𑌬𑍍𑌰𑌹𑍍𑌮𑌜𑍍𑌞𑌾𑌨𑌾𑌵𑌳𑍀𑌮𑌾𑌲𑌾

𑌸𑌕𑍃𑌚𑍍𑌛𑍍𑌰𑌵𑌣𑌮𑌾𑌤𑍍𑌰𑍇𑌣 𑌬𑍍𑌰𑌹𑍍𑌮𑌜𑍍𑌞𑌾𑌨𑌂 𑌯𑌤𑍋 𑌭𑌵𑍇𑌤𑍍 ।
𑌬𑍍𑌰𑌹𑍍𑌮𑌜𑍍𑌞𑌾𑌨𑌾𑌵𑌲𑍀𑌮𑌾𑌲𑌾 𑌸𑌰𑍍𑌵𑍇𑌷𑌾𑌂 𑌮𑍋𑌕𑍍𑌷𑌸𑌿𑌦𑍍𑌧𑌯𑍇 ॥ 1॥

𑌅𑌸𑌂𑌗𑍋𑌽𑌹𑌮𑌸𑌂𑌗𑍋𑌽𑌹𑌮𑌸𑌂𑌗𑍋𑌽𑌹𑌂 𑌪𑍁𑌨𑌃 𑌪𑍁𑌨𑌃 ।
𑌸𑌚𑍍𑌚𑌿𑌦𑌾𑌨𑌂𑌦𑌰𑍂𑌪𑍋𑌽𑌹𑌮𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 2॥

𑌨𑌿𑌤𑍍𑌯𑌶𑍁𑌦𑍍𑌧𑌵𑌿𑌮𑍁𑌕𑍍𑌤𑍋𑌽𑌹𑌂 𑌨𑌿𑌰𑌾𑌕𑌾𑌰𑍋𑌽𑌹𑌮𑌵𑍍𑌯𑌯𑌃 ।
𑌭𑍂𑌮𑌾𑌨𑌂𑌦𑌸𑍍𑌵𑌰𑍂𑌪𑍋𑌽𑌹𑌮𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 3॥

𑌨𑌿𑌤𑍍𑌯𑍋𑌽𑌹𑌂 𑌨𑌿𑌰𑌵𑌦𑍍𑌯𑍋𑌽𑌹𑌂 𑌨𑌿𑌰𑌾𑌕𑌾𑌰𑍋𑌽𑌹𑌮𑍁𑌚𑍍𑌯𑌤𑍇 ।
𑌪𑌰𑌮𑌾𑌨𑌂𑌦𑌰𑍂𑌪𑍋𑌽𑌹𑌮𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 4॥

𑌶𑍁𑌦𑍍𑌧𑌚𑍈𑌤𑌨𑍍𑌯𑌰𑍂𑌪𑍋𑌽𑌹𑌮𑌾𑌤𑍍𑌮𑌾𑌰𑌾𑌮𑍋𑌽𑌹𑌮𑍇𑌵 𑌚 ।
𑌅𑌖𑌂𑌡𑌾𑌨𑌂𑌦𑌰𑍂𑌪𑍋𑌽𑌹𑌮𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 5॥

𑌪𑍍𑌰𑌤𑍍𑌯𑌕𑍍𑌚𑍈𑌤𑌨𑍍𑌯𑌰𑍂𑌪𑍋𑌽𑌹𑌂 𑌶𑌾𑌂𑌤𑍋𑌽𑌹𑌂 𑌪𑍍𑌰𑌕𑍃𑌤𑍇𑌃 𑌪𑌰𑌃 ।
𑌶𑌾𑌶𑍍𑌵𑌤𑌾𑌨𑌂𑌦𑌰𑍂𑌪𑍋𑌽𑌹𑌮𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 6॥

𑌤𑌤𑍍𑌤𑍍𑌵𑌾𑌤𑍀𑌤𑌃 𑌪𑌰𑌾𑌤𑍍𑌮𑌾𑌹𑌂 𑌮𑌧𑍍𑌯𑌾𑌤𑍀𑌤𑌃 𑌪𑌰𑌃 𑌶𑌿𑌵𑌃 ।
𑌮𑌾𑌯𑌾𑌤𑍀𑌤𑌃 𑌪𑌰𑌂𑌜𑍍𑌯𑍋𑌤𑌿𑌰𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 𑍭॥

𑌨𑌾𑌨𑌾𑌰𑍂𑌪𑌵𑍍𑌯𑌤𑍀𑌤𑍋𑌽𑌹𑌂 𑌚𑌿𑌦𑌾𑌕𑌾𑌰𑍋𑌽𑌹𑌮𑌚𑍍𑌯𑍁𑌤𑌃 ।
𑌸𑍁𑌖𑌰𑍂𑌪𑌸𑍍𑌵𑌰𑍂𑌪𑍋𑌽𑌹𑌮𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 𑍮॥

