𑌅𑌮𑍃𑌤 𑌸𑌂𑌜𑍀𑌵𑌨𑌿 𑌧𑌨𑍍𑌵𑌂𑌤𑌰𑍀 𑌸𑍍𑌤𑍋𑌤𑍍𑌰𑌮𑍍

𑌅𑌥𑌾𑌪𑌰𑌮𑌹𑌂 𑌵𑌕𑍍𑌷𑍍𑌯𑍇𑌽𑌮𑍃𑌤𑌸𑌂𑌜𑍀𑌵𑌨𑌂 𑌸𑍍𑌤𑌵𑌮𑍍 ।
𑌯𑌸𑍍𑌯𑌾𑌨𑍁𑌷𑍍𑌠𑌾𑌨𑌮𑌾𑌤𑍍𑌰𑍇𑌣 𑌮𑍃𑌤𑍍𑌯𑍁𑌰𑍍𑌦𑍂𑌰𑌾𑌤𑍍𑌪𑌲𑌾𑌯𑌤𑍇 ॥ 1 ॥

𑌅𑌸𑌾𑌧𑍍𑌯𑌾𑌃 𑌕𑌷𑍍𑌟𑌸𑌾𑌧𑍍𑌯𑌾𑌶𑍍𑌚 𑌮𑌹𑌾𑌰𑍋𑌗𑌾 𑌭𑌯𑌂𑌕𑌰𑌾𑌃 ।
𑌶𑍀𑌘𑍍𑌰𑌂 𑌨𑌶𑍍𑌯𑌂𑌤𑌿 𑌪𑌠𑌨𑌾𑌦𑌸𑍍𑌯𑌾𑌯𑍁𑌶𑍍𑌚 𑌪𑍍𑌰𑌵𑌰𑍍𑌧𑌤𑍇 ॥ 2 ॥

𑌶𑌾𑌕𑌿𑌨𑍀𑌡𑌾𑌕𑌿𑌨𑍀𑌦𑍋𑌷𑌾𑌃 𑌕𑍁𑌦𑍃𑌷𑍍𑌟𑌿𑌗𑍍𑌰𑌹𑌶𑌤𑍍𑌰𑍁𑌜𑌾𑌃 ।
𑌪𑍍𑌰𑍇𑌤𑌵𑍇𑌤𑌾𑌲𑌯𑌕𑍍𑌷𑍋𑌤𑍍𑌥𑌾 𑌬𑌾𑌧𑌾 𑌨𑌶𑍍𑌯𑌂𑌤𑌿 𑌚𑌾𑌖𑌿𑌲𑌾𑌃 ॥ 3 ॥

𑌦𑍁𑌰𑌿𑌤𑌾𑌨𑌿 𑌸𑌮𑌸𑍍𑌤𑌾𑌨𑌿 𑌨𑌾𑌨𑌾𑌜𑌨𑍍𑌮𑍋𑌦𑍍𑌭𑌵𑌾𑌨𑌿 𑌚 ।
𑌸𑌂𑌸𑌰𑍍𑌗𑌜𑌵𑌿𑌕𑌾𑌰𑌾𑌣𑌿 𑌵𑌿𑌲𑍀𑌯𑌂𑌤𑍇𑌽𑌸𑍍𑌯 𑌪𑌾𑌠𑌤𑌃 ॥ 4 ॥

𑌸𑌰𑍍𑌵𑍋𑌪𑌦𑍍𑌰𑌵𑌨𑌾𑌶𑌾𑌯 𑌸𑌰𑍍𑌵𑌬𑌾𑌧𑌾𑌪𑍍𑌰𑌶𑌾𑌂𑌤𑌯𑍇 ।
𑌆𑌯𑍁𑌃 𑌪𑍍𑌰𑌵𑍃𑌦𑍍𑌧𑌯𑍇 𑌚𑍈𑌤𑌤𑍍 𑌸𑍍𑌤𑍋𑌤𑍍𑌰𑌂 𑌪𑌰𑌮𑌮𑌦𑍍𑌭𑍁𑌤𑌮𑍍 ॥ 5 ॥

𑌬𑌾𑌲𑌗𑍍𑌰𑌹𑌾𑌭𑌿𑌭𑍂𑌤𑌾𑌨𑌾𑌂 𑌬𑌾𑌲𑌾𑌨𑌾𑌂 𑌸𑍁𑌖𑌦𑌾𑌯𑌕𑌮𑍍 ।
𑌸𑌰𑍍𑌵𑌾𑌰𑌿𑌷𑍍𑌟𑌹𑌰𑌂 𑌚𑍈𑌤𑌦𑍍𑌬𑌲𑌪𑍁𑌷𑍍𑌟𑌿𑌕𑌰𑌂 𑌪𑌰𑌮𑍍 ॥ 6 ॥

𑌬𑌾𑌲𑌾𑌨𑌾𑌂 𑌜𑍀𑌵𑌨𑌾𑌯𑍈𑌤𑌤𑍍 𑌸𑍍𑌤𑍋𑌤𑍍𑌰𑌂 𑌦𑌿𑌵𑍍𑌯𑌂 𑌸𑍁𑌧𑍋𑌪𑌮𑌮𑍍 ।
𑌮𑍃𑌤𑌵𑌤𑍍𑌸𑌤𑍍𑌵𑌹𑌰𑌣𑌂 𑌚𑌿𑌰𑌂𑌜𑍀𑌵𑌿𑌤𑍍𑌵𑌕𑌾𑌰𑌕𑌮𑍍 ॥ 𑍭 ॥

