Vidura Neethi – Udyoga Parvam Chapter 34

॥ iti śrīmahābhāratē udyōgaparvaṇi prajāgaraparvaṇi
viduranītivākyē chatustriṃśō’dhyāyaḥ ॥

dhṛtarāṣṭra uvācha ।

jāgratō dahyamānasya yatkāryamanupaśyasi ।
tadbrūhi tvaṃ hi nastāta dharmārthakuśalaḥ śuchiḥ ॥ 1॥

tvaṃ māṃ yathāvadvidura praśādhi
prajñā pūrvaṃ sarvamajātaśatrōḥ ।
yanmanyasē pathyamadīnasattva
śrēyaḥ karaṃ brūhi tadvai kurūṇām ॥ 2॥

pāpāśaṅgī pāpamēva naupaśyan
pṛchChāmi tvāṃ vyākulēnātmanāham ।
kavē tanmē brūhi sarvaṃ yathāvan
manīṣitaṃ sarvamajātaśatrōḥ ॥ 3॥

vidura uvācha ।

śubhaṃ vā yadi vā pāpaṃ dvēṣyaṃ vā yadi vā priyam ।
apṛṣṭastasya tadbrūyādyasya nēchChētparābhavam ॥ 4॥

tasmādvakṣyāmi tē rājanbhavamichChankurūnprati ।
vachaḥ śrēyaḥ karaṃ dharmyaṃ bruvatastannibōdha mē ॥ 5॥

mithyōpētāni karmāṇi sidhyēyuryāni bhārata ।
anupāya prayuktāni mā sma tēṣu manaḥ kṛthāḥ ॥ 6॥

tathaiva yōgavihitaṃ na sidhyētkarma yannṛpa ।
upāyayuktaṃ mēdhāvī na tatra glapayēnmanaḥ ॥ 7॥

anubandhānavēkṣēta sānubandhēṣu karmasu ।
sampradhārya cha kurvīta na vēgēna samācharēt ॥ 8॥

anubandhaṃ cha samprēkṣya vipākāṃśchaiva karmaṇām ।
utthānamātmanaśchaiva dhīraḥ kurvīta vā na vā ॥ 9॥

yaḥ pramāṇaṃ na jānāti sthānē vṛddhau tathā kṣayē ।
kōśē janapadē daṇḍē na sa rājyāvatiṣṭhatē ॥ 10॥

yastvētāni pramāṇāni yathōktānyanupaśyati ।
yuktō dharmārthayōrjñānē sa rājyamadhigachChati ॥ 11॥

na rājyaṃ prāptamityēva vartitavyamasāmpratam ।
śriyaṃ hyavinayō hanti jarā rūpamivōttamam ॥ 12॥

bhakṣyōttama pratichChannaṃ matsyō baḍiśamāyasam ।
rūpābhipātī grasatē nānubandhamavēkṣatē ॥ 13॥

yachChakyaṃ grasituṃ grasyaṃ grastaṃ pariṇamēchcha yat ।
hitaṃ cha pariṇāmē yattadadyaṃ bhūtimichChatā ॥ 14॥

vanaspatērapakvāni phalāni prachinōti yaḥ ।
sa nāpnōti rasaṃ tēbhyō bījaṃ chāsya vinaśyati ॥ 15॥

yastu pakvamupādattē kālē pariṇataṃ phalam ।
phalādrasaṃ sa labhatē bījāchchaiva phalaṃ punaḥ ॥ 16॥

yathā madhu samādattē rakṣanpuṣpāṇi ṣaṭpadaḥ ।
tadvadarthānmanuṣyēbhya ādadyādavihiṃsayā ॥ 17॥

puṣpaṃ puṣpaṃ vichinvīta mūlachChēdaṃ na kārayēt ।
mālākāra ivārāmē na yathāṅgārakārakaḥ ॥ 18॥

kiṃ nu mē syādidaṃ kṛtvā kiṃ nu mē syādakurvataḥ ।
iti karmāṇi sañchintya kuryādvā puruṣō na vā ॥ 19॥

anārabhyā bhavantyarthāḥ kē chinnityaṃ tathāgatāḥ ।
kṛtaḥ puruṣakārō’pi bhavēdyēṣu nirarthakaḥ ॥ 20॥

kāṃśchidarthānnaraḥ prājñō labhu mūlānmahāphalān ।
kṣipramārabhatē kartuṃ na vighnayati tādṛśān ॥ 21॥

