𑌆𑌨𑌂𑌦 𑌲𑌹𑌰𑌿

𑌭𑌵𑌾𑌨𑌿 𑌸𑍍𑌤𑍋𑌤𑍁𑌂 𑌤𑍍𑌵𑌾𑌂 𑌪𑍍𑌰𑌭𑌵𑌤𑌿 𑌚𑌤𑍁𑌰𑍍𑌭𑌿𑌰𑍍𑌨 𑌵𑌦𑌨𑍈𑌃
𑌪𑍍𑌰𑌜𑌾𑌨𑌾𑌮𑍀𑌶𑌾𑌨𑌸𑍍𑌤𑍍𑌰𑌿𑌪𑍁𑌰𑌮𑌥𑌨𑌃 𑌪𑌂𑌚𑌭𑌿𑌰𑌪𑌿 ।
𑌨 𑌷𑌡𑍍𑌭𑌿𑌃 𑌸𑍇𑌨𑌾𑌨𑍀𑌰𑍍𑌦𑌶𑌶𑌤𑌮𑍁𑌖𑍈𑌰𑌪𑍍𑌯𑌹𑌿𑌪𑌤𑌿𑌃
𑌤𑌦𑌾𑌨𑍍𑌯𑍇𑌷𑌾𑌂 𑌕𑍇𑌷𑌾𑌂 𑌕𑌥𑌯 𑌕𑌥𑌮𑌸𑍍𑌮𑌿𑌨𑍍𑌨𑌵𑌸𑌰𑌃 ॥ 1॥

𑌘𑍃𑌤𑌕𑍍𑌷𑍀𑌰𑌦𑍍𑌰𑌾𑌕𑍍𑌷𑌾𑌮𑌧𑍁𑌮𑌧𑍁𑌰𑌿𑌮𑌾 𑌕𑍈𑌰𑌪𑌿 𑌪𑌦𑍈𑌃
𑌵𑌿𑌶𑌿𑌷𑍍𑌯𑌾𑌨𑌾𑌖𑍍𑌯𑍇𑌯𑍋 𑌭𑌵𑌤𑌿 𑌰𑌸𑌨𑌾𑌮𑌾𑌤𑍍𑌰 𑌵𑌿𑌷𑌯𑌃 ।
𑌤𑌥𑌾 𑌤𑍇 𑌸𑍌𑌂𑌦𑌰𑍍𑌯𑌂 𑌪𑌰𑌮𑌶𑌿𑌵𑌦𑍃𑌙𑍍𑌮𑌾𑌤𑍍𑌰𑌵𑌿𑌷𑌯𑌃
𑌕𑌥𑌂𑌕𑌾𑌰𑌂 𑌬𑍍𑌰𑍂𑌮𑌃 𑌸𑌕𑌲𑌨𑌿𑌗𑌮𑌾𑌗𑍋𑌚𑌰𑌗𑍁𑌣𑍇 ॥ 2॥

𑌮𑍁𑌖𑍇 𑌤𑍇 𑌤𑌾𑌂𑌬𑍂𑌲𑌂 𑌨𑌯𑌨𑌯𑍁𑌗𑌳𑍇 𑌕𑌜𑍍𑌜𑌲𑌕𑌲𑌾
𑌲𑌲𑌾𑌟𑍇 𑌕𑌾𑌶𑍍𑌮𑍀𑌰𑌂 𑌵𑌿𑌲𑌸𑌤𑌿 𑌗𑌳𑍇 𑌮𑍌𑌕𑍍𑌤𑌿𑌕𑌲𑌤𑌾 ।
𑌸𑍍𑌫𑍁𑌰𑌤𑍍𑌕𑌾𑌂𑌚𑍀 𑌶𑌾𑌟𑍀 𑌪𑍃𑌥𑍁𑌕𑌟𑌿𑌤𑌟𑍇 𑌹𑌾𑌟𑌕𑌮𑌯𑍀
𑌭𑌜𑌾𑌮𑌿 𑌤𑍍𑌵𑌾𑌂 𑌗𑍌𑌰𑍀𑌂 𑌨𑌗𑌪𑌤𑌿𑌕𑌿𑌶𑍋𑌰𑍀𑌮𑌵𑌿𑌰𑌤𑌮𑍍 ॥ 3॥