𑌮𑌹𑌾𑌰𑍋𑌗𑌾𑌭𑌿𑌭𑍂𑌤𑌾𑌨𑌾𑌂 𑌭𑌯𑌵𑍍𑌯𑌾𑌕𑍁𑌲𑌿𑌤𑌾𑌤𑍍𑌮𑌨𑌾𑌮𑍍 ।
𑌸𑌰𑍍𑌵𑌾𑌧𑌿𑌵𑍍𑌯𑌾𑌧𑌿𑌹𑌰𑌣𑌂 𑌭𑌯𑌘𑍍𑌨𑌮𑌮𑍃𑌤𑍋𑌪𑌮𑌮𑍍 ॥ 𑍮 ॥

𑌅𑌲𑍍𑌪𑌮𑍃𑌤𑍍𑌯𑍁𑌶𑍍𑌚𑌾𑌪𑌮𑍃𑌤𑍍𑌯𑍁𑌃 𑌪𑌾𑌠𑌾𑌦𑌸𑍍𑌯𑌃 𑌪𑍍𑌰𑌣𑌶𑍍𑌯𑌤𑌿 ।
𑌜𑌲𑌾𑌽𑌗𑍍𑌨𑌿𑌵𑌿𑌷𑌶𑌸𑍍𑌤𑍍𑌰𑌾𑌰𑌿 𑌨 𑌹𑌿 𑌶𑍃𑌂𑌗𑌿 𑌭𑌯𑌂 𑌤𑌥𑌾 ॥ 𑍯 ॥

𑌗𑌰𑍍𑌭𑌰𑌕𑍍𑌷𑌾𑌕𑌰𑌂 𑌸𑍍𑌤𑍍𑌰𑍀𑌣𑌾𑌂 𑌬𑌾𑌲𑌾𑌨𑌾𑌂 𑌜𑍀𑌵𑌨𑌪𑍍𑌰𑌦𑌮𑍍 ।
𑌮𑌹𑌾𑌰𑍋𑌗𑌹𑌰𑌂 𑌨𑍄𑌣𑌾𑌮𑌲𑍍𑌪𑌮𑍃𑌤𑍍𑌯𑍁𑌹𑌰𑌂 𑌪𑌰𑌮𑍍 ॥ 10 ॥

𑌬𑌾𑌲𑌾 𑌵𑍃𑌦𑍍𑌧𑌾𑌶𑍍𑌚 𑌤𑌰𑍁𑌣𑌾 𑌨𑌰𑌾 𑌨𑌾𑌰𑍍𑌯𑌶𑍍𑌚 𑌦𑍁𑌃𑌖𑌿𑌤𑌾𑌃 ।
𑌭𑌵𑌂𑌤𑌿 𑌸𑍁𑌖𑌿𑌨𑌃 𑌪𑌾𑌠𑌾𑌦𑌸𑍍𑌯 𑌲𑍋𑌕𑍇 𑌚𑌿𑌰𑌾𑌯𑍁𑌷𑌃 ॥ 11 ॥

𑌅𑌸𑍍𑌮𑌾𑌤𑍍𑌪𑌰𑌤𑌰𑌂 𑌨𑌾𑌸𑍍𑌤𑌿 𑌜𑍀𑌵𑌨𑍋𑌪𑌾𑌯 𑌐𑌹𑌿𑌕𑌃 ।
𑌤𑌸𑍍𑌮𑌾𑌤𑍍 𑌸𑌰𑍍𑌵𑌪𑍍𑌰𑌯𑌤𑍍𑌨𑍇𑌨 𑌪𑌾𑌠𑌮𑌸𑍍𑌯 𑌸𑌮𑌾𑌚𑌰𑍇𑌤𑍍 ॥ 12 ॥

𑌅𑌯𑍁𑌤𑌾𑌵𑍃𑌤𑍍𑌤𑌿𑌕𑌂 𑌵𑌾𑌥 𑌸𑌹𑌸𑍍𑌰𑌾𑌵𑍃𑌤𑍍𑌤𑌿𑌕𑌂 𑌤𑌥𑌾 ।
𑌤𑌦𑌰𑍍𑌧𑌂 𑌵𑌾 𑌤𑌦𑌰𑍍𑌧𑌂 𑌵𑌾 𑌪𑌠𑍇𑌦𑍇𑌤𑌚𑍍𑌚 𑌭𑌕𑍍𑌤𑌿𑌤𑌃 ॥ 13 ॥

