Rudrashtadhyayi (Shukla Yajurveda)

॥ ōṃ śrī gaṇēśāya namaḥ ॥
ōṃ

1. maṅgalācharaṇam, dhyānam

vandē siddhipradaṃ dēvaṃ gaṇēśaṃ priyapālakam ।
viśvagarbhaṃ cha vighnēśaṃ anādiṃ maṅgalaṃ vibhūm ॥
atha dhyānam
dhyāyēnnityaṃ mahēśaṃ rajatagirinibhaṃ chāru chandravataṃsam ।
ratnākalpōjjvalāṅgaṃ paraśumṛgavarābhītihastaṃ prasannam ॥ 1॥

padmāsīnaṃ samantātstutamamaragaṇairvyāghrakṛtiṃ vasānam ।
viśvādyaṃ viśvavandyaṃ nikhilabhayaharaṃ pañchavaktraṃ trinētram ॥ 2॥

2. prathamō’dhyāyaḥ – gaṇapati mantrāḥ, śiva saṅkalpa sūktam

hari̍ḥ ōṃ
ga̠ṇānāṃ̍ tvā ga̠ṇapa̍tigṃ havāmahē pri̠yāṇāṃ̍ tvā pri̠yapa̍tigṃ havāmahē
ni̠dhīnāṃ̍ tvā̍ nidhi̠pati̍gṃ havāmahē vasō mama ।
āhama̍jāni garbha̠dhamā tvama̍jāsi garbha̠dham ॥ 1॥

gā̠ya̠trī tri̠ṣṭubjaga̍tyanu̠ṣṭuppa̠ṅktyā sa̠ha ।
bṛ̠ha̠tyuṣṇihā̍ ka̠kupsū̠chībhi̍-śśamyantu tvā ॥ 2॥

dvipa̍dā̠yāśchatu̍ṣpadā̠stripa̍dā̠yāścha̠ṣaṭpa̍dāḥ ।
vichCha̍ndā̠ yāścha̠ sachCha̍ndā-ssū̠chībhi̍-śśamyantu tvā ॥ 3॥

sa̠hastō̍mā-ssa̠hachCha̍ndasa ā̠vṛta̍-ssa̠hapra̍mā̠ ṛṣa̍ya-ssa̠pta dai̍vyāḥ ।
pūrvē̍ṣāṃ̠ panthā̍manu̠dṛśya̠ dhīrā̍ a̠nvālē̍bhirē ra̠thyō na ra̠śmīn ॥ 4॥

yajjāgra̍tō dū̠ramu̠daiti̠ daivaṃ̠ tadu̍ su̠ptasya̠ tathai̠vaiti̍ ।
dū̠ra̠ṅga̠ma-ñjyōti̍ṣāṃ̠ jyōti̠rēkaṃ̠ tanmē̠ mana̍-śśi̠vasa̍ṅkalpamastu ॥ 1॥

yēna̠ karmā̍ṇya̠pasō̍ manī̠ṣiṇō̍ ya̠jñē kṛ̠ṇvanti̍ vi̠dathē̍ṣu̠ dhīrā̍ḥ ।
yada̍pū̠rvaṃ ya̠kṣama̠ntaḥ pra̠jānāṃ̠ tanmē̠ mana̍-śśi̠vasa̍ṅkalpamastu ॥ 2॥

yatpra̠jñāna̍mu̠ta chētō̠ dhṛti̍ścha̠ yajjyōti̍ra̠ntara̠mṛtaṃ̍ pra̠jāsu̍ ।
yasmā̠nna-‘ṛ̠tē ki-ñcha̠na karma̍ kri̠yatē̠ tanmē̠ mana̍-śśi̠vasa̍ṅkalpamastu ॥ 3॥

yēnē̠da-mbhū̠ta-mbhuva̍na-mbhavi̠ṣyatpari̍gṛhītama̠mṛtē̍na̠ sarva̍m ।
yēna̍ ya̠jñastā̠yatē̍ sa̠ptahō̍tā̠ tanmē̠ mana̍-śśi̠vasa̍ṅkalpamastu ॥ 4॥

yasmi̠nnṛcha̠-ssāma̠ yajū̍gṃṣi̠ yasmi̠-nprati̍ṣṭhitā rathanā̠bhāvi̍vā̠rāḥ ।
yasmi̍gṃśchi̠ttagṃ sarva̠mōtaṃ̍ pra̠jānāṃ̠ tanmē̠ mana̍-śśi̠vasa̍ṅkalpamastu ॥ 5॥

su̠ṣā̠ra̠thiraśvā̍niva̠ yanma̍nu̠ṣyā̠nnēnī̠yatē̠-‘bhīśu̍bhirvā̠jina̍ iva ।
hṛ̠tprati̍ṣṭhaṃ̠ yada̍ji̠ra-ñjavi̍ṣṭhaṃ̠ tanmē̠ mana̍-śśi̠vasa̍ṅkalpamastu ॥ 6॥

iti rudrē prathamō-‘dhyāyaḥ ॥ 1॥

3. dvitīyō’dhyāyaḥ – puruṣa sūktam

hari̍ḥ ōṃ
sa̠hasra̍śīr​ṣā̠ puru̍ṣa-ssahasrā̠kṣa-ssa̠hasra̍pāt ।
sa bhūmi̍gṃ sa̠rvataḥ̍ spṛ̠tvātya̍tiṣṭhaddaśāṅgu̠lam ॥ 1॥

puru̍ṣa ē̠vēdagṃ sarvaṃ̠ yadbhū̠taṃ yachcha̍ bhā̠vya̠m ।
u̠tāmṛ̍ta̠tvasyēśā̍nō̠ yadannē̍nāti̠rōha̍ti ॥ 2॥

ē̠tāvā̍nasya mahi̠mātō̠ jyāyā.ṇ̍ścha̠ pūru̍ṣaḥ ।
pādō̍-‘sya̠ viśvā̍ bhū̠tāni̍ tri̠pāda̍syā̠mṛtaṃ̍ di̠vi ॥ 3॥

tri̠pādū̠rdhva udai̠tpuru̍ṣa̠ḥ pādō̍-‘syē̠hābha̍va̠tpuna̍ḥ ।
tatō̠ viṣva̠ṅ vya̠krāmatsāśanānaśa̠nē a̠bhi ॥ 4॥

tatō̍ vi̠rāḍa̍jāyata vi̠rājō̠ adhi̠ pūru̍ṣaḥ ।
sa jā̠tō atya̍richyata pa̠śchādbhūmi̠mathō̍ pu̠raḥ ॥ 5॥

tasmā̍dya̠jñātsa̍rva̠huta̠-ssambhṛ̍ta-mpṛṣadā̠jyam ।
pa̠śū.ṇstā.ṇścha̍krē vāya̠vyā̠nāra̠ṇyā grā̠myāścha̠ yē ॥ 6॥

tasmā̍dya̠jñātsa̍rva̠huta̠ ṛcha̠-ssāmā̍ni jajñirē ।
Chandā̍gṃsi jajñirē̠ tasmā̠dyaju̠stasmā̍dajāyata ॥ 7॥

tasmā̠daśvā̍ ajāyanta̠ yē kē chō̍bha̠yāda̍taḥ ।
gāvō̍ ha jajñirē̠ tasmā̠ttasmā̍jjā̠tā a̍jā̠vaya̍ḥ ॥ 8॥

taṃ ya̠jña-mba̠r​hiṣi̠ praukṣa̠npuru̍ṣa-ñjā̠tama̍gra̠taḥ ।
tēna̍ dē̠vā a̍yajanta sā̠dhyā ṛṣa̍yaścha̠ yē ॥ 9॥

yatpuru̍ṣaṃ̠ vyada̍dhuḥ kati̠dhā vya̍kalpayann ।
mukhaṃ̠ kima̍syāsī̠-tki-mbā̠hū kimū̠rū pādā̍ uchyētē ॥ 10॥

brā̠hma̠ṇō̠-‘sya̠ mukha̍māsīdbā̠hū rā̍ja̠nya̠ḥ kṛ̠taḥ ।
ū̠rū tada̍sya̠ yadvai̍śyaḥ pa̠dbhyāgṃ śū̠drō a̍jāyata ॥ 11॥

cha̠ndramā̠ mana̍sō jā̠taśchakṣōḥ̠ sūryō̍ ajāyata ।
śrōtrā̍dvā̠yuścha̍ prā̠ṇaścha̠ mukhā̍da̠gnira̍jāyata ॥ 12॥

nābhyā̍ āsīda̠ntari̍kṣagṃ śī̠r​ṣṇō dyau̠-ssama̍vartata ।
pa̠dbhyā-mbhūmi̠rdiśa̠-śśrōtrā̠ttathā̍ lō̠kā.ṇ2 ॥ a̍kalpayann ॥ 13॥

yatpuru̍ṣēṇa ha̠viṣā̍ dē̠vā ya̠jñamata̍nvata ।
va̠sa̠ntō̠-‘syāsī̠dājyaṃ̍ grī̠ṣma i̠dhma-śśa̠raddha̠viḥ ॥ 14॥

sa̠ptāsyā̍sanpari̠dhaya̠strissa̠pta sa̠midha̍ḥ kṛ̠tāḥ ।
dē̠vā yadya̠jña-nta̍nvā̠nā aba̍dhna̠-npuru̍ṣa-mpa̠śum ॥ 15॥

ya̠jñēna̍ ya̠jñama̍yajanta dē̠vāstāni̠ dharmā̍ṇi pratha̠mānyā̍sann ।
tē ha̠ nākaṃ̍ mahi̠māna̍-ssachanta̠ yatra̠ pūrvē̍ sā̠dhyā-ssanti̍ dē̠vāḥ ॥ 16॥

a̠dbhya-ssambhṛ̍taḥ pṛthivyai̠ rasā̍chcha vi̠śvaka̍rmaṇa̠-ssama̍varta̠tāgrē̍ ।
tasya̠ tvaṣṭā̍ vi̠dadha̍drū̠pamē̍ti̠ tanmartya̍sya dēva̠tvamā̠jāna̠magrē̍ ॥ 17॥

vēdā̠hamē̠ta-mpuru̍ṣa-mma̠hānta̍mādi̠tyava̍rṇaṃ̠ tama̍saḥ pa̠rastā̍t ।
tamē̠va vi̍di̠tvā-‘ti̍ mṛ̠tyumē̍ti̠ nānyaḥ panthā̍ vidya̠tē-‘ya̍nāya ॥ 18॥

pra̠jāpa̍tiścha̠rati̠ garbhē̍ a̠ntarajā̍yamānō bahu̠dhā vi jā̍yatē ।
tasya̠ yōniṃ̠ pari̍paśyanti̠ dhīrā̠stasmi̍nha tasthu̠rbhuva̍nāni̠ viśvā̍ ॥ 19॥

yō dē̠vēbhya̍ ā̠tapa̍ti̠ yō dē̠vānāṃ̍ pu̠rōhi̍taḥ ।
pūrvō̠ yō dē̠vēbhyō̍ jā̠tō namō̍ ru̠chāya̠ brāhma̍yē ॥ 20॥

ru̠cha-mbrā̠hmya-ñja̠naya̍ntō dē̠vā agrē̠ tada̍bruvann ।
yastvai̠va-mbrā̍hma̠ṇō vi̠dyāttasya̍ dē̠vā a̍sa̠nvaśē̍ ॥ 21॥

