𑌚𑌾𑌣𑌕𑍍𑌯 𑌨𑍀𑌤𑌿 – 𑌦𑍍𑌵𑌾𑌦𑌶𑍋𑌽𑌧𑍍𑌯𑌾𑌯𑌃

𑌸𑌾𑌨𑌂𑌦𑌂 𑌸𑌦𑌨𑌂 𑌸𑍁𑌤𑌾𑌸𑍍𑌤𑍁 𑌸𑍁𑌧𑌿𑌯𑌃 𑌕𑌾𑌂𑌤𑌾 𑌪𑍍𑌰𑌿𑌯𑌾𑌲𑌾𑌪𑌿𑌨𑍀
𑌇𑌚𑍍𑌛𑌾𑌪𑍂𑌰𑍍𑌤𑌿𑌧𑌨𑌂 𑌸𑍍𑌵𑌯𑍋𑌷𑌿𑌤𑌿 𑌰𑌤𑌿𑌃 𑌸𑍍𑌵𑌾𑌜𑍍𑌞𑌾𑌪𑌰𑌾𑌃 𑌸𑍇𑌵𑌕𑌾𑌃 ।
𑌆𑌤𑌿𑌥𑍍𑌯𑌂 𑌶𑌿𑌵𑌪𑍂𑌜𑌨𑌂 𑌪𑍍𑌰𑌤𑌿𑌦𑌿𑌨𑌂 𑌮𑌿𑌷𑍍𑌟𑌾𑌨𑍍𑌨𑌪𑌾𑌨𑌂 𑌗𑍃𑌹𑍇
𑌸𑌾𑌧𑍋𑌃 𑌸𑌂𑌗𑌮𑍁𑌪𑌾𑌸𑌤𑍇 𑌚 𑌸𑌤𑌤𑌂 𑌧𑌨𑍍𑌯𑍋 𑌗𑍃𑌹𑌸𑍍𑌥𑌾𑌶𑍍𑌰𑌮𑌃 ॥ 01 ॥

𑌆𑌰𑍍𑌤𑍇𑌷𑍁 𑌵𑌿𑌪𑍍𑌰𑍇𑌷𑍁 𑌦𑌯𑌾𑌨𑍍𑌵𑌿𑌤𑌶𑍍𑌚
𑌯𑌚𑍍𑌛𑍍𑌰𑌦𑍍𑌧𑌯𑌾 𑌸𑍍𑌵𑌲𑍍𑌪𑌮𑍁𑌪𑍈𑌤𑌿 𑌦𑌾𑌨𑌮𑍍 ।
𑌅𑌨𑌂𑌤𑌪𑌾𑌰𑌮𑍁𑌪𑍈𑌤𑌿 𑌰𑌾𑌜𑌨𑍍
𑌯𑌦𑍍𑌦𑍀𑌯𑌤𑍇 𑌤𑌨𑍍𑌨 𑌲𑌭𑍇𑌦𑍍𑌦𑍍𑌵𑌿𑌜𑍇𑌭𑍍𑌯𑌃 ॥ 02 ॥

𑌦𑌾𑌕𑍍𑌷𑌿𑌣𑍍𑌯𑌂 𑌸𑍍𑌵𑌜𑌨𑍇 𑌦𑌯𑌾 𑌪𑌰𑌜𑌨𑍇 𑌶𑌾𑌠𑍍𑌯𑌂 𑌸𑌦𑌾 𑌦𑍁𑌰𑍍𑌜𑌨𑍇
𑌪𑍍𑌰𑍀𑌤𑌿𑌃 𑌸𑌾𑌧𑍁𑌜𑌨𑍇 𑌸𑍍𑌮𑌯𑌃 𑌖𑌲𑌜𑌨𑍇 𑌵𑌿𑌦𑍍𑌵𑌜𑍍𑌜𑌨𑍇 𑌚𑌾𑌰𑍍𑌜𑌵𑌮𑍍 ।
𑌶𑍌𑌰𑍍𑌯𑌂 𑌶𑌤𑍍𑌰𑍁𑌜𑌨𑍇 𑌕𑍍𑌷𑌮𑌾 𑌗𑍁𑌰𑍁𑌜𑌨𑍇 𑌨𑌾𑌰𑍀𑌜𑌨𑍇 𑌧𑍂𑌰𑍍𑌤𑌤𑌾
𑌇𑌤𑍍𑌥𑌂 𑌯𑍇 𑌪𑍁𑌰𑍁𑌷𑌾 𑌕𑌲𑌾𑌸𑍁 𑌕𑍁𑌶𑌲𑌾𑌸𑍍𑌤𑍇𑌷𑍍𑌵𑍇𑌵 𑌲𑍋𑌕𑌸𑍍𑌥𑌿𑌤𑌿𑌃 ॥ 03 ॥

