Nasadiya Suktam

(ṛ.10.129)

nāsa̍dāsī̠nnō sadā̍sītta̠dānī̠-nnāsī̠drajō̠ nō vyō̍mā pa̠rō yat ।
kimāva̍rīva̠ḥ kuha̠ kasya̠ śarma̠nnambha̠ḥ kimā̍sī̠dgaha̍na-ṅgabhī̠ram ॥ 1 ॥

na mṛ̠tyurā̍sīda̠mṛta̠-nna tar​hi̠ na rātryā̠ ahna̍ āsītprakē̠taḥ ।
ānī̍davā̠taṃ sva̠dhayā̠ tadēka̠-ntasmā̍ddhā̠nyanna pa̠raḥ ki-ñcha̠nāsa̍ ॥ 2 ॥

tama̍ āsī̠ttama̍sā gū̠ḻhamagrē̍-‘prakē̠taṃ sa̍li̠laṃ sarva̍mā i̠dam ।
tu̠chChyēnā̠bhvapi̍hita̠ṃ yadāsī̠ttapa̍sa̠stanma̍hi̠nājā̍ya̠taika̍m ॥ 3 ॥

kāma̠stadagrē̠ sama̍varta̠tādhi̠ mana̍sō̠ rēta̍ḥ pratha̠maṃ yadāsī̍t ।
sa̠tō bandhu̠masa̍ti̠ nira̍vindan hṛ̠di pra̠tīṣyā̍ ka̠vayō̍ manī̠ṣā ॥ 4 ॥

ti̠ra̠śchīnō̠ vita̍tō ra̠śmirē̍ṣāma̠dha-ssvi̍dā̠sī 3 du̠pari̍ svidāsī 3 t ।
rē̠tō̠dhā ā̍sanmahi̠māna̍ āsantsva̠dhā a̠vastā̠tpraya̍tiḥ pa̠rastā̍t ॥ 5 ॥

kō a̠ddhā vē̍da̠ ka i̠ha pra vō̍cha̠tkuta̠ ājā̍tā̠ kuta̍ i̠yaṃ visṛ̍ṣṭiḥ ।
a̠rvāgdē̠vā a̠sya vi̠sarja̍nē̠nāthā̠ kō vē̍da̠ yata̍ āba̠bhūva̍ ॥ 6 ॥

i̠yaṃ visṛ̍ṣṭi̠ryata̍ āba̠bhūva̠ yadi̍ vā da̠dhē yadi̍ vā̠ na ।
yō a̠syādhya̍kṣaḥ para̠mē vyō̍ma̠ntsō a̠ṅga vē̍da̠ yadi̍ vā̠ na vēda̍ ॥ 7 ॥