𑌭𑌰𑍍𑌤𑍃𑌹𑌰𑍇𑌃 𑌶𑌤𑌕 𑌤𑍍𑌰𑌿𑌶𑌤𑌿 – 𑌨𑍀𑌤𑌿 𑌶𑌤𑌕𑌮𑍍

𑌦𑌿𑌕𑍍𑌕𑌾𑌲𑌾𑌦𑍍𑌯𑌨𑌵𑌚𑍍𑌛𑌿𑌨𑍍𑌨𑌾𑌨𑌂𑌤𑌚𑌿𑌨𑍍𑌮𑌾𑌤𑍍𑌰𑌮𑍂𑌰𑍍𑌤𑌯𑍇 ।
𑌸𑍍𑌵𑌾𑌨𑍁𑌭𑍂𑌤𑍍𑌯𑍇𑌕𑌮𑌾𑌨𑌾𑌯 𑌨𑌮𑌃 𑌶𑌾𑌂𑌤𑌾𑌯 𑌤𑍇𑌜𑌸𑍇 ॥ 1.1 ॥

𑌬𑍋𑌦𑍍𑌧𑌾𑌰𑍋 𑌮𑌤𑍍𑌸𑌰𑌗𑍍𑌰𑌸𑍍𑌤𑌾𑌃 𑌪𑍍𑌰𑌭𑌵𑌃 𑌸𑍍𑌮𑌯𑌦𑍂𑌷𑌿𑌤𑌾𑌃 ।
𑌅𑌬𑍋𑌧𑍋𑌪𑌹𑌤𑌾𑌃 𑌚𑌾𑌨𑍍𑌯𑍇 𑌜𑍀𑌰𑍍𑌣𑌮𑌂𑌗𑍇 𑌸𑍁𑌭𑌾𑌷𑌿𑌤𑌮𑍍 ॥ 1.2 ॥

𑌅𑌜𑍍𑌞𑌃 𑌸𑍁𑌖𑌂 𑌆𑌰𑌾𑌧𑍍𑌯𑌃
𑌸𑍁𑌖𑌤𑌰𑌂 𑌆𑌰𑌾𑌧𑍍𑌯𑌤𑍇 𑌵𑌿𑌶𑍇𑌷𑌜𑍍𑌞𑌃 ।
𑌜𑍍𑌞𑌾𑌨𑌲𑌵𑌦𑍁𑌰𑍍𑌵𑌿𑌦𑌗𑍍𑌧𑌂
𑌬𑍍𑌰𑌹𑍍𑌮𑌾𑌪𑌿 𑌤𑌂 𑌨𑌰𑌂 𑌨 𑌰𑌂𑌜𑌯𑌤𑌿 ॥ 1.3 ॥

𑌪𑍍𑌰𑌸𑌹𑍍𑌯 𑌮𑌣𑌿𑌂 𑌉𑌦𑍍𑌧𑌰𑍇𑌨𑍍𑌮𑌕𑌰𑌵𑌕𑍍𑌤𑍍𑌰𑌦𑌂𑌷𑍍𑌟𑍍𑌰𑌾𑌂𑌤𑌰𑌾𑌤𑍍
𑌸𑌮𑍁𑌦𑍍𑌰𑌂 𑌅𑌪𑌿 𑌸𑌂𑌤𑌰𑍇𑌤𑍍𑌪𑍍𑌰𑌚𑌲𑌦𑍂𑌰𑍍𑌮𑌿𑌮𑌾𑌲𑌾𑌕𑍁𑌲𑌮𑍍 ।
𑌭𑍁𑌜𑌂𑌗𑌂 𑌅𑌪𑌿 𑌕𑍋𑌪𑌿𑌤𑌂 𑌶𑌿𑌰𑌸𑌿 𑌪𑍁𑌷𑍍𑌪𑌵𑌦𑍍𑌧𑌾𑌰𑌯𑍇𑌤𑍍
𑌨 𑌤𑍁 𑌪𑍍𑌰𑌤𑌿𑌨𑌿𑌵𑌿𑌷𑍍𑌟𑌮𑍂𑌰𑍍𑌖𑌜𑌨𑌚𑌿𑌤𑍍𑌤𑌂 𑌆𑌰𑌾𑌧𑌯𑍇𑌤𑍍 ॥ 1.4 ॥

𑌲𑌭𑍇𑌤 𑌸𑌿𑌕𑌤𑌾𑌸𑍁 𑌤𑍈𑌲𑌂 𑌅𑌪𑌿 𑌯𑌤𑍍𑌨𑌤𑌃 𑌪𑍀𑌡𑌯𑌨𑍍
𑌪𑌿𑌬𑍇𑌚𑍍𑌚 𑌮𑍃𑌗𑌤𑍃𑌷𑍍𑌣𑌿𑌕𑌾𑌸𑍁 𑌸𑌲𑌿𑌲𑌂 𑌪𑌿𑌪𑌾𑌸𑌾𑌰𑍍𑌦𑌿𑌤𑌃 ।
𑌕𑍍𑌵𑌚𑌿𑌦𑌪𑌿 𑌪𑌰𑍍𑌯𑌟𑌨𑍍𑌶𑌶𑌵𑌿𑌷𑌾𑌣𑌂 𑌆𑌸𑌾𑌦𑌯𑍇𑌤𑍍
𑌨 𑌤𑍁 𑌪𑍍𑌰𑌤𑌿𑌨𑌿𑌵𑌿𑌷𑍍𑌟𑌮𑍂𑌰𑍍𑌖𑌚𑌿𑌤𑍍𑌤𑌂 𑌆𑌰𑌾𑌧𑌯𑍇𑌤𑍍 ॥ 1.5 ॥

𑌵𑍍𑌯𑌾𑌲𑌂 𑌬𑌾𑌲𑌮𑍃𑌣𑌾𑌲𑌤𑌂𑌤𑍁𑌭𑌿𑌰𑌸𑍌 𑌰𑍋𑌦𑍍𑌧𑍁𑌂 𑌸𑌮𑍁𑌜𑍍𑌜𑍃𑌂𑌭𑌤𑍇
𑌛𑍇𑌤𑍍𑌤𑍁𑌂 𑌵𑌜𑍍𑌰𑌮𑌣𑌿𑌂 𑌶𑌿𑌰𑍀𑌷𑌕𑍁𑌸𑍁𑌮𑌪𑍍𑌰𑌾𑌂𑌤𑍇𑌨 𑌸𑌨𑍍𑌨𑌹𑍍𑌯𑌤𑌿 ।
𑌮𑌾𑌧𑍁𑌰𑍍𑌯𑌂 𑌮𑌧𑍁𑌬𑌿𑌂𑌦𑍁𑌨𑌾 𑌰𑌚𑌯𑌿𑌤𑍁𑌂 𑌕𑍍𑌷𑌾𑌰𑌾𑌂𑌬𑍁𑌧𑍇𑌰𑍀𑌹𑌤𑍇
𑌨𑍇𑌤𑍁𑌂 𑌵𑌾𑌂𑌛𑌤𑌿 𑌯𑌃 𑌖𑌲𑌾𑌨𑍍𑌪𑌥𑌿 𑌸𑌤𑌾𑌂 𑌸𑍂𑌕𑍍𑌤𑍈𑌃 𑌸𑍁𑌧𑌾𑌸𑍍𑌯𑌂𑌦𑌿𑌭𑌿𑌃 ॥ 1.6 ॥

𑌸𑍍𑌵𑌾𑌯𑌤𑍍𑌤𑌂 𑌏𑌕𑌾𑌂𑌤𑌗𑍁𑌣𑌂 𑌵𑌿𑌧𑌾𑌤𑍍𑌰𑌾
𑌵𑌿𑌨𑌿𑌰𑍍𑌮𑌿𑌤𑌂 𑌛𑌾𑌦𑌨𑌂 𑌅𑌜𑍍𑌞𑌤𑌾𑌯𑌾𑌃 ।
𑌵𑌿𑌶𑍇𑌷𑌤𑌃 𑌸𑌰𑍍𑌵𑌵𑌿𑌦𑌾𑌂 𑌸𑌮𑌾𑌜𑍇
𑌵𑌿𑌭𑍂𑌷𑌣𑌂 𑌮𑍌𑌨𑌂 𑌅𑌪𑌂𑌡𑌿𑌤𑌾𑌨𑌾𑌮𑍍 ॥ 1.𑍭 ॥

𑌯𑌦𑌾 𑌕𑌿𑌂𑌚𑌿𑌜𑍍𑌜𑍍𑌞𑍋𑌽𑌹𑌂 𑌦𑍍𑌵𑌿𑌪 𑌇𑌵 𑌮𑌦𑌾𑌂𑌧𑌃 𑌸𑌮𑌭𑌵𑌂
𑌤𑌦𑌾 𑌸𑌰𑍍𑌵𑌜𑍍𑌞𑍋𑌽𑌸𑍍𑌮𑍀𑌤𑍍𑌯𑌭𑌵𑌦𑌵𑌲𑌿𑌪𑍍𑌤𑌂 𑌮𑌮 𑌮𑌨𑌃
𑌯𑌦𑌾 𑌕𑌿𑌂𑌚𑌿𑌤𑍍𑌕𑌿𑌂𑌚𑌿𑌦𑍍𑌬𑍁𑌧𑌜𑌨𑌸𑌕𑌾𑌶𑌾𑌦𑌵𑌗𑌤𑌂
𑌤𑌦𑌾 𑌮𑍂𑌰𑍍𑌖𑍋𑌽𑌸𑍍𑌮𑍀𑌤𑌿 𑌜𑍍𑌵𑌰 𑌇𑌵 𑌮𑌦𑍋 𑌮𑍇 𑌵𑍍𑌯𑌪𑌗𑌤𑌃 ॥ 1.𑍮 ॥

𑌕𑍃𑌮𑌿𑌕𑍁𑌲𑌚𑌿𑌤𑌂 𑌲𑌾𑌲𑌾𑌕𑍍𑌲𑌿𑌨𑍍𑌨𑌂 𑌵𑌿𑌗𑌂𑌧𑌿𑌜𑍁𑌗𑍁𑌪𑍍𑌸𑌿𑌤𑌂
𑌨𑌿𑌰𑍁𑌪𑌮𑌰𑌸𑌂 𑌪𑍍𑌰𑍀𑌤𑍍𑌯𑌾 𑌖𑌾𑌦𑌨𑍍𑌨𑌰𑌾𑌸𑍍𑌥𑌿 𑌨𑌿𑌰𑌾𑌮𑌿𑌷𑌮𑍍 ।
𑌸𑍁𑌰𑌪𑌤𑌿𑌂 𑌅𑌪𑌿 𑌶𑍍𑌵𑌾 𑌪𑌾𑌰𑍍𑌶𑍍𑌵𑌸𑍍𑌥𑌂 𑌵𑌿𑌲𑍋𑌕𑍍𑌯 𑌨 𑌶𑌂𑌕𑌤𑍇
𑌨 𑌹𑌿 𑌗𑌣𑌯𑌤𑌿 𑌕𑍍𑌷𑍁𑌦𑍍𑌰𑍋 𑌜𑌂𑌤𑍁𑌃 𑌪𑌰𑌿𑌗𑍍𑌰𑌹𑌫𑌲𑍍𑌗𑍁𑌤𑌾𑌮𑍍 ॥ 1.𑍯 ॥

𑌶𑌿𑌰𑌃 𑌶𑌾𑌰𑍍𑌵𑌂 𑌸𑍍𑌵𑌰𑍍𑌗𑌾𑌤𑍍𑌪𑌶𑍁𑌪𑌤𑌿𑌶𑌿𑌰𑌸𑍍𑌤𑌃 𑌕𑍍𑌷𑌿𑌤𑌿𑌧𑌰𑌂
𑌮𑌹𑍀𑌧𑍍𑌰𑌾𑌦𑍁𑌤𑍍𑌤𑍁𑌂𑌗𑌾𑌦𑌵𑌨𑌿𑌂 𑌅𑌵𑌨𑍇𑌶𑍍𑌚𑌾𑌪𑌿 𑌜𑌲𑌧𑌿𑌮𑍍 ।
𑌅𑌧𑍋𑌽𑌧𑍋 𑌗𑌂𑌗𑍇𑌯𑌂 𑌪𑌦𑌂 𑌉𑌪𑌗𑌤𑌾 𑌸𑍍𑌤𑍋𑌕𑌮𑍍
𑌅𑌥𑌵𑌾𑌵𑌿𑌵𑍇𑌕𑌭𑍍𑌰𑌷𑍍𑌟𑌾𑌨𑌾𑌂 𑌭𑌵𑌤𑌿 𑌵𑌿𑌨𑌿𑌪𑌾𑌤𑌃 𑌶𑌤𑌮𑍁𑌖𑌃 ॥ 1.10 ॥

𑌶𑌕𑍍𑌯𑍋 𑌵𑌾𑌰𑌯𑌿𑌤𑍁𑌂 𑌜𑌲𑍇𑌨 𑌹𑍁𑌤𑌭𑍁𑌕𑍍𑌚𑍍𑌛𑌤𑍍𑌰𑍇𑌣 𑌸𑍂𑌰𑍍𑌯𑌾𑌤𑌪𑍋
𑌨𑌾𑌗𑍇𑌂𑌦𑍍𑌰𑍋 𑌨𑌿𑌶𑌿𑌤𑌾𑌂𑌕𑍁𑌶𑍇𑌨 𑌸𑌮𑌦𑍋 𑌦𑌂𑌡𑍇𑌨 𑌗𑍋𑌗𑌰𑍍𑌦𑌭𑍌 ।
𑌵𑍍𑌯𑌾𑌧𑌿𑌰𑍍𑌭𑍇𑌷𑌜𑌸𑌂𑌗𑍍𑌰𑌹𑍈𑌶𑍍𑌚 𑌵𑌿𑌵𑌿𑌧𑍈𑌰𑍍𑌮𑌂𑌤𑍍𑌰𑌪𑍍𑌰𑌯𑍋𑌗𑍈𑌰𑍍𑌵𑌿𑌷𑌂
𑌸𑌰𑍍𑌵𑌸𑍍𑌯𑍌𑌷𑌧𑌂 𑌅𑌸𑍍𑌤𑌿 𑌶𑌾𑌸𑍍𑌤𑍍𑌰𑌵𑌿𑌹𑌿𑌤𑌂 𑌮𑍂𑌰𑍍𑌖𑌸𑍍𑌯 𑌨𑌾𑌸𑍍𑌤𑍍𑌯𑍌𑌷𑌧𑌮𑍍 ॥ 1.11 ॥

𑌸𑌾𑌹𑌿𑌤𑍍𑌯𑌸𑌂𑌗𑍀𑌤𑌕𑌲𑌾𑌵𑌿𑌹𑍀𑌨𑌃
𑌸𑌾𑌕𑍍𑌷𑌾𑌤𑍍𑌪𑌶𑍁𑌃 𑌪𑍁𑌚𑍍𑌛𑌵𑌿𑌷𑌾𑌣𑌹𑍀𑌨𑌃 ।
𑌤𑍃𑌣𑌂 𑌨 𑌖𑌾𑌦𑌨𑍍𑌨𑌪𑌿 𑌜𑍀𑌵𑌮𑌾𑌨𑌸𑍍
𑌤𑌦𑍍𑌭𑌾𑌗𑌧𑍇𑌯𑌂 𑌪𑌰𑌮𑌂 𑌪𑌶𑍂𑌨𑌾𑌮𑍍 ॥ 1.12 ॥

𑌯𑍇𑌷𑌾𑌂 𑌨 𑌵𑌿𑌦𑍍𑌯𑌾 𑌨 𑌤𑌪𑍋 𑌨 𑌦𑌾𑌨𑌂
𑌜𑍍𑌞𑌾𑌨𑌂 𑌨 𑌶𑍀𑌲𑌂 𑌨 𑌗𑍁𑌣𑍋 𑌨 𑌧𑌰𑍍𑌮𑌃 ।
𑌤𑍇 𑌮𑌰𑍍𑌤𑍍𑌯𑌲𑍋𑌕𑍇 𑌭𑍁𑌵𑌿 𑌭𑌾𑌰𑌭𑍂𑌤𑌾
𑌮𑌨𑍁𑌷𑍍𑌯𑌰𑍂𑌪𑍇𑌣 𑌮𑍃𑌗𑌾𑌶𑍍𑌚𑌰𑌂𑌤𑌿 ॥ 1.13 ॥

𑌵𑌰𑌂 𑌪𑌰𑍍𑌵𑌤𑌦𑍁𑌰𑍍𑌗𑍇𑌷𑍁
𑌭𑍍𑌰𑌾𑌂𑌤𑌂 𑌵𑌨𑌚𑌰𑍈𑌃 𑌸𑌹
𑌨 𑌮𑍂𑌰𑍍𑌖𑌜𑌨𑌸𑌂𑌪𑌰𑍍𑌕𑌃
𑌸𑍁𑌰𑍇𑌂𑌦𑍍𑌰𑌭𑌵𑌨𑍇𑌷𑍍𑌵𑌪𑌿 ॥ 1.14 ॥

𑌶𑌾𑌸𑍍𑌤𑍍𑌰𑍋𑌪𑌸𑍍𑌕𑍃𑌤𑌶𑌬𑍍𑌦𑌸𑍁𑌂𑌦𑌰𑌗𑌿𑌰𑌃 𑌶𑌿𑌷𑍍𑌯𑌪𑍍𑌰𑌦𑍇𑌯𑌾𑌗𑌮𑌾
𑌵𑌿𑌖𑍍𑌯𑌾𑌤𑌾𑌃 𑌕𑌵𑌯𑍋 𑌵𑌸𑌂𑌤𑌿 𑌵𑌿𑌷𑌯𑍇 𑌯𑌸𑍍𑌯 𑌪𑍍𑌰𑌭𑍋𑌰𑍍𑌨𑌿𑌰𑍍𑌧𑌨𑌾𑌃 ।
𑌤𑌜𑍍𑌜𑌾𑌡𑍍𑌯𑌂 𑌵𑌸𑍁𑌧𑌾𑌧𑌿𑌪𑌸𑍍𑌯 𑌕𑌵𑌯𑌸𑍍𑌤𑍍𑌵𑌰𑍍𑌥𑌂 𑌵𑌿𑌨𑌾𑌪𑍀𑌶𑍍𑌵𑌰𑌾𑌃
𑌕𑍁𑌤𑍍𑌸𑍍𑌯𑌾𑌃 𑌸𑍍𑌯𑍁𑌃 𑌕𑍁𑌪𑌰𑍀𑌕𑍍𑌷𑌕𑌾 𑌹𑌿 𑌮𑌣𑌯𑍋 𑌯𑍈𑌰𑌰𑍍𑌘𑌤𑌃 𑌪𑌾𑌤𑌿𑌤𑌾𑌃 ॥ 1.15 ॥

