𑌗𑌣𑍇𑌶 𑌭𑍁𑌜𑌂𑌗𑌮𑍍

𑌰𑌣𑌤𑍍𑌕𑍍𑌷𑍁𑌦𑍍𑌰𑌘𑌂𑌟𑌾𑌨𑌿𑌨𑌾𑌦𑌾𑌭𑌿𑌰𑌾𑌮𑌂
𑌚𑌲𑌤𑍍𑌤𑌾𑌂𑌡𑌵𑍋𑌦𑍍𑌦𑌂𑌡𑌵𑌤𑍍𑌪𑌦𑍍𑌮𑌤𑌾𑌲𑌮𑍍 ।
𑌲𑌸𑌤𑍍𑌤𑍁𑌂𑌦𑌿𑌲𑌾𑌂𑌗𑍋𑌪𑌰𑌿𑌵𑍍𑌯𑌾𑌲𑌹𑌾𑌰𑌂
𑌗𑌣𑌾𑌧𑍀𑌶𑌮𑍀𑌶𑌾𑌨𑌸𑍂𑌨𑍁𑌂 𑌤𑌮𑍀𑌡𑍇 ॥ 1 ॥

𑌧𑍍𑌵𑌨𑌿𑌧𑍍𑌵𑌂𑌸𑌵𑍀𑌣𑌾𑌲𑌯𑍋𑌲𑍍𑌲𑌾𑌸𑌿𑌵𑌕𑍍𑌤𑍍𑌰𑌂
𑌸𑍍𑌫𑍁𑌰𑌚𑍍𑌛𑍁𑌂𑌡𑌦𑌂𑌡𑍋𑌲𑍍𑌲𑌸𑌦𑍍𑌬𑍀𑌜𑌪𑍂𑌰𑌮𑍍 ।
𑌗𑌲𑌦𑍍𑌦𑌰𑍍𑌪𑌸𑍌𑌗𑌂𑌧𑍍𑌯𑌲𑍋𑌲𑌾𑌲𑌿𑌮𑌾𑌲𑌂
𑌗𑌣𑌾𑌧𑍀𑌶𑌮𑍀𑌶𑌾𑌨𑌸𑍂𑌨𑍁𑌂 𑌤𑌮𑍀𑌡𑍇 ॥ 2 ॥

𑌪𑍍𑌰𑌕𑌾𑌶𑌜𑍍𑌜𑌪𑌾𑌰𑌕𑍍𑌤𑌰𑌤𑍍𑌨𑌪𑍍𑌰𑌸𑍂𑌨-
𑌪𑍍𑌰𑌵𑌾𑌲𑌪𑍍𑌰𑌭𑌾𑌤𑌾𑌰𑍁𑌣𑌜𑍍𑌯𑍋𑌤𑌿𑌰𑍇𑌕𑌮𑍍 ।
𑌪𑍍𑌰𑌲𑌂𑌬𑍋𑌦𑌰𑌂 𑌵𑌕𑍍𑌰𑌤𑍁𑌂𑌡𑍈𑌕𑌦𑌂𑌤𑌂
𑌗𑌣𑌾𑌧𑍀𑌶𑌮𑍀𑌶𑌾𑌨𑌸𑍂𑌨𑍁𑌂 𑌤𑌮𑍀𑌡𑍇 ॥ 3 ॥

𑌵𑌿𑌚𑌿𑌤𑍍𑌰𑌸𑍍𑌫𑍁𑌰𑌦𑍍𑌰𑌤𑍍𑌨𑌮𑌾𑌲𑌾𑌕𑌿𑌰𑍀𑌟𑌂
𑌕𑌿𑌰𑍀𑌟𑍋𑌲𑍍𑌲𑌸𑌚𑍍𑌚𑌂𑌦𑍍𑌰𑌰𑍇𑌖𑌾𑌵𑌿𑌭𑍂𑌷𑌮𑍍 ।
𑌵𑌿𑌭𑍂𑌷𑍈𑌕𑌭𑍂𑌷𑌂 𑌭𑌵𑌧𑍍𑌵𑌂𑌸𑌹𑍇𑌤𑍁𑌂
𑌗𑌣𑌾𑌧𑍀𑌶𑌮𑍀𑌶𑌾𑌨𑌸𑍂𑌨𑍁𑌂 𑌤𑌮𑍀𑌡𑍇 ॥ 4 ॥

𑌉𑌦𑌂𑌚𑌦𑍍𑌭𑍁𑌜𑌾𑌵𑌲𑍍𑌲𑌰𑍀𑌦𑍃𑌶𑍍𑌯𑌮𑍂𑌲𑍋-
𑌚𑍍𑌚𑌲𑌦𑍍𑌭𑍍𑌰𑍂𑌲𑌤𑌾𑌵𑌿𑌭𑍍𑌰𑌮𑌭𑍍𑌰𑌾𑌜𑌦𑌕𑍍𑌷𑌮𑍍 ।
𑌮𑌰𑍁𑌤𑍍𑌸𑍁𑌂𑌦𑌰𑍀𑌚𑌾𑌮𑌰𑍈𑌃 𑌸𑍇𑌵𑍍𑌯𑌮𑌾𑌨𑌂
𑌗𑌣𑌾𑌧𑍀𑌶𑌮𑍀𑌶𑌾𑌨𑌸𑍂𑌨𑍁𑌂 𑌤𑌮𑍀𑌡𑍇 ॥ 5 ॥

