Viveka Chudamani

sarvavēdāntasiddhāntagōcharaṃ tamagōcharam ।
gōvindaṃ paramānandaṃ sadguruṃ praṇatō’smyaham ॥ 1॥

jantūnāṃ narajanma durlabhamataḥ puṃstvaṃ tatō vipratā
tasmādvaidikadharmamārgaparatā vidvattvamasmātparam ।
ātmānātmavivēchanaṃ svanubhavō brahmātmanā saṃsthitiḥ
muktirnō śatajanmakōṭisukṛtaiḥ puṇyairvinā labhyatē ॥ 2॥ (pāṭhabhēdaḥ – śatakōṭijanmasu kṛtaiḥ)

durlabhaṃ trayamēvaitaddēvānugrahahētukam ।
manuṣyatvaṃ mumukṣutvaṃ mahāpuruṣasaṃśrayaḥ ॥ 3॥

labdhvā kathañchinnarajanma durlabhaṃ (pāṭhabhēdaḥ – kathañchin)
tatrāpi puṃstvaṃ śrutipāradarśanam ।
yastvātmamuktau na yatēta mūḍhadhīḥ
sa hyātmahā svaṃ vinihantyasadgrahāt ॥ 4॥ (pāṭhabhēdaḥ – ātmahā svaṃ)

itaḥ kō nvasti mūḍhātmā yastu svārthē pramādyati ।
durlabhaṃ mānuṣaṃ dēhaṃ prāpya tatrāpi pauruṣam ॥ 5॥

vadantu śāstrāṇi yajantu dēvān (pāṭhabhēdaḥ – paṭhantu)
kurvantu karmāṇi bhajantu dēvatāḥ ।
ātmaikyabōdhēna vināpi mukti- (pāṭhabhēdaḥ – vinā vimuktiḥ na)
rna sidhyati brahmaśatāntarē’pi ॥ 6॥

amṛtattvasya nāśāsti vittēnētyēva hi śrutiḥ ।
bravīti karmaṇō muktērahētutvaṃ sphuṭaṃ yataḥ ॥ 7॥

atō vimuktyai prayatēta vidvān
sannyastabāhyārthasukhaspṛhaḥ san ।
santaṃ mahāntaṃ samupētya dēśikaṃ
tēnōpadiṣṭārthasamāhitātmā ॥ 8॥

uddharēdātmanā”tmānaṃ magnaṃ saṃsāravāridhau ।
yōgārūḍhatvamāsādya samyagdarśananiṣṭhayā ॥ 9॥

sannyasya sarvakarmāṇi bhavabandhavimuktayē ।
yatyatāṃ paṇḍitairdhīrairātmābhyāsa upasthitaiḥ ॥ 10॥

chittasya śuddhayē karma na tu vastūpalabdhayē ।
vastusiddhirvichārēṇa na kiñchitkarmakōṭibhiḥ ॥ 11॥

samyagvichārataḥ siddhā rajjutattvāvadhāraṇā ।
bhrāntōditamahāsarpabhayaduḥkhavināśinī ॥ 12॥ (pāṭhabhēdaḥ – bhrāntyō)
arthasya niśchayō dṛṣṭō vichārēṇa hitōktitaḥ ।
na snānēna na dānēna prāṇāyāmaśatēna vā ॥ 13॥

adhikāriṇamāśāstē phalasiddhirviśēṣataḥ ।
upāyā dēśakālādyāḥ santyasminsahakāriṇaḥ ॥ 14॥ (pāṭhabhēdaḥ – santyasyāṃ)
atō vichāraḥ kartavyō jijñāsōrātmavastunaḥ ॥

samāsādya dayāsindhuṃ guruṃ brahmaviduttamam ॥ 15॥

mēdhāvī puruṣō vidvānūhāpōhavichakṣaṇaḥ ।
adhikāryātmavidyāyāmuktalakṣaṇalakṣitaḥ ॥ 16॥

vivēkinō viraktasya śamādiguṇaśālinaḥ ।
mumukṣōrēva hi brahmajijñāsāyōgyatā matā ॥ 17॥

sādhanānyatra chatvāri kathitāni manīṣibhiḥ ।
yēṣu satsvēva sanniṣṭhā yadabhāvē na sidhyati ॥ 18॥

ādau nityānityavastuvivēkaḥ parigaṇyatē ।
ihāmutraphalabhōgavirāgastadanantaram ।
śamādiṣaṭkasampattirmumukṣutvamiti sphuṭam ॥ 19॥

brahma satyaṃ jaganmithyētyēvaṃrūpō viniśchayaḥ ।
sō’yaṃ nityānityavastuvivēkaḥ samudāhṛtaḥ ॥ 20॥

tadvairāgyaṃ jihāsā yā darśanaśravaṇādibhiḥ । (pāṭhabhēdaḥ – jugupsā yā)
dēhādibrahmaparyantē hyanityē bhōgavastuni ॥ 21॥ (pāṭhabhēdaḥ – bhōgyavastuni)
virajya viṣayavrātāddōṣadṛṣṭyā muhurmuhuḥ ।
svalakṣyē niyatāvasthā manasaḥ śama uchyatē ॥ 22॥

viṣayēbhyaḥ parāvartya sthāpanaṃ svasvagōlakē ।
ubhayēṣāmindriyāṇāṃ sa damaḥ parikīrtitaḥ ।
bāhyānālambanaṃ vṛttērēṣōparatiruttamā ॥ 23॥

sahanaṃ sarvaduḥkhānāmapratīkārapūrvakam ।
chintāvilāparahitaṃ sā titikṣā nigadyatē ॥ 24॥

śāstrasya guruvākyasya satyabuddhyavadhāraṇam । (pāṭhabhēdaḥ – satyabuddhyāvadhāraṇā)
sā śraddhā kathitā sadbhiryayā vastūpalabhyatē ॥ 25॥

sarvadā sthāpanaṃ buddhēḥ śuddhē brahmaṇi sarvadā । (pāṭhabhēdaḥ – samyagāsthāpanaṃ)
tatsamādhānamityuktaṃ na tu chittasya lālanam ॥ 26॥

ahaṅkārādidēhāntān bandhānajñānakalpitān ।
svasvarūpāvabōdhēna mōktumichChā mumukṣutā ॥ 27॥

mandamadhyamarūpāpi vairāgyēṇa śamādinā ।
prasādēna gurōḥ sēyaṃ pravṛddhā sūyatē phalam ॥ 28॥

vairāgyaṃ cha mumukṣutvaṃ tīvraṃ yasya tu vidyatē ।
tasminnēvārthavantaḥ syuḥ phalavantaḥ śamādayaḥ ॥ 29॥

ētayōrmandatā yatra viraktatvamumukṣayōḥ ।
marau salilavattatra śamādērbhānamātratā ॥ 30॥

mōkṣakāraṇasāmagryāṃ bhaktirēva garīyasī ।
svasvarūpānusandhānaṃ bhaktirityabhidhīyatē ॥ 31॥

svātmatattvānusandhānaṃ bhaktirityaparē jaguḥ ।
uktasādhanasampannastattvajijñāsurātmanaḥ ।
upasīdēdguruṃ prājñaṃ yasmādbandhavimōkṣaṇam ॥ 32॥

śrōtriyō’vṛjinō’kāmahatō yō brahmavittamaḥ ।
brahmaṇyuparataḥ śāntō nirindhana ivānalaḥ ।
ahētukadayāsindhurbandhurānamatāṃ satām ॥ 33॥

tamārādhya guruṃ bhaktyā prahvapraśrayasēvanaiḥ । (pāṭhabhēdaḥ – prahvaḥ)
prasannaṃ tamanuprāpya pṛchChējjñātavyamātmanaḥ ॥ 34॥

svāminnamastē natalōkabandhō
kāruṇyasindhō patitaṃ bhavābdhau ।
māmuddharātmīyakaṭākṣadṛṣṭyā
ṛjvyātikāruṇyasudhābhivṛṣṭyā ॥ 35॥

durvārasaṃsāradavāgnitaptaṃ
dōdhūyamānaṃ duradṛṣṭavātaiḥ ।
bhītaṃ prapannaṃ paripāhi mṛtyōḥ
śaraṇyamanyadyadahaṃ na jānē ॥ 36॥ (pāṭhabhēdaḥ – anyaṃ)

śāntā mahāntō nivasanti santō
vasantavallōkahitaṃ charantaḥ ।
tīrṇāḥ svayaṃ bhīmabhavārṇavaṃ janā-
nahētunānyānapi tārayantaḥ ॥ 37॥

ayaṃ svabhāvaḥ svata ēva yatpara-
śramāpanōdapravaṇaṃ mahātmanām ।
sudhāṃśurēṣa svayamarkakarkaśa-
prabhābhitaptāmavati kṣitiṃ kila ॥ 38॥

brahmānandarasānubhūtikalitaiḥ pūtaiḥ suśītairyutai- (pāṭhabhēdaḥ – suśītaiḥ sitaiḥ)
ryuṣmadvākkalaśōjjhitaiḥ śrutisukhairvākyāmṛtaiḥ sēchaya ।
santaptaṃ bhavatāpadāvadahanajvālābhirēnaṃ prabhō
dhanyāstē bhavadīkṣaṇakṣaṇagatēḥ pātrīkṛtāḥ svīkṛtāḥ ॥ 39॥

kathaṃ tarēyaṃ bhavasindhumētaṃ
kā vā gatirmē katamō’styupāyaḥ ।
jānē na kiñchitkṛpayā’va māṃ prabhō
saṃsāraduḥkhakṣatimātanuṣva ॥ 40॥

tathā vadantaṃ śaraṇāgataṃ svaṃ
saṃsāradāvānalatāpataptam ।
nirīkṣya kāruṇyarasārdradṛṣṭyā
dadyādabhītiṃ sahasā mahātmā ॥ 41॥

vidvān sa tasmā upasattimīyuṣē
mumukṣavē sādhu yathōktakāriṇē ।
praśāntachittāya śamānvitāya
tattvōpadēśaṃ kṛpayaiva kuryāt ॥ 42॥

mā bhaiṣṭa vidvaṃstava nāstyapāyaḥ
saṃsārasindhōstaraṇē’styupāyaḥ ।
yēnaiva yātā yatayō’sya pāraṃ
tamēva mārgaṃ tava nirdiśāmi ॥ 43॥

astyupāyō mahānkaśchitsaṃsārabhayanāśanaḥ ।
tēna tīrtvā bhavāmbhōdhiṃ paramānandamāpsyasi ॥ 44॥

vēdāntārthavichārēṇa jāyatē jñānamuttamam ।
tēnātyantikasaṃsāraduḥkhanāśō bhavatyanu ॥ 45॥

śraddhābhaktidhyānayōgānmumukṣōḥ
muktērhētūnvakti sākṣāchChrutērgīḥ ।
yō vā ētēṣvēva tiṣṭhatyamuṣya
mōkṣō’vidyākalpitāddēhabandhāt ॥ 46॥

ajñānayōgātparamātmanastava
hyanātmabandhastata ēva saṃsṛtiḥ ।
tayōrvivēkōditabōdhavahniḥ
ajñānakāryaṃ pradahētsamūlam ॥ 47॥

śiṣya uvācha ।
kṛpayā śrūyatāṃ svāminpraśnō’yaṃ kriyatē mayā ।
yaduttaramahaṃ śrutvā kṛtārthaḥ syāṃ bhavanmukhāt ॥ 48॥

kō nāma bandhaḥ kathamēṣa āgataḥ
kathaṃ pratiṣṭhāsya kathaṃ vimōkṣaḥ ।
kō’sāvanātmā paramaḥ ka ātmā
tayōrvivēkaḥ kathamētaduchyatām ॥ 49॥

śrīguruvācha ।
dhanyō’si kṛtakṛtyō’si pāvitaṃ tē kulaṃ tvayā । (pāṭhabhēdaḥ – pāvitaṃ)
yadavidyābandhamuktyā brahmībhavitumichChasi ॥ 50॥

ṛṇamōchanakartāraḥ pituḥ santi sutādayaḥ ।
bandhamōchanakartā tu svasmādanyō na kaśchana ॥ 51॥

mastakanyastabhārādērduḥkhamanyairnivāryatē ।
kṣudhādikṛtaduḥkhaṃ tu vinā svēna na kēnachit ॥ 52॥

pathyamauṣadhasēvā cha kriyatē yēna rōgiṇā ।
ārōgyasiddhirdṛṣṭā’sya nānyānuṣṭhitakarmaṇā ॥ 53॥

vastusvarūpaṃ sphuṭabōdhachakṣuṣā
svēnaiva vēdyaṃ na tu paṇḍitēna ।
chandrasvarūpaṃ nijachakṣuṣaiva
jñātavyamanyairavagamyatē kim ॥ 54॥

avidyākāmakarmādipāśabandhaṃ vimōchitum ।
kaḥ śaknuyādvinā”tmānaṃ kalpakōṭiśatairapi ॥ 55॥

na yōgēna na sāṅkhyēna karmaṇā nō na vidyayā ।
brahmātmaikatvabōdhēna mōkṣaḥ sidhyati nānyathā ॥ 56॥

vīṇāyā rūpasaundaryaṃ tantrīvādanasauṣṭhavam ।
prajārañjanamātraṃ tanna sāmrājyāya kalpatē ॥ 57॥

vāgvaikharī śabdajharī śāstravyākhyānakauśalam ।
vaiduṣyaṃ viduṣāṃ tadvadbhuktayē na tu muktayē ॥ 58॥

avijñātē parē tattvē śāstrādhītistu niṣphalā ।
vijñātē’pi parē tattvē śāstrādhītistu niṣphalā ॥ 59॥

śabdajālaṃ mahāraṇyaṃ chittabhramaṇakāraṇam ।
ataḥ prayatnājjñātavyaṃ tattvajñaistattvamātmanaḥ ॥ 60॥ tattvajñāttattva
ajñānasarpadaṣṭasya brahmajñānauṣadhaṃ vinā ।
kimu vēdaiścha śāstraiścha kimu mantraiḥ kimauṣadhaiḥ ॥ 61॥

na gachChati vinā pānaṃ vyādhirauṣadhaśabdataḥ ।
vinā’parōkṣānubhavaṃ brahmaśabdairna muchyatē ॥ 62॥

akṛtvā dṛśyavilayamajñātvā tattvamātmanaḥ ।
brahmaśabdaiḥ kutō muktiruktimātraphalairnṛṇām ॥ 63॥ (pāṭhabhēdaḥ – bāhyaśabdaiḥ)

akṛtvā śatrusaṃhāramagatvākhilabhūśriyam ।
rājāhamiti śabdānnō rājā bhavitumarhati ॥ 64॥

āptōktiṃ khananaṃ tathōpariśilādyutkarṣaṇaṃ svīkṛtiṃ (pāṭhabhēdaḥ – pariśilāpākarṣaṇaṃ)
nikṣēpaḥ samapēkṣatē na hi bahiḥśabdaistu nirgachChati ।
tadvadbrahmavidōpadēśamananadhyānādibhirlabhyatē
māyākāryatirōhitaṃ svamamalaṃ tattvaṃ na duryuktibhiḥ ॥ 65॥

tasmātsarvaprayatnēna bhavabandhavimuktayē ।
svairēva yatnaḥ kartavyō rōgādāviva paṇḍitaiḥ ॥ 66॥ (pāṭhabhēdaḥ – rōgādēriva)

yastvayādya kṛtaḥ praśnō varīyāñChāstravinmataḥ । (pāṭhabhēdaḥ – sammataḥ)
sūtraprāyō nigūḍhārthō jñātavyaścha mumukṣubhiḥ ॥ 67॥

śaṛṇuṣvāvahitō vidvanyanmayā samudīryatē ।
tadētachChravaṇātsadyō bhavabandhādvimōkṣyasē ॥ 68॥

mōkṣasya hētuḥ prathamō nigadyatē
vairāgyamatyantamanityavastuṣu ।
tataḥ śamaśchāpi damastitikṣā
nyāsaḥ prasaktākhilakarmaṇāṃ bhṛśam ॥ 69॥

tataḥ śrutistanmananaṃ satattva-
dhyānaṃ chiraṃ nityanirantaraṃ munēḥ ।
tatō’vikalpaṃ paramētya vidvān
ihaiva nirvāṇasukhaṃ samṛchChati ॥ 70॥

yadbōddhavyaṃ tavēdānīmātmānātmavivēchanam ।
taduchyatē mayā samyak śrutvātmanyavadhāraya ॥ 71॥

majjāsthimēdaḥpalaraktacharma-
tvagāhvayairdhātubhirēbhiranvitam ।
pādōruvakṣōbhujapṛṣṭhamastakaiḥ
aṅgairupāṅgairupayuktamētat ॥ 72॥

ahammamēti prathitaṃ śarīraṃ
mōhāspadaṃ sthūlamitīryatē budhaiḥ ।
nabhōnabhasvaddahanāmbubhūmayaḥ
sūkṣmāṇi bhūtāni bhavanti tāni ॥ 73॥

parasparāṃśairmilitāni bhūtvā
sthūlāni cha sthūlaśarīrahētavaḥ ।
mātrāstadīyā viṣayā bhavanti
śabdādayaḥ pañcha sukhāya bhōktuḥ ॥ 74॥

ya ēṣu mūḍhā viṣayēṣu baddhā
rāgōrupāśēna sudurdamēna ।
āyānti niryāntyadha ūrdhvamuchchaiḥ
svakarmadūtēna javēna nītāḥ ॥ 75॥

śabdādibhiḥ pañchabhirēva pañcha
pañchatvamāpuḥ svaguṇēna baddhāḥ ।
kuraṅgamātaṅgapataṅgamīna-
bhṛṅgā naraḥ pañchabhirañchitaḥ kim ॥ 76॥

dōṣēṇa tīvrō viṣayaḥ kṛṣṇasarpaviṣādapi ।
viṣaṃ nihanti bhōktāraṃ draṣṭāraṃ chakṣuṣāpyayam ॥ 77॥

viṣayāśāmahāpāśādyō vimuktaḥ sudustyajāt ।
sa ēva kalpatē muktyai nānyaḥ ṣaṭśāstravēdyapi ॥ 78॥

