𑌗𑌣𑍇𑌶 𑌮𑌾𑌨𑌸 𑌪𑍂𑌜

𑌗𑍃𑌤𑍍𑌸𑌮𑌦 𑌉𑌵𑌾𑌚 ।
𑌵𑌿𑌘𑍍𑌨𑍇𑌶𑌵𑍀𑌰𑍍𑌯𑌾𑌣𑌿 𑌵𑌿𑌚𑌿𑌤𑍍𑌰𑌕𑌾𑌣𑌿
𑌬𑌂𑌦𑍀𑌜𑌨𑍈𑌰𑍍𑌮𑌾𑌗𑌧𑌕𑍈𑌃 𑌸𑍍𑌮𑍃𑌤𑌾𑌨𑌿 ।
𑌶𑍍𑌰𑍁𑌤𑍍𑌵𑌾 𑌸𑌮𑍁𑌤𑍍𑌤𑌿𑌷𑍍𑌠 𑌗𑌜𑌾𑌨𑌨 𑌤𑍍𑌵𑌂
𑌬𑍍𑌰𑌾𑌹𑍍𑌮𑍇 𑌜𑌗𑌨𑍍𑌮𑌂𑌗𑌳𑌕𑌂 𑌕𑍁𑌰𑍁𑌷𑍍𑌵 ॥ 1 ॥

𑌏𑌵𑌂 𑌮𑌯𑌾 𑌪𑍍𑌰𑌾𑌰𑍍𑌥𑌿𑌤 𑌵𑌿𑌘𑍍𑌨𑌰𑌾𑌜-
-𑌶𑍍𑌚𑌿𑌤𑍍𑌤𑍇𑌨 𑌚𑍋𑌤𑍍𑌥𑌾𑌯 𑌬𑌹𑌿𑌰𑍍𑌗𑌣𑍇𑌶𑌃 ।
𑌤𑌂 𑌨𑌿𑌰𑍍𑌗𑌤𑌂 𑌵𑍀𑌕𑍍𑌷𑍍𑌯 𑌨𑌮𑌂𑌤𑌿 𑌦𑍇𑌵𑌾𑌃
𑌶𑌂𑌭𑍍𑌵𑌾𑌦𑌯𑍋 𑌯𑍋𑌗𑌿𑌮𑍁𑌖𑌾𑌸𑍍𑌤𑌥𑌾𑌹𑌮𑍍 ॥ 2 ॥

𑌶𑍌𑌚𑌾𑌦𑌿𑌕𑌂 𑌤𑍇 𑌪𑌰𑌿𑌕𑌲𑍍𑌪𑌯𑌾𑌮𑌿
𑌹𑍇𑌰𑌂𑌬 𑌵𑍈 𑌦𑌂𑌤𑌵𑌿𑌶𑍁𑌦𑍍𑌧𑌿𑌮𑍇𑌵𑌮𑍍 ।
𑌵𑌸𑍍𑌤𑍍𑌰𑍇𑌣 𑌸𑌂𑌪𑍍𑌰𑍋𑌕𑍍𑌷𑍍𑌯 𑌮𑍁𑌖𑌾𑌰𑌵𑌿𑌂𑌦𑌂
𑌦𑍇𑌵𑌂 𑌸𑌭𑌾𑌯𑌾𑌂 𑌵𑌿𑌨𑌿𑌵𑍇𑌶𑌯𑌾𑌮𑌿 ॥ 3 ॥

𑌦𑍍𑌵𑌿𑌜𑌾𑌦𑌿𑌸𑌰𑍍𑌵𑍈𑌰𑌭𑌿𑌵𑌂𑌦𑌿𑌤𑌂 𑌚
𑌶𑍁𑌕𑌾𑌦𑌿𑌭𑌿𑌰𑍍𑌮𑍋𑌦𑌸𑍁𑌮𑍋𑌦𑌕𑌾𑌦𑍍𑌯𑍈𑌃 ।
𑌸𑌂𑌭𑌾𑌷𑍍𑌯 𑌚𑌾𑌲𑍋𑌕𑍍𑌯 𑌸𑌮𑍁𑌤𑍍𑌥𑌿𑌤𑌂 𑌤𑌂
𑌸𑍁𑌮𑌂𑌡𑌪𑌂 𑌕𑌲𑍍𑌪𑍍𑌯 𑌨𑌿𑌵𑍇𑌶𑌯𑌾𑌮𑌿 ॥ 4 ॥

𑌰𑌤𑍍𑌨𑍈𑌃 𑌸𑍁𑌦𑍀𑌪𑍍𑌤𑍈𑌃 𑌪𑍍𑌰𑌤𑌿𑌬𑌿𑌂𑌬𑌿𑌤𑌂 𑌤𑌂
𑌪𑌶𑍍𑌯𑌾𑌮𑌿 𑌚𑌿𑌤𑍍𑌤𑍇𑌨 𑌵𑌿𑌨𑌾𑌯𑌕𑌂 𑌚 ।
𑌤𑌤𑍍𑌰𑌾𑌸𑌨𑌂 𑌰𑌤𑍍𑌨𑌸𑍁𑌵𑌰𑍍𑌣𑌯𑍁𑌕𑍍𑌤𑌂
𑌸𑌂𑌕𑌲𑍍𑌪𑍍𑌯 𑌦𑍇𑌵𑌂 𑌵𑌿𑌨𑌿𑌵𑍇𑌶𑌯𑌾𑌮𑌿 ॥ 5 ॥

𑌸𑌿𑌦𑍍𑌧𑍍𑌯𑌾 𑌚 𑌬𑍁𑌦𑍍𑌧𑍍𑌯𑌾 𑌸𑌹 𑌵𑌿𑌘𑍍𑌨𑌰𑌾𑌜
𑌪𑌾𑌦𑍍𑌯𑌂 𑌕𑍁𑌰𑍁 𑌪𑍍𑌰𑍇𑌮𑌭𑌰𑍇𑌣 𑌸𑌰𑍍𑌵𑍈𑌃 ।
𑌸𑍁𑌵𑌾𑌸𑌿𑌤𑌂 𑌨𑍀𑌰𑌮𑌥𑍋 𑌗𑍃𑌹𑌾𑌣
𑌚𑌿𑌤𑍍𑌤𑍇𑌨 𑌦𑌤𑍍𑌤𑌂 𑌚 𑌸𑍁𑌖𑍋𑌷𑍍𑌣𑌭𑌾𑌵𑌮𑍍 ॥ 6 ॥

𑌤𑌤𑌃 𑌸𑍁𑌵𑌸𑍍𑌤𑍍𑌰𑍇𑌣 𑌗𑌣𑍇𑌶𑌮𑌾𑌦𑍌
𑌸𑌂𑌪𑍍𑌰𑍋𑌕𑍍𑌷𑍍𑌯 𑌦𑍂𑌰𑍍𑌵𑌾𑌦𑌿𑌭𑌿𑌰𑌰𑍍𑌚𑌯𑌾𑌮𑌿 ।
𑌚𑌿𑌤𑍍𑌤𑍇𑌨 𑌭𑌾𑌵𑌪𑍍𑌰𑌿𑌯 𑌦𑍀𑌨𑌬𑌂𑌧𑍋
𑌮𑌨𑍋 𑌵𑌿𑌲𑍀𑌨𑌂 𑌕𑍁𑌰𑍁 𑌤𑍇 𑌪𑌦𑌾𑌬𑍍𑌜𑍇 ॥ 𑍭 ॥

𑌕𑌰𑍍𑌪𑍂𑌰𑌕𑍈𑌲𑌾𑌦𑌿𑌸𑍁𑌵𑌾𑌸𑌿𑌤𑌂 𑌤𑍁
𑌸𑍁𑌕𑌲𑍍𑌪𑌿𑌤𑌂 𑌤𑍋𑌯𑌮𑌥𑍋 𑌗𑍃𑌹𑌾𑌣 ।
𑌆𑌚𑌮𑍍𑌯 𑌤𑍇𑌨𑍈𑌵 𑌗𑌜𑌾𑌨𑌨 𑌤𑍍𑌵𑌂
𑌕𑍃𑌪𑌾𑌕𑌟𑌾𑌕𑍍𑌷𑍇𑌣 𑌵𑌿𑌲𑍋𑌕𑌯𑌾𑌶𑍁 ॥ 𑍮 ॥

𑌪𑍍𑌰𑌵𑌾𑌲𑌮𑍁𑌕𑍍𑌤𑌾𑌫𑌲𑌹𑌾𑌟𑌕𑌾𑌦𑍍𑌯𑍈𑌃
𑌸𑍁𑌸𑌂𑌸𑍍𑌕𑍃𑌤𑌂 𑌹𑍍𑌯𑌂𑌤𑌰𑌭𑌾𑌵𑌕𑍇𑌨 ।
𑌅𑌨𑌰𑍍𑌘𑍍𑌯𑌮𑌰𑍍𑌘𑍍𑌯𑌂 𑌸𑌫𑌲𑌂 𑌕𑍁𑌰𑍁𑌷𑍍𑌵
𑌮𑌯𑌾 𑌪𑍍𑌰𑌦𑌤𑍍𑌤𑌂 𑌗𑌣𑌰𑌾𑌜 𑌢𑍁𑌂𑌢𑍇 ॥ 𑍯 ॥

𑌸𑍌𑌗𑌂𑌧𑍍𑌯𑌯𑍁𑌕𑍍𑌤𑌂 𑌮𑌧𑍁𑌪𑌰𑍍𑌕𑌮𑌾𑌦𑍍𑌯𑌂
𑌸𑌂𑌕𑌲𑍍𑌪𑌿𑌤𑌂 𑌭𑌾𑌵𑌯𑍁𑌤𑌂 𑌗𑍃𑌹𑌾𑌣 ।
𑌪𑍁𑌨𑌸𑍍𑌤𑌥𑌾𑌚𑌮𑍍𑌯 𑌵𑌿𑌨𑌾𑌯𑌕 𑌤𑍍𑌵𑌂
𑌭𑌕𑍍𑌤𑌾𑌂𑌶𑍍𑌚 𑌭𑌕𑍍𑌤𑍇𑌶 𑌸𑍁𑌰𑌕𑍍𑌷𑌯𑌾𑌶𑍁 ॥ 10 ॥

𑌸𑍁𑌵𑌾𑌸𑌿𑌤𑌂 𑌚𑌂𑌪𑌕𑌜𑌾𑌤𑌿𑌕𑌾𑌦𑍍𑌯𑍈-
-𑌸𑍍𑌤𑍈𑌲𑌂 𑌮𑌯𑌾 𑌕𑌲𑍍𑌪𑌿𑌤𑌮𑍇𑌵 𑌢𑍁𑌂𑌢𑍇 ।
𑌗𑍃𑌹𑌾𑌣 𑌤𑍇𑌨 𑌪𑍍𑌰𑌵𑌿𑌮𑌰𑍍𑌦𑌯𑌾𑌮𑌿
𑌸𑌰𑍍𑌵𑌾𑌂𑌗𑌮𑍇𑌵𑌂 𑌤𑌵 𑌸𑍇𑌵𑌨𑌾𑌯 ॥ 11 ॥

