Udaka Shanti (Punyaha Vachanam)

1 kalaśa pratiṣṭhāpana prayōga mantrāḥ
brahma̍jajñā̠na-mpra̍tha̠ma-mpu̠rastā̠-dvisī̍ma̠ta-ssu̠ruchō̍ vē̠na ā̍vaḥ ।
sa bu̠dhniyā̍ upa̠mā a̍sya vi̠ṣṭhā-ssa̠taścha̠ yōni̠-masa̍taścha̠ viva̍ḥ ।

nākē̍ supa̠rṇa mupa̠ya-tpata̍ntagṃ hṛ̠dā vēna̍ntō a̠bhyacha̍kṣa-tatvā ।
hira̍ṇyapakṣa̠ṃ varu̍ṇasya dū̠taṃ ya̠masya̠ yōnau̍ śaku̠na-mbhu̍ra̠ṇyum ।

āpyā̍yasva̠ samē̍tu tē vi̠śvata̍-ssōma̠ vṛṣṇi̍yam । bhavā̠ vāja̍sya saṅga̠thē ।
yō ru̠drō a̠gnau yō a̠phsu ya ōṣa̍dhīṣu̠ yō ru̠drō viśvā̠
bhuva̍nā-”vi̠vēśa̠ tasmai̍ ru̠drāya̠ namō̍ astu । 1 (apa upaspṛśya)

i̠daṃ viṣṇu̠ rvicha̍kramē trē̠dhā nida̍dhē pa̠dam । samū̍ḍhamasya pāgṃ su̠rē ।
indra̠ṃ viśvā̍ avīvṛdhan-thsamu̠dravya̍chasa̠-ṅgira̍ḥ ।
ra̠thīta̍magṃ rathī̠nāṃ vājā̍nā̠gṃ̠ satpa̍ti̠-mpati̎m ।
āpō̠ vā i̠daṃgṃ sarva̠ṃ viśvā̍ bhū̠tānyāpa̍ḥ prā̠ṇā vā āpa̍ḥ pa̠śava̠ āpō-‘nna̠māpō-‘mṛ̍ta̠māpa̍-ssa̠mrāḍāpō̍ vi̠rāḍāpa̍-ssva̠rāḍāpa̠-śChandā̠g̠śyāpō̠ jyōtī̠g̠ṣyāpō̠ yajū̠g̠ṣyāpa̍-ssa̠tyamāpa̠-ssarvā̍ dē̠vatā̠ āpō̠ bhūrbhuva̠ssuva̠rāpa̠ ōm । 2

a̠paḥ praṇa̍yati । śra̠ddhā vā āpa̍ḥ । śra̠ddhāmē̠vārabhya̍ pra̠ṇīya̠ pracha̍rati ।
a̠paḥ praṇa̍yati ।
ya̠jñō vā āpa̍ḥ । ya̠jñamē̠vārabhya̍ pra̠ṇīya̠ pracha̍rati । a̠paḥ praṇa̍yati ।
vajrō̠ vā āpa̍ḥ । vajra̍mē̠va bhrātṛ̍vyēbhyaḥ pra̠hṛtya̍ pra̠ṇīya̠ pracha̍rati ।
a̠paḥ praṇa̍yati ।
āpō̠ vai ra̍kṣō̠ghnīḥ । rakṣa̍sā̠mapa̍hatyai । a̠paḥ praṇa̍yati ।
āpō̠ vai dē̠vānā̎-mpri̠ya-ndhāma̍ । dē̠vānā̍mē̠va pri̠ya-ndhāma̍ pra̠ṇīya̠ pracha̍rati । a̠paḥ praṇa̍yati ।
āpō̠ vai sarvā̍ dē̠vatā̎ḥ । dē̠vatā̍ ē̠vārabhya̍ pra̠ṇīya̠ pracha̍rati ।
a̠paḥ praṇa̍yati ।
āpō̠ vai śā̠ntāḥ । śā̠ntābhi̍rē̠vāsya̠ śuchagṃ̍ śamayati । dē̠vō va̍ḥ
savi̠tō-tpu̍nā̠tva-chChi̍drēṇa pa̠vitrē̍ṇa̠ vasō̠ssūrya̍sya ra̠śmibhi̍ḥ ॥ 3

2 vēdārambhē sarvasādhāraṇyēna japyāḥ mantrāḥ
ō-mbhūḥ tathsa̍vi̠tu-rvarē̎ṇyam । ō-mbhuva̍ḥ bhargō̍ dē̠vasya̍ dhīmahi । ōgṃ suva̍ḥ dhiyō̠ yōna̍ḥ prachō̠dayā̎t ।
ō-mbhūḥ tathsa̍vi̠tu-rvarē̎ṇyam । bhargō̍ dē̠vasya̍ dhīmahi । ō-mbhuvaḥ dhiyō̠ yōna̍ḥ prachō̠dayā̎t ।

ōgṃ suva̍ḥ tathsa̍vi̠tu-rvarē̎ṇyaṃ̠ bhargō̍ dē̠vasya̍ dhīmahi । dhiyō̠ yōna̍ḥ prachō̠dayā̎t । ōṃ śānti̠-śśānti̠-śśānti̍ḥ ।

3 vēdādayaḥ
a̠gnimī̎ḻē pu̠rōhi̍taṃ-ya̠jñasya̍
dē̠vamṛ̠tvija̎m । hōtā̎raṃ ratna̠ dhāta̍mam ।
i̠ṣē tvō̠rjētvā̍ vā̠yava̍ssthō pā̠yava̍stha dē̠vō va̍ssavi̠tā prārpa̍yatu̠ śrēṣṭha̍tamāya̠ karma̍ṇē ।
agna̠ āyā̍hi vī̠tayē̍ gṛṇā̠nō ha̠vyadā̍tayē । nihōtā̍ sathsi ba̠r̠hiṣi̍ ।

śannō̍ dē̠vīra̠bhiṣṭa̍ya̠ āpō̍ bhavantu pī̠tayē̎ । śaṃ yōra̠bhisra̍vantu naḥ ॥ 1 (1) ॥

4 rakṣōghnaṃ
kṛ̠ṇu̠ṣva pāja̠ḥ prasi̍ti̠nna pṛ̠thvīṃ yā̠hi rājē̠ vāma̍vā̠gṃ̠ ibhē̍na । tṛ̠ṣvīmanu̠ prasi̍tiṃ-drūṇā̠nō-‘stā̍-‘si̠ viddhya̍ ra̠kṣasa̠ stapi̍ṣṭhaiḥ । tava̍ bhra̠māsa̍ āśu̠yā pa̍taṃ̠ tyanu̍spṛśa-dhṛṣa̠tā śōśu̍chānaḥ । tapūg̍ṣyagnē ju̠hvā̍ pataṃ̠-gānasa̍nditō̠ visṛ̍ja̠ viṣva̍ gu̠lkāḥ । prati̠spaśō̠ visṛ̍ja̠-tūrṇi̍tamō̠ bhavā̍ pā̠yurvi̠śō a̠syā ada̍bdhaḥ ॥ 2 ॥

yōnō̍ dū̠rē a̠ghaśagṃ̍sō̠yō antyagnē̠ māki̍ṣṭē̠ vyathi̠rā da̍dhar​ṣīt । uda̍gnē tiṣṭha̠ pratyā ta̍nuṣva̠nya̍mitrāgṃ̍ ōṣatā-ttigmahētē । yō nō̠ arā̍tigṃ samidhāna cha̠krē nī̠chā tandha̍kṣyata̠ sanna śuṣka̎m । ū̠rdhvō bha̍va̠ prati̍ vi̠dhyā-dhya̠smadā̠ viṣkṛ̍ṇuṣva̠ daivyā̎nyagnē । ava̍sthi̠rā ta̍nuhi yātu̠ jūnā̎-ñjā̠mimajā̍miṃ̠ pramṛ̍ṇīhi̠ śatrūn̍ ॥ 3 ॥

satē̍ jānāti suma̠tiṃ ya̍ viṣṭha̠ya īva̍tē̠ brahma̍ṇē gā̠tumaira̍t । viśvā̎nyasmai su̠dinā̍ni rā̠yō dyu̠mnānya̠ryō vidurō̍ a̠bhidyau̎t । sēda̍gnē astu su̠bhaga̍ ssu̠dānu̠-ryastvā̠ nityē̍na ha̠viṣā̠ ya u̠kthaiḥ । piprī̍ṣati̠ sva āyu̍ṣi durō̠ṇē viśvēda̍smai su̠dinā̠-sā-‘sa̍di̠ṣṭiḥ । archā̍mitē suma̠ti-ṅghōṣya̠rvākh-santē̍ vā̠ vātā̍ jaratā mi̠yaṅgīḥ ॥ 4 ॥

svaśvā̎stvā su̠rathā̍ marjayē-mā̠smē kṣa̠trāṇi̍ dhārayē̠ra-nu̠dyūn । i̠ha tvā̠ bhūryā cha̍rē̠dupa̠tma-ndōṣā̍vasta-rdīdi̠vāgṃ sa̠manu̠dyūn । krīḍa̍ntastvā su̠mana̍sa ssapēmā̠bhi dyu̠mnā ta̍sthi̠vāgṃsō̠ janā̍nām ।
yastvā̠ svaśva̍ssuhira̠ṇyō a̍gna upa̠yāti̠ vasu̍matā̠ rathē̍na । tasya̍ trā̠tā bha̍vasi̠ tasya̠ sakhā̠ yasta̍ āti̠thya mā̍nu̠ṣag jujō̍ṣat ॥ 5 ॥

ma̠hōru̍jāmi ba̠ndhutā̠ vachō̍ bhi̠stanmā̍ pi̠turgōta̍mā̠da nvi̍yāya । tvannō̍ a̠sya vacha̍sa-śchikiddhi̠ hōta̍ryaviṣṭha sukratō̠ damū̍nāḥ । asva̍pna jasta̠raṇa̍ya ssu̠śēvā̠ ata̍ndrāsō-‘vṛ̠kā aśra̍miṣṭhāḥ । tē pā̠yava̍-ssa̠dhriya̍ñchō ni̠ṣadyāgnē̠ tava̍ naḥ pāntvamūra । yē pā̠yavō̍ māmatē̠ya-ntē̍ agnē̠ paśya̍ntō a̠ndha-ndu̍ri̠tāda ra̍kṣann ।
ra̠rakṣa̠ tān-thsu̠kṛtō̍ vi̠śvavē̍dā̠ diphsa̍nta̠ idri̠pavō̠ nāha̍ dēbhuḥ ॥ 6 ॥

tvayā̍ va̠yagṃ sa̍dha̠nya̍-stvōtā̠ stava̠ praṇī̎tya śyāma̠ vājān̍ । u̠bhāśagṃ sā̍ sūdaya satyatā tē-‘nuṣṭhu̠yā kṛ̍ṇuhya-hrayāṇa ।
a̠yā tē̍ agnē sa̠midhā̍ vidhēma̠ prati̠stōmagṃ̍ śa̠syamā̍na-ṅgṛbhāya । dahā̠śasō̍ ra̠kṣasa̍ḥ pā̠hya̍smā-ndru̠hō ni̠dō mi̍tramahō ava̠dyāt । ra̠kṣō̠haṇaṃ̍ ँvā̠jina̠māji̍ gharmi mi̠tra-mprathi̍ṣṭha̠ mupa̍yāmi̠ śarma̍ । śiśā̍nō a̠gniḥ kratu̍bhi̠ ssami̍ddha̠-ssanō̠ divā̠ sa ri̠ṣaḥ
pā̍tu̠ nakta̎m ॥ 7 ॥
vijyōti̍ṣā bṛha̠tā bhā̎tya̠gni rā̠vi-rviśvā̍ni kṛṇutē mahi̠tvā । prādē̍vīrmā̠yā ssa̍hatē du̠rēvā̠ śśiśī̍tē̠ śṛṅgē̠ rakṣa̍sē vi̠nikṣē̎ ।
u̠tasvā̠nāsō̍ di̠viṣa̍ntva̠gnē sti̠gmāyu̍dhā̠ rakṣa̍sē̠ hanta̠ vā u̍ ।
madē̍ chidasya̠ praru̍janti̠ bhāmā̠ nava̍rantē pari̠bādhō̠ adē̍vīḥ ॥ 8 (2) ॥

5 indra sūktaṃ
indraṃ̍ ँvō vi̠śvata̠spari̠ havā̍mahē̠ janē̎bhyaḥ । a̠smāka̍mastu̠ kēva̍laḥ । indra̠-nnarō̍ nē̠madhi̍tā havantē̠ yatpāryā̍ yu̠naja̍tē̠ dhiya̠stāḥ । śūrō̠ nṛṣā̍tā̠ śava̍saśchakā̠ na ā gōma̍ti vra̠jē bha̍jā̠ tvannaḥ̍ । i̠ndri̠yāṇi̍ śatakratō̠ yā tē̠ janē̍ṣu pa̠ñchasu̍ । indra̠ tāni̍ ta̠ ā vṛ̍ṇē । anu̍tē dāyi ma̠ha i̍ndri̠yāya̍ sa̠trātē̠ viśva̠manu̍ vṛtra̠hatyē̎ ॥ 9 ॥

anu̍ kṣa̠tramanu̠ sahō̍ yaja̠trēndra̍ dē̠vēbhi̠ranu̍ tē nṛ̠ṣahyē̎ । āyasmi̎m-thsa̠ptavā̍sa̠vā stiṣṭha̍nti svā̠ruhō̍ yathā ।
ṛṣi̍r​ha dīrgha̠ śrutta̍ma̠ indra̍sya gha̠rmō ati̍thiḥ । ā̠māsu̍ pa̠kvamaira̍ya̠ ā sūryagṃ̍ rōhayō di̠vi । gha̠rmanna sāma̍ntapatā suvṛ̠ktibhi̠-rjuṣṭaṃ̠ girva̍ṇa sē̠gira̍ḥ । indra̠mi-dgā̠thinō̍ bṛ̠hadindra̍ ma̠rkēbhi̍ ra̠rkiṇa̍ḥ । indraṃ̠ ँvāṇī̍ranūṣata ॥ 10 ॥

gāya̍ntitvā gāya̠triṇōrchaṃ̍ tya̠rka ma̠rkiṇa̍ḥ । bra̠hmāṇa̍stvā śatakrata̠-vudva̠gṃ̠ śami̍va yē mirē । a̠gṃ̠hō̠muchē̠ prabha̍rēmā manī̠ṣā mō̍ṣiṣṭha̠-dāvnē̍ suma̠ti-ṅgṛ̍ṇā̠nāḥ ।
i̠dami̍ndra̠ prati̍ ha̠vya-ṅgṛ̍bhāya sa̠tyāssa̍ntu̠ yaja̍mānasya̠ kāmā̎ḥ । vi̠vēṣa̠yanmā̍ dhi̠ṣaṇā̍ ja̠jāna̠ stavai̍ pu̠rā pāryā̠dindra̠ mahna̍ḥ । agṃha̍sō̠ yatra̍ pī̠para̠dyathā̍ nō nā̠vēva̠ yānta̍ mu̠bhayē̍ havantē ॥ 11 ॥

prasa̠mrāja̍-mpratha̠ma ma̍dhva̠-rāṇā̍magṃ hō̠ muchaṃ̍ ँvṛṣa̠bhaṃ ya̠jñiyā̍nām ।
a̠pānna-pā̍tamaśvinā̠ haya̍nta ma̠sminna̍ra indri̠ya-ndha̍tta̠mōja̍ḥ । vina̍ indra̠ mṛdhō̍ jahi nī̠ chā ya̍chCha pṛtanya̠taḥ । a̠dha̠spa̠da-ntamī̎-ṅkṛdhi̠ yō a̠smāgṃ a̍bhi̠dāsa̍ti ।
indra̍kṣa̠trama̠bhi vā̠mamōjō ‘jā̍yathā vṛṣabha chara.ṣaṇī̠nām । apā̍nudō̠ jana̍mamitra̠ yanta̍ mu̠ru-ndē̠vēbhyō̍ akṛṇōru lō̠kam ।
mṛ̠gō na bhī̠maḥ ku̍cha̠rō gi̍ri̠ṣṭhāḥ pa̍rā̠vata̠ āja̍gāmā̠-para̍syāḥ ॥ 12 ॥

sṛ̠kagṃ sa̠gṃ̠ śāya̍ pa̠vimi̍ndra ti̠gmaṃ viśatrū̎-ntāḍi̠ vimṛdhō̍ nudasva ।
viśatrū̠n̠. vimṛdhō̍nuda̠ vivṛ̠trasya̠ hanū̍ ruja । vima̠nyumi̍ndra bhāmi̠tō̍ ‘mitra̍syābhi̠ dāsa̍taḥ ।
trā̠tāra̠mindra̍ mavi̠tāra̠ mindra̠gṃ̠ havē̍ havē su̠hava̠gṃ̠ śūra̠mindra̎m ।
hu̠vē nu śa̠kra-mpu̍ruhū̠ta mindragg̍ sva̠sti nō̍ ma̠ghavā̍ dhā̠tvindra̍ḥ ॥ 13 ॥

mā tē̍ a̠syāgṃ sa̍hasāva̠-npari̍ṣṭā va̠ghāya̍ bhūma harivaḥ parā̠dai ।
trāya̍svanō ‘vṛ̠kēbhi̠-rvarū̍thai̠ stava̍ pri̠yāsa̍ ssū̠riṣu̍ syāma । ana̍vastē̠ ratha̠maśvā̍ya takṣa̠n-tvaṣṭā̠ vajraṃ̍ puruhūta dyu̠manta̎m ।
bra̠hmāṇa̠ indraṃ̍ ma̠haya̍ntō a̠rkairava̍rdhaya̠-nnaha̍yē̠ hanta̠ vā u̍ ।
vṛṣṇē̠ yattē̠ vṛṣa̍ṇō a̠rkamarchā̠ nindra̠ grāvā̍ṇō̠ adi̍ti-ssa̠jōṣā̎ḥ ।
a̠na̠śvāsō̠ yē pa̠vayō̍-‘ra̠thā indrē̍ṣitā a̠bhyava̍rta-nta̠dasyūn̍ ॥ 14 (3) ॥
(tai. ara. 6.1.9; tai. saṃ. 1.4.41.1; tai. saṃ. 1.4.42.1)

yata̍ indra̠ bhayā̍mahē̠ tatō̍ nō̠ abha̍ya-ṅkṛdhi ।
magha̍van chCha̠gdhi tava̠ tanna̍ ū̠tayē̠ vidviṣō̠ vimṛdhō̍ jahi । sva̠sti̠dā vi̠śaspati̍-rvṛtra̠hā vimṛdhō̍ va̠śī । vṛṣēndra̍ḥ pu̠ra ē̍tu na ssvasti̠dā a̍bhaya-ṅka̠raḥ ॥ 15a ॥

ma̠hāgṃ indrō̠ vajra̍ bāhu ṣṣōḍa̠śī śarma̍ yachChatu । sva̠sti nō̍ ma̠ghavā̍ karōtu̠ hantu̍ pā̠pmānaṃ̠ yō̎-‘smā-ndvēṣṭi̍ । sa̠jōṣā̍ indra̠ saga̍ṇō ma̠rudbhi̠ ssōmaṃ̍ piba vṛtrahan chChūra vi̠dvān । ja̠hi śatrū̠gṃ̠ rapa̠mṛdhō̍-nuda̠svāthā bha̍ya-ṅkṛṇuhi vi̠śvatō̍ naḥ ॥ 15b (4) ॥

6 yē dēvāḥ
yē dē̠vāḥ pu̍ra̠ssadō̠-‘gni nē̎trā,
dakṣiṇa̠sadō̍ ya̠manē̎trā,
paśchā̠thsada̍ ssavi̠tṛ nē̎trā,
uttara̠sadō̠ varu̍ṇanētrā,
upari̠ṣadō̠ bṛha̠spati̍ nētrā,
rakṣō̠haṇa̠stē na̍ḥ pāntu̠ tē nō̍-‘vantu̠ tēbhyō̠ nama̠stēbhya̠ ssvāhā̠
-‘gnayē̍ rakṣō̠ghnē svāhā̍,
ya̠māya̍ savi̠trē ,
varu̍ṇāya̠ bṛha̠spata̍yē̠
duva̍svatē rakṣō̠ghnē svāhā̎ ॥ 16 (5) ॥