āpātavairāgyavatō mumukṣūn
bhavābdhipāraṃ pratiyātumudyatān ।
āśāgrahō majjayatē’ntarālē
nigṛhya kaṇṭhē vinivartya vēgāt ॥ 79॥

viṣayākhyagrahō yēna suviraktyasinā hataḥ ।
sa gachChati bhavāmbhōdhēḥ pāraṃ pratyūhavarjitaḥ ॥ 80॥

viṣamaviṣayamārgairgachChatō’nachChabuddhēḥ (pāṭhabhēdaḥ – viṣayamārgē gachChatō)
pratipadamabhiyātō mṛtyurapyēṣa viddhi । (pāṭhabhēdaḥ – pratipadamabhighātō mṛtyurapyēṣa siddhaḥ)
hitasujanagurūktyā gachChataḥ svasya yuktyā
prabhavati phalasiddhiḥ satyamityēva viddhi ॥ 81॥

mōkṣasya kāṅkṣā yadi vai tavāsti
tyajātidūrādviṣayānviṣaṃ yathā ।
pīyūṣavattōṣadayākṣamārjava-
praśāntidāntīrbhaja nityamādarāt ॥ 82॥

anukṣaṇaṃ yatparihṛtya kṛtyaṃ
anādyavidyākṛtabandhamōkṣaṇam ।
dēhaḥ parārthō’yamamuṣya pōṣaṇē
yaḥ sajjatē sa svamanēna hanti ॥ 83॥

śarīrapōṣaṇārthī san ya ātmānaṃ didṛkṣati । (pāṭhabhēdaḥ – didṛkṣatē)
grāhaṃ dārudhiyā dhṛtvā nadīṃ tartuṃ sa gachChati ॥ 84॥ (pāṭhabhēdaḥ – sa ichChati)

mōha ēva mahāmṛtyurmumukṣōrvapurādiṣu ।
mōhō vinirjitō yēna sa muktipadamarhati ॥ 85॥

mōhaṃ jahi mahāmṛtyuṃ dēhadārasutādiṣu ।
yaṃ jitvā munayō yānti tadviṣṇōḥ paramaṃ padam ॥ 86॥

tvaṅmāṃsarudhirasnāyumēdōmajjāsthisaṅkulam ।
pūrṇaṃ mūtrapurīṣābhyāṃ sthūlaṃ nindyamidaṃ vapuḥ ॥ 87॥

pañchīkṛtēbhyō bhūtēbhyaḥ sthūlēbhyaḥ pūrvakarmaṇā ।
samutpannamidaṃ sthūlaṃ bhōgāyatanamātmanaḥ ।
avasthā jāgarastasya sthūlārthānubhavō yataḥ ॥ 88॥

bāhyēndriyaiḥ sthūlapadārthasēvāṃ
srakchandanastryādivichitrarūpām ।
karōti jīvaḥ svayamētadātmanā
tasmātpraśastirvapuṣō’sya jāgarē ॥ 89॥

sarvō’pi bāhyasaṃsāraḥ puruṣasya yadāśrayaḥ ।
viddhi dēhamidaṃ sthūlaṃ gṛhavadgṛhamēdhinaḥ ॥ 90॥

sthūlasya sambhavajarāmaraṇāni dharmāḥ
sthaulyādayō bahuvidhāḥ śiśutādyavasthāḥ ।
varṇāśramādiniyamā bahudhā”mayāḥ syuḥ
pūjāvamānabahumānamukhā viśēṣāḥ ॥ 91॥

buddhīndriyāṇi śravaṇaṃ tvagakṣi
ghrāṇaṃ cha jihvā viṣayāvabōdhanāt ।
vākpāṇipādā gudamapyupasthaḥ (pāṭhabhēdaḥ – upasthaṃ)
karmēndriyāṇi pravaṇēna karmasu ॥ 92॥ (pāṭhabhēdaḥ – pravaṇāni)

nigadyatē’ntaḥkaraṇaṃ manōdhīḥ
ahaṅkṛtiśchittamiti svavṛttibhiḥ ।
manastu saṅkalpavikalpanādibhiḥ
buddhiḥ padārthādhyavasāyadharmataḥ ॥ 93॥

atrābhimānādahamityahaṅkṛtiḥ ।
svārthānusandhānaguṇēna chittam ॥ 94॥

prāṇāpānavyānōdānasamānā bhavatyasau prāṇaḥ ।
svayamēva vṛttibhēdādvikṛtibhēdātsuvarṇasalilādivat ॥ 95॥ (pāṭhabhēdaḥ – vikṛtērbhēdātsuvarṇasalilamiva)

vāgādi pañcha śravaṇādi pañcha
prāṇādi pañchābhramukhāni pañcha ।
buddhyādyavidyāpi cha kāmakarmaṇī
puryaṣṭakaṃ sūkṣmaśarīramāhuḥ ॥ 96॥

idaṃ śarīraṃ śa‍ṛṇu sūkṣmasañjñitaṃ
liṅgaṃ tvapañchīkṛtabhūtasambhavam ।
savāsanaṃ karmaphalānubhāvakaṃ
svājñānatō’nādirupādhirātmanaḥ ॥ 97॥

svapnō bhavatyasya vibhaktyavasthā
svamātraśēṣēṇa vibhāti yatra ।
svapnē tu buddhiḥ svayamēva jāgrat
kālīnanānāvidhavāsanābhiḥ ॥ 98॥

kartrādibhāvaṃ pratipadya rājatē
yatra svayaṃ bhāti hyayaṃ parātmā । (pāṭhabhēdaḥ – svayañjyōtirayaṃ)
dhīmātrakōpādhiraśēṣasākṣī
na lipyatē tatkṛtakarmalēśaiḥ । karmalēpaiḥ
yasmādasaṅgastata ēva karmabhiḥ
na lipyatē kiñchidupādhinā kṛtaiḥ ॥ 99॥

sarvavyāpṛtikaraṇaṃ liṅgamidaṃ syāchchidātmanaḥ puṃsaḥ ।
vāsyādikamiva takṣṇastēnaivātmā bhavatyasaṅgō’yam ॥ 100॥

andhatvamandatvapaṭutvadharmāḥ
sauguṇyavaiguṇyavaśāddhi chakṣuṣaḥ ।
bādhiryamūkatvamukhāstathaiva
śrōtrādidharmā na tu vētturātmanaḥ ॥ 101॥

uchChvāsaniḥśvāsavijṛmbhaṇakṣu-
tprasyandanādyutkramaṇādikāḥ kriyāḥ । (pāṭhabhēdaḥ – praspandanādy)
prāṇādikarmāṇi vadanti tajñāḥ (pāṭhabhēdaḥ – tajjñāḥ)
prāṇasya dharmāvaśanāpipāsē ॥ 102॥

antaḥkaraṇamētēṣu chakṣurādiṣu varṣmaṇi ।
ahamityabhimānēna tiṣṭhatyābhāsatējasā ॥ 103॥

ahaṅkāraḥ sa vijñēyaḥ kartā bhōktābhimānyayam ।
sattvādiguṇayōgēna chāvasthātrayamaśnutē ॥ 104॥ (pāṭhabhēdaḥ – yōgēnāvasthātritayamśnutē)

viṣayāṇāmānukūlyē sukhī duḥkhī viparyayē ।
sukhaṃ duḥkhaṃ cha taddharmaḥ sadānandasya nātmanaḥ ॥ 105॥

ātmārthatvēna hi prēyānviṣayō na svataḥ priyaḥ ।
svata ēva hi sarvēṣāmātmā priyatamō yataḥ ।
tata ātmā sadānandō nāsya duḥkhaṃ kadāchana ॥ 106॥

yatsuṣuptau nirviṣaya ātmānandō’nubhūyatē ।
śrutiḥ pratyakṣamaitihyamanumānaṃ cha jāgrati ॥ 107॥

avyaktanāmnī paramēśaśaktiḥ
anādyavidyā triguṇātmikā parā ।
kāryānumēyā sudhiyaiva māyā
yayā jagatsarvamidaṃ prasūyatē ॥ 108॥

sannāpyasannāpyubhayātmikā nō
bhinnāpyabhinnāpyubhayātmikā nō ।
sāṅgāpyanaṅgā hyubhayātmikā nō (pāṭhabhēdaḥ – anaṅgāpyubhayātmikā)
mahādbhutā’nirvachanīyarūpā ॥ 109॥

śuddhādvayabrahmavibōdhanāśyā
sarpabhramō rajjuvivēkatō yathā ।
rajastamaḥsattvamiti prasiddhā
guṇāstadīyāḥ prathitaiḥ svakāryaiḥ ॥ 110॥

vikṣēpaśaktī rajasaḥ kriyātmikā
yataḥ pravṛttiḥ prasṛtā purāṇī ।
rāgādayō’syāḥ prabhavanti nityaṃ
duḥkhādayō yē manasō vikārāḥ ॥ 111॥

kāmaḥ krōdhō lōbhadambhādyasūyā (pāṭhabhēdaḥ – lōbhadambhābhyasūyā)
ahaṅkārērṣyāmatsarādyāstu ghōrāḥ ।
dharmā ētē rājasāḥ pumpravṛtti-
ryasmādēṣā tadrajō bandhahētuḥ ॥ 112॥ (pāṭhabhēdaḥ – yasmādētattadrajō)

ēṣā”vṛtirnāma tamōguṇasya
śaktirmayā vastvavabhāsatē’nyathā । śaktiryayā
saiṣā nidānaṃ puruṣasya saṃsṛtēḥ
vikṣēpaśaktēḥ pravaṇasya hētuḥ ॥ 113॥ (pāṭhabhēdaḥ – prasarasya)

prajñāvānapi paṇḍitō’pi chaturō’pyatyantasūkṣmātmadṛg- (pāṭhabhēdaḥ – sūkṣmārthadṛg)
vyālīḍhastamasā na vētti bahudhā sambōdhitō’pi sphuṭam ।
bhrāntyārōpitamēva sādhu kalayatyālambatē tadguṇān
hantāsau prabalā durantatamasaḥ śaktirmahatyāvṛtiḥ ॥ 114॥

abhāvanā vā viparītabhāvanā’- (pāṭhabhēdaḥ – viparītabhāvanā)
sambhāvanā vipratipattirasyāḥ ।
saṃsargayuktaṃ na vimuñchati dhruvaṃ
vikṣēpaśaktiḥ kṣapayatyajasram ॥ 115॥

ajñānamālasyajaḍatvanidrā-
pramādamūḍhatvamukhāstamōguṇāḥ ।
ētaiḥ prayuktō na hi vētti kiñchit
nidrāluvatstambhavadēva tiṣṭhati ॥ 116॥

sattvaṃ viśuddhaṃ jalavattathāpi
tābhyāṃ militvā saraṇāya kalpatē ।
yatrātmabimbaḥ pratibimbitaḥ san
prakāśayatyarka ivākhilaṃ jaḍam ॥ 117॥

miśrasya sattvasya bhavanti dharmāḥ
tvamānitādyā niyamā yamādyāḥ ।
śraddhā cha bhaktiścha mumukṣutā cha
daivī cha sampattirasannivṛttiḥ ॥ 118॥

viśuddhasattvasya guṇāḥ prasādaḥ
svātmānubhūtiḥ paramā praśāntiḥ ।
tṛptiḥ praharṣaḥ paramātmaniṣṭhā
yayā sadānandarasaṃ samṛchChati ॥ 119॥

avyaktamētattriguṇairniruktaṃ
tatkāraṇaṃ nāma śarīramātmanaḥ ।
suṣuptirētasya vibhaktyavasthā
pralīnasarvēndriyabuddhivṛttiḥ ॥ 120॥

sarvaprakārapramitipraśāntiḥ
bījātmanāvasthitirēva buddhēḥ ।
suṣuptirētasya kila pratītiḥ (pāṭhabhēdaḥ – suṣuptiratrāsya)
kiñchinna vēdmīti jagatprasiddhēḥ ॥ 121॥

dēhēndriyaprāṇamanō’hamādayaḥ
sarvē vikārā viṣayāḥ sukhādayaḥ ।
vyōmādibhūtānyakhilaṃ cha viśvaṃ
avyaktaparyantamidaṃ hyanātmā ॥ 122॥

māyā māyākāryaṃ sarvaṃ mahadādidēhaparyantam ।
asadidamanātmatattvaṃ viddhi tvaṃ marumarīchikākalpam ॥ 123॥

atha tē sampravakṣyāmi svarūpaṃ paramātmanaḥ ।
yadvijñāya narō bandhānmuktaḥ kaivalyamaśnutē ॥ 124॥

asti kaśchitsvayaṃ nityamahampratyayalambanaḥ ।
avasthātrayasākṣī sanpañchakōśavilakṣaṇaḥ ॥ 125॥

yō vijānāti sakalaṃ jāgratsvapnasuṣuptiṣu ।
buddhitadvṛttisadbhāvamabhāvamahamityayam ॥ 126॥

yaḥ paśyati svayaṃ sarvaṃ yaṃ na paśyati kaśchana । (pāṭhabhēdaḥ – kiñchana)
yaśchētayati buddhyādi na tadyaṃ chētayatyayam ॥ 127॥

yēna viśvamidaṃ vyāptaṃ yaṃ na vyāpnōti kiñchana ।
ābhārūpamidaṃ sarvaṃ yaṃ bhāntamanubhātyayam ॥ 128॥

yasya sannidhimātrēṇa dēhēndriyamanōdhiyaḥ ।
viṣayēṣu svakīyēṣu vartantē prēritā iva ॥ 129॥

ahaṅkārādidēhāntā viṣayāścha sukhādayaḥ ।
vēdyantē ghaṭavadyēna nityabōdhasvarūpiṇā ॥ 130॥

ēṣō’ntarātmā puruṣaḥ purāṇō
nirantarākhaṇḍasukhānubhūtiḥ ।
sadaikarūpaḥ pratibōdhamātrō
yēnēṣitā vāgasavaścharanti ॥ 131॥

atraiva sattvātmani dhīguhāyāṃ
avyākṛtākāśa uśatprakāśaḥ । (pāṭhabhēdaḥ – uruprakāśaḥ)
ākāśa uchchai ravivatprakāśatē
svatējasā viśvamidaṃ prakāśayan ॥ 132॥

jñātā manō’haṅkṛtivikriyāṇāṃ
dēhēndriyaprāṇakṛtakriyāṇām ।
ayō’gnivattānanuvartamānō
na chēṣṭatē nō vikarōti kiñchana ॥ 133॥

na jāyatē nō mriyatē na vardhatē
na kṣīyatē nō vikarōti nityaḥ ।
vilīyamānē’pi vapuṣyamuṣmi-
nna līyatē kumbha ivāmbaraṃ svayam ॥ 134॥

prakṛtivikṛtibhinnaḥ śuddhabōdhasvabhāvaḥ
sadasadidamaśēṣaṃ bhāsayannirviśēṣaḥ ।
vilasati paramātmā jāgradādiṣvavasthā-
svahamahamiti sākṣātsākṣirūpēṇa buddhēḥ ॥ 135॥

niyamitamanasāmuṃ tvaṃ svamātmānamātma-
nyayamahamiti sākṣādviddhi buddhiprasādāt ।
janimaraṇataraṅgāpārasaṃsārasindhuṃ
pratara bhava kṛtārthō brahmarūpēṇa saṃsthaḥ ॥ 136॥

atrānātmanyahamiti matirbandha ēṣō’sya puṃsaḥ
prāptō’jñānājjananamaraṇaklēśasampātahētuḥ ।
yēnaivāyaṃ vapuridamasatsatyamityātmabuddhyā
puṣyatyukṣatyavati viṣayaistantubhiḥ kōśakṛdvat ॥ 137॥

atasmiṃstadbuddhiḥ prabhavati vimūḍhasya tamasā
vivēkābhāvādvai sphurati bhujagē rajjudhiṣaṇā ।
tatō’narthavrātō nipatati samādāturadhikaḥ
tatō yō’sadgrāhaḥ sa hi bhavati bandhaḥ śaṛṇu sakhē ॥ 138॥

akhaṇḍanityādvayabōdhaśaktyā
sphurantamātmānamanantavaibhavam ।
samāvṛṇōtyāvṛtiśaktirēṣā
tamōmayī rāhurivārkabimbam ॥ 139॥

tirōbhūtē svātmanyamalataratējōvati pumān
anātmānaṃ mōhādahamiti śarīraṃ kalayati ।
tataḥ kāmakrōdhaprabhṛtibhiramuṃ bandhanaguṇaiḥ (pāṭhabhēdaḥ – bandhakaguṇaiḥ)
paraṃ vikṣēpākhyā rajasa uruśaktirvyathayati ॥ 140॥

mahāmōhagrāhagrasanagalitātmāvagamanō
dhiyō nānāvasthāṃ svayamabhinayaṃstadguṇatayā । (pāṭhabhēdaḥ – nānāvasthāḥ)
apārē saṃsārē viṣayaviṣapūrē jalanidhau
nimajyōnmajyāyaṃ bhramati kumatiḥ kutsitagatiḥ ॥ 141॥

bhānuprabhāsañjanitābhrapaṅktiḥ
bhānuṃ tirōdhāya vijṛmbhatē yathā ।
ātmōditāhaṅkṛtirātmatattvaṃ
tathā tirōdhāya vijṛmbhatē svayam ॥ 142॥

kavalitadinanāthē durdinē sāndramēghaiḥ
vyathayati himajhañjhāvāyurugrō yathaitān ।
aviratatamasā”tmanyāvṛtē mūḍhabuddhiṃ
kṣapayati bahuduḥkhaistīvravikṣēpaśaktiḥ ॥ 143॥

ētābhyāmēva śaktibhyāṃ bandhaḥ puṃsaḥ samāgataḥ ।
yābhyāṃ vimōhitō dēhaṃ matvā”tmānaṃ bhramatyayam ॥ 144॥

bījaṃ saṃsṛtibhūmijasya tu tamō dēhātmadhīraṅkurō
rāgaḥ pallavamambu karma tu vapuḥ skandhō’savaḥ śākhikāḥ ।
agrāṇīndriyasaṃhatiścha viṣayāḥ puṣpāṇi duḥkhaṃ phalaṃ
nānākarmasamudbhavaṃ bahuvidhaṃ bhōktātra jīvaḥ khagaḥ ॥ 145॥

ajñānamūlō’yamanātmabandhō
naisargikō’nādirananta īritaḥ ।
janmāpyayavyādhijarādiduḥkha-
pravāhapātaṃ janayatyamuṣya ॥ 146॥

nāstrairna śastrairanilēna vahninā
Chēttuṃ na śakyō na cha karmakōṭibhiḥ ।
vivēkavijñānamahāsinā vinā
dhātuḥ prasādēna śitēna mañjunā ॥ 147॥

