Sri Manasa Devi Stotram (Mahendra Kritam)

dēvi tvāṃ stōtumichChāmi sādhvīnāṃ pravarāṃ parām ।
parātparāṃ cha paramāṃ na hi stōtuṃ kṣamō’dhunā ॥ 1 ॥

stōtrāṇāṃ lakṣaṇaṃ vēdē svabhāvākhyānataḥ param ।
na kṣamaḥ prakṛtiṃ vaktuṃ guṇānāṃ tava suvratē ॥ 2 ॥

śuddhasattvasvarūpā tvaṃ kōpahiṃsāvivarjitā ।
na cha śaptō munistēna tyaktayā cha tvayā yataḥ ॥ 3 ॥

tvaṃ mayā pūjitā sādhvī jananī cha yathā’ditiḥ ।
dayārūpā cha bhaginī kṣamārūpā yathā prasūḥ ॥ 4 ॥

tvayā mē rakṣitāḥ prāṇā putradārāḥ surēśvari ।
ahaṃ karōmi tvāṃ pūjyāṃ mama prītiścha vardhatē ॥ 5 ॥

nityaṃ yadyapi pūjyā tvaṃ bhavē’tra jagadambikē ।
tathāpi tava pūjāṃ vai vardhayāmi punaḥ punaḥ ॥ 6 ॥

yē tvāmāṣāḍhasaṅkrāntyāṃ pūjayiṣyanti bhaktitaḥ ।
pañchamyāṃ manasākhyāyāṃ māsāntē vā dinē dinē ॥ 7 ॥

putrapautrādayastēṣāṃ vardhantē cha dhanāni cha ।
yaśasvinaḥ kīrtimantō vidyāvantō guṇānvitāḥ ॥ 8 ॥

yē tvāṃ na pūjayiṣyanti nindantyajñānatō janāḥ ।
lakṣmīhīnā bhaviṣyanti tēṣāṃ nāgabhayaṃ sadā ॥ 9 ॥

tvaṃ svargalakṣmīḥ svargē cha vaikuṇṭhē kamalākalā ।
nārāyaṇāṃśō bhagavān jaratkārurmunīśvaraḥ ॥ 10 ॥

tapasā tējasā tvāṃ cha manasā sasṛjē pitā ।
asmākaṃ rakṣaṇāyaiva tēna tvaṃ manasābhidhā ॥ 11 ॥

manasā dēvi tu śaktā chātmanā siddhayōginī ।
tēna tvaṃ manasādēvī pūjitā vanditā bhavē ॥ 12 ॥

yāṃ bhaktyā manasā dēvāḥ pūjayantyaniśaṃ bhṛśam ।
tēna tvāṃ manasādēvīṃ pravadanti purāvidaḥ ॥ 13 ॥

sattvarūpā cha dēvī tvaṃ śaśvatsattvaniṣēvayā ।
yō hi yadbhāvayēnnityaṃ śataṃ prāpnōti tatsamam ॥ 14 ॥

idaṃ stōtraṃ puṇyabījaṃ tāṃ sampūjya cha yaḥ paṭhēt ।
tasya nāgabhayaṃ nāsti tasya vaṃśōdbhavasya cha ॥ 15 ॥

viṣaṃ bhavētsudhātulyaṃ siddhastōtraṃ yadā paṭhēt ।
pañchalakṣajapēnaiva siddhastōtrō bhavēnnaraḥ ।
sarpaśāyī bhavētsō’pi niśchitaṃ sarpavāhanaḥ ॥ 16 ॥

iti śrībrahmavaivartē mahāpurāṇē prakṛtikhaṇḍē ṣaṭchatvāriṃśō’dhyāyē mahēndra kṛta śrī manasādēvī stōtram ॥

āstīkamuni mantraḥ
sarpāpasarpa bhadraṃ tē gachCha sarpa mahāviṣa ।
janamējayasya yajñāntē āstīkavachanaṃ smara ॥