𑌵𑌿𑌰𑌾𑌜𑌨𑍍𑌮𑌂𑌦𑌾𑌰𑌦𑍍𑌰𑍁𑌮𑌕𑍁𑌸𑍁𑌮𑌹𑌾𑌰𑌸𑍍𑌤𑌨𑌤𑌟𑍀
𑌨𑌦𑌦𑍍𑌵𑍀𑌣𑌾𑌨𑌾𑌦𑌶𑍍𑌰𑌵𑌣𑌵𑌿𑌲𑌸𑌤𑍍𑌕𑍁𑌂𑌡𑌲𑌗𑍁𑌣𑌾
𑌨𑌤𑌾𑌂𑌗𑍀 𑌮𑌾𑌤𑌂𑌗𑍀 𑌰𑍁𑌚𑌿𑌰𑌗𑌤𑌿𑌭𑌂𑌗𑍀 𑌭𑌗𑌵𑌤𑍀
𑌸𑌤𑍀 𑌶𑌂𑌭𑍋𑌰𑌂𑌭𑍋𑌰𑍁𑌹𑌚𑌟𑍁𑌲𑌚𑌕𑍍𑌷𑍁𑌰𑍍𑌵𑌿𑌜𑌯𑌤𑍇 ॥ 4॥

𑌨𑌵𑍀𑌨𑌾𑌰𑍍𑌕𑌭𑍍𑌰𑌾𑌜𑌨𑍍𑌮𑌣𑌿𑌕𑌨𑌕𑌭𑍂𑌷𑌣𑌪𑌰𑌿𑌕𑌰𑍈𑌃
𑌵𑍃𑌤𑌾𑌂𑌗𑍀 𑌸𑌾𑌰𑌂𑌗𑍀𑌰𑍁𑌚𑌿𑌰𑌨𑌯𑌨𑌾𑌂𑌗𑍀𑌕𑍃𑌤𑌶𑌿𑌵𑌾 ।
𑌤𑌡𑌿𑌤𑍍𑌪𑍀𑌤𑌾 𑌪𑍀𑌤𑌾𑌂𑌬𑌰𑌲𑌲𑌿𑌤𑌮𑌂𑌜𑍀𑌰𑌸𑍁𑌭𑌗𑌾
𑌮𑌮𑌾𑌪𑌰𑍍𑌣𑌾 𑌪𑍂𑌰𑍍𑌣𑌾 𑌨𑌿𑌰𑌵𑌧𑌿𑌸𑍁𑌖𑍈𑌰𑌸𑍍𑌤𑍁 𑌸𑍁𑌮𑍁𑌖𑍀 ॥ 5॥

𑌹𑌿𑌮𑌾𑌦𑍍𑌰𑍇𑌃 𑌸𑌂𑌭𑍂𑌤𑌾 𑌸𑍁𑌲𑌲𑌿𑌤𑌕𑌰𑍈𑌃 𑌪𑌲𑍍𑌲𑌵𑌯𑍁𑌤𑌾
𑌸𑍁𑌪𑍁𑌷𑍍𑌪𑌾 𑌮𑍁𑌕𑍍𑌤𑌾𑌭𑌿𑌰𑍍𑌭𑍍𑌰𑌮𑌰𑌕𑌲𑌿𑌤𑌾 𑌚𑌾𑌲𑌕𑌭𑌰𑍈𑌃 ।
𑌕𑍃𑌤𑌸𑍍𑌥𑌾𑌣𑍁𑌸𑍍𑌥𑌾𑌨𑌾 𑌕𑍁𑌚𑌫𑌲𑌨𑌤𑌾 𑌸𑍂𑌕𑍍𑌤𑌿𑌸𑌰𑌸𑌾
𑌰𑍁𑌜𑌾𑌂 𑌹𑌂𑌤𑍍𑌰𑍀 𑌗𑌂𑌤𑍍𑌰𑍀 𑌵𑌿𑌲𑌸𑌤𑌿 𑌚𑌿𑌦𑌾𑌨𑌂𑌦𑌲𑌤𑌿𑌕𑌾 ॥ 6॥