śrutipramāṇaikamatēḥ svadharma
niṣṭhā tayaivātmaviśuddhirasya ।
viśuddhabuddhēḥ paramātmavēdanaṃ
tēnaiva saṃsārasamūlanāśaḥ ॥ 148॥

kōśairannamayādyaiḥ pañchabhirātmā na saṃvṛtō bhāti ।
nijaśaktisamutpannaiḥ śaivālapaṭalairivāmbu vāpīstham ॥ 149॥

tachChaivālāpanayē samyak salilaṃ pratīyatē śuddham ।
tṛṣṇāsantāpaharaṃ sadyaḥ saukhyapradaṃ paraṃ puṃsaḥ ॥ 150॥

pañchānāmapi kōśānāmapavādē vibhātyayaṃ śuddhaḥ ।
nityānandaikarasaḥ pratyagrūpaḥ paraḥ svayañjyōtiḥ ॥ 151॥

ātmānātmavivēkaḥ kartavyō bandhamuktayē viduṣā ।
tēnaivānandī bhavati svaṃ vijñāya sachchidānandam ॥ 152॥

muñjādiṣīkāmiva dṛśyavargāt
pratyañchamātmānamasaṅgamakriyam ।
vivichya tatra pravilāpya sarvaṃ
tadātmanā tiṣṭhati yaḥ sa muktaḥ ॥ 153॥

dēhō’yamannabhavanō’nnamayastu kōśa- (pāṭhabhēdaḥ – kōśō)
śchānnēna jīvati vinaśyati tadvihīnaḥ । (pāṭhabhēdaḥ – hyannēna)
tvakcharmamāṃsarudhirāsthipurīṣarāśi-
rnāyaṃ svayaṃ bhavitumarhati nityaśuddhaḥ ॥ 154॥

pūrvaṃ janēradhimṛtērapi nāyamasti (pāṭhabhēdaḥ – janērapimṛtēratha)
jātakṣaṇaḥ kṣaṇaguṇō’niyatasvabhāvaḥ ।
naikō jaḍaścha ghaṭavatparidṛśyamānaḥ
svātmā kathaṃ bhavati bhāvavikāravēttā ॥ 155॥

pāṇipādādimāndēhō nātmā vyaṅgē’pi jīvanāt ।
tattachChaktēranāśāchcha na niyamyō niyāmakaḥ ॥ 156॥

dēhataddharmatatkarmatadavasthādisākṣiṇaḥ ।
sata ēva svataḥsiddhaṃ tadvailakṣaṇyamātmanaḥ ॥ 157॥

śalyarāśirmāṃsaliptō malapūrṇō’tikaśmalaḥ ।
kathaṃ bhavēdayaṃ vēttā svayamētadvilakṣaṇaḥ ॥ 158॥

tvaṅmāṃsamēdō’sthipurīṣarāśā-
vahammatiṃ mūḍhajanaḥ karōti ।
vilakṣaṇaṃ vētti vichāraśīlō
nijasvarūpaṃ paramārthabhūtam ॥ 159॥

dēhō’hamityēva jaḍasya buddhiḥ
dēhē cha jīvē viduṣastvahandhīḥ ।
vivēkavijñānavatō mahātmanō
brahmāhamityēva matiḥ sadātmani ॥ 160॥

atrātmabuddhiṃ tyaja mūḍhabuddhē
tvaṅmāṃsamēdō’sthipurīṣarāśau ।
sarvātmani brahmaṇi nirvikalpē
kuruṣva śāntiṃ paramāṃ bhajasva ॥ 161॥

dēhēndriyādāvasati bhramōditāṃ
vidvānahantāṃ na jahāti yāvat ।
tāvanna tasyāsti vimuktivārtā-
pyastvēṣa vēdāntanayāntadarśī ॥ 162॥

Chāyāśarīrē pratibimbagātrē
yatsvapnadēhē hṛdi kalpitāṅgē ।
yathātmabuddhistava nāsti kāchi-
jjīvachCharīrē cha tathaiva mā’stu ॥ 163॥

dēhātmadhīrēva nṛṇāmasaddhiyāṃ
janmādiduḥkhaprabhavasya bījam ।
yatastatastvaṃ jahi tāṃ prayatnāt
tyaktē tu chittē na punarbhavāśā ॥ 164॥

karmēndriyaiḥ pañchabhirañchitō’yaṃ
prāṇō bhavētprāṇamayastu kōśaḥ ॥

yēnātmavānannamayō’nupūrṇaḥ
pravartatē’sau sakalakriyāsu ॥ 165॥

naivātmāpi prāṇamayō vāyuvikārō (pāṭhabhēdaḥ – naivātmāyaṃ)
gantā”gantā vāyuvadantarbahirēṣaḥ ।
yasmātkiñchitkvāpi na vēttīṣṭamaniṣṭaṃ
svaṃ vānyaṃ vā kiñchana nityaṃ paratantraḥ ॥ 166॥

jñānēndriyāṇi cha manaścha manōmayaḥ syāt
kōśō mamāhamiti vastuvikalpahētuḥ ।
sañjñādibhēdakalanākalitō balīyāṃ-
statpūrvakōśamabhipūrya vijṛmbhatē yaḥ ॥ 167॥ (pāṭhabhēdaḥ – anupūrya)
pañchēndriyaiḥ pañchabhirēva hōtṛbhiḥ
prachīyamānō viṣayājyadhārayā ।
jājvalyamānō bahuvāsanēndhanaiḥ
manōmayāgnirdahati prapañcham ॥ 168॥ (pāṭhabhēdaḥ – manōmayō’gnirdahati)

na hyastyavidyā manasō’tiriktā
manō hyavidyā bhavabandhahētuḥ ।
tasminvinaṣṭē sakalaṃ vinaṣṭaṃ
vijṛmbhitē’sminsakalaṃ vijṛmbhatē ॥ 169॥

svapnē’rthaśūnyē sṛjati svaśaktyā
bhōktrādiviśvaṃ mana ēva sarvam ।
tathaiva jāgratyapi nō viśēṣaḥ
tatsarvamētanmanasō vijṛmbhaṇam ॥ 170॥

suṣuptikālē manasi pralīnē
naivāsti kiñchitsakalaprasiddhēḥ ।
atō manaḥkalpita ēva puṃsaḥ
saṃsāra ētasya na vastutō’sti ॥ 171॥

vāyunā”nīyatē mēghaḥ punastēnaiva nīyatē । (pāṭhabhēdaḥ – vāyunā nīyatē mēghaḥ punastēnaiva līyatē)
manasā kalpyatē bandhō mōkṣastēnaiva kalpyatē ॥ 172॥

dēhādisarvaviṣayē parikalpya rāgaṃ
badhnāti tēna puruṣaṃ paśuvadguṇēna ।
vairasyamatra viṣavat suvidhāya paśchād
ēnaṃ vimōchayati tanmana ēva bandhāt ॥ 173॥

tasmānmanaḥ kāraṇamasya jantōḥ
bandhasya mōkṣasya cha vā vidhānē ।
bandhasya hēturmalinaṃ rajōguṇaiḥ
mōkṣasya śuddhaṃ virajastamaskam ॥ 174॥

vivēkavairāgyaguṇātirēkā-
chChuddhatvamāsādya manō vimuktyai ।
bhavatyatō buddhimatō mumukṣō-
stābhyāṃ dṛḍhābhyāṃ bhavitavyamagrē ॥ 175॥

manō nāma mahāvyāghrō viṣayāraṇyabhūmiṣu ।
charatyatra na gachChantu sādhavō yē mumukṣavaḥ ॥ 176॥

manaḥ prasūtē viṣayānaśēṣān
sthūlātmanā sūkṣmatayā cha bhōktuḥ ।
śarīravarṇāśramajātibhēdān
guṇakriyāhētuphalāni nityam ॥ 177॥

asaṅgachidrūpamamuṃ vimōhya
dēhēndriyaprāṇaguṇairnibaddhya ।
ahammamēti bhramayatyajasraṃ
manaḥ svakṛtyēṣu phalōpabhuktiṣu ॥ 178॥

adhyāsadōṣātpuruṣasya saṃsṛtiḥ (pāṭhabhēdaḥ – adhyāsayōgāt)
adhyāsabandhastvamunaiva kalpitaḥ ।
rajastamōdōṣavatō’vivēkinō
janmādiduḥkhasya nidānamētat ॥ 179॥

ataḥ prāhurmanō’vidyāṃ paṇḍitāstattvadarśinaḥ ।
yēnaiva bhrāmyatē viśvaṃ vāyunēvābhramaṇḍalam ॥ 180॥

tanmanaḥśōdhanaṃ kāryaṃ prayatnēna mumukṣuṇā ।
viśuddhē sati chaitasminmuktiḥ karaphalāyatē ॥ 181॥

mōkṣaikasaktyā viṣayēṣu rāgaṃ
nirmūlya sannyasya cha sarvakarma ।
sachChraddhayā yaḥ śravaṇādiniṣṭhō
rajaḥsvabhāvaṃ sa dhunōti buddhēḥ ॥ 182॥

manōmayō nāpi bhavētparātmā
hyādyantavattvātpariṇāmibhāvāt ।
duḥkhātmakatvādviṣayatvahētōḥ
draṣṭā hi dṛśyātmatayā na dṛṣṭaḥ ॥ 183॥

buddhirbuddhīndriyaiḥ sārdhaṃ savṛttiḥ kartṛlakṣaṇaḥ ।
vijñānamayakōśaḥ syātpuṃsaḥ saṃsārakāraṇam ॥ 184॥

anuvrajachchitpratibimbaśaktiḥ
vijñānasañjñaḥ prakṛtērvikāraḥ ।
jñānakriyāvānahamityajasraṃ
dēhēndriyādiṣvabhimanyatē bhṛśam ॥ 185॥

anādikālō’yamahaṃsvabhāvō
jīvaḥ samastavyavahāravōḍhā ।
karōti karmāṇyapi pūrvavāsanaḥ (pāṭhabhēdaḥ – karmāṇyanu)
puṇyānyapuṇyāni cha tatphalāni ॥ 186॥

bhuṅktē vichitrāsvapi yōniṣu vraja-
nnāyāti niryātyadha ūrdhvamēṣaḥ ।
asyaiva vijñānamayasya jāgrat-
svapnādyavasthāḥ sukhaduḥkhabhōgaḥ ॥ 187॥

dēhādiniṣṭhāśramadharmakarma-
guṇābhimānaḥ satataṃ mamēti ।
vijñānakōśō’yamatiprakāśaḥ
prakṛṣṭasānnidhyavaśātparātmanaḥ ।
atō bhavatyēṣa upādhirasya
yadātmadhīḥ saṃsarati bhramēṇa ॥ 188॥

yō’yaṃ vijñānamayaḥ prāṇēṣu hṛdi sphuratyayaṃ jyōtiḥ । (pāṭhabhēdaḥ – sphuratsvayañjyōtiḥ)
kūṭasthaḥ sannātmā kartā bhōktā bhavatyupādhisthaḥ ॥ 189॥

svayaṃ parichChēdamupētya buddhēḥ
tādātmyadōṣēṇa paraṃ mṛṣātmanaḥ ।
sarvātmakaḥ sannapi vīkṣatē svayaṃ
svataḥ pṛthaktvēna mṛdō ghaṭāniva ॥ 190॥

upādhisambandhavaśātparātmā
hyupādhidharmānanubhāti tadguṇaḥ । (pāṭhabhēdaḥ – ‘pyupādhi)
ayōvikārānavikārivahnivat
sadaikarūpō’pi paraḥ svabhāvāt ॥ 191॥

śiṣya uvācha ।
bhramēṇāpyanyathā vā’stu jīvabhāvaḥ parātmanaḥ ।
tadupādhēranāditvānnānādērnāśa iṣyatē ॥ 192॥

atō’sya jīvabhāvō’pi nityā bhavati saṃsṛtiḥ ।
na nivartēta tanmōkṣaḥ kathaṃ mē śrīgurō vada ॥ 193॥

śrīgururuvācha ।
samyakpṛṣṭaṃ tvayā vidvansāvadhānēna tachChṛṇu ।
prāmāṇikī na bhavati bhrāntyā mōhitakalpanā ॥ 194॥

bhrāntiṃ vinā tvasaṅgasya niṣkriyasya nirākṛtēḥ ।
na ghaṭētārthasambandhō nabhasō nīlatādivat ॥ 195॥

svasya draṣṭurnirguṇasyākriyasya
pratyagbōdhānandarūpasya buddhēḥ ।
bhrāntyā prāptō jīvabhāvō na satyō
mōhāpāyē nāstyavastusvabhāvāt ॥ 196॥

yāvadbhrāntistāvadēvāsya sattā
mithyājñānōjjṛmbhitasya pramādāt ।
rajjvāṃ sarpō bhrāntikālīna ēva
bhrāntērnāśē naiva sarpō’pi tadvat ॥ 197॥ (pāṭhabhēdaḥ – sarpō’sti)

anāditvamavidyāyāḥ kāryasyāpi tathēṣyatē ।
utpannāyāṃ tu vidyāyāmāvidyakamanādyapi ॥ 198॥

prabōdhē svapnavatsarvaṃ sahamūlaṃ vinaśyati ।
anādyapīdaṃ nō nityaṃ prāgabhāva iva sphuṭam ॥ 199॥

anādērapi vidhvaṃsaḥ prāgabhāvasya vīkṣitaḥ ।
yadbuddhyupādhisambandhātparikalpitamātmani ॥ 200॥

jīvatvaṃ na tatō’nyastu svarūpēṇa vilakṣaṇaḥ । (pāṭhabhēdaḥ – tatō’nyattu)
sambandhastvātmanō buddhyā mithyājñānapuraḥsaraḥ ॥ 201॥ (pāṭhabhēdaḥ – sambandhaḥ svātmanō)

vinivṛttirbhavēttasya samyagjñānēna nānyathā ।
brahmātmaikatvavijñānaṃ samyagjñānaṃ śrutērmatam ॥ 202॥

tadātmānātmanōḥ samyagvivēkēnaiva sidhyati ।
tatō vivēkaḥ kartavyaḥ pratyagātmasadātmanōḥ ॥ 203॥ (pāṭhabhēdaḥ – pratyagātmāsadātmanōḥ)

jalaṃ paṅkavadatyantaṃ paṅkāpāyē jalaṃ sphuṭam । (pāṭhabhēdaḥ – paṅkavadaspaṣṭaṃ)
yathā bhāti tathātmāpi dōṣābhāvē sphuṭaprabhaḥ ॥ 204॥

asannivṛttau tu sadātmanā sphuṭaṃ
pratītirētasya bhavētpratīchaḥ ।
tatō nirāsaḥ karaṇīya ēva
sadātmanaḥ sādhvahamādivastunaḥ ॥ 205॥ (pāṭhabhēdaḥ – asadātmanaḥ)

atō nāyaṃ parātmā syādvijñānamayaśabdabhāk ।
vikāritvājjaḍatvāchcha parichChinnatvahētutaḥ ।
dṛśyatvādvyabhichāritvānnānityō nitya iṣyatē ॥ 206॥

ānandapratibimbachumbitatanurvṛttistamōjṛmbhitā
syādānandamayaḥ priyādiguṇakaḥ svēṣṭārthalābhōdayaḥ ।
puṇyasyānubhavē vibhāti kṛtināmānandarūpaḥ svayaṃ
sarvō nandati yatra sādhu tanubhṛnmātraḥ prayatnaṃ vinā ॥ 207॥ (pāṭhabhēdaḥ – bhūtvā nandati)

ānandamayakōśasya suṣuptau sphūrtirutkaṭā ।
svapnajāgarayōrīṣadiṣṭasandarśanādinā ॥ 208॥

naivāyamānandamayaḥ parātmā
sōpādhikatvātprakṛtērvikārāt ।
kāryatvahētōḥ sukṛtakriyāyā
vikārasaṅghātasamāhitatvāt ॥ 209॥

pañchānāmapi kōśānāṃ niṣēdhē yuktitaḥ śrutēḥ । (pāṭhabhēdaḥ – yuktitaḥ kṛtē)
tanniṣēdhāvadhi sākṣī bōdharūpō’vaśiṣyatē ॥ 210॥ (pāṭhabhēdaḥ – tanniṣēdhāvadhiḥ)

yō’yamātmā svayañjyōtiḥ pañchakōśavilakṣaṇaḥ ।
avasthātrayasākṣī sannirvikārō nirañjanaḥ ।
sadānandaḥ sa vijñēyaḥ svātmatvēna vipaśchitā ॥ 211॥

śiṣya uvācha ।
mithyātvēna niṣiddhēṣu kōśēṣvētēṣu pañchasu ।
sarvābhāvaṃ vinā kiñchinna paśyāmyatra hē gurō ।
vijñēyaṃ kimu vastvasti svātmanā”tmavipaśchitā ॥ 212॥ (pāṭhabhēdaḥ – svātmanātra vipaśchitā)

