𑌚𑌾𑌣𑌕𑍍𑌯 𑌨𑍀𑌤𑌿 – 𑌷𑍋𑌡𑌶𑍋𑌽𑌧𑍍𑌯𑌾𑌯𑌃

𑌨 𑌧𑍍𑌯𑌾𑌤𑌂 𑌪𑌦𑌮𑍀𑌶𑍍𑌵𑌰𑌸𑍍𑌯 𑌵𑌿𑌧𑌿𑌵𑌤𑍍𑌸𑌂𑌸𑌾𑌰𑌵𑌿𑌚𑍍𑌛𑌿𑌤𑍍𑌤𑌯𑍇
𑌸𑍍𑌵𑌰𑍍𑌗𑌦𑍍𑌵𑌾𑌰𑌕𑌪𑌾𑌟𑌪𑌾𑌟𑌨𑌪𑌟𑍁𑌰𑍍𑌧𑌰𑍍𑌮𑍋𑌽𑌪𑌿 𑌨𑍋𑌪𑌾𑌰𑍍𑌜𑌿𑌤𑌃 ।
𑌨𑌾𑌰𑍀𑌪𑍀𑌨𑌪𑌯𑍋𑌧𑌰𑍋𑌰𑍁𑌯𑍁𑌗𑌲𑌾 𑌸𑍍𑌵𑌪𑍍𑌨𑍇𑌽𑌪𑌿 𑌨𑌾𑌲𑌿𑌂𑌗𑌿𑌤𑌂
𑌮𑌾𑌤𑍁𑌃 𑌕𑍇𑌵𑌲𑌮𑍇𑌵 𑌯𑍌𑌵𑌨𑌵𑌨𑌚𑍍𑌛𑍇𑌦𑍇 𑌕𑍁𑌠𑌾𑌰𑌾 𑌵𑌯𑌮𑍍 ॥ 01 ॥

𑌜𑌲𑍍𑌪𑌂𑌤𑌿 𑌸𑌾𑌰𑍍𑌧𑌮𑌨𑍍𑌯𑍇𑌨 𑌪𑌶𑍍𑌯𑌂𑌤𑍍𑌯𑌨𑍍𑌯𑌂 𑌸𑌵𑌿𑌭𑍍𑌰𑌮𑌾𑌃 ।
𑌹𑍃𑌦𑌯𑍇 𑌚𑌿𑌂𑌤𑌯𑌂𑌤𑍍𑌯𑌨𑍍𑌯𑌂 𑌨 𑌸𑍍𑌤𑍍𑌰𑍀𑌣𑌾𑌮𑍇𑌕𑌤𑍋 𑌰𑌤𑌿𑌃 ॥ 02 ॥

𑌯𑍋 𑌮𑍋𑌹𑌾𑌨𑍍𑌮𑌨𑍍𑌯𑌤𑍇 𑌮𑍂𑌢𑍋 𑌰𑌕𑍍𑌤𑍇𑌯𑌂 𑌮𑌯𑌿 𑌕𑌾𑌮𑌿𑌨𑍀 ।
𑌸 𑌤𑌸𑍍𑌯𑌾 𑌵𑌶𑌗𑍋 𑌭𑍂𑌤𑍍𑌵𑌾 𑌨𑍃𑌤𑍍𑌯𑍇𑌤𑍍 𑌕𑍍𑌰𑍀𑌡𑌾𑌶𑌕𑍁𑌂𑌤𑌵𑌤𑍍 ॥ 03 ॥

𑌕𑍋𑌽𑌰𑍍𑌥𑌾𑌨𑍍𑌪𑍍𑌰𑌾𑌪𑍍𑌯 𑌨 𑌗𑌰𑍍𑌵𑌿𑌤𑍋 𑌵𑌿𑌷𑌯𑌿𑌣𑌃 𑌕𑌸𑍍𑌯𑌾𑌪𑌦𑍋𑌽𑌸𑍍𑌤𑌂 𑌗𑌤𑌾𑌃
𑌸𑍍𑌤𑍍𑌰𑍀𑌭𑌿𑌃 𑌕𑌸𑍍𑌯 𑌨 𑌖𑌂𑌡𑌿𑌤𑌂 𑌭𑍁𑌵𑌿 𑌮𑌨𑌃 𑌕𑍋 𑌨𑌾𑌮 𑌰𑌾𑌜𑌪𑍍𑌰𑌿𑌯𑌃 ।
𑌕𑌃 𑌕𑌾𑌲𑌸𑍍𑌯 𑌨 𑌗𑍋𑌚𑌰𑌤𑍍𑌵𑌮𑌗𑌮𑌤𑍍 𑌕𑍋𑌽𑌰𑍍𑌥𑍀 𑌗𑌤𑍋 𑌗𑍌𑌰𑌵𑌂
𑌕𑍋 𑌵𑌾 𑌦𑍁𑌰𑍍𑌜𑌨𑌦𑍁𑌰𑍍𑌗𑌮𑍇𑌷𑍁 𑌪𑌤𑌿𑌤𑌃 𑌕𑍍𑌷𑍇𑌮𑍇𑌣 𑌯𑌾𑌤𑌃 𑌪𑌥𑌿 ॥ 04 ॥

