𑌆𑌦𑌿𑌤𑍍𑌯 𑌹𑍃𑌦𑌯𑌮𑍍

𑌧𑍍𑌯𑌾𑌨𑌮𑍍
𑌨𑌮𑌸𑍍𑌸𑌵𑌿𑌤𑍍𑌰𑍇 𑌜𑌗𑌦𑍇𑌕 𑌚𑌕𑍍𑌷𑍁𑌸𑍇
𑌜𑌗𑌤𑍍𑌪𑍍𑌰𑌸𑍂𑌤𑌿 𑌸𑍍𑌥𑌿𑌤𑌿 𑌨𑌾𑌶𑌹𑍇𑌤𑌵𑍇
𑌤𑍍𑌰𑌯𑍀𑌮𑌯𑌾𑌯 𑌤𑍍𑌰𑌿𑌗𑍁𑌣𑌾𑌤𑍍𑌮 𑌧𑌾𑌰𑌿𑌣𑍇
𑌵𑌿𑌰𑌿𑌂𑌚𑌿 𑌨𑌾𑌰𑌾𑌯𑌣 𑌶𑌂𑌕𑌰𑌾𑌤𑍍𑌮𑌨𑍇

𑌤𑌤𑍋 𑌯𑍁𑌦𑍍𑌧 𑌪𑌰𑌿𑌶𑍍𑌰𑌾𑌂𑌤𑌂 𑌸𑌮𑌰𑍇 𑌚𑌿𑌂𑌤𑌯𑌾𑌸𑍍𑌥𑌿𑌤𑌮𑍍 ।
𑌰𑌾𑌵𑌣𑌂 𑌚𑌾𑌗𑍍𑌰𑌤𑍋 𑌦𑍃𑌷𑍍𑌟𑍍𑌵𑌾 𑌯𑍁𑌦𑍍𑌧𑌾𑌯 𑌸𑌮𑍁𑌪𑌸𑍍𑌥𑌿𑌤𑌮𑍍 ॥ 1 ॥

𑌦𑍈𑌵𑌤𑍈𑌶𑍍𑌚 𑌸𑌮𑌾𑌗𑌮𑍍𑌯 𑌦𑍍𑌰𑌷𑍍𑌟𑍁𑌮𑌭𑍍𑌯𑌾𑌗𑌤𑍋 𑌰𑌣𑌮𑍍 ।
𑌉𑌪𑌾𑌗𑌮𑍍𑌯𑌾𑌬𑍍𑌰𑌵𑍀𑌦𑍍𑌰𑌾𑌮𑌂 𑌅𑌗𑌸𑍍𑌤𑍍𑌯𑍋 𑌭𑌗𑌵𑌾𑌨𑍍 𑌋𑌷𑌿𑌃 ॥ 2 ॥

𑌰𑌾𑌮 𑌰𑌾𑌮 𑌮𑌹𑌾𑌬𑌾𑌹𑍋 𑌶𑍃𑌣𑍁 𑌗𑍁𑌹𑍍𑌯𑌂 𑌸𑌨𑌾𑌤𑌨𑌮𑍍 ।
𑌯𑍇𑌨 𑌸𑌰𑍍𑌵𑌾𑌨𑌰𑍀𑌨𑍍 𑌵𑌤𑍍𑌸 𑌸𑌮𑌰𑍇 𑌵𑌿𑌜𑌯𑌿𑌷𑍍𑌯𑌸𑌿 ॥ 3 ॥

𑌆𑌦𑌿𑌤𑍍𑌯𑌹𑍃𑌦𑌯𑌂 𑌪𑍁𑌣𑍍𑌯𑌂 𑌸𑌰𑍍𑌵𑌶𑌤𑍍𑌰𑍁-𑌵𑌿𑌨𑌾𑌶𑌨𑌮𑍍 ।
𑌜𑌯𑌾𑌵𑌹𑌂 𑌜𑌪𑍇𑌨𑍍𑌨𑌿𑌤𑍍𑌯𑌂 𑌅𑌕𑍍𑌷𑌯𑍍𑌯𑌂 𑌪𑌰𑌮𑌂 𑌶𑌿𑌵𑌮𑍍 ॥ 4 ॥