𑌮𑌾𑌯𑌾𑌤𑌤𑍍𑌕𑌾𑌰𑍍𑌯𑌦𑍇𑌹𑌾𑌦𑌿 𑌮𑌮 𑌨𑌾𑌸𑍍𑌤𑍍𑌯𑍇𑌵 𑌸𑌰𑍍𑌵𑌦𑌾 ।
𑌸𑍍𑌵𑌪𑍍𑌰𑌕𑌾𑌶𑍈𑌕𑌰𑍂𑌪𑍋𑌽𑌹𑌮𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 𑍯॥

𑌗𑍁𑌣𑌤𑍍𑌰𑌯𑌵𑍍𑌯𑌤𑍀𑌤𑍋𑌽𑌹𑌂 𑌬𑍍𑌰𑌹𑍍𑌮𑌾𑌦𑍀𑌨𑌾𑌂 𑌚 𑌸𑌾𑌕𑍍𑌷𑍍𑌯𑌹𑌮𑍍 ।
𑌅𑌨𑌂𑌤𑌾𑌨𑌂𑌤𑌰𑍂𑌪𑍋𑌽𑌹𑌮𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 10॥

𑌅𑌂𑌤𑌰𑍍𑌯𑌾𑌮𑌿𑌸𑍍𑌵𑌰𑍂𑌪𑍋𑌽𑌹𑌂 𑌕𑍂𑌟𑌸𑍍𑌥𑌃 𑌸𑌰𑍍𑌵𑌗𑍋𑌽𑌸𑍍𑌮𑍍𑌯𑌹𑌮𑍍 ।
𑌪𑌰𑌮𑌾𑌤𑍍𑌮𑌸𑍍𑌵𑌰𑍂𑌪𑍋𑌽𑌹𑌮𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 11॥

𑌨𑌿𑌷𑍍𑌕𑌲𑍋𑌽𑌹𑌂 𑌨𑌿𑌷𑍍𑌕𑍍𑌰𑌿𑌯𑍋𑌽𑌹𑌂 𑌸𑌰𑍍𑌵𑌾𑌤𑍍𑌮𑌾𑌦𑍍𑌯𑌃 𑌸𑌨𑌾𑌤𑌨𑌃 ।
𑌅𑌪𑌰𑍋𑌕𑍍𑌷𑌸𑍍𑌵𑌰𑍂𑌪𑍋𑌽𑌹𑌮𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 12॥

𑌦𑍍𑌵𑌂𑌦𑍍𑌵𑌾𑌦𑌿𑌸𑌾𑌕𑍍𑌷𑌿𑌰𑍂𑌪𑍋𑌽𑌹𑌮𑌚𑌲𑍋𑌽𑌹𑌂 𑌸𑌨𑌾𑌤𑌨𑌃 ।
𑌸𑌰𑍍𑌵𑌸𑌾𑌕𑍍𑌷𑌿𑌸𑍍𑌵𑌰𑍂𑌪𑍋𑌽𑌹𑌮𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 13॥

𑌪𑍍𑌰𑌜𑍍𑌞𑌾𑌨𑌘𑌨 𑌏𑌵𑌾𑌹𑌂 𑌵𑌿𑌜𑍍𑌞𑌾𑌨𑌘𑌨 𑌏𑌵 𑌚 ।
𑌅𑌕𑌰𑍍𑌤𑌾𑌹𑌮𑌭𑍋𑌕𑍍𑌤𑌾𑌹𑌮𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 14॥

𑌨𑌿𑌰𑌾𑌧𑌾𑌰𑌸𑍍𑌵𑌰𑍂𑌪𑍋𑌽𑌹𑌂 𑌸𑌰𑍍𑌵𑌾𑌧𑌾𑌰𑍋𑌽𑌹𑌮𑍇𑌵 𑌚 ।
𑌆𑌪𑍍𑌤𑌕𑌾𑌮𑌸𑍍𑌵𑌰𑍂𑌪𑍋𑌽𑌹𑌮𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 15॥

𑌤𑌾𑌪𑌤𑍍𑌰𑌯𑌵𑌿𑌨𑌿𑌰𑍍𑌮𑍁𑌕𑍍𑌤𑍋 𑌦𑍇𑌹𑌤𑍍𑌰𑌯𑌵𑌿𑌲𑌕𑍍𑌷𑌣𑌃 ।
𑌅𑌵𑌸𑍍𑌥𑌾𑌤𑍍𑌰𑌯𑌸𑌾𑌕𑍍𑌷𑍍𑌯𑌸𑍍𑌮𑌿 𑌚𑌾𑌹𑌮𑍇𑌵𑌾𑌹𑌮𑌵𑍍𑌯𑌯𑌃 ॥ 16॥

𑌦𑍃𑌗𑍍𑌦𑍃𑌶𑍍𑌯𑍌 𑌦𑍍𑌵𑍌 𑌪𑌦𑌾𑌰𑍍𑌥𑍌 𑌸𑍍𑌤𑌃 𑌪𑌰𑌸𑍍𑌪𑌰𑌵𑌿𑌲𑌕𑍍𑌷𑌣𑍌 ।
𑌦𑍃𑌗𑍍𑌬𑍍𑌰𑌹𑍍𑌮 𑌦𑍃𑌶𑍍𑌯𑌂 𑌮𑌾𑌯𑍇𑌤𑌿 𑌸𑌰𑍍𑌵𑌵𑍇𑌦𑌾𑌂𑌤𑌡𑌿𑌂𑌡𑌿𑌮𑌃 ॥ 1𑍭॥