7 yē dēvāḥ (anuṣaṅgaṃ)
yē dē̠vāḥ pu̍ra̠ssadō̠-‘gni nē̎trā rakṣō̠haṇa̠stēna̍ḥ pāntu̠ tē nō̍-‘vantu̠
tēbhyō̠ nama̠stēbhya̠ ssvāhā̎ । yē dē̠vā da̍kṣiṇa̠sadō̍ ya̠ma nē̎trā rakṣō̠haṇa̠stēna̍ḥ pāntu̠ tē nō̍-‘vantu̠
tēbhyō̠ nama̠stēbhya̠ ssvāhā̎ । yē dē̠vāḥ pa̍śchā̠thsada̍ ssavi̠tṛ nē̎trā rakṣō̠haṇa̠stēna̍ḥ pāntu̠ tē nō̍-‘vantu̠ tēbhyō̠ nama̠stēbhya̠ ssvāhā̎ । yē dē̠vā u̍ttara̠sadō̠ varu̍ṇanētrā rakṣō̠haṇa̠stēna̍ḥ pāntu̠ tē nō̍-‘vantu̠
tēbhyō̠ nama̠stēbhya̠ ssvāhā̎ । yē dē̠vā u̍pari̠ṣadō̠ bṛha̠spati̍ nētrā rakṣō̠haṇa̠stēna̍ḥ pāntu̠ tē nō̍-‘vantu̠ tēbhyō̠ nama̠stēbhya̠ ssvāhā̎ । agnayē̍ rakṣō̠ghnē svāhā̎ । ya̠māya̍ rakṣō̠ghnē svāhā̎ । savi̠trē ra̍kṣō̠ghnē svāhā̎ । varu̍ṇāya rakṣō̠ghnē svāhā̎ । bṛha̠spata̍yē̠ duva̍svatē rakṣō̠ghnē svāhā̎ ॥ 16ā (5ā) ॥

8 āyuṣkāmēṣṭi mantrāḥ
a̠gnirāyu̍ṣmā̠n​thsa vana̠spati̍bhi̠-rāyu̍ṣmā̠-ntēna̠tvā-”yu̠ṣā-”yu̍ṣmanta-ṅkarōmi̠,
sōma̠ āyu̍ṣmā̠n​thsa ōṣa̍dhībhir,
ya̠jña āyu̍ṣmā̠n​thsa dakṣi̍ṇābhi̠r,
brahmāyu̍ṣma̠tta-dbrā̎hma̠ṇai-rāyu̍ṣmad,
dē̠vā āyu̍ṣmanta̠stē̍ ‘mṛtē̠nā yu̍ṣmanta̠stēna̠tvā
-”yu̠ṣā-”yu̍ṣmanta-ṅkarōmi ॥ 17 (6) ॥

9 āyuṣkāmēṣṭi mantrāḥ (anuṣaṅgaṃ)
a̠gnirāyu̍ṣmā̠n​thsa vana̠spati̍bhi̠ rāyu̍ṣmā̠-ntēna̠tvā ”yu̠ṣā-”yu̍ṣmanta-ṅkarōmi । sōma̠ āyu̍ṣmā̠n​thsa ōṣa̍dhībhi̠rāyu̍ṣmā̠-ntēna̠tvā
-”yu̠ṣā-”yu̍ṣmanta-ṅkarōmi । ya̠jña āyu̍ṣmā̠n​thsa dakṣi̍ṇābhi̠rāyu̍ṣmā̠-ntēna̠tvā
-”yu̠ṣā-”yu̍ṣmanta-ṅkarōmi ।
brahmāyu̍ṣma̠tta-dbrā̎hma̠ṇai-rāyu̍ṣma̠-ttēna̠tvā ”yu̠ṣā-”yu̍ṣmantaṃ
karōmi । dē̠vā āyu̍ṣmanta̠stē̍ ‘mṛtē̠-nāyu̍ṣmanta̠stēna̠tvā
-”yu̠ṣā-”yu̍ṣmanta-ṅkarōmi ॥ 17ā(6ā) ॥

10 agṃhōmucha mantrāḥ
yā vā̍mindrā varuṇā yata̠vyā̍ ta̠nūstayē̠ mamagṃha̍sō muñchataṃ̠ ,
ँyā vā̍mindrā varuṇā saha̠syā̍, rakṣa̠syā̍, tēja̠syā̍,
ta̠nūstayē̠ mamagṃha̍sō muñchataṃ̠,
ँyō vā̍mindrā varuṇā va̠gnau srāma̠staṃ vā̍ mē̠tēnā va̍yajē̠,
yō vā̍mindrā varuṇā dvi̠pāthsu̍ pa̠śuṣu̠, chatu̍ṣpāthsu,
gō̠ṣṭhē, gṛ̠hē-, ṣva̠phsōṣa̍dhīṣu̠, vana̠spati̍ṣu̠,
srāma̠staṃ vā̍ mē̠tēnā va̍yajē ॥ 18 (7) ॥

11 agṃhōmucha mantrāḥ (anuṣaṅgaṃ)
yā vā̍mindrā varuṇā yata̠vyā̍ ta̠nūstayē̠ mamagṃha̍sō muñchatam ।
yā vā̍mindrā varuṇā saha̠syā̍ ta̠nūstayē̠ mamagṃha̍sō muñchatam ।
yā vā̍mindrā varuṇā rakṣa̠syā̍ ta̠nūstayē̠ mamagṃha̍sō muñchatam । yā vā̍mindrā varuṇā tēja̠syā̍ ta̠nūstayē̠ mamagṃha̍sō muñchatam ।
yō vā̍mindrā varuṇā va̠gnau srāma̠staṃ vā̍mē̠ tēnā va̍yajē ।
yō vā̍mindrā varuṇā dvi̠pāthsu̍ pa̠śuṣu̠ srāma̠staṃ vā̍mē̠ tēnā va̍yajē ।
yō vā̍mindrā varuṇā̠ chatu̍ṣpāthsu pa̠śuṣu̠ srāma̠staṃ vā̍mē̠ tēnā va̍yajē । yō vā̍mindrā varuṇā gō̠ṣṭhē srāma̠staṃ vā̍mē̠ tēnā va̍yajē ।
yō vā̍mindrā varuṇā gṛ̠hēṣu̠ srāma̠staṃ vā̍mē̠ tēnā va̍yajē ।
yō vā̍mindrā varuṇā̠-‘phsu srāma̠staṃ vā̍mē̠ tēnā va̍yajē ।
yō vā̍mindrā varu̠ṇauṣa̍dhīṣu̠ srāma̠staṃ vā̍mē̠ tēnā va̍yajē ।
yō vā̍mindrā varuṇā̠ vana̠spati̍ṣu̠ srāma̠staṃ vā̍mē̠ tēnā va̍yajē ॥ (18ā) (7ā)

12 śāstṛ sūktaṃ (āpyaṃ)
agnē̍ yaśasvi̠n̠. yaśa̍sē̠ mama̍rpa̠yēndrā̍vatī̠ mapa̍chitī mi̠hāva̍ha । a̠ya-mmū̠rdhā pa̍ramē̠ṣṭhī su̠varchā̎-ssamā̠nānā̍ mutta̠ma ślō̍kō astu । bha̠dra-mpaśya̍nta̠ upa̍sēdu̠ragrē̠ tapō̍ dī̠kṣā mṛṣa̍ya ssuva̠rvida̍ḥ । tata̍ḥ, kṣa̠tra-mbala̠mōja̍ścha jā̠ta-ntada̠smai dē̠vā a̠bhisanna̍-mantu । dhā̠tā vi̍dhā̠tā pa̍ra̠mōta sa̠ndṛ-kpra̠jāpa̍tiḥ paramē̠ṣṭhī vi̠rājā̎ । stōmā̠-śchandāgṃ̍si ni̠vidō̍ma āhurē̠tasmai̍ rā̠ṣṭrama̠bhi-sanna̍māma । a̠bhyāva̍rtaddhva̠-mupa̠mēta̍ sā̠kama̠yagṃ śā̠stā-‘dhi̍patirvō astu । a̠sya vi̠jñāna̠manu̠sagṃ-ra̍bhaddhvami̠ma-mpa̠śchādanu̍ jīvātha̠ sarvē̎ ॥ 19 (8) ॥

13 rāṣṭrabhṛtaṃ
ṛ̠tā̠ṣā-ḍṛ̠tadhā̍mā̠-‘gni-rga̍ndha̠rvasta-syauṣa̍dhayō-‘phsa̠rasa̠
ūrjō̠ nāma̠ sa i̠da-mbrahma̍ kṣa̠tra-mpā̍tu̠ tā i̠da-mbrahma̍ kṣa̠tra-mpā̎mtu̠
tasmai̠ svāhā̠ tābhya̠ ssvāhā̍ ,
sagṃhi̠tō vi̠śvasā̍mā̠ sūryō̍ gandha̠rva-stasya̠ marī̍chayō-‘phsa̠rasa̍ ā̠yuva̍ ,
ssuṣu̠mna ssūrya̍ raśmi-ścha̠ndramā̍ gandha̠rva-stasya̠ nakṣa̍trāṇya-
phsa̠rasō̍ bē̠kura̍yō,
bhu̠jyussu̍pa̠rṇō ya̠jñō ga̍ndha̠rva-stasya̠ dakṣi̍ṇā aphsa̠rasa̍ sta̠vāḥ,
pra̠jāpa̍ti-rvi̠śvaka̍rmā̠ manō̍ gandha̠rvastasya̍-rkhsā̠mānya̍-phsa̠rasō̠ vahna̍ya,
iṣi̠rō vi̠śva vya̍chā̠ vātō̍ gandha̠rva-stasyāpō̎ ‘phsa̠rasō̍ mu̠dā,
bhuva̍nasya patē̠ yasya̍ta u̠pari̍ gṛ̠hā i̠ha cha̍ ।

sa nō̍ rā̠svājyā̍nigṃ rā̠yaspōṣagṃ̍ su̠vīryagṃ̍ saṃvathsa̠rīṇāg̍ sva̠stim ।
pa̠ra̠mē̠ṣṭhyadhi̍pati-rmṛ̠tyu-rga̍ndha̠rva-stasya̠ viśva̍maphsa̠rasō̠ bhuva̍,
ssukṣi̠ti- ssubhū̍ti-rbhadra̠kṛ-thsuva̍rvā-npa̠rjanyō̍ gandha̠rva-stasya̍
vi̠dyutō̎ ‘phsa̠rasō̠ ruchō̍,
dū̠rē hē̍tira-mṛḍa̠yō mṛ̠tyu-rga̍ndha̠rva-stasya̍ pra̠jā a̍phsa̠rasō̍ bhī̠ruvaḥ̠,

chāru̍ḥ kṛpaṇa kā̠śī kāmō̍ gandha̠rva-stasyā̠dhayō̎ ‘phsa̠rasa̍ śśō̠chaya̍ntī̠r,
nāma̠ sa i̠da-mbrahma̍ kṣa̠tra-mpā̍tu tā i̠da-mbrahma̍ kṣa̠tra-mpā̎mtu̠ tasmai̠ svāhā̠
tābhya̠ ssvāhā̠,
sa nō̍ bhuvanasya patē̠ yasya̍ta u̠pari̍ gṛ̠hā i̠ha cha̍ । u̠ru brahma̍ṇē̠-‘smai kṣa̠trāya̠ mahi̠ śarma̍ yachCha ॥ 20 (9) ॥

14 rāṣṭrabhṛtaṃ (anuṣaṅgaṃ)
ṛ̠tā̠ṣā-ḍṛ̠tadhā̍mā̠-‘gni-rga̍ndha̠rvassa-i̠da-mbrahma̍ kṣa̠tra-mpā̍tu̠
tasmai̠ svāhā̎ । tasyauṣa̍dhayō-‘phsa̠rasa̠ ūrjō̠ nāma̠ tā i̠da-mbrahma̍ kṣa̠tra-mpā̎mtu̠ tābhya̠ ssvāhā̎ ॥
sagṃhi̠tō vi̠śvasā̍mā̠ sūryō̍ gandha̠rvassa i̠da-mbrahma̍ kṣa̠tra-mpā̍tu̠
tasmai̠ svāhā̎ । tasya̠ marī̍chayō-‘phsa̠rasa̍ ā̠yuvō̠ nāma̠ tā i̠da-mbrahma̍ kṣa̠tra-mpā̎mtu̠ tābhya̠ ssvāhā̎ ॥
suṣu̠mnassūrya̍-raśmiścha̠ndramā̍ gandha̠rvassa i̠da-mbrahma̍ kṣa̠tra-mpā̍tu̠
tasmai̠ svāhā̎ । tasya̠ nakṣa̍trāṇya ‘phsa̠rasō̍ bē̠kura̍yō̠ nāma̠ tā
i̠da-mbrahma̍ kṣa̠tra-mpā̎mtu̠ tābhya̠ ssvāhā̎ ॥
bhu̠jyussu̍pa̠rṇō ya̠jñō ga̍ndha̠rvassa i̠da-mbrahma̍ kṣa̠tra-mpā̍tu̠ tasmai̠ svāhā̎ । tasya̠ dakṣi̍ṇā aphsa̠rasa̍ sta̠vā nāma̠ tā i̠da-mbrahma̍ kṣa̠tra-mpā̎mtu̠ tābhya̠ ssvāhā̎ ॥
pra̠jāpa̍ti-rvi̠śvaka̍rmā̠ manō̍ gandha̠rvassa i̠da-mbrahma̍ kṣa̠tra-mpā̍tu̠
tasmai̠ svāhā̎ । tasya̍r​-khsā̠mānya̍-‘phsa̠rasō̠ vahna̍yō̠ nāma̠ tā i̠da-mbrahma̍ kṣa̠tra-mpā̎mtu̠ tābhya̠ ssvāhā̎ ॥

iṣi̠rō vi̠śvavya̍chā̠ vātō̍ gandha̠rvassa i̠da-mbrahma̍ kṣa̠tra-mpā̍tu̠
tasmai̠ svāhā̎ । tasyāpō̎-‘phsa̠rasō̍ mu̠dā nāma̠ tā i̠da-mbrahma̍
kṣa̠tra-mpā̎mtu̠ tābhya̠ ssvāhā̎ ॥ bhuva̍nasya patē̠ yasya̍ta u̠pari̍ gṛ̠hā i̠ha cha̍ ।
sa nō̍ rā̠svājyā̍nigṃ rā̠yaspōṣagṃ̍ su̠vīryagṃ̍ saṃvathsa̠rīṇāg̍
sva̠stigg​ svāhā̎ ॥
pa̠ra̠mē̠ṣṭhyadhi̍pati-rmṛ̠tyu-rga̍ndha̠rvassa i̠da-mbrahma̍ kṣa̠tra-mpā̍tu̠
tasmai̠ svāhā̎ । tasya̠ viśva̍maphsa̠rasō̠ bhuvō̠ nāma̠ tā i̠da-mbrahma̍ kṣa̠tra-mpā̎mtu̠ tābhya̠ ssvāhā̎ ॥
sukṣi̠ti-ssubhū̍ti-rbhadra̠kṛ-thsuva̍rvā-npa̠rjanyō̍ gandha̠rvassa
i̠da-mbrahma̍ kṣa̠tra-mpā̍tu̠ tasmai̠ svāhā̎ । tasya ̍vi̠dyutō̎-‘phsa̠rasō̠ ruchō̠ nāma̠ tā i̠da-mbrahma̍ kṣa̠tra-mpā̎mtu̠ tābhya̠ ssvāhā̎ ॥
dū̠rē hē̍tira mṛḍa̠yō mṛ̠tyu-rga̍ndha̠rvassa i̠da-mbrahma̍ kṣa̠tra-mpā̍tu̠
tasmai̠ svāhā̎ । tasya̍ pra̠jā a̍phsa̠rasō̍ bhī̠ruvō̠ nāma̠ tā i̠da-mbrahma̍ kṣa̠tra-mpā̎mtu̠ tābhya̠ ssvāhā̎ ॥ chāru̍ḥ kṛpaṇa kā̠śī kāmō̍ gandha̠rvassa i̠da-mbrahma̍ kṣa̠tra-mpā̍tu̠
tasmai̠ svāhā̎ । tasyā̠dhayō̎ ‘phsa̠rasa̍ śśō̠chaya̍nti̠-rnāma̠ tā i̠da-mbrahma̍ kṣa̠tra-mpā̎mtu̠ tābhya̠ ssvāhā̎ ॥

sa nō̍ bhuvanasyapatē̠ yasya̍ta u̠pari̍ gṛ̠hā i̠ha cha̍ ।u̠ru brahma̍ṇē̠-‘smai kṣa̠trāya̠ mahi̠ śarma̍ yachCha̠ svāhā̎ ॥ (20ā) (9ā)

15 sarpa sūktaṃ
namō̍ astu sa̠rpēbhyō̠ yē kē cha̍ pṛthi̠vī manu̍ । yē a̠ntari̍kṣē̠ yē di̠vi tēbhya̍ ssa̠rpēbhyō̠ nama̍ḥ । yē̍-‘dō rō̍cha̠nē di̠vō yē vā̠ sūrya̍sya ra̠śmiṣu̍ । yēṣā̍ma̠phsu sada̍ḥ kṛ̠ta-ntēbhya̍ ssa̠rpēbhyō̠ nama̍ḥ । yā iṣa̍vō yātu̠ dhānā̍nāṃ̠ ँyē vā̠ vana̠spatī̠gṃ̠ ranu̍ । yē vā̍-‘va̠ṭēṣu̠ śēra̍tē̠ tēbhya̍ ssa̠rpēbhyō̠ nama̍ḥ ॥ 21 (10) ॥

16 pañchachōḍāḥ
a̠ya-mpu̠rō hari̍kēśa̠ ssūrya̍raśmi̠-stasya̍ rathagṛ̠thsaścha̠ rathau̍jāścha sēnāni
grāma̠ṇyau̍ puñjikastha̠lā cha̍ kṛtastha̠lā chā̎phsa̠rasau̍ yātu̠ dhānā̍ hē̠tī rakṣāgṃ̍si̠ prahē̍ti ,
ra̠ya-nda̍kṣi̠ṇā vi̠śva ka̍rmā̠ tasya̍ ratha sva̠naścha̠ rathē̍-chitraścha sēnāni
grāma̠ṇyau̍ mēna̠kā cha̍ sahaja̠nyā chā̎-‘phsa̠rasau̍ da̠ṃṣṇava̍ḥ pa̠śavō̍ hē̠tiḥ pauru̍ṣēyō va̠dhaḥ prahē̍ti,
ra̠ya-mpa̠śchā-dvi̠śva-vya̍chā̠ stasya̠ ratha̍ prōta̠śchā-sa̍marathaścha sēnāni
grāma̠ṇyau̎ pra̠mlōcha̍ntī chā nu̠mlōcha̍ntī-chā-‘phsa̠rasau̍ sa̠rpā hē̠ti-r
vyā̠ghrāḥ prahē̍ti,
ra̠ya mu̍tta̠rā-thsa̠ṃyadva̍su̠stasya̍ sēna̠jichcha̍ su̠ṣēṇa̍ścha sēnāni grāma̠ṇyau̍
vi̠śvāchī̍cha ghṛ̠tāchī̍ chā-phsa̠rasā̠ vāpō̍ hē̠ti-rvāta̠ḥ prahē̍ti ,
ra̠ya-mu̠parya̠-rvāgva̍-su̠stasya̠ tārkṣya̠-śchāri̍ṣṭa-nēmiścha sēnāni grāma̠ṇyā̍
vu̠rvaśī̍ cha pū̠rvachi̍ttiśchā-phsa̠rasau̍ vi̠dyuddhē̠ti-ra̍va̠sphūrja̠-nprahē̍ti̠ ,
stēbhyō̠ nama̠stē nō̍ mṛḍayantu̠ tē ya-ndvi̠ṣmō yaścha̍ nō̠ dvēṣṭi̠ taṃ vō̠
jambhē̍ dadhāmi ॥ 22 (11) ॥