𑌸𑌰𑍍𑌵𑌮𑌂𑌗𑌳-𑌮𑌾𑌂𑌗𑌳𑍍𑌯𑌂 𑌸𑌰𑍍𑌵𑌪𑌾𑌪-𑌪𑍍𑌰𑌣𑌾𑌶𑌨𑌮𑍍 ।
𑌚𑌿𑌂𑌤𑌾𑌶𑍋𑌕-𑌪𑍍𑌰𑌶𑌮𑌨𑌂 𑌆𑌯𑍁𑌰𑍍𑌵𑌰𑍍𑌧𑌨𑌮𑍁𑌤𑍍𑌤𑌮𑌮𑍍 ॥ 5 ॥

𑌰𑌶𑍍𑌮𑌿𑌮𑌂𑌤𑌂 𑌸𑌮𑍁𑌦𑍍𑌯𑌂𑌤𑌂 𑌦𑍇𑌵𑌾𑌸𑍁𑌰 𑌨𑌮𑌸𑍍𑌕𑍃𑌤𑌮𑍍 ।
𑌪𑍂𑌜𑌯𑌸𑍍𑌵 𑌵𑌿𑌵𑌸𑍍𑌵𑌂𑌤𑌂 𑌭𑌾𑌸𑍍𑌕𑌰𑌂 𑌭𑍁𑌵𑌨𑍇𑌶𑍍𑌵𑌰𑌮𑍍 ॥ 6 ॥

𑌸𑌰𑍍𑌵𑌦𑍇𑌵𑌾𑌤𑍍𑌮𑌕𑍋 𑌹𑍍𑌯𑍇𑌷 𑌤𑍇𑌜𑌸𑍍𑌵𑍀 𑌰𑌶𑍍𑌮𑌿𑌭𑌾𑌵𑌨𑌃 ।
𑌏𑌷 𑌦𑍇𑌵𑌾𑌸𑍁𑌰-𑌗𑌣𑌾𑌨𑍍 𑌲𑍋𑌕𑌾𑌨𑍍 𑌪𑌾𑌤𑌿 𑌗𑌭𑌸𑍍𑌤𑌿𑌭𑌿𑌃 ॥ 𑍭 ॥

𑌏𑌷 𑌬𑍍𑌰𑌹𑍍𑌮𑌾 𑌚 𑌵𑌿𑌷𑍍𑌣𑍁𑌶𑍍𑌚 𑌶𑌿𑌵𑌃 𑌸𑍍𑌕𑌂𑌦𑌃 𑌪𑍍𑌰𑌜𑌾𑌪𑌤𑌿𑌃 ।
𑌮𑌹𑍇𑌂𑌦𑍍𑌰𑍋 𑌧𑌨𑌦𑌃 𑌕𑌾𑌲𑍋 𑌯𑌮𑌃 𑌸𑍋𑌮𑍋 𑌹𑍍𑌯𑌪𑌾𑌂 𑌪𑌤𑌿𑌃 ॥ 𑍮 ॥

𑌪𑌿𑌤𑌰𑍋 𑌵𑌸𑌵𑌃 𑌸𑌾𑌧𑍍𑌯𑌾 𑌹𑍍𑌯𑌶𑍍𑌵𑌿𑌨𑍌 𑌮𑌰𑍁𑌤𑍋 𑌮𑌨𑍁𑌃 ।
𑌵𑌾𑌯𑍁𑌰𑍍𑌵𑌹𑍍𑌨𑌿𑌃 𑌪𑍍𑌰𑌜𑌾𑌪𑍍𑌰𑌾𑌣𑌃 𑌋𑌤𑍁𑌕𑌰𑍍𑌤𑌾 𑌪𑍍𑌰𑌭𑌾𑌕𑌰𑌃 ॥ 𑍯 ॥

𑌆𑌦𑌿𑌤𑍍𑌯𑌃 𑌸𑌵𑌿𑌤𑌾 𑌸𑍂𑌰𑍍𑌯𑌃 𑌖𑌗𑌃 𑌪𑍂𑌷𑌾 𑌗𑌭𑌸𑍍𑌤𑌿𑌮𑌾𑌨𑍍 ।
𑌸𑍁𑌵𑌰𑍍𑌣𑌸𑌦𑍃𑌶𑍋 𑌭𑌾𑌨𑍁𑌃 𑌹𑌿𑌰𑌣𑍍𑌯𑌰𑍇𑌤𑌾 𑌦𑌿𑌵𑌾𑌕𑌰𑌃 ॥ 10 ॥ [𑌸𑍍𑌵𑌰𑍍𑌣𑌰𑍇𑌤𑌾 𑌦𑌿𑌵𑌾𑌕𑌰𑌃]