𑌹𑌰𑍍𑌤𑍁𑌰𑍍𑌯𑌾𑌤𑌿 𑌨 𑌗𑍋𑌚𑌰𑌂 𑌕𑌿𑌂 𑌅𑌪𑌿 𑌶𑌂 𑌪𑍁𑌷𑍍𑌣𑌾𑌤𑌿 𑌯𑌤𑍍𑌸𑌰𑍍𑌵𑌦𑌾𑌽𑌪𑍍𑌯𑍍
𑌅𑌰𑍍𑌥𑌿𑌭𑍍𑌯𑌃 𑌪𑍍𑌰𑌤𑌿𑌪𑌾𑌦𑍍𑌯𑌮𑌾𑌨𑌂 𑌅𑌨𑌿𑌶𑌂 𑌪𑍍𑌰𑌾𑌪𑍍𑌨𑍋𑌤𑌿 𑌵𑍃𑌦𑍍𑌧𑌿𑌂 𑌪𑌰𑌾𑌮𑍍 ।
𑌕𑌲𑍍𑌪𑌾𑌂𑌤𑍇𑌷𑍍𑌵𑌪𑌿 𑌨 𑌪𑍍𑌰𑌯𑌾𑌤𑌿 𑌨𑌿𑌧𑌨𑌂 𑌵𑌿𑌦𑍍𑌯𑌾𑌖𑍍𑌯𑌂 𑌅𑌂𑌤𑌰𑍍𑌧𑌨𑌂
𑌯𑍇𑌷𑌾𑌂 𑌤𑌾𑌨𑍍𑌪𑍍𑌰𑌤𑌿 𑌮𑌾𑌨𑌂 𑌉𑌜𑍍𑌝𑌤 𑌨𑍃𑌪𑌾𑌃 𑌕𑌸𑍍𑌤𑍈𑌃 𑌸𑌹 𑌸𑍍𑌪𑌰𑍍𑌧𑌤𑍇 ॥ 1.16 ॥

𑌅𑌧𑌿𑌗𑌤𑌪𑌰𑌮𑌾𑌰𑍍𑌥𑌾𑌨𑍍𑌪𑌂𑌡𑌿𑌤𑌾𑌨𑍍𑌮𑌾𑌵𑌮𑌂𑌸𑍍𑌥𑌾𑌸𑍍
𑌤𑍃𑌣𑌂 𑌇𑌵 𑌲𑌘𑍁 𑌲𑌕𑍍𑌷𑍍𑌮𑍀𑌰𑍍𑌨𑍈𑌵 𑌤𑌾𑌨𑍍𑌸𑌂𑌰𑍁𑌣𑌦𑍍𑌧𑌿 ।
𑌅𑌭𑌿𑌨𑌵𑌮𑌦𑌲𑍇𑌖𑌾𑌶𑍍𑌯𑌾𑌮𑌗𑌂𑌡𑌸𑍍𑌥𑌲𑌾𑌨𑌾𑌂
𑌨 𑌭𑌵𑌤𑌿 𑌬𑌿𑌸𑌤𑌂𑌤𑍁𑌰𑍍𑌵𑌾𑌰𑌣𑌂 𑌵𑌾𑌰𑌣𑌾𑌨𑌾𑌮𑍍 ॥ 1.1𑍭 ॥

𑌅𑌂𑌭𑍋𑌜𑌿𑌨𑍀𑌵𑌨𑌵𑌿𑌹𑌾𑌰𑌵𑌿𑌲𑌾𑌸𑌂 𑌏𑌵
𑌹𑌂𑌸𑌸𑍍𑌯 𑌹𑌂𑌤𑌿 𑌨𑌿𑌤𑌰𑌾𑌂 𑌕𑍁𑌪𑌿𑌤𑍋 𑌵𑌿𑌧𑌾𑌤𑌾 ।
𑌨 𑌤𑍍𑌵𑌸𑍍𑌯 𑌦𑍁𑌗𑍍𑌧𑌜𑌲𑌭𑍇𑌦𑌵𑌿𑌧𑍌 𑌪𑍍𑌰𑌸𑌿𑌦𑍍𑌧𑌾𑌂
𑌵𑍈𑌦𑌗𑍍𑌧𑍀𑌕𑍀𑌰𑍍𑌤𑌿𑌂 𑌅𑌪𑌹𑌰𑍍𑌤𑍁𑌂 𑌅𑌸𑍌 𑌸𑌮𑌰𑍍𑌥𑌃 ॥ 1.1𑍮 ॥

𑌕𑍇𑌯𑍂𑌰𑌾𑌣𑌿 𑌨 𑌭𑍂𑌷𑌯𑌂𑌤𑌿 𑌪𑍁𑌰𑍁𑌷𑌂 𑌹𑌾𑌰𑌾 𑌨 𑌚𑌂𑌦𑍍𑌰𑍋𑌜𑍍𑌜𑍍𑌵𑌲𑌾
𑌨 𑌸𑍍𑌨𑌾𑌨𑌂 𑌨 𑌵𑌿𑌲𑍇𑌪𑌨𑌂 𑌨 𑌕𑍁𑌸𑍁𑌮𑌂 𑌨𑌾𑌲𑌂𑌕𑍃𑌤𑌾 𑌮𑍂𑌰𑍍𑌧𑌜𑌾𑌃 ।
𑌵𑌾𑌣𑍍𑌯𑍇𑌕𑌾 𑌸𑌮𑌲𑌂𑌕𑌰𑍋𑌤𑌿 𑌪𑍁𑌰𑍁𑌷𑌂 𑌯𑌾 𑌸𑌂𑌸𑍍𑌕𑍃𑌤𑌾 𑌧𑌾𑌰𑍍𑌯𑌤𑍇
𑌕𑍍𑌷𑍀𑌯𑌂𑌤𑍇 𑌖𑌲𑍁 𑌭𑍂𑌷𑌣𑌾𑌨𑌿 𑌸𑌤𑌤𑌂 𑌵𑌾𑌗𑍍𑌭𑍂𑌷𑌣𑌂 𑌭𑍂𑌷𑌣𑌮𑍍 ॥ 1.1𑍯 ॥

𑌵𑌿𑌦𑍍𑌯𑌾 𑌨𑌾𑌮 𑌨𑌰𑌸𑍍𑌯 𑌰𑍂𑌪𑌂 𑌅𑌧𑌿𑌕𑌂 𑌪𑍍𑌰𑌚𑍍𑌛𑌨𑍍𑌨𑌗𑍁𑌪𑍍𑌤𑌂 𑌧𑌨𑌂
𑌵𑌿𑌦𑍍𑌯𑌾 𑌭𑍋𑌗𑌕𑌰𑍀 𑌯𑌶𑌃𑌸𑍁𑌖𑌕𑌰𑍀 𑌵𑌿𑌦𑍍𑌯𑌾 𑌗𑍁𑌰𑍂𑌣𑌾𑌂 𑌗𑍁𑌰𑍁𑌃 ।
𑌵𑌿𑌦𑍍𑌯𑌾 𑌬𑌂𑌧𑍁𑌜𑌨𑍋 𑌵𑌿𑌦𑍇𑌶𑌗𑌮𑌨𑍇 𑌵𑌿𑌦𑍍𑌯𑌾 𑌪𑌰𑌾 𑌦𑍇𑌵𑌤𑌾
𑌵𑌿𑌦𑍍𑌯𑌾 𑌰𑌾𑌜𑌸𑍁 𑌪𑍂𑌜𑍍𑌯𑌤𑍇 𑌨 𑌤𑍁 𑌧𑌨𑌂 𑌵𑌿𑌦𑍍𑌯𑌾𑌵𑌿𑌹𑍀𑌨𑌃 𑌪𑌶𑍁𑌃 ॥ 1.20 ॥

𑌕𑍍𑌷𑌾𑌂𑌤𑌿𑌶𑍍𑌚𑍇𑌤𑍍𑌕𑌵𑌚𑍇𑌨 𑌕𑌿𑌂 𑌕𑌿𑌂 𑌅𑌰𑌿𑌭𑌿𑌃 𑌕𑍍𑌰𑍋𑌧𑍋𑌽𑌸𑍍𑌤𑌿 𑌚𑍇𑌦𑍍𑌦𑍇𑌹𑌿𑌨𑌾𑌂
𑌜𑍍𑌞𑌾𑌤𑌿𑌶𑍍𑌚𑍇𑌦𑌨𑌲𑍇𑌨 𑌕𑌿𑌂 𑌯𑌦𑌿 𑌸𑍁𑌹𑍃𑌦𑍍𑌦𑌿𑌵𑍍𑌯𑍌𑌷𑌧𑌂 𑌕𑌿𑌂 𑌫𑌲𑌮𑍍 ।
𑌕𑌿𑌂 𑌸𑌰𑍍𑌪𑍈𑌰𑍍𑌯𑌦𑌿 𑌦𑍁𑌰𑍍𑌜𑌨𑌾𑌃 𑌕𑌿𑌂 𑌉 𑌧𑌨𑍈𑌰𑍍𑌵𑌿𑌦𑍍𑌯𑌾𑌽𑌨𑌵𑌦𑍍𑌯𑌾 𑌯𑌦𑌿
𑌵𑍍𑌰𑍀𑌡𑌾 𑌚𑍇𑌤𑍍𑌕𑌿𑌂 𑌉 𑌭𑍂𑌷𑌣𑍈𑌃 𑌸𑍁𑌕𑌵𑌿𑌤𑌾 𑌯𑌦𑍍𑌯𑌸𑍍𑌤𑌿 𑌰𑌾𑌜𑍍𑌯𑍇𑌨 𑌕𑌿𑌮𑍍 ॥ 1.21 ॥

𑌦𑌾𑌕𑍍𑌷𑌿𑌣𑍍𑌯𑌂 𑌸𑍍𑌵𑌜𑌨𑍇 𑌦𑌯𑌾 𑌪𑌰𑌿𑌜𑌨𑍇 𑌶𑌾𑌠𑍍𑌯𑌂 𑌸𑌦𑌾 𑌦𑍁𑌰𑍍𑌜𑌨𑍇
𑌪𑍍𑌰𑍀𑌤𑌿𑌃 𑌸𑌾𑌧𑍁𑌜𑌨𑍇 𑌨𑌯𑍋 𑌨𑍃𑌪𑌜𑌨𑍇 𑌵𑌿𑌦𑍍𑌵𑌜𑍍𑌜𑌨𑍇 𑌚𑌾𑌰𑍍𑌜𑌵𑌮𑍍 ।
𑌶𑍌𑌰𑍍𑌯𑌂 𑌶𑌤𑍍𑌰𑍁𑌜𑌨𑍇 𑌕𑍍𑌷𑌮𑌾 𑌗𑍁𑌰𑍁𑌜𑌨𑍇 𑌕𑌾𑌂𑌤𑌾𑌜𑌨𑍇 𑌧𑍃𑌷𑍍𑌟𑌤𑌾
𑌯𑍇 𑌚𑍈𑌵𑌂 𑌪𑍁𑌰𑍁𑌷𑌾𑌃 𑌕𑌲𑌾𑌸𑍁 𑌕𑍁𑌶𑌲𑌾𑌸𑍍𑌤𑍇𑌷𑍍𑌵𑍇𑌵 𑌲𑍋𑌕𑌸𑍍𑌥𑌿𑌤𑌿𑌃 ॥ 1.22 ॥

𑌜𑌾𑌡𑍍𑌯𑌂 𑌧𑌿𑌯𑍋 𑌹𑌰𑌤𑌿 𑌸𑌿𑌂𑌚𑌤𑌿 𑌵𑌾𑌚𑌿 𑌸𑌤𑍍𑌯𑌂
𑌮𑌾𑌨𑍋𑌨𑍍𑌨𑌤𑌿𑌂 𑌦𑌿𑌶𑌤𑌿 𑌪𑌾𑌪𑌂 𑌅𑌪𑌾𑌕𑌰𑍋𑌤𑌿 ।
𑌚𑍇𑌤𑌃 𑌪𑍍𑌰𑌸𑌾𑌦𑌯𑌤𑌿 𑌦𑌿𑌕𑍍𑌷𑍁 𑌤𑌨𑍋𑌤𑌿 𑌕𑍀𑌰𑍍𑌤𑌿𑌂
𑌸𑌤𑍍𑌸𑌂𑌗𑌤𑌿𑌃 𑌕𑌥𑌯 𑌕𑌿𑌂 𑌨 𑌕𑌰𑍋𑌤𑌿 𑌪𑍁𑌂𑌸𑌾𑌮𑍍 ॥ 1.23 ॥

𑌜𑌯𑌂𑌤𑌿 𑌤𑍇 𑌸𑍁𑌕𑍃𑌤𑌿𑌨𑍋
𑌰𑌸𑌸𑌿𑌦𑍍𑌧𑌾𑌃 𑌕𑌵𑍀𑌶𑍍𑌵𑌰𑌾𑌃 ।
𑌨𑌾𑌸𑍍𑌤𑌿 𑌯𑍇𑌷𑌾𑌂 𑌯𑌶𑌃𑌕𑌾𑌯𑍇
𑌜𑌰𑌾𑌮𑌰𑌣𑌜𑌂 𑌭𑌯𑌮𑍍 ॥ 1.24 ॥

𑌸𑍂𑌨𑍁𑌃 𑌸𑌚𑍍𑌚𑌰𑌿𑌤𑌃 𑌸𑌤𑍀 𑌪𑍍𑌰𑌿𑌯𑌤𑌮𑌾 𑌸𑍍𑌵𑌾𑌮𑍀 𑌪𑍍𑌰𑌸𑌾𑌦𑍋𑌨𑍍𑌮𑍁𑌖𑌃
𑌸𑍍𑌨𑌿𑌗𑍍𑌧𑌂 𑌮𑌿𑌤𑍍𑌰𑌂 𑌅𑌵𑌂𑌚𑌕𑌃 𑌪𑌰𑌿𑌜𑌨𑍋 𑌨𑌿𑌃𑌕𑍍𑌲𑍇𑌶𑌲𑍇𑌶𑌂 𑌮𑌨𑌃 ।
𑌆𑌕𑌾𑌰𑍋 𑌰𑍁𑌚𑌿𑌰𑌃 𑌸𑍍𑌥𑌿𑌰𑌶𑍍𑌚 𑌵𑌿𑌭𑌵𑍋 𑌵𑌿𑌦𑍍𑌯𑌾𑌵𑌦𑌾𑌤𑌂 𑌮𑍁𑌖𑌂
𑌤𑍁𑌷𑍍𑌟𑍇 𑌵𑌿𑌷𑍍𑌟𑌪𑌕𑌷𑍍𑌟𑌹𑌾𑌰𑌿𑌣𑌿 𑌹𑌰𑍌 𑌸𑌂𑌪𑍍𑌰𑌾𑌪𑍍𑌯𑌤𑍇 𑌦𑍇𑌹𑌿𑌨𑌾 ॥ 1.25 ॥

𑌪𑍍𑌰𑌾𑌣𑌾𑌘𑌾𑌤𑌾𑌨𑍍𑌨𑌿𑌵𑍃𑌤𑍍𑌤𑌿𑌃 𑌪𑌰𑌧𑌨𑌹𑌰𑌣𑍇 𑌸𑌂𑌯𑌮𑌃 𑌸𑌤𑍍𑌯𑌵𑌾𑌕𑍍𑌯𑌂
𑌕𑌾𑌲𑍇 𑌶𑌕𑍍𑌤𑍍𑌯𑌾 𑌪𑍍𑌰𑌦𑌾𑌨𑌂 𑌯𑍁𑌵𑌤𑌿𑌜𑌨𑌕𑌥𑌾𑌮𑍂𑌕𑌭𑌾𑌵𑌃 𑌪𑌰𑍇𑌷𑌾𑌮𑍍 ।
𑌤𑍃𑌷𑍍𑌣𑌾𑌸𑍍𑌰𑍋𑌤𑍋 𑌵𑌿𑌭𑌂𑌗𑍋 𑌗𑍁𑌰𑍁𑌷𑍁 𑌚 𑌵𑌿𑌨𑌯𑌃 𑌸𑌰𑍍𑌵𑌭𑍂𑌤𑌾𑌨𑍁𑌕𑌂𑌪𑌾
𑌸𑌾𑌮𑌾𑌨𑍍𑌯𑌃 𑌸𑌰𑍍𑌵𑌶𑌾𑌸𑍍𑌤𑍍𑌰𑍇𑌷𑍍𑌵𑌨𑍁𑌪𑌹𑌤𑌵𑌿𑌧𑌿𑌃 𑌶𑍍𑌰𑍇𑌯𑌸𑌾𑌂 𑌏𑌷 𑌪𑌂𑌥𑌾𑌃 ॥ 1.26 ॥