𑌤𑌤𑌃 𑌸𑍁𑌖𑍋𑌷𑍍𑌣𑍇𑌨 𑌜𑌲𑍇𑌨 𑌚𑌾𑌹-
-𑌮𑌨𑍇𑌕𑌤𑍀𑌰𑍍𑌥𑌾𑌹𑍃𑌤𑌕𑍇𑌨 𑌢𑍁𑌂𑌢𑍇 ।
𑌚𑌿𑌤𑍍𑌤𑍇𑌨 𑌶𑍁𑌦𑍍𑌧𑍇𑌨 𑌚 𑌸𑍍𑌨𑌾𑌪𑌯𑌾𑌮𑌿
𑌸𑍍𑌨𑌾𑌨𑌂 𑌮𑌯𑌾 𑌦𑌤𑍍𑌤𑌮𑌥𑍋 𑌗𑍃𑌹𑌾𑌣 ॥ 12 ॥

𑌤𑌤𑌃 𑌪𑌯𑌃𑌸𑍍𑌨𑌾𑌨𑌮𑌚𑌿𑌂𑌤𑍍𑌯𑌭𑌾𑌵
𑌗𑍃𑌹𑌾𑌣 𑌤𑍋𑌯𑌸𑍍𑌯 𑌤𑌥𑌾 𑌗𑌣𑍇𑌶 ।
𑌪𑍁𑌨𑌰𑍍𑌦𑌧𑌿𑌸𑍍𑌨𑌾𑌨𑌮𑌨𑌾𑌮𑌯 𑌤𑍍𑌵𑌂
𑌚𑌿𑌤𑍍𑌤𑍇𑌨 𑌦𑌤𑍍𑌤𑌂 𑌚 𑌜𑌲𑌸𑍍𑌯 𑌚𑍈𑌵 ॥ 13 ॥

𑌤𑌤𑍋 𑌘𑍃𑌤𑌸𑍍𑌨𑌾𑌨𑌮𑌪𑌾𑌰𑌵𑌂𑌦𑍍𑌯
𑌸𑍁𑌤𑍀𑌰𑍍𑌥𑌜𑌂 𑌵𑌿𑌘𑍍𑌨𑌹𑌰 𑌪𑍍𑌰𑌸𑍀𑌦 ।
𑌗𑍃𑌹𑌾𑌣 𑌚𑌿𑌤𑍍𑌤𑍇𑌨 𑌸𑍁𑌕𑌲𑍍𑌪𑌿𑌤𑌂 𑌤𑍁
𑌤𑌤𑍋 𑌮𑌧𑍁𑌸𑍍𑌨𑌾𑌨𑌮𑌥𑍋 𑌜𑌲𑌸𑍍𑌯 ॥ 14 ॥

𑌸𑍁𑌶𑌰𑍍𑌕𑌰𑌾𑌯𑍁𑌕𑍍𑌤𑌮𑌥𑍋 𑌗𑍃𑌹𑌾𑌣
𑌸𑍍𑌨𑌾𑌨𑌂 𑌮𑌯𑌾 𑌕𑌲𑍍𑌪𑌿𑌤𑌮𑍇𑌵 𑌢𑍁𑌂𑌢𑍇 ।
𑌤𑌤𑍋 𑌜𑌲𑌸𑍍𑌨𑌾𑌨𑌮𑌘𑌾𑌪𑌹𑌂𑌤𑍃
𑌵𑌿𑌘𑍍𑌨𑍇𑌶 𑌮𑌾𑌯𑌾𑌭𑍍𑌰𑌮𑌂 𑌵𑌾𑌰𑌯𑌾𑌶𑍁 ॥ 15 ॥

𑌸𑍁𑌯𑌕𑍍𑌷𑌪𑌂𑌕𑌸𑍍𑌥𑌮𑌥𑍋 𑌗𑍃𑌹𑌾𑌣
𑌸𑍍𑌨𑌾𑌨𑌂 𑌪𑌰𑍇𑌶𑌾𑌧𑌿𑌪𑌤𑍇 𑌤𑌤𑌶𑍍𑌚 ।
𑌕𑍌𑌮𑌂𑌡𑌲𑍀𑌸𑌂𑌭𑌵𑌜𑌂 𑌕𑍁𑌰𑍁𑌷𑍍𑌵
𑌵𑌿𑌶𑍁𑌦𑍍𑌧𑌮𑍇𑌵𑌂 𑌪𑌰𑌿𑌕𑌲𑍍𑌪𑌿𑌤𑌂 𑌤𑍁 ॥ 16 ॥

𑌤𑌤𑌸𑍍𑌤𑍁 𑌸𑍂𑌕𑍍𑌤𑍈𑌰𑍍𑌮𑌨𑌸𑌾 𑌗𑌣𑍇𑌶𑌂
𑌸𑌂𑌪𑍂𑌜𑍍𑌯 𑌦𑍂𑌰𑍍𑌵𑌾𑌦𑌿𑌭𑌿𑌰𑌲𑍍𑌪𑌭𑌾𑌵𑍈𑌃 ।
𑌅𑌪𑌾𑌰𑌕𑍈𑌰𑍍𑌮𑌂𑌡𑌲𑌭𑍂𑌤𑌬𑍍𑌰𑌹𑍍𑌮-
-𑌣𑌸𑍍𑌪𑌤𑍍𑌯𑌕𑍈𑌸𑍍𑌤𑌂 𑌹𑍍𑌯𑌭𑌿𑌷𑍇𑌚𑌯𑌾𑌮𑌿 ॥ 1𑍭 ॥

𑌤𑌤𑌃 𑌸𑍁𑌵𑌸𑍍𑌤𑍍𑌰𑍇𑌣 𑌤𑍁 𑌪𑍍𑌰𑍋𑌂𑌛𑌨𑌂 𑌤𑍍𑌵𑌂
𑌗𑍃𑌹𑌾𑌣 𑌚𑌿𑌤𑍍𑌤𑍇𑌨 𑌮𑌯𑌾 𑌸𑍁𑌕𑌲𑍍𑌪𑌿𑌤𑌮𑍍 ।
𑌤𑌤𑍋 𑌵𑌿𑌶𑍁𑌦𑍍𑌧𑍇𑌨 𑌜𑌲𑍇𑌨 𑌢𑍁𑌂𑌢𑍇
𑌹𑍍𑌯𑌾𑌚𑌾𑌂𑌤𑌮𑍇𑌵𑌂 𑌕𑍁𑌰𑍁 𑌵𑌿𑌘𑍍𑌨𑌰𑌾𑌜 ॥ 1𑍮 ॥

𑌅𑌗𑍍𑌨𑍌 𑌵𑌿𑌶𑍁𑌦𑍍𑌧𑍇 𑌤𑍁 𑌗𑍃𑌹𑌾𑌣 𑌵𑌸𑍍𑌤𑍍𑌰𑍇
𑌹𑍍𑌯𑌨𑌰𑍍𑌘𑍍𑌯𑌮𑍌𑌲𑍍𑌯𑍇 𑌮𑌨𑌸𑌾 𑌮𑌯𑌾 𑌤𑍇 ।
𑌦𑌤𑍍𑌤𑍇 𑌪𑌰𑌿𑌚𑍍𑌛𑌾𑌦𑍍𑌯 𑌨𑌿𑌜𑌾𑌤𑍍𑌮𑌦𑍇𑌹𑌂
𑌤𑌾𑌭𑍍𑌯𑌾𑌂 𑌮𑌯𑍂𑌰𑍇𑌶 𑌜𑌨𑌾𑌂𑌶𑍍𑌚 𑌪𑌾𑌲𑌯 ॥ 1𑍯 ॥

𑌆𑌚𑌮𑍍𑌯 𑌵𑌿𑌘𑍍𑌨𑍇𑌶 𑌪𑍁𑌨𑌸𑍍𑌤𑌥𑍈𑌵
𑌚𑌿𑌤𑍍𑌤𑍇𑌨 𑌦𑌤𑍍𑌤𑌂 𑌮𑍁𑌖𑌮𑍁𑌤𑍍𑌤𑌰𑍀𑌯𑌮𑍍 ।
𑌗𑍃𑌹𑌾𑌣 𑌭𑌕𑍍𑌤𑌪𑍍𑌰𑌤𑌿𑌪𑌾𑌲𑌕 𑌤𑍍𑌵𑌂
𑌨𑌮𑍋 𑌯𑌥𑌾 𑌤𑌾𑌰𑌕𑌸𑌂𑌯𑍁𑌤𑌂 𑌤𑍁 ॥ 20 ॥

𑌯𑌜𑍍𑌞𑍋𑌪𑌵𑍀𑌤𑌂 𑌤𑍍𑌰𑌿𑌗𑍁𑌣𑌸𑍍𑌵𑌰𑍂𑌪𑌂
𑌸𑍌𑌵𑌰𑍍𑌣𑌮𑍇𑌵𑌂 𑌹𑍍𑌯𑌹𑌿𑌨𑌾𑌥𑌭𑍂𑌤𑌮𑍍 ।
𑌭𑌾𑌵𑍇𑌨 𑌦𑌤𑍍𑌤𑌂 𑌗𑌣𑌨𑌾𑌥 𑌤𑌤𑍍𑌤𑍍𑌵𑌂
𑌗𑍃𑌹𑌾𑌣 𑌭𑌕𑍍𑌤𑍋𑌦𑍍𑌧𑍃𑌤𑌿𑌕𑌾𑌰𑌣𑌾𑌯 ॥ 21 ॥

𑌆𑌚𑌾𑌂𑌤𑌮𑍇𑌵𑌂 𑌮𑌨𑌸𑌾 𑌪𑍍𑌰𑌦𑌤𑍍𑌤𑌂
𑌕𑍁𑌰𑍁𑌷𑍍𑌵 𑌶𑍁𑌦𑍍𑌧𑍇𑌨 𑌜𑌲𑍇𑌨 𑌢𑍁𑌂𑌢𑍇 ।
𑌪𑍁𑌨𑌶𑍍𑌚 𑌕𑍌𑌮𑌂𑌡𑌲𑌕𑍇𑌨 𑌪𑌾𑌹𑌿 𑌵𑌿𑌶𑍍𑌵𑌂
𑌪𑍍𑌰𑌭𑍋 𑌖𑍇𑌲𑌕𑌰𑌂 𑌸𑌦𑌾 𑌤𑍇 ॥ 22 ॥