𑌸𑌪𑌰𑍍𑌣𑌾𑌮𑌾𑌕𑍀𑌰𑍍𑌣𑌾𑌂 𑌕𑌤𑌿𑌪𑌯𑌗𑍁𑌣𑍈𑌃 𑌸𑌾𑌦𑌰𑌮𑌿𑌹
𑌶𑍍𑌰𑌯𑌂𑌤𑍍𑌯𑌨𑍍𑌯𑍇 𑌵𑌲𑍍𑌲𑍀𑌂 𑌮𑌮 𑌤𑍁 𑌮𑌤𑌿𑌰𑍇𑌵𑌂 𑌵𑌿𑌲𑌸𑌤𑌿 ।
𑌅𑌪𑌰𑍍𑌣𑍈𑌕𑌾 𑌸𑍇𑌵𑍍𑌯𑌾 𑌜𑌗𑌤𑌿 𑌸𑌕𑌲𑍈𑌰𑍍𑌯𑌤𑍍𑌪𑌰𑌿𑌵𑍃𑌤𑌃
𑌪𑍁𑌰𑌾𑌣𑍋𑌽𑌪𑌿 𑌸𑍍𑌥𑌾𑌣𑍁𑌃 𑌫𑌲𑌤𑌿 𑌕𑌿𑌲 𑌕𑍈𑌵𑌲𑍍𑌯𑌪𑌦𑌵𑍀𑌮𑍍 ॥ 𑍭॥

𑌵𑌿𑌧𑌾𑌤𑍍𑌰𑍀 𑌧𑌰𑍍𑌮𑌾𑌣𑌾𑌂 𑌤𑍍𑌵𑌮𑌸𑌿 𑌸𑌕𑌲𑌾𑌮𑍍𑌨𑌾𑌯𑌜𑌨𑌨𑍀
𑌤𑍍𑌵𑌮𑌰𑍍𑌥𑌾𑌨𑌾𑌂 𑌮𑍂𑌲𑌂 𑌧𑌨𑌦𑌨𑌮𑌨𑍀𑌯𑌾𑌂𑌘𑍍𑌰𑌿𑌕𑌮𑌲𑍇 ।
𑌤𑍍𑌵𑌮𑌾𑌦𑌿𑌃 𑌕𑌾𑌮𑌾𑌨𑌾𑌂 𑌜𑌨𑌨𑌿 𑌕𑍃𑌤𑌕𑌂𑌦𑌰𑍍𑌪𑌵𑌿𑌜𑌯𑍇
𑌸𑌤𑌾𑌂 𑌮𑍁𑌕𑍍𑌤𑍇𑌰𑍍𑌬𑍀𑌜𑌂 𑌤𑍍𑌵𑌮𑌸𑌿 𑌪𑌰𑌮𑌬𑍍𑌰𑌹𑍍𑌮𑌮𑌹𑌿𑌷𑍀 ॥ 𑍮॥

𑌪𑍍𑌰𑌭𑍂𑌤𑌾 𑌭𑌕𑍍𑌤𑌿𑌸𑍍𑌤𑍇 𑌯𑌦𑌪𑌿 𑌨 𑌮𑌮𑌾𑌲𑍋𑌲𑌮𑌨𑌸𑌃
𑌤𑍍𑌵𑌯𑌾 𑌤𑍁 𑌶𑍍𑌰𑍀𑌮𑌤𑍍𑌯𑌾 𑌸𑌦𑌯𑌮𑌵𑌲𑍋𑌕𑍍𑌯𑍋𑌽𑌹𑌮𑌧𑍁𑌨𑌾 ।
𑌪𑌯𑍋𑌦𑌃 𑌪𑌾𑌨𑍀𑌯𑌂 𑌦𑌿𑌶𑌤𑌿 𑌮𑌧𑍁𑌰𑌂 𑌚𑌾𑌤𑌕𑌮𑍁𑌖𑍇
𑌭𑍃𑌶𑌂 𑌶𑌂𑌕𑍇 𑌕𑍈𑌰𑍍𑌵𑌾 𑌵𑌿𑌧𑌿𑌭𑌿𑌰𑌨𑍁𑌨𑍀𑌤𑌾 𑌮𑌮 𑌮𑌤𑌿𑌃 ॥ 𑍯॥