𑌪𑍍𑌰𑌾𑌰𑌭𑍍𑌯𑌤𑍇 𑌨 𑌖𑌲𑍁 𑌵𑌿𑌘𑍍𑌨𑌭𑌯𑍇𑌨 𑌨𑍀𑌚𑍈𑌃
𑌪𑍍𑌰𑌾𑌰𑌭𑍍𑌯 𑌵𑌿𑌘𑍍𑌨𑌵𑌿𑌹𑌤𑌾 𑌵𑌿𑌰𑌮𑌂𑌤𑌿 𑌮𑌧𑍍𑌯𑌾𑌃 ।
𑌵𑌿𑌘𑍍𑌨𑍈𑌃 𑌪𑍁𑌨𑌃 𑌪𑍁𑌨𑌰𑌪𑌿 𑌪𑍍𑌰𑌤𑌿𑌹𑌨𑍍𑌯𑌮𑌾𑌨𑌾𑌃
𑌪𑍍𑌰𑌾𑌰𑌬𑍍𑌧𑌂 𑌉𑌤𑍍𑌤𑌮𑌜𑌨𑌾 𑌨 𑌪𑌰𑌿𑌤𑍍𑌯𑌜𑌂𑌤𑌿 ॥ 1.2𑍭 ॥

𑌅𑌸𑌂𑌤𑍋 𑌨𑌾𑌭𑍍𑌯𑌰𑍍𑌥𑍍𑌯𑌾𑌃 𑌸𑍁𑌹𑍃𑌦𑌪𑌿 𑌨 𑌯𑌾𑌚𑍍𑌯𑌃 𑌕𑍃𑌶𑌧𑌨𑌃
𑌪𑍍𑌰𑌿𑌯𑌾 𑌨𑍍𑌯𑌾𑌯𑍍𑌯𑌾 𑌵𑍃𑌤𑍍𑌤𑌿𑌰𑍍𑌮𑌲𑌿𑌨𑌂 𑌅𑌸𑍁𑌭𑌂𑌗𑍇𑌽𑌪𑍍𑌯𑌸𑍁𑌕𑌰𑌮𑍍 ।
𑌵𑌿𑌪𑌦𑍍𑌯𑍁𑌚𑍍𑌚𑍈𑌃 𑌸𑍍𑌥𑍇𑌯𑌂 𑌪𑌦𑌂 𑌅𑌨𑍁𑌵𑌿𑌧𑍇𑌯𑌂 𑌚 𑌮𑌹𑌤𑌾𑌂
𑌸𑌤𑌾𑌂 𑌕𑍇𑌨𑍋𑌦𑍍𑌦𑌿𑌷𑍍𑌟𑌂 𑌵𑌿𑌷𑌮𑌂 𑌅𑌸𑌿𑌧𑌾𑌰𑌾𑌵𑍍𑌰𑌤𑌂 𑌇𑌦𑌮𑍍 ॥ 1.2𑍮 ॥

𑌕𑍍𑌷𑍁𑌤𑍍𑌕𑍍𑌷𑌾𑌮𑍋𑌽𑌪𑌿 𑌜𑌰𑌾𑌕𑍃𑌶𑍋𑌽𑌪𑌿 𑌶𑌿𑌥𑌿𑌲𑌪𑍍𑌰𑌾𑌣𑍋𑌽𑌪𑌿 𑌕𑌷𑍍𑌟𑌾𑌂 𑌦𑌶𑌾𑌮𑍍
𑌆𑌪𑌨𑍍𑌨𑍋𑌽𑌪𑌿 𑌵𑌿𑌪𑌨𑍍𑌨𑌦𑍀𑌧𑌿𑌤𑌿𑌰𑌿𑌤𑌿 𑌪𑍍𑌰𑌾𑌣𑍇𑌷𑍁 𑌨𑌶𑍍𑌯𑌤𑍍𑌸𑍍𑌵𑌪𑌿 ।
𑌮𑌤𑍍𑌤𑍇𑌭𑍇𑌂𑌦𑍍𑌰𑌵𑌿𑌭𑌿𑌨𑍍𑌨𑌕𑍁𑌂𑌭𑌪𑌿𑌶𑌿𑌤𑌗𑍍𑌰𑌾𑌸𑍈𑌕𑌬𑌦𑍍𑌧𑌸𑍍𑌪𑍃𑌹𑌃
𑌕𑌿𑌂 𑌜𑍀𑌰𑍍𑌣𑌂 𑌤𑍃𑌣𑌂 𑌅𑌤𑍍𑌤𑌿 𑌮𑌾𑌨𑌮𑌹𑌤𑌾𑌂 𑌅𑌗𑍍𑌰𑍇𑌸𑌰𑌃 𑌕𑍇𑌸𑌰𑍀 ॥ 1.2𑍯 ॥

𑌸𑍍𑌵𑌲𑍍𑌪𑌸𑍍𑌨𑌾𑌯𑍁𑌵𑌸𑌾𑌵𑌶𑍇𑌷𑌮𑌲𑌿𑌨𑌂 𑌨𑌿𑌰𑍍𑌮𑌾𑌂𑌸𑌂 𑌅𑌪𑍍𑌯𑌸𑍍𑌥𑌿 𑌗𑍋𑌃
𑌶𑍍𑌵𑌾 𑌲𑌬𑍍𑌧𑍍𑌵𑌾 𑌪𑌰𑌿𑌤𑍋𑌷𑌂 𑌏𑌤𑌿 𑌨 𑌤𑍁 𑌤𑌤𑍍𑌤𑌸𑍍𑌯 𑌕𑍍𑌷𑍁𑌧𑌾𑌶𑌾𑌂𑌤𑌯𑍇 ।
𑌸𑌿𑌂𑌹𑍋 𑌜𑌂𑌬𑍁𑌕𑌂 𑌅𑌂𑌕𑌂 𑌆𑌗𑌤𑌂 𑌅𑌪𑌿 𑌤𑍍𑌯𑌕𑍍𑌤𑍍𑌵𑌾 𑌨𑌿𑌹𑌂𑌤𑌿 𑌦𑍍𑌵𑌿𑌪𑌂
𑌸𑌰𑍍𑌵𑌃 𑌕𑍃𑌚𑍍𑌛𑍍𑌰𑌗𑌤𑍋𑌽𑌪𑌿 𑌵𑌾𑌂𑌛𑌤𑌿 𑌜𑌨𑌃 𑌸𑌤𑍍𑌤𑍍𑌵𑌾𑌨𑍁𑌰𑍂𑌪𑌂 𑌫𑌲𑌮𑍍 ॥ 1.30 ॥

𑌲𑌾𑌂𑌗𑍂𑌲𑌚𑌾𑌲𑌨𑌂 𑌅𑌧𑌶𑍍𑌚𑌰𑌣𑌾𑌵𑌪𑌾𑌤𑌂
𑌭𑍂𑌮𑍌 𑌨𑌿𑌪𑌤𑍍𑌯 𑌵𑌦𑌨𑍋𑌦𑌰𑌦𑌰𑍍𑌶𑌨𑌂 𑌚 ।
𑌶𑍍𑌵𑌾 𑌪𑌿𑌂𑌡𑌦𑌸𑍍𑌯 𑌕𑍁𑌰𑍁𑌤𑍇 𑌗𑌜𑌪𑍁𑌂𑌗𑌵𑌸𑍍𑌤𑍁
𑌧𑍀𑌰𑌂 𑌵𑌿𑌲𑍋𑌕𑌯𑌤𑌿 𑌚𑌾𑌟𑍁𑌶𑌤𑍈𑌶𑍍𑌚 𑌭𑍁𑌂𑌕𑍍𑌤𑍇 ॥ 1.31 ॥

𑌪𑌰𑌿𑌵𑌰𑍍𑌤𑌿𑌨𑌿 𑌸𑌂𑌸𑌾𑌰𑍇
𑌮𑍃𑌤𑌃 𑌕𑍋 𑌵𑌾 𑌨 𑌜𑌾𑌯𑌤𑍇 ।
𑌸 𑌜𑌾𑌤𑍋 𑌯𑍇𑌨 𑌜𑌾𑌤𑍇𑌨
𑌯𑌾𑌤𑌿 𑌵𑌂𑌶𑌃 𑌸𑌮𑍁𑌨𑍍𑌨𑌤𑌿𑌮𑍍 ॥ 1.32 ॥

𑌕𑍁𑌸𑍁𑌮𑌸𑍍𑌤𑌵𑌕𑌸𑍍𑌯𑍇𑌵
𑌦𑍍𑌵𑌯𑍀 𑌵𑍃𑌤𑍍𑌤𑌿𑌰𑍍𑌮𑌨𑌸𑍍𑌵𑌿𑌨𑌃 ।
𑌮𑍂𑌰𑍍𑌧𑍍𑌨𑌿 𑌵𑌾 𑌸𑌰𑍍𑌵𑌲𑍋𑌕𑌸𑍍𑌯
𑌶𑍀𑌰𑍍𑌯𑌤𑍇 𑌵𑌨 𑌏𑌵 𑌵𑌾 ॥ 1.33 ॥

𑌸𑌂𑌤𑍍𑌯𑌨𑍍𑌯𑍇𑌽𑌪𑌿 𑌬𑍃𑌹𑌸𑍍𑌪𑌤𑌿𑌪𑍍𑌰𑌭𑍃𑌤𑌯𑌃 𑌸𑌂𑌭𑌾𑌵𑌿𑌤𑌾𑌃 𑌪𑌂𑌚𑌷𑌾𑌸𑍍
𑌤𑌾𑌨𑍍𑌪𑍍𑌰𑌤𑍍𑌯𑍇𑌷 𑌵𑌿𑌶𑍇𑌷𑌵𑌿𑌕𑍍𑌰𑌮𑌰𑍁𑌚𑍀 𑌰𑌾𑌹𑍁𑌰𑍍𑌨 𑌵𑍈𑌰𑌾𑌯𑌤𑍇 ।
𑌦𑍍𑌵𑌾𑌵𑍇𑌵 𑌗𑍍𑌰𑌸𑌤𑍇 𑌦𑌿𑌵𑌾𑌕𑌰𑌨𑌿𑌶𑌾𑌪𑍍𑌰𑌾𑌣𑍇𑌶𑍍𑌵𑌰𑍌 𑌭𑌾𑌸𑍍𑌕𑌰𑍌
𑌭𑍍𑌰𑌾𑌤𑌃 𑌪𑌰𑍍𑌵𑌣𑌿 𑌪𑌶𑍍𑌯 𑌦𑌾𑌨𑌵𑌪𑌤𑌿𑌃 𑌶𑍀𑌰𑍍𑌷𑌾𑌵𑌶𑍇𑌷𑌾𑌕𑍃𑌤𑌿𑌃 ॥ 1.34 ॥

𑌵𑌹𑌤𑌿 𑌭𑍁𑌵𑌨𑌶𑍍𑌰𑍇𑌣𑌿𑌂 𑌶𑍇𑌷𑌃 𑌫𑌣𑌾𑌫𑌲𑌕𑌸𑍍𑌥𑌿𑌤𑌾𑌂
𑌕𑌮𑌠𑌪𑌤𑌿𑌨𑌾 𑌮𑌧𑍍𑌯𑍇𑌪𑍃𑌷𑍍𑌠𑌂 𑌸𑌦𑌾 𑌸 𑌚 𑌧𑌾𑌰𑍍𑌯𑌤𑍇 ।
𑌤𑌂 𑌅𑌪𑌿 𑌕𑍁𑌰𑍁𑌤𑍇 𑌕𑍍𑌰𑍋𑌡𑌾𑌧𑍀𑌨𑌂 𑌪𑌯𑍋𑌧𑌿𑌰𑌨𑌾𑌦𑌰𑌾𑌦𑍍
𑌅𑌹𑌹 𑌮𑌹𑌤𑌾𑌂 𑌨𑌿𑌃𑌸𑍀𑌮𑌾𑌨𑌶𑍍𑌚𑌰𑌿𑌤𑍍𑌰𑌵𑌿𑌭𑍂𑌤𑌯𑌃 ॥ 1.35 ॥

𑌵𑌰𑌂 𑌪𑌕𑍍𑌷𑌚𑍍𑌛𑍇𑌦𑌃 𑌸𑌮𑌦𑌮𑌘𑌵𑌨𑍍𑌮𑍁𑌕𑍍𑌤𑌕𑍁𑌲𑌿𑌶𑌪𑍍𑌰𑌹𑌾𑌰𑍈𑌰𑍍
𑌉𑌦𑍍𑌗𑌚𑍍𑌛𑌦𑍍𑌬𑌹𑍁𑌲𑌦𑌹𑌨𑍋𑌦𑍍𑌗𑌾𑌰𑌗𑍁𑌰𑍁𑌭𑌿𑌃 ।
𑌤𑍁𑌷𑌾𑌰𑌾𑌦𑍍𑌰𑍇𑌃 𑌸𑍂𑌨𑍋𑌰𑌹𑌹 𑌪𑌿𑌤𑌰𑌿 𑌕𑍍𑌲𑍇𑌶𑌵𑌿𑌵𑌶𑍇
𑌨 𑌚𑌾𑌸𑍌 𑌸𑌂𑌪𑌾𑌤𑌃 𑌪𑌯𑌸𑌿 𑌪𑌯𑌸𑌾𑌂 𑌪𑌤𑍍𑌯𑍁𑌰𑍁𑌚𑌿𑌤𑌃 ॥ 1.36 ॥

𑌸𑌿𑌂𑌹𑌃 𑌶𑌿𑌶𑍁𑌰𑌪𑌿 𑌨𑌿𑌪𑌤𑌤𑌿
𑌮𑌦𑌮𑌲𑌿𑌨𑌕𑌪𑍋𑌲𑌭𑌿𑌤𑍍𑌤𑌿𑌷𑍁 𑌗𑌜𑍇𑌷𑍁 ।
𑌪𑍍𑌰𑌕𑍃𑌤𑌿𑌰𑌿𑌯𑌂 𑌸𑌤𑍍𑌤𑍍𑌵𑌵𑌤𑌾𑌂
𑌨 𑌖𑌲𑍁 𑌵𑌯𑌸𑍍𑌤𑍇𑌜𑌸𑍋 𑌹𑍇𑌤𑍁𑌃 ॥ 1.3𑍭 ॥

𑌜𑌾𑌤𑌿𑌰𑍍𑌯𑌾𑌤𑍁 𑌰𑌸𑌾𑌤𑌲𑌂 𑌗𑍁𑌣𑌗𑌣𑍈𑌸𑍍𑌤𑌤𑍍𑌰𑌾𑌪𑍍𑌯𑌧𑍋 𑌗𑌮𑍍𑌯𑌤𑌾𑌂
𑌶𑍀𑌲𑌂 𑌶𑍈𑌲𑌤𑌟𑌾𑌤𑍍𑌪𑌤𑌤𑍍𑌵𑌭𑌿𑌜𑌨𑌃 𑌸𑌂𑌦𑌹𑍍𑌯𑌤𑌾𑌂 𑌵𑌹𑍍𑌨𑌿𑌨𑌾 ।
𑌶𑍌𑌰𑍍𑌯𑍇 𑌵𑍈𑌰𑌿𑌣𑌿 𑌵𑌜𑍍𑌰𑌂 𑌆𑌶𑍁 𑌨𑌿𑌪𑌤𑌤𑍍𑌵𑌰𑍍𑌥𑍋𑌽𑌸𑍍𑌤𑍁 𑌨𑌃 𑌕𑍇𑌵𑌲𑌂
𑌯𑍇𑌨𑍈𑌕𑍇𑌨 𑌵𑌿𑌨𑌾 𑌗𑍁𑌣𑌾𑌸𑍍𑌤𑍃𑌣𑌲𑌵𑌪𑍍𑌰𑌾𑌯𑌾𑌃 𑌸𑌮𑌸𑍍𑌤𑌾 𑌇𑌮𑍇 ॥ 1.3𑍮 ॥

𑌧𑌨𑌂 𑌅𑌰𑍍𑌜𑌯 𑌕𑌾𑌕𑍁𑌤𑍍𑌸𑍍𑌥
𑌧𑌨𑌮𑍂𑌲𑌂 𑌇𑌦𑌂 𑌜𑌗𑌤𑍍 ।
𑌅𑌂𑌤𑌰𑌂 𑌨𑌾𑌭𑌿𑌜𑌾𑌨𑌾𑌮𑌿
𑌨𑌿𑌰𑍍𑌧𑌨𑌸𑍍𑌯 𑌮𑍃𑌤𑌸𑍍𑌯 𑌚 ॥ 1.3𑍯 ॥

𑌤𑌾𑌨𑍀𑌂𑌦𑍍𑌰𑌿𑌯𑌾𑌣𑍍𑌯𑌵𑌿𑌕𑌲𑌾𑌨𑌿 𑌤𑌦𑍇𑌵 𑌨𑌾𑌮
𑌸𑌾 𑌬𑍁𑌦𑍍𑌧𑌿𑌰𑌪𑍍𑌰𑌤𑌿𑌹𑌤𑌾 𑌵𑌚𑌨𑌂 𑌤𑌦𑍇𑌵 ।
𑌅𑌰𑍍𑌥𑍋𑌷𑍍𑌮𑌣𑌾 𑌵𑌿𑌰𑌹𑌿𑌤𑌃 𑌪𑍁𑌰𑍁𑌷𑌃 𑌕𑍍𑌷𑌣𑍇𑌨
𑌸𑍋𑌽𑌪𑍍𑌯𑌨𑍍𑌯 𑌏𑌵 𑌭𑌵𑌤𑍀𑌤𑌿 𑌵𑌿𑌚𑌿𑌤𑍍𑌰𑌂 𑌏𑌤𑌤𑍍 ॥ 1.40 ॥