𑌹𑌰𑌿𑌦𑌶𑍍𑌵𑌃 𑌸𑌹𑌸𑍍𑌰𑌾𑌰𑍍𑌚𑌿𑌃 𑌸𑌪𑍍𑌤𑌸𑌪𑍍𑌤𑌿-𑌰𑍍𑌮𑌰𑍀𑌚𑌿𑌮𑌾𑌨𑍍 ।
𑌤𑌿𑌮𑌿𑌰𑍋𑌨𑍍𑌮𑌥𑌨𑌃 𑌶𑌂𑌭𑍁𑌃 𑌤𑍍𑌵𑌷𑍍𑌟𑌾 𑌮𑌾𑌰𑍍𑌤𑌾𑌂𑌡𑌕𑍋𑌂𑌽𑌶𑍁𑌮𑌾𑌨𑍍 ॥ 11 ॥

𑌹𑌿𑌰𑌣𑍍𑌯𑌗𑌰𑍍𑌭𑌃 𑌶𑌿𑌶𑌿𑌰𑌃 𑌤𑌪𑌨𑍋 𑌭𑌾𑌸𑍍𑌕𑌰𑍋 𑌰𑌵𑌿𑌃 ।
𑌅𑌗𑍍𑌨𑌿𑌗𑌰𑍍𑌭𑍋𑌽𑌦𑌿𑌤𑍇𑌃 𑌪𑍁𑌤𑍍𑌰𑌃 𑌶𑌂𑌖𑌃 𑌶𑌿𑌶𑌿𑌰𑌨𑌾𑌶𑌨𑌃 ॥ 12 ॥

𑌵𑍍𑌯𑍋𑌮𑌨𑌾𑌥-𑌸𑍍𑌤𑌮𑍋𑌭𑍇𑌦𑍀 𑌋𑌗𑍍𑌯𑌜𑍁𑌃𑌸𑌾𑌮-𑌪𑌾𑌰𑌗𑌃 ।
𑌘𑌨𑌾𑌵𑍃𑌷𑍍𑌟𑌿𑌰𑌪𑌾𑌂 𑌮𑌿𑌤𑍍𑌰𑌃 𑌵𑌿𑌂𑌧𑍍𑌯𑌵𑍀𑌥𑍀 𑌪𑍍𑌲𑌵𑌂𑌗𑌮𑌃 ॥ 13 ॥

𑌆𑌤𑌪𑍀 𑌮𑌂𑌡𑌲𑍀 𑌮𑍃𑌤𑍍𑌯𑍁𑌃 𑌪𑌿𑌂𑌗𑌳𑌃 𑌸𑌰𑍍𑌵𑌤𑌾𑌪𑌨𑌃 ।
𑌕𑌵𑌿𑌰𑍍𑌵𑌿𑌶𑍍𑌵𑍋 𑌮𑌹𑌾𑌤𑍇𑌜𑌾 𑌰𑌕𑍍𑌤𑌃 𑌸𑌰𑍍𑌵𑌭𑌵𑍋𑌦𑍍𑌭𑌵𑌃 ॥ 14 ॥

𑌨𑌕𑍍𑌷𑌤𑍍𑌰 𑌗𑍍𑌰𑌹 𑌤𑌾𑌰𑌾𑌣𑌾𑌂 𑌅𑌧𑌿𑌪𑍋 𑌵𑌿𑌶𑍍𑌵𑌭𑌾𑌵𑌨𑌃 ।
𑌤𑍇𑌜𑌸𑌾𑌮𑌪𑌿 𑌤𑍇𑌜𑌸𑍍𑌵𑍀 𑌦𑍍𑌵𑌾𑌦𑌶𑌾𑌤𑍍𑌮-𑌨𑍍𑌨𑌮𑍋𑌽𑌸𑍍𑌤𑍁 𑌤𑍇 ॥ 15 ॥