śrīścha̍ tē la̠kṣmīścha̠ patnyā̍vahōrā̠trē pā̠r​śvē nakṣa̍trāṇi rū̠pama̠śvinau̠ vyātta̍m ।
i̠ṣṇanni̍ṣāṇā̠mu-mma̍ iṣāṇa sarvalō̠ka-mma̍ iṣāṇa ॥ 22॥

iti rudrē dvitīyō-‘dhyāyaḥ ॥ 2॥

4. tṛtīyō’dhyāyaḥ – apratiratha sūktam

hari̍ ōṃ
ā̠śu-śśiśā̍nō vṛṣa̠bhō na bhī̠mō gha̍nāgha̠naḥ, kṣōbha̍ṇaśchar​ṣaṇī̠nām ।
sa̠ṅkranda̍nō-‘nimi̠ṣa ē̍kavī̠ra-śśa̠tagṃ sēnā̍ ajayatsā̠kamindra̍ḥ ॥ 1॥

sa̠ṅkranda̍nēnā-‘nimi̠ṣēṇa̍ ji̠ṣṇunā̍ yutkā̠rēṇa̍ duśchyava̠nēna̍ dhṛ̠ṣṇunā̍ ।
tadindrē̍ṇa jayata̠ tatsa̍hadhvaṃ̠ yudhō̍ nara̠ iṣu̍hastēna̠ vṛṣṇā̍ ॥ 2॥

sa iṣu̍hastaiḥ̠ sa ni̍ṣa̠ṅgibhi̍rva̠śī sagṃsra̍ṣṭā̠ sa yudha̠ indrō̍ ga̠ṇēna̍ ।
sa̠gṃsṛṣṭa̠jitsō̍ma̠pā bā̍huśa̠rdhyugradha̍nvā̠ prati̍hitābhi̠rastā̍ ॥ 3॥

bṛha̍spatē̠ pari̍dīyā̠ rathē̍na rakṣō̠hāmitrā̍.ṇ2 apa̠bādha̍mānaḥ ।
pra̠bha̠ñjantsēnā̍ḥ pramṛ̠ṇō yu̠dhā jaya̍nna̠smāka̍mēdhyavi̠tā rathā̍nām ॥ 4॥

ba̠la̠vi̠jñā̠ya-ssthavi̍ra̠ḥ pravī̍ra̠-ssaha̍svānvā̠jī saha̍māna u̠graḥ ।
a̠bhivī̍rō a̠bhisa̍tvā sahō̠jā jai̍tramindra̠ ratha̠māti̍ṣṭha gō̠vit ॥ 5॥

gō̠tra̠bhidaṃ̍ gō̠vidaṃ̠ vajra̍bāhuṃ̠ jaya̍nta̠majma̍ pramṛ̠ṇanta̠mōja̍sā ।
i̠magṃ sa̍jātā̠ anu̍ vīrayadhva̠mindra̍gṃ sakhāyō̠ anu̠ sagṃra̍bhadhvam ॥ 6॥

a̠bhi gō̠trāṇi̠ saha̍sā̠ gāha̍mānō-‘da̠yō vī̠ra-śśa̠tama̍nyu̠rindra̍ḥ ।
du̠śchya̠va̠naḥ pṛ̍tanā̠ṣāḍa̍yu̠dhyō-‘smāka̠gṃ sēnā̍ avatu̠ pra yu̠tsu ॥ 7॥

indra̍ āsā-nnē̠tā bṛha̠spati̠rdakṣi̍ṇā ya̠jñaḥ pu̠ra ē̍tu̠ sōma̍ḥ ।
dē̠va̠sē̠nānā̍mabhibhañjatī̠nā-ñjaya̍ntīnā-mma̠rutō̍ ya̠ntvagra̍m ॥ 8॥

indra̍sya̠ vṛṣṇō̠ varu̍ṇasya̠ rājña̍ ādi̠tyānāṃ̍ ma̠rutā̠gṃ śardha̍ u̠gram ।
ma̠hāma̍nasā-mbhuvanachya̠vānāṃ̠ ghōṣō̍ dē̠vānāṃ̠ jaya̍tā̠muda̍sthāt ॥ 9॥

uddha̍r​ṣaya maghava̠nnāyu̍dhā̠nyutsatva̍nā-mmāma̠kānāṃ̠ manā̍gṃsi ।
udvṛ̍trahanvā̠jināṃ̠ vāji̍nā̠nyudrathā̍nāṃ̠ jaya̍tāṃ yantu̠ ghōṣā̍ḥ ॥ 10॥

a̠smāka̠mindra̠-ssamṛ̍tēṣu dhva̠jēṣva̠smākaṃ̠ yā iṣa̍va̠stā ja̍yantu ।
a̠smākaṃ̍ vī̠rā utta̍rē bhavantva̠smā.ṇ2 u̍ dēvā avatā̠ havē̍ṣu ॥ 11॥

a̠mīṣāṃ̍ chi̠tta-mpra̍tilō̠bhaya̍ntī gṛhā̠ṇāṅgā̍nyapvē̠ parē̍hi ।
a̠bhi prēhi̠ nirda̍ha hṛ̠tsu śōkai̍ra̠ndhēnā̠mitrā̠stama̍sā sachantām ॥ 12॥

ava̍sṛṣṭā̠ parā̍pata̠ śara̍vyē̠ brahma̍sagṃśitē ।
gachChā̠mitrā̠nprapa̍dyasva̠ māmīṣāṅkañchanōchChi̍ṣaḥ ॥ 13॥

prētā̠ jaya̍tā nara̠ indrō̍ va̠-śśarma̍ yachChatu ।
u̠grā va̍-ssantu bā̠havō̍-‘nādhṛ̠ṣyā yathāsa̍tha ॥ 14॥

asau̠ yā sēnā̍ maruta̠ḥ parē̍ṣāma̠bhyaiti̍ na̠ ōja̍sā̠ spardha̍mānā ।
tā-ṅgū̍hata̠ tama̠sā-‘pa̍vratēna̠ yathā̠mī a̠nyō a̠nya-nna jā̠nann ॥ 15॥

yatra̍ bā̠ṇā-ssa̠mpata̍nti kumā̠rā vi̍śi̠khā i̍va ।
tanna̠ indrō̠ bṛha̠spati̠radi̍ti̠-śśarma̍ yachChatu vi̠śvāhā̠ śarma̍ yachChatu ॥ 16॥

marmā̍ṇi tē̠ varma̍ṇā Chādayāmi̠ sōma̍stvā̠ rājā̠-‘mṛtē̠nānu̍vastām ।
u̠rōrvarī̍yō̠ varu̍ṇastē kṛṇōtu̠ jaya̍ntaṃ̠ tvānu̍ dē̠vā ma̍dantu ॥ 17॥

iti rudrē tṛtīyō-‘dhyāyaḥ ॥ 3॥

5. chaturthō’dhyāyaḥ – saura sūktam, maitra sūktam

hari̍ḥ ōṃ
vi̠bhrāḍbṛ̠hatpi̍batu sō̠mya-mmadhvāyu̠rdadha̍dya̠jñapa̍tā̠vavi̍hrutam ।
vāta̍jūtō̠ yō a̍bhi̠rakṣa̍ti̠ tmanā̍ pra̠jāḥ pu̍pōṣa puru̠dhā vi rā̍jati ॥ 1॥

udu̠ tya-ñjā̠tavē̍dasa-ndē̠vaṃ va̍hanti kē̠tava̍ḥ ।
dṛ̠śē viśvā̍ya̠ sūrya̍m ॥ 2॥

yēnā̍ pāvaka̠ chakṣa̍sā bhura̠ṇyantaṃ̠ janā.ṇ̠2 ॥ anu̍ ।
tvaṃ va̍ruṇa̠ paśya̍si ॥ 3॥

daivyā̍vadhvaryū̠ āga̍ta̠gṃ rathē̍na̠ sūrya̍tvachā . madhvā̍ ya̠jñagṃ sama̍ñjāthē ।
ta-mpra̠tnathā̠-‘yaṃ vē̠naśchi̠tra-ndē̠vānā̍m ॥ 4॥

ta-mpra̠tnathā̍ pū̠rvathā̍ vi̠śvathē̠mathā̍ jyē̠ṣṭhatā̍ti-mbar​hi̠ṣada̍gṃsva̠rvida̍m ।
pra̠tī̠chī̠naṃ vṛ̠janaṃ̍ dōhasē̠ dhuni̍mā̠śu-ñjaya̍nta̠manu̠ yāsu̠ vardha̍sē ॥ 5॥

a̠yaṃ vē̠naśchō̍daya̠tpṛśni̍garbhā̠ jyōti̍rjarāyū̠ raja̍sō vi̠mānē̍ ।
i̠mama̠pāgṃsa̍ṅga̠mē sūrya̍sya̠ śiśu̠nna viprā̍ ma̠tibhī̍ rihanti ॥ 6॥

chi̠tra-ndē̠vānā̠muda̍gā̠danī̍kaṃ̠ chakṣu̍rmi̠trasya̠ varu̍ṇasyā̠gnēḥ ।
āprā̠ dyāvā̍pṛthi̠vī a̠ntari̍kṣagṃ sūrya̍ ā̠tmā jaga̍tasta̠sthuṣa̍ścha ॥ 7॥