𑌯𑌸𑍍𑌯𑌾𑌸𑍍𑌤𑌿 𑌵𑌿𑌤𑍍𑌤𑌂 𑌸 𑌨𑌰𑌃 𑌕𑍁𑌲𑍀𑌨𑌃
𑌸 𑌪𑌂𑌡𑌿𑌤𑌃 𑌸 𑌶𑍍𑌰𑍁𑌤𑌵𑌾𑌨𑍍𑌗𑍁𑌣𑌜𑍍𑌞𑌃 ।
𑌸 𑌏𑌵 𑌵𑌕𑍍𑌤𑌾 𑌸 𑌚 𑌦𑌰𑍍𑌶𑌨𑍀𑌯𑌃
𑌸𑌰𑍍𑌵𑍇 𑌗𑍁𑌣𑌾𑌃 𑌕𑌾𑌂𑌚𑌨𑌂 𑌆𑌶𑍍𑌰𑌯𑌂𑌤𑌿 ॥ 1.41 ॥

𑌦𑍌𑌰𑍍𑌮𑌂𑌤𑍍𑌰𑍍𑌯𑌾𑌨𑍍𑌨𑍃𑌪𑌤𑌿𑌰𑍍𑌵𑌿𑌨𑌶𑍍𑌯𑌤𑌿 𑌯𑌤𑌿𑌃 𑌸𑌂𑌗𑌾𑌤𑍍𑌸𑍁𑌤𑍋 𑌲𑌾𑌲𑌨𑌾𑌤𑍍
𑌵𑌿𑌪𑍍𑌰𑍋𑌽𑌨𑌧𑍍𑌯𑌯𑌨𑌾𑌤𑍍𑌕𑍁𑌲𑌂 𑌕𑍁𑌤𑌨𑌯𑌾𑌚𑍍𑌛𑍀𑌲𑌂 𑌖𑌲𑍋𑌪𑌾𑌸𑌨𑌾𑌤𑍍 ।
𑌹𑍍𑌰𑍀𑌰𑍍𑌮𑌦𑍍𑌯𑌾𑌦𑌨𑌵𑍇𑌕𑍍𑌷𑌣𑌾𑌦𑌪𑌿 𑌕𑍃𑌷𑌿𑌃 𑌸𑍍𑌨𑍇𑌹𑌃 𑌪𑍍𑌰𑌵𑌾𑌸𑌾𑌶𑍍𑌰𑌯𑌾𑌨𑍍
𑌮𑍈𑌤𑍍𑌰𑍀 𑌚𑌾𑌪𑍍𑌰𑌣𑌯𑌾𑌤𑍍𑌸𑌮𑍃𑌦𑍍𑌧𑌿𑌰𑌨𑌯𑌾𑌤𑍍𑌤𑍍𑌯𑌾𑌗𑌪𑍍𑌰𑌮𑌾𑌦𑌾𑌦𑍍𑌧𑌨𑌮𑍍 ॥ 1.42 ॥

𑌦𑌾𑌨𑌂 𑌭𑍋𑌗𑍋 𑌨𑌾𑌶𑌸𑍍𑌤𑌿𑌸𑍍𑌰𑍋
𑌗𑌤𑌯𑍋 𑌭𑌵𑌂𑌤𑌿 𑌵𑌿𑌤𑍍𑌤𑌸𑍍𑌯 ।
𑌯𑍋 𑌨 𑌦𑌦𑌾𑌤𑌿 𑌨 𑌭𑍁𑌂𑌕𑍍𑌤𑍇
𑌤𑌸𑍍𑌯 𑌤𑍃𑌤𑍀𑌯𑌾 𑌗𑌤𑌿𑌰𑍍𑌭𑌵𑌤𑌿 ॥ 1.43 ॥

𑌮𑌣𑌿𑌃 𑌶𑌾𑌣𑍋𑌲𑍍𑌲𑍀𑌢𑌃 𑌸𑌮𑌰𑌵𑌿𑌜𑌯𑍀 𑌹𑍇𑌤𑌿𑌦𑌲𑌿𑌤𑍋
𑌮𑌦𑌕𑍍𑌷𑍀𑌣𑍋 𑌨𑌾𑌗𑌃 𑌶𑌰𑌦𑌿 𑌸𑌰𑌿𑌤𑌃 𑌶𑍍𑌯𑌾𑌨𑌪𑍁𑌲𑌿𑌨𑌾𑌃 ।
𑌕𑌲𑌾𑌶𑍇𑌷𑌶𑍍𑌚𑌂𑌦𑍍𑌰𑌃 𑌸𑍁𑌰𑌤𑌮𑍃𑌦𑌿𑌤𑌾 𑌬𑌾𑌲𑌵𑌨𑌿𑌤𑌾
𑌤𑌨𑍍𑌨𑌿𑌮𑍍𑌨𑌾 𑌶𑍋𑌭𑌂𑌤𑍇 𑌗𑌲𑌿𑌤𑌵𑌿𑌭𑌵𑌾𑌶𑍍𑌚𑌾𑌰𑍍𑌥𑌿𑌷𑍁 𑌨𑌰𑌾𑌃 ॥ 1.44 ॥

𑌪𑌰𑌿𑌕𑍍𑌷𑍀𑌣𑌃 𑌕𑌶𑍍𑌚𑌿𑌤𑍍𑌸𑍍𑌪𑍃𑌹𑌯𑌤𑌿 𑌯𑌵𑌾𑌨𑌾𑌂 𑌪𑍍𑌰𑌸𑍃𑌤𑌯𑍇
𑌸 𑌪𑌶𑍍𑌚𑌾𑌤𑍍𑌸𑌂𑌪𑍂𑌰𑍍𑌣𑌃 𑌕𑌲𑌯𑌤𑌿 𑌧𑌰𑌿𑌤𑍍𑌰𑍀𑌂 𑌤𑍃𑌣𑌸𑌮𑌾𑌮𑍍 ।
𑌅𑌤𑌶𑍍𑌚𑌾𑌨𑍈𑌕𑌾𑌂𑌤𑍍𑌯𑌾𑌦𑍍𑌗𑍁𑌰𑍁𑌲𑌘𑍁𑌤𑌯𑌾𑌽𑌰𑍍𑌥𑍇𑌷𑍁 𑌧𑌨𑌿𑌨𑌾𑌮𑍍
𑌅𑌵𑌸𑍍𑌥𑌾 𑌵𑌸𑍍𑌤𑍂𑌨𑌿 𑌪𑍍𑌰𑌥𑌯𑌤𑌿 𑌚 𑌸𑌂𑌕𑍋𑌚𑌯𑌤𑌿 𑌚 ॥ 1.45 ॥

𑌰𑌾𑌜𑌂𑌦𑍁𑌧𑍁𑌕𑍍𑌷𑌸𑌿 𑌯𑌦𑌿 𑌕𑍍𑌷𑌿𑌤𑌿𑌧𑍇𑌨𑍁𑌂 𑌏𑌤𑌾𑌂
𑌤𑍇𑌨𑌾𑌦𑍍𑌯 𑌵𑌤𑍍𑌸𑌂 𑌇𑌵 𑌲𑍋𑌕𑌂 𑌅𑌮𑍁𑌂 𑌪𑍁𑌷𑌾𑌣
𑌤𑌸𑍍𑌮𑌿𑌂𑌶𑍍𑌚 𑌸𑌮𑍍𑌯𑌗𑌨𑌿𑌶𑌂 𑌪𑌰𑌿𑌪𑍋𑌷𑍍𑌯𑌮𑌾𑌣𑍇
𑌨𑌾𑌨𑌾𑌫𑌲𑍈𑌃 𑌫𑌲𑌤𑌿 𑌕𑌲𑍍𑌪𑌲𑌤𑍇𑌵 𑌭𑍂𑌮𑌿𑌃 ॥ 1.46 ॥

𑌸𑌤𑍍𑌯𑌾𑌨𑍃𑌤𑌾 𑌚 𑌪𑌰𑍁𑌷𑌾 𑌪𑍍𑌰𑌿𑌯𑌵𑌾𑌦𑌿𑌨𑍀 𑌚
𑌹𑌿𑌂𑌸𑍍𑌰𑌾 𑌦𑌯𑌾𑌲𑍁𑌰𑌪𑌿 𑌚𑌾𑌰𑍍𑌥𑌪𑌰𑌾 𑌵𑌦𑌾𑌨𑍍𑌯𑌾 ।
𑌨𑌿𑌤𑍍𑌯𑌵𑍍𑌯𑌯𑌾 𑌪𑍍𑌰𑌚𑍁𑌰𑌨𑌿𑌤𑍍𑌯𑌧𑌨𑌾𑌗𑌮𑌾 𑌚
𑌵𑌾𑌰𑌾𑌂𑌗𑌨𑍇𑌵 𑌨𑍃𑌪𑌨𑍀𑌤𑌿𑌰𑌨𑍇𑌕𑌰𑍂𑌪𑌾 ॥ 1.4𑍭 ॥

𑌆𑌜𑍍𑌞𑌾 𑌕𑍀𑌰𑍍𑌤𑌿𑌃 𑌪𑌾𑌲𑌨𑌂 𑌬𑍍𑌰𑌾𑌹𑍍𑌮𑌣𑌾𑌨𑌾𑌂
𑌦𑌾𑌨𑌂 𑌭𑍋𑌗𑍋 𑌮𑌿𑌤𑍍𑌰𑌸𑌂𑌰𑌕𑍍𑌷𑌣𑌂 𑌚
𑌯𑍇𑌷𑌾𑌂 𑌏𑌤𑍇 𑌷𑌡𑍍𑌗𑍁𑌣𑌾 𑌨 𑌪𑍍𑌰𑌵𑍃𑌤𑍍𑌤𑌾𑌃
𑌕𑍋𑌽𑌰𑍍𑌥𑌸𑍍𑌤𑍇𑌷𑌾𑌂 𑌪𑌾𑌰𑍍𑌥𑌿𑌵𑍋𑌪𑌾𑌶𑍍𑌰𑌯𑍇𑌣 ॥ 1.4𑍮 ॥

𑌯𑌦𑍍𑌧𑌾𑌤𑍍𑌰𑌾 𑌨𑌿𑌜𑌭𑌾𑌲𑌪𑌟𑍍𑌟𑌲𑌿𑌖𑌿𑌤𑌂 𑌸𑍍𑌤𑍋𑌕𑌂 𑌮𑌹𑌦𑍍𑌵𑌾 𑌧𑌨𑌂
𑌤𑌤𑍍𑌪𑍍𑌰𑌾𑌪𑍍𑌨𑍋𑌤𑌿 𑌮𑌰𑍁𑌸𑍍𑌥𑌲𑍇𑌽𑌪𑌿 𑌨𑌿𑌤𑌰𑌾𑌂 𑌮𑍇𑌰𑍌 𑌤𑌤𑍋 𑌨𑌾𑌧𑌿𑌕𑌮𑍍 ।
𑌤𑌦𑍍𑌧𑍀𑌰𑍋 𑌭𑌵 𑌵𑌿𑌤𑍍𑌤𑌵𑌤𑍍𑌸𑍁 𑌕𑍃𑌪𑌣𑌾𑌂 𑌵𑍃𑌤𑍍𑌤𑌿𑌂 𑌵𑍃𑌥𑌾 𑌮𑌾 𑌕𑍃𑌥𑌾𑌃
𑌕𑍂𑌪𑍇 𑌪𑌶𑍍𑌯 𑌪𑌯𑍋𑌨𑌿𑌧𑌾𑌵𑌪𑌿 𑌘𑌟𑍋 𑌗𑍃𑌹𑍍𑌣𑌾𑌤𑌿 𑌤𑍁𑌲𑍍𑌯𑌂 𑌜𑌲𑌮𑍍 ॥ 1.4𑍯 ॥

𑌤𑍍𑌵𑌂 𑌏𑌵 𑌚𑌾𑌤𑌕𑌾𑌧𑌾𑌰𑍋𑌽
𑌸𑍀𑌤𑌿 𑌕𑍇𑌷𑌾𑌂 𑌨 𑌗𑍋𑌚𑌰𑌃 ।
𑌕𑌿𑌂 𑌅𑌂𑌭𑍋𑌦𑌵𑌰𑌾𑌸𑍍𑌮𑌾𑌕𑌂
𑌕𑌾𑌰𑍍𑌪𑌣𑍍𑌯𑍋𑌕𑍍𑌤𑌂 𑌪𑍍𑌰𑌤𑍀𑌕𑍍𑌷𑌸𑍇 ॥ 1.50 ॥

𑌰𑍇 𑌰𑍇 𑌚𑌾𑌤𑌕 𑌸𑌾𑌵𑌧𑌾𑌨𑌮𑌨𑌸𑌾 𑌮𑌿𑌤𑍍𑌰 𑌕𑍍𑌷𑌣𑌂 𑌶𑍍𑌰𑍂𑌯𑌤𑌾𑌮𑍍
𑌅𑌂𑌭𑍋𑌦𑌾 𑌬𑌹𑌵𑍋 𑌵𑌸𑌂𑌤𑌿 𑌗𑌗𑌨𑍇 𑌸𑌰𑍍𑌵𑍇𑌽𑌪𑌿 𑌨𑍈𑌤𑌾𑌦𑍃𑌶𑌾𑌃 ।
𑌕𑍇𑌚𑌿𑌦𑍍𑌵𑍃𑌷𑍍𑌟𑌿𑌭𑌿𑌰𑌾𑌰𑍍𑌦𑍍𑌰𑌯𑌂𑌤𑌿 𑌵𑌸𑍁𑌧𑌾𑌂 𑌗𑌰𑍍𑌜𑌂𑌤𑌿 𑌕𑍇𑌚𑌿𑌦𑍍𑌵𑍃𑌥𑌾
𑌯𑌂 𑌯𑌂 𑌪𑌶𑍍𑌯𑌸𑌿 𑌤𑌸𑍍𑌯 𑌤𑌸𑍍𑌯 𑌪𑍁𑌰𑌤𑍋 𑌮𑌾 𑌬𑍍𑌰𑍂𑌹𑌿 𑌦𑍀𑌨𑌂 𑌵𑌚𑌃 ॥ 1.51 ॥

𑌅𑌕𑌰𑍁𑌣𑌤𑍍𑌵𑌂 𑌅𑌕𑌾𑌰𑌣𑌵𑌿𑌗𑍍𑌰𑌹𑌃
𑌪𑌰𑌧𑌨𑍇 𑌪𑌰𑌯𑍋𑌷𑌿𑌤𑌿 𑌚 𑌸𑍍𑌪𑍃𑌹𑌾 ।
𑌸𑍁𑌜𑌨𑌬𑌂𑌧𑍁𑌜𑌨𑍇𑌷𑍍𑌵𑌸𑌹𑌿𑌷𑍍𑌣𑍁𑌤𑌾
𑌪𑍍𑌰𑌕𑍃𑌤𑌿𑌸𑌿𑌦𑍍𑌧𑌂 𑌇𑌦𑌂 𑌹𑌿 𑌦𑍁𑌰𑌾𑌤𑍍𑌮𑌨𑌾𑌮𑍍 ॥ 1.52 ॥

𑌦𑍁𑌰𑍍𑌜𑌨𑌃 𑌪𑌰𑌿𑌹𑌰𑍍𑌤𑌵𑍍𑌯𑍋
𑌵𑌿𑌦𑍍𑌯𑌯𑌾𑌽𑌲𑌕𑍃𑌤𑍋𑌽𑌪𑌿 𑌸𑌨𑍍 ।
𑌮𑌣𑌿𑌨𑌾 𑌭𑍂𑌷𑌿𑌤𑌃 𑌸𑌰𑍍𑌪𑌃
𑌕𑌿𑌂 𑌅𑌸𑍌 𑌨 𑌭𑌯𑌂𑌕𑌰𑌃 ॥ 1.53 ॥

𑌜𑌾𑌡𑍍𑌯𑌂 𑌹𑍍𑌰𑍀𑌮𑌤𑌿 𑌗𑌣𑍍𑌯𑌤𑍇 𑌵𑍍𑌰𑌤𑌰𑍁𑌚𑍌 𑌦𑌂𑌭𑌃 𑌶𑍁𑌚𑍌 𑌕𑍈𑌤𑌵𑌂
𑌶𑍂𑌰𑍇 𑌨𑌿𑌰𑍍𑌘𑍃𑌣𑌤𑌾 𑌮𑍁𑌨𑍌 𑌵𑌿𑌮𑌤𑌿𑌤𑌾 𑌦𑍈𑌨𑍍𑌯𑌂 𑌪𑍍𑌰𑌿𑌯𑌾𑌲𑌾𑌪𑌿𑌨𑌿 ।
𑌤𑍇𑌜𑌸𑍍𑌵𑌿𑌨𑍍𑌯𑌵𑌲𑌿𑌪𑍍𑌤𑌤𑌾 𑌮𑍁𑌖𑌰𑌤𑌾 𑌵𑌕𑍍𑌤𑌰𑍍𑌯𑌶𑌕𑍍𑌤𑌿𑌃 𑌸𑍍𑌥𑌿𑌰𑍇
𑌤𑌤𑍍𑌕𑍋 𑌨𑌾𑌮 𑌗𑍁𑌣𑍋 𑌭𑌵𑍇𑌤𑍍𑌸 𑌗𑍁𑌣𑌿𑌨𑌾𑌂 𑌯𑍋 𑌦𑍁𑌰𑍍𑌜𑌨𑍈𑌰𑍍𑌨𑌾𑌂𑌕𑌿𑌤𑌃 ॥ 1.54 ॥