𑌨𑌮𑌃 𑌪𑍂𑌰𑍍𑌵𑌾𑌯 𑌗𑌿𑌰𑌯𑍇 𑌪𑌶𑍍𑌚𑌿𑌮𑌾𑌯𑌾𑌦𑍍𑌰𑌯𑍇 𑌨𑌮𑌃 ।
𑌜𑍍𑌯𑍋𑌤𑌿𑌰𑍍𑌗𑌣𑌾𑌨𑌾𑌂 𑌪𑌤𑌯𑍇 𑌦𑌿𑌨𑌾𑌧𑌿𑌪𑌤𑌯𑍇 𑌨𑌮𑌃 ॥ 16 ॥

𑌜𑌯𑌾𑌯 𑌜𑌯𑌭𑌦𑍍𑌰𑌾𑌯 𑌹𑌰𑍍𑌯𑌶𑍍𑌵𑌾𑌯 𑌨𑌮𑍋 𑌨𑌮𑌃 ।
𑌨𑌮𑍋 𑌨𑌮𑌃 𑌸𑌹𑌸𑍍𑌰𑌾𑌂𑌶𑍋 𑌆𑌦𑌿𑌤𑍍𑌯𑌾𑌯 𑌨𑌮𑍋 𑌨𑌮𑌃 ॥ 1𑍭 ॥

𑌨𑌮 𑌉𑌗𑍍𑌰𑌾𑌯 𑌵𑍀𑌰𑌾𑌯 𑌸𑌾𑌰𑌂𑌗𑌾𑌯 𑌨𑌮𑍋 𑌨𑌮𑌃 ।
𑌨𑌮𑌃 𑌪𑌦𑍍𑌮𑌪𑍍𑌰𑌬𑍋𑌧𑌾𑌯 𑌮𑌾𑌰𑍍𑌤𑌾𑌂𑌡𑌾𑌯 𑌨𑌮𑍋 𑌨𑌮𑌃 ॥ 1𑍮 ॥

𑌬𑍍𑌰𑌹𑍍𑌮𑍇𑌶𑌾𑌨𑌾𑌚𑍍𑌯𑍁𑌤𑍇𑌶𑌾𑌯 𑌸𑍂𑌰𑍍𑌯𑌾𑌯𑌾𑌦𑌿𑌤𑍍𑌯-𑌵𑌰𑍍𑌚𑌸𑍇 ।
𑌭𑌾𑌸𑍍𑌵𑌤𑍇 𑌸𑌰𑍍𑌵𑌭𑌕𑍍𑌷𑌾𑌯 𑌰𑍌𑌦𑍍𑌰𑌾𑌯 𑌵𑌪𑍁𑌷𑍇 𑌨𑌮𑌃 ॥ 1𑍯 ॥

𑌤𑌮𑍋𑌘𑍍𑌨𑌾𑌯 𑌹𑌿𑌮𑌘𑍍𑌨𑌾𑌯 𑌶𑌤𑍍𑌰𑍁𑌘𑍍𑌨𑌾-𑌯𑌾𑌮𑌿𑌤𑌾𑌤𑍍𑌮𑌨𑍇 ।
𑌕𑍃𑌤𑌘𑍍𑌨𑌘𑍍𑌨𑌾𑌯 𑌦𑍇𑌵𑌾𑌯 𑌜𑍍𑌯𑍋𑌤𑌿𑌷𑌾𑌂 𑌪𑌤𑌯𑍇 𑌨𑌮𑌃 ॥ 20 ॥