𑌹𑌸𑍍𑌤𑍌 𑌦𑌾𑌨𑌵𑌿𑌵𑌰𑍍𑌜𑌿𑌤𑍌 𑌶𑍍𑌰𑍁𑌤𑌿𑌪𑍁𑌟𑍌 𑌸𑌾𑌰𑌸𑍍𑌵𑌤𑌦𑍍𑌰𑍋𑌹𑌿𑌣𑍌
𑌨𑍇𑌤𑍍𑌰𑍇 𑌸𑌾𑌧𑍁𑌵𑌿𑌲𑍋𑌕𑌨𑍇𑌨 𑌰𑌹𑌿𑌤𑍇 𑌪𑌾𑌦𑍌 𑌨 𑌤𑍀𑌰𑍍𑌥𑌂 𑌗𑌤𑍌 ।
𑌅𑌨𑍍𑌯𑌾𑌯𑌾𑌰𑍍𑌜𑌿𑌤𑌵𑌿𑌤𑍍𑌤𑌪𑍂𑌰𑍍𑌣𑌮𑍁𑌦𑌰𑌂 𑌗𑌰𑍍𑌵𑍇𑌣 𑌤𑍁𑌂𑌗𑌂 𑌶𑌿𑌰𑍋
𑌰𑍇 𑌰𑍇 𑌜𑌂𑌬𑍁𑌕 𑌮𑍁𑌂𑌚 𑌮𑍁𑌂𑌚 𑌸𑌹𑌸𑌾 𑌨𑍀𑌚𑌂 𑌸𑍁𑌨𑌿𑌂𑌦𑍍𑌯𑌂 𑌵𑌪𑍁𑌃 ॥ 04 ॥

𑌯𑍇𑌷𑌾𑌂 𑌶𑍍𑌰𑍀𑌮𑌦𑍍𑌯𑌶𑍋𑌦𑌾𑌸𑍁𑌤𑌪𑌦𑌕𑌮𑌲𑍇 𑌨𑌾𑌸𑍍𑌤𑌿 𑌭𑌕𑍍𑌤𑌿𑌰𑍍𑌨𑌰𑌾𑌣𑌾𑌂
𑌯𑍇𑌷𑌾𑌮𑌾𑌭𑍀𑌰𑌕𑌨𑍍𑌯𑌾𑌪𑍍𑌰𑌿𑌯𑌗𑍁𑌣𑌕𑌥𑌨𑍇 𑌨𑌾𑌨𑍁𑌰𑌕𑍍𑌤𑌾 𑌰𑌸𑌜𑍍𑌞𑌾 ।
𑌯𑍇𑌷𑌾𑌂 𑌶𑍍𑌰𑍀𑌕𑍃𑌷𑍍𑌣𑌲𑍀𑌲𑌾𑌲𑌲𑌿𑌤𑌰𑌸𑌕𑌥𑌾𑌸𑌾𑌦𑌰𑍌 𑌨𑍈𑌵 𑌕𑌰𑍍𑌣𑍌
𑌧𑌿𑌕𑍍 𑌤𑌾𑌨𑍍 𑌧𑌿𑌕𑍍 𑌤𑌾𑌨𑍍 𑌧𑌿𑌗𑍇𑌤𑌾𑌨𑍍 𑌕𑌥𑌯𑌤𑌿 𑌸𑌤𑌤𑌂 𑌕𑍀𑌰𑍍𑌤𑌨𑌸𑍍𑌥𑍋 𑌮𑍃𑌦𑌂𑌗𑌃 ॥ 05 ॥