𑌲𑍋𑌭𑌶𑍍𑌚𑍇𑌦𑌗𑍁𑌣𑍇𑌨 𑌕𑌿𑌂 𑌪𑌿𑌶𑍁𑌨𑌤𑌾 𑌯𑌦𑍍𑌯𑌸𑍍𑌤𑌿 𑌕𑌿𑌂 𑌪𑌾𑌤𑌕𑍈𑌃
𑌸𑌤𑍍𑌯𑌂 𑌚𑍇𑌤𑍍𑌤𑌪𑌸𑌾 𑌚 𑌕𑌿𑌂 𑌶𑍁𑌚𑌿 𑌮𑌨𑍋 𑌯𑌦𑍍𑌯𑌸𑍍𑌤𑌿 𑌤𑍀𑌰𑍍𑌥𑍇𑌨 𑌕𑌿𑌮𑍍 ।
𑌸𑍌𑌜𑌨𑍍𑌯𑌂 𑌯𑌦𑌿 𑌕𑌿𑌂 𑌗𑍁𑌣𑍈𑌃 𑌸𑍁𑌮𑌹𑌿𑌮𑌾 𑌯𑌦𑍍𑌯𑌸𑍍𑌤𑌿 𑌕𑌿𑌂 𑌮𑌂𑌡𑌨𑍈𑌃
𑌸𑌦𑍍𑌵𑌿𑌦𑍍𑌯𑌾 𑌯𑌦𑌿 𑌕𑌿𑌂 𑌧𑌨𑍈𑌰𑌪𑌯𑌶𑍋 𑌯𑌦𑍍𑌯𑌸𑍍𑌤𑌿 𑌕𑌿𑌂 𑌮𑍃𑌤𑍍𑌯𑍁𑌨𑌾 ॥ 1.55 ॥

𑌶𑌶𑍀 𑌦𑌿𑌵𑌸𑌧𑍂𑌸𑌰𑍋 𑌗𑌲𑌿𑌤𑌯𑍌𑌵𑌨𑌾 𑌕𑌾𑌮𑌿𑌨𑍀
𑌸𑌰𑍋 𑌵𑌿𑌗𑌤𑌵𑌾𑌰𑌿𑌜𑌂 𑌮𑍁𑌖𑌂 𑌅𑌨𑌕𑍍𑌷𑌰𑌂 𑌸𑍍𑌵𑌾𑌕𑍃𑌤𑍇𑌃 ।
𑌪𑍍𑌰𑌭𑍁𑌰𑍍𑌧𑌨𑌪𑌰𑌾𑌯𑌣𑌃 𑌸𑌤𑌤𑌦𑍁𑌰𑍍𑌗𑌤𑌃 𑌸𑌜𑍍𑌜𑌨𑍋
𑌨𑍃𑌪𑌾𑌂𑌗𑌣𑌗𑌤𑌃 𑌖𑌲𑍋 𑌮𑌨𑌸𑌿 𑌸𑌪𑍍𑌤 𑌶𑌲𑍍𑌯𑌾𑌨𑌿 𑌮𑍇 ॥ 1.56 ॥

𑌨 𑌕𑌶𑍍𑌚𑌿𑌚𑍍𑌚𑌂𑌡𑌕𑍋𑌪𑌾𑌨𑌾𑌮𑍍
𑌆𑌤𑍍𑌮𑍀𑌯𑍋 𑌨𑌾𑌮 𑌭𑍂𑌭𑍁𑌜𑌾𑌮𑍍 ।
𑌹𑍋𑌤𑌾𑌰𑌂 𑌅𑌪𑌿 𑌜𑍁𑌹𑍍𑌵𑌾𑌨𑌂
𑌸𑍍𑌪𑍃𑌷𑍍𑌟𑍋 𑌦𑌹𑌤𑌿 𑌪𑌾𑌵𑌕𑌃 ॥ 1.5𑍭 ॥

𑌮𑍌𑌨𑌾𑌨𑍍𑌮𑍂𑌕𑌃 𑌪𑍍𑌰𑌵𑌚𑌨𑌪𑌟𑍁𑌰𑍍𑌵𑌾𑌤𑍁𑌲𑍋 𑌜𑌲𑍍𑌪𑌕𑍋 𑌵𑌾
𑌧𑍃𑌷𑍍𑌟𑌃 𑌪𑌾𑌰𑍍𑌶𑍍𑌵𑍇 𑌵𑌸𑌤𑌿 𑌚 𑌸𑌦𑌾 𑌦𑍂𑌰𑌤𑌶𑍍𑌚𑌾𑌪𑍍𑌰𑌗𑌲𑍍𑌭𑌃 ।
𑌕𑍍𑌷𑌾𑌂𑌤𑍍𑌯𑌾 𑌭𑍀𑌰𑍁𑌰𑍍𑌯𑌦𑌿 𑌨 𑌸𑌹𑌤𑍇 𑌪𑍍𑌰𑌾𑌯𑌶𑍋 𑌨𑌾𑌭𑌿𑌜𑌾𑌤𑌃
𑌸𑍇𑌵𑌾𑌧𑌰𑍍𑌮𑌃 𑌪𑌰𑌮𑌗𑌹𑌨𑍋 𑌯𑍋𑌗𑌿𑌨𑌾𑌂 𑌅𑌪𑍍𑌯𑌗𑌮𑍍𑌯𑌃 ॥ 1.5𑍮 ॥

𑌉𑌦𑍍𑌭𑌾𑌸𑌿𑌤𑌾𑌖𑌿𑌲𑌖𑌲𑌸𑍍𑌯 𑌵𑌿𑌶𑍃𑌂𑌖𑌲𑌸𑍍𑌯
𑌪𑍍𑌰𑌾𑌗𑍍𑌜𑌾𑌤𑌵𑌿𑌸𑍍𑌤𑍃𑌤𑌨𑌿𑌜𑌾𑌧𑌮𑌕𑌰𑍍𑌮𑌵𑍃𑌤𑍍𑌤𑍇𑌃 ।
𑌦𑍈𑌵𑌾𑌦𑌵𑌾𑌪𑍍𑌤𑌵𑌿𑌭𑌵𑌸𑍍𑌯 𑌗𑍁𑌣𑌦𑍍𑌵𑌿𑌷𑍋𑌽𑌸𑍍𑌯
𑌨𑍀𑌚𑌸𑍍𑌯 𑌗𑍋𑌚𑌰𑌗𑌤𑍈𑌃 𑌸𑍁𑌖𑌂 𑌆𑌪𑍍𑌯𑌤𑍇 𑌕𑍈𑌃 ॥ 1.5𑍯 ॥

𑌆𑌰𑌂𑌭𑌗𑍁𑌰𑍍𑌵𑍀 𑌕𑍍𑌷𑌯𑌿𑌣𑍀 𑌕𑍍𑌰𑌮𑍇𑌣
𑌲𑌘𑍍𑌵𑍀 𑌪𑍁𑌰𑌾 𑌵𑍃𑌦𑍍𑌧𑌿𑌮𑌤𑍀 𑌚 𑌪𑌶𑍍𑌚𑌾𑌤𑍍 ।
𑌦𑌿𑌨𑌸𑍍𑌯 𑌪𑍂𑌰𑍍𑌵𑌾𑌰𑍍𑌧𑌪𑌰𑌾𑌰𑍍𑌧𑌭𑌿𑌨𑍍𑌨𑌾
𑌛𑌾𑌯𑍇𑌵 𑌮𑍈𑌤𑍍𑌰𑍀 𑌖𑌲𑌸𑌜𑍍𑌜𑌨𑌾𑌨𑌾𑌮𑍍 ॥ 1.60 ॥

𑌮𑍃𑌗𑌮𑍀𑌨𑌸𑌜𑍍𑌜𑌨𑌾𑌨𑌾𑌂 𑌤𑍃𑌣𑌜𑌲𑌸𑌂𑌤𑍋𑌷𑌵𑌿𑌹𑌿𑌤𑌵𑍃𑌤𑍍𑌤𑍀𑌨𑌾𑌮𑍍 ।
𑌲𑍁𑌬𑍍𑌧𑌕𑌧𑍀𑌵𑌰𑌪𑌿𑌶𑍁𑌨𑌾 𑌨𑌿𑌷𑍍𑌕𑌾𑌰𑌣𑌵𑍈𑌰𑌿𑌣𑍋 𑌜𑌗𑌤𑌿 ॥ 1.61 ॥

𑌵𑌾𑌂𑌛𑌾 𑌸𑌜𑍍𑌜𑌨𑌸𑌂𑌗𑌮𑍇 𑌪𑌰𑌗𑍁𑌣𑍇 𑌪𑍍𑌰𑍀𑌤𑌿𑌰𑍍𑌗𑍁𑌰𑍌 𑌨𑌮𑍍𑌰𑌤𑌾
𑌵𑌿𑌦𑍍𑌯𑌾𑌯𑌾𑌂 𑌵𑍍𑌯𑌸𑌨𑌂 𑌸𑍍𑌵𑌯𑍋𑌷𑌿𑌤𑌿 𑌰𑌤𑌿𑌰𑍍𑌲𑍋𑌕𑌾𑌪𑌵𑌾𑌦𑌾𑌦𑍍𑌭𑌯𑌮𑍍 ।
𑌭𑌕𑍍𑌤𑌿𑌃 𑌶𑍂𑌲𑌿𑌨𑌿 𑌶𑌕𑍍𑌤𑌿𑌰𑌾𑌤𑍍𑌮𑌦𑌮𑌨𑍇 𑌸𑌂𑌸𑌰𑍍𑌗𑌮𑍁𑌕𑍍𑌤𑌿𑌃 𑌖𑌲𑍇
𑌯𑍇𑌷𑍍𑌵𑍇𑌤𑍇 𑌨𑌿𑌵𑌸𑌂𑌤𑌿 𑌨𑌿𑌰𑍍𑌮𑌲𑌗𑍁𑌣𑌾𑌸𑍍𑌤𑍇𑌭𑍍𑌯𑍋 𑌨𑌰𑍇𑌭𑍍𑌯𑍋 𑌨𑌮𑌃 ॥ 1.62 ॥

𑌵𑌿𑌪𑌦𑌿 𑌧𑍈𑌰𑍍𑌯𑌂 𑌅𑌥𑌾𑌭𑍍𑌯𑍁𑌦𑌯𑍇 𑌕𑍍𑌷𑌮𑌾
𑌸𑌦𑌸𑌿 𑌵𑌾𑌕𑍍𑌪𑌟𑍁𑌤𑌾 𑌯𑍁𑌧𑌿 𑌵𑌿𑌕𑍍𑌰𑌮𑌃 ।
𑌯𑌶𑌸𑌿 𑌚𑌾𑌭𑌿𑌰𑍁𑌚𑌿𑌰𑍍𑌵𑍍𑌯𑌸𑌨𑌂 𑌶𑍍𑌰𑍁𑌤𑍌
𑌪𑍍𑌰𑌕𑍃𑌤𑌿𑌸𑌿𑌦𑍍𑌧𑌂 𑌇𑌦𑌂 𑌹𑌿 𑌮𑌹𑌾𑌤𑍍𑌮𑌨𑌾𑌮𑍍 ॥ 1.63 ॥

𑌪𑍍𑌰𑌦𑌾𑌨𑌂 𑌪𑍍𑌰𑌚𑍍𑌛𑌨𑍍𑌨𑌂 𑌗𑍃𑌹𑌂 𑌉𑌪𑌗𑌤𑍇 𑌸𑌂𑌭𑍍𑌰𑌮𑌵𑌿𑌧𑌿𑌃
𑌪𑍍𑌰𑌿𑌯𑌂 𑌕𑍃𑌤𑍍𑌵𑌾 𑌮𑍌𑌨𑌂 𑌸𑌦𑌸𑌿 𑌕𑌥𑌨𑌂 𑌚𑌾𑌪𑍍𑌯𑍁𑌪𑌕𑍃𑌤𑍇𑌃 ।
𑌅𑌨𑍁𑌤𑍍𑌸𑍇𑌕𑍋 𑌲𑌕𑍍𑌷𑍍𑌮𑍍𑌯𑌾𑌂 𑌅𑌨𑌭𑌿𑌭𑌵𑌗𑌂𑌧𑌾𑌃 𑌪𑌰𑌕𑌥𑌾𑌃
𑌸𑌤𑌾𑌂 𑌕𑍇𑌨𑍋𑌦𑍍𑌦𑌿𑌷𑍍𑌟𑌂 𑌵𑌿𑌷𑌮𑌂 𑌅𑌸𑌿𑌧𑌾𑌰𑌾𑌵𑍍𑌰𑌤𑌂 𑌇𑌦𑌮𑍍 ॥ 1.64 ॥

𑌕𑌰𑍇 𑌶𑍍𑌲𑌾𑌘𑍍𑌯𑌸𑍍𑌤𑍍𑌯𑌾𑌗𑌃 𑌶𑌿𑌰𑌸𑌿 𑌗𑍁𑌰𑍁𑌪𑌾𑌦𑌪𑍍𑌰𑌣𑌯𑌿𑌤𑌾
𑌮𑍁𑌖𑍇 𑌸𑌤𑍍𑌯𑌾 𑌵𑌾𑌣𑍀 𑌵𑌿𑌜𑌯𑌿 𑌭𑍁𑌜𑌯𑍋𑌰𑍍𑌵𑍀𑌰𑍍𑌯𑌂 𑌅𑌤𑍁𑌲𑌮𑍍 ।
𑌹𑍃𑌦𑌿 𑌸𑍍𑌵𑌚𑍍𑌛𑌾 𑌵𑍃𑌤𑍍𑌤𑌿𑌃 𑌶𑍍𑌰𑍁𑌤𑌂 𑌅𑌧𑌿𑌗𑌤𑌂 𑌚 𑌶𑍍𑌰𑌵𑌣𑌯𑍋𑌰𑍍
𑌵𑌿𑌨𑌾𑌪𑍍𑌯𑍈𑌶𑍍𑌵𑌰𑍍𑌯𑍇𑌣 𑌪𑍍𑌰𑌕𑍃𑌤𑌿𑌮𑌹𑌤𑌾𑌂 𑌮𑌂𑌡𑌨𑌂 𑌇𑌦𑌮𑍍 ॥ 1.65 ॥

𑌸𑌂𑌪𑌤𑍍𑌸𑍁 𑌮𑌹𑌤𑌾𑌂 𑌚𑌿𑌤𑍍𑌤𑌂 𑌭𑌵𑌤𑍍𑌯𑍁𑌤𑍍𑌪𑌲𑌕𑍋𑌮𑌲𑌮𑍍 ।
𑌆𑌪𑌤𑍍𑌸𑍁 𑌚 𑌮𑌹𑌾𑌶𑍈𑌲𑌶𑌿𑌲𑌾 𑌸𑌂𑌘𑌾𑌤𑌕𑌰𑍍𑌕𑌶𑌮𑍍 ॥ 1.66 ॥

𑌸𑌂𑌤𑌪𑍍𑌤𑌾𑌯𑌸𑌿 𑌸𑌂𑌸𑍍𑌥𑌿𑌤𑌸𑍍𑌯 𑌪𑌯𑌸𑍋 𑌨𑌾𑌮𑌾𑌪𑌿 𑌨 𑌜𑍍𑌞𑌾𑌯𑌤𑍇
𑌮𑍁𑌕𑍍𑌤𑌾𑌕𑌾𑌰𑌤𑌯𑌾 𑌤𑌦𑍇𑌵 𑌨𑌲𑌿𑌨𑍀𑌪𑌤𑍍𑌰𑌸𑍍𑌥𑌿𑌤𑌂 𑌰𑌾𑌜𑌤𑍇 ।
𑌸𑍍𑌵𑌾𑌤𑍍𑌯𑌾𑌂 𑌸𑌾𑌗𑌰𑌶𑍁𑌕𑍍𑌤𑌿𑌮𑌧𑍍𑌯𑌪𑌤𑌿𑌤𑌂 𑌤𑌨𑍍𑌮𑍌𑌕𑍍𑌤𑌿𑌕𑌂 𑌜𑌾𑌯𑌤𑍇
𑌪𑍍𑌰𑌾𑌯𑍇𑌣𑌾𑌧𑌮𑌮𑌧𑍍𑌯𑌮𑍋𑌤𑍍𑌤𑌮𑌗𑍁𑌣𑌃 𑌸𑌂𑌸𑌰𑍍𑌗𑌤𑍋 𑌜𑌾𑌯𑌤𑍇 ॥ 1.6𑍭 ॥

𑌪𑍍𑌰𑍀𑌣𑌾𑌤𑌿 𑌯𑌃 𑌸𑍁𑌚𑌰𑌿𑌤𑍈𑌃 𑌪𑌿𑌤𑌰𑌂 𑌸 𑌪𑍁𑌤𑍍𑌰𑍋
𑌯𑌦𑍍𑌭𑌰𑍍𑌤𑍁𑌰𑍇𑌵 𑌹𑌿𑌤𑌂 𑌇𑌚𑍍𑌛𑌤𑌿 𑌤𑌤𑍍𑌕𑌲𑌤𑍍𑌰𑌮𑍍 ।
𑌤𑌨𑍍𑌮𑌿𑌤𑍍𑌰𑌂 𑌆𑌪𑌦𑌿 𑌸𑍁𑌖𑍇 𑌚 𑌸𑌮𑌕𑍍𑌰𑌿𑌯𑌂 𑌯𑌦𑍍
𑌏𑌤𑌤𑍍𑌤𑍍𑌰𑌯𑌂 𑌜𑌗𑌤𑌿 𑌪𑍁𑌣𑍍𑌯𑌕𑍃𑌤𑍋 𑌲𑌭𑌂𑌤𑍇 ॥ 1.6𑍮 ॥

𑌏𑌕𑍋 𑌦𑍇𑌵𑌃 𑌕𑍇𑌶𑌵𑍋 𑌵𑌾 𑌶𑌿𑌵𑍋 𑌵𑌾
𑌹𑍍𑌯𑍇𑌕𑌂 𑌮𑌿𑌤𑍍𑌰𑌂 𑌭𑍂𑌪𑌤𑌿𑌰𑍍𑌵𑌾 𑌯𑌤𑌿𑌰𑍍𑌵𑌾 ।
𑌏𑌕𑍋 𑌵𑌾𑌸𑌃 𑌪𑌤𑍍𑌤𑌨𑍇 𑌵𑌾 𑌵𑌨𑍇 𑌵𑌾
𑌹𑍍𑌯𑍇𑌕𑌾 𑌭𑌾𑌰𑍍𑌯𑌾 𑌸𑍁𑌂𑌦𑌰𑍀 𑌵𑌾 𑌦𑌰𑍀 𑌵𑌾 ॥ 1.6𑍯 ॥

