𑌭𑌰𑍍𑌤𑍃𑌹𑌰𑍇𑌃 𑌶𑌤𑌕 𑌤𑍍𑌰𑌿𑌶𑌤𑌿 – 𑌵𑍈𑌰𑌾𑌗𑍍𑌯 𑌶𑌤𑌕𑌮𑍍

𑌚𑍂𑌡𑍋𑌤𑍍𑌤𑌂𑌸𑌿𑌤𑌚𑌂𑌦𑍍𑌰𑌚𑌾𑌰𑍁𑌕𑌲𑌿𑌕𑌾𑌚𑌂𑌚𑌚𑍍𑌛𑌿𑌖𑌾𑌭𑌾𑌸𑍍𑌵𑌰𑍋
𑌲𑍀𑌲𑌾𑌦𑌗𑍍𑌧𑌵𑌿𑌲𑍋𑌲𑌕𑌾𑌮𑌶𑌲𑌭𑌃 𑌶𑍍𑌰𑍇𑌯𑍋𑌦𑌶𑌾𑌗𑍍𑌰𑍇 𑌸𑍍𑌫𑍁𑌰𑌨𑍍 ।
𑌅𑌂𑌤𑌃𑌸𑍍𑌫𑍂𑌰𑍍𑌜𑌦𑍍​𑌅𑌪𑌾𑌰𑌮𑍋𑌹𑌤𑌿𑌮𑌿𑌰𑌪𑍍𑌰𑌾𑌗𑍍𑌭𑌾𑌰𑌂 𑌉𑌚𑍍𑌚𑌾𑌟𑌯𑌨𑍍
𑌚𑍇𑌤𑌃𑌸𑌦𑍍𑌮𑌨𑌿 𑌯𑍋𑌗𑌿𑌨𑌾𑌂 𑌵𑌿𑌜𑌯𑌤𑍇 𑌜𑍍𑌞𑌾𑌨𑌪𑍍𑌰𑌦𑍀𑌪𑍋 𑌹𑌰𑌃 ॥ 3.1 ॥

𑌭𑍍𑌰𑌾𑌂𑌤𑌂 𑌦𑍇𑌶𑌂 𑌅𑌨𑍇𑌕𑌦𑍁𑌰𑍍𑌗𑌵𑌿𑌷𑌮𑌂 𑌪𑍍𑌰𑌾𑌪𑍍𑌤𑌂 𑌨 𑌕𑌿𑌂𑌚𑌿𑌤𑍍𑌫𑌲𑌂
𑌤𑍍𑌯𑌕𑍍𑌤𑍍𑌵𑌾 𑌜𑌾𑌤𑌿𑌕𑍁𑌲𑌾𑌭𑌿𑌮𑌾𑌨𑌂 𑌉𑌚𑌿𑌤𑌂 𑌸𑍇𑌵𑌾 𑌕𑍃𑌤𑌾 𑌨𑌿𑌷𑍍𑌫𑌲𑌾 ।
𑌭𑍁𑌕𑍍𑌤𑌂 𑌮𑌾𑌨𑌵𑌿𑌵𑌰𑍍𑌜𑌿𑌤𑌂 𑌪𑌰𑌗𑍃𑌹𑍇𑌷𑍍𑌵𑌾𑌶𑌂𑌕𑌯𑌾 𑌕𑌾𑌕𑌵𑌤𑍍
𑌤𑍃𑌷𑍍𑌣𑍇 𑌜𑍃𑌂𑌭𑌸𑌿 𑌪𑌾𑌪𑌕𑌰𑍍𑌮𑌪𑌿𑌶𑍁𑌨𑍇 𑌨𑌾𑌦𑍍𑌯𑌾𑌪𑌿 𑌸𑌂𑌤𑍁𑌷𑍍𑌯𑌸𑌿 ॥ 3.2 ॥

𑌉𑌤𑍍𑌖𑌾𑌤𑌂 𑌨𑌿𑌧𑌿𑌶𑌂𑌕𑌯𑌾 𑌕𑍍𑌷𑌿𑌤𑌿𑌤𑌲𑌂 𑌧𑍍𑌮𑌾𑌤𑌾 𑌗𑌿𑌰𑍇𑌰𑍍𑌧𑌾𑌤𑌵𑍋
𑌨𑌿𑌸𑍍𑌤𑍀𑌰𑍍𑌣𑌃 𑌸𑌰𑌿𑌤𑌾𑌂 𑌪𑌤𑌿𑌰𑍍𑌨𑍃𑌪𑌤𑌯𑍋 𑌯𑌤𑍍𑌨𑍇𑌨 𑌸𑌂𑌤𑍋𑌷𑌿𑌤𑌾𑌃 ।
𑌮𑌂𑌤𑍍𑌰𑌾𑌰𑌾𑌧𑌨𑌤𑌤𑍍𑌪𑌰𑍇𑌣 𑌮𑌨𑌸𑌾 𑌨𑍀𑌤𑌾𑌃 𑌶𑍍𑌮𑌶𑌾𑌨𑍇 𑌨𑌿𑌶𑌾𑌃
𑌪𑍍𑌰𑌾𑌪𑍍𑌤𑌃 𑌕𑌾𑌣𑌵𑌰𑌾𑌟𑌕𑍋𑌽𑌪𑌿 𑌨 𑌮𑌯𑌾 𑌤𑍃𑌷𑍍𑌣𑍇 𑌸𑌕𑌾𑌮𑌾 𑌭𑌵 ॥ 3.3 ॥

𑌖𑌲𑌾𑌲𑌾𑌪𑌾𑌃 𑌸𑍋𑌢𑌾𑌃 𑌕𑌥𑌂 𑌅𑌪𑌿 𑌤𑌦𑍍​𑌆𑌰𑌾𑌧𑌨𑌪𑌰𑍈𑌰𑍍𑌨𑌿𑌗𑍃𑌹𑍍𑌯𑌾𑌂𑌤𑌰𑍍
𑌬𑌾𑌷𑍍𑌪𑌂 𑌹𑌸𑌿𑌤𑌂 𑌅𑌪𑌿 𑌶𑍂𑌨𑍍𑌯𑍇𑌨 𑌮𑌨𑌸𑌾 ।
𑌕𑍃𑌤𑍋 𑌵𑌿𑌤𑍍𑌤𑌸𑍍𑌤𑌂𑌭𑌪𑍍𑌰𑌤𑌿𑌹𑌤𑌧𑌿𑌯𑌾𑌂 𑌅𑌂𑌜𑌲𑌿𑌰𑌪𑌿
𑌤𑍍𑌵𑌂 𑌆𑌶𑍇 𑌮𑍋𑌘𑌾𑌶𑍇 𑌕𑌿𑌮 𑌅𑌪𑌰𑌂 𑌅𑌤𑍋 𑌨𑌰𑍍𑌤𑌯𑌸𑌿 𑌮𑌾𑌮𑍍 ॥ 3.4 ॥

𑌅𑌮𑍀𑌷𑌾𑌂 𑌪𑍍𑌰𑌾𑌣𑌾𑌨𑌾𑌂 𑌤𑍁𑌲𑌿𑌤𑌵𑌿𑌸𑌿𑌨𑍀𑌪𑌤𑍍𑌰𑌪𑌯𑌸𑌾𑌂
𑌕𑍃𑌤𑍇 𑌕𑌿𑌂 𑌨𑌾𑌸𑍍𑌮𑌾𑌭𑌿𑌰𑍍𑌵𑌿𑌗𑌲𑌿𑌤𑌵𑌿𑌵𑍇𑌕𑍈𑌰𑍍𑌵𑍍𑌯𑌵𑌸𑌿𑌤𑌮𑍍 ।
𑌯𑌦𑍍​𑌆𑌢𑍍𑌯𑌾𑌨𑌾𑌂 𑌅𑌗𑍍𑌰𑍇 𑌦𑍍𑌰𑌵𑌿𑌣𑌮𑌦𑌨𑌿𑌃𑌸𑌂𑌜𑍍𑌞𑌮𑌨𑌸𑌾𑌂
𑌕𑍃𑌤𑌂 𑌵𑍀𑌤𑌵𑍍𑌰𑍀𑌡𑍈𑌰𑍍𑌨𑌿𑌜𑌗𑍁𑌣𑌕𑌥𑌾𑌪𑌾𑌤𑌕𑌂 𑌅𑌪𑌿 ॥ 3.5 ॥

𑌕𑍍𑌷𑌾𑌂𑌤𑌂 𑌨 𑌕𑍍𑌷𑌮𑌯𑌾 𑌗𑍃𑌹𑍋𑌚𑌿𑌤𑌸𑍁𑌖𑌂 𑌤𑍍𑌯𑌕𑍍𑌤𑌂 𑌨 𑌸𑌂𑌤𑍋𑌷𑌤𑌃
𑌸𑍋𑌢𑍋 𑌦𑍁𑌃𑌸𑌹𑌶𑍀𑌤𑌤𑌾𑌪𑌪𑌵𑌨𑌕𑍍𑌲𑍇𑌶𑍋 𑌨 𑌤𑌪𑍍𑌤𑌂 𑌤𑌪𑌃 ।
𑌧𑍍𑌯𑌾𑌤𑌂 𑌵𑌿𑌤𑍍𑌤𑌂 𑌅𑌹𑌰𑍍𑌨𑌿𑌶𑌂 𑌨𑌿𑌤𑍍𑌯𑌮𑌿𑌤𑌪𑍍𑌰𑌾𑌣𑍈𑌰𑍍𑌨 𑌶𑌂𑌭𑍋𑌃 𑌪𑌦𑌂
𑌤𑌤𑍍𑌤𑌤𑍍𑌕𑌰𑍍𑌮 𑌕𑍃𑌤𑌂 𑌯𑌦𑍇𑌵 𑌮𑍁𑌨𑌿𑌭𑌿𑌸𑍍𑌤𑍈𑌸𑍍𑌤𑍈𑌃 𑌫𑌲𑍈𑌰𑍍𑌵𑌂𑌚𑌿𑌤𑌾𑌃 ॥ 3.6 ॥

𑌭𑍋𑌗𑌾 𑌨 𑌭𑍁𑌕𑍍𑌤𑌾 𑌵𑌯𑌂 𑌏𑌵 𑌭𑍁𑌕𑍍𑌤𑌾𑌸𑍍
𑌤𑌪𑍋 𑌨 𑌤𑌪𑍍𑌤𑌂 𑌵𑌯𑌂 𑌏𑌵 𑌤𑌪𑍍𑌤𑌾𑌃 ।
𑌕𑌾𑌲𑍋 𑌨 𑌯𑌾𑌤𑍋 𑌵𑌯𑌂 𑌏𑌵 𑌯𑌾𑌤𑌾𑌸𑍍𑌤𑍃𑌷𑍍𑌣𑌾
𑌨 𑌜𑍀𑌰𑍍𑌣𑌾 𑌵𑌯𑌂 𑌏𑌵 𑌜𑍀𑌰𑍍𑌣𑌾𑌃 ॥ 3.𑍭 ॥

𑌬𑌲𑌿𑌭𑌿𑌰𑍍𑌮𑍁𑌖𑌂 𑌆𑌕𑍍𑌰𑌾𑌂𑌤𑌂 𑌪𑌲𑌿𑌤𑍇𑌨𑌾𑌂𑌕𑌿𑌤𑌂 𑌶𑌿𑌰𑌃 ।
𑌗𑌾𑌤𑍍𑌰𑌾𑌣𑌿 𑌶𑌿𑌥𑌿𑌲𑌾𑌯𑌂𑌤𑍇 𑌤𑍃𑌷𑍍𑌣𑍈𑌕𑌾 𑌤𑌰𑍁𑌣𑌾𑌯𑌤𑍇 ॥ 3.𑍮 ॥

𑌵𑌿𑌵𑍇𑌕𑌵𑍍𑌯𑌾𑌕𑍋𑌶𑍇 𑌵𑌿𑌦𑌧𑌤𑌿 𑌸𑌮𑍇 𑌶𑌾𑌮𑍍𑌯𑌤𑌿 𑌤𑍃𑌷𑌾
𑌪𑌰𑌿𑌷𑍍𑌵𑌂𑌗𑍇 𑌤𑍁𑌂𑌗𑍇 𑌪𑍍𑌰𑌸𑌰𑌤𑌿𑌤𑌰𑌾𑌂 𑌸𑌾 𑌪𑌰𑌿𑌣𑌤𑌾 ।
𑌜𑌰𑌾𑌜𑍀𑌰𑍍𑌣𑍈𑌶𑍍𑌵𑌰𑍍𑌯𑌗𑍍𑌰𑌸𑌨𑌗𑌹𑌨𑌾𑌕𑍍𑌷𑍇𑌪𑌕𑍃𑌪𑌣𑌸𑍍𑌤𑍃𑌷𑌾𑌪𑌾𑌤𑍍𑌰𑌂
𑌯𑌸𑍍𑌯𑌾𑌂 𑌭𑌵𑌤𑌿 𑌮𑌰𑍁𑌤𑌾𑌂 𑌅𑌪𑍍𑌯𑌧𑌿𑌪𑌤𑌿𑌃 ॥ 3.𑍮.1 ॥

𑌨𑌿𑌵𑍃𑌤𑍍𑌤𑌾 𑌭𑍋𑌗𑍇𑌚𑍍𑌛𑌾 𑌪𑍁𑌰𑍁𑌷𑌬𑌹𑍁𑌮𑌾𑌨𑍋𑌽𑌪𑌿 𑌗𑌲𑌿𑌤𑌃
𑌸𑌮𑌾𑌨𑌾𑌃 𑌸𑍍𑌵𑌰𑍍𑌯𑌾𑌤𑌾𑌃 𑌸𑌪𑌦𑌿 𑌸𑍁𑌹𑍃𑌦𑍋 𑌜𑍀𑌵𑌿𑌤𑌸𑌮𑌾𑌃 ।
𑌶𑌨𑍈𑌰𑍍𑌯𑌷𑍍𑌟𑍍𑌯𑍁𑌤𑍍𑌥𑌾𑌨𑌂 𑌘𑌨𑌤𑌿𑌮𑌿𑌰𑌰𑍁𑌦𑍍𑌧𑍇 𑌚 𑌨𑌯𑌨𑍇
𑌅𑌹𑍋 𑌮𑍂𑌢𑌃 𑌕𑌾𑌯𑌸𑍍𑌤𑌦𑌪𑌿 𑌮𑌰𑌣𑌾𑌪𑌾𑌯𑌚𑌕𑌿𑌤𑌃 ॥ 3.𑍯 ॥

𑌆𑌶𑌾 𑌨𑌾𑌮 𑌨𑌦𑍀 𑌮𑌨𑍋𑌰𑌥𑌜𑌲𑌾 𑌤𑍃𑌷𑍍𑌣𑌾𑌤𑌰𑌂𑌗𑌾𑌕𑍁𑌲𑌾
𑌰𑌾𑌗𑌗𑍍𑌰𑌾𑌹𑌵𑌤𑍀 𑌵𑌿𑌤𑌰𑍍𑌕𑌵𑌿𑌹𑌗𑌾 𑌧𑍈𑌰𑍍𑌯𑌦𑍍𑌰𑍁𑌮𑌧𑍍𑌵𑌂𑌸𑌿𑌨𑍀 ।
𑌮𑍋𑌹𑌾𑌵𑌰𑍍𑌤𑌸𑍁𑌦𑍁𑌸𑍍𑌤𑌰𑌾𑌤𑌿𑌗𑌹𑌨𑌾 𑌪𑍍𑌰𑍋𑌤𑍍𑌤𑍁𑌂𑌗𑌚𑌿𑌂𑌤𑌾𑌤𑌟𑍀
𑌤𑌸𑍍𑌯𑌾𑌃 𑌪𑌾𑌰𑌗𑌤𑌾 𑌵𑌿𑌶𑍁𑌦𑍍𑌧𑌮𑌨𑌸𑍋 𑌨𑌂𑌦𑌂𑌤𑌿 𑌯𑍋𑌗𑍀𑌶𑍍𑌵𑌰𑌾𑌃 ॥ 3.10 ॥

𑌨 𑌸𑌂𑌸𑌾𑌰𑍋𑌤𑍍𑌪𑌨𑍍𑌨𑌂 𑌚𑌰𑌿𑌤𑌂 𑌅𑌨𑍁𑌪𑌶𑍍𑌯𑌾𑌮𑌿 𑌕𑍁𑌶𑌲𑌂
𑌵𑌿𑌪𑌾𑌕𑌃 𑌪𑍁𑌣𑍍𑌯𑌾𑌨𑌾𑌂 𑌜𑌨𑌯𑌤𑌿 𑌭𑌯𑌂 𑌮𑍇 𑌵𑌿𑌮𑍃𑌶𑌤𑌃 ।
𑌮𑌹𑌦𑍍𑌭𑌿𑌃 𑌪𑍁𑌣𑍍𑌯𑍌𑌘𑍈𑌶𑍍𑌚𑌿𑌰𑌪𑌰𑌿𑌗𑍃𑌹𑍀𑌤𑌾𑌶𑍍𑌚 𑌵𑌿𑌷𑌯𑌾
𑌮𑌹𑌾𑌂𑌤𑍋 𑌜𑌾𑌯𑌂𑌤𑍇 𑌵𑍍𑌯𑌸𑌨𑌂 𑌇𑌵 𑌦𑌾𑌤𑍁𑌂 𑌵𑌿𑌷𑌯𑌿𑌣𑌾𑌮𑍍 ॥ 3.11 ॥

𑌅𑌵𑌶𑍍𑌯𑌂 𑌯𑌾𑌤𑌾𑌰𑌶𑍍𑌚𑌿𑌰𑌤𑌰𑌂 𑌉𑌷𑌿𑌤𑍍𑌵𑌾𑌪𑌿 𑌵𑌿𑌷𑌯𑌾
𑌵𑌿𑌯𑍋𑌗𑍇 𑌕𑍋 𑌭𑍇𑌦𑌸𑍍𑌤𑍍𑌯𑌜𑌤𑌿 𑌨 𑌜𑌨𑍋 𑌯𑌤𑍍𑌸𑍍𑌵𑌯𑌂 𑌅𑌮𑍂𑌨𑍍 ।
𑌵𑍍𑌰𑌜𑌂𑌤𑌃 𑌸𑍍𑌵𑌾𑌤𑌂𑌤𑍍𑌰𑍍𑌯𑌾𑌦𑌤𑍁𑌲𑌪𑌰𑌿𑌤𑌾𑌪𑌾𑌯 𑌮𑌨𑌸𑌃
𑌸𑍍𑌵𑌯𑌂 𑌤𑍍𑌯𑌕𑍍𑌤𑌾 𑌹𑍍𑌯𑍇𑌤𑍇 𑌶𑌮𑌸𑍁𑌖𑌂 𑌅𑌨𑌂𑌤𑌂 𑌵𑌿𑌦𑌧𑌤𑌿 ॥ 3.12 ॥

𑌬𑍍𑌰𑌹𑍍𑌮𑌜𑍍𑌞𑌾𑌨𑌵𑌿𑌵𑍇𑌕𑌨𑌿𑌰𑍍𑌮𑌲𑌧𑌿𑌯𑌃 𑌕𑍁𑌰𑍍𑌵𑌂𑌤𑍍𑌯𑌹𑍋 𑌦𑍁𑌷𑍍𑌕𑌰𑌂
𑌯𑌨𑍍𑌮𑍁𑌂𑌚𑌂𑌤𑍍𑌯𑍁𑌪𑌭𑍋𑌗𑌭𑌾𑌂𑌜𑍍𑌯𑌪𑌿 𑌧𑌨𑌾𑌨𑍍𑌯𑍇𑌕𑌾𑌂𑌤𑌤𑍋 𑌨𑌿𑌃𑌸𑍍𑌪𑍃𑌹𑌾𑌃 ।
𑌸𑌂𑌪𑍍𑌰𑌾𑌪𑍍𑌤𑌾𑌨𑍍𑌨 𑌪𑍁𑌰𑌾 𑌨 𑌸𑌂𑌪𑍍𑌰𑌤𑌿 𑌨 𑌚 𑌪𑍍𑌰𑌾𑌪𑍍𑌤𑍌 𑌦𑍃𑌢𑌪𑍍𑌰𑌤𑍍𑌯𑌯𑌾𑌨𑍍
𑌵𑌾𑌂𑌛𑌾𑌮𑌾𑌤𑍍𑌰𑌪𑌰𑌿𑌗𑍍𑌰𑌹𑌾𑌨𑌪𑌿 𑌪𑌰𑌂 𑌤𑍍𑌯𑌕𑍍𑌤𑍁𑌂 𑌨 𑌶𑌕𑍍𑌤𑌾 𑌵𑌯𑌮𑍍 ॥ 3.13 ॥