ā na̠ iḍā̍bhirvi̠dathē̍ suśa̠sti vi̠śvāna̍ra-ssavi̠tā dē̠va ē̍tu ।
api̠ yathā̍ yuvānō̠ matsa̍thā nō̠ viśvaṃ̠ jaga̍dabhipi̠tvē ma̍nī̠ṣā ॥ 8॥

yada̠dya kachcha̍ vṛtrahannu̠dagā̍ a̠bhi sū̍rya ।
sarvaṃ̠ tadi̍ndra tē̠ vaśē̍ ॥ 9॥

ta̠raṇi̍rvi̠śvada̍r​śatō jyōti̠ṣkṛda̍si sūrya ।
viśva̠mā bhā̍si rōcha̠nam ॥ 10॥

tatsūrya̍sya dēva̠tva-ntanma̍hi̠tva-mma̠dhyā kartō̠rvita̍ta̠gṃ sa-ñja̍bhāra ।
ya̠dēdayu̍kta ha̠rita̍-ssa̠dhasthā̠dādrātrī̠ vāsa̍stanutē si̠masmai̍ ॥ 11॥

tanmi̠trasya̠ varu̍ṇasyābhi̠chakṣē̠ sūryō̍ rū̠pa-ṅkṛ̍ṇutē̠ dyōru̠pasthē̍ ।
a̠na̠ntama̠nyadruśa̍dasya̠ pāja̍ḥ kṛ̠ṣṇama̠nyaddha̠rita̠-ssa-mbha̍ranti ॥ 12॥

baṇma̠hā.ṇ2 ॥ a̍si sūrya̠ baḍā̍ditya ma̠hā.ṇ2 ॥ a̍si ।
ma̠hastē̍ sa̠tō ma̍hi̠mā pa̍nasyatē̠-‘ddhā dē̍va ma̠hā.ṇ2 ॥ a̍si ॥ 13॥

baṭ sū̍rya̠ śrava̍sā ma̠hā.ṇ2 ॥ a̍si . sa̠trā dē̍va ma̠hā.ṇ2 ॥ a̍si ।
ma̠hnā dē̠vānā̍masu̠rya̠ḥ pu̠rōhi̍tō vi̠bhu jyōti̠radā̍bhyam ॥ 14॥

śrāya̍nta iva̠ sūryaṃ̠ viśvēdindra̍sya bhakṣata ।
vasū̍ni jā̠tē jana̍māna̠ ōja̍sā̠ prati̍ bhā̠ga-nna dī̍dhima ॥ 15॥

a̠dyā dē̍vā̠ udi̍tā̠ sūrya̍sya̠ niragṃha̍saḥ pipṛ̠tā nira̍va̠dyāt ।
tannō̍ mi̠trō varu̍ṇō māmahantā̠madi̍ti̠-ssindhu̍ḥ pṛthi̠vī u̠ta dyauḥ ॥ 16॥

ā kṛ̠ṣṇēna̠ raja̍sā̠ varta̍mānō nivē̠śaya̍nna̠mṛtaṃ̠ martyaṃ̍ cha ।
hi̠ra̠ṇyayē̍na savi̠tā rathē̠nā dē̠vō yā̍ti̠ bhuva̍nāni̠ paśya̍n ॥ 17॥

iti rudrē chaturthō-‘dhyāyaḥ ॥ 4॥

6. pañchamō’dhyāyaḥ – rudra sūktam (nīla sūktam)

hari̍ḥ ōṃ
nama̍stē rudra ma̠nyava̍ u̠tō ta̠ iṣa̍vē̠ nama̍ḥ ।
bā̠hubhyā̍mu̠ta tē̠ nama̍ḥ ॥ 1॥

yā tē̍ rudra śi̠vā ta̠nūraghō̠rā-‘pā̍pakāśinī ।
tayā̍ nasta̠nvā śanta̍mayā̠ giri̍śantā̠bhi chā̍kaśīhi ॥ 2॥

yāmiṣuṃ̍ giriśanta̠ hastē̍ bi̠bhar​ṣyasta̍vē ।
śi̠vā-ṅgi̍ritra̠ tā-ṅku̍ru̠ mā hi̍gṃsī̠ḥ puru̍ṣaṃ̠ jaga̍t ॥ 3॥

śi̠vēna̠ vacha̍sā tvā giri̠śā-‘chChā̍vadāmasi ।
yathā̍ na̠-ssarva̠mijjaga̍daya̠kṣmagṃ su̠manā̠ asa̍t ॥ 4॥

adhya̍vōchadadhiva̠ktā pra̍tha̠mō daivyō̍ bhi̠ṣak ।
ahī̍gṃścha̠ sarvā̍ñja̠mbhaya̠ntsarvā̍ścha yātudhā̠nyō̠-‘dha̠rāchī̠ḥ parā̍suva ॥ 5॥

asau̠ yastā̠mrō a̍ru̠ṇa u̠ta ba̠bhru-ssu̍ma̠ṅgala̍ḥ ।
yē chai̍nagṃ ru̠drā a̠bhitō̍ di̠kṣu śri̠tā-ssa̍hasra̠śō-‘vai̍ṣā̠gṃ hēḍa̍ īmahē ॥ 6॥

asau̠ yō̍-‘va̠sarpa̍ti̠ nīla̍grīvō̠ vilō̍hitaḥ ।
u̠tainaṃ̍ gō̠pā a̍dṛśra̠nnadṛ̍śrannudahā̠rya-ssa dṛ̠ṣṭō mṛ̍ḍayāti naḥ ॥ 7॥

namō̍-‘stu̠ nīla̍grīvāya sahasrā̠kṣāya̍ mī̠ḍhuṣē̍ ।
athō̠ yē a̍sya̠ satvā̍nō̠-‘ha-ntēbhyō̍-‘karaṃ̠ nama̍ḥ ॥ 8॥

pramu̍ñcha̠ dhanva̍na̠stvamu̠bhayō̠rārtnyō̠rjyām ।
yāścha̍ tē̠ hasta̠ iṣa̍va̠ḥ parā̠ tā bha̍gavō vapa ॥ 9॥

vijyaṃ̠ dhanu̍ḥ kapa̠rdinō̠ viśa̍lyō̠ bāṇa̍vā.ṇ2 ॥ u̠ta ।
anē̍śannasya̠ yā iṣa̍va ā̠bhura̍sya niṣaṅga̠dhiḥ ॥ 10॥

yā tē̍ hē̠tirmī̍ḍhuṣṭama̠ hastē̍ ba̠bhūva̍ tē̠ dhanu̍ḥ ।
tayā̠smānvi̠śvata̠stvama̍ya̠kṣmayā̠ pari̍bhuja ॥ 11॥

pari̍ tē̠ dhanva̍nō hē̠tira̠smānvṛ̍ṇaktu vi̠śvata̍ḥ ।
athō̠ ya i̍ṣu̠dhistavā̠rē a̠smannidhē̍hi̠ tam ॥ 12॥

a̠va̠tatya̠ dhanu̠ṣṭvagṃ saha̍srākṣa̠ śatē̍ṣudhē ।
ni̠śīrya̍ śa̠lyānāṃ̠ mukhā̍ śi̠vō na̍-ssu̠manā̍ bhava ॥ 13॥

nama̍sta̠ āyu̍dhā̠yānā̍tatāya dhṛ̠ṣṇavē̍ ।
u̠bhābhyā̍mu̠ta tē̠ namō̍ bā̠hubhyāṃ̠ tava̠ dhanva̍nē ॥ 14॥

mā nō̍ ma̠hānta̍mu̠ta mā nō̍ arbha̠ka-mmā na̠ ukṣa̍ntamu̠ta mā na̍ ukṣi̠tam ।
mā nō̍ vadhīḥ pi̠taraṃ̠ mōta̍ mā̠taraṃ̠ mā na̍ḥ pri̠yāsta̠nvō̠ rudra rīriṣaḥ ॥ 15॥

mā na̍stō̠kē tana̍yē̠ mā na̠ āyu̍ṣi̠ mā nō̠ gōṣu̠ mā nō̠ aśvē̍ṣu rīriṣaḥ ।
mā nō̍ vī̠rā-nru̍dra bhā̠minō̍ vadhīr​ha̠viṣma̍nta̠-ssada̠mittvā̍ havāmahē ॥ 16॥

namō̠ hira̍ṇyabāhavē sēnā̠nyē̠ di̠śā-ñcha̠ pata̍yē̠ namō̠
namō̍ vṛ̠kṣēbhyō̠ hari̍kēśēbhyaḥ paśū̠nā-mpata̍yē̠ namō̠
nama̍-śśa̠ṣpiñja̍rāya̠ tviṣī̍matē pathī̠nā-mpata̍yē̠ namō̠
namō̠ hari̍kēśāyōpavī̠tinē̍ pu̠ṣṭānāṃ̠ pata̍yē̠ nama̍ḥ ॥ 17॥

namō̍ babhlu̠śāya̍ vyā̠dhinē-‘nnā̍nāṃ̠ pata̍yē̠ namō̠
namō̍ bha̠vasya̍ hētyai̠ jaga̍tāṃ̠ pata̍yē̠ namō̠
namō̍ ru̠drāyā̍tatā̠yinē̠ kṣētrā̍ṇāṃ̠ pata̍yē̠ namō̠
nama̍-ssū̠tāyāha̍ntyai̠ vanā̍nāṃ̠ pata̍yē̠ nama̍ḥ ॥ 18॥

namō̠ rōhi̍tāya stha̠pata̍yē vṛ̠kṣāṇāṃ̠ pata̍yē̠ namō̠
namō̍ bhuva̠ntayē̍ vārivaskṛ̠tāyauṣa̍dhīnāṃ̠ pata̍yē̠ namō̠
namō̍ ma̠ntriṇē̍ vāṇi̠jāya̠ kakṣā̍ṇāṃ̠ pata̍yē̠ namō̠
nama̍ u̠chchairghō̍ṣāyākra̠ndaya̍tē pattī̠nā-mpata̍yē̠ nama̍ḥ ॥ 19॥

nama̍ḥ kṛtsnāya̠tayā̠ dhāva̍tē̠ satva̍nāṃ̠ pata̍yē̠ namō̠
nama̠-ssaha̍mānāya nivyā̠dhina̍ āvyā̠dhinī̍nāṃ̠ pata̍yē̠ namō̠
namō̍ niṣa̠ṅgiṇē̍ kaku̠bhāya̍ stē̠nānāṃ̠ pata̍yē̠ namō̠
namō̍ nichē̠ravē̍ paricha̠rāyāra̍ṇyānāṃ̠ pata̍yē̠ nama̍ḥ ॥ 20॥

namō̠ vañcha̍tē pari̠vañcha̍tē stāyū̠nā-mpata̍yē̠ namō̠
namō̍ niṣa̠ṅgiṇa̍ iṣudhi̠matē̠ taska̍rāṇāṃ̠ pata̍yē̠ namō̠
nama̍-ssṛkā̠yibhyō̠ jighā̍gṃsadbhyō muṣṇa̠tā-mpata̍yē̠ namō̠
namō̍-‘si̠madbhyō̠ nakta̠ñchara̍dbhyō vikṛ̠ntānāṃ̠ pata̍yē̠ nama̍ḥ ॥ 21॥