śrīgururuvācha ।
satyamuktaṃ tvayā vidvannipuṇō’si vichāraṇē ।
ahamādivikārāstē tadabhāvō’yamapyanu ॥ 213॥ (pāṭhabhēdaḥ – ‘yamapyatha)

sarvē yēnānubhūyantē yaḥ svayaṃ nānubhūyatē ।
tamātmānaṃ vēditāraṃ viddhi buddhyā susūkṣmayā ॥ 214॥

tatsākṣikaṃ bhavēttattadyadyadyēnānubhūyatē ।
kasyāpyananubhūtārthē sākṣitvaṃ nōpayujyatē ॥ 215॥ (pāṭhabhēdaḥ – nōpapadyatē)

asau svasākṣikō bhāvō yataḥ svēnānubhūyatē ।
ataḥ paraṃ svayaṃ sākṣātpratyagātmā na chētaraḥ ॥ 216॥

jāgratsvapnasuṣuptiṣu sphuṭataraṃ yō’sau samujjṛmbhatē
pratyagrūpatayā sadāhamahamityantaḥ sphurannaikadhā । (pāṭhabhēdaḥ – sphurannēkadhā)
nānākāravikārabhāgina imān paśyannahandhīmukhān (pāṭhabhēdaḥ – bhājina)
nityānandachidātmanā sphurati taṃ viddhi svamētaṃ hṛdi ॥ 217॥

ghaṭōdakē bimbitamarkabimba-
mālōkya mūḍhō ravimēva manyatē ।
tathā chidābhāsamupādhisaṃsthaṃ
bhrāntyāhamityēva jaḍō’bhimanyatē ॥ 218॥

ghaṭaṃ jalaṃ tadgatamarkabimbaṃ
vihāya sarvaṃ vinirīkṣyatē’rkaḥ । (pāṭhabhēdaḥ – divi vīkṣyatē’rkaḥ)
taṭastha ētattritayāvabhāsakaḥ (pāṭhabhēdaḥ – taṭasthitaḥ tattri)
svayamprakāśō viduṣā yathā tathā ॥ 219॥

dēhaṃ dhiyaṃ chitpratibimbamēvaṃ (pāṭhabhēdaḥ – chitpratibimbamētaṃ)
visṛjya buddhau nihitaṃ guhāyām ।
draṣṭāramātmānamakhaṇḍabōdhaṃ
sarvaprakāśaṃ sadasadvilakṣaṇam ॥ 220॥

nityaṃ vibhuṃ sarvagataṃ susūkṣmaṃ
antarbahiḥśūnyamananyamātmanaḥ ।
vijñāya samyaṅnijarūpamētat
pumān vipāpmā virajō vimṛtyuḥ ॥ 221॥

viśōka ānandaghanō vipaśchit
svayaṃ kutaśchinna bibhēti kaśchit ।
nānyō’sti panthā bhavabandhamuktēḥ
vinā svatattvāvagamaṃ mumukṣōḥ ॥ 222॥

brahmābhinnatvavijñānaṃ bhavamōkṣasya kāraṇam ।
yēnādvitīyamānandaṃ brahma sampadyatē budhaiḥ ॥ 223॥ (pāṭhabhēdaḥ – sampadyatē budhaḥ)

brahmabhūtastu saṃsṛtyai vidvānnāvartatē punaḥ ।
vijñātavyamataḥ samyagbrahmābhinnatvamātmanaḥ ॥ 224॥

satyaṃ jñānamanantaṃ brahma viśuddhaṃ paraṃ svataḥsiddham ।
nityānandaikarasaṃ pratyagabhinnaṃ nirantaraṃ jayati ॥ 225॥

sadidaṃ paramādvaitaṃ svasmādanyasya vastunō’bhāvāt ।
na hyanyadasti kiñchit samyak paramārthatattvabōdhadaśāyām ॥ 226॥ (pāṭhabhēdaḥ – paratattvabōdhasudaśāyām)

yadidaṃ sakalaṃ viśvaṃ nānārūpaṃ pratītamajñānāt ।
tatsarvaṃ brahmaiva pratyastāśēṣabhāvanādōṣam ॥ 227॥

mṛtkāryabhūtō’pi mṛdō na bhinnaḥ
kumbhō’sti sarvatra tu mṛtsvarūpāt ।
na kumbharūpaṃ pṛthagasti kumbhaḥ
kutō mṛṣā kalpitanāmamātraḥ ॥ 228॥

kēnāpi mṛdbhinnatayā svarūpaṃ
ghaṭasya sandarśayituṃ na śakyatē ।
atō ghaṭaḥ kalpita ēva mōhā-
nmṛdēva satyaṃ paramārthabhūtam ॥ 229॥

sadbrahmakāryaṃ sakalaṃ sadēvaṃ (pāṭhabhēdaḥ – sadaiva)
tanmātramētanna tatō’nyadasti । (pāṭhabhēdaḥ – sanmātramētanna)
astīti yō vakti na tasya mōhō
vinirgatō nidritavatprajalpaḥ ॥ 230॥

brahmaivēdaṃ viśvamityēva vāṇī
śrautī brūtē’tharvaniṣṭhā variṣṭhā ।
tasmādētadbrahmamātraṃ hi viśvaṃ
nādhiṣṭhānādbhinnatā”rōpitasya ॥ 231॥

satyaṃ yadi syājjagadētadātmanō’
nantattvahānirnigamāpramāṇatā ।
asatyavāditvamapīśituḥ syā-
nnaitattrayaṃ sādhu hitaṃ mahātmanām ॥ 232॥

īśvarō vastutattvajñō na chāhaṃ tēṣvavasthitaḥ ।
na cha matsthāni bhūtānītyēvamēva vyachīklṛpat ॥ 233॥ (pāṭhabhēdaḥ – vyachīkathat)

yadi satyaṃ bhavēdviśvaṃ suṣuptāvupalabhyatām ।
yannōpalabhyatē kiñchidatō’satsvapnavanmṛṣā ॥ 234॥

ataḥ pṛthaṅnāsti jagatparātmanaḥ
pṛthakpratītistu mṛṣā guṇādivat । guṇāhivat
ārōpitasyāsti kimarthavattā’-
dhiṣṭhānamābhāti tathā bhramēṇa ॥ 235॥

bhrāntasya yadyadbhramataḥ pratītaṃ
brahmaiva tattadrajataṃ hi śuktiḥ ।
idantayā brahma sadaiva rūpyatē (pāṭhabhēdaḥ – sadēva)
tvārōpitaṃ brahmaṇi nāmamātram ॥ 236॥

ataḥ paraṃ brahma sadadvitīyaṃ
viśuddhavijñānaghanaṃ nirañjanam ।
praśāntamādyantavihīnamakriyaṃ
nirantarānandarasasvarūpam ॥ 237॥

nirastamāyākṛtasarvabhēdaṃ
nityaṃ sukhaṃ niṣkalamapramēyam । (pāṭhabhēdaḥ – nityaṃ dhruvaṃ)
arūpamavyaktamanākhyamavyayaṃ
jyōtiḥ svayaṃ kiñchididaṃ chakāsti ॥ 238॥

jñātṛjñēyajñānaśūnyamanantaṃ nirvikalpakam ।
kēvalākhaṇḍachinmātraṃ paraṃ tattvaṃ vidurbudhāḥ ॥ 239॥

ahēyamanupādēyaṃ manōvāchāmagōcharam ।
apramēyamanādyantaṃ brahma pūrṇamahaṃ mahaḥ ॥ 240॥ (pāṭhabhēdaḥ – pūrṇaṃ mahanmahaḥ)

tattvampadābhyāmabhidhīyamānayōḥ
brahmātmanōḥ śōdhitayōryadīttham । (pāṭhabhēdaḥ – śōdhitayōryadittham)
śrutyā tayōstattvamasīti samyag
ēkatvamēva pratipādyatē muhuḥ ॥ 241-

ēkyaṃ tayōrlakṣitayōrna vāchyayōḥ
nigadyatē’nyōnyaviruddhadharmiṇōḥ ।
khadyōtabhānvōriva rājabhṛtyayōḥ
kūpāmburāśyōḥ paramāṇumērvōḥ ॥ 242॥

tayōrvirōdhō’yamupādhikalpitō
na vāstavaḥ kaśchidupādhirēṣaḥ ।
īśasya māyā mahadādikāraṇaṃ
jīvasya kāryaṃ śaṛṇu pañchakōśam ॥ 243॥ (pāṭhabhēdaḥ – pañchakōśāḥ)

ētāvupādhī parajīvayōstayōḥ
samyaṅnirāsē na parō na jīvaḥ ।
rājyaṃ narēndrasya bhaṭasya khēṭak-
stayōrapōhē na bhaṭō na rājā ॥ 244॥

athāta ādēśa iti śrutiḥ svayaṃ
niṣēdhati brahmaṇi kalpitaṃ dvayam ।
śrutipramāṇānugṛhītabōdhā- (pāṭhabhēdaḥ – pramāṇānugṛhītayuktyā)
ttayōrnirāsaḥ karaṇīya ēva ॥ 245॥

nēdaṃ nēdaṃ kalpitatvānna satyaṃ
rajjudṛṣṭavyālavatsvapnavachcha । (pāṭhabhēdaḥ – rajjau)
itthaṃ dṛśyaṃ sādhuyuktyā vyapōhya
jñēyaḥ paśchādēkabhāvastayōryaḥ ॥ 246॥

tatastu tau lakṣaṇayā sulakṣyau
tayōrakhaṇḍaikarasatvasiddhayē ।
nālaṃ jahatyā na tathā’jahatyā
kintūbhayārthātmikayaiva bhāvyam ॥ 247॥ (pāṭhabhēdaḥ – bhayārthaikatayaiva)

sa dēvadattō’yamitīha chaikatā
viruddhadharmāṃśamapāsya kathyatē ।
yathā tathā tattvamasītivākyē
viruddhadharmānubhayatra hitvā ॥ 248॥

saṃlakṣya chinmātratayā sadātmanōḥ
akhaṇḍabhāvaḥ parichīyatē budhaiḥ ।
ēvaṃ mahāvākyaśatēna kathyatē
brahmātmanōraikyamakhaṇḍabhāvaḥ ॥ 249॥

asthūlamityētadasannirasya
siddhaṃ svatō vyōmavadapratarkyam ।
atō mṛṣāmātramidaṃ pratītaṃ
jahīhi yatsvātmatayā gṛhītam ।
brahmāhamityēva viśuddhabuddhyā
viddhi svamātmānamakhaṇḍabōdham ॥ 250॥

mṛtkāryaṃ sakalaṃ ghaṭādi satataṃ mṛnmātramēvāhitaṃ (pāṭhabhēdaḥ – mṛnmātramēvābhitaḥ)
tadvatsajjanitaṃ sadātmakamidaṃ sanmātramēvākhilam ।
yasmānnāsti sataḥ paraṃ kimapi tatsatyaṃ sa ātmā svayaṃ
tasmāttattvamasi praśāntamamalaṃ brahmādvayaṃ yatparam ॥ 251॥

nidrākalpitadēśakālaviṣayajñātrādi sarvaṃ yathā
mithyā tadvadihāpi jāgrati jagatsvājñānakāryatvataḥ ।
yasmādēvamidaṃ śarīrakaraṇaprāṇāhamādyapyasat
tasmāttattvamasi praśāntamamalaṃ brahmādvayaṃ yatparam ॥ 252॥

yatra bhrāntyā kalpitaṃ tadvivēkē (pāṭhabhēdaḥ – yadvivēkē)
tattanmātraṃ naiva tasmādvibhinnam ।
svapnē naṣṭaṃ svapnaviśvaṃ vichitraṃ
svasmādbhinnaṃ kinnu dṛṣṭaṃ prabōdhē ॥ 253॥

jātinītikulagōtradūragaṃ
nāmarūpaguṇadōṣavarjitam ।
dēśakālaviṣayātivarti yad
brahma tattvamasi bhāvayātmani ॥ 254॥

yatparaṃ sakalavāgagōcharaṃ
gōcharaṃ vimalabōdhachakṣuṣaḥ ।
śuddhachidghanamanādi vastu yad
brahma tattvamasi bhāvayātmani ॥ 255॥

ṣaḍbhirūrmibhirayōgi yōgihṛd-
bhāvitaṃ na karaṇairvibhāvitam ।
buddhyavēdyamanavadyamasti yad (pāṭhabhēdaḥ – bhūti yad)
brahma tattvamasi bhāvayātmani ॥ 256॥

bhrāntikalpitajagatkalāśrayaṃ
svāśrayaṃ cha sadasadvilakṣaṇam ।
niṣkalaṃ nirupamānavaddhi yad (pāṭhabhēdaḥ – nirupamānamṛddhimat)
brahma tattvamasi bhāvayātmani ॥ 257॥

janmavṛddhipariṇatyapakṣaya-
vyādhināśanavihīnamavyayam ।
viśvasṛṣṭyavavighātakāraṇaṃ (pāṭhabhēdaḥ – vanaghātakāraṇaṃ)
brahma tattvamasi bhāvayātmani ॥ 258॥

astabhēdamanapāstalakṣaṇaṃ
nistaraṅgajalarāśiniśchalam ।
nityamuktamavibhaktamūrti yad
brahma tattvamasi bhāvayātmani ॥ 259॥

ēkamēva sadanēkakāraṇaṃ
kāraṇāntaranirāsyakāraṇam । (pāṭhabhēdaḥ – sakāraṇam)
kāryakāraṇavilakṣaṇaṃ svayaṃ
brahma tattvamasi bhāvayātmani ॥ 260॥

nirvikalpakamanalpamakṣaraṃ
yatkṣarākṣaravilakṣaṇaṃ param ।
nityamavyayasukhaṃ nirañjanaṃ
brahma tattvamasi bhāvayātmani ॥ 261॥

yadvibhāti sadanēkadhā bhramā-
nnāmarūpaguṇavikriyātmanā ।
hēmavatsvayamavikriyaṃ sadā
brahma tattvamasi bhāvayātmani ॥ 262॥

yachchakāstyanaparaṃ parātparaṃ
pratyagēkarasamātmalakṣaṇam ।
satyachitsukhamanantamavyayaṃ
brahma tattvamasi bhāvayātmani ॥ 263॥

uktamarthamimamātmani svayaṃ
bhāvayētprathitayuktibhirdhiyā । (pāṭhabhēdaḥ – bhāvaya prathita)
saṃśayādirahitaṃ karāmbuvat
tēna tattvanigamō bhaviṣyati ॥ 264॥

sambōdhamātraṃ pariśuddhatattvaṃ (pāṭhabhēdaḥ – svaṃ bōdhamātraṃ)
vijñāya saṅghē nṛpavachcha sainyē ।
tadāśrayaḥ svātmani sarvadā sthitō (pāṭhabhēdaḥ – tadātmanaivātmani)
vilāpaya brahmaṇi viśvajātam ॥ 265॥ (pāṭhabhēdaḥ – dṛśyajātam)

buddhau guhāyāṃ sadasadvilakṣaṇaṃ
brahmāsti satyaṃ paramadvitīyam ।
tadātmanā yō’tra vasēdguhāyāṃ
punarna tasyāṅgaguhāpravēśaḥ ॥ 266॥

jñātē vastunyapi balavatī vāsanā’nādirēṣā
kartā bhōktāpyahamiti dṛḍhā yā’sya saṃsārahētuḥ ।
pratyagdṛṣṭyā”tmani nivasatā sāpanēyā prayatnā-
nmuktiṃ prāhustadiha munayō vāsanātānavaṃ yat ॥ 267॥

ahaṃ mamēti yō bhāvō dēhākṣādāvanātmani ।
adhyāsō’yaṃ nirastavyō viduṣā svātmaniṣṭhayā ॥ 268॥

jñātvā svaṃ pratyagātmānaṃ buddhitadvṛttisākṣiṇam ।
sō’hamityēva sadvṛttyā’nātmanyātmamatiṃ jahi ॥ 269॥

lōkānuvartanaṃ tyaktvā tyaktvā dēhānuvartanam ।
śāstrānuvartanaṃ tyaktvā svādhyāsāpanayaṃ kuru ॥ 270॥

lōkavāsanayā jantōḥ śāstravāsanayāpi cha ।
dēhavāsanayā jñānaṃ yathāvannaiva jāyatē ॥ 271

saṃsārakārāgṛhamōkṣamichChō-
rayōmayaṃ pādanibandhaśaṛṅkhalam । (pāṭhabhēdaḥ – nibaddha)
vadanti tajjñāḥ paṭu vāsanātrayaṃ
yō’smādvimuktaḥ samupaiti muktim ॥ 272॥

jalādisaṃsargavaśātprabhūta- (pāṭhabhēdaḥ – jalādisamparkavaśāt)
durgandhadhūtā’garudivyavāsanā ।
saṅgharṣaṇēnaiva vibhāti samya-
gvidhūyamānē sati bāhyagandhē ॥ 273॥

antaḥśritānantadurantavāsanā-
dhūlīviliptā paramātmavāsanā ।
prajñātisaṅgharṣaṇatō viśuddhā
pratīyatē chandanagandhavat sphuṭam ॥ 274॥ (pāṭhabhēdaḥ – sphuṭā)

anātmavāsanājālaistirōbhūtātmavāsanā ।
nityātmaniṣṭhayā tēṣāṃ nāśē bhāti svayaṃ sphuṭam ॥ 275॥ (pāṭhabhēdaḥ – sphuṭā)

yathā yathā pratyagavasthitaṃ manaḥ
tathā tathā muñchati bāhyavāsanām । (pāṭhabhēdaḥ – bāhyavāsanāḥ)
niḥśēṣamōkṣē sati vāsanānāṃ
ātmānubhūtiḥ pratibandhaśūnyā ॥ 276॥

svātmanyēva sadā sthitvā manō naśyati yōginaḥ । (pāṭhabhēdaḥ – sthityā)
vāsanānāṃ kṣayaśchātaḥ svādhyāsāpanayaṃ kuru ॥ 277॥

tamō dvābhyāṃ rajaḥ sattvātsattvaṃ śuddhēna naśyati ।
tasmātsattvamavaṣṭabhya svādhyāsāpanayaṃ kuru ॥ 278॥

prārabdhaṃ puṣyati vapuriti niśchitya niśchalaḥ ।
dhairyamālambya yatnēna svādhyāsāpanayaṃ kuru ॥ 279॥

nāhaṃ jīvaḥ paraṃ brahmētyatadvyāvṛttipūrvakam ।
vāsanāvēgataḥ prāptasvādhyāsāpanayaṃ kuru ॥ 280॥

