Narayaniyam Dashaka 92

vēdaissarvāṇi karmāṇyaphalaparatayā varṇitānīti budhvā
tāni tvayyarpitānyēva hi samanucharan yāni naiṣkarmyamīśa ।
mā bhūdvēdairniṣiddhē kuhachidapi manaḥkarmavāchāṃ pravṛtti-
rdurvarjaṃ chēdavāptaṃ tadapi khalu bhavatyarpayē chitprakāśē ॥1॥

yastvanyaḥ karmayōgastava bhajanamayastatra chābhīṣṭamūrtiṃ
hṛdyāṃ sattvaikarūpāṃ dṛṣadi hṛdi mṛdi kvāpi vā bhāvayitvā ।
puṣpairgandhairnivēdyairapi cha virachitaiḥ śaktitō bhaktipūtai-
rnityaṃ varyāṃ saparyāṃ vidadhadayi vibhō tvatprasādaṃ bhajēyam ॥2॥

strīśūdrāstvatkathādiśravaṇavirahitā āsatāṃ tē dayārhā-
stvatpādāsannayātān dvijakulajanuṣō hanta śōchāmyaśāntān ।
vṛttyarthaṃ tē yajantō bahukathitamapi tvāmanākarṇayantō
dṛptā vidyābhijātyaiḥ kimu na vidadhatē tādṛśaṃ mā kṛthā mām ॥3॥

pāpō’yaṃ kṛṣṇarāmētyabhilapati nijaṃ gūhituṃ duścharitraṃ
nirlajjasyāsya vāchā bahutarakathanīyāni mē vighnitāni ।
bhrātā mē vandhyaśīlō bhajati kila sadā viṣṇumitthaṃ budhāṃstē
nindantyuchchairhasanti tvayi nihitamatīṃstādṛśaṃ mā kṛthā mām ॥4॥

śvētachChāyaṃ kṛtē tvāṃ munivaravapuṣaṃ prīṇayantē tapōbhi-
strētāyāṃ sruksruvādyaṅkitamaruṇatanuṃ yajñarūpaṃ yajantē ।
sēvantē tantramārgairvilasadarigadaṃ dvāparē śyāmalāṅgaṃ
nīlaṃ saṅkīrtanādyairiha kalisamayē mānuṣāstvāṃ bhajantē ॥5॥

sō’yaṃ kālēyakālō jayati muraripō yatra saṅkīrtanādyai-
rniryatnairēva mārgairakhilada na chirāttvatprasādaṃ bhajantē ।
jātāstrētākṛtādāvapi hi kila kalau sambhavaṃ kāmayantē
daivāttatraiva jātān viṣayaviṣarasairmā vibhō vañchayāsmān ॥6॥

bhaktāstāvatkalau syurdramilabhuvi tatō bhūriśastatra chōchchai:
kāvērīṃ tāmraparṇīmanu kila kṛtamālāṃ cha puṇyāṃ pratīchīm ।
hā māmapyētadantarbhavamapi cha vibhō kiñchidañchadrasaṃ tva-
yyāśāpāśairnibadhya bhramaya na bhagavan pūraya tvanniṣēvām ॥7॥

dṛṣṭvā dharmadruhaṃ taṃ kalimapakaruṇaṃ prāṅmahīkṣit parīkṣit
hantuṃ vyākṛṣṭakhaḍgō’pi na vinihatavān sāravēdī guṇāṃśāt ।
tvatsēvādyāśu siddhyēdasadiha na tathā tvatparē chaiṣa bhīru-
ryattu prāgēva rōgādibhirapaharatē tatra hā śikṣayainam ॥8॥

gaṅgā gītā cha gāyatryapi cha tulasikā gōpikāchandanaṃ tat
sālagrāmābhipūjā parapuruṣa tathaikādaśī nāmavarṇāḥ ।
ētānyaṣṭāpyayatnānyapi kalisamayē tvatprasādapravṛddhyā
kṣipraṃ muktipradānītyabhidadhuḥ ṛṣayastēṣu māṃ sajjayēthāḥ ॥9॥

dēvarṣīṇāṃ pitṛṇāmapi na punaḥ ṛṇī kiṅkarō vā sa bhūman ।
yō’sau sarvātmanā tvāṃ śaraṇamupagatassarvakṛtyāni hitvā ।
tasyōtpannaṃ vikarmāpyakhilamapanudasyēva chittasthitastvaṃ
tanmē pāpōtthatāpān pavanapurapatē rundhi bhaktiṃ praṇīyāḥ ॥10॥