nama̍ uṣṇī̠ṣiṇē̍ giricha̠rāya̍ kulu̠ñchānāṃ̠ pata̍yē̠ namō̠
nama̍ iṣu̠madbhyō̍ dhanvā̠yibhya̍ścha vō̠ namō̠
nama̍ ātanvā̠nēbhya̍ḥ prati̠dadhā̍nēbhyaścha vō̠ namō̠
nama̍ ā̠yachCha̠dbhyō-‘sya̍dbhyaścha vō̠ nama̍ḥ ॥ 22॥

namō̍ visṛ̠jadbhyō̠ vidhya̍dbhyaścha vō̠ namō̠
nama̍-ssva̠padbhyō̠ jāgra̍dbhyaścha vō̠ namō̠
nama̠-śśayā̍nēbhya̠ āsī̍nēbhyaścha vō̠ namō̠
nama̠stiṣṭha̍dbhyō̠ dhāva̍dbhyaścha vō̠ nama̍ḥ ॥ 23॥

nama̍-ssa̠bhābhya̍-ssa̠bhāpa̍tibhyaścha vō̠ namō̠
namō-‘śvē̠bhyō-‘śva̍patibhyaścha vō̠ namō̠
nama̍ āvyā̠dhinī̍bhyō vi̠vidhya̍ntībhyaścha vō̠ namō̠
nama̠ uga̍ṇābhyastṛgṃha̠tībhya̍ścha vō̠ nama̍ḥ ॥ 24॥

namō̍ ga̠ṇēbhyō̍ ga̠ṇapa̍tibhyaścha vō̠ namō̠
namō̠ vrātē̍bhyō̠ vrāta̍patibhyaścha vō̠ namō̠
namō̠ gṛtsē̍bhyō̠ gṛtsa̍patibhyaścha vō̠ namō̠
namō̠ virū̍pēbhyō vi̠śvarū̍pēbhyaścha vō̠ nama̍ḥ ॥ 25॥

nama̠-ssēnā̍bhya-ssēnā̠nibhya̍ścha vō̠ namō̠
namō̍ ra̠thibhyō̍ ara̠thēbhya̍ścha vō̠ namō̠
nama̍ḥ, kṣa̠ttṛbhya̍-ssaṅgrahī̠tṛbhya̍ścha vō̠ namō̠
namō̍ ma̠hadbhyō̍ arbha̠kēbhya̍ścha vō̠ nama̍ḥ ॥ 26॥

nama̠stakṣa̍bhyō rathakā̠rēbhya̍ścha vō̠ namō̠
nama̠ḥ kulā̍lēbhyaḥ ka̠rmārē̍bhyaścha vō̠ namō̠
namō̍ niṣā̠dēbhya̍ḥ pu̠ñjiṣṭē̍bhyaścha vō̠ namō̠
nama̍-śśva̠nibhyō̍ mṛga̠yubhya̍ścha vō̠ nama̍ḥ ॥ 27॥

nama̠-śśvabhya̠-śśvapa̍tibhyaścha vō̠ namō̠
namō̍ bha̠vāya̍ cha ru̠drāya̍ cha̠
nama̍-śśa̠rvāya̍ cha paśu̠pata̍yē cha̠
namō̠ nīla̍grīvāya cha śiti̠kaṇṭhā̍ya cha ॥ 28॥

nama̍ḥ kapa̠rdinē̍ cha̠ vyu̠ptakēśāya cha̠
nama̍-ssahasrā̠kṣāya̍ cha śa̠tadha̍nvanē cha̠
namō̍ giriśa̠yāya̍ cha śipivi̠ṣṭāya̍ cha̠
namō̍ mī̠ḍhuṣṭa̍māya̠ chēṣu̍matē cha ॥ 29॥

namō̍ hra̠svāya̍ cha vāma̠nāya̍ cha̠
namō̍ bṛha̠tē cha̠ var​ṣī̍yasē cha̠
namō̍ vṛ̠ddhāya̍ cha sa̠vṛdhē̍ cha̠
namō-‘gryā̍ya cha pratha̠māya̍ cha ॥ 30॥

nama̍ ā̠śavē̍ chāji̠rāya̍ cha̠
nama̠-śśīghryā̍ya cha̠ śībhyā̍ya cha̠
nama̠ ūrmyā̍ya chāvasva̠nyā̠ya cha̠
namō̍ nādē̠yāya̍ cha̠ dvīpyā̍ya cha ॥ 31॥

namō̍ jyē̠ṣṭhāya̍ cha kani̠ṣṭhāya̍ cha̠
nama̍ḥ pūrva̠jāya̍ chāpara̠jāya̍ cha̠
namō̍ madhya̠māya̍ chāpaga̠lbhāya̍ cha̠
namō̍ jagha̠nyā̠ya cha bu̠dhnyā̠ya cha ॥ 32॥

nama̠-ssōbhyā̍ya cha pratisa̠ryā̠ya cha̠
namō̠ yāmyā̍ya cha̠ kṣēmyā̍ya cha̠
nama̠-śślōkyā̍ya chāvasā̠nyā̠ya cha̠
nama̍ urva̠ryā̠ya cha̠ khalyā̍ya cha ॥ 33॥

namō̠ vanyā̍ya cha̠ kakṣyā̍ya cha̠
nama̍-śśra̠vāya̍ cha pratiśra̠vāya̍ cha̠
nama̍ ā̠śuṣē̍ṇāya chā̠śura̍thāya cha̠
nama̠-śśūrā̍ya chāvabhē̠dinē̍ cha ॥ 34॥

namō̍ bi̠lminē̍ cha kava̠chinē̍ cha̠
namō̍ va̠rmiṇē̍ cha varū̠thinē̍ cha̠
nama̍-śśru̠tāya̍ cha śrutasē̠nāya̍ cha̠
namō̍ dundu̠bhyā̠ya chāhana̠nyā̠ya cha ॥ 35॥

namō̍ dhṛ̠ṣṇavē̍ cha pramṛ̠śāya̍ cha̠
namō̍ niṣa̠ṅgiṇē̍ chēṣudhi̠matē̍ cha̠
nama̍stī̠kṣṇēṣa̍vē chāyu̠dhinē̍ cha̠
nama̍-ssvāyu̠dhāya̍ cha su̠dhanva̍nē cha ॥ 36॥

nama̠-ssrutyā̍ya cha̠ pathyā̍ya cha̠
nama̠ḥ kāṭyā̍ya cha̠ nīpyā̍ya cha̠
nama̠ḥ kulyā̍ya cha sara̠syā̠ya cha̠
namō̍ nādē̠yāya̍ cha vaiśa̠ntāya̍ cha ॥ 37॥

nama̠ḥ kūpyā̍ya chāva̠ṭyā̍ya cha̠
namō̠ vīdhryā̍ya chāta̠pyā̠ya cha̠
namō̠ mēghyā̍ya cha vidyu̠tyā̠ya cha̠
namō̠ var​ṣyā̍ya chāva̠r​ṣyāya̍ cha ॥ 38॥

namō̠ vātyā̍ya cha̠ rēṣmyā̍ya cha̠
namō̍ vāsta̠vyā̠ya cha vāstu̠pāya̍ cha̠
nama̠-ssōmā̍ya cha ru̠drāya̍ cha̠
nama̍stā̠mrāya̍ chāru̠ṇāya̍ cha ॥ 39॥

nama̍-śśa̠ṅgavē̍ cha paśu̠pata̍yē cha̠
nama̍ u̠grāya̍ cha bhī̠māya̍ cha̠
namō̍-‘grēva̠dhāya̍ cha dūrēva̠dhāya̍ cha̠
namō̍ ha̠ntrē cha̠ hanī̍yasē cha̠
namō̍ vṛ̠kṣēbhyō̠ hari̍kēśēbhyō̠ nama̍stā̠rāya̍ ॥ 40॥

nama̍-śśambha̠vāya̍ cha mayōbha̠vāya̍ cha̠
nama̍-śśaṅka̠rāya̍ cha mayaska̠rāya̍ cha̠
nama̍-śśi̠vāya̍ cha śi̠vata̍rāya cha ॥ 41॥

nama̠ḥ pāryā̍ya chāvā̠ryā̠ya cha̠
nama̍ḥ pra̠tara̍ṇāya chō̠ttara̍ṇāya cha̠
nama̠stīrthyā̍ya cha̠ kūlyā̍ya cha̠
nama̠-śśaṣpyā̍ya cha̠ phēnyā̍ya cha ॥ 42॥

nama̍-ssika̠tyā̠ya cha pravā̠hyā̠ya cha̠
nama̍ḥ kigṃśi̠lāya̍ cha kṣaya̠ṇāya̍ cha̠
nama̍ḥ kapa̠rdinē̍ cha pula̠stayē̍ cha̠
nama̍ iri̠ṇyā̠ya cha prapa̠thyā̠ya cha ॥ 43॥

namō̠ vrajyā̍ya cha̠ gōṣṭhyā̍ya cha̠
nama̠stalpyā̍ya cha̠ gēhyā̍ya cha̠
namō̍ hṛda̠yyā̠ya cha nivē̠ṣpyā̠ya cha̠
nama̠ḥ kāṭyā̍ya cha gahvarē̠ṣṭhāya̍ cha ॥ 44॥

nama̠-śśuṣkyā̍ya cha hari̠tyā̠ya cha̠
nama̍ḥ pāgṃsa̠vyā̠ya cha raja̠syā̠ya cha̠
namō̠ lōpyā̍ya chōla̠pyā̠ya cha̠
nama̠ ūrvyā̍ya cha̠ sūrvyā̍ya cha ॥ 45॥

nama̍ḥ pa̠rṇāya̍ cha parṇaśa̠dāya̍ cha̠
nama̍ udgu̠ramā̍ṇāya chābhighna̠tē cha̠
nama̍ ākhida̠tē cha̍ prakhida̠tē cha̠
nama̍ḥ iṣu̠kṛdbhyō̍ dhanu̠ṣkṛdbhya̍ścha vō̠ namō̠
namō̍ vaḥ kiri̠kēbhyō̍ dē̠vānā̠gṃ hṛda̍yēbhyō̠ namō̍
vichinva̠tkēbhyō̠ namō̍ vikṣiṇa̠tkēbhyō̠ nama̍ ānir​ha̠tēbhya̍ḥ ॥ 46॥

drāpē̠ andha̍saspatē̠ dari̍draṃ̠ nīla̍lōhita ।
ā̠sā-mpra̠jānā̍mē̠ṣā-mpa̍śū̠nā-mmā bhē̠rmā rōṅbhō cha̍ na̠ḥ kiñcha̠nāma̍mat ॥ 47॥

i̠mā ru̠drāya̍ ta̠vasē̍ kapa̠rdinē̍ kṣa̠yadvī̍rāya̠ prabha̍rāmahē ma̠tīḥ ।
yathā̠ śamasa̍ddvi̠padē̠ chatu̍ṣpadē̠ viśvaṃ̍ pu̠ṣṭa-ṅgrāmē̍ a̠sminna̍nātu̠ram ॥ 48॥

