𑌘𑌟 𑌸𑍍𑌤𑌵𑌃

𑌆𑌨𑌂𑌦𑌮𑌂𑌥𑌰𑌪𑍁𑌰𑌂𑌦𑌰𑌮𑍁𑌕𑍍𑌤𑌮𑌾𑌲𑍍𑌯𑌂
𑌮𑍌𑌲𑍌 𑌹𑌠𑍇𑌨 𑌨𑌿𑌹𑌿𑌤𑌂 𑌮𑌹𑌿𑌷𑌾𑌸𑍁𑌰𑌸𑍍𑌯 ।
𑌪𑌾𑌦𑌾𑌂𑌬𑍁𑌜𑌂 𑌭𑌵𑌤𑍁 𑌮𑍇 𑌵𑌿𑌜𑌯𑌾𑌯 𑌮𑌂𑌜𑍁-
-𑌮𑌂𑌜𑍀𑌰𑌶𑌿𑌂𑌜𑌿𑌤𑌮𑌨𑍋𑌹𑌰𑌮𑌂𑌬𑌿𑌕𑌾𑌯𑌾𑌃 ॥ 1 ॥

𑌦𑍇𑌵𑌿 𑌤𑍍𑌰𑍍𑌯𑌂𑌬𑌕𑌪𑌤𑍍𑌨𑌿 𑌪𑌾𑌰𑍍𑌵𑌤𑌿 𑌸𑌤𑌿 𑌤𑍍𑌰𑍈𑌲𑍋𑌕𑍍𑌯𑌮𑌾𑌤𑌃 𑌶𑌿𑌵𑍇
𑌶𑌰𑍍𑌵𑌾𑌣𑌿 𑌤𑍍𑌰𑌿𑌪𑍁𑌰𑍇 𑌮𑍃𑌡𑌾𑌨𑌿 𑌵𑌰𑌦𑍇 𑌰𑍁𑌦𑍍𑌰𑌾𑌣𑌿 𑌕𑌾𑌤𑍍𑌯𑌾𑌯𑌨𑌿 ।
𑌭𑍀𑌮𑍇 𑌭𑍈𑌰𑌵𑌿 𑌚𑌂𑌡𑌿 𑌶𑌰𑍍𑌵𑌰𑌿𑌕𑌲𑍇 𑌕𑌾𑌲𑌕𑍍𑌷𑌯𑍇 𑌶𑍂𑌲𑌿𑌨𑌿
𑌤𑍍𑌵𑌤𑍍𑌪𑌾𑌦𑌪𑍍𑌰𑌣𑌤𑌾𑌨𑌨𑌨𑍍𑌯𑌮𑌨𑌸𑌃 𑌪𑌰𑍍𑌯𑌾𑌕𑍁𑌲𑌾𑌨𑍍𑌪𑌾𑌹𑌿 𑌨𑌃 ॥ 2 ॥

𑌦𑍇𑌵𑌿 𑌤𑍍𑌵𑌾𑌂 𑌸𑌕𑍃𑌦𑍇𑌵 𑌯𑌃 𑌪𑍍𑌰𑌣𑌮𑌤𑌿 𑌕𑍍𑌷𑍋𑌣𑍀𑌭𑍃𑌤𑌸𑍍𑌤𑌂 𑌨𑌮-
-𑌂𑌤𑍍𑌯𑌾𑌜𑌨𑍍𑌮𑌸𑍍𑌫𑍁𑌰𑌦𑌂𑌘𑍍𑌰𑌿𑌪𑍀𑌠𑌵𑌿𑌲𑍁𑌠𑌤𑍍𑌕𑍋𑌟𑍀𑌰𑌕𑍋𑌟𑌿𑌚𑍍𑌛𑌟𑌾𑌃 ।
𑌯𑌸𑍍𑌤𑍍𑌵𑌾𑌮𑌰𑍍𑌚𑌤𑌿 𑌸𑍋𑌽𑌰𑍍𑌚𑍍𑌯𑌤𑍇 𑌸𑍁𑌰𑌗𑌣𑍈𑌰𑍍𑌯𑌃 𑌸𑍍𑌤𑍌𑌤𑌿 𑌸 𑌸𑍍𑌤𑍂𑌯𑌤𑍇
𑌯𑌸𑍍𑌤𑍍𑌵𑌾𑌂 𑌧𑍍𑌯𑌾𑌯𑌤𑌿 𑌤𑌂 𑌸𑍍𑌮𑌰𑌾𑌰𑍍𑌤𑌿𑌵𑌿𑌧𑍁𑌰𑌾 𑌧𑍍𑌯𑌾𑌯𑌂𑌤𑌿 𑌵𑌾𑌮𑌭𑍍𑌰𑍁𑌵𑌃 ॥ 3 ॥

