Pitru Suktam

(ṛ.1.10.15.1)

udī̍ratā̠mava̍ra̠ utparā̍sa̠ unma̍dhya̠māḥ pi̠tara̍-ssō̠myāsa̍ḥ ।
asu̠ṃ ya ī̠yura̍vṛ̠kā ṛ̍ta̠jñāstē nō̍-‘vantu pi̠tarō̠ havē̍ṣu ॥ 01

i̠da-mpi̠tṛbhyō̠ namō̍ astva̠dya yē pūrvā̍sō̠ ya upa̍rāsa ī̠yuḥ ।
yē pārthi̍vē̠ raja̠syā niṣa̍ttā̠ yē vā̍ nū̠naṃ su̍vṛ̠janā̍su vi̠kṣu ॥ 02

āha-mpi̠tṝnsu̍vi̠datrā̍ṃ avitsi̠ napā̍ta-ñcha vi̠krama̍ṇa-ñcha̠ viṣṇō̍ḥ ।
ba̠r​hi̠ṣadō̠ yē sva̠dhayā̍ su̠tasya̠ bhaja̍nta pi̠tvasta i̠hāga̍miṣṭhāḥ ॥ 03

bar​hi̍ṣadaḥ pitara ū̠tya(1̠̍ )rvāgi̠mā vō̍ ha̠vyā cha̍kṛmā ju̠ṣadhva̍m ।
ta ā ga̠tāva̍sā̠ śanta̍mē̠nāthā̍ na̠-śśaṃ yōra̍ra̠pō da̍dhāta ॥ 04

upa̍hūtāḥ pi̠tara̍-ssō̠myāsō̍ bar​hi̠ṣyē̍ṣu ni̠dhiṣu̍ pri̠yēṣu̍ ।
ta ā ga̍mantu̠ ta i̠ha śru̍va̠ntvadhi̍ bruvantu̠ tē̍-‘vantva̠smān ॥ 05

āchyā̠ jānu̍ dakṣiṇa̠tō ni̠ṣadyē̠maṃ ya̠jñama̠bhi gṛ̍ṇīta̠ viśvē̍ ।
mā hi̍ṃsiṣṭa pitara̠ḥ kēna̍ chinnō̠ yadva̠ āga̍ḥ puru̠ṣatā̠ karā̍ma ॥ 06

āsī̍nāsō aru̠ṇīnā̍mu̠pasthē̍ ra̠yi-ndha̍tta dā̠śuṣē̠ martyā̍ya ।
pu̠trēbhya̍ḥ pitara̠stasya̠ vasva̠ḥ pra ya̍chChata̠ ta i̠hōrja̍-ndadhāta ॥ 07

yē na̠ḥ pūrvē̍ pi̠tara̍-ssō̠myāsō̍-‘nūhi̠rē sō̍mapī̠thaṃ vasi̍ṣṭhāḥ ।
tēbhi̍rya̠ma-ssa̍ṃrarā̠ṇō ha̠vīṃ‍ṣyu̠śannu̠śadbhi̍ḥ pratikā̠mama̍ttu ॥ 08

yē tā̍tṛ̠ṣurdē̍va̠trā jēha̍mānā hōtrā̠vida̠-sstōma̍taṣṭāsō a̠rkaiḥ ।
āgnē̍ yāhi suvi̠datrē̍bhira̠rvāṅ‍ sa̠tyaiḥ ka̠vyaiḥ pi̠tṛbhi̍rgharma̠sadbhi̍ḥ ॥ 09

yē sa̠tyāsō̍ havi̠radō̍ havi̠ṣpā indrē̍ṇa dē̠vai-ssa̠ratha̠-ndadhā̍nāḥ ।
āgnē̍ yāhi sa̠hasra̍-ndēvava̠ndaiḥ parai̠ḥ pūrvai̍ḥ pi̠tṛbhi̍rgharma̠sadbhi̍ḥ ॥ 10

agni̍ṣvāttāḥ pitara̠ ēha ga̍chChata̠ sada̍ssada-ssadata supraṇītayaḥ ।
a̠ttā ha̠vīṃṣi̠ praya̍tāni ba̠r​hiṣyathā̍ ra̠yiṃ sarva̍vīra-ndadhātana ॥ 11

tvama̍gna īḻi̠tō jā̍tavē̠dō-‘vā̍ḍḍha̠vyāni̍ sura̠bhīṇi̍ kṛ̠tvī ।
prādā̍ḥ pi̠tṛbhya̍-ssva̠dhayā̠ tē a̍kṣanna̠ddhi tva-ndē̍va̠ praya̍tā ha̠vīṃṣi̍ ॥ 12

yē chē̠ha pi̠tarō̠ yē cha̠ nēha yāṃ‍ścha̍ vi̠dma yāँ u̍ cha̠ na pra̍vi̠dma ।
tvaṃ vē̍ttha̠ yati̠ tē jā̍tavēda-ssva̠dhābhi̍rya̠jñaṃ sukṛ̍ta-ñjuṣasva ॥ 13

yē a̍gnida̠gdhā yē ana̍gnidagdhā̠ madhyē̍ di̠va-ssva̠dhayā̍ mā̠daya̍ntē ।
tēbhi̍-ssva̠rāḻasu̍nītimē̠tāṃ ya̍thāva̠śa-nta̠nva̍-ṅkalpayasva ॥ 14

ōṃ śānti̠-śśānti̠-śśānti̍ḥ ।