𑌕𑌲𑌶𑍇 𑌵𑌿𑌷𑍍𑌣𑍁𑌮𑌾𑌰𑌾𑌧𑍍𑌯 𑌦𑍀𑌪𑌂 𑌪𑍍𑌰𑌜𑍍𑌵𑌾𑌲𑍍𑌯 𑌯𑌤𑍍𑌨𑌤𑌃 ।
𑌸𑌾𑌯𑌂 𑌪𑍍𑌰𑌾𑌤𑌶𑍍𑌚 𑌵𑌿𑌧𑌿𑌵𑌤𑍍 𑌸𑍍𑌤𑍋𑌤𑍍𑌰𑌮𑍇𑌤𑌤𑍍 𑌪𑌠𑍇𑌤𑍍 𑌸𑍁𑌧𑍀𑌃 ॥ 14 ॥

𑌸𑌰𑍍𑌪𑌿𑌷𑌾 𑌹𑌵𑌿𑌷𑌾 𑌵𑌾𑌽𑌪𑌿 𑌸𑌂𑌯𑌾𑌵𑍇𑌨𑌾𑌥 𑌭𑌕𑍍𑌤𑌿𑌤𑌃 ।
𑌦𑌶𑌾𑌂𑌶𑌮𑌾𑌨𑌤𑍋 𑌹𑍋𑌮𑌂 𑌕𑍁𑌰𑍍𑌯𑌾𑌤𑍍 𑌸𑌰𑍍𑌵𑌾𑌰𑍍𑌥𑌸𑌿𑌦𑍍𑌧𑌯𑍇 ॥ 15 ॥

𑌅𑌥 𑌸𑍍𑌤𑍋𑌤𑍍𑌰𑌮𑍍
𑌨𑌮𑍋 𑌨𑌮𑍋 𑌵𑌿𑌶𑍍𑌵𑌵𑌿𑌭𑌾𑌵𑌨𑌾𑌯
𑌨𑌮𑍋 𑌨𑌮𑍋 𑌲𑍋𑌕𑌸𑍁𑌖𑌪𑍍𑌰𑌦𑌾𑌯 ।
𑌨𑌮𑍋 𑌨𑌮𑍋 𑌵𑌿𑌶𑍍𑌵𑌸𑍃𑌜𑍇𑌶𑍍𑌵𑌰𑌾𑌯
𑌨𑌮𑍋 𑌨𑌮𑍋 𑌮𑍁𑌕𑍍𑌤𑌿𑌵𑌰𑌪𑍍𑌰𑌦𑌾𑌯 ॥ 1 ॥

𑌨𑌮𑍋 𑌨𑌮𑌸𑍍𑌤𑍇𑌽𑌖𑌿𑌲𑌲𑍋𑌕𑌪𑌾𑌯
𑌨𑌮𑍋 𑌨𑌮𑌸𑍍𑌤𑍇𑌽𑌖𑌿𑌲𑌕𑌾𑌮𑌦𑌾𑌯 ।
𑌨𑌮𑍋 𑌨𑌮𑌸𑍍𑌤𑍇𑌽𑌖𑌿𑌲𑌕𑌾𑌰𑌣𑌾𑌯
𑌨𑌮𑍋 𑌨𑌮𑌸𑍍𑌤𑍇𑌽𑌖𑌿𑌲𑌰𑌕𑍍𑌷𑌕𑌾𑌯 ॥ 2 ॥

𑌨𑌮𑍋 𑌨𑌮𑌸𑍍𑌤𑍇 𑌸𑌕𑌲𑌾𑌰𑍍𑌤𑌿𑌹𑌰𑍍𑌤𑍍𑌰𑍇
𑌨𑌮𑍋 𑌨𑌮𑌸𑍍𑌤𑍇 𑌵𑌿𑌰𑍁𑌜𑌃 𑌪𑍍𑌰𑌕𑌰𑍍𑌤𑍍𑌰𑍇 ।
𑌨𑌮𑍋 𑌨𑌮𑌸𑍍𑌤𑍇𑌽𑌖𑌿𑌲𑌵𑌿𑌶𑍍𑌵𑌧𑌰𑍍𑌤𑍍𑌰𑍇
𑌨𑌮𑍋 𑌨𑌮𑌸𑍍𑌤𑍇𑌽𑌖𑌿𑌲𑌲𑍋𑌕𑌭𑌰𑍍𑌤𑍍𑌰𑍇 ॥ 3 ॥