𑌨 𑌨𑌿𑌰𑍍𑌮𑌿𑌤𑍋 𑌨 𑌚𑍈𑌵 𑌨 𑌦𑍃𑌷𑍍𑌟𑌪𑍂𑌰𑍍𑌵𑍋
𑌨 𑌶𑍍𑌰𑍂𑌯𑌤𑍇 𑌹𑍇𑌮𑌮𑌯𑌃 𑌕𑍁𑌰𑌂𑌗𑌃 ।
𑌤𑌥𑌾𑌽𑌪𑌿 𑌤𑍃𑌷𑍍𑌣𑌾 𑌰𑌘𑍁𑌨𑌂𑌦𑌨𑌸𑍍𑌯
𑌵𑌿𑌨𑌾𑌶𑌕𑌾𑌲𑍇 𑌵𑌿𑌪𑌰𑍀𑌤𑌬𑍁𑌦𑍍𑌧𑌿𑌃 ॥ 05 ॥

𑌗𑍁𑌣𑍈𑌰𑍁𑌤𑍍𑌤𑌮𑌤𑌾𑌂 𑌯𑌾𑌤𑌿 𑌨𑍋𑌚𑍍𑌚𑍈𑌰𑌾𑌸𑌨𑌸𑌂𑌸𑍍𑌥𑌿𑌤𑌾𑌃 ।
𑌪𑍍𑌰𑌾𑌸𑌾𑌦𑌶𑌿𑌖𑌰𑌸𑍍𑌥𑍋𑌽𑌪𑌿 𑌕𑌾𑌕𑌃 𑌕𑌿𑌂 𑌗𑌰𑍁𑌡𑌾𑌯𑌤𑍇 ॥ 06 ॥

𑌗𑍁𑌣𑌾𑌃 𑌸𑌰𑍍𑌵𑌤𑍍𑌰 𑌪𑍂𑌜𑍍𑌯𑌂𑌤𑍇 𑌨 𑌮𑌹𑌤𑍍𑌯𑍋𑌽𑌪𑌿 𑌸𑌂𑌪𑌦𑌃 ।
𑌪𑍂𑌰𑍍𑌣𑍇𑌂𑌦𑍁𑌃 𑌕𑌿𑌂 𑌤𑌥𑌾 𑌵𑌂𑌦𑍍𑌯𑍋 𑌨𑌿𑌷𑍍𑌕𑌲𑌂𑌕𑍋 𑌯𑌥𑌾 𑌕𑍃𑌶𑌃 ॥ 0𑍭 ॥

𑌪𑌰𑍈𑌰𑍁𑌕𑍍𑌤𑌗𑍁𑌣𑍋 𑌯𑌸𑍍𑌤𑍁 𑌨𑌿𑌰𑍍𑌗𑍁𑌣𑍋𑌽𑌪𑌿 𑌗𑍁𑌣𑍀 𑌭𑌵𑍇𑌤𑍍 ।
𑌇𑌂𑌦𑍍𑌰𑍋𑌽𑌪𑌿 𑌲𑌘𑍁𑌤𑌾𑌂 𑌯𑌾𑌤𑌿 𑌸𑍍𑌵𑌯𑌂 𑌪𑍍𑌰𑌖𑍍𑌯𑌾𑌪𑌿𑌤𑍈𑌰𑍍𑌗𑍁𑌣𑍈𑌃 ॥ 0𑍮 ॥