𑌉𑌨𑍍𑌮𑌤𑍍𑌤𑌾 𑌇𑌵 𑌸𑌗𑍍𑌰𑌹𑌾 𑌇𑌵 𑌵𑌿𑌷𑌵𑍍𑌯𑌾𑌸𑌕𑍍𑌤𑌮𑍂𑌰𑍍𑌛𑌾 𑌇𑌵
𑌪𑍍𑌰𑌾𑌪𑍍𑌤𑌪𑍍𑌰𑍌𑌢𑌮𑌦𑌾 𑌇𑌵𑌾𑌰𑍍𑌤𑌿𑌵𑌿𑌰𑌹𑌗𑍍𑌰𑌸𑍍𑌤𑌾 𑌇𑌵𑌾𑌰𑍍𑌤𑌾 𑌇𑌵 ।
𑌯𑍇 𑌧𑍍𑌯𑌾𑌯𑌂𑌤𑌿 𑌹𑌿 𑌶𑍈𑌲𑌰𑌾𑌜𑌤𑌨𑌯𑌾𑌂 𑌧𑌨𑍍𑌯𑌾𑌸𑍍𑌤 𑌏𑌵𑌾𑌗𑍍𑌰𑌤𑌃
𑌤𑍍𑌯𑌕𑍍𑌤𑍋𑌪𑌾𑌧𑌿𑌵𑌿𑌵𑍃𑌦𑍍𑌧𑌰𑌾𑌗𑌮𑌨𑌸𑍋 𑌧𑍍𑌯𑌾𑌯𑌂𑌤𑌿 𑌤𑌾𑌨𑍍𑌸𑍁𑌭𑍍𑌰𑍁𑌵𑌃 ॥ 4 ॥

𑌧𑍍𑌯𑌾𑌯𑌂𑌤𑌿 𑌯𑍇 𑌕𑍍𑌷𑌣𑌮𑌪𑌿 𑌤𑍍𑌰𑌿𑌪𑍁𑌰𑍇 𑌹𑍃𑌦𑌿 𑌤𑍍𑌵𑌾𑌂
𑌲𑌾𑌵𑌣𑍍𑌯𑌯𑍌𑌵𑌨𑌧𑌨𑍈𑌰𑌪𑌿 𑌵𑌿𑌪𑍍𑌰𑌯𑍁𑌕𑍍𑌤𑌾𑌃 ।
𑌤𑍇 𑌵𑌿𑌸𑍍𑌫𑍁𑌰𑌂𑌤𑌿 𑌲𑌲𑌿𑌤𑌾𑌯𑌤𑌲𑍋𑌚𑌨𑌾𑌨𑌾𑌂
𑌚𑌿𑌤𑍍𑌤𑍈𑌕𑌭𑌿𑌤𑍍𑌤𑌿𑌲𑌿𑌖𑌿𑌤𑌪𑍍𑌰𑌤𑌿𑌮𑌾𑌃 𑌪𑍁𑌮𑌾𑌂𑌸𑌃 ॥ 5 ॥