𑌸𑍃𑌷𑍍𑌟𑌂 𑌦𑍇𑌵 𑌚𑌰𑌾𑌚𑌰𑌂 𑌜𑌗𑌦𑌿𑌦𑌂 𑌬𑍍𑌰𑌹𑍍𑌮𑌸𑍍𑌵𑌰𑍂𑌪𑍇𑌣 𑌤𑍇
𑌸𑌰𑍍𑌵𑌂 𑌤𑌤𑍍𑌪𑌰𑌿𑌪𑌾𑌲𑍍𑌯𑌤𑍇 𑌜𑌗𑌦𑌿𑌦𑌂 𑌵𑌿𑌷𑍍𑌣𑍁𑌸𑍍𑌵𑌰𑍂𑌪𑍇𑌣 𑌤𑍇 ।
𑌵𑌿𑌶𑍍𑌵𑌂 𑌸𑌂𑌹𑍍𑌰𑌿𑌤𑌯𑍇 𑌤𑌦𑍇𑌵 𑌨𑌿𑌖𑌿𑌲𑌂 𑌰𑍁𑌦𑍍𑌰𑌸𑍍𑌵𑌰𑍂𑌪𑍇𑌣 𑌤𑍇
𑌸𑌂𑌸𑌿𑌚𑍍𑌯𑌾𑌮𑍃𑌤𑌶𑍀𑌕𑌰𑍈𑌰𑍍𑌹𑌰 𑌮𑌹𑌾𑌰𑌿𑌷𑍍𑌟𑌂 𑌚𑌿𑌰𑌂 𑌜𑍀𑌵𑌯 ॥ 4 ॥

𑌯𑍋 𑌧𑌨𑍍𑌵𑌂𑌤𑌰𑌿𑌸𑌂𑌜𑍍𑌞𑌯𑌾 𑌨𑌿𑌗𑌦𑌿𑌤𑌃 𑌕𑍍𑌷𑍀𑌰𑌾𑌬𑍍𑌧𑌿𑌤𑍋 𑌨𑌿𑌃𑌸𑍃𑌤𑍋
𑌹𑌸𑍍𑌤𑌾𑌭𑍍𑌯𑌾𑌂 𑌜𑌨𑌜𑍀𑌵𑌨𑌾𑌯 𑌕𑌲𑌶𑌂 𑌪𑍀𑌯𑍂𑌷𑌪𑍂𑌰𑍍𑌣𑌂 𑌦𑌧𑌤𑍍 ।
𑌆𑌯𑍁𑌰𑍍𑌵𑍇𑌦𑌮𑌰𑍀𑌰𑌚𑌜𑍍𑌜𑌨𑌰𑍁𑌜𑌾𑌂 𑌨𑌾𑌶𑌾𑌯 𑌸 𑌤𑍍𑌵𑌂 𑌮𑍁𑌦𑌾
𑌸𑌂𑌸𑌿𑌚𑍍𑌯𑌾𑌮𑍃𑌤𑌶𑍀𑌕𑌰𑍈𑌰𑍍𑌹𑌰 𑌮𑌹𑌾𑌰𑌿𑌷𑍍𑌟𑌂 𑌚𑌿𑌰𑌂 𑌜𑍀𑌵𑌯 ॥ 5 ॥

𑌸𑍍𑌤𑍍𑌰𑍀𑌰𑍂𑌪𑌂 𑌵𑌰𑌭𑍂𑌷𑌣𑌾𑌂𑌬𑌰𑌧𑌰𑌂 𑌤𑍍𑌰𑍈𑌲𑍋𑌕𑍍𑌯𑌸𑌮𑍍𑌮𑍋𑌹𑌨𑌂
𑌕𑍃𑌤𑍍𑌵𑌾 𑌪𑌾𑌯𑌯𑌤𑌿 𑌸𑍍𑌮 𑌯𑌃 𑌸𑍁𑌰𑌗𑌣𑌾𑌨𑍍 𑌪𑍀𑌯𑍂𑌷𑌮𑌤𑍍𑌯𑍁𑌤𑍍𑌤𑌮𑌮𑍍 ।
𑌚𑌕𑍍𑌰𑍇 𑌦𑍈𑌤𑍍𑌯𑌗𑌣𑌾𑌨𑍍 𑌸𑍁𑌧𑌾𑌵𑌿𑌰𑌹𑌿𑌤𑌾𑌨𑍍 𑌸𑌂𑌮𑍋𑌹𑍍𑌯 𑌸 𑌤𑍍𑌵𑌂 𑌮𑍁𑌦𑌾
𑌸𑌂𑌸𑌿𑌚𑍍𑌯𑌾𑌮𑍃𑌤𑌶𑍀𑌕𑌰𑍈𑌰𑍍𑌹𑌰 𑌮𑌹𑌾𑌰𑌿𑌷𑍍𑌟𑌂 𑌚𑌿𑌰𑌂 𑌜𑍀𑌵𑌯 ॥ 6 ॥