𑌵𑌿𑌵𑍇𑌕𑌿𑌨𑌮𑌨𑍁𑌪𑍍𑌰𑌾𑌪𑍍𑌤𑌾 𑌗𑍁𑌣𑌾 𑌯𑌾𑌂𑌤𑌿 𑌮𑌨𑍋𑌜𑍍𑌞𑌤𑌾𑌮𑍍 ।
𑌸𑍁𑌤𑌰𑌾𑌂 𑌰𑌤𑍍𑌨𑌮𑌾𑌭𑌾𑌤𑌿 𑌚𑌾𑌮𑍀𑌕𑌰𑌨𑌿𑌯𑍋𑌜𑌿𑌤𑌮𑍍 ॥ 0𑍯 ॥

𑌗𑍁𑌣𑍈𑌃 𑌸𑌰𑍍𑌵𑌜𑍍𑌞𑌤𑍁𑌲𑍍𑌯𑍋𑌽𑌪𑌿 𑌸𑍀𑌦𑌤𑍍𑌯𑍇𑌕𑍋 𑌨𑌿𑌰𑌾𑌶𑍍𑌰𑌯𑌃 ।
𑌅𑌨𑌰𑍍𑌘𑍍𑌯𑌮𑌪𑌿 𑌮𑌾𑌣𑌿𑌕𑍍𑌯𑌂 𑌹𑍇𑌮𑌾𑌶𑍍𑌰𑌯𑌮𑌪𑍇𑌕𑍍𑌷𑌤𑍇 ॥ 10 ॥

𑌅𑌤𑌿𑌕𑍍𑌲𑍇𑌶𑍇𑌨 𑌯𑌦𑍍𑌦𑍍𑌰𑌵𑍍𑌯𑌮𑌤𑌿𑌲𑍋𑌭𑍇𑌨 𑌯𑌤𑍍𑌸𑍁𑌖𑌮𑍍 ।
𑌶𑌤𑍍𑌰𑍂𑌣𑌾𑌂 𑌪𑍍𑌰𑌣𑌿𑌪𑌾𑌤𑍇𑌨 𑌤𑍇 𑌹𑍍𑌯𑌰𑍍𑌥𑌾 𑌮𑌾 𑌭𑌵𑌂𑌤𑍁 𑌮𑍇 ॥ 11 ॥

𑌕𑌿𑌂 𑌤𑌯𑌾 𑌕𑍍𑌰𑌿𑌯𑌤𑍇 𑌲𑌕𑍍𑌷𑍍𑌮𑍍𑌯𑌾 𑌯𑌾 𑌵𑌧𑍂𑌰𑌿𑌵 𑌕𑍇𑌵𑌲𑌾 ।
𑌯𑌾 𑌤𑍁 𑌵𑍇𑌶𑍍𑌯𑍇𑌵 𑌸𑌾𑌮𑌾𑌨𑍍𑌯𑌾 𑌪𑌥𑌿𑌕𑍈𑌰𑌪𑌿 𑌭𑍁𑌜𑍍𑌯𑌤𑍇 ॥ 12 ॥

𑌧𑌨𑍇𑌷𑍁 𑌜𑍀𑌵𑌿𑌤𑌵𑍍𑌯𑍇𑌷𑍁 𑌸𑍍𑌤𑍍𑌰𑍀𑌷𑍁 𑌚𑌾𑌹𑌾𑌰𑌕𑌰𑍍𑌮𑌸𑍁 ।
𑌅𑌤𑍃𑌪𑍍𑌤𑌾𑌃 𑌪𑍍𑌰𑌾𑌣𑌿𑌨𑌃 𑌸𑌰𑍍𑌵𑍇 𑌯𑌾𑌤𑌾 𑌯𑌾𑌸𑍍𑌯𑌂𑌤𑌿 𑌯𑌾𑌂𑌤𑌿 𑌚 ॥ 13 ॥

𑌕𑍍𑌷𑍀𑌯𑌂𑌤𑍇 𑌸𑌰𑍍𑌵𑌦𑌾𑌨𑌾𑌨𑌿 𑌯𑌜𑍍𑌞𑌹𑍋𑌮𑌬𑌲𑌿𑌕𑍍𑌰𑌿𑌯𑌾𑌃 ।
𑌨 𑌕𑍍𑌷𑍀𑌯𑌤𑍇 𑌪𑌾𑌤𑍍𑌰𑌦𑌾𑌨𑌮𑌭𑌯𑌂 𑌸𑌰𑍍𑌵𑌦𑍇𑌹𑌿𑌨𑌾𑌮𑍍 ॥ 14 ॥