𑌸𑍍𑌫𑍁𑌰𑌨𑍍𑌨𑌿𑌷𑍍𑌠𑍁𑌰𑌾𑌲𑍋𑌲𑌪𑌿𑌂𑌗𑌾𑌕𑍍𑌷𑌿𑌤𑌾𑌰𑌂
𑌕𑍃𑌪𑌾𑌕𑍋𑌮𑌲𑍋𑌦𑌾𑌰𑌲𑍀𑌲𑌾𑌵𑌤𑌾𑌰𑌮𑍍 ।
𑌕𑌲𑌾𑌬𑌿𑌂𑌦𑍁𑌗𑌂 𑌗𑍀𑌯𑌤𑍇 𑌯𑍋𑌗𑌿𑌵𑌰𑍍𑌯𑍈-
𑌰𑍍𑌗𑌣𑌾𑌧𑍀𑌶𑌮𑍀𑌶𑌾𑌨𑌸𑍂𑌨𑍁𑌂 𑌤𑌮𑍀𑌡𑍇 ॥ 6 ॥

𑌯𑌮𑍇𑌕𑌾𑌕𑍍𑌷𑌰𑌂 𑌨𑌿𑌰𑍍𑌮𑌲𑌂 𑌨𑌿𑌰𑍍𑌵𑌿𑌕𑌲𑍍𑌪𑌂
𑌗𑍁𑌣𑌾𑌤𑍀𑌤𑌮𑌾𑌨𑌂𑌦𑌮𑌾𑌕𑌾𑌰𑌶𑍂𑌨𑍍𑌯𑌮𑍍 ।
𑌪𑌰𑌂 𑌪𑌾𑌰𑌮𑍋𑌂𑌕𑌾𑌰𑌮𑌾𑌮𑍍𑌨𑌾𑌯𑌗𑌰𑍍𑌭𑌂
𑌵𑌦𑌂𑌤𑌿 𑌪𑍍𑌰𑌗𑌲𑍍𑌭𑌂 𑌪𑍁𑌰𑌾𑌣𑌂 𑌤𑌮𑍀𑌡𑍇 ॥ 𑍭 ॥

𑌚𑌿𑌦𑌾𑌨𑌂𑌦𑌸𑌾𑌂𑌦𑍍𑌰𑌾𑌯 𑌶𑌾𑌂𑌤𑌾𑌯 𑌤𑍁𑌭𑍍𑌯𑌂
𑌨𑌮𑍋 𑌵𑌿𑌶𑍍𑌵𑌕𑌰𑍍𑌤𑍍𑌰𑍇 𑌚 𑌹𑌰𑍍𑌤𑍍𑌰𑍇 𑌚 𑌤𑍁𑌭𑍍𑌯𑌮𑍍 ।
𑌨𑌮𑍋𑌽𑌨𑌂𑌤𑌲𑍀𑌲𑌾𑌯 𑌕𑍈𑌵𑌲𑍍𑌯𑌭𑌾𑌸𑍇
𑌨𑌮𑍋 𑌵𑌿𑌶𑍍𑌵𑌬𑍀𑌜 𑌪𑍍𑌰𑌸𑍀𑌦𑍇𑌶𑌸𑍂𑌨𑍋 ॥ 𑍮 ॥

𑌇𑌮𑌂 𑌸𑍁𑌸𑍍𑌤𑌵𑌂 𑌪𑍍𑌰𑌾𑌤𑌰𑍁𑌤𑍍𑌥𑌾𑌯 𑌭𑌕𑍍𑌤𑍍𑌯𑌾
𑌪𑌠𑍇𑌦𑍍𑌯𑌸𑍍𑌤𑍁 𑌮𑌰𑍍𑌤𑍍𑌯𑍋 𑌲𑌭𑍇𑌤𑍍𑌸𑌰𑍍𑌵𑌕𑌾𑌮𑌾𑌨𑍍 ।
𑌗𑌣𑍇𑌶𑌪𑍍𑌰𑌸𑌾𑌦𑍇𑌨 𑌸𑌿𑌦𑍍𑌧𑍍𑌯𑌂𑌤𑌿 𑌵𑌾𑌚𑍋
𑌗𑌣𑍇𑌶𑍇 𑌵𑌿𑌭𑍌 𑌦𑍁𑌰𑍍𑌲𑌭𑌂 𑌕𑌿𑌂 𑌪𑍍𑌰𑌸𑌨𑍍𑌨𑍇 ॥ 𑍯 ॥