𑌕𑍃𑌪𑌾𑌪𑌾𑌂𑌗𑌾𑌲𑍋𑌕𑌂 𑌵𑌿𑌤𑌰 𑌤𑌰𑌸𑌾 𑌸𑌾𑌧𑍁𑌚𑌰𑌿𑌤𑍇
𑌨 𑌤𑍇 𑌯𑍁𑌕𑍍𑌤𑍋𑌪𑍇𑌕𑍍𑌷𑌾 𑌮𑌯𑌿 𑌶𑌰𑌣𑌦𑍀𑌕𑍍𑌷𑌾𑌮𑍁𑌪𑌗𑌤𑍇 ।
𑌨 𑌚𑍇𑌦𑌿𑌷𑍍𑌟𑌂 𑌦𑌦𑍍𑌯𑌾𑌦𑌨𑍁𑌪𑌦𑌮𑌹𑍋 𑌕𑌲𑍍𑌪𑌲𑌤𑌿𑌕𑌾
𑌵𑌿𑌶𑍇𑌷𑌃 𑌸𑌾𑌮𑌾𑌨𑍍𑌯𑍈𑌃 𑌕𑌥𑌮𑌿𑌤𑌰𑌵𑌲𑍍𑌲𑍀𑌪𑌰𑌿𑌕𑌰𑍈𑌃 ॥ 10॥

𑌮𑌹𑌾𑌂𑌤𑌂 𑌵𑌿𑌶𑍍𑌵𑌾𑌸𑌂 𑌤𑌵 𑌚𑌰𑌣𑌪𑌂𑌕𑍇𑌰𑍁𑌹𑌯𑍁𑌗𑍇
𑌨𑌿𑌧𑌾𑌯𑌾𑌨𑍍𑌯𑌨𑍍𑌨𑍈𑌵𑌾𑌶𑍍𑌰𑌿𑌤𑌮𑌿𑌹 𑌮𑌯𑌾 𑌦𑍈𑌵𑌤𑌮𑍁𑌮𑍇 ।
𑌤𑌥𑌾𑌪𑌿 𑌤𑍍𑌵𑌚𑍍𑌚𑍇𑌤𑍋 𑌯𑌦𑌿 𑌮𑌯𑌿 𑌨 𑌜𑌾𑌯𑍇𑌤 𑌸𑌦𑌯𑌂
𑌨𑌿𑌰𑌾𑌲𑌂𑌬𑍋 𑌲𑌂𑌬𑍋𑌦𑌰𑌜𑌨𑌨𑌿 𑌕𑌂 𑌯𑌾𑌮𑌿 𑌶𑌰𑌣𑌮𑍍 ॥ 11॥

𑌅𑌯𑌃 𑌸𑍍𑌪𑌰𑍍𑌶𑍇 𑌲𑌗𑍍𑌨𑌂 𑌸𑌪𑌦𑌿 𑌲𑌭𑌤𑍇 𑌹𑍇𑌮𑌪𑌦𑌵𑍀𑌂
𑌯𑌥𑌾 𑌰𑌥𑍍𑌯𑌾𑌪𑌾𑌥𑌃 𑌶𑍁𑌚𑌿 𑌭𑌵𑌤𑌿 𑌗𑌂𑌗𑍌𑌘𑌮𑌿𑌲𑌿𑌤𑌮𑍍 ।
𑌤𑌥𑌾 𑌤𑌤𑍍𑌤𑌤𑍍𑌪𑌾𑌪𑍈𑌰𑌤𑌿𑌮𑌲𑌿𑌨𑌮𑌂𑌤𑌰𑍍𑌮𑌮 𑌯𑌦𑌿
𑌤𑍍𑌵𑌯𑌿 𑌪𑍍𑌰𑍇𑌮𑍍𑌣𑌾𑌸𑌕𑍍𑌤𑌂 𑌕𑌥𑌮𑌿𑌵 𑌨 𑌜𑌾𑌯𑍇𑌤 𑌵𑌿𑌮𑌲𑌮𑍍 ॥ 12॥