śrutyā yuktyā svānubhūtyā jñātvā sārvātmyamātmanaḥ ।
kvachidābhāsataḥ prāptasvādhyāsāpanayaṃ kuru ॥ 281॥

anādānavisargābhyāmīṣannāsti kriyā munēḥ । (pāṭhabhēdaḥ – annādānavisargā)
tadēkaniṣṭhayā nityaṃ svādhyāsāpanayaṃ kuru ॥ 282॥

tattvamasyādivākyōtthabrahmātmaikatvabōdhataḥ ।
brahmaṇyātmatvadārḍhyāya svādhyāsāpanayaṃ kuru ॥ 283॥

ahambhāvasya dēhē’sminniḥśēṣavilayāvadhi ।
sāvadhānēna yuktātmā svādhyāsāpanayaṃ kuru ॥ 284॥

pratītirjīvajagatōḥ svapnavadbhāti yāvatā ।
tāvannirantaraṃ vidvansvādhyāsāpanayaṃ kuru ॥ 285॥

nidrāyā lōkavārtāyāḥ śabdādērapi vismṛtēḥ ।
kvachinnāvasaraṃ dattvā chintayātmānamātmani ॥ 286॥

mātāpitrōrmalōdbhūtaṃ malamāṃsamayaṃ vapuḥ ।
tyaktvā chāṇḍālavaddūraṃ brahmībhūya kṛtī bhava ॥ 287॥

ghaṭākāśaṃ mahākāśa ivātmānaṃ parātmani ।
vilāpyākhaṇḍabhāvēna tūṣṇī bhava sadā munē ॥ 288॥ (pāṭhabhēdaḥ – tūṣṇīṃ)

svaprakāśamadhiṣṭhānaṃ svayambhūya sadātmanā ।
brahmāṇḍamapi piṇḍāṇḍaṃ tyajyatāṃ malabhāṇḍavat ॥ 289॥

chidātmani sadānandē dēhārūḍhāmahandhiyam ।
nivēśya liṅgamutsṛjya kēvalō bhava sarvadā ॥ 290॥

yatraiṣa jagadābhāsō darpaṇāntaḥ puraṃ yathā ।
tadbrahmāhamiti jñātvā kṛtakṛtyō bhaviṣyasi ॥ 291॥

yatsatyabhūtaṃ nijarūpamādyaṃ
chidadvayānandamarūpamakriyam ।
tadētya mithyāvapurutsṛjēta (pāṭhabhēdaḥ – sṛjaita)
śailūṣavadvēṣamupāttamātmanaḥ ॥ 292॥

sarvātmanā dṛśyamidaṃ mṛṣaiva
naivāhamarthaḥ kṣaṇikatvadarśanāt ।
jānāmyahaṃ sarvamiti pratītiḥ
kutō’hamādēḥ kṣaṇikasya sidhyēt ॥ 293॥

ahampadārthastvahamādisākṣī
nityaṃ suṣuptāvapi bhāvadarśanāt ।
brūtē hyajō nitya iti śrutiḥ svayaṃ
tatpratyagātmā sadasadvilakṣaṇaḥ ॥ 294॥

vikāriṇāṃ sarvavikāravēttā
nityāvikārō bhavituṃ samarhati । (pāṭhabhēdaḥ – nityō’vikārō)
manōrathasvapnasuṣuptiṣu sphuṭaṃ
punaḥ punardṛṣṭamasattvamētayōḥ ॥ 295॥

atō’bhimānaṃ tyaja māṃsapiṇḍē
piṇḍābhimāninyapi buddhikalpitē ।
kālatrayābādhyamakhaṇḍabōdhaṃ
jñātvā svamātmānamupaihi śāntim ॥ 296॥

tyajābhimānaṃ kulagōtranāma-
rūpāśramēṣvārdraśavāśritēṣu ।
liṅgasya dharmānapi kartṛtādīṃ-
styaktvā bhavākhaṇḍasukhasvarūpaḥ ॥ 297॥

santyanyē pratibandhāḥ puṃsaḥ saṃsārahētavō dṛṣṭāḥ ।
tēṣāmēvaṃ mūlaṃ prathamavikārō bhavatyahaṅkāraḥ ॥ 298॥ (pāṭhabhēdaḥ – tēṣāmēṣāṃ)

yāvatsyātsvasya sambandhō’haṅkārēṇa durātmanā ।
tāvanna lēśamātrāpi muktivārtā vilakṣaṇā ॥ 299॥

ahaṅkāragrahānmuktaḥ svarūpamupapadyatē ।
chandravadvimalaḥ pūrṇaḥ sadānandaḥ svayamprabhaḥ ॥ 300॥

yō vā purē sō’hamiti pratītō (pāṭhabhēdaḥ – puraiṣō’hamiti)
buddhyā praklṛptastamasā’timūḍhayā । (pāṭhabhēdaḥ – buddhyā’viviktastamasā)
tasyaiva niḥśēṣatayā vināśē
brahmātmabhāvaḥ pratibandhaśūnyaḥ ॥ 301॥

brahmānandanidhirmahābalavatā’haṅkāraghōrāhinā
saṃvēṣṭyātmani rakṣyatē guṇamayaiśchaṇḍēstribhirmastakaiḥ (pāṭhabhēdaḥ – chaṇḍai)
vijñānākhyamahāsinā śrutimatā vichChidya śīrṣatrayaṃ (pāṭhabhēdaḥ – dyutimatā)
nirmūlyāhimimaṃ nidhiṃ sukhakaraṃ dhīrō’nubhōktuṅkṣamaḥ ॥ 302॥

yāvadvā yatkiñchidviṣadōṣasphūrtirasti chēddēhē ।
kathamārōgyāya bhavēttadvadahantāpi yōginō muktyai ॥ 303॥

ahamō’tyantanivṛttyā tatkṛtanānāvikalpasaṃhṛtyā ।
pratyaktattvavivēkādidamahamasmīti vindatē tattvam ॥ 304॥ (pāṭhabhēdaḥ – vivēkādayam)

ahaṅkārē kartaryahamiti matiṃ muñcha sahasā (pāṭhabhēdaḥ – ahaṅkartaryasminnahamiti)
vikārātmanyātmapratiphalajuṣi svasthitimuṣi ।
yadadhyāsātprāptā janimṛtijarāduḥkhabahulā
pratīchaśchinmūrtēstava sukhatanōḥ saṃsṛtiriyam ॥ 305॥

sadaikarūpasya chidātmanō vibhō-
rānandamūrtēranavadyakīrtēḥ ।
naivānyathā kvāpyavikāriṇastē
vināhamadhyāsamamuṣya saṃsṛtiḥ ॥ 306॥

tasmādahaṅkāramimaṃ svaśatruṃ
bhōkturgalē kaṇṭakavatpratītam ।
vichChidya vijñānamahāsinā sphuṭaṃ
bhuṅkṣvātmasāmrājyasukhaṃ yathēṣṭam ॥ 307॥

tatō’hamādērvinivartya vṛttiṃ
santyaktarāgaḥ paramārthalābhāt ।
tūṣṇīṃ samāssvātmasukhānubhūtyā
pūrṇātmanā brahmaṇi nirvikalpaḥ ॥ 308॥

samūlakṛttō’pi mahānahaṃ punaḥ
vyullēkhitaḥ syādyadi chētasā kṣaṇam ।
sañjīvya vikṣēpaśataṃ karōti
nabhasvatā prāvṛṣi vāridō yathā ॥ 309॥

nigṛhya śatrōrahamō’vakāśaḥ
kvachinna dēyō viṣayānuchintayā ।
sa ēva sañjīvanahēturasya
prakṣīṇajambīratarōrivāmbu ॥ 310॥

dēhātmanā saṃsthita ēva kāmī
vilakṣaṇaḥ kāmayitā kathaṃ syāt ।
atō’rthasandhānaparatvamēva
bhēdaprasaktyā bhavabandhahētuḥ ॥ 311॥

kāryapravardhanādbījapravṛddhiḥ paridṛśyatē ।
kāryanāśādbījanāśastasmātkāryaṃ nirōdhayēt ॥ 312॥

vāsanāvṛddhitaḥ kāryaṃ kāryavṛddhyā cha vāsanā ।
vardhatē sarvathā puṃsaḥ saṃsārō na nivartatē ॥ 313॥

saṃsārabandhavichChittyai tad dvayaṃ pradahēdyatiḥ ।
vāsanāvṛddhirētābhyāṃ chintayā kriyayā bahiḥ ॥ 314॥ (pāṭhabhēdaḥ – vāsanā prēryatē hyantaḥ)

tābhyāṃ pravardhamānā sā sūtē saṃsṛtimātmanaḥ ।
trayāṇāṃ cha kṣayōpāyaḥ sarvāvasthāsu sarvadā ॥ 315॥

sarvatra sarvataḥ sarvabrahmamātrāvalōkanaiḥ । (pāṭhabhēdaḥ – mātrāvalōkanam)
sadbhāvavāsanādārḍhyāttattrayaṃ layamaśnutē ॥ 316॥

kriyānāśē bhavēchchintānāśō’smādvāsanākṣayaḥ ।
vāsanāprakṣayō mōkṣaḥ sā jīvanmuktiriṣyatē ॥ 317॥ (pāṭhabhēdaḥ – sa)

sadvāsanāsphūrtivijṛmbhaṇē sati
hyasau vilīnāpyahamādivāsanā । (pāṭhabhēdaḥ – vilīnā tvahamādivāsanā)
atiprakṛṣṭāpyaruṇaprabhāyāṃ
vilīyatē sādhu yathā tamisrā ॥ 318॥

tamastamaḥkāryamanarthajālaṃ
na dṛśyatē satyuditē dinēśē ।
tathā’dvayānandarasānubhūtau
naivāsti bandhō na cha duḥkhagandhaḥ ॥ 319॥

dṛśyaṃ pratītaṃ pravilāpayansan (pāṭhabhēdaḥ – pravilāpayansvayaṃ)
sanmātramānandaghanaṃ vibhāvayan ।
samāhitaḥ sanbahirantaraṃ vā
kālaṃ nayēthāḥ sati karmabandhē ॥ 320॥

pramādō brahmaniṣṭhāyāṃ na kartavyaḥ kadāchana ।
pramādō mṛtyurityāha bhagavānbrahmaṇaḥ sutaḥ ॥ 321॥

na pramādādanarthō’nyō jñāninaḥ svasvarūpataḥ ।
tatō mōhastatō’handhīstatō bandhastatō vyathā ॥ 322॥

viṣayābhimukhaṃ dṛṣṭvā vidvāṃsamapi vismṛtiḥ ।
vikṣēpayati dhīdōṣairyōṣā jāramiva priyam ॥ 323॥

yathāpakṛṣṭaṃ śaivālaṃ kṣaṇamātraṃ na tiṣṭhati ।
āvṛṇōti tathā māyā prājñaṃ vāpi parāṅmukham ॥ 324॥

lakṣyachyutaṃ chēdyadi chittamīṣad
bahirmukhaṃ sannipatēttatastataḥ ।
pramādataḥ prachyutakēlikandukaḥ
sōpānapaṅktau patitō yathā tathā ॥ 325॥

viṣayēṣvāviśachchētaḥ saṅkalpayati tadguṇān ।
samyaksaṅkalpanātkāmaḥ kāmātpuṃsaḥ pravartanam ॥ 326॥

ataḥ pramādānna parō’sti mṛtyuḥ
vivēkinō brahmavidaḥ samādhau ।
samāhitaḥ siddhimupaiti samyak
samāhitātmā bhava sāvadhānaḥ ॥ 327॥

tataḥ svarūpavibhraṃśō vibhraṣṭastu patatyadhaḥ ।
patitasya vinā nāśaṃ punarnārōha īkṣyatē ॥ 328॥

saṅkalpaṃ varjayēttasmātsarvānarthasya kāraṇam ।
apathyāni hi vastūni vyādhigrastō yathōtsṛjē ।
jīvatō yasya kaivalyaṃ vidēhē sa cha kēvalaḥ ।
yatkiñchit paśyatō bhēdaṃ bhayaṃ brūtē yajuḥśrutiḥ ॥ 329॥

yadā kadā vāpi vipaśchidēṣa
brahmaṇyanantē’pyaṇumātrabhēdam ।
paśyatyathāmuṣya bhayaṃ tadaiva
yadvīkṣitaṃ bhinnatayā pramādāt ॥ 330॥ (pāṭhabhēdaḥ – yadīkṣitaṃ)

śrutismṛtinyāyaśatairniṣiddhē
dṛśyē’tra yaḥ svātmamatiṃ karōti ।
upaiti duḥkhōpari duḥkhajātaṃ
niṣiddhakartā sa malimluchō yathā ॥ 331॥

satyābhisandhānaratō vimuktō
mahattvamātmīyamupaiti nityam ।
mithyābhisandhānaratastu naśyēd
dṛṣṭaṃ tadētadyadachaurachaurayōḥ ॥ 332॥ (pāṭhabhēdaḥ – chōrachōrayōḥ)

yatirasadanusandhiṃ bandhahētuṃ vihāya
svayamayamahamasmītyātmadṛṣṭyaiva tiṣṭhēt
sukhayati nanu niṣṭhā brahmaṇi svānubhūtyā
harati paramavidyākāryaduḥkhaṃ pratītam ॥ 333॥

bāhyānusandhiḥ parivardhayētphalaṃ (pāṭhabhēdaḥ – bāhyābhisandhiḥ)
durvāsanāmēva tatastatō’dhikām ।
jñātvā vivēkaiḥ parihṛtya bāhyaṃ
svātmānusandhiṃ vidadhīta nityam ॥ 334॥

bāhyē niruddhē manasaḥ prasannatā
manaḥprasādē paramātmadarśanam ।
tasminsudṛṣṭē bhavabandhanāśō
bahirnirōdhaḥ padavī vimuktēḥ ॥ 335॥

kaḥ paṇḍitaḥ sansadasadvivēkī
śrutipramāṇaḥ paramārthadarśī ।
jānanhi kuryādasatō’valambaṃ
svapātahētōḥ śiśuvanmumukṣuḥ ॥ 336॥

dēhādisaṃsaktimatō na muktiḥ
muktasya dēhādyabhimatyabhāvaḥ ।
suptasya nō jāgaraṇaṃ na jāgrataḥ
svapnastayōrbhinnaguṇāśrayatvāt ॥ 337॥

antarbahiḥ svaṃ sthirajaṅgamēṣu
jñātvā”tmanādhāratayā vilōkya । (pāṭhabhēdaḥ – jñānātman)
tyaktākhilōpādhirakhaṇḍarūpaḥ
pūrṇātmanā yaḥ sthita ēṣa muktaḥ ॥ 338॥

sarvātmanā bandhavimuktihētuḥ
sarvātmabhāvānna parō’sti kaśchit ।
dṛśyāgrahē satyupapadyatē’sau
sarvātmabhāvō’sya sadātmaniṣṭhayā ॥ 339॥

dṛśyasyāgrahaṇaṃ kathaṃ nu ghaṭatē dēhātmanā tiṣṭhatō
bāhyārthānubhavaprasaktamanasastattatkriyāṃ kurvataḥ ।
sannyastākhiladharmakarmaviṣayairnityātmaniṣṭhāparaiḥ
tattvajñaiḥ karaṇīyamātmani sadānandēchChubhiryatnataḥ ॥ 340॥

sarvātmasiddhayē bhikṣōḥ kṛtaśravaṇakarmaṇaḥ । (pāṭhabhēdaḥ – sārvātmya)
samādhiṃ vidadhātyēṣā śāntō dānta iti śrutiḥ ॥ 341॥

ārūḍhaśaktērahamō vināśaḥ
kartunna śakya sahasāpi paṇḍitaiḥ । (pāṭhabhēdaḥ – kartuṃ na)
yē nirvikalpākhyasamādhiniśchalāḥ
tānantarā’nantabhavā hi vāsanāḥ ॥ 342॥

ahambuddhyaiva mōhinyā yōjayitvā”vṛtērbalāt ।
vikṣēpaśaktiḥ puruṣaṃ vikṣēpayati tadguṇaiḥ ॥ 343॥

vikṣēpaśaktivijayō viṣamō vidhātuṃ
niḥśēṣamāvaraṇaśaktinivṛttyabhāvē ।
dṛgdṛśyayōḥ sphuṭapayōjalavadvibhāgē
naśyēttadāvaraṇamātmani cha svabhāvāt ।
niḥsaṃśayēna bhavati pratibandhaśūnyō
vikṣēpaṇaṃ na hi tadā yadi chēnmṛṣārthē ॥ 344॥ (pāṭhabhēdaḥ – nikṣēpaṇaṃ)

samyagvivēkaḥ sphuṭabōdhajanyō
vibhajya dṛgdṛśyapadārthatattvam ।
Chinatti māyākṛtamōhabandhaṃ
yasmādvimuktastu punarna saṃsṛtiḥ ॥ 345॥ (pāṭhabhēdaḥ – vimuktasya)

parāvaraikatvavivēkavahniḥ
dahatyavidyāgahanaṃ hyaśēṣam ।
kiṃ syātpunaḥ saṃsaraṇasya bījaṃ
advaitabhāvaṃ samupēyuṣō’sya ॥ 346॥

āvaraṇasya nivṛttirbhavati hi samyakpadārthadarśanataḥ ।
mithyājñānavināśastadvikṣēpajanitaduḥkhanivṛttiḥ ॥ 347॥

ētattritayaṃ dṛṣṭaṃ samyagrajjusvarūpavijñānāt ।
tasmādvastusatattvaṃ jñātavyaṃ bandhamuktayē viduṣā ॥ 348॥

ayō’gniyōgādiva satsamanvayān
mātrādirūpēṇa vijṛmbhatē dhīḥ ।
tatkāryamētaddvitayaṃ yatō mṛṣā (pāṭhabhēdaḥ – tatkāryamēva tritayaṃ)
dṛṣṭaṃ bhramasvapnamanōrathēṣu ॥ 349॥

tatō vikārāḥ prakṛtērahammukhā
dēhāvasānā viṣayāścha sarvē ।
kṣaṇē’nyathābhāvitayā hyamīṣā- (pāṭhabhēdaḥ – bhāvina ēṣa ātmā)
masattvamātmā tu kadāpi nānyathā ॥ 350॥ (pāṭhabhēdaḥ – masattvamātmā tu kadāpi)

nityādvayākhaṇḍachidēkarūpō
buddhyādisākṣī sadasadvilakṣaṇaḥ ।
ahampadapratyayalakṣitārthaḥ
pratyak sadānandaghanaḥ parātmā ॥ 351॥

itthaṃ vipaśchitsadasadvibhajya
niśchitya tattvaṃ nijabōdhadṛṣṭyā ।
jñātvā svamātmānamakhaṇḍabōdhaṃ
tēbhyō vimuktaḥ svayamēva śāmyati ॥ 352॥

ajñānahṛdayagranthērniḥśēṣavilayastadā ।
samādhinā’vikalpēna yadā’dvaitātmadarśanam ॥ 353॥

tvamahamidamitīyaṃ kalpanā buddhidōṣāt
prabhavati paramātmanyadvayē nirviśēṣē ।
pravilasati samādhāvasya sarvō vikalpō
vilayanamupagachChēdvastutattvāvadhṛtyā ॥ 354॥

śāntō dāntaḥ paramuparataḥ kṣāntiyuktaḥ samādhiṃ
kurvannityaṃ kalayati yatiḥ svasya sarvātmabhāvam ।
tēnāvidyātimirajanitānsādhu dagdhvā vikalpān
brahmākṛtyā nivasati sukhaṃ niṣkriyō nirvikalpaḥ ॥ 355॥

samāhitā yē pravilāpya bāhyaṃ
śrōtrādi chētaḥ svamahaṃ chidātmani ।
ta ēva muktā bhavapāśabandhaiḥ
nānyē tu pārōkṣyakathābhidhāyinaḥ ॥ 356॥

upādhibhēdātsvayamēva bhidyatē (pāṭhabhēdaḥ – yōgātsvayamēva)
chōpādhyapōhē svayamēva kēvalaḥ ।
tasmādupādhērvilayāya vidvān
vasētsadā’kalpasamādhiniṣṭhayā ॥ 357॥

sati saktō narō yāti sadbhāvaṃ hyēkaniṣṭhayā ।
kīṭakō bhramaraṃ dhyāyan bhramaratvāya kalpatē ॥ 358॥

kriyāntarāsaktimapāsya kīṭakō
dhyāyannalitvaṃ hyalibhāvamṛchChati । (pāṭhabhēdaḥ – dhyāyanyathāliṃ)
tathaiva yōgī paramātmatattvaṃ
dhyātvā samāyāti tadēkaniṣṭhayā ॥ 359॥

atīva sūkṣmaṃ paramātmatattvaṃ
na sthūladṛṣṭyā pratipattumarhati ।
samādhinātyantasusūkṣmavṛttyā
jñātavyamāryairatiśuddhabuddhibhiḥ ॥ 360॥

yathā suvarṇaṃ puṭapākaśōdhitaṃ
tyaktvā malaṃ svātmaguṇaṃ samṛchChati ।
tathā manaḥ sattvarajastamōmalaṃ
dhyānēna santyajya samēti tattvam ॥ 361॥

nirantarābhyāsavaśāttaditthaṃ
pakvaṃ manō brahmaṇi līyatē yadā ।
tadā samādhiḥ savikalpavarjitaḥ (pāṭhabhēdaḥ – sa vikalpavarjitaḥ)
svatō’dvayānandarasānubhāvakaḥ ॥ 362॥

samādhinā’nēna samastavāsanā-
granthērvināśō’khilakarmanāśaḥ ।
antarbahiḥ sarvata ēva sarvadā
svarūpavisphūrtirayatnataḥ syāt ॥ 363॥