𑌤𑌪𑍍𑌤 𑌚𑌾𑌮𑍀𑌕𑌰𑌾𑌭𑌾𑌯 𑌵𑌹𑍍𑌨𑌯𑍇 𑌵𑌿𑌶𑍍𑌵𑌕𑌰𑍍𑌮𑌣𑍇 ।
𑌨𑌮-𑌸𑍍𑌤𑌮𑍋𑌽𑌭𑌿𑌨𑌿𑌘𑍍𑌨𑌾𑌯 𑌰𑌵𑌯𑍇 𑌲𑍋𑌕𑌸𑌾𑌕𑍍𑌷𑌿𑌣𑍇 ॥ 21 ॥

𑌨𑌾𑌶𑌯𑌤𑍍𑌯𑍇𑌷 𑌵𑍈 𑌭𑍂𑌤𑌂 𑌤𑌦𑍇𑌵 𑌸𑍃𑌜𑌤𑌿 𑌪𑍍𑌰𑌭𑍁𑌃 ।
𑌪𑌾𑌯𑌤𑍍𑌯𑍇𑌷 𑌤𑌪𑌤𑍍𑌯𑍇𑌷 𑌵𑌰𑍍𑌷𑌤𑍍𑌯𑍇𑌷 𑌗𑌭𑌸𑍍𑌤𑌿𑌭𑌿𑌃 ॥ 22 ॥

𑌏𑌷 𑌸𑍁𑌪𑍍𑌤𑍇𑌷𑍁 𑌜𑌾𑌗𑌰𑍍𑌤𑌿 𑌭𑍂𑌤𑍇𑌷𑍁 𑌪𑌰𑌿𑌨𑌿𑌷𑍍𑌠𑌿𑌤𑌃 ।
𑌏𑌷 𑌏𑌵𑌾𑌗𑍍𑌨𑌿𑌹𑍋𑌤𑍍𑌰𑌂 𑌚 𑌫𑌲𑌂 𑌚𑍈𑌵𑌾𑌗𑍍𑌨𑌿𑌹𑍋𑌤𑍍𑌰𑌿𑌣𑌾𑌮𑍍 ॥ 23 ॥

𑌵𑍇𑌦𑌾𑌶𑍍𑌚 𑌕𑍍𑌰𑌤𑌵𑌶𑍍𑌚𑍈𑌵 𑌕𑍍𑌰𑌤𑍂𑌨𑌾𑌂 𑌫𑌲𑌮𑍇𑌵 𑌚 ।
𑌯𑌾𑌨𑌿 𑌕𑍃𑌤𑍍𑌯𑌾𑌨𑌿 𑌲𑍋𑌕𑍇𑌷𑍁 𑌸𑌰𑍍𑌵 𑌏𑌷 𑌰𑌵𑌿𑌃 𑌪𑍍𑌰𑌭𑍁𑌃 ॥ 24 ॥

𑌫𑌲𑌶𑍍𑌰𑍁𑌤𑌿𑌃

𑌏𑌨-𑌮𑌾𑌪𑌤𑍍𑌸𑍁 𑌕𑍃𑌚𑍍𑌛𑍍𑌰𑍇𑌷𑍁 𑌕𑌾𑌂𑌤𑌾𑌰𑍇𑌷𑍁 𑌭𑌯𑍇𑌷𑍁 𑌚 ।
𑌕𑍀𑌰𑍍𑌤𑌯𑌨𑍍 𑌪𑍁𑌰𑍁𑌷𑌃 𑌕𑌶𑍍𑌚𑌿𑌨𑍍𑌨𑌾𑌵𑌶𑍀𑌦𑌤𑌿 𑌰𑌾𑌘𑌵 ॥ 25 ॥

𑌪𑍂𑌜𑌯𑌸𑍍𑌵𑍈𑌨-𑌮𑍇𑌕𑌾𑌗𑍍𑌰𑌃 𑌦𑍇𑌵𑌦𑍇𑌵𑌂 𑌜𑌗𑌤𑍍𑌪𑌤𑌿𑌮𑍍 ।
𑌏𑌤𑌤𑍍 𑌤𑍍𑌰𑌿𑌗𑍁𑌣𑌿𑌤𑌂 𑌜𑌪𑍍𑌤𑍍𑌵𑌾 𑌯𑍁𑌦𑍍𑌧𑍇𑌷𑍁 𑌵𑌿𑌜𑌯𑌿𑌷𑍍𑌯𑌸𑌿 ॥ 26 ॥

𑌅𑌸𑍍𑌮𑌿𑌨𑍍 𑌕𑍍𑌷𑌣𑍇 𑌮𑌹𑌾𑌬𑌾𑌹𑍋 𑌰𑌾𑌵𑌣𑌂 𑌤𑍍𑌵𑌂 𑌵𑌧𑌿𑌷𑍍𑌯𑌸𑌿 ।
𑌏𑌵𑌮𑍁𑌕𑍍𑌤𑍍𑌵𑌾 𑌤𑌦𑌾𑌗𑌸𑍍𑌤𑍍𑌯𑍋 𑌜𑌗𑌾𑌮 𑌚 𑌯𑌥𑌾𑌗𑌤𑌮𑍍 ॥ 2𑍭 ॥