𑌤𑍃𑌣𑌂 𑌲𑌘𑍁 𑌤𑍃𑌣𑌾𑌤𑍍𑌤𑍂𑌲𑌂 𑌤𑍂𑌲𑌾𑌦𑌪𑌿 𑌚 𑌯𑌾𑌚𑌕𑌃 ।
𑌵𑌾𑌯𑍁𑌨𑌾 𑌕𑌿𑌂 𑌨 𑌨𑍀𑌤𑍋𑌽𑌸𑍌 𑌮𑌾𑌮𑌯𑌂 𑌯𑌾𑌚𑌯𑌿𑌷𑍍𑌯𑌤𑌿 ॥ 15 ॥

𑌵𑌰𑌂 𑌪𑍍𑌰𑌾𑌣𑌪𑌰𑌿𑌤𑍍𑌯𑌾𑌗𑍋 𑌮𑌾𑌨𑌭𑌂𑌗𑍇𑌨 𑌜𑍀𑌵𑌨𑌾𑌤𑍍 ।
𑌪𑍍𑌰𑌾𑌣𑌤𑍍𑌯𑌾𑌗𑍇 𑌕𑍍𑌷𑌣𑌂 𑌦𑍁𑌃𑌖𑌂 𑌮𑌾𑌨𑌭𑌂𑌗𑍇 𑌦𑌿𑌨𑍇 𑌦𑌿𑌨𑍇 ॥ 16 ॥

𑌪𑍍𑌰𑌿𑌯𑌵𑌾𑌕𑍍𑌯𑌪𑍍𑌰𑌦𑌾𑌨𑍇𑌨 𑌸𑌰𑍍𑌵𑍇 𑌤𑍁𑌷𑍍𑌯𑌂𑌤𑌿 𑌜𑌂𑌤𑌵𑌃 ।
𑌤𑌸𑍍𑌮𑌾𑌤𑍍𑌤𑌦𑍇𑌵 𑌵𑌕𑍍𑌤𑌵𑍍𑌯𑌂 𑌵𑌚𑌨𑍇 𑌕𑌾 𑌦𑌰𑌿𑌦𑍍𑌰𑌤𑌾 ॥ 1𑍭 ॥

𑌸𑌂𑌸𑌾𑌰𑌕𑌟𑍁𑌵𑍃𑌕𑍍𑌷𑌸𑍍𑌯 𑌦𑍍𑌵𑍇 𑌫𑌲𑍇𑌽𑌮𑍃𑌤𑍋𑌪𑌮𑍇 ।
𑌸𑍁𑌭𑌾𑌷𑌿𑌤𑌂 𑌚 𑌸𑍁𑌸𑍍𑌵𑌾𑌦𑍁 𑌸𑌂𑌗𑌤𑌿𑌃 𑌸𑌜𑍍𑌜𑌨𑍇 𑌜𑌨𑍇 ॥ 1𑍮 ॥

𑌜𑌨𑍍𑌮 𑌜𑌨𑍍𑌮 𑌯𑌦𑌭𑍍𑌯𑌸𑍍𑌤𑌂 𑌦𑌾𑌨𑌮𑌧𑍍𑌯𑌯𑌨𑌂 𑌤𑌪𑌃 ।
𑌤𑍇𑌨𑍈𑌵𑌾𑌽𑌭𑍍𑌯𑌾𑌸𑌯𑍋𑌗𑍇𑌨 𑌦𑍇𑌹𑍀 𑌚𑌾𑌭𑍍𑌯𑌸𑍍𑌯𑌤𑍇 𑌪𑍁𑌨𑌃 ॥ 1𑍯 ॥

𑌪𑍁𑌸𑍍𑌤𑌕𑌸𑍍𑌥𑌾 𑌤𑍁 𑌯𑌾 𑌵𑌿𑌦𑍍𑌯𑌾 𑌪𑌰𑌹𑌸𑍍𑌤𑌗𑌤𑌂 𑌧𑌨𑌮𑍍 ।
𑌕𑌾𑌰𑍍𑌯𑌕𑌾𑌲𑍇 𑌸𑌮𑍁𑌤𑍍𑌪𑌨𑍍𑌨𑍇 𑌨 𑌸𑌾 𑌵𑌿𑌦𑍍𑌯𑌾 𑌨 𑌤𑌦𑍍𑌧𑌨𑌮𑍍 ॥ 20 ॥