𑌉𑌦𑍍𑌯𑌦𑍍𑌦𑌿𑌨𑍇𑌶𑌾𑌭𑌮𑌥𑍋 𑌗𑍃𑌹𑌾𑌣
𑌸𑌿𑌂𑌦𑍂𑌰𑌕𑌂 𑌤𑍇 𑌮𑌨𑌸𑌾 𑌪𑍍𑌰𑌦𑌤𑍍𑌤𑌮𑍍 ।
𑌸𑌰𑍍𑌵𑌾𑌂𑌗𑌸𑌂𑌲𑍇𑌪𑌨𑌮𑌾𑌦𑌰𑌾𑌦𑍍𑌵𑍈
𑌕𑍁𑌰𑍁𑌷𑍍𑌵 𑌹𑍇𑌰𑌂𑌬 𑌚 𑌤𑍇𑌨 𑌪𑍂𑌰𑍍𑌣𑌮𑍍 ॥ 23 ॥

𑌸𑌹𑌸𑍍𑌰𑌶𑍀𑌰𑍍𑌷𑌂 𑌮𑌨𑌸𑌾 𑌮𑌯𑌾 𑌤𑍍𑌵𑌂
𑌦𑌤𑍍𑌤𑌂 𑌕𑌿𑌰𑍀𑌟𑌂 𑌤𑍁 𑌸𑍁𑌵𑌰𑍍𑌣𑌜𑌂 𑌵𑍈 ।
𑌅𑌨𑍇𑌕𑌰𑌤𑍍𑌨𑍈𑌃 𑌖𑌚𑌿𑌤𑌂 𑌗𑍃𑌹𑌾𑌣
𑌬𑍍𑌰𑌹𑍍𑌮𑍇𑌶 𑌤𑍇 𑌮𑌸𑍍𑌤𑌕𑌶𑍋𑌭𑌨𑌾𑌯 ॥ 24 ॥

𑌵𑌿𑌚𑌿𑌤𑍍𑌰𑌰𑌤𑍍𑌨𑍈𑌃 𑌕𑌨𑌕𑍇𑌨 𑌢𑍁𑌂𑌢𑍇
𑌯𑍁𑌤𑌾𑌨𑌿 𑌚𑌿𑌤𑍍𑌤𑍇𑌨 𑌮𑌯𑌾 𑌪𑌰𑍇𑌶 ।
𑌦𑌤𑍍𑌤𑌾𑌨𑌿 𑌨𑌾𑌨𑌾𑌪𑌦𑌕𑍁𑌂𑌡𑌲𑌾𑌨𑌿
𑌗𑍃𑌹𑌾𑌣 𑌶𑍂𑌰𑍍𑌪𑌶𑍍𑌰𑍁𑌤𑌿𑌭𑍂𑌷𑌣𑌾𑌯 ॥ 25 ॥

𑌶𑍁𑌂𑌡𑌾𑌵𑌿𑌭𑍂𑌷𑌾𑌰𑍍𑌥𑌮𑌨𑌂𑌤𑌖𑍇𑌲𑌿𑌨𑍍
𑌸𑍁𑌵𑌰𑍍𑌣𑌜𑌂 𑌕𑌂𑌚𑍁𑌕𑌮𑌾𑌗𑍃𑌹𑌾𑌣 ।
𑌰𑌤𑍍𑌨𑍈𑌶𑍍𑌚 𑌯𑍁𑌕𑍍𑌤𑌂 𑌮𑌨𑌸𑌾 𑌮𑌯𑌾 𑌯-
-𑌦𑍍𑌦𑌤𑍍𑌤𑌂 𑌪𑍍𑌰𑌭𑍋 𑌤𑌤𑍍𑌸𑌫𑌲𑌂 𑌕𑍁𑌰𑍁𑌷𑍍𑌵 ॥ 26 ॥

𑌸𑍁𑌵𑌰𑍍𑌣𑌰𑌤𑍍𑌨𑍈𑌶𑍍𑌚 𑌯𑍁𑌤𑌾𑌨𑌿 𑌢𑍁𑌂𑌢𑍇
𑌸𑌦𑍈𑌕𑌦𑌂𑌤𑌾𑌭𑌰𑌣𑌾𑌨𑌿 𑌕𑌲𑍍𑌪𑍍𑌯 ।
𑌗𑍃𑌹𑌾𑌣 𑌚𑍂𑌡𑌾𑌕𑍃𑌤𑌯𑍇 𑌪𑌰𑍇𑌶
𑌦𑌤𑍍𑌤𑌾𑌨𑌿 𑌦𑌂𑌤𑌸𑍍𑌯 𑌚 𑌶𑍋𑌭𑌨𑌾𑌰𑍍𑌥𑌮𑍍 ॥ 2𑍭 ॥

𑌰𑌤𑍍𑌨𑍈𑌃 𑌸𑍁𑌵𑌰𑍍𑌣𑍇𑌨 𑌕𑍃𑌤𑌾𑌨𑌿 𑌤𑌾𑌨𑌿
𑌗𑍃𑌹𑌾𑌣 𑌚𑌤𑍍𑌵𑌾𑌰𑌿 𑌮𑌯𑌾 𑌪𑍍𑌰𑌕𑌲𑍍𑌪𑍍𑌯 ।
𑌸𑌂𑌭𑍂𑌷𑌯 𑌤𑍍𑌵𑌂 𑌕𑌟𑌕𑌾𑌨𑌿 𑌨𑌾𑌥
𑌚𑌤𑍁𑌰𑍍𑌭𑍁𑌜𑍇𑌷𑍁 𑌹𑍍𑌯𑌜 𑌵𑌿𑌘𑍍𑌨𑌹𑌾𑌰𑌿𑌨𑍍 ॥ 2𑍮 ॥

𑌵𑌿𑌚𑌿𑌤𑍍𑌰𑌰𑌤𑍍𑌨𑍈𑌃 𑌖𑌚𑌿𑌤𑌂 𑌸𑍁𑌵𑌰𑍍𑌣-
-𑌸𑌂𑌭𑍂𑌤𑌕𑌂 𑌗𑍃𑌹𑍍𑌯 𑌮𑌯𑌾 𑌪𑍍𑌰𑌦𑌤𑍍𑌤𑌮𑍍 ।
𑌤𑌥𑌾𑌂𑌗𑍁𑌲𑍀𑌷𑍍𑌵𑌂𑌗𑍁𑌲𑌿𑌕𑌂 𑌗𑌣𑍇𑌶
𑌚𑌿𑌤𑍍𑌤𑍇𑌨 𑌸𑌂𑌶𑍋𑌭𑌯 𑌤𑌤𑍍𑌪𑌰𑍇𑌶 ॥ 2𑍯 ॥

𑌵𑌿𑌚𑌿𑌤𑍍𑌰𑌰𑌤𑍍𑌨𑍈𑌃 𑌖𑌚𑌿𑌤𑌾𑌨𑌿 𑌢𑍁𑌂𑌢𑍇
𑌕𑍇𑌯𑍂𑌰𑌕𑌾𑌣𑌿 𑌹𑍍𑌯𑌥 𑌕𑌲𑍍𑌪𑌿𑌤𑌾𑌨𑌿 ।
𑌸𑍁𑌵𑌰𑍍𑌣𑌜𑌾𑌨𑌿 𑌪𑍍𑌰𑌮𑌥𑌾𑌧𑌿𑌨𑌾𑌥
𑌗𑍃𑌹𑌾𑌣 𑌦𑌤𑍍𑌤𑌾𑌨𑌿 𑌤𑍁 𑌬𑌾𑌹𑍁𑌷𑍁 𑌤𑍍𑌵𑌮𑍍 ॥ 30 ॥

𑌪𑍍𑌰𑌵𑌾𑌲𑌮𑍁𑌕𑍍𑌤𑌾𑌫𑌲𑌰𑌤𑍍𑌨𑌜𑍈𑌸𑍍𑌤𑍍𑌵𑌂
𑌸𑍁𑌵𑌰𑍍𑌣𑌸𑍂𑌤𑍍𑌰𑍈𑌶𑍍𑌚 𑌗𑍃𑌹𑌾𑌣 𑌕𑌂𑌠𑍇 ।
𑌚𑌿𑌤𑍍𑌤𑍇𑌨 𑌦𑌤𑍍𑌤𑌾 𑌵𑌿𑌵𑌿𑌧𑌾𑌶𑍍𑌚 𑌮𑌾𑌲𑌾
𑌉𑌰𑍋𑌦𑌰𑍇 𑌶𑍋𑌭𑌯 𑌵𑌿𑌘𑍍𑌨𑌰𑌾𑌜 ॥ 31 ॥

𑌚𑌂𑌦𑍍𑌰𑌂 𑌲𑌲𑌾𑌟𑍇 𑌗𑌣𑌨𑌾𑌥 𑌪𑍂𑌰𑍍𑌣𑌂
𑌵𑍃𑌦𑍍𑌧𑌿𑌕𑍍𑌷𑌯𑌾𑌭𑍍𑌯𑌾𑌂 𑌤𑍁 𑌵𑌿𑌹𑍀𑌨𑌮𑌾𑌦𑍍𑌯𑌮𑍍 ।
𑌸𑌂𑌶𑍋𑌭𑌯 𑌤𑍍𑌵𑌂 𑌵𑌰𑌸𑌂𑌯𑍁𑌤𑌂 𑌤𑍇
𑌭𑌕𑍍𑌤𑌿𑌪𑍍𑌰𑌿𑌯𑌤𑍍𑌵𑌂 𑌪𑍍𑌰𑌕𑌟𑍀𑌕𑍁𑌰𑍁𑌷𑍍𑌵 ॥ 32 ॥

𑌚𑌿𑌂𑌤𑌾𑌮𑌣𑌿𑌂 𑌚𑌿𑌂𑌤𑌿𑌤𑌦𑌂 𑌪𑌰𑍇𑌶
𑌹𑍃𑌦𑍍𑌦𑍇𑌶𑌗𑌂 𑌜𑍍𑌯𑍋𑌤𑌿𑌰𑍍𑌮𑌯𑌂 𑌕𑍁𑌰𑍁𑌷𑍍𑌵 ।
𑌮𑌣𑌿𑌂 𑌸𑌦𑌾𑌨𑌂𑌦𑌸𑍁𑌖𑌪𑍍𑌰𑌦𑌂 𑌚
𑌵𑌿𑌘𑍍𑌨𑍇𑌶 𑌦𑍀𑌨𑌾𑌰𑍍𑌥𑌦 𑌪𑌾𑌲𑌯𑌸𑍍𑌵 ॥ 33 ॥