𑌚𑌾𑌕𑍍𑌷𑍁𑌷𑍋𑌦𑌧𑌿𑌸𑌂𑌪𑍍𑌲𑌾𑌵 𑌭𑍂𑌵𑍇𑌦𑌪 𑌝𑌷𑌾𑌕𑍃𑌤𑍇 ।
𑌸𑌿𑌂𑌚 𑌸𑌿𑌂𑌚𑌾𑌮𑍃𑌤𑌕𑌣𑍈𑌶𑍍𑌚𑌿𑌰𑌂 𑌜𑍀𑌵𑌯 𑌜𑍀𑌵𑌯 ॥ 𑍭 ॥

𑌪𑍃𑌷𑍍𑌠𑌮𑌂𑌦𑌰𑌨𑌿𑌰𑍍𑌘𑍂𑌰𑍍𑌣𑌨𑌿𑌦𑍍𑌰𑌾𑌕𑍍𑌷 𑌕𑌮𑌠𑌾𑌕𑍃𑌤𑍇 ।
𑌸𑌿𑌂𑌚 𑌸𑌿𑌂𑌚𑌾𑌮𑍃𑌤𑌕𑌣𑍈𑌶𑍍𑌚𑌿𑌰𑌂 𑌜𑍀𑌵𑌯 𑌜𑍀𑌵𑌯 ॥ 𑍮 ॥

𑌯𑌾𑌂𑌚𑌾𑌚𑍍𑌛𑌲𑌬𑌲𑌿𑌤𑍍𑌰𑌾𑌸𑌮𑍁𑌕𑍍𑌤𑌨𑌿𑌰𑍍𑌜𑌰 𑌵𑌾𑌮𑌨 ।
𑌸𑌿𑌂𑌚 𑌸𑌿𑌂𑌚𑌾𑌮𑍃𑌤𑌕𑌣𑍈𑌶𑍍𑌚𑌿𑌰𑌂 𑌜𑍀𑌵𑌯 𑌜𑍀𑌵𑌯 ॥ 𑍯 ॥

𑌧𑌰𑍋𑌦𑍍𑌧𑌾𑌰 𑌹𑌿𑌰𑌣𑍍𑌯𑌾𑌕𑍍𑌷𑌘𑌾𑌤 𑌕𑍍𑌰𑍋𑌡𑌾𑌕𑍃𑌤𑍇 𑌪𑍍𑌰𑌭𑍋 ।
𑌸𑌿𑌂𑌚 𑌸𑌿𑌂𑌚𑌾𑌮𑍃𑌤𑌕𑌣𑍈𑌶𑍍𑌚𑌿𑌰𑌂 𑌜𑍀𑌵𑌯 𑌜𑍀𑌵𑌯 ॥ 10 ॥

