Nataraja Stotram (Patanjali Krutam)

atha charaṇaśṛṅgarahita śrī naṭarāja stōtraṃ

sadañchita-mudañchita nikuñchita padaṃ jhalajhalaṃ-chalita mañju kaṭakam ।
patañjali dṛgañjana-manañjana-machañchalapadaṃ janana bhañjana karam ।
kadambaruchimambaravasaṃ paramamambuda kadamba kaviḍambaka galam
chidambudhi maṇiṃ budha hṛdambuja raviṃ para chidambara naṭaṃ hṛdi bhaja ॥ 1 ॥

haraṃ tripura bhañjana-manantakṛtakaṅkaṇa-makhaṇḍadaya-mantarahitaṃ
viriñchisurasaṃhatipurandhara vichintitapadaṃ taruṇachandramakuṭam ।
paraṃ pada vikhaṇḍitayamaṃ bhasita maṇḍitatanuṃ madanavañchana paraṃ
chirantanamamuṃ praṇavasañchitanidhiṃ para chidambara naṭaṃ hṛdi bhaja ॥ 2 ॥

avantamakhilaṃ jagadabhaṅga guṇatuṅgamamataṃ dhṛtavidhuṃ surasarit-
taraṅga nikurumba dhṛti lampaṭa jaṭaṃ śamanadambhasuharaṃ bhavaharam ।
śivaṃ daśadigantara vijṛmbhitakaraṃ karalasanmṛgaśiśuṃ paśupatiṃ
haraṃ śaśidhanañjayapataṅganayanaṃ para chidambara naṭaṃ hṛdi bhaja ॥ 3 ॥

anantanavaratnavilasatkaṭakakiṅkiṇijhalaṃ jhalajhalaṃ jhalaravaṃ
mukundavidhi hastagatamaddala layadhvanidhimiddhimita nartana padam ।
śakuntaratha barhiratha nandimukha bhṛṅgiriṭisaṅghanikaṭaṃ bhayaharam
sananda sanaka pramukha vandita padaṃ para chidambara naṭaṃ hṛdi bhaja ॥ 4 ॥

anantamahasaṃ tridaśavandya charaṇaṃ muni hṛdantara vasantamamalam
kabandha viyadindvavani gandhavaha vahnimakha bandhuravimañju vapuṣam ।
anantavibhavaṃ trijagadantara maṇiṃ trinayanaṃ tripura khaṇḍana param
sananda muni vandita padaṃ sakaruṇaṃ para chidambara naṭaṃ hṛdi bhaja ॥ 5 ॥

achintyamalivṛnda ruchi bandhuragalaṃ kurita kunda nikurumba dhavalam
mukunda sura vṛnda bala hantṛ kṛta vandana lasantamahikuṇḍala dharam ।
akampamanukampita ratiṃ sujana maṅgalanidhiṃ gajaharaṃ paśupatim
dhanañjaya nutaṃ praṇata rañjanaparaṃ para chidambara naṭaṃ hṛdi bhaja ॥ 6 ॥

paraṃ suravaraṃ puraharaṃ paśupatiṃ janita dantimukha ṣaṇmukhamamuṃ
mṛḍaṃ kanaka piṅgala jaṭaṃ sanaka paṅkaja raviṃ sumanasaṃ himaruchim ।
asaṅghamanasaṃ jaladhi janmagaralaṃ kavalayanta matulaṃ guṇanidhim
sananda varadaṃ śamitamindu vadanaṃ para chidambara naṭaṃ hṛdi bhaja ॥ 7 ॥

ajaṃ kṣitirathaṃ bhujagapuṅgavaguṇaṃ kanaka śṛṅgi dhanuṣaṃ karalasat
kuraṅga pṛthu ṭaṅka paraśuṃ ruchira kuṅkuma ruchiṃ ḍamarukaṃ cha dadhatam ।
mukunda viśikhaṃ namadavandhya phaladaṃ nigama vṛnda turagaṃ nirupamaṃ
sa chaṇḍikamamuṃ jhaṭiti saṃhṛtapuraṃ para chidambara naṭaṃ hṛdi bhaja ॥ 8 ॥

anaṅgaparipanthinamajaṃ kṣiti dhurandharamalaṃ karuṇayantamakhilaṃ
jvalantamanalaṃ dadhatamantakaripuṃ satatamindra suravanditapadam ।
udañchadaravindakula bandhuśata bimbaruchi saṃhati sugandhi vapuṣaṃ
patañjali nutaṃ praṇava pañjara śukaṃ para chidambara naṭaṃ hṛdi bhaja ॥ 9 ॥

iti stavamamuṃ bhujagapuṅgava kṛtaṃ pratidinaṃ paṭhati yaḥ kṛtamukhaḥ
sadaḥ prabhupada dvitayadarśanapadaṃ sulalitaṃ charaṇa śṛṅga rahitam ।
saraḥ prabhava sambhava haritpati haripramukha divyanuta śaṅkarapadaṃ
sa gachChati paraṃ na tu janurjalanidhiṃ paramaduḥkhajanakaṃ duritadam ॥ 10 ॥

iti śrī patañjalimuni praṇītaṃ charaṇaśṛṅgarahita naṭarāja stōtraṃ sampūrṇam ॥