𑌪𑌤𑍍𑌰𑌂 𑌨𑍈𑌵 𑌯𑌦𑌾 𑌕𑌰𑍀𑌲𑌵𑌿𑌟𑌪𑍇 𑌦𑍋𑌷𑍋 𑌵𑌸𑌂𑌤𑌸𑍍𑌯 𑌕𑌿𑌂
𑌨𑍋𑌲𑍂𑌕𑍋𑌽𑌪𑍍𑌯𑌵𑌲𑍋𑌕𑌤𑍇 𑌯𑌦𑌿 𑌦𑌿𑌵𑌾 𑌸𑍂𑌰𑍍𑌯𑌸𑍍𑌯 𑌕𑌿𑌂 𑌦𑍂𑌷𑌣𑌮𑍍 ।
𑌵𑌰𑍍𑌷𑌾 𑌨𑍈𑌵 𑌪𑌤𑌂𑌤𑌿 𑌚𑌾𑌤𑌕𑌮𑍁𑌖𑍇 𑌮𑍇𑌘𑌸𑍍𑌯 𑌕𑌿𑌂 𑌦𑍂𑌷𑌣𑌂
𑌯𑌤𑍍𑌪𑍂𑌰𑍍𑌵𑌂 𑌵𑌿𑌧𑌿𑌨𑌾 𑌲𑌲𑌾𑌟𑌲𑌿𑌖𑌿𑌤𑌂 𑌤𑌨𑍍𑌮𑌾𑌰𑍍𑌜𑌿𑌤𑍁𑌂 𑌕𑌃 𑌕𑍍𑌷𑌮𑌃 ॥ 06 ॥

𑌸𑌤𑍍𑌸𑌂𑌗𑌾𑌦𑍍𑌭𑌵𑌤𑌿 𑌹𑌿 𑌸𑌾𑌧𑍁𑌨𑌾 𑌖𑌲𑌾𑌨𑌾𑌂
𑌸𑌾𑌧𑍂𑌨𑌾𑌂 𑌨 𑌹𑌿 𑌖𑌲𑌸𑌂𑌗𑌤𑌃 𑌖𑌲𑌤𑍍𑌵𑌮𑍍 ।
𑌆𑌮𑍋𑌦𑌂 𑌕𑍁𑌸𑍁𑌮𑌭𑌵𑌂 𑌮𑍃𑌦𑍇𑌵 𑌧𑌤𑍍𑌤𑍇
𑌮𑍃𑌦𑍍𑌗𑌂𑌧𑌂 𑌨𑌹𑌿 𑌕𑍁𑌸𑍁𑌮𑌾𑌨𑌿 𑌧𑌾𑌰𑌯𑌂𑌤𑌿 ॥ 0𑍭 ॥

𑌸𑌾𑌧𑍂𑌨𑌾𑌂 𑌦𑌰𑍍𑌶𑌨𑌂 𑌪𑍁𑌣𑍍𑌯𑌂 𑌤𑍀𑌰𑍍𑌥𑌭𑍂𑌤𑌾 𑌹𑌿 𑌸𑌾𑌧𑌵𑌃 ।
𑌕𑌾𑌲𑍇𑌨 𑌫𑌲𑌤𑍇 𑌤𑍀𑌰𑍍𑌥𑌂 𑌸𑌦𑍍𑌯𑌃 𑌸𑌾𑌧𑍁𑌸𑌮𑌾𑌗𑌮𑌃 ॥ 0𑍮 ॥

𑌵𑌿𑌪𑍍𑌰𑌾𑌸𑍍𑌮𑌿𑌨𑍍𑌨𑌗𑌰𑍇 𑌮𑌹𑌾𑌨𑍍𑌕𑌥𑌯 𑌕𑌸𑍍𑌤𑌾𑌲𑌦𑍍𑌰𑍁𑌮𑌾𑌣𑌾𑌂 𑌗𑌣𑌃
𑌕𑍋 𑌦𑌾𑌤𑌾 𑌰𑌜𑌕𑍋 𑌦𑌦𑌾𑌤𑌿 𑌵𑌸𑌨𑌂 𑌪𑍍𑌰𑌾𑌤𑌰𑍍𑌗𑍃𑌹𑍀𑌤𑍍𑌵𑌾 𑌨𑌿𑌶𑌿 ।
𑌕𑍋 𑌦𑌕𑍍𑌷𑌃 𑌪𑌰𑌵𑌿𑌤𑍍𑌤𑌦𑌾𑌰𑌹𑌰𑌣𑍇 𑌸𑌰𑍍𑌵𑍋𑌽𑌪𑌿 𑌦𑌕𑍍𑌷𑍋 𑌜𑌨𑌃
𑌕𑌸𑍍𑌮𑌾𑌜𑍍𑌜𑍀𑌵𑌸𑌿 𑌹𑍇 𑌸𑌖𑍇 𑌵𑌿𑌷𑌕𑍃𑌮𑌿𑌨𑍍𑌯𑌾𑌯𑍇𑌨 𑌜𑍀𑌵𑌾𑌮𑍍𑌯𑌹𑌮𑍍 ॥ 0𑍯 ॥