𑌏𑌤𑌂 𑌕𑌿𑌂 𑌨𑍁 𑌦𑍃𑌶𑌾 𑌪𑌿𑌬𑌾𑌮𑍍𑌯𑍁𑌤 𑌵𑌿𑌶𑌾𑌮𑍍𑌯𑌸𑍍𑌯𑌾𑌂𑌗𑌮𑌂𑌗𑍈𑌰𑍍𑌨𑌿𑌜𑍈𑌃
𑌕𑌿𑌂 𑌵𑌾𑌽𑌮𑍁𑌂 𑌨𑌿𑌗𑌰𑌾𑌮𑍍𑌯𑌨𑍇𑌨 𑌸𑌹𑌸𑌾 𑌕𑌿𑌂 𑌵𑍈𑌕𑌤𑌾𑌮𑌾𑌶𑍍𑌰𑌯𑍇 ।
𑌯𑌸𑍍𑌯𑍇𑌤𑍍𑌥𑌂 𑌵𑌿𑌵𑌶𑍋 𑌵𑌿𑌕𑌲𑍍𑌪𑌲𑌲𑌿𑌤𑌾𑌕𑍂𑌤𑍇𑌨 𑌯𑍋𑌷𑌿𑌜𑍍𑌜𑌨𑌃
𑌕𑌿𑌂 𑌤𑌦𑍍𑌯𑌨𑍍𑌨 𑌕𑌰𑍋𑌤𑌿 𑌦𑍇𑌵𑌿 𑌹𑍃𑌦𑌯𑍇 𑌯𑌸𑍍𑌯 𑌤𑍍𑌵𑌮𑌾𑌵𑌰𑍍𑌤𑌸𑍇 ॥ 6 ॥

𑌵𑌿𑌶𑍍𑌵𑌵𑍍𑌯𑌾𑌪𑌿𑌨𑌿 𑌯𑌦𑍍𑌵𑌦𑍀𑌶𑍍𑌵𑌰 𑌇𑌤𑌿 𑌸𑍍𑌥𑌾𑌣𑌾𑌵𑌨𑌨𑍍𑌯𑌾𑌶𑍍𑌰𑌯𑌃
𑌶𑌬𑍍𑌦𑌃 𑌶𑌕𑍍𑌤𑌿𑌰𑌿𑌤𑌿 𑌤𑍍𑌰𑌿𑌲𑍋𑌕𑌜𑌨𑌨𑌿 𑌤𑍍𑌵𑌯𑍍𑌯𑍇𑌵 𑌤𑌥𑍍𑌯𑌸𑍍𑌥𑌿𑌤𑌿𑌃 ।
𑌇𑌤𑍍𑌥𑌂 𑌸𑌤𑍍𑌯𑌪𑌿 𑌶𑌕𑍍𑌨𑍁𑌵𑌂𑌤𑌿 𑌯𑌦𑌿𑌮𑌾𑌃 𑌕𑍍𑌷𑍁𑌦𑍍𑌰𑌾 𑌰𑍁𑌜𑍋 𑌬𑌾𑌧𑌿𑌤𑍁𑌂
𑌤𑍍𑌵𑌦𑍍𑌭𑌕𑍍𑌤𑌾𑌨𑌪𑌿 𑌨 𑌕𑍍𑌷𑌿𑌣𑍋𑌷𑌿 𑌚 𑌰𑍁𑌷𑌾 𑌤𑌦𑍍𑌦𑍇𑌵𑌿 𑌚𑌿𑌤𑍍𑌰𑌂 𑌮𑌹𑌤𑍍 ॥ 𑍭 ॥