śrutēḥ śataguṇaṃ vidyānmananaṃ mananādapi ।
nididhyāsaṃ lakṣaguṇamanantaṃ nirvikalpakam ॥ 364॥

nirvikalpakasamādhinā sphuṭaṃ
brahmatattvamavagamyatē dhruvam ।
nānyathā chalatayā manōgatēḥ
pratyayāntaravimiśritaṃ bhavēt ॥ 365॥

ataḥ samādhatsva yatēndriyaḥ san
nirantaraṃ śāntamanāḥ pratīchi ।
vidhvaṃsaya dhvāntamanādyavidyayā
kṛtaṃ sadēkatvavilōkanēna ॥ 366॥

yōgasya prathamadvāraṃ vāṅnirōdhō’parigrahaḥ । (pāṭhabhēdaḥ – prathamaṃ dvāraṃ)
nirāśā cha nirīhā cha nityamēkāntaśīlatā ॥ 367॥

ēkāntasthitirindriyōparamaṇē hēturdamaśchētasaḥ
saṃrōdhē karaṇaṃ śamēna vilayaṃ yāyādahaṃvāsanā ।
tēnānandarasānubhūtirachalā brāhmī sadā yōginaḥ
tasmāchchittanirōdha ēva satataṃ kāryaḥ prayatnō munēḥ ॥ 368॥ prayatnānmunēḥ
vāchaṃ niyachChātmani taṃ niyachCha
buddhau dhiyaṃ yachCha cha buddhisākṣiṇi ।
taṃ chāpi pūrṇātmani nirvikalpē
vilāpya śāntiṃ paramāṃ bhajasva ॥ 369॥

dēhaprāṇēndriyamanōbuddhyādibhirupādhibhiḥ ।
yairyairvṛttēḥsamāyōgastattadbhāvō’sya yōginaḥ ॥ 370॥

tannivṛttyā munēḥ samyak sarvōparamaṇaṃ sukham ।
sandṛśyatē sadānandarasānubhavaviplavaḥ ॥ 371॥

antastyāgō bahistyāgō viraktasyaiva yujyatē ।
tyajatyantarbahiḥsaṅgaṃ viraktastu mumukṣayā ॥ 372॥

bahistu viṣayaiḥ saṅgaṃ tathāntarahamādibhiḥ । (pāṭhabhēdaḥ – saṅgaḥ)
virakta ēva śaknōti tyaktuṃ brahmaṇi niṣṭhitaḥ ॥ 373॥

vairāgyabōdhau puruṣasya pakṣivat
pakṣau vijānīhi vichakṣaṇa tvam ।
vimuktisaudhāgralatādhirōhaṇaṃ
tābhyāṃ vinā nānyatarēṇa sidhyati ॥ 374॥

atyantavairāgyavataḥ samādhiḥ
samāhitasyaiva dṛḍhaprabōdhaḥ ।
prabuddhatattvasya hi bandhamuktiḥ
muktātmanō nityasukhānubhūtiḥ ॥ 375॥

vairāgyānna paraṃ sukhasya janakaṃ paśyāmi vaśyātmanaḥ
tachchēchChuddhatarātmabōdhasahitaṃ svārājyasāmrājyadhuk ।
ētaddvāramajasramuktiyuvatēryasmāttvamasmātparaṃ
sarvatrāspṛhayā sadātmani sadā prajñāṃ kuru śrēyasē ॥ 376॥

āśāṃ Chinddhi viṣōpamēṣu viṣayēṣvēṣaiva mṛtyōḥ kṛti- (pāṭhabhēdaḥ – mṛtyōḥ sṛti)
styaktvā jātikulāśramēṣvabhimatiṃ muñchātidūrātkriyāḥ ।
dēhādāvasati tyajātmadhiṣaṇāṃ prajñāṃ kuruṣvātmani
tvaṃ draṣṭāsyamanō’si nirdvayaparaṃ brahmāsi yadvastutaḥ ॥ 377॥ (pāṭhabhēdaḥ – draṣṭāsyamalō)

lakṣyē brahmaṇi mānasaṃ dṛḍhataraṃ saṃsthāpya bāhyēndriyaṃ
svasthānē vinivēśya niśchalatanuśchōpēkṣya dēhasthitim ।
brahmātmaikyamupētya tanmayatayā chākhaṇḍavṛttyā’niśaṃ
brahmānandarasaṃ pibātmani mudā śūnyaiḥ kimanyairbhṛśam ॥ 378॥ (pāṭhabhēdaḥ – kimanyairbhramaiḥ)

anātmachintanaṃ tyaktvā kaśmalaṃ duḥkhakāraṇam ।
chintayātmānamānandarūpaṃ yanmuktikāraṇam ॥ 379॥

ēṣa svayañjyōtiraśēṣasākṣī
vijñānakōśō vilasatyajasram । vijñānakōśē
lakṣyaṃ vidhāyainamasadvilakṣaṇa-
makhaṇḍavṛttyā”tmatayā’nubhāvaya ॥ 380॥

ētamachChinnayā vṛttyā pratyayāntaraśūnyayā ।
ullēkhayanvijānīyātsvasvarūpatayā sphuṭam ॥ 381॥

atrātmatvaṃ dṛḍhīkurvannahamādiṣu santyajan ।
udāsīnatayā tēṣu tiṣṭhētsphuṭaghaṭādivat ॥ 382॥ (pāṭhabhēdaḥ – tiṣṭhēdghaṭapaṭādivat)

viśuddhamantaḥkaraṇaṃ svarūpē
nivēśya sākṣiṇyavabōdhamātrē ।
śanaiḥ śanairniśchalatāmupānayan
pūrṇaṃ svamēvānuvilōkayēttataḥ ॥ 383॥ (pāṭhabhēdaḥ – pūrṇatvamēvānu)

dēhēndriyaprāṇamanō’hamādibhiḥ
svājñānaklṛptairakhilairupādhibhiḥ ।
vimuktamātmānamakhaṇḍarūpaṃ
pūrṇaṃ mahākāśamivāvalōkayēt ॥ 384॥

ghaṭakalaśakusūlasūchimukhyaiḥ
gaganamupādhiśatairvimuktamēkam ।
bhavati na vividhaṃ tathaiva śuddhaṃ
paramahamādivimuktamēkamēva ॥ 385॥

brahmādistambaparyantā mṛṣāmātrā upādhayaḥ । (pāṭhabhēdaḥ – brahmādyāḥ stamba)
tataḥ pūrṇaṃ svamātmānaṃ paśyēdēkātmanā sthitam ॥ 386॥

yatra bhrāntyā kalpitaṃ tadvivēkē (pāṭhabhēdaḥ – yadvivēkē)
tattanmātraṃ naiva tasmādvibhinnam ।
bhrāntērnāśē bhāti dṛṣṭāhitattvaṃ (pāṭhabhēdaḥ – bhrāntidṛṣṭā)
rajjustadvadviśvamātmasvarūpam ॥ 387॥

svayaṃ brahmā svayaṃ viṣṇuḥ svayamindraḥ svayaṃ śivaḥ ।
svayaṃ viśvamidaṃ sarvaṃ svasmādanyanna kiñchana ॥ 388॥

antaḥ svayaṃ chāpi bahiḥ svayaṃ cha
svayaṃ purastāt svayamēva paśchāt ।
svayaṃ hyāvāchyāṃ svayamapyudīchyāṃ (pāṭhabhēdaḥ – hyavāchyāṃ)
tathōpariṣṭātsvayamapyadhastāt ॥ 389॥

taraṅgaphēnabhramabudbudādi
sarvaṃ svarūpēṇa jalaṃ yathā tathā ।
chidēva dēhādyahamantamētat
sarvaṃ chidēvaikarasaṃ viśuddham ॥ 390॥

sadēvēdaṃ sarvaṃ jagadavagataṃ vāṅmanasayōḥ
satō’nyannāstyēva prakṛtiparasīmni sthitavataḥ ।
pṛthak kiṃ mṛtsnāyāḥ kalaśaghaṭakumbhādyavagataṃ
vadatyēṣa bhrāntastvamahamiti māyāmadirayā ॥ 391॥

kriyāsamabhihārēṇa yatra nānyaditi śrutiḥ ।
bravīti dvaitarāhityaṃ mithyādhyāsanivṛttayē ॥ 392॥

ākāśavannirmalanirvikalpaṃ (pāṭhabhēdaḥ – nirvikalpa)
niḥsīmaniḥspandananirvikāram ।
antarbahiḥśūnyamananyamadvayaṃ
svayaṃ paraṃ brahma kimasti bōdhyam ॥ 393॥

vaktavyaṃ kimu vidyatē’tra bahudhā brahmaiva jīvaḥ svayaṃ
brahmaitajjagadātataṃ nu sakalaṃ brahmādvitīyaṃ śrutiḥ । (pāṭhabhēdaḥ – jagadāparāṇu sakalaṃ)
brahmaivāhamiti prabuddhamatayaḥ santyaktabāhyāḥ sphuṭaṃ
brahmībhūya vasanti santatachidānandātmanaitaddhruvam ॥ 394॥ (pāṭhabhēdaḥ – ānandātmanaiva dhruvam)

jahi malamayakōśē’handhiyōtthāpitāśāṃ
prasabhamanilakalpē liṅgadēhē’pi paśchāt ।
nigamagaditakīrtiṃ nityamānandamūrtiṃ
svayamiti parichīya brahmarūpēṇa tiṣṭha ॥ 395॥

śavākāraṃ yāvadbhajati manujastāvadaśuchiḥ
parēbhyaḥ syātklēśō jananamaraṇavyādhinilayaḥ । (pāṭhabhēdaḥ – vyādhinirayāḥ)
yadātmānaṃ śuddhaṃ kalayati śivākāramachalam
tadā tēbhyō muktō bhavati hi tadāha śrutirapi ॥ 396॥

svātmanyārōpitāśēṣābhāsavastunirāsataḥ ।
svayamēva paraṃ brahma pūrṇamadvayamakriyam ॥ 397॥

samāhitāyāṃ sati chittavṛttau
parātmani brahmaṇi nirvikalpē ।
na dṛśyatē kaśchidayaṃ vikalpaḥ
prajalpamātraḥ pariśiṣyatē yataḥ ॥ 398॥ (pāṭhabhēdaḥ – tataḥ)

asatkalpō vikalpō’yaṃ viśvamityēkavastuni ।
nirvikārē nirākārē nirviśēṣē bhidā kutaḥ ॥ 399॥

draṣṭudarśanadṛśyādibhāvaśūnyaikavastuni । (pāṭhabhēdaḥ – draṣṭṛdarśana)
nirvikārē nirākārē nirviśēṣē bhidā kutaḥ ॥ 400॥

kalpārṇava ivātyantaparipūrṇaikavastuni ।
nirvikārē nirākārē nirviśēṣē bhidā kutaḥ ॥ 401॥

tējasīva tamō yatra pralīnaṃ bhrāntikāraṇam । (pāṭhabhēdaḥ – yatra vilīnaṃ)
advitīyē parē tattvē nirviśēṣē bhidā kutaḥ ॥ 402॥

ēkātmakē parē tattvē bhēdavārtā kathaṃ vasēt । (pāṭhabhēdaḥ – kathaṃ bhavēt)
suṣuptau sukhamātrāyāṃ bhēdaḥ kēnāvalōkitaḥ ॥ 403॥

na hyasti viśvaṃ paratattvabōdhāt
sadātmani brahmaṇi nirvikalpē ।
kālatrayē nāpyahirīkṣitō guṇē
na hyambubindurmṛgatṛṣṇikāyām ॥ 404॥

māyāmātramidaṃ dvaitamadvaitaṃ paramārthataḥ ।
iti brūtē śrutiḥ sākṣātsuṣuptāvanubhūyatē ॥ 405॥

ananyatvamadhiṣṭhānādārōpyasya nirīkṣitam ।
paṇḍitai rajjusarpādau vikalpō bhrāntijīvanaḥ ॥ 406॥

chittamūlō vikalpō’yaṃ chittābhāvē na kaśchana ।
ataśchittaṃ samādhēhi pratyagrūpē parātmani ॥ 407॥

kimapi satatabōdhaṃ kēvalānandarūpaṃ
nirupamamativēlaṃ nityamuktaṃ nirīham ।
niravadhigaganābhaṃ niṣkalaṃ nirvikalpaṃ
hṛdi kalayati vidvān brahma pūrṇaṃ samādhau ॥ 408॥

prakṛtivikṛtiśūnyaṃ bhāvanātītabhāvaṃ
samarasamasamānaṃ mānasambandhadūram ।
nigamavachanasiddhaṃ nityamasmatprasiddhaṃ
hṛdi kalayati vidvān brahma pūrṇaṃ samādhau ॥ 409॥

ajaramamaramastābhāvavastusvarūpaṃ (pāṭhabhēdaḥ – bhāsavastu)
stimitasalilarāśiprakhyamākhyāvihīnam ।
śamitaguṇavikāraṃ śāśvataṃ śāntamēkaṃ
hṛdi kalayati vidvān brahma pūrṇaṃ samādhau ॥ 410॥

samāhitāntaḥkaraṇaḥ svarūpē
vilōkayātmānamakhaṇḍavaibhavam ।
vichChinddhi bandhaṃ bhavagandhagandhitaṃ (pāṭhabhēdaḥ – gandhagandhilaṃ)
yatnēna puṃstvaṃ saphalīkuruṣva ॥ 411-

sarvōpādhivinirmuktaṃ sachchidānandamadvayam ।
bhāvayātmānamātmasthaṃ na bhūyaḥ kalpasē’dhvanē ॥ 412॥

Chāyēva puṃsaḥ paridṛśyamāna-
mābhāsarūpēṇa phalānubhūtyā ।
śarīramārāchChavavannirastaṃ
punarna sandhatta idaṃ mahātmā ॥ 413॥

satatavimalabōdhānandarūpaṃ samētya (pāṭhabhēdaḥ – svamētya)
tyaja jaḍamalarūpōpādhimētaṃ sudūrē ।
atha punarapi naiṣa smaryatāṃ vāntavastu (pāṭhabhēdaḥ – punarapi naiva)
smaraṇaviṣayabhūtaṃ kalpatē kutsanāya ॥ 414॥

samūlamētatparidāhya vahnau (pāṭhabhēdaḥ – paridahya)
sadātmani brahmaṇi nirvikalpē ।
tataḥ svayaṃ nityaviśuddhabōdhā-
nandātmanā tiṣṭhati vidvariṣṭhaḥ ॥ 415॥

prārabdhasūtragrathitaṃ śarīraṃ
prayātu vā tiṣṭhatu gōriva srak ।
na tatpunaḥ paśyati tattvavēttā-
”nandātmani brahmaṇi līnavṛttiḥ ॥ 416॥

akhaṇḍānandamātmānaṃ vijñāya svasvarūpataḥ ।
kimichChan kasya vā hētōrdēhaṃ puṣṇāti tattvavit ॥ 417॥

saṃsiddhasya phalaṃ tvētajjīvanmuktasya yōginaḥ ।
bahirantaḥ sadānandarasāsvādanamātmani ॥ 418॥

vairāgyasya phalaṃ bōdhō bōdhasyōparatiḥ phalam ।
svānandānubhavāchChāntirēṣaivōparatēḥ phalam ॥ 419॥

yadyuttarōttarābhāvaḥ pūrvapūrvantu niṣphalam ।
nivṛttiḥ paramā tṛptirānandō’nupamaḥ svataḥ ॥ 420॥

dṛṣṭaduḥkhēṣvanudvēgō vidyāyāḥ prastutaṃ phalam ।
yatkṛtaṃ bhrāntivēlāyāṃ nānā karma jugupsitam ।
paśchānnarō vivēkēna tatkathaṃ kartumarhati ॥ 421॥

vidyāphalaṃ syādasatō nivṛttiḥ
pravṛttirajñānaphalaṃ tadīkṣitam ।
tajjñājñayōryanmṛgatṛṣṇikādau
nōchēdvidāṃ dṛṣṭaphalaṃ kimasmāt ॥ 422॥ (pāṭhabhēdaḥ – nōchēdvidō)

ajñānahṛdayagranthērvināśō yadyaśēṣataḥ ।
anichChōrviṣayaḥ kiṃ nu pravṛttēḥ kāraṇaṃ svataḥ ॥ 423॥ (pāṭhabhēdaḥ – viduṣaḥ kiṃ)

vāsanānudayō bhōgyē vairāgyasya tadāvadhiḥ ।
ahambhāvōdayābhāvō bōdhasya paramāvadhiḥ ।
līnavṛttairanutpattirmaryādōparatēstu sā ॥ 424॥ (pāṭhabhēdaḥ – vṛttēra)

brahmākāratayā sadā sthitatayā nirmuktabāhyārthadhī-
ranyāvēditabhōgyabhōgakalanō nidrāluvadbālavat ।
svapnālōkitalōkavajjagadidaṃ paśyankvachillabdhadhī-
rāstē kaśchidanantapuṇyaphalabhugdhanyaḥ sa mānyō bhuvi ॥ 425॥

sthitaprajñō yatirayaṃ yaḥ sadānandamaśnutē ।
brahmaṇyēva vilīnātmā nirvikārō viniṣkriyaḥ ॥ 426॥

brahmātmanōḥ śōdhitayōrēkabhāvāvagāhinī ।
nirvikalpā cha chinmātrā vṛttiḥ prajñēti kathyatē ।
susthitā’sau bhavēdyasya sthitaprajñaḥ sa uchyatē ॥ 427॥

yasya sthitā bhavētprajñā yasyānandō nirantaraḥ ।
prapañchō vismṛtaprāyaḥ sa jīvanmukta iṣyatē ॥ 428॥

līnadhīrapi jāgarti jāgraddharmavivarjitaḥ ।
bōdhō nirvāsanō yasya sa jīvanmukta iṣyatē ॥ 429॥