yā tē̍ rudra śi̠vā ta̠nū-śśi̠vā vi̠śvāhā̍ bhēṣa̠jī ।
śi̠vā ru̠tasya̍ bhēṣa̠jī tayā̍ nō mṛḍa jī̠vasē̍ ॥ 49॥

pari̍ nō ru̠drasya̍ hē̠tirvṛ̍ṇaktu̠ pari̍ tvē̠ṣasya̍ durma̠tira̍ghā̠yōḥ ।
ava̍ sthi̠rā ma̠ghava̍dbhyastanuṣva̠ mīḍhva̍stō̠kāya̠ tana̍yāya mṛḍa ॥ 50॥

mīḍhu̍ṣṭama̠ śiva̍tama śi̠vō na̍-ssu̠manā̍ bhava ।
pa̠ra̠mē vṛ̠kṣa āyu̍dha-nni̠dhāya̠ kṛttiṃ̠ vasā̍na̠ ācha̍ra̠ pinā̍kaṃ̠ bibhra̠dāga̍hi ॥ 51॥

viki̍ridra̠ vilō̍hita̠ nama̍stē astu bhagavaḥ ।
yāstē̍ sa̠hasra̍gṃ hē̠tayō̠-‘nyama̠smanniva̍pantu̠ tāḥ ॥ 52॥

sa̠hasrā̍ṇi sahasra̠śō bā̠hvōstava̍ hē̠taya̍ḥ ।
tāsā̠mīśā̍nō bhagavaḥ parā̠chīnā̠ mukhā̍ kṛdhi ॥ 53॥

asaṃ̍khyātā sa̠hasrā̍ṇi̠ yē ru̠drā adhi̠ bhūmyā̍m ।
tēṣā̍gṃ sahasrayōja̠nē-‘va̠ dhanvā̍ni tanmasi ॥ 54॥

a̠sminma̍ha̠tya̠rṇa̠vē-‘ntari̍kṣē bha̠vā adhi̍ ।
tēṣā̍gṃ sahasrayōja̠nē-‘va̠ dhanvā̍ni tanmasi ॥ 55॥

nīla̍grīvā-śśiti̠kaṇṭhā̠ diva̍gṃ ru̠drā upa̍śritāḥ ।
tēṣā̍gṃ sahasrayōja̠nē-‘va̠ dhanvā̍ni tanmasi ॥ 56॥

nīla̍grīvā-śśiti̠kaṇṭhā̍-śśa̠rvā a̠dhaḥ, kṣa̍mācha̠rāḥ ।
tēṣā̍gṃ sahasrayōja̠nē-‘va̠ dhanvā̍ni tanmasi ॥ 57॥

yē vṛ̠kṣēṣu̍ śa̠ṣpiñja̍rā̠ nīla̍grīvā̠ vilō̍hitāḥ ।
tēṣā̍gṃ sahasrayōja̠nē-‘va̠ dhanvā̍ni tanmasi ॥ 58॥

yē bhū̠tānā̠madhi̍patayō viśi̠khāsa̍ḥ kapa̠rdina̍ḥ ।
tēṣā̍gṃ sahasrayōja̠nē-‘va̠ dhanvā̍ni tanmasi ॥ 59॥

yē pa̠thā-mpa̍thi̠rakṣa̍ya ailabṛ̠dā ā̍yu̠ryudha̍ḥ ।
tēṣā̍gṃ sahasrayōja̠nē-‘va̠ dhanvā̍ni tanmasi ॥ 60॥

yē tī̠rthāni̍ pra̠chara̍nti sṛ̠kāha̍stā niṣa̠ṅgiṇa̍ḥ ।
tēṣā̍gṃ sahasrayōja̠nē-‘va̠ dhanvā̍ni tanmasi ॥ 61॥

yē-‘nnē̍ṣu vi̠vidhya̍nti̠ pātrē̍ṣu̠ piba̍tō̠ janā̍n ।
tēṣā̍gṃ sahasrayōja̠nē-‘va̠ dhanvā̍ni tanmasi ॥ 62॥

ya ē̠tāva̍ntaścha̠ bhūyā̍gṃsaścha̠ diśō̍ ru̠drā vi̍tasthi̠rē ।
tēṣā̍gṃ sahasrayōja̠nē-‘va̠ dhanvā̍ni tanmasi ॥ 63॥

namō̍-‘stu ru̠drēbhyō̠ yē di̠vi yēṣāṃ̍ va̠r​ṣamiṣa̍vastēbhyō̠
daśa̠ prāchī̠rdaśa̍ dakṣi̠ṇā daśa̍ pra̠tīchī̠rdaśōdī̍chī̠rdaśō̠rdhvāstēbhyō̠
namō̍ astu̠ tē nō̍-‘vantu̠ tē nō̍ mṛḍayantu̠ tē yaṃ
dvi̠ṣmō yaścha̍ nō̠ dvēṣṭi̠ tamē̍ṣāṃ̠ jambhē̍ dadhmaḥ ॥ 64॥

namō̍-‘stu ru̠drēbhyō̠ yē-‘ntari̍kṣē̠ yēṣāṃ̠ vāta̠ iṣa̍vastēbhyō̠
daśa̠ prāchī̠rdaśa̍ dakṣi̠ṇā daśa̍ pra̠tīchī̠rdaśōdī̍chī̠rdaśō̠rdhvāstēbhyō̠
namō̍ astu̠ tē nō̍-‘vantu̠ tē nō̍ mṛḍayantu̠ tē yaṃ
dvi̠ṣmō yaścha̍ nō̠ dvēṣṭi̠ tamē̍ṣāṃ̠ jambhē̍ dadhmaḥ ॥ 65॥

namō̍-‘stu ru̠drēbhyō̠ yē pṛ̍thi̠vyāṃ yēṣā̠manna̠miṣa̍vastēbhyō̠
daśa̠ prāchī̠rdaśa̍ dakṣi̠ṇā daśa̍ pra̠tīchī̠rdaśōdī̍chī̠rdaśō̠rdhvāstēbhyō̠
namō̍ astu̠ tē nō̍-‘vantu̠ tē nō̍ mṛḍayantu̠ tē yaṃ
dvi̠ṣmō yaścha̍ nō̠ dvēṣṭi̠ tamē̍ṣāṃ̠ jambhē̍ dadhmaḥ ॥ 66॥

iti rudrē pañchamō-‘dhyāyaḥ ॥ 5॥

7. ṣaṣṭhō’dhyāyaḥ – mahachChira, sōma stavana, tryambaka yajanam

hari̍ḥ ōṃ
va̠yagṃsō̍ma vra̠tē tava̠ mana̍sta̠nūṣu̠ bibhra̍taḥ ।
pra̠jāva̍nta-ssachēmahi ॥ 1॥

ē̠ṣa tē̍ rudra bhā̠ga-ssa̠ha svasrā-‘mbi̍kayā̠ ta-ñju̍ṣasva̠ svāhai̠ṣa tē̍ rudra bhā̠ga ā̠khustē̍ pa̠śuḥ ॥ 2॥

ava̍ ru̠drama̍dīma̠hyava̍ dē̠va-ntrya̍mbakam ।
yathā̍ nō̠ vasya̍sa̠skara̠dyathā̍ na̠-śśrēya̍sa̠skara̠dyathā̍ nō vyavasā̠yayā̍t ॥ 3॥

bhē̠ṣa̠jama̍si bhēṣa̠ja-ṅgavē-‘śvā̍ya̠ puru̍ṣāya bhēṣa̠jam ।
su̠kha-mmē̠ṣāya̍ mēṣyai ॥ 4॥

trya̍mbakaṃ yajāmahē suga̠ndhi-mpu̍ṣṭi̠vardha̍nam ।
u̠rvā̠ru̠kami̍va̠ bandha̍nānmṛ̠tyōrmu̍kṣīya̠ mā-‘mṛtā̍t ।
trya̍mbakaṃ yajāmahē suga̠ndhi-mpa̍ti̠vēda̍nam ।
u̠rvā̠ru̠kami̍va̠ bandha̍nādi̠tō mu̍kṣīya̠ māmuta̍ḥ ॥ 5॥

ē̠tattē̍ rudrāva̠sa-ntēna̍ pa̠rō mūja̍va̠tō-‘tī̍hi ।
ava̍tatadhanvā̠ pinā̍kāvasa̠ḥ kṛtti̍vāsā̠ ahi̍gṃsanna-śśi̠vō-‘tī̍hi ॥ 6॥

tryā̍yu̠ṣa-ñja̠mada̍gnēḥ ka̠śyapa̍sya tryāyu̠ṣam ।
yaddē̠vēṣu̍ tryāyu̠ṣa-ntannō̍ astu tryāyu̠ṣam ॥ 7॥

śi̠vō nāmā̍si̠ svadhi̍tistē pi̠tā nama̍stē astu̠ mā mā̍ higṃsīḥ ।
niva̍rtayāmyāyu̍ṣē̠-‘nnādyā̍ya̠ prajana̍nāya rā̠yaspōṣā̍ya suprajā̠stvāya̍ su̠vīryā̍ya ॥ 8॥

iti rudrē ṣaṣṭhō-‘dhyāyaḥ ॥ 6॥

8. saptamō’dhyāyaḥ – jaṭā’dhyāyaḥ

hari̍ḥ ōṃ
u̠graścha̍ bhī̠maścha̠ dhvā̠ntaścha̠ dhuni̍ścha ।
sā̠sa̠hvāṃśchā̍bhiyu̠gvā cha̍ vi̠kṣipa̠-ssvāhā̍ ॥ 1॥

a̠gnigṃ hṛda̍yēnā̠śani̍gṃ hṛdayā̠grēṇa̍ paśu̠patiṃ̍ kṛtsna̠hṛda̍yēna bha̠vaṃ ya̠knā ।
śa̠rva-mmata̍snābhyā̠mīśā̍na-mma̠nyunā̍ mahādē̠vama̍ntaḥ par​śa̠vyēnō̠graṃ
dē̠vaṃ va̍ni̠ṣṭhunā̍ vasiṣṭha̠hanuḥ̠ śiṅgī̍ni kō̠śyābhyā̍m ॥ 2॥

u̠graṃ llōhi̍tēna mi̠tragṃ sau̍vratyēna ru̠dra-ndaurvra̍tyē̠nēndraṃ̍ prakrī̠ḍēna̍ ma̠rutō̠ balē̍na sā̠dhyānpra̠mudā̍ ।
bha̠vasya̠ kaṇṭhya̍gṃ ru̠drasyā̍ntaḥ pā̠r​śvya-mma̍hādē̠vasya̠ yakṛ̍chCha̠rvasya̍ vani̠ṣṭhuḥ pa̍śu̠patē̍ḥ purī̠tat ॥ 3॥

lōma̍bhya̠-ssvāhā̠ lōma̍bhya̠-ssvāhā̍ tva̠chē svāhā̍ tva̠chē svāhā̠
lōhi̍tāya̠ svāhā̠ lōhi̍tāya̠ svāhā̠ mēdō̍bhya̠-ssvāhā̠ mēdō̍bhya̠-ssvāhā̍ ।
mā̠gṃsēbhya̠-ssvāhā̍ mā̠gṃsēbhya̠-ssvāhā̠ snāva̍bhya̠-ssvāhā̠ snāva̍bhya̠-ssvāhā̠
asthabhya̠-ssvāhā̠ asthabhya̠-ssvāhā̍ ma̠jjabhya̠-ssvāhā̍ ma̠jjabhya̠-ssvāhā̍ ।
rēta̍sē̠ svāhā̍ pā̠yavē̠ svāhā̍ ॥ 4॥