𑌇𑌂𑌦𑍋𑌰𑍍𑌮𑌧𑍍𑌯𑌗𑌤𑌾𑌂 𑌮𑍃𑌗𑌾𑌂𑌕𑌸𑌦𑍃𑌶𑌚𑍍𑌛𑌾𑌯𑌾𑌂 𑌮𑌨𑍋𑌹𑌾𑌰𑌿𑌣𑍀𑌂
𑌪𑌾𑌂𑌡𑍂𑌤𑍍𑌫𑍁𑌲𑍍𑌲𑌸𑌰𑍋𑌰𑍁𑌹𑌾𑌸𑌨𑌗𑌤𑌾 𑌸𑍍𑌨𑌿𑌗𑍍𑌧𑌪𑍍𑌰𑌦𑍀𑌪𑌚𑍍𑌛𑌵𑌿𑌮𑍍 ।
𑌵𑌰𑍍𑌷𑌂𑌤𑍀𑌮𑌮𑍃𑌤𑌂 𑌭𑌵𑌾𑌨𑌿 𑌭𑌵𑌤𑍀𑌂 𑌧𑍍𑌯𑌾𑌯𑌂𑌤𑌿 𑌯𑍇 𑌦𑍇𑌹𑌿𑌨𑌃
𑌤𑍇 𑌨𑌿𑌰𑍍𑌮𑍁𑌕𑍍𑌤𑌰𑍁𑌜𑍋 𑌭𑌵𑌂𑌤𑌿 𑌰𑌿𑌪𑌵𑌃 𑌪𑍍𑌰𑍋𑌜𑍍𑌝𑌂𑌤𑌿 𑌤𑌾𑌂𑌦𑍂𑌰𑌤𑌃 ॥ 𑍮 ॥

𑌪𑍂𑌰𑍍𑌣𑍇𑌂𑌦𑍋𑌃 𑌶𑌕𑌲𑍈𑌰𑌿𑌵𑌾𑌤𑌿𑌬𑌹𑌲𑍈𑌃 𑌪𑍀𑌯𑍂𑌷𑌪𑍂𑌰𑍈𑌰𑌿𑌵
𑌕𑍍𑌷𑍀𑌰𑌾𑌬𑍍𑌧𑍇𑌰𑍍𑌲𑌹𑌰𑍀𑌭𑌰𑍈𑌰𑌿𑌵 𑌸𑍁𑌧𑌾𑌪𑌂𑌕𑌸𑍍𑌯 𑌪𑌿𑌂𑌡𑍈𑌰𑌿𑌵 ।
𑌪𑍍𑌰𑌾𑌲𑍇𑌯𑍈𑌰𑌿𑌵 𑌨𑌿𑌰𑍍𑌮𑌿𑌤𑌂 𑌤𑌵 𑌵𑌪𑍁𑌰𑍍𑌧𑍍𑌯𑌾𑌯𑌂𑌤𑌿 𑌯𑍇 𑌶𑍍𑌰𑌦𑍍𑌧𑌯𑌾
𑌚𑌿𑌤𑍍𑌤𑌾𑌂𑌤𑌰𑍍𑌨𑌿𑌹𑌿𑌤𑌾𑌰𑍍𑌤𑌿𑌤𑌾𑌪𑌵𑌿𑌪𑌦𑌸𑍍𑌤𑍇 𑌸𑌂𑌪𑌦𑌂 𑌬𑌿𑌭𑍍𑌰𑌤𑌿 ॥ 𑍯 ॥

𑌯𑍇 𑌸𑌂𑌸𑍍𑌮𑌰𑌂𑌤𑌿 𑌤𑌰𑌲𑌾𑌂 𑌸𑌹𑌸𑍋𑌲𑍍𑌲𑌸𑌂𑌤𑍀𑌂
𑌤𑍍𑌵𑌾𑌂 𑌗𑍍𑌰𑌂𑌥𑌿𑌪𑌂𑌚𑌕𑌭𑌿𑌦𑌂 𑌤𑌰𑍁𑌣𑌾𑌰𑍍𑌕𑌶𑍋𑌣𑌾𑌮𑍍 ।
𑌰𑌾𑌗𑌾𑌰𑍍𑌣𑌵𑍇 𑌬𑌹𑌲𑌰𑌾𑌗𑌿𑌣𑌿 𑌮𑌜𑍍𑌜𑌯𑌂𑌤𑍀𑌂
𑌕𑍃𑌤𑍍𑌸𑍍𑌨𑌂 𑌜𑌗𑌦𑍍𑌦𑌧𑌤𑌿 𑌚𑍇𑌤𑌸𑌿 𑌤𑌾𑌨𑍍𑌮𑍃𑌗𑌾𑌕𑍍𑌷𑍍𑌯𑌃 ॥ 10 ॥

