Narayaniyam Dashaka 97

traiguṇyādbhinnarūpaṃ bhavati hi bhuvanē hīnamadhyōttamaṃ yat
jñānaṃ śraddhā cha kartā vasatirapi sukhaṃ karma chāhārabhēdāḥ ।
tvatkṣētratvanniṣēvādi tu yadiha punastvatparaṃ tattu sarvaṃ
prāhurnaiguṇyaniṣṭhaṃ tadanubhajanatō maṅkṣu siddhō bhavēyam ॥1॥

tvayyēva nyastachittaḥ sukhamayi vicharan sarvachēṣṭāstvadarthaṃ
tvadbhaktaiḥ sēvyamānānapi charitacharānāśrayan puṇyadēśān ।
dasyau viprē mṛgādiṣvapi cha samamatirmuchyamānāvamāna-
spardhāsūyādidōṣaḥ satatamakhilabhūtēṣu sampūjayē tvām ॥2॥

tvadbhāvō yāvadēṣu sphurati na viśadaṃ tāvadēvaṃ hyupāstiṃ
kurvannaikātmyabōdhē jhaṭiti vikasati tvanmayō’haṃ charēyam ।
tvaddharmasyāsya tāvat kimapi na bhagavan prastutasya praṇāśa-
stasmātsarvātmanaiva pradiśa mama vibhō bhaktimārgaṃ manōjñam ॥3॥

taṃ chainaṃ bhaktiyōgaṃ draḍhayitumayi mē sādhyamārōgyamāyu-
rdiṣṭyā tatrāpi sēvyaṃ tava charaṇamahō bhēṣajāyēva dugdham ।
mārkaṇḍēyō hi pūrvaṃ gaṇakanigaditadvādaśābdāyuruchchaiḥ
sēvitvā vatsaraṃ tvāṃ tava bhaṭanivahairdrāvayāmāsa mṛtyum ॥4॥

mārkaṇḍēyaśchirāyuḥ sa khalu punarapi tvatparaḥ puṣpabhadrā-
tīrē ninyē tapasyannatulasukharatiḥ ṣaṭ tu manvantarāṇi ।
dēvēndraḥ saptamastaṃ surayuvatimarunmanmathairmōhayiṣyan
yōgōṣmapluṣyamāṇairna tu punaraśakattvajjanaṃ nirjayēt kaḥ ॥5॥

prītyā nārāyaṇākhyastvamatha narasakhaḥ prāptavānasya pārśvaṃ
tuṣṭyā tōṣṭūyamānaḥ sa tu vividhavarairlōbhitō nānumēnē ।
draṣṭuṃ māyāṃ tvadīyāṃ kila punaravṛṇōdbhaktitṛptāntarātmā
māyāduḥkhānabhijñastadapi mṛgayatē nūnamāścharyahētōḥ ॥6॥

yātē tvayyāśu vātākulajaladagalattōyapūrṇātighūrṇat-
saptārṇōrāśimagnē jagati sa tu jalē sambhraman varṣakōṭīḥ ।
dīnaḥ praikṣiṣṭa dūrē vaṭadalaśayanaṃ kañchidāścharyabālaṃ
tvāmēva śyāmalāṅgaṃ vadanasarasijanyastapādāṅgulīkam ॥7॥

dṛṣṭvā tvāṃ hṛṣṭarōmā tvaritamupagataḥ spraṣṭukāmō munīndraḥ
śvāsēnāntarniviṣṭaḥ punariha sakalaṃ dṛṣṭavān viṣṭapaugham ।
bhūyō’pi śvāsavātairbahiranupatitō vīkṣitastvatkaṭākṣai-
rmōdādāślēṣṭukāmastvayi pihitatanau svāśramē prāgvadāsīt ॥8॥

gauryā sārdhaṃ tadagrē purabhidatha gatastvatpriyaprēkṣaṇārthī
siddhānēvāsya datvā svayamayamajarāmṛtyutādīn gatō’bhūt ।
ēvaṃ tvatsēvayaiva smararipurapi sa prīyatē yēna tasmā-
nmūrtitrayyātmakastvaṃ nanu sakalaniyantēti suvyaktamāsīt ॥9॥

tryaṃśēsmin satyalōkē vidhiharipurabhinmandirāṇyūrdhvamūrdhvaṃ
tēbhō’pyūrdhvaṃ tu māyāvikṛtivirahitō bhāti vaikuṇṭhalōkaḥ ।
tatra tvaṃ kāraṇāmbhasyapi paśupakulē śuddhasattvaikarūpī
sachchitbrahmādvayātmā pavanapurapatē pāhi māṃ sarvarōgāt ॥10॥