𑌨 𑌵𑌿𑌪𑍍𑌰𑌪𑌾𑌦𑍋𑌦𑌕𑌕𑌰𑍍𑌦𑌮𑌾𑌣𑌿
𑌨 𑌵𑍇𑌦𑌶𑌾𑌸𑍍𑌤𑍍𑌰𑌧𑍍𑌵𑌨𑌿𑌗𑌰𑍍𑌜𑌿𑌤𑌾𑌨𑌿 ।
𑌸𑍍𑌵𑌾𑌹𑌾𑌸𑍍𑌵𑌧𑌾𑌕𑌾𑌰𑌵𑌿𑌵𑌰𑍍𑌜𑌿𑌤𑌾𑌨𑌿
𑌶𑍍𑌮𑌶𑌾𑌨𑌤𑍁𑌲𑍍𑌯𑌾𑌨𑌿 𑌗𑍃𑌹𑌾𑌣𑌿 𑌤𑌾𑌨𑌿 ॥ 10 ॥

𑌸𑌤𑍍𑌯𑌂 𑌮𑌾𑌤𑌾 𑌪𑌿𑌤𑌾 𑌜𑍍𑌞𑌾𑌨𑌂 𑌧𑌰𑍍𑌮𑍋 𑌭𑍍𑌰𑌾𑌤𑌾 𑌦𑌯𑌾 𑌸𑌖𑌾 ।
𑌶𑌾𑌂𑌤𑌿𑌃 𑌪𑌤𑍍𑌨𑍀 𑌕𑍍𑌷𑌮𑌾 𑌪𑍁𑌤𑍍𑌰𑌃 𑌷𑌡𑍇𑌤𑍇 𑌮𑌮 𑌬𑌾𑌂𑌧𑌵𑌾𑌃 ॥ 11 ॥

𑌅𑌨𑌿𑌤𑍍𑌯𑌾𑌨𑌿 𑌶𑌰𑍀𑌰𑌾𑌣𑌿 𑌵𑌿𑌭𑌵𑍋 𑌨𑍈𑌵 𑌶𑌾𑌶𑍍𑌵𑌤𑌃 ।
𑌨𑌿𑌤𑍍𑌯𑌂 𑌸𑌂𑌨𑌿𑌹𑌿𑌤𑍋 𑌮𑍃𑌤𑍍𑌯𑍁𑌃 𑌕𑌰𑍍𑌤𑌵𑍍𑌯𑍋 𑌧𑌰𑍍𑌮𑌸𑌂𑌗𑍍𑌰𑌹𑌃 ॥ 12 ॥

𑌨𑌿𑌮𑌂𑌤𑍍𑌰𑍋𑌤𑍍𑌸𑌵𑌾 𑌵𑌿𑌪𑍍𑌰𑌾 𑌗𑌾𑌵𑍋 𑌨𑌵𑌤𑍃𑌣𑍋𑌤𑍍𑌸𑌵𑌾𑌃 ।
𑌪𑌤𑍍𑌯𑍁𑌤𑍍𑌸𑌾𑌹𑌯𑍁𑌤𑌾 𑌭𑌾𑌰𑍍𑌯𑌾 𑌅𑌹𑌂 𑌕𑍃𑌷𑍍𑌣𑌚𑌰𑌣𑍋𑌤𑍍𑌸𑌵𑌃 ॥ 13 ॥

𑌮𑌾𑌤𑍃𑌵𑌤𑍍𑌪𑌰𑌦𑌾𑌰𑍇𑌷𑍁 𑌪𑌰𑌦𑍍𑌰𑌵𑍍𑌯𑍇𑌷𑍁 𑌲𑍋𑌷𑍍𑌟𑍍𑌰𑌵𑌤𑍍 ।
𑌆𑌤𑍍𑌮𑌵𑌤𑍍𑌸𑌰𑍍𑌵𑌭𑍂𑌤𑍇𑌷𑍁 𑌯𑌃 𑌪𑌶𑍍𑌯𑌤𑌿 𑌸 𑌪𑌂𑌡𑌿𑌤𑌃 ॥ 14 ॥