𑌲𑌾𑌕𑍍𑌷𑌾𑌰𑌸𑌸𑍍𑌨𑌪𑌿𑌤𑌪𑌂𑌕𑌜𑌤𑌂𑌤𑍁𑌤𑌨𑍍𑌵𑍀𑌂
𑌅𑌂𑌤𑌃 𑌸𑍍𑌮𑌰𑌤𑍍𑌯𑌨𑍁𑌦𑌿𑌨𑌂 𑌭𑌵𑌤𑍀𑌂 𑌭𑌵𑌾𑌨𑌿 ।
𑌯𑌸𑍍𑌤𑌂 𑌸𑍍𑌮𑌰𑌪𑍍𑌰𑌤𑌿𑌮𑌮𑌪𑍍𑌰𑌤𑌿𑌮𑌸𑍍𑌵𑌰𑍂𑌪𑌾𑌃
𑌨𑍇𑌤𑍍𑌰𑍋𑌤𑍍𑌪𑌲𑍈𑌰𑍍𑌮𑍃𑌗𑌦𑍃𑌶𑍋 𑌭𑍃𑌶𑌮𑌰𑍍𑌚𑌯𑌂𑌤𑌿 ॥ 11 ॥

𑌸𑍍𑌤𑍁𑌮𑌸𑍍𑌤𑍍𑌵𑌾𑌂 𑌵𑌾𑌚𑌮𑌵𑍍𑌯𑌕𑍍𑌤𑌾𑌂 𑌹𑌿𑌮𑌕𑍁𑌂𑌦𑍇𑌂𑌦𑍁𑌰𑍋𑌚𑌿𑌷𑌮𑍍 ।
𑌕𑌦𑌂𑌬𑌮𑌾𑌲𑌾𑌂 𑌬𑌿𑌭𑍍𑌰𑌾𑌣𑌾𑌮𑌾𑌪𑌾𑌦𑌤𑌲𑌲𑌂𑌬𑌿𑌨𑍀𑌮𑍍 ॥ 12 ॥

𑌮𑍂𑌰𑍍𑌧𑍍𑌨𑍀𑌂𑌦𑍋𑌃 𑌸𑌿𑌤𑌪𑌂𑌕𑌜𑌾𑌸𑌨𑌗𑌤𑌾𑌂 𑌪𑍍𑌰𑌾𑌲𑍇𑌯𑌪𑌾𑌂𑌡𑍁𑌤𑍍𑌵𑌿𑌷𑌂
𑌵𑌰𑍍𑌷𑌂𑌤𑍀𑌮𑌮𑍃𑌤𑌂 𑌸𑌰𑍋𑌰𑍁𑌹𑌭𑍁𑌵𑍋 𑌵𑌕𑍍𑌤𑍍𑌰𑍇𑌽𑌪𑌿 𑌰𑌂𑌧𑍍𑌰𑍇𑌽𑌪𑌿 𑌚 ।
𑌅𑌚𑍍𑌛𑌿𑌨𑍍𑌨𑌾 𑌚 𑌮𑌨𑍋𑌹𑌰𑌾 𑌚 𑌲𑌲𑌿𑌤𑌾 𑌚𑌾𑌤𑌿𑌪𑍍𑌰𑌸𑌨𑍍𑌨𑌾𑌪𑌿 𑌚
𑌤𑍍𑌵𑌾𑌮𑍇𑌵𑌂 𑌸𑍍𑌮𑌰𑌤𑌃 𑌸𑍍𑌮𑌰𑌾𑌰𑌿𑌦𑌯𑌿𑌤𑍇 𑌵𑌾𑌕𑍍𑌸𑌰𑍍𑌵𑌤𑍋 𑌵𑌲𑍍𑌗𑌤𑌿 ॥ 13 ॥

