𑍍𑌵𑌮𑍇𑌵 𑌮𑍁𑌦𑌮𑌂𑌚 𑌨 𑌪𑌂𑌚𑌬𑌾𑌣-𑌚𑌂𑌡𑌾𑌲𑌕𑌾𑌂𑌡𑌦𑌲𑌨𑌾𑌦𑌸𑌵𑌃 𑌪𑍍𑌰𑌯𑌾𑌂𑌤𑍁 ॥ 55 ॥

𑌵𑍍𑌯𑌥𑌯𑌤𑌿 𑌵𑍃𑌥𑌾 𑌮𑍌𑌨𑌂 𑌤𑌨𑍍𑌵𑌿 𑌪𑍍𑌰𑌪𑌂𑌚𑌯 𑌪𑌂𑌚𑌮𑌂 𑌤𑌰𑍁𑌣𑍀 𑌮𑌧𑍁𑌰𑌾𑌲𑌾𑌪𑍈𑌸𑍍𑌤𑌾𑌪𑌂 𑌵𑌿𑌨𑍋𑌦𑌯 𑌦𑍃𑌷𑍍𑌟𑌿𑌭𑌿𑌃 ।
𑌸𑍁𑌮𑍁𑌖𑌿 𑌵𑌿𑌮𑍁𑌖𑍀𑌭𑌾𑌵𑌂 𑌤𑌾𑌵𑌦𑍍𑌵𑌿𑌮𑍁𑌂𑌚 𑌨 𑌮𑍁𑌂𑌚 𑌮𑌾𑌂 𑌸𑍍𑌵𑌯𑌮𑌤𑌿𑌶𑌯𑌸𑍍𑌨𑌿𑌗𑍍𑌧𑍋 𑌮𑍁𑌗𑍍𑌧𑍇 𑌪𑍍𑌰𑌿𑌯𑌿𑌽𑌹𑌮𑍁𑌪𑌸𑍍𑌥𑌿𑌤𑌃 ॥ 56 ॥

𑌬𑌂𑌧𑍂𑌕𑌦𑍍𑌯𑍁𑌤𑌿𑌬𑌾𑌂𑌧𑌵𑍋𑌽𑌯𑌮𑌧𑌰𑌃 𑌸𑍍𑌨𑌿𑌗𑍍𑌧𑍋 𑌮𑌧𑍂𑌕𑌚𑍍𑌚𑌵𑌿-𑌰𑍍𑌗𑌂𑌡𑌶𑍍𑌚𑌂𑌡𑌿 𑌚𑌕𑌾𑌸𑍍𑌤𑌿 𑌨𑍀𑌲𑌨𑌲𑌿𑌨𑌶𑍍𑌰𑍀𑌮𑍋𑌚𑌨𑌂 𑌲𑍋𑌚𑌨𑌮𑍍 ।
𑌨𑌾𑌸𑌾𑌭𑍍𑌯𑍇𑌤𑌿 𑌤𑌿𑌲𑌪𑍍𑌰𑌸𑍂𑌨𑌪𑌦𑌵𑍀𑌂 𑌕𑍁𑌂𑌦𑌾𑌭𑌦𑌾𑌂𑌤𑌿 𑌪𑍍𑌰𑌿𑌯𑍇 𑌪𑍍𑌰𑌾𑌯𑌸𑍍𑌤𑍍𑌵𑌨𑍍𑌮𑍁𑌖𑌸𑍇𑌵𑌯𑌾 𑌵𑌿𑌜𑌯𑌤𑍇 𑌵𑌿𑌶𑍍𑌵𑌂 𑌸 𑌪𑍁𑌷𑍍𑌪𑌾𑌯𑍁𑌧𑌃 ॥ 5𑍭 ॥

𑌦𑍃𑌶𑍌 𑌤𑌵 𑌮𑌦𑌾𑌲𑌸𑍇 𑌵𑌦𑌨𑌮𑌿𑌂𑌦𑍁𑌸𑌂𑌦𑍀𑌪𑌕𑌂 𑌗𑌤𑌿𑌰𑍍𑌜𑌨𑌮𑌨𑍋𑌰𑌮𑌾 𑌵𑌿𑌧𑍁𑌤𑌰𑌂𑌭𑌮𑍂𑌰𑍁𑌦𑍍𑌵𑌯𑌮𑍍 ।
𑌰𑌤𑌿𑌸𑍍𑌤𑌵 𑌕𑌲𑌾𑌵𑌤𑍀 𑌰𑍁𑌚𑌿𑌰𑌚𑌿𑌤𑍍𑌰𑌲𑍇𑌖𑍇 𑌭𑍍𑌰𑍁𑌵𑌾-𑌵𑌹𑍋 𑌵𑌿𑌬𑍁𑌧𑌯𑍌𑌵𑌨𑌂 𑌵𑌹𑌸𑌿 𑌤𑌨𑍍𑌵𑍀 𑌪𑍃𑌥𑍍𑌵𑍀𑌗𑌤𑌾 ॥ 5𑍮 ॥

॥ 𑌇𑌤𑌿 𑌶𑍍𑌰𑍀𑌗𑍀𑌤𑌗𑍋𑌵𑌿𑌂𑌦𑍇 𑌮𑌾𑌨𑌿𑌨𑍀𑌵𑌰𑍍𑌣𑌨𑍇 𑌚𑌤𑍁𑌰𑌚𑌤𑍁𑌰𑍍𑌭𑍁𑌜𑍋 𑌨𑌾𑌮 𑌦𑌶𑌮𑌃 𑌸𑌰𑍍𑌗𑌃 ॥