𑌤𑍍𑌵𑌦𑌨𑍍𑌯𑌸𑍍𑌮𑌾𑌦𑌿𑌚𑍍𑌛𑌾𑌵𑌿𑌷𑌯𑌫𑌲𑌲𑌾𑌭𑍇 𑌨 𑌨𑌿𑌯𑌮𑌃
𑌤𑍍𑌵𑌮𑌰𑍍𑌥𑌾𑌨𑌾𑌮𑌿𑌚𑍍𑌛𑌾𑌧𑌿𑌕𑌮𑌪𑌿 𑌸𑌮𑌰𑍍𑌥𑌾 𑌵𑌿𑌤𑌰𑌣𑍇 ।
𑌇𑌤𑌿 𑌪𑍍𑌰𑌾𑌹𑍁𑌃 𑌪𑍍𑌰𑌾𑌂𑌚𑌃 𑌕𑌮𑌲𑌭𑌵𑌨𑌾𑌦𑍍𑌯𑌾𑌸𑍍𑌤𑍍𑌵𑌯𑌿 𑌮𑌨𑌃
𑌤𑍍𑌵𑌦𑌾𑌸𑌕𑍍𑌤𑌂 𑌨𑌕𑍍𑌤𑌂 𑌦𑌿𑌵𑌮𑍁𑌚𑌿𑌤𑌮𑍀𑌶𑌾𑌨𑌿 𑌕𑍁𑌰𑍁 𑌤𑌤𑍍 ॥ 13॥

𑌸𑍍𑌫𑍁𑌰𑌨𑍍𑌨𑌾𑌨𑌾𑌰𑌤𑍍𑌨𑌸𑍍𑌫𑌟𑌿𑌕𑌮𑌯𑌭𑌿𑌤𑍍𑌤𑌿𑌪𑍍𑌰𑌤𑌿𑌫𑌲
𑌤𑍍𑌤𑍍𑌵𑌦𑌾𑌕𑌾𑌰𑌂 𑌚𑌂𑌚𑌚𑍍𑌛𑌶𑌧𑌰𑌕𑌲𑌾𑌸𑍌𑌧𑌶𑌿𑌖𑌰𑌮𑍍 ।
𑌮𑍁𑌕𑍁𑌂𑌦𑌬𑍍𑌰𑌹𑍍𑌮𑍇𑌂𑌦𑍍𑌰𑌪𑍍𑌰𑌭𑍃𑌤𑌿𑌪𑌰𑌿𑌵𑌾𑌰𑌂 𑌵𑌿𑌜𑌯𑌤𑍇
𑌤𑌵𑌾𑌗𑌾𑌰𑌂 𑌰𑌮𑍍𑌯𑌂 𑌤𑍍𑌰𑌿𑌭𑍁𑌵𑌨𑌮𑌹𑌾𑌰𑌾𑌜𑌗𑍃𑌹𑌿𑌣𑌿 ॥ 14॥

𑌨𑌿𑌵𑌾𑌸𑌃 𑌕𑍈𑌲𑌾𑌸𑍇 𑌵𑌿𑌧𑌿𑌶𑌤𑌮𑌖𑌾𑌦𑍍𑌯𑌾𑌃 𑌸𑍍𑌤𑍁𑌤𑌿𑌕𑌰𑌾𑌃
𑌕𑍁𑌟𑍁𑌂𑌬𑌂 𑌤𑍍𑌰𑍈𑌲𑍋𑌕𑍍𑌯𑌂 𑌕𑍃𑌤𑌕𑌰𑌪𑍁𑌟𑌃 𑌸𑌿𑌦𑍍𑌧𑌿𑌨𑌿𑌕𑌰𑌃 ।
𑌮𑌹𑍇𑌶𑌃 𑌪𑍍𑌰𑌾𑌣𑍇𑌶𑌸𑍍𑌤𑌦𑌵𑌨𑌿𑌧𑌰𑌾𑌧𑍀𑌶𑌤𑌨𑌯𑍇
𑌨 𑌤𑍇 𑌸𑍌𑌭𑌾𑌗𑍍𑌯𑌸𑍍𑌯 𑌕𑍍𑌵𑌚𑌿𑌦𑌪𑌿 𑌮𑌨𑌾𑌗𑌸𑍍𑌤𑌿 𑌤𑍁𑌲𑌨𑌾 ॥ 15॥