𑌦𑌦𑌾𑌤𑍀𑌷𑍍𑌟𑌾𑌨𑍍𑌭𑍋𑌗𑌾𑌨𑍍 𑌕𑍍𑌷𑌪𑌯𑌤𑌿 𑌰𑌿𑌪𑍂𑌨𑍍𑌹𑌂𑌤𑌿 𑌵𑌿𑌪𑌦𑍋
𑌦𑌹𑌤𑍍𑌯𑌾𑌧𑍀𑌨𑍍𑌵𑍍𑌯𑌾𑌧𑍀𑌨𑍍 𑌶𑌮𑌯𑌤𑌿 𑌸𑍁𑌖𑌾𑌨𑌿 𑌪𑍍𑌰𑌤𑌨𑍁𑌤𑍇 ।
𑌹𑌠𑌾𑌦𑌂𑌤𑌰𑍍𑌦𑍁𑌃𑌖𑌂 𑌦𑌲𑌯𑌤𑌿 𑌪𑌿𑌨𑌷𑍍𑌟𑍀𑌷𑍍𑌟𑌵𑌿𑌰𑌹𑌂
𑌸𑌕𑍃𑌦𑍍𑌧𑍍𑌯𑌾𑌤𑌾 𑌦𑍇𑌵𑍀 𑌕𑌿𑌮𑌿𑌵 𑌨𑌿𑌰𑌵𑌦𑍍𑌯𑌂 𑌨 𑌕𑍁𑌰𑍁𑌤𑍇 ॥ 14 ॥

𑌯𑌸𑍍𑌤𑍍𑌵𑌾𑌂 𑌧𑍍𑌯𑌾𑌯𑌤𑌿 𑌵𑍇𑌤𑍍𑌤𑌿 𑌵𑌿𑌂𑌦𑌤𑌿 𑌜𑌪𑌤𑍍𑌯𑌾𑌲𑍋𑌕𑌤𑍇 𑌚𑌿𑌂𑌤𑌯-
-𑌤𑍍𑌯𑌨𑍍𑌵𑍇𑌤𑌿 𑌪𑍍𑌰𑌤𑌿𑌪𑌦𑍍𑌯𑌤𑍇 𑌕𑌲𑌯𑌤𑌿 𑌸𑍍𑌤𑍌𑌤𑍍𑌯𑌾𑌶𑍍𑌰𑌯𑌤𑍍𑌯𑌰𑍍𑌚𑌤𑌿 ।
𑌯𑌶𑍍𑌚 𑌤𑍍𑌰𑍍𑌯𑌂𑌬𑌕𑌵𑌲𑍍𑌲𑌭𑍇 𑌤𑌵 𑌗𑍁𑌣𑌾𑌨𑌾𑌕𑌰𑍍𑌣𑌯𑌤𑍍𑌯𑌾𑌦𑌰𑌾𑌤𑍍
𑌤𑌸𑍍𑌯 𑌶𑍍𑌰𑍀𑌰𑍍𑌨 𑌗𑍃𑌹𑌾𑌦𑌪𑍈𑌤𑌿 𑌵𑌿𑌜𑌯𑌸𑍍𑌤𑌸𑍍𑌯𑌾𑌗𑍍𑌰𑌤𑍋 𑌧𑌾𑌵𑌤𑌿 ॥ 15 ॥