𑌨𑌮𑍍𑌰𑌤𑍍𑌵𑍇𑌨𑍋𑌨𑍍𑌨𑌮𑌂𑌤𑌃 𑌪𑌰𑌗𑍁𑌣𑌕𑌥𑌨𑍈𑌃 𑌸𑍍𑌵𑌾𑌨𑍍𑌗𑍁𑌣𑌾𑌨𑍍𑌖𑍍𑌯𑌾𑌪𑌯𑌂𑌤𑌃
𑌸𑍍𑌵𑌾𑌰𑍍𑌥𑌾𑌨𑍍𑌸𑌂𑌪𑌾𑌦𑌯𑌂𑌤𑍋 𑌵𑌿𑌤𑌤𑌪𑍃𑌥𑍁𑌤𑌰𑌾𑌰𑌂𑌭𑌯𑌤𑍍𑌨𑌾𑌃 𑌪𑌰𑌾𑌰𑍍𑌥𑍇 ।
𑌕𑍍𑌷𑌾𑌂𑌤𑍍𑌯𑍈𑌵𑌾𑌕𑍍𑌷𑍇𑌪𑌰𑍁𑌕𑍍𑌷𑌾𑌕𑍍𑌷𑌰𑌮𑍁𑌖𑌰𑌮𑍁𑌖𑌾𑌂𑌦𑍁𑌰𑍍𑌜𑌨𑌾𑌂𑌦𑍂𑌷𑌯𑌂𑌤𑌃
𑌸𑌂𑌤𑌃 𑌸𑌾𑌶𑍍𑌚𑌰𑍍𑌯𑌚𑌰𑍍𑌯𑌾 𑌜𑌗𑌤𑌿 𑌬𑌹𑍁𑌮𑌤𑌾𑌃 𑌕𑌸𑍍𑌯 𑌨𑌾𑌭𑍍𑌯𑌰𑍍𑌚𑌨𑍀𑌯𑌾𑌃 ॥ 1.𑍭0 ॥

𑌭𑌵𑌂𑌤𑌿 𑌨𑌮𑍍𑌰𑌾𑌸𑍍𑌤𑌰𑌵𑌃 𑌫𑌲𑍋𑌦𑍍𑌗𑌮𑍈𑌰𑍍
𑌨𑌵𑌾𑌂𑌬𑍁𑌭𑌿𑌰𑍍𑌦𑍂𑌰𑌾𑌵𑌲𑌂𑌬𑌿𑌨𑍋 𑌘𑌨𑌾𑌃 ।
𑌅𑌨𑍁𑌦𑍍𑌧𑌤𑌾𑌃 𑌸𑌤𑍍𑌪𑍁𑌰𑍁𑌷𑌾𑌃 𑌸𑌮𑍃𑌦𑍍𑌧𑌿𑌭𑌿𑌃
𑌸𑍍𑌵𑌭𑌾𑌵 𑌏𑌷 𑌪𑌰𑍋𑌪𑌕𑌾𑌰𑌿𑌣𑌾𑌮𑍍 ॥ 1.𑍭1 ॥

𑌶𑍍𑌰𑍋𑌤𑍍𑌰𑌂 𑌶𑍍𑌰𑍁𑌤𑍇𑌨𑍈𑌵 𑌨 𑌕𑍁𑌂𑌡𑌲𑍇𑌨
𑌦𑌾𑌨𑍇𑌨 𑌪𑌾𑌣𑌿𑌰𑍍𑌨 𑌤𑍁 𑌕𑌂𑌕𑌣𑍇𑌨 ।
𑌵𑌿𑌭𑌾𑌤𑌿 𑌕𑌾𑌯𑌃 𑌕𑌰𑍁𑌣𑌪𑌰𑌾𑌣𑌾𑌂
𑌪𑌰𑍋𑌪𑌕𑌾𑌰𑍈𑌰𑍍𑌨 𑌤𑍁 𑌚𑌂𑌦𑌨𑍇𑌨 ॥ 1.𑍭2 ॥

𑌪𑌾𑌪𑌾𑌨𑍍𑌨𑌿𑌵𑌾𑌰𑌯𑌤𑌿 𑌯𑍋𑌜𑌯𑌤𑍇 𑌹𑌿𑌤𑌾𑌯
𑌗𑍁𑌹𑍍𑌯𑌂 𑌨𑌿𑌗𑍂𑌹𑌤𑌿 𑌗𑍁𑌣𑌾𑌨𑍍𑌪𑍍𑌰𑌕𑌟𑍀𑌕𑌰𑍋𑌤𑌿 ।
𑌆𑌪𑌦𑍍𑌗𑌤𑌂 𑌚 𑌨 𑌜𑌹𑌾𑌤𑌿 𑌦𑌦𑌾𑌤𑌿 𑌕𑌾𑌲𑍇
𑌸𑌨𑍍𑌮𑌿𑌤𑍍𑌰𑌲𑌕𑍍𑌷𑌣𑌂 𑌇𑌦𑌂 𑌪𑍍𑌰𑌵𑌦𑌂𑌤𑌿 𑌸𑌂𑌤𑌃 ॥ 1.𑍭3 ॥

𑌪𑌦𑍍𑌮𑌾𑌕𑌰𑌂 𑌦𑌿𑌨𑌕𑌰𑍋 𑌵𑌿𑌕𑌚𑍀𑌕𑌰𑍋𑌤𑌿
𑌚𑌂𑌦𑍍𑌰𑌪𑍍𑌰𑌭𑍋𑌲𑍍𑌲𑌾𑌸𑌯𑌤𑌿 𑌕𑍈𑌰𑌵𑌚𑌕𑍍𑌰𑌵𑌾𑌲𑌮𑍍 ।
𑌨𑌾𑌭𑍍𑌯𑌰𑍍𑌥𑌿𑌤𑍋 𑌜𑌲𑌧𑌰𑍋𑌽𑌪𑌿 𑌜𑌲𑌂 𑌦𑌦𑌾𑌤𑌿
𑌸𑌂𑌤𑌃 𑌸𑍍𑌵𑌯𑌂 𑌪𑌰𑌹𑌿𑌤𑍇 𑌵𑌿𑌹𑌿𑌤𑌾𑌭𑌿𑌯𑍋𑌗𑌾𑌃 ॥ 1.𑍭4 ॥

𑌏𑌕𑍇 𑌸𑌤𑍍𑌪𑍁𑌰𑍁𑌷𑌾𑌃 𑌪𑌰𑌾𑌰𑍍𑌥𑌘𑌟𑌕𑌾𑌃 𑌸𑍍𑌵𑌾𑌰𑍍𑌥𑌂 𑌪𑌰𑌿𑌤𑍍𑌯𑌜𑌂𑌤𑌿 𑌯𑍇
𑌸𑌾𑌮𑌾𑌨𑍍𑌯𑌾𑌸𑍍𑌤𑍁 𑌪𑌰𑌾𑌰𑍍𑌥𑌂 𑌉𑌦𑍍𑌯𑌮𑌭𑍃𑌤𑌃 𑌸𑍍𑌵𑌾𑌰𑍍𑌥𑌾𑌵𑌿𑌰𑍋𑌧𑍇𑌨 𑌯𑍇 ।
𑌤𑍇𑌽𑌮𑍀 𑌮𑌾𑌨𑍁𑌷𑌰𑌾𑌕𑍍𑌷𑌸𑌾𑌃 𑌪𑌰𑌹𑌿𑌤𑌂 𑌸𑍍𑌵𑌾𑌰𑍍𑌥𑌾𑌯 𑌨𑌿𑌘𑍍𑌨𑌂𑌤𑌿 𑌯𑍇
𑌯𑍇 𑌤𑍁 𑌘𑍍𑌨𑌂𑌤𑌿 𑌨𑌿𑌰𑌰𑍍𑌥𑌕𑌂 𑌪𑌰𑌹𑌿𑌤𑌂 𑌤𑍇 𑌕𑍇 𑌨 𑌜𑌾𑌨𑍀𑌮𑌹𑍇 ॥ 1.𑍭5 ॥

𑌕𑍍𑌷𑍀𑌰𑍇𑌣𑌾𑌤𑍍𑌮𑌗𑌤𑍋𑌦𑌕𑌾𑌯 𑌹𑌿 𑌗𑍁𑌣𑌾 𑌦𑌤𑍍𑌤𑌾 𑌪𑍁𑌰𑌾 𑌤𑍇𑌽𑌖𑌿𑌲𑌾
𑌕𑍍𑌷𑍀𑌰𑍋𑌤𑍍𑌤𑌾𑌪𑌂 𑌅𑌵𑍇𑌕𑍍𑌷𑍍𑌯 𑌤𑍇𑌨 𑌪𑌯𑌸𑌾 𑌸𑍍𑌵𑌾𑌤𑍍𑌮𑌾 𑌕𑍃𑌶𑌾𑌨𑍌 𑌹𑍁𑌤𑌃 ।
𑌗𑌂𑌤𑍁𑌂 𑌪𑌾𑌵𑌕𑌂 𑌉𑌨𑍍𑌮𑌨𑌸𑍍𑌤𑌦𑌭𑌵𑌦𑍍𑌦𑍃𑌷𑍍𑌟𑍍𑌵𑌾 𑌤𑍁 𑌮𑌿𑌤𑍍𑌰𑌾𑌪𑌦𑌂
𑌯𑍁𑌕𑍍𑌤𑌂 𑌤𑍇𑌨 𑌜𑌲𑍇𑌨 𑌶𑌾𑌮𑍍𑌯𑌤𑌿 𑌸𑌤𑌾𑌂 𑌮𑍈𑌤𑍍𑌰𑍀 𑌪𑍁𑌨𑌸𑍍𑌤𑍍𑌵𑍀𑌦𑍃𑌶𑍀 ॥ 1.𑍭6 ॥

𑌇𑌤𑌃 𑌸𑍍𑌵𑌪𑌿𑌤𑌿 𑌕𑍇𑌶𑌵𑌃 𑌕𑍁𑌲𑌂 𑌇𑌤𑌸𑍍𑌤𑌦𑍀𑌯𑌦𑍍𑌵𑌿𑌷𑌾𑌮𑍍
𑌇𑌤𑌶𑍍𑌚 𑌶𑌰𑌣𑌾𑌰𑍍𑌥𑌿𑌨𑌾𑌂 𑌶𑌿𑌖𑌰𑌿𑌣𑌾𑌂 𑌗𑌣𑌾𑌃 𑌶𑍇𑌰𑌤𑍇 ।
𑌇𑌤𑍋𑌽𑌪𑌿 𑌬𑌡𑌵𑌾𑌨𑌲𑌃 𑌸𑌹 𑌸𑌮𑌸𑍍𑌤𑌸𑌂𑌵𑌰𑍍𑌤𑌕𑍈𑌃
𑌅𑌹𑍋 𑌵𑌿𑌤𑌤𑌂 𑌊𑌰𑍍𑌜𑌿𑌤𑌂 𑌭𑌰𑌸𑌹𑌂 𑌸𑌿𑌂𑌧𑍋𑌰𑍍𑌵𑌪𑍁𑌃 ॥ 1.𑍭𑍭 ॥

𑌤𑍃𑌷𑍍𑌣𑌾𑌂 𑌛𑌿𑌂𑌧𑌿 𑌭𑌜 𑌕𑍍𑌷𑌮𑌾𑌂 𑌜𑌹𑌿 𑌮𑌦𑌂 𑌪𑌾𑌪𑍇 𑌰𑌤𑌿𑌂 𑌮𑌾 𑌕𑍃𑌥𑌾𑌃
𑌸𑌤𑍍𑌯𑌂 𑌬𑍍𑌰𑍂𑌹𑍍𑌯𑌨𑍁𑌯𑌾𑌹𑌿 𑌸𑌾𑌧𑍁𑌪𑌦𑌵𑍀𑌂 𑌸𑍇𑌵𑌸𑍍𑌵 𑌵𑌿𑌦𑍍𑌵𑌜𑍍𑌜𑌨𑌮𑍍 ।
𑌮𑌾𑌨𑍍𑌯𑌾𑌨𑍍𑌮𑌾𑌨𑌯 𑌵𑌿𑌦𑍍𑌵𑌿𑌷𑍋𑌽𑌪𑍍𑌯𑌨𑍁𑌨𑌯 𑌪𑍍𑌰𑌖𑍍𑌯𑌾𑌪𑌯 𑌪𑍍𑌰𑌶𑍍𑌰𑌯𑌂
𑌕𑍀𑌰𑍍𑌤𑌿𑌂 𑌪𑌾𑌲𑌯 𑌦𑍁𑌃𑌖𑌿𑌤𑍇 𑌕𑍁𑌰𑍁 𑌦𑌯𑌾𑌂 𑌏𑌤𑌤𑍍𑌸𑌤𑌾𑌂 𑌚𑍇𑌷𑍍𑌟𑌿𑌤𑌮𑍍 ॥ 1.𑍭𑍮 ॥

𑌮𑌨𑌸𑌿 𑌵𑌚𑌸𑌿 𑌕𑌾𑌯𑍇 𑌪𑍁𑌣𑍍𑌯𑌪𑍀𑌯𑍂𑌷𑌪𑍂𑌰𑍍𑌣𑌾𑌸𑍍
𑌤𑍍𑌰𑌿𑌭𑍁𑌵𑌨𑌂 𑌉𑌪𑌕𑌾𑌰𑌶𑍍𑌰𑍇𑌣𑌿𑌭𑌿𑌃 𑌪𑍍𑌰𑍀𑌣𑌯𑌂𑌤𑌃 ।
𑌪𑌰𑌗𑍁𑌣𑌪𑌰𑌮𑌾𑌣𑍂𑌨𑍍𑌪𑌰𑍍𑌵𑌤𑍀𑌕𑍃𑌤𑍍𑌯 𑌨𑌿𑌤𑍍𑌯𑌂
𑌨𑌿𑌜𑌹𑍃𑌦𑌿 𑌵𑌿𑌕𑌸𑌂𑌤𑌃 𑌸𑌂𑌤𑌿 𑌸𑌂𑌤𑌃 𑌕𑌿𑌯𑌂𑌤𑌃 ॥ 1.𑍭𑍯 ॥

𑌕𑌿𑌂 𑌤𑍇𑌨 𑌹𑍇𑌮𑌗𑌿𑌰𑌿𑌣𑌾 𑌰𑌜𑌤𑌾𑌦𑍍𑌰𑌿𑌣𑌾 𑌵𑌾
𑌯𑌤𑍍𑌰𑌾𑌶𑍍𑌰𑌿𑌤𑌾𑌶𑍍𑌚 𑌤𑌰𑌵𑌸𑍍𑌤𑌰𑌵𑌸𑍍𑌤 𑌏𑌵 ।
𑌮𑌨𑍍𑌯𑌾𑌮𑌹𑍇 𑌮𑌲𑌯𑌂 𑌏𑌵 𑌯𑌦𑌾𑌶𑍍𑌰𑌯𑍇𑌣
𑌕𑌂𑌕𑍋𑌲𑌨𑌿𑌂𑌬𑌕𑍁𑌟𑌜𑌾 𑌅𑌪𑌿 𑌚𑌂𑌦𑌨𑌾𑌃 𑌸𑍍𑌯𑍁𑌃 ॥ 1.𑍮0 ॥

𑌰𑌤𑍍𑌨𑍈𑌰𑍍𑌮𑌹𑌾𑌰𑍍𑌹𑍈𑌸𑍍𑌤𑍁𑌤𑍁𑌷𑍁𑌰𑍍𑌨 𑌦𑍇𑌵𑌾
𑌨 𑌭𑍇𑌜𑌿𑌰𑍇 𑌭𑍀𑌮𑌵𑌿𑌷𑍇𑌣 𑌭𑍀𑌤𑌿𑌮𑍍 ।
𑌸𑍁𑌧𑌾𑌂 𑌵𑌿𑌨𑌾 𑌨 𑌪𑍍𑌰𑌯𑌯𑍁𑌰𑍍𑌵𑌿𑌰𑌾𑌮𑌂
𑌨 𑌨𑌿𑌶𑍍𑌚𑌿𑌤𑌾𑌰𑍍𑌥𑌾𑌦𑍍𑌵𑌿𑌰𑌮𑌂𑌤𑌿 𑌧𑍀𑌰𑌾𑌃 ॥ 1.𑍮1 ॥

𑌕𑍍𑌵𑌚𑌿𑌤𑍍𑌪𑍃𑌥𑍍𑌵𑍀𑌶𑌯𑍍𑌯𑌃 𑌕𑍍𑌵𑌚𑌿𑌦𑌪𑌿 𑌚 𑌪𑌰𑍍𑌯𑌂𑌕𑌶𑌯𑌨𑌃
𑌕𑍍𑌵𑌚𑌿𑌚𑍍𑌛𑌾𑌕𑌾𑌹𑌾𑌰𑌃 𑌕𑍍𑌵𑌚𑌿𑌦𑌪𑌿 𑌚 𑌶𑌾𑌲𑍍𑌯𑍋𑌦𑌨𑌰𑍁𑌚𑌿𑌃 ।
𑌕𑍍𑌵𑌚𑌿𑌤𑍍𑌕𑌂𑌥𑌾𑌧𑌾𑌰𑍀 𑌕𑍍𑌵𑌚𑌿𑌦𑌪𑌿 𑌚 𑌦𑌿𑌵𑍍𑌯𑌾𑌂𑌬𑌰𑌧𑌰𑍋
𑌮𑌨𑌸𑍍𑌵𑍀 𑌕𑌾𑌰𑍍𑌯𑌾𑌰𑍍𑌥𑍀 𑌨 𑌗𑌣𑌯𑌤𑌿 𑌦𑍁𑌃𑌖𑌂 𑌨 𑌚 𑌸𑍁𑌖𑌮𑍍 ॥ 1.𑍮2 ॥