𑌵𑍃𑌷𑍋 𑌵𑍃𑌦𑍍𑌧𑍋 𑌯𑌾𑌨𑌂 𑌵𑌿𑌷𑌮𑌶𑌨𑌮𑌾𑌶𑌾 𑌨𑌿𑌵𑌸𑌨𑌂
𑌶𑍍𑌮𑌶𑌾𑌨𑌂 𑌕𑍍𑌰𑍀𑌡𑌾𑌭𑍂𑌰𑍍𑌭𑍁𑌜𑌗𑌨𑌿𑌵𑌹𑍋 𑌭𑍂𑌷𑌣𑌵𑌿𑌧𑌿𑌃
𑌸𑌮𑌗𑍍𑌰𑌾 𑌸𑌾𑌮𑌗𑍍𑌰𑍀 𑌜𑌗𑌤𑌿 𑌵𑌿𑌦𑌿𑌤𑍈𑌵 𑌸𑍍𑌮𑌰𑌰𑌿𑌪𑍋𑌃
𑌯𑌦𑍇𑌤𑌸𑍍𑌯𑍈𑌶𑍍𑌵𑌰𑍍𑌯𑌂 𑌤𑌵 𑌜𑌨𑌨𑌿 𑌸𑍌𑌭𑌾𑌗𑍍𑌯𑌮𑌹𑌿𑌮𑌾 ॥ 16॥

𑌅𑌶𑍇𑌷𑌬𑍍𑌰𑌹𑍍𑌮𑌾𑌂𑌡𑌪𑍍𑌰𑌲𑌯𑌵𑌿𑌧𑌿𑌨𑍈𑌸𑌰𑍍𑌗𑌿𑌕𑌮𑌤𑌿𑌃
𑌶𑍍𑌮𑌶𑌾𑌨𑍇𑌷𑍍𑌵𑌾𑌸𑍀𑌨𑌃 𑌕𑍃𑌤𑌭𑌸𑌿𑌤𑌲𑍇𑌪𑌃 𑌪𑌶𑍁𑌪𑌤𑌿𑌃 ।
𑌦𑌧𑍌 𑌕𑌂𑌠𑍇 𑌹𑌾𑌲𑌾𑌹𑌲𑌮𑌖𑌿𑌲𑌭𑍂𑌗𑍋𑌲𑌕𑍃𑌪𑌯𑌾
𑌭𑌵𑌤𑍍𑌯𑌾𑌃 𑌸𑌂𑌗𑌤𑍍𑌯𑌾𑌃 𑌫𑌲𑌮𑌿𑌤𑌿 𑌚 𑌕𑌲𑍍𑌯𑌾𑌣𑌿 𑌕𑌲𑌯𑍇 ॥ 1𑍭॥