𑌭𑌕𑍍𑌤𑌤𑍍𑌰𑌾𑌸𑌵𑌿𑌨𑌾𑌶𑌾𑌤𑍍𑌤𑌚𑌂𑌡𑌤𑍍𑌵 𑌨𑍃𑌹𑌰𑍇 𑌵𑌿𑌭𑍋 ।
𑌸𑌿𑌂𑌚 𑌸𑌿𑌂𑌚𑌾𑌮𑍃𑌤𑌕𑌣𑍈𑌶𑍍𑌚𑌿𑌰𑌂 𑌜𑍀𑌵𑌯 𑌜𑍀𑌵𑌯 ॥ 11 ॥

𑌕𑍍𑌷𑌤𑍍𑌰𑌿𑌯𑌾𑌰𑌣𑍍𑌯𑌸𑌂𑌛𑍇𑌦𑌕𑍁𑌠𑌾𑌰𑌕𑌰𑌰𑍈𑌣𑍁𑌕 ।
𑌸𑌿𑌂𑌚 𑌸𑌿𑌂𑌚𑌾𑌮𑍃𑌤𑌕𑌣𑍈𑌶𑍍𑌚𑌿𑌰𑌂 𑌜𑍀𑌵𑌯 𑌜𑍀𑌵𑌯 ॥ 12 ॥

𑌰𑌕𑍍𑌷𑍋𑌰𑌾𑌜𑌪𑍍𑌰𑌤𑌾𑌪𑌾𑌬𑍍𑌧𑌿𑌶𑍋𑌷𑌣𑌾𑌶𑍁𑌗 𑌰𑌾𑌘𑌵 ।
𑌸𑌿𑌂𑌚 𑌸𑌿𑌂𑌚𑌾𑌮𑍃𑌤𑌕𑌣𑍈𑌶𑍍𑌚𑌿𑌰𑌂 𑌜𑍀𑌵𑌯 𑌜𑍀𑌵𑌯 ॥ 13 ॥

𑌭𑍂𑌭𑌾𑌰𑌾𑌸𑍁𑌰𑌸𑌂𑌦𑍋𑌹𑌕𑌾𑌲𑌾𑌗𑍍𑌨𑍇 𑌰𑍁𑌕𑍍𑌮𑌿𑌣𑍀𑌪𑌤𑍇 ।
𑌸𑌿𑌂𑌚 𑌸𑌿𑌂𑌚𑌾𑌮𑍃𑌤𑌕𑌣𑍈𑌶𑍍𑌚𑌿𑌰𑌂 𑌜𑍀𑌵𑌯 𑌜𑍀𑌵𑌯 ॥ 14 ॥

𑌵𑍇𑌦𑌮𑌾𑌰𑍍𑌗𑌰𑌤𑌾𑌨𑌰𑍍𑌹𑌵𑌿𑌭𑍍𑌰𑌾𑌂𑌤𑍍𑌯𑍈 𑌬𑍁𑌦𑍍𑌧𑌰𑍂𑌪𑌧𑍃𑌕𑍍 ।
𑌸𑌿𑌂𑌚 𑌸𑌿𑌂𑌚𑌾𑌮𑍃𑌤𑌕𑌣𑍈𑌶𑍍𑌚𑌿𑌰𑌂 𑌜𑍀𑌵𑌯 𑌜𑍀𑌵𑌯 ॥ 15 ॥

𑌕𑌲𑌿𑌵𑌰𑍍𑌣𑌾𑌶𑍍𑌰𑌮𑌾𑌸𑍍𑌪𑌷𑍍𑌟𑌧𑌰𑍍𑌮𑌰𑍍𑌧𑍍𑌯𑍈 𑌕𑌲𑍍𑌕𑌿𑌰𑍂𑌪𑌭𑌾𑌕𑍍 ।
𑌸𑌿𑌂𑌚 𑌸𑌿𑌂𑌚𑌾𑌮𑍃𑌤𑌕𑌣𑍈𑌶𑍍𑌚𑌿𑌰𑌂 𑌜𑍀𑌵𑌯 𑌜𑍀𑌵𑌯 ॥ 16 ॥

𑌅𑌸𑌾𑌧𑍍𑌯𑌾𑌃 𑌕𑌷𑍍𑌟𑌸𑌾𑌧𑍍𑌯𑌾 𑌯𑍇 𑌮𑌹𑌾𑌰𑍋𑌗𑌾 𑌭𑌯𑌂𑌕𑌰𑌾𑌃 ।
𑌛𑌿𑌂𑌧𑌿 𑌤𑌾𑌨𑌾𑌶𑍁 𑌚𑌕𑍍𑌰𑍇𑌣 𑌚𑌿𑌰𑌂 𑌜𑍀𑌵𑌯 𑌜𑍀𑌵𑌯 ॥ 1𑍭 ॥

𑌅𑌲𑍍𑌪𑌮𑍃𑌤𑍍𑌯𑍁𑌂 𑌚𑌾𑌪𑌮𑍃𑌤𑍍𑌯𑍁𑌂 𑌮𑌹𑍋𑌤𑍍𑌪𑌾𑌤𑌾𑌨𑍁𑌪𑌦𑍍𑌰𑌵𑌾𑌨𑍍 ।
𑌭𑌿𑌂𑌧𑌿 𑌭𑌿𑌂𑌧𑌿 𑌗𑌦𑌾𑌘𑌾𑌤𑍈𑌶𑍍𑌚𑌿𑌰𑌂 𑌜𑍀𑌵𑌯 𑌜𑍀𑌵𑌯 ॥ 1𑍮 ॥

𑌅𑌹𑌂 𑌨 𑌜𑌾𑌨𑍇 𑌕𑌿𑌮𑌪𑌿 𑌤𑍍𑌵𑌦𑌨𑍍𑌯𑌤𑍍
𑌸𑌮𑌾𑌶𑍍𑌰𑌯𑍇 𑌨𑌾𑌥 𑌪𑌦𑌾𑌂𑌬𑍁𑌜𑌂 𑌤𑍇 ।
𑌕𑍁𑌰𑍁𑌷𑍍𑌵 𑌤𑌦𑍍𑌯𑌨𑍍𑌮𑌨𑌸𑍀𑌪𑍍𑌸𑌿𑌤𑌂 𑌤𑍇
𑌸𑍁𑌕𑌰𑍍𑌮𑌣𑌾 𑌕𑍇𑌨 𑌸𑌮𑌕𑍍𑌷𑌮𑍀𑌯𑌾𑌮𑍍 ॥ 1𑍯 ॥

𑌤𑍍𑌵𑌮𑍇𑌵 𑌤𑌾𑌤𑍋 𑌜𑌨𑌨𑍀 𑌤𑍍𑌵𑌮𑍇𑌵
𑌤𑍍𑌵𑌮𑍇𑌵 𑌨𑌾𑌥𑌶𑍍𑌚 𑌤𑍍𑌵𑌮𑍇𑌵 𑌬𑌂𑌧𑍁𑌃 ।
𑌵𑌿𑌦𑍍𑌯𑌾𑌧𑌨𑌾𑌗𑌾𑌰𑌕𑍁𑌲𑌂 𑌤𑍍𑌵𑌮𑍇𑌵
𑌤𑍍𑌵𑌮𑍇𑌵 𑌸𑌰𑍍𑌵𑌂 𑌮𑌮 𑌦𑍇𑌵𑌦𑍇𑌵 ॥ 20 ॥