𑌧𑌨𑍍𑌯𑌾𑌨𑌾𑌂 𑌗𑌿𑌰𑌿𑌕𑌂𑌦𑌰𑍇𑌷𑍁 𑌵𑌸𑌤𑌾𑌂 𑌜𑍍𑌯𑍋𑌤𑌿𑌃 𑌪𑌰𑌂 𑌧𑍍𑌯𑌾𑌯𑌤𑌾𑌮𑌾𑌨𑌂𑌦𑌾𑌶𑍍𑌰𑍁
𑌜𑌲𑌂 𑌪𑌿𑌬𑌂𑌤𑌿 𑌶𑌕𑍁𑌨𑌾 𑌨𑌿𑌃𑌶𑌂𑌕𑌂 𑌅𑌂𑌕𑍇𑌶𑌯𑌾𑌃 ।
𑌅𑌸𑍍𑌮𑌾𑌕𑌂 𑌤𑍁 𑌮𑌨𑍋𑌰𑌥𑍋𑌪𑌰𑌚𑌿𑌤𑌪𑍍𑌰𑌾𑌸𑌾𑌦𑌵𑌾𑌪𑍀𑌤𑌟𑌕𑍍𑌰𑍀𑌡𑌾
𑌕𑌾𑌨𑌨𑌕𑍇𑌲𑌿𑌕𑍌𑌤𑍁𑌕𑌜𑍁𑌷𑌾𑌂 𑌆𑌯𑍁𑌃 𑌪𑌰𑌂 𑌕𑍍𑌷𑍀𑌯𑌤𑍇 ॥ 3.14 ॥

𑌭𑌿𑌕𑍍𑌷𑌾𑌶𑌨𑌂 𑌤𑌦𑌪𑌿 𑌨𑍀𑌰𑌸𑌂 𑌏𑌕𑌵𑌾𑌰𑌂
𑌶𑌯𑍍𑌯𑌾 𑌚 𑌭𑍂𑌃 𑌪𑌰𑌿𑌜𑌨𑍋 𑌨𑌿𑌜𑌦𑍇𑌹𑌮𑌾𑌤𑍍𑌰𑌮𑍍 ।
𑌵𑌸𑍍𑌤𑍍𑌰𑌂 𑌵𑌿𑌶𑍀𑌰𑍍𑌣𑌶𑌤𑌖𑌂𑌡𑌮𑌯𑍀 𑌚 𑌕𑌂𑌥𑌾
𑌹𑌾 𑌹𑌾 𑌤𑌥𑌾𑌪𑌿 𑌵𑌿𑌷𑌯𑌾 𑌨 𑌪𑌰𑌿𑌤𑍍𑌯𑌜𑌂𑌤𑌿 ॥ 3.15 ॥

𑌸𑍍𑌤𑌨𑍌 𑌮𑌾𑌂𑌸𑌗𑍍𑌰𑌂𑌥𑍀 𑌕𑌨𑌕𑌕𑌲𑌶𑌾𑌵𑌿𑌤𑍍𑌯𑍁𑌪𑌮𑌿𑌤𑍌
𑌮𑍁𑌖𑌂 𑌶𑍍𑌲𑍇𑌷𑍍𑌮𑌾𑌗𑌾𑌰𑌂 𑌤𑌦𑌪𑌿 𑌚 𑌶𑌶𑌾𑌂𑌕𑍇𑌨 𑌤𑍁𑌲𑌿𑌤𑌮𑍍 ।
𑌸𑍍𑌰𑌵𑌨𑍍𑌮𑍂𑌤𑍍𑌰𑌕𑍍𑌲𑌿𑌨𑍍𑌨𑌂 𑌕𑌰𑌿𑌵𑌰𑌶𑌿𑌰𑌸𑍍𑌪𑌰𑍍𑌧𑌿 𑌜𑌘𑌨𑌂
𑌮𑍁𑌹𑍁𑌰𑍍𑌨𑌿𑌂𑌦𑍍𑌯𑌂 𑌰𑍂𑌪𑌂 𑌕𑌵𑌿𑌜𑌨𑌵𑌿𑌶𑍇𑌷𑍈𑌰𑍍𑌗𑍁𑌰𑍁𑌕𑍃𑌤𑌮𑍍 ॥ 3.16 ॥

𑌏𑌕𑍋 𑌰𑌾𑌗𑌿𑌷𑍁 𑌰𑌾𑌜𑌤𑍇 𑌪𑍍𑌰𑌿𑌯𑌤𑌮𑌾𑌦𑍇𑌹𑌾𑌰𑍍𑌧𑌹𑌾𑌰𑍀 𑌹𑌰𑍋
𑌨𑍀𑌰𑌾𑌗𑍇𑌷𑍁 𑌜𑌨𑍋 𑌵𑌿𑌮𑍁𑌕𑍍𑌤𑌲𑌲𑌨𑌾𑌸𑌂𑌗𑍋 𑌨 𑌯𑌸𑍍𑌮𑌾𑌤𑍍𑌪𑌰𑌃 ।
𑌦𑍁𑌰𑍍𑌵𑌾𑌰𑌸𑍍𑌮𑌰𑌬𑌾𑌣𑌪𑌨𑍍𑌨𑌗𑌵𑌿𑌷𑌵𑍍𑌯𑌾𑌵𑌿𑌦𑍍𑌧𑌮𑍁𑌗𑍍𑌧𑍋 𑌜𑌨𑌃
𑌶𑍇𑌷𑌃 𑌕𑌾𑌮𑌵𑌿𑌡𑌂𑌬𑌿𑌤𑌾𑌨𑍍𑌨 𑌵𑌿𑌷𑌯𑌾𑌨𑍍𑌭𑍋𑌕𑍍𑌤𑍁𑌂 𑌨 𑌮𑍋𑌕𑍍𑌤𑍁𑌂 𑌕𑍍𑌷𑌮𑌃 ॥ 3.1𑍭 ॥

𑌅𑌜𑌾𑌨𑌂𑌦𑌾𑌹𑌾𑌤𑍍𑌮𑍍𑌯𑌂 𑌪𑌤𑌤𑍁 𑌶𑌲𑌭𑌸𑍍𑌤𑍀𑌵𑍍𑌰𑌦𑌹𑌨𑍇
𑌸 𑌮𑍀𑌨𑍋𑌽𑌪𑍍𑌯𑌜𑍍𑌞𑌾𑌨𑌾𑌦𑍍𑌬𑌡𑌿𑌶𑌯𑍁𑌤𑌂 𑌅𑌶𑍍𑌨𑌾𑌤𑍁 𑌪𑌿𑌶𑌿𑌤𑌮𑍍 ।
𑌵𑌿𑌜𑌾𑌨𑌂𑌤𑍋𑌽𑌪𑍍𑌯𑍇𑌤𑍇 𑌵𑌯𑌂 𑌇𑌹 𑌵𑌿𑌪𑌜𑍍𑌜𑌾𑌲𑌜𑌟𑌿𑌲𑌾𑌨𑍍
𑌨 𑌮𑍁𑌂𑌚𑌾𑌮𑌃 𑌕𑌾𑌮𑌾𑌨𑍍 𑌅𑌹𑌹 𑌗𑌹𑌨𑍋 𑌮𑍋𑌹𑌮𑌹𑌿𑌮𑌾 ॥ 3.1𑍮 ॥

𑌤𑍃𑌷𑌾 𑌶𑍁𑌷𑍍𑌯𑌤𑍍𑌯𑌾𑌸𑍍𑌯𑍇 𑌪𑌿𑌬𑌤𑌿 𑌸𑌲𑌿𑌲𑌂 𑌶𑍀𑌤𑌮𑌧𑍁𑌰𑌂
𑌕𑍍𑌷𑍁𑌧𑌾𑌰𑍍𑌤𑌃 𑌶𑌾𑌲𑍍𑌯𑌨𑍍𑌨𑌂 𑌕𑌵𑌲𑌯𑌤𑌿 𑌮𑌾𑌂𑌸𑌾𑌦𑌿𑌕𑌲𑌿𑌤𑌮𑍍 ।
𑌪𑍍𑌰𑌦𑍀𑌪𑍍𑌤𑍇 𑌕𑌾𑌮𑌾𑌗𑍍𑌨𑍌 𑌸𑍁𑌦𑍃𑌢𑌤𑌰𑌂 𑌆𑌲𑌿𑌂𑌗𑌤𑌿 𑌵𑌧𑍂𑌂
𑌪𑍍𑌰𑌤𑍀𑌕𑌾𑌰𑌂 𑌵𑍍𑌯𑌾𑌧𑍇𑌃 𑌸𑍁𑌖𑌂 𑌇𑌤𑌿 𑌵𑌿𑌪𑌰𑍍𑌯𑌸𑍍𑌯𑌤𑌿 𑌜𑌨𑌃 ॥ 3.1𑍯 ॥

𑌤𑍁𑌂𑌗𑌂 𑌵𑍇𑌶𑍍𑌮 𑌸𑍁𑌤𑌾𑌃 𑌸𑌤𑌾𑌂 𑌅𑌭𑌿𑌮𑌤𑌾𑌃 𑌸𑌂𑌖𑍍𑌯𑌾𑌤𑌿𑌗𑌾𑌃 𑌸𑌂𑌪𑌦𑌃
𑌕𑌲𑍍𑌯𑌾𑌣𑍀 𑌦𑌯𑌿𑌤𑌾 𑌵𑌯𑌶𑍍𑌚 𑌨𑌵𑌂 𑌇𑌤𑍍𑌯𑌜𑍍𑌞𑌾𑌨𑌮𑍂𑌢𑍋 𑌜𑌨𑌃 ।
𑌮𑌤𑍍𑌵𑌾 𑌵𑌿𑌶𑍍𑌵𑌂 𑌅𑌨𑌶𑍍𑌵𑌰𑌂 𑌨𑌿𑌵𑌿𑌶𑌤𑍇 𑌸𑌂𑌸𑌾𑌰𑌕𑌾𑌰𑌾𑌗𑍃𑌹𑍇
𑌸𑌂𑌦𑍃𑌶𑍍𑌯 𑌕𑍍𑌷𑌣𑌭𑌂𑌗𑍁𑌰𑌂 𑌤𑌦𑌖𑌿𑌲𑌂 𑌧𑌨𑍍𑌯𑌸𑍍𑌤𑍁 𑌸𑌨𑍍𑌨𑍍𑌯𑌸𑍍𑌯𑌤𑌿 ॥ 3.20 ॥

𑌦𑍀𑌨𑌾 𑌦𑍀𑌨𑌮𑍁𑌖𑍈𑌃 𑌸𑌦𑍈𑌵 𑌶𑌿𑌶𑍁𑌕𑍈𑌰𑌾𑌕𑍃𑌷𑍍𑌟𑌜𑍀𑌰𑍍𑌣𑌾𑌂𑌬𑌰𑌾
𑌕𑍍𑌰𑍋𑌶𑌦𑍍𑌭𑌿𑌃 𑌕𑍍𑌷𑍁𑌧𑌿𑌤𑍈𑌰𑍍𑌨𑌿𑌰𑌨𑍍𑌨𑌵𑌿𑌧𑍁𑌰𑌾 𑌦𑍃𑌶𑍍𑌯𑌾 𑌨 𑌚𑍇𑌦𑍍𑌗𑍇𑌹𑌿𑌨𑍀 ।
𑌯𑌾𑌚𑍍𑌞𑌾𑌭𑌂𑌗𑌭𑌯𑍇𑌨 𑌗𑌦𑍍𑌗𑌦𑌗𑌲𑌤𑍍𑌰𑍁𑌟𑍍𑌯𑌦𑍍𑌵𑌿𑌲𑍀𑌨𑌾𑌕𑍍𑌷𑌰𑌂
𑌕𑍋 𑌦𑍇𑌹𑍀𑌤𑌿 𑌵𑌦𑍇𑌤𑍍𑌸𑍍𑌵𑌦𑌗𑍍𑌧𑌜𑌠𑌰𑌸𑍍𑌯𑌾𑌰𑍍𑌥𑍇 𑌮𑌨𑌸𑍍𑌵𑍀 𑌪𑍁𑌮𑌾𑌨𑍍 ॥ 3.21 ॥

𑌅𑌭𑌿𑌮𑌤𑌮𑌹𑌾𑌮𑌾𑌨𑌗𑍍𑌰𑌂𑌥𑌿𑌪𑍍𑌰𑌭𑍇𑌦𑌪𑌟𑍀𑌯𑌸𑍀
𑌗𑍁𑌰𑍁𑌤𑌰𑌗𑍁𑌣𑌗𑍍𑌰𑌾𑌮𑌾𑌂𑌭𑍋𑌜𑌸𑍍𑌫𑍁𑌟𑍋𑌜𑍍𑌜𑍍𑌵𑌲𑌚𑌂𑌦𑍍𑌰𑌿𑌕𑌾 ।
𑌵𑌿𑌪𑍁𑌲𑌵𑌿𑌲𑌸𑌲𑍍𑌲𑌜𑍍𑌜𑌾𑌵𑌲𑍍𑌲𑍀𑌵𑌿𑌤𑌾𑌨𑌕𑍁𑌠𑌾𑌰𑌿𑌕𑌾
𑌜𑌠𑌰𑌪𑌿𑌠𑌰𑍀 𑌦𑍁𑌷𑍍𑌪𑍂𑌰𑍇𑌯𑌂 𑌕𑌰𑍋𑌤𑌿 𑌵𑌿𑌡𑌂𑌬𑌨𑌮𑍍 ॥ 3.22 ॥

𑌪𑍁𑌣𑍍𑌯𑍇 𑌗𑍍𑌰𑌾𑌮𑍇 𑌵𑌨𑍇 𑌵𑌾 𑌮𑌹𑌤𑌿 𑌸𑌿𑌤𑌪𑌟𑌚𑍍𑌛𑌨𑍍𑌨𑌪𑌾𑌲𑍀 𑌕𑌪𑌾𑌲𑌿𑌂
𑌹𑍍𑌯𑌾𑌦𑌾𑌯 𑌨𑍍𑌯𑌾𑌯𑌗𑌰𑍍𑌭𑌦𑍍𑌵𑌿𑌜𑌹𑍁𑌤𑌹𑍁𑌤𑌭𑍁𑌗𑍍𑌧𑍂𑌮𑌧𑍂𑌮𑍍𑌰𑍋𑌪𑌕𑌂𑌠𑍇 ।
𑌦𑍍𑌵𑌾𑌰𑌂 𑌦𑍍𑌵𑌾𑌰𑌂 𑌪𑍍𑌰𑌵𑌿𑌷𑍍𑌟𑍋 𑌵𑌰𑌂 𑌉𑌦𑌰𑌦𑌰𑍀𑌪𑍂𑌰𑌣𑌾𑌯 𑌕𑍍𑌷𑍁𑌧𑌾𑌰𑍍𑌤𑍋
𑌮𑌾𑌨𑍀 𑌪𑍍𑌰𑌾𑌣𑍈𑌃 𑌸𑌨𑌾𑌥𑍋 𑌨 𑌪𑍁𑌨𑌰𑌨𑍁𑌦𑌿𑌨𑌂 𑌤𑍁𑌲𑍍𑌯𑌕𑍁𑌲𑍍𑌯𑍇𑌷𑍁 𑌦𑍀𑌨𑌃 ॥ 3.23 ॥

𑌗𑌂𑌗𑌾𑌤𑌰𑌂𑌗𑌕𑌣𑌶𑍀𑌕𑌰𑌶𑍀𑌤𑌲𑌾𑌨𑌿
𑌵𑌿𑌦𑍍𑌯𑌾𑌧𑌰𑌾𑌧𑍍𑌯𑍁𑌷𑌿𑌤𑌚𑌾𑌰𑍁𑌶𑌿𑌲𑌾𑌤𑌲𑌾𑌨𑌿 ।
𑌸𑍍𑌥𑌾𑌨𑌾𑌨𑌿 𑌕𑌿𑌂 𑌹𑌿𑌮𑌵𑌤𑌃 𑌪𑍍𑌰𑌲𑌯𑌂 𑌗𑌤𑌾𑌨𑌿
𑌯𑌤𑍍𑌸𑌾𑌵𑌮𑌾𑌨𑌪𑌰𑌪𑌿𑌂𑌡𑌰𑌤𑌾 𑌮𑌨𑍁𑌷𑍍𑌯𑌾𑌃 ॥ 3.24 ॥

𑌕𑌿𑌂 𑌕𑌂𑌦𑌾𑌃 𑌕𑌂𑌦𑌰𑍇𑌭𑍍𑌯𑌃 𑌪𑍍𑌰𑌲𑌯𑌂 𑌉𑌪𑌗𑌤𑌾 𑌨𑌿𑌰𑍍𑌝𑌰𑌾 𑌵𑌾 𑌗𑌿𑌰𑌿𑌭𑍍𑌯𑌃
𑌪𑍍𑌰𑌧𑍍𑌵𑌸𑍍𑌤𑌾 𑌵𑌾 𑌤𑌰𑍁𑌭𑍍𑌯𑌃 𑌸𑌰𑌸𑌫𑌲𑌭𑍃𑌤𑍋 𑌵𑌲𑍍𑌕𑌲𑌿𑌨𑍍𑌯𑌶𑍍𑌚 𑌶𑌾𑌖𑌾𑌃 ।
𑌵𑍀𑌕𑍍𑌷𑍍𑌯𑌂𑌤𑍇 𑌯𑌨𑍍𑌮𑍁𑌖𑌾𑌨𑌿 𑌪𑍍𑌰𑌸𑌭𑌂 𑌅𑌪𑌗𑌤𑌪𑍍𑌰𑌶𑍍𑌰𑌯𑌾𑌣𑌾𑌂 𑌖𑌲𑌾𑌨𑌾𑌂
𑌦𑍁𑌃𑌖𑌾𑌪𑍍𑌤𑌸𑍍𑌵𑌲𑍍𑌪𑌵𑌿𑌤𑍍𑌤𑌸𑍍𑌮𑌯𑌪𑌵𑌨𑌵𑌶𑌾𑌨𑍍𑌨𑌰𑍍𑌤𑌿𑌤𑌭𑍍𑌰𑍂𑌲𑌤𑌾𑌨𑌿 ॥ 3.25 ॥

𑌪𑍁𑌣𑍍𑌯𑍈𑌰𑍍𑌮𑍂𑌲𑌫𑌲𑍈𑌸𑍍𑌤𑌥𑌾 𑌪𑍍𑌰𑌣𑌯𑌿𑌨𑍀𑌂 𑌵𑍃𑌤𑍍𑌤𑌿𑌂 𑌕𑍁𑌰𑍁𑌷𑍍𑌵𑌾𑌧𑍁𑌨𑌾
𑌭𑍂𑌶𑌯𑍍𑌯𑌾𑌂 𑌨𑌵𑌪𑌲𑍍𑌲𑌵𑍈𑌰𑌕𑍃𑌪𑌣𑍈𑌰𑍁𑌤𑍍𑌤𑌿𑌷𑍍𑌠 𑌯𑌾𑌵𑍋 𑌵𑌨𑌮𑍍 ।
𑌕𑍍𑌷𑍁𑌦𑍍𑌰𑌾𑌣𑌾𑌂 𑌅𑌵𑌿𑌵𑍇𑌕𑌮𑍂𑌢𑌮𑌨𑌸𑌾𑌂 𑌯𑌤𑍍𑌰𑍇𑌶𑍍𑌵𑌰𑌾𑌣𑌾𑌂 𑌸𑌦𑌾
𑌵𑌿𑌤𑍍𑌤𑌵𑍍𑌯𑌾𑌧𑌿𑌵𑌿𑌕𑌾𑌰𑌵𑌿𑌹𑍍𑌵𑌲𑌗𑌿𑌰𑌾𑌂 𑌨𑌾𑌮𑌾𑌪𑌿 𑌨 𑌶𑍍𑌰𑍂𑌯𑌤𑍇 ॥ 3.26 ॥

𑌫𑌲𑌂 𑌸𑍍𑌵𑍇𑌚𑍍𑌛𑌾𑌲𑌭𑍍𑌯𑌂 𑌪𑍍𑌰𑌤𑌿𑌵𑌨𑌂 𑌅𑌖𑍇𑌦𑌂 𑌕𑍍𑌷𑌿𑌤𑌿𑌰𑍁𑌹𑌾𑌂
𑌪𑌯𑌃 𑌸𑍍𑌥𑌾𑌨𑍇 𑌸𑍍𑌥𑌾𑌨𑍇 𑌶𑌿𑌶𑌿𑌰𑌮𑌧𑍁𑌰𑌂 𑌪𑍁𑌣𑍍𑌯𑌸𑌰𑌿𑌤𑌾𑌮𑍍 ।
𑌮𑍃𑌦𑍁𑌸𑍍𑌪𑌰𑍍𑌶𑌾 𑌶𑌯𑍍𑌯𑌾 𑌸𑍁𑌲𑌲𑌿𑌤𑌲𑌤𑌾𑌪𑌲𑍍𑌲𑌵𑌮𑌯𑍀
𑌸𑌹𑌂𑌤𑍇 𑌸𑌂𑌤𑌾𑌪𑌂 𑌤𑌦𑌪𑌿 𑌧𑌨𑌿𑌨𑌾𑌂 𑌦𑍍𑌵𑌾𑌰𑌿 𑌕𑍃𑌪𑌣𑌾𑌃 ॥ 3.2𑍭 ॥