𑌐𑌶𑍍𑌵𑌰𑍍𑌯𑌸𑍍𑌯 𑌵𑌿𑌭𑍂𑌷𑌣𑌂 𑌸𑍁𑌜𑌨𑌤𑌾 𑌶𑍌𑌰𑍍𑌯𑌸𑍍𑌯 𑌵𑌾𑌕𑍍𑌸𑌂𑌯𑌮𑍋
𑌜𑍍𑌞𑌾𑌨𑌸𑍍𑌯𑍋𑌪𑌶𑌮𑌃 𑌶𑍍𑌰𑍁𑌤𑌸𑍍𑌯 𑌵𑌿𑌨𑌯𑍋 𑌵𑌿𑌤𑍍𑌤𑌸𑍍𑌯 𑌪𑌾𑌤𑍍𑌰𑍇 𑌵𑍍𑌯𑌯𑌃 ।
𑌅𑌕𑍍𑌰𑍋𑌧𑌸𑍍𑌤𑌪𑌸𑌃 𑌕𑍍𑌷𑌮𑌾 𑌪𑍍𑌰𑌭𑌵𑌿𑌤𑍁𑌰𑍍𑌧𑌰𑍍𑌮𑌸𑍍𑌯 𑌨𑌿𑌰𑍍𑌵𑍍𑌯𑌾𑌜𑌤𑌾
𑌸𑌰𑍍𑌵𑍇𑌷𑌾𑌂 𑌅𑌪𑌿 𑌸𑌰𑍍𑌵𑌕𑌾𑌰𑌣𑌂 𑌇𑌦𑌂 𑌶𑍀𑌲𑌂 𑌪𑌰𑌂 𑌭𑍂𑌷𑌣𑌮𑍍 ॥ 1.𑍮3 ॥

𑌨𑌿𑌂𑌦𑌂𑌤𑍁 𑌨𑍀𑌤𑌿𑌨𑌿𑌪𑍁𑌣𑌾 𑌯𑌦𑌿 𑌵𑌾 𑌸𑍍𑌤𑍁𑌵𑌂𑌤𑍁
𑌲𑌕𑍍𑌷𑍍𑌮𑍀𑌃 𑌸𑌮𑌾𑌵𑌿𑌶𑌤𑍁 𑌗𑌚𑍍𑌛𑌤𑍁 𑌵𑌾 𑌯𑌥𑍇𑌷𑍍𑌠𑌮𑍍 ।
𑌅𑌦𑍍𑌯𑍈𑌵 𑌵𑌾 𑌮𑌰𑌣𑌂 𑌅𑌸𑍍𑌤𑍁 𑌯𑍁𑌗𑌾𑌂𑌤𑌰𑍇 𑌵𑌾
𑌨𑍍𑌯𑌾𑌯𑍍𑌯𑌾𑌤𑍍𑌪𑌥𑌃 𑌪𑍍𑌰𑌵𑌿𑌚𑌲𑌂𑌤𑌿 𑌪𑌦𑌂 𑌨 𑌧𑍀𑌰𑌾𑌃 ॥ 1.𑍮4 ॥

𑌭𑌗𑍍𑌨𑌾𑌶𑌸𑍍𑌯 𑌕𑌰𑌂𑌡𑌪𑌿𑌂𑌡𑌿𑌤𑌤𑌨𑍋𑌰𑍍𑌮𑍍𑌲𑌾𑌨𑍇𑌂𑌦𑍍𑌰𑌿𑌯𑌸𑍍𑌯 𑌕𑍍𑌷𑍁𑌧𑌾
𑌕𑍃𑌤𑍍𑌵𑌾𑌖𑍁𑌰𑍍𑌵𑌿𑌵𑌰𑌂 𑌸𑍍𑌵𑌯𑌂 𑌨𑌿𑌪𑌤𑌿𑌤𑍋 𑌨𑌕𑍍𑌤𑌂 𑌮𑍁𑌖𑍇 𑌭𑍋𑌗𑌿𑌨𑌃 ।
𑌤𑍃𑌪𑍍𑌤𑌸𑍍𑌤𑌤𑍍𑌪𑌿𑌶𑌿𑌤𑍇𑌨 𑌸𑌤𑍍𑌵𑌰𑌂 𑌅𑌸𑍌 𑌤𑍇𑌨𑍈𑌵 𑌯𑌾𑌤𑌃 𑌪𑌥𑌾
𑌲𑍋𑌕𑌾𑌃 𑌪𑌶𑍍𑌯𑌤 𑌦𑍈𑌵𑌂 𑌏𑌵 𑌹𑌿 𑌨𑍃𑌣𑌾𑌂 𑌵𑍃𑌦𑍍𑌧𑍌 𑌕𑍍𑌷𑌯𑍇 𑌕𑌾𑌰𑌣𑌮𑍍 ॥ 1.𑍮5 ॥

𑌆𑌲𑌸𑍍𑌯𑌂 𑌹𑌿 𑌮𑌨𑍁𑌷𑍍𑌯𑌾𑌣𑌾𑌂
𑌶𑌰𑍀𑌰𑌸𑍍𑌥𑍋 𑌮𑌹𑌾𑌨𑍍𑌰𑌿𑌪𑍁𑌃 ।
𑌨𑌾𑌸𑍍𑌤𑍍𑌯𑍁𑌦𑍍𑌯𑌮𑌸𑌮𑍋 𑌬𑌂𑌧𑍁𑌃
𑌕𑍁𑌰𑍍𑌵𑌾𑌣𑍋 𑌨𑌾𑌵𑌸𑍀𑌦𑌤𑌿 ॥ 1.𑍮6 ॥

𑌛𑌿𑌨𑍍𑌨𑍋𑌽𑌪𑌿 𑌰𑍋𑌹𑌤𑌿 𑌤𑌰𑍁𑌃 𑌕𑍍𑌷𑍀𑌣𑍋𑌽𑌪𑍍𑌯𑍁𑌪𑌚𑍀𑌯𑌤𑍇 𑌪𑍁𑌨𑌶𑍍𑌚𑌂𑌦𑍍𑌰𑌃 ।
𑌇𑌤𑌿 𑌵𑌿𑌮𑍃𑌶𑌂𑌤𑌃 𑌸𑌂𑌤𑌃 𑌸𑌂𑌤𑌪𑍍𑌯𑌂𑌤𑍇 𑌨 𑌦𑍁𑌃𑌖𑍇𑌷𑍁 ॥ 1.𑍮𑍭 ॥

𑌨𑍇𑌤𑌾 𑌯𑌸𑍍𑌯 𑌬𑍃𑌹𑌸𑍍𑌪𑌤𑌿𑌃 𑌪𑍍𑌰𑌹𑌰𑌣𑌂 𑌵𑌜𑍍𑌰𑌂 𑌸𑍁𑌰𑌾𑌃 𑌸𑍈𑌨𑌿𑌕𑌾𑌃
𑌸𑍍𑌵𑌰𑍍𑌗𑍋 𑌦𑍁𑌰𑍍𑌗𑌂 𑌅𑌨𑍁𑌗𑍍𑌰𑌹𑌃 𑌕𑌿𑌲 𑌹𑌰𑍇𑌰𑍈𑌰𑌾𑌵𑌤𑍋 𑌵𑌾𑌰𑌣𑌃 ।
𑌇𑌤𑍍𑌯𑍈𑌶𑍍𑌵𑌰𑍍𑌯𑌬𑌲𑌾𑌨𑍍𑌵𑌿𑌤𑍋𑌽𑌪𑌿 𑌬𑌲𑌭𑌿𑌦𑍍𑌭𑌗𑍍𑌨𑌃 𑌪𑌰𑍈𑌃 𑌸𑌂𑌗𑌰𑍇
𑌤𑌦𑍍𑌵𑍍𑌯𑌕𑍍𑌤𑌂 𑌨𑌨𑍁 𑌦𑍈𑌵𑌂 𑌏𑌵 𑌶𑌰𑌣𑌂 𑌧𑌿𑌗𑍍𑌧𑌿𑌗𑍍𑌵𑍃𑌥𑌾 𑌪𑍌𑌰𑍁𑌷𑌮𑍍 ॥ 1.𑍮𑍮 ॥

𑌕𑌰𑍍𑌮𑌾𑌯𑌤𑍍𑌤𑌂 𑌫𑌲𑌂 𑌪𑍁𑌂𑌸𑌾𑌂
𑌬𑍁𑌦𑍍𑌧𑌿𑌃 𑌕𑌰𑍍𑌮𑌾𑌨𑍁𑌸𑌾𑌰𑌿𑌣𑍀 ।
𑌤𑌥𑌾𑌪𑌿 𑌸𑍁𑌧𑌿𑌯𑌾 𑌭𑌾𑌵𑍍𑌯𑌂
𑌸𑍁𑌵𑌿𑌚𑌾𑌰𑍍𑌯𑍈𑌵 𑌕𑍁𑌰𑍍𑌵𑌤𑌾 ॥ 1.𑍮𑍯 ॥

𑌖𑌲𑍍𑌵𑌾𑌟𑍋 𑌦𑌿𑌵𑌸𑍇𑌶𑍍𑌵𑌰𑌸𑍍𑌯 𑌕𑌿𑌰𑌣𑍈𑌃 𑌸𑌂𑌤𑌾𑌡𑌿𑌤𑍋 𑌮𑌸𑍍𑌤𑌕𑍇
𑌵𑌾𑌂𑌛𑌂𑌦𑍇𑌶𑌂 𑌅𑌨𑌾𑌤𑌪𑌂 𑌵𑌿𑌧𑌿𑌵𑌶𑌾𑌤𑍍𑌤𑌾𑌲𑌸𑍍𑌯 𑌮𑍂𑌲𑌂 𑌗𑌤𑌃 ।
𑌤𑌤𑍍𑌰𑌾𑌪𑍍𑌯𑌸𑍍𑌯 𑌮𑌹𑌾𑌫𑌲𑍇𑌨 𑌪𑌤𑌤𑌾 𑌭𑌗𑍍𑌨𑌂 𑌸𑌶𑌬𑍍𑌦𑌂 𑌶𑌿𑌰𑌃
𑌪𑍍𑌰𑌾𑌯𑍋 𑌗𑌚𑍍𑌛𑌤𑌿 𑌯𑌤𑍍𑌰 𑌭𑌾𑌗𑍍𑌯𑌰𑌹𑌿𑌤𑌸𑍍𑌤𑌤𑍍𑌰𑍈𑌵 𑌯𑌾𑌂𑌤𑍍𑌯𑌾𑌪𑌦𑌃 ॥ 1.𑍯0 ॥

𑌰𑌵𑌿𑌨𑌿𑌶𑌾𑌕𑌰𑌯𑍋𑌰𑍍𑌗𑍍𑌰𑌹𑌪𑍀𑌡𑌨𑌂
𑌗𑌜𑌭𑍁𑌜𑌂𑌗𑌮𑌯𑍋𑌰𑌪𑌿 𑌬𑌂𑌧𑌨𑌮𑍍 ।
𑌮𑌤𑌿𑌮𑌤𑌾𑌂 𑌚 𑌵𑌿𑌲𑍋𑌕𑍍𑌯 𑌦𑌰𑌿𑌦𑍍𑌰𑌤𑌾𑌂
𑌵𑌿𑌧𑌿𑌰𑌹𑍋 𑌬𑌲𑌵𑌾𑌨𑌿𑌤𑌿 𑌮𑍇 𑌮𑌤𑌿𑌃 ॥ 1.𑍯1 ॥

𑌸𑍃𑌜𑌤𑌿 𑌤𑌾𑌵𑌦𑌶𑍇𑌷𑌗𑍁𑌣𑌾𑌕𑌰𑌂
𑌪𑍁𑌰𑍁𑌷𑌰𑌤𑍍𑌨𑌂 𑌅𑌲𑌂𑌕𑌰𑌣𑌂 𑌭𑍁𑌵𑌃 ।
𑌤𑌦𑌪𑌿 𑌤𑌤𑍍𑌕𑍍𑌷𑌣𑌭𑌂𑌗𑌿 𑌕𑌰𑍋𑌤𑌿
𑌚𑍇𑌦𑌹𑌹 𑌕𑌷𑍍𑌟𑌂 𑌅𑌪𑌂𑌡𑌿𑌤𑌤𑌾 𑌵𑌿𑌧𑍇𑌃 ॥ 1.𑍯2 ॥

𑌪𑌤𑍍𑌰𑌂 𑌨𑍈𑌵 𑌯𑌦𑌾 𑌕𑌰𑍀𑌰𑌵𑌿𑌟𑌪𑍇 𑌦𑍋𑌷𑍋 𑌵𑌸𑌂𑌤𑌸𑍍𑌯 𑌕𑌿𑌮𑍍
𑌨𑍋𑌲𑍂𑌕𑍋𑌽𑌪𑍍𑌯𑌵𑌲𑍋𑌕𑌤𑍇 𑌯𑌦𑌿 𑌦𑌿𑌵𑌾 𑌸𑍂𑌰𑍍𑌯𑌸𑍍𑌯 𑌕𑌿𑌂 𑌦𑍂𑌷𑌣𑌮𑍍 ।
𑌧𑌾𑌰𑌾 𑌨𑍈𑌵 𑌪𑌤𑌂𑌤𑌿 𑌚𑌾𑌤𑌕𑌮𑍁𑌖𑍇 𑌮𑍇𑌘𑌸𑍍𑌯 𑌕𑌿𑌂 𑌦𑍂𑌷𑌣𑌮𑍍
𑌯𑌤𑍍𑌪𑍂𑌰𑍍𑌵𑌂 𑌵𑌿𑌧𑌿𑌨𑌾 𑌲𑌲𑌾𑌟𑌲𑌿𑌖𑌿𑌤𑌂 𑌤𑌨𑍍𑌮𑌾𑌰𑍍𑌜𑌿𑌤𑍁𑌂 𑌕𑌃 𑌕𑍍𑌷𑌮𑌃 ॥ 1.𑍯3 ॥

𑌨𑌮𑌸𑍍𑌯𑌾𑌮𑍋 𑌦𑍇𑌵𑌾𑌨𑍍𑌨𑌨𑍁 𑌹𑌤𑌵𑌿𑌧𑍇𑌸𑍍𑌤𑍇𑌽𑌪𑌿 𑌵𑌶𑌗𑌾
𑌵𑌿𑌧𑌿𑌰𑍍𑌵𑌂𑌦𑍍𑌯𑌃 𑌸𑍋𑌽𑌪𑌿 𑌪𑍍𑌰𑌤𑌿𑌨𑌿𑌯𑌤𑌕𑌰𑍍𑌮𑍈𑌕𑌫𑌲𑌦𑌃 ।
𑌫𑌲𑌂 𑌕𑌰𑍍𑌮𑌾𑌯𑌤𑍍𑌤𑌂 𑌯𑌦𑌿 𑌕𑌿𑌂 𑌅𑌮𑌰𑍈𑌃 𑌕𑌿𑌂 𑌚 𑌵𑌿𑌧𑌿𑌨𑌾
𑌨𑌮𑌸𑍍𑌤𑌤𑍍𑌕𑌰𑍍𑌮𑌭𑍍𑌯𑍋 𑌵𑌿𑌧𑌿𑌰𑌪𑌿 𑌨 𑌯𑍇𑌭𑍍𑌯𑌃 𑌪𑍍𑌰𑌭𑌵𑌤𑌿 ॥ 1.𑍯4 ॥

𑌬𑍍𑌰𑌹𑍍𑌮𑌾 𑌯𑍇𑌨 𑌕𑍁𑌲𑌾𑌲𑌵𑌨𑍍𑌨𑌿𑌯𑌮𑌿𑌤𑍋 𑌬𑍍𑌰𑌹𑍍𑌮𑌾𑌂𑌡𑌭𑌾𑌂𑌡𑍋𑌦𑌰𑍇
𑌵𑌿𑌷𑍍𑌣𑍁𑌰𑍍𑌯𑍇𑌨 𑌦𑌶𑌾𑌵𑌤𑌾𑌰𑌗𑌹𑌨𑍇 𑌕𑍍𑌷𑌿𑌪𑍍𑌤𑍋 𑌮𑌹𑌾𑌸𑌂𑌕𑌟𑍇 ।
𑌰𑍁𑌦𑍍𑌰𑍋 𑌯𑍇𑌨 𑌕𑌪𑌾𑌲𑌪𑌾𑌣𑌿𑌪𑍁𑌟𑌕𑍇 𑌭𑌿𑌕𑍍𑌷𑌾𑌟𑌨𑌂 𑌕𑌾𑌰𑌿𑌤𑌃
𑌸𑍂𑌰𑍍𑌯𑍋 𑌭𑍍𑌰𑌾𑌮𑍍𑌯𑌤𑌿 𑌨𑌿𑌤𑍍𑌯𑌂 𑌏𑌵 𑌗𑌗𑌨𑍇 𑌤𑌸𑍍𑌮𑍈 𑌨𑌮𑌃 𑌕𑌰𑍍𑌮𑌣𑍇 ॥ 1.𑍯5 ॥

𑌨𑍈𑌵𑌾𑌕𑍃𑌤𑌿𑌃 𑌫𑌲𑌤𑌿 𑌨𑍈𑌵 𑌕𑍁𑌲𑌂 𑌨 𑌶𑍀𑌲𑌂
𑌵𑌿𑌦𑍍𑌯𑌾𑌪𑌿 𑌨𑍈𑌵 𑌨 𑌚 𑌯𑌤𑍍𑌨𑌕𑍃𑌤𑌾𑌪𑌿 𑌸𑍇𑌵𑌾 ।
𑌭𑌾𑌗𑍍𑌯𑌾𑌨𑌿 𑌪𑍂𑌰𑍍𑌵𑌤𑌪𑌸𑌾 𑌖𑌲𑍁 𑌸𑌂𑌚𑌿𑌤𑌾𑌨𑌿
𑌕𑌾𑌲𑍇 𑌫𑌲𑌂𑌤𑌿 𑌪𑍁𑌰𑍁𑌷𑌸𑍍𑌯 𑌯𑌥𑍈𑌵 𑌵𑍃𑌕𑍍𑌷𑌾𑌃 ॥ 1.𑍯6 ॥