ā̠yā̠sāya̠ svāhā̍ prāyā̠sāya̠ svāhā̍ saṃyā̠sāya̠ svāhā̍ viyā̠sāya̠ svāhō̍dyā̠sāya̠ svāhā̍ ।
śu̠chē svāhā̠ śōcha̍tē̠ svāhā̠ śōcha̍mānāya̠ svāhā̠ śōkā̍ya̠ svāhā̍ ॥ 5॥

tapa̍sē̠ svāhā̠ tapya̍tē̠ svāhā̠ tapya̍mānāya̠ svāhā̍ ta̠ptāya̠ svāhā̍ gha̠rmāya̠ svāhā̍ ।
niṣkṛ̍tyai̠ svāhā̠ prāya̍śchittyai̠ svāhā̍ bhēṣa̠jāya̠ svāhā̍ ॥ 6॥

ya̠māya̠ svāhānta̍kāya̠ svāhā̍ mṛ̠tyavē̠ svāhā̠ brahma̍ṇē̠ svāhā̍ brahmaha̠tyāyai̠ svāhā̠ ।
viśvē̍bhyō dē̠vēbhya̠-ssvāhā̠ dyāvā̍pṛthi̠vībhyā̠gṃ svāhā̍ ॥ 7॥

iti rudrē saptamō-‘dhyāyaḥ ॥ 7॥

9. aṣṭamō’dhyāyaḥ – chamaka praśnaḥ

(chamakapraśnaḥ ।)
hari̍ḥ ōṃ
vāja̍ścha mē prasa̠vaścha̍ mē̠ praya̍tiścha mē̠ prasi̍tiścha mē
dhī̠tiścha̍ mē̠ kratu̍ścha mē̠ svara̍ścha mē̠ ślōka̍ścha mē
śra̠vaścha̍ mē̠ śruti̍ścha mē̠ jyōti̍ścha mē̠ sva̠ścha mē
ya̠jñēna̍ kalpantām ॥ 1॥

prā̠ṇaścha̍ mē-‘pā̠naścha̍ mē vyā̠naścha̠ mē-‘su̍ścha mē
chi̠tta-ñcha̍ ma̠ ādhī̍ta-ñcha mē̠ vākcha̍ mē̠ mana̍ścha mē̠
chakṣu̍ścha mē̠ śrōtraṃ̍ cha mē̠ dakṣa̍ścha mē̠ balaṃ̍ cha mē
ya̠jñēna̍ kalpantām ॥ 2॥

ōja̍ścha mē̠ saha̍ścha ma ā̠tmā cha̍ mē ta̠nūścha̍ mē̠
śarma̍ cha mē̠ varma̍ cha̠ mē-‘ṅgā̍ni cha̠ mē-‘sthī̍ni cha mē̠
parū̍gṃṣi cha mē̠ śarī̍rāṇi cha ma̠ āyu̍ścha mē ja̠rā cha̍ mē
ya̠jñēna̍ kalpantām ॥ 3॥

jyai̍ṣṭhya-ñcha ma ādhi̍patya-ñcha mē ma̠nyuścha̍ mē̠ bhāma̍ścha̠ mē-‘ma̍ścha̠ mē-‘mbha̍ścha mē
jē̠mā cha̍ mē mahi̠mā cha̍ mē vari̠mā cha̍ mē prathi̠mā cha̍ mē
var​ṣi̠mā cha̍ mē drāghi̠mā cha̍ mē vṛ̠ddha-ñcha̍ mē̠ vṛddhi̍ścha mē
ya̠jñēna̍ kalpantām ॥ 4॥

sa̠tya-ñcha̍ mē śra̠ddhā cha̍ mē̠ jaga̍chcha mē̠ dhanaṃ̍ cha mē̠
viśvaṃ̍ cha mē̠ maha̍ścha mē krī̠ḍā cha̍ mē̠ mōda̍ścha mē
jā̠ta-ñcha̍ mē jani̠ṣyamā̍ṇa-ñcha mē sū̠kta-ñcha̍ mē sukṛ̠ta-ñcha̍ mē
ya̠jñēna̍ kalpantām ॥ 5॥

ṛ̠ta-ñcha̍ mē-‘mṛtaṃ̍ cha mē-‘ya̠kṣma-ñcha̠ mē-‘nā̍mayachcha mē
jī̠vātu̍ścha mē dīrghāyu̠tva-ñcha̍ mē-‘nami̠tra-ñcha̠ mē-‘bha̍ya-ñcha mē
su̠kha-ñcha̍ mē̠ śaya̍na-ñcha mē sū̠ṣāścha̍ mē su̠dinaṃ̍ cha mē
ya̠jñēna̍ kalpantām ॥ 6॥

ya̠ntā cha̍ mē dha̠rtā cha̍ mē̠ kṣēma̍ścha mē̠ dhṛti̍ścha mē̠
viśvaṃ̍ cha mē̠ maha̍ścha mē saṃ̠vichcha̍ mē̠ jñātraṃ̍ cha mē̠
sūścha̍ mē pra̠sūśacha̠̍ mē̠ sīraṃ̍ cha mē̠ laya̍ścha mē
ya̠jñēna̍ kalpantām ॥ 7॥

śa-ñcha̍ mē̠ maya̍ścha mē pri̠ya-ñcha̍ mē-‘nukā̠maścha̍ mē̠
kāma̍ścha mē saumana̠saścha̍ mē̠ bhaga̍ścha mē̠ dravi̍ṇa-ñcha mē
bha̠dra-ñcha̍ mē̠ śrēya̍ścha mē̠ vasī̍yaścha mē̠ yaśa̍ścha mē
ya̠jñēna̍ kalpantām ॥ 8॥

ūrkcha̍ mē sū̠nṛtā̍ cha mē̠ paya̍ścha mē̠ rasa̍ścha mē
ghṛ̠ta-ñcha̍ mē̠ madhu̍ cha mē̠ sagdhi̍ścha mē̠ sapī̍tiścha mē
kṛ̠ṣiścha̍ mē̠ vṛṣṭi̍ścha mē̠ jaitraṃ̍ cha ma̠ audbhi̍dya-ñcha mē
ya̠jñēna̍ kalpantām ॥ 9॥

ra̠yiścha̍ mē̠ rāya̍ścha mē pu̠ṣṭa-ñcha̍ mē̠ puṣṭi̍ścha mē
vi̠bhu cha̍ mē pra̠bhu cha̍ mē pū̠rṇa-ñcha̍ mē pū̠rṇata̍ra-ñcha mē̠
kuya̍va-ñcha̠ mē-‘kṣi̍ta-ñcha̠ mē-‘nnaṃ̍ cha̠ mē-‘kṣu̍chcha mē
ya̠jñēna̍ kalpantām ॥ 10॥

vi̠tta-ñcha̍ mē̠ vēdyaṃ̍ cha mē bhū̠ta-ñcha̍ mē bhavi̠ṣyachcha̍ mē
su̠ga-ñcha̍ mē supa̠thyaṃ̠ cha ma ṛ̠ddha-ñcha̍ ma̠ ṛddhi̍ścha mē
klṛ̠pta-ñcha̍ mē̠ klṛpti̍ścha mē ma̠tiścha̍ mē suma̠tiścha̍ mē
ya̠jñēna̍ kalpantām ॥ 11॥

vrī̠haya̍ścha mē̠ yavā̍ścha mē̠ māṣā̍ścha mē̠ tilā̍ścha mē
mu̠drāścha̍ mē̠ khalvā̍ścha mē pri̠yaṅga̍vaścha̠ mē-‘ṇa̍vaścha mē
śyā̠mākā̍ścha mē nī̠vārā̍ścha mē gō̠dhūmā̍ścha mē ma̠sūrā̍ścha mē
ya̠jñēna̍ kalpantām ॥ 12॥

aśmā̍ cha mē̠ mṛtti̍kā cha mē gi̠raya̍ścha mē̠ parva̍tāścha mē̠
sika̍tāścha mē̠ vana̠spata̍yaścha mē̠ hira̍ṇya-ñcha̠ mē-‘ya̍ścha mē
śyā̠ma-ñcha̍ mē lō̠ha-ñcha̍ mē̠ sīsaṃ̍ cha mē̠ trapu̍ cha mē
ya̠jñēna̍ kalpantām ॥ 13॥

a̠gniścha̍ ma̠ āpa̍ścha mē vī̠rudha̍ścha ma̠ ōṣa̍dhayaścha mē
kṛṣṭapa̠chyāścha̍ mē-‘kṛṣṭapa̠chyāścha̍ mē grā̠myāścha̍ mē pa̠śava̍ āra̠ṇyāścha̍ mē
vi̠tta-ñcha̍ mē̠ vitti̍ścha mē bhū̠ta-ñcha̍ mē̠ bhūti̍ścha mē
ya̠jñēna̍ kalpantām ॥ 14॥

vasu̍ cha mē vasa̠tiścha̍ mē̠ karma̍ cha mē̠
śakti̍ścha̠ mē-‘rtha̍ścha ma̠ ēma̍ścha ma i̠tyā cha̍ mē̠ gati̍ścha mē
ya̠jñēna̍ kalpantām ॥ 15॥

a̠gniścha̍ ma̠ indra̍ścha mē̠ sōma̍ścha ma̠ indra̍ścha mē
savi̠tā cha̍ ma̠ indra̍ścha mē̠ sara̍svatī cha ma̠ indra̍ścha mē
pū̠ṣā cha̍ ma̠ indra̍ścha mē̠ bṛha̠spati̍ścha ma̠ indra̍ścha mē
ya̠jñēna̍ kalpantām ॥ 16॥

mi̠traścha̍ ma̠ indra̍ścha mē̠ varu̍ṇaścha ma̠ indra̍ścha mē
dhā̠tā cha̍ ma̠ indra̍ścha mē̠ tvaṣṭā̍ cha ma̠ indra̍ścha mē
ma̠ruta̍ścha ma̠ indra̍ścha mē̠ viśvē̍ cha mē dē̠vā indra̍ścha mē
ya̠jñēna̍ kalpantām ॥ 17॥

pṛ̠thi̠vī cha̍ ma̠ indra̍ścha̠ mē-‘ntari̍kṣa-ñcha ma̠ indra̍ścha mē̠
dyauścha̍ ma̠ indra̍ścha mē̠ samā̍ścha ma̠ indra̍ścha mē̠
nakṣa̍trāṇi cha ma̠ indra̍ścha mē̠ diśa̍ścha ma̠ indra̍ścha mē
ya̠jñēna̍ kalpantām ॥ 18॥

a̠gṃśuścha̍ mē ra̠śmiścha̠ mē-‘dā̍bhyaścha̠ mē-‘dhi̍patiścha ma upā̠gṃśuścha̍ mē-‘ntaryā̠maścha̍ ma aindravāya̠vaścha̍ mē
maitrāvaru̠ṇaścha̍ ma āśvi̠naścha̍ mē pratipra̠sthāna̍ścha mē śu̠kraścha̍ mē ma̠nthī cha̍ mē
ya̠jñēna̍ kalpantām ॥ 19॥

