𑌚𑌾𑌣𑌕𑍍𑌯 𑌨𑍀𑌤𑌿 – 𑌚𑌤𑍁𑌰𑍍𑌦𑌶𑍋𑌽𑌧𑍍𑌯𑌾𑌯𑌃

𑌆𑌤𑍍𑌮𑌾𑌪𑌰𑌾𑌧𑌵𑍃𑌕𑍍𑌷𑌸𑍍𑌯 𑌫𑌲𑌾𑌨𑍍𑌯𑍇𑌤𑌾𑌨𑌿 𑌦𑍇𑌹𑌿𑌨𑌾𑌮𑍍 ।
𑌦𑌾𑌰𑌿𑌦𑍍𑌰𑍍𑌯𑌦𑍁𑌃𑌖𑌰𑍋𑌗𑌾𑌣𑌿 𑌬𑌂𑌧𑌨𑌵𑍍𑌯𑌸𑌨𑌾𑌨𑌿 𑌚 ॥ 01 ॥

𑌪𑍁𑌨𑌰𑍍𑌵𑌿𑌤𑍍𑌤𑌂 𑌪𑍁𑌨𑌰𑍍𑌮𑌿𑌤𑍍𑌰𑌂 𑌪𑍁𑌨𑌰𑍍𑌭𑌾𑌰𑍍𑌯𑌾 𑌪𑍁𑌨𑌰𑍍𑌮𑌹𑍀 ।
𑌏𑌤𑌤𑍍𑌸𑌰𑍍𑌵𑌂 𑌪𑍁𑌨𑌰𑍍𑌲𑌭𑍍𑌯𑌂 𑌨 𑌶𑌰𑍀𑌰𑌂 𑌪𑍁𑌨𑌃 𑌪𑍁𑌨𑌃 ॥ 02 ॥

𑌬𑌹𑍂𑌨𑌾𑌂 𑌚𑍈𑌵 𑌸𑌤𑍍𑌤𑍍𑌵𑌾𑌨𑌾𑌂 𑌸𑌮𑌵𑌾𑌯𑍋 𑌰𑌿𑌪𑍁𑌂𑌜𑌯𑌃 ।
𑌵𑌰𑍍𑌷𑌾𑌧𑌾𑌰𑌾𑌧𑌰𑍋 𑌮𑍇𑌘𑌸𑍍𑌤𑍃𑌣𑍈𑌰𑌪𑌿 𑌨𑌿𑌵𑌾𑌰𑍍𑌯𑌤𑍇 ॥ 03 ॥

𑌜𑌲𑍇 𑌤𑍈𑌲𑌂 𑌖𑌲𑍇 𑌗𑍁𑌹𑍍𑌯𑌂 𑌪𑌾𑌤𑍍𑌰𑍇 𑌦𑌾𑌨𑌂 𑌮𑌨𑌾𑌗𑌪𑌿 ।
𑌪𑍍𑌰𑌾𑌜𑍍𑌞𑍇 𑌶𑌾𑌸𑍍𑌤𑍍𑌰𑌂 𑌸𑍍𑌵𑌯𑌂 𑌯𑌾𑌤𑌿 𑌵𑌿𑌸𑍍𑌤𑌾𑌰𑌂 𑌵𑌸𑍍𑌤𑍁𑌶𑌕𑍍𑌤𑌿𑌤𑌃 ॥ 04 ॥

𑌧𑌰𑍍𑌮𑌾𑌖𑍍𑌯𑌾𑌨𑍇 𑌶𑍍𑌮𑌶𑌾𑌨𑍇 𑌚 𑌰𑍋𑌗𑌿𑌣𑌾𑌂 𑌯𑌾 𑌮𑌤𑌿𑌰𑍍𑌭𑌵𑍇𑌤𑍍 ।
𑌸𑌾 𑌸𑌰𑍍𑌵𑌦𑍈𑌵 𑌤𑌿𑌷𑍍𑌠𑍇𑌚𑍍𑌚𑍇𑌤𑍍𑌕𑍋 𑌨 𑌮𑍁𑌚𑍍𑌯𑍇𑌤 𑌬𑌂𑌧𑌨𑌾𑌤𑍍 ॥ 05 ॥

𑌉𑌤𑍍𑌪𑌨𑍍𑌨𑌪𑌶𑍍𑌚𑌾𑌤𑍍𑌤𑌾𑌪𑌸𑍍𑌯 𑌬𑍁𑌦𑍍𑌧𑌿𑌰𑍍𑌭𑌵𑌤𑌿 𑌯𑌾𑌦𑍃𑌶𑍀 ।
𑌤𑌾𑌦𑍃𑌶𑍀 𑌯𑌦𑌿 𑌪𑍂𑌰𑍍𑌵𑌂 𑌸𑍍𑌯𑌾𑌤𑍍𑌕𑌸𑍍𑌯 𑌨 𑌸𑍍𑌯𑌾𑌨𑍍𑌮𑌹𑍋𑌦𑌯𑌃 ॥ 06 ॥