𑌨𑌾𑌭𑍌 𑌫𑌣𑍀𑌶𑌂 𑌚 𑌸𑌹𑌸𑍍𑌰𑌶𑍀𑌰𑍍𑌷𑌂
𑌸𑌂𑌵𑍇𑌷𑍍𑌟𑌨𑍇𑌨𑍈𑌵 𑌗𑌣𑌾𑌧𑌿𑌨𑌾𑌥 ।
𑌭𑌕𑍍𑌤𑌂 𑌸𑍁𑌭𑍂𑌷𑌂 𑌕𑍁𑌰𑍁 𑌭𑍂𑌷𑌣𑍇𑌨
𑌵𑌰𑌪𑍍𑌰𑌦𑌾𑌨𑌂 𑌸𑌫𑌲𑌂 𑌪𑌰𑍇𑌶 ॥ 34 ॥

𑌕𑌟𑍀𑌤𑌟𑍇 𑌰𑌤𑍍𑌨𑌸𑍁𑌵𑌰𑍍𑌣𑌯𑍁𑌕𑍍𑌤𑌾𑌂
𑌕𑌾𑌂𑌚𑍀𑌂 𑌸𑍁𑌚𑌿𑌤𑍍𑌤𑍇𑌨 𑌚 𑌧𑌾𑌰𑌯𑌾𑌮𑌿 ।
𑌵𑌿𑌘𑍍𑌨𑍇𑌶 𑌜𑍍𑌯𑍋𑌤𑌿𑌰𑍍𑌗𑌣𑌦𑍀𑌪𑌨𑍀𑌂 𑌤𑍇
𑌪𑍍𑌰𑌸𑍀𑌦 𑌭𑌕𑍍𑌤𑌂 𑌕𑍁𑌰𑍁 𑌮𑌾𑌂 𑌦𑌯𑌾𑌬𑍍𑌧𑍇 ॥ 35 ॥

𑌹𑍇𑌰𑌂𑌬 𑌤𑍇 𑌰𑌤𑍍𑌨𑌸𑍁𑌵𑌰𑍍𑌣𑌯𑍁𑌕𑍍𑌤𑍇
𑌸𑍁𑌨𑍂𑌪𑍁𑌰𑍇 𑌮𑌂𑌜𑌿𑌰𑌕𑍇 𑌤𑌥𑍈𑌵 ।
𑌸𑍁𑌕𑌿𑌂𑌕𑌿𑌣𑍀𑌨𑌾𑌦𑌯𑍁𑌤𑍇 𑌸𑍁𑌬𑍁𑌦𑍍𑌧𑍍𑌯𑌾
𑌸𑍁𑌪𑌾𑌦𑌯𑍋𑌃 𑌶𑍋𑌭𑌯 𑌮𑍇 𑌪𑍍𑌰𑌦𑌤𑍍𑌤𑍇 ॥ 36 ॥

𑌇𑌤𑍍𑌯𑌾𑌦𑌿 𑌨𑌾𑌨𑌾𑌵𑌿𑌧𑌭𑍂𑌷𑌣𑌾𑌨𑌿
𑌤𑌵𑍇𑌚𑍍𑌛𑌯𑌾 𑌮𑌾𑌨𑌸𑌕𑌲𑍍𑌪𑌿𑌤𑌾𑌨𑌿 ।
𑌸𑌂𑌭𑍂𑌷𑌯𑌾𑌮𑍍𑌯𑍇𑌵 𑌤𑍍𑌵𑌦𑌂𑌗𑌕𑍇𑌷𑍁
𑌵𑌿𑌚𑌿𑌤𑍍𑌰𑌧𑌾𑌤𑍁𑌪𑍍𑌰𑌭𑌵𑌾𑌨𑌿 𑌢𑍁𑌂𑌢𑍇 ॥ 3𑍭 ॥

𑌸𑍁𑌚𑌂𑌦𑌨𑌂 𑌰𑌕𑍍𑌤𑌮𑌮𑍋𑌘𑌵𑍀𑌰𑍍𑌯𑌂
𑌸𑍁𑌘𑌰𑍍𑌷𑌿𑌤𑌂 𑌹𑍍𑌯𑌷𑍍𑌟𑌕𑌗𑌂𑌧𑌮𑍁𑌖𑍍𑌯𑍈𑌃 ।
𑌯𑍁𑌕𑍍𑌤𑌂 𑌮𑌯𑌾 𑌕𑌲𑍍𑌪𑌿𑌤𑌮𑍇𑌕𑌦𑌂𑌤
𑌗𑍃𑌹𑌾𑌣 𑌤𑍇 𑌤𑍍𑌵𑌂𑌗𑌵𑌿𑌲𑍇𑌪𑌨𑌾𑌰𑍍𑌥𑌮𑍍 ॥ 3𑍮 ॥

𑌲𑌿𑌪𑍍𑌤𑍇𑌷𑍁 𑌵𑍈𑌚𑌿𑌤𑍍𑌰𑍍𑌯𑌮𑌥𑌾𑌷𑍍𑌟𑌗𑌂𑌧𑍈-
-𑌰𑌂𑌗𑍇𑌷𑍁 𑌤𑍇𑌽𑌹𑌂 𑌪𑍍𑌰𑌕𑌰𑍋𑌮𑌿 𑌚𑌿𑌤𑍍𑌰𑌮𑍍 ।
𑌪𑍍𑌰𑌸𑍀𑌦 𑌚𑌿𑌤𑍍𑌤𑍇𑌨 𑌵𑌿𑌨𑌾𑌯𑌕 𑌤𑍍𑌵𑌂
𑌤𑌤𑌃 𑌸𑍁𑌰𑌕𑍍𑌤𑌂 𑌰𑌵𑌿𑌮𑍇𑌵 𑌫𑌾𑌲𑍇 ॥ 3𑍯 ॥

𑌘𑍃𑌤𑍇𑌨 𑌵𑍈 𑌕𑍁𑌂𑌕𑍁𑌮𑌕𑍇𑌨 𑌰𑌕𑍍𑌤𑌾𑌨𑍍
𑌸𑍁𑌤𑌂𑌡𑍁𑌲𑌾𑌂𑌸𑍍𑌤𑍇 𑌪𑌰𑌿𑌕𑌲𑍍𑌪𑌯𑌾𑌮𑌿 ।
𑌫𑌾𑌲𑍇 𑌗𑌣𑌾𑌧𑍍𑌯𑌕𑍍𑌷 𑌗𑍃𑌹𑌾𑌣 𑌪𑌾𑌹𑌿
𑌭𑌕𑍍𑌤𑌾𑌨𑍍 𑌸𑍁𑌭𑌕𑍍𑌤𑌿𑌪𑍍𑌰𑌿𑌯 𑌦𑍀𑌨𑌬𑌂𑌧𑍋 ॥ 40 ॥

𑌗𑍃𑌹𑌾𑌣 𑌭𑍋 𑌚𑌂𑌪𑌕𑌮𑌾𑌲𑌤𑍀𑌨𑌿
𑌜𑌲𑌪𑌂𑌕𑌜𑌾𑌨𑌿 𑌸𑍍𑌥𑌲𑌪𑌂𑌕𑌜𑌾𑌨𑌿 ।
𑌚𑌿𑌤𑍍𑌤𑍇𑌨 𑌦𑌤𑍍𑌤𑌾𑌨𑌿 𑌚 𑌮𑌲𑍍𑌲𑌿𑌕𑌾𑌨𑌿
𑌪𑍁𑌷𑍍𑌪𑌾𑌣𑌿 𑌨𑌾𑌨𑌾𑌵𑌿𑌧𑌵𑍃𑌕𑍍𑌷𑌜𑌾𑌨𑌿 ॥ 41 ॥

𑌪𑍁𑌷𑍍𑌪𑍋𑌪𑌰𑌿 𑌤𑍍𑌵𑌂 𑌮𑌨𑌸𑌾 𑌗𑍃𑌹𑌾𑌣
𑌹𑍇𑌰𑌂𑌬 𑌮𑌂𑌦𑌾𑌰𑌶𑌮𑍀𑌦𑌳𑌾𑌨𑌿 ।
𑌮𑌯𑌾 𑌸𑍁𑌚𑌿𑌤𑍍𑌤𑍇𑌨 𑌪𑍍𑌰𑌕𑌲𑍍𑌪𑌿𑌤𑌾𑌨𑌿
𑌹𑍍𑌯𑌪𑌾𑌰𑌕𑌾𑌣𑌿 𑌪𑍍𑌰𑌣𑌵𑌾𑌕𑍃𑌤𑍇 𑌤𑍁 ॥ 42 ॥

𑌦𑍂𑌰𑍍𑌵𑌾𑌂𑌕𑍁𑌰𑌾𑌨𑍍𑌵𑍈 𑌮𑌨𑌸𑌾 𑌪𑍍𑌰𑌦𑌤𑍍𑌤𑌾𑌂-
-𑌸𑍍𑌤𑍍𑌰𑌿𑌪𑌂𑌚𑌪𑌤𑍍𑌰𑍈𑌰𑍍𑌯𑍁𑌤𑌕𑌾𑌂𑌶𑍍𑌚 𑌸𑍍𑌨𑌿𑌗𑍍𑌧𑌾𑌨𑍍 ।
𑌗𑍃𑌹𑌾𑌣 𑌵𑌿𑌘𑍍𑌨𑍇𑌶𑍍𑌵𑌰 𑌸𑌂𑌖𑍍𑌯𑌯𑌾 𑌤𑍍𑌵𑌂
𑌹𑍀𑌨𑌾𑌂𑌶𑍍𑌚 𑌸𑌰𑍍𑌵𑍋𑌪𑌰𑌿 𑌵𑌕𑍍𑌰𑌤𑍁𑌂𑌡 ॥ 43 ॥

𑌦𑌶𑌾𑌂𑌗𑌭𑍂𑌤𑌂 𑌮𑌨𑌸𑌾 𑌮𑌯𑌾 𑌤𑍇
𑌧𑍂𑌪𑌂 𑌪𑍍𑌰𑌦𑌤𑍍𑌤𑌂 𑌗𑌣𑌰𑌾𑌜 𑌢𑍁𑌂𑌢𑍇 ।
𑌗𑍃𑌹𑌾𑌣 𑌸𑍌𑌰𑌭𑍍𑌯𑌕𑌰𑌂 𑌪𑌰𑍇𑌶
𑌸𑌿𑌦𑍍𑌧𑍍𑌯𑌾 𑌚 𑌬𑍁𑌦𑍍𑌧𑍍𑌯𑌾 𑌸𑌹 𑌭𑌕𑍍𑌤𑌪𑌾𑌲 ॥ 44 ॥