ā̠gra̠yā̠ṇaścha̍ mē vaiśvadē̠vaścha̍ mē dhru̠vaścha̍ mē
vaiśvāna̠raścha̍ ma aindrā̠gnaścha̍ mē
ma̠hāvai̍śvadēścha mē marutva̠tīyā̍ścha mē̠ niṣkē̍valyaścha mē
sāvi̠traścha̍ mē sārasva̠taścha̍ mē pātnīva̠taścha̍ mē hāriyōja̠naścha̍ mē
ya̠jñēna̍ kalpantām ॥ 20॥

srucha̍ścha mē chama̠sāścha̍ mē vāya̠vyā̠ni cha mē drōṇakala̠śaścha̍ mē̠
grāvā̍ṇaścha mē-‘dhi̠ṣava̍ṇē cha mē pūta̠bhṛchcha̍ ma ādhava̠nīya̍ścha mē̠
vēdi̍ścha mē ba̠r​hiścha̍ mē-‘vabhṛ̠taścha̍ mē svagākā̠raścha̍ mē
ya̠jñēna̍ kalpantām ॥ 21॥

a̠gniścha̍ mē gha̠rmaścha̍ mē̠-‘rkaścha̍ mē̠ sūrya̍ścha mē
prā̠ṇaścha̍ mē-‘śvamē̠dhaścha̍ mē pṛthi̠vī cha̠ mē-‘di̍tiścha mē̠
diti̍ścha mē̠ dyauścha̍ mē̠-‘ṅgula̍ya̠: śakva̍rayō̠ diśa̍ścha mē
ya̠jñēna̍ kalpantām ॥ 22॥

vra̠ta-ñcha̍ ma ṛ̠tava̍ścha mē̠ tapa̍ścha mē saṃvatsa̠raścha̍ mē
ahōrā̠trē ū̍rvaṣṭhī̠vē bṛ̍hadrathanta̠rē cha̍ mē
ya̠jñēna̍ kalpantām ॥ 23॥

ēkā̍ cha mē ti̠sraścha̍ mē ti̠sraścha̍ mē̠ pañcha̍ cha mē̠ pañcha̍ cha mē
sa̠pta cha̍ mē sa̠pta cha̍ mē̠ nava̍ cha mē̠ nava̍ cha ma̠ ēkā̍daśa cha ma̠ ēkā̍daśa cha mē̠
trayō̍daśa cha mē̠ trayō̍daśa cha mē̠ pañcha̍daśa cha mē̠ pañcha̍daśa cha mē sa̠ptada̍śa cha mē sa̠ptada̍śa cha mē̠
nava̍daśa cha mē̠ nava̍daśa cha ma̠ ēka̍vigṃśatiścha ma̠ ēka̍vigṃśatiścha mē̠ trayō̍vigṃśatiścha mē̠ trayō̍vigṃśatiścha mē̠
pañcha̍vigṃśatiścha mē̠ pañcha̍vigṃśatiścha mē sa̠ptavi̍gṃśatiścha mē ptavi̍gṃśatiścha mē̠
nava̍vigṃśatiścha mē̠ nava̍vigṃśatiścha ma̠ ēka̍trigṃśachcha ma̠ ēka̍trigṃśachcha mē̠ traya̍strigṃśachcha mē
ya̠jñēna̍ kalpantām ॥ 24॥

chata̍sraścha mē̠-‘ṣṭau cha̍ mē̠-‘ṣṭau cha̍ mē̠ dvāda̍śa cha mē̠ dvāda̍śa cha mē̠
ṣōḍa̍śa cha mē̠ ṣōḍa̍śa cha mē vigṃśa̠tiścha̍ mē vigṃśatiścha̍ mē̠
chatu̍rvigṃśatiścha mē̠ chatu̍rvigṃśa̠tiścha̍ mē̠-‘ṣṭāvi̍gṃśatiścha mē̠-‘ṣṭāvi̍gṃśatiścha mē̠
dvātri̍gṃśachcha mē̠ dvātri̍gṃśachcha mē̠ ṣaṭtri̍gṃśachcha mē̠ ṣaṭtri̍gṃśachcha mē
chatvāri̠gṃśachcha̍ mē chatvāri̠gṃśachcha̍ mē̠ chatu̍śchatvārigṃśachcha mē̠ chatu̍śchatvārigṃśachcha mē̠-‘ṣṭācha̍tvārigṃśachcha mē
ya̠jñēna̍ kalpantām ॥ 25॥

tryavi̍ścha mē trya̠vī cha̍ mē ditya̠vāṭ cha̍ mē dityau̠hī cha̍ mē
pañchā̠viścha̍ mē pañchā̠vī cha̍ mē triva̠tsaścha̍ mē triva̠tsā cha̍ mē
turya̠vāṭ cha̍ mē turyau̠hī cha̍ mē
ya̠jñēna̍ kalpantām ॥ 26॥

pa̠ṣṭha̠vāṭ cha̍ mē paṣṭhau̠hī cha̍ ma u̠kṣā cha̍ mē va̠śā cha̍ ma ṛṣa̠bhaścha̍ mē
vē̠hachcha̍ mē-‘na̠ḍvāṃścha̍ mē dhē̠nuścha̍ mē
ya̠jñēna̍ kalpantām ॥ 27॥

vājā̍ya̠ svāhā̍ prasa̠vāya̠ svāhā̍-‘pi̠jāya̠ svāhā̠ krata̍vē̠ svāhā̠ vasa̍vē̠ svāhā̍-‘ha̠rpata̍yē̠ svāhāhnē̍
mu̠gdhāya̠ svāhā̍ mu̠gdhāya̍ vainagṃśi̠nāya̠ svāhā̍ vina̠śina̍ āntyāya̠nāya̠ svāhāntyā̍ya
bhauva̠nāya̠ svāhā̠ bhuva̍nasya̠ pata̍yē̠ svāhādhi̍patayē̠ svāhā̍ pra̠jāpa̍tayē̠ svāhā̍ ।
i̠ya-ntē̠ rāṇmi̠trāya̍ ya̠ntā-‘si̠ yama̍na ū̠rjē tvā̠ vṛṣṭyai̍ tvā pra̠jānāṃ̠ tvādhi̍patyāya ॥ 28॥

āyu̍rya̠jñēna̍ kalpatā-mprā̠ṇō ya̠jñēna̍ kalpatāṃ̠ chakṣu̍rya̠jñēna̍ kalpatā̠gṃśrōtraṃ̍ ya̠jñēna̍ kalpatāṃ̠
vāgya̠jñēna̍ kalpatāṃ̠ manō̍ ya̠jñēna̍ kalpatāmā̠tmā ya̠jñēna̍ kalpatā-mbra̠hmā ya̠jñēna̍ kalpatāṃ̠
jyōti̍rya̠jñēna̍ kalpatāṃ̠ sva̠rya̠jñēna̍ kalpatā-mpṛ̠ṣṭhaṃ ya̠jñēna̍ kalpatāṃ ya̠jñō ya̠jñēna̍ kalpatām ।
stōma̍ścha yaju̍ścha̠ ṛkcha̠ sāma̍ cha bṛ̠hachcha̍ rathanta̠ra-ñcha̍ ।
sva̍rdēvā aganmā̠mṛtā̍ abhūma pra̠jāpa̍tēḥ pra̠jā a̍bhūma̠ vēṭ svāhā̍ ॥ 29॥

iti rudrē-‘ṣṭamō-‘dhyāyaḥ ॥ 8॥

10. śāntyadhyāyaḥ

hari̍ḥ ōṃ
ṛchaṃ̠ vāchaṃ̠ prapa̍dyē̠ manō̠ yaju̠ḥ prapa̍dyē̠ sāma̍ prā̠ṇa-mprapa̍dyē̠ chakṣu̠-śśrōtraṃ̠ prapa̍dyē ।
vāgōja̍-ssa̠haujō̠ mayi̍ prāṇāpā̠nau ॥ 1॥

yanmē̍ Chi̠dra-ñchakṣu̍ṣō̠ hṛda̍yasya̠ mana̍sō̠ vāti̍tṛṇṇaṃ̠ bṛha̠spati̍rmē̠ tadda̍dhātu ।
śa-nnō̍ bhavatu̠ bhuva̍nasya̠ yaspati̍ḥ ॥ 2॥

bhūrbhuva̠-ssva̠ḥ tatsa̍vi̠turvarē̍ṇyaṃ̠ bhargō̍ dē̠vasya̍ dhīmahi ।
dhiyō̠ yō na̍ḥ prachō̠dayā̍t ॥ 3॥

kayā̍ naśchi̠tra ābhu̍vadū̠tī sa̠dāvṛ̍dha̠-ssakhā̍ ।
kayā̠ śachi̍ṣṭhayā vṛ̠tā ॥ 4॥

kastvā̍ sa̠tyō madā̍nāṃ̠ magṃhi̍ṣṭhō matsa̠dandha̍saḥ ।
dṛ̠ḍhā chi̍dā̠rujē̠ vasu̍ ॥ 5॥

a̠bhī ṣu ṇa̠-ssakhī̍nāmavi̠tā ja̍ritṝ̠ṇām ।
śa̠ta-mbha̍vāsyū̠tibhi̍ḥ ॥ 6॥

kayā̠ tva-nna ū̠tyābhi prama̍ndasē vṛṣann ।
kayā̍ stō̠tṛbhya̠ ābha̍ra ॥ 7॥

indrō̠ viśva̍sya rājati ।
śa-nnō̍ astu dvi̠padē̠ śa-ñchatu̍ṣpadē ॥ 8॥

śa-nnō̍ mi̠tra: śaṃ varu̍ṇa̠-śśa-nnō̍ bhavatvarya̠mā ।
śa-nna̠ indrō̠ bṛha̠spati̠-śśa-nnō̠ viṣṇu̍rurukra̠maḥ ॥ 9॥