𑌨 𑌮𑍇𑌽𑌪𑌰𑌾𑌧𑌂 𑌪𑍍𑌰𑌵𑌿𑌲𑍋𑌕𑌯 𑌪𑍍𑌰𑌭𑍋-
-𑌽𑌪𑌰𑌾𑌧𑌸𑌿𑌂𑌧𑍋𑌶𑍍𑌚 𑌦𑌯𑌾𑌨𑌿𑌧𑌿𑌸𑍍𑌤𑍍𑌵𑌮𑍍 ।
𑌤𑌾𑌤𑍇𑌨 𑌦𑍁𑌷𑍍𑌟𑍋𑌽𑌪𑌿 𑌸𑍁𑌤𑌃 𑌸𑍁𑌰𑌕𑍍𑌷𑌤𑍇
𑌦𑌯𑌾𑌲𑍁𑌤𑌾 𑌤𑍇𑌽𑌵𑌤𑍁 𑌸𑌰𑍍𑌵𑌦𑌾𑌽𑌸𑍍𑌮𑌾𑌨𑍍 ॥ 21 ॥

𑌅𑌹𑌹 𑌵𑌿𑌸𑍍𑌮𑌰 𑌨𑌾𑌥 𑌨 𑌮𑌾𑌂 𑌸𑌦𑌾
𑌕𑌰𑍁𑌣𑌯𑌾 𑌨𑌿𑌜𑌯𑌾 𑌪𑌰𑌿𑌪𑍂𑌰𑌿𑌤𑌃 ।
𑌭𑍁𑌵𑌿 𑌭𑌵𑌾𑌨𑍍 𑌯𑌦𑌿 𑌮𑍇 𑌨 𑌹𑌿 𑌰𑌕𑍍𑌷𑌕𑌃
𑌕𑌥𑌮𑌹𑍋 𑌮𑌮 𑌜𑍀𑌵𑌨𑌮𑌤𑍍𑌰 𑌵𑍈 ॥ 22 ॥

𑌦𑌹 𑌦𑌹 𑌕𑍃𑌪𑌯𑌾 𑌤𑍍𑌵𑌂 𑌵𑍍𑌯𑌾𑌧𑌿𑌜𑌾𑌲𑌂 𑌵𑌿𑌶𑌾𑌲𑌂
𑌹𑌰 𑌹𑌰 𑌕𑌰𑌵𑌾𑌲𑌂 𑌚𑌾𑌲𑍍𑌪𑌮𑍃𑌤𑍍𑌯𑍋𑌃 𑌕𑌰𑌾𑌲𑌮𑍍 ।
𑌨𑌿𑌜𑌜𑌨𑌪𑌰𑌿𑌪𑌾𑌲𑌂 𑌤𑍍𑌵𑌾𑌂 𑌭𑌜𑍇 𑌭𑌾𑌵𑌯𑌾𑌲𑌂
𑌕𑍁𑌰𑍁 𑌕𑍁𑌰𑍁 𑌬𑌹𑍁𑌕𑌾𑌲𑌂 𑌜𑍀𑌵𑌿𑌤𑌂 𑌮𑍇 𑌸𑌦𑌾𑌽𑌲𑌮𑍍 ॥ 23 ॥

𑌨 𑌯𑌤𑍍𑌰 𑌧𑌰𑍍𑌮𑌾𑌚𑌰𑌣𑌂 𑌨 𑌜𑌾𑌨𑌂
𑌵𑍍𑌰𑌤𑌂 𑌨 𑌯𑍋𑌗𑍋 𑌨 𑌚 𑌵𑌿𑌷𑍍𑌣𑍁𑌚𑌰𑍍𑌚𑌾 ।
𑌨 𑌪𑌿𑌤𑍃𑌗𑍋𑌵𑌿𑌪𑍍𑌰𑌵𑌰𑌾𑌮𑌰𑌾𑌰𑍍𑌚𑌾
𑌸𑍍𑌵𑌲𑍍𑌪𑌾𑌯𑍁𑌷𑌸𑍍𑌤𑌤𑍍𑌰 𑌜𑌨𑌾 𑌭𑌵𑌂𑌤𑌿 ॥ 24 ॥

𑌅𑌥 𑌮𑌂𑌤𑍍𑌰𑌮𑍍
𑌕𑍍𑌲𑍀𑌂 𑌶𑍍𑌰𑍀𑌂 𑌕𑍍𑌲𑍀𑌂 𑌶𑍍𑌰𑍀𑌂 𑌨𑌮𑍋 𑌭𑌗𑌵𑌤𑍇 𑌜𑌨𑌾𑌰𑍍𑌦𑌨𑌾𑌯 𑌸𑌕𑌲 𑌦𑍁𑌰𑌿𑌤𑌾𑌨𑌿 𑌨𑌾𑌶𑌯 𑌨𑌾𑌶𑌯 ।
𑌕𑍍𑌷𑍍𑌰𑍌𑌂 𑌆𑌰𑍋𑌗𑍍𑌯𑌂 𑌕𑍁𑌰𑍁 𑌕𑍁𑌰𑍁 । 𑌹𑍍𑌰𑍀𑌂 𑌦𑍀𑌰𑍍𑌘𑌮𑌾𑌯𑍁𑌰𑍍𑌦𑍇𑌹𑌿 𑌦𑍇𑌹𑌿 𑌸𑍍𑌵𑌾𑌹𑌾 ॥