𑌦𑍀𑌪𑌂 𑌸𑍁𑌵𑌰𑍍𑌤𑍍𑌯𑌾 𑌯𑍁𑌤𑌮𑌾𑌦𑌰𑌾𑌤𑍍𑌤𑍇
𑌦𑌤𑍍𑌤𑌂 𑌮𑌯𑌾 𑌮𑌾𑌨𑌸𑌕𑌂 𑌗𑌣𑍇𑌶 ।
𑌗𑍃𑌹𑌾𑌣 𑌨𑌾𑌨𑌾𑌵𑌿𑌧𑌜𑌂 𑌘𑍃𑌤𑌾𑌦𑌿-
-𑌤𑍈𑌲𑌾𑌦𑌿𑌸𑌂𑌭𑍂𑌤𑌮𑌮𑍋𑌘𑌦𑍃𑌷𑍍𑌟𑍇 ॥ 45 ॥

𑌭𑍋𑌜𑍍𑌯𑌂 𑌚 𑌲𑍇𑌹𑍍𑌯𑌂 𑌗𑌣𑌰𑌾𑌜 𑌪𑍇𑌯𑌂
𑌚𑍋𑌷𑍍𑌯𑌂 𑌚 𑌨𑌾𑌨𑌾𑌵𑌿𑌧𑌷𑌡𑍍𑌰𑌸𑌾𑌢𑍍𑌯𑌮𑍍 ।
𑌗𑍃𑌹𑌾𑌣 𑌨𑍈𑌵𑍇𑌦𑍍𑌯𑌮𑌥𑍋 𑌮𑌯𑌾 𑌤𑍇
𑌸𑍁𑌕𑌲𑍍𑌪𑌿𑌤𑌂 𑌪𑍁𑌷𑍍𑌟𑌿𑌪𑌤𑍇 𑌮𑌹𑌾𑌤𑍍𑌮𑌨𑍍 ॥ 46 ॥

𑌸𑍁𑌵𑌾𑌸𑌿𑌤𑌂 𑌭𑍋𑌜𑌨𑌮𑌧𑍍𑌯𑌭𑌾𑌗𑍇
𑌜𑌲𑌂 𑌮𑌯𑌾 𑌦𑌤𑍍𑌤𑌮𑌥𑍋 𑌗𑍃𑌹𑌾𑌣 ।
𑌕𑌮𑌂𑌡𑌲𑍁𑌸𑍍𑌥𑌂 𑌮𑌨𑌸𑌾 𑌗𑌣𑍇𑌶
𑌪𑌿𑌬𑌸𑍍𑌵 𑌵𑌿𑌶𑍍𑌵𑌾𑌦𑌿𑌕𑌤𑍃𑌪𑍍𑌤𑌿𑌕𑌾𑌰𑌿𑌨𑍍 ॥ 4𑍭 ॥

𑌤𑌤𑌃 𑌕𑌰𑍋𑌦𑍍𑌵𑌰𑍍𑌤𑌨𑌕𑌂 𑌗𑍃𑌹𑌾𑌣
𑌸𑍌𑌗𑌂𑌧𑍍𑌯𑌯𑍁𑌕𑍍𑌤𑌂 𑌮𑍁𑌖𑌮𑌾𑌰𑍍𑌜𑌨𑌾𑌯 ।
𑌸𑍁𑌵𑌾𑌸𑌿𑌤𑍇𑌨𑍈𑌵 𑌸𑍁𑌤𑍀𑌰𑍍𑌥𑌜𑍇𑌨
𑌸𑍁𑌕𑌲𑍍𑌪𑌿𑌤𑌂 𑌨𑌾𑌥 𑌗𑍃𑌹𑌾𑌣 𑌢𑍁𑌂𑌢𑍇 ॥ 4𑍮 ॥

𑌪𑍁𑌨𑌸𑍍𑌤𑌥𑌾𑌚𑌮𑍍𑌯 𑌸𑍁𑌵𑌾𑌸𑌿𑌤𑌂 𑌚
𑌦𑌤𑍍𑌤𑌂 𑌮𑌯𑌾 𑌤𑍀𑌰𑍍𑌥𑌜𑌲𑌂 𑌪𑌿𑌬𑌸𑍍𑌵 ।
𑌪𑍍𑌰𑌕𑌲𑍍𑌪𑍍𑌯 𑌵𑌿𑌘𑍍𑌨𑍇𑌶 𑌤𑌤𑌃 𑌪𑌰𑌂 𑌤𑍇
𑌸𑌂𑌪𑍍𑌰𑍋𑌂𑌛𑌨𑌂 𑌹𑌸𑍍𑌤𑌮𑍁𑌖𑍇 𑌕𑌰𑍋𑌮𑌿 ॥ 4𑍯 ॥

𑌦𑍍𑌰𑌾𑌕𑍍𑌷𑌾𑌦𑌿𑌰𑌂𑌭𑌾𑌫𑌲𑌚𑍂𑌤𑌕𑌾𑌨𑌿
𑌖𑌾𑌰𑍍𑌜𑍂𑌰𑌕𑌾𑌰𑍍𑌕𑌂𑌧𑍁𑌕𑌦𑌾𑌡𑌿𑌮𑌾𑌨𑌿 ।
𑌸𑍁𑌸𑍍𑌵𑌾𑌦𑌯𑍁𑌕𑍍𑌤𑌾𑌨𑌿 𑌮𑌯𑌾 𑌪𑍍𑌰𑌕𑌲𑍍𑌪𑍍𑌯
𑌗𑍃𑌹𑌾𑌣 𑌦𑌤𑍍𑌤𑌾𑌨𑌿 𑌫𑌲𑌾𑌨𑌿 𑌢𑍁𑌂𑌢𑍇 ॥ 50 ॥

𑌪𑍁𑌨𑌰𑍍𑌜𑌲𑍇𑌨𑍈𑌵 𑌕𑌰𑌾𑌦𑌿𑌕𑌂 𑌤𑍇
𑌸𑌂𑌕𑍍𑌷𑌾𑌲𑌯𑌾𑌮𑌿 𑌮𑌨𑌸𑌾 𑌗𑌣𑍇𑌶 ।
𑌸𑍁𑌵𑌾𑌸𑌿𑌤𑌂 𑌤𑍋𑌯𑌮𑌥𑍋 𑌪𑌿𑌬𑌸𑍍𑌵
𑌮𑌯𑌾 𑌪𑍍𑌰𑌦𑌤𑍍𑌤𑌂 𑌮𑌨𑌸𑌾 𑌪𑌰𑍇𑌶 ॥ 51 ॥

𑌅𑌷𑍍𑌟𑌾𑌂𑌗𑌯𑍁𑌕𑍍𑌤𑌂 𑌗𑌣𑌨𑌾𑌥 𑌦𑌤𑍍𑌤𑌂
𑌤𑌾𑌂𑌬𑍂𑌲𑌕𑌂 𑌤𑍇 𑌮𑌨𑌸𑌾 𑌮𑌯𑌾 𑌵𑍈 ।
𑌗𑍃𑌹𑌾𑌣 𑌵𑌿𑌘𑍍𑌨𑍇𑌶𑍍𑌵𑌰 𑌭𑌾𑌵𑌯𑍁𑌕𑍍𑌤𑌂
𑌸𑌦𑌾 𑌸𑌕𑍃𑌤𑍍𑌤𑍁𑌂𑌡𑌵𑌿𑌶𑍋𑌧𑌨𑌾𑌰𑍍𑌥𑌮𑍍 ॥ 52 ॥

𑌤𑌤𑍋 𑌮𑌯𑌾 𑌕𑌲𑍍𑌪𑌿𑌤𑌕𑍇 𑌗𑌣𑍇𑌶
𑌮𑌹𑌾𑌸𑌨𑍇 𑌰𑌤𑍍𑌨𑌸𑍁𑌵𑌰𑍍𑌣𑌯𑍁𑌕𑍍𑌤𑍇 ।
𑌮𑌂𑌦𑌾𑌰𑌕𑌾𑌰𑍍𑌪𑌾𑌸𑌕𑌯𑍁𑌕𑍍𑌤𑌵𑌸𑍍𑌤𑍍𑌰𑍈-
-𑌰𑌨𑌰𑍍𑌘𑍍𑌯𑌸𑌂𑌛𑌾𑌦𑌿𑌤𑌕𑍇 𑌪𑍍𑌰𑌸𑍀𑌦 ॥ 53 ॥

𑌤𑌤𑌸𑍍𑌤𑍍𑌵𑌦𑍀𑌯𑌾𑌵𑌰𑌣𑌂 𑌪𑌰𑍇𑌶
𑌸𑌂𑌪𑍂𑌜𑌯𑌾𑌮𑌿 𑌮𑌨𑌸𑌾 𑌯𑌥𑌾𑌵𑌤𑍍 ।
𑌨𑌾𑌨𑍋𑌪𑌚𑌾𑌰𑍈𑌃 𑌪𑌰𑌮𑌪𑍍𑌰𑌿𑌯𑍈𑌸𑍍𑌤𑍁
𑌤𑍍𑌵𑌤𑍍𑌪𑍍𑌰𑍀𑌤𑌿𑌕𑌾𑌮𑌾𑌰𑍍𑌥𑌮𑌨𑌾𑌥𑌬𑌂𑌧𑍋 ॥ 54 ॥

𑌗𑍃𑌹𑌾𑌣 𑌲𑌂𑌬𑍋𑌦𑌰 𑌦𑌕𑍍𑌷𑌿𑌣𑌾𑌂 𑌤𑍇
𑌹𑍍𑌯𑌸𑌂𑌖𑍍𑌯𑌭𑍂𑌤𑌾𑌂 𑌮𑌨𑌸𑌾 𑌪𑍍𑌰𑌦𑌤𑍍𑌤𑌾𑌮𑍍 ।
𑌸𑍌𑌵𑌰𑍍𑌣𑌮𑍁𑌦𑍍𑌰𑌾𑌦𑌿𑌕𑌮𑍁𑌖𑍍𑌯𑌭𑌾𑌵𑌾𑌂
𑌪𑌾𑌹𑌿 𑌪𑍍𑌰𑌭𑍋 𑌵𑌿𑌶𑍍𑌵𑌮𑌿𑌦𑌂 𑌗𑌣𑍇𑌶 ॥ 55 ॥