𑌏𑌤𑌚𑍍𑌛𑍍𑌰𑍁𑌤𑍍𑌵𑌾 𑌮𑌹𑌾𑌤𑍇𑌜𑌾𑌃 𑌨𑌷𑍍𑌟𑌶𑍋𑌕𑍋𑌽𑌭𑌵𑌤𑍍𑌤𑌦𑌾 ।
𑌧𑌾𑌰𑌯𑌾𑌮𑌾𑌸 𑌸𑍁𑌪𑍍𑌰𑍀𑌤𑌃 𑌰𑌾𑌘𑌵𑌃 𑌪𑍍𑌰𑌯𑌤𑌾𑌤𑍍𑌮𑌵𑌾𑌨𑍍 ॥ 2𑍮 ॥

𑌆𑌦𑌿𑌤𑍍𑌯𑌂 𑌪𑍍𑌰𑍇𑌕𑍍𑌷𑍍𑌯 𑌜𑌪𑍍𑌤𑍍𑌵𑌾 𑌤𑍁 𑌪𑌰𑌂 𑌹𑌰𑍍𑌷𑌮𑌵𑌾𑌪𑍍𑌤𑌵𑌾𑌨𑍍 ।
𑌤𑍍𑌰𑌿𑌰𑌾𑌚𑌮𑍍𑌯 𑌶𑍁𑌚𑌿𑌰𑍍𑌭𑍂𑌤𑍍𑌵𑌾 𑌧𑌨𑍁𑌰𑌾𑌦𑌾𑌯 𑌵𑍀𑌰𑍍𑌯𑌵𑌾𑌨𑍍 ॥ 2𑍯 ॥

𑌰𑌾𑌵𑌣𑌂 𑌪𑍍𑌰𑍇𑌕𑍍𑌷𑍍𑌯 𑌹𑍃𑌷𑍍𑌟𑌾𑌤𑍍𑌮𑌾 𑌯𑍁𑌦𑍍𑌧𑌾𑌯 𑌸𑌮𑍁𑌪𑌾𑌗𑌮𑌤𑍍 ।
𑌸𑌰𑍍𑌵𑌯𑌤𑍍𑌨𑍇𑌨 𑌮𑌹𑌤𑌾 𑌵𑌧𑍇 𑌤𑌸𑍍𑌯 𑌧𑍃𑌤𑍋𑌽𑌭𑌵𑌤𑍍 ॥ 30 ॥

𑌅𑌥 𑌰𑌵𑌿𑌰𑌵𑌦𑌨𑍍𑌨𑌿𑌰𑍀𑌕𑍍𑌷𑍍𑌯 𑌰𑌾𑌮𑌂 𑌮𑍁𑌦𑌿𑌤𑌮𑌨𑌾𑌃 𑌪𑌰𑌮𑌂 𑌪𑍍𑌰𑌹𑍃𑌷𑍍𑌯𑌮𑌾𑌣𑌃 ।
𑌨𑌿𑌶𑌿𑌚𑌰𑌪𑌤𑌿 𑌸𑌂𑌕𑍍𑌷𑌯𑌂 𑌵𑌿𑌦𑌿𑌤𑍍𑌵𑌾 𑌸𑍁𑌰𑌗𑌣 𑌮𑌧𑍍𑌯𑌗𑌤𑍋 𑌵𑌚𑌸𑍍𑌤𑍍𑌵𑌰𑍇𑌤𑌿 ॥ 31 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑌿𑌕𑍀𑌯𑍇 𑌆𑌦𑌿𑌕𑌾𑌵𑍍𑌯𑍇 𑌯𑍁𑌦𑍍𑌧𑌕𑌾𑌂𑌡𑍇 𑌪𑌂𑌚𑌾𑌧𑌿𑌕 𑌶𑌤𑌤𑌮𑌃 𑌸𑌰𑍍𑌗𑌃 ॥