𑌯𑍇 𑌵𑌰𑍍𑌤𑌂𑌤𑍇 𑌧𑌨𑌪𑌤𑌿𑌪𑍁𑌰𑌃 𑌪𑍍𑌰𑌾𑌰𑍍𑌥𑌨𑌾𑌦𑍁𑌃𑌖𑌭𑌾𑌜𑍋
𑌯𑍇 𑌚𑌾𑌲𑍍𑌪𑌤𑍍𑌵𑌂 𑌦𑌧𑌤𑌿 𑌵𑌿𑌷𑌯𑌾𑌕𑍍𑌷𑍇𑌪𑌪𑌰𑍍𑌯𑌾𑌪𑍍𑌤𑌬𑍁𑌦𑍍𑌧𑍇𑌃 ।
𑌤𑍇𑌷𑌾𑌂 𑌅𑌂𑌤𑌃𑌸𑍍𑌫𑍁𑌰𑌿𑌤𑌹𑌸𑌿𑌤𑌂 𑌵𑌾𑌸𑌰𑌾𑌣𑌿 𑌸𑍍𑌮𑌰𑍇𑌯𑌂
𑌧𑍍𑌯𑌾𑌨𑌚𑍍𑌛𑍇𑌦𑍇 𑌶𑌿𑌖𑌰𑌿𑌕𑍁𑌹𑌰𑌗𑍍𑌰𑌾𑌵𑌶𑌯𑍍𑌯𑌾𑌨𑌿𑌷𑌣𑍍𑌣𑌃 ॥ 3.2𑍮 ॥

𑌯𑍇 𑌸𑌂𑌤𑍋𑌷𑌨𑌿𑌰𑌂𑌤𑌰𑌪𑍍𑌰𑌮𑍁𑌦𑌿𑌤𑌾𑌸𑍍𑌤𑍇𑌷𑌾𑌂 𑌨 𑌭𑌿𑌨𑍍𑌨𑌾 𑌮𑍁𑌦𑍋
𑌯𑍇 𑌤𑍍𑌵𑌨𑍍𑌯𑍇 𑌧𑌨𑌲𑍁𑌬𑍍𑌧𑌸𑌂𑌕𑍁𑌲𑌧𑌿𑌯𑌸𑍍𑌤𑍇𑌷𑌾𑌂 𑌨 𑌤𑍃𑌷𑍍𑌣𑌾𑌹𑌤𑌾 ।
𑌇𑌤𑍍𑌥𑌂 𑌕𑌸𑍍𑌯 𑌕𑍃𑌤𑍇 𑌕𑍁𑌤𑌃 𑌸 𑌵𑌿𑌧𑌿𑌨𑌾 𑌕𑍀𑌦𑍃𑌕𑍍𑌪𑌦𑌂 𑌸𑌂𑌪𑌦𑌾𑌂 [𑌕𑍃𑌤𑌃]
𑌸𑍍𑌵𑌾𑌤𑍍𑌮𑌨𑍍𑌯𑍇𑌵 𑌸𑌮𑌾𑌪𑍍𑌤𑌹𑍇𑌮𑌮𑌹𑌿𑌮𑌾 𑌮𑍇𑌰𑍁𑌰𑍍𑌨 𑌮𑍇 𑌰𑍋𑌚𑌤𑍇 ॥ 3.2𑍯 ॥

𑌭𑌿𑌕𑍍𑌷𑌾𑌹𑌾𑌰𑌂 𑌅𑌦𑍈𑌨𑍍𑌯𑌂 𑌅𑌪𑍍𑌰𑌤𑌿𑌸𑍁𑌖𑌂 𑌭𑍀𑌤𑌿𑌚𑍍𑌛𑌿𑌦𑌂 𑌸𑌰𑍍𑌵𑌤𑍋
𑌦𑍁𑌰𑍍𑌮𑌾𑌤𑍍𑌸𑌰𑍍𑌯𑌮𑌦𑌾𑌭𑌿𑌮𑌾𑌨𑌮𑌥𑌨𑌂 𑌦𑍁𑌃𑌖𑍌𑌘𑌵𑌿𑌧𑍍𑌵𑌂𑌸𑌨𑌮𑍍 ।
𑌸𑌰𑍍𑌵𑌤𑍍𑌰𑌾𑌨𑍍𑌵𑌹𑌂 𑌅𑌪𑍍𑌰𑌯𑌤𑍍𑌨𑌸𑍁𑌲𑌭𑌂 𑌸𑌾𑌧𑍁𑌪𑍍𑌰𑌿𑌯𑌂 𑌪𑌾𑌵𑌨𑌂
𑌶𑌂𑌭𑍋𑌃 𑌸𑌤𑍍𑌰𑌂 𑌅𑌵𑌾𑌰𑍍𑌯𑌂 𑌅𑌕𑍍𑌷𑌯𑌨𑌿𑌧𑌿𑌂 𑌶𑌂𑌸𑌂𑌤𑌿 𑌯𑍋𑌗𑍀𑌶𑍍𑌵𑌰𑌾𑌃 ॥ 3.30 ॥

𑌭𑍋𑌗𑍇 𑌰𑍋𑌗𑌭𑌯𑌂 𑌕𑍁𑌲𑍇 𑌚𑍍𑌯𑍁𑌤𑌿𑌭𑌯𑌂 𑌵𑌿𑌤𑍍𑌤𑍇 𑌨𑍃𑌪𑌾𑌲𑌾𑌦𑍍𑌭𑌯𑌂
𑌮𑌾𑌨𑍇 𑌦𑍈𑌨𑍍𑌯𑌭𑌯𑌂 𑌬𑌲𑍇 𑌰𑌿𑌪𑍁𑌭𑌯𑌂 𑌰𑍂𑌪𑍇 𑌜𑌰𑌾𑌯𑌾 𑌭𑌯𑌮𑍍 ।
𑌶𑌾𑌸𑍍𑌤𑍍𑌰𑍇 𑌵𑌾𑌦𑌿𑌭𑌯𑌂 𑌗𑍁𑌣𑍇 𑌖𑌲𑌭𑌯𑌂 𑌕𑌾𑌯𑍇 𑌕𑍃𑌤𑌾𑌂𑌤𑌾𑌦𑍍𑌭𑌯𑌂
𑌸𑌰𑍍𑌵𑌂 𑌵𑌸𑍍𑌤𑍁 𑌭𑌯𑌾𑌨𑍍𑌵𑌿𑌤𑌂 𑌭𑍁𑌵𑌿 𑌨𑍃𑌣𑌾𑌂 𑌵𑍈𑌰𑌾𑌗𑍍𑌯𑌮𑍇𑌵𑌾𑌭𑌯𑌮𑍍 ॥ 3.31 ॥

𑌆𑌕𑍍𑌰𑌾𑌂𑌤𑌂 𑌮𑌰𑌣𑍇𑌨 𑌜𑌨𑍍𑌮 𑌜𑌰𑌸𑌾 𑌚𑌾𑌤𑍍𑌯𑍁𑌜𑍍𑌜𑍍𑌵𑌲𑌂 𑌯𑍌𑌵𑌨𑌂
𑌸𑌂𑌤𑍋𑌷𑍋 𑌧𑌨𑌲𑌿𑌪𑍍𑌸𑌯𑌾 𑌶𑌮𑌸𑍁𑌖𑌂 𑌪𑍍𑌰𑍌𑌢𑌾𑌂𑌗𑌨𑌾𑌵𑌿𑌭𑍍𑌰𑌮𑍈𑌃 ।
𑌲𑍋𑌕𑍈𑌰𑍍𑌮𑌤𑍍𑌸𑌰𑌿𑌭𑌿𑌰𑍍𑌗𑍁𑌣𑌾 𑌵𑌨𑌭𑍁𑌵𑍋 𑌵𑍍𑌯𑌾𑌲𑍈𑌰𑍍𑌨𑍃𑌪𑌾 𑌦𑍁𑌰𑍍𑌜𑌨𑍈𑌰𑍍
𑌅𑌸𑍍𑌥𑍈𑌰𑍍𑌯𑍇𑌣 𑌵𑌿𑌭𑍂𑌤𑌯𑍋𑌽𑌪𑍍𑌯𑌪𑌹𑌤𑌾 𑌗𑍍𑌰𑌸𑍍𑌤𑌂 𑌨 𑌕𑌿𑌂 𑌕𑍇𑌨 𑌵𑌾 ॥ 3.32 ॥

𑌆𑌧𑌿𑌵𑍍𑌯𑌾𑌧𑌿𑌶𑌤𑍈𑌰𑍍𑌜𑌨𑌸𑍍𑌯 𑌵𑌿𑌵𑌿𑌧𑍈𑌰𑌾𑌰𑍋𑌗𑍍𑌯𑌂 𑌉𑌨𑍍𑌮𑍂𑌲𑍍𑌯𑌤𑍇
𑌲𑌕𑍍𑌷𑍍𑌮𑍀𑌰𑍍𑌯𑌤𑍍𑌰 𑌪𑌤𑌂𑌤𑌿 𑌤𑌤𑍍𑌰 𑌵𑌿𑌵𑍃𑌤𑌦𑍍𑌵𑌾𑌰𑌾 𑌇𑌵 𑌵𑍍𑌯𑌾𑌪𑌦𑌃 ।
𑌜𑌾𑌤𑌂 𑌜𑌾𑌤𑌂 𑌅𑌵𑌶𑍍𑌯𑌂 𑌆𑌶𑍁 𑌵𑌿𑌵𑌶𑌂 𑌮𑍃𑌤𑍍𑌯𑍁𑌃 𑌕𑌰𑍋𑌤𑍍𑌯𑌾𑌤𑍍𑌮𑌸𑌾𑌤𑍍
𑌤𑌤𑍍𑌕𑌿𑌂 𑌤𑍇𑌨 𑌨𑌿𑌰𑌂𑌕𑍁𑌶𑍇𑌨 𑌵𑌿𑌧𑌿𑌨𑌾 𑌯𑌨𑍍𑌨𑌿𑌰𑍍𑌮𑌿𑌤𑌂 𑌸𑍁𑌸𑍍𑌥𑌿𑌰𑌮𑍍 ॥ 3.33 ॥

𑌭𑍋𑌗𑌾𑌸𑍍𑌤𑍁𑌂𑌗𑌤𑌰𑌂𑌗𑌭𑌂𑌗𑌤𑌰𑌲𑌾𑌃 𑌪𑍍𑌰𑌾𑌣𑌾𑌃 𑌕𑍍𑌷𑌣𑌧𑍍𑌵𑌂𑌸𑌿𑌨𑌃
𑌸𑍍𑌤𑍋𑌕𑌾𑌨𑍍𑌯𑍇𑌵 𑌦𑌿𑌨𑌾𑌨𑌿 𑌯𑍌𑌵𑌨𑌸𑍁𑌖𑌂 𑌸𑍍𑌫𑍂𑌰𑍍𑌤𑌿𑌃 𑌪𑍍𑌰𑌿𑌯𑌾𑌸𑍁 𑌸𑍍𑌥𑌿𑌤𑌾 ।
𑌤𑌤𑍍𑌸𑌂𑌸𑌾𑌰𑌂 𑌅𑌸𑌾𑌰𑌂 𑌏𑌵 𑌨𑌿𑌖𑌿𑌲𑌂 𑌬𑍁𑌦𑍍𑌧𑍍𑌵𑌾 𑌬𑍁𑌧𑌾 𑌬𑍋𑌧𑌕𑌾
𑌲𑍋𑌕𑌾𑌨𑍁𑌗𑍍𑌰𑌹𑌪𑍇𑌶𑌲𑍇𑌨 𑌮𑌨𑌸𑌾 𑌯𑌤𑍍𑌨𑌃 𑌸𑌮𑌾𑌧𑍀𑌯𑌤𑌾𑌮𑍍 ॥ 3.34 ॥

𑌭𑍋𑌗𑌾 𑌮𑍇𑌘𑌵𑌿𑌤𑌾𑌨𑌮𑌧𑍍𑌯𑌵𑌿𑌲𑌸𑌤𑍍𑌸𑍌𑌦𑌾𑌮𑌿𑌨𑍀𑌚𑌂𑌚𑌲𑌾
𑌆𑌯𑍁𑌰𑍍𑌵𑌾𑌯𑍁𑌵𑌿𑌘𑌟𑍍𑌟𑌿𑌤𑌾𑌬𑍍𑌜𑌪𑌟𑌲𑍀𑌲𑍀𑌨𑌾𑌂𑌬𑍁𑌵𑌦𑍍𑌭𑌂𑌗𑍁𑌰𑌮𑍍 ।
𑌲𑍀𑌲𑌾 𑌯𑍌𑌵𑌨𑌲𑌾𑌲𑌸𑌾𑌸𑍍𑌤𑌨𑍁𑌭𑍃𑌤𑌾𑌂 𑌇𑌤𑍍𑌯𑌾𑌕𑌲𑌯𑍍𑌯 𑌦𑍍𑌰𑍁𑌤𑌂
𑌯𑍋𑌗𑍇 𑌧𑍈𑌰𑍍𑌯𑌸𑌮𑌾𑌧𑌿𑌸𑌿𑌦𑍍𑌧𑌿𑌸𑍁𑌲𑌭𑍇 𑌬𑍁𑌦𑍍𑌧𑌿𑌂 𑌵𑌿𑌦𑌧𑍍𑌵𑌂 𑌬𑍁𑌧𑌾𑌃 ॥ 3.35 ॥

𑌆𑌯𑍁𑌃 𑌕𑌲𑍍𑌲𑍋𑌲𑌲𑍋𑌲𑌂 𑌕𑌤𑌿𑌪𑌯𑌦𑌿𑌵𑌸𑌸𑍍𑌥𑌾𑌯𑌿𑌨𑍀 𑌯𑍌𑌵𑌨𑌶𑍍𑌰𑍀𑌃
𑌅𑌰𑍍𑌥𑌾𑌃 𑌸𑌂𑌕𑌲𑍍𑌪𑌕𑌲𑍍𑌪𑌾 𑌘𑌨𑌸𑌮𑌯𑌤𑌡𑌿𑌦𑍍𑌵𑌿𑌭𑍍𑌰𑌮𑌾 𑌭𑍋𑌗𑌪𑍂𑌗𑌾𑌃 ।
𑌕𑌂𑌠𑌾𑌶𑍍𑌲𑍇𑌷𑍋𑌪𑌗𑍂𑌢𑌂 𑌤𑌦𑌪𑌿 𑌚 𑌨 𑌚𑌿𑌰𑌂 𑌯𑌤𑍍𑌪𑍍𑌰𑌿𑌯𑌾𑌭𑌿𑌃 𑌪𑍍𑌰𑌣𑍀𑌤𑌂
𑌬𑍍𑌰𑌹𑍍𑌮𑌣𑍍𑌯𑌾𑌸𑌕𑍍𑌤𑌚𑌿𑌤𑍍𑌤𑌾 𑌭𑌵𑌤 𑌭𑌵𑌭𑌯𑌾𑌂𑌭𑍋𑌧𑌿𑌪𑌾𑌰𑌂 𑌤𑌰𑍀𑌤𑍁𑌮𑍍 ॥ 3.36 ॥

𑌕𑍃𑌚𑍍𑌛𑍍𑌰𑍇𑌣𑌾𑌮𑍇𑌧𑍍𑌯𑌮𑌧𑍍𑌯𑍇 𑌨𑌿𑌯𑌮𑌿𑌤𑌤𑌨𑍁𑌭𑌿𑌃 𑌸𑍍𑌥𑍀𑌯𑌤𑍇 𑌗𑌰𑍍𑌭𑌵𑌾𑌸𑍇
𑌕𑌾𑌂𑌤𑌾𑌵𑌿𑌶𑍍𑌲𑍇𑌷𑌦𑍁𑌃𑌖𑌵𑍍𑌯𑌤𑌿𑌕𑌰𑌵𑌿𑌷𑌮𑍋 𑌯𑍌𑌵𑌨𑍇 𑌚𑍋𑌪𑌭𑍋𑌗𑌃 ।
𑌵𑌾𑌮𑌾𑌕𑍍𑌷𑍀𑌣𑌾𑌂 𑌅𑌵𑌜𑍍𑌞𑌾𑌵𑌿𑌹𑌸𑌿𑌤𑌵𑌸𑌤𑌿𑌰𑍍𑌵𑍃𑌦𑍍𑌧𑌭𑌾𑌵𑍋𑌽𑌪𑍍𑌯𑌸𑌾𑌧𑍁𑌃
𑌸𑌂𑌸𑌾𑌰𑍇 𑌰𑍇 𑌮𑌨𑍁𑌷𑍍𑌯𑌾 𑌵𑌦𑌤 𑌯𑌦𑌿 𑌸𑍁𑌖𑌂 𑌸𑍍𑌵𑌲𑍍𑌪𑌂 𑌅𑌪𑍍𑌯𑌸𑍍𑌤𑌿 𑌕𑌿𑌂𑌚𑌿𑌤𑍍 ॥ 3.3𑍭 ॥

𑌵𑍍𑌯𑌾𑌘𑍍𑌰𑍀𑌵 𑌤𑌿𑌷𑍍𑌠𑌤𑌿 𑌜𑌰𑌾 𑌪𑌰𑌿𑌤𑌰𑍍𑌜𑌯𑌂𑌤𑍀
𑌰𑍋𑌗𑌾𑌶𑍍𑌚 𑌶𑌤𑍍𑌰𑌵 𑌇𑌵 𑌪𑍍𑌰𑌹𑌰𑌂𑌤𑌿 𑌦𑍇𑌹𑌮𑍍 ।
𑌆𑌯𑍁𑌃 𑌪𑌰𑌿𑌸𑍍𑌰𑌵𑌤𑌿 𑌭𑌿𑌨𑍍𑌨𑌘𑌟𑌾𑌦𑌿𑌵𑌾𑌂𑌭𑍋
𑌲𑍋𑌕𑌸𑍍𑌤𑌥𑌾𑌪𑍍𑌯𑌹𑌿𑌤𑌂 𑌆𑌚𑌰𑌤𑍀𑌤𑌿 𑌚𑌿𑌤𑍍𑌰𑌮𑍍 ॥ 3.3𑍮 ॥

𑌭𑍋𑌗𑌾 𑌭𑌂𑌗𑍁𑌰𑌵𑍃𑌤𑍍𑌤𑌯𑍋 𑌬𑌹𑍁𑌵𑌿𑌧𑌾𑌸𑍍𑌤𑍈𑌰𑍇𑌵 𑌚𑌾𑌯𑌂 𑌭𑌵𑌸𑍍𑌤𑌤𑍍
𑌕𑌸𑍍𑌯𑍇𑌹 𑌕𑍃𑌤𑍇 𑌪𑌰𑌿𑌭𑍍𑌰𑌮𑌤 𑌰𑍇 𑌲𑍋𑌕𑌾𑌃 𑌕𑍃𑌤𑌂 𑌚𑍇𑌷𑍍𑌟𑌿𑌤𑍈𑌃 ।
𑌆𑌶𑌾𑌪𑌾𑌶𑌶𑌤𑍋𑌪𑌶𑌾𑌂𑌤𑌿𑌵𑌿𑌶𑌦𑌂 𑌚𑍇𑌤𑌃𑌸𑌮𑌾𑌧𑍀𑌯𑌤𑌾𑌂
𑌕𑌾𑌮𑍋𑌤𑍍𑌪𑌤𑍍𑌤𑌿𑌵𑌶𑌾𑌤𑍍𑌸𑍍𑌵𑌧𑌾𑌮𑌨𑌿 𑌯𑌦𑌿 𑌶𑍍𑌰𑌦𑍍𑌧𑍇𑌯𑌂 𑌅𑌸𑍍𑌮𑌦𑍍𑌵𑌚𑌃 ॥ 3.3𑍯 ॥

𑌸𑌖𑍇 𑌧𑌨𑍍𑌯𑌾𑌃 𑌕𑍇𑌚𑌿𑌤𑍍𑌤𑍍𑌰𑍁𑌟𑌿𑌤𑌭𑌵𑌬𑌂𑌧𑌵𑍍𑌯𑌤𑌿𑌕𑌰𑌾
𑌵𑌨𑌾𑌂𑌤𑍇 𑌚𑌿𑌤𑍍𑌤𑌾𑌂𑌤𑌰𑍍𑌵𑌿𑌷𑌮𑌵𑌿𑌷𑌯𑌾𑌶𑍀𑌵𑌿𑌷𑌗𑌤𑌾𑌃 ।
𑌶𑌰𑌚𑍍𑌚𑌂𑌦𑍍𑌰𑌜𑍍𑌯𑍋𑌤𑍍𑌸𑍍𑌨𑌾𑌧𑌵𑌲𑌗𑌗𑌨𑌾𑌭𑍋𑌗𑌸𑍁𑌭𑌗𑌾𑌂
𑌨𑌯𑌂𑌤𑍇 𑌯𑍇 𑌰𑌾𑌤𑍍𑌰𑌿𑌂 𑌸𑍁𑌕𑍃𑌤𑌚𑌯𑌚𑌿𑌂𑌤𑍈𑌕𑌶𑌰𑌣𑌾𑌃 ॥ 3.3𑍯.1 ॥