ṛju paśyati yaḥ sarvaṃ chakṣuṣānupibanniva ।
āsīnamapi tūṣṇīkamanurajyanti taṃ prajāḥ ॥ 22॥

chakṣuṣā manasā vāchā karmaṇā cha chaturvidham ।
prasādayati lōkaṃ yastaṃ lōkō’nuprasīdati ॥ 23॥

yasmāttrasyanti bhūtāni mṛgavyādhānmṛgā iva ।
sāgarāntāmapi mahīṃ labdhvā sa parihīyatē ॥ 24॥

pitṛpaitāmahaṃ rājyaṃ prāptavānsvēna tējasā ।
vāyurabhramivāsādya bhraṃśayatyanayē sthitaḥ ॥ 25॥

dharmamācharatō rājñaḥ sadbhiścharitamāditaḥ ।
vasudhā vasusampūrṇā vardhatē bhūtivardhanī ॥ 26॥

atha santyajatō dharmamadharmaṃ chānutiṣṭhataḥ ।
pratisaṃvēṣṭatē bhūmiragnau charmāhitaṃ yathā ॥ 27॥

ya ēva yatnaḥ kriyatē prara rāṣṭrāvamardanē ।
sa ēva yatnaḥ kartavyaḥ svarāṣṭra paripālanē ॥ 28॥

dharmēṇa rājyaṃ vindēta dharmēṇa paripālayēt ।
dharmamūlāṃ śriyaṃ prāpya na jahāti na hīyatē ॥ 29॥

apyunmattātpralapatō bālāchcha parisarpataḥ ।
sarvataḥ sāramādadyādaśmabhya iva kāñchanam ॥ 30॥

suvyāhṛtāni sudhiyāṃ sukṛtāni tatastataḥ ।
sañchinvandhīra āsīta śilā hārī śilaṃ yathā ॥ 31॥

gandhēna gāvaḥ paśyanti vēdaiḥ paśyanti brāhmaṇāḥ ।
chāraiḥ paśyanti rājānaśchakṣurbhyāmitarē janāḥ ॥ 32॥

bhūyāṃsaṃ labhatē klēśaṃ yā gaurbhavati durduhā ।
atha yā suduhā rājannaiva tāṃ vinayantyapi ॥ 33॥

yadataptaṃ praṇamati na tatsantāpayantyapi ।
yachcha svayaṃ nataṃ dāru na tatsannāmayantyapi ॥ 34॥

ētayōpamayā dhīraḥ sannamēta balīyasē ।
indrāya sa praṇamatē namatē yō balīyasē ॥ 35॥

parjanyanāthāḥ paśavō rājānō mitra bāndhavāḥ ।
patayō bāndhavāḥ strīṇāṃ brāhmaṇā vēda bāndhavāḥ ॥ 36॥

satyēna rakṣyatē dharmō vidyā yōgēna rakṣyatē ।
mṛjayā rakṣyatē rūpaṃ kulaṃ vṛttēna rakṣyatē ॥ 37॥

mānēna rakṣyatē dhānyamaśvānrakṣyatyanukramaḥ ।
abhīkṣṇadarśanādgāvaḥ striyō rakṣyāḥ kuchēlataḥ ॥ 38॥

na kulaṃ vṛtti hīnasya pramāṇamiti mē matiḥ ।
antyēṣvapi hi jātānāṃ vṛttamēva viśiṣyatē ॥ 39॥

ya īrṣyuḥ paravittēṣu rūpē vīryē kulānvayē ।
sukhē saubhāgyasatkārē tasya vyādhiranantakaḥ ॥ 40॥

akārya karaṇādbhītaḥ kāryāṇāṃ cha vivarjanāt ।
akālē mantrabhēdāchcha yēna mādyēnna tatpibēt ॥ 41॥