𑌰𑌾𑌜𑍋𑌪𑌚𑌾𑌰𑌾𑌨𑍍𑌵𑌿𑌵𑌿𑌧𑌾𑌨𑍍𑌗𑍃𑌹𑌾𑌣
𑌹𑌸𑍍𑌤𑍍𑌯𑌶𑍍𑌵𑌛𑌤𑍍𑌰𑌾𑌦𑌿𑌕𑌮𑌾𑌦𑌰𑌾𑌦𑍍𑌵𑍈 ।
𑌚𑌿𑌤𑍍𑌤𑍇𑌨 𑌦𑌤𑍍𑌤𑌾𑌨𑍍 𑌗𑌣𑌨𑌾𑌥 𑌢𑍁𑌂𑌢𑍇
𑌹𑍍𑌯𑌪𑌾𑌰𑌸𑌂𑌖𑍍𑌯𑌾𑌨𑍍 𑌸𑍍𑌥𑌿𑌰𑌜𑌂𑌗𑌮𑌾𑌂𑌸𑍍𑌤𑍇 ॥ 56 ॥

𑌦𑌾𑌨𑌾𑌯 𑌨𑌾𑌨𑌾𑌵𑌿𑌧𑌰𑍂𑌪𑌕𑌾𑌂𑌸𑍍𑌤𑍇
𑌗𑍃𑌹𑌾𑌣 𑌦𑌤𑍍𑌤𑌾𑌨𑍍𑌮𑌨𑌸𑌾 𑌮𑌯𑌾 𑌵𑍈 ।
𑌪𑌦𑌾𑌰𑍍𑌥𑌭𑍂𑌤𑌾𑌨𑍍 𑌸𑍍𑌥𑌿𑌰𑌜𑌂𑌗𑌮𑌾𑌂𑌶𑍍𑌚
𑌹𑍇𑌰𑌂𑌬 𑌮𑌾𑌂 𑌤𑌾𑌰𑌯 𑌮𑍋𑌹𑌭𑌾𑌵𑌾𑌤𑍍 ॥ 5𑍭 ॥

𑌮𑌂𑌦𑌾𑌰𑌪𑍁𑌷𑍍𑌪𑌾𑌣𑌿 𑌶𑌮𑍀𑌦𑌳𑌾𑌨𑌿
𑌦𑍂𑌰𑍍𑌵𑌾𑌂𑌕𑍁𑌰𑌾𑌂𑌸𑍍𑌤𑍇 𑌮𑌨𑌸𑌾 𑌦𑌦𑌾𑌮𑌿 ।
𑌹𑍇𑌰𑌂𑌬 𑌲𑌂𑌬𑍋𑌦𑌰 𑌦𑍀𑌨𑌪𑌾𑌲
𑌗𑍃𑌹𑌾𑌣 𑌭𑌕𑍍𑌤𑌂 𑌕𑍁𑌰𑍁 𑌮𑌾𑌂 𑌪𑌦𑍇 𑌤𑍇 ॥ 5𑍮 ॥

𑌤𑌤𑍋 𑌹𑌰𑌿𑌦𑍍𑌰𑌾𑌮𑌬𑌿𑌰𑌂 𑌗𑍁𑌲𑌾𑌲𑌂
𑌸𑌿𑌂𑌦𑍂𑌰𑌕𑌂 𑌤𑍇 𑌪𑌰𑌿𑌕𑌲𑍍𑌪𑌯𑌾𑌮𑌿 ।
𑌸𑍁𑌵𑌾𑌸𑌿𑌤𑌂 𑌵𑌸𑍍𑌤𑍁 𑌸𑍁𑌵𑌾𑌸𑌭𑍂𑌤𑍈-
-𑌰𑍍𑌗𑍃𑌹𑌾𑌣 𑌬𑍍𑌰𑌹𑍍𑌮𑍇𑌶𑍍𑌵𑌰 𑌶𑍋𑌭𑌨𑌾𑌰𑍍𑌥𑌮𑍍 ॥ 5𑍯 ॥

𑌤𑌤𑌃 𑌶𑍁𑌕𑌾𑌦𑍍𑌯𑌾𑌃 𑌶𑌿𑌵𑌵𑌿𑌷𑍍𑌣𑍁𑌮𑍁𑌖𑍍𑌯𑌾
𑌇𑌂𑌦𑍍𑌰𑌾𑌦𑌯𑌃 𑌶𑍇𑌷𑌮𑍁𑌖𑌾𑌸𑍍𑌤𑌥𑌾𑌨𑍍𑌯𑍇 ।
𑌮𑍁𑌨𑍀𑌂𑌦𑍍𑌰𑌕𑌾𑌃 𑌸𑍇𑌵𑌕𑌭𑌾𑌵𑌯𑍁𑌕𑍍𑌤𑌾𑌃
𑌸𑌭𑌾𑌸𑌨𑌸𑍍𑌥𑌂 𑌪𑍍𑌰𑌣𑌮𑌂𑌤𑌿 𑌢𑍁𑌂𑌢𑌿𑌮𑍍 ॥ 60 ॥

𑌵𑌾𑌮𑌾𑌂𑌗𑌕𑍇 𑌶𑌕𑍍𑌤𑌿𑌯𑍁𑌤𑌾 𑌗𑌣𑍇𑌶𑌂
𑌸𑌿𑌦𑍍𑌧𑌿𑌸𑍍𑌤𑍁 𑌨𑌾𑌨𑌾𑌵𑌿𑌧𑌸𑌿𑌦𑍍𑌧𑌿𑌭𑌿𑌸𑍍𑌤𑌮𑍍 ।
𑌅𑌤𑍍𑌯𑌂𑌤𑌭𑌾𑌵𑍇𑌨 𑌸𑍁𑌸𑍇𑌵𑌤𑍇 𑌤𑍁
𑌮𑌾𑌯𑌾𑌸𑍍𑌵𑌰𑍂𑌪𑌾 𑌪𑌰𑌮𑌾𑌰𑍍𑌥𑌭𑍂𑌤𑌾 ॥ 61 ॥

𑌗𑌣𑍇𑌶𑍍𑌵𑌰𑌂 𑌦𑌕𑍍𑌷𑌿𑌣𑌭𑌾𑌗𑌸𑌂𑌸𑍍𑌥𑌾
𑌬𑍁𑌦𑍍𑌧𑌿𑌃 𑌕𑌲𑌾𑌭𑌿𑌶𑍍𑌚 𑌸𑍁𑌬𑍋𑌧𑌿𑌕𑌾𑌭𑌿𑌃 ।
𑌵𑌿𑌦𑍍𑌯𑌾𑌭𑌿𑌰𑍇𑌵𑌂 𑌭𑌜𑌤𑍇 𑌪𑌰𑍇𑌶
𑌮𑌾𑌯𑌾𑌸𑍁 𑌸𑌾𑌂𑌖𑍍𑌯𑌪𑍍𑌰𑌦𑌚𑌿𑌤𑍍𑌤𑌰𑍂𑌪𑌾𑌃 ॥ 62 ॥

𑌪𑍍𑌰𑌮𑍋𑌦𑌮𑍋𑌦𑌾𑌦𑌯𑌃 𑌪𑍃𑌷𑍍𑌠𑌭𑌾𑌗𑍇
𑌗𑌣𑍇𑌶𑍍𑌵𑌰𑌂 𑌭𑌾𑌵𑌯𑍁𑌤𑌾 𑌭𑌜𑌂𑌤𑍇 ।
𑌭𑌕𑍍𑌤𑍇𑌶𑍍𑌵𑌰𑌾 𑌮𑍁𑌦𑍍𑌗𑌲𑌶𑌂𑌭𑍁𑌮𑍁𑌖𑍍𑌯𑌾𑌃
𑌶𑍁𑌕𑌾𑌦𑌯𑌸𑍍𑌤𑌂 𑌸𑍍𑌮 𑌪𑍁𑌰𑍋 𑌭𑌜𑌂𑌤𑍇 ॥ 63 ॥

𑌗𑌂𑌧𑌰𑍍𑌵𑌮𑍁𑌖𑍍𑌯𑌾 𑌮𑌧𑍁𑌰𑌂 𑌜𑌗𑍁𑌶𑍍𑌚
𑌗𑌣𑍇𑌶𑌗𑍀𑌤𑌂 𑌵𑌿𑌵𑌿𑌧𑌸𑍍𑌵𑌰𑍂𑌪𑌮𑍍 ।
𑌨𑍃𑌤𑍍𑌯𑌂 𑌕𑌲𑌾𑌯𑍁𑌕𑍍𑌤𑌮𑌥𑍋 𑌪𑍁𑌰𑌸𑍍𑌤𑌾-
-𑌚𑍍𑌚𑌕𑍍𑌰𑍁𑌸𑍍𑌤𑌥𑌾 𑌹𑍍𑌯𑌪𑍍𑌸𑌰𑌸𑍋 𑌵𑌿𑌚𑌿𑌤𑍍𑌰𑌮𑍍 ॥ 64 ॥

𑌇𑌤𑍍𑌯𑌾𑌦𑌿𑌨𑌾𑌨𑌾𑌵𑌿𑌧𑌭𑌾𑌵𑌯𑍁𑌕𑍍𑌤𑍈𑌃
𑌸𑌂𑌸𑍇𑌵𑌿𑌤𑌂 𑌵𑌿𑌘𑍍𑌨𑌪𑌤𑌿𑌂 𑌭𑌜𑌾𑌮𑌿 ।
𑌚𑌿𑌤𑍍𑌤𑍇𑌨 𑌧𑍍𑌯𑌾𑌤𑍍𑌵𑌾 𑌤𑍁 𑌨𑌿𑌰𑌂𑌜𑌨𑌂 𑌵𑍈
𑌕𑌰𑍋𑌮𑌿 𑌨𑌾𑌨𑌾𑌵𑌿𑌧𑌦𑍀𑌪𑌯𑍁𑌕𑍍𑌤𑌮𑍍 ॥ 65 ॥

𑌚𑌤𑍁𑌰𑍍𑌭𑍁𑌜𑌂 𑌪𑌾𑌶𑌧𑌰𑌂 𑌗𑌣𑍇𑌶𑌂
𑌤𑌥𑌾𑌂𑌕𑍁𑌶𑌂 𑌦𑌂𑌤𑌯𑍁𑌤𑌂 𑌤𑌮𑍇𑌵𑌮𑍍 ।
𑌤𑍍𑌰𑌿𑌨𑍇𑌤𑍍𑌰𑌯𑍁𑌕𑍍𑌤𑌂 𑌤𑍍𑌵𑌭𑌯𑌂𑌕𑌰𑌂 𑌤𑌂
𑌮𑌹𑍋𑌦𑌰𑌂 𑌚𑍈𑌕𑌰𑌦𑌂 𑌗𑌜𑌾𑌸𑍍𑌯𑌮𑍍 ॥ 66 ॥