𑌬𑍍𑌰𑌹𑍍𑌮𑍇𑌂𑌦𑍍𑌰𑌾𑌦𑌿𑌮𑌰𑍁𑌦𑍍𑌗𑌣𑌾𑌂𑌸𑍍𑌤𑍃𑌣𑌕𑌣𑌾𑌨𑍍𑌯𑌤𑍍𑌰 𑌸𑍍𑌥𑌿𑌤𑍋 𑌮𑌨𑍍𑌯𑌤𑍇
𑌯𑌤𑍍𑌸𑍍𑌵𑌾𑌦𑌾𑌦𑍍𑌵𑌿𑌰𑌸𑌾 𑌭𑌵𑌂𑌤𑌿 𑌵𑌿𑌭𑌵𑌾𑌸𑍍𑌤𑍍𑌰𑍈𑌲𑍋𑌕𑍍𑌯𑌰𑌾𑌜𑍍𑌯𑌾𑌦𑌯𑌃 ।
𑌭𑍋𑌗𑌃 𑌕𑍋𑌽𑌪𑌿 𑌸 𑌏𑌵 𑌏𑌕𑌃 𑌪𑌰𑌮𑍋 𑌨𑌿𑌤𑍍𑌯𑍋𑌦𑌿𑌤𑍋 𑌜𑍃𑌂𑌭𑌤𑍇
𑌭𑍋𑌃 𑌸𑌾𑌧𑍋 𑌕𑍍𑌷𑌣𑌭𑌂𑌗𑍁𑌰𑍇 𑌤𑌦𑌿𑌤𑌰𑍇 𑌭𑍋𑌗𑍇 𑌰𑌤𑌿𑌂 𑌮𑌾 𑌕𑍃𑌥𑌾𑌃 ॥ 3.40 ॥

𑌸𑌾 𑌰𑌮𑍍𑌯𑌾 𑌨𑌗𑌰𑍀 𑌮𑌹𑌾𑌨𑍍𑌸 𑌨𑍃𑌪𑌤𑌿𑌃 𑌸𑌾𑌮𑌂𑌤𑌚𑌕𑍍𑌰𑌂 𑌚 𑌤𑌤𑍍
𑌪𑌾𑌰𑍍𑌶𑍍𑌵𑍇 𑌤𑌸𑍍𑌯 𑌚 𑌸𑌾 𑌵𑌿𑌦𑌗𑍍𑌧𑌪𑌰𑌿𑌷𑌤𑍍𑌤𑌾𑌶𑍍𑌚𑌂𑌦𑍍𑌰𑌬𑌿𑌂𑌬𑌾𑌨𑌨𑌾𑌃 ।
𑌉𑌦𑍍𑌵𑍃𑌤𑍍𑌤𑌃 𑌸 𑌰𑌾𑌜𑌪𑍁𑌤𑍍𑌰𑌨𑌿𑌵𑌹𑌸𑍍𑌤𑍇 𑌵𑌂𑌦𑌿𑌨𑌸𑍍𑌤𑌾𑌃 𑌕𑌥𑌾𑌃
𑌸𑌰𑍍𑌵𑌂 𑌯𑌸𑍍𑌯 𑌵𑌶𑌾𑌦𑌗𑌾𑌤𑍍𑌸𑍍𑌮𑍃𑌤𑌿𑌪𑌥𑌂 𑌕𑌾𑌲𑌾𑌯 𑌤𑌸𑍍𑌮𑍈 𑌨𑌮𑌃 ॥ 3.41 ॥

𑌯𑌤𑍍𑌰𑌾𑌨𑍇𑌕𑌃 𑌕𑍍𑌵𑌚𑌿𑌦𑌪𑌿 𑌗𑍃𑌹𑍇 𑌤𑌤𑍍𑌰 𑌤𑌿𑌷𑍍𑌠𑌤𑍍𑌯𑌥𑍈𑌕𑍋
𑌯𑌤𑍍𑌰𑌾𑌪𑍍𑌯𑍇𑌕𑌸𑍍𑌤𑌦𑌨𑍁 𑌬𑌹𑌵𑌸𑍍𑌤𑌤𑍍𑌰 𑌨𑍈𑌕𑍋𑌽𑌪𑌿 𑌚𑌾𑌂𑌤𑍇 ।
𑌇𑌤𑍍𑌥𑌂 𑌨𑍇𑌯𑍌 𑌰𑌜𑌨𑌿𑌦𑌿𑌵𑌸𑍌 𑌲𑍋𑌲𑌯𑌂𑌦𑍍𑌵𑌾𑌵𑌿𑌵𑌾𑌕𑍍𑌷𑍌
𑌕𑌾𑌲𑌃 𑌕𑌲𑍍𑌯𑍋 𑌭𑍁𑌵𑌨𑌫𑌲𑌕𑍇 𑌕𑍍𑌰𑍀𑌡𑌤𑌿 𑌪𑍍𑌰𑌾𑌣𑌿𑌶𑌾𑌰𑍈𑌃 ॥ 3.42 ॥

𑌆𑌦𑌿𑌤𑍍𑌯𑌸𑍍𑌯 𑌗𑌤𑌾𑌗𑌤𑍈𑌰𑌹𑌰𑌹𑌃 𑌸𑌂𑌕𑍍𑌷𑍀𑌯𑌤𑍇 𑌜𑍀𑌵𑌿𑌤𑌂
𑌵𑍍𑌯𑌾𑌪𑌾𑌰𑍈𑌰𑍍𑌬𑌹𑍁𑌕𑌾𑌰𑍍𑌯𑌭𑌾𑌰𑌗𑍁𑌰𑍁𑌭𑌿𑌃 𑌕𑌾𑌲𑍋𑌽𑌪𑌿 𑌨 𑌜𑍍𑌞𑌾𑌯𑌤𑍇 ।
𑌦𑍃𑌷𑍍𑌟𑍍𑌵𑌾 𑌜𑌨𑍍𑌮𑌜𑌰𑌾𑌵𑌿𑌪𑌤𑍍𑌤𑌿𑌮𑌰𑌣𑌂 𑌤𑍍𑌰𑌾𑌸𑌶𑍍𑌚 𑌨𑍋𑌤𑍍𑌪𑌦𑍍𑌯𑌤𑍇
𑌪𑍀𑌤𑍍𑌵𑌾 𑌮𑍋𑌹𑌮𑌯𑍀𑌂 𑌪𑍍𑌰𑌮𑌾𑌦𑌮𑌦𑌿𑌰𑌾𑌂 𑌉𑌨𑍍𑌮𑌤𑍍𑌤𑌭𑍂𑌤𑌂 𑌜𑌗𑌤𑍍 ॥ 3.43 ॥

𑌰𑌾𑌤𑍍𑌰𑌿𑌃 𑌸𑍈𑌵 𑌪𑍁𑌨𑌃 𑌸 𑌏𑌵 𑌦𑌿𑌵𑌸𑍋 𑌮𑌤𑍍𑌵𑌾 𑌮𑍁𑌧𑌾 𑌜𑌂𑌤𑌵𑍋
𑌧𑌾𑌵𑌂𑌤𑍍𑌯𑍁𑌦𑍍𑌯𑌮𑌿𑌨𑌸𑍍𑌤𑌥𑍈𑌵 𑌨𑌿𑌭𑍃𑌤𑌪𑍍𑌰𑌾𑌰𑌬𑍍𑌧𑌤𑌤𑍍𑌤𑌤𑍍𑌕𑍍𑌰𑌿𑌯𑌾𑌃 ।
𑌵𑍍𑌯𑌾𑌪𑌾𑌰𑍈𑌃 𑌪𑍁𑌨𑌰𑍍​𑌉𑌕𑍍𑌤𑌭𑍂𑌤𑌵𑌿𑌷𑌯𑍈𑌰𑌿𑌤𑍍𑌥𑌂 𑌵𑌿𑌧𑍇𑌨𑌾𑌮𑍁𑌨𑌾
𑌸𑌂𑌸𑌾𑌰𑍇𑌣 𑌕𑌦𑌰𑍍𑌥𑌿𑌤𑌾 𑌵𑌯𑌂 𑌅𑌹𑍋 𑌮𑍋𑌹𑌾𑌨𑍍𑌨 𑌲𑌜𑍍𑌜𑌾𑌮𑌹𑍇 ॥ 3.44 ॥

𑌨 𑌧𑍍𑌯𑌾𑌤𑌂 𑌪𑌦𑌂 𑌈𑌶𑍍𑌵𑌰𑌸𑍍𑌯 𑌵𑌿𑌧𑌿𑌵𑌤𑍍𑌸𑌂𑌸𑌾𑌰𑌵𑌿𑌚𑍍𑌛𑌿𑌤𑍍𑌤𑌯𑍇
𑌸𑍍𑌵𑌰𑍍𑌗𑌦𑍍𑌵𑌾𑌰𑌕𑌪𑌾𑌟𑌪𑌾𑌟𑌨𑌪𑌟𑍁𑌰𑍍𑌧𑌰𑍍𑌮𑍋𑌽𑌪𑌿 𑌨𑍋𑌪𑌾𑌰𑍍𑌜𑌿𑌤𑌃 ।
𑌨𑌾𑌰𑍀𑌪𑍀𑌨𑌪𑌯𑍋𑌧𑌰𑍋𑌰𑍁𑌯𑍁𑌗𑌲𑌂 𑌸𑍍𑌵𑌪𑍍𑌨𑍇𑌽𑌪𑌿 𑌨𑌾𑌲𑌿𑌂𑌗𑌿𑌤𑌂
𑌮𑌾𑌤𑍁𑌃 𑌕𑍇𑌵𑌲𑌂 𑌏𑌵 𑌯𑍌𑌵𑌨𑌵𑌨𑌚𑍍𑌛𑍇𑌦𑍇 𑌕𑍁𑌠𑌾𑌰𑌾 𑌵𑌯𑌮𑍍 ॥ 3.45 ॥

𑌨𑌾𑌭𑍍𑌯𑌸𑍍𑌤𑌾 𑌪𑍍𑌰𑌤𑌿𑌵𑌾𑌦𑌿𑌵𑍃𑌂𑌦𑌦𑌮𑌨𑍀 𑌵𑌿𑌦𑍍𑌯𑌾 𑌵𑌿𑌨𑍀𑌤𑍋𑌚𑌿𑌤𑌾
𑌖𑌡𑍍𑌗𑌾𑌗𑍍𑌰𑍈𑌃 𑌕𑌰𑌿𑌕𑍁𑌂𑌭𑌪𑍀𑌠𑌦𑌲𑌨𑍈𑌰𑍍𑌨𑌾𑌕𑌂 𑌨 𑌨𑍀𑌤𑌂 𑌯𑌶𑌃 ।
𑌕𑌾𑌂𑌤𑌾𑌕𑍋𑌮𑌲𑌪𑌲𑍍𑌲𑌵𑌾𑌧𑌰𑌰𑌸𑌃 𑌪𑍀𑌤𑍋 𑌨 𑌚𑌂𑌦𑍍𑌰𑍋𑌦𑌯𑍇
𑌤𑌾𑌰𑍁𑌣𑍍𑌯𑌂 𑌗𑌤𑌂 𑌏𑌵 𑌨𑌿𑌷𑍍𑌫𑌲𑌂 𑌅𑌹𑍋 𑌶𑍂𑌨𑍍𑌯𑌾𑌲𑌯𑍇 𑌦𑍀𑌪𑌵𑌤𑍍 ॥ 3.46 ॥

𑌵𑌿𑌦𑍍𑌯𑌾 𑌨𑌾𑌧𑌿𑌗𑌤𑌾 𑌕𑌲𑌂𑌕𑌰𑌹𑌿𑌤𑌾 𑌵𑌿𑌤𑍍𑌤𑌂 𑌚 𑌨𑍋𑌪𑌾𑌰𑍍𑌜𑌿𑌤𑌂
𑌶𑍁𑌶𑍍𑌰𑍂𑌷𑌾𑌪𑌿 𑌸𑌮𑌾𑌹𑌿𑌤𑍇𑌨 𑌮𑌨𑌸𑌾 𑌪𑌿𑌤𑍍𑌰𑍋𑌰𑍍𑌨 𑌸𑌂𑌪𑌾𑌦𑌿𑌤𑌾 ।
𑌆𑌲𑍋𑌲𑌾𑌯𑌤𑌲𑍋𑌚𑌨𑌾𑌃 𑌪𑍍𑌰𑌿𑌯𑌤𑌮𑌾𑌃 𑌸𑍍𑌵𑌪𑍍𑌨𑍇𑌽𑌪𑌿 𑌨𑌾𑌲𑌿𑌂𑌗𑌿𑌤𑌾𑌃
𑌕𑌾𑌲𑍋𑌽𑌯𑌂 𑌪𑌰𑌪𑌿𑌂𑌡𑌲𑍋𑌲𑍁𑌪𑌤𑌯𑌾 𑌕𑌾𑌕𑍈𑌰𑌿𑌵 𑌪𑍍𑌰𑍇𑌰𑍍𑌯𑌤𑍇 ॥ 3.4𑍭 ॥

𑌵𑌯𑌂 𑌯𑍇𑌭𑍍𑌯𑍋 𑌜𑌾𑌤𑌾𑌶𑍍𑌚𑌿𑌰𑌪𑌰𑌿𑌗𑌤𑌾 𑌏𑌵 𑌖𑌲𑍁 𑌤𑍇
𑌸𑌮𑌂 𑌯𑍈𑌃 𑌸𑌂𑌵𑍃𑌦𑍍𑌧𑌾𑌃 𑌸𑍍𑌮𑍃𑌤𑌿𑌵𑌿𑌷𑌯𑌤𑌾𑌂 𑌤𑍇𑌽𑌪𑌿 𑌗𑌮𑌿𑌤𑌾𑌃 ।
𑌇𑌦𑌾𑌨𑍀𑌂 𑌏𑌤𑍇 𑌸𑍍𑌮𑌃 𑌪𑍍𑌰𑌤𑌿𑌦𑌿𑌵𑌸𑌂 𑌆𑌸𑌨𑍍𑌨𑌪𑌤𑌨𑌾
𑌗𑌤𑌾𑌸𑍍𑌤𑍁𑌲𑍍𑌯𑌾𑌵𑌸𑍍𑌥𑌾𑌂 𑌸𑌿𑌕𑌤𑌿𑌲𑌨𑌦𑍀𑌤𑍀𑌰𑌤𑌰𑍁𑌭𑌿𑌃 ॥ 3.4𑍮 ॥

𑌆𑌯𑍁𑌰𑍍𑌵𑌰𑍍𑌷𑌶𑌤𑌂 𑌨𑍃𑌣𑌾𑌂 𑌪𑌰𑌿𑌮𑌿𑌤𑌂 𑌰𑌾𑌤𑍍𑌰𑍌 𑌤𑌦𑍍​𑌅𑌰𑍍𑌧𑌂 𑌗𑌤𑌂
𑌤𑌸𑍍𑌯𑌾𑌰𑍍𑌧𑌸𑍍𑌯 𑌪𑌰𑌸𑍍𑌯 𑌚𑌾𑌰𑍍𑌧𑌂 𑌅𑌪𑌰𑌂 𑌬𑌾𑌲𑌤𑍍𑌵𑌵𑍃𑌦𑍍𑌧𑌤𑍍𑌵𑌯𑍋𑌃 ।
𑌶𑍇𑌷𑌂 𑌵𑍍𑌯𑌾𑌧𑌿𑌵𑌿𑌯𑍋𑌗𑌦𑍁𑌃𑌖𑌸𑌹𑌿𑌤𑌂 𑌸𑍇𑌵𑌾𑌦𑌿𑌭𑌿𑌰𑍍𑌨𑍀𑌯𑌤𑍇
𑌜𑍀𑌵𑍇 𑌵𑌾𑌰𑌿𑌤𑌰𑌂𑌗𑌚𑌂𑌚𑌲𑌤𑌰𑍇 𑌸𑍌𑌖𑍍𑌯𑌂 𑌕𑍁𑌤𑌃 𑌪𑍍𑌰𑌾𑌣𑌿𑌨𑌾𑌮𑍍 ॥ 3.4𑍯 ॥

𑌕𑍍𑌷𑌣𑌂 𑌬𑌾𑌲𑍋 𑌭𑍂𑌤𑍍𑌵𑌾 𑌕𑍍𑌷𑌣𑌂 𑌅𑌪𑌿 𑌯𑍁𑌵𑌾 𑌕𑌾𑌮𑌰𑌸𑌿𑌕𑌃
𑌕𑍍𑌷𑌣𑌂 𑌵𑌿𑌤𑍍𑌤𑍈𑌰𑍍𑌹𑍀𑌨𑌃 𑌕𑍍𑌷𑌣𑌂 𑌅𑌪𑌿 𑌚 𑌸𑌂𑌪𑍂𑌰𑍍𑌣𑌵𑌿𑌭𑌵𑌃 ।
𑌜𑌰𑌾𑌜𑍀𑌰𑍍𑌣𑍈𑌰𑌂𑌗𑍈𑌰𑍍𑌨𑌟 𑌇𑌵 𑌵𑌲𑍀𑌮𑌂𑌡𑌿𑌤𑌤𑌨𑍂𑌰𑍍
𑌨𑌰𑌃 𑌸𑌂𑌸𑌾𑌰𑌾𑌂𑌤𑍇 𑌵𑌿𑌶𑌤𑌿 𑌯𑌮𑌧𑌾𑌨𑍀𑌯𑌵𑌨𑌿𑌕𑌾𑌮𑍍 ॥ 3.50 ॥

𑌤𑍍𑌵𑌂 𑌰𑌾𑌜𑌾 𑌵𑌯𑌂 𑌅𑌪𑍍𑌯𑍁𑌪𑌾𑌸𑌿𑌤𑌗𑍁𑌰𑍁𑌪𑍍𑌰𑌜𑍍𑌞𑌾𑌭𑌿𑌮𑌾𑌨𑍋𑌨𑍍𑌨𑌤𑌾𑌃
𑌖𑍍𑌯𑌾𑌤𑌸𑍍𑌤𑍍𑌵𑌂 𑌵𑌿𑌭𑌵𑍈𑌰𑍍𑌯𑌶𑌾𑌂𑌸𑌿 𑌕𑌵𑌯𑍋 𑌦𑌿𑌕𑍍𑌷𑍁 𑌪𑍍𑌰𑌤𑌨𑍍𑌵𑌂𑌤𑌿 𑌨𑌃 ।
𑌇𑌤𑍍𑌥𑌂 𑌮𑌾𑌨𑌧𑌨𑌾𑌤𑌿𑌦𑍂𑌰𑌂 𑌉𑌭𑌯𑍋𑌰𑌪𑍍𑌯𑌾𑌵𑌯𑍋𑌰𑌂𑌤𑌰𑌂
𑌯𑌦𑍍𑌯𑌸𑍍𑌮𑌾𑌸𑍁 𑌪𑌰𑌾𑌙𑍍𑌮𑍁𑌖𑍋𑌽𑌸𑌿 𑌵𑌯𑌂 𑌅𑌪𑍍𑌯𑍇𑌕𑌾𑌂𑌤𑌤𑍋 𑌨𑌿𑌃𑌸𑍍𑌪𑍃𑌹𑌾𑌃 ॥ 3.51 ॥

𑌅𑌰𑍍𑌥𑌾𑌨𑌾𑌂 𑌈𑌶𑌿𑌷𑍇 𑌤𑍍𑌵𑌂 𑌵𑌯𑌂 𑌅𑌪𑌿 𑌚 𑌗𑌿𑌰𑌾𑌂 𑌈𑌶𑍍𑌮𑌹𑍇 𑌯𑌾𑌵𑌦𑌰𑍍𑌥𑌂
𑌶𑍂𑌰𑌸𑍍𑌤𑍍𑌵𑌂 𑌵𑌾𑌦𑌿𑌦𑌰𑍍𑌪𑌵𑍍𑌯𑍁𑌪𑌶𑌮𑌨𑌵𑌿𑌧𑌾𑌵𑌕𑍍𑌷𑌯𑌂 𑌪𑌾𑌟𑌵𑌂 𑌨𑌃 ।
𑌸𑍇𑌵𑌂𑌤𑍇 𑌤𑍍𑌵𑌾𑌂 𑌧𑌨𑌾𑌢𑍍𑌯𑌾 𑌮𑌤𑌿𑌮𑌲𑌹𑌤𑌯𑍇 𑌮𑌾𑌂 𑌅𑌪𑌿 𑌶𑍍𑌰𑍋𑌤𑍁𑌕𑌾𑌮𑌾𑌃 ।
𑌮𑌯𑍍𑌯𑌪𑍍𑌯𑌾𑌸𑍍𑌥𑌾 𑌨 𑌤𑍇 𑌚𑍇𑌤𑍍𑌤𑍍𑌵𑌯𑌿 𑌮𑌮 𑌨𑌿𑌤𑌰𑌾𑌂 𑌏𑌵 𑌰𑌾𑌜𑌨𑍍𑌨𑌨𑌾𑌸𑍍𑌥𑌾 ॥ 3.52 ॥