vidyāmadō dhanamadastṛtīyō’bhijanō madaḥ ।
ētē madāvaliptānāmēta ēva satāṃ damāḥ ॥ 42॥

asantō’bhyarthitāḥ sadbhiḥ kiṃ chitkāryaṃ kadā chana ।
manyantē santamātmānamasantamapi viśrutam ॥ 43॥

gatirātmavatāṃ santaḥ santa ēva satāṃ gatiḥ ।
asatāṃ cha gatiḥ santō na tvasantaḥ satāṃ gatiḥ ॥ 44॥

jitā sabhā vastravatā samāśā gōmatā jitā ।
adhvā jitō yānavatā sarvaṃ śīlavatā jitam ॥ 45॥

śīlaṃ pradhānaṃ puruṣē tadyasyēha praṇaśyati ।
na tasya jīvitēnārthō na dhanēna na bandhubhiḥ ॥ 46॥

āḍhyānāṃ māṃsaparamaṃ madhyānāṃ gōrasōttaram ।
lavaṇōttaraṃ daridrāṇāṃ bhōjanaṃ bharatarṣabha ॥ 47॥

sampannataramēvānnaṃ daridrā bhuñjatē sadā ।
kṣutsvādutāṃ janayati sā chāḍhyēṣu sudurlabhā ॥ 48॥

prāyēṇa śrīmatāṃ lōkē bhōktuṃ śaktirna vidyatē ।
daridrāṇāṃ tu rājēndra api kāṣṭhaṃ hi jīryatē ॥ 49॥

avṛttirbhayamantyānāṃ madhyānāṃ maraṇādbhayam ।
uttamānāṃ tu martyānāmavamānātparaṃ bhayam ॥ 50॥

aiśvaryamadapāpiṣṭhā madāḥ pānamadādayaḥ ।
aiśvaryamadamattō hi nāpatitvā vibudhyatē ॥ 51॥

indriyaurindriyārthēṣu vartamānairanigrahaiḥ ।
tairayaṃ tāpyatē lōkō nakṣatrāṇi grahairiva ॥ 52॥

yō jitaḥ pañchavargēṇa sahajēnātma karśinā ।
āpadastasya vardhantē śuklapakṣa ivōḍurāḍ ॥ 53॥

avijitya ya ātmānamamātyānvijigīṣatē ।
amitrānvājitāmātyaḥ sō’vaśaḥ parihīyatē ॥ 54॥

ātmānamēva prathamaṃ dēśarūpēṇa yō jayēt ।
tatō’mātyānamitrāṃścha na mōghaṃ vijigīṣatē ॥ 55॥

vaśyēndriyaṃ jitāmātyaṃ dhṛtadaṇḍaṃ vikāriṣu ।
parīkṣya kāriṇaṃ dhīramatyantaṃ śrīrniṣēvatē ॥ 56॥

rathaḥ śarīraṃ puruṣasya rājan
nātmā niyantēndriyāṇyasya chāśvāḥ ।
tairapramattaḥ kuśalaḥ sadaśvair
dāntaiḥ sukhaṃ yāti rathīva dhīraḥ ॥ 57॥

ētānyanigṛhītāni vyāpādayitumapyalam ।
avidhēyā ivādāntā hayāḥ pathi kusārathim ॥ 58॥

anarthamarthataḥ paśyannartaṃ chaivāpyanarthataḥ ।
indriyaiḥ prasṛtō bālaḥ suduḥkhaṃ manyatē sukham ॥ 59॥

dharmārthau yaḥ parityajya syādindriyavaśānugaḥ ।
śrīprāṇadhanadārēbhya kṣipraṃ sa parihīyatē ॥ 60॥

arthānāmīśvarō yaḥ syādindriyāṇāmanīśvaraḥ ।
indriyāṇāmanaiśvaryādaiśvaryādbhraśyatē hi saḥ ॥ 61॥