𑌦𑌾𑌨𑍇 𑌤𑌪𑌸𑌿 𑌶𑍌𑌰𑍍𑌯𑍇 𑌵𑌾 𑌵𑌿𑌜𑍍𑌞𑌾𑌨𑍇 𑌵𑌿𑌨𑌯𑍇 𑌨𑌯𑍇 ।
𑌵𑌿𑌸𑍍𑌮𑌯𑍋 𑌨𑌹𑌿 𑌕𑌰𑍍𑌤𑌵𑍍𑌯𑍋 𑌬𑌹𑍁𑌰𑌤𑍍𑌨𑌾 𑌵𑌸𑍁𑌂𑌧𑌰𑌾 ॥ 0𑍭 ॥

𑌦𑍂𑌰𑌸𑍍𑌥𑍋𑌽𑌪𑌿 𑌨 𑌦𑍂𑌰𑌸𑍍𑌥𑍋 𑌯𑍋 𑌯𑌸𑍍𑌯 𑌮𑌨𑌸𑌿 𑌸𑍍𑌥𑌿𑌤𑌃 ।
𑌯𑍋 𑌯𑌸𑍍𑌯 𑌹𑍃𑌦𑌯𑍇 𑌨𑌾𑌸𑍍𑌤𑌿 𑌸𑌮𑍀𑌪𑌸𑍍𑌥𑍋𑌽𑌪𑌿 𑌦𑍂𑌰𑌤𑌃 ॥ 0𑍮 ॥

𑌯𑌸𑍍𑌮𑌾𑌚𑍍𑌚 𑌪𑍍𑌰𑌿𑌯𑌮𑌿𑌚𑍍𑌛𑍇𑌤𑍍𑌤𑍁 𑌤𑌸𑍍𑌯 𑌬𑍍𑌰𑍂𑌯𑌾𑌤𑍍𑌸𑌦𑌾 𑌪𑍍𑌰𑌿𑌯𑌮𑍍 ।
𑌵𑍍𑌯𑌾𑌧𑍋 𑌮𑍃𑌗𑌵𑌧𑌂 𑌕𑌰𑍍𑌤𑍁𑌂 𑌗𑍀𑌤𑌂 𑌗𑌾𑌯𑌤𑌿 𑌸𑍁𑌸𑍍𑌵𑌰𑌮𑍍 ॥ 0𑍯 ॥

𑌅𑌤𑍍𑌯𑌾𑌸𑌨𑍍𑌨𑌾 𑌵𑌿𑌨𑌾𑌶𑌾𑌯 𑌦𑍂𑌰𑌸𑍍𑌥𑌾 𑌨 𑌫𑌲𑌪𑍍𑌰𑌦𑌾 ।
𑌸𑍇𑌵𑍍𑌯𑌤𑌾𑌂 𑌮𑌧𑍍𑌯𑌭𑌾𑌵𑍇𑌨 𑌰𑌾𑌜𑌾 𑌵𑌹𑍍𑌨𑌿𑌰𑍍𑌗𑍁𑌰𑍁𑌃 𑌸𑍍𑌤𑍍𑌰𑌿𑌯𑌃 ॥ 10 ॥

𑌅𑌗𑍍𑌨𑌿𑌰𑌾𑌪𑌃 𑌸𑍍𑌤𑍍𑌰𑌿𑌯𑍋 𑌮𑍂𑌰𑍍𑌖𑌾𑌃 𑌸𑌰𑍍𑌪𑌾 𑌰𑌾𑌜𑌕𑍁𑌲𑌾𑌨𑌿 𑌚 ।
𑌨𑌿𑌤𑍍𑌯𑌂 𑌯𑌤𑍍𑌨𑍇𑌨 𑌸𑍇𑌵𑍍𑌯𑌾𑌨𑌿 𑌸𑌦𑍍𑌯𑌃 𑌪𑍍𑌰𑌾𑌣𑌹𑌰𑌾𑌣𑌿 𑌷𑌟𑍍 ॥ 11 ॥

𑌸 𑌜𑍀𑌵𑌤𑌿 𑌗𑍁𑌣𑌾 𑌯𑌸𑍍𑌯 𑌯𑌸𑍍𑌯 𑌧𑌰𑍍𑌮𑌃 𑌸 𑌜𑍀𑌵𑌤𑌿 ।
𑌗𑍁𑌣𑌧𑌰𑍍𑌮𑌵𑌿𑌹𑍀𑌨𑌸𑍍𑌯 𑌜𑍀𑌵𑌿𑌤𑌂 𑌨𑌿𑌷𑍍𑌪𑍍𑌰𑌯𑍋𑌜𑌨𑌮𑍍 ॥ 12 ॥