𑌵𑌯𑌂 𑌇𑌹 𑌪𑌰𑌿𑌤𑍁𑌷𑍍𑌟𑌾 𑌵𑌲𑍍𑌕𑌲𑍈𑌸𑍍𑌤𑍍𑌵𑌂 𑌦𑍁𑌕𑍂𑌲𑍈𑌃
𑌸𑌮 𑌇𑌹 𑌪𑌰𑌿𑌤𑍋𑌷𑍋 𑌨𑌿𑌰𑍍𑌵𑌿𑌶𑍇𑌷𑍋 𑌵𑌿𑌶𑍇𑌷𑌃 ।
𑌸 𑌤𑍁 𑌭𑌵𑌤𑍁 𑌦𑌰𑌿𑌦𑍍𑌰𑍋 𑌯𑌸𑍍𑌯 𑌤𑍃𑌷𑍍𑌣𑌾 𑌵𑌿𑌶𑌾𑌲𑌾
𑌮𑌨𑌸𑌿 𑌚 𑌪𑌰𑌿𑌤𑍁𑌷𑍍𑌟𑍇 𑌕𑍋𑌽𑌰𑍍𑌥𑌵𑌾𑌨𑍍𑌕𑍋 𑌦𑌰𑌿𑌦𑍍𑌰𑌃 ॥ 3.53 ॥

𑌫𑌲𑌂 𑌅𑌲𑌂 𑌅𑌶𑌨𑌾𑌯 𑌸𑍍𑌵𑌾𑌦𑍁 𑌪𑌾𑌨𑌾𑌯 𑌤𑍋𑌯𑌂
𑌕𑍍𑌷𑌿𑌤𑌿𑌰𑌪𑌿 𑌶𑌯𑌨𑌾𑌰𑍍𑌥𑌂 𑌵𑌾𑌸𑌸𑍇 𑌵𑌲𑍍𑌕𑌲𑌂 𑌚 ।
𑌨𑌵𑌧𑌨𑌮𑌧𑍁𑌪𑌾𑌨𑌭𑍍𑌰𑌾𑌂𑌤𑌸𑌰𑍍𑌵𑍇𑌂𑌦𑍍𑌰𑌿𑌯𑌾𑌣𑌾𑌂
𑌅𑌵𑌿𑌨𑌯𑌂 𑌅𑌨𑍁𑌮𑌂𑌤𑍁𑌂 𑌨𑍋𑌤𑍍𑌸𑌹𑍇 𑌦𑍁𑌰𑍍𑌜𑌨𑌾𑌨𑌾𑌮𑍍 ॥ 3.54 ॥

𑌅𑌶𑍍𑌨𑍀𑌮𑌹𑌿 𑌵𑌯𑌂 𑌭𑌿𑌕𑍍𑌷𑌾𑌂 𑌆𑌶𑌾𑌵𑌾𑌸𑍋 𑌵𑌸𑍀𑌮𑌹𑌿 ।
𑌶𑌯𑍀𑌮𑌹𑌿 𑌮𑌹𑍀𑌪𑍃𑌷𑍍𑌠𑍇 𑌕𑍁𑌰𑍍𑌵𑍀𑌮𑌹𑌿 𑌕𑌿𑌂 𑌈𑌶𑍍𑌵𑌰𑍈𑌃 ॥ 3.55 ॥

𑌨 𑌨𑌟𑌾 𑌨𑌾 𑌵𑌿𑌟𑌾 𑌨 𑌗𑌾𑌯𑌕𑌾 𑌨 𑌚 𑌸𑌭𑍍𑌯𑍇𑌤𑌰𑌵𑌾𑌦𑌚𑍁𑌂𑌚𑌵𑌃 ।
𑌨𑍃𑌪𑌂 𑌈𑌕𑍍𑌷𑌿𑌤𑍁𑌂 𑌅𑌤𑍍𑌰 𑌕𑍇 𑌵𑌯𑌂 𑌸𑍍𑌤𑌨𑌭𑌾𑌰𑌾𑌨𑌮𑌿𑌤𑌾 𑌨 𑌯𑍋𑌷𑌿𑌤𑌃 ॥ 3.56 ॥

𑌵𑌿𑌪𑍁𑌲𑌹𑍃𑌦𑌯𑍈𑌰𑍀𑌶𑍈𑌰𑍇𑌤𑌜𑍍𑌜𑌗𑌜𑍍𑌜𑌨𑌿𑌤𑌂 𑌪𑍁𑌰𑌾
𑌵𑌿𑌧𑍃𑌤𑌂 𑌅𑌪𑌰𑍈𑌰𑍍𑌦𑌤𑍍𑌤𑌂 𑌚𑌾𑌨𑍍𑌯𑍈𑌰𑍍𑌵𑌿𑌜𑌿𑌤𑍍𑌯 𑌤𑍃𑌣𑌂 𑌯𑌥𑌾 ।
𑌇𑌹 𑌹𑌿 𑌭𑍁𑌵𑌨𑌾𑌨𑍍𑌯𑌨𑍍𑌯𑍈𑌰𑍍𑌧𑍀𑌰𑌾𑌶𑍍𑌚𑌤𑍁𑌰𑍍𑌦𑌶 𑌭𑍁𑌂𑌜𑌤𑍇
𑌕𑌤𑌿𑌪𑌯𑌪𑍁𑌰𑌸𑍍𑌵𑌾𑌮𑍍𑌯𑍇 𑌪𑍁𑌂𑌸𑌾𑌂 𑌕 𑌏𑌷 𑌮𑌦𑌜𑍍𑌵𑌰𑌃 ॥ 3.5𑍭 ॥

𑌅𑌭𑍁𑌕𑍍𑌤𑌾𑌯𑌾𑌂 𑌯𑌸𑍍𑌯𑌾𑌂 𑌕𑍍𑌷𑌣𑌂 𑌅𑌪𑌿 𑌨 𑌯𑌾𑌤𑌂 𑌨𑍃𑌪𑌶𑌤𑍈𑌰𑍍
𑌭𑍁𑌵𑌸𑍍𑌤𑌸𑍍𑌯𑌾 𑌲𑌾𑌭𑍇 𑌕 𑌇𑌵 𑌬𑌹𑍁𑌮𑌾𑌨𑌃 𑌕𑍍𑌷𑌿𑌤𑌿𑌭𑍃𑌤𑌾𑌮𑍍 ।
𑌤𑌦𑍍​𑌅𑌂𑌶𑌸𑍍𑌯𑌾𑌪𑍍𑌯𑌂𑌶𑍇 𑌤𑌦𑍍​𑌅𑌵𑌯𑌵𑌲𑍇𑌶𑍇𑌽𑌪𑌿 𑌪𑌤𑌯𑍋
𑌵𑌿𑌷𑌾𑌦𑍇 𑌕𑌰𑍍𑌤𑌵𑍍𑌯𑍇 𑌵𑌿𑌦𑌧𑌤𑌿 𑌜𑌡𑌾𑌃 𑌪𑍍𑌰𑌤𑍍𑌯𑍁𑌤 𑌮𑍁𑌦𑌮𑍍 ॥ 3.5𑍮 ॥

𑌮𑍃𑌤𑍍𑌪𑌿𑌂𑌡𑍋 𑌜𑌲𑌰𑍇𑌖𑌯𑌾 𑌵𑌲𑌯𑌿𑌤𑌃 𑌸𑌰𑍍𑌵𑍋𑌽𑌪𑍍𑌯𑌯𑌂 𑌨𑌨𑍍𑌵𑌣𑍁𑌃
𑌸𑍍𑌵𑌾𑌂𑌶𑍀𑌕𑍃𑌤𑍍𑌯 𑌸 𑌏𑌵 𑌸𑌂𑌗𑌰𑌶𑌤𑍈 𑌰𑌾𑌜𑍍𑌞𑌾𑌂 𑌗𑌣𑌾 𑌭𑍁𑌂𑌜𑌤𑍇 । [𑌤𑌮𑍇𑌵]
𑌯𑍇 𑌦𑌦𑍍𑌯𑍁𑌰𑍍𑌦𑌦𑌤𑍋𑌽𑌥𑌵𑌾 𑌕𑌿𑌂 𑌅𑌪𑌰𑌂 𑌕𑍍𑌷𑍁𑌦𑍍𑌰𑌾 𑌦𑌰𑌿𑌦𑍍𑌰𑌾 𑌭𑍃𑌶𑌂
𑌧𑌿𑌗𑍍𑌧𑌿𑌕𑍍𑌤𑌾𑌨𑍍𑌪𑍁𑌰𑍁𑌷𑌾𑌧𑌮𑌾𑌂𑌧𑌨𑌕𑌣𑌾𑌨𑍍𑌵𑌾𑌂𑌛𑌂𑌤𑌿 𑌤𑍇𑌭𑍍𑌯𑍋𑌽𑌪𑌿 𑌯𑍇 ॥ 3.5𑍯 ॥

𑌸 𑌜𑌾𑌤𑌃 𑌕𑍋𑌽𑌪𑍍𑌯𑌾𑌸𑍀𑌨𑍍𑌮𑌦𑌨𑌰𑌿𑌪𑍁𑌣𑌾 𑌮𑍂𑌰𑍍𑌧𑍍𑌨𑌿 𑌧𑌵𑌲𑌂
𑌕𑌪𑌾𑌲𑌂 𑌯𑌸𑍍𑌯𑍋𑌚𑍍𑌚𑍈𑌰𑍍𑌵𑌿𑌨𑌿𑌹𑌿𑌤𑌂 𑌅𑌲𑌂𑌕𑌾𑌰𑌵𑌿𑌧𑌯𑍇 ।
𑌨𑍃𑌭𑌿𑌃 𑌪𑍍𑌰𑌾𑌣𑌤𑍍𑌰𑌾𑌣𑌪𑍍𑌰𑌵𑌣𑌮𑌤𑌿𑌭𑌿𑌃 𑌕𑍈𑌶𑍍𑌚𑌿𑌦𑌧𑍁𑌨𑌾
𑌨𑌮𑌦𑍍𑌭𑌿𑌃 𑌕𑌃 𑌪𑍁𑌂𑌸𑌾𑌂 𑌅𑌯𑌂 𑌅𑌤𑍁𑌲𑌦𑌰𑍍𑌪𑌜𑍍𑌵𑌰𑌭𑌰𑌃 ॥ 3.60 ॥

𑌪𑌰𑍇𑌷𑌾𑌂 𑌚𑍇𑌤𑌾𑌂𑌸𑌿 𑌪𑍍𑌰𑌤𑌿𑌦𑌿𑌵𑌸𑌂 𑌆𑌰𑌾𑌧𑍍𑌯 𑌬𑌹𑍁𑌧𑌾
𑌪𑍍𑌰𑌸𑌾𑌦𑌂 𑌕𑌿𑌂 𑌨𑍇𑌤𑍁𑌂 𑌵𑌿𑌶𑌸𑌿 𑌹𑍃𑌦𑌯 𑌕𑍍𑌲𑍇𑌶𑌕𑌲𑌿𑌤𑌮𑍍 ।
𑌪𑍍𑌰𑌸𑌨𑍍𑌨𑍇 𑌤𑍍𑌵𑌯𑍍𑌯𑌂𑌤𑌃𑌸𑍍𑌵𑌯𑌮𑍁𑌦𑌿𑌤𑌚𑌿𑌂𑌤𑌾𑌮𑌣𑌿𑌗𑌣𑍋
𑌵𑌿𑌵𑌿𑌕𑍍𑌤𑌃 𑌸𑌂𑌕𑌲𑍍𑌪𑌃 𑌕𑌿𑌂 𑌅𑌭𑌿𑌲𑌷𑌿𑌤𑌂 𑌪𑍁𑌷𑍍𑌯𑌤𑌿 𑌨 𑌤𑍇 ॥ 3.61 ॥

𑌸𑌤𑍍𑌯𑌾𑌂 𑌏𑌵 𑌤𑍍𑌰𑌿𑌲𑍋𑌕𑍀𑌸𑌰𑌿𑌤𑌿 𑌹𑌰𑌶𑌿𑌰𑌶𑍍𑌚𑍁𑌂𑌬𑌿𑌨𑍀𑌵𑌚𑍍𑌛𑌟𑌾𑌯𑌾𑌂
𑌸𑌦𑍍𑌵𑍃𑌤𑍍𑌤𑌿𑌂 𑌕𑌲𑍍𑌪𑌯𑌂𑌤𑍍𑌯𑌾𑌂 𑌵𑌟𑌵𑌿𑌟𑌪𑌭𑌵𑍈𑌰𑍍𑌵𑌲𑍍𑌕𑌲𑍈𑌃 𑌸𑌤𑍍𑌫𑌲𑍈𑌶𑍍𑌚 ।
𑌕𑍋𑌽𑌯𑌂 𑌵𑌿𑌦𑍍𑌵𑌾𑌨𑍍𑌵𑌿𑌪𑌤𑍍𑌤𑌿𑌜𑍍𑌵𑌰𑌜𑌨𑌿𑌤𑌰𑍁𑌜𑌾𑌤𑍀𑌵𑌦𑍁𑌃𑌖𑌾𑌸𑌿𑌕𑌾𑌨𑌾𑌂
𑌵𑌕𑍍𑌤𑍍𑌰𑌂 𑌵𑍀𑌕𑍍𑌷𑍇𑌤 𑌦𑍁𑌃𑌸𑍍𑌥𑍇 𑌯𑌦𑌿 𑌹𑌿 𑌨 𑌵𑌿𑌭𑍃𑌯𑌾𑌤𑍍𑌸𑍍𑌵𑍇 𑌕𑍁𑌟𑍁𑌂𑌬𑍇𑌽𑌨𑍁𑌕𑌂𑌪𑌾𑌮𑍍 ॥ 3.61.1 ॥

𑌪𑌰𑌿𑌭𑍍𑌰𑌮𑌸𑌿 𑌕𑌿𑌂 𑌮𑍁𑌧𑌾 𑌕𑍍𑌵𑌚𑌨 𑌚𑌿𑌤𑍍𑌤 𑌵𑌿𑌶𑍍𑌰𑌾𑌮𑍍𑌯𑌤𑌾𑌂
𑌸𑍍𑌵𑌯𑌂 𑌭𑌵𑌤𑌿 𑌯𑌦𑍍𑌯𑌥𑌾 𑌭𑌵𑌤𑌿 𑌤𑌤𑍍𑌤𑌥𑌾 𑌨𑌾𑌨𑍍𑌯𑌥𑌾 ।
𑌅𑌤𑍀𑌤𑌂 𑌅𑌨𑌨𑍁𑌸𑍍𑌮𑌰𑌨𑍍𑌨𑌪𑌿 𑌚 𑌭𑌾𑌵𑍍𑌯𑌸𑌂𑌕𑌲𑍍𑌪𑌯𑌨𑍍𑌨𑌤𑌰𑍍𑌕𑌿𑌤
𑌸𑌮𑌾𑌗𑌮𑌾𑌨𑌨𑍁𑌭𑌵𑌾𑌮𑌿 𑌭𑍋𑌗𑌾𑌨𑌹𑌮𑍍 ॥ 3.62 ॥

𑌏𑌤𑌸𑍍𑌮𑌾𑌦𑍍𑌵𑌿𑌰𑌮𑍇𑌂𑌦𑍍𑌰𑌿𑌯𑌾𑌰𑍍𑌥𑌗𑌹𑌨𑌾𑌦𑌾𑌯𑌾𑌸𑌕𑌾𑌦𑌾𑌶𑍍𑌰𑌯𑌶𑍍𑌰𑍇𑌯𑍋
𑌮𑌾𑌰𑍍𑌗𑌂 𑌅𑌶𑍇𑌷𑌦𑍁𑌃𑌖𑌶𑌮𑌨𑌵𑍍𑌯𑌾𑌪𑌾𑌰𑌦𑌕𑍍𑌷𑌂 𑌕𑍍𑌷𑌣𑌾𑌤𑍍 ।
𑌸𑍍𑌵𑌾𑌤𑍍𑌮𑍀𑌭𑌾𑌵𑌂 𑌉𑌪𑍈𑌹𑌿 𑌸𑌂𑌤𑍍𑌯𑌜 𑌨𑌿𑌜𑌾𑌂 𑌕𑌲𑍍𑌲𑍋𑌲𑌲𑍋𑌲𑌾𑌂 𑌗𑌤𑌿𑌂
𑌮𑌾 𑌭𑍂𑌯𑍋 𑌭𑌜 𑌭𑌂𑌗𑍁𑌰𑌾𑌂 𑌭𑌵𑌰𑌤𑌿𑌂 𑌚𑍇𑌤𑌃 𑌪𑍍𑌰𑌸𑍀𑌦𑌾𑌧𑍁𑌨𑌾 ॥ 3.63 ॥

𑌮𑍋𑌹𑌂 𑌮𑌾𑌰𑍍𑌜𑌯 𑌤𑌾𑌂 𑌉𑌪𑌾𑌰𑍍𑌜𑌯 𑌰𑌤𑌿𑌂 𑌚𑌂𑌦𑍍𑌰𑌾𑌰𑍍𑌧𑌚𑍂𑌡𑌾𑌮𑌣𑍌
𑌚𑍇𑌤𑌃 𑌸𑍍𑌵𑌰𑍍𑌗𑌤𑌰𑌂𑌗𑌿𑌣𑍀𑌤𑌟𑌭𑍁𑌵𑌾𑌂 𑌆𑌸𑌂𑌗𑌂 𑌅𑌂𑌗𑍀𑌕𑍁𑌰𑍁 ।
𑌕𑍋 𑌵𑌾 𑌵𑍀𑌚𑌿𑌷𑍁 𑌬𑍁𑌦𑍍𑌬𑍁𑌦𑍇𑌷𑍁 𑌚 𑌤𑌡𑌿𑌲𑍍𑌲𑍇𑌖𑌾𑌸𑍁 𑌚 𑌶𑍍𑌰𑍀𑌷𑍁 𑌚
𑌜𑍍𑌵𑌾𑌲𑌾𑌗𑍍𑌰𑍇𑌷𑍁 𑌚 𑌪𑌨𑍍𑌨𑌗𑍇𑌷𑍁 𑌸𑌰𑌿𑌦𑍍𑌵𑍇𑌗𑍇𑌷𑍁 𑌚 𑌪𑍍𑌰𑌤𑍍𑌯𑌯𑌃 ॥ 3.64 ॥

𑌚𑍇𑌤𑌶𑍍𑌚𑌿𑌂𑌤𑌯 𑌮𑌾 𑌰𑌮𑌾𑌂 𑌸𑌕𑍃𑌦𑌿𑌮𑌾𑌂 𑌅𑌸𑍍𑌥𑌾𑌯𑌿𑌨𑍀𑌂 𑌆𑌸𑍍𑌥𑌯𑌾
𑌭𑍂𑌪𑌾𑌲𑌭𑍍𑌰𑍁𑌕𑍁𑌟𑍀𑌕𑍁𑌟𑍀𑌵𑌿𑌹𑌰𑌣𑌵𑍍𑌯𑌾𑌪𑌾𑌰𑌪𑌣𑍍𑌯𑌾𑌂𑌗𑌨𑌾𑌮𑍍 ।
𑌕𑌂𑌥𑌾𑌕𑌂𑌚𑍁𑌕𑌿𑌨𑌃 𑌪𑍍𑌰𑌵𑌿𑌶𑍍𑌯 𑌭𑌵𑌨𑌦𑍍𑌵𑌾𑌰𑌾𑌣𑌿 𑌵𑌾𑌰𑌾𑌣𑌸𑍀𑌰𑌥𑍍𑌯𑌾
𑌪𑌂𑌕𑍍𑌤𑌿𑌷𑍁 𑌪𑌾𑌣𑌿𑌪𑌾𑌤𑍍𑌰𑌪𑌤𑌿𑌤𑌾𑌂 𑌭𑌿𑌕𑍍𑌷𑌾𑌂 𑌅𑌪𑍇𑌕𑍍𑌷𑌾𑌮𑌹𑍇 ॥ 3.65 ॥

𑌅𑌗𑍍𑌰𑍇 𑌗𑍀𑌤𑌂 𑌸𑌰𑌸𑌕𑌵𑌯𑌃 𑌪𑌾𑌰𑍍𑌶𑍍𑌵𑌯𑍋𑌰𑍍𑌦𑌾𑌕𑍍𑌷𑌿𑌣𑌾𑌤𑍍𑌯𑌾𑌃
𑌪𑌶𑍍𑌚𑌾𑌲𑍍𑌲𑍀𑌲𑌾𑌵𑌲𑌯𑌰𑌣𑌿𑌤𑌂 𑌚𑌾𑌮𑌰𑌗𑍍𑌰𑌾𑌹𑌿𑌣𑍀𑌨𑌾𑌮𑍍 ।
𑌯𑌦𑍍𑌯𑌸𑍍𑌤𑍍𑌯𑍇𑌵𑌂 𑌕𑍁𑌰𑍁 𑌭𑌵𑌰𑌸𑌾𑌸𑍍𑌵𑌾𑌦𑌨𑍇 𑌲𑌂𑌪𑌟𑌤𑍍𑌵𑌂
𑌨𑍋 𑌚𑍇𑌚𑍍𑌚𑍇𑌤𑌃 𑌪𑍍𑌰𑌵𑌿𑌶 𑌸𑌹𑌸𑌾 𑌨𑌿𑌰𑍍𑌵𑌿𑌕𑌲𑍍𑌪𑍇 𑌸𑌮𑌾𑌧𑍌 ॥ 3.66 ॥