𑌸𑌰𑍍𑌪𑍋𑌪𑌵𑍀𑌤𑌂 𑌗𑌜𑌕𑌰𑍍𑌣𑌧𑌾𑌰𑌂
𑌵𑌿𑌭𑍂𑌤𑌿𑌭𑌿𑌃 𑌸𑍇𑌵𑌿𑌤𑌪𑌾𑌦𑌪𑌦𑍍𑌮𑌮𑍍 ।
𑌧𑍍𑌯𑌾𑌯𑍇𑌦𑍍𑌗𑌣𑍇𑌶𑌂 𑌵𑌿𑌵𑌿𑌧𑌪𑍍𑌰𑌕𑌾𑌰𑍈𑌃
𑌸𑍁𑌪𑍂𑌜𑌿𑌤𑌂 𑌶𑌕𑍍𑌤𑌿𑌯𑍁𑌤𑌂 𑌪𑌰𑍇𑌶𑌮𑍍 ॥ 6𑍭 ॥

𑌤𑌤𑍋 𑌜𑌪𑌂 𑌵𑍈 𑌮𑌨𑌸𑌾 𑌕𑌰𑍋𑌮𑌿
𑌸𑍍𑌵𑌮𑍂𑌲𑌮𑌂𑌤𑍍𑌰𑌸𑍍𑌯 𑌵𑌿𑌧𑌾𑌨𑌯𑍁𑌕𑍍𑌤𑌮𑍍 ।
𑌅𑌸𑌂𑌖𑍍𑌯𑌭𑍂𑌤𑌂 𑌗𑌣𑌰𑌾𑌜 𑌹𑌸𑍍𑌤𑍇
𑌸𑌮𑌰𑍍𑌪𑌯𑌾𑌮𑍍𑌯𑍇𑌵 𑌗𑍃𑌹𑌾𑌣 𑌢𑍁𑌂𑌢𑍇 ॥ 6𑍮 ॥

𑌆𑌰𑌾𑌰𑍍𑌤𑌿𑌕𑌾𑌂 𑌕𑌰𑍍𑌪𑍂𑌰𑌕𑌾𑌦𑌿𑌭𑍂𑌤𑌾-
-𑌮𑌪𑌾𑌰𑌦𑍀𑌪𑌾𑌂 𑌪𑍍𑌰𑌕𑌰𑍋𑌮𑌿 𑌪𑍂𑌰𑍍𑌣𑌾𑌮𑍍 ।
𑌚𑌿𑌤𑍍𑌤𑍇𑌨 𑌲𑌂𑌬𑍋𑌦𑌰 𑌤𑌾𑌂 𑌗𑍃𑌹𑌾𑌣
𑌹𑍍𑌯𑌜𑍍𑌞𑌾𑌨𑌧𑍍𑌵𑌾𑌂𑌤𑌾𑌘𑌹𑌰𑌾𑌂 𑌨𑌿𑌜𑌾𑌨𑌾𑌮𑍍 ॥ 6𑍯 ॥

𑌵𑍇𑌦𑍇𑌷𑍁 𑌵𑌿𑌘𑍍𑌨𑍇𑌶𑍍𑌵𑌰𑌕𑍈𑌃 𑌸𑍁𑌮𑌂𑌤𑍍𑌰𑍈𑌃
𑌸𑍁𑌮𑌂𑌤𑍍𑌰𑌿𑌤𑌂 𑌪𑍁𑌷𑍍𑌪𑌦𑌲𑌂 𑌪𑍍𑌰𑌭𑍂𑌤𑌮𑍍 ।
𑌗𑍃𑌹𑌾𑌣 𑌚𑌿𑌤𑍍𑌤𑍇𑌨 𑌮𑌯𑌾 𑌪𑍍𑌰𑌦𑌤𑍍𑌤-
-𑌮𑌪𑌾𑌰𑌵𑍃𑌤𑍍𑌤𑍍𑌯𑌾 𑌤𑍍𑌵𑌥 𑌮𑌂𑌤𑍍𑌰𑌪𑍁𑌷𑍍𑌪𑌮𑍍 ॥ 𑍭0 ॥

𑌅𑌪𑌾𑌰𑌵𑍃𑌤𑍍𑌯𑌾 𑌸𑍍𑌤𑍁𑌤𑌿𑌮𑍇𑌕𑌦𑌂𑌤𑌂
𑌗𑍃𑌹𑌾𑌣 𑌚𑌿𑌤𑍍𑌤𑍇𑌨 𑌕𑍃𑌤𑌾𑌂 𑌗𑌣𑍇𑌶 ।
𑌯𑍁𑌕𑍍𑌤𑌾𑌂 𑌶𑍍𑌰𑍁𑌤𑌿𑌸𑍍𑌮𑌾𑌰𑍍𑌤𑌭𑌵𑍈𑌃 𑌪𑍁𑌰𑌾𑌣𑍈𑌃
𑌸𑌰𑍍𑌵𑍈𑌃 𑌪𑌰𑍇𑌶𑌾𑌧𑌿𑌪𑌤𑍇 𑌮𑌯𑌾 𑌤𑍇 ॥ 𑍭1 ॥

𑌪𑍍𑌰𑌦𑌕𑍍𑌷𑌿𑌣𑌾 𑌮𑌾𑌨𑌸𑌕𑌲𑍍𑌪𑌿𑌤𑌾𑌸𑍍𑌤𑌾
𑌗𑍃𑌹𑌾𑌣 𑌲𑌂𑌬𑍋𑌦𑌰 𑌭𑌾𑌵𑌯𑍁𑌕𑍍𑌤𑌾𑌃 ।
𑌸𑌂𑌖𑍍𑌯𑌾𑌵𑌿𑌹𑍀𑌨𑌾 𑌵𑌿𑌵𑌿𑌧𑌸𑍍𑌵𑌰𑍂𑌪𑌾
𑌭𑌕𑍍𑌤𑌾𑌨𑍍 𑌸𑌦𑌾 𑌰𑌕𑍍𑌷 𑌭𑌵𑌾𑌰𑍍𑌣𑌵𑌾𑌦𑍍𑌵𑍈 ॥ 𑍭2 ॥

𑌨𑌤𑌿𑌂 𑌤𑌤𑍋 𑌵𑌿𑌘𑍍𑌨𑌪𑌤𑍇 𑌗𑍃𑌹𑌾𑌣
𑌸𑌾𑌷𑍍𑌟𑌾𑌂𑌗𑌕𑌾𑌦𑍍𑌯𑌾𑌂 𑌵𑌿𑌵𑌿𑌧𑌸𑍍𑌵𑌰𑍂𑌪𑌾𑌮𑍍 ।
𑌸𑌂𑌖𑍍𑌯𑌾𑌵𑌿𑌹𑍀𑌨𑌾𑌂 𑌮𑌨𑌸𑌾 𑌕𑍃𑌤𑌾𑌂 𑌤𑍇
𑌸𑌿𑌦𑍍𑌧𑍍𑌯𑌾 𑌚 𑌬𑍁𑌦𑍍𑌧𑍍𑌯𑌾 𑌪𑌰𑌿𑌪𑌾𑌲𑌯𑌾𑌶𑍁 ॥ 𑍭3 ॥

𑌨𑍍𑌯𑍂𑌨𑌾𑌤𑌿𑌰𑌿𑌕𑍍𑌤𑌂 𑌤𑍁 𑌮𑌯𑌾 𑌕𑍃𑌤𑌂 𑌚𑍇-
-𑌤𑍍𑌤𑌦𑌰𑍍𑌥𑌮𑌂𑌤𑍇 𑌮𑌨𑌸𑌾 𑌗𑍃𑌹𑌾𑌣 ।
𑌦𑍂𑌰𑍍𑌵𑌾𑌂𑌕𑍁𑌰𑌾𑌨𑍍𑌵𑌿𑌘𑍍𑌨𑌪𑌤𑍇 𑌪𑍍𑌰𑌦𑌤𑍍𑌤𑌾𑌨𑍍
𑌸𑌂𑌪𑍂𑌰𑍍𑌣𑌮𑍇𑌵𑌂 𑌕𑍁𑌰𑍁 𑌪𑍂𑌜𑌨𑌂 𑌮𑍇 ॥ 𑍭4 ॥

𑌕𑍍𑌷𑌮𑌸𑍍𑌵 𑌵𑌿𑌘𑍍𑌨𑌾𑌧𑌿𑌪𑌤𑍇 𑌮𑌦𑍀𑌯𑌾𑌨𑍍
𑌸𑌦𑌾𑌪𑌰𑌾𑌧𑌾𑌨𑍍 𑌵𑌿𑌵𑌿𑌧𑌸𑍍𑌵𑌰𑍂𑌪𑌾𑌨𑍍 ।
𑌭𑌕𑍍𑌤𑌿𑌂 𑌮𑌦𑍀𑌯𑌾𑌂 𑌸𑌫𑌲𑌾𑌂 𑌕𑍁𑌰𑍁𑌷𑍍𑌵
𑌸𑌂𑌪𑍍𑌰𑌾𑌰𑍍𑌥𑌯𑌾𑌮𑌿 𑌮𑌨𑌸𑌾 𑌗𑌣𑍇𑌶 ॥ 𑍭5 ॥

𑌤𑌤𑌃 𑌪𑍍𑌰𑌸𑌨𑍍𑌨𑍇𑌨 𑌗𑌜𑌾𑌨𑌨𑍇𑌨
𑌦𑌤𑍍𑌤𑌂 𑌪𑍍𑌰𑌸𑌾𑌦𑌂 𑌶𑌿𑌰𑌸𑌾𑌭𑌿𑌵𑌂𑌦𑍍𑌯 ।
𑌸𑍍𑌵𑌮𑌸𑍍𑌤𑌕𑍇 𑌤𑌂 𑌪𑌰𑌿𑌧𑌾𑌰𑌯𑌾𑌮𑌿
𑌚𑌿𑌤𑍍𑌤𑍇𑌨 𑌵𑌿𑌘𑍍𑌨𑍇𑌶𑍍𑌵𑌰𑌮𑌾𑌨𑌤𑍋𑌽𑌸𑍍𑌮𑌿 ॥ 𑍭6 ॥

𑌉𑌤𑍍𑌥𑌾𑌯 𑌵𑌿𑌘𑍍𑌨𑍇𑌶𑍍𑌵𑌰 𑌏𑌵 𑌤𑌸𑍍𑌮𑌾-
-𑌦𑍍𑌗𑌤𑌸𑍍𑌤𑌤𑌸𑍍𑌤𑍍𑌵𑌂𑌤𑌰𑌧𑌾𑌨𑌶𑌕𑍍𑌤𑍍𑌯𑌾 ।
𑌶𑌿𑌵𑌾𑌦𑌯𑌸𑍍𑌤𑌂 𑌪𑍍𑌰𑌣𑌿𑌪𑌤𑍍𑌯 𑌸𑌰𑍍𑌵𑍇
𑌗𑌤𑌾𑌃 𑌸𑍁𑌚𑌿𑌤𑍍𑌤𑍇𑌨 𑌚 𑌚𑌿𑌂𑌤𑌯𑌾𑌮𑌿 ॥ 𑍭𑍭 ॥