𑌕𑌿𑌂 𑌕𑌿𑌂 𑌦𑍁𑌃𑌖𑌂 𑌦𑌨𑍁𑌜𑌦𑌲𑌿𑌨𑌿 𑌕𑍍𑌷𑍀𑌯𑌤𑍇 𑌨 𑌸𑍍𑌮𑍃𑌤𑌾𑌯𑌾𑌂
𑌕𑌾 𑌕𑌾 𑌕𑍀𑌰𑍍𑌤𑌿𑌃 𑌕𑍁𑌲𑌕𑌮𑌲𑌿𑌨𑌿 𑌖𑍍𑌯𑌾𑌪𑍍𑌯𑌤𑍇 𑌨 𑌸𑍍𑌤𑍁𑌤𑌾𑌯𑌾𑌮𑍍 ।
𑌕𑌾 𑌕𑌾 𑌸𑌿𑌦𑍍𑌧𑌿𑌃 𑌸𑍁𑌰𑌵𑌰𑌨𑍁𑌤𑍇 𑌪𑍍𑌰𑌾𑌪𑍍𑌯𑌤𑍇 𑌨𑌾𑌰𑍍𑌚𑌿𑌤𑌾𑌯𑌾𑌂
𑌕𑌂 𑌕𑌂 𑌯𑍋𑌗𑌂 𑌤𑍍𑌵𑌯𑌿 𑌨 𑌚𑌿𑌨𑍁𑌤𑍇 𑌚𑌿𑌤𑍍𑌤𑌮𑌾𑌲𑌂𑌬𑌿𑌤𑌾𑌯𑌾𑌮𑍍 ॥ 16 ॥

𑌯𑍇 𑌦𑍇𑌵𑌿 𑌦𑍁𑌰𑍍𑌧𑌰𑌕𑍃𑌤𑌾𑌂𑌤𑌮𑍁𑌖𑌾𑌂𑌤𑌰𑌸𑍍𑌥𑌾𑌃
𑌯𑍇 𑌕𑌾𑌲𑌿 𑌕𑌾𑌲𑌘𑌨𑌪𑌾𑌶𑌨𑌿𑌤𑌾𑌂𑌤𑌬𑌦𑍍𑌧𑌾𑌃 ।
𑌯𑍇 𑌚𑌂𑌡𑌿 𑌚𑌂𑌡𑌗𑍁𑌰𑍁𑌕𑌲𑍍𑌮𑌷𑌸𑌿𑌂𑌧𑍁𑌮𑌗𑍍𑌨𑌾𑌃
𑌤𑌾𑌨𑍍𑌪𑌾𑌸𑌿 𑌮𑍋𑌚𑌯𑌸𑌿 𑌤𑌾𑌰𑌯𑌸𑌿 𑌸𑍍𑌮𑍃𑌤𑍈𑌵 ॥ 1𑍭 ॥

𑌲𑌕𑍍𑌷𑍍𑌮𑍀𑌵𑌶𑍀𑌕𑌰𑌣𑌚𑍂𑌰𑍍𑌣𑌸𑌹𑍋𑌦𑌰𑌾𑌣𑌿
𑌤𑍍𑌵𑌤𑍍𑌪𑌾𑌦𑌪𑌂𑌕𑌜𑌰𑌜𑌾𑌂𑌸𑌿 𑌚𑌿𑌰𑌂 𑌜𑌯𑌂𑌤𑌿 ।
𑌯𑌾𑌨𑌿 𑌪𑍍𑌰𑌣𑌾𑌮𑌮𑌿𑌲𑌿𑌤𑌾𑌨𑌿 𑌨𑍃𑌣𑌾𑌂 𑌲𑌲𑌾𑌟𑍇
𑌲𑍁𑌂𑌪𑌂𑌤𑌿 𑌦𑍈𑌵𑌲𑌿𑌖𑌿𑌤𑌾𑌨𑌿 𑌦𑍁𑌰𑌕𑍍𑌷𑌰𑌾𑌣𑌿 ॥ 1𑍮 ॥