𑌪𑍍𑌰𑌾𑌪𑍍𑌤𑌾𑌃 𑌶𑍍𑌰𑌿𑌯𑌃 𑌸𑌕𑌲𑌕𑌾𑌮𑌦𑍁𑌘𑌾𑌸𑍍𑌤𑌤𑌃 𑌕𑌿𑌂
𑌨𑍍𑌯𑌸𑍍𑌤𑌂 𑌪𑌦𑌂 𑌶𑌿𑌰𑌸𑌿 𑌵𑌿𑌦𑍍𑌵𑌿𑌷𑌤𑌾𑌂 𑌤𑌤𑌃 𑌕𑌿𑌮𑍍 ।
𑌸𑌂𑌪𑌾𑌦𑌿𑌤𑌾𑌃 𑌪𑍍𑌰𑌣𑌯𑌿𑌨𑍋 𑌵𑌿𑌭𑌵𑍈𑌸𑍍𑌤𑌤𑌃 𑌕𑌿𑌂
𑌕𑌲𑍍𑌪𑌂 𑌸𑍍𑌥𑌿𑌤𑌾𑌸𑍍𑌤𑌨𑍁𑌭𑍃𑌤𑌾𑌂 𑌤𑌨𑌵𑌸𑍍𑌤𑌤𑌃 𑌕𑌿𑌮𑍍 ॥ 3.6𑍭 ॥

𑌭𑌕𑍍𑌤𑌿𑌰𑍍𑌭𑌵𑍇 𑌮𑌰𑌣𑌜𑌨𑍍𑌮𑌭𑌯𑌂 𑌹𑍃𑌦𑌿𑌸𑍍𑌥𑌂
𑌸𑍍𑌨𑍇𑌹𑍋 𑌨 𑌬𑌂𑌧𑍁𑌷𑍁 𑌨 𑌮𑌨𑍍𑌮𑌥𑌜𑌾 𑌵𑌿𑌕𑌾𑌰𑌾𑌃 ।
𑌸𑌂𑌸𑌰𑍍𑌗 𑌦𑍋𑌷𑌰𑌹𑌿𑌤𑌾 𑌵𑌿𑌜𑌨𑌾 𑌵𑌨𑌾𑌂𑌤𑌾
𑌵𑍈𑌰𑌾𑌗𑍍𑌯𑌂 𑌅𑌸𑍍𑌤𑌿 𑌕𑌿𑌂 𑌇𑌤𑌃 𑌪𑌰𑌮𑌰𑍍𑌥𑌨𑍀𑌯𑌮𑍍 ॥ 3.6𑍮 ॥

𑌤𑌸𑍍𑌮𑌾𑌦𑌨𑌂𑌤𑌂 𑌅𑌜𑌰𑌂 𑌪𑌰𑌮𑌂 𑌵𑌿𑌕𑌾𑌸𑌿
𑌤𑌦𑍍𑌬𑍍𑌰𑌹𑍍𑌮 𑌚𑌿𑌂𑌤𑌯 𑌕𑌿𑌂 𑌏𑌭𑌿𑌰𑌸𑌦𑍍𑌵𑌿𑌕𑌲𑍍𑌪𑍈𑌃 ।
𑌯𑌸𑍍𑌯𑌾𑌨𑍁𑌷𑌂𑌗𑌿𑌣 𑌇𑌮𑍇 𑌭𑍁𑌵𑌨𑌾𑌧𑌿𑌪𑌤𑍍𑌯𑌭𑍋𑌗𑌾𑌦𑌯𑌃
𑌕𑍃𑌪𑌣𑌲𑍋𑌕𑌮𑌤𑌾 𑌭𑌵𑌂𑌤𑌿 ॥ 3.6𑍯 ॥

𑌪𑌾𑌤𑌾𑌲𑌂 𑌆𑌵𑌿𑌶𑌸𑌿 𑌯𑌾𑌸𑌿 𑌨𑌭𑍋 𑌵𑌿𑌲𑌂𑌘𑍍𑌯
𑌦𑌿𑌙𑍍𑌮𑌂𑌡𑌲𑌂 𑌭𑍍𑌰𑌮𑌸𑌿 𑌮𑌾𑌨𑌸 𑌚𑌾𑌪𑌲𑍇𑌨 ।
𑌭𑍍𑌰𑌾𑌂𑌤𑍍𑌯𑌾𑌪𑌿 𑌜𑌾𑌤𑍁 𑌵𑌿𑌮𑌲𑌂 𑌕𑌥𑌂 𑌆𑌤𑍍𑌮𑌨𑍀𑌨𑌂
𑌨 𑌬𑍍𑌰𑌹𑍍𑌮 𑌸𑌂𑌸𑍍𑌮𑌰𑌸𑌿 𑌨𑌿𑌰𑍍𑌵𑍃𑌤𑌿𑌂 𑌏𑌷𑌿 𑌯𑍇𑌨 ॥ 3.𑍭0 ॥

𑌕𑌿𑌂 𑌵𑍇𑌦𑍈𑌃 𑌸𑍍𑌮𑍃𑌤𑌿𑌭𑌿𑌃 𑌪𑍁𑌰𑌾𑌣𑌪𑌠𑌨𑍈𑌃 𑌶𑌾𑌸𑍍𑌤𑍍𑌰𑍈𑌰𑍍𑌮𑌹𑌾𑌵𑌿𑌸𑍍𑌤𑌰𑍈𑌃
𑌸𑍍𑌵𑌰𑍍𑌗𑌗𑍍𑌰𑌾𑌮𑌕𑍁𑌟𑍀𑌨𑌿𑌵𑌾𑌸𑌫𑌲𑌦𑍈𑌃 𑌕𑌰𑍍𑌮𑌕𑍍𑌰𑌿𑌯𑌾𑌵𑌿𑌭𑍍𑌰𑌮𑍈𑌃 ।
𑌮𑍁𑌕𑍍𑌤𑍍𑌵𑍈𑌕𑌂 𑌭𑌵𑌦𑍁𑌃𑌖𑌭𑌾𑌰𑌰𑌚𑌨𑌾𑌵𑌿𑌧𑍍𑌵𑌂𑌸𑌕𑌾𑌲𑌾𑌨𑌲𑌂
𑌸𑍍𑌵𑌾𑌤𑍍𑌮𑌾𑌨𑌂𑌦𑌪𑌦𑌪𑍍𑌰𑌵𑍇𑌶𑌕𑌲𑌨𑌂 𑌶𑍇𑌶𑍈𑌰𑍍𑌵𑌣𑌿𑌗𑍍𑌵𑍃𑌤𑍍𑌤𑌿𑌭𑌿𑌃 ॥ 3.𑍭1 ॥

𑌨𑌾𑌯𑌂 𑌤𑍇 𑌸𑌮𑌯𑍋 𑌰𑌹𑌸𑍍𑌯𑌂 𑌅𑌧𑍁𑌨𑌾 𑌨𑌿𑌦𑍍𑌰𑌾𑌤𑌿 𑌨𑌾𑌥𑍋 𑌯𑌦𑌿
𑌸𑍍𑌥𑌿𑌤𑍍𑌵𑌾 𑌦𑍍𑌰𑌕𑍍𑌷𑍍𑌯𑌤𑌿 𑌕𑍁𑌪𑍍𑌯𑌤𑌿 𑌪𑍍𑌰𑌭𑍁𑌰𑌿𑌤𑌿 𑌦𑍍𑌵𑌾𑌰𑍇𑌷𑍁 𑌯𑍇𑌷𑌾𑌂 𑌵𑌚𑌃 ।
𑌚𑍇𑌤𑌸𑍍𑌤𑌾𑌨𑌪𑌹𑌾𑌯 𑌯𑌾𑌹𑌿 𑌭𑌵𑌨𑌂 𑌦𑍇𑌵𑌸𑍍𑌯 𑌵𑌿𑌶𑍍𑌵𑍇𑌶𑌿𑌤𑍁𑌰𑍍
𑌨𑌿𑌰𑍍𑌦𑍌𑌵𑌾𑌰𑌿𑌕𑌨𑌿𑌰𑍍𑌦𑌯𑍋𑌕𑍍𑌤𑍍𑌯𑍍​𑌅𑌪𑌰𑍁𑌷𑌂 𑌨𑌿𑌃𑌸𑍀𑌮𑌶𑌰𑍍𑌮𑌪𑍍𑌰𑌦𑌮𑍍 ॥ 3.𑍭1.1 ॥

𑌯𑌤𑍋 𑌮𑍇𑌰𑍁𑌃 𑌶𑍍𑌰𑍀𑌮𑌾𑌨𑍍𑌨𑌿𑌪𑌤𑌤𑌿 𑌯𑍁𑌗𑌾𑌂𑌤𑌾𑌗𑍍𑌨𑌿𑌵𑌲𑌿𑌤𑌃
𑌸𑌮𑍁𑌦𑍍𑌰𑌾𑌃 𑌶𑍁𑌷𑍍𑌯𑌂𑌤𑌿 𑌪𑍍𑌰𑌚𑍁𑌰𑌮𑌕𑌰𑌗𑍍𑌰𑌾𑌹𑌨𑌿𑌲𑌯𑌾𑌃 ।
𑌧𑌰𑌾 𑌗𑌚𑍍𑌛𑌤𑍍𑌯𑌂𑌤𑌂 𑌧𑌰𑌣𑌿𑌧𑌰𑌪𑌾𑌦𑍈𑌰𑌪𑌿 𑌧𑍃𑌤𑌾
𑌶𑌰𑍀𑌰𑍇 𑌕𑌾 𑌵𑌾𑌰𑍍𑌤𑌾 𑌕𑌰𑌿𑌕𑌲𑌭𑌕𑌰𑍍𑌣𑌾𑌗𑍍𑌰𑌚𑌪𑌲𑍇 ॥ 3.𑍭2 ॥

𑌗𑌾𑌤𑍍𑌰𑌂 𑌸𑌂𑌕𑍁𑌚𑌿𑌤𑌂 𑌗𑌤𑌿𑌰𑍍𑌵𑌿𑌗𑌲𑌿𑌤𑌾 𑌭𑍍𑌰𑌷𑍍𑌟𑌾 𑌚 𑌦𑌂𑌤𑌾𑌵𑌲𑌿𑌰𑍍
𑌦𑍃𑌷𑍍𑌟𑌿𑌰𑍍𑌨𑌶𑍍𑌯𑌤𑌿 𑌵𑌰𑍍𑌧𑌤𑍇 𑌬𑌧𑌿𑌰𑌤𑌾 𑌵𑌕𑍍𑌤𑍍𑌰𑌂 𑌚 𑌲𑌾𑌲𑌾𑌯𑌤𑍇 ।
𑌵𑌾𑌕𑍍𑌯𑌂 𑌨𑌾𑌦𑍍𑌰𑌿𑌯𑌤𑍇 𑌚 𑌬𑌾𑌂𑌧𑌵𑌜𑌨𑍋 𑌭𑌾𑌰𑍍𑌯𑌾 𑌨 𑌶𑍁𑌶𑍍𑌰𑍂𑌷𑌤𑍇
𑌹𑌾 𑌕𑌷𑍍𑌟𑌂 𑌪𑍁𑌰𑍁𑌷𑌸𑍍𑌯 𑌜𑍀𑌰𑍍𑌣𑌵𑌯𑌸𑌃 𑌪𑍁𑌤𑍍𑌰𑍋𑌽𑌪𑍍𑌯𑌮𑌿𑌤𑍍𑌰𑌾𑌯𑌤𑍇 ॥ 3.𑍭3 ॥

𑌵𑌰𑍍𑌣𑌂 𑌸𑌿𑌤𑌂 𑌶𑌿𑌰𑌸𑌿 𑌵𑍀𑌕𑍍𑌷𑍍𑌯 𑌶𑌿𑌰𑍋𑌰𑍁𑌹𑌾𑌣𑌾𑌂
𑌸𑍍𑌥𑌾𑌨𑌂 𑌜𑌰𑌾𑌪𑌰𑌿𑌭𑌵𑌸𑍍𑌯 𑌤𑌦𑌾 𑌪𑍁𑌮𑌾𑌂𑌸𑌮𑍍 ।
𑌆𑌰𑍋𑌪𑌿𑌤𑌾𑌸𑍍𑌥𑌿𑌶𑌤𑌕𑌂 𑌪𑌰𑌿𑌹𑍃𑌤𑍍𑌯 𑌯𑌾𑌂𑌤𑌿
𑌚𑌂𑌡𑌾𑌲𑌕𑍂𑌪𑌂 𑌇𑌵 𑌦𑍂𑌰𑌤𑌰𑌂 𑌤𑌰𑍁𑌣𑍍𑌯𑌃 ॥ 3.𑍭4 ॥

𑌯𑌾𑌵𑌤𑍍𑌸𑍍𑌵𑌸𑍍𑌥𑌂 𑌇𑌦𑌂 𑌶𑌰𑍀𑌰𑌂 𑌅𑌰𑍁𑌜𑌂 𑌯𑌾𑌵𑌚𑍍𑌚 𑌦𑍂𑌰𑍇 𑌜𑌰𑌾
𑌯𑌾𑌵𑌚𑍍𑌚𑍇𑌂𑌦𑍍𑌰𑌿𑌯𑌶𑌕𑍍𑌤𑌿𑌰𑌪𑍍𑌰𑌤𑌿𑌹𑌤𑌾 𑌯𑌾𑌵𑌤𑍍𑌕𑍍𑌷𑌯𑍋 𑌨𑌾𑌯𑍁𑌷𑌃 ।
𑌆𑌤𑍍𑌮𑌶𑍍𑌰𑍇𑌯𑌸𑌿 𑌤𑌾𑌵𑌦𑍇𑌵 𑌵𑌿𑌦𑍁𑌷𑌾 𑌕𑌾𑌰𑍍𑌯𑌃 𑌪𑍍𑌰𑌯𑌤𑍍𑌨𑍋 𑌮𑌹𑌾𑌨𑍍
𑌸𑌂𑌦𑍀𑌪𑍍𑌤𑍇 𑌭𑌵𑌨𑍇 𑌤𑍁 𑌕𑍂𑌪𑌖𑌨𑌨𑌂 𑌪𑍍𑌰𑌤𑍍𑌯𑍁𑌦𑍍𑌯𑌮𑌃 𑌕𑍀𑌦𑍃𑌶𑌃 ॥ 3.𑍭5 ॥

𑌤𑌪𑌸𑍍𑌯𑌂𑌤𑌃 𑌸𑌂𑌤𑌃 𑌕𑌿𑌂 𑌅𑌧𑌿𑌨𑌿𑌵𑌸𑌾𑌮𑌃 𑌸𑍁𑌰𑌨𑌦𑍀𑌂
𑌗𑍁𑌣𑍋𑌦𑌾𑌰𑌾𑌂𑌦𑌾𑌰𑌾𑌨𑍁𑌤 𑌪𑌰𑌿𑌚𑌰𑌾𑌮𑌃 𑌸𑌵𑌿𑌨𑌯𑌮𑍍 ।
𑌪𑌿𑌬𑌾𑌮𑌃 𑌶𑌾𑌸𑍍𑌤𑍍𑌰𑍌𑌘𑌾𑌨𑍁𑌤𑌵𑌿𑌵𑌿𑌧𑌕𑌾𑌵𑍍𑌯𑌾𑌮𑍃𑌤𑌰𑌸𑌾𑌨𑍍
𑌨 𑌵𑌿𑌦𑍍𑌮𑌃 𑌕𑌿𑌂 𑌕𑍁𑌰𑍍𑌮𑌃 𑌕𑌤𑌿𑌪𑌯𑌨𑌿𑌮𑍇𑌷𑌾𑌯𑍁𑌷𑌿 𑌜𑌨𑍇 ॥ 3.𑍭6 ॥

𑌦𑍁𑌰𑌾𑌰𑌾𑌧𑍍𑌯𑌾𑌶𑍍𑌚𑌾𑌮𑍀 𑌤𑍁𑌰𑌗𑌚𑌲𑌚𑌿𑌤𑍍𑌤𑌾𑌃 𑌕𑍍𑌷𑌿𑌤𑌿𑌭𑍁𑌜𑍋
𑌵𑌯𑌂 𑌤𑍁 𑌸𑍍𑌥𑍂𑌲𑍇𑌚𑍍𑌛𑌾𑌃 𑌸𑍁𑌮𑌹𑌤𑌿 𑌫𑌲𑍇 𑌬𑌦𑍍𑌧𑌮𑌨𑌸𑌃 ।
𑌜𑌰𑌾 𑌦𑍇𑌹𑌂 𑌮𑍃𑌤𑍍𑌯𑍁𑌰𑍍𑌹𑌰𑌤𑌿 𑌦𑌯𑌿𑌤𑌂 𑌜𑍀𑌵𑌿𑌤𑌂 𑌇𑌦𑌂
𑌸𑌖𑍇 𑌨𑌾𑌨𑍍𑌯𑌚𑍍𑌛𑍍𑌰𑍇𑌯𑍋 𑌜𑌗𑌤𑌿 𑌵𑌿𑌦𑍁𑌷𑍋𑌽𑌨𑍍𑌯𑌤𑍍𑌰 𑌤𑌪𑌸𑌃 ॥ 3.𑍭𑍭 ॥

𑌮𑌾𑌨𑍇 𑌮𑍍𑌲𑌾𑌯𑌿𑌨𑌿 𑌖𑌂𑌡𑌿𑌤𑍇 𑌚 𑌵𑌸𑍁𑌨𑌿 𑌵𑍍𑌯𑌰𑍍𑌥𑍇 𑌪𑍍𑌰𑌯𑌾𑌤𑍇𑌽𑌰𑍍𑌥𑌿𑌨𑌿
𑌕𑍍𑌷𑍀𑌣𑍇 𑌬𑌂𑌧𑍁𑌜𑌨𑍇 𑌗𑌤𑍇 𑌪𑌰𑌿𑌜𑌨𑍇 𑌨𑌷𑍍𑌟𑍇 𑌶𑌨𑍈𑌰𑍍𑌯𑍌𑌵𑌨𑍇 ।
𑌯𑍁𑌕𑍍𑌤𑌂 𑌕𑍇𑌵𑌲𑌂 𑌏𑌤𑌦𑍇𑌵 𑌸𑍁𑌧𑌿𑌯𑌾𑌂 𑌯𑌜𑍍𑌜𑌹𑍍𑌨𑍁𑌕𑌨𑍍𑌯𑌾𑌪𑌯𑌃𑌪𑍂𑌤𑌗𑍍𑌰𑌾𑌵
𑌗𑌿𑌰𑍀𑌂𑌦𑍍𑌰𑌕𑌂𑌦𑌰𑌤𑌟𑍀𑌕𑍁𑌂𑌜𑍇 𑌨𑌿𑌵𑌾𑌸𑌃 𑌕𑍍𑌵𑌚𑌿𑌤𑍍 ॥ 3.𑍭𑍮 ॥

𑌰𑌮𑍍𑌯𑌾𑌶𑍍𑌚𑌂𑌦𑍍𑌰𑌮𑌰𑍀𑌚𑌯𑌸𑍍𑌤𑍃𑌣𑌵𑌤𑍀 𑌰𑌮𑍍𑌯𑌾 𑌵𑌨𑌾𑌂𑌤𑌸𑍍𑌥𑌲𑍀
𑌰𑌮𑍍𑌯𑌂 𑌸𑌾𑌧𑍁𑌸𑌮𑌾𑌗𑌮𑌾𑌗𑌤𑌸𑍁𑌖𑌂 𑌕𑌾𑌵𑍍𑌯𑍇𑌷𑍁 𑌰𑌮𑍍𑌯𑌾𑌃 𑌕𑌥𑌾𑌃 ।
𑌕𑍋𑌪𑍋𑌪𑌾𑌹𑌿𑌤𑌬𑌾𑌷𑍍𑌪𑌬𑌿𑌂𑌦𑍁𑌤𑌰𑌲𑌂 𑌰𑌮𑍍𑌯𑌂 𑌪𑍍𑌰𑌿𑌯𑌾𑌯𑌾 𑌮𑍁𑌖𑌂
𑌸𑌰𑍍𑌵𑌂 𑌰𑌮𑍍𑌯𑌂 𑌅𑌨𑌿𑌤𑍍𑌯𑌤𑌾𑌂 𑌉𑌪𑌗𑌤𑍇 𑌚𑌿𑌤𑍍𑌤𑍇 𑌨 𑌕𑌿𑌂𑌚𑌿𑌤𑍍𑌪𑍁𑌨𑌃 ॥ 3.𑍭𑍯 ॥

𑌰𑌮𑍍𑌯𑌂 𑌹𑌰𑍍𑌮𑍍𑌯𑌤𑌲𑌂 𑌨 𑌕𑌿𑌂 𑌵𑌸𑌤𑌯𑍇 𑌶𑍍𑌰𑌾𑌵𑍍𑌯𑌂 𑌨 𑌗𑍇𑌯𑌾𑌦𑌿𑌕𑌂
𑌕𑌿𑌂 𑌵𑌾 𑌪𑍍𑌰𑌾𑌣𑌸𑌮𑌾𑌸𑌮𑌾𑌗𑌮𑌸𑍁𑌖𑌂 𑌨𑍈𑌵𑌾𑌧𑌿𑌕𑌪𑍍𑌰𑍀𑌤𑌯𑍇 ।
𑌕𑌿𑌂𑌤𑍁 𑌭𑍍𑌰𑌾𑌂𑌤𑌪𑌤𑌂𑌗𑌪𑌕𑍍𑌷𑌪𑌵𑌨𑌵𑍍𑌯𑌾𑌲𑍋𑌲𑌦𑍀𑌪𑌾𑌂𑌕𑍁𑌰𑌚𑍍𑌛𑌾𑌯𑌾
𑌚𑌂𑌚𑌲𑌂 𑌆𑌕𑌲𑌯𑍍𑌯 𑌸𑌕𑌲𑌂 𑌸𑌂𑌤𑍋 𑌵𑌨𑌾𑌂𑌤𑌂 𑌗𑌤𑌾𑌃 ॥ 3.𑍮0 ॥