𑌧𑌰𑍍𑌮𑍇 𑌤𑌤𑍍𑌪𑌰𑌤𑌾 𑌮𑍁𑌖𑍇 𑌮𑌧𑍁𑌰𑌤𑌾 𑌦𑌾𑌨𑍇 𑌸𑌮𑍁𑌤𑍍𑌸𑌾𑌹𑌤𑌾
𑌮𑌿𑌤𑍍𑌰𑍇𑌽𑌵𑌂𑌚𑌕𑌤𑌾 𑌗𑍁𑌰𑍌 𑌵𑌿𑌨𑌯𑌤𑌾 𑌚𑌿𑌤𑍍𑌤𑍇𑌽𑌤𑌿𑌮𑌭𑍀𑌰𑌤𑌾 ।
𑌆𑌚𑌾𑌰𑍇 𑌶𑍁𑌚𑌿𑌤𑌾 𑌗𑍁𑌣𑍇 𑌰𑌸𑌿𑌕𑌤𑌾 𑌶𑌾𑌸𑍍𑌤𑍍𑌰𑍇𑌷𑍁 𑌵𑌿𑌜𑍍𑌞𑌾𑌨𑌤𑌾
𑌰𑍂𑌪𑍇 𑌸𑍁𑌂𑌦𑌰𑌤𑌾 𑌶𑌿𑌵𑍇 𑌭𑌜𑌨𑌤𑌾 𑌤𑍍𑌵𑌯𑍍𑌯𑌸𑍍𑌤𑌿 𑌭𑍋 𑌰𑌾𑌘𑌵 ॥ 15 ॥

𑌕𑌾𑌷𑍍𑌠𑌂 𑌕𑌲𑍍𑌪𑌤𑌰𑍁𑌃 𑌸𑍁𑌮𑍇𑌰𑍁𑌚𑌲𑌶𑍍𑌚𑌿𑌂𑌤𑌾𑌮𑌣𑌿𑌃 𑌪𑍍𑌰𑌸𑍍𑌤𑌰𑌃
𑌸𑍂𑌰𑍍𑌯𑌾𑌸𑍍𑌤𑍀𑌵𑍍𑌰𑌕𑌰𑌃 𑌶𑌶𑍀 𑌕𑍍𑌷𑌯𑌕𑌰𑌃 𑌕𑍍𑌷𑌾𑌰𑍋 𑌹𑌿 𑌵𑌾𑌰𑌾𑌂 𑌨𑌿𑌧𑌿𑌃 ।
𑌕𑌾𑌮𑍋 𑌨𑌷𑍍𑌟𑌤𑌨𑍁𑌰𑍍𑌵𑌲𑌿𑌰𑍍𑌦𑌿𑌤𑌿𑌸𑍁𑌤𑍋 𑌨𑌿𑌤𑍍𑌯𑌂 𑌪𑌶𑍁𑌃 𑌕𑌾𑌮𑌗𑍌-
𑌰𑍍𑌨𑍈𑌤𑌾𑌂𑌸𑍍𑌤𑍇 𑌤𑍁𑌲𑌯𑌾𑌮𑌿 𑌭𑍋 𑌰𑌘𑍁𑌪𑌤𑍇 𑌕𑌸𑍍𑌯𑍋𑌪𑌮𑌾 𑌦𑍀𑌯𑌤𑍇 ॥ 16 ॥

𑌵𑌿𑌦𑍍𑌯𑌾 𑌮𑌿𑌤𑍍𑌰𑌂 𑌪𑍍𑌰𑌵𑌾𑌸𑍇 𑌚 𑌭𑌾𑌰𑍍𑌯𑌾 𑌮𑌿𑌤𑍍𑌰𑌂 𑌗𑍃𑌹𑍇𑌷𑍁 𑌚 ।
𑌵𑍍𑌯𑌾𑌧𑌿𑌤𑌸𑍍𑌯𑍌𑌷𑌧𑌂 𑌮𑌿𑌤𑍍𑌰𑌂 𑌧𑌰𑍍𑌮𑍋 𑌮𑌿𑌤𑍍𑌰𑌂 𑌮𑍃𑌤𑌸𑍍𑌯 𑌚 ॥ 1𑍭 ॥

