Narayaniyam Dashaka 93

bandhusnēhaṃ vijahyāṃ tava hi karuṇayā tvayyupāvēśitātmā
sarvaṃ tyaktvā charēyaṃ sakalamapi jagadvīkṣya māyāvilāsam ।
nānātvādbhrāntijanyāt sati khalu guṇadōṣāvabōdhē vidhirvā
vyāsēdhō vā kathaṃ tau tvayi nihitamatērvītavaiṣamyabuddhēḥ ॥1॥

kṣuttṛṣṇālōpamātrē satatakṛtadhiyō jantavaḥ santyanantā-
stēbhyō vijñānavattvāt puruṣa iha varastajjanirdurlabhaiva ।
tatrāpyātmātmanaḥ syātsuhṛdapi cha ripuryastvayi nyastachētā-
stāpōchChittērupāyaṃ smarati sa hi suhṛt svātmavairī tatō’nyaḥ ॥2॥

tvatkāruṇyē pravṛttē ka iva nahi gururlōkavṛttē’pi bhūman
sarvākrāntāpi bhūmirnahi chalati tatassatkṣamāṃ śikṣayēyam ।
gṛhṇīyāmīśa tattadviṣayaparichayē’pyaprasaktiṃ samīrāt
vyāptatvañchātmanō mē gaganaguruvaśādbhātu nirlēpatā cha ॥3

svachChaḥ syāṃ pāvanō’haṃ madhura udakavadvahnivanmā sma gṛhṇāṃ
sarvānnīnō’pi dōṣaṃ taruṣu tamiva māṃ sarvabhūtēṣvavēyām ।
puṣṭirnaṣṭiḥ kalānāṃ śaśina iva tanōrnātmanō’stīti vidyāṃ
tōyādivyastamārtāṇḍavadapi cha tanuṣvēkatāṃ tvatprasādāt ॥4॥

snēhādvyādhāttaputrapraṇayamṛtakapōtāyitō mā sma bhūvaṃ
prāptaṃ prāśnan sahēya kṣudhamapi śayuvat sindhuvatsyāmagādhaḥ ।
mā paptaṃ yōṣidādau śikhini śalabhavat bhṛṅgavatsārabhāgī
bhūyāsaṃ kintu tadvaddhanachayanavaśānmāhamīśa praṇēśam ॥5॥

mā baddhyāsaṃ taruṇyā gaja iva vaśayā nārjayēyaṃ dhanaughaṃ
hartānyastaṃ hi mādhvīhara iva mṛgavanmā muhaṃ grāmyagītaiḥ ।
nātyāsajjēya bhōjyē jhaṣa iva baliśē piṅgalāvannirāśaḥ
supyāṃ bhartavyayōgāt kurara iva vibhō sāmiṣō’nyairna hanyai ॥6॥

vartēya tyaktamānaḥ sukhamatiśiśuvannissahāyaścharēyaṃ
kanyāyā ēkaśēṣō valaya iva vibhō varjitānyōnyaghōṣaḥ ।
tvachchittō nāvabudhyai paramiṣukṛdiva kṣmābhṛdāyānaghōṣaṃ
gēhēṣvanyapraṇītēṣvahiriva nivasānyundurōrmandirēṣu ॥7॥

tvayyēva tvatkṛtaṃ tvaṃ kṣapayasi jagadityūrṇanābhāt pratīyāṃ
tvachchintā tvatsvarūpaṃ kuruta iti dṛḍhaṃ śikṣayē pēśakārāt ।
viḍbhasmātmā cha dēhō bhavati guruvarō yō vivēkaṃ viraktiṃ
dhattē sañchintyamānō mama tu bahurujāpīḍitō’yaṃ viśēṣāt ॥8॥

hī hī mē dēhamōhaṃ tyaja pavanapurādhīśa yatprēmahētō-
rgēhē vittē kalatrādiṣu cha vivaśitāstvatpadaṃ vismaranti ।
sō’yaṃ vahnēśśunō vā paramiha parataḥ sāmpratañchākṣikarṇa-
tvagjihvādyā vikarṣantyavaśamata itaḥ kō’pi na tvatpadābjē ॥9॥

durvārō dēhamōhō yadi punaradhunā tarhi niśśēṣarōgān
hṛtvā bhaktiṃ draḍhiṣṭhāṃ kuru tava padapaṅkēruhē paṅkajākṣa ।
nūnaṃ nānābhavāntē samadhigatamamuṃ muktidaṃ vipradēhaṃ
kṣudrē hā hanta mā mā kṣipa viṣayarasē pāhi māṃ mārutēśa ॥10॥