𑌆 𑌸𑌂𑌸𑌾𑌰𑌾𑌤𑍍𑌤𑍍𑌰𑌿𑌭𑍁𑌵𑌨𑌂 𑌇𑌦𑌂 𑌚𑌿𑌨𑍍𑌵𑌤𑌾𑌂 𑌤𑌾𑌤 𑌤𑌾𑌦𑍃𑌙𑍍𑌨𑍈𑌵𑌾𑌸𑍍𑌮𑌾𑌕𑌂
𑌨𑌯𑌨𑌪𑌦𑌵𑍀𑌂 𑌶𑍍𑌰𑍋𑌤𑍍𑌰𑌮𑌾𑌰𑍍𑌗𑌂 𑌗𑌤𑍋 𑌵𑌾 ।
𑌯𑍋𑌽𑌯𑌂 𑌧𑌤𑍍𑌤𑍇 𑌵𑌿𑌷𑌯𑌕𑌰𑌿𑌣𑍋 𑌗𑌾𑌢𑌗𑍂𑌢𑌾𑌭𑌿𑌮𑌾𑌨𑌕𑍍𑌷𑍀𑌵𑌸𑍍𑌯𑌾𑌂𑌤𑌃 [𑌵𑌿𑌷𑌯𑌕𑌰𑌿𑌣𑍀𑌗𑌾𑌢𑌗𑍂𑌢𑌾𑌭𑌿𑌮𑌾𑌨𑌕𑍍𑌷𑍀𑌵𑌸𑍍𑌯𑌾𑌂𑌤𑌃]
𑌕𑌰𑌣𑌕𑌰𑌿𑌣𑌃 𑌸𑌂𑌯𑌮𑌾𑌲𑌾𑌨𑌲𑍀𑌲𑌾𑌮𑍍 ॥ 3.𑍮1 ॥

𑌯𑌦𑍇𑌤𑌤𑍍𑌸𑍍𑌵𑌚𑍍𑌛𑌂𑌦𑌂 𑌵𑌿𑌹𑌰𑌣𑌂 𑌅𑌕𑌾𑌰𑍍𑌪𑌣𑍍𑌯𑌂 𑌅𑌶𑌨𑌂
𑌸𑌹𑌾𑌰𑍍𑌯𑍈𑌃 𑌸𑌂𑌵𑌾𑌸𑌃 𑌶𑍍𑌰𑍁𑌤𑌂 𑌉𑌪𑌶𑌮𑍈𑌕𑌵𑍍𑌰𑌤𑌫𑌲𑌮𑍍 ।
𑌮𑌨𑍋 𑌮𑌂𑌦𑌸𑍍𑌪𑌂𑌦𑌂 𑌬𑌹𑌿𑌰𑌪𑌿 𑌚𑌿𑌰𑌸𑍍𑌯𑌾𑌪𑌿 𑌵𑌿𑌮𑍃𑌶𑌨𑍍𑌨
𑌜𑌾𑌨𑍇 𑌕𑌸𑍍𑌯𑍈𑌷𑌾 𑌪𑌰𑌿𑌣𑌤𑌿𑌰𑍁𑌦𑌾𑌰𑌸𑍍𑌯 𑌤𑌪𑌸𑌃 ॥ 3.𑍮2 ॥

𑌜𑍀𑌰𑍍𑌣𑌾 𑌏𑌵 𑌮𑌨𑍋𑌰𑌥𑌾𑌶𑍍𑌚 𑌹𑍃𑌦𑌯𑍇 𑌯𑌾𑌤𑌂 𑌚 𑌤𑌦𑍍𑌯𑍌𑌵𑌨𑌂
𑌹𑌂𑌤𑌾𑌂𑌗𑍇𑌷𑍁 𑌗𑍁𑌣𑌾𑌶𑍍𑌚 𑌵𑌂𑌧𑍍𑌯𑌫𑌲𑌤𑌾𑌂 𑌯𑌾𑌤𑌾 𑌗𑍁𑌣𑌜𑍍𑌞𑍈𑌰𑍍𑌵𑌿𑌨𑌾 ।
𑌕𑌿𑌂 𑌯𑍁𑌕𑍍𑌤𑌂 𑌸𑌹𑌸𑌾𑌭𑍍𑌯𑍁𑌪𑍈𑌤𑌿 𑌬𑌲𑌵𑌾𑌨𑍍𑌕𑌾𑌲𑌃 𑌕𑍃𑌤𑌾𑌂𑌤𑍋𑌽𑌕𑍍𑌷𑌮𑍀
𑌹𑌾 𑌜𑍍𑌞𑌾𑌤𑌂 𑌮𑌦𑌨𑌾𑌂𑌤𑌕𑌾𑌂𑌘𑍍𑌰𑌿𑌯𑍁𑌗𑌲𑌂 𑌮𑍁𑌕𑍍𑌤𑍍𑌵𑌾𑌸𑍍𑌤𑌿 𑌨𑌾𑌨𑍍𑌯𑌾 𑌗𑌤𑌿𑌃 ॥ 3.𑍮3 ॥

𑌮𑌹𑍇𑌶𑍍𑌵𑌰𑍇 𑌵𑌾 𑌜𑌗𑌤𑌾𑌂 𑌅𑌧𑍀𑌶𑍍𑌵𑌰𑍇
𑌜𑌨𑌾𑌰𑍍𑌦𑌨𑍇 𑌵𑌾 𑌜𑌗𑌦𑍍​𑌅𑌂𑌤𑌰𑌾𑌤𑍍𑌮𑌨𑌿 ।
𑌨 𑌵𑌸𑍍𑌤𑍁𑌭𑍇𑌦𑌪𑍍𑌰𑌤𑌿𑌪𑌤𑍍𑌤𑌿𑌰𑌸𑍍𑌤𑌿 𑌮𑍇
𑌤𑌥𑌾𑌪𑌿 𑌭𑌕𑍍𑌤𑌿𑌸𑍍𑌤𑌰𑍁𑌣𑍇𑌂𑌦𑍁𑌶𑍇𑌖𑌰𑍇 ॥ 3.𑍮4 ॥

𑌸𑍍𑌫𑍁𑌰𑌤𑍍𑌸𑍍𑌫𑌾𑌰𑌜𑍍𑌯𑍋𑌤𑍍𑌸𑍍𑌨𑌾𑌧𑌵𑌲𑌿𑌤𑌤𑌲𑍇 𑌕𑍍𑌵𑌾𑌪𑌿 𑌪𑍁𑌲𑌿𑌨𑍇
𑌸𑍁𑌖𑌾𑌸𑍀𑌨𑌾𑌃 𑌶𑌾𑌂𑌤𑌧𑍍𑌵𑌨𑌿𑌷𑍁 𑌰𑌜𑌨𑍀𑌷𑍁 𑌦𑍍𑌯𑍁𑌸𑌰𑌿𑌤𑌃 ।
𑌭𑌵𑌾𑌭𑍋𑌗𑍋𑌦𑍍𑌵𑌿𑌗𑍍𑌨𑌾𑌃 𑌶𑌿𑌵 𑌶𑌿𑌵 𑌶𑌿𑌵𑍇𑌤𑍍𑌯𑍁𑌚𑍍𑌚𑌵𑌚𑌸𑌃
𑌕𑌦𑌾 𑌯𑌾𑌸𑍍𑌯𑌾𑌮𑍋𑌽𑌂𑌤𑌰𑍍𑌗𑌤𑌬𑌹𑍁𑌲𑌬𑌾𑌷𑍍𑌪𑌾𑌕𑍁𑌲𑌦𑌶𑌾𑌮𑍍 ॥ 3.𑍮5 ॥

𑌮𑌹𑌾𑌦𑍇𑌵𑍋 𑌦𑍇𑌵𑌃 𑌸𑌰𑌿𑌦𑌪𑌿 𑌚 𑌸𑍈𑌷𑌾 𑌸𑍁𑌰𑌸𑌰𑌿𑌦𑍍𑌗𑍁𑌹𑌾
𑌏𑌵𑌾𑌗𑌾𑌰𑌂 𑌵𑌸𑌨𑌂 𑌅𑌪𑌿 𑌤𑌾 𑌏𑌵 𑌹𑌰𑌿𑌤𑌃 ।
𑌸𑍁𑌹𑍃𑌦𑌾 𑌕𑌾𑌲𑍋𑌽𑌯𑌂 𑌵𑍍𑌰𑌤𑌂 𑌇𑌦𑌂 𑌅𑌦𑍈𑌨𑍍𑌯𑌵𑍍𑌰𑌤𑌂 𑌇𑌦𑌂
𑌕𑌿𑌯𑌦𑍍𑌵𑌾 𑌵𑌕𑍍𑌷𑍍𑌯𑌾𑌮𑍋 𑌵𑌟𑌵𑌿𑌟𑌪 𑌏𑌵𑌾𑌸𑍍𑌤𑍁 𑌦𑌯𑌿𑌤𑌾 ॥ 3.𑍮5.1 ॥

𑌵𑌿𑌤𑍀𑌰𑍍𑌣𑍇 𑌸𑌰𑍍𑌵𑌸𑍍𑌵𑍇 𑌤𑌰𑍁𑌣𑌕𑌰𑍁𑌣𑌾𑌪𑍂𑌰𑍍𑌣𑌹𑍃𑌦𑌯𑌾𑌃
𑌸𑍍𑌮𑌰𑌂𑌤𑌃 𑌸𑌂𑌸𑌾𑌰𑍇 𑌵𑌿𑌗𑍁𑌣𑌪𑌰𑌿𑌣𑌾𑌮𑌾𑌂 𑌵𑌿𑌧𑌿𑌗𑌤𑌿𑌮𑍍 ।
𑌵𑌯𑌂 𑌪𑍁𑌣𑍍𑌯𑌾𑌰𑌣𑍍𑌯𑍇 𑌪𑌰𑌿𑌣𑌤𑌶𑌰𑌚𑍍𑌚𑌂𑌦𑍍𑌰𑌕𑌿𑌰𑌣𑌾𑌸𑍍
𑌤𑍍𑌰𑌿𑌯𑌾𑌮𑌾 𑌨𑍇𑌷𑍍𑌯𑌾𑌮𑍋 𑌹𑌰𑌚𑌰𑌣𑌚𑌿𑌂𑌤𑍈𑌕𑌶𑌰𑌣𑌾𑌃 ॥ 3.𑍮6 ॥

𑌕𑌦𑌾 𑌵𑌾𑌰𑌾𑌣𑌸𑍍𑌯𑌾𑌂 𑌅𑌮𑌰𑌤𑌟𑌿𑌨𑍀𑌰𑍋𑌧𑌸𑌿 𑌵𑌸𑌨𑍍
𑌵𑌸𑌾𑌨𑌃 𑌕𑍌𑌪𑍀𑌨𑌂 𑌶𑌿𑌰𑌸𑌿 𑌨𑌿𑌦𑌧𑌾𑌨𑍋𑌽𑌂𑌜𑌲𑌿𑌪𑍁𑌟𑌮𑍍 ।
𑌅𑌯𑍇 𑌗𑍌𑌰𑍀𑌨𑌾𑌥 𑌤𑍍𑌰𑌿𑌪𑍁𑌰𑌹𑌰 𑌶𑌂𑌭𑍋 𑌤𑍍𑌰𑌿𑌨𑌯𑌨
𑌪𑍍𑌰𑌸𑍀𑌦𑍇𑌤𑍍𑌯𑌾𑌕𑍍𑌰𑍋𑌶𑌨𑍍𑌨𑌿𑌮𑌿𑌷𑌂 𑌇𑌵 𑌨𑍇𑌷𑍍𑌯𑌾𑌮𑌿 𑌦𑌿𑌵𑌸𑌾𑌨𑍍 ॥ 3.𑍮𑍭 ॥

𑌉𑌦𑍍𑌯𑌾𑌨𑍇𑌷𑍁 𑌵𑌿𑌚𑌿𑌤𑍍𑌰𑌭𑍋𑌜𑌨𑌵𑌿𑌧𑌿𑌸𑍍𑌤𑍀𑌵𑍍𑌰𑌾𑌤𑌿𑌤𑍀𑌵𑍍𑌰𑌂 𑌤𑌪𑌃
𑌕𑍌𑌪𑍀𑌨𑌾𑌵𑌰𑌣𑌂 𑌸𑍁𑌵𑌸𑍍𑌤𑍍𑌰𑌂 𑌅𑌮𑌿𑌤𑌂 𑌭𑌿𑌕𑍍𑌷𑌾𑌟𑌨𑌂 𑌮𑌂𑌡𑌨𑌮𑍍 ।
𑌆𑌸𑌨𑍍𑌨𑌂 𑌮𑌰𑌣𑌂 𑌚 𑌮𑌂𑌗𑌲𑌸𑌮𑌂 𑌯𑌸𑍍𑌯𑌾𑌂 𑌸𑌮𑍁𑌤𑍍𑌪𑌦𑍍𑌯𑌤𑍇
𑌤𑌾𑌂 𑌕𑌾𑌶𑍀𑌂 𑌪𑌰𑌿𑌹𑍃𑌤𑍍𑌯 𑌹𑌂𑌤 𑌵𑌿𑌬𑍁𑌧𑍈𑌰𑌨𑍍𑌯𑌤𑍍𑌰 𑌕𑌿𑌂 𑌸𑍍𑌥𑍀𑌯𑌤𑍇 ॥ 3.𑍮𑍭.1 ॥

𑌸𑍍𑌨𑌾𑌤𑍍𑌵𑌾 𑌗𑌾𑌂𑌗𑍈𑌃 𑌪𑌯𑍋𑌭𑌿𑌃 𑌶𑍁𑌚𑌿𑌕𑍁𑌸𑍁𑌮𑌫𑌲𑍈𑌰𑌰𑍍𑌚𑌯𑌿𑌤𑍍𑌵𑌾 𑌵𑌿𑌭𑍋 𑌤𑍍𑌵𑌾𑌂
𑌧𑍍𑌯𑍇𑌯𑍇 𑌧𑍍𑌯𑌾𑌨𑌂 𑌨𑌿𑌵𑍇𑌶𑍍𑌯 𑌕𑍍𑌷𑌿𑌤𑌿𑌧𑌰𑌕𑍁𑌹𑌰𑌗𑍍𑌰𑌾𑌵𑌪𑌰𑍍𑌯𑌂𑌕𑌮𑍂𑌲𑍇 ।
𑌆𑌤𑍍𑌮𑌾𑌰𑌾𑌮𑌃 𑌫𑌲𑌾𑌶𑍀 𑌗𑍁𑌰𑍁𑌵𑌚𑌨𑌰𑌤𑌸𑍍𑌤𑍍𑌵𑌤𑍍𑌪𑍍𑌰𑌸𑌾𑌦𑌾𑌤𑍍𑌸𑍍𑌮𑌰𑌾𑌰𑍇
𑌦𑍁𑌃𑌖𑌂 𑌮𑍋𑌕𑍍𑌷𑍍𑌯𑍇 𑌕𑌦𑌾𑌹𑌂 𑌸𑌮𑌕𑌰𑌚𑌰𑌣𑍇 𑌪𑍁𑌂𑌸𑌿 𑌸𑍇𑌵𑌾𑌸𑌮𑍁𑌤𑍍𑌥𑌮𑍍 ॥ 3.𑍮𑍮 ॥

𑌏𑌕𑌾𑌕𑍀 𑌨𑌿𑌃𑌸𑍍𑌪𑍃𑌹𑌃 𑌶𑌾𑌂𑌤𑌃 𑌪𑌾𑌣𑌿𑌪𑌾𑌤𑍍𑌰𑍋 𑌦𑌿𑌗𑌂𑌬𑌰𑌃 ।
𑌕𑌦𑌾 𑌶𑌂𑌭𑍋 𑌭𑌵𑌿𑌷𑍍𑌯𑌾𑌮𑌿 𑌕𑌰𑍍𑌮𑌨𑌿𑌰𑍍𑌮𑍂𑌲𑌨𑌕𑍍𑌷𑌮𑌃 ॥ 3.𑍮𑍯 ॥

𑌪𑌾𑌣𑌿𑌂 𑌪𑌾𑌤𑍍𑌰𑌯𑌤𑌾𑌂 𑌨𑌿𑌸𑌰𑍍𑌗𑌶𑍁𑌚𑌿𑌨𑌾 𑌭𑍈𑌕𑍍𑌷𑍇𑌣 𑌸𑌂𑌤𑍁𑌷𑍍𑌯𑌤𑌾𑌂
𑌯𑌤𑍍𑌰 𑌕𑍍𑌵𑌾𑌪𑌿 𑌨𑌿𑌷𑍀𑌦𑌤𑌾𑌂 𑌬𑌹𑍁𑌤𑍃𑌣𑌂 𑌵𑌿𑌶𑍍𑌵𑌂 𑌮𑍁𑌹𑍁𑌃 𑌪𑌶𑍍𑌯𑌤𑌾𑌮𑍍 ।
𑌅𑌤𑍍𑌯𑌾𑌗𑍇𑌽𑌪𑌿 𑌤𑌨𑍋𑌰𑌖𑌂𑌡𑌪𑌰𑌮𑌾𑌨𑌂𑌦𑌾𑌵𑌬𑍋𑌧𑌸𑍍𑌪𑍃𑌶𑌾
𑌮𑌧𑍍𑌵𑌾 𑌕𑍋𑌽𑌪𑌿 𑌶𑌿𑌵𑌪𑍍𑌰𑌸𑌾𑌦𑌸𑍁𑌲𑌭𑌃 𑌸𑌂𑌪𑌤𑍍𑌸𑍍𑌯𑌤𑍇 𑌯𑍋𑌗𑌿𑌨𑌾𑌮𑍍 ॥ 3.𑍯0 ॥

𑌕𑍌𑌪𑍀𑌨𑌂 𑌶𑌤𑌖𑌂𑌡𑌜𑌰𑍍𑌜𑌰𑌤𑌰𑌂 𑌕𑌂𑌥𑌾 𑌪𑍁𑌨𑌸𑍍𑌤𑌾𑌦𑍃𑌶𑍀
𑌨𑍈𑌶𑍍𑌚𑌿𑌂𑌤𑍍𑌯𑌂 𑌨𑌿𑌰𑌪𑍇𑌕𑍍𑌷𑌭𑍈𑌕𑍍𑌷𑍍𑌯𑌂 𑌅𑌶𑌨𑌂 𑌨𑌿𑌦𑍍𑌰𑌾 𑌶𑍍𑌮𑌶𑌾𑌨𑍇 𑌵𑌨𑍇 ।
𑌸𑍍𑌵𑌾𑌤𑌂𑌤𑍍𑌰𑍍𑌯𑍇𑌣 𑌨𑌿𑌰𑌂𑌕𑍁𑌶𑌂 𑌵𑌿𑌹𑌰𑌣𑌂 𑌸𑍍𑌵𑌾𑌂𑌤𑌂 𑌪𑍍𑌰𑌶𑌾𑌂𑌤𑌂 𑌸𑌦𑌾
𑌸𑍍𑌥𑍈𑌰𑍍𑌯𑌂 𑌯𑍋𑌗𑌮𑌹𑍋𑌤𑍍𑌸𑌵𑍇𑌽𑌪𑌿 𑌚 𑌯𑌦𑌿 𑌤𑍍𑌰𑍈𑌲𑍋𑌕𑍍𑌯𑌰𑌾𑌜𑍍𑌯𑍇𑌨 𑌕𑌿𑌮𑍍 ॥ 3.𑍯1 ॥

𑌬𑍍𑌰𑌹𑍍𑌮𑌾𑌂𑌡𑌂 𑌮𑌂𑌡𑌲𑍀𑌮𑌾𑌤𑍍𑌰𑌂 𑌕𑌿𑌂 𑌲𑍋𑌭𑌾𑌯 𑌮𑌨𑌸𑍍𑌵𑌿𑌨𑌃 ।
𑌶𑌫𑌰𑍀𑌸𑍍𑌫𑍁𑌰𑌿𑌤𑍇𑌨𑌾𑌬𑍍𑌧𑌿𑌃 𑌕𑍍𑌷𑍁𑌬𑍍𑌧𑍋 𑌨 𑌖𑌲𑍁 𑌜𑌾𑌯𑌤𑍇 ॥ 3.𑍯2 ॥