𑌵𑌿𑌨𑌯𑌂 𑌰𑌾𑌜𑌪𑍁𑌤𑍍𑌰𑍇𑌭𑍍𑌯𑌃 𑌪𑌂𑌡𑌿𑌤𑍇𑌭𑍍𑌯𑌃 𑌸𑍁𑌭𑌾𑌷𑌿𑌤𑌮𑍍 ।
𑌅𑌨𑍃𑌤𑌂 𑌦𑍍𑌯𑍂𑌤𑌕𑌾𑌰𑍇𑌭𑍍𑌯𑌃 𑌸𑍍𑌤𑍍𑌰𑍀𑌭𑍍𑌯𑌃 𑌶𑌿𑌕𑍍𑌷𑍇𑌤 𑌕𑍈𑌤𑌵𑌮𑍍 ॥ 1𑍮 ॥

𑌅𑌨𑌾𑌲𑍋𑌕𑍍𑌯 𑌵𑍍𑌯𑌯𑌂 𑌕𑌰𑍍𑌤𑌾 𑌅𑌨𑌾𑌥𑌃 𑌕𑌲𑌹𑌪𑍍𑌰𑌿𑌯𑌃 ।
𑌆𑌤𑍁𑌰𑌃 𑌸𑌰𑍍𑌵𑌕𑍍𑌷𑍇𑌤𑍍𑌰𑍇𑌷𑍁 𑌨𑌰𑌃 𑌶𑍀𑌘𑍍𑌰𑌂 𑌵𑌿𑌨𑌶𑍍𑌯𑌤𑌿 ॥ 1𑍯 ॥

𑌨𑌾𑌹𑌾𑌰𑌂 𑌚𑌿𑌂𑌤𑌯𑍇𑌤𑍍𑌪𑍍𑌰𑌾𑌜𑍍𑌞𑍋 𑌧𑌰𑍍𑌮𑌮𑍇𑌕𑌂 𑌹𑌿 𑌚𑌿𑌂𑌤𑌯𑍇𑌤𑍍 ।
𑌆𑌹𑌾𑌰𑍋 𑌹𑌿 𑌮𑌨𑍁𑌷𑍍𑌯𑌾𑌣𑌾𑌂 𑌜𑌨𑍍𑌮𑌨𑌾 𑌸𑌹 𑌜𑌾𑌯𑌤𑍇 ॥ 20 ॥

𑌧𑌨𑌧𑌾𑌨𑍍𑌯𑌪𑍍𑌰𑌯𑍋𑌗𑍇𑌷𑍁 𑌵𑌿𑌦𑍍𑌯𑌾𑌸𑌂𑌗𑍍𑌰𑌹𑌣𑍇 𑌤𑌥𑌾 ।
𑌆𑌹𑌾𑌰𑍇 𑌵𑍍𑌯𑌵𑌹𑌾𑌰𑍇 𑌚 𑌤𑍍𑌯𑌕𑍍𑌤𑌲𑌜𑍍𑌜𑌃 𑌸𑍁𑌖𑍀 𑌭𑌵𑍇𑌤𑍍 ॥ 21 ॥

𑌜𑌲𑌬𑌿𑌂𑌦𑍁𑌨𑌿𑌪𑌾𑌤𑍇𑌨 𑌕𑍍𑌰𑌮𑌶𑌃 𑌪𑍂𑌰𑍍𑌯𑌤𑍇 𑌘𑌟𑌃 ।
𑌸 𑌹𑍇𑌤𑍁𑌃 𑌸𑌰𑍍𑌵𑌵𑌿𑌦𑍍𑌯𑌾𑌨𑌾𑌂 𑌧𑌰𑍍𑌮𑌸𑍍𑌯 𑌚 𑌧𑌨𑌸𑍍𑌯 𑌚 ॥ 22 ॥

𑌵𑌯𑌸𑌃 𑌪𑌰𑌿𑌣𑌾𑌮𑍇𑌽𑌪𑌿 𑌯𑌃 𑌖𑌲𑌃 𑌖𑌲 𑌏𑌵 𑌸𑌃 ।
𑌸𑌂𑌪𑌕𑍍𑌵𑌮𑌪𑌿 𑌮𑌾𑌧𑍁𑌰𑍍𑌯𑌂 𑌨𑍋𑌪𑌯𑌾𑌤𑍀𑌂𑌦𑍍𑌰𑌵𑌾𑌰𑍁𑌣𑌮𑍍 ॥ 23 ॥