śa-nnō̠ vāta̍ḥ pavatā̠gṃ śa-nna̍stapatu̠ sūrya̍ḥ ।
śa-nna̠ḥ kani̍kradaddē̠vaḥ pa̠rjanyō̍ a̠bhiva̍r​ṣatu ॥ 10॥

ahā̍ni̠ śa-mbhava̍ntu na̠-śśagṃ rātrī̠ḥ prati̍dhīyatām ।
śa-nna̍ indrā̠gnī bha̍vatā̠mavō̍bhi̠-śśa-nna̠ indrā̠varu̍ṇā rā̠taha̍vyā ।
śa-nna̍ indrāpū̠ṣaṇā̠ vāja̍sātau̠ śamindrā̠sōmā̍ suvi̠tāya̠ śaṃ yōḥ ॥ 11॥

śa-nnō̍ dē̠vīra̠bhiṣṭa̍ya̠ āpō̍ bhavantu pī̠tayē̍ ।
śaṃ yōra̠bhisra̍vantu naḥ ॥ 12॥

syō̠nā pṛ̍thivi nō bhavānṛkṣa̠rā ni̠vēśa̍nī ।
yachChā̍ na̠-śśarma̍ sa̠prathā̍ḥ ॥ 13॥

āpō̠ hi ṣṭhā ma̍yō̠bhuva̠stā na̍ ū̠rjē da̍dhātana ।
ma̠hē raṇā̍ya̠ chakṣa̍sē ॥ 14॥

yō va̍-śśi̠vata̍mō̠ rasa̠stasya̍ bhājayatē̠ha na̍ḥ ।
u̠śa̠tīri̍va mā̠tara̍ḥ ॥ 15॥

tasmā̠ araṃ̍ gamāma vō̠ yasya̠ kṣayā̍ya̠ jinva̍tha ।
āpō̍ ja̠naya̍thā cha naḥ ॥ 16॥

dyau: śānti̍ra̠ntari̍kṣa̠gṃ śānti̍ḥ pṛthi̠vī śānti̠rāpa̠-śśānti̠rōṣa̍dhaya̠-śśānti̍ḥ ।
vana̠spata̍ya̠-śśānti̠rviśvē̍ dē̠vā-śśānti̠rbrahma̠ śānti̠-ssarva̠gṃ śānti̠ḥ
śānti̍rē̠va śānti̠-ssā mā̠ śānti̍rēdhi ॥ 17॥

dṛtē̠ dṛgṃha̍ mā mi̠trasya̍ mā̠ chakṣu̍ṣā̠ sarvā̍ṇi bhū̠tāni̠ samī̍kṣantām ।
mi̠trasyā̠ha-ñchakṣu̍ṣā̠ sarvā̍ṇi bhū̠tāni̠ samī̍kṣē ।
mi̠trasya̠ chakṣu̍ṣā̠ samī̍kṣāmahē ॥ 18॥

dṛtē̠ dṛgṃha̍ mā mi̠trasya̍ mā̠ chakṣu̍ṣā̠ sarvā̍ṇi bhū̠tāni̠ samī̍kṣantām ।
jyōktē̍ sa̠ndṛśi̍ jīvyāsaṃ̠ jyōktē̍ sa̠ndṛśi̍ jīvyāsam ॥ 19॥

nama̍stē̠ hara̍sē śō̠chiṣē̠ nama̍stē astva̠rchiṣē̍ ।
a̠nyā.ṇstē̍ a̠smatta̍pantu hē̠taya̍ḥ pāva̠kō a̠smabhya̍gṃ śi̠vō bha̍va ॥ 20॥

nama̍stē astu vi̠dyutē̠ nama̍stē stanayi̠tnavē̍ ।
nama̍stē bhagavannastu̠ yata̠-ssvaḥ̠ sa̠mīha̍sē ॥ 21॥

yatō̍ yata-ssa̠mīha̍sē̠ tatō̍ nō̠ abha̍ya-ṅkuru ।
śa-nna̍ḥ kuru pra̠jābhyō-‘bha̍ya-nnaḥ pa̠śubhya̍ḥ ॥ 22॥

su̠mi̠tri̠yā na̠ āpa̠ ōṣa̍dhaya-ssantu durmitri̠yāstasmai̍ santu̠yō̠-‘smā-ndvēṣṭi̠ ya-ñcha̍ va̠ya-ndvi̠ṣmaḥ ॥ 23॥

tachchakṣu̍rdē̠vahi̍ta-mpu̠rastā̍chChu̠kramuchcha̍rat ।
paśyē̍ma śa̠rada̍-śśa̠ta-ñjīvē̍ma śa̠rada̍-śśa̠tagṃ śṛṇu̍yāma śa̠rada̍-śśa̠taṃ
prabra̍vāma śa̠rada̍-śśa̠tamadī̍nā-ssyāma śa̠rada̍-śśa̠ta-mbhūya̍ścha śa̠rada̍-śśa̠tāt ॥ 24॥

iti rudrē śāntyadhyāyaḥ ॥ 9॥

11. svasti prārthanā mantrāḥ

hari̍ḥ ōṃ
ōṃ
sva̠sti na̠ indrō̍ vṛ̠ddhaśra̍vāḥ ।
sva̠sti naḥ̍ pū̠ṣā vi̠śvavē̍dāḥ ।
sva̠sti na̠stārkṣyō̠ ari̍ṣṭanēmiḥ ।
sva̠sti nō̠ bṛha̠spati̍rdadhātu ॥ 1॥

ōṃ
paya̍ḥ pṛthi̠vyā-mpaya̠ ōṣa̍dhīṣu̠ payō̍ di̠vyantari̍kṣē̠ payō̍ dhāḥ ।
paya̍svatīḥ pra̠diśa̍-ssantu̠ mahya̍m ॥ 2॥

ōṃ
viṣṇō̍ ra̠rāṭa̍masi̠ viṣṇō̠-śśnaptrē̍ sthō viṣṇō̠-ssyūra̍si̠ viṣṇō̍rdhru̠vō̠-‘si ।
vai̠ṣṇa̠vama̍si̠ viṣṇa̍vē tvā ॥ 3॥

ōṃ
a̠gnirdē̠vatā̠ vātō̍ dē̠vatā̠ sūryō̍ dē̠vatā̍ cha̠ndramā̍ dē̠vatā̠ vasa̍vō dē̠vatā̍
ru̠drā dē̠vatā̍di̠tyā dē̠vatā̍ ma̠rutō̍ dē̠vatā̠ viśvē̍dē̠vā dēvatā̠
bṛha̠spati̍rdē̠vatēndrō̍ dē̠vatā̠ varu̍ṇō dē̠vatā̍ ॥ 4॥

ōṃ
sa̠dyōjā̠ta-mpra̍padyā̠mi̠ sa̠dyōjā̠tāya̠ vai namō̠ namaḥ̍ ।
bha̠vē bha̍vē̠ nāti̍bhavē bhavasva̠ mām ।
bha̠vōdbha̍vāya̠ namaḥ̍ ॥ 5॥

vā̠ma̠dē̠vāya̠ namō̍ jyē̠ṣṭhāya̠ namaḥ̍ śrē̠ṣṭhāya̠ namō̍ ru̠drāya̠ namaḥ̠
kālā̍ya namaḥ̠ kala̍vikaraṇāya̠ namō̠ bala̍vikaraṇāya̠ namō̠
balā̍ya̠ namō̠ bala̍pramathanāya̠ namaḥ̠ sarva̍bhūtadamanāya̠ namō̍
ma̠nōnma̍nāya̠ namaḥ̠ ॥ 6॥

a̠ghōrē̍bhyō-‘tha̠ ghōrē̍bhyō̠ ghōra̠ghōra̍tarēbhyaḥ ।
sa̠rvēbhya-ssarva̠ śa̍rvēbhyō̠ nama̍stē-‘stu ru̠drarū̍pēbhyaḥ ॥ 7॥

(sa̠rvataḥ̍ śarva̠ sarvē̍bhyō̠)

tatpuru̍ṣāya vi̠dmahē̍ mahādē̠vāya̍ dhīmahi ।
tannō̍ rudraḥ prachō̠dayā̍t ॥ 8॥

īśānassarva̍vidyā̠nā̠mīśvara-ssarva̍bhūtā̠nāṃ̠ ।
brahmādhi̍pati̠rbrahma̠ṇō-‘dhi̍pati̠rbrahmā̍ śi̠vō mē̍-‘stu sadāśi̠vōm ॥ 9॥

ōṃ
śi̠vō nāmā̍si̠ svadhi̍tistē pi̠tā nama̍stē astu̠ mā mā̍ higṃsīḥ ।
niva̍rtayāmyāyu̍ṣē̠-‘nnādyā̍ya̠ prajana̍nāya rā̠yaspōṣā̍ya suprajā̠stvāya̍ su̠vīryā̍ya ॥ 10॥

ōṃ
viśvā̍ni dēva savitarduri̠tāni̠ parāsuva ।
yadbha̠dra-ntanna̠ āsuva ॥ 11॥

ōṃ
dyau-śśānti̍ra̠ntari̍kṣa̠gṃ śānti̍ḥ pṛthi̠vī śānti̠rāpa̠-śśānti̠rōṣa̍dhaya̠-śśānti̍ḥ ।
vana̠spata̍ya̠-śśānti̠rviśvē̍dē̠vā-śśānti̠rbrahma̠ śānti̠-ssarva̠gṃ śānti̠-śśānti̍rē̠va śānti̠-ssā mā̠ śānti̍rēdhi ॥ 12॥

ōṃ
sarvēṣāṃ vā ēṣa vēdānāgṃrasō yatsāmaḥ ।
sarvēṣāmēvainamētad vēdānāgṃ rasēnābhiṣiñchati ॥ 13॥

ōṃ
śānti̠-śśānti̠-śśānti̍ḥ ॥
anēna śrī rudrābhiṣēkakarmaṇā śrī bhavānīśaṅkara mahārudrāḥ prīyatā-nna mama ।

iti śrīśuklayajurvēdīya rudrāṣṭādhyāyī samāptā ।
॥ ōṃ sāmba sadāśivārpaṇamastu ॥