𑌮𑌾𑌤𑌰𑍍𑌲𑌕𑍍𑌷𑍍𑌮𑌿 𑌭𑌜𑌸𑍍𑌵 𑌕𑌂𑌚𑌿𑌦𑌪𑌰𑌂 𑌮𑌤𑍍𑌕𑌾𑌂𑌕𑍍𑌷𑌿𑌣𑍀 𑌮𑌾 𑌸𑍍𑌮 𑌭𑍂𑌰𑍍
𑌭𑍋𑌗𑍇𑌷𑍁 𑌸𑍍𑌪𑍃𑌹𑌯𑌾𑌲𑌵𑌸𑍍𑌤𑌵 𑌵𑌶𑍇 𑌕𑌾 𑌨𑌿𑌃𑌸𑍍𑌪𑍃𑌹𑌾𑌣𑌾𑌂 𑌅𑌸𑌿 ।
𑌸𑌦𑍍𑌯𑌃 𑌸𑍍𑌯𑍂𑌤𑌪𑌲𑌾𑌶𑌪𑌤𑍍𑌰𑌪𑍁𑌟𑌿𑌕𑌾𑌪𑌾𑌤𑍍𑌰𑍈𑌃 𑌪𑌵𑌿𑌤𑍍𑌰𑍀𑌕𑍃𑌤𑍈𑌰𑍍
𑌭𑌿𑌕𑍍𑌷𑌾𑌵𑌸𑍍𑌤𑍁𑌭𑌿𑌰𑍇𑌵 𑌸𑌂𑌪𑍍𑌰𑌤𑌿 𑌵𑌯𑌂 𑌵𑍃𑌤𑍍𑌤𑌿𑌂 𑌸𑌮𑍀𑌹𑌾𑌮𑌹𑍇 ॥ 3.𑍯3 ॥

𑌮𑌹𑌾𑌶𑌯𑍍𑌯𑌾 𑌪𑍃𑌥𑍍𑌵𑍀 𑌵𑌿𑌪𑍁𑌲𑌂 𑌉𑌪𑌧𑌾𑌨𑌂 𑌭𑍁𑌜𑌲𑌤𑌾
𑌵𑌿𑌤𑌾𑌨𑌂 𑌚𑌾𑌕𑌾𑌶𑌂 𑌵𑍍𑌯𑌜𑌨𑌂 𑌅𑌨𑍁𑌕𑍂𑌲𑍋𑌽𑌯𑌂 𑌅𑌨𑌿𑌲𑌃 ।
𑌶𑌰𑌚𑍍𑌚𑌂𑌦𑍍𑌰𑍋 𑌦𑍀𑌪𑍋 𑌵𑌿𑌰𑌤𑌿𑌵𑌨𑌿𑌤𑌾𑌸𑌂𑌗𑌮𑍁𑌦𑌿𑌤𑌃
𑌸𑍁𑌖𑍀 𑌶𑌾𑌂𑌤𑌃 𑌶𑍇𑌤𑍇 𑌮𑍁𑌨𑌿𑌰𑌤𑌨𑍁𑌭𑍂𑌤𑌿𑌰𑍍𑌨𑍃𑌪 𑌇𑌵 ॥ 3.𑍯4 ॥

𑌭𑌿𑌕𑍍𑌷𑌾𑌶𑍀 𑌜𑌨𑌮𑌧𑍍𑌯𑌸𑌂𑌗𑌰𑌹𑌿𑌤𑌃 𑌸𑍍𑌵𑌾𑌯𑌤𑍍𑌤𑌚𑍇𑌷𑍍𑌟𑌃 𑌸𑌦𑌾
𑌹𑌾𑌨𑌾𑌦𑌾𑌨𑌵𑌿𑌰𑌕𑍍𑌤𑌮𑌾𑌰𑍍𑌗𑌨𑌿𑌰𑌤𑌃 𑌕𑌶𑍍𑌚𑌿𑌤𑍍𑌤𑌪𑌸𑍍𑌵𑍀 𑌸𑍍𑌥𑌿𑌤𑌃 ।
𑌰𑌥𑍍𑌯𑌾𑌕𑍀𑌰𑍍𑌣𑌵𑌿𑌶𑍀𑌰𑍍𑌣𑌜𑍀𑌰𑍍𑌣𑌵𑌸𑌨𑌃 𑌸𑌂𑌪𑍍𑌰𑌾𑌪𑍍𑌤𑌕𑌂𑌥𑌾𑌸𑌨𑍋
𑌨𑌿𑌰𑍍𑌮𑌾𑌨𑍋 𑌨𑌿𑌰𑌹𑌂𑌕𑍃𑌤𑌿𑌃 𑌶𑌮𑌸𑍁𑌖𑌾𑌭𑍋𑌗𑍈𑌕𑌬𑌦𑍍𑌧𑌸𑍍𑌪𑍃𑌹𑌃 ॥ 3.𑍯5 ॥

𑌚𑌂𑌡𑌾𑌲𑌃 𑌕𑌿𑌂 𑌅𑌯𑌂 𑌦𑍍𑌵𑌿𑌜𑌾𑌤𑌿𑌰𑌥𑌵𑌾 𑌶𑍂𑌦𑍍𑌰𑍋𑌽𑌥 𑌕𑌿𑌂 𑌤𑌾𑌪𑌸𑌃
𑌕𑌿𑌂 𑌵𑌾 𑌤𑌤𑍍𑌤𑍍𑌵𑌵𑌿𑌵𑍇𑌕𑌪𑍇𑌶𑌲𑌮𑌤𑌿𑌰𑍍𑌯𑍋𑌗𑍀𑌶𑍍𑌵𑌰𑌃 𑌕𑍋𑌽𑌪𑌿 𑌕𑌿𑌮𑍍 ।
𑌇𑌤𑍍𑌯𑍁𑌤𑍍𑌪𑌨𑍍𑌨𑌵𑌿𑌕𑌲𑍍𑌪𑌜𑌲𑍍𑌪𑌮𑍁𑌖𑌰𑍈𑌰𑌾𑌭𑌾𑌷𑍍𑌯𑌮𑌾𑌣𑌾 𑌜𑌨𑍈𑌰𑍍
𑌨 𑌕𑍍𑌰𑍁𑌦𑍍𑌧𑌾𑌃 𑌪𑌥𑌿 𑌨𑍈𑌵 𑌤𑍁𑌷𑍍𑌟𑌮𑌨𑌸𑍋 𑌯𑌾𑌂𑌤𑌿 𑌸𑍍𑌵𑌯𑌂 𑌯𑍋𑌗𑌿𑌨𑌃 ॥ 3.𑍯6 ॥

𑌹𑌿𑌂𑌸𑌾𑌶𑍂𑌨𑍍𑌯𑌂 𑌅𑌯𑌤𑍍𑌨𑌲𑌭𑍍𑌯𑌂 𑌅𑌶𑌨𑌂 𑌧𑌾𑌤𑍍𑌰𑌾 𑌮𑌰𑍁𑌤𑍍𑌕𑌲𑍍𑌪𑌿𑌤𑌂
𑌵𑍍𑌯𑌾𑌲𑌾𑌨𑌾𑌂 𑌪𑌶𑌵𑌸𑍍𑌤𑍃𑌣𑌾𑌂𑌕𑍁𑌰𑌭𑍁𑌜𑌸𑍍𑌤𑍁𑌷𑍍𑌟𑌾𑌃 𑌸𑍍𑌥𑌲𑍀𑌶𑌾𑌯𑌿𑌨𑌃 ।
𑌸𑌂𑌸𑌾𑌰𑌾𑌰𑍍𑌣𑌵𑌲𑌂𑌘𑌨𑌕𑍍𑌷𑌮𑌧𑌿𑌯𑌾𑌂 𑌵𑍃𑌤𑍍𑌤𑌿𑌃 𑌕𑍃𑌤𑌾 𑌸𑌾 𑌨𑍃𑌣𑌾𑌂
𑌤𑌾𑌂 𑌅𑌨𑍍𑌵𑍇𑌷𑌯𑌤𑌾𑌂 𑌪𑍍𑌰𑌯𑌾𑌂𑌤𑌿 𑌸𑌤𑌤𑌂 𑌸𑌰𑍍𑌵𑌂 𑌸𑌮𑌾𑌪𑍍𑌤𑌿𑌂 𑌗𑍁𑌣𑌾𑌃 ॥ 3.𑍯𑍭 ॥

𑌗𑌂𑌗𑌾𑌤𑍀𑌰𑍇 𑌹𑌿𑌮𑌗𑌿𑌰𑌿𑌶𑌿𑌲𑌾𑌬𑌦𑍍𑌧𑌪𑌦𑍍𑌮𑌾𑌸𑌨𑌸𑍍𑌯
𑌬𑍍𑌰𑌹𑍍𑌮𑌧𑍍𑌯𑌾𑌨𑌾𑌭𑍍𑌯𑌸𑌨𑌵𑌿𑌧𑌿𑌨𑌾 𑌯𑍋𑌗𑌨𑌿𑌦𑍍𑌰𑌾𑌂 𑌗𑌤𑌸𑍍𑌯 ।
𑌕𑌿𑌂 𑌤𑍈𑌰𑍍𑌭𑌾𑌵𑍍𑌯𑌂 𑌮𑌮 𑌸𑍁𑌦𑌿𑌵𑌸𑍈𑌰𑍍𑌯𑌤𑍍𑌰 𑌤𑍇 𑌨𑌿𑌰𑍍𑌵𑌿𑌶𑌂𑌕𑌾𑌃
𑌕𑌂𑌡𑍂𑌯𑌂𑌤𑍇 𑌜𑌰𑌠𑌹𑌰𑌿𑌣𑌾𑌃 𑌸𑍍𑌵𑌾𑌂𑌗𑌂 𑌅𑌂𑌗𑍇 𑌮𑌦𑍀𑌯𑍇 ॥ 3.𑍯𑍮 ॥

𑌜𑍀𑌰𑍍𑌣𑌾 𑌕𑌂𑌥𑌾 𑌤𑌤𑌃 𑌕𑌿𑌂 𑌸𑌿𑌤𑌂 𑌅𑌮𑌲𑌪𑌟𑌂 𑌪𑌟𑍍𑌟𑌸𑍂𑌤𑍍𑌰𑌂 𑌤𑌤𑌃 𑌕𑌿𑌂
𑌏𑌕𑌾 𑌭𑌾𑌰𑍍𑌯𑌾 𑌤𑌤𑌃 𑌕𑌿𑌂 𑌹𑌯𑌕𑌰𑌿𑌸𑍁𑌗𑌣𑍈𑌰𑌾𑌵𑍃𑌤𑍋 𑌵𑌾 𑌤𑌤𑌃 𑌕𑌿𑌮𑍍 ।
𑌭𑌕𑍍𑌤𑌂 𑌭𑍁𑌕𑍍𑌤𑌂 𑌤𑌤𑌃 𑌕𑌿𑌂 𑌕𑌦𑌶𑌨𑌂 𑌅𑌥𑌵𑌾 𑌵𑌾𑌸𑌰𑌾𑌂𑌤𑍇 𑌤𑌤𑌃 𑌕𑌿𑌂
𑌵𑍍𑌯𑌕𑍍𑌤𑌜𑍍𑌯𑍋𑌤𑌿𑌰𑍍𑌨 𑌵𑌾𑌂𑌤𑌰𑍍𑌮𑌥𑌿𑌤𑌭𑌵𑌭𑌯𑌂 𑌵𑍈𑌭𑌵𑌂 𑌵𑌾 𑌤𑌤𑌃 𑌕𑌿𑌮𑍍 ॥ 3.𑍯𑍮.1 ॥

𑌪𑌾𑌣𑌿𑌃 𑌪𑌾𑌤𑍍𑌰𑌂 𑌪𑌵𑌿𑌤𑍍𑌰𑌂 𑌭𑍍𑌰𑌮𑌣𑌪𑌰𑌿𑌗𑌤𑌂 𑌭𑍈𑌕𑍍𑌷𑍍𑌯𑌂 𑌅𑌕𑍍𑌷𑌯𑍍𑌯𑌂 𑌅𑌨𑍍𑌨𑌂
𑌵𑌿𑌸𑍍𑌤𑍀𑌰𑍍𑌣𑌂 𑌵𑌸𑍍𑌤𑍍𑌰𑌂 𑌆𑌶𑌾𑌦𑌶𑌕𑌂 𑌅𑌚𑌪𑌲𑌂 𑌤𑌲𑍍𑌪𑌂 𑌅𑌸𑍍𑌵𑌲𑍍𑌪𑌂 𑌉𑌰𑍍𑌵𑍀 ।
𑌯𑍇𑌷𑌾𑌂 𑌨𑌿𑌃𑌸𑌂𑌗𑌤𑌾𑌂𑌗𑍀𑌕𑌰𑌣𑌪𑌰𑌿𑌣𑌤𑌸𑍍𑌵𑌾𑌂𑌤𑌸𑌂𑌤𑍋𑌷𑌿𑌣𑌸𑍍𑌤𑍇
𑌧𑌨𑍍𑌯𑌾𑌃 𑌸𑌂𑌨𑍍𑌯𑌸𑍍𑌤𑌦𑍈𑌨𑍍𑌯𑌵𑍍𑌯𑌤𑌿𑌕𑌰𑌨𑌿𑌕𑌰𑌾𑌃 𑌕𑌰𑍍𑌮 𑌨𑌿𑌰𑍍𑌮𑍂𑌲𑌯𑌂𑌤𑌿 ॥ 3.𑍯𑍯 ॥

𑌤𑍍𑌰𑍈𑌲𑍋𑌕𑍍𑌯𑌾𑌧𑌿𑌪𑌤𑌿𑌤𑍍𑌵𑌂 𑌏𑌵 𑌵𑌿𑌰𑌸𑌂 𑌯𑌸𑍍𑌮𑌿𑌨𑍍𑌮𑌹𑌾𑌶𑌾𑌸𑌨𑍇
𑌤𑌲𑍍𑌲𑌬𑍍𑌧𑍍𑌵𑌾𑌸𑌨𑌵𑌸𑍍𑌤𑍍𑌰𑌮𑌾𑌨𑌘𑌟𑌨𑍇 𑌭𑍋𑌗𑍇 𑌰𑌤𑌿𑌂 𑌮𑌾 𑌕𑍃𑌥𑌾𑌃 ।
𑌭𑍋𑌗𑌃 𑌕𑍋𑌽𑌪𑌿 𑌸 𑌏𑌕 𑌏𑌵 𑌪𑌰𑌮𑍋 𑌨𑌿𑌤𑍍𑌯𑍋𑌦𑌿𑌤𑍋 𑌜𑍃𑌂𑌭𑌤𑍇
𑌯𑌤𑍍𑌸𑍍𑌵𑌾𑌦𑌾𑌦𑍍𑌵𑌿𑌰𑌸𑌾 𑌭𑌵𑌂𑌤𑌿 𑌵𑌿𑌷𑌯𑌾𑌸𑍍𑌤𑍍𑌰𑍈𑌲𑍋𑌕𑍍𑌯𑌰𑌾𑌜𑍍𑌯𑌾𑌦𑌯𑌃 ॥ 3.𑍯𑍯.1 ॥

𑌮𑌾𑌤𑌰𑍍𑌮𑍇𑌦𑌿𑌨𑌿 𑌤𑌾𑌤 𑌮𑌾𑌰𑍁𑌤 𑌸𑌖𑍇 𑌤𑍇𑌜𑌃 𑌸𑍁𑌬𑌂𑌧𑍋 𑌜𑌲
𑌭𑍍𑌰𑌾𑌤𑌰𑍍𑌵𑍍𑌯𑍋𑌮 𑌨𑌿𑌬𑌦𑍍𑌧 𑌏𑌷 𑌭𑌵𑌤𑌾𑌂 𑌅𑌂𑌤𑍍𑌯𑌃 𑌪𑍍𑌰𑌣𑌾𑌮𑌾𑌂𑌜𑌲𑌿𑌃 ।
𑌯𑍁𑌷𑍍𑌮𑌤𑍍𑌸𑌂𑌗𑌵𑌶𑍋𑌪𑌜𑌾𑌤𑌸𑍁𑌕𑍃𑌤𑌸𑍍𑌫𑌾𑌰𑌸𑍍𑌫𑍁𑌰𑌨𑍍𑌨𑌿𑌰𑍍𑌮𑌲𑌜𑍍𑌞𑌾𑌨𑌾𑌪𑌾𑌸𑍍𑌤
𑌸𑌮𑌸𑍍𑌤𑌮𑍋𑌹𑌮𑌹𑌿𑌮𑌾 𑌲𑍀𑌯𑍇 𑌪𑌰𑌬𑍍𑌰𑌹𑍍𑌮𑌣𑌿 ॥ 3.100 ॥

𑌶𑌯𑍍𑌯𑌾 𑌶𑍈𑌲𑌶𑌿𑌲𑌾 𑌗𑍃𑌹𑌂 𑌗𑌿𑌰𑌿𑌗𑍁𑌹𑌾 𑌵𑌸𑍍𑌤𑍍𑌰𑌂 𑌤𑌰𑍂𑌣𑌾𑌂 𑌤𑍍𑌵𑌚𑌃
𑌸𑌾𑌰𑌂𑌗𑌾𑌃 𑌸𑍁𑌹𑍃𑌦𑍋 𑌨𑌨𑍁 𑌕𑍍𑌷𑌿𑌤𑌿𑌰𑍁𑌹𑌾𑌂 𑌵𑍃𑌤𑍍𑌤𑌿𑌃 𑌫𑌲𑍈𑌃 𑌕𑍋𑌮𑌲𑍈𑌃 ।
𑌯𑍇𑌷𑌾𑌂 𑌨𑌿𑌰𑍍𑌝𑌰𑌂 𑌅𑌂𑌬𑍁𑌪𑌾𑌨𑌂 𑌉𑌚𑌿𑌤𑌂 𑌰𑌤𑍍𑌯𑍈 𑌤𑍁 𑌵𑌿𑌦𑍍𑌯𑌾𑌂𑌗𑌨𑌾
𑌮𑌨𑍍𑌯𑍇 𑌤𑍇 𑌪𑌰𑌮𑍇𑌶𑍍𑌵𑌰𑌾𑌃 𑌶𑌿𑌰𑌸𑌿 𑌯𑍈𑌰𑍍 𑌬𑌦𑍍𑌧𑍋 𑌨 𑌸𑍇𑌵𑌾𑌂𑌜𑌲𑌿𑌃 ॥ 3.101 ॥

𑌧𑍈𑌰𑍍𑌯𑌂 𑌯𑌸𑍍𑌯 𑌪𑌿𑌤𑌾 𑌕𑍍𑌷𑌮𑌾 𑌚 𑌜𑌨𑌨𑍀 𑌶𑌾𑌂𑌤𑌿𑌶𑍍𑌚𑌿𑌰𑌂 𑌗𑍇𑌹𑌿𑌨𑍀
𑌸𑌤𑍍𑌯𑌂 𑌮𑌿𑌤𑍍𑌰𑌂 𑌇𑌦𑌂 𑌦𑌯𑌾 𑌚 𑌭𑌗𑌿𑌨𑍀 𑌭𑍍𑌰𑌾𑌤𑌾 𑌮𑌨𑌃𑌸𑌂𑌯𑌮𑌃 ।
𑌶𑌯𑍍𑌯𑌾 𑌭𑍂𑌮𑌿𑌤𑌲𑌂 𑌦𑌿𑌶𑍋𑌽𑌪𑌿 𑌵𑌸𑌨𑌂 𑌜𑍍𑌞𑌾𑌨𑌾𑌮𑍃𑌤𑌂 𑌭𑍋𑌜𑌨𑌂
𑌹𑍍𑌯𑍇𑌤𑍇 𑌯𑌸𑍍𑌯 𑌕𑍁𑌟𑍁𑌂𑌬𑌿𑌨𑍋 𑌵𑌦 𑌸𑌖𑍇 𑌕𑌸𑍍𑌮𑌾𑌦𑍍𑌭𑌯𑌂 𑌯𑍋𑌗𑌿𑌨𑌃 ॥ 3.102 ॥

𑌅𑌹𑍌 𑌵𑌾 𑌹𑌾𑌰𑍇 𑌵𑌾 𑌬𑌲𑌵𑌤𑌿 𑌰𑌿𑌪𑍌 𑌵𑌾 𑌸𑍁𑌹𑍃𑌦𑌿 𑌵𑌾
𑌮𑌣𑍌 𑌵𑌾 𑌲𑍋𑌷𑍍𑌠𑍇 𑌵𑌾 𑌕𑍁𑌸𑍁𑌮𑌶𑌯𑌨𑍇 𑌵𑌾 𑌦𑍃𑌷𑌦𑌿 𑌵𑌾 ।
𑌤𑍃𑌣𑍇 𑌵𑌾 𑌸𑍍𑌤𑍍𑌰𑍈𑌣𑍇 𑌵𑌾 𑌮𑌮 𑌸𑌮𑌦𑍃𑌶𑍋 𑌯𑌾𑌂𑌤𑌿 𑌦𑌿𑌵𑌸𑌾𑌃
𑌕𑍍𑌵𑌚𑌿𑌤𑍍𑌪𑍁𑌣𑍍𑌯𑌾𑌰𑌣𑍍𑌯𑍇 𑌶𑌿𑌵 𑌶𑌿𑌵 𑌶𑌿𑌵𑍇𑌤𑌿 𑌪𑍍𑌰𑌲𑌪𑌤𑌃 ॥ 3.103 ॥