ātmanātmānamanvichChēnmanō buddhīndriyairyataiḥ ।
ātmaiva hyātmanō bandhurātmaiva ripurātmanaḥ ॥ 62॥

kṣudrākṣēṇēva jālēna jhaṣāvapihitāvubhau ।
kāmaścha rājankrōdhaścha tau prājñānaṃ vilumpataḥ ॥ 63॥

samavēkṣyēha dharmārthau sambhārānyō’dhigachChati ।
sa vai sambhṛta sambhāraḥ satataṃ sukhamēdhatē ॥ 64॥

yaḥ pañchābhyantarāñśatrūnavijitya matikṣayān ।
jigīṣati ripūnanyānripavō’bhibhavanti tam ॥ 65॥

dṛśyantē hi durātmānō vadhyamānāḥ svakarma bhiḥ ।
indriyāṇāmanīśatvādrājānō rājyavibhramaiḥ ॥ 66॥

asantyāgātpāpakṛtāmapāpāṃs
tulyō daṇḍaḥ spṛśatē miśrabhāvāt ।
śuṣkēṇārdraṃ dahyatē miśrabhāvāt
tasmātpāpaiḥ saha sandhiṃ na kuryāt ॥ 67॥

nijānutpatataḥ śatrūnpañcha pañcha prayōjanān ।
yō mōhānna nighṛhṇāti tamāpadgrasatē naram ॥ 68॥

anasūyārjavaṃ śauchaṃ santōṣaḥ priyavāditā ।
damaḥ satyamanāyāsō na bhavanti durātmanām ॥ 69॥

ātmajñānamanāyāsastitikṣā dharmanityatā ।
vākchaiva guptā dānaṃ cha naitānyantyēṣu bhārata ॥ 70॥

ākrōśa parivādābhyāṃ vihiṃsantyabudhā budhān ।
vaktā pāpamupādattē kṣamamāṇō vimuchyatē ॥ 71॥

hiṃsā balamasādhūnāṃ rājñāṃ daṇḍavidhirbalam ।
śuśrūṣā tu balaṃ strīṇāṃ kṣamāguṇavatāṃ balam ॥ 72॥

vāksaṃyamō hi nṛpatē suduṣkaratamō mataḥ ।
arthavachcha vichitraṃ cha na śakyaṃ bahubhāṣitum ॥ 73॥

abhyāvahati kalyāṇaṃ vividhā vāksubhāṣitā ।
saiva durbhāṣitā rājannanarthāyōpapadyatē ॥ 74॥

saṃrōhati śarairviddhaṃ vanaṃ paraśunā hatam ।
vāchā duruktaṃ bībhatsaṃ na saṃrōhati vākkṣatam ॥ 75॥

karṇinālīkanārāchā nirharanti śarīrataḥ ।
vākṣalyastu na nirhartuṃ śakyō hṛdi śayō hi saḥ ॥ 76॥

vāksāyakā vadanānniṣpatanti
yairāhataḥ śōchati ratryahāni ।
parasya nāmarmasu tē patanti
tānpaṇḍitō nāvasṛjētparēṣu ॥ 77॥

yasmai dēvāḥ prayachChanti puruṣāya parābhavam ।
buddhiṃ tasyāpakarṣanti sō’pāchīnāni paśyati ॥ 78॥

buddhau kaluṣa bhūtāyāṃ vināśē pratyupasthitē ।
anayō nayasaṅkāśō hṛdayānnāpasarpati ॥ 79॥

sēyaṃ buddhiḥ parītā tē putrāṇāṃ tava bhārata ।
pāṇḍavānāṃ virōdhēna na chaināṃ avabudhyasē ॥ 80॥

rājā lakṣaṇasampannastrailōkyasyāpi yō bhavēt ।
śiṣyastē śāsitā sō’stu dhṛtarāṣṭra yudhiṣṭhiraḥ ॥ 81॥

atīva sarvānputrāṃstē bhāgadhēya puraskṛtaḥ ।
tējasā prajñayā chaiva yuktō dharmārthatattvavit ॥ 82॥

ānṛśaṃsyādanukrōśādyō’sau dharmabhṛtāṃ varaḥ ।
gauravāttava rājēndra bahūnklēśāṃstitikṣati ॥ 83॥

॥ iti śrīmahābhāratē udyōgaparvaṇi prajāgaraparvaṇi
viduranītivākyē chatustriṃśō’dhyāyaḥ ॥ 34॥