śāntasaṃsārakalanaḥ kalāvānapi niṣkalaḥ ।
yasya chittaṃ viniśchintaṃ sa jīvanmukta iṣyatē ॥ 430॥ (pāṭhabhēdaḥ – yaḥ sachittō’pi niśchittaḥ)

vartamānē’pi dēhē’smiñChāyāvadanuvartini ।
ahantāmamatā’bhāvō jīvanmuktasya lakṣaṇam ॥ 431॥

atītānanusandhānaṃ bhaviṣyadavichāraṇam ।
audāsīnyamapi prāptaṃ jīvanmuktasya lakṣaṇam ॥ 432॥ (pāṭhabhēdaḥ – prāptē)

guṇadōṣaviśiṣṭē’sminsvabhāvēna vilakṣaṇē ।
sarvatra samadarśitvaṃ jīvanmuktasya lakṣaṇam ॥ 433॥

iṣṭāniṣṭārthasamprāptau samadarśitayā”tmani ।
ubhayatrāvikāritvaṃ jīvanmuktasya lakṣaṇam ॥ 434॥

brahmānandarasāsvādāsaktachittatayā yatēḥ ।
antarbahiravijñānaṃ jīvanmuktasya lakṣaṇam ॥ 435॥

dēhēndriyādau kartavyē mamāhambhāvavarjitaḥ ।
audāsīnyēna yastiṣṭhētsa jīvanmuktalakṣaṇaḥ ॥ 436॥ (pāṭhabhēdaḥ – sa jīvanmukta iṣyatē)

vijñāta ātmanō yasya brahmabhāvaḥ śrutērbalāt ।
bhavabandhavinirmuktaḥ sa jīvanmuktalakṣaṇaḥ ॥ 437॥ (pāṭhabhēdaḥ – sa jīvanmukta iṣyatē)

dēhēndriyēṣvahambhāva idambhāvastadanyakē ।
yasya nō bhavataḥ kvāpi sa jīvanmukta iṣyatē ॥ 438॥

jīvēśōbhayasaṃsārarūpadurvāsanōjjhitā ।
sā sarvadā bhavēdyasya sa jīvanmukta iṣyatē ॥

na pratyagbrahmaṇōrbhēdaṃ kadāpi brahmasargayōḥ ।
prajñayā yō vijāniti sa jīvanmuktalakṣaṇaḥ ॥ 439॥ (pāṭhabhēdaḥ – sa jīvanmukta iṣyatē)
sādhubhiḥ pūjyamānē’sminpīḍyamānē’pi durjanaiḥ ।
samabhāvō bhavēdyasya sa jīvanmuktalakṣaṇaḥ ॥ 440॥ (pāṭhabhēdaḥ – sa jīvanmukta iṣyatē)

yatra praviṣṭā viṣayāḥ parēritā
nadīpravāhā iva vārirāśau ।
linanti sanmātratayā na vikriyāṃ
utpādayantyēṣa yatirvimuktaḥ ॥ 441॥

vijñātabrahmatattvasya yathāpūrvaṃ na saṃsṛtiḥ ।
asti chēnna sa vijñātabrahmabhāvō bahirmukhaḥ ॥ 442॥

prāchīnavāsanāvēgādasau saṃsaratīti chēt ।
na sadēkatvavijñānānmandī bhavati vāsanā ॥ 443॥

atyantakāmukasyāpi vṛttiḥ kuṇṭhati mātari ।
tathaiva brahmaṇi jñātē pūrṇānandē manīṣiṇaḥ ॥ 444॥

nididhyāsanaśīlasya bāhyapratyaya īkṣyatē ।
bravīti śrutirētasya prārabdhaṃ phaladarśanāt ॥ 445॥

sukhādyanubhavō yāvattāvatprārabdhamiṣyatē ।
phalōdayaḥ kriyāpūrvō niṣkriyō na hi kutrachit ॥ 446॥

ahaṃ brahmēti vijñānātkalpakōṭiśatārjitam ।
sañchitaṃ vilayaṃ yāti prabōdhātsvapnakarmavat ॥ 447॥

yatkṛtaṃ svapnavēlāyāṃ puṇyaṃ vā pāpamulbaṇam ।
suptōtthitasya kintatsyātsvargāya narakāya vā ॥ 448॥

svamasaṅgamudāsīnaṃ parijñāya nabhō yathā ।
na śliṣyati cha yatkiñchitkadāchidbhāvikarmabhiḥ ॥ 449॥ (pāṭhabhēdaḥ – śliṣyatē yatiḥ kiñchit)

na nabhō ghaṭayōgēna surāgandhēna lipyatē ।
tathātmōpādhiyōgēna taddharmairnaiva lipyatē ॥ 450॥

jñānōdayātpurārabdhaṃ karmajñānānna naśyati ।
adatvā svaphalaṃ lakṣyamuddiśyōtsṛṣṭabāṇavat ॥ 451॥

vyāghrabuddhyā vinirmuktō bāṇaḥ paśchāttu gōmatau ।
na tiṣṭhati Chinatyēva lakṣyaṃ vēgēna nirbharam ॥ 452॥

prārabdhaṃ balavattaraṃ khalu vidāṃ bhōgēna tasya kṣayaḥ
samyagjñānahutāśanēna vilayaḥ prāksañchitāgāminām ।
brahmātmaikyamavēkṣya tanmayatayā yē sarvadā saṃsthitāḥ
tēṣāṃ tattritayaṃ nahi kvachidapi brahmaiva tē nirguṇam ॥ 453॥

upādhitādātmyavihīnakēvala-
brahmātmanaivātmani tiṣṭhatō munēḥ ।
prārabdhasadbhāvakathā na yuktā
svapnārthasambandhakathēva jāgrataḥ ॥ 454॥

na hi prabuddhaḥ pratibhāsadēhē
dēhōpayōginyapi cha prapañchē ।
karōtyahantāṃ mamatāmidantāṃ
kintu svayaṃ tiṣṭhati jāgarēṇa ॥ 455॥

na tasya mithyārthasamarthanēchChā
na saṅgrahastajjagatō’pi dṛṣṭaḥ ।
tatrānuvṛttiryadi chēnmṛṣārthē
na nidrayā mukta itīṣyatē dhruvam ॥ 456॥

tadvatparē brahmaṇi vartamānaḥ
sadātmanā tiṣṭhati nānyadīkṣatē ।
smṛtiryathā svapnavilōkitārthē
tathā vidaḥ prāśanamōchanādau ॥ 457॥

karmaṇā nirmitō dēhaḥ prārabdhaṃ tasya kalpyatām ।
nānādērātmanō yuktaṃ naivātmā karmanirmitaḥ ॥ 458॥

ajō nityaḥ śāśvata iti brūtē śrutiramōghavāk । (pāṭhabhēdaḥ – ajō nitya iti brūtē śrutirēṣā tvamōghavāk)
tadātmanā tiṣṭhatō’sya kutaḥ prārabdhakalpanā ॥ 459॥

prārabdhaṃ sidhyati tadā yadā dēhātmanā sthitiḥ ।
dēhātmabhāvō naivēṣṭaḥ prārabdhaṃ tyajyatāmataḥ ॥ 460॥

śarīrasyāpi prārabdhakalpanā bhrāntirēva hi ।
adhyastasya kutaḥ sattvamasatyasya kutō janiḥ । (pāṭhabhēdaḥ – sattvamasattvasya)
ajātasya kutō nāśaḥ prārabdhamasataḥ kutaḥ ॥ 461॥

jñānēnājñānakāryasya samūlasya layō yadi ।
tiṣṭhatyayaṃ kathaṃ dēha iti śaṅkāvatō jaḍān ॥ 462॥

samādhātuṃ bāhyadṛṣṭyā prārabdhaṃ vadati śrutiḥ ।
na tu dēhādisatyatvabōdhanāya vipaśchitām ।
yataḥ śrutērabhiprāyaḥ paramārthaikagōcharaḥ ॥ 463॥

paripūrṇamanādyantamapramēyamavikriyam ।
ēkamēvādvayaṃ brahma nēha nānāsti kiñchana ॥ 464॥

sadghanaṃ chidghanaṃ nityamānandaghanamakriyam ।
ēkamēvādvayaṃ brahma nēha nānāsti kiñchana ॥ 465॥

pratyagēkarasaṃ pūrṇamanantaṃ sarvatōmukham ।
ēkamēvādvayaṃ brahma nēha nānāsti kiñchana ॥ 466॥

ahēyamanupādēyamanādēyamanāśrayam । manādhēyamanā
ēkamēvādvayaṃ brahma nēha nānāsti kiñchana ॥ 467॥

nirguṇaṃ niṣkalaṃ sūkṣmaṃ nirvikalpaṃ nirañjanam ।
ēkamēvādvayaṃ brahma nēha nānāsti kiñchana ॥ 468॥

anirūpya svarūpaṃ yanmanōvāchāmagōcharam ।
ēkamēvādvayaṃ brahma nēha nānāsti kiñchana ॥ 469॥

satsamṛddhaṃ svataḥsiddhaṃ śuddhaṃ buddhamanīdṛśam ।
ēkamēvādvayaṃ brahma nēha nānāsti kiñchana ॥ 470॥

nirastarāgā vinirastabhōgāḥ (pāṭhabhēdaḥ – nirapāstabhōgāḥ)
śāntāḥ sudāntā yatayō mahāntaḥ ।
vijñāya tattvaṃ paramētadantē
prāptāḥ parāṃ nirvṛtimātmayōgāt ॥ 471॥

bhavānapīdaṃ paratattvamātmanaḥ
svarūpamānandaghanaṃ vichārya । (pāṭhabhēdaḥ – nichāyya)
vidhūya mōhaṃ svamanaḥprakalpitaṃ
muktaḥ kṛtārthō bhavatu prabuddhaḥ ॥ 472॥

samādhinā sādhuviniśchalātmanā (pāṭhabhēdaḥ – suniśchalātmanā)
paśyātmatattvaṃ sphuṭabōdhachakṣuṣā ।
niḥsaṃśayaṃ samyagavēkṣitaśchē-
chChrutaḥ padārthō na punarvikalpyatē ॥ 473॥ (pāṭhabhēdaḥ – punarvikalpatē)

svasyāvidyābandhasambandhamōkṣā-
tsatyajñānānandarūpātmalabdhau ।
śāstraṃ yuktirdēśikōktiḥ pramāṇaṃ
chāntaḥsiddhā svānubhūtiḥ pramāṇam ॥ 474॥

bandhō mōkṣaścha tṛptiścha chintā”rōgyakṣudhādayaḥ ।
svēnaiva vēdyā yajjñānaṃ parēṣāmānumānikam ॥ 475॥

taṭasthitā bōdhayanti guravaḥ śrutayō yathā ।
prajñayaiva tarēdvidvānīśvarānugṛhītayā ॥ 476॥

svānubhūtyā svayaṃ jñātvā svamātmānamakhaṇḍitam ।
saṃsiddhaḥ sammukhaṃ tiṣṭhēnnirvikalpātmanā”tmani ॥ 477॥ (pāṭhabhēdaḥ – susukhaṃ tiṣṭhēn)
vēdāntasiddhāntaniruktirēṣā
brahmaiva jīvaḥ sakalaṃ jagachcha ।
akhaṇḍarūpasthitirēva mōkṣō
brahmādvitīyē śrutayaḥ pramāṇam ॥ 478॥ (pāṭhabhēdaḥ – brahmādvitīyaṃ)

iti guruvachanāchChrutipramāṇāt
paramavagamya satattvamātmayuktyā ।
praśamitakaraṇaḥ samāhitātmā
kvachidachalākṛtirātmaniṣṭhatō’bhūt ॥ 479॥ (pāṭhabhēdaḥ – ātmaniṣṭhitō)

kiñchitkālaṃ samādhāya parē brahmaṇi mānasam । (pāṭhabhēdaḥ – kañchitkālaṃ)
utthāya paramānandādidaṃ vachanamabravīt ॥ 480॥ (pāṭhabhēdaḥ – vyutthāya)

buddhirvinaṣṭā galitā pravṛttiḥ
brahmātmanōrēkatayā’dhigatyā ।
idaṃ na jānē’pyanidaṃ na jānē
kiṃ vā kiyadvā sukhamastyapāram ॥ 481॥ (pāṭhabhēdaḥ – sukhamasya pāram)

vāchā vaktumaśakyamēva manasā mantuṃ na vā śakyatē
svānandāmṛtapūrapūritaparabrahmāmbudhērvaibhavam ।
ambhōrāśiviśīrṇavārṣikaśilābhāvaṃ bhajanmē manō
yasyāṃśāṃśalavē vilīnamadhunā”nandātmanā nirvṛtam ॥ 482॥

kva gataṃ kēna vā nītaṃ kutra līnamidaṃ jagat ।
adhunaiva mayā dṛṣṭaṃ nāsti kiṃ mahadadbhutam ॥ 483॥

kiṃ hēyaṃ kimupādēyaṃ kimanyatkiṃ vilakṣaṇam ।
akhaṇḍānandapīyūṣapūrṇē brahmamahārṇavē ॥ 484॥

na kiñchidatra paśyāmi na śaṛṇōmi na vēdmyaham ।
svātmanaiva sadānandarūpēṇāsmi vilakṣaṇaḥ ॥ 485॥

namō namastē guravē mahātmanē
vimuktasaṅgāya saduttamāya ।
nityādvayānandarasasvarūpiṇē
bhūmnē sadā’pāradayāmbudhāmnē ॥ 486॥

yatkaṭākṣaśaśisāndrachandrikā-
pātadhūtabhavatāpajaśramaḥ ।
prāptavānahamakhaṇḍavaibhavā-
nandamātmapadamakṣayaṃ kṣaṇāt ॥ 487॥

dhanyō’haṃ kṛtakṛtyō’haṃ vimuktō’haṃ bhavagrahāt ।
nityānandasvarūpō’haṃ pūrṇō’haṃ tvadanugrahāt ॥ 488॥

asaṅgō’hamanaṅgō’hamaliṅgō’hamabhaṅguraḥ ।
praśāntō’hamanantō’hamamalō’haṃ chirantanaḥ ॥ 489॥ (pāṭhabhēdaḥ – ‘hamatāntō’haṃ)

akartāhamabhōktāhamavikārō’hamakriyaḥ ।
śuddhabōdhasvarūpō’haṃ kēvalō’haṃ sadāśivaḥ ॥ 490॥

draṣṭuḥ śrōturvaktuḥ karturbhōkturvibhinna ēvāham ।
nityanirantaraniṣkriyaniḥsīmāsaṅgapūrṇabōdhātmā ॥ 491॥

nāhamidaṃ nāhamadō’pyubhayōravabhāsakaṃ paraṃ śuddham ।
bāhyābhyantaraśūnyaṃ pūrṇaṃ brahmādvitīyamēvāham ॥ 492॥

nirupamamanāditattvaṃ tvamahamidamada iti kalpanādūram ।
nityānandaikarasaṃ satyaṃ brahmādvitīyamēvāham ॥ 493॥

nārāyaṇō’haṃ narakāntakō’haṃ
purāntakō’haṃ puruṣō’hamīśaḥ ।
akhaṇḍabōdhō’hamaśēṣasākṣī
nirīśvarō’haṃ nirahaṃ cha nirmamaḥ ॥ 494॥

sarvēṣu bhūtēṣvahamēva saṃsthitō
jñānātmanā’ntarbahirāśrayaḥ san ।
bhōktā cha bhōgyaṃ svayamēva sarvaṃ
yadyatpṛthagdṛṣṭamidantayā purā ॥ 495॥

mayyakhaṇḍasukhāmbhōdhau bahudhā viśvavīchayaḥ ।
utpadyantē vilīyantē māyāmārutavibhramāt ॥ 496॥

sthulādibhāvā mayi kalpitā bhramā-
dārōpitānusphuraṇēna lōkaiḥ ।
kālē yathā kalpakavatsarāya-
ṇartvādayō niṣkalanirvikalpē ॥ 497॥

ārōpitaṃ nāśrayadūṣakaṃ bhavēt
kadāpi mūḍhairatidōṣadūṣitaiḥ । mūḍhairmati
nārdrīkarōtyūṣarabhūmibhāgaṃ
marīchikāvāri mahāpravāhaḥ ॥ 498॥

ākāśavallēpavidūragō’haṃ (pāṭhabhēdaḥ – ākāśavat kalpavi)
ādityavadbhāsyavilakṣaṇō’ham ।
ahāryavannityaviniśchalō’haṃ
ambhōdhivatpāravivarjitō’ham ॥ 499॥

na mē dēhēna sambandhō mēghēnēva vihāyasaḥ ।
ataḥ kutō mē taddharmā jāgratsvapnasuṣuptayaḥ ॥ 500॥

upādhirāyāti sa ēva gachChati
sa ēva karmāṇi karōti bhuṅktē ।
sa ēva jīryan mriyatē sadāhaṃ (pāṭhabhēdaḥ – ēva jīvan)
kulādrivanniśchala ēva saṃsthitaḥ ॥ 501॥

na mē pravṛttirna cha mē nivṛttiḥ
sadaikarūpasya niraṃśakasya ।
ēkātmakō yō niviḍō nirantarō (pāṭhabhēdaḥ – nibiḍō)
vyōmēva pūrṇaḥ sa kathaṃ nu chēṣṭatē ॥ 502॥

puṇyāni pāpāni nirindriyasya
niśchētasō nirvikṛtērnirākṛtēḥ ।
kutō mamākhaṇḍasukhānubhūtēḥ
brūtē hyananvāgatamityapi śrutiḥ ॥ 503॥