𑌅𑌹𑌂 𑌸𑌾𑌕𑍍𑌷𑍀𑌤𑌿 𑌯𑍋 𑌵𑌿𑌦𑍍𑌯𑌾𑌦𑍍𑌵𑌿𑌵𑌿𑌚𑍍𑌯𑍈𑌵𑌂 𑌪𑍁𑌨𑌃 𑌪𑍁𑌨𑌃 ।
𑌸 𑌏𑌵 𑌮𑍁𑌕𑍍𑌤𑌃 𑌸𑍋 𑌵𑌿𑌦𑍍𑌵𑌾𑌨𑌿𑌤𑌿 𑌵𑍇𑌦𑌾𑌂𑌤𑌡𑌿𑌂𑌡𑌿𑌮𑌃 ॥ 1𑍮॥

𑌘𑌟𑌕𑍁𑌡𑍍𑌯𑌾𑌦𑌿𑌕𑌂 𑌸𑌰𑍍𑌵𑌂 𑌮𑍃𑌤𑍍𑌤𑌿𑌕𑌾𑌮𑌾𑌤𑍍𑌰𑌮𑍇𑌵 𑌚 ।
𑌤𑌦𑍍𑌵𑌦𑍍𑌬𑍍𑌰𑌹𑍍𑌮 𑌜𑌗𑌤𑍍𑌸𑌰𑍍𑌵𑌮𑌿𑌤𑌿 𑌵𑍇𑌦𑌾𑌂𑌤𑌡𑌿𑌂𑌡𑌿𑌮𑌃 ॥ 1𑍯॥

𑌬𑍍𑌰𑌹𑍍𑌮 𑌸𑌤𑍍𑌯𑌂 𑌜𑌗𑌨𑍍𑌮𑌿𑌥𑍍𑌯𑌾 𑌜𑍀𑌵𑍋 𑌬𑍍𑌰𑌹𑍍𑌮𑍈𑌵 𑌨𑌾𑌪𑌰𑌃 ।
𑌅𑌨𑍇𑌨 𑌵𑍇𑌦𑍍𑌯𑌂 𑌸𑌚𑍍𑌛𑌾𑌸𑍍𑌤𑍍𑌰𑌮𑌿𑌤𑌿 𑌵𑍇𑌦𑌾𑌂𑌤𑌡𑌿𑌂𑌡𑌿𑌮𑌃 ॥ 20॥

𑌅𑌂𑌤𑌰𑍍𑌜𑍍𑌯𑍋𑌤𑌿𑌰𑍍𑌬𑌹𑌿𑌰𑍍𑌜𑍍𑌯𑍋𑌤𑌿𑌃 𑌪𑍍𑌰𑌤𑍍𑌯𑌗𑍍𑌜𑍍𑌯𑍋𑌤𑌿𑌃 𑌪𑌰𑌾𑌤𑍍𑌪𑌰𑌃 ।
𑌜𑍍𑌯𑍋𑌤𑌿𑌰𑍍𑌜𑍍𑌯𑍋𑌤𑌿𑌃 𑌸𑍍𑌵𑌯𑌂𑌜𑍍𑌯𑍋𑌤𑌿𑌰𑌾𑌤𑍍𑌮𑌜𑍍𑌯𑍋𑌤𑌿𑌃 𑌶𑌿𑌵𑍋𑌽𑌸𑍍𑌮𑍍𑌯𑌹𑌮𑍍 ॥ 21॥

𑌇𑌤𑌿 𑌶𑍍𑌰𑍀𑌮𑌤𑍍𑌪𑌰𑌮𑌹𑌂𑌸𑌪𑌰𑌿𑌵𑍍𑌰𑌾𑌜𑌕𑌾𑌚𑌾𑌰𑍍𑌯𑌸𑍍𑌯
𑌶𑍍𑌰𑍀𑌗𑍋𑌵𑌿𑌂𑌦𑌭𑌗𑌵𑌤𑍍𑌪𑍂𑌜𑍍𑌯𑌪𑌾𑌦𑌶𑌿𑌷𑍍𑌯𑌸𑍍𑌯
𑌶𑍍𑌰𑍀𑌮𑌚𑍍𑌛𑌂𑌕𑌰𑌭𑌗𑌵𑌤𑌃 𑌕𑍃𑌤𑍌
𑌬𑍍𑌰𑌹𑍍𑌮𑌜𑍍𑌞𑌾𑌨𑌾𑌵𑌲𑍀𑌮𑌾𑌲𑌾 𑌸𑌂𑌪𑍂𑌰𑍍𑌣𑌾 ॥