𑌵𑌨𑍇 𑌰𑌣𑍇 𑌶𑌤𑍍𑌰𑍁𑌜𑌲𑌾𑌗𑍍𑌨𑌿𑌮𑌧𑍍𑌯𑍇
𑌮𑌹𑌾𑌰𑍍𑌣𑌵𑍇 𑌪𑌰𑍍𑌵𑌤𑌮𑌸𑍍𑌤𑌕𑍇 𑌵𑌾 ।
𑌸𑍁𑌪𑍍𑌤𑌂 𑌪𑍍𑌰𑌮𑌤𑍍𑌤𑌂 𑌵𑌿𑌷𑌮𑌸𑍍𑌥𑌿𑌤𑌂 𑌵𑌾
𑌰𑌕𑍍𑌷𑌂𑌤𑌿 𑌪𑍁𑌣𑍍𑌯𑌾𑌨𑌿 𑌪𑍁𑌰𑌾𑌕𑍃𑌤𑌾𑌨𑌿 ॥ 1.𑍯𑍭 ॥

𑌯𑌾 𑌸𑌾𑌧𑍂𑌂𑌶𑍍𑌚 𑌖𑌲𑌾𑌨𑍍𑌕𑌰𑍋𑌤𑌿 𑌵𑌿𑌦𑍁𑌷𑍋 𑌮𑍂𑌰𑍍𑌖𑌾𑌨𑍍𑌹𑌿𑌤𑌾𑌂𑌦𑍍𑌵𑍇𑌷𑌿𑌣𑌃
𑌪𑍍𑌰𑌤𑍍𑌯𑌕𑍍𑌷𑌂 𑌕𑍁𑌰𑍁𑌤𑍇 𑌪𑌰𑍋𑌕𑍍𑌷𑌂 𑌅𑌮𑍃𑌤𑌂 𑌹𑌾𑌲𑌾𑌹𑌲𑌂 𑌤𑌤𑍍𑌕𑍍𑌷𑌣𑌾𑌤𑍍 ।
𑌤𑌾𑌂 𑌆𑌰𑌾𑌧𑌯 𑌸𑌤𑍍𑌕𑍍𑌰𑌿𑌯𑌾𑌂 𑌭𑌗𑌵𑌤𑍀𑌂 𑌭𑍋𑌕𑍍𑌤𑍁𑌂 𑌫𑌲𑌂 𑌵𑌾𑌂𑌛𑌿𑌤𑌂
𑌹𑍇 𑌸𑌾𑌧𑍋 𑌵𑍍𑌯𑌸𑌨𑍈𑌰𑍍𑌗𑍁𑌣𑍇𑌷𑍁 𑌵𑌿𑌪𑍁𑌲𑍇𑌷𑍍𑌵𑌾𑌸𑍍𑌥𑌾𑌂 𑌵𑍃𑌥𑌾 𑌮𑌾 𑌕𑍃𑌥𑌾𑌃 ॥ 1.𑍯𑍮 ॥

𑌗𑍁𑌣𑌵𑌦𑌗𑍁𑌣𑌵𑌦𑍍𑌵𑌾 𑌕𑍁𑌰𑍍𑌵𑌤𑌾 𑌕𑌾𑌰𑍍𑌯𑌜𑌾𑌤𑌂
𑌪𑌰𑌿𑌣𑌤𑌿𑌰𑌵𑌧𑌾𑌰𑍍𑌯𑌾 𑌯𑌤𑍍𑌨𑌤𑌃 𑌪𑌂𑌡𑌿𑌤𑍇𑌨 ।
𑌅𑌤𑌿𑌰𑌭𑌸𑌕𑍃𑌤𑌾𑌨𑌾𑌂 𑌕𑌰𑍍𑌮𑌣𑌾𑌂 𑌆𑌵𑌿𑌪𑌤𑍍𑌤𑍇𑌰𑍍
𑌭𑌵𑌤𑌿 𑌹𑍃𑌦𑌯𑌦𑌾𑌹𑍀 𑌶𑌲𑍍𑌯𑌤𑍁𑌲𑍍𑌯𑍋 𑌵𑌿𑌪𑌾𑌕𑌃 ॥ 1.𑍯𑍯 ॥

𑌸𑍍𑌥𑌾𑌲𑍍𑌯𑌾𑌂 𑌵𑍈𑌦𑍂𑌰𑍍𑌯𑌮𑌯𑍍𑌯𑌾𑌂 𑌪𑌚𑌤𑌿 𑌤𑌿𑌲𑌕𑌣𑌾𑌂𑌶𑍍𑌚𑌂𑌦𑌨𑍈𑌰𑌿𑌂𑌧𑌨𑍌𑌘𑍈𑌃
𑌸𑍌𑌵𑌰𑍍𑌣𑍈𑌰𑍍𑌲𑌾𑌂𑌗𑌲𑌾𑌗𑍍𑌰𑍈𑌰𑍍𑌵𑌿𑌲𑌿𑌖𑌤𑌿 𑌵𑌸𑍁𑌧𑌾𑌂 𑌅𑌰𑍍𑌕𑌮𑍂𑌲𑌸𑍍𑌯 𑌹𑍇𑌤𑍋𑌃 ।
𑌕𑍃𑌤𑍍𑌵𑌾 𑌕𑌰𑍍𑌪𑍂𑌰𑌖𑌂𑌡𑌾𑌨𑍍𑌵𑍃𑌤𑌿𑌂 𑌇𑌹 𑌕𑍁𑌰𑍁𑌤𑍇 𑌕𑍋𑌦𑍍𑌰𑌵𑌾𑌣𑌾𑌂 𑌸𑌮𑌂𑌤𑌾𑌤𑍍
𑌪𑍍𑌰𑌾𑌪𑍍𑌯𑍇𑌮𑌾𑌂 𑌕𑌰𑍍𑌮𑌭𑍂𑌮𑌿𑌂 𑌨 𑌚𑌰𑌤𑌿 𑌮𑌨𑍁𑌜𑍋 𑌯𑌸𑍍𑌤𑌪𑍋 𑌮𑌂𑌦𑌭𑌾𑌗𑍍𑌯𑌃 ॥ 1.100 ॥

𑌮𑌜𑍍𑌜𑌤𑍍𑌵𑌂𑌭𑌸𑌿 𑌯𑌾𑌤𑍁 𑌮𑍇𑌰𑍁𑌶𑌿𑌖𑌰𑌂 𑌶𑌤𑍍𑌰𑍁𑌂 𑌜𑌯𑌤𑍍𑌵𑌾𑌹𑌵𑍇
𑌵𑌾𑌣𑌿𑌜𑍍𑌯𑌂 𑌕𑍃𑌷𑌿𑌸𑍇𑌵𑌨𑍇 𑌚 𑌸𑌕𑌲𑌾 𑌵𑌿𑌦𑍍𑌯𑌾𑌃 𑌕𑌲𑌾𑌃 𑌶𑌿𑌕𑍍𑌷𑌤𑌾𑌮𑍍 ।
𑌆𑌕𑌾𑌶𑌂 𑌵𑌿𑌪𑍁𑌲𑌂 𑌪𑍍𑌰𑌯𑌾𑌤𑍁 𑌖𑌗𑌵𑌤𑍍𑌕𑍃𑌤𑍍𑌵𑌾 𑌪𑍍𑌰𑌯𑌤𑍍𑌨𑌂 𑌪𑌰𑌂
𑌨𑌾𑌭𑌾𑌵𑍍𑌯𑌂 𑌭𑌵𑌤𑍀𑌹 𑌕𑌰𑍍𑌮𑌵𑌶𑌤𑍋 𑌭𑌾𑌵𑍍𑌯𑌸𑍍𑌯 𑌨𑌾𑌶𑌃 𑌕𑍁𑌤𑌃 ॥ 1.101 ॥

𑌭𑍀𑌮𑌂 𑌵𑌨𑌂 𑌭𑌵𑌤𑌿 𑌤𑌸𑍍𑌯 𑌪𑍁𑌰𑌂 𑌪𑍍𑌰𑌧𑌾𑌨𑌂
𑌸𑌰𑍍𑌵𑍋 𑌜𑌨𑌃 𑌸𑍍𑌵𑌜𑌨𑌤𑌾𑌂 𑌉𑌪𑌯𑌾𑌤𑌿 𑌤𑌸𑍍𑌯 ।
𑌕𑍃𑌤𑍍𑌸𑍍𑌨𑌾 𑌚 𑌭𑍂𑌰𑍍𑌭𑌵𑌤𑌿 𑌸𑌨𑍍𑌨𑌿𑌧𑌿𑌰𑌤𑍍𑌨𑌪𑍂𑌰𑍍𑌣𑌾
𑌯𑌸𑍍𑌯𑌾𑌸𑍍𑌤𑌿 𑌪𑍂𑌰𑍍𑌵𑌸𑍁𑌕𑍃𑌤𑌂 𑌵𑌿𑌪𑍁𑌲𑌂 𑌨𑌰𑌸𑍍𑌯 ॥ 1.102 ॥

𑌕𑍋 𑌲𑌾𑌭𑍋 𑌗𑍁𑌣𑌿𑌸𑌂𑌗𑌮𑌃 𑌕𑌿𑌂 𑌅𑌸𑍁𑌖𑌂 𑌪𑍍𑌰𑌾𑌜𑍍𑌞𑍇𑌤𑌰𑍈𑌃 𑌸𑌂𑌗𑌤𑌿𑌃
𑌕𑌾 𑌹𑌾𑌨𑌿𑌃 𑌸𑌮𑌯𑌚𑍍𑌯𑍁𑌤𑌿𑌰𑍍𑌨𑌿𑌪𑍁𑌣𑌤𑌾 𑌕𑌾 𑌧𑌰𑍍𑌮𑌤𑌤𑍍𑌤𑍍𑌵𑍇 𑌰𑌤𑌿𑌃 ।
𑌕𑌃 𑌶𑍂𑌰𑍋 𑌵𑌿𑌜𑌿𑌤𑍇𑌂𑌦𑍍𑌰𑌿𑌯𑌃 𑌪𑍍𑌰𑌿𑌯𑌤𑌮𑌾 𑌕𑌾𑌽𑌨𑍁𑌵𑍍𑌰𑌤𑌾 𑌕𑌿𑌂 𑌧𑌨𑌂
𑌵𑌿𑌦𑍍𑌯𑌾 𑌕𑌿𑌂 𑌸𑍁𑌖𑌂 𑌅𑌪𑍍𑌰𑌵𑌾𑌸𑌗𑌮𑌨𑌂 𑌰𑌾𑌜𑍍𑌯𑌂 𑌕𑌿𑌂 𑌆𑌜𑍍𑌞𑌾𑌫𑌲𑌮𑍍 ॥ 1.103 ॥

𑌅𑌪𑍍𑌰𑌿𑌯𑌵𑌚𑌨𑌦𑌰𑌿𑌦𑍍𑌰𑍈𑌃 𑌪𑍍𑌰𑌿𑌯𑌵𑌚𑌨𑌧𑌨𑌾𑌢𑍍𑌯𑍈𑌃 𑌸𑍍𑌵𑌦𑌾𑌰𑌪𑌰𑌿𑌤𑍁𑌷𑍍𑌟𑍈𑌃 ।
𑌪𑌰𑌪𑌰𑌿𑌵𑌾𑌦𑌨𑌿𑌵𑍃𑌤𑍍𑌤𑍈𑌃 𑌕𑍍𑌵𑌚𑌿𑌤𑍍𑌕𑍍𑌵𑌚𑌿𑌨𑍍𑌮𑌂𑌡𑌿𑌤𑌾 𑌵𑌸𑍁𑌧𑌾 ॥ 1.104 ॥

𑌕𑌦𑌰𑍍𑌥𑌿𑌤𑌸𑍍𑌯𑌾𑌪𑌿 𑌹𑌿 𑌧𑍈𑌰𑍍𑌯𑌵𑍃𑌤𑍍𑌤𑍇𑌰𑍍
𑌨 𑌶𑌕𑍍𑌯𑌤𑍇 𑌧𑍈𑌰𑍍𑌯𑌗𑍁𑌣𑌃 𑌪𑍍𑌰𑌮𑌾𑌰𑍍𑌷𑍍𑌟𑍁𑌮𑍍 ।
𑌅𑌧𑍋𑌮𑍁𑌖𑌸𑍍𑌯𑌾𑌪𑌿 𑌕𑍃𑌤𑌸𑍍𑌯 𑌵𑌹𑍍𑌨𑍇𑌰𑍍
𑌨𑌾𑌧𑌃 𑌶𑌿𑌖𑌾 𑌯𑌾𑌤𑌿 𑌕𑌦𑌾𑌚𑌿𑌦𑍇𑌵 ॥ 1.105 ॥

𑌕𑌾𑌂𑌤𑌾𑌕𑌟𑌾𑌕𑍍𑌷𑌵𑌿𑌶𑌿𑌖𑌾 𑌨 𑌲𑍁𑌨𑌂𑌤𑌿 𑌯𑌸𑍍𑌯
𑌚𑌿𑌤𑍍𑌤𑌂 𑌨 𑌨𑌿𑌰𑍍𑌦𑌹𑌤𑌿 𑌕𑍋𑌪𑌕𑍃𑌶𑌾𑌨𑍁𑌤𑌾𑌪𑌃 ।
𑌕𑌰𑍍𑌷𑌂𑌤𑌿 𑌭𑍂𑌰𑌿𑌵𑌿𑌷𑌯𑌾𑌶𑍍𑌚 𑌨 𑌲𑍋𑌭𑌪𑌾𑌶𑍈𑌰𑍍
𑌲𑍋𑌕𑌤𑍍𑌰𑌯𑌂 𑌜𑌯𑌤𑌿 𑌕𑍃𑌤𑍍𑌸𑍍𑌨𑌂 𑌇𑌦𑌂 𑌸 𑌧𑍀𑌰𑌃 ॥ 1.106 ॥

𑌏𑌕𑍇𑌨𑌾𑌪𑌿 𑌹𑌿 𑌶𑍂𑌰𑍇𑌣
𑌪𑌾𑌦𑌾𑌕𑍍𑌰𑌾𑌂𑌤𑌂 𑌮𑌹𑍀𑌤𑌲𑌮𑍍 ।
𑌕𑍍𑌰𑌿𑌯𑌤𑍇 𑌭𑌾𑌸𑍍𑌕𑌰𑍇𑌣𑍈𑌵
𑌸𑍍𑌫𑌾𑌰𑌸𑍍𑌫𑍁𑌰𑌿𑌤𑌤𑍇𑌜𑌸𑌾 ॥ 1.10𑍭 ॥

𑌵𑌹𑍍𑌨𑌿𑌸𑍍𑌤𑌸𑍍𑌯 𑌜𑌲𑌾𑌯𑌤𑍇 𑌜𑌲𑌨𑌿𑌧𑌿𑌃 𑌕𑍁𑌲𑍍𑌯𑌾𑌯𑌤𑍇 𑌤𑌤𑍍𑌕𑍍𑌷𑌣𑌾𑌨𑍍
𑌮𑍇𑌰𑍁𑌃 𑌸𑍍𑌵𑌲𑍍𑌪𑌶𑌿𑌲𑌾𑌯𑌤𑍇 𑌮𑍃𑌗𑌪𑌤𑌿𑌃 𑌸𑌦𑍍𑌯𑌃 𑌕𑍁𑌰𑌂𑌗𑌾𑌯𑌤𑍇 ।
𑌵𑍍𑌯𑌾𑌲𑍋 𑌮𑌾𑌲𑍍𑌯𑌗𑍁𑌣𑌾𑌯𑌤𑍇 𑌵𑌿𑌷𑌰𑌸𑌃 𑌪𑍀𑌯𑍂𑌷𑌵𑌰𑍍𑌷𑌾𑌯𑌤𑍇
𑌯𑌸𑍍𑌯𑌾𑌂𑌗𑍇𑌽𑌖𑌿𑌲𑌲𑍋𑌕𑌵𑌲𑍍𑌲𑌭𑌤𑌮𑌂 𑌶𑍀𑌲𑌂 𑌸𑌮𑍁𑌨𑍍𑌮𑍀𑌲𑌤𑌿 ॥ 1.10𑍮 ॥

𑌲𑌜𑍍𑌜𑌾𑌗𑍁𑌣𑍌𑌘𑌜𑌨𑌨𑍀𑌂 𑌜𑌨𑌨𑍀𑌂 𑌇𑌵 𑌸𑍍𑌵𑌾𑌮𑍍
𑌅𑌤𑍍𑌯𑌂𑌤𑌶𑍁𑌦𑍍𑌧𑌹𑍃𑌦𑌯𑌾𑌂 𑌅𑌨𑍁𑌵𑌰𑍍𑌤𑌮𑌾𑌨𑌾𑌮𑍍 ।
𑌤𑍇𑌜𑌸𑍍𑌵𑌿𑌨𑌃 𑌸𑍁𑌖𑌂 𑌅𑌸𑍂𑌨𑌪𑌿 𑌸𑌂𑌤𑍍𑌯𑌜𑌂𑌤𑌿
𑌸𑌤𑍍𑌯𑌵𑍍𑌰𑌤𑌵𑍍𑌯𑌸𑌨𑌿𑌨𑍋 𑌨 𑌪𑍁𑌨𑌃 𑌪𑍍𑌰𑌤𑌿𑌜𑍍𑌞𑌾𑌮𑍍 ॥ 1.10𑍯 ॥