Chāyayā spṛṣṭamuṣṇaṃ vā śītaṃ vā suṣṭhu duḥṣṭhu vā ।
na spṛśatyēva yatkiñchitpuruṣaṃ tadvilakṣaṇam ॥ 504॥

na sākṣiṇaṃ sākṣyadharmāḥ saṃspṛśanti vilakṣaṇam ।
avikāramudāsīnaṃ gṛhadharmāḥ pradīpavat ।
dēhēndriyamanōdharmā naivātmānaṃ spṛśantyahō ॥ 505॥ ēxtra

ravēryathā karmaṇi sākṣibhāvō
vahnēryathā dāhaniyāmakatvam । (pāṭhabhēdaḥ – vā’yasi dāhakatvam)
rajjōryathā”rōpitavastusaṅgaḥ
tathaiva kūṭasthachidātmanō mē ॥ 506॥

kartāpi vā kārayitāpi nāhaṃ
bhōktāpi vā bhōjayitāpi nāham ।
draṣṭāpi vā darśayitāpi nāhaṃ
sō’haṃ svayañjyōtiranīdṛgātmā ॥ 507॥

chalatyupādhau pratibimbalaulya-
maupādhikaṃ mūḍhadhiyō nayanti ।
svabimbabhūtaṃ ravivadviniṣkriyaṃ
kartāsmi bhōktāsmi hatō’smi hēti ॥ 508॥

jalē vāpi sthalē vāpi luṭhatvēṣa jaḍātmakaḥ ।
nāhaṃ vilipyē taddharmairghaṭadharmairnabhō yathā ॥ 509॥

kartṛtvabhōktṛtvakhalatvamattatā-
jaḍatvabaddhatvavimuktatādayaḥ ।
buddhērvikalpā na tu santi vastutaḥ
svasminparē brahmaṇi kēvalē’dvayē ॥ 510॥

santu vikārāḥ prakṛtērdaśadhā śatadhā sahasradhā vāpi ।
kiṃ mē’saṅgachitastairna ghanaḥ kvachidambaraṃ spṛśati ॥ 511॥ (pāṭhabhēdaḥ – taiḥ kiṃ mē’saṅgachitērna hyambudaḍambarō’mbaraṃ)

avyaktādisthūlaparyantamētat
viśvaṃ yatrābhāsamātraṃ pratītam ।
vyōmaprakhyaṃ sūkṣmamādyantahīnaṃ
brahmādvaitaṃ yattadēvāhamasmi ॥ 512॥

sarvādhāraṃ sarvavastuprakāśaṃ
sarvākāraṃ sarvagaṃ sarvaśūnyam ।
nityaṃ śuddhaṃ niśchalaṃ nirvikalpaṃ (pāṭhabhēdaḥ – niṣkalaṃ)
brahmādvaitaṃ yattadēvāhamasmi ॥ 513॥

yatpratyastāśēṣamāyāviśēṣaṃ
pratyagrūpaṃ pratyayāgamyamānam ।
satyajñānānantamānandarūpaṃ
brahmādvaitaṃ yattadēvāhamasmi ॥ 514॥

niṣkriyō’smyavikārō’smi
niṣkalō’smi nirākṛtiḥ ।
nirvikalpō’smi nityō’smi
nirālambō’smi nirdvayaḥ ॥ 515॥

sarvātmakō’haṃ sarvō’haṃ sarvātītō’hamadvayaḥ ।
kēvalākhaṇḍabōdhō’hamānandō’haṃ nirantaraḥ ॥ 516॥

svārājyasāmrājyavibhūtirēṣā
bhavatkṛpāśrīmahimaprasādāt ।
prāptā mayā śrīguravē mahātmanē
namō namastē’stu punarnamō’stu ॥ 517॥

mahāsvapnē māyākṛtajanijarāmṛtyugahanē
bhramantaṃ kliśyantaṃ bahulataratāpairanudinam । (pāṭhabhēdaḥ – ranukalam)
ahaṅkāravyāghravyathitamimamatyantakṛpayā
prabōdhya prasvāpātparamavitavānmāmasi gurō ॥ 518॥

namastasmai sadaikasmai kasmaichinmahasē namaḥ । (pāṭhabhēdaḥ – sadēkasmai namaśchinmahasē muhuḥ)
yadētadviśvarūpēṇa rājatē gururāja tē ॥ 519॥

iti natamavalōkya śiṣyavaryaṃ
samadhigatātmasukhaṃ prabuddhatattvam ।
pramuditahṛdayaṃ sa dēśikēndraḥ (pāṭhabhēdaḥ – hṛdayaḥ)
punaridamāha vachaḥ paraṃ mahātmā ॥ 520॥

brahmapratyayasantatirjagadatō brahmaiva tatsarvataḥ (pāṭhabhēdaḥ – satsarvataḥ)
paśyādhyātmadṛśā praśāntamanasā sarvāsvavasthāsvapi ।
rūpādanyadavēkṣitaṃ kimabhitaśchakṣuṣmatāṃ dṛśyatē (pāṭhabhēdaḥ – vidyatē)
tadvadbrahmavidaḥ sataḥ kimaparaṃ buddhērvihārāspadam ॥ 521॥

kastāṃ parānandarasānubhūti-
mṛtsṛjya śūnyēṣu ramēta vidvān । (pāṭhabhēdaḥ – mutsṛjya
chandrē mahāhlādini dīpyamānē)
chitrēndumālōkayituṃ ka ichChēt ॥ 522॥

asatpadārthānubhavēna kiñchin
na hyasti tṛptirna cha duḥkhahāniḥ ।
tadadvayānandarasānubhūtyā
tṛptaḥ sukhaṃ tiṣṭha sadātmaniṣṭhayā ॥ 523॥

svamēva sarvathā paśyanmanyamānaḥ svamadvayam । (pāṭhabhēdaḥ – sarvataḥ)
svānandamanubhuñjānaḥ kālaṃ naya mahāmatē ॥ 524॥

akhaṇḍabōdhātmani nirvikalpē
vikalpanaṃ vyōmni puraprakalpanam ।
tadadvayānandamayātmanā sadā
śāntiṃ parāmētya bhajasva maunam ॥ 525॥

tūṣṇīmavasthā paramōpaśāntiḥ
buddhērasatkalpavikalpahētōḥ ।
brahmātmanō brahmavidō mahātmanō
yatrādvayānandasukhaṃ nirantaram ॥ 526॥

nāsti nirvāsanānmaunātparaṃ sukhakṛduttamam ।
vijñātātmasvarūpasya svānandarasapāyinaḥ ॥ 527॥

gachChaṃstiṣṭhannupaviśañChayānō vā’nyathāpi vā ।
yathēchChayā vasēdvidvānātmārāmaḥ sadā muniḥ ॥ 528॥

na dēśakālāsanadigyamādi-
lakṣyādyapēkṣā’pratibaddhavṛttēḥ । (pāṭhabhēdaḥ – pratibaddha
saṃsiddhatattvasya mahātmanō’sti)
svavēdanē kā niyamādyavasthā ॥ 529॥

ghaṭō’yamiti vijñātuṃ niyamaḥ kō’nvavēkṣatē । (pāṭhabhēdaḥ – apēkṣyatē)
vinā pramāṇasuṣṭhutvaṃ yasminsati padārthadhīḥ ॥ 530॥

ayamātmā nityasiddhaḥ pramāṇē sati bhāsatē ।
na dēśaṃ nāpi vā kālaṃ na śuddhiṃ vāpyapēkṣatē ॥ 531॥

dēvadattō’hamityētadvijñānaṃ nirapēkṣakam ।
tadvadbrahmavidō’pyasya brahmāhamiti vēdanam ॥ 532॥

bhānunēva jagatsarvaṃ bhāsatē yasya tējasā ।
anātmakamasattuchChaṃ kiṃ nu tasyāvabhāsakam ॥ 533॥

vēdaśāstrapurāṇāni bhūtāni sakalānyapi ।
yēnārthavanti taṃ kinnu vijñātāraṃ prakāśayēt ॥ 534॥

ēṣa svayañjyōtiranantaśaktiḥ
ātmā’pramēyaḥ sakalānubhūtiḥ ।
yamēva vijñāya vimuktabandhō
jayatyayaṃ brahmaviduttamōttamaḥ ॥ 535॥

na khidyatē nō viṣayaiḥ pramōdatē
na sajjatē nāpi virajyatē cha ।
svasminsadā krīḍati nandati svayaṃ
nirantarānandarasēna tṛptaḥ ॥ 536॥

kṣudhāṃ dēhavyathāṃ tyaktvā bālaḥ krīḍati vastuniḥ । (pāṭhabhēdaḥ – vastuni)
tathaiva vidvān ramatē nirmamō nirahaṃ sukhī ॥ 537॥

chintāśūnyamadainyabhaikṣamaśanaṃ pānaṃ saridvāriṣu
svātantryēṇa niraṅkuśā sthitirabhīrnidrā śmaśānē vanē ।
vastraṃ kṣālanaśōṣaṇādirahitaṃ digvāstu śayyā mahī
sañchārō nigamāntavīthiṣu vidāṃ krīḍā parē brahmaṇi ॥ 538॥

vimānamālambya śarīramētad
bhunaktyaśēṣānviṣayānupasthitān ।
parēchChayā bālavadātmavēttā
yō’vyaktaliṅgō’nanuṣaktabāhyaḥ ॥ 539॥

digambarō vāpi cha sāmbarō vā
tvagambarō vāpi chidambarasthaḥ ।
unmattavadvāpi cha bālavadvā
piśāchavadvāpi charatyavanyām ॥ 540॥

kāmānniṣkāmarūpī saṃścharatyēkacharō muniḥ । (pāṭhabhēdaḥ – kāmānnī kāmarūpī)
svātmanaiva sadā tuṣṭaḥ svayaṃ sarvātmanā sthitaḥ ॥ 541॥

kvachinmūḍhō vidvān kvachidapi mahārājavibhavaḥ
kvachidbhrāntaḥ saumyaḥ kvachidajagarāchārakalitaḥ ।
kvachitpātrībhūtaḥ kvachidavamataḥ kvāpyaviditaḥ
charatyēvaṃ prājñaḥ satataparamānandasukhitaḥ ॥ 542॥

nirdhanō’pi sadā tuṣṭō’pyasahāyō mahābalaḥ ।
nityatṛptō’pyabhuñjānō’pyasamaḥ samadarśanaḥ ॥ 543॥

api kurvannakurvāṇaśchābhōktā phalabhōgyapi ।
śarīryapyaśarīryēṣa parichChinnō’pi sarvagaḥ ॥ 544॥

aśarīraṃ sadā santamimaṃ brahmavidaṃ kvachit ।
priyāpriyē na spṛśatastathaiva cha śubhāśubhē ॥ 545॥

sthūlādisambandhavatō’bhimāninaḥ
sukhaṃ cha duḥkhaṃ cha śubhāśubhē cha ।
vidhvastabandhasya sadātmanō munēḥ
kutaḥ śubhaṃ vā’pyaśubhaṃ phalaṃ vā ॥ 546॥

tamasā grastavadbhānādagrastō’pi ravirjanaiḥ ।
grasta ityuchyatē bhrāntyāṃ hyajñātvā vastulakṣaṇam ॥ 547॥ (pāṭhabhēdaḥ – bhrāntyā)
tadvaddēhādibandhēbhyō vimuktaṃ brahmavittamam ।
paśyanti dēhivanmūḍhāḥ śarīrābhāsadarśanāt ॥ 548॥

ahirnirlvayanīṃ vāyaṃ muktvā dēhaṃ tu tiṣṭhati । (pāṭhabhēdaḥ – ahini)
itastataśchālyamānō yatkiñchitprāṇavāyunā ॥ 549॥

strōtasā nīyatē dāru yathā nimnōnnatasthalam ।
daivēna nīyatē dēhō yathākālōpabhuktiṣu ॥ 550॥

prārabdhakarmaparikalpitavāsanābhiḥ
saṃsārivachcharati bhuktiṣu muktadēhaḥ ।
siddhaḥ svayaṃ vasati sākṣivadatra tūṣṇīṃ
chakrasya mūlamiva kalpavikalpaśūnyaḥ ॥ 551॥

naivēndriyāṇi viṣayēṣu niyuṅkta ēṣa
naivāpayuṅkta upadarśanalakṣaṇasthaḥ ।
naiva kriyāphalamapīṣadavēkṣatē sa (pāṭhabhēdaḥ – apīṣadapēkṣatē saḥ)
svānandasāndrarasapānasumattachittaḥ ॥ 552॥

lakṣyālakṣyagatiṃ tyaktvā yastiṣṭhētkēvalātmanā ।
śiva ēva svayaṃ sākṣādayaṃ brahmaviduttamaḥ ॥ 553॥

jīvannēva sadā muktaḥ kṛtārthō brahmavittamaḥ ।
upādhināśādbrahmaiva san brahmāpyēti nirdvayam ॥ 554॥

śailūṣō vēṣasadbhāvābhāvayōścha yathā pumān ।
tathaiva brahmavichChrēṣṭhaḥ sadā brahmaiva nāparaḥ ॥ 555॥

yatra kvāpi viśīrṇaṃ satparṇamiva tarōrvapuḥ patatāt । (pāṭhabhēdaḥ – viśīrṇaṃ parṇamiva)
brahmībhūtasya yatēḥ prāgēva tachchidagninā dagdham ॥ 556॥

sadātmani brahmaṇi tiṣṭhatō munēḥ
pūrṇā’dvayānandamayātmanā sadā ।
na dēśakālādyuchitapratīkṣā
tvaṅmāṃsaviṭpiṇḍavisarjanāya ॥ 557॥

dēhasya mōkṣō nō mōkṣō na daṇḍasya kamaṇḍalōḥ ।
avidyāhṛdayagranthimōkṣō mōkṣō yatastataḥ ॥ 558॥

kulyāyāmatha nadyāṃ vā śivakṣētrē’pi chatvarē ।
parṇaṃ patati chēttēna tarōḥ kiṃ nu śubhāśubham ॥ 559॥

patrasya puṣpasya phalasya nāśavad-
dēhēndriyaprāṇadhiyāṃ vināśaḥ ।
naivātmanaḥ svasya sadātmakasyā-
nandākṛtērvṛkṣavadasti chaiṣaḥ ॥ 560॥ (pāṭhabhēdaḥ – vadāsta ēṣaḥ)

prajñānaghana ityātmalakṣaṇaṃ satyasūchakam ।
anūdyaupādhikasyaiva kathayanti vināśanam ॥ 561॥

avināśī vā arē’yamātmēti śrutirātmanaḥ ।
prabravītyavināśitvaṃ vinaśyatsu vikāriṣu ॥ 562॥

pāṣāṇavṛkṣatṛṇadhānyakaḍaṅkarādyā (pāṭhabhēdaḥ – kaṭāmbarādyā)
dagdhā bhavanti hi mṛdēva yathā tathaiva ।
dēhēndriyāsumana ādi samastadṛśyaṃ
jñānāgnidagdhamupayāti parātmabhāvam ॥ 563॥

vilakṣaṇaṃ yathā dhvāntaṃ līyatē bhānutējasi ।
tathaiva sakalaṃ dṛśyaṃ brahmaṇi pravilīyatē ॥ 564॥

ghaṭē naṣṭē yathā vyōma vyōmaiva bhavati sphuṭam ।
tathaivōpādhivilayē brahmaiva brahmavitsvayam ॥ 565॥

kṣīraṃ kṣīrē yathā kṣiptaṃ tailaṃ tailē jalaṃ jalē ।
saṃyuktamēkatāṃ yāti tathā”tmanyātmavinmuniḥ ॥ 566॥

ēvaṃ vidēhakaivalyaṃ sanmātratvamakhaṇḍitam ।
brahmabhāvaṃ prapadyaiṣa yatirnāvartatē punaḥ ॥ 567॥

sadātmaikatvavijñānadagdhāvidyādivarṣmaṇaḥ ।
amuṣya brahmabhūtatvād brahmaṇaḥ kuta udbhavaḥ ॥ 568॥

māyāklṛptau bandhamōkṣau na staḥ svātmani vastutaḥ ।
yathā rajjau niṣkriyāyāṃ sarpābhāsavinirgamau ॥ 569॥

āvṛtēḥ sadasattvābhyāṃ vaktavyē bandhamōkṣaṇē ।
nāvṛtirbrahmaṇaḥ kāchidanyābhāvādanāvṛtam ।
yadyastyadvaitahāniḥ syād dvaitaṃ nō sahatē śrutiḥ ॥ 570॥

bandhañcha mōkṣañcha mṛṣaiva mūḍhā
buddhērguṇaṃ vastuni kalpayanti ।
dṛgāvṛtiṃ mēghakṛtāṃ yathā ravau
yatō’dvayā’saṅgachidētadakṣaram ॥ 571॥ (pāṭhabhēdaḥ – chidēkamakṣaram)

astīti pratyayō yaścha yaścha nāstīti vastuni ।
buddhērēva guṇāvētau na tu nityasya vastunaḥ ॥ 572॥

atastau māyayā klṛptau bandhamōkṣau na chātmani ।
niṣkalē niṣkriyē śāntē niravadyē nirañjanē ।
advitīyē parē tattvē vyōmavatkalpanā kutaḥ ॥ 573॥

na nirōdhō na chōtpattirna baddhō na cha sādhakaḥ ।
na mumukṣurna vai mukta ityēṣā paramārthatā ॥ 574॥

sakalanigamachūḍāsvāntasiddhāntarūpaṃ
paramidamatiguhyaṃ darśitaṃ tē mayādya ।
apagatakalidōṣaṃ kāmanirmuktabuddhiṃ (pāṭhabhēdaḥ – buddhiḥ)
svasutavadasakṛttvāṃ bhāvayitvā mumukṣum ॥ 575॥

iti śrutvā gurōrvākyaṃ praśrayēṇa kṛtānatiḥ ।
sa tēna samanujñātō yayau nirmuktabandhanaḥ ॥ 576॥

gururēva sadānandasindhau nirmagnamānasaḥ । (pāṭhabhēdaḥ – gururēṣa)
pāvayanvasudhāṃ sarvāṃ vichachāra nirantaraḥ ॥ 577॥

ityāchāryasya śiṣyasya saṃvādēnātmalakṣaṇam ।
nirūpitaṃ mumukṣūṇāṃ sukhabōdhōpapattayē ॥ 578॥

hitamidamupadēśamādriyantāṃ
vihitanirastasamastachittadōṣāḥ ।
bhavasukhaviratāḥ praśāntachittāḥ (pāṭhabhēdaḥ – sukhavimukhāḥ)
śrutirasikā yatayō mumukṣavō yē ॥ 579॥

saṃsārādhvani tāpabhānukiraṇaprōdbhūtadāhavyathā-
khinnānāṃ jalakāṅkṣayā marubhuvi bhrāntyā paribhrāmyatām ।
atyāsannasudhāmbudhiṃ sukhakaraṃ brahmādvayaṃ darśaya-
tyēṣā śaṅkarabhāratī vijayatē nirvāṇasandāyinī ॥ 580॥

॥ iti śaṅkarāchāryavirachitaṃ vivēkachūḍāmaṇiḥ ॥

॥ ōṃ tatsat ॥