𑌯𑌦𑍀𑌚𑍍𑌛𑌸𑌿 𑌵𑌶𑍀𑌕𑌰𑍍𑌤𑍁𑌂 𑌜𑌗𑌦𑍇𑌕𑍇𑌨 𑌕𑌰𑍍𑌮𑌣𑌾 ।
𑌪𑍁𑌰𑌾 𑌪𑌂𑌚𑌦𑌶𑌾𑌸𑍍𑌯𑍇𑌭𑍍𑌯𑍋 𑌗𑌾𑌂 𑌚𑌰𑌂𑌤𑍀 𑌨𑌿𑌵𑌾𑌰𑌯 ॥ 13 ॥

𑌪𑍍𑌰𑌸𑍍𑌤𑌾𑌵𑌸𑌦𑍃𑌶𑌂 𑌵𑌾𑌕𑍍𑌯𑌂 𑌪𑍍𑌰𑌭𑌾𑌵𑌸𑌦𑍃𑌶𑌂 𑌪𑍍𑌰𑌿𑌯𑌮𑍍 ।
𑌆𑌤𑍍𑌮𑌶𑌕𑍍𑌤𑌿𑌸𑌮𑌂 𑌕𑍋𑌪𑌂 𑌯𑍋 𑌜𑌾𑌨𑌾𑌤𑌿 𑌸 𑌪𑌂𑌡𑌿𑌤𑌃 ॥ 14 ॥

𑌏𑌕 𑌏𑌵 𑌪𑌦𑌾𑌰𑍍𑌥𑌸𑍍𑌤𑍁 𑌤𑍍𑌰𑌿𑌧𑌾 𑌭𑌵𑌤𑌿 𑌵𑍀𑌕𑍍𑌷𑌿𑌤𑌃 ।
𑌕𑍁𑌣𑌪𑌂 𑌕𑌾𑌮𑌿𑌨𑍀 𑌮𑌾𑌂𑌸𑌂 𑌯𑍋𑌗𑌿𑌭𑌿𑌃 𑌕𑌾𑌮𑌿𑌭𑌿𑌃 𑌶𑍍𑌵𑌭𑌿𑌃 ॥ 15 ॥

𑌸𑍁𑌸𑌿𑌦𑍍𑌧𑌮𑍌𑌷𑌧𑌂 𑌧𑌰𑍍𑌮𑌂 𑌗𑍃𑌹𑌚𑍍𑌛𑌿𑌦𑍍𑌰𑌂 𑌚 𑌮𑍈𑌥𑍁𑌨𑌮𑍍 ।
𑌕𑍁𑌭𑍁𑌕𑍍𑌤𑌂 𑌕𑍁𑌶𑍍𑌰𑍁𑌤𑌂 𑌚𑍈𑌵 𑌮𑌤𑌿𑌮𑌾𑌨𑍍𑌨 𑌪𑍍𑌰𑌕𑌾𑌶𑌯𑍇𑌤𑍍 ॥ 16 ॥

𑌤𑌾𑌵𑌨𑍍𑌮𑍌𑌨𑍇𑌨 𑌨𑍀𑌯𑌂𑌤𑍇 𑌕𑍋𑌕𑌿𑌲𑍈𑌶𑍍𑌚𑍈𑌵 𑌵𑌾𑌸𑌰𑌾𑌃 ।
𑌯𑌾𑌵𑌤𑍍𑌸𑌰𑍍𑌵𑌜𑌨𑌾𑌨𑌂𑌦𑌦𑌾𑌯𑌿𑌨𑍀 𑌵𑌾𑌕𑍍𑌪𑍍𑌰𑌵𑌰𑍍𑌤𑌤𑍇 ॥ 1𑍭 ॥

𑌧𑌰𑍍𑌮𑌂 𑌧𑌨𑌂 𑌚 𑌧𑌾𑌨𑍍𑌯𑌂 𑌚 𑌗𑍁𑌰𑍋𑌰𑍍𑌵𑌚𑌨𑌮𑍌𑌷𑌧𑌮𑍍 ।
𑌸𑍁𑌗𑍃𑌹𑍀𑌤𑌂 𑌚 𑌕𑌰𑍍𑌤𑌵𑍍𑌯𑌮𑌨𑍍𑌯𑌥𑌾 𑌤𑍁 𑌨 𑌜𑍀𑌵𑌤𑌿 ॥ 1𑍮 ॥

𑌤𑍍𑌯𑌜 𑌦𑍁𑌰𑍍𑌜𑌨𑌸𑌂𑌸𑌰𑍍𑌗𑌂 𑌭𑌜 𑌸𑌾𑌧𑍁𑌸𑌮𑌾𑌗𑌮𑌮𑍍 ।
𑌕𑍁𑌰𑍁 𑌪𑍁𑌣𑍍𑌯𑌮𑌹𑍋𑌰𑌾𑌤𑍍𑌰𑌂 𑌸𑍍𑌮𑌰 𑌨𑌿𑌤𑍍𑌯𑌮𑌨𑌿𑌤𑍍𑌯𑌤𑌃 ॥ 1𑍯 ॥