𑌫𑌲𑌶𑍍𑌰𑍁𑌤𑌿𑌃
𑌅𑌸𑍍𑌯 𑌧𑌾𑌰𑌣𑌤𑍋 𑌜𑌾𑌪𑌾𑌦𑌲𑍍𑌪𑌮𑍃𑌤𑍍𑌯𑍁𑌃 𑌪𑍍𑌰𑌶𑌾𑌮𑍍𑌯𑌤𑌿 ।
𑌗𑌰𑍍𑌭𑌰𑌕𑍍𑌷𑌾𑌕𑌰𑌂 𑌸𑍍𑌤𑍍𑌰𑍀𑌣𑌾𑌂 𑌬𑌾𑌲𑌾𑌨𑌾𑌂 𑌜𑍀𑌵𑌨𑌂 𑌪𑌰𑌮𑍍 ॥ 1 ॥

𑌶𑌤𑌂 𑌪𑌂𑌚𑌾𑌶𑌤𑌂 𑌶𑌕𑍍𑌤𑍍𑌯𑌾𑌽𑌥𑌵𑌾 𑌪𑌂𑌚𑌾𑌧𑌿𑌵𑌿𑌂𑌶𑌤𑌿𑌮𑍍 ।
𑌪𑍁𑌸𑍍𑌤𑌕𑌾𑌨𑌾𑌂 𑌦𑍍𑌵𑌿𑌜𑍇𑌭𑍍𑌯𑌸𑍍𑌤𑍁 𑌦𑌦𑍍𑌯𑌾𑌦𑍍𑌦𑍀𑌰𑍍𑌘𑌾𑌯𑍁𑌷𑌾𑌪𑍍𑌤𑌯𑍇 ॥ 2 ॥

𑌭𑍂𑌰𑍍𑌜𑌪𑌤𑍍𑌰𑍇 𑌵𑌿𑌲𑌿𑌖𑍍𑌯𑍇𑌦𑌂 𑌕𑌂𑌠𑍇 𑌵𑌾 𑌬𑌾𑌹𑍁𑌮𑍂𑌲𑌕𑍇 ।
𑌸𑌂𑌧𑌾𑌰𑌯𑍇𑌦𑍍𑌗𑌰𑍍𑌭𑌰𑌕𑍍𑌷𑌾 𑌬𑌾𑌲𑌰𑌕𑍍𑌷𑌾 𑌚 𑌜𑌾𑌯𑌤𑍇 ॥ 3 ॥

𑌸𑌰𑍍𑌵𑍇 𑌰𑍋𑌗𑌾 𑌵𑌿𑌨𑌶𑍍𑌯𑌂𑌤𑌿 𑌸𑌰𑍍𑌵𑌾 𑌬𑌾𑌧𑌾𑌃 𑌪𑍍𑌰𑌶𑌾𑌮𑍍𑌯𑌤𑌿 ।
𑌕𑍁𑌦𑍃𑌷𑍍𑌟𑌿𑌜𑌂 𑌭𑌯𑌂 𑌨𑌶𑍍𑌯𑍇𑌤𑍍 𑌤𑌥𑌾 𑌪𑍍𑌰𑍇𑌤𑌾𑌦𑌿𑌜𑌂 𑌭𑌯𑌮𑍍 ॥ 4 ॥

𑌮𑌯𑌾 𑌕𑌥𑌿𑌤𑌮𑍇𑌤𑌤𑍍𑌤𑍇𑌽𑌮𑍃𑌤𑌸𑌂𑌜𑍀𑌵𑌨𑌂 𑌪𑌰𑌮𑍍 ।
𑌅𑌲𑍍𑌪𑌮𑍃𑌤𑍍𑌯𑍁𑌹𑌰𑌂 𑌸𑍍𑌤𑍋𑌤𑍍𑌰𑌂 𑌮𑍃𑌤𑌵𑌤𑍍𑌸𑌤𑍍𑌵𑌨𑌾𑌶𑌨𑌮𑍍 ॥ 5 ॥

𑌇𑌤𑌿 𑌸𑍁𑌦𑌰𑍍𑌶𑌨𑌸𑌂𑌹𑌿𑌤𑍋𑌕𑍍𑌤𑌂 𑌅𑌮𑍃𑌤𑌸𑌂𑌜𑍀𑌵𑌨 𑌧𑌨𑍍𑌵𑌂𑌤𑌰𑌿 𑌸𑍍𑌤𑍋𑌤𑍍𑌰𑌮𑍍 ॥