𑌤𑍍𑌵𑌦𑍀𑌯𑌂 𑌸𑍌𑌂𑌦𑌰𑍍𑌯𑌂 𑌨𑌿𑌰𑌤𑌿𑌶𑌯𑌮𑌾𑌲𑍋𑌕𑍍𑌯 𑌪𑌰𑌯𑌾
𑌭𑌿𑌯𑍈𑌵𑌾𑌸𑍀𑌦𑍍𑌗𑌂𑌗𑌾 𑌜𑌲𑌮𑌯𑌤𑌨𑍁𑌃 𑌶𑍈𑌲𑌤𑌨𑌯𑍇 ।
𑌤𑌦𑍇𑌤𑌸𑍍𑌯𑌾𑌸𑍍𑌤𑌸𑍍𑌮𑌾𑌦𑍍𑌵𑌦𑌨𑌕𑌮𑌲𑌂 𑌵𑍀𑌕𑍍𑌷𑍍𑌯 𑌕𑍃𑌪𑌯𑌾
𑌪𑍍𑌰𑌤𑌿𑌷𑍍𑌠𑌾𑌮𑌾𑌤𑌨𑍍𑌵𑌨𑍍𑌨𑌿𑌜𑌶𑌿𑌰𑌸𑌿𑌵𑌾𑌸𑍇𑌨 𑌗𑌿𑌰𑌿𑌶𑌃 ॥ 1𑍮॥

𑌵𑌿𑌶𑌾𑌲𑌶𑍍𑌰𑍀𑌖𑌂𑌡𑌦𑍍𑌰𑌵𑌮𑍃𑌗𑌮𑌦𑌾𑌕𑍀𑌰𑍍𑌣𑌘𑍁𑌸𑍃𑌣
𑌪𑍍𑌰𑌸𑍂𑌨𑌵𑍍𑌯𑌾𑌮𑌿𑌶𑍍𑌰𑌂 𑌭𑌗𑌵𑌤𑌿 𑌤𑌵𑌾𑌭𑍍𑌯𑌂𑌗𑌸𑌲𑌿𑌲𑌮𑍍 ।
𑌸𑌮𑌾𑌦𑌾𑌯 𑌸𑍍𑌰𑌷𑍍𑌟𑌾 𑌚𑌲𑌿𑌤𑌪𑌦𑌪𑌾𑌂𑌸𑍂𑌨𑍍𑌨𑌿𑌜𑌕𑌰𑍈𑌃
𑌸𑌮𑌾𑌧𑌤𑍍𑌤𑍇 𑌸𑍃𑌷𑍍𑌟𑌿𑌂 𑌵𑌿𑌬𑍁𑌧𑌪𑍁𑌰𑌪𑌂𑌕𑍇𑌰𑍁𑌹𑌦𑍃𑌶𑌾𑌮𑍍 ॥ 1𑍯॥

𑌵𑌸𑌂𑌤𑍇 𑌸𑌾𑌨𑌂𑌦𑍇 𑌕𑍁𑌸𑍁𑌮𑌿𑌤𑌲𑌤𑌾𑌭𑌿𑌃 𑌪𑌰𑌿𑌵𑍃𑌤𑍇
𑌸𑍍𑌫𑍁𑌰𑌨𑍍𑌨𑌾𑌨𑌾𑌪𑌦𑍍𑌮𑍇 𑌸𑌰𑌸𑌿 𑌕𑌲𑌹𑌂𑌸𑌾𑌲𑌿𑌸𑍁𑌭𑌗𑍇 ।
𑌸𑌖𑍀𑌭𑌿𑌃 𑌖𑍇𑌲𑌂𑌤𑍀𑌂 𑌮𑌲𑌯𑌪𑌵𑌨𑌾𑌂𑌦𑍋𑌲𑌿𑌤𑌜𑌲𑍇
𑌸𑍍𑌮𑌰𑍇𑌦𑍍𑌯𑌸𑍍𑌤𑍍𑌵𑌾𑌂 𑌤𑌸𑍍𑌯 𑌜𑍍𑌵𑌰𑌜𑌨𑌿𑌤𑌪𑍀𑌡𑌾𑌪𑌸𑌰𑌤𑌿 ॥ 20॥

॥ 𑌇𑌤𑌿 𑌶𑍍𑌰𑍀𑌮𑌚𑍍𑌛𑌂𑌕𑌰𑌾𑌚𑌾𑌰𑍍𑌯𑌵𑌿𑌰𑌚𑌿𑌤𑌾 𑌆𑌨𑌂𑌦𑌲𑌹𑌰𑍀 𑌸𑌂𑌪𑍂𑌰𑍍𑌣𑌾 ॥