𑌸𑌰𑍍𑌵𑌾𑌨𑍍𑌨𑌮𑌸𑍍𑌕𑍃𑌤𑍍𑌯 𑌤𑌤𑍋𑌽𑌹𑌮𑍇𑌵
𑌭𑌜𑌾𑌮𑌿 𑌚𑌿𑌤𑍍𑌤𑍇𑌨 𑌗𑌣𑌾𑌧𑌿𑌪𑌂 𑌤𑌮𑍍 ।
𑌸𑍍𑌵𑌸𑍍𑌥𑌾𑌨𑌮𑌾𑌗𑌤𑍍𑌯 𑌮𑌹𑌾𑌨𑍁𑌭𑌾𑌵𑍈-
-𑌰𑍍𑌭𑌕𑍍𑌤𑍈𑌰𑍍𑌗𑌣𑍇𑌶𑌸𑍍𑌯 𑌚 𑌖𑍇𑌲𑌯𑌾𑌮𑌿 ॥ 𑍭𑍮 ॥

𑌏𑌵𑌂 𑌤𑍍𑌰𑌿𑌕𑌾𑌲𑍇𑌷𑍁 𑌗𑌣𑌾𑌧𑌿𑌪𑌂 𑌤𑌂
𑌚𑌿𑌤𑍍𑌤𑍇𑌨 𑌨𑌿𑌤𑍍𑌯𑌂 𑌪𑌰𑌿𑌪𑍂𑌜𑌯𑌾𑌮𑌿 ।
𑌤𑍇𑌨𑍈𑌵 𑌤𑍁𑌷𑍍𑌟𑌃 𑌪𑍍𑌰𑌦𑌦𑌾𑌤𑍁 𑌭𑌾𑌵𑌂
𑌵𑌿𑌶𑍍𑌵𑍇𑌶𑍍𑌵𑌰𑍋 𑌭𑌕𑍍𑌤𑌿𑌮𑌯𑌂 𑌤𑍁 𑌮𑌹𑍍𑌯𑌮𑍍 ॥ 𑍭𑍯 ॥

𑌗𑌣𑍇𑌶𑌪𑌾𑌦𑍋𑌦𑌕𑌪𑌾𑌨𑌕𑌂 𑌚
𑌹𑍍𑌯𑍁𑌚𑍍𑌛𑌿𑌷𑍍𑌟𑌗𑌂𑌧𑌸𑍍𑌯 𑌸𑍁𑌲𑍇𑌪𑌨𑌂 𑌤𑍁 ।
𑌨𑌿𑌰𑍍𑌮𑌾𑌲𑍍𑌯𑌸𑌂𑌧𑌾𑌰𑌣𑌕𑌂 𑌸𑍁𑌭𑍋𑌜𑍍𑌯𑌂
𑌲𑌂𑌬𑍋𑌦𑌰𑌸𑍍𑌯𑌾𑌸𑍍𑌤𑍁 𑌹𑌿 𑌭𑍁𑌕𑍍𑌤𑌶𑍇𑌷𑌮𑍍 ॥ 𑍮0 ॥

𑌯𑌂 𑌯𑌂 𑌕𑌰𑍋𑌮𑍍𑌯𑍇𑌵 𑌤𑌦𑍇𑌵 𑌦𑍀𑌕𑍍𑌷𑌾
𑌗𑌣𑍇𑌶𑍍𑌵𑌰𑌸𑍍𑌯𑌾𑌸𑍍𑌤𑍁 𑌸𑌦𑌾 𑌗𑌣𑍇𑌶 ।
𑌪𑍍𑌰𑌸𑍀𑌦 𑌨𑌿𑌤𑍍𑌯𑌂 𑌤𑌵 𑌪𑌾𑌦𑌭𑌕𑍍𑌤𑌂
𑌕𑍁𑌰𑍁𑌷𑍍𑌵 𑌮𑌾𑌂 𑌬𑍍𑌰𑌹𑍍𑌮𑌪𑌤𑍇 𑌦𑌯𑌾𑌲𑍋 ॥ 𑍮1 ॥

𑌤𑌤𑌸𑍍𑌤𑍁 𑌶𑌯𑍍𑌯𑌾𑌂 𑌪𑌰𑌿𑌕𑌲𑍍𑌪𑌯𑌾𑌮𑌿
𑌮𑌂𑌦𑌾𑌰𑌕𑌾𑌰𑍍𑌪𑌾𑌸𑌕𑌵𑌸𑍍𑌤𑍍𑌰𑌯𑍁𑌕𑍍𑌤𑌾𑌮𑍍 ।
𑌸𑍁𑌵𑌾𑌸𑌪𑍁𑌷𑍍𑌪𑌾𑌦𑌿𑌭𑌿𑌰𑌰𑍍𑌚𑌿𑌤𑌾𑌂
𑌤𑍇 𑌗𑍃𑌹𑌾𑌣 𑌨𑌿𑌦𑍍𑌰𑌾𑌂 𑌕𑍁𑌰𑍁 𑌵𑌿𑌘𑍍𑌨𑌰𑌾𑌜 ॥ 𑍮2 ॥

𑌸𑌿𑌦𑍍𑌧𑍍𑌯𑌾 𑌚 𑌬𑍁𑌦𑍍𑌧𑍍𑌯𑌾 𑌸𑌹𑌿𑌤𑌂 𑌗𑌣𑍇𑌶
𑌸𑍁𑌨𑌿𑌦𑍍𑌰𑌿𑌤𑌂 𑌵𑍀𑌕𑍍𑌷𑍍𑌯 𑌤𑌥𑌾𑌹𑌮𑍇𑌵 ।
𑌗𑌤𑍍𑌵𑌾 𑌸𑍍𑌵𑌵𑌾𑌸𑌂 𑌚 𑌕𑌰𑍋𑌮𑌿 𑌨𑌿𑌦𑍍𑌰𑌾𑌂
𑌧𑍍𑌯𑌾𑌤𑍍𑌵𑌾 𑌹𑍃𑌦𑌿 𑌬𑍍𑌰𑌹𑍍𑌮𑌪𑌤𑌿𑌂 𑌤𑌦𑍀𑌯𑌃 ॥ 𑍮3 ॥

𑌏𑌤𑌾𑌦𑍃𑌶𑌂 𑌸𑍌𑌖𑍍𑌯𑌮𑌮𑍋𑌘𑌶𑌕𑍍𑌤𑍇
𑌦𑍇𑌹𑌿 𑌪𑍍𑌰𑌭𑍋 𑌮𑌾𑌨𑌸𑌜𑌂 𑌗𑌣𑍇𑌶 ।
𑌮𑌹𑍍𑌯𑌂 𑌚 𑌤𑍇𑌨𑍈𑌵 𑌕𑍃𑌤𑌾𑌰𑍍𑌥𑌰𑍂𑌪𑍋
𑌭𑌵𑌾𑌮𑌿 𑌭𑌕𑍍𑌤𑌿𑌰𑌸𑌲𑌾𑌲𑌸𑍋𑌽𑌹𑌮𑍍 ॥ 𑍮4 ॥

𑌗𑌾𑌰𑍍𑌗𑍍𑌯 𑌉𑌵𑌾𑌚 ।
𑌏𑌵𑌂 𑌨𑌿𑌤𑍍𑌯𑌂 𑌮𑌹𑌾𑌰𑌾𑌜 𑌗𑍃𑌤𑍍𑌸𑌮𑌦𑍋 𑌮𑌹𑌾𑌯𑌶𑌾𑌃 ।
𑌚𑌕𑌾𑌰 𑌮𑌾𑌨𑌸𑍀𑌂 𑌪𑍂𑌜𑌾𑌂 𑌯𑍋𑌗𑍀𑌂𑌦𑍍𑌰𑌾𑌣𑌾𑌂 𑌗𑍁𑌰𑍁𑌃 𑌸𑍍𑌵𑌯𑌮𑍍 ॥ 𑍮5 ॥

𑌯 𑌏𑌤𑌾𑌂 𑌮𑌾𑌨𑌸𑍀𑌂 𑌪𑍂𑌜𑌾𑌂 𑌕𑌰𑌿𑌷𑍍𑌯𑌤𑌿 𑌨𑌰𑍋𑌤𑍍𑌤𑌮𑌃 ।
𑌪𑌠𑌿𑌷𑍍𑌯𑌤𑌿 𑌸𑌦𑌾 𑌸𑍋𑌽𑌪𑌿 𑌗𑌾𑌣𑌪𑌤𑍍𑌯𑍋 𑌭𑌵𑌿𑌷𑍍𑌯𑌤𑌿 ॥ 𑍮6 ॥

𑌶𑍍𑌰𑌾𑌵𑌯𑌿𑌷𑍍𑌯𑌤𑌿 𑌯𑍋 𑌮𑌰𑍍𑌤𑍍𑌯𑌃 𑌶𑍍𑌰𑍋𑌷𑍍𑌯𑌤𑍇 𑌭𑌾𑌵𑌸𑌂𑌯𑍁𑌤𑌃 ।
𑌸 𑌕𑍍𑌰𑌮𑍇𑌣 𑌮𑌹𑍀𑌪𑌾𑌲 𑌬𑍍𑌰𑌹𑍍𑌮𑌭𑍂𑌤𑍋 𑌭𑌵𑌿𑌷𑍍𑌯𑌤𑌿 ॥ 𑍮𑍭 ॥

𑌯𑌂 𑌯𑌮𑌿𑌚𑍍𑌛𑌤𑌿 𑌤𑌂 𑌤𑌂 𑌵𑍈 𑌸𑌫𑌲𑌂 𑌤𑌸𑍍𑌯 𑌜𑌾𑌯𑌤𑍇 ।
𑌅𑌂𑌤𑍇 𑌸𑍍𑌵𑌾𑌨𑌂𑌦𑌗𑌃 𑌸𑍋𑌽𑌪𑌿 𑌯𑍋𑌗𑌿𑌵𑌂𑌦𑍍𑌯𑍋 𑌭𑌵𑌿𑌷𑍍𑌯𑌤𑌿 ॥ 𑍮𑍮 ॥

𑌇𑌤𑌿 𑌶𑍍𑌰𑍀𑌮𑌦𑌾𑌂𑌤𑍍𑌯𑍇 𑌮𑍌𑌦𑍍𑌗𑌲𑍍𑌯𑍇 𑌗𑌣𑍇𑌶𑌮𑌾𑌨𑌸𑌪𑍂𑌜𑌾 𑌸𑌂𑌪𑍂𑌰𑍍𑌣𑌮𑍍 ।