𑌰𑍇 𑌮𑍂𑌢𑌾𑌃 𑌕𑌿𑌮𑌯𑌂 𑌵𑍃𑌥𑍈𑌵 𑌤𑌪𑌸𑌾 𑌕𑌾𑌯𑌃 𑌪𑌰𑌿𑌕𑍍𑌲𑌿𑌶𑍍𑌯𑌤𑍇
𑌯𑌜𑍍𑌞𑍈𑌰𑍍𑌵𑌾 𑌬𑌹𑍁𑌦𑌕𑍍𑌷𑌿𑌣𑍈𑌃 𑌕𑌿𑌮𑌿𑌤𑌰𑍇 𑌰𑌿𑌕𑍍𑌤𑍀𑌕𑍍𑌰𑌿𑌯𑌂𑌤𑍇 𑌗𑍃𑌹𑌾𑌃 ।
𑌭𑌕𑍍𑌤𑌿𑌶𑍍𑌚𑍇𑌦𑌵𑌿𑌨𑌾𑌶𑌿𑌨𑍀 𑌭𑌗𑌵𑌤𑍀𑌪𑌾𑌦𑌦𑍍𑌵𑌯𑍀 𑌸𑍇𑌵𑍍𑌯𑌤𑌾𑌂
𑌉𑌨𑍍𑌨𑌿𑌦𑍍𑌰𑌾𑌂𑌬𑍁𑌰𑍁𑌹𑌾𑌤𑌪𑌤𑍍𑌰𑌸𑍁𑌭𑌗𑌾 𑌲𑌕𑍍𑌷𑍍𑌮𑍀𑌃 𑌪𑍁𑌰𑍋 𑌧𑌾𑌵𑌤𑌿 ॥ 1𑍯 ॥

𑌯𑌾𑌚𑍇 𑌨 𑌕𑌂𑌚𑌨 𑌨 𑌕𑌂𑌚𑌨 𑌵𑌂𑌚𑌯𑌾𑌮𑌿
𑌸𑍇𑌵𑍇 𑌨 𑌕𑌂𑌚𑌨 𑌨𑌿𑌰𑌸𑍍𑌤𑌸𑌮𑌸𑍍𑌤𑌦𑍈𑌨𑍍𑌯𑌃 ।
𑌶𑍍𑌲𑌕𑍍𑌷𑍍𑌣𑌂 𑌵𑌸𑍇 𑌮𑌧𑍁𑌰𑌮𑌦𑍍𑌮𑌿 𑌭𑌜𑍇 𑌵𑌰𑌸𑍍𑌤𑍍𑌰𑍀𑌃
𑌦𑍇𑌵𑍀 𑌹𑍃𑌦𑌿 𑌸𑍍𑌫𑍁𑌰𑌤𑌿 𑌮𑍇 𑌕𑍁𑌲𑌕𑌾𑌮𑌧𑍇𑌨𑍁𑌃 ॥ 20 ॥

𑌨𑌮𑌾𑌮𑌿 𑌯𑌾𑌮𑌿𑌨𑍀𑌨𑌾𑌥𑌲𑍇𑌖𑌾𑌲𑌂𑌕𑍃𑌤𑌕𑍁𑌂𑌤𑌲𑌾𑌮𑍍 ।
𑌭𑌵𑌾𑌨𑍀𑌂 𑌭𑌵𑌸𑌂𑌤𑌾𑌪𑌨𑌿𑌰𑍍𑌵𑌾𑌪𑌣𑌸𑍁𑌧𑌾𑌨𑌦𑍀𑌮𑍍 ॥ 21 ॥

𑌇𑌤𑌿 𑌶𑍍𑌰𑍀𑌕𑌾𑌳𑌿𑌦𑌾𑌸 𑌵𑌿𑌰𑌚𑌿𑌤 𑌪𑌂𑌚𑌸𑍍𑌤𑌵𑍍𑌯𑌾𑌂 𑌤𑍃𑌤𑍀𑌯𑌃 𑌘𑌟𑌸𑍍𑌤𑌵𑌃 ।