17 pañchachōḍāḥ (anuṣaṅgaṃ)
a̠ya-mpu̠rō hari̍kēśa̠ ssūrya̍raśmi̠-stasya̍ rathagṛ̠thsaścha̠ rathau̍jāścha sēnāni grāma̠ṇyau̍ puñjikastha̠lā cha̍ kṛtastha̠lā chā̎phsa̠rasau̍ yātu̠dhānā̍ hē̠tī rakṣāgṃ̍si̠ prahē̍ti̠stēbhyō̠ nama̠stē nō̍ mṛḍayantu̠tē ya-ndvi̠ṣmō yaścha̍ nō̠ dvēṣṭi̠ taṃ vō̠ jambhē̍ dadhāmi ॥

a̠ya-nda̍kṣi̠ṇā vi̠śvaka̍rmā̠ tasya̍ rathasva̠naścha̠ rathē̍ chitraścha sēnāni
grāma̠ṇyau̍ mēna̠kā cha̍ sahaja̠nyā chā̎phsa̠rasau̍ da̠ṃṣṇava̍ḥ pa̠śavō̍
hē̠tiḥ pauru̍ṣēyō va̠dhaḥ prahē̍ti̠stēbhyō̠ nama̠stē nō̍ mṛḍayantu̠ tē
ya-ndvi̠ṣmō yaścha̍ nō̠ dvēṣṭi̠ taṃ vō̠ jambhē̍ dadhāmi ॥

a̠ya-mpa̠śchā-dvi̠śva vya̍chā̠-stasya̠ ratha̍prōta̠śchā-sa̍marathaścha sēnāni grāma̠ṇyau̎ pra̠mlōcha̍ntīchā nu̠mlōcha̍ntī-chāphsa̠rasau̍ sa̠rpā hē̠ti-rvyā̠ghrāḥ prahē̍ti̠stēbhyō̠ nama̠stē nō̍ mṛḍayantu̠ tēya-ndvi̠ṣmō yaścha̍ nō̠ dvēṣṭi̠ taṃ vō̠ jambhē̍ dadhāmi ॥

a̠ya-mu̍tta̠rā-thsa̠ṃyadva̍su̠stasya̍ sēna̠jichcha̍ su̠ṣēṇa̍ścha sēnāni
grāma̠ṇyau̍ vi̠śvāchī̍cha ghṛ̠tāchī̍chā-phsa̠rasā̠ vāpō̍ hē̠ti-rvāta̠ḥ
prahē̍ti̠stēbhyō̠ nama̠stē nō̍ mṛḍayantu̠ tē ya-ndvi̠ṣmō yaścha̍ nō̠
dvēṣṭi̠ taṃ vō̠ jambhē̍ dadhāmi ॥
a̠yamu̠parya̠-rvāgva̍su̠stasya̠ tārkṣya̠-śchāri̍ṣṭa-nēmiścha sēnāni
grāma̠ṇyā̍ vu̠rvaśī̍ cha pū̠rvachi̍tti-śchāphsa̠rasau̍ vi̠dyuddhē̠tira̍-
va̠sphūrja̠-nprahē̍ti̠stēbhyō̠ nama̠stē nō̍ mṛḍayantu̠ tē ya-ndvi̠ṣmō yaścha̍ nō̠ dvēṣṭi̠
taṃ vō̠ jambhē̍ dadhāmi ॥ 22ā(11ā) ॥

18 apratirathaḥ
ā̠śu-śśiśā̍nō vṛṣa̠bhō na yu̠dhmō gha̍nāgha̠naḥ, kṣōbha̍ṇa-śchar​ṣaṇī̠nām । sa̠ṅkranda̍nō-‘nimi̠ṣa ē̍ka vī̠raśśa̠tagṃ
sēnā̍ ajayathsā̠kamindra̍ḥ । sa̠ṅkranda̍nēnā nimi̠ṣēṇa̍ ji̠ṣṇunā̍ yutkā̠rēṇa̍ duśchyava̠nēna̍ dhṛ̠ṣṇunā̎ । tadindrē̍ṇa jayata̠ ta-thsa̍hadhvaṃ̠ ँyudhō̍ nara̠ iṣu̍ hastēna̠ vṛṣṇā̎ । sa iṣu̍hastai̠-ssa ni̍ṣa̠ṅgibhi̍rva̠śī sagg​ sra̍ṣṭā̠ sa yudha̠ indrō̍ ga̠ṇēna̍ । sa̠gṃ̠sṛ̠ṣṭa̠ji-thsō̍ma̠pā bā̍hu śa̠rdhyū̎rdhva dha̍nvā̠ prati̍hitābhi̠rastā̎ । bṛha̍spatē̠ pari̍dīyā̠ rathē̍na rakṣō̠hā ‘mitrāgṃ̍ apa̠ bādha̍mānaḥ ॥ 23 ॥

pra̠bha̠ñjan-thsēnā̎ḥ pramṛ̠ṇō yu̠dhā jaya̍nna̠smāka̍-mēdhyavi̠tā rathā̍nām । gō̠tra̠bhidaṃ̍ gō̠vidaṃ̠ ँvajra̍bāhuṃ̠ jaya̍nta̠majma̍ pramṛ̠ṇanta̠-mōja̍sā । i̠magṃ sa̍jātā̠ anu̍vīra-yadhva̠ mindragṃ̍ sakhā̠yō-‘nu̠ sagṃ ra̍bhadhvam । ba̠la̠vi̠jñā̠ya-ssthavi̍ra̠ḥ pravī̍ra̠-ssaha̍svān. vā̠jī saha̍māna u̠graḥ । a̠bhivī̍rō a̠bhisa̍tvā sahō̠jā jaitra̍mindra̠ ratha̠māti̍ṣṭha gō̠vit ॥ 24 ॥

a̠bhigō̠trāṇi̠ saha̍sā̠ gāha̍mānō-‘dā̠yō vī̠raśśa̠tama̍nyu̠rindra̍ḥ । du̠śchya̠va̠naḥ pṛ̍tanā̠ṣāḍa̍ yu̠dhyō̎-smāka̠gṃ̠ sēnā̍ avatu̠ prayu̠thsu । indra̍ āsāṃ-nē̠tā bṛha̠spati̠-rdakṣi̍ṇā ya̠jñaḥ pu̠ra ē̍tu̠ sōma̍ḥ । dē̠va̠sē̠nānā̍-mabhibhañjatī̠nā-ñjaya̍ntīnā-mma̠rutō̍ ya̠ntvagrē̎ । indra̍sya̠ vṛṣṇō̠ varu̍ṇasya̠ rājña̍ ādi̠tyānā̎-mma̠rutā̠gṃ̠ śardha̍ u̠gram । ma̠hāma̍nasā-mbhuvanachya̠vānāṃ̠ ghōṣō̍ dē̠vānāṃ̠ jaya̍tā̠ muda̍sthāt । a̠smāka̠-mindra̠-ssamṛ̍tēṣu dhva̠jēṣva̠smākaṃ̠ ँyā iṣa̍va̠stā ja̍yantu ॥ 25 ॥

a̠smākaṃ̍ ँvī̠rā utta̍rē bhavantva̠smānu̍ dēvā avatā̠ havē̍ṣu । uddha̍r​ṣaya maghava̠-nnāyu̍dhā̠-nnyuth​satva̍nā-mmāma̠kānāṃ̠ mahāgṃ̍si । udvṛ̍trahan-vā̠jināṃ̠ ँvāji̍nā̠nyudrathā̍nāṃ̠ jaya̍tāmētu̠ ghōṣa̍ḥ । upa̠prēta̠ jaya̍tā narassthi̠rā va̍ssantu bā̠hava̍ḥ ।
indrō̍ va̠-śśarma̍ yachCha tvanā-dhṛ̠ṣyā yathāsa̍tha । ava̍sṛṣṭā̠ parā̍pata̠ śara̍vyē̠ brahma̍ sagṃśitā ॥ 26 ॥

gachChā̠mitrā̠-npravi̍śa̠ maiṣāṃ̠ kañcha̠nōchChi̍ṣaḥ । marmā̍ṇi tē̠ varma̍bhiśChādayāmi̠ sōma̍stvā̠ rājā̠ ‘mṛtē̍nā̠bhi-va̍stām । u̠rōrvarī̍yō̠ vari̍vastē astu̠ jaya̍ntaṃ̠ tvāmanu̍ madantu dē̠vāḥ । yatra̍ bā̠ṇā-ssa̠mpata̍nti kumā̠rā vi̍śi̠khā i̍va । indrō̍ na̠statra̍ vṛtra̠hā vi̍śvā̠hā śarma̍ yachChatu ॥ 27 (12) ॥

19 chamaka-ntṛtīya anuvākaḥ
śa-ñcha̍ mē̠ maya̍ścha mē pri̠ya-ñcha̍ mē-‘nukā̠maścha̍ mē̠
kāma̍ścha mē saumana̠saścha̍ mē bha̠dra-ñcha̍ mē̠ śrēya̍ścha mē̠
vasya̍ścha mē̠ yaśa̍ścha mē̠ bhaga̍ścha mē̠ dravi̍ṇa-ñcha mē
ya̠ntā cha̍ mē dha̠rtā cha̍ mē̠ kṣēma̍ścha mē̠ dhṛti̍ścha mē̠
viśvaṃ̍ cha mē̠ maha̍ścha mē (28)
sa̠ṃvichcha̍ mē̠ jñātra̍-ñcha mē̠
sūścha̍ mē pra̠sūścha̍ mē̠ sīra̍-ñcha mē la̠yaścha̍ ma
ṛ̠ta-ñcha̍ mē̠-‘mṛtaṃ̍ cha mē ‘ya̠kṣma-ñcha̠ mē-‘nā̍mayachcha mē
jī̠vātu̍ścha mē dīrghāyu̠tva-ñcha̍ mē-‘nami̠tra-ñcha̠ mē-‘bha̍ya-ñcha mē
su̠ga-ñcha̍ mē̠ śaya̍na-ñcha mē sū̠ṣā cha̍ mē su̠dina̍-ñcha mē ॥ 29 (13) ॥

20 vihavyam
mamā̎gnē̠ varchō̍ viha̠vēṣva̍stu va̠ya-ntvēndhā̍nā sta̠nuva̍-mpuṣēma ।
mahya̍-nnamantā-mpra̠diśa̠śchata̍sra̠ stvayā-‘ddhya̍kṣēṇa̠ pṛta̍nā jayēma ।
mama̍ dē̠vā vi̍ha̠vē sa̍ntu̠ sarva̠ indrā̍vantō ma̠rutō̠ viṣṇu̍ra̠gniḥ ।
mamā̠ntari̍kṣa mu̠ru gō̠pama̍stu̠ mahyaṃ̠ ँvāta̍ḥ pavatā̠-ṅkāmē̍ a̠sminn ।
mayi̍ dē̠vā dravi̍ṇa̠ māya̍jantā̠-mmayyā̠ śīra̍stu̠ mayi̍ dē̠vahū̍tiḥ ॥ 30 ॥

daivyā̠ hōtā̍rā vaniṣanta̠ pūrvē ‘ri̍ṣṭā-ssyāma ta̠nuvā̍ su̠vīrā̎ḥ । mahyaṃ̍ ँyajantu̠ mama̠ yāni̍ ha̠vyā-”kū̍ti ssa̠tyā mana̍sō mē astu ।
ēnō̠ mānigā̎-ṅkata̠machcha̠ nāhaṃ viśvē̍ dēvāsō̠ adhi̍vōcha tā mē ।
dēvī̎ṣṣaḍu-rvīru̠ruṇa̍ḥ kṛṇōta̠ viśvē̍ dēvāsa i̠ha vī̍rayaddhvam ।
māhā̎smahi pra̠jayā̠ mā ta̠nūbhi̠-rmāra̍dhāma dviṣa̠tē sō̍marājann ।
a̠gnirma̠nyu-mpra̍tinu̠da-npu̠rastā̠-dada̍bdhō gō̠pāḥ pari̍pāhi na̠stvam ॥ 31 ॥

pra̠tyañchō̍ yantu ni̠guta̠ḥ puna̠stē̍ ‘maiṣā̎-ñchi̠tta-mpra̠budhā̠ vinē̍śat ।
dhā̠tā dhā̍tṛ̠ṇā-mbhuva̍nasya̠ yaspati̍-rdē̠vagṃ sa̍vi̠tāra̍mabhi māti̠ṣāha̎m ।
i̠maṃ ya̠jña ma̠śvinō̠bhā bṛha̠spati̍-rdē̠vāḥ pā̎mtu̠ yaja̍māna-nnya̠rthāt ।
u̠ru̠vyachā̍ nō mahi̠ṣa śśarma̍yagṃ sada̠smin. havē̍ puruhū̠taḥ pu̍ru̠kṣu ।
sa na̍ḥ pra̠jāyai̍ haryaśva mṛḍa̠yēndra̠ mā nō̍ rīriṣō̠ mā parā̍dāḥ ॥ 32 ॥

yē na̍ ssa̠patnā̠ apa̠tē bha̍vantvindrā̠-gnibhyā̠ mava̍ bādhāmahē̠ tān ।
vasa̍vō ru̠drā ā̍di̠tyā u̍pari̠ spṛśaṃ̍ mō̠graṃ-chēttā̍ramadhi rā̠jama̍krann ।
a̠rvāñcha̠ mindra̍ ma̠mutō̍ havāmahē̠ yō gō̠ji-ddha̍na̠-jida̍śva̠-jidyaḥ ।
i̠mannō̍ ya̠jñaṃ vi̍ha̠vē ju̍ṣasvā̠sya ku̍rmō harivō mē̠dinaṃ̍ tvā ॥ 33 (14) ॥

21 mṛgāraḥ
a̠gnē-rma̍nvē pratha̠masya̠ prachē̍tasō̠ya-mpāñcha̍janya-mba̠hava̍ ssami̠ndhatē̎ ।
viśva̍syāṃ vi̠śi pra̍viviśi̠vāgṃ sa̍mīmahē̠ sa nō̍ muñcha̠tvagṃ ha̍saḥ ।
yasyē̠da-mprā̠ṇa-nni̍mi̠ṣa-dyadēja̍ti̠ yasya̍ jā̠ta-ñjana̍māna-ñcha̠ kēva̍lam ।
staumya̠gni-nnā̍thi̠tō jō̍havīmi̠ sa nō̍ muñcha̠tvagṃ ha̍saḥ ।
indra̍sya manyē pratha̠masya̠ prachē̍tasō vṛtra̠ghna-sstōmā̠ upa̠mā mu̠pāgu̍ḥ ।
yō dā̠śuṣa̍-ssu̠kṛtō̠ hava̠mupa̠ gantā̠ sa nō̍ muñcha̠tvagṃ ha̍saḥ ॥ 34 ॥

ya ssaṃ̍grā̠ma-nnaya̍ti̠ saṃva̠śī yu̠dhē yaḥ pu̠ṣṭāni̍ sagṃsṛ̠jati̍ tra̠yāṇi̍ । staumīndra̍-nnāthi̠tō jō̍havīmi̠ sa nō̍ muñcha̠tvagṃ ha̍saḥ । ma̠nvēvāṃ̎ mitrāvaruṇā̠ tasya̍ vitta̠gṃ̠ satyau̍jasā dṛgṃhaṇā̠ ya-nnu̠dēthē̎ । yā rājā̍nagṃ sa̠rathaṃ̍ ँyā̠tha u̍grā̠ tā nō̍ muñchata̠ māga̍saḥ ।
yō vā̠gṃ̠ ratha̍ ṛ̠jura̍śmi-ssa̠tyadha̍rmā̠ mithu̠-śchara̍nta-mupa̠yāti̍ dū̠ṣayann̍ ॥ 35 ॥

staumi̍ mi̠trāvaru̍ṇā nāthi̠tō jō̍havīmi̠ tau nō̍ muñchata̠ māga̍saḥ । vā̠yō-ssa̍vi̠tu-rvi̠dathā̍ni manmahē̠ yāvā̎tma̠n-vadbi̍bhṛ̠tō yau
cha̠ rakṣa̍taḥ । yau viśva̍sya pari̠bhū ba̍bhū̠vatu̠stau nō̍ muñchata̠ māga̍saḥ ।
upa̠śrēṣṭhā̍na ā̠śiṣō̍ dē̠vayō̠rdharmē̍ asthirann । staumi̍ vā̠yugṃ sa̍vi̠tāra̍-nnāthi̠tō jō̍havīmi̠ tau nō̍ muñchata̠ māga̍saḥ ।
ra̠thīta̍mau rathī̠nā ma̍hva ū̠tayē̠ śubha̠ṅgami̍ṣṭhau su̠yamē̍-bhi̠raśvai̎ḥ ॥ 36 ॥

yayō̎rvā-ndēvau dē̠vēṣva-ni̍śita̠ mōja̠stau nō̍ muñchata̠ māga̍saḥ । yadayā̍taṃ vaha̠tugṃ sū̠ryāyā̎-stricha̠krēṇa̍ sa̠gṃ̠ sada̍mi̠chChamā̍nau । staumi̍ dē̠vā va̠śvinau̍ nāthi̠tō jō̍havīmi̠ tau nō̍ muñchata̠ māga̍saḥ ।
ma̠rutāṃ̎ manvē̠ adhi̍nō bruvantu̠ prēmāṃ vāchaṃ̠ ँviśvā̍mavantu̠ viśvē̎ ।
ā̠śūn. hu̍vē su̠yamā̍nū̠tayē̠ tē nō̍ muñcha̠ntvēna̍saḥ । ti̠gmamāyu̍dhaṃ vīḍi̠tagṃ saha̍svada di̠vyagṃ śardha̠ḥ pṛta̍nāsu ji̠ṣṇu ॥ 37 ॥

staumi̍ dē̠vā-nma̠rutō̍ nāthi̠tō jō̍havīmi̠ tē nō̍ muñcha̠ntvēna̍saḥ । dē̠vānā̎-mmanvē̠ adhi̍ nō bruvantu̠ prēmāṃ vāchaṃ̠ ँviśvā̍mavantu̠ viśvē̎ । ā̠śūn. hu̍vē su̠yamā̍nū̠tayē̠ tē nō̍ muñcha̠ntvēna̍saḥ । yadi̠da-mmā̍-‘bhi̠śōcha̍ti̠ pauru̍ṣēyēṇa̠ daivyē̍na । staumi̠ viśvā̎-ndē̠vā-nnā̍thi̠tō jō̍havīmi̠ tē nō̍ muñcha̠ntvēna̍saḥ ।
anu̍nō̠-‘dyānu̍mati̠ranvida̍nu matē̠ tvaṃ vai̎śvāna̠rō na̍ ū̠tyā pṛ̠ṣṭō di̠vi ॥ 38 ॥

anu̍nō̠-‘dhyānu̍mati-rya̠jña-ndē̠vēṣu̍ manyatām । a̠gniścha̍ havya̠ vāha̍nō̠ bhava̍tā-ndā̠śuṣē̠ maya̍ḥ । anvida̍numatē̠ tva-mmanyā̍sai̠ śañcha̍ naḥ kṛdhi । kratvē̠ dakṣā̍ya nō hinu̠ praṇa̠ āyūgṃ̍ṣi tāriṣaḥ ॥ 38a ॥

vai̠śvā̠na̠rō na̍ ū̠tyā ”prayā̍tu parā̠vata̍ḥ । a̠gniru̠kthēna̠ vāha̍sā ।

pṛ̠ṣṭō di̠vi pṛ̠ṣṭō a̠gniḥ pṛ̍thi̠vyā-mpṛ̠ṣṭō viśvā̠ ōṣa̍dhī̠rā-vi̍vēśa ।
vai̠śvā̠na̠ra ssaha̍sā pṛ̠ṣṭō a̠gnissanō̠ divā̠ sari̠ṣaḥ pā̍tu̠ nakta̎m ॥ 38b ॥
yē apra̍thētā̠ mami̍tēbhi̠ rōjō̍bhi̠ ryē pra̍ti̠ṣṭhē abha̍vatā̠ṃ vasū̍nām । staumi̠ dyāvā̍pṛthi̠vī nā̍thi̠tō jō̍havīmi̠ tē nō̍ muñchata̠magṃ ha̍saḥ ।
urvī̍ rōdasī̠ vari̍vaḥ kṛṇōta̠-ṅkṣētra̍sya patnī̠ adhi̍nō brūyātam । staumi̠ dyāvā̍pṛthi̠vī nā̍thi̠tō jō̍havīmi̠ tē nō̍ muñchata̠magṃ ha̍saḥ ।
yattē̍ va̠ya-mpu̍ruṣa̠trāya̍ vi̠ṣṭhā vi̍dvāgṃ saścha kṛ̠mā kachcha̠ nāga̍ḥ ॥ 39 ॥
kṛ̠dhī sva̍smāgṃ adi̍tē̠ranā̍gā̠ vyēnāgṃ̍si śiśrathō̠ viṣva̍gagnē । yathā̍ ha̠ ta-dva̍savō gau̠ryaṃ̍ chi-tpa̠diṣi̠tā mamu̍ñchatā yajatrāḥ ।
ē̠vā tvama̠sma-tpramu̍ñchā̠ vyagṃha̠ḥ prātā̎ryagnē prata̠rānna̠ āyu̍ḥ ॥ 40 (15) ॥

22 sarpāhutī mantrāḥ
sa̠mīchī̠ nāmā̍si̠ prāchī̠ diktasyā̎stē̠ ‘gniradhi̍pati rasi̠tō ra̍kṣi̠tā yaśchādhi̍pati̠-ryaścha̍ gō̠ptā tābhyāṃ̠ nama̠staunō̍ mṛḍayatāṃ̠ tē ya-ndvi̠ṣmō yaścha̍ nō̠ dvēṣṭi̠ taṃ vā̠-ñjambhē̍ dadhāmyō-,
-ja̠svinī̠ nāmā̍si dakṣi̠ṇā diktasyā̎sta̠ indrō-‘dhi̍pati̠ḥ pṛdā̍ku̠ḥ ,
prāchī̠ nāmā̍si pra̠tīchī̠ diktasyā̎stē̠ sōmō-‘dhi̍pati ssva̠jō̍ ,
-‘va̠sthāvā̠ nāmā̠-syudī̍chī̠ diktasyā̎stē̠ varu̠ṇō-‘dhi̍pati-sti̠raścha̍rāji̠ḥ,
-radhi̍patnī̠ nāmā̍si bṛha̠tī diktasyā̎stē̠ bṛha̠spati̠-radhi̍pati śśvi̠trō,
va̠śinī̠ nāmā̍sī̠ ya-ndiktasyā̎stē ya̠mō-‘dhi̍patiḥ ka̠lmāṣa̍ grīvō,
rakṣi̠tā yaśchādhi̍pati̠-ryaścha̍ gō̠ptā tābhyāṃ̠ nama̠stau nō̍ mṛḍayatāṃ̠
tē ya-ndvi̠ṣmō yaścha̍ nō̠ dvēṣṭi̠ taṃ vā̠-ñjambhē̍ dadhāmi ॥ 41 (16) ॥

23 sarpāhutī mantrāḥ (anuṣaṅgaṃ)
sa̠mīchī̠ nāmā̍si̠ prāchī̠ diktasyā̎stē̠ ‘gniradhi̍pati rasi̠tō ra̍kṣi̠tā-yaśchādhi̍pati̠-ryaścha̍ gō̠ptā
tābhyāṃ̠ nama̠stau nō̍ mṛḍayatāṃ̠
tē ya-ndvi̠ṣmō yaścha̍ nō̠ dvēṣṭi̠ taṃ vāṃ̠ jambhē̍ dadhāmi ।

ō̠ja̠svinī̠ nāmā̍si dakṣi̠ṇā diktasyā̎sta̠ indrō-‘dhi̍pati̠ḥ pṛdā̍ku̠ḥ rakṣi̠tā yaśchādhi̍pati̠-ryaścha̍ gō̠ptā tābhyāṃ̠ nama̠stau nō̍ mṛḍayatāṃ̠ tē ya-ndvi̠ṣmō yaścha̍nō̠ dvēṣṭi̠ taṃ vāṃ̠ jambhē̍ dadhāmi ।

prāchī̠ nāmā̍si pra̠tīchī̠ diktasyā̎stē̠ sōmō-‘dhi̍pati ssva̠jō ra̍kṣi̠tā yaśchādhi̍pati̠-ryaścha̍ gō̠ptā tābhyāṃ̠ nama̠stau nō̍ mṛḍayatāṃ̠ tē ya-ndvi̠ṣmō yaścha̍ nō̠ dvēṣṭi̠ taṃ vā̠-ñjambhē̍ dadhāmi ।

a̠va̠sthāvā̠ nāmā̠-syudī̍chī̠ diktasyā̎stē̠ varu̠ṇō-‘dhi̍pati-sti̠raścha̍rāji̠ḥ rakṣi̠tā yaśchādhi̍pati̠-ryaścha̍ gō̠ptā tābhyāṃ̠ nama̠stau nō̍ mṛḍayatāṃ̠ tē ya-ndvi̠ṣmō yaścha̍ nō̠ dvēṣṭi̠ taṃ vā̠-ñjambhē̍ dadhāmi ।

adhi̍patnī̠ nāmā̍si bṛha̠tī diktasyā̎stē̠ bṛha̠spati̠-radhi̍pati-śśvi̠trō ra̍kṣi̠tā yaśchādhi̍pati̠-ryaścha̍ gō̠ptā tābhyāṃ̠ nama̠stau nō̍ mṛḍayatāṃ̠ tē ya-ndvi̠ṣmō yaścha̍ nō̠ dvēṣṭi̠ taṃ vā̠-ñjambhē̍ dadhāmi ।

va̠śinī̠ nāmā̍sī̠ya-ndiktasyā̎stē ya̠mō-‘dhi̍patiḥ ka̠lmāṣa̍ grīvō rakṣi̠tā yaśchādhi̍pati̠-ryaścha̍ gō̠ptā tābhyāṃ̠ nama̠stau nō̍ mṛḍayatāṃ̠
tē ya-ndvi̠ṣmō yaścha̍ nō̠ dvēṣṭi̠ taṃ vāṃ̠ jambhē̍ dadhāmi ॥ 41ā (16ā) ॥

24 gandharvāhutīḥ
hē̠tayō̠ nāma̍stha̠ tēṣā̎ṃ vaḥ pu̠rō gṛ̠hā a̠gnirva̠ iṣa̍va ssali̠lō,
ni̍li̠pā-nnāma̍stha̠ tēṣā̎ṃ vō dakṣi̠ṇā gṛ̠hāḥ pi̠tarō̍ va̠ iṣa̍va̠ ssaga̍rō,
va̠jriṇō̠ nāma̍stha̠ tēṣā̎ṃ vaḥ pa̠śchā-dgṛ̠hā ssvapnō̍ va̠ iṣa̍vō̠ gahva̍rō,
-‘va̠sthāvā̍nō̠ nāma̍stha̠ tēṣā̎ṃ va utta̠rā-dgṛ̠hā āpō̍ va̠ iṣa̍va ssamu̠drō-,
-‘dhi̍patayō̠ nāma̍stha̠ tēṣā̎ṃ va u̠pari̍ gṛ̠hā va̠r̠ṣaṃ va̠ iṣa̠vō-‘va̍svān,
kra̠vyā nāma̍stha̠ pārthi̍vā̠-stēṣā̎ṃ va i̠ha gṛ̠hā annaṃ̍ ँva̠ iṣa̍vō nimi̠ṣō,
vā̍tanā̠ma-ntēbhyō̍ vō̠ nama̠stē nō̍ mṛḍayata̠ tē ya-ndvi̠ṣmō yaścha̍ nō̠ dvēṣṭi̠
taṃ vō̠ jambhē̍ dadhāmi ॥ 42 (17) ॥

25 gandharvāhutīḥ (anuṣaṅgaṃ)
hē̠tayō̠ nāma̍stha̠ tēṣā̎ṃ vaḥ pu̠rō gṛ̠hā a̠gnirva̠ iṣa̍va-ssali̠lō vā̍tanā̠ma-ntēbhyō̍ vō̠ nama̠stē nō̍ mṛḍayata̠ tē ya-ndvi̠ṣmō yaścha̍ nō̠ dvēṣṭi̠ taṃ vō̠ jambhē̍ dadhāmi ।

ni̠li̠pā-nnāma̍stha̠ tēṣā̎ṃ vō dakṣi̠ṇā gṛ̠hāḥ pi̠tarō̍ va̠ iṣa̍va̠-ssaga̍rō vā̍tanā̠ma-ntēbhyō̍ vō̠ nama̠stē nō̍ mṛḍayata̠ tē ya-ndvi̠ṣmō yaścha̍ nō̠ dvēṣṭi̠ taṃ vō̠ jambhē̍ dadhāmi ।

va̠jriṇō̠ nāma̍stha̠ tēṣā̎ṃ vaḥ pa̠śchā-dgṛ̠hā ssvapnō̍ va̠ iṣa̍vō̠ gahva̍rō vā̍tanā̠ma-ntēbhyō̍ vō̠ nama̠stē nō̍ mṛḍayata̠ tē ya-ndvi̠ṣmō yaścha̍ nō̠ dvēṣṭi̠ taṃ vō̠ jambhē̍ dadhāmi ।

a̠va̠sthāvā̍nō̠ nāma̍stha̠ tēṣā̎ṃ va utta̠rā-dgṛ̠hā āpō̍ va̠ iṣa̍vassamu̠drō vā̍tanā̠ma-ntēbhyō̍ vō̠ nama̠stē nō̍ mṛḍayata̠ tē ya-ndvi̠ṣmō yaścha̍ nō̠ dvēṣṭi̠ taṃ vō̠ jambhē̍ dadhā̠mi ।

adhi̍patayō̠ nāma̍stha̠ tēṣā̎ṃ va u̠pari̍ gṛ̠hā va̠r̠ṣaṃ va̠ iṣa̠vō-‘va̍svān vā̍tanā̠ma-ntēbhyō̍ vō̠ nama̠stē nō̍ mṛḍayata̠ tē ya-ndvi̠ṣmō yaścha̍ nō̠ dvēṣṭi̠ taṃ vō̠ jambhē̍ dadhāmi ।

kra̠vyā nāma̍stha̠ pārthi̍vā̠-stēṣā̎ṃ va i̠ha gṛ̠hā annaṃ̍ ँva̠ iṣa̍vō nimi̠ṣō vā̍tanā̠ma-ntēbhyō̍ vō̠ nama̠stē nō̍ mṛḍayata̠ tē ya-ndvi̠ṣmō yaścha̍ nō̠ dvēṣṭi̠ taṃ vō̠ jambhē̍ dadhāmi ॥ 42ā (17ā) ॥

26 ajyāni mantrāḥ
śa̠tāyu̍dhāya śa̠tavī̎ryāya śa̠tōta̍yē ‘bhimāti̠ṣāhē̎ । śa̠taṃ yō na̍ śśa̠radō̠ ajī̍tā̠-nindrō̍ nēṣa̠dati̍ duri̠tāni̠ viśvā̎ ।
yē cha̠tvāra̍ḥ pa̠thayō̍ dēva̠yānā̍ anta̠rā dyāvā̍pṛthi̠vī vi̠yanti̍ । tēṣā̠ṃ yō ajyā̍ni̠- majī̍ti-mā̠vahā̠ttasmai̍ nō dēvā̠ḥ pari̍dattē̠ha sarvē̎ । grī̠ṣmō hē̍ma̠nta u̠ta nō̍ vasa̠nta śśa̠ra-dva̠r̠ṣā ssu̍vi̠tannō̍ astu ।
tēṣā̍-mṛtū̠nāgṃ śa̠taśā̍radānā-nnivā̠ta ē̍ṣā̠mabha̍yē syāma । i̠du̠va̠thsa̠rāya̍ parivathsa̠rāya̍ saṃvathsa̠rāya̍ kṛṇutā bṛ̠hannama̍ḥ । tēṣāṃ̎ ँva̠yagṃ su̍ma̠tau ya̠jñiyā̍nā̠-ñjyōgajī̍tā̠ aha̍tā ssyāma ।
bha̠drānna̠-śśrēya̠ ssama̍naiṣṭa dēvā̠ stvayā̍-‘va̠sēna̠ sama̍śīmahi tvā ।
sanō̍mayō̠ bhūḥ pi̍tō̠ āvi̍śasva̠ śantō̠kāya̍ ta̠nuvē̎ syō̠naḥ ॥ 43 (18) ॥

bhū̠ta-mbhavyaṃ̍ bhavi̠ṣya-dvaṣa̠-ṭthsvāhā̠ ,
nama̠ ṛ-khsāma̠-yaju̠-rvaṣa̠-ṭthsvāhā̠ ,
namō̍ gāya̠trī tri̠ṣṭup jaga̍tī̠ vaṣa̠-ṭthsvāhā̠ ,
nama̍ḥ pṛthi̠vya̍ntari̍kṣaṃ̠ dyau-rvaṣa̠-ṭthsvāhā̠ ,
namō̠ ‘gnirvā̠yu-ssūryō̠ vaṣa̠-ṭthsvāhā̠ ,
nama̍ḥ prā̠ṇō-vyā̠nō̍-‘pā̠nō vaṣa̠-ṭthsvāhā̠ ,
namō-‘nnaṃ̍ kṛ̠ṣi-rvṛṣṭi̠-rvaṣa̠-ṭthsvāhā̠ ,
nama̍ḥ pi̠tā pu̠traḥ pautrō̠ vaṣa̠-ṭthsvāhā̠ ,
namō̠ bhūrbhuva̠ssuva̠ rvaṣa̠-ṭthsvāhā̠ nama̍ḥ ॥ 44 (19) ॥

27 atharvaśīr​ṣaṃ
(tai. brā. 1.5.8.1-1.5.8.3)
indrō̍ dadhī̠chō a̠sthabhi̍ḥ । vṛ̠trāṇya pra̍tiṣkutaḥ । ja̠ghāna̍ nava̠tīrnava̍ । i̠chChanna-śva̍sya̠ yachChira̍ḥ । parva̍tē̠ṣvapa̍śritam । tadvi̍dachCharya̠ṇāva̍ti ।
atrā ha̠ gōrama̍nvata । nāma̠ tvaṣṭu̍ra-pī̠chya̎m । i̠tthā cha̠ndrama̍sō gṛ̠hē ।
indra̠mi-dgā̠thinō̍ bṛ̠hat ॥ 45 ॥

indra̍-ma̠rkēbhi̍ ra̠rkiṇa̍ḥ । indraṃ̠ ँvāṇī̍ranūṣata । indra̠ iddharyō̠ ssachā̎ ।
sa-mmi̍śla̠ āva̍chō̠ yujā̎ । indrō̍ va̠jrī hi̍ra̠ṇyaya̍ḥ । indrō̍ dī̠rghāya̠ chakṣa̍sē । ā sūryagṃ̍ rōhaya-ddi̠vi । vi gōbhi̠radri̍mairayat । indra̠ vājē̍ṣu nō ava । sa̠hasra̍ pradhanēṣu cha ॥ 46 ॥

u̠gra u̠grābhi̍-rū̠tibhi̍ḥ । tamindraṃ̍ ँvājayāmasi । ma̠hē vṛ̠trāya̠ hanta̍vē । sa vṛṣā̍ vṛṣa̠bhō-bhu̍vat । indra̠ ssadā ma̍nē kṛ̠taḥ । ōji̍ṣṭha̠ ssabalē̍ hi̠taḥ । dyu̠mnī ślō̠kī sa sau̠mya̍ḥ । gi̠rā vajrō̠ na sambhṛ̍taḥ । saba̍lō̠ ana̍pachyutaḥ । va̠va̠kṣu ru̠grō astṛ̍taḥ ॥ 47 (20) ॥

28 pratyaṅgirasaḥ
(tai. brā. 2.4.2.1-2.4.2.4)
chakṣu̍ṣō hētē̠ mana̍sō hētē । vāchō̍ hētē̠ brahma̍ṇō hētē । yōmā̍-‘ghā̠yu-ra̍bhi̠dāsa̍ti । tama̍gnē mē̠nyā-‘mē̠ni-ṅkṛ̍ṇu । yōmā̠ chakṣu̍ṣā̠ yō mana̍sā । yō vā̠chā brahma̍ṇā-‘ghā̠yu-ra̍bhi̠dāsa̍ti । tayā̎-‘gnē̠ tva-mmē̠nyā । a̠muma̍ mē̠ni-ṅkṛ̍ṇu । ya-tkiñchā̠sau mana̍sā̠ yachcha̍ vā̠chā । ya̠jñai-rju̠hōti̠ yaju̍ṣā ha̠virbhi̍ḥ ॥ 48 ॥

ta-nmṛ̠tyu-rnir-ṛ̍tyā saṃvidā̠naḥ । pu̠rā-”di̠ṣṭā-dāhu̍tī-rasya hantu ।
yā̠tu̠dhānā̠ nir-ṛ̍ti̠-rā-du̠ rakṣa̍ḥ । tē a̍syaghnaṃ̠ tvanṛ̍tēna sa̠tyam ।
indrē̍ṣitā̠ ājya̍masya mathnantu । māta-thsamṛ̍ddhi̠ yada̠sau ka̠rōti̍ ।
hanmi̍tē̠-‘ha-ṅkṛ̠tagṃ ha̠viḥ । yō mē̍ ghō̠ramachī̍ kṛtaḥ ।
apā̎mchau ta u̠bhau bā̠hū । apa̍nahyāmyā̠sya̎m ॥ 49 ॥

apa̍nahyāmi tē bā̠hū । apa̍nahyāmyā̠sya̎m । a̠gnē-rdē̠vasya̠ brahma̍ṇā । sarvaṃ̍ tē ‘vadhiṣa-ṅkṛ̠tam । pu̠rā-‘muṣya̍ vaṣa-ṭkā̠rāt । ya̠jña-ndē̠vēṣu̍ naskṛdhi । svi̍ṣṭa-ma̠smākaṃ̍ bhūyāt । mā-‘smā-nprāpa̠nnarā̍tayaḥ । anti̍ dū̠rē sa̠tō a̍gnē । bhrātṛ̍vyasyā bhi̠dāsa̍taḥ । va̠ṣa̠-ṭkā̠rēṇa̠ vajrē̍ṇa । kṛ̠tyāgṃ ha̍nmi kṛ̠tāma̠ham । yō mā̠ naktaṃ̠ divā̍ sā̠yam । prā̠ta-śchāhnō̍ ni̠pīya̍ti । a̠dyā-tami̍ndra̠ vajrē̍ṇa । bhrātṛ̍vya-mpādayāmasi ॥ 50 (21) ॥

(tai. brā. 2.5.1.1-2.5.1.3)
prā̠ṇō ra̍kṣati̠ viśva̠mēja̍t । iryō̍ bhū̠tvā ba̍hu̠dhā ba̠hūni̍ । sa i-thsarvaṃ̠ ँvyā̍naśē । yō dē̠vō dē̠vēṣu̍ vi̠bhūra̠ntaḥ ।
āvṛ̍dū̠dā-tkṣētriya̍ddhva̠ga-dvṛṣā̎ । tami-tprā̠ṇa-mmana̠sōpa̍ śikṣata ।
agraṃ̍ dē̠vānā̍-mi̠dama̍ttu nō ha̠viḥ । mana̍sa̠śchi-ttē̠dam । bhū̠ta-mbhavyaṃ̍ cha gupyatē । taddhi dē̠vēṣva̍-gri̠yam ॥ 51 ॥

ā na̍ ētu puraścha̠ram । sa̠ha dē̠vai-ri̠magṃ hava̎m । mana̠-śśrēya̍si śrēyasi । karma̍n. ya̠jñapa̍tiṃ̠ dadha̍t । ju̠ṣatāṃ̎ mē̠ vāgi̠dagṃ ha̠viḥ । vi̠rā-ḍdē̠vī pu̠rōhi̍tā । ha̠vya̠vāḍana̍-pāyinī । yayā̍ rū̠pāṇi̍ bahu̠dhā vada̍nti । pēśāgṃ̍si dē̠vāḥ pa̍ra̠mē ja̠nitrē̎ । sā nō̍ vi̠rāḍana̍pa sphurantī ॥ 52 ॥

vāgdē̠vī ju̍ṣatā-mi̠dagṃ ha̠viḥ । chakṣu̍-rdē̠vānāṃ̠ jyōti̍ra̠mṛtē̠ nya̍ktam ।
a̠sya vi̠jñānā̍ya bahu̠dhā nidhī̍yatē । tasya̍ su̠mna-ma̍śīmahi । mā nō̍ hāsī-dvichakṣa̠ṇam । āyu̠rinna̠ḥ pratī̎ryatām । ana̍ndhā̠-śchakṣu̍ṣā va̠yam । jī̠vā jyōti̍-raśīmahi । suva̠-rjyōti̍-ru̠tāmṛtaṃ̎ । śrōtrē̍ṇa bha̠dra mu̠ta-śṛ̍ṇvanti sa̠tyam । śrōtrē̍ṇa̠ vāchaṃ̍ bahu̠dhōdyamā̍nām । śrōtrē̍ṇa̠ mōda̍ścha̠ maha̍ścha śrūyatē ।
śrōtrē̍ṇa̠ sarvā̠ diśa̠ āśṛ̍ṇōmi । yēna̠ prāchyā̍ u̠ta da̍kṣi̠ṇā । pra̠tīchyai̍ di̠śa-śśṛ̠ṇvantyu̍tta̠rāt । tadichChrōtraṃ̍ bahu̠dhōdyamā̍nam ।
a̠rānna nē̠miḥ pari̠sarvaṃ̍ babhūva ॥ 53 (22) ॥

(tai. brā. 2.7.7.1-2.7.7.7)
si̠gṃ̠hē vyā̠ghra u̠ta yā pṛdā̍kau । tviṣi̍-ra̠gnau brā̎hma̠ṇē sūryē̠yā ।
indraṃ̠ ँyā dē̠vī su̠bhagā̍ ja̠jāna̍ । sā na̠ āga̠n varcha̍sā saṃvidā̠nā । yā rā̍ja̠nyē̍ dundu̠-bhāvāya̍tāyām । aśva̍sya̠ krandyē̠ puru̍ṣasya mā̠yau । indraṃ̠ ँyā dē̠vī su̠bhagā̍ ja̠jāna̍ । sā na̠ āga̠n varcha̍sā saṃvidā̠nā । yā ha̠stini̍ dvī̠pini̠ yā hira̍ṇyē । tviṣi̠-raśvē̍ṣu̠ puru̍ṣēṣu̠ gōṣu̍ ॥ 54 ॥

indraṃ̠ ँyā dē̠vī su̠bhagā̍ ja̠jāna̍ । sā na̠ āga̠n varcha̍sā saṃvidā̠nā । rathē̍ a̠kṣēṣu̍ vṛṣa̠bhasya̠ vājē̎ । vātē̍ pa̠rjanyē̠ varu̍ṇasya̠ śuṣmē̎ । indraṃ̠ ँyā dē̠vī su̠bhagā̍ ja̠jāna̍ । sā na̠ āga̠n varcha̍sā saṃvidā̠nā । rāḍa̍si vi̠rāḍa̍si । sa̠mrāḍa̍si sva̠rāḍa̍si । indrā̍ya tvā̠ tēja̍svatē̠ tēja̍svantagg​ śrīṇāmi । indrā̍ya̠ tvauja̍svata̠ ōja̍svantagg​ śrīṇāmi ॥ 55 ॥

indrā̍ya tvā̠ paya̍svatē̠ paya̍svantagg​ śrīṇāmi । indrā̍ya̠ tvā-”yu̍ṣmata̠ āyu̍ṣmantagg​ śrīṇāmi । tējō̍-‘si । tattē̠ praya̍chChāmi । tēja̍svadastu mē̠ mukha̎m । tēja̍sva̠chChirō̍ astu mē । tēja̍svān. vi̠śvata̍ḥ pra̠tyam । tēja̍sā̠ sa-mpi̍pṛgdhimā । ōjō̍-‘si । tattē̠ praya̍chChāmi ॥ 56 ॥

ōja̍svadastu mē̠ mukha̎m । ōja̍sva̠chChirō̍ astu mē । ōja̍svān. vi̠śvata̍ḥ pra̠tyam । ōja̍sā̠ sampi̍pṛgdhi mā । payō̍-‘si । tattē̠ praya̍chChāmi । paya̍svadastu mē̠ mukha̎m । paya̍sva̠chChirō̍ astu mē । paya̍svān. vi̠śvata̍ḥ pra̠tyam । paya̍sā̠ sampi̍pṛgdhi mā ॥ 57 ॥

āyu̍rasi । tattē̠ praya̍chChāmi । āyu̍ṣmadastu mē̠ mukha̎m । āyu̍ṣma̠chChirō̍ astu mē । āyu̍ṣmān. vi̠śvata̍ḥ pra̠tyam । āyu̍ṣā̠ sampi̍pṛgdhi mā । i̠ma-ma̍gna̠ āyu̍ṣē̠ varcha̍sē kṛdhi । pri̠yagṃ rētō̍ varuṇa sōma rājann । mā̠-tē-vā̎smā aditē̠ śarma̍ yachCha । viśvē̍ dēvā̠ jara̍daṣṭi̠-ryathā-‘sa̍t ॥ 58 ॥

āyu̍rasi vi̠śvāyu̍rasi । sa̠rvāyu̍rasi̠ sarva̠māyu̍rasi । yatō̠ vātō̠ manō̍javāḥ । yata̠ḥ, kṣara̍nti̠ sindha̍vaḥ । tāsāṃ̎ tvā̠ sarvā̍sāgṃ ru̠chā । a̠bhiṣi̍ñchāmi̠ varcha̍sā । sa̠mu̠dra i̍vāsi ga̠hmanā̎ । sōma̍ ivā̠syadā̎bhyaḥ । a̠gniri̍va vi̠śvata̍ḥ pra̠tyam । sūrya̍ iva̠ jyōti̍ṣā vi̠bhūḥ ॥ 59 ॥

a̠pāṃ yō drava̍ṇē̠ rasa̍ḥ । tama̠hama̠smā ā̍muṣyāya̠ṇāya̍ । tēja̍sē brahmavarcha̠sāya̍ gṛhṇāmi । a̠pāṃ ya ū̠rmau rasa̍ḥ । tama̠hama̠smā ā̍muṣyāya̠ṇāya̍ । ōja̍sē vī̠ryā̍ya gṛhṇāmi । a̠pāṃ yō ma̍ddhya̠tō rasa̍ḥ । tama̠hama̠smā ā̍muṣyāya̠ṇāya̍ । puṣṭyai̎ pra̠jana̍nāya gṛhṇāmi । a̠pāṃ yō ya̠jñiyō̠ rasa̍ḥ । tama̠hama̠smā ā̍muṣyāya̠ṇāya̍ । āyu̍ṣē dīrghāyu̠tvāya̍ gṛhṇāmi ॥ 60 (23) ॥

29 anna sūktaṃ
(tai. brā. 2.8.8.1-2.8.8.4)
a̠hama̍smi prathama̠jā ṛ̠tasya̍ । pūrvaṃ̍ dē̠vēbhyō̍ a̠mṛta̍sya̠ nābhi̍ḥ ।
yō mā̠ dadā̍ti̠ sa i dē̠va mā vā̎ḥ । a̠hamanna̠ manna̍ ma̠danta̍madmi । pūrva̍-ma̠gnērapi̍ daha̠tyannaṃ̎ । ya̠ttau hā̍sātē ahamutta̠rēṣu̍ । vyātta̍masya pa̠śava̍-ssu̠jambha̎m । paśya̍nti̠ dhīrā̠ḥ pracha̍ranti̠ pākā̎ḥ ।
jahā̎mya̠nya-nna ja̍hāmya̠nyam । a̠hamannaṃ̠ ँvaśa̠michcha̍rāmi ॥ 61 ॥

sa̠mā̠namarthaṃ̠ paryē̍mi bhu̠ñjat । kō mā mannaṃ̍ manu̠ṣyō̍ dayēta ।
parā̍kē̠ annaṃ̠ nihi̍taṃ lō̠ka ē̠tat । viśvai̎-rdē̠vaiḥ pi̠tṛbhi̍-rgu̠ptamanna̎m ।
yada̠dyatē̍ lu̠pyatē̠ ya-tpa̍rō̠pyatē̎ । śa̠ta̠ta̠mī sā ta̠nūrmē̍ babhūva ।
ma̠hāntau̍ cha̠rū sa̍kṛ-ddu̠gdhēna̍ paprau । diva̍ñcha̠ pṛśñi̍ pṛthi̠vī-ñcha̍ sā̠kam ।
ta-thsa̠mpiba̍ntō̠ na mi̍nanti vē̠dhasa̍ḥ । naitadbhūyō̠ bhava̍ti̠ nō kanī̍yaḥ ॥ 62 ॥

annaṃ̍ prā̠ṇamanna̍ mapā̠na-mā̍huḥ । annaṃ̍ mṛ̠tyu-ntamu̍ jī̠vātu̍ māhuḥ ।
annaṃ̍ bra̠hmāṇō̍ ja̠rasaṃ̍ ँvadanti । anna̍māhuḥ pra̠jana̍na-mpra̠jānā̎m ।
mōgha̠-mannaṃ̍ ँvindatē̠ apra̍chētāḥ । sa̠tya-mbra̍vīmi va̠dha ithsa tasya̍ ।
nārya̠maṇaṃ̠ puṣya̍ti̠ nō sakhā̍yam । kēva̍lāghō bhavati kēvalā̠dī ।
a̠ha-mmē̠gha ssta̠naya̠n var​ṣa̍nnasmi । māma̍dantya̠-hama̍dmya̠nyān ॥ a̠hagṃ sada̠mṛtō̍ bhavāmi । madā̍di̠tyā adhi̠ sarvē̍ tapanti ॥ 63 ॥

30 vāk sūktaṃ
(tai. brā. 2.8.8.4)
dē̠vīṃ vācha̍-majanayanta̠ ya-dvāgvada̍nti ॥ 64 ॥

dē̠vīṃ vācha̍majanayanta dē̠vāḥ । tāṃ vi̠śvarū̍pāḥ pa̠śavō̍ vadanti । sā nō̍ ma̠ndrēṣa̠ mūrjaṃ̠ duhā̍nā । dhē̠nurvāga̠smā-nupa̠suṣṭu̠taitu̍ ॥ 64a ॥

ya-dvāgvada̍ntya-vichēta̠nāni̍ । rāṣṭrī̍ dē̠vānā̎-nniṣa̠sāda̍ ma̠ndrā । chata̍sra̠ ūrjaṃ̍ duduhē̠ payāgṃ̍si । kva̍svi dasyāḥ para̠ma-ñja̍gāma ॥ 64b ॥

(tai. brā. 2.8.8.4-2.8.8.5)
a̠na̠ntā-mantā̠dadhi̠ nirmi̍tā-mma̠hīm । yasyāṃ̎ dē̠vā a̍dadhu̠-rbhōja̍nāni । ēkā̎kṣarā-ndvi̠padā̠gṃ̠ ṣaṭpa̍dāñcha । vācha̍-ndē̠vā upa̍jīvanti̠ viśvē̎ । vācha̍-ndē̠vā upa̍jīvanti̠ viśvē̎ । vācha̍-ṅgandha̠rvāḥ pa̠śavō̍ manu̠ṣyā̎ḥ । vā̠chīmā viśvā̠ bhuva̍nā̠-nyarpi̍tā । sā nō̠ havaṃ̍ juṣatā̠-mindra̍ patnī ।
vāga̠kṣaraṃ̍ prathama̠jā ṛ̠tasya̍ । vēdā̍nā-mmā̠tā-‘mṛta̍sya̠ nābhi̍ḥ ॥ 65 ॥

sā nō̍ juṣā̠ṇōpa̍ ya̠jña māgā̎t । ava̍ntī dē̠vī su̠havā̍ mē astu । yā mṛṣa̍yō mantra̠ kṛtō̍ manī̠ṣiṇa̍ḥ । a̠nvaichCha̍-ndē̠vā-stapa̍sā̠ śramē̍ṇa । tā-ndē̠vīṃ vāchagṃ̍ ha̠viṣā̍ yajāmahē । sā nō̍ dadhātu sukṛ̠tasya̍ lō̠kē ।
cha̠tvāri̠ vā-kpari̍mitā pa̠dāni̍ । tāni̍ vidu-rbrāhma̠ṇā yē ma̍nī̠ṣiṇa̍ḥ । guhā̠ trīṇi̠ nihi̍tā̠ nēṅga̍yanti । tu̠rīyaṃ̍ ँvā̠chō ma̍nu̠ṣyā̍ vadanti ॥ 66 ॥

31 śraddhā sūktaṃ
(tai. brā. 2.8.8.5-2.8.8.8)
śra̠ddhayā̠-‘gni ssami̍dhyatē । śra̠ddhayā̍ vindatē ha̠viḥ । śra̠ddhā-mbhaga̍sya mū̠rdhani̍ । vacha̠sā ”vē̍dayāmasi । pri̠yagg​ śra̍ddhē̠ dada̍taḥ । pri̠yagg​ śra̍ddhē̠ didā̍sataḥ । pri̠ya-mbhō̠jēṣu̠ yajva̍su । i̠da-mma̍ udi̠ta-ṅkṛ̍dhi । yathā̍ dē̠vā asu̍rēṣu । śra̠ddhā-mu̠grēṣu̍ chakri̠rē ॥ 67 ॥

ē̠va-mbhō̠jēṣu̠ yajva̍su । a̠smāka̍-mudi̠ta-ṅkṛ̍dhi । śra̠ddhā-ndē̍vā̠ yaja̍mānāḥ । vā̠yu-gō̍pā̠ upā̍satē । śra̠ddhāgṃ hṛ̍da̠yya̍yā-”kū̎tyā । śra̠ddhayā̍ hūyatē ha̠viḥ ।
śra̠ddhā-mprā̠tar-ha̍vāmahē । śra̠ddhā-mma̠dhyandi̍naṃ̠ pari̍ । śra̠ddhāgṃ sūrya̍sya ni̠mruchi̍ । śraddhē̠ śraddhā̍pa-yē̠ha mā̎ ॥ 68 ॥

śra̠ddhā dē̠vā-nadhi̍vastē । śra̠ddhā viśva̍-mi̠da-ñjaga̍t । śra̠ddhā-ṅkāma̍sya mā̠tara̎m । ha̠viṣā̍ vardhayāmasi ॥ 69a ॥

32 brahma sūktaṃ
(tai. brā. 2.8.8.8-2.8.8.11)
brahma̍jajñā̠na-mpra̍tha̠ma-mpu̠rastā̎t । vi sī̍ma̠ta-ssu̠ruchō̍ vē̠na ā̍vaḥ ।
sa bu̠dhniyā̍ upa̠mā a̍sya vi̠ṣṭhāḥ । sa̠taścha̠ yōni̠-masa̍taścha̠ viva̍ḥ ॥ pi̠tā vi̠rājā̍-mṛṣa̠bhō ra̍yī̠ṇām । a̠ntari̍kṣaṃ vi̠śvarū̍pa̠ āvi̍vēśa ॥ 69b ॥

tama̠rkai-ra̠bhya̍rchanti va̠thsam । brahma̠ santa̠-mbrahma̍ṇā va̠rdhaya̍ntaḥ ॥ brahma̍ dē̠vāna̍janayat । brahma̠ viśva̍mi̠da-ñjaga̍t ॥
brahma̍ṇaḥ, kṣa̠tra-nnirmi̍tam । brahma̍ brāhma̠ṇa ā̠tmanā̎ ॥ a̠ntara̍smi-nni̠mē lō̠kāḥ । a̠nta-rviśva̍mi̠da-ñjaga̍t । brahmai̠va bhū̠tānā̠-ñjyēṣṭha̎m । tēna̠ kō̍-‘r​hati̠ spardhi̍tum ॥ 70 ॥

brahma̍-ndē̠vā-straya̍strigṃśat । brahma̍-nnindra prajāpa̠tī । brahma̍n ha̠ viśvā̍ bhū̠tāni̍ । nā̠vī-vā̠nta-ssa̠māhi̍tā ॥ chata̍sra̠ āśā̠ḥ pracha̍rantva̠-gnaya̍ḥ । i̠mannō̍ ya̠jñanna̍yatu prajā̠nann ।
ghṛ̠ta-mpinva̍-nna̠jaragṃ̍ su̠vīra̎m । brahma̍ sa̠mi-dbha̍va̠tyāhu̍tīnām ॥ 71 ॥

33 gō sūktaṃ
(tai. brā. 2.8.8.11)
ā gāvō̍ agmannu̠ta bha̠dra-ma̍krann । sīda̍ntu gō̠ṣṭhē-ra̠ṇaya̍ntva̠smē ॥ pra̠jāva̍tīḥ puru̠rūpā̍ i̠ha syuḥ । indrā̍ya pū̠rvī ru̠ṣasō̠ duhā̍nāḥ । indrō̠ yajva̍nē pṛṇa̠tē cha̍ śikṣati । upēdda̍dāti̠ na sva-mmu̍ṣāyati । bhūyō̍ bhūyō ra̠yimida̍sya va̠rdhayann̍ । abhi̍nnē khi̠llē nida̍dhāti dēva̠yum ।
na tā na̍śanti̠ na tā arvā̎ ॥ 72 ॥

na tā na̍śanti̠ nada̍bhāti̠ taska̍raḥ । nainā̍ ami̠trō vyathi̠rā da̍dhar​ṣati ।
dē̠vāg​ścha̠ yābhi̠-ryaja̍tē̠ dadā̍ti cha । jyōgittābhi̍ ssachatē̠ gōpa̍ti ssa̠ha ॥ 72a ॥

na tā arvā̍ rē̠ṇu ka̍kāṭō aśnutē । na sagg̍ skṛta̠tra-mupa̍yanti̠ tā a̠bhi ।
u̠ru̠gā̠yama̍bhaya̠-ntasya̠ tā anu̍ । gāvō̠ martya̍sya̠ vicha̍ranti̠ yajva̍naḥ ॥ 72b ॥

(tai. brā. 2.8.8.12)
gāvō̠ bhagō̠ gāva̠ indrō̍ mē achChāt । gāva̠ ssōma̍sya pratha̠masya̍ bha̠kṣaḥ ।
i̠mā yā gāva̠-ssaja̍nāsa̠ indra̍ḥ । i̠chChāmī-ddhṛ̠dā mana̍sā-chi̠dindra̎m ।
yū̠ya-ṅgā̍vō mēdayathā kṛ̠śañchi̍t । a̠ślī̠la-ñchi̍-tkṛṇuthā su̠pratī̍kam ॥ 73 ॥

bha̠dra-ṅgṛ̠ha-ṅkṛ̍ṇutha bhadravāchaḥ । bṛ̠hadvō̠ vaya̍ uchyatē sa̠bhāsu̍ । pra̠jāva̍tī ssū̠yava̍sagṃ-ri̠śantī̎ḥ । śu̠ddhā a̠pa ssu̍prapā̠ṇē piba̍ntīḥ ।
mā va̍-sstē̠na ī̍śata̠ mā-‘ghaśagṃ̍saḥ । pari̍vō hē̠tī ru̠drasya̍ vṛñjyāt । upē̠da-mu̍pa̠-parcha̍nam । ā̠su gōṣūpa̍ pṛchyatām । upa̍r​ṣa̠bhasya̠ rēta̍si । upē̎mdra̠ tava̍ vī̠ryē̎ ॥ 74 (24) ॥

34 sūryā chandramasā sūktaṃ
(tai. brā. 2.8.9.1-2.8.9.3)
tā sū̎ryā chandra̠masā̍ viśva̠-bhṛtta̍mā ma̠hat । tējō̠ vasu̍madrājatō di̠vi । sāmā̎tmānā charata ssāma-chā̠riṇā̎ । yayō̎rvra̠ta-nnama̠mē jātu̍ dē̠vayō̎ḥ । u̠bhāvantau̠ pari̍yāta̠ armyā̎ । di̠vō na ra̠śmīg​ sta̍nu̠tō-vya̍rṇa̠vē । u̠bhā bhu̍va̠ntī bhuva̍nā ka̠vikra̍tū । sūryā̠ na cha̠ndrā cha̍ratō ha̠tāma̍tī । patī̎dyu̠ma-dvi̍śva̠-vidā̍ u̠bhā di̠vaḥ । sūryā̍ u̠bhā cha̠ndrama̍sā vichakṣa̠ṇā ॥ 75 ॥

vi̠śvavā̍rā varivō̠ bhā varē̎ṇyā । tā nō̍-‘vata-mmati̠mantā̠ mahi̍vratā । vi̠śva̠vapa̍rī pra̠tara̍ṇā tara̠ntā । su̠va̠rvidā̍ dṛ̠śayē̠ bhūri̍ raśmī । sūryā̠ hi cha̠ndrā vasu̍tvē̠ṣa-da̍r​śatā । ma̠na̠svinō̠ bhā-‘nu̍chara̠tō nu̠ sa-ndiva̎m । a̠sya śravō̍ na̠dya̍ ssa̠pta bi̍bhrati । dyāvā̠ kṣāmā̍ pṛthi̠vī da̍r​śa̠taṃ vapu̍ḥ । a̠smē sū̎ryā chandra̠masā̍-‘bhi̠chakṣē̎ । śra̠ddhēka-mi̍ndra charatō vichartu̠ram ॥ 76 ॥
pū̠rvā̠pa̠ra-ñcha̍ratō mā̠ya-yai̠tau । śiśū̠ krīḍa̍ntau̠ pari̍yātō adhva̠ram । viśvā̎nya̠nyō bhuva̍nā ‘bhi̠chaṣṭē̎ । ṛ̠tūna̠nyō vi̠dadha̍jjāyatē̠ puna̍ḥ । hira̍ṇyavarṇā̠-śśucha̍yaḥ pāva̠kā yāsā̠gṃ̠ rājā̎ । yāsāṃ̎ dē̠vā śśi̠vēna̍ mā̠ chakṣu̍ṣā paśyata । āpō̍ bha̠drā āditpa̍śyāmi ॥ 77 ॥

hira̍ṇyavarṇā̠-śśucha̍yaḥ pāva̠kā yāsu̍ jā̠taḥ ka̠śyapō̠ yāsvindra̍ḥ । a̠gniṃ yā garbhaṃ̍ dadhi̠rē virū̍pā̠stā na̠ āpa̠śśagg​ syō̠nā bha̍vantu ॥
yāsā̠gṃ̠ rājā̠ varu̍ṇō̠ yāti̠ madhyē̍ satyānṛ̠tē a̍va̠paśya̠n janā̍nām ।
ma̠dhu̠śchuta̠-śśucha̍yō̠ yāḥ pā̍va̠kāstā na̠ āpa̠śśagg​ syō̠nā bha̍vantu ॥ 77a ॥

yāsāṃ̎ dē̠vā di̠vi kṛ̠ṇvanti̍ bha̠kṣaṃ yā a̠ntari̍kṣē bahu̠dhā bhava̍nti ।
yāḥ pṛ̍thi̠vī-mpaya̍sō̠ndanti̍ śu̠krāstā na̠ āpa̠śśagg​ syō̠nā bha̍vantu ॥
śi̠vēna̍ mā̠ chakṣu̍ṣā paśyatāpa śśi̠vayā̍ ta̠nuvōpa̍ spṛśata̠ tvacha̍-mmē ।
sarvāgṃ̍ a̠gnīgṃ ra̍phsu̠ṣadō̍ huvē vō̠ mayi̠ varchō̠ bala̠mōjō̠ nidha̍tta ॥ 77b ॥

āpō̍ bha̠drā ghṛ̠tamidāpa̍ āsura̠gnī-ṣōmau̍ bibhra̠tyāpa̠ ittāḥ । tī̠vrō rasō̍ madhu̠pṛchā̍-maraṅga̠ma ā mā̎ prā̠ṇēna̍ sa̠ha varcha̍sā gann ।
ādi-tpa̍śyā-myu̠ta vā̍ śṛṇō̠-myā mā̠ ghōṣō̍ gachChati̠ vā-nna̍ āsām । manyē̍ bhējā̠nō a̠mṛta̍sya̠ tar​hi̠ hira̍ṇyavarṇā̠ atṛ̍paṃ ya̠dā va̍ḥ ॥ 77ch ॥

35 nāsadīya sūktaṃ
(tai. brā. 2.8.9.3-2.8.9.7)
nāsa̍dāsī̠nnō sadā̍sītta̠dānī̎m । nāsī̠drajō̠ nō vyō̍mā-pa̠rōyat । ki-māva̍rīva̠ḥ kuha̠kasya̠ śarmann̍ । ambha̠ḥ kimā̍sī̠-dgaha̍na-ṅgabhī̠ram ॥ 78 ॥
na mṛ̠tyu-ra̠mṛta̠-ntar​hi̠ na । rātri̍yā̠ ahna̍ āsī-tprakē̠taḥ । ānī̍-davā̠tagg​ sva̠dhayā̠ tadēka̎m । tasmā̎ddhā̠nya-nna pa̠raḥ kiñcha̠nāsa̍ ।
tama̍ āsī̠-ttama̍sā gū̠ḍhamagrē̎ prakē̠tam । sa̠li̠lagṃ sarva̍-mā i̠dam । tu̠chChē nā̠bhvapi̍hitaṃ̠ yadāsī̎t । tama̍sa̠s tanma̍hi̠nā jā̍ya̠taika̎m ।
kāma̠stadagrē̠ sama̍varta̠tādhi̍ । mana̍sō̠ rēta̍ḥ pratha̠maṃ yadāsī̎t ॥ 79 ॥

sa̠tō bandhu̠masa̍ti̠ nira̍vindann । hṛ̠di-pra̠tīṣyā̍ ka̠vayō̍ manī̠ṣā ।
ti̠ra̠śchīnō̠ vita̍tō ra̠śmi-rē̍ṣām । a̠dhasvi̍dā̠sī(3) du̠pari̍svidāsī(3)t ।
rē̠tō̠dhā ā̍sa-nmahi̠māna̍ āsann । sva̠dhā a̠vastā̠-tpraya̍tiḥ pa̠rastā̎t ।
kō a̠ddhā vē̍da̠ka i̠ha pravō̍chat । kuta̠ ājā̍tā̠ kuta̍ i̠yaṃ visṛ̍ṣṭiḥ ।
a̠rvāg dē̠vā a̠sya vi̠sarja̍nāya । athā̠ kō vē̍da̠ yata̍ ā ba̠bhūva̍ ॥ 80 ॥

i̠yaṃ visṛ̍ṣṭi̠-ryata̍ āba̠bhūva̍ । yadi̍ vā da̠dhē yadi̍ vā̠ na ।
yō a̠syādhya̍kṣaḥ para̠mē vyō̍mann । sō a̠ṅgavē̍da̠ yadi̍ vā̠ na vēda̍ ।
kigg​svi̠dvanaṃ̠ ka u̠sa vṛ̠kṣa ā̍sīt । yatō̠ dyāvā̍pṛthi̠vī ni̍ṣṭata̠kṣuḥ ।
manī̍ṣiṇō̠ mana̍sā pṛ̠chChatēdu̠tat । yada̠dhyati̍ṣṭha̠-dbhuva̍nāni dhā̠rayann̍ । brahma̠vanaṃ̠ brahma̠ sa vṛ̠kṣa ā̍sīt । yatō̠ dyāvā̍pṛthi̠vī ni̍ṣṭata̠kṣuḥ ॥ manī̍ṣiṇō̠ mana̍sā̠ vibra̍vīmi vaḥ । brahmā̠dhyati̍ṣṭha̠-dbhuva̍nāni dhā̠rayann̍ ॥ 81 ॥

36 bhāgya sūktaṃ
(tai. brā. 2.8.9.7-2.8.9.9)
prā̠tara̠gni-mprā̠tarindragṃ̍ havāmahē । prā̠ta-rmi̠trā varu̍ṇā prā̠tara̠śvinā̎ ।
prā̠ta-rbhagaṃ̍ pū̠ṣaṇaṃ̠ brahma̍ṇa̠spati̎m । prā̠tassōma̍ mu̠ta ru̠dragṃ hu̍vēma ॥ pra̠ta̠rjitaṃ̠ bhaga̍mu̠gragṃ hu̍vēma । va̠ya-mpu̠tramadi̍tē̠ryō vi̍dha̠rtā । ā̠dhraśchi̠dya-mmanya̍māna-stu̠raśchi̍t । rājā̍ chi̠dya-mbhagaṃ̍ bha̠kṣītyāha̍ ॥ 82 ॥

bhaga̠praṇē̍ta̠-rbhaga̠satya̍rādhaḥ । bhagē̠mā-ndhiya̠muda̍va̠ dada̍nnaḥ । bhaga̠praṇō̍ janaya̠ gōbhi̠raśvai̎ḥ । bhaga̠ pranṛbhi̍-rnṛ̠vanta̍ssyāma ॥ u̠tēdānīṃ̠ bhaga̍vantassyāma । u̠ta prapi̠tva u̠ta maddhyē̠ ahnā̎m । u̠tōdi̍tā maghava̠n-thsūrya̍sya । va̠ya-ndē̠vānāgṃ̍ suma̠tau syā̍ma ॥ bhaga̍ ē̠va bhaga̍vāgṃ astu dēvāḥ । tēna̍ va̠ya-mbhaga̍vanta ssyāma ॥ 83 ॥

tantvā̍ bhaga̠ sarva̠ ijjō̍havīmi । sanō̍ bhaga pura ē̠tā bha̍vē̠ha ॥ sama̍dhva̠rā-yō̠ṣasō̍-‘namanta । da̠dhi̠krāvē̍va̠ śucha̍yē pa̠dāya̍ । a̠rvā̠chī̠naṃ va̍su̠vidaṃ̠ bhaga̍nnaḥ । ratha̍mi̠vāśvā̍ vā̠jina̠ āva̍hantu ॥ aśvā̍vatī̠-rgōma̍tī-rna u̠ṣāsa̍ḥ । vī̠rava̍tī̠-ssada̍muchChantu bha̠drāḥ । ghṛ̠ta-nduhā̍nā vi̠śvata̠ḥ prapī̍nāḥ । yū̠ya-mpā̍ta sva̠stibhi̠-ssadā̍naḥ ॥ 84 (25) ॥

37 nakṣatra sūktaṃ
(tai. brā. 3.1.1.1-3.1.3.3)
37.1 nakṣatraṃ – kṛttikā dēvatā – agniḥ
a̠gnirna̍ḥ pātu̠ kṛtti̍kāḥ । nakṣa̍tra-ndē̠vami̍ndri̠yam । i̠damā̍sāṃvichakṣa̠ṇam । ha̠virā̠sa-ñju̍hōtana । yasya̠ bhānti̍ ra̠śmayō̠ yasya̍ kē̠tava̍ḥ । yasyē̠mā viśvā̠ bhuva̍nāni̠ sarvā̎ । sa kṛtti̍kābhi-ra̠bhi-sa̠ṃvasā̍naḥ । a̠gnirnō̍ dē̠vassu̍vi̠tē da̍dhātu ॥ 1 ॥

37.2 nakṣatraṃ – rōhiṇī dēvatā – prajāpatiḥ
pra̠jāpa̍tē rōhi̠ṇī vē̍tu̠ patnī̎ । vi̠śvarū̍pā bṛha̠tī chi̠trabhā̍nuḥ ॥ 85 ॥
sā nō̍ ya̠jñasya̍ suvi̠tē da̍dhātu । yathā̠ jīvē̍ma śa̠rada̠ssavī̍rāḥ । rō̠hi̠ṇī dē̠vyuda̍gā-tpu̠rastā̎t । viśvā̍ rū̠pāṇi̍ prati̠mōda̍mānā । pra̠jāpa̍tigṃ ha̠viṣā̍ va̠rdhaya̍ntī । pri̠yā dē̠vānā̠-mupa̍yātu ya̠jñam ॥ 2 ॥

37.3 nakṣatraṃ – mṛgaśīr​ṣaḥ dēvatā – sōmaḥ
sōmō̠ rājā̍ mṛgaśī̠ra̠.ṣēṇa̠ āgann̍ । śi̠va-nnakṣa̍tra-mpri̠yama̍sya̠ dhāma̍ । ā̠pyāya̍mānō bahu̠dhā janē̍ṣu । rētaḥ̍ pra̠jāṃ yaja̍mānē dadhātu ॥ 86 ॥
yattē̠ nakṣa̍tra-mmṛgaśī̠r̠ṣamasti̍ । pri̠yagṃ rā̍ja-npri̠yata̍ma-mpri̠yāṇā̎m । tasmai̍ tē sōma ha̠viṣā̍ vidhēma । śanna̍ ēdhi dvi̠padē̠ śañchatu̍ṣpadē ॥ 3 ॥
37.4 nakṣatraṃ – ārdrā dēvatā – rudraḥ
ā̠rdrayā̍ ru̠draḥ pratha̍māna ēti । śrēṣṭhō̍ dē̠vānāṃ̠ pati̍raghni̠yānā̎m । nakṣa̍tramasya ha̠viṣā̍ vidhēma । mā naḥ̍ pra̠jāgṃ rī̍riṣa̠-nmōta vī̠rān । hē̠tī ru̠drasya̠ pari̍ṇō vṛṇaktu । ā̠rdrā nakṣa̍tra-ñjuṣatāgṃ ha̠virna̍ḥ ॥ 87 ॥
pra̠mu̠ñchamā̍nau duri̠tāni̠ viśvā̎ । apā̠ghaśagṃ̍ sannu-datā̠marā̍tim ॥ 4 ॥

37.5 nakṣatraṃ – punarvasu dēvatā – aditiḥ
puna̍rnō dē̠vyadi̍ti-sspṛṇōtu । puna̍rvasū naḥ̠ puna̠rētā̎ṃ ya̠jñam । puna̍rnō dē̠vā a̠bhiya̍ntu̠ sarvē̎ । punaḥ̍ punarvō ha̠viṣā̍ yajāmaḥ । ē̠vā na dē̠vyadi̍tirana̠rvā । viśva̍sya bha̠rtrī jaga̍taḥ prati̠ṣṭhā । puna̍rvasū ha̠viṣā̍ va̠rdhaya̍ntī । pri̠ya-ndē̠vānā̠-mapyē̍tu̠ pāthaḥ̍ ॥ 5 (88) ॥

37.6 nakṣatraṃ – puṣyaḥ dēvatā – bṛhaspatiḥ
bṛha̠spatiḥ̍ pratha̠mañjāya̍mānaḥ । ti̠ṣya̍-nnakṣa̍trama̠bhi samba̍bhūva । śrēṣṭhō̍ dē̠vānāṃ̠ pṛta̍nāsu ji̠ṣṇuḥ । di̠śō nu̠ sarvā̠ abha̍yannō astu । ti̠ṣyaḥ̍ pu̠rastā̍du̠ta ma̍dhya̠tō naḥ̍ । bṛha̠spati̍-rna̠ḥ pari̍pātu pa̠śchāt । bādhē̍ tā̠-ndvēṣō̠ abha̍ya-ṅkṛṇutām । su̠vīrya̍sya̠ pata̍yasyāma ॥ 6 ॥

37.7 nakṣatraṃ -āśrēṣaṃ dēvatā – sarpāḥ
i̠dagṃ sa̠rpēbhyō̍ ha̠vira̍stu̠ juṣṭa̎m । ā̠śrē̠ṣā yēṣā̍-manu̠yanti̠ chētaḥ̍ ॥ 89 ॥
yē a̠ntari̍kṣa-mpṛthi̠vīṃ-kṣi̠yanti̍ । tēna̍ ssa̠rpāsō̠ hava̠māga̍miṣṭhāḥ । yē rō̍cha̠nē sūrya̠syāpi̍ sa̠rpāḥ । yē divaṃ̍ dē̠vī-manu̍sa̠ñchara̍nti । yēṣā̍māśrē̠ṣā a̍nu̠yanti̠ kāma̎m । tēbhya̍-ssa̠rpēbhyō̠ madhu̍-majjuhōmi ॥ 7 ॥

37.8 nakṣatraṃ – maghā dēvatā – pitaraḥ
upa̍hūtāḥ pi̠tarō̠ yē ma̠ghāsu̍ । manō̍javasa-ssu̠kṛta̍-ssukṛ̠tyāḥ । tē nō̠ nakṣa̍trē̠ hava̠māga̍miṣṭhāḥ । sva̠dhābhi̍-rya̠jña-mpraya̍ta-ñjuṣantām ॥ 90 ॥
yē a̍gnida̠gdhā yē-‘na̍gni-dagdhāḥ । yē̍-‘muँlō̠ka-mpi̠taraḥ̍ kṣi̠yanti̍ । yāg​ścha̍ vi̠dmayāgṃ u̍ cha̠ na pra̍vi̠dma । ma̠ghāsu̍ ya̠jñagṃ sukṛ̍ta-ñjuṣantām ॥ 8 ॥

37.9 nakṣatraṃ – pūrvaphalgu̍nī dēvatā – aryamā
gavāṃ̠ pati̠ḥ phalgu̍nī-nāmasi̠ tvam । tada̍r​yaman varuṇa mitra̠ chāru̍ । tantvā̍ va̠yagṃ sa̍ni̠tāragṃ̍ sanī̠nām । jī̠vā jīva̍nta̠mupa̠ saṃvi̍śēma । yēnē̠mā viśvā̠ bhuva̍nāni̠ sañji̍tā । yasya̍ dē̠vā a̍nusa̠ṃyanti̠ chētaḥ̍ ॥ 91 ॥
a̠rya̠mā rājā̠-‘jara̠stu vi̍ṣmān । phalgu̍nīnā-mṛṣa̠bhō rō̍ravīti ॥ 9 ॥

37.10 nakṣatraṃ – uttara pha̍lgunī dēvatā – bhagaḥ
śrēṣṭhō̍ dē̠vānāṃ̎ bhagavō bhagāsi । tattvā̍ vidu̠ḥ phalgu̍nī̠-stasya̍ vittāt । a̠smabhya̍ṃ-kṣa̠trama̠jaragṃ̍ su̠vīrya̎m । gōma̠daśva̍-va̠dupa̠sannu̍-dē̠ha । bhagō̍ha dā̠tā bhaga̠ itpra̍dā̠tā । bhagō̍ dē̠vīḥ phalgu̍nī̠-rāvi̍vēśa । bhaga̠syētta-mpra̍sa̠va-ṅga̍mēma । yatra̍ dē̠vai-ssa̍dha̠mādaṃ̍ madēma । ॥ 10/ 92 ॥

37.11 nakṣatraṃ – hastaḥ dēvatā – savita
āyā̍tu dē̠va-ssa̍vi̠tō pa̍yātu । hi̠ra̠ṇyayē̍na su̠vṛtā̠ rathē̍na । vaha̠n̠. hastagṃ̍ su̠bhagaṃ̍ ँvidma̠nāpa̍sam । pra̠yachCha̍ntaṃ̠ papu̍riṃ̠ puṇya̠machCha̍ । hasta̠ḥ praya̍chCha tva̠mṛtaṃ̠ ँvasī̍yaḥ । dakṣi̍ṇēna̠ prati̍gṛbhṇīma ēnat ।
dā̠tāra̍-ma̠dya sa̍vi̠tā vi̍dēya । yō nō̠ hastā̍ya prasu̠vāti̍ ya̠jñam ॥ 11 ॥

37.12 nakṣatraṃ – chitrā dēvatā – tvaṣṭā
tvaṣṭā̠ nakṣa̍tra-ma̠bhyē̍ti chi̠trām । su̠bhagṃ sa̍saṃyuva̠tigṃ rōcha̍mānām ॥ 93 ॥
ni̠vē̠śaya̍nna̠-mṛtā̠-nmartyāg̍ścha । rū̠pāṇi̍ pi̠gṃ̠śa-nbhuva̍nāni̠ viśvā̎ । tanna̠stvaṣṭā̠ tadu̍ chi̠trā vicha̍ṣṭām । tannakṣa̍tra-mbhūri̠dā a̍stu̠ mahya̎m । tannaḥ̍ pra̠jāṃ vī̠rava̍tīgṃ sanōtu । gōbhi̍rnō̠ aśvai̠-ssama̍naktu ya̠jñam ॥ 12 ॥

37.13 nakṣatraṃ – svātī dēvatā – vāyuḥ
vā̠yu-rnakṣa̍tra-ma̠bhyē̍ti̠ niṣṭyā̎m । ti̠gmaśṛṃ̍gō vṛṣa̠bhō rōru̍vāṇaḥ । sa̠mī̠raya̠-nbhuva̍nā māta̠riśvā̎ । apa̠ dvēṣāgṃ̍si nudatā̠marā̍tīḥ ॥ 94 ॥
tannō̍ vā̠yastadu̠ niṣṭyā̍ śṛṇōtu । tannakṣa̍tra-mbhūri̠dā a̍stu̠ mahya̎m । tannō̍ dē̠vāsō̠ anu̍ jānantu̠ kāma̎m । yathā̠ tarē̍ma duri̠tāni̠ viśvā̎ ॥ 13 ॥

37.14 nakṣatraṃ – viśākhā dēvatā – indrāgnīḥ
dū̠ra-ma̠smachChatra̍vō yantu bhī̠tāḥ । tadi̍ndrā̠gnī kṛ̍ṇutāṃ̠ ta-dviśā̍khē । tannō̍ dē̠vā anu̍madantu ya̠jñam । pa̠śchā-tpu̠rastā̠-dabha̍yannō astu । nakṣa̍trāṇā̠-madhi̍patnī̠ viśā̍khē । śrēṣṭhā̍-vindrā̠gnī bhuva̍nasya gō̠pau ॥ 95 ॥
viṣū̍cha̠-śśatrū̍napa̠bādha̍mānau । apa̠kṣudha̍-nnudatā̠marā̍tim । ॥ 14 ॥

37.15 paurṇamāsi
pū̠rṇā pa̠śchādu̠ta pū̠rṇā pu̠rastā̎t । unma̍dhya̠taḥ pau̎rṇamā̠sī ji̍gāya । tasyāṃ̎ dē̠vā adhi̍ sa̠ṃvasa̍ntaḥ । u̠tta̠mē nāka̍ i̠ha mā̍dayantām । pṛ̠thvī su̠varchā̍ yuva̠ti-ssa̠jōṣā̎ḥ । pau̠rṇa̠mā̠syuda̍gā̠-chChōbha̍mānā । ā̠pyā̠ya-ya̍ntī duri̠tāni̠ viśvā̎ । u̠ru-nduhāṃ̠ yaँja̍mānāya ya̠jñam ॥ 15/96 (26) ॥

37.16 nakṣatraṃ – anūrādhā dēvatā – mitraḥ
ṛ̠ddhyāsma̍ ha̠vyai-rnama̍sōpa̠sadya̍ । mi̠tra-ndē̠va-mmi̍tra̠dhēya̍nnō astu । a̠nū̠rā̠dhān. ha̠viṣā̍ va̠rdhaya̍ntaḥ । śa̠ta-ñjī̍vēma śa̠rada̠ssavī̍rāḥ । chi̠traṃ-nakṣa̍tra̠-muda̍gā-tpu̠rastā̎t । a̠nū̠rā̠dhāsa̠ iti̠ ya-dvada̍nti । tanmi̠tra ē̍ti pa̠thibhi̍-rdēva̠yānai̎ḥ । hi̠ra̠ṇyayai̠-rvita̍tai-ra̠ntari̍kṣē ॥ 16 ॥

37.17 nakṣatraṃ – jyēṣṭhā dēvatā – indraḥ
indrō̎ jyē̠ṣṭhā-manu̠ nakṣa̍tramēti । yasmi̍n vṛ̠traṃ vṛ̍tra̠ tūryē̍ ta̠tāra̍ ॥ 97 ॥
tasmi̍n va̠ya-ma̠mṛtaṃ̠ duhā̍nāḥ । kṣudha̍ntarēma̠ duri̍tiṃ̠ duri̍ṣṭim । pu̠ra̠nda̠rāya̍ vṛṣa̠bhāya̍ dhṛ̠ṣṇavē̎ । aṣā̍ḍhāya̠ saha̍mānāya mī̠ḍhuṣē̎ । indrā̍ya jyē̠ṣṭhā madhu̍ma̠dduhā̍nā । u̠ru-ṅkṛ̍ṇōtu̠ yaja̍mānāya lō̠kam ॥ 17 ॥

37.18 nakṣatraṃ – mūlaṃ dēvatā – prajāpatiḥ
mūlaṃ̍ pra̠jāṃ vī̠rava̍tīṃ vidēya । parā̎chyētu̠ nir-ṛ̍tiḥ parā̠chā । gōbhi̠-rnakṣa̍tra-mpa̠śubhi̠-ssama̍ktam । aha̍-rbhūyā̠-dyaja̍mānāya̠ mahya̎m ॥ 98 ॥
aha̍rnō a̠dya su̍vi̠tē da̍dhātu । mūlaṃ̠ nakṣa̍tra̠miti̠ ya-dvada̍nti । parā̍chīṃ vā̠chā nir-ṛ̍ti-nnudāmi । śi̠va-mpra̠jāyai̍ śi̠vama̍stu̠ mahya̎m ॥ 18 ॥

37.19 nakṣatraṃ – pūrvāṣāḍhā dēvatā – āpaḥ
yā di̠vyā āpa̠ḥ paya̍sā sambabhū̠vuḥ । yā a̠ntari̍kṣa u̠ta pārthi̍vī̠ryāḥ ।
yāsā̍maṣā̠ḍhā a̍nu̠yanti̠ kāma̎m । tā na̠ āpa̠-śśagg​ syō̠nā bha̍vantu । yāścha̠ kūpyā̠ yāścha̍ nā̠dyā̎-ssamu̠driyā̎ḥ । yāścha̍ vaiśa̠ntīru̠ta prā̍sa̠chīryāḥ ॥ 99 ॥
yāsā̍maṣā̠ḍhā madhu̍ bha̠kṣaya̍nti । tā na̠ āpa̠-śśagg​ syō̠nā bha̍vantu ॥ 19 ॥

37.20 nakṣatraṃ – uttarāṣāḍhā dēvatā – viśvēdēvaḥ
tannō̠ viśvē̠ upa̍ śṛṇvantu dē̠vāḥ । tada̍ṣā̠ḍhā a̠bhi saṃya̍ntu ya̠jñam । tannakṣa̍tra-mprathatā-mpa̠śubhyaḥ̍ । kṛ̠ṣi-rvṛ̠ṣṭi-ryaja̍mānāya kalpatām । śu̠bhrāḥ ka̠nyā̍ yuva̠taya̍-ssu̠pēśa̍saḥ । ka̠rma̠kṛta̍-ssu̠kṛtō̍ vī̠ryā̍vatīḥ । viśvā̎-ndē̠vān. ha̠viṣā̍ va̠rdhaya̍ntīḥ । a̠ṣā̠ḍhāḥ kāma̠-mupa̍yāntu ya̠jñam ॥ 20/100 ॥

37.21 nakṣatraṃ – abhijit dēvatā – brahmā
yasmi̠-nbrahmā̠-‘bhyaja̍ya̠-thsarva̍mē̠tat । a̠muñcha̍ lō̠ka mi̠damū̍cha̠ sarva̎m। tannō̠ nakṣa̍tra-mabhi̠ji-dvi̠jitya̍ । śriya̍-ndadhā̠tvahṛ̍ṇīyamānam । u̠bhau lō̠kau brahma̍ṇā̠ sañji̍tē̠mau । tannō̠ nakṣa̍tra-mabhi̠ji-d
vicha̍ṣṭām । tasmi̍n va̠ya-mpṛta̍nā̠ ssañja̍yēma । tannō̍ dē̠vāsō̠ anu̍jānantu̠ kāma̎m ॥ 21 ॥

37.22 nakṣatraṃ – śravaṇaṃ dēvatā – viṣṇuḥ
śṛ̠ṇvanti̍ śrō̠ṇā-ma̠mṛta̍sya gō̠pām । puṇyā̍masyā̠ upa̍śṛṇōmi̠ vācha̎m ॥ 101 ॥
ma̠hī-ndē̠vīṃ viṣṇu̍patnī majū̠ryām । pra̠tīchī̍ mēnāgṃ ha̠viṣā̍ yajāmaḥ । trē̠dhā viṣṇu̍-rurugā̠yō vicha̍kramē । ma̠hī-ndivaṃ̍ pṛthi̠vī-ma̠ntari̍kṣam ।
tachChrō̠ṇaiti̠ śrava̍-i̠chChamā̍nā । puṇya̠gg̠ ślōkaṃ̠ ँyaja̍mānāya kṛṇva̠tī ॥ 22 ॥

37.23 nakṣatraṃ – śraviṣṭā dēvatā – vasavaḥ
a̠ṣṭau dē̠vā vasa̍vassō̠myāsaḥ̍ । chata̍srō dē̠vī ra̠jarā̠-śśravi̍ṣṭhāḥ । tē ya̠jña-mpā̎mtu̠ raja̍saḥ pa̠rastā̎t । sa̠ṃva̠thsa̠rīṇa̍-ma̠mṛtagg̍ sva̠sti ॥ 102 ॥
ya̠jña-nnaḥ̍ pāntu̠ vasa̍vaḥ pu̠rastā̎t । da̠kṣi̠ṇa̠tō̍-‘bhiya̍ntu̠ śravi̍ṣṭhāḥ । puṇya̠nnakṣa̍trama̠bhi saṃvi̍śāma । mā nō̠ arā̍ti-ra̠ghaśa̠gṃ̠ sāgann̍ ॥ 23 ॥

37.24 nakṣatraṃ – śatabhiṣak dēvatā – varuṇaḥ
kṣa̠trasya̠ rājā̠ varu̍ṇō-‘dhirā̠jaḥ । nakṣa̍trāṇāgṃ śa̠tabhi̍ṣa̠g vasi̍ṣṭhaḥ । tau dē̠vēbhyaḥ̍ kṛṇutō dī̠rghamāyuḥ̍ । śa̠tagṃ sa̠hasrā̍ bhēṣa̠jāni̍ dhattaḥ । ya̠jñannō̠ rājā̠ varu̍ṇa̠ upa̍yātu । tannō̠ viśvē̍ a̠bhisaṃya̍ntu dē̠vāḥ ॥ 103 ॥
tannō̠ nakṣa̍tragṃ śa̠tabhi̍ṣag juṣā̠ṇam । dī̠rghamāyu̠ḥ prati̍ra-dbhēṣa̠jāni̍ ॥ 24 ॥

37.25 nakṣatraṃ – pūrvaprōṣṭhapadā dēvatā – ajayēkapādaḥ
a̠ja ēka̍pā̠-duda̍gā-tpu̠rastā̎t । viśvā̍ bhū̠tāni̍ prati̠ mōda̍mānaḥ । tasya̍ dē̠vāḥ pra̍sa̠vaṃ ya̍nti̠ sarvē̎ । prō̠ṣṭha̠pa̠dāsō̍ a̠mṛta̍sya gō̠pāḥ । vi̠bhrāja̍māna-ssamidhā̠na u̠graḥ । ā-‘ntari̍kṣa-maruha̠da-ga̠ndyām । tagṃ sūrya̍-ndē̠va-ma̠jamēka̍pādam । prō̠ṣṭha̠pa̠dāsō̠ anu̍yanti̠ sarvē̎ ॥ 25 / 104 ॥

37.26 nakṣatraṃ – uttaraprōṣṭhapadā dēvatā – ahirbudhniyaḥ
ahi̍-rbu̠dhniya̠ḥ pratha̍māna ēti । śrēṣṭhō̍ dē̠vānā̍mu̠ta mānu̍ṣāṇām । ta-mbrā̎hma̠ṇā-ssō̍ma̠pā-ssō̠myāsaḥ̍ । prō̠ṣṭha̠pa̠dāsō̍ a̠bhira̍kṣanti̠ sarvē̎ । cha̠tvāra̠ ēka̍ma̠bhi karma̍ dē̠vāḥ । prō̠ṣṭha̠pa̠dāsa̠ iti̠ yān. vada̍nti । tē bu̠dhniyaṃ̍ pari̠ṣadyagg̍ stu̠vantaḥ̍ । ahigṃ̍ rakṣanti̠ nama̍sōpa̠sadya̍ ॥ 26 ॥

37.27 nakṣatraṃ – rēvatī dēvatā – pūṣā
pū̠ṣā rē̠vatyanvē̍ti̠ panthā̎m । pu̠ṣṭi̠patī̍ paśu̠pā vāja̍bastyau ॥ 105 ॥
i̠māni̍ ha̠vyā praya̍tā juṣā̠ṇā । su̠gairnō̠ yānai̠rupa̍yātāṃ ya̠jñam । kṣu̠drā-npa̠śū-nra̍kṣatu rē̠vatī̍ naḥ । gāvō̍ nō̠ aśvā̠gṃ̠ anvē̍tu pū̠ṣā । anna̠gṃ̠ rakṣa̍ntau bahu̠dhā virū̍pam । vājagṃ̍ sanutāṃ̠ ँyaja̍mānāya ya̠jñam ॥ 27 ॥

37.28 nakṣatraṃ – aśvinī dēvatā – aśvinī dēva
tada̠śvinā̍-vaśva̠yujōpa̍yātām । śubha̠ṅgami̍ṣṭhau su̠yamē̍bhi̠raśvai̎ḥ । svannakṣa̍tragṃ ha̠viṣā̠ yaja̍ntau । madhvā̠ sampṛ̍ktau̠ yaju̍ṣā̠ sama̍ktau ॥ 106 ॥
yau dē̠vānā̎-mbhi̠ṣajau̍ havyavā̠hau । viśva̍sya dū̠tā-va̠mṛta̍sya gō̠pau । tau nakṣa̍traṃ-jujuṣā̠ṇō-pa̍yātām । namō̠-‘śvibhyāṃ̎ kṛṇumō-‘śva̠yugbhyā̎m ॥ 28 ॥

37.29 nakṣatraṃ – apabharaṇī dēvatā – yamaḥ
apa̍ pā̠pmānaṃ̠ bhara̍ṇī-rbharantu । ta-dya̠mō rājā̠ bhaga̍vā̠n̠. vicha̍ṣṭām । lō̠kasya̠ rājā̍ maha̠tō ma̠hān. hi । su̠ganna̠ḥ panthā̠mabha̍ya-ṅkṛṇōtu । yasmi̠-nnakṣa̍trē ya̠ma ēti̠ rājā̎ । yasmi̍nnēna-ma̠bhyaṣiṃ̍chanta dē̠vāḥ । tada̍sya chi̠tragṃ ha̠viṣā̍ yajāma । apa̍ pā̠pmānaṃ̠ bhara̍ṇī-rbharantu ॥ 29 ॥

37.30 amāvāsi
ni̠vēśa̍nī̠ yattē̍ dē̠vā ada̍dhuḥ ।

ni̠vēśa̍nī sa̠ṅgama̍nī̠ vasū̍nāṃ̠ ँviśvā̍ rū̠pāṇi̠ vasū̎nyā-vē̠śaya̍ntī । sa̠ha̠sra̠pō̠ṣagṃ su̠bhagā̠ rarā̍ṇā̠ sā na̠ āga̠n varcha̍sā saṃvidā̠nā ।
yattē̍ dē̠vā ada̍dhu-rbhāga̠dhēya̠-mamā̍vāsyē
sa̠ṃvasa̍ntō mahi̠tvā । sā nō̍ ya̠jña-mpi̍pṛhi viśvavārē ra̠yinnō̍ dhēhi subhagē su̠vīraṃ̎ ॥ 30/107 (27) ॥

37.31 chandramā
navō̍ navō bhavati̠ jāya̍mānō̠ yamā̍di̠tyā a̠gṃ̠śumā̎-pyā̠yaya̍nti ।

navō̍ navō bhavati̠ jāya̍mā̠nō-‘hnā̎-ṅkē̠tu-ru̠ṣasā̍ mē̠tyagrē̎ ।
bhā̠ga-ndē̠vēbhyō̠ vida̍dhātyā̠ya-npracha̠ndramā̎stirati dī̠rghamāyu̍ḥ ।
yamā̍di̠tyā a̠gṃ̠śumā̎pyā̠yaya̍nti̠ yamakṣi̍ta̠-makṣi̍taya̠ḥ piba̍nti ।
tēna̍ nō̠ rājā̠ varu̍ṇō̠ bṛha̠spati̠ rāpyā̍yayantu̠ bhuva̍nasya gō̠pāḥ ।

37.32 ahō rātrī
yē virū̍pē̠ sama̍nasā sa̠ṃvyaya̍ntī । sa̠mā̠na-ntantuṃ̍ paritā-ta̠nātē̎ ।
vi̠bhū pra̠bhū a̍nu̠bhū vi̠śvatō̍ huvē । tē nō̠ nakṣa̍trē̠ hava̠māga̍mētam ।
va̠ya-ndē̠vī brahma̍ṇā saṃvidā̠nāḥ । su̠ratnā̍sō dē̠vavī̍tiṃ̠ dadhā̍nāḥ ॥ 108 ॥
a̠hō̠rā̠trē ha̠viṣā̍ va̠rdhaya̍ntaḥ । ati̍ pā̠pmāna̠-mati̍muktyā gamēma ॥
37.33 uṣā
pratyu̍va dṛśyāya̠tī । vyu̠chChantī̍ duhi̠tā di̠vaḥ । a̠pō ma̠hī vṛ̍ṇutē̠ chakṣu̍ṣā । tamō̠ jyōti̍ṣ-kṛṇōti sū̠narī̎ ।
udu̠ striyā̎ssachatē̠ sūrya̍ḥ । sa chā̍ u̠dyannakṣa̍tra marchi̠mat ।
tavē du̍ṣō̠ vyuṣi̠ sūrya̍sya cha । sambha̠ktēna̍ gamēmahi ॥ 109 ॥

37.34 nakṣatraḥ
tannō̠ nakṣa̍tra marchi̠mat । bhā̠nu̠mattēja̍ u̠chChara̍t । upa̍ ya̠jñami̠hāga̍mat । pranakṣa̍trāya dē̠vāya̍ । indrā̠yēndugṃ̍ havāmahē । sa na̍ ssavi̠tā su̍va-thsa̠nim । pu̠ṣṭi̠dāṃ vī̠rava̍ttamam ॥

37.35 sūryaḥ
udu̠tya-ñchi̠tram ॥
udu̠tya-ñjā̠tavē̍dasa-ndē̠vaṃ va̍hanti kē̠tava̍ḥ । dṛ̠śē viśvā̍ya̠ sūrya̎m ।
chi̠tra-ndē̠vānā̠ muda̍gā̠danī̍kaṃ̠ chakṣu̍-rmi̠trasya̠ varu̍ṇasyā̠gnēḥ ॥ 110 ॥
ā-‘prā̠ dyāvā̍pṛ̠thivī a̠ntari̍kṣa̠ sūrya̍ ā̠tmā jaga̍tasta̠sthuṣa̍ścha ॥

37.36 aditiḥ
adi̍tirna uruṣyatu ma̠hīmū̠ṣu mā̠tara̎m ॥

adi̍tirna uruṣya̠-tvadi̍ti̠-śśarma̍ yachChatu । adi̍tiḥ pā̠tvagṃ ha̍saḥ ॥
ma̠hīmū̠ṣu mā̠taragṃ̍ suvra̠tānā̍-mṛ̠tasya̠ patnī̠ mava̍sē huvēma ।
tu̠vi̠kṣa̠trā-ma̠jara̍ntī murū̠chīgṃ su̠śarmā̍ṇa̠-madi̍tigṃ su̠praṇī̍tim ।

37.37 viṣṇuḥ
i̠daṃ viṣṇu̠ pratadviṣṇu̍ḥ ॥

i̠daṃ viṣṇu̠-rvicha̍kramē trē̠dhā nida̍dhē pa̠dam । samū̍ḍhamasya pāgṃ su̠rē ॥

pratadviṣṇu̍ stavatē vī̠ryā̍ya । mṛ̠gō na bhī̠maḥ ku̍cha̠rō gi̍ri̠ṣṭhāḥ । yasyō̠ruṣu̍ tri̠ṣu vi̠krama̍ṇēṣu । adhi̍kṣi̠yanti̠ bhuva̍nāni̠ viśvā̎ ॥ 111 ॥

37.38 agniḥ
a̠gni-rmū̠rdhā bhuva̍ḥ ॥

a̠gni-rmū̠rdhā di̠vaḥ ka̠kutpati̍ḥ pṛthi̠vyā a̠yam । a̠pāgṃ rētāgṃ̍si jinvati ॥ bhuvō̍ ya̠jñasya̠ raja̍saścha nē̠tā yatrā̍ ni̠yudbhi̠-ssacha̍sē
śi̠vābhi̍ḥ । di̠vi mū̠rdhānaṃ̍ dadhiṣē suva̠r̠ṣā-ñji̠hvāma̍gnē chakṛṣē havya̠vāha̎m ।

37.39 anumata
anu̍nō̠-‘dyānu̍mati̠-ranvida̍numatē̠ tvam ॥
anu̍nō̠-‘dyānu̍mati rya̠jña-ndē̠vēṣu̍ manyatām । a̠gniścha̍ havya̠vāha̍nō̠ bhava̍tā-ndā̠śuṣē̠ maya̍ḥ ।
anvida̍numatē̠ tva-mmanyā̍sai̠ śañcha̍ naḥ kṛdhi । kratvē̠ dakṣā̍ya nō hinu̠ praṇa̠ āyūgṃ̍ṣi tāriṣaḥ ।

37.40 havyavāhaḥ (agniḥ)
ha̠vya̠vāha̠gg̠ svi̍ṣṭam ॥

ha̠vya̠vāha̍mabhi-māti̠ṣāha̎m । ra̠kṣō̠haṇaṃ̠ pṛta̍nāsu ji̠ṣṇum ।
jyōti̍ṣmantaṃ̠ dīdya̍taṃ̠ pura̍ndhim । a̠gnigg​ svi̍ṣṭa̠ kṛta̠mā hu̍vēma ।
svi̍ṣṭa magnē a̠bhita-tpṛ̍ṇāhi । viśvā̍ dēva̠ pṛta̍nā a̠bhiṣya ।
u̠runna̠ḥ panthā̎-mpradi̠śan vibhā̍hi । jyōti̍ṣmaddhēhya̠ jara̍nna̠ āyuḥ̍ ॥ 112/28 ॥

38 nakṣatra upahōma mantrāḥ
(tai. brā. 3.1.4.1-3.1.6.7)
38.1 kṛttikā
a̠gnayē̠ svāhā̠ kṛtti̍kābhya̠ ssvāhā̎ । a̠mbāyai̠ svāhā̍ du̠lāyai̠ svāhā̎ । ni̠ta̠tnyai svāhā̠ ‘bhraya̍ntyai̠ svāhā̎ । mē̠ghaya̍ntyai̠ svāhā̍ va̠r̠ṣaya̍ntyai̠ svāhā̎ । chu̠pu̠ṇīkā̍yai̠ svāhā̎ ॥

38.2 rōhiṇī
pra̠jāpa̍tayē̠ svāhā̍ rōhi̠ṇyai svāhā̎ । rōcha̍mānāyai̠ svāhā̎ pra̠jābhya̠ svāhā̎ ॥

38.3 mṛgaśī.r​ṣaḥ
sōmā̍ya̠ svāhā̍ mṛgaśī̠r̠ṣāya̠ svāhā̎ । i̠nva̠kābhya̠ ssvāhauṣa̍dhībhya̠ ssvāhā̎ । rā̠jyāya̠ svāhā̠-‘bhiji̍tyai̠ svāhā̎ ॥ 113 ॥

38.4 ārdrā
ru̠drāya̠ svāhā̠-”rdrāyai̠ svāhā̎ । pinva̍mānāyai̠ svāhā̍ pa̠śubhya̠ ssvāhā̎ ॥

38.5 punarvasu
adi̍tyai̠ svāhā̠ puna̍rvasubhyām । svāhā-”bhū̎tyai̠ svāhā̠ prajā̎tyai̠ svāhā̎ ॥

38.6 puṣyaḥ​
bṛha̠spata̍yē̠ svāhā̍ ti̠ṣyā̍ya̠ svāhā̎ । bra̠hma̠va̠rcha̠sāya̠ svāhā̎ ॥

38.7 āśrēṣa
sa̠rpēbhya̠ ssvāhā̎ ”śrē̠ṣābhya̠ ssvāhā̎ । da̠nda̠śūkē̎bhya̠ ssvāhā̎ ॥

38.8 maghā
pi̠tṛbhya̠ ssvāhā̍ ma̠ghābhya̍ḥ । svāhā̍ ‘na̠ghābhya̠ ssvāhā̍ ‘ga̠dābhyaḥ̍ । svāhā̍rundha̠tībhya̠ ssvāhā̎ ॥ 114 ॥

38.9 pūrva pha̍lgunī
a̠rya̠mṇē svāhā̠ phalgu̍nībhyā̠g̠ svāhā̎ । pa̠śubhya̠ ssvāhā̎ ॥

38.10 uttara pha̍lgunī
bhagā̍ya̠ svāhā̠ phalgu̍nībhyā̠g̠ svāhā̎ । śraiṣṭhyā̍ya̠ svāhā̎ ॥

38.11 hastaḥ
sa̠vi̠trē svāhā̠ hastā̍ya । svāhā̍ dada̠tē svāhā̍ pṛṇa̠tē । svāhā̎ pra̠yachCha̍tē̠ svāhā̎ pratigṛbhṇa̠tē svāhā̎ ॥

38.12 chitrā
tvaṣṭrē̠ svāhā̍ chi̠trāyai̠ svāhā̎ । chaitrā̍ya̠ svāhā̎ pra̠jāyai̠ svāhā̎ ॥

38.13 svāti
vā̠yavē̠ svāhā̠ niṣṭyā̍yai̠ svāhā̎ । kā̠ma̠chārā̍ya̠ svāhā̠ ‘bhiji̍tyai̠ svāhā̎ ॥

38.14 viśākhā
i̠ndrā̠gnibhyā̠g̠ svāhā̠ viśā̍khābhyā̠g̠ svāhā̎ । śraiṣṭhyā̍ya̠ svāhā̠ ‘bhiji̍tyai̠ svāhā̎ ॥

38.15 paurṇamāsi
pau̠rṇa̠mā̠syai svāhā̠ kāmā̍ya̠ svāhā-”ga̍tyai̠ svāhā̎ ॥ 115 (29) ॥

38.16 anūrādhā
mi̠trāya̠ svāhā̍-‘nūrā̠dhēbhya̠ ssvāhā̎ । mi̠tra̠dhēyā̍ya̠ svāhā̠-‘bhiji̍tyai̠ svāhā̎ ॥

38.17 jyēṣṭhā
indrā̍ya̠ svāhā̎ jyē̠ṣṭhāyai̠ svāhā̎ । jyaiṣṭhyā̍ya̠ svāhā̠-‘bhiji̍tyai̠ svāhā̎ ॥

38.18 mūlaṃ
pra̠jāpa̍tayē̠ svāhā̠ mūlā̍ya̠ svāhā̎ । pra̠jāyai̠ svāhā̎ ॥

38.19 pūrvāṣāḍhā
a̠dbhya ssvāhā̍ ‘ṣā̠ḍhābhya̠ ssvāhā̎ । sa̠mu̠drāya̠ svāhā̠ kāmā̍ya̠ svāhā̎ । a̠bhiji̍tyai̠ svāhā̎ ॥

38.20 uttarāṣāḍhā
viśvē̎bhyō dē̠vēbhya̠ ssvāhā̍ ‘ṣā̠ḍhābhya̠ ssvāhā̎ । a̠na̠pa̠ja̠yyāya̠ svāhā̠ jityai̠ svāhā̎ ॥ 116 ॥

38.21 abhijit
brahma̍ṇē̠ svāhā̍ ‘bhi̠jitē̠ svāhā̎ । bra̠hma̠lō̠kāya̠ svāhā̠ ‘bhiji̍tyai̠ svāhā̎ ॥

38.22 śravaṇaṃ
viṣṇa̍vē̠ svāhā̎ śrō̠ṇāyai̠ svāhā̎ । ślōkā̍ya̠ svāhā̎ śru̠tāya̠ svāhā̎ ॥

38.23 śraviṣṭhā
vasu̍bhya̠ ssvāhā̠ śravi̍ṣṭhābhya̠ ssvāhā̎ । agrā̍ya̠ svāhā̠ parī̎tyai̠ svāhā̎ ॥

38.24 śatabhiṣak
varu̍ṇāya̠ svāhā̍ śa̠tabhi̍ṣajē̠ svāhā̎ । bhē̠ṣa̠jēbhya̠ ssvāhā ̎ ॥

38.25 pūrva prōṣṭhapadā
a̠jāyaika̍padē̠ svāhā̎ prōṣṭhapa̠dēbhya̠ ssvāhā̎ ॥ 117 ॥
tēja̍sē̠ svāhā̎ brahmavarcha̠sāya̠ svāhā̎ ॥

38.26 uttara prōṣṭhapadā
aha̍yē bu̠dhniyā̍ya̠ svāhā̎ prōṣṭhapa̠dēbhya̠ ssvāhā̎ । pra̠ti̠ṣṭhāyai̠ svāhā̎ ॥

38.27 rēvati
pū̠ṣṇē svāhā̍ rē̠vatyai̠ svāhā̎ । pa̠śubhya̠ ssvāhā̎ ॥

38.28 aśvinī
a̠śvibhyā̠g̠ svāhā̎ ‘śva̠yugbhyā̠g̠ svāhā ̎। śrōtrā̍ya̠ svāhā̠ śrutyai̠ svāhā̎ ॥

38.29 apabharaṇi
ya̠māya̠ svāhā̍ ‘pa̠bhara̍ṇībhya̠ ssvāhā̎ । rā̠jyāya̠ svāhā̠ ‘bhiji̍tyai̠ svāhā̎ ॥

38.30 amāvāsi
a̠ma̠vā̠syā̍yai̠ svāhā̠ kāmā̍ya̠ svāhā ”ga̍tyai̠ svāhā̎ ॥ 118 (30) ॥

38.31 chandramā
cha̠ndrama̍sē̠ svāhā̎ pratī̠dṛśyā̍yai̠ svāhā̎ । a̠hō̠rā̠trēbhya̠ ssvāhā̎-‘rdhamā̠sēbhya̠ ssvāhā̎ । māsē̎bhya̠ ssvāha̠rtubhya̠ ssvāhā̎ । sa̠ṃva̠thsa̠rāya̠ svāhā̎ ॥

38.32 ahō rātrī
ahnē̠ svāhā̠ rātri̍yai̠ svāhā̎ । ati̍muktyai̠ svāhā̎ ॥

38.33 uṣā
u̠ṣasē̠ svāhā̠ vyu̍ṣṭyai̠ svāhā̎ । vyū̠ṣuṣyai̠ svāhā̎ vyu̠chChantyai̠ svāhā̎ । vyu̍ṣṭāyai̠ svāhā̎ ॥

38.34 nakṣatraḥ
nakṣa̍trāya̠ svāhō̍dēṣyatē̠ svāhā̎ ॥ 119 ॥
u̠dya̠tē svāhō-di̍tāya̠ svāhā̎ । hara̍sē̠ svāhā̠ bhara̍sē̠ svāhā̎ ।
bhrāja̍sē̠ svāhā̠ tēja̍sē̠ svāhā̎ । tapa̍sē̠ svāhā̎ brahmavarcha̠sāya̠ svāhā̎ ॥

38.35 sūryaḥ
sūryā̍ya̠ svāhā̠ nakṣa̍trēbhya̠ ssvāhā̎ । pra̠ti̠ṣṭhāyai̠ svāhā̎ ॥

38.36 aditiḥ
adi̍tyai̠ svāhā̎ prati̠ṣṭhāyai̠ svāhā̎ ॥

38.37 viṣṇuḥ
viṣṇa̍vē̠ svāhā̍ ya̠jñāya̠ svāhā̎ । pra̠ti̠ṣṭhāyai̠ svāhā̎ ॥ 120 ॥

da̠dhi̠krāvṇṇō̍ akāriṣaṃ
da̠dhi̠krāvṇṇō̍ akāriṣam । ji̠ṣṇō raśva̍sya vā̠jina̍ḥ । su̠ra̠bhi nō̠ mukhā̍ kara̠t । praṇa̠ āyūgṃ̍ṣi tāriṣat । āpō̠hiṣṭhā ma̍yō̠bhuva̠stā na̍ ū̠rjē da̍dhātana । ma̠hē raṇā̍ya̠ chakṣa̍sē ।
yō va̍śśi̠vata̍mō̠ rasa̠stasya̍ bhājaya-tē̠ha na̍ḥ । u̠śa̠tīri̍va mā̠tara̍ḥ । tasmā̠ ara̍ṅgamāma vō̠ yasya̠ kṣayā̍ya̠ jinva̍tha । āpō̍ ja̠naya̍thā cha naḥ ॥ 121 (32) ॥

39 varuṇa sūktaṃ
(tai. saṃ. 1.5.11.3)
udu̍tta̠maṃ va̍ruṇa̠ pāśa̍ma̠sma-davā̍dha̠maṃ vima̍dhya̠magg​ śra̍thāya ।
athā ̍va̠yamā̍ditya vra̠tē tavānā̍gasō̠ adi̍tayē syāma ॥ (tai. saṃ. 1.2.8.1 )
asta̍bh​nā̠ddhyā-mṛ̍ṣa̠bhō a̠ntari̍kṣa̠-mami̍mīta-vari̠māṇa̍-mpṛthi̠vyā
ā-‘sī̍da̠dviśvā̠ bhuva̍nāni sa̠mrā-ḍviśvēttāni̠ varu̍ṇasya vra̠tāni̍ ॥ (tai. saṃ. 3.4.11.6)
yatkiñchē̠daṃ va̍ruṇa̠ daivyē̠ janē̍-‘bhidrō̠ha-mma̍nu̠ṣyā̎-ścharā̍masi ।
achi̍ttī̠-yattava̠-dharmā̍ yuyōpi̠ma-māna̠stasmā̠ dēna̍sō dēva rīriṣaḥ ॥ (tai. saṃ. 3.4.11.6)
ki̠ta̠vāsō̠ yadri̍ri̠purna dī̠vi yadvā̍ ghā sa̠tya-mu̠tayanna vi̠dma ।
sarvā̠tāviṣya̍ śithi̠rēva̍ dē̠vāthā̍tē-syāma varuṇa pri̠yāsa̍ḥ ॥ (tai. saṃ. 1.5.11.3)
ava̍tē̠hēḍō̍ varuṇa̠ namō̍bhi̠rava̍ ya̠jñē-bhi̍rīmahē ha̠virbhi̍ḥ ।
kṣaya̍nna̠ smabhya̍ masura-prachētō̠ rāja̠nnēnāgṃ̍si śiśrathaḥ kṛ̠tāni̍ ॥ (tai. saṃ. 2.1.11.6)
tatvā̍yāmi̠ brahma̍ṇā̠ vanda̍māna̠ stadāśā̎stē̠ yaja̍mānō ha̠virbhi̍ḥ । ahē̍ḍamānō varuṇē̠ha bō̠ddhyuru̍śagṃ sa̠ mā na̠ āyu̠ḥ pramō̍ṣīḥ ॥ 122 (33) ॥

40 pavamāna sūktaṃ
hira̍ṇyavarṇā̠-śśucha̍yaḥ pāva̠kā yāsu̍jā̠taḥ ka̠śyapō̠ yāsvindra̍ḥ ।
a̠gniṃyā garbhaṃ̍dadhi̠rē virū̍pā̠stā na̠ āpa̠śśagg​ syō̠nā bha̍vantu ॥ yāsā̠gṃ̠ rājā̠ varu̍ṇō̠ yāti̠ madhyē̍ satyānṛ̠tē a̍va̠paśya̠n janā̍nām ।
ma̠dhu̠śchuta̠-śśucha̍yō̠yāḥ pā̍va̠kāstā na̠ āpa̠śśagg​ syō̠nā bha̍vantu ॥ yāsāṃ̎ dē̠vādi̠vi kṛ̠ṇvanti̍ bha̠kṣaṃyā a̠ntari̍kṣē bahu̠dhā bhava̍nti ।
yāḥ pṛ̍thi̠vī-mpaya̍sō̠ndanti̍ śu̠krāstā na̠ āpa̠śśagg​ syō̠nā bha̍vantu ॥ śi̠vēna̍ mā̠ chakṣu̍ṣā paśyatāpa śśi̠vayā̍ ta̠nuvō-pa̍spṛśata̠ tvacha̍-mmē ।
sarvāgṃ̍ a̠gnīgṃ ra̍phsu̠ṣadō̍ huvē vō̠ mayi̠ varchō̠ bala̠mōjō̠ nidha̍tta ॥ 123 (34) ॥

(tai. brā. 1.4.8.1)
pava̍māna̠-ssuva̠rjana̍ḥ । pa̠vitrē̍ṇa̠ vicha̍r​ṣaṇiḥ । yaḥ pōtā̠ sa pu̍nātu mā । pu̠nantu̍ mā dēvaja̠nāḥ । pu̠nantu̠ mana̍
vōdhi̠yā । pu̠nantu̠ viśva̍ ā̠yava̍ḥ । jāta̍vēdaḥ pa̠vitra̍vat । pa̠vitrē̍ṇa punāhi mā । śu̠krēṇa̍ dēva̠ dīdya̍t । agnē̠ kratvā̠-kratū̠gṃ̠ ranu̍ ॥ 124 ॥

yattē̍ pa̠vitra̍-ma̠rchiṣi̍ । agnē̠ vita̍ta-manta̠rā । brahma̠ tēna̍ punīmahē । u̠bhābhyāṃ̎ dēva savitaḥ । pa̠vitrē̍ṇa sa̠vēna̍ cha । i̠da-mbrahma̍ punīmahē ।
vai̠śva̠dē̠vī pu̍na̠tī dē̠vyāgā̎t । yasyai̍ ba̠hvī-sta̠nuvō̍ vī̠tapṛ̍ṣṭhāḥ । tayā̠ mada̍nta-ssadha̠mādyē̍ṣu । va̠yagg​ syā̍ma̠ pata̍yōrayī̠ṇām ॥ 125 ॥

vai̠śvā̠na̠rō ra̠śmibhi̍rmā punātu । vāta̍ḥ prā̠ṇēnē̍ ṣi̠rō ma̍yō̠ bhūḥ ।
dyāvā̍pṛthi̠vī paya̍sā̠ payō̍bhiḥ । ṛ̠tāva̍rī ya̠jñiyē̍ mā punītām । bṛ̠hadbhi̍-ssavita̠stṛbhi̍ḥ । var​ṣi̍ṣṭhai-rdēva̠ manma̍bhiḥ । agnē̠ dakṣai̎ḥ punāhi mā । yēna̍ dē̠vā apu̍nata । yē-nāpō̍ di̠vya-ṅkaśa̍ḥ । tēna̍ di̠vyēna̠ brahma̍ṇā ॥ 126 ॥

i̠da-mbrahma̍ punīmahē । yaḥ pā̍vamā̠nī-ra̠ddhyēti̍ । ṛṣi̍bhi̠-ssambhṛ̍ta̠gṃ̠ rasa̎m । sarva̠gṃ̠ sa pū̠tama̍śnāti । sva̠di̠ta-mmā̍ta̠riśva̍nā । pā̠va̠mā̠nī̠ryō a̠ddhyēti̍ ।
ṛṣi̍bhi̠-ssambhṛ̍ta̠gṃ̠ rasa̎m । tasmai̠ sara̍svatī duhē । kṣī̠ragṃ sa̠rpi-rmadhū̍da̠kam । pā̠va̠mā̠nī-ssva̠styaya̍nīḥ ॥ 127 ॥

su̠dughā̠hi paya̍svatīḥ । ṛṣi̍bhi̠-ssambhṛ̍tō̠ rasa̍ḥ । brā̠hma̠ṇēṣva̠-mṛtagṃ̍ hi̠tam । pā̠va̠mā̠nī-rdi̍śantu naḥ । i̠maṃ lō̠kamathō̍ a̠mum । kāmā̠n-thsama̍rdhayantu naḥ । dē̠vīrdē̠vai-ssa̠mābhṛ̍tāḥ । pā̠va̠mā̠nī-ssva̠styaya̍nīḥ । su̠dughā̠hi ghṛ̍ta̠śchuta̍ḥ । ṛṣi̍bhi̠-ssambhṛ̍tō̠ rasa̍ḥ ॥ 128 ॥

brā̠hma̠ṇēṣva̠-mṛtagṃ̍ hi̠tam । yēna̍ dē̠vāḥ pa̠vitrē̍ṇa । ā̠tmānaṃ̍ pu̠natē̠ sadā̎ । tēna̍ sa̠hasra̍ dhārēṇa । pā̠va̠mā̠nyaḥ pu̍nantu mā । prā̠jā̠pa̠tya-mpa̠vitra̎m । śa̠tōdyā̍magṃ hira̠ṇmaya̎m । tēna̍ brahma̠ vidō̍ va̠yam । pū̠ta-mbrahma̍ punīmahē । indra̍-ssunī̠tī sa̠ha mā̍ punātu । sōma̍-ssva̠styā varu̍ṇa-ssa̠mīchyā̎ । ya̠mō rājā̎ pramṛ̠ṇābhi̍ḥ punātumā । jā̠tavē̍dā mō̠rjaya̍ntyā punātu । ō-mbhūrbhuva̠ssuva̍ḥ ॥ 129 ॥

(tai. brā. 3.5.11.1)
tachChaṃ̠ँyōrā vṛ̍ṇīmahē । gā̠tuṃ ya̠jñāya̍ । gā̠tuṃ ya̠jñapa̍tayē । daivī̎sva̠sti-ra̍stunaḥ । sva̠sti-rmānu̍ṣēbhyaḥ । ū̠rdhva-ñji̍gātu bhēṣa̠jam । śannō̍ astu dvi̠padē̎ । śañchatu̍ṣpadē ॥ 130 (36) ॥
ōṃ śānti̠-śśānti̠-śśānti̍ḥ ॥

41 āyuṣya sūktaṃ
yō brahmābrahmaṇa ujjabhāra prāṇēśvaraḥ (yō brahmā brahmaṇa ujjahāra prāṇai-śśiraḥ) kṛttivāsāḥ pinākī ।
īśānō dēvassana āyurdadhātu tasmai juhōmi haviṣā ghṛtēna ॥ 1 ॥

vibhrājamāna-ssarirasya madhyād rōchamānō gharmaruchirya āgāt ।
sa mṛtyupāśā-napanudya ghōrā-nihāyuṣēṇō ghṛtamattu dēvaḥ ॥ 2 ॥

brahmajyōtir brahmapatnīṣu garbhaṃ yamādadhā-tpururūpa-ñjayantam ।
suvarṇarambha-graha-markamarchya-ntamāyuṣē vardhayāmō ghṛtēna ॥ 3 ॥

śriyaṃ lakṣmī-maupalāṃ ambikā-ṅgāṃ ṣaṣṭīñcha yāmindrasēnētyudāhuḥ ।
tāṃ vidyā-mbrahmayōnigṃ sarūpā-mihāyuṣē tarpayāmō ghṛtēna ॥ 4 ॥

dākṣāyaṇya-ssarvayōnya ssuyōnya-ssahasraśō viśva rūpā virūpāḥ ।
sasūnava-ssapataya-ssayūthyā āyuṣēṇō ghṛtamida-ñjuṣantām ॥ 5 ॥

divyā gaṇā bahurūpāḥ purāṇā āyuśChidō naḥ pramathnantu vīrān ।
tēbhyō juhōmi bahudhā ghṛtēna mā naḥ prajāgṃ rīriṣō mōta vīrān ॥ 6 ॥

ēkaḥ purastāt ya ida-mbabhūva yatō babhūva bhuvanasya gōpāḥ ।
yamapyēti bhuvanagṃ sāmparāyē sa nō havir ghṛta-mihāyuṣē’ttu dēvaḥ ॥ 7 ॥

vasū-nrudrānā-dityā-nmarutō’tha sāddhyān ṛbhūn yakṣā-ngandharvāgṃścha pitṛgṃścha viśvān ।
bhṛgūn-thsarpāgṃśchā-ṅgigarasō’tha sarvā-nghṛtagṃ hutvā svāyuṣyā mahayāma śaśvat ॥ 8 ॥

viṣṇō̠ tvannō̠ anta̍ma̠-śśarma̍yachCha sahantya ।
pratē̠ dhārā̍ madhu̠śchuta̠ uthsa̍nduhratē̠ akṣi̍tam ॥ (tai. saṃ. 3.1.10.3) ॥

namō brahmaṇē namō astvagnayē namaḥ pṛthivyai nama ōṣadhībhyaḥ ।
namō vāchē namō vāchaspata̍yē namō viṣṇavē bṛhatē karōmi ॥ (tai. ara. 2.12.1) ॥
(ēva-ntriḥ)

yadakṣarapadabhraṣṭa-mmātrāhīna-ntu yadbhavēt ।
tatsarva-ṅkṣamyatā-ndēva nārāyaṇa namō’stutē ॥
visarga bindu mātrāṇi padapādākṣarāṇi cha ।

nyūnātiriktaṃ yatkiñchidabhigīrbhirudīryatē ॥
ā̠bhir gī̠rbhir yadatō̍na ū̠namāpyā̍yaya harivō̠ vardha̍mānaḥ ।
ya̠dā stō̠tṛbhyō̠ mahi̍ gō̠trā ru̠jāsi̍ bhūyiṣṭha̠bhājō̠ adha̍tē śyāma ।
brahma̠ prāvā̍diṣma̠ tannō̠ māhā̍sīt ।
ōṃ śānti̠-śśānti̠-śśānti̍ḥ ॥ (tai. ara. 4.42.5)

hariḥ ōm । śrīkṛṣṇārpaṇamastu ॥

ō-ntatsat brahmārpaṇamastu